RUTA CLARINIANA [3] : "DOÑA BERTA"
L'Ayuntamientu de Carreño (Asturies) tevo la gran idea d'iguar unes rutes lliteraries de senderismu per aciu d'unos cuentos de Leopoldo Alas "Clarín", meciendo'l deporte cola lliteratura; una idega exemplar. Foron tres les que tresnó: "Viaxe redondu", per Llogrezana y Guimarán; "Boroña", pa descubrir Prendes ya Albaldi y por último "Doña Berta", la que trataremos güei, pos les otres dos yá va màs de cinco años que les tenemos fecho y sacao a la lluz.
Entramos nel Barriu del Pineo onde se fai notar una quintana asitiada na llomba d'amanzorga onde unos pinos mui prestosos con copa de pame abelluguen la casona. Nun ye manca d'estensión la casería - dellos tractores esperen pacientes la entrada en faena - ornada tamién por una vistosa panera tipu carreño.
Namás pasar esta célebre quinta entramos nel Barriu del Regueral porque ríu, ríu nun llega haber pero sí un par de riegues - Noval y Raitán - que se mecen na Matiella pa formar el Riucu de Candás (o de Rita). Ye grande'l barriu y con bones cases siendo la más sonada la Casa de la Torre, de los González Pola que tantu arraigu tienen en Carreñu ( nun mos escaecemos del palaciu xunto a la Ilesia de LLuanco) qu'amás de palacín tien una capiella ya una panera tipu carreñu que manca la madera. ¡Vaya dibuxos! ¡Vaya coloríu! ... La Casa, perbién conservada y con igües de 2011, ta asitiada a la vera la CE-1 y blasonada col escudu de los Pola. Foi construyida en 1811 (XIX) como reza una lleenda encabezada por una cruz :
< Añu de 1811 la gracia del Espíritu Santu sía pa con nos. Fui edificada pol mio dueñu Don Thomás González POLA, rexidor perpetuu, que lo tien heredao de la so antepasada Doña Catalina Fernández, nel so testamentu d'esti añu el peor que tengo visto dende'l VI >. En realidá la Casa de la Torre tien unos raigaños más antiguos, del sieglu XVI (1550) cuando Pedro Fdez de Luanco llevantó una casería. Son célebres les orixinales piedres de les ventanes norte con sendes inscripciones, una col escudu de los Pola y la otra cola lleenda que venimos de nomar faciendo referencia al mal añu de 1811: Guerra la Independencia onde'l reximientu "Asturies" taba batiendo'l cobre en LLeón, males condiciones climátiques, muerte de Xovellanaos...
La Capiella de La Torre - seguramente de primeros del XIX - de cuerpu rectángular y dos naves, ta desimía de la Torre, esenta, ya enfrentada a la fachada oeste de la casona. Tien un pórticu a tres agües, abiertu, mui llamatible, sofitáu en columnes dóriques. De mano tevo embaxo l'advocación de Santu Tomás, más tarde de San Xuan (una de les poques talles que salvó de la Guerra Civil (36), depués de Santa Bárbara, por eso de les mines que s'abrieron nel Regueral a primeros del XX y anguaño ta presidida pol Cristu del Amparu.
Aportamos al cruce entamu oficial de la Ruta, onde acaba El Regueral y entama'l Barriu de la Xunca. Entrugamos a un señor del barriu que vive nuna casería si podemos dexar el coche un poco metíu nel prau y nun pon denguna torga. De pasu aprovechamos pa falar con él de la Ruta Clariniana: - Sí, podéis dexar el coche si nun estorba pa otros . Pa la ruta que me dicís tenéis que xubir la cuesta la Teyera y pasando la Ilesia Pie del Alloru* tiráis pa Zanzabornín. Ellí garráis la CE-1 y llegáis equí.
P'aportar a < Casa Ramón de Casimira>, una casería en toa regla, hai que xubir una cuesta perpindia, menos mal que ye curtia. La Primero que ves ye un palombar modernu, redondu, de ladrillu cara vita acolorazao. Darréu ta la casa que vista dende ellí nun diz lo que ye, paez poca cosa pero tien una nave industrial, adosada, que la fai muncho mayor. Lo que más llama l'atención ye un panerona de tipu carreño con unos dibuxos mui llamatibles y mensaxes cristianoides nes puertes:
- ¿Pueo saca-y unes semeyes a la panera? - Dende llueu. L'otru día tuvo equí un señor d'Uviéu sacando semeyes y faciendo dibuxos, dixo que yera un especialista. Déxame que te zarre les puertes que ye muncho más guapa. Les dos ñetines plantáronse enriba la tenobia nun santiamén mientres yo buscaba'l sitiu afayaizu pa sacar la semeya.
De la ilesia a la carretera hai cuatro pasos. Ensiguida dimos cola Escuela Moderna onde sacamos la semeya afayaiza. Un pelín más allá - tirenado a mandrecha - ta'l "Centru d'Iniciatives de Pieloro" y al final de la recta la Antigua Escuela convertida dende va tiempu nuna Carpintería pero manteniendo la casa. Nun viemos a naide pero cuando tuviemos equí va cinco años falamos col allegre carpinteru Xulio, que s'instalare equí col sofitu del Principáu. Los aperos de la carpintería taben en so sitiu, había madera nuevo y al par de casa un güertu polo que camentamos que'l proyeutu sigui en funcionamientu; deseyámos-yos lo meyor y que tea recuperáu del llombu, cuando andaba montando horros perdayuri.
