(26 Km)
Camín Primitivu <Uviéu-Compostela>: ¡A mediu Camín!
Nel tránsitu d'Asturies a Galicia
 |
| Pelegrin@s visitando'l Chao Samartín Abenayá, abenayá , dellos grupos humanos que conocimos como celtes arribaron a estes tierres y nun fueron a colar ... Llevantaron pali-pali un castru que ni un terremotu foi a desaniciar dafechu, otros construyeron esti pueblu. Nosotros vinimos a conocer la hestoria , ¿averámonos?... |
En cualquier casu dao l'enfotu que teníemos en visitar el Castru del Chao, magar les recientes torgues físiques (la pata ...), decidímos tomalo con calma y dividir la etapa en tres estayes :
Grandas-Chao, Chao-Altu O Acevo y O Acevo-Fonsagrada, a ver qué pasa ...
< Grandas de Salime - Castru d'El Chao Samartín >
(6 km)
 |
| La cosa entama bien, cuestarriba, como tien que ser. ¡Andando! |
 |
| Taxi Bernardo al algame de la mano. |
Enantes de salir camentamos en falar con Balbino, el taxista del pueblu, pa que nos fuere a buscar al Chao, onde teníemos alcordao col Muséu pa facer la visita guiada al castru, pero nun lo ficimos:
- ¿Por qué nun llamamos darréu la visita?... Pa les dos (14:00) acabamos y tenemos tiempu a esgaya, podemos visitar tranquilamente'l pueblu d'El Chao...
- Acuéi. ¿Yá tas calzáu? ... Pos andando, yá llevo daqué pa pinchar, por si nun se nos s'arregla xintar nel Chao.
- Son seis kilómetros escasos, a ver cómo nos respuende'l cuerpu per esi cuestibayu .
- Mira, la Colexata ta abierta, ¿echamos una güeyada?
- A esti pasu ....
************************************
NOTA:
Darréu voi copiar lo que tenía escrito nel post anterior ( "A Mesa- Grandas de Salime") al rodiu La Colexata, igual meto dalguna semeya de la visita que venimos de facer .
NOTA:
Darréu voi copiar lo que tenía escrito nel post anterior ( "A Mesa- Grandas de Salime") al rodiu La Colexata, igual meto dalguna semeya de la visita que venimos de facer .
 |
| La Colexata de San Salvador |
La COLEXATA de San Salvador , anguaño namás ilesia, surdió por mor del Camín Xacobéu, d'ehí'l so nome talo que la catedral d'Uviéu, de la que dependía tres la donación de Fernando II de LLeón qu'ideó esta fórmula p'amortizar un poco'l poder de los cercanos monesterios de Meira (LLugo) y Vilanova d'Ozcos.
D'estilu románicu, yá fuere mencionada nel XII (1186), como diximos, pero pasó por munches igües nos siglos XVII, XVIII Y XIX polo que puen apreciase nella varios estilos, quedando del primitivu románicu namás la portada, unes gárgoles y la pila bautismal.
La ilesia tien forma de cruz llatina cola cabecera cuadrada, dos capielles al cabu los cruceros, otres dos sacristíes ya una torre de planta cuadrada (XVII), calada en blanco, que la destaca del restu del sólidu edificiu de mamposteria visto.
 |
| Nave y retablu mayor de Juan de Castro. |
Si dalgo da barafuste al edificiu ye'l pórticu decimonónicu, sobro arcos de mediu puntu, qu'arrodia tol edificiu, llevantáu nel XIX col envís d'agospiar los numberosos pelegrinos xacobeos. Nel claustru pues contemplar dos sepulcros románicu-góticos.
La ilesia primitiva debía ser pequeña y d'ehí les ampliaciones;una delles foi la nave nueva que comunica la torre col primer arcu (XIX).
Nel interior destaca'l retablu mayor (XVII) de Juan de Castro que tamién tien otres talles de María, Xesús y dellos Santos. El retablu del lladral drechu ye de José Faxín y Barruego, que tamién apurrió algunes otres. Hasta la escuela andaluza aportó un Neñu Xesús.
Merez atención la portada románica de mediu puntu d'arquivoltes simples pero colos capiteles decoraos: la Visitación, l'Anuciación, aves bebiendo, animales comiendo d'un árbol, les socorríes fueyes d'acantu... Un caballeru ya una dama, Adán y Eva, figuren nel interior de les xambes, a dambos llaos de la portada, anunciando la entrada al paradisu (probes, qué poco-yos duró).
**********************************************
 |
| Capiella del Carme |
La piedra ye lo que domina l'entornu, piedra en delles cases, llousa nos teyaos y piedra prieto como zarru de les finques y solares que-y dan al barriu esi sabor antiguu occidental.
La Capiella del Carme, del XVIII, ye de planta rectangular siendo l'adriu abiertu al camín lo más bultable d'esti edificiu en mampostería, talo que'l palaciu axuntu.
 |
| Casona-Palaciu Liñera |
Ye la Linera una familia mui notable na zona pos munchos de los sos miembros ocuparen cargos municipales y xudiciales. En 1970 finó'l caberu miembru d'esta familia, la Señora María de Linera. Tou s'acaba nesti mundu, lo importante ye dexar bon recuerdu, como nesti casu.
 |
| "Industrias Lácteas Monteverde" |
Calamos a la carretera xeneral AS-28 y nun santiamén tábemos n'A Farrapa. Caminando per un arcén topamos con una nave industrial mui remocicada. Siempre que vemos un negociu en marcha ponémonos percontentos; camentar nel panorama llaboral d'Asturies ye pa echalo a gritos: Poco abre, muncho cierra.
- Mira, una fabriquina; menos mal.
- A ver de qué ye... "Industries Lláctees Monteverde". *
- Normal, per equí hai bonos pastos y vese qu'abonda'l ganao.
 |
| "Quesos TresOscos" |
- Mira tu, esti quesu tomámoslo a vegaes en casa.
- Pos d'equí p'arriba más.
* Nos premios concedíos pola Caxa Rural nel añu 2019 "Industrias Lácteas Monteverde" algamó'l primer premiu na categoría "agroalimentaria 4.0" pol so compromisu na instalación de nueves teunoloxíes que permiten tener un control remotu de la producción.
 |
| Casa Gallleguín (Cereixeira) |
 |
| Capiella de La Esperanza (Malneira) |
Ensin danos cuenta son les 11.50 cuando aportamos delantre la Capiella la Esperanza, tamos en Malneira.
Esta humilde capiella entamó facese nel sieglu XII y remató nel XVIII. Una nave cuadrada, pequeñina, ya un adriu bien grande y afayaizu - pa lo que ye - tán cubiertos a cuatro agües, cadún por separao, con llousa prieto de la zona. La rústica espadaña de piedra amuesa una campana bien bultable. Nel presbiteriu un cenciellu retablu acueye una imax de la Virxe del Carme escoltada pol Neñu Xesús ya otra de La Esperanza.
 |
| Los refugos prietos del Chao Samartin |
Facemos alcordanza de la nuesa guía I.SS. per aciu la voz d'Alana:
[[ A midida qu'ascendíemos, la viesca trupo daba pasu nuevamente al monte ralo abriendo ente los nuesos güeyos un horizonte estenu de llombes reverdecíes pol claror d'un sol esllumante qu'obligaba a caltener la vista baxo.
Acabante coronar un cuetu, aprució a la nuesa manzorga - pa nós ye a mandrecha - l'esqueletu d'un castru de piedra. Otra Cuaña abandonada polos sos moradores, amosando al cielu los sos refugos prietos, talo qu'otres reliquies d'un pasáu escaecíu espardíes equí y acullá. ]]. Tamos ente'l Castru del Chao Samartín, chapeau.
 |
| Albergue Xuvenil de Castro (Chao Samartín) |
Foi dexar atrás un gallineru pergrande y yá teníemos El Chao a la vista tres pasar una casona de mampostería abandonada. Pa que'l gociu tan esperáu de la visita al castru fuere entá mayor fuimos averándonos al santuriau celta pasu ente pasu per una carretera formigón iguada va bien poco. Son les doce y cinco (12:05), quédanos casi una hora pa la cita, vamos sobraos.
A midida que nos acercamos al Albergue vamos echando la vista a mandrecha pa contemplar el pueblu d'El Chao.
L'Albergue Xuvenil de Castro, ye una casona pergrande de piedra en mampostería cuidada con tol procuru.
- ¿Por qué nun tomamos daqué, tenemos tiempu a esgaya?
- Acuéi.
Hai dalguna xente sentao nes meses de l'antoxana tomando daqué. Ye la hora la llimpieza del llocal y nun atienden el Bar.
- Si podéis esperar un poco... Toi terminando de llimpiar. Si queréis tomar daqué hai máquina dientro, na Receición.
- Más tarde, entós; agora vamos al Castru que tenemos visita concertada.
 |
| Entrando pal Muséu d'El Chao Samartín. |
Llegáremos temprano y aprovechamos pa echar un tragu d'agua y aselar un poco sentaos na muria qu'acota'l recintu del Muséu. Sí, nel Chao hai dos llugares - o más - a visitar, el Muséu del Chao Samartín y el propiu Castru, asitiáu un poco más abaxo, como a mediu kilómetru.
Nun había un alma alredor con intención de visitalu; namás dalgún pelegrín que pasaba de llargo. Decidimos entrar nel Muséu a sacar les entraes y de pasu supieren que tábemos ellí. Había una señorita mui amable en Receición.
- Bonos díes, teníemos visita concertada pa la una.
