<SUAÑOS de MERINDADES (7) >
<El complexu kársticu de GÜEYU GUAREÑA: Una vida pantasmal>
<MISIÓN : PATERNA (7)
 |
| GÜEYU GAREÑA: Anfiteatru de la cueva Santu Titu y San Bartolomé |
.... ZZZ ......zzz ..... SUAÑU Nu. (9) : < Camín de San Bartolomé > ...zzz ... ZZZZ..
Bonos díes, collacios; ¿alcordáisvos de mio?. Soi Selim Marwán, el mozárabe, que trabaya na corte d'Uviéu al serviciu del Rei Castu. Esta vegada encamentóme una misión en Lucus Augusti (Llugo) cola fin de confirmar si Ramiro, el fíu de Bermudo, desendolcaba guapamente l'encargu de Gobernador en Galicia seique la xida yera comprobar los avances nel <Camín Primitivu Xacobéu> inclusive na Ilesia prerrománica qu'esti Rei mandó llevantar en Santiago Compostela. El casu ye que Ramiro - que les golía toes - aprovechó la ocasión pa encomendame otra misión, (axente doble, quedé):
- Mira, Selím; si nun ye torga pa ti en cuantes llegues a Uviéu preciso que me faigas daqué cometíu nes Merindades de Burgos. Ando en tratos con un conde de Castiella, Don Diego Rodríguez, cola fin contrayer matrimoniu cola so fía, Paterna. Quiero encamentate esta delicada embaxada, la MISIÓN: PATERNA.
Por supuesto qu'aceuté, ye más, paecióme de lo más interesante. Yá sabéis que llegamos a Medina de Pomar, onde t'asitiáu'l castiellu de don Diego, y que llevamos feches delles salides peles Bardulies (Merindades) col enfotu que yo llegue a conocer cómo ta realmente la situación y comunicá-ylo al posible rei d'Asturies, Ramiro. Al endefechu, llevo otru cometíu, conocer a Paterna y confirmar que ye digna aspirante al tronu d'Asturies.
El caberu día percorrimos el Valle de Tobalina; el Valle de LLosa, onde l'abá Pablo nos recibiere colos brazos abietos; Valpuesta, la cuna del castellán y de la repoblación d'esa zona onde tuvimos l'honor de conocer al obispu Xuan, amigu personal y antiguu preceutor del Castu. Depués pasamos per San Zadornil y Frías, onde fuimos agasayaos con una receición de lo más candial.
::::::::::::::::
 |
| Mercáu Medieval (Semeya: Denia.net) |
Madre teníanos preparada una cena digna d'una reina: Níscalos al cazu, cámbaros del Nela con salsa de xamón, cabritu a la estaca y de postre una receta que Selim tuviere-y enseñao a Doña Mencía enantes de colar, a saber, torta frita de quesu blanco con canela y miel. Bebimos vinu chacolí y zusmiu de mazana fermentao (sidra, pa los cristianos) o non, según los gustos. Tres d'aquel recibimientu nun yera plan de dir pa la cama ensin más y dexar a Don Diego col miel ente los llabios pos taba arranáu por conocer los detalles del viax; y doña Mencía nun te digo ná.
- ¿Cómo visteis a l'abá Pablo?
- Foi un aciertu total la visita al abá - entamó Paterna . Ye un home arrechu y echáu p'alantre onde los haya pero que la fía'l conde, la posible Reina d'Asturies, lu fuere a visitar ya interesase polo que taba faciendo llegó-y al alma. Aportamos talo fuéremos unos ánxeles cayíos del cielu. Nun pudieren portase meyor pa con nós y amosáronnos les güegues de lo que fuere una villa romana, qu'ellos respetaben como daqué celestial. Van despacio coles obres de Samartín de Fabio pero tán aidando a muncha xente y atrayendo a otros a repoblar: cántabros, vascones, bárdulos... y hasta mozárabes veníos del sur. Per equí tiénense llevao munchos "pinchos morunos" pero los vascones, autrigones y bárdulos son xente de munchos tolones.
 |
| Monesteriu de Valpuesta (804) |
- ¿Y qué me dicís del obispu Xuan en Valpuesta?¿Cómo lu visteis?
- Muuui mayorín. Yá sabes que ye íntimu amigu del Castu y ceo van alcontrase nel más p'allá - camenté. Tuvo perinteresáu en mi pos naguaba por conocer los avantares de los emires cordobeses asina como les obres que'l so amigu fixere n'Uviéu: San Salvador, Santa María, San Tirso, la igua la Foncalada (el barrriu de mio), l'acueductu y sobremanera la Ilesia y palacios de Santullano de los Praos.
- ¿Y tu qué tal, Selim? ¿Tá prestándote la visita a Les Merindades?
- Pola vida, don Diego; muncho más de lo que podía maxinar. Tais convirtiendo Les Bardulies nuna tierra nueva por mor de los castiellos, los monesterios y la repoblación. Na tierra de mio, tanto n'Uviéu como n'Al Andalus, a esta zona que bordia'l Ríu Ebru y dellos afluentes ta conociéndose como Castiella o Al Qilá. Y tu, don Diego, yes ún de los cabezaleros d'esta fazaña y tas perbién miráu na capital del Reinu. Ramiro tamién lo sabe y por eso ta tan enfotáu n'echar raigaños equí. D'otramiente conozte bien y sabe qu'una fía tuya ye una garantía d'estabilidá.
 |
| Escobiu de Pancorbo.- Ríu Orón |
- Sí, conozo a Ramiro dende la Batalla del Ríu Orón, nel escobiu de Pancorbo, allá pel añu 816. ¡Qué mal lo pasamos! Trece díes a la tema col infiel, y perdona la espresión. Cuando un pasu p'alantre o cuando p'atrás. Lluchamos como nunca pero perdimos muncha xente importante : Velasco de Navarra, amigu tamién de Ludovico Pío; Sancho, el meyor caballeru de Pamplona; Zaldún, aquel bravu guerreru vascu ....
- Y García Lope d'Uviéu - interrumpo yo, Selim. Ye un fechu percamentáu na corte uvieina y tamién nel emiratu cordobés por tratase del xenru del Rei Bermudo I, en que abdicó del tronu darréu la Batalla del Burbia, nel Bierzu, en 791. Yeren tiempos de Hixam I (788-796) y comandaba l'exércitu árabe Yusuf ibn Bujt.
 |
| Otru Karim, Bencemá. |
- Pero n’esta batalla el xeneral yera l’espertu Abd al-Karim - arrepostia don Diego. Emburriónos al escobiu onde nun podíemos maniobrar asina que tuviemos qu’esguilar peles parés hasta tomar posición nos altos del beyu; dende ellí fartucámolos a peñazos y entós ellos tornaron al puntu de partida. Pela nueche cadún fortificó les sos posiciones a una y otra oriella del ríu y asina pasamos dellos díes xugando al gatu y al ratón pero ensin que dengún tomare dafechu la iniciativa.
- Dicen per Córdoba que de nun ser pola lluvia....
- Sí, gracies a Dios entamó a llover como’l día del Diluviu Universal. Nun había manera de lluchar asina que Karim tomó les de Villadiegu y nosotros les d’Uviéu. La batalla quedó n’empate pero tábemos contentos porque ellos nun pudieren rompenos les defenses nin tirar dica Pamplona como teníen pensao. Magar les grandes perdes estos fechos xuncen a les persones y ye dalgo que nos dexa marcaos de por vida, como ye’l casu de Ramiro y de mio.
- Y sobre tou a usté... Esi mesmu añu ñaciere Paterna ....
- Sí, foi'l regalu que Dios me diere por mor de los mios desvelos. Cuando llegué a casa y vi aquella neña alcontré ¡por fin! la compensación de tantu sufrimientu. ¡Gracies, Señor!.
- Si Dios lo quier ansí sedrá. Hai que xuncir los esfuercios ente los cristianos, otramiente tamos condergaos a otra invasión por mor de la yihad que nun da tregua.
