domingo, 14 de abril de 2019

< ¡Bon Camín! [5a] . C. Primitivu : La Puela - El Palu >

                                     <  ¡Bon Camín ! C. P. [5] : La Puela - A Mesa > 

       Estaya 1ª:   Camín Primitivu [5a]:
                               < La Puela d'Allande - Puertu d'El PALU>

                                          < La Sienda del Nisón >



                            < Camín d'El Palu, pela sienda del Nisón>
                                               < El Palu nun ye talu si asciendes 
                                              pali-pali pela Sienda del Nisón;
                                              les agües van faciéndote compaña
                                              con pontes y banzaos al por mayor.
                                              Los mozos allandesos que colaren 
                                              por fer les Amériques, fuercia mayor,
                                              enxamás dexaren de sentir, aquel
                                              ruxerrux saltarín, l'arrecendor 
                                              de la so sienda madre, 
                                                                                   del Nisón.>>
                                                            
       Sabíemos que'l Puertu d'El Palu yera un finxu del Camín, asitiáu a 1145 m/altor ya la cume màs averada al cielu con que nos debemos enfrentar nesta Ruta Xacobea. Andábemos un poco roceanos, nun ta'l nuesu cuerpu pa marafundios y hai que controlar les escases fuercies que mos queden. Falando con un taxista quitónos el miéu:
     - Venga, ho, si son poco más de 6 km.... 
     -(Hoe, claro, ho;tu nun llegues nin con un cachu a los cuarenta....- Camenté pa min.)
     Un mapa que nos dieren en Turismu afitaba lo dicho: Dos km a Peñaxeita y 4,2 hasta' puertu'l Palu  vienen a ser unos 6 km y mediu...
     - Tranquila, muyerina , ¿ves cómo nun ye pa tanto?.
      Esto foi lo que nos valió, de momentu, pa entamar la caminada, otramiente nun sé quien arrancaría col personal...

La Puela embaxo la mirada aliella de la <Virxe del Ablanu>
< La Virxe prefier l'Ablanu
 pa vivir, que non la Villa
pos controla tola Puela
dende equí, de maraviya >
      Salimos de casa - Santurio - primero qu'otres veces; a les 8 y cuartu yá tábemos camín de l'autopista. Tampoco ye pa tirar cohetes , ¿eh?. Uviéu, Grao, salida a Curniana - Salas y a xubir La Espina. Baxamos a la redolada Tinéu y tiramos p'Allande - Navelgas. Too mui guapo, pero al llegar a Piedrafita en cuenta tirar pa Oubona-Navelgas hasta Piedratecha , na rotonda, facémoslo camín d'Allande pola AS-217... ¡Pa morrer!... Mas de 35 interminables  kilómetros de curva y recurva hasta avistar  Ferroy, l'antoxana de La Puela. Una y buena bien podíemos tener salío en Xera pa visitar el "Carbayón de Valentín" pero ente'l noxu que trayía un menda, pol erru, y que nun yera plan  perder más tiempu siguimos col plan "im-previstu".

<Sales col Mazu y llegues col Palu >
     Tres un cafetín nel "Queipo" y la previsión del taxista Xuan - que taba nel puntu - pa que fuera buscanos embredamos pola
 AS-14 camín d'El Palu.
    Un día solariegu (debo tar pensando nes casones d'indianos) , pero fresquín, yera l'anuncia de daqué prestoso magar los 500 m y picu de desnivel que deberíemos salvar. Total, que son les 10:30 cuando arrancamos de la villa.
      Yá se sal xubiendo pel Barriu d'El Mazu , onde ta la Gasolinera, tres percorrer l'Avenida Galicia,  y dexar atrás unes cases perguapes a dambos llaos de la carretera y dellos xalés en toa regla que pueblen la redolada.
        El son permanente del Ríu, el valle, les montañes al fondu - Les Turries, nos rimeros del Panchón -, les verdes praderes y los eros al par de les casines formen un harmonícu conxuntu embaxo d'un sol afalagueru que vien d'esparcer la gruma mañanera. Antes d'un kilómetru yá vemos la señal, a manzorga, que nos empobina camín del Ríu Nisón per un senderín solombriegu na zona de Fontelvira. Enriba, a manzorga, los montes de Les Turries y Picu los Campos (estos detalles cópiolos del Mayestru Xurde).  El nome del "Mazu" vien-y d'un antiguu mazu hidráulicu, de los munchos que furrulaben na zona occidental d'Asturies (facemos alcordanza d'Os Teixóis, de Taramundi).