Pasamos les cites lliteraries 7ª y 8ª , una capiellina dedicada a la Santina y tres cruciar les víes del tren sentamos un ratín nos bancos de la Estación-Apeaderu de Zanzabornín enantes de titar camín del Barriu la Uz pela carretera CE-1 hasta'l final - o principiu, según se mire - del Regueral, onde dexáremos el coche. Esti tramu - 3,5 km - de sele baxada tien pocu qu'amosar, más que nada dir charrando, camentando la xornada.
- ¿Qué te paeció la ruta? - De lo más afayaizo. Pocos kilómetros (7 km) , tiempu inmeyorable, seles xubíes y prestoses baxaes. Amás saqué dalgunes semeyes perguapes y los nomes de la novela salieron a rellucir. - Cuido que Clarín s'aprovechó de los nomes y de los paisaxes pero remanólos a so manera ensin que coincidan colos llugares que conocemos. - Toi d'alcuerdu contigo. La Ren, Susacasa y Arén queden pa otru sitiu. El Palaciu nun vimos y el Gatu .. - Yo tengo alcontrao ún, a ver si crees que puea ser pariente d'aquel ....
**************************************
El meyor escritor asturianu, el más clarividente, agriu y universal que tuvimos nestes tierres ñació en Zamora por circuntancies de la vida, pos so padre yera gobernador civil - a los siete años yá vivía n'Uviéu - pero elli foi ún de los cuatro mediucampistes que formaron el meyor centru del campu que tevo l'Uviéu a llargo de la hestoria: Tuero, Rubín, Palacio Valdés y Clarín.
Alfonso XII, <El Pacificador>, reinó dende 1874 hasta 1885. Foi un rei educáu nel estranxeru, mui cercau al pueblu, y con un ciertu caráuter lliberal. La si idea yera modernizar España y sacala del atrasu secular en que tábemos - gracies a los sos antepasaos y a la gloriosa Guerra de la Independencia - per aciu d'una enseñanza popular, del ameyoramientu de la cultura, la industria, el comerciu, les ciencies, les lletres y l'Arte; casi ná.
L'Ayuntamientu de Carreño (Asturies) tevo la gran idea d'iguar unes rutes lliteraries de senderismu per aciu d'unos cuentos de Leopoldo Alas "Clarín", meciendo'l deporte cola lliteratura; una idega exemplar. Foron tres les que tresnó: "Viaxe redondu", per Llogrezana y Guimarán; "Boroña", pa descubrir Prendes ya Albaldi y por último "Doña Berta", la que trataremos güei, pos les otres dos yá va màs de cinco años que les tenemos fecho y sacao a la lluz.
Ruta Clariniana "Doña Berta"
- ¿Petezte dir a Misa a Pieloro?
<< DOÑA BERTA >>
"Doña Berta" ye un cuentu - seique una novela curtia - de Clarín (1892) que nos trai n'alcordanza'l mitu del "Paradisu perdíu". Una muyerina asturiana vese obligada a treslladar a Madrid; a camudar l'edén astur por una vida impersonal de trabayu, dolor y muerte ... D'otramiente ye una obra de denuncia onde s'amuesa la ruina d'una sociedá inmovilista por mor del carlismu y del capitalismu. "Doña Berta" reflexa una sociedá caduca y tresnuechada, el Rondaliegu, qu'entá se caltién na zona rural per aciu los infanzones que con sos costumes arcaiques torguen el desarrollu. La protagonista, Doña Berta, va pasar del inmovilismu idílicu de l'Arcadia de Posadoiru a l 'aición más desbordante de la Capital d'España, cuando yá nun tenía edá pa ello. El contraste acaba con ella lo mesmo que'l lliberalismo va camudar l'Antiguu Réxime. C'est la vie.
La NOVELA : Desendolcu de l'Aición
El "Gatín de Doña Berta", qu'enxamás la desabeyó.
La novela tien como diximos dos partes bien estremaes:
La primera n'aldea de Posadoriu onde la familia Rondaliegu tien unes escases posesiones que-yos permiten dir tirando a Berta ya sos cuatro hermanos dao que van a medies colos caseros y demás trabayadores de la esplotación rural. La casualidá trai a les puertes de la facienda un maltrechu lliberal que termina namorando a la Doña y llevándola al güertu. D'aquel "frutu prohibíu" ella nun s'enteró pos los avergoñaos hermanos yá s'encargaron de tapar el pecáu.
La segunda , Doña Berta, llibre d'hermanos, hipoteca lo que tien y cola pa la capital d'España a la cata del posible fíu que ve reflexáu nun cuadru que-y regalare un pintor que dio por casualidá con Posadoriu. Doña Berta va tratar de mercar otru cuadru del mesmu autor que retrata la heróica muerte del posible fíu y , de pasu, pagar la delda que tenía enantes de morrer; esti va ser l'únicu motivu que-y caltién l'aliendu. La rondaliega morrerá nel intentu, pero Doña Berta, la carreñense, lluchó hasta'l final. Los olímpicos de Candás (Carreñu) van siguir el so exemplu dellos años más tarde.
************************
La <Ruta clariniana "Doña Berta"> , la oficial, entama en Piedeloro seique pues facela dende l'estrarradiu de Candás, al par del Campu de Fútbol, colo cual andarás (2,7 x 2= 5.4) unos cinco km y mediu más, eso va depender del to estáu d'ánimu. Nós tenémosla fecha entera va pa seis años... ¡Cómo pasa'l tiempu!. Anguaño vamos repetila - aprovechando'l tiempu la pandemia - pero va ser la oficial, dende Piedeloro (3,5 x 2 = 7 km), nun damos un pasu más (yá nun damos pa más, y veremos ....).