- En Córdoba vendióse aquello d'Orón como una gran victoria por mor de la cacida importante que trexo Abd al-Karim pero toos sabíemos que fuere un frenu pa poder controlar el Norte y darréu llanzase a polos francos qu’andaben encetaos con aquello de la <Marca Hispana>. En cualquier casu’l carisma d’Alhakem (796-722) tuvo un retrocesu perimportante que terminó rematando dos años depués – 818 – cuando se produxo la revuelta del “Arrabal de la Sacunda”.
 |
| Ponte romana dende L'Arrabal |
-Tengo entendío qu’Alhakem pasárales torniaes na propia casa.
- Sí, yá nun yera mui queríu pero aquel día …. Por un <quítate p’allá> armóse la marimorena nel Arrabal de la Sacunda – La Cimavilla de los años 60 y 70 - y la xente enfiló la Ponte Romana camín del Alcázar armada hasta los dientes, col enfotu de da-y capirote al Emir. Tuviérenlo llograo magar la so Guardia Pretoriana, los "mudos" (yeren eslavos que nun entendíen nin papa d’árabe nin de romance) de nun ser pol mio padrín, el Cadí, que-y dio la idega d’atacar per detrás. Eso sí, la rempuesta foi horrible; dexó la Sacunda talo una ería (pero los vicios nun tienen solución y el vinu tornó a surdir milagrosamente, gracies a Dios, pos Alá ye astemiu, polo visto). Yera un home enforma llibertín y como políticu bastante curtiu. Gustaba-y más el vinu que rezar na Mezquita pero un Guía tien que tar al altor: <Cuando perdiz, perdiz; y cuando penitencia, penitencia>, diz el refrán. Llevábase fatal colos ulemes y por más que-y dicía’l mio padrín :
< Reza un poco más y bebe un poco menos pa tener contentos a los ulemes; da-yos daqué concesión. Escaezte un pelín de la yihad y baxa los impuestos pa quedar a bien col pueblu : pásiate pel zocu de xemes en cuandu y mécete cola xente pa que vean que yes ún Emir esmolecíu por pueblu y los sos problemes. Y nun te metas tanto cola Sacunda porque ehí fàense munchos negocios y d’otros van a relaxase un poco y escaecer los problemes cotidianos de la vida. Tol mundu nun tien un harén, señor Emir.>
- Nun fue solo la revuelta de la Sacunda - intervién don Diego, tevo dalgunos problemes más qu'aprovechamos nosotros pa siguir cola repoblación. < Nun hai mal que por bien nun venga>, diz otru refrán.
 |
| <La xornada fel fuexu> (S:istopiahistoria) |
- Non, qué va. Yá a primeros del so reináu (795) amás de Córdoba tevo problemes mui serios con otres grandes urbes como Mérida y Toledo que siempres gociaron de cierta autonomía.
Taba hasta'l moñu y p'acabar con ello preparó una engatada a los cabezaleros de la ciudá per aciu del gobernador Amrus ben Yusuf . Asesinare a más de 400 personaxesa a los que sapozó una fuexa, d'ehí quedó aquello de <La xornada del fuexu>, qu'otros dan en llamar <Nueche toledana>.
Pero esti home nun salía d'una pa metese n'otra . La nuesa familia tratábalu con procuru, a fin de cuentes yera un omeya como nós. Pero <que si quies arroz, Catalina>; nun facía casu nin a dios. Morrió amargáu a los 52 años y difícil sedrá qu’Alá lu tenga a cargu de les hurís del Paradisu porque yá lo disfrutare nesti mundu: “Incuntables son los fíos que dexó”. - Alvertíu tabes, monín.
- En cualquier casu a nós tréxonos pela cai de l'amargura con tantes azeifes- afitó don Diego: En 801 mandó al so hermanu Mw'awiya col enfotu d'abrir una "Vía Carolinxa" al travíes d'Álava, la naciente Castiella; menos mal que pudimos paralu nes <Conches d'Arlanzón>. Dos años más tarde - 803 -unvía a Abd al-Karim pel mesmu sitiu pero tamién fuimos a paralu.
- Sí, pero lo que nun para ye la repobloción , ¿eh, don Diego?
- Dende lluéu, la repoblación nun para y en 804 - como sabéis, diz don Diego - ñaz el Monesteriu de Valpuesta a cargu del obispu Xuan con enfotu de crear una "cabeza de puente" que sirva de base a los futuros monesterios y pueblos de la naciente Castiella. Tamos poniéndo-y un tapón al Islam: <Que tol mundu nun ye oriéganu, Hixam>
 |
| Aguilar de Campoo |
- Sicasí en 805 el vieyu Abu Utmán remontó'l Pisuerga - camenta Paterna - pero atragantóse coles galletes d'Aguilar de Campoo y morrió d'una indixestión en plena batalla. Nun había manera de meter mano al Reinu del Norte y esto tuvo consecuencies nel emiratu coles revueltes del Arrabal - y de tola capital- nel añu 806. En 808 volvió a carga escontra nós; esta vegada tiró pa Galicia'l col so fíu Hiam al frente pero foi más bien una cuestión de marketing, nun ficieron otro que promocionar el pulpu y los percebes na capital (venme con cuentos de Bagdad, señor Ziryak). Al añu siguiente - 809 -Alfonso II, otru gallu la quintana, cansu de visites a chupar marchó tres d'ellos y nel <Ríu Henares> dio-yos como panzorro.
- Paterna nun s'aguanta y mete baza. - En 814 tien llugar un fechu esmoleciente: la muerte de Carlomagnu; podía ser una oportunidá pa nós pero lo mesmo pensaben los vascones, los Banu Qasí y los Condaos Catalanes. Había qu'esperar ... Ya espiar...
 |
| Escobiu de Pancorbo (Semeya:hoteles.ne) |
- Yá en 816 tien llugar la trescendental <Batalla del Ríu Orón> que tanto tien significao nes nueses vides... - esclamo'l Conde, mientres toos s'amiren unos pa otros con cara d'asentimientu. El nuesu Reinu precisa d'un Santu que sía l'estandarte de la Reconquista, lo mesmo qu'ellos tienen a Alá. precisamos d'ún nexu d'aunión de tola cristiandá. Dímonos cuenta en Pancorbo, tres la batalla, que nos faltaba daqué. Podía ser la Santina, podía ser Satolaya pero ... Una muyer con espada nun ta bien visto. ¿Ónde andará esi Santu? ... Beato de Llévana faló de Santiago como Patrón d'España en tiempos de Mauregato pero les fontes de la so estancia n'España nun tán mui clares ... Hai qu'esperar un milagru, ¿vendrá?... Hai qu'esperar un pelín...
- En 818 acaeció la <Revuelta del Arrabal> de la Sacunda que tantu malestar creó en Córdoba y en tol emiratu. Hixam nun llegó a pasar del añu 822, sucediendolu'l so fíu, el segundu Abederramán.
 |
| Abderramán II na Mezquita |
- Depués d’Alhakam vino Abderramán II (822 -852), ¿qué tal vos lleváis con él?. A nosotros ta dándonos guerra enforma, yá nun sabemos cómo llibranos d’él. En cuantes entró y punxo la so casa n'orde yà l’entamó pa con nosotros.
- Esti Emir ye otru cantar y sabe cómo tratar cola xente. Cultu ya emprendedor quier convertir a Al- Andalus nel reinu más prometedor d’Occidente, la Siria o l’Irak d’Oriente. De la qu’entró tevo qu’espantar a los moscones, cosa que pasa cuasi siempre; un tíu quería quita-y el puestu y abellugó nel reinu de Tudmir. A la fin Abderramán acabó cola rebelión y trespasó la capital dende Orihuela - dexóla fecha una llaceria - hasta Murcia (Madina Mursiya); corría l'añu 825.
-¿Cómo ye él, personalmente? - entrugó doña Mencía.