Crucia'l Regueiru, a manzorga.
        Al dar con una Riega, que debemos cruciar, éntrenmos duldes per ónde siguir nel biforcu; a manzorga, alcuérdate, pos nun ta señalao. Xubimos pela caleyuca hasta una casona d'El Cumbréu y la señal afayaiza empobínanos a manzorga baxando sele per una caleya formigón ruino hasta dar con ca Zancos, na zona del Teixu onde columbramos otra quintana percima un cachu del camín.
    De cuando en cuando'l ríu va formando pequeños tabayones, naturales unos y artesanos otros, que sirven pa crear sangraeres   al envís de regar los praos axacentes. A vegaes una canal más grande, iguada con procuru, servirá pa llevar l'agua a los banzaos de los molinos.

Ca Zancos, nel Teixu. 
       Siguimos faciendo la ola pel camín embarandáu - yá perfechamente asfalcáu - siempre al compás de ruxerrux del Ríu llaráu de cucies pontes de madera que los ganaderos empleguen pa cruciar a les praeríes de la fastera opuesta. Tres pasar otra casa de paredes de piedra algamamos a una quintana - casa, horru, tenada, hangar ya eros - n'antoxana Peñaxeita, pienso yo, onde un vecín ta furrulando con un tractor mentanto l'otru, bien amable, nos deseya:
    - ¡Bon Camín!, güei tenéis un día de lo más afayaizo. 
    - Que tengan un bon día, señores. 


Algamando a Peñaxeita.
        Salimos del llugar , a eso de les 11:20, con un arrecendor a cuchu importante, vese qu'hai trabayu abondo nesta bona casa. Namás doblar l'horru - el típicu d'occidente, entamilgáu sobro una base multiusos de piedra - entramos nuna verdadera sienda, col pisu de piedra y tierra entemecío, que va ascendiendo al empar que'l Ríu pente una viesca  mesta y solombriega de lo más donda. A vegaes paez predominar l'abeduriu pero ensiguida lo desñeguen castañales y carbayos; tapoco nun falten los carrascos.
Venti minutos más tarde tamos nel cruce que t'invita xubir - per mandrecha- hasta l'Albergue de Peñaxeita, no que yeren les antigües Escueles Nacionales. Como nun ye'l casu tiramos de frente per un caminín astráu de fueya seco ente piornales a mamplén. Pasamos una riega que crucia sele'l camín.

Munches tierres de Peñaxeita pertenecieren al "Fraire"
   [[N'Allande hebo un personax bien célebre nel sieglu XIX, José Fdez. González que ñaciere en Penaseita en 1814. Foi un home avispáu que viaxó munchu pel mundu y alquirió una cultura importante. Rellacionábase con con xente d'altor y terminó casando n'Alicante cola fía d'una familia dedicada al negociu del turrón, la señorita María Galiana. Manudu como yera dedicó en Barcelona al facilitar el tresporte al Caribe a los emigrantes, allandeses mayormente, que queríen fer les Amériques. Dao qu'estos, davezu, nun teníen metálicu con que pagar trocaben el serviciu por tierres del pueblu. "El Fraire", como yera conocíu (seique d'esto nada nun tenía), algamó d'esta miente un patrimoniu bien bultable; munches de les finques a la vera del Nisón yeren d'él. ]]

Ponte de Fonfaraón
      A meudía xustamente (12:00) topamos con un sitiu idílicu: la Ponte del Xestu Molín  que debemos de cruciar pa salvar el xabaz Regueiru de Fonfaraón. Aprovechamos pa tomar la parva sentaos nos bultables raigaños d'una castañal: un plátanu ya una mazana van danos les fuercies necesaries p'algamar hasta la cume del míticu Palu (eso pensábemos entós, en nuestra santa inocencia).
Poco más tarde volvemos cruciar otra Riega pergrande y pedreguesa.