- Mui buenes. La visita al castru entama a la una (13:00), van facela conmigo;como ye temprano puen dir visitando'l Muséu mientres tanto.
 |
| Perendengue prerromanu d'oru y plata, a lo Pantoja. |
Flipes. Cosiquines que viniéremos d'estudiar pelos llibros teníamosles delantre los güeyos: el perendengue romanu d'oru ya otro prerromanu d'oru y plata, el vasu finu col lleón de Melgar de Tena (Zamora), los h.achos de talón, la calota funeraria, hebilles, la piedra de toque de lutila, el puñal d'antenes, el denariu de Cayo y Lucio, el xuegu de peses, cerámica a mamplén ..... Lo que nu pudimos ver foi'l cuellu de la olla* de Burou , esa que lleva una salutación amistosa d'esti pueblu pa con Ocela (Chao Samartín) - segúramente la capital d'onde dependía - que ye como se nomaba na dómina romana.
*[Como nun m'aguantaba fui vela dellos díes más tarde al Muséu Arqueolóxicu d'Uviéu. Tamién pensamos visitar Burou, una vez en Fonsagrada, qu'antes pertenecía a Asturies.]
 |
| El Castru del Chao Samartín Los putos amos. |
 |
| Muralla de módulos |
- Voi facer una semeya.
Llegamos en cinco minutos.
- Vamos entamar la visita per equí, pela muralla de módulos y los fosos.
- ¿Cuántos había?
- Dos; unu prerromanu, del Bronce, ya otru romanu.
- ¿Cómo ye que durante la <pax romana> foi preciso abrir otru fosu?
- De mano non, pero cola guerra civil al final de la dinastía Xulia-Claudia hebo temores y amás de llimpiar el fosu antiguu que taba siendo amortizáu tresnóse otru, por si acasu ...
 |
| El pobláu |
- Equí ta parte del pobláu, que too nun ta escavao nin por asomu.
- ¿Y piensen siguir ?
- Sedría perguapo pero ¿nun-y paez que val más consolidar primero lo que vemos?... Les perres nun dan pa too.
- Si usté lo diz. ¿ Pa qué son esos teyainos de llousa que cubren les muries de les cases?
- Precisamente pa torgar que la lluvia acabe colos tabiques de les cases escavaes.
- Perdone, con eso y too tengo la sensación de que'l castru ta un pelín abandonáu ... (¡Vaya morru que tengo!).
- Sí, y hai dellos sitios onde nun se pue entrar, por exemplu a La Plaza o al interior de la "urbanización".
- ¿Y a la sauna?
- Tampoco.
- Vaya, cola ilusión que tenía por dame un bañín caldiu...
- Tendrá qu'esperar que venga la subvención pa da-y a esta ayalga un cálter más humanu, y que se puean visitar toles coses per aciu d'una pasarela que circule pel mediu del pobláu. Yá queda poco, ¿eh?, nun s'esmoleza, les obres tán a puntu d'entamar.
- Vamos, que tengo que dame otra vuelta pel Chao.
- Por supuesto; nun ye plan que se quede usté con una mala impresión.
- Nun crea, ta prestándome abondo pero quixera velo too de cerca y .... ¡tocalo!, si pudiere.
 |
| La Gran Cabaña de l'Acrópolis. Delantre de la Entrada (menhir ) taba la Empalizada madera |
- Equí taba la entrada al castru que da accesu a tola trama urbanística y de cote alcuéntrase lo que se conoz como La Plaza.
- ¿El Foru castreñu?
- Bueno, un espaciu comunal onde podíen celebrase fiestes, mercaos o asamblees. Y más p'atrás tenéis la sauna que tantu vos presta.
- ¿Castreña?
- Pudiere ser pero esta paez romana, sicasí n'otros castros sí que les hai ciento por ciento castreñes.
- ¿Y la gran cabaña de l'Acrópolis?
- Ehí arriba, vamos p'allá. Queda poco porque'l suelu trabayóse muncho pa l'agricultura pero yá sabéis que yera rectangular coles esquines mataes. Foi seguramente un llugar de cultu como lo amuesa tamién la cista cola calota d'un moza qu'había a la entrada.
- ¿Taba protexida esta Acrópolis santa?
- Amás del crestón cuarcíticu natural llevantóse una empalizada que sufrió un incendiu talo que la cabaña ente'l VIII - VII e.X., a finales del Bronce. Ehí al llau teníen el Taller metalúrxicu.
 |
| La Domus romana (s. I d.X.) |
- ¿Cuando vinieron los romanos pol oru tamién vivíen nes cabañes caatreñes?
- Sí, pero fueren remocicándoles, faciéndoles más cuadraes y hasta con un pisu enriba. Aprovechaben meyor los espacios, teníen téunica pa ello.
- ¿Y el gran xefe romanu nun tenía daqué con más sonadía?
- Claro, la Domus. Tenéi en cuenta qu'Ocela (El Chao) yera seguramente'l centru más importante de la zona no que cinca a la recoyida del oru, equí ye onde se cortaba'l bacaláu. Vamos vela, ta pal norte.
La Domus, la casona romana asitiada al delláu de la muralla, impresionónos, polo grande y polo curiosa que debió ser con toles dependencies propies d'una casa de gobernador romanu. Too parte d'un patiu central con un adriu columnáu, ¡qué guai!. Les muries de la casa tán feches de mampostería tallao y amasao con morteru caliar (opus incertum). Les parés de los cuartos van cargaes y ¡pintaes al frescu!
- ¡Vaya ayalga!
- Costó muncho sacar esta escavación p'alantre porque na Edá Media esto convirtióse nun cementeriu. Bueno, pos con esta bona impresión termínase la visita. Espero vos prestare y gustaríame vevos otra vuelta cuando esto tea remocicao.
- Súpome a poco. Vamos tener que volver, pero eso sí, cuando tea iguao. Suerte coles obres.
 |
| Caparina |
- ¿Tien cerveza asturiano?
- Solo faltaría, tengo varies; podéis mirales nesa vitrina. - Y dionos un repasu al rodiu la cerveza que quedamos flipando. Yá me soltaren otru parecíu nuna cervecería de Xixón, "Señor Lúpulo", pero sigo ensin entender nada, lo mio ye'l sicere o daqué traguín de vinu.
- ¡Meca, mira, la Podallirios!
- ¿Quién?
- La Iphiclides Podalirius , la caparina que vimos nel castru de San Chuis y que tantu nos llamó l'atención. ¿Nun t'alcuerdes?... Como nun la conocíemos tuvimos de pidir socorru a Asturgeografic.
- ¿Tas seguru?.... Asemeya enforma por mor d'ese bandes negres y blanques pero esi color encarnáu ....
- Ties razón; bueno, hai que siguir investigando... En cualquier casu facemos alcordanza de Carme y Pepe.
Yeren munchos los pelegrinos qu'había nel Bar, tanto dientru como fuera; la terraza l'antoxana y tol entornu son mui afayaizos; por si fuere pocu'l día agabitaba lo suyo.
Fuimos a xintar el bocata a la solombra d'unos ablanos cerca del Muséu y a les cuatro (16:00) entramos otra vuelta ensin tener qu'abonar la entrada, un detalle. Echamos cerca una hora retratándolo todo y esfrutando de lo que teníemos lleío con tantu enfotu. Mereció bien la pena.
 |
| <Perdíu nel Camín> - <Dica la lluz m'embredo arreyando la sombra per un carreru> -<Sombra d'atapecida, el molde en que la tierra vien tomame la medía> . <A la lluz me dirijo arrastrando una sombra por el camino> . < Sombra de atardecida, el molde en que la tierra me toma las medidas>. A partir de J. Almuzara. |
- ¿Y agora qué, cristiana?
- Yo alcuéntrome bien, si quies tornamos a Grandas andando; ye too baxar.
- ¿Qué?.... Colos problemes que tuvisti estos díes...
- Como vamos siempre pegaos a la carretera si éso llamamos a Bernardo, el taxista, que venga buscanos. Andando.
- Acuéi ... - Agacho les oreyes y ....
Pel camín paramos en Cereixeira a tomar daqué nel Bar-Tienda onde calechamos de too y de ná pero pasamos un ratu entreteníu. Agospiamos nel Hotel La Barra y tres d'una ducha ya una vueltuca pel pueblu fuimos a cenar el pulpu al Bar Occidente; nun lo hai meyor. Cola caminada y el carah.illu dormimos como truchos pero enantes yá teníemos decidió salir al día siguiente camín d'O Acevo (L'Acebu) dende'l mesmu Chao.
**********************************
NOTA: Nel post anterior <A Mesa - Grandas de Salime> escribimos esto que repetimos darréu. Si yá lo lleisti pasa, otramiente pues aprovechar el tantu; que te preste.
EL CASTRU DEL CHAO SAMARTÍN
(Les semeyes del castru'l Chao tán sacaes del llibru d'Ángel Villa: "El castro de Chao Samartín")
(Les semeyes del castru'l Chao tán sacaes del llibru d'Ángel Villa: "El castro de Chao Samartín")
 |
| Castru del Chao de Samartín Enantes d'entamar coles escavaciones. |
Si hai un monumentu que da altor y sonadía a Grandas esi ye'l Castru del Chao de Samartín; esi finxu que xunce un pasáu rescamplante con un presente esmoleciente (talo'l de cualisquier otru puntu d'Asturies, qu'asina andamos, Mon Dieu).