Abderramán II ye un poeta-estadista que reformó l'emiratu de cabu a rabu. Supo nomar pa cada cargu a les persones afayaices - nada d'enchufes - como los eunucos Nasr y Masrur o'l intolerante y cobiciosu l'alfaquí Yahyá - al que la nuesa familia nun pue nin ver - y hasta un músicu-poeta y vividor que trexo les costumes de Bagdad, el cantautor Ziryab, que fundó'l Conservatoriu Música de Córdoba.
 |
| Ziryab, l'influencer d'Al Andalus (S:lasnuevemusas.com) |
- ¿Ye verdá que trexo la moda de beber en vasos de vidríu?- entrugó Paterna.
- Y tan verdá. El vinu, y sobre too la sidra, saben munchu meyor. Tamién punxo la moda de comer tres platos y l'orde de los mesmos: sopa, platu fuerte y postre. Y mirái que vos digo, pue considerase'l precursor de la fabada ...Sí como lo tais oyendo, punxo de moda'l ziriabí que ye un guisu de fabes blanques y seces en salazón. Les albóndigues tamién son cosa de so (Tas perdonáu, Abu l-Hasam, por mui mal que cantes. Si t'echen de Córdoba ... Na cai Gascona nun te dicen ná).
- ¿Qué más coses fexo esti Abderramán de la puñeta?- camentó don Diego.
- Amplió la Mezquita-Alhama de Córdoba - y dalguna qu'otra más - , ameyoró los sistemes agrícoles con araos más apropiaos y con unes téuniques de regadíu que tienen ablucaos a los mozárabes. Tamién introduxo la numeración indú (conocía como arábiga), fexo xorrecer les ciencies, les artes y la industria y creó una Biblioteca que yera la envidia del mundu conocíu.
- Dalgún defectucu tendrá, el mui xostrón - entruga doña Mencía.
- Sí, el so "Talón d'Aquiles" ta nel harén, pos nun da pasu ensin él y onde la concubina Tarub manda tanto - o más - qu'él. < Naide nun ye perfeutu, señora, nin tan siquier él >.
 |
| Dª Mencía aporta con unos aperitivos al estilu árabe pa siguir col alderique. (Semeya:local.mx) |
- Equí vos traigo unes llambiotaes ya unos refrescos pa entretenevos mientres faláis; l’alderique nun pue ser más interesante. - Pastelinos de quesu perfumao con agua de roses; otros, fritos con almendra, azucre ya almizcre ya unes tortes de mantega con piñones y miel, que yá probáremos antes (lo que naide nun sabía ye que doña Mencía tuviere falao con Selim enantes de partir camín de Valpuesta, por eso los postres yeren de la cocina árabe). Pa beber brindónos con zusmiu de mazana ya hipocrás, que ye un vino adulzapayao por mor del miel que lleva dalgunes especies. Punxímonos toos tan contentos qu’Abderramán II paecíanos un santu varón magar la guerra que nos tuviere dao, y nos taba dando.
- ¿Cómo llevasteis per equí la primera dómina del segundu Abderramán? Ellí entró nel 22 (822) y yo vini pa Uviéu nel 830 - entrugó Selim.- Bueno, esti yá dio guerra dende’l primer día. Nun pasare un añu y nel 823 yá nos unvió a Abd al-Karim a felicitanos les Pascues. Como lo más fácil ye arrasar la llanura alavesa pos ye lo que fizo; tampoco taba pa munchos trotes pos yera mui vieyín.
- En realidá foi una <operación de marketing> de cara a dexar a Abderramán bien. Contónoslo Karim a la vuelta, poco antes de morrer. Al añu siguiente – 824 – Karim foi a descansar al paradisu de les huríes, que bien merecío lo tenía. En casa sentímoslo daveres porque yera ún más de la familia. Yo mesmu tengo que dicir que lu eché muncho de menos nos alderiques en casa del Cadí, el mio padrín. Dende pequeñu tenía-y munchu enfotu polo bien que me tratare siempres y porque’l ñetu del conquistador de Córdoba yera un comandante mui reconocíu.
 |
| El conde Munio lleendo a la visitante la "Carta Puebla de Brañosera" (824) |
-
¿Cómo llevasteis la
razia del
añu siguiente – 825 -
, en Córdoba armóse un alborotu pergrande. Salíen dos exércitos
con envís de dividise en trés llegáu’l momentu. Ún mándábalu
Ubayd Allha al Balansi que
tiró precisamente p’aquí, pal este.
- Nun tábemos preparaos dafechu. Los mauri entraron <como Pedro per so casa> nes aldegues onde destruyín les cabañes y facíen esclavos a dellos homes, munches muyeres y sobremanera a los neños. Llueu arrasaben les colleches pa que nun pudiéremos llevantar cabeza. Llegaron hasta les tierres vascones de los mayús.
- L’exércitu del oeste cuido que nun tevo tanta suerte ….
- Non. Malik xubió pela costa hasta hasta Tuy y el so hermanu Al-Abás pasó pel Bierzo camín de Llugo. Alfonso esperó a esti nun escobiu cerca de Becerreá (Arón) y dio-y hasta na foto’l carné; nin tan siquier Abás salió con vida d'aquella falcatrúa.
- ¿Y qué pasó con Malik?
- Del otru tenemos menos noticies pos Alfonso seguro nun tuviere ellí pero suponemos que Ramiro, el Gobernador de Galicia y comandante en xefe d'esi exércitu, foi'l que-y preparó la engatada n’Anceo y pocos sarracenos llibraron del desastre. ¿Cómo-y quedó la cara a Abderramán cuando s’enteró de lo asocedío?
- Fumaba en pipa’l <bon vivant>. Xuró tomar venganza: <Esto nun va quedar ansí -glayaba l'Emir>. Pero tevo qu’esperar. En 826 creciéron-y los enanos: Toledo, Mérida y Zaragoza xubiéronse-y a la chepa. Más de diez años precisó pa poner n'orde xaréu talu…
- Y nesi tiempu foi cuando nos aprovechamos pa da-y otru emburrión a la repoblación y tu aprovechasti pa colar pal Norte - apurrió don Diego.
- Mesmamente, señor. Nel 830 – mio padrín yá morriere nel 827 – foi cuando decidí dafechu conocer los mios raigaños. Padre y Madre siempes taben falándome d’Asturies; del so yentu clima, de les montañes de Peñamayor, de les tierres del Rei Aurelio, del calter socarrón de xentes afalagoses, de los mios parientes y de les playes, que malpenes conocíen sacante San Llorienzu en Xixón (foi nel viaxe de novios), pero yá teníen bastante pa facese una idega …
 |
| Locus Sancti Iacobi (S: revistaorballo.com) |
[ Podéis lleer nesti mesmu blog "Camin de Niria" : <¡Bon Camín! : Territoriu comanche [1] La lleenda del Clavih.o>
*NOTA: El propagandismo del "Códiz Calistinus" ( Llibru IV Pseudo-Turpin) diz que'l sepulcru de Santiago aprució en 813 morriendo Carlomango en 814. D'esta miente (¡MIENTE!) pue atribuyíse-y al gran emperador de la cristiandad la participación n'esta "inventio" . Pero nós creyemos que'l sarcófagu foi alcontráu poco enantes de 830, añu nel que seguramente Alfonso'l Castu se presentare nel Monte LLibredón pa confirmar l'afayu. Cuido que bien pudo aprovechar la visita pa nomar a Ramiro Gobernador de Galicia encamentándo-y llevantar una Ilesia prerrománica ( asemeyada a San Salvador d'Uviéu) al Apóstol nel Locus Sancti Iacobi onde s'estableciere'l Cenobiu d'Antealtares col enfotu de curialu.
- Llóxico, esi día nun taba yo, bastante tenía con llegar sanu y salvu a Asturies dende Córdoba…
- Esi viaxe yá nos lu cuntarás un día, Selim. - arrepostió Paterna. Güei ye mui tarde y nun ye plan de castigate tantu. Amás prefiero que sigamos coles maldaes d’Abderramán.
 |
| San Salvador (Santiago) (Semeya: Alberto Solana) |
- ¿Conocisti a Ramiro? - entrugó Paterna.
- Yo a elli sí pero nun creo que’él se decatare de min pos nun yera un cargu de postín, magar xintáremos xuntos daqué vez. Cuando m’unvió equí, a Les Merindades, dixo que-y sonaba la mio cara pero nun m’asitiaba en cosa dala.