Afatándose:
Hai que llegar guap@ al Picu.
       Llaneamos un ratu a la vera'l ríu hasta qu'acolumbramos los teyaos - teya árabe o pizarra - d'unes cases, un pueblín mui solanu trevesáu por una riega importante, el Ríu Solana, qu'emboca nel Nisón y que debemos cruciar per aciu una ponte mista de formigón y madera. Nun soi a pescanciar cuantes pontes llevamos vistes, nin tan siquier les que cruciamos , ¿tres?. Unes cuantes vaques tán pastiando na vega, a la vera del ríu, claro; elles tamién debieron cruciar la ponte.
      Nun ficimos que salir de La Solana y el camín empina insolente, como si yá tuviere cansáu d'amosanos tanta belleza por un gastu tan pequeñu.
    - Venga, pelegrinos, yá hora de currar, ¿nun veis ónde ta la cume?. ¿Pretendéis xubir en llano?... Eso namás val pa Vettel, yá lo sabéis. A ver si conseguís qu'un día vos acompañe nesta odisea. 

                     
                                                  <Un brinde a la salú de los entomólogos>

           ¡ A plombu!. El Ríu cueye altura rápido: saltos, bancaes, preses ya una vexetación ablucante. Por momentos tenemos qu'aselar. Tamos sentaos cuando un par de montañeros baxen escontra nueso ¡a una velocidá !....
    - Bon día, ¿falta muncho p'algamar al Palu?
    - Bueno, entá vos queda un cachu. Ensiguida caláis a la carretera per onde debéis andar unos 100 metros, darréu vais entrar, a mandrecha, nuna sienda de montaña .... Poco a poco, xubíi adulces,  nun vos apurar....
     - ¿D'ónde venís? ¿Xubisteis al Palu y agora facéislo al aviesu?
    - Non, salimos de Borres y ficimos la Ruta de los Hospitales, agora baxamos a La Puela. Bueno, los qu'andamos apuraos somos nós; tán esperándonos pa la xinta. Ta lluéu. 
    - ¿ Oisti eso, ne?... ¡Los dos tramos nuna mañana!
    - Pos yá nun son unos mozos.... 


 
¿La Sienda del Nisón o 
el País de les Xanes?

         El camín ye increyible, y busco nel llibru "La Peregrina", d'Isabel S. Sebastián dellos pasaxes qu'espliquen munchu meyor que yo lo que ye esti tránsitu:

      [Tien llamao la mio atención un vieyu troncón, vencíu, que del so cadarma comía una infinidá de plantes, viermes ya inseutos tranxidos d'alimentu.]

<La fuercia irresistible de la viesca>

     
    [ La fuercia irresistible de la viesca, enfotada en perpetuase por más rixu que pongamos en gana-y la partida.
 Por más árboles que troncemos, por más raigaños centenarios qu'arrinquemos, magar desaniciemos palmu a palmu los sos llares, obligaos como tamos a abrir pastos p'alimentar el ganáu... Ella aguanta, ella trepa, ella vive, ella caltiense. ] I.S.S.


< A Reigada, s'acabó lo que se daba. >
     
  Depués de tanta viesca tarmuda y solombriega, semillanos y el frescor del calce del Nisón que va enantando por mor de delles riegues saltarines arribamos al caberu puntu habitáu de la sienda: A Reigada. Agora entama lo bueno, la braera ascensión al Palu;
más 400 m de desnivel en 3'5 km.
    - ¡Xacobu, echa un gabitu, manín!

       Siento'l Ríu alluendi... Son les dos (14:00) en puntu. En plena xubida un argayu de piedra calizo, que nun torga l'ascensión, cubre un tramu d'un regueiru, ¡otru!. Un cuartu d'hora más tarde empatamos cola carretera As-17. La información fuere correuta pero el cumal ta... ¡En ca Dios!... La parienta quier llorar.... Nun pueo - nun debo - nin mirar pa ella... 

                                                                                               culiebra >
                                                                                         la 
                                                                         faciendo
                                                              pasu                      
                                                  ente                   
                                         pasu 
                   ascendiendo
    < Vamos

     - Nun sé si podré, l'aire nun me llega y el coral, más que valtos, dame saltos, duelme, ta ardiéndome'l pechu. Esto ye una traición... 
     - ( Yo tamién toi ablucáu mirando pa la cume, pero nun pueo gurgutiar... Fáigome'l llocu y apúrro-y un botellu d'agua, pa despistar...)
    - Oi, tu; ¿ la to amiga , "La Pelegrina", xubió ésto?
    - Y coxa... 
    - ( Coxu vas quedar tu, so .... , del bastiazu que te voi dar). Ye lo que intuí intentado calletrar na so donda mirada...