Sí, yá sé que tán la Colexata, l'Embalse y el Muséu - ¡que runfen, por Dios! - pero El Chao ye un patrimoniu cultural irrenunciable que tien de tratase col tol rigor siguiendo los parámetros de la moderna arqueoloxía; que'l dineru fácil y la premura política del momentu nun sían talo la nublina que venimos de dexar nos montes de Buspol. Según camienten delles fontes cuerre'l peligru de perder pa siempres una bayurosa información .... Faites attention!
Pero dexemos les cuestiones político-sociales y demos una vuelta pela antigua morada celta y romana y vete tu a saber... que yo nun lo conozo y entá queden coses qu'aprender. ¿Xubimos hasta allá?
P'algamar al Chao tenemos que salir de Grandas pola carretera AS-28 hasta'l pueblu de Castro,
6 km. Chupao.
 |
| Con esti llibru y algún más tratamos de ponenos al corriente al rodiu la vida los castreños d'El Chao Samartín |
El Castru de Chao de Samartín ye un recintu fortificáu, asitiáu poliorceticamente, que desendolcó la so actividá vital dende finales de la Edá del Bronce (IX-VIII e.X.) hasta finales del sieglu II d.X. cuando foi esbarrumbáu por mor d'un movimientu sísmicu; pero gracies a munchos aqueólogos y sobre manera a Ánxel Villa, direutor de les últimes y modernes escavaciones , sabemos munches coses qu'ellí pasaren cuantayá. Hai llibros que te lo cuenten y un Muséu que te lo esplica.
 |
| Cacía cerámico d'El Chao Samartín (Semeya propia del MAPA) |
- Pero qué esperáis, yá alcontramos una cabana y cachos de cerámica....
En 1990 Principáu y Ayuntamientu pónense manes a la obra - les coses de palaciu van despaciu, eh - y la cosa entamó en serio seique partíen de la base que'l castru debió tar ocupáu dende'l s. I hasta l'entamu la E.M. ( V ó VI) con un pequeñu abandonu nel s. II. Vamos, que yera cosa de romanos, como los castros vecinos del Navia. Tic- tac, tic -tac ...
 |
| <Hachu de talón> Edá del Bronce. |
De mano too empobinaba per esi camín, la sienda romana: Un axuar d'altor, les muries perfeches, la llosa perdayuri, hasta'l C14 sambla ser romano ..... Pero un lustru más tarde, al tirar par sur-este, la estratigrafía nun ye igual, aprucen materiales cuarcíticos, más potentes que la pizarra, más antiguos.... Una muralla amuesa'l focicu.... ¿Nun ye romana? .... ¡Ye prerromana!... Un trasgu sal del pinal vecín y camienta-yos a la oreya:
- ¿Nun seríemos celtes?
El Chao de Samartín, el bastión castru-romanu por escelencia, entra en cris.... Los sos raigaños tamién son prerromanos pero ... ¿De cuándo? ......
- ¡A picar!
- ¿Entamamos equí arriba, nesta esplanada d'unos 30 x 80 m ?
 |
| Acrópolis, témenos celta. 1. Bastión d'entrada, imponente roca cuarcítica. Cerquina ta la cista cola calota. 2. Pira o foguera crematoria. 3. Empalizada, barganal fecha a conciencia. 4. Cabana o Santa Santorum col druida entamando la ceremonia. 5. Fosu delantre la muralla - Si esto nun ye celta que venga Lugh y vea. |
De finales del Bronce (800 a.X) son les primeres defenses: una empalizada ya un fosu qu'arrodiaben el recintu sagráu (Acrópolis) al que s'accede per aciu d'una portona, a poniente, de piedres escomanaes qu'asemeyen un poco a Peña Tu. A oriente un crestón cuarcíticu fai imposible l'accesu. Nel interior, el Santa Santorum, un edificiu pa usos públicos, una cabana de techu vexetal, d'unos 60 m2, bien grande pa la dómina, de planta rectangular coles esquines mataes que se sofitaba nunos postes fondiaos na roca y bien suxetos por mor d'una pequeña muria de mampostería.
 |
| La Diosa Navia (Equí nun fallaba a misa nin Dios) Semeya: <cosesdemeiga.com> |
- Equí nun se vivía ....
- Si ye daqué sagrao, igual vivía un Dios...
- O una Diosa.
- Meyor.
- Ties razón. Esto ye un "témenos". Un tarrén acutáu dientro una viesca y dedicáu a una divinidá.
- ¿Yes capaz imaxinar la escena?... La entrada al traviés del roqueru, la cista col cráneu, la empalizada, la foguera ardiendo .... Y el druida, o la sacerdotisa, invocando a Lugh o la diosa Navia?
- Calla, fatu; equí manda la Santina.
- Representación cristiana de la Deva y de la Navia.
 |
| Cista |
Qu'esta especie d'Acrópolis yera daqué sagrao amuésalo'l fechu d'alcontrar frente a la puerta de entrada - al meudía - una pequeña cista* col cráneu d'una moza nueva, una cigua escontra'l malinu. Intención apotrófica, dicen los sabios castellanos...
Amás tampoco queden nel recintu restos del quefer diariu: llares, cuartos, cacía, preseos de caza ... El daqué metalúrxico que s'alcontró- como'l discu - llévanos a lo ritual. Yera sagrao, val, pero... ¿cuala foi la xida del incendiu qu'acabó con ella al igual que'l de la empalizada** qu'arrodiaba'l recintu (VIII - VII e.X)?... Nunca nun lo sabremos, namás queda maquinar una hestoria que finó al tiempu que la Edá del Bronce ....
*Cista: Pequeñu monumentu funerariu a mou de receptáculu paralelepípedu, formáu por delles llábanes verticales cubiertes por una llosina, que caltenía una cigua, un oxetu que refugare'l malinu.
***************************************
< Castru Chao Samartín - Altu O Acevo>
(9 km)
[ Castro ye una llocalidá d'unos 50 habitantes que pertenez al Conceyu de Grandas de Salime. Ta asitiada nun pandu a 673 m/a al delláu la carretera AS-28. El pueblu ye guapu en sí por lo bien asitiáu, soleyeru, con bones tierres de llabor y praderíes cercanes poro yá tevo habitaú, cuando menos, polos celtes de la Edá del Bronce (XIX-VIII e.X.) onde establecieron un castru que nel s. I foi aprovecháu polos romanos con envís d'arramplar col oru que guardaben les nueses montañes. ]
Nel "Hotel La Barra" desayúnase bien: zusmiu, tostaes,melón, xamón, café y delles llambiotaes; nun damos a bastu. Enantes de les nueve yá taba Bernardo llevándonos en taxi camín de Castro (El Chao); dexónos xusto al entamu la xubida al Muséu que tanto nos prestara. Embredamos per un camín solombriegu de lo más afayaizo y a eso de les diez (10:00) tábemos cruciando la carretera xeneral tres dexar atrás - nun lo vimos siquiera - el pueblín de Padraira. De cuando en cuando pasábanos dalgún pelegrín, en bicicleta dellos mozos y a pata daqué moza. Nun te sientes solu.
Metanes la viesca pero nel camín acolumbramos una capiella ruaral pintada de blanco; trátase de la Capiella de San LLázau, una antigua malatería. Charra que te charra, camentando al rodiu'l Reinu d'Asturies cuando na dómina del Castu un ermitañu descubriere'l el sepulcru del Apóstol Santiago y l'Obispu Teodomiro lo punxere en conocimientu'l Rei .... Fóisenos el santu al cielu y nun llegamos a entrar en Xestoselo, menos mal qu'un chaval que salía de casa en coche echónos un gabitu:
- Tranquilos, pa salir a la xeneral tiráis per equí p'arriba y yá la pilláis otra vuelta; nun arrodiasteis ná, ensiguida veis Peñafonte.
La carretera pica p'arriba. Caminamos per un senderu acutáu, formigonáu a veces, y ensin peligru que nos pille un coche.
Penafonte acolúmbrase dende lloñe, ta asitiáu nuna cotariella embaxo unos molinos de vientu, d'esos que producen lletrecidá. D'esti pueblu nun se puen ún escaecer, les mesmes señales t'empobinen a él. Ye preciso xubir, ente cases de mampuestos, una cuestuca bien empinada p'arribar a la fonte al delláu d'una peña, que-y da nome al llugar. Llegamos - somos una zubiella pelegrinos - a una plazoleta formigonada, bien afayaiza, astiada delantre una ilesia rural y del llavaderu, percuriáu, que s'aprovecha de la fonte.
- Ehí les tienes, la fonte y la peña: Peñafonte (850 m/a).
- Voi aselar un poco nesti escañu del cabildru, toi matá.
- De pasu llees la epigrafía pelegrina de los bancos.
- It is cold! - diz una mocina foriata que vien d'echar un tragu d'agua.
- It's very very cold but very good - arrepostié yo, tres pensar un cachu, tratando facer alcordanza del mio english de párvulos yá escaecíu. Debí pronunciar mui bien porque la rapaza nun paraba de rise... la h.odía.
[Penafonte ye una parroquia del conceyu de Grandas de Salime que tien una estensión de 19 Km2 con algo menos de cien habitantes repartíos en catorce núcleos de población siendo esti nel que tamos el más pobláu.]
Al salir de Peñafonte un cartelu diz que nos queden 3 kms p'algamar al Altu l'Acebu pero nós nun vamos dir pela carretera xeneral sinón siguiendo un senderu zahorra pela fastera del Monte Do Zarro, hasta alcanzar la cota de 1100 m/snm. A lo primero cuesta un poco pero ensiguida se fai mui llevadero hasta que topamos otra vuelta cola AS- 28, compañera del alma. Da gustu caminar per esta viesca ente brezoz, toxos, felechos, abedurios, carbayos y numberosos capudres.