- Yá nun mos queden munches coses que cuntar d'Aderramán- terció don Diego. Pasaren 12 años hasta que nel branu del 38 (838) torna cola yihad. Dos azeifes más pa dir faciendo boca: Una per Galicia ya otra per Álava-Castiella. Destruición y rapiña pero poca pretensión más (Yá teníemos a esgaya). Al añu siguiente (839) otra vuelta a la yihad; esta vegada a cargu de so fíu El Hakam, que pa facese'l chulu, menuda estroza nos fizo per Álava'l condergáu. Entá nun podemos escaecenos d’aquel branu de 839. El que nun lo perdonó foi'l Rei Alfonso que tomó venganza bastiando'l Medinacelli árabe esi mesmu añu.
- Pero l' añu pasáu, papa, na última primavera, la del (840) , vieno’l mesmu Abderramán.
- Sí, quixo conocer les <calidades de Galicia> – nun ye d’estrañar – pero a poco de pasar Guadalajara tornó pa la capital; nun llegó a probar el pulpu de LLugo nin les amasueles de les Ríes Baxes.
- Yeren munchos díes ensin harén pa un <bon vivant>- falló Selim; seique'l mariscu de Galicia nun tea nada mal.
- Entá hebo más; n'Ochobre del mesmu año 840 mandó al so fíu Al Motarrif col xeneral Alb al Wahid y ficieren lo que dexó de facer so padre, frayanos a güelpes per Galicia entraos yá nel 841.
- Namás tornar los árabes pa Córdoba - retruca Selim - ye cuando Ramiro, aprovechando'l mandáu d'Alfonso, faime llamar col enfotu de que venga equí, a Les Merindades, pa tresnar el casoriu ente vós.
- Sí, pero entá hebó más coses qu'ocurrieron per Galicia nesi añu de 840. - escazó Paterna. ¿Nun había un moru astiáu en tierres de Galicia col asentimientu del Rei Castu?... Algo tenemos entendío que se sublevó...
- Sí - contestó Selim. Foi un fechu mui singular, Paterna, que precisa cierta información. El bereber meridanu Mahamud ibn abd al- Yabar sublevóse escontra l'Emir Abderramán en 835 llegando inclusive a atacalu en Monsalú y Beja faciéndose fuertes nel Monte Sacru (Faro). Al dir l'emir por ellos vense obligaos a pidir socorro ... ¿A quién?... Al rei Castu que los dexa acampar al sur de Llugo, en Sarria. (pensaría n'aprovechalu nel futuru).
- Imaxino lo contentu que taría Ramiro cola espada de Damocles al par de casa ... - esclama Paterna.
- Y sobre too cuando de la nueche al día tórnase escontra Ramiro tomando delles ciudaes importantes.
- ¿Pero qué pretendía'l xostrón?- clamia don Diego.
- Creyemos que taba compráu por Abderramán que-y propunxo perdonalu si-y iguaba la entrada del exércitu en Galicia.
- ¿Qué fizo entós el Rei astur?
- Nun tevo quietu'l Castu y Ramiro persiguió al traidor que se refuxó nel Castiellu Santa Cristina. Nun-y dimos tregua y salió a la desesperá onde alcontró la muerte. Quedó la cabeza pa recuerdu del Castu y parte de les güestes sarraceni pasaes a cuchiellu. Tampoco foi mui gorda, pos aprovechóse la mano d'obra bereber y respetóse la vida d'algunes xentes d'altor qu'asitiaron dafechu en Galicia.
- Vese que l'exércitu árabe qu'esperaba nun llegó a tiempu- comienta Paterna
- Igual Abderramán lu traicionó - pescuda don Diego - pa que sirviera d'exemplu a Mérida, Toledo, Zaragoza o cualisquier otra población que tuviere l'atrevencia de xubise-y a les barbes, que yeren bien llargues según cuenten.
 |
| La irresistible mirada de Tarub. ¿Qué cristianu podría resistir ésto, sin pisar l'infiernu?) (S:bajolamiradadecordoba) |
- Cuido que nun foi ansí. Cuando Alfonso tornaba pa casa llegaron-y noticies de que l'exércitu d'Abderramán - con elli al frente, ¡qué machada! - xubía per Piedrafita. Igual llegó tarde, ensin más. El Castu escucó pela redolada en busca d'un llugar afayaizu p'atacar pero .... Cuando taben frente a frente, a cierta distacia, miráronse, chiscaron un güeyu y .... Yhavé y Alá chocaron la mano, dieron media vuelta y ...¡Cadún pa so casa!. .. ¿Taben cansaos de tanta guerra? ... ¿Tuviéronse miéu?... Gracies a Dios esta vegada nun hebo que llamentar más víctimes.**
**[Alfonso nun tardó dos años en morrer pero Abderramán esfrutó unos cuantos años más na regaza de Tarub. ]
::::::::::::::::::::::::::
- Bueno, señores, - intervién doña Mencía - cuido que ye hora de colar. Mañana a los rapazos tienen un día mui cargáu por mor de la Feria y el Mercáu onde tendrán muncho que compartir col pueblu.
- Y bien ceo tenemos que continuar colos viaxes – diz Paterna - pos Selim nun debe tar munchu tiempu acá y entovía nos queden, cuando menos, un par de coses por visitar.
- ¿Cuál va ser la próxima visita, Paterna? - entruga don Diego.
- Pensaba n’averame a la Ermita de San Bernabé pa que conoza Selim tol entornu natural de Güeyu Guareña, ¿qué te paez, padre?
- Paezme perbién , fía, pero alcuérdate llegar a tiempu pal Campeonatu de Bolos d’Espinosa. Sabes que nun pues faltar.
- Nun t’esmolezas, padre, eso queda de mio cuenta. Soi la más interesada p’amosa-y a Selim cómo les gastamos les merindanes xugando a los bolos.
………………….
 |
| Mercáu Medieval : ¡Vaya folixa que s'armó! (Semeya: 7 Merindades) |
Magar l’escasu tiempu con que se preparó’l Mercáu – dengún , a dicir verdá– l’arribazón de públicu foi macanuda. Nunca el “boca a boca” andevo tan aprisa como aquel día. Muncha xente llegó a eso del meudía pero la feria duró hasta que’l sol se despidiere pel horizonte. A l’anochecida hebo música y baille hasta la mañana del siguiente día. La fiesta terminó cuando los mozos y moces del tol alfoz de Medina de Pomar xuntáronse na Plaza pa tomar un suave hidromiel con unos pastelinos d'engrudu de ñueces ya ablanes envuelto nuna masa frita fecha con fariña de trigu; yera un vezu establecíu.
Los braeros artistes nun fuimos Paterna y yo sinón les criaes y soldaos que nos acompañaren nel viax. Cadún cuntaba la so hestoria como la tuviere vivío inventado de collecha propia lo que a la xente-y prestaba sentir. La operación marqueting meyor nun pudo salir. Ellos unos prexuglares y nós los marcopolos de Les Merindades.
:::::::::::::::::::
Pasamos el día siguiente descansando y preparando’l viax a Güeyu Guareña na sobremesa del almuerzu.
- ¿Per ónde vais dir, Paterna? - entrugó don Diego.
- Tuvi pensando que la ruta a siguir fuere’l siguiente track: Medina – Pomar – Miñón – Céspedes – Bocos – Barruso – Fresneo (Alto de Bocos) – Torme (Ruta del Ríu Trema) [Butrera - Pereda -Hornillayuso]– Cornejo – [Les Diaclases] – Ermita San Batolomé.
- Yá veo que vais siguir la sienda’l Ríu Trema dende Torme hasta la Cueva.
- Sí, papa. Vamos escaecer Pontedey, que yá lo conocen, y xubir más derechos per una sienda poco conocida, más xabaz pero quiciabes más divertida; la Sienda del Ríu Trema.