Ruta clariniana: "Doña BERTA"
Güei, 10 de Mayu de 2020 vamos , por fin, a finar cola la tercer Ruta Clariniana: "DOÑA BERTA" seique ye la cuarta vez que la facemos. Como'l cuerpu últimamente nun ta pa munches fiestes vamos siguir, andando, el trazáu oficial: Salimos del empalme qu'hai nel Barriu la Xunca y tiramos a manzorga pela carretera que va a Pieloru travesando l'Altu la Teyera y l'Altu de la Ilesia p'algamar a Zanzabornín. Llueu baxar pali-pali pela CE-1 pasando'l Barriu de La Uz hasta l'entamu; otra vuelta nel barriu de la Xunca onde quedáremos aparcaos. Como diximos unos 7 km de xube, baxa y llanea, que nun ta nada mal pa estos paisanuc@s.
 |
| L'entornu la Ruta Clariniana "Doña Berta". |
P'algamar a puntu de partía - Bº La Xunca - teníemos que cruciar Candás y tres pasar la Ilesia de San Félix torcer a manzorga carretera del Regueral y Zanzabornín pero .... Perdímonos, como siempres, y hasta la segunda vegada nun acertamos; coses de la edá... La primera vegada que tuviemos per equí, a primeros del 2015, cuando vinimos a tomar contautu con esta zona en cuantes vimos Regueral tiramos a manzorga, cruciamos les víes del tren (¡siempres el tren!) y a esguilar camín del ocalital al traviés del barriu...
- Tamos perdíos, tenemos qu'entrugar a daquién ... Nun se ve dengún cartelu, los finxos de la ruta.
- Ehí vien un coche, hai que paralu que per equí pasa poca xente.
Menos mal qu'aquel día preguntamos y pudimos aportar a Pieloro nel Barriu Altu, onde ta la Ilesia. Más p'allá, na carretera xeneral, vas alcontrate cola Escuela Moderna y tamién cola antigua, convertida nuna carpintería.
 |
| Potentes Caseríes n'antoxana El Regueral |
Güei [10-9-20] yeren les (11:10) cuando dexábemos atrás el Campu Fútbol del Candás y na zona de La Sierra díbemos alcontrando un xalé indianu - coles típiques palmeres - ya una casa mariñana con dalgunes caruterístiques estremaes, como tener el portalón nun lladral envede en mediu. Yá lo nonocíemos d'otres vegaes asina qu'a ferregüeyar y tirar p'alantre pos tábemos dispuestos a facer la Ruta como manden los cánones: l'oficial.
 |
| Quinta Rosalía |
- Bonos díes, señoras. ¿podríen dicinos cómo se noma a esa quintana del cantu?
- Ye la "Quinta Rosalía", tien muncho más tarrén de lo que se pue apreciar dende equí.
- Ta perbién asitiada, tien que tener unes vistes d'impresión. Gracies y que tengan un bon día.
 |
| Casa de la Torre (El Regueral). |
 |
| Piedra Casa de la Torre Inscripción fundacional. |
 |
| Capiella de la Casa de La Torre Típicu adriu y , al fondu, panera tipu Carreñu. |
El Regueral tien un reciente pasáu mui granible cuando la "Sociedá Mines de Fierro y Ferrrocarril de Carreño" se tien establecío na zona a la fin d'estrar el mineral de Fierro y tresportalo hasta'l Musel en tren. De mano diba d'Aboño a Candás con ramales a Coyanca, Pieloro y Regueral pero foi enantando, camudando de manes y enantando hasta completar Xixón - Avilés per aciu de la FEVE. Cuando Clarín escribió esta novela (1892) entá nun había tren que pasare pola zona, yera, en verdá, <un paradisu perdíu>. Les mines entamaron a esplotase a primeros del sieglu XX.
******
 |
| Barriu de la Xunca. Entamu de la ruta. Casona d'Aldea "La Frana". |
*Alloru: Lloréu o laurel.
Yeren les 11:33 cuando dexamos el coche tres preparar les mochiles. Cruciamos les víes del tren y entamamos la xubida. El Tren de cercaníes ta siempres presente, cada cuartu d'hora sientes ún pasar o bien sentíu d'Avilés (Xixón- Avilés) o bien sentíu Candás. Qué lloñe tán los camiento de Doña Berta de Rondaliegu cuando dicía:
- < Hai un llugar nel norte d'España onde nunca nun llegaron nin los romanos nin los moros>
Pos yá llega'l tren, Doña Berta, gracies a Dios.
 |
| Casería de "Ramón de Casimira". |
 |
| La célebre panera de Ca Ramón de Casimira. Pintada al estilu Carreño. |
A les 12 y cinco terminamos el Barríu de la Xunca ente maizales, una docena invernaderos y unes tierres mui granibles onde taben plantando tres rapazos verdures a mamplén bien estremaes . Ye una esplotación agrícola como Dios manda. Yá tamos nel Altu la Ilesia onde vemos la 4ª cita lliteraria:
- < LLegó'l capitán, un capitán de los cristianos; venía firíu, fuxíu. Cayó desmayáu delantre la portiella de la finca > .
