jueves, 19 de abril de 2018

< De co casa a Cuadonga [5]: Breceña - Sietes >

                   < De co casa a Cuadonga [5] : Breceña - Sietes >

                         ¡¡ A la cata un  culete renacentista !!

¡Curiao colos de Breceña!.  Que son xente encantadoro.
(Faites attention aux Brecegniens. N'alcordanza de Dalia)
                                        <  Dicen que los de Breceña
                                          son xente trabayadoro
                                          nada se-ys pon per delantre
                                          a esta xente entamadoro ,
                                          ¿sedrá la lleche les vaques
                                          o seique la Sidra Coro?.
                                            Preguntarélo en Piñera
                                          qu'en chigre sábese to-o. >

     En Breceña quedáremos el día caberu tres un paseín dende Coru. Col tastu la sidra nel gargüelu  aportamos a un pueblu que lleva nel so ADN esi arume, como canta esta coplina qu'atopamos nel llibru Xurde:
                                       << Pa les fabes Samartín
                                             y el Carme de Santoxenia,
                                            pa facer cares Benitu
                                            y pa la sidre Breceña >>

La primavera bilta en Breceña:
Los mazanos echen flor,
la xente tresna la güerta.
       Agora vamos partir d'esta <Tierra de campesinos> p'averanos a la <revolución renacentista> de 7s.
       Paez qu'entamamos bien el día, pos un migayu antes d'arribar al pueblu sal un rebecu a saludanos. (Cuando digo rebecu pue ser cualisquier animal con cuernucos mayor qu'un caracol y más pequeñu qu'un güe. Perdona, Fredo).  Asitiáu metanes la carretera (AS-332) pega un blincu de los demonios cuando siente'l coche, ruíu raru pa él, y entaina a esmucir pela viesca faciendo zis-zás. ¡Qué pena!. Nun mos dio tiempu a sacar la cámara...
        El rebecu y el sol, que yá anuncia calorín, son badagüeyos de bon día. Aparcamos al cabu'l Barriu del Cuetu, namás pasar el cruce pa Ceyanes, xusto delantre lo que fuere'l  <Salón de Peruyera>, célebre por ser el baille onde tantos mozos y moces de la redolada aniciaren los amores. Cuatro pasos más p'alantre dexamos la nueva carretera xeneral y empobinamos a mandrecha dica la plazoleta'l Chigre, onde tamién tán la Ilesia y l'antigüa "Casa Colmao", otru baille fasmosu que fuere... ¡Anda que nun-yos gusta la folixa a los de Breceña!... Vese que la sidra ¡ye más bono  que la lleche!, que yá ye dicir ....
     Nel Bar de Piñera pues abastecete de cosuques que te puen facer falta nun momentu determináu pos ye tamién una "tienda de pequeñes necesidaes": lates de conserva, embutíu, especies, chuches .... Enantes yera una politienda con toles de la llei, un supermercáu onde alcontrabes pa comer, beber, vistir, calzar o culisquier aperiu de llabranza. Anguaño ta en procesu d'ampliación y quieren poner albergue, dao que'l que había en pueblu peslló. ¡SUERTE!.

La Plazoleta Breceña:
Ilesia, horru y Colmao.
    Sentamos un momentín nel bancu qu'hai delantre' cabildru la ilesia de San Pedru a calzar les polaines; hai que prevenir qu'estos díes (bueno, estos meses) tien llovío a fargataes y nun sabemos con qué se pue ún alcontrar... Tampoco ye que la ilesia sía la <revolución francesa> - pa enriba ta embutía ente les cases -  pero fai les llabores como les más guapes; amás tien una torre cuadrada, bastante alta, que guía los pelegrinos del Camín. Dende un horru antigüu, col solhorru zarráu, echamos una mirada al entornu y darréu vamos baxando a manzorga pela vieya carreterina de Sietes. Hai de too: cases remocicaes y cases clamiando una igua pero'l garapiellu sigui calteniendo'l tastu del pasáu.