……………….
 |
| Primeros castiellos (S:forbes.com) |
Salimos de Medina bien tempranino, a eso de la hora prima, pos nun queríamos que la xente nos entretuviere más de la cuenta al salir del pueblu. Formábenos la comitiva los 11 de siempres (Merindades F.C) : Paterna y les dos criaes, los cinco soldaos de don Diego y los dos míos, más un servidor. Yá sabéis que’l castiellu de don Diego ta asitiáu no alto d’un cuetu onde anguaño hebo un castru prerromanu y va poco un castiellu árabe. Agora ta arrodiáu por una muralla-empalizada ya un fosu que l’arrodia.
Tres cruciar la ponte llevadiza ficimos la señal de la cruz al pasar delantre la ilesia de la Santa Cruz. Tomamos el camín de Miñón mientres a mandrecha quedaba Pomar, que como’l so nome indica ta llaraú de pomares.
En Miñón , cerca d’una ermita, paramos a abebentar los caballos nuna fonte d’orixe romanu.
- Nesti pueblu – camienta Paterna – padre reune delles veces colos dueños d’otros castiellos de la redolada, seique lo más corriente ye que lo faiga en Medina.
De Miñón tiramos pa la llanera de Céspedes . Qué prestoso ye contemplar los campos llaraos de cereal (trigu, centeno, cebá) y tamién de leguminoses (fabes, titos y yeros). Dellos chavales andaben agazapaos ente la mies cazando perdices y falpayares (codornices). Na fastera del monte pastiaben dalgunes oveyes y un poco más p’arriba unes cabres esgamotaben ente les peñes. Nuna cantera cercana taben sacando y trabayando la piedra.
- Tán faciendo sillares pa los nuevos castiellos de Les Merindades - aclaria Paterna. Tamién faen escudos de piedra; cada casa quier tener el suyu propiu como símbolu de distinción. Ye la moda últimamente.
. Salimos camín de Bocos. Pa llegar tuvimos que bordiar un escomanáu meandru del Ríu Nela en forma de ferradura.
 |
| Meandros del Nora |
[ Anguaño l’Altu de Bocos fízose célebre por mor de la Vuelta a Burgos].
-No alto d’esti pueblu tan llevantando una ermita a San Pedro.
[ Anguaño queden les güelgues del Palaciu de los Medinilla (XVIII) que s’arrodia d’una murallina.]
Una señora bien mayor, al ver la comitiva, salió a ofrecenos unes morcielles de casa. Dixo que llevaben arroz, unos granos que semaba nuna llosa, yenta y soleyera, tres so casa que dexaren los moros. Al saber quien yera Paterna nun quería cobránosles pero nun tuvimos bazu pa ello. Paterna correspondió entregándo-y una medallina de plata cola Virxe del Rosariu, patrona de Medina de Pomar. Quedó contenta de la vida y prometió-y rezar toa la vida pola suerte de so. Ye nidio que Paterna sabe cómo tratar a la xente; nun tengo dubia alguna que va ser una Reina de pro.
 |
| Molín de 2 Ruedes (Dreamstimes) |
. Pali-pali algamamos a Torme per onde pasa el Ríu Trema que ceo va desaguar nel Nela. Vemos casones con sillares nes bases y nos vanos, esos qu’iguaben na cantera de Céspedes. Yá siguimos dafechu la vereda del Trema camín de Cornejo. Como a un kilómetru del pueblu pasamos una ermita dedicada a Los Mártiles. En Butrera alcontramos un molín de dos ruedes en plenu funcionamientu y paramos un ratu a descansar mientres charrávemos col molineru.
- Toi contentu col molín porque tengo trabayu a esgaya. Ya vos decataríeis qu’abonda’l trigu, la cebada y l’avena. Cuando acabo la molienda semo yeros y legumes nesa llosa cercana al molín. Tamién tengo unes cuantes cabres na braña del pueblu y cuatro oveyes pastiando na fastera del Monte de Bocos.
[[ Col tiempu Torme tiense convertío nun pueblu importante qu’aportare a la Corona homes de gran valir que desempeñaron cargos importantes na Nueva España d’América: G. de Salinas Varona y A. Salinas y Castañeda. Entá conserva Tormela Casona-Palaciu de los López de Salazar (XVI) d’estilu renacentista ya otra de los Salinas-Varona. La ilesia de Samartín(XII) caltién entá bastantes elementos románicos.]]
Pela breda del Trema empobinamos dica Cornejo, unes 5 milles pel Valle de Sotoscueva. Hai un momentu sublime cuando al cruciar La Riega de la Foz , tributaria del Trema, forma una garganta rocosa onde se van sucediendo tabayones y sumideros; dalgo espectacular. Embaecíos en plena natura camienta Paterna:
- Ehí p’arriba, n’Hornilayuso, apruz l’afloramientu (l’alfaguara) de La Torcona, una salida de los ríos soterraños qu’atraviesen el complexu cavernariu de Güeyu Guareña.
Ablucaos énte aquella pola creación algamar a Cornejo foi un plis-plás. Asitiáu en plena llanera y arrrodiáu polos montes de Cornejo, La Mesa, El Cuetu, Peña Oricedo y La Peña Caballera:
- Cornejo ya figura na carta de los primeros tiempos de la Repoblación pol abá de Taranco nel añu 800 cuando se fizo la primer presura. Pocu depués, nel 816, l’añu que ñací yo, el conde Gundesindo donó tierres de Sotoscueva (Cornejo) al Monesteriu de San Vicente de Fístoles (Cantabria) que foi fundáu en 811 pola abadesa Gudvigía y el so hermanu, l’abá Sisnando. Anguaño padre anda en tratos pa incorporalu a la Mancomunidá del Condáu de Castiella cola fin que sía un baluarte más escontra’l coladeru árabe.
 |
| Monesteriu (811) S.Vicente de Fístoles (Esles). Equí ta sapozáu'l conde Gundesindo (Semeya:cantabria.com) |
- ¿Qué sabes d’esi Conde?
- Yera un cabezaleru godu del Condáu de Cantabria. Tenía posesiones en Trasmiera, nes Asturies de Santillana y nes Bardulies (Castiella). Ta sapozáu nel monesteriu d’Esles que pertenez a Lloreda (Cantabria).
- Bueno, Selim; namás queden tres milles p’algamar a la Ermita y Cueva de San Bernabé.
- Nun tengo priesa en llegar, toi pasándolo de viciu nesti Edén.
- Pos entá te queda lo meyor … Deamos de beber a los caballos y sigamos la marcha. Una vida antigua y pantasmal ta a la espera
::::::::::::::::::::::::::
EL COMPLEXU KÁRSTICU DE “GÜEYU GUAREÑA”
 |
| GÜEYU GUAREÑA, a la Cueva de S. Bernabé |
El Ríu Guareña esmuzse – sumidoriu de Güeyu Guareña – xusto delante l’anfiteatru de la Ermita de San Tirso y San Bernabé pa xurdir nos afloramientos de La Torcona y El Torcón, 5 km depués.
Los afayos arqueolóxicos d’esti Santuariu Rupestre van dende’l Paleolíticu Mediu hasta la Edá Media, por aciu de la invasión árabe. Tamién se tienen alcontrao más de 180 especies d’invertebraos, dalgunos endémicos (namás que s’alcuentren equí) y d’animales vertebraos como l’osu, inclusive les zarpaes. Por exemplu, alcontramos nestes cueves lo siguiente:
. Sala de les Pintures: Unes 100 pintures zoomorfes ya humanes con unos 14000 milenios d’antigüedá.
. Galería Macarroni: Pintures y grabaos.
. Galería Chipichondo: Furacos cántabros tipu ánfora. Una Necrópolis del Bronce.
. Sala de la Fonte: Na bóveda y parés hai representaciones antropomórfiques, zoomórfiques y xeométriques correspondientes a una dómina ente’l Neolíticu y el Bronce.
. Cueva Prado Vargas: Les güelgues humanes más antigües alcontraes asina como una industria lítica del Musteriense con non menos de 70.000 años d’antigüedá.
. Cueva Kaite: Con dos derivaciones que nun enllacen cola principal onde puen apreciase durante kilómetros representaciones zoomorfes - dellos cérvidos - como una cierva preñá. Tamién llamen l’atención les atractives estalactites y estalagmites de colores estremaos.