En diez minutos tábemos delantre la Ilesia de Pioloro sacando unes poques semeyes pos yá teníemos abondo d'una visita que fixéremos en 2015; aquel día tan prestosu onde tuvimos la suerte de dar col señor Morán, la persona que curia de la ilesia dende va munchos años. Ye natural de Priendes, familiar del célebre cocineru de "Casa Priendes", onde les fabada tiense convertío nel maná de los ánxeles. Tuvo enseñándonosla dando esplicaciones al rodiu de la Virxe de Santa María de Pieloro y de la ilesia en xeneral.
 |
| Doña Berta nun pierde la misa magar el mal tiempu. Ilesia de Sta. María de Pieloro |
Diz el señor Morán que La ilesia de Santa María de Pieloro ye del sieglu XII, románica polo tanto, seique tien "sufrío" delles tresformaciones sobremanera nos sieglos barrocos XVII y XVIII ; d'esta época caltiense la espadaña, la cabecera cuadrada, l'adriu a dos cares y la sacristía a meudía- magar qu'él entá s'alcuerda de la cabera del XX "onde se tienen alcontrao munchos güesos". Nel XIII - XIV llevantóse la Capiella Mayor d'estilu protogóticu, dalgo apuntada. Nel XVI creóse la Capiella de Nª Sª de les Ñeves adosada a la muria sur de la Capiella Mayor.
 |
| L'Arcu de trunfu da pasu al presbiteriu. |
Ye perinteresante la so decoración esotérica, misteriosa y simbólica que pasa un poco desapercibía. Tamos énte una de les poques ilesies romániques asturianes con tres portaes magar que la del norte tea tapiada. La Sur presenta doble arquivolta y sofita sobro impostes de decoración xeométrica mientres la occidental - abocinada - ta nun saliente del edificiu con tres arquivoltes sofitaes en columnes colos capiteles docoraos.
 |
| La Virxe indiana. |
Tien una sóleda nave reforzada con recios contrafuertes lo que-y permitió abrir delles saeteres qu'anguaño tamién tán tapiaes. Tou l'interior ta mui iguau pos pasó munchos avantares cuando la Guerra Civil ( ¡Qué bien tábemos con un gobiernu progresista d'izquierdes que nun s'obsesionara con delles obres d'arte!). La cubierta de madera pasó a una bóveda de cañón con llunetos y arcos faxones. La cabecera tamién tien bóveda nervada, ornada con ménsules. L'ábside ta separtáu de la nave por un arcu de trunfu sofitáu en columnes con capiteles decoraos. Comimos percontentos nel cabildru la Ilesia; nun sé si fue porque Morán nos dixera qu'hubo un tiempu que'l adriu ficiere d'Escuela, pos nun había nada meyor, polo menos nun llovía.
*****
 |
| La Escuela Antigua, anguaño CARPINTERÍA |
 |
| El Regatu de la vergoña, según la visión de los Rondaliegos. (Semeya I. del Rivero: "Dª Berta" |
Pasamos un depósitu d'água nun ocalital y tres lleer la 6ª cita aportamos a un cruce que zarra una casería y tornamos a mandrecha, cuestabaxo, camín de Zanzabornín. A mandrecha queda El Rendaliegu, topónimu de la familia protagonista de la novela : Los Rendaliegos. Bien cerca pasa El Regueru de Noval, quiciabes del que fala Clarín na novela, esi que cruciaben los aldeanos p'amosar los sos drechos énte la clas dominante; esi que tantu enritaba a la nobleza rendaliega que comparaba la yerba pisao colos sos drechos pisotiaos.
 |
| El tren pasa per ZanzABORNÍN, si Doña Berta llevantara la cabeza .... |
La baxada teva perguapa pola panorámica qu'amosaba: Zanzabornín, tol valle de Campo Longo per onde cruciaba'l tren cada quince minutos y Posadoriu, otru de los nomes míticos de la novela. En Posadoriu taba la vivienda: el palaciu, l'horru y la capiella de los Rendaliegos: <esi esconderite verde y silenciosu desconocíu pala hestoria>
 |
| El tren , que nun mos abandona, al pasu per La Uz |
 |
| La célebre capiella de La Ren. |
Hai una capiella na Ren (Gozón) que de mano taba asitiada no que se conoz como'l Prau de la Ermita y que foi tresllada a esta granible campina nel sieglu XIX y remocicada más recién. Los oríxenes de la mesma son del sieglu X siendo toa la zona mui valorada dende antiguo como lo demuestra'l fechu de tenese alcontrao delles tégules (teyes) romanes.
A les dos y picu (14:08) tábemos abriendo'l coche.
- ¿Oi, sabes que te digo, ne?
- Que si nun alcontramos una mesa afayaiza enantes de llegar a Candás podemos xintar en casa tranquilamente, con una cervecina (0) bien fría ....
¿CUÉNTOTE'L CUENTU UN POCO MÁS ENANTÁUSTENDÍU?
 |
| Per estos andurriales (Zanzabornín) buscó Don Leopoldo la inspiració pa "DOÑA BERTA". |
Hai un llugar nel norte d'España onde nunca nun llegaron nin los romanos nin los moros y de saber un poquñín más d'Hestoria hasta afitaría que nin tan siquier Agripa o Augusto tuvieren espetao les ñaples per aquel requexu de so: una pradería verde, inmaculda de nun ser por unos repulgos curvos - servidume de pasu - que cruciaben el Ríu - la Riega, según los despreciatibles vecinos - que bendicía les tierres de los Rondaliegos asitiaes en Susacasa, barriu de Zanzadornín, parroquia de Pieloru y conceyu de Carreño. El praú del honor y la vergoña ta nun farfagón domináu por una viesca mista ya nuna llomba del mesmu alcuéntrase la casona-palaciu (dexémosmo en palaciu, pa nun fadiar a Doña Berta) de los Rondaliegu que lleva apareyada una casa de llabor pa los caseros: un vieyu sordu con una fía mediu fata - pero que cumple bien coles xeres que se-y encamienten - asina como un criáu que fai lo que pue. Nun ye muncho pero da mantener a los Rondaliegos - Doña Berta y cuatro hermanos solteros - asina como a la criada de Dª Berta, Sabelona, ya caseros y criaos colos que van a medies. ¡Ah!, fáltame nomar al gatu que por ser únicu, ye conocíu como 'l Gatu.
 |
| Casona d'Aldea "Capiella San Clemente" (La Ren): Casona, llagar, Capiella ya horru. |
El Palaciu ye una casona solariega, blanca, cola so quintana y dependencies: capiella, llagar, horru y palombar asina como una cabaña que les veces de casa de llabranza astiada a unos trenta pasos del palaciu.