Saliendo del pueblu
camín de Sietes (7s)
       Abandonamos el cogollu'l pueblu y empatamos cola carretera nueva onde un cartelu t'invita a xubir al Barriu del Pandu, pero nun ye'l día. Siguimos baxando camín del Barriu La Infiesta onde s'acolumbra la poderosa escuela. No fondero destaca una quintana mui afatada, col horru n'antoxana, que se tien tresformao en xardín; ¡qué guapo!.
Tamos delantre la Capiella d'Ánimes, por fin remocicada dafechu, onde echamos la plegaria de siempres. En frente destaca un cartelu pergrande amosando l'itinerariu del Camín de Cuadonga puestu por la Asociación Cultural "El Garrapiellu".

Capiella d'Ánimes.
(-Xubi per onde la Escuela)
   
             Pero lo qu'apodera'l pandu ye'l <roxo caldera> de la maxestuosa Escuela. Dos pisos tien esta construcción rectangular de principios del XIX. Llevantada pol Conceyu en 1919, col sudu económicu de la vecindá, terminó por convertir en Casona-Albergue tres pasar dellos años ensin llabor mandáu por mor de les concentraciones escolares. Angüaño ye <Centru Social>, la cabera utilidá de cuasi toles escueles rurales. Nun ta mal.

L'antigua Escuela, llueu albergue.
Anguaño Centru Saocial (AA.VV)
 

      Nel prau axacente una señora trata de tresnar el xardín de l'antoxana.
    - Nun acaba de biltar la primavera, ¿eh?
    - Vaya iviernu que llevamos... Frío y llover, llover y frío. ¿Ves qué atrasao lo tengo too?... Nin xardín nin güerta, nun tengo manera de semar nada.
    - Nun faltará muncho; cuando vengan tres díes de sol siguíos vamos tar toos clamiando del llumbagu. En Xixón tamos igual, como ye de suponer. Esto que-y digo... ¿ye verdá qu'en Breceña hebo una fábrica de quesos?
    - Eso se camienta, pero yo nun la conocí.
    - Tenía que ser guapo, ¿eh?, si la tuvieren agora...
    - Yá te digo, cola falta trabayu qu'hai... Probes mozos.
    - ¿Oiga, pa Sietes ye per ehí?
   - Sí, a manzorga, per esa cuestina; per esta otra vas pal Barriu Ñovales.
   - ¿Ye too carretera asfalcada hasta Sietes?
   - Ehí p'arriba das con un cruce. Si tires de frente vas pela carretera xeneral y si tuerces a mandrecha llegues a Busllaz, lluéu...  ¿Hasta ónde quies llegar?
   - Namás a Sietes, lluéu doi la vuelta. Voi faciendo'l Camín de Cuadonga a cachinos.
   - Mui guapo; qué prisa hai, el casu ye entretenese.
   - Bueno, pos cuando llegue al biforcu, decido. Que tenga un bon día, señora, güei hai qu'aprovechar esti caldiu solín.
   - Ta lluéu, que t'afayes nel camín.   
       Mientres paso'l Barriu la Infiesta voi camentando na fábrica de quesos....


(Semeya del blog:<Castiellu de la Marina>
Tamién pues vela nel llibru:
<Villaviciosa y su progreso, 1928>)
        [[El breceñanu Don Constantino Riera foi'l creador de la fábrica  "Quesos de Breceña". Camentaba que yera conveniente aprovechar la riqueza ganadera ellí onde la hubiera, y foi lo que fizo. Les vaques y oveyes de Breceña dieron un quesu y una mantega perapreciao pol so tastu y les sos cualidaes nutritives. 


Los sos fíos Belarmino y Lauriano sacaron la fábrica de casa pa llevala a Careñes y darréu a Venta les Ranes, col nome "La Corona", pa facilitar la so esportación  y venta. Dellos años depués Belarmino independiza y Lauriano (el fundador del Teatru Riera de Villaviciosa) llega a alcuerdos con Nestlé. Depués Belarmino tamién funda una sidrera en Venta Les Ranes, onde taba la Teyera.