. Cueva de San Tirso y Bernabé: Aprucen 3 niveles siendo visitable el mendianu. El pisu inferior (3º) comunícase col restu del complexu magar nun se puea visitar por mor de los argayos. Grabaos fechos con silex. Buracos cántabros tipu ánfora. Una Necrópolis del Bronce. Visitable’l
. Cueva del Oru: Un güesu frontal Neanderthal ya una mandíbula de Homo sapiens.
. Galería de les Güelgues: En 1969 alcontráronse más de 400 m. de güelgues de pisaes de 6 a 10 humanos con más de 17 mil años d’antigüedá. Cachos d’antorcha con 15600 BP.
. Cueva Palomera: Pues visitar nel 4º nivel les Pintures rupestres del Magdaleniense superior y Aziliense con 10.000 BP (Antes del presente= 8.000 e.X). En dellos tramos puen vese circular los ríos Trema y Guareña. Una cascada de 54 m. de la Riega Samartín que tien el sumideru na Sima de Les Dolencies. Fósiles marinos que nos diz qua va millones d’años esto yera Mar. Loa brillos del techu por mor de les bacteries que viven nel agua condensao.
Otres cueves importantes son: Kubia, Covaneria, La Mina, C. del Moru, Rizuelos o Cueva de Jaime.
Anguaño nestes cueves podemos alcontrar delles especies d’esperteyos estremaos, foines, gatos monteses y más de 60 invertebraos cavernícoles de les que cuatro son endémiques, como diximos.
FAUNA: Nel entornu exterior podemos alcontrar les aigles Real y Culiebrera , Zapiquera (Alimoche), Ferre (Azor), Uxu Real, Utre Lleonada, Curuxa (Cárabu), Gavilán o Falcón Pelegrín. Nun ye fácil dar col Desmán Ibéricu o’l Gatu Montés, asina como’l Llirón Caretu o la Llondra (Nutria) pero hai unos cuantos.
FLORA: La vexetación ye la propia d’una zona de transición ente clima Mediterráneu y l’Euruasiáticu. Les viesques más corrientes son les carbayeres, los fayeos, les alcinares, ablanales, choperes, alisedes (humerales) y pinales de repoblación. Pero la gran parte de la superficie del Monumentu ta ocupada por campos de cultivu, praeres y berizales.
. ::::::::::::::::::::::::::
… Yá aportamos al anfiteatru qu’hai delantre la Cueva San Bernabé. Una gran explanada embaxo una montaña saliente , a mou de bisera,qu’amuesa nel frente roca caliar per uquier y qu’abelluga la entrada d’una cueva que los cristianos convirtieron en ermita magar que nun se vea por mieu a delatase delantre l’enemigu árabe.
- Mira, Selim, yá llegamos onde te quería trayer. Ehí enfrente, nesa roca caliar, tienes la entrada a una cueva seique nun ve. Dientro hai un mundu soterrañu, máxicu y ancestral qu’entama con una ermita dedicada a San Bernabé anque de mano púnxose embaxo l’advocación de Santu Titu (Tirso), anguaño val pa los dos. ¿Entramos?.
- ¿Per ónde, yo nun veo puerta alguna?
Hebo que mover un entramáu de piedra con dalgún arbustu que disimulaba la entrada.
- ¿Y agora qué te paez?. Tenemos que facer esto por mor de los moros, nun convién que sepan d’ella pos tenémoslo habitao. Equí dientro tantu padre como otros celebren reuniones cola xente de Les Merindades. Tamién ye un llugar de refuxu en casu qu’haya qu’escondese de los sarracenos.
- ¿Pero tá grande ye la cueva ?
- Pa empezar hai varies cueves en toa esta zona, munches d’elles tán comunicaes y a distintos niveles.
- ¡Dios santu, esto ye un entramáu!
- Si quies pues llamalo ansí, un entramáu kársticu.
- ¿Qué?
 |
| Sumidoriu "Güeyu Guareña" (S:Wikiloc.es) |
- Les cueves van formándose a lo llargo de millones d’años por mor del agua que va descomponiendo la roca caliar hasta que da con una roca impermeable, entós l’agua forma corrientes superficiales hasta que dan con un sumidoriu y ¡esapaez!.
- Tu, monina tas tomándome’l pelo y eso nun ta bien que yá voi pa mayor… ¿D’ónde sal esi agua, si se pue saber?
-¡H.a, h.a, h.a!. De los ríos. ¿Tu nun viniste pela sienda que bordia’l riu Trema?
- Sí, pero nun la vi ¡esapaicer!
- Sí que lo visti, sí. Mira p’allí; ellí mesmo tienes el sumidoriu d’otru ríu que pasa per ehí debaxo y va descomponiendo la roca, el ríu Guareña. Col río Trema pásate lo mesmo; a la vuelta , camín d’Espinosa, voi llevate por un beyu onde verás el misteriu; ¿paezte bien?.
- Pos supuesto; tiénesme arranáu. ¿Por qué nun entramos d’una vez?.
 |
| Santu Titu y San Bartolomé |
- ¡Santu Titu, esto qué ye!
- La Ermita de San Bernabé. ¿Préstente les pintures murales?. Representen el martiriu de Santu Titu (San Tirso) que yá fuere decapitáu por Decio nel sieglu III. Ficiere-y mil perreríes pero nun podíen con él, diba de milagru en milagru. Hasta quisieren tayalu pero el serruchu nun cortaba..
- Estós ta como’l míu.
- Como ves hai perfeuta ilesia col so altar y la figura del Santu. Ya verás a la salida la Sala de Xuntes onse se reune’l pueblu colos cabezaleros pa tratar los asuntos de la repoblación y la meyor manera de facer frente a “tos parientes”….- dexó cayer Paterna qu’andaba de goña viendo la cara que-y quedó a Selim cuando vio l’interior de la cueva.
 |
| Nin col serruchu puen |
- ¿Y cuánto mide la cueva?
- Les cueves, querrás dicir. Yá alcontramos más de 300 …
- ¡Más de trescientes!
- Sí, y sabemos qu’entá hai más; tou ye cuestión de tiempu en dar con elles. Tamién sabemos que tán distribuyíes hasta en niveles y munches d’elles tán comunicaes este sigo.
- ¿ Cuántes milles lleváis andao per esti mundu soterrañu, tienes idega?
- Cuido que 70 milles (unos 110 km) yá les tenemos fecho. Bueno, si nun t’importa podemos dar un paseín hasta la Sima de les Güelgues. Tranqui, namás vamos ver dalguna pa que te faigas una idega.
- Menos mal, esto ye per guapo per nun soi un esperteyu … Oi, ¿les güelgues de qué...?
- Esperteyos hai hai a mamplén, dalgunos bien raros, por cierto … Cuando veas les güelgues yá me dirás tu de quién se trata. Mira a manzorga, ¿nun ves cómo una especie d’ánfora escavada na roca? … Son silos pa guardar el granu; en casu d’una azeifa tamos pertrechaos. Cuando llueve abondo l’agua xube de nivel pero los silos tán a bon recaudu, ehí nunca nun llegare l’agua.
- Tenéislo too estudiao, ¿eh?
- Ten en cuenta Selim qu’estes cueves tán habitaes dende abenayá. Muncho antes de los romanos, dende tiempos mui primitivos. Tenemos alcontrao los güesos d’una frente de sabe Dios cuantos años (neanderthal) y tamién una quexada que nun te digo nada (Homo sapiens) … Hasta se tienen alcontrao una especie d’animalinos convertíos en piedra. Unos repobladores d’Espinosa que vinieren de la marina dicen qu’ellos vieren nel mar animalinos bien paecíos (fósiles marinos). Un abá mui sabichegu diz qu’estes tierres pudieren tar baxo’l mar cuando’l Diluvio Universal. (Los fósiles marinos demuestren qu’estes tierres foron marines cuantayá).
 |
| Galería de les Güelgues (Semeya: Miguel) |
Pali-pali, tornando cuando a mandreche cuando a manzorga algamamos a una zona col suelu llaráu de pisaes grabaes na roca.