[[ El capudre (Sorbus aucuparia) ye un arbolín plani-caduci-foliu, hermafrodita (flores machu y fema na mesma planta) que pue algamar los 25 m/altor seique nu ye lo normal. Tien la groma oval y poco trupo siendo la corteya'l tueru d'un gris buxo.
Les fueyes son compueste y alternes ya imparipinnaes (impares) de 13-17 foliolos aserraos y con cieta pubescencia pel raquis y nervios.
Les flores - xunu/agostu - van en grupos tipu umbela (paragües) con 5 sépalos y otros 5 pétalos blancos qu'abelluguen numberosos estames. El carnosu frutu coloráu - ricu en vitamina C - conocíu como mostaya (mostal.la), de tastu ásperu y fariñosu, ye'l petite de los páxaros; los cazadores sábenlo y avecen a esperalos, tapecíos, pa llevalos al zurrón. Tamién los humanos podemos comer la mostaya seique ye un poco astrinxente; bueno, si tienes diarréa pistonudo. Hai quien saca dulce d'ello ya otros aguardiente.
El capudre, como yo, ye heliófilu - vamos, que-y presta'l sol como'l carambelu - y s'adáptase a suelos estremaos seique prefier los caliares, fondos y llentos; home, va.... Pues alcontralu hasta cerca los 1700 m/a acompañáu por bidules, carbayu albar y falles. Tien una especie mui asemeyada, l'alcafresnu (Servus doméstica L) que da un frutu nomáu silva y abonda na parte oriental d'Asturies, más mediteránea.
El capudre, conocíu como serval de los cazadores, tien raigaños máxicos; el dios Thor pudo salvase del Ríu de la Muerte agarrándose a esti árbol.]]
Cruciámos la carretera y, tres abrir una portiella , entramos nel propiu Monte la Curiscada que vamos dexando atrás, pali-pali, tapecíos ente'l fusia de los brezos y les flores marielles del toxal; tan contentos andamos que malpenes sentimos los pinchazos de les numberoses espines d'esta planta. Al zarrar la portiella del final de la xubida, embaxo mesmo d'una cadena d'aeroxeneradoes - nunca nun los vimos tan cerca - , dannos algame tres mocines foriates:
- Bye, bye ...
- Ta llueu, guapines. - (¡¿Tarán de coña?!)
Caminado pela viesca damos con un moyón que nos marca la llende ente Asturies y ¡¡Galicia!!. A cierta distancia, a manzorga, vemos la Sierra de les Piedres Apañaes, hai quien diz que por mor de los montucos de piedra que los pelegrinos llevanten al pasar, como si quixeren dexar constancia de so pasu per Asturies; ta claro, cuesta abandonar esta comunidá pero Santiago nun tien espera y ye preciso avanzar. Nesta semeya adxunta de les piedres apañaes tenemos un finxu, un pequeñu monumentu al amestamientu ente Asturies y Galia:
<<Gallegos y asturianos
primos hermanos>>
- ¡¡ Bye, bye, Asturies !!
Ceo entamamos a baxar. Hai qu'andar con pies de plombu por mor de la piedra suelto.
- ¡Mira qué pueblu naquel altu!
- ¡Qué guai! Ye granducu, ¿eh?. ¿Qué crees que pue ser?
- Cuido que pue ser Fonsagrada, nun hai otru tan grande en tola redolada.
- Coimes, pos anque paez cercanu deben faltanos tovía .
- Doce (12) kilómetros buenos, tengo alpuntao.
- En fin, como güei nun vamos dir allá ...
...
La baxada del Monte La Curiscada, na Sierra O Acevo, hasta l'antigua Venta del Acebu asitiada al par la carretera LU-701 faise per una pista ancha, llarada de curves , metanes una viesca onde predomina'l pinal pero nun falten los carrascos (acebos) nin el bricial-toxal tan necesariu pa'aguantar el tarrén y la numberosa garulla de cuarcita suelto qu'amuesa de xemes en cuando. Tamién hai alguna castañal, carbayos o bidules; vese qu'antes yera viesca misto.
Acolumbramos al fondu'l Chao de Foláis, qu'hemos de xubir, y a mandrecha, bordiándolu, l'A Valía da Fonte, onde ñaz el Ríu Nabalón.
El Mesón O Acevo ta asitiáu nun requexu la esplanada que domina la llomba; un encruz de carreteres no alto del pandu. Sábese qu'esta Venta tien más de cuatrocientos años d'hestoria pero son de supone-y munchos más; per equí pasaba una calzada romana que comunicaba Asturies con Galicia, pero antes yá transitaben per esti Camiño Real los vecinos col ganáu y los pastores treshumantes.
O Acevo ye'l puntu más altu del Camín Primitivu en Galicia algamando los ..... m/a. Nesti monte son célebres les Medorres o Mamoes Neolítiques, monumentos funerarios tipu dolmen asitiaos en pequeños montículos de tierra colos qu'horrar a los antepasaos y señalar el territoriu d'un clan.
Anguaño esti Bar-Tienda ta rexentaú por un paisanín del mio tiempu - more or less - que s'encarga de tol buizu: Sirve bebíes, pon pinchos, llimpia les meses, atiendi la cocina ... ¡Menudu trasiegu!. El chigre ta atacáu de xente. Entiéndese con toos; lo mesmo contesta n'inglés qu'entruga n'alemán.
Y mira que tien coses ... Ye'l típicu Bar-Tienda onde s'acuentra de too, moderno ya antiguo, muncho d'ello obsoleto dafechu como los sifones. Esto ye como la tienda'l Muséu Etnográficu de Grandas pero "a lo bestia". Nós aprovechamos pa tomar la parva, un vinín pa dar entrada al pinchu de cecina y quesu. Yá tamos como motos, como Marc Márquez. Y miramos ún pa otru ...
- ¿Qué facemos, cristiana? ¿Cómo t'alcuentres?
- Yo por min ....
- Por ti, ¿qué?... ¿Tas pa siguir?...
- Pos sí, nada nun me duel; si te prúi podemos tirar otru poco, hasta'l próximu empalme cola carretera.
- Nun ta lloñe, podemos intentalo y si éso llamamos al taxi.
- Acuéi.
Pagamos y al salir damos un respingu al sentir d'esmenu'l sonar d'un cencerru :
- ¡Gracies pola propina!.
El Bon Camín embreda cuestarriba, tres del Bar, dica'l Chao de Folais (1026 m/a) onde alcontramos dellos acebos o carrascos. Tres la cuesta enllanamos, caminando per un pandu abiertu , de lo más afayaizo, a vegaes paralelu a la carretera. Dende lo más alto acolumbramos al fondu la panorámica una ciudá asitiada bien alto; nun ye otra que Fonsagrada.
Tres un xube y baxa, per una pista acutada, con baranda tornamieos - ¡qué nivel, Galicia!- llegamos a Cabreira, llugar de la parroquia Minteseiro y conceyu Fonsagrada. Lo que vemos ye otra venta na llanera, pegada a la carretera.
- ¿Otra venta?. Mira aquel monovolumen naranxa que ta estacuináu delantre, asemeya'l taxi de Bernardo.
- ¡Anda, si ye él!
- Bonos díes, señora taxista, ¿nun tará esperando por nós? - dixe con un poco goña.
- Pos sí, como quedareis llamar dende l'Acebu ....
- ¡Madiós!, yera si lo precisábemos pero como decidimos siguir ... Qué fallu tuvi, tenía qu'haber llamao.
- Nun t'esmolezas, en realidá terminé facer un serviciu pela zona y Bernardo encamentóme pasar pol bar, por si nos precisabeis ; como nun tabeis averéme hasta Cabreira, por si acasu.
- Gracies y milentamil gracies, sois los ánxeles de la carretera.
Quedamos en siguir caminando porque nos alcontrábemos bien, amás aquello yera práuticamente llano.
- Vamos intentar llegar a Fonsagrada, en cualquier casa avisamos cuando seya necesario.
- Ta llueu; dir tranquilos, taremos soyertes.
[ Teo que dicir que nin d'esta visita fallida nin de la xubida mañanera al Chao nos pasare factura Bernardo. Tamién ye verdá que la segunda nueche en Grandas agospiamos nel Albergue de so propiedá qu'en realidá rexenta la so muyer. De cine. Acaben d'inaugurar l'Albergue <Porta de Grandas>. Ye una casona a la entrada de Grandas, Avenida los Tilos, namás desembocar del Camín Xacobéu según se vien del pantanu de Salime.]
La pista circula paralela a la carretera bordiando un piñeiral - viesca de pinos - al algame de Fonfría, el siguiente finxu del Camín. Enantes d'aportar al pueblu alcontramos una fonte mui cuidada metanes una pequena Área Recreativa, un llugar p'aselar y refrescar. Son les (14:40). Darréu echar un tragu y tomar les semeyes afayaices entramos nel pueblu:
Fonfría, cómo sinón, una parroquia del conceyu Fonsagrada encomendada a Santa Mª Madalena (Ilesia del XVIII). Foi importante esti pueblu, de cases de mampuestos y teyaos de pizarra, como Encomienda de los caballeros Sanxuanistes y por caltener un Hospital de pelegrinos - Santa Catalina - desde 1535 hasta principios del XX; anguaño andará esta aldea polos 40 habitantes repatíos en cuatro pequeños núcleos.
[ La Orde de los Caballeros de San Xuan conocida tamién como Orde de los Hermanos Hospitalarios o Orden de Malta (1530) entamó por ser una suerte d'ONG con fines benéficos pero terminó por convertir nuna orde al usu, de caballeros guerreros, qu'algamó importantes victories.