(Semeya d'Internet)
Don Constantino tamién ye'l fundador de la sidrera "Escanciador" col so fíu Manuel, que pa to valía esti home. 
Otru fíu de don Constatino, Francisco, tamién independizó del pá y fundó una fabriquina quesos n' Herrera de Pisuerga y otra n'Avilés, "Granja la Luz", que lluéu vendió a Nestlé. 
Entá queda otru hermanu, Maximino, que  tres independizar del pá fundó la quesera "El Molineru" que más tarde vendió a Nestlé, como non, pero quedó col repartu y terminó por fundar LAGISA (Lácteos Gijón S.A.). ¡Vaya saga emprendedores!
Esto ye lo se llama, Don Costantino, "llevar los fíos pol ramal", ¡quién pudiera!]]

       Esin dame cuenta yá toi nel biforcu; nin m'enteré de la cuestuca que vengo de xubir.
Ta nidio: De frente, pela xeneral, a Sietes y a mandrecha una carreterina que t'empobina a Busllaz [500 m], que ye per onde te manden les garrapielles. ¡A obedecer!.

Abebentaderu Busllaz.
Pa Xanes, cuélebres y trasgos en xeneral.

      Da gustu caminar per esti sele oleax a la solombra la viesca, plagada d'ocalitos. Na comba'l camín una riega desemboca nun abebentaderu y pocos pasos más p'allá, tres pasar una casa abandonada,  damos con otru. Peles entenes que me dexa l'arbolíu voi viendo'l pueblu y dellos otros más esparcíos pela montaña.
    - Oi, tu; agradezse... Sientes como abellugu porque un alma nun alcuentres y nada nun me presta andar solu per estos andurriales. La parienta nun acaba curar del catarru por más comedies que-y da'l mélicu.
     - ¿Ves?... Si tomares ferviatos como antiguamente: romeru, oriéganu, yerbaluisa ..... Pero faes casu d'estos cativinos que pretenden curate namás con mirar pa máquines y papeles... A ver, ¿ miróte a la cara como facía Granda?... ¿Cómo va saber lo que tienes?.

Entrando en Busllaz.
 Per detrás de la Capiella , al fondu, tires pa 7s. 
     Pa entrar en Busllaz tengo que xubir un repechu que me dexa nuna encruciyada, a la entrada'l pueblu. Son les once menos cuartu (10:45) . ¡Vaya andariegu!, tres cuartos d'hora p'andar un kilómetro.  Fisgo un poco y busco les garrapielles.
    - ¡A manzorga!.
 Delante mío tengo una capiellina per antigua de la que nunca nun sintiere falar...
   - ¡Voi fisgar!
    Xubo la media ocena peldaños de piedra rústico y quedo nel pequeñu estragal que d'otramiente ye la mitá de la ilesia. Meto les ñaples pela rexa y paezme ver que ta dedicada a San Antón. La cadarma'l techu ye de madera y les cuatro columnes que sofiten aquel aspirante a adriu tamién; siéntome como indefensu y baxo corriendo los seis peldaños....
    - Pero home, ho, cuantos años llevará esto equí... Amás vese que ta atendío.  Debe ser la soledá la que me tien amedranáu... ¡Vaya gallu que toi fechu!

Busllaz
      Busllaz ye un pueblín (315 m/snm) con sabor a antiguo poles sos numberoses cases-corredor y la bayura d'horros, dalgunos con detalles al estilu Villaviciosa. Busllaz ye'l final de la "Ruta los molinos del Profundu" (PR AS-137) qu'entamare en Valbúcar, como yá sabemos, pos tenemos pasao per ella. Esti pueblu tien tamién una Casona-Palaciu del XVIII  y otra ilesia dedicada a Santa Mª la Real.