Si a los Rondaliegos cafiába-yos que ya xente cruciara les sos propiedaes- drechu de servidume lliberal - yá me dirás cómo los casamos ... Namás mecíen el sangre col so sangre asina que les bodes ente ellos y ... Taben los cinco solteros porque per ellí nun había más Rondaliegos.
Loa homes, como tales, podíen escaecer los llibros y dase un vueltu pela ciudá (mui de tarde en tarde, seguramente) pero Doña Berta pasaba la vida "a veles venir". Dios, misericordiosu, dexó un día un lliberal firíu delante la portiella d'Arén dando la casualidá que lu topare Doña Berta. Metiólu pa la ilesia - magar fuere lliberal - y curó-y les firíes. Nun pudiendo ocultalo eternamente comunicó-ylo a los sos hermanos carlistes que-y aplaudieron la obra de caridá . Tantu procuru punxo la rapaza que terminó namorada del capitán lliberal Garrido al que-y asocedió otru tantu.
Una vez curáu debía de colar pero los hermanos tamién s'afayaben con aquella novedá y pensaren que la meyor manera de agradecé-yoslo yera nun tornando a la guerra pa matar más carlistes.
 |
| La carlista Doña Berta venció énte'l primer besu lliberal. Y ye que'l AMOR nun entiende de política, heureusement. (Semeya: I. del Rivero. "Doña Berta") |
Sanu'l capitán y alloriada ella en coses del amor derritióse entera tres el primer besu lliberal; nunca meyor dicho'l capitán llevóla al güertu onde prendió un bilortu d'amor. El capitán coló pa la guerra prometiéndo-y a Doña Berta que vendría a facela so muyer, como Dios manda: na ilesia y con papeles. Los hermanos, esmedrentaos, dieron el guaje a unos mercaderes pa que lu curiaren según el so rangu aportándo-y una dote considerable. Doña Berta creyó que taba muertu y nun anduvo más tres d'ello, de momento ...
El capitán morrió na guerra pero Doña Berta nunca nun lo supo y pasó los años esperando por él y consumiendo la vela la so vida en Posadoriu por mor de les duldes de la que nunca nun la sacaron los hermanos que diben morriendo pasu ente pasu .... ¿Qué pasó col neñu? ... ¿Morrió o vivió? ...
****
Una tardiquina tando Doña Berta camentando nes sos velees, sentada xunto al Regatu, sintió un ruíu estrañu que resultó ser un guapu mozu cargáu con un macutu de pintor.
- ¿Qué fai esti home equí, en Finibusterrre?
Ensiguida entamaron a charrar como dos bonos amigos encuantes pasare la primer rocea .... Ella yera la sorda, ama d'aquelles tierres, ya él un célebre pintor - Valencia - que venía de xemes en cuando per Asturies a la cata la musa - los colores - que nun yera alcontrar en Madrid; Doña Berta yera pa él l'ánima que daba vida a aquel paisax. Charra que te charra ente chicolate y llambiotaes metióse enriba la nueche y yá nun yera plan de colar, asina que'l pintor agospió aquel día en Posadoriu. Elli contó-y los sos amores perdíos y ella feyo lo mesmo escaeciendo los asocedíos vergoñosos.
 |
| - Cuido que'l capitán nun s'escaeció de Berta, morrió na guerra tres un arrebatu heróicu. (Semeya: I. del Rivero:"Dª Berta") |
Atando cabos el pintor atalantó que si'l so amante nun tornó foi porque nun fuere a ello, de xuru que morriere defendiendo los sos ideales, de xuru que yera un héroe y non un falsiador. Equí fai un altu nel camín y cúnta-y a Doña Berta la xida del so cuadru caberu, esi que tantu éxitu tenía na capital d'España:
Yo tamién tengo'l mio capitán y lo que-y asocedió bien pudo pasa-y tamién al suyu. Cuntó-y que durante la Segunda Guerra Carlista él trabayó como reporteru-gráficu pa un periódicu col enfotu d'aportar dalgún cuadru heróicu de la contienda que xustificare tanta matanza inútil (esto camiéntolo yo). Pa ello axuntó a un bravu capitán que-y permitía tar en primer llínea de combate, y onde pudo comprobar la temeridá daquel capitán lliberal:
- Un día el capitán esmució ente'l sangre, fueu y fumu d'una heróica ya unútil amarraza mientres los demás desapovisávemos del mapa ...
Cuando llegó la criada, Sabelona, cola cena prendió la lluz ya illuminóse'l cuadru d'una moza embarazada cola vestimienta de va cuantayá:
- ¡Doña Berta!. Yá alcontré la manera de paga-y la posada. Mañana pela mañana voy saca-y unos alpuntes a esti cuadru y face-y una copia pero colos téuniques d'anguaño.
Coló'l pintor y quedó Doña Berta soyerte pero más contenta camentando na falta involuntaria del so capitán, de xuru un héroe silenciosu. Pero ....
-¿Qué foi del frutu del mio amor?. ¿Habrá daqué de cierto o sedrá una zuna mía? ....
 |
| Doña Berta Rendaliegu, guapa moza (Semeya: I. del Rivero) |
A los pocos díes aportó a la Facienda un aldeanu con un paquete que caltenía dos cuadros a oleu. Ún yera'l de Doña Berta, muncho más guapa y remocicada pero l'otru dicía : <Mio Capitán>.
- ¡Mio Capitán!.- Doña Berta perdió l'aliendu al decatase qu'aquel capitán del pintor yera tamién el de so. El de so pero ... aquel capitán yera'l so antiguu amante pero tamién al empar yera ella mesma, yera un amestu d'ambos, yera un Rondaliegu ...