<Vamos ascendiendo pasu ente pasu - adulces - camín d'El Palu>
       Nós tampoco tenemos priesa...
      [El Camín ye duru y los nuesos güesos vieyos.  Nun hai  apuru. Si'l nuesu Apóstol tardó lo suyo n'amosanos la so presencia, bien podrá aguardar dellos díes más a que nos ablayemos a los sos pies. ] I.S.S.

Brezal -Toxal . ¡Vaya Palu!
      Vemos les montañes escarnaes - eso nos paecen - de tola redolada. Dalgunu será'l Panchón, pero danos igual. Si aquello nun se vien abaxo ye pol granible brezal-toxal que tapiza la fastera. Sentamos un ratu.
    - Venga, a ver si llegamos al pinal....
      Llegamos, aselamos y algamamos hasta un abebentaderu pal ganáu.
    - Yá debe quedar poco, ¿llamamos al taxista?
    - Espera tar arriba. ¿Por qué nun tomamos la tortiella ?; tengo una delgaina....
       Yeren les cuatro menos cuartu (15:45) cuando terminamos de dar cuenta del menú del pelegrín: una tortiella deliciosa, unes raxes de xamón ya unes galletuques permodernes devolviéronnos les fuercies que dexáremos nesti camín interminable. Heureusement dionos por metelo na mochila, porque la intención yera baxar a comer a L'Allandesa.
Intenté llamar al taxi pero ...  ¡ Nun tenía cobertura!....
Nel cumal d'El Palu (1146 m)
¡Llegamos!

    - Si arriba nun hai cobertura vamos tener que baxar andando...
      La rempuesta foi una mirada Lee Marvin que me dexó xeláu.
    - (A esta rapaza voi tener que baxala a llombu...)

        Pa llomba la d'El Palu, que taba ellí mesmo coles sos antenes albentestate. Un vientu arrollador y constante facía xirar les aspes de los molinillos xenaradores d'electricidad a una velocidá supersónica.
    - ¡¡¡¡Nun tengo cobertura!!!!
    - Prueba con esti.   
Puertu d'El Palu  (Esta rapaza ta pa poco)
Al fondu la Central Eólica tresformadora.
       Nel Puertu d'el Palu queden güelgues perantigües de los trabayos nes mines d'oru qu'esplotaren los romanos en toa la redolada: Unes na mesma Campa d'El Palu - pequeñes llagunes - ya otres nos argayos de piedra qu'alcontráremos durante la xubida. Yá sabéis qu'una de les formes d'obtenelo consistía nel Ruina montium, ye dicir, en desfacer les montañes per aciu del fuéu y del agua: Primero una galería soterraña, lluéu calentaben la piedra con grandes fogueres y darréu añagábenlo con agua frío por riegues canalizaes ex profeso. El contraste de fríu-calor frañía y arrostraba la roca desfecho, onde buscaben l'oru. ¡Vaya esclavitú! Probes prisioneros, probes asturianos.
      Costó. Tuvi qu'escondeme d'aquel airón porque nun yera escuchar lo que me dicía'l taxista.
     - Ponte a cubierto, ho; onde nun te dea l'aire... Nun t'oigo nada.
     - Bona idea, tu, voi sapozame nun furacu d'estos de les mines... 
     - H.a, h.a, h.a... Tápate col anorack... 

    Unes poques semeyes porque'l cansanciu y aquel airón impertinente nun te dexaben trabayar. ¿Será tolos díes del añu asina?....
    - Mira qué te digo... al oru que-y den. 
    - Voi sacar una semeya a la Central Tresformadora Eólica  mientres llega'l taxi. 
    - Esos molinillos tienen que xeneral corriente a esgaya.... Oi, nun t'escaezas del Refuxu, ye una ayalga y cualquier día sal volando. 
    - Sí, paez de cuentu. 
        Nun cuartu d'hora taba recoyéndonos Xuan; bien que-ylo agradecimos. Por fin acabó la tensión.