- Pon atención onde pises, Selím, nun vayas estropiar estes reliquies …
- ¡Son pisaes humanes! … Y de tamañu estremáu … Vese que yeren varios, una familia, seguramenrte (ente 6 y 10 individuos). ¡Mira, a esti faltába-y un deu!.
- Hai cerca de 480 vares (1 vara= 0,838 m) con estes pisaes. A esta sima nomámosla la Galería de les Güelgues. Estes pisaes tienen miles d’años (¿17.000 años?). La tierra’l suelu taba blandio, barroso y foi endureciendo poco a poco.
- Bueno, Selim, vamos tornando mientres te cuento dalguna cosa más de estes cueves. ¿Paezte?
- Asina que me dices qu’estes cueves tán feches por mor del agua los ríos que va colándose polos sumidorios y esmigallando la roca… (Roca caliar del “Cuniacense”:85 Ma)
- Sí, hai dellos ríos y riegues, los más importantes son los ríos Guareña y Trema y la Riega Villamartín; pero hai dalgunes más.
 |
| Tabayón de Palomera |
- ¡Home, hai tantes !. Tán, por exemplu, les pintures rupestres de la Cueva Palombera . (Magdaleniense superior ya Azilienseon 8000 años e.X.). Nesta cueva pues ves los ríos circular . Hai un tabayón de 64 vares (54 ) de la Riega Samartín que tien el sumidoriu na Sima de Les Dolencies. Tamién hai grabaos d’animalinos marinos y llama munchu l’atención el coloríu del techu (por mor d’unes bacteries que viven nel agua condensao).
 |
| El "molar" de la Niña Vera Neanderthal (S:labrazón.es) |
Na Cueva Vargas Llosa [200 m2] lo más llamatible pue ser la industria lítica d’un grupu humanu mui antiguu (neanderthales) y bien organizáu pa cazar, iguar les armes afayaices con pedra silex. Alredor del fueu xintaben corcios, venaos, coneyos o caballos tresnando darréu les pieles p’abrigase nos fríos iviernos de Castiella. Dalguna neña perdió daqué diente que nos dexó como recuerdu; vese que la cabra yera algo vieya …
Son delles les cueves onde los artistes rupestres tiénennos dexao pruebes de la so maestría nes pintures feches con silex y pintures oxidantes nes parés y bóvedes d’esti dédalu infinitu; amás de Palombera amuésense en Keite, La Fonte o Santutitu. ¿Qué resume me faes de lo qu’acabes de ver, Selim?
- Que sobro una alfombra vexetal de colores estremaos tenéis embaxo tierra un mundu máxicu que paez propiu d’un cuentu de “Les Mil ya una nueches”. Equí hai vida dende l’entamu los tiempos. Vida terrestre, acuática y marina: ¡vida!. Vida cola que siguís. Cuido que si duró miles d’años nun var ser los mios collacios árabes los qu’acaben con ella.
A la salida la cueva vimos la Sala de los Conceyos onde se tomaben decisiones importantes pa la comunidá merindadense. Fuera, enriba la Cueva, nel Altu Concha, una alcina pervieya ye testigu mudu de les reuniones de los rexidores de les Merindades enantes de buscar refuxos más afayadizos, como la mesma San Bernabé, Quisicedo o Cornejo [anguaño la capital del conceyu Sotoscueva]. Echamos tola mañana visitando la Cueva.
- Nun podemos aparamos más, entá tenemos que llegar a Espinosa los Monteros p’abeyugar. Queden más o menos 9 milles pero tamién hai que dir viendo coses pel camín. Enantes vamos a xintar daqué delantre del Sumidoriu de Güeyu Gareña, que ye lo que-y da nome a esti conxuntu kársticu. Vamos discutir mientres comemos el camín a siguir porque son varies les posibilidaes que tenemos pero too nun se pue ver, nesta vida siempres hai qu’elexir.
Paterna fálanos de les coses que podemos alcontrar pel camín.
- Podemos volver a Cornejo y d’ehí a Quintanilla del Rebolar y depués pa Barcenillas. ¿Qué tenemos per ehí? … El Esgobiu de Les Diaclases del Ríu Tema, onde’l ríu se somorguia y torna más tarde a aflorar. Otramiente pue tirase a Quintanilla y coyer la sienda d’Espinosa por Villabascones, Quisicedo y Quintanilla de Rebollar.
- La sienda les Diaclases* yá nos facemos una idega de cómo ye, unos cortes profundos nes montañes que ruempen la roca formando canales. Yá vimos daqué a la ida, cuando pasamos per Cornejo, ¿por qué nun vamos agora per Quisicedo?.
 |
| Sumidoriu del Guareña (Wp) Bien cerca de S. Bernabé |
Cuando
hai crecides el ríu
arrastra too lo qu’alcuentra y llega a taponar el Sumidoriu lo que
prevoca grandes riaes peles casi del pueblu onde predominen les
casines de tipu montañés . Metanes del pueblu alcontramos un potru
de ferrar ganao; les
vaques
son la base de la economía d’esta llocalidá.
 |
| Trilitu (Wp) |
- Non mui lloñe d’equí los antiguos homes de la dómina la Piedra llevantaron una necrópolis conocida como Las Dolmas, onde abondaben los trilitos, una especie de dólmenes pero cola piedra más trabayao.
[ Anguaño tán desapaecíos. Les pedrones son perguapes ta llevantar casines o sirvir d’adornu en casones de postín. ¡Qué pollinos!]
Ceo aportamos a Villabascones que como’l so nome indica foi repobláu por xente venío del pueblu vascu. Edificaron les cases con solana, esi balconín asitiáu al sur p’aprovechar el calor del sol.
- Cuenta la lleenda que cuando César Augusto pasó per esti pueblu por mor de les Gueres Cántabres agarró un trancazu por aciu del fríu que por poco lu lleva Júpiter p’allá (C’est la pene).
 |
| Turruxón de Quisicedo (castillosdelolvido.com) |
Ensiguida coyemos la calzada que nos lleva a Espinosa (Área Patriniani) y pasamos per Quisicedo, un llugar llaráu de caxigos, que bien podía llamase Caxigal.
- Equí padre tien llevantáu un pequeñu torreón pa control de la zona que presenta una particularidá perinteresante: Tien una pasadizu secretu de media milla pa poder escapar en casu d’apuru.
Llamónos l’atención la bayura de fontes qu’alcontramos. Paez ser que l’agua procede del Guareña que ñaz nos Montes de Somo. Na fastera d’esti monte tiénense alcoltrao dellos menhires, lo que demuestra la presencia humana dende va miles d’años.
 |
| Diaclases (Wp) |
En Quintanilla de Rebollar ye onde’l Ríu Trema entama formar l’Esgobiu de Les Diaclases que fina en Cornejo. Son 2 milles y media de suspense coles agües qu’afloren o s’esmucen al caprichu la naturaleza hasta que xurden dafechu na Torcona. Precisamente’l pueblu tien una fonte-abebentaderu de lo más antiguo que iguamos últimamente pos ye mui usada.
. Yá vamos hacia Espinosa. Al siguir dica Barcenillas vemos a manzorga unos pueblinos : El Rebollar, Herrera y Redondo asitiaos nes faldes de los Montes de Somo que separen Les Merindades de Cantabria; esta zona ye conocida como La Sonsierra.
- Nel Rebollar ta padre mui interesáu en llevantar un cenobiu que sirva de guía a la xente d’esta zona.
[En Redondo y Herrera y en toa la Sorsierra tuvo asitiada la Orde Hospitalaria de San Xuan de Xerusalén qu’acoyía a los pelegrinos xacobeos.
 |
| Níscalos (lactarius deliciosus) |
. Al pasar per Barcenillas de Cerezo, de bultable influxu montañes, vimos la xente trabayando esmolecío por mor del ganáo, principal ocupación d’esta xente. De lo que nun s’ocupaben yera en pañar setes, perabondantes nes viesquines que bordiaben el camín. Los nuesos compañeros de viax, los soldaos, mui avezaos a estes xeres pidiéronnos permisu pa enllenar un cestín cola fin de tresnar una cena esta nueche n’Espinosa. Al cabu d’un ratu tábemos toos a la gueta de perrechicos, lepiotes, níscalos y edulis y hasta facíemos competición. Pasamos un ratu mui distendíu y enllenamos varies cestes d’aquellos fungos dignos de competición.