    Alcuentro la garrapiella mirando p'arriba, per una caleya ensin .... bueno, virxe: prau y llábana. A lo primero mui guapo, ta pindio pero sequino, l'agua nun para. Pero al llegar a una llana que llenda con una plantación de mazanos: barru, llamuerga, charcos y ... ¡A saltar al prau!. Ta llarao de güelgues del xabaril. Unes espineres floríes devuélvenme la gayola por un instante y aprovecho pa facer unes semeyes.

Espinera blanca
(Crataegus Monogyna)
        Ta mui solitario, tengo mieu enquivocame de camín y sigo por intuición el de mandrecha; busco les garrapielles como llocu y voi alcontrándoles, a dios gracies. Llevo andando desde Busllaz más de media hora; fáiseme abegoso.
      Toi altu; nes entenes de la viesca veo un pueblu allargáu a manzorga, ¡vaya grande!. Por fin el camín enancha y siento'l ruíu de les chocarites.
     - ¡Vaques!, por fín nun toi solu.
Enllano. Veo como una nave pintada n'azul y un vecín que s'aproxima con un carretillu cuchu.
Nel Barriu d'El Campón.
    - Bonos díes, señor; ¿pue dicime ande toi?
    - Tas usté en Sietes. Esti ye'l Barriu d'El Campón.
    - ¡ Gracies a dios! Nun taba seguru. Conozo la entrada a Sietes viniendo pela carrtera pero esta....
    - ¿Entós cómo parasti equí?
     - Vengo de Breceña, faciendo'l Camín de Cuadonga, ya una indicación al salir del pueblu empobinóme a Busllaz. Lluéu too caleya arriba... Nun sabía lo que podía alcontrar pel camín...
    - Nun hai pueblu dengún pero la xubida ye un poco abegosa pol barru, ¿eh?
    - Yá te digo, tuvi que saltar a un prau...
    - ¿Pienses llegar güei a Cuadonga?
    - Que va, ho. Voi poco a poco, a cachinos. En cuantes visite'l pueblu yá doi la vuelta.
    - ¿D'ónde vienes?
    - Vengo de Xixón, pero téngolo fecho en munchos díes. Llevo andao unos 30 km. oficiales.
    - Más los de la vuelta, claro.
     - Nidio.
     - ¿Qué pueblu ye esi que tenemos ehí detrás, a manzorga?
    - Eso ye Piedrafita, un barriu de Sietes - dizme'l señor averándose a un claru pa poder acolumbralu. Un poco más p'allá tienes l'Área Recreativa de Campa LLuexe  y los montes aquellos son los de La Soma.


Sietes: horros, paneres y corredores.
          El casu ye que tuviemos calechando un ratu buenu. Los dos tamos xubilaos y yá sabéis qu'últimamente andamos mui sublevaos. Esto del 0,25 echónos otra vuelta a la cai; somos una xeneración de pitu caleya. A Rajoy y la del máster (Cifuentes) deben ruxi-yos los oyidos cosa fina.
    - El cachorru del C's ye del mesmu palu.
    - ¿Pienses que Pedrito pue arreglalo?
   - ¡Quiá!, ta más verde qu'un prau. Nun hai políticos socialistes como los de antes. Nun sé por qué xente como Borrel o Jáuregui nun vuelven al ruedu... Hasta Felipe y Guerra echo de menos.
    - Bueno, esperemos que nun haya que baxalo.
    - ¿Baxar más dalgunes pensiones?...
      El que tien que baxar la cuesta p'algamar al cogollu'l pueblu soi yo. Ta llarao de casines, talo la de Domitila, como reza nun cartelu.

Santumederu de Sietes, cara Norte. 
Nesi cabildru dieron los guajes escuela
enantes de construyir la oficial;
nun m'estraña que munchos colaren pa l'Habana.