- ¡ Esti ye'l mio fíu, el nuesu fíu!. Y desmayóse.
Dellos díes tevo na cama con tolos procuros de Sabel pero'l mélicu dictaminó:
- Nada nun tien; veyures de la vieyera.
Trés díes más tarde taba escribiendo una carta al pintor pos tenía conocimientu del so abellugu nun conceyu cercanu. Pasaron díes, selmanes, meses.... Pero'l pintor nun daba señales de vida. Cuntare-y la verdá del embarazu, de la so cobardía colos hermanos y rogaba-y noticies del <So capitán> : Nome, familia y hasta del acreedor de les perres que'l capitán tenía a deber. Tamién entrugaba pola suerte del <CUADRU> pa poder facese con él, si fuere posible . Nada nun llegaba y ....
 |
| Doña Berta garra'l tren y plántase en Madrid col enfotu d'alcontrar el CUADRU del so fíu, l'otru CAPITÁN. (Semeya: I. del Rivero. De "Dª Berta)) |
Y Doña Berta tomó un determín: Vender les sos posesiones en Posadoriu y treslladar a Madrid pa cumplir col so fíu tres la so muerte dao que nun pudo facelo en vida. El Señor Pumariega, notariu retiráu, fízose cola facienda de Posadoriu per aciu d'una hipoteca. Sabelona nun perdiere nada en Madrid y quedó n'Asturies en ca d'unos familiares. La brava Doña Berta coló pa la capital en tren y agospió nuna pensionuca onde'l mesmu Pumariega se quedaba cuando diba a Madrid. La Rondaliega abandonó el Paradisu silenciosu de Carreño pol buiciu de la capital; nada que nun puea superar l'instintu atávicu del AMOR. Eso sí, el Gatu nun se separó de la Doña.
*****
 |
| En Madrid nevaba a estrapayar. Nel buiciu de la capital la vida nun valía un rial. |
(Semeya: "Doña Berta". Isaac del Rivero)
Nevaba a estrapayar na Puerta del Sol cuando Doña Berta empobinaba pa Misa, l'únicu requexu onse sentía venceyada a los sos asemeyaos: los mesmos cures, los mesmos sermones, les mesmes cares d'aniciáticos esperando un consuelu. Doña Berta tenía medrana a la ciudá: a la multitú cortesana, a los tranvíes y xarrés que cruciaben de cotino les places y cais d'una ciudá enlloquecida dafechu onde naide paecía conocese. La pensión, fría, pioyosa, ruina ya escura acabaríen por amalicala pero tres una selmana na cama llevantó con tal determín que se punxo darréu a la xida que la trexo al infiernu: Conocer la intrahestoria del <CUADRU>. Comentólo na posada por si daquién-y daba alguna pista hasta qu'un día, lleendo'l periódicu ún de los güespedes:
 |
| Magar el tiempu infernal Doña Berta visitaba tolos díes el cuadru'l <SO CAPITÁN> (S: "Dª Berta".- I. del Rivero) |
- Falen del so cuadru, Doña Berta. Ta nuna casona pesllada al públicu hasta que'l gobiernu decida qué facer con él; si lu lleva un Ministru o un ricachón americanu pal so palaciu.
Otru compañeru de pensión ufrióse-y pa que pudiere, polo menos, ver el cuadru per aciu d'unes amistaes. Pero nun foi fácil, el cuadru taba nel suelu onde nada se podía ver y muncho tevo que rogar, y llorar, pa que los obreros la dexaren ver al <SO CAPITÁN> esnalando espada en mano penriba d'un garapiellu carlistes que cola balloneta calada apuntaben p'hacia elli ente fueu, fumu y sangre.
Tuvieron que llevala hasta la xarré del ablucamientu que trayía. Pasó dos díes na cama camentando cómo entrar nel palaciu del ricachón americanu pa merca-y el CUADRU y al empar poniendo tol procuru pa que los compañeros de pisu nun s'enteraren que tenía perres abondo enriba suyo.
 |
| EL CUADRU: SO CAPITÁN EL SO FÍU (S: "Doña Berta".- I. del Rivero) |
Pudo a la fin entrar na casa l'americanu ya esfrutar del <CUADRU> pero lo que nun pudo foi mercalu porque al morrer l'autor (finare n'Asturies) el cuadru triplicaba'l so valir y pa eso nun-y alcanzaben les perres a la Rondaliega magar que l'amu tampoco taba dimpuestu a soltalu. Eso sí, mentanto nun embarcó'l CUADRU pa l'Habana dexóla dir a visitalu tolos díes. Por si fuere poco tuvo que cambiar de pensión dao que'l Gatu, llibre y montunu, nun s'avezaba a la vida de presu. Con tantes velees Doña Berta tresvoló y terminó pillándola un tranvía. La cabera Rondaliega morrió unos díes antes quel so Gatu, cativu nun desván. El Rondaliegu del <CUADRU> vive eternamente.
Como Asturies nun lo hai, la pandemia ye bien peligrosa y Madrid nun se queda atrás.
ESTIMANCES:
. Los dos GRADECIMIENTOS principales van dedicaos a Don Leopoldo Alas "Clarín", l'autor de "Doña Berta" y a Isaac del Rivero, que fexo una torna CÓMIC n'ASTURIANU de lo más prestoso. Yo quiero qu'estes semeyes que-y copié del llibru seyan un homenax a esti diduxante astur que nos vien de dexar en 2019 y al que tanto-y debe l'Arte, la cultura y nós mesmos.