- Vamos ser la envidia del Conventu Santolaya, onde pensamos agospiar – camienta gayolera Paterna. Quédennos 2 milles y media p’arribar a Espinosa, al cenobiu un pelín menos.
Cruciamos el Barrancu de Teh.era y poco más tarde la Riega de La Cena. La sienda circulaba ente esta corriente y la Riega de Praos de Miyares durante un bon ratu; aquello asemeyaba a una calzada romana asina que podíemos llegar a Espinosa los Monteros nuna hora escasamente pero pa dir a Santolaya nun facía falta llegar a la ciudá nin travesar el Ríu Trueba, que sabíemos llevaba agua n’abondancia. Teníemos ganes de visitar aquel pueblu tan grande y tan célebre ente los repobladores - Área Patriniani? - pero quiciás lo meyor sedría descansar y patiar aquel pueblu al día siguiente.
 |
| Turruxón de vixilancia sobro'l Ríu Trueba |
- ¿Qué vos paez si dexamos Espinosa pa mañana y pasao cuando teamos más folgaos y agora vamos a cenar y aselar dignamente?.
Toos tuviemos d’alcuerdu, qué remediu, y tomamos un senderu a manzorga enantes d’algamar a Espinosa. Yera bien emprunu pues el cenobiu quedaba na fastera la montaña Monte Herbosa, qu’abeyuga la urbe. Otros a esta zona nómenla Cantu Blancu. Enantes d'entrar nel migollu'l pueblu acolumbramos como una especie torreón na parte baxa, xusto enriba'l ríu Trueba.
- Padre tien un pequeñu turruxón pa controlar les entrades y salides d'Espinosa.
Al travesar el pueblu pasamos delantre d’una casona-palaciu que llevaba dos escudos na fachada, como mandaba la moda. Y siguimos xubiendo.
- Yá falta poco. ¡Ah!, escaecióseme dicivos que’l Monesteriu ye doblu (dúplice); hai monxos y monxes xuntos, que non revueltos, ¿eh?. La Ilesia de Satolaya ye común, naturalmente, pero cada comunidá funciona por separao en casi too. Caduna tien les sos dependencies propies, como los cuartos, astragales o recibidores, scriptorium, la sala capitular o’l claustru ; por embargu’l refectoriu ye común siendo les monxines les que trsnen la comida (los monxos tán como llocos pos la comida sal muncho más amorisiega) mientres son los monxos los que s’ocupen de les cuadres, de cultivar el campu – les monxines tienen tamién el so güertín – y d’iguar la lleña pal iviernu.
- Bueno, pos a ver onde dormimos – marmulla un soldáu. - Produzse una carcaxada xeneral dao la intención malina de la entruga.
- Nun vos esmolecer, soldainos, nes corripes hai sitiu a esgaya – desbardia Paterna. Otra carcaxada más fuerte sonó a la entrada la hospedería, siguiendo cola tónica de chancia que se tuviere creao. Taben toos de bon humor. - Nun vos ablayéis, de xuru que monxos y monxes tán espicotiando a ver quién nos va atender meyor...
 |
| Capiella-Monesteriu de Santolaya Si nos reciben equí pensamos agospiar nós. ¿Tará Paterna, quiciás? |
El monesteriu nun paez gran cosa, esperaba daqué más pero supongo que siguen con obres dao los materiales que vimos per uquier, unos a teyavana ya otros albentestate. Les monxes y monxos salieron a recibinos más contentos que unes castañueles. Paecíen unos ánxeles custodios empeñaos en quedar bien con aquella condesa que quiciás bien ceo podía ser la so Reina. Unos mozos ocupárense de los nuesos caballos que los abebentaren enantes de llevalos a les cuadres. A nosotros teníennos preparaos unos pilones col ¡agua caliente!, na parte tras del edificiu masculín, pa poder aseamos en condiciones. Paterna y les criaes foron llevaes aparte, como ye de suponer. Una hora más tarde tábemos toos nel refectorium con ganes de probar les setes que pañáremos pel camín. Pero había muncho más, aquelles monxines yeren unes artistes de la cocina y la cara de los monxos nun asemeyaba un beatus ille, seique un gourmand.
 |
| ¡Por Paterna, d'Asturies y España la Reina! (Semeya: Historia Universal) |
Arrimaron delles meses pa tar toos xuntos pos les monxes ya monxos xintaron con nós; taben arranaos por compartir noticies y tratar cola xente, sobre tou forastero. Nun yera un día más, aquello diba quedar nos anales del monesteriu y yera preciso tar al altor, la fía del conde yera un bombón.
La cena foi de lo más abondante y candial. En cuantes tomamos un par de copes del vino chacolí (los flaires sacaron más tarde un caldu de la Rioh.a alavesa) les formes , el protocolu y l'abstinencia pasaron a un segundu planu. Les setes como entrante - ¡qué riques les igüen ellí! -, morciella de Burgos, cabeza de xabaril, xamón y cecina embutió nel propiu monesteriu seique col gabitu de los vecinos del pueblu; corderu a la estaca que yá taben tresnando enantes de llegar y de postres hoxaldres con cabellu d'ánxel, fruta del tiempu, frutos secos y hasta ¡arroz con lleche! qu'un fraile mozárabe trexo del sur; dalgo asemeyao yá nos pasare en Valpuesta, si nin recuerdo mal.
Na sobremesa tanto flaires como monxes ficiéronnos mil preguntes - como nosotros a ellos - pero sin nun va da más d'esto falamos mañana porque güei toi matáu.
::::::::::::::::::::::
ESTIMANCES:
 |
| Área Recreativa del Ríu Trueba ( Espinosa los Monteros) A cuatro pasos, tres cruciar el ríu, alcontramos Santolaya |
. Al blog: El "Condado de Castilla", un veneru d'esti blog. Siempre agradecíu.
. A les páxines web de: " 7 Merindades", "Merindad de Sotoscueva", "Espinosa los Monteros", "Merindad de Montija", "Merindad de Villarcayo" , "Merindad de Valdeporres", "Merindad de Medina de Pomar asina como a la Diputación de Burgos.
. Nesti rol de semeyeros ... ¡son tantos!... Los nuesos protagonistes pasaron per dalgunos sitios que nós nun conocíemos de manera que nun quedó más remediu que tirar d'internet. Nel pie de cada foto trae l'autor.
::::::::::::::::::::::::::::::::::::::::::::
ENTAMU PRÓSIMU SPOT
Seya como fuere tamos en 841. El rei Castu nun pue pa col alma. La traición de Mahamud en Galicia foi la espuela a una vida real llarada de xirpíos, guerres, y enfallos familiares cola compensación d’una obra arquiteutónica perorixinal y bultable. Dexaba un reinu en construición pero con una base mui firme ya unes idegues bien clares: <Reconstruyir n’Uviéu tol orde góticu de Toledo>. Pero escarecía d’un fíu que pudiere continuar con aquella magna obra, ¿cómo alcontrar un heriede dignu d’esa función?… Tenía asociáu a Ramiro al tronu, fíu de la incombustible rama cántabra, pero sabía d’alguién de los suyos que taba dispuestu a too por algamar al tronu …- < ¿Nin tan siquier pueo morrer tranquilu, Señor?>.
Sicasí entovía-y falta un poco pa reunise col Creador. Nesi entrín y non, el Castu manda a Selim a visitar Galicia p’asegurase que’l Gobernador Ramiro ye, ensin dubia alguna, el meyor validor. El cuciu Ramiro, entós, aprovecha’l tantu pa que Selim s’avere hasta Castiella p’apareyar el tratu matrimonial si se dieren les condiciones afayaices: que Paterna y la so familia tean tanto d’alcuerdu como al altor.
:::::::::::::::::::::