         Yá veo la imponente ilesia. Tengo sentío falar d'ella. Ruxe enforma la so portada renacentista pero lo que me sorpriende al vela dende'l cuetu ye la so fortaleza con esos contrafuertes tan altos qu'arrodien la nave ya esa torre-campanariu desafiando al Sueve.
   -¡ Madre, qué ilesia tan grande pa un pueblu tan pequeñu!
         Desemboco na plazoletina aparcamientu que da pal norte sol abellugu d'un texu centenariu, símbolu de conceyos ancestrales. Arródiola mientres voi faciendo semeyes. Al llegar a la portada principal tomo bona cuenta los detalles pero quedo embebecíu al contemplar el Portalín: el Neñu en brazos de so Madre, énte'l miramientu de so Padre y l'abellugu la Mula y el Güe asina como una retafila d'anxelinos.

Santumederu sur. 
      [[ La ilesia  Santumederu de Sietes foi llevantada nel 1555 por encargu de don Fernando Suárez del Canto, provisor de la Catedral de San Salvador d'Uviéu, que metió nella bona parte del so padremoñu personal. Quería dexar  les güelgues de los Del Cantu reflexaes eternamente na piedra mariñana d'un panteón familiar. Trexo pa ello los Maestros de prestixu que taben rematando la catedral de San Salvador, n'Uviéu. La familia Del Canto, colos raigaños en Sietes, pertenecía a la cabezalera burguesía rural de la dómina.
      Yá tamos a mediaos del XVI, les tendencies medievales van camudando.... Yá nun ye solo Dios, agora piénsase tamién nel home. Nesti mundu tamos de pasu pero... ¿por qué mientres vivimos  nun vamos poder esfrutar de toles maravíes que la creación nos brinda? ... ¿Pa qué les creó Dios?...

El cogollu de Sietes
     Llegó'l Renacimientu, y esto va notase nesta catedralina de Sietes. ¿Ves lo humanizaos que tán los eternos Sol y LLuna del frontispiciu?. ¿Y la candial imax del Dios creador bendiciendo la Tierra?
     La renacentista iglesia de Santu Mederu (San Emeterio), nun principiu embaxo la Tresfiguración de Nª Señora y darréu a Santumederu por coincidir esi día'l mercáu,  presenta una nave rectangular que remata nuna cabecera cuadrada ya una torre-campanariu a los pies con un cabildru que da pal norte.
     La nave ta acuarteronada en tres tramos separaos por tres arcos de mediu puntu carpanel que separa de la cabecera por un arcu toral de mediu puntu.
     L'alta bóveda - sambla una catedral - ye de crucería colos nervios descansando en ménsules sacante'l tramu la tribuna que ye adinteláu y estrelláu na capiella. Ente los nervios del cielu celebramos una fiesta renacentista llabrada en piedra: Preside'l Pantocrator arrodiáu polos por ánxeles y el restu la creación: L'Árbol de la vida, la Muyer-Sierpe, el Sol, la Lluna, les Estrelles, páxaros y culiebres y hasta'l Cuébre volador, tan célebre na mitoloxía asturiana. Nun falten tampoco los grifos renacentistes decoraos con animales que recuerden los evanxelistes, como'l toro aláu o'l ferre  amás de símbolos del Calvariu: la cruz, la escalera, el martiellu, les tenaces....

Célebre portada
Renacentista.
     Preside l'altar un retablu de madera, de corte renacentista, que lleva nel mediu una Piedá n'actitú perhumana.  Illumina l'interior per aciu d'unes ventanes de mediu puntu, abocinaes, asitiaes al sur.
El Portalín

     Si esto yera un mausoléu nun puen faltar los sarcófagos como'l que caltién los restos del fundador y con una inscripción funeraria de 1607.
       La llamatible decoración d'esta ilesia amuesa na cara sur, la más vistosa y soleyera, que mira pa la carretera xeneral. La portada principal, de grandes doveles conformando un arcu de mediu puntu, ta enmarcada por dos columnes de fuste estriáu y capiteles vexetales que descansen sobro'l  basamentu. Como protexendo l'arcu, a modo guardapolvu, un entablamentu decoráu  ente dos cornises  que remata nun frontón triangular representando'l Portalín: Xesús, María, Xosé, la Mula y el Güe. Les enxutes, ente cornisa y doveles, tán ornaes col sol, la lluna y les estrelles, símbolos de la eternidá, como pretendía'l constructor. Presidiendo esta ayalga terrenal, un poco eleváu, Dios creador n'humana actitú.   
       ¿Qué más quies pa una aldeina como Sietes, onde Dios perdió'l zapatu ? (Qu'alcontraren los Del Cantu, por cierto, tresformándolu nuna de les poques muestres renacentistes que n'Asturies habemos).
 