A partir de 1188 contó con una rama femenina seique nun yeren amazones, dedicaben a la vida contemplativa ya hospitalaria; menos mal.
La primer casa n'España nació en Santa Mª de Sigena (Villanueva los Monegros- Huesca) de la mano de Sancha de Castilla, consorte d'Alfonso II d'Aragón.]
Salimos de la carretera pa caleyar pel Monte de Penoucos (999 m/a) hasta que salimos a l'altura de Barbeitos, un pueblín de la parroquia de Fonfría, conceyu de Fonsagrada, que nun llega a los 20 habitantes, pero que tien un horru de castañu de 1850 y tamién ...
¡Tien un mesón! Otra venta, <Mesón Cuatro Ventos> y con tola razón, talo les otres, albentestate. Ye célebre poles carnes a la brasa ya embutidos y productos de la zona; si tienes tiempu ... Failu.
En Barbeitos hai que cruciar la carretera ya embredar per un pinal que nos tien de llevar a Silvela, na parroquia de Samartín de Suarnia, onde aportamos a eso de les tres y media (15:30). Les vistes per aquel camín ampliu de zahorra metanes la viesca son impresionantes; con la Fonsagrada nel altu horizonte atrayéndonos talo un imán. Por momentos quixéres ser un aigla pa volar y posar les tos garres naquel pirulí sobeyosu que ruempe l'harmonía del pobláu.
Tres cruciar la carretera LU-701 otra vuelta vamos algamar al Área Recreativa de la Ermita Santa Bárbara. Son les cuatro menos cuartu (15.45) y la parva d'O Acevo yá quedare bien amortizada. Nuna mesa de madera aprovechamos pa xintar un bocata, la llacuada dexámosla pa la nueche, en Ca Sánchez de Grandas; nun hai pulpu y Ribeiro como eso. Comimos tranquilos al par d'otros pelegrinos estranxeros que descansaben nos bancos; Fonsagrada yá ta a tiru flecha, nótase la gayola nes cares, cansaes ya aprovecientes.
Como siempres, tres la xinta hai que xubir un repechu, curtiu esta vez, seique nun va ser el últimu. Per una sienda amplia y acutada por una barganal que nos defende del tráficu la carretera xeneral vamos arribar a l'antoxana d'A Fonsagrada : la fondera (¡840 m/a!) Paradonova, parata nova, un llugar que fai referencia a les posaes pa pelegrinos onde podíen - y pues - encamentase a Santiago dende'l pórticu d'una capiellina rectangular con techume madera a dos agües. Nel altar un ánxel abelluga a la Virxe del Rosariu, a San Xosé y hasta la mesmísima Santa Cruz, de la que recibe'l nome.
El gran pueblu, el de la Fonte Santa (952 m/a), el petite de güei y de tantos díes, ta a la fin al algame de la mano; namás queda xubir una cuestuca de nada, ¡pero vaya repechu!. De 840 a 952 hai 192 m de desnivel, en nada.
Quedamos dubitatibles enantes d'arancar pos teníemos tres opciones:
. Carretera xeneral, refugada dafechu por mor del tráficu.
. Caleya a manzorga, ye la que aconseyen, pero tamién la escaecemos porque de mano hai que baxar y pensamos que la cuesta venidera sedría entá mayor y ...
. Cruciar la xeneral y xubir pero onde pon : A Proba do Burón, un llugar míticu pa nós onde pensamos dir na próxima visita. Chupamos mediu km más ¡por llistos!. Aportamos a la entrada'l pueblu al tiempu qu'unos collacios de ruta que quedaren anantes xintando en Santa Bárbara.
- Par ici, c'est plus curt .
- A buenes hores, mangues verdes.
- ¿¿¿ Mangues verdes ????
- Au revoir. Bon chemin!
**********************
¿Por qué queremos visitar A Proba de Burón? ... ¿Porque ye una de les variantes del Camín del Camín Primitivu pa salir d'A Fonsagrada camín de Llugo? ... Non, habría ser, porque en realidá esi yera'l camín primixeniu pel que pasó'l primer pelegrín, Alfonso II, pero nun ye esa la única razón; la xida ye por mor d'una olla qu'aprució nel castru del Chao Samartín y que na boca del cuellu lleva una inscripción que fai referencia a l'amistá ente dos pueblos albiones: Buroflavia (La Puebla de Burón), como dedicante ya Ocela (Chao Samartín), como receptor; esti regalu tiennos aliellos dafechu.
**************************************
[[ A Fonsagrada (Fontem Sacratam) ye un municipiu de la provincia de Llugo asitiáu a 952 m/snm distante 60 km de la capital. Falta-y poco p'alcanzar los cuatro mil habitantes de los cualos más de la cuarta parte viven na capital del conceyu. Con 438 km2 d'estensión ye'l municipiu más grande de Galicia.
La fonte sagrada tien les sos lleendes. Unos dicen qu'un día tando Santiago predicando per estes tierres aparecióse-y a una madre perprobe que nun tenía un res pa dar comer a los fíos pero atendió al Apóstol curándo-y les firíes; esti, agradecíu, convirtió en lleche l'agua de una fonte. Otros creen que foi la Virxe la amiyó na fonte pa socorrer a una pelegrina qu'andaba malecía. En cualquier casu esti agua resulta milagroso, nun pienso dexar de probalo.
Camiéntase que Fonsagrada tien hestoria dende va más de 30.000 años siendo as mamoas (dólmenes) neolíticas y los castros de la Edá de los Metales lo más bultable de la prehistoria.
La Fonte-Sagrada entró na historia hacía'l sieglu IV per aciu d'un vía romana (siguiendo caminos prehistóricos) que diba comunicar Asturies (Uviéu) con Llugo. A partir del IX foi algamando sonadía por mor del Camín Primitivu a Santiago - el nuesu rixu - viéndose obligada a llevantar varios hospitales pa pelegrinos ya una capiella como Santa María, cerca precisamente de la Fonte Sagrada que curaba les firíes dexándote como nuevu p'algamar a Llugo y darréu a Compostela (cómo lo movéis , h.odíos). Ún d'esos hospitales - Santiago - foi mandáu llevantar nel sieglu XIV pol mesmísimu Pedro'l Cruel, o'l Xusticieru (1350-1369), rei de Castiella.
Les tierres de Fonsagrada tuvieron na baxa Edá Media, en manes de los condes de Trastámara y darréu nos d'Altamira pero dengún dexó bon recuerdu por los munchos abusos tributarios con que cargaron a los vecinos. Tola vida estos tuvieren lluchando por unos fueros dignos. La Guerra la Independencia (1808-1814) y más tarde los carlistes (1833-1847) nun ficieron otro que trayer más anoxu y miseria a esta bona xente a los que'l lliberalismu tampoco sacó de probes. Nes cortes republicanes de 1943 sacaron un diputáu procurador sicasí l'allegría en casa'l probe dura poco, nel 36 la Guerra aventó la llibertá penriba la Sierra l'Hospital .
Fonsagrada asina como Negueira de Muñiz formaron parte hasta 1835 del municipiu de Puebla de Burón perteneciente a la provincia d'Asturies, que foi cuando entamaron a pertenecer a Llugo (Galicia). Vamos, que la Fonte Sagrada yera asturiana, ¡sigo en casa!, como nun voi dir a Puebla de Burón si tamién ye de mio, a ver qué va ser esto ...
Ye de fer notar la importancia que tevo na provinvia de LLugo, y sobremanera nestes tierres, la Orde de los Caballeros de San Xuan; yá lo mencionamos en Fonfría y tamién son conocíos n'O Padrón, en Paradavella y n'A Allonca. ]]
********************************************
Tres arribar al centru Fonsagrada lo primero que ficimos foi aselar un poco mientres tomábemos una clara. Darréu fuimos a buscar la Oficina de Turismu pa recoyer información. Nun barracón de madera atendiónos una mocina mui amamable:
- Bones tardes, ¿tán faciendo'l Primitivu, non?
- Con esta pinta nun despistamos a naide, ¿eh?; tamos faciéndolu a cachinos, pasu ente pasu, non de contino. Esto que-y digo, pensamos agospiar unos díes en Fonsagrada pa facer dende equí unes estayes hasta LLugo, ¿podría indicanos un hotelín afayaizu dao que yá nun tamos pa cuartos compartíos?. Y de pasu si nos cuenta lo que hai per equí cerca, nel conceyu ...
- Tenéi, esti ye un mapa caleyeru de la villa - un rueiru - y esti otru trai to lo turístico no que cinca al conceyu Fonsagrada:
. Mirái, la Fonte Sagrada de los milagros ta equí - señálalo nel planu.
- Nun sobrará, fía del alma ....
- Nun sedrá pa tanto, ho. Equí ta L'Ayuntamientu modernu, equí l'antiguu, el Muséu Etnográficu y la Ilesia Sta. María; tres del ábside ye ande s'atopa la célebre Fonte los Milagros.
- ¿ Y depués de rezar tantu ónde podríemos alcanzar la gloria d'una tapina pulpu?
- Hai dellos Bares y Pulpeires ande poder tastiar el meyor pulpu de Galicia (tuse) pero nun pueo emponderar una sobro la otra; probái delles. [ Miro en google y veo dos pulperíes : Candal y A Caldeira, nesta yá lo probare yo va años cuando facía cursos d'asturianu n'Ibies].
- Bueno, y pequí a mano tenemos dalguna cascada o tabayón ?