. Nun pueo escaeceme de la eterna Wikipedia asina como de los numberosos personax - la mayoría anónimos - que nos apurrieron información, talo el Señor Morán, na ilesia de Pieloro, el carpinteru Xulio, la señora de Casa Ramón de Casimira, o'l vecín de La Ren que nos faló de la capiella antigua, dellos otros en Posadorio, en Zanzabornín, na Uz , nel Regueral ....
. Tamién fisgamos per <Biografías y vidas> y <Cervantesvitual.com>.
ISAAC del RIVERO
Isaac del Rivero de la LLana nació cola Segunda República en Colunga nel añu 1931 y morrió en Xixón en 2019 ensin llegar a conocer la pandemia mundial del COVID 19 . Foi un dibuxante, guionista, ilustrador, editor y entamador de delles actividaes rellacionaes col cine infantil y xuvenil.
 |
| Isaac del Rivero de la LLana (Semeya Wikipedia) |
De mocín entamó la so actividá llaboral nos Astilleros de Xixón pos les coses de la Cultura ya l'Arte nun solíen dar pa vivir y hasta podíen convertir n'asuntu peligrosu pos el probe guaje tenía qu'escondese debaxo la cama pa dibuxar evitando les riñes de so padre. De pequeñu yá amaba aquel cine primerizu que-y enllenaba la cabeza de la poesía que'l supu tresmitir per aciu les sos publicaciones. Como nun tenía un duru colábase nel cine agarráu de la mano d'un mayor conocíu que-y facía de padre.
Cuando yá nun pudo más pidió excedencia nos Astilleros y embarcóse n'aventura d'escribir historietes pa los periódicos llocales. Ello yera pel 1953 cuando "La Nueva España" aceutó-y unes tires cómiques y enseguidina vinieron otros los contratos d'otros periódicos llocales, colo que'l rapaz podía dir tirando dedicando la so vida a lo que-y petaba. Esi mesmu añu presentó'l so primer trabayu :"Niños" y tamién entamó como publicista gráficu.
 |
| El Gomeru (S:todocolección.net) |
. En 1960 creó la revista"Kikelín".
. En 1963 propón al Ayuntamientu de Xixón la creación d'un certame de cine pa guajes. Tuvo muncho éxitu y él mesmu foi so direutor hasta 1981 al empar que siguía promoviendo otros proyeutos :
. 1971: Películes y Cómics del Far West. - "Espolique".
. 1973: Organiza la Iª Muestra Internacional de Publicaciones Infantiles y Xuveniles.
. 1978: La rana verde.
. 1983: Salón Internacional de vidéu-cine d'Uviéu.
. 1989: Tapón.
. 1991: Dirixe la Ier. Selmana del Comic al cine de Dibuxos Animaos.
. 1990: Dirixe el Certame Européu de Cine Rural y Pesca de Candás.
. 1993: El Gomeru.
RECONOCENCIA: Güei yamos equí pol so enfotu y compromisu cola LLingua Asturiana. Pasó al cómic con grandísimu aciertu les obres del asturianu Clarín: "La Rexenta", Adiós Cordera", Doña Berta" y "Xovellanos" con guiones de Paco Abril y JJ Plans.
Tevo dellos premios como: L'Aru de Plata de Valencia (1973). La Venus de Barcelona (1976) dasmbos pola so promoción del cine pa neños. Diploma d'honor de la National Cartoonists (EEUU) pola so contribución al arte del cómic y algamó'l premiu Alfonso Iglesias de cómics precisamente pola so adautación de "Doña Berta". Tien la Medalla de Plata del Ayuntamientu de Xixón del añu 2012 pola so llabor cinéfila.
Asturies tendrá siempres un compromisu d'honor con esti colungués pola so contribución al Arte y la Cultura.
DON LEOPOLDO ALAS "CLARÍN".
 |
| Clarín colos <Paliques> (Semeya: Sancha) |
Si'l caderálgu Leopoldo Alas namás tuviere escrito "La Rexenta" tendría motivos sobraos pa comer na mesa con Cervantes, Lope, Lorca, A. Machado , .... pero escribió munches coses más que la mayoría nun conocemos porque igual nun queremos paranos a pensar .... Tuvo en vida, y hasta depués de muertu, dalgunos enemigos íntimos que nun-y perdonaron que-yos sacare davezu los colores, qué vamos facer... Escribir ye una cosa mui sería, como vivir, y esti home nun perdonaba a los hipócrites, vividores y crédulos escritores; nun perdonaba nin a Dios .. Igual yera polos espantibles dolores que carecía del estómadu, igual ...
 |
| Clarín mozu (Wp) |
Los primeros pasos d'Escuela dalos en LLeón, nel Colexu San Marcos, onde yá destaca pola so clara intelixencia. Nel branu del 59 vien pa Guimarán onde estudia en contautu direutu cola Naruraleza. En 1863 (11 años) ingresa na Universidá d'Uviéu pa facer una cursu "preparatoriu", una especie Bachiller y darréu fai abogáu. Amás d'estudiar fai los bonos amigos que yá conocemos pero en 1871 tiró pa Madrid pos quería doctorase y tamién aprovechó pa estudiar Filosofía y Lletres. Tevo ellí hasta 1882 faciéndose krausista mercé al pedagogu Francisco Giner de los Rios y siendo, dende 1875 , ún de los más activos collaboradores periodísticos democráticos col alcuñu de "Clarín" nel nuevu periódicu "Solfeo" y va convertise nel "Azotacáis de Madrid". Yá cayere la Primer República con Castelar al frente por mor del golpe de Pavía y entrare Alfonso XII. Clarín va poner verdes a los políticos de la Restauración. A partir del branu del 76 va entamar colos primeros cuentos y dalgunes poesíes.