Casa Prida
¿Faite falta gasolina?
         Restolo pel pueblu. Lo más llamatible ye la bayura d'horros qu'hai. Dalgunos sirven de cochera pero toos tán llaraos d'aperios, la mayoría obsoletos. Reparamos nes ruedes en H carauterístiques de la zona. Siguimos sacando semeyes buscando ángulos imposibles pa retratar los corredores de les cases, semaes a voleú na fastera la llomba. Dacuando siéntome caleyar  pente cais medievales ya otres veces rurales.  Cuando aportamos al chigre, "Bar Prida", son cerca les doce y media (12:30). Entramos al tiempu que la Cartera. Nun hai naide.  Mientres tomábemos un piscolabis y echábemos una güeyada al Comerciu díbemos falucando col chigreru, que nun paraba de traxinar.
      - Sí, ho; equí tamién ofrecemos posada - retruca mientres tresna una mesa del comedor. Quédense munchos grupos d'escursionistes que faen el Camín de Cuadonga en dellos díes. Tamién hai xente que vien a xintar namás, sobremanera les fiestes y domingos, talo que güei.

<Casasietes>, a la entrada'l pueblu
si vienes pela carretera.
   La próxima estación ye Anayo, a 5 Km pela  xeneral (AS-332). Pero nun ye hora, quedé de comer en casa, igual vienen los guajes. Fixi la vuelta a Breceña pela carretera, yá tuvo bien de folleros y soledá pa gúei; polo menos equí veo coches. Depués de pasar <Casasietes> alcontré el célebre cementeriu, que tien ganao'l premiu al meyor curiáu. Delantre tien un aparcamientu mui afayaizu.
     Poco más alantre una carreterina periguada pue llevate a Piedrafita, ún de los tres barrios de Samartín del Vallés (conceyu Villaviciosa), xunto con Sietes y el propiu Samartín .
    Al llegar a la Infiesta eché la cabera mirada a la escuela, ¡cómo me presta!.                                             
                                             *************************************

-¡Guau, guau! ¿Qué traes pa comer, rapaza?
- Tortiella, xamón y llambionaes asgaya.
 - Entós ponme mesa, mantel y cuyara
que tengo floxera y entá nun toi estragada.
   ESTIMANCES:
. N'alcordanza de Madre y de Dalia, de les que tanto aprendimos de la vida.
. Blog <Castiellu de la Marina>, al rodiu Villaviciosa.
. Artículu lne. <<Todas las ventanas de Sietes> de Xuan Carlos Busto.
. A Xurde Morán y l'Asociación cultural "El Garrapiellu", pol so enfotu col Camín y l'ayuda que nos presten a los romeros poco avezaos, como yo.
. A l'Academia la LLingua, J.LL. Arias y L.A. Prieto, S. Vicente y R. d'Andrés, fontes onde abebento de cotino.

¡¡¡ El SOL !!!
(Tuvi que venir a 7s
 p'alcordame qu'existía)
. A los vecinos de los pueblos, que me saquen de tolos enguedeyos asina como al perru Canelo que tevo a bien compartir xinta en Perviyao.
. A los collacios y parienta que me faen compaña nesta travesía.
. A la Wikipedia, compañera de viaxe, compañera del alma.
. Al Camín en sí, nel que tanto aprendemos y tantes allegríes nos da.
. Al Sol, esi bien tan preciáu, que tevo'l detalle d'amosar, ¡por fin!, les ñaples quedando reflexáu na portada de Santumederu. 

No hay comentarios:

Publicar un comentario