- Sí, como a 8 km tenéis la Seimeira - nós llamámosles ansina - de Vilagocende, la mayor de Galicia. Forma parte d'una ruta de pocu más d'un kilómetru, fácil, fácil.
- ¿Y dalguna cosina más aparte A Proba de Burón, onde pensamos dir?
- Pos bien cerquina de la Puebla de Burón tenéis, na Ruta Castañoso, una sauna ya un castru, un molín, cortinos ... Namás 6 km, circular.
- ¿Dalguna mámoa ?
- A poco salgáis de Fonsagrada, siguiendo'l Camín, tenéis el dolmen de Montouto amás de les ruines d'un hospital de pelegrinos.
- Cuido que tenemos a esgaya cola información que nos tien apurrío. Munches gracies, señorita.
- Nun dexéis de sacar el carné p'algamar la COMPOSTELANA, hai una Oficina'l Pelegrín nos baxos de la ilesia de Santa María, según baxáis.
- Nun s'esmoleza por ello, somos mui devotos de Santiago. Fasta ceo. Adeus.
- Ata máis ver, asturianos.
La Ilesia Santa María de Fonsagrada ta asitiada dafechu nel Camín Primitivu, na Rua Mayor , xunto la Plaza España. Trátase d'una construcción barroca, en mampostería de pizarra, de los sieglos XVI / XVII de planta en cruz llatina, con tres naves ya un ábside octogonal cubiertos con llousa prieto. L'accesu faise al traviés d'un pórticu cuadráu con arcu de mediu puntu que prollonga nuna torre campanariu de tres cuerpos rematada pon una cúpula con bola. Nel interior caltién un retablu bien bultable asina como dellles escultures de santos.
***************************
Namás quedaba llamar al taxi pa tornar al nuevu Albergue Porta de Grandas, onde pensábemos agospiar Nun tardó Bernardo, propietariu del Albergue, nin media hora n'apaecer. Asina da gustu.
Mientres espérabemos por él echamos una güeyada a la Ilesia Santa María. La fonte sagrada ta asitiada tres de l'ábside pero esta vegada nun la vimos, tábemos un poco cansaos sicasí pensamos agospiar un par de díes nesta villa'l próximu día qu'embredemos col Camín.
L' Albergue Porta de Grandas, na cai Los Tilos, ye nuevu, vien d'abrir a finales d'esti branu na cai Los Tilos, a la entrada del pueblu viniendo del Embalse de Salime. Tien 35 places ente cuartos compartíos y habitaciones dobles. Nun-y falta de nada: Wi-fi, lavadora, secadora, nevera, microondas, taquilles y hasta una cocina individual onde los pelegrinos puen tresnar ellos mesmos la comida y darréu tomala nel comedor o terraza. Lo más nuevo y col preciu más baxu amás del tratu candial de María José y Bernardo.
Anduvimos más de lo que contábemos, ¡llegamos a Galicia!. La vuelta ficímosla por Santaya d'Ozcos onde tuvimos intención de fer la Ruta de la Seimeira; intentámoslo pero andávemos un poco roceanos y dimos la vuelta dende Pumares, onde realmente entama la ruta. Ye curtia, unos 4 km; queda pendiente pa la próxima visita, llevaremos los guajes.
Nun teníemos ganes tirar pa casa - esto de caleyar ye lo que tien - y paramos en Castropol, pos nun lo conocíemos. Foi una prestosa mañana pola Ría del Eo con Figueiras y Ribadeo enfrente.
ESTIMANCES:
. Al Muséu del CASTRU SAMARTÍN, pol so tratu, la so esposición y les sos granibles esplicaciones.
< Castru Chao Samartín - Altu O Acevo>
(9 km)
 |
| Saliendo d'El Chao (Castro) |
[ Castro ye una llocalidá d'unos 50 habitantes que pertenez al Conceyu de Grandas de Salime. Ta asitiada nun pandu a 673 m/a al delláu la carretera AS-28. El pueblu ye guapu en sí por lo bien asitiáu, soleyeru, con bones tierres de llabor y praderíes cercanes poro yá tevo habitaú, cuando menos, polos celtes de la Edá del Bronce (XIX-VIII e.X.) onde establecieron un castru que nel s. I foi aprovecháu polos romanos con envís d'arramplar col oru que guardaben les nueses montañes. ]
 |
| Ciclistes, volando tres la "compostelana" |
 |
| Ilesia Sta Mª Madalena Penafonte. |
- Tranquilos, pa salir a la xeneral tiráis per equí p'arriba y yá la pilláis otra vuelta; nun arrodiasteis ná, ensiguida veis Peñafonte.
 |
| La FONTE col Llavaderu. Al fondu la Peña. |
Penafonte acolúmbrase dende lloñe, ta asitiáu nuna cotariella embaxo unos molinos de vientu, d'esos que producen lletrecidá. D'esti pueblu nun se puen ún escaecer, les mesmes señales t'empobinen a él. Ye preciso xubir, ente cases de mampuestos, una cuestuca bien empinada p'arribar a la fonte al delláu d'una peña, que-y da nome al llugar. Llegamos - somos una zubiella pelegrinos - a una plazoleta formigonada, bien afayaiza, astiada delantre una ilesia rural y del llavaderu, percuriáu, que s'aprovecha de la fonte.
- Ehí les tienes, la fonte y la peña: Peñafonte (850 m/a).
- Voi aselar un poco nesti escañu del cabildru, toi matá.
- De pasu llees la epigrafía pelegrina de los bancos.
- It is cold! - diz una mocina foriata que vien d'echar un tragu d'agua.
- It's very very cold but very good - arrepostié yo, tres pensar un cachu, tratando facer alcordanza del mio english de párvulos yá escaecíu. Debí pronunciar mui bien porque la rapaza nun paraba de rise... la h.odía.
[Penafonte ye una parroquia del conceyu de Grandas de Salime que tien una estensión de 19 Km2 con algo menos de cien habitantes repartíos en catorce núcleos de población siendo esti nel que tamos el más pobláu.]
Al salir de Peñafonte un cartelu diz que nos queden 3 kms p'algamar al Altu l'Acebu pero nós nun vamos dir pela carretera xeneral sinón siguiendo un senderu zahorra pela fastera del Monte Do Zarro, hasta alcanzar la cota de 1100 m/snm. A lo primero cuesta un poco pero ensiguida se fai mui llevadero hasta que topamos otra vuelta cola AS- 28, compañera del alma. Da gustu caminar per esta viesca ente brezoz, toxos, felechos, abedurios, carbayos y numberosos capudres.
 |
| Capudre |
[[ El capudre (Sorbus aucuparia) ye un arbolín plani-caduci-foliu, hermafrodita (flores machu y fema na mesma planta) que pue algamar los 25 m/altor seique nu ye lo normal. Tien la groma oval y poco trupo siendo la corteya'l tueru d'un gris buxo.
Les fueyes son compueste y alternes ya imparipinnaes (impares) de 13-17 foliolos aserraos y con cieta pubescencia pel raquis y nervios.
Les flores - xunu/agostu - van en grupos tipu umbela (paragües) con 5 sépalos y otros 5 pétalos blancos qu'abelluguen numberosos estames. El carnosu frutu coloráu - ricu en vitamina C - conocíu como mostaya (mostal.la), de tastu ásperu y fariñosu, ye'l petite de los páxaros; los cazadores sábenlo y avecen a esperalos, tapecíos, pa llevalos al zurrón. Tamién los humanos podemos comer la mostaya seique ye un poco astrinxente; bueno, si tienes diarréa pistonudo. Hai quien saca dulce d'ello ya otros aguardiente.
 |
| ¿Agarrándose al capudre, talo Thor, pa salvar del Ríu la Muerte? |
El capudre, como yo, ye heliófilu - vamos, que-y presta'l sol como'l carambelu - y s'adáptase a suelos estremaos seique prefier los caliares, fondos y llentos; home, va.... Pues alcontralu hasta cerca los 1700 m/a acompañáu por bidules, carbayu albar y falles. Tien una especie mui asemeyada, l'alcafresnu (Servus doméstica L) que da un frutu nomáu silva y abonda na parte oriental d'Asturies, más mediteránea.
El capudre, conocíu como serval de los cazadores, tien raigaños máxicos; el dios Thor pudo salvase del Ríu de la Muerte agarrándose a esti árbol.]]
 |
| Camín d'O Acevo per aciu'l Monte la Curiscada. - ¡Ábrite, Sésamo! |
- Bye, bye ...
- Ta llueu, guapines. - (¡¿Tarán de coña?!)
 |
| - ¡Bye, bye, Asturies! |
<<Gallegos y asturianos
primos hermanos>>
- ¡¡ Bye, bye, Asturies !!
Ceo entamamos a baxar. Hai qu'andar con pies de plombu por mor de la piedra suelto.
- ¡Mira qué pueblu naquel altu!
- ¡Qué guai! Ye granducu, ¿eh?. ¿Qué crees que pue ser?
- Cuido que pue ser Fonsagrada, nun hai otru tan grande en tola redolada.
- Coimes, pos anque paez cercanu deben faltanos tovía .
- Doce (12) kilómetros buenos, tengo alpuntao.
- En fin, como güei nun vamos dir allá ...
...
 |
| - Tranquilos, ho; tamos como D. |
La baxada del Monte La Curiscada, na Sierra O Acevo, hasta l'antigua Venta del Acebu asitiada al par la carretera LU-701 faise per una pista ancha, llarada de curves , metanes una viesca onde predomina'l pinal pero nun falten los carrascos (acebos) nin el bricial-toxal tan necesariu pa'aguantar el tarrén y la numberosa garulla de cuarcita suelto qu'amuesa de xemes en cuando. Tamién hai alguna castañal, carbayos o bidules; vese qu'antes yera viesca misto.