En 1978 saca la cátedra de Drechu Civil y Canónicu y darréu prepara en Madrid les oposiciones a caderalgu d'Economía Política ya Estadística de la Universidá de Salamanca pero'l ministru LLano POnte, al que pusierepintu nel "Solfeo" dió-yla al segundu candidatu.
En 1883 va de caderalgu d'Economía pa la Universidá de Zaragoza y aprovecha pa casar con Doña Onofre García Argüelles. Al otru añu - 1884 - tresllada a Uviéu pa enseñar "Derechu Romanu" y "Drechu Natural" (esti home val pa too) y espubliza la primer parte de "La Rexenta"tenía 31 años. Nel 85 sal la Segunda parte La Rexenta. Nel 86 ve la lluz Pipá , llibru de cuentos. Nel 89 termina un ensayu al rodiu de Galdós. Nel 91 sal la segunda novela llarga "El so únicu fíu ". Nel 92 sufre una cris relixosa qu'amuesa nel cuentu "Cambiu de lluz". Nel 94 intentó escribir teatru - "Teresa" - por apreciu a la so amiga María Guerrero pero nun resultó mui bien po yera un home demasiao seriu pa esplayase nuna farsa teatral. En 1990 ponse por encargu a traducir al naturalista Zola - "l'home más denostáu del sieglu XIX" - pero como yera tan perfechu cssi acaba con él. En 1901 visita Lleón pa ver les igües de la Catedral y facer alcordanza la so infancia ; foi la cabera felicidá, cundo torna, ensin remediu, muerre de tuberculosis intestinal; entá nun había penicilina.
******
LA ESPAÑA POLÍTICA DE CLARÍN.
 |
| Sabel II, la de los tristes destinos (S: Calle Ancha) |
Cuando don Leopoldo ñació reinaba n'España "la dama de los tristes destinos", Doña Sabel II de Borbón (1833-1868) . Nesi intre -1852 - taba pasando polo que se conoció como la "Década Moderada" (1844 - 1854) onde'l gallu yera'l moderáu xeneral Narváez qu'igua una nueva Constitución (1854) más retrógrada que la de Mendizabal del 37 pos repartía la soberamía ente la corona y les cortes. Asina-y pintó, pos votaben cuatro gatos (ricos) y Narváez terminó a palos con <maríasantísima> dándo-y un arrebatu absolutista.
Cambiáronlu pol santurrón Bravo Murillo que frenó la Desamortización y hasta peslló'l Congresu; lo que nun pudo frenar foi la corruptela liderada pola avaricia real que chupaba de la teta les concesiones públiques a papu enllenu ... Pero Clarín nun s'enteraba tovía d'esto nin tan siquier que la Vicalvarada del 54 dirixida por O'Donnell terminó cola Década Moderada y que la Reina tornó llamar a Espartero (yera como un pá pa ella) que firma un apañu con O'Donnell ... Duró dos años el Bieniu Progresista (1854-56) pos Espartero echa a correr...
Torna'l moderáu Narváez Bieniu Moderáu (1856 - 58) mientes O'Donnel tresna la Unión Lliberal (1858-63) que va trayer cuatro años y picu de relativa tranquilidá: Torna la C. del 45 pero col gobiernu controlando'l llexislativu dafechu, hai inversiones públiques, puxa'l ferrocarril, ameyora l'exércitu ...
Pa entrar bien ye cuando O'Donnel encamienta a la Reina fer dellos viaxes per provincies a la fin de presentar el futuru nuevu rei (Alfonso XII) y congraciar la corona col pueblu. En 1858 tevo n'Asturies y casi hai qu'echala porque nun alcontraba fecha pa colar... Y ye que como Asturies nun lo hai.
 |
| La Gloriosa |
O'Donnel, la Unión Lliberal, aguantó hasta'l 63 y entramos en crisis permanente con ocho (8) gobiernos en cinco años por mor de les revueltes (Nueche de San Daniel o'l Motín de San Gil) que terminen nel izquierdosu Pautu d'Ostende . Muertos O'Donnel y el moderáu Narváez la Reina yá nun tien en quien sofitar y saca un billete d'ida pa París. La Gloriosa, onde yá reburdiaba Clarín (16 años), acabó con ella y cola Monarquía, de momento, y trexo'l Sexeniu Democráticu o Revolucionariu (1868-1874) : Gobiernu provisional, Amadeo de Saboya (70-73), Primera República (73-74 ) y Pronunciamientu de Sagunto [xeneal Martínez Campos] que trexo la Restauración Borbónica (74). Clarín yá tien 22 años y ye abogáu.
 |
| Alfonso XII |
Aprobó la Constitución de 1876 y terminó cola tercer ya última Guerra Carlista (76). Los Fueros vascu y navarru foron reducíos y consiguió una paz transitoria con Cuba.
Morrió de tuberculosis nel 1885 (casi 28 años) siendo socedíu pol so fíu póstumu, Alfonso XIII, quedando de rexente so madre María Cristina d'Habsburgo Lorena hasta la so mayoría d'edá (1902). Clarín yá nun conoció a esti rei (¡vaya suerte que tuvo!) pos morrió un añu antes.
La rexencia de María Cristina, l'últimu cuartu del del XIX, foi una dómina mui guapa pa consolidar el sistema, pal espoxigue del lliberalismu y el puxu del movimientu obreru (socilismu y anarquismu) pero la pérdida de les colonies (Tratáu París 1898) y el nacimientu de rexonalismos y nacionalismos separatistes tréxonos de cabeza.
*******************
Esti post nun pue ser l'últimu al rodiu les Rutes Clarinianes, fáltanos completales con un vueltu per Uviéu, la Vetusta de La Rexenta, pero nun vos pueo prometer pa cuando .... Tengo la cabeza enllena páxarós.