Acolumbramos al fondu'l Chao de Foláis, qu'hemos de xubir, y a mandrecha, bordiándolu, l'A Valía da Fonte, onde ñaz el Ríu Nabalón.
El Mesón O Acevo ta asitiáu nun requexu la esplanada que domina la llomba; un encruz de carreteres no alto del pandu. Sábese qu'esta Venta tien más de cuatrocientos años d'hestoria pero son de supone-y munchos más; per equí pasaba una calzada romana que comunicaba Asturies con Galicia, pero antes yá transitaben per esti Camiño Real los vecinos col ganáu y los pastores treshumantes.
O Acevo ye'l puntu más altu del Camín Primitivu en Galicia algamando los ..... m/a. Nesti monte son célebres les Medorres o Mamoes Neolítiques, monumentos funerarios tipu dolmen asitiaos en pequeños montículos de tierra colos qu'horrar a los antepasaos y señalar el territoriu d'un clan.
 |
| - ¡Vaya baturiciu tan prestosu! |
Y mira que tien coses ... Ye'l típicu Bar-Tienda onde s'acuentra de too, moderno ya antiguo, muncho d'ello obsoleto dafechu como los sifones. Esto ye como la tienda'l Muséu Etnográficu de Grandas pero "a lo bestia". Nós aprovechamos pa tomar la parva, un vinín pa dar entrada al pinchu de cecina y quesu. Yá tamos como motos, como Marc Márquez. Y miramos ún pa otru ...
 |
| Pel Chao de Folais (1026 m/a) Allalantrones Fonsagrada. |
- ¿Qué facemos, cristiana? ¿Cómo t'alcuentres?
- Yo por min ....
- Por ti, ¿qué?... ¿Tas pa siguir?...
- Pos sí, nada nun me duel; si te prúi podemos tirar otru poco, hasta'l próximu empalme cola carretera.
- Nun ta lloñe, podemos intentalo y si éso llamamos al taxi.
- Acuéi.
Pagamos y al salir damos un respingu al sentir d'esmenu'l sonar d'un cencerru :
- ¡Gracies pola propina!.
El Bon Camín embreda cuestarriba, tres del Bar, dica'l Chao de Folais (1026 m/a) onde alcontramos dellos acebos o carrascos. Tres la cuesta enllanamos, caminando per un pandu abiertu , de lo más afayaizo, a vegaes paralelu a la carretera. Dende lo más alto acolumbramos al fondu la panorámica una ciudá asitiada bien alto; nun ye otra que Fonsagrada.
 |
| Llegando a Cabreira |
Tres un xube y baxa, per una pista acutada, con baranda tornamieos - ¡qué nivel, Galicia!- llegamos a Cabreira, llugar de la parroquia Minteseiro y conceyu Fonsagrada. Lo que vemos ye otra venta na llanera, pegada a la carretera.
- ¿Otra venta?. Mira aquel monovolumen naranxa que ta estacuináu delantre, asemeya'l taxi de Bernardo.
- ¡Anda, si ye él!
- Bonos díes, señora taxista, ¿nun tará esperando por nós? - dixe con un poco goña.
- Pos sí, como quedareis llamar dende l'Acebu ....
- ¡Madiós!, yera si lo precisábemos pero como decidimos siguir ... Qué fallu tuvi, tenía qu'haber llamao.
- Nun t'esmolezas, en realidá terminé facer un serviciu pela zona y Bernardo encamentóme pasar pol bar, por si nos precisabeis ; como nun tabeis averéme hasta Cabreira, por si acasu.
- Gracies y milentamil gracies, sois los ánxeles de la carretera.
 |
| <Un momentu del Camín> |
- Vamos intentar llegar a Fonsagrada, en cualquier casa avisamos cuando seya necesario.
- Ta llueu; dir tranquilos, taremos soyertes.
[ Teo que dicir que nin d'esta visita fallida nin de la xubida mañanera al Chao nos pasare factura Bernardo. Tamién ye verdá que la segunda nueche en Grandas agospiamos nel Albergue de so propiedá qu'en realidá rexenta la so muyer. De cine. Acaben d'inaugurar l'Albergue <Porta de Grandas>. Ye una casona a la entrada de Grandas, Avenida los Tilos, namás desembocar del Camín Xacobéu según se vien del pantanu de Salime.]
 |
| Aportando al Hospital de Pelegrinos d'A Fonfría. (Nun sabe que yá peslló a primero del sieglu pasáu) |
 |
| La fonte fría de Fonfría. |
[ La Orde de los Caballeros de San Xuan conocida tamién como Orde de los Hermanos Hospitalarios o Orden de Malta (1530) entamó por ser una suerte d'ONG con fines benéficos pero terminó por convertir nuna orde al usu, de caballeros guerreros, qu'algamó importantes victories.
A partir de 1188 contó con una rama femenina seique nun yeren amazones, dedicaben a la vida contemplativa ya hospitalaria; menos mal.
La primer casa n'España nació en Santa Mª de Sigena (Villanueva los Monegros- Huesca) de la mano de Sancha de Castilla, consorte d'Alfonso II d'Aragón.]
 |
| BARBEITOS: <Mesón 4 Ventos> |
Salimos de la carretera pa caleyar pel Monte de Penoucos (999 m/a) hasta que salimos a l'altura de Barbeitos, un pueblín de la parroquia de Fonfría, conceyu de Fonsagrada, que nun llega a los 20 habitantes, pero que tien un horru de castañu de 1850 y tamién ...
¡Tien un mesón! Otra venta, <Mesón Cuatro Ventos> y con tola razón, talo les otres, albentestate. Ye célebre poles carnes a la brasa ya embutidos y productos de la zona; si tienes tiempu ... Failu.
 |
| Pelegrín |
 |
| Pelegrina arribando a la Capiya Santa Bárbara (Silvela) |
Tres cruciar la carretera LU-701 otra vuelta vamos algamar al Área Recreativa de la Ermita Santa Bárbara. Son les cuatro menos cuartu (15.45) y la parva d'O Acevo yá quedare bien amortizada. Nuna mesa de madera aprovechamos pa xintar un bocata, la llacuada dexámosla pa la nueche, en Ca Sánchez de Grandas; nun hai pulpu y Ribeiro como eso. Comimos tranquilos al par d'otros pelegrinos estranxeros que descansaben nos bancos; Fonsagrada yá ta a tiru flecha, nótase la gayola nes cares, cansaes ya aprovecientes.
Como siempres, tres la xinta hai que xubir un repechu, curtiu esta vez, seique nun va ser el últimu. Per una sienda amplia y acutada por una barganal que nos defende del tráficu la carretera xeneral vamos arribar a l'antoxana d'A Fonsagrada : la fondera (¡840 m/a!) Paradonova, parata nova, un llugar que fai referencia a les posaes pa pelegrinos onde podíen - y pues - encamentase a Santiago dende'l pórticu d'una capiellina rectangular con techume madera a dos agües. Nel altar un ánxel abelluga a la Virxe del Rosariu, a San Xosé y hasta la mesmísima Santa Cruz, de la que recibe'l nome.
El gran pueblu, el de la Fonte Santa (952 m/a), el petite de güei y de tantos díes, ta a la fin al algame de la mano; namás queda xubir una cuestuca de nada, ¡pero vaya repechu!. De 840 a 952 hai 192 m de desnivel, en nada.
Quedamos dubitatibles enantes d'arancar pos teníemos tres opciones:
. Carretera xeneral, refugada dafechu por mor del tráficu.
. Caleya a manzorga, ye la que aconseyen, pero tamién la escaecemos porque de mano hai que baxar y pensamos que la cuesta venidera sedría entá mayor y ...
. Cruciar la xeneral y xubir pero onde pon : A Proba do Burón, un llugar míticu pa nós onde pensamos dir na próxima visita. Chupamos mediu km más ¡por llistos!. Aportamos a la entrada'l pueblu al tiempu qu'unos collacios de ruta que quedaren anantes xintando en Santa Bárbara.
- Par ici, c'est plus curt .
- A buenes hores, mangues verdes.
- ¿¿¿ Mangues verdes ????
- Au revoir. Bon chemin!
**********************
¿Por qué queremos visitar A Proba de Burón? ... ¿Porque ye una de les variantes del Camín del Camín Primitivu pa salir d'A Fonsagrada camín de Llugo? ... Non, habría ser, porque en realidá esi yera'l camín primixeniu pel que pasó'l primer pelegrín, Alfonso II, pero nun ye esa la única razón; la xida ye por mor d'una olla qu'aprució nel castru del Chao Samartín y que na boca del cuellu lleva una inscripción que fai referencia a l'amistá ente dos pueblos albiones: Buroflavia (La Puebla de Burón), como dedicante ya Ocela (Chao Samartín), como receptor; esti regalu tiennos aliellos dafechu.
**************************************
 |
| La Fontem Sacratam del agua milagroso. (Semeya prestada por: <verpueblos.com>) |
La fonte sagrada tien les sos lleendes. Unos dicen qu'un día tando Santiago predicando per estes tierres aparecióse-y a una madre perprobe que nun tenía un res pa dar comer a los fíos pero atendió al Apóstol curándo-y les firíes; esti, agradecíu, convirtió en lleche l'agua de una fonte. Otros creen que foi la Virxe la amiyó na fonte pa socorrer a una pelegrina qu'andaba malecía. En cualquier casu esti agua resulta milagroso, nun pienso dexar de probalo.
 |
| Blasón heráldicu: En campu de sinople una torre d'oru custodiada por dos tiestes de llobu, n'oru, llinguaes de gules. En xefe una venera de plata y en punta dos ondes del mesmu metal. En timbre la Corona Real zarrada. |
La Fonte-Sagrada entró na historia hacía'l sieglu IV per aciu d'un vía romana (siguiendo caminos prehistóricos) que diba comunicar Asturies (Uviéu) con Llugo. A partir del IX foi algamando sonadía por mor del Camín Primitivu a Santiago - el nuesu rixu - viéndose obligada a llevantar varios hospitales pa pelegrinos ya una capiella como Santa María, cerca precisamente de la Fonte Sagrada que curaba les firíes dexándote como nuevu p'algamar a Llugo y darréu a Compostela (cómo lo movéis , h.odíos). Ún d'esos hospitales - Santiago - foi mandáu llevantar nel sieglu XIV pol mesmísimu Pedro'l Cruel, o'l Xusticieru (1350-1369), rei de Castiella.
Les tierres de Fonsagrada tuvieron na baxa Edá Media, en manes de los condes de Trastámara y darréu nos d'Altamira pero dengún dexó bon recuerdu por los munchos abusos tributarios con que cargaron a los vecinos. Tola vida estos tuvieren lluchando por unos fueros dignos. La Guerra la Independencia (1808-1814) y más tarde los carlistes (1833-1847) nun ficieron otro que trayer más anoxu y miseria a esta bona xente a los que'l lliberalismu tampoco sacó de probes. Nes cortes republicanes de 1943 sacaron un diputáu procurador sicasí l'allegría en casa'l probe dura poco, nel 36 la Guerra aventó la llibertá penriba la Sierra l'Hospital .
 |
| Antiguu Ayuntamientu de Fonsagrada |
Fonsagrada asina como Negueira de Muñiz formaron parte hasta 1835 del municipiu de Puebla de Burón perteneciente a la provincia d'Asturies, que foi cuando entamaron a pertenecer a Llugo (Galicia). Vamos, que la Fonte Sagrada yera asturiana, ¡sigo en casa!, como nun voi dir a Puebla de Burón si tamién ye de mio, a ver qué va ser esto ...
Ye de fer notar la importancia que tevo na provinvia de LLugo, y sobremanera nestes tierres, la Orde de los Caballeros de San Xuan; yá lo mencionamos en Fonfría y tamién son conocíos n'O Padrón, en Paradavella y n'A Allonca. ]]
********************************************
Tres arribar al centru Fonsagrada lo primero que ficimos foi aselar un poco mientres tomábemos una clara. Darréu fuimos a buscar la Oficina de Turismu pa recoyer información. Nun barracón de madera atendiónos una mocina mui amamable:
 |
| Rueiru de Fonsagrada |
- Bones tardes, ¿tán faciendo'l Primitivu, non?
- Con esta pinta nun despistamos a naide, ¿eh?; tamos faciéndolu a cachinos, pasu ente pasu, non de contino. Esto que-y digo, pensamos agospiar unos díes en Fonsagrada pa facer dende equí unes estayes hasta LLugo, ¿podría indicanos un hotelín afayaizu dao que yá nun tamos pa cuartos compartíos?. Y de pasu si nos cuenta lo que hai per equí cerca, nel conceyu ...
- Tenéi, esti ye un mapa caleyeru de la villa - un rueiru - y esti otru trai to lo turístico no que cinca al conceyu Fonsagrada:
. Mirái, la Fonte Sagrada de los milagros ta equí - señálalo nel planu.
- Nun sobrará, fía del alma ....
- Nun sedrá pa tanto, ho. Equí ta L'Ayuntamientu modernu, equí l'antiguu, el Muséu Etnográficu y la Ilesia Sta. María; tres del ábside ye ande s'atopa la célebre Fonte los Milagros.
- ¿ Y depués de rezar tantu ónde podríemos alcanzar la gloria d'una tapina pulpu?
- Hai dellos Bares y Pulpeires ande poder tastiar el meyor pulpu de Galicia (tuse) pero nun pueo emponderar una sobro la otra; probái delles. [ Miro en google y veo dos pulperíes : Candal y A Caldeira, nesta yá lo probare yo va años cuando facía cursos d'asturianu n'Ibies].
 |
| Seimeira de Vilagocende (Semeya:<jardincelas.com>) Espero poner un día la propia. seique nun algame esti preste. |
- Sí, como a 8 km tenéis la Seimeira - nós llamámosles ansina - de Vilagocende, la mayor de Galicia. Forma parte d'una ruta de pocu más d'un kilómetru, fácil, fácil.
- ¿Y dalguna cosina más aparte A Proba de Burón, onde pensamos dir?
- Pos bien cerquina de la Puebla de Burón tenéis, na Ruta Castañoso, una sauna ya un castru, un molín, cortinos ... Namás 6 km, circular.
- ¿Dalguna mámoa ?
- A poco salgáis de Fonsagrada, siguiendo'l Camín, tenéis el dolmen de Montouto amás de les ruines d'un hospital de pelegrinos.
- Cuido que tenemos a esgaya cola información que nos tien apurrío. Munches gracies, señorita.
- Nun dexéis de sacar el carné p'algamar la COMPOSTELANA, hai una Oficina'l Pelegrín nos baxos de la ilesia de Santa María, según baxáis.
- Nun s'esmoleza por ello, somos mui devotos de Santiago. Fasta ceo. Adeus.
- Ata máis ver, asturianos.
 |
| Ilesia Santa María, barroca, na Rua Mayor. <Camín Xacobéu> |
***************************
Namás quedaba llamar al taxi pa tornar al nuevu Albergue Porta de Grandas, onde pensábemos agospiar Nun tardó Bernardo, propietariu del Albergue, nin media hora n'apaecer. Asina da gustu.
 |
| Albergue Porta de Grandas, na Cai Los Tilos. |
L' Albergue Porta de Grandas, na cai Los Tilos, ye nuevu, vien d'abrir a finales d'esti branu na cai Los Tilos, a la entrada del pueblu viniendo del Embalse de Salime. Tien 35 places ente cuartos compartíos y habitaciones dobles. Nun-y falta de nada: Wi-fi, lavadora, secadora, nevera, microondas, taquilles y hasta una cocina individual onde los pelegrinos puen tresnar ellos mesmos la comida y darréu tomala nel comedor o terraza. Lo más nuevo y col preciu más baxu amás del tratu candial de María José y Bernardo.
 |
| Ría del Eo, la que xunce Asturies con Galicia. Al fondu la Ponte los Santos que t'embreda a Ribadeo. |
Anduvimos más de lo que contábemos, ¡llegamos a Galicia!. La vuelta ficímosla por Santaya d'Ozcos onde tuvimos intención de fer la Ruta de la Seimeira; intentámoslo pero andávemos un poco roceanos y dimos la vuelta dende Pumares, onde realmente entama la ruta. Ye curtia, unos 4 km; queda pendiente pa la próxima visita, llevaremos los guajes.
Nun teníemos ganes tirar pa casa - esto de caleyar ye lo que tien - y paramos en Castropol, pos nun lo conocíemos. Foi una prestosa mañana pola Ría del Eo con Figueiras y Ribadeo enfrente.
ESTIMANCES:
 |
| Pumares (Santaya d'Ozcos) Entamu la Ruta de la Seimeira. |
. Al Ayuntamientu de Fonsagrada pola so páxina web ya Oficina d'Información y Turismu.
. A Xurde Morán pol so blog al rodiu'l <Camín Primitivu>, un tetu inescosable.
. A Isabel SS. por encamentame a Alana pa facer el Camín Primitivu (cuido que-y voi echar el picáu) y pola bayura de llibros al rodiu'l Reinu d'Asturies).
. A la Wikipedia, consultora impenitente; a Asturnatura, siempres a mano; y al blog <dendecagüelu>, onde m'agabito davezu.
. A Bernardo, el taxista de Grandas que se desvela pol pelegrín.
. Al Hotel "La Barra" y al "Albergue Porta de Grandas" pol so tratu afayadizu asina como al "Bar Occidente" que tresna'l pulpu como naide ya igua los carah.illos con amor de madre.
. A <jardincelas.com> robéi la Seimeira de Vilagocende y
a <verpueblos.com> la Fontem Sacratam.
. A tantos vecinos como nos apurren información y gayola coles son cháchares.
. A Javier Almuzara polos sos poemas que de xemes en cuando evoco nel Camín.
**********************************
. A Xurde Morán pol so blog al rodiu'l <Camín Primitivu>, un tetu inescosable.
. A Isabel SS. por encamentame a Alana pa facer el Camín Primitivu (cuido que-y voi echar el picáu) y pola bayura de llibros al rodiu'l Reinu d'Asturies).
. A la Wikipedia, consultora impenitente; a Asturnatura, siempres a mano; y al blog <dendecagüelu>, onde m'agabito davezu.
. A Bernardo, el taxista de Grandas que se desvela pol pelegrín.
. Al Hotel "La Barra" y al "Albergue Porta de Grandas" pol so tratu afayadizu asina como al "Bar Occidente" que tresna'l pulpu como naide ya igua los carah.illos con amor de madre.
. A <jardincelas.com> robéi la Seimeira de Vilagocende y
a <verpueblos.com> la Fontem Sacratam.
. A tantos vecinos como nos apurren información y gayola coles son cháchares.
. A Javier Almuzara polos sos poemas que de xemes en cuando evoco nel Camín.
**********************************