                               ******************************************
   Na Puela dimos unes vueltes enantes de colar pa Xixón. Andoliamos pel centru la villa aloyando cola arquiteutura urbana: Ayuntamientu, cases d'indianos, fontes y les cases-galería del Nisón. Saludamos al Monumental mozu del Emigrante y fuimos encamentamos a la Virxe del Ablanu enantes d'avistar el Palaciu los Cienfuegos, el señor d'Allande.

La Puela d'Allande, la señaldá de tantos emigrantes.
     El día de trabayu nun terminare entá; precisaba dar un vueltu per Allande pa retratar dalgunes coses: El Monumentu al Emigrante, El Palaciu de los Cienfuegos, la ilesia de Nuestra Señora del Ablanu, el pasu del  Ríu Nisón metanes la villa, l'Ayuntamientu y delles cases d'Indianos que son la flor y ñata La Puela: Villa Rosario (el Xalé de Cadierno), Casa Cundo, Casa de Carlos Santos......
     Yá falamos de tou esto nel post anterior : < Camín Primitivu [4a] :Campiello- La Puela>
pero como son entraes independiente vuelvo a repetilo por si daquién nun lu lleere. Como tu yá lo ficisti, pasa d'ello.

El Palaciu de los Cienfuegos:

Güei namás nos queda visitar el palaciu que domina La Puela, esi símbolu de poder señorial del que munches veces refugaron los allandeses. A ver...
         El  Palaciu de Cienfuegos o de Peñalba o de los Señores d'Allande:


 A partir d'un edificiu del XIV don Rodrigo González de Cienfuegos , señor d'Allande, reedificólu en 1520 pasando depués por delles igües siendo mui bultable la del XVIII por Baltesar González de Cienfuegos, tamién conde de Peñalba, arriendes dello namas se caltién de lo antiguo la parte baxa.
    De calter defensivu tien forma de "L" y ta reforzáu por tres turruxones - dos cuadraos ya un rectangular, ampliáu, que-y dan munchu barafuste al edificiu. De mano ye más que probable que fueren almenaos pero anguaño tan cubiertos, por teya árabe, a cuatro agües.
    Una galería de finales del XIX ruempe l'armonía d'esti conxuntu góticu ( a min nun me presta un res magar la so reciente recuperación) con dalgunos, pocos, elementos decorativos renacentistes asitiaos nel interior.
    Tamién el patiu interior gocia d'una galería de madera sofitada en tosques columnes de mampuestos.
Parte trasera'l palaciu.
     Ye una pena qu'esti Señor d'Allande tea a puntu d'esbarrumbar - sigui na Llista Roxa de los edificios "en peligru de..." - sicasí les sos caberes igües, dignes de toa allabanza. Esti edificiu ye'l finxu d'una dómina, más o menos gratible*, pero iconu al fin y al cabu. Como símbolu d'Allande dedicáu a llabores culturales sedría una gayola ya un emburrión turísticu, de xuru, bien bultable.

*Yá sabéis de les engarradielles de los Señores de los cotos colos Conceyos o Puebles, y con esti señor foi mui gordo. El que tien la sartén pol mangu... Nun la suelta, hai que quitá-yla. 
    - Hai que repartir, ho; que toos somos fíos de Dios. 

** Nota: Si daqué dia tengo semeyes meyores del Palaciu prométovos que les cambio. Son de pena, entiéndolo. Sorry. 

Nuestra Señora del Ablanu:


< La Virxe prefier l'Ablanu
pa vivir, que non la Villa
pos controla tola Puela
dende equí, de maravilla
>
       Asitiada  nun cuetu del barriu altu, camín de  Palaciu, alcontramos una ilesia dedicada  a una señora mui asturiana, La Virxe del Ablanu:
      Llevantada nun estilu modernu, metanes del XX, la virxe lleva esti nome porque - cuenta la lleenda - unos pastores alcontraren esta imax ente'l ramax d'un ablanu. P'abellugala como Dios manda'l cura treslladóla a la ilesia parroquial pero, ensin saber cómo, a la mañana siguiente aprució otra vez entamilgada nel mesmu ablanu. Nun taba'l cura p'amiyase ente los sos feligreses y aporfió con baxala a la Puela. El cura aneciaba y añeció pero la Virxe ye la virxe , ya otra vuelta al ablanu... El párrocu terminó por entender que si elli ye <la virxen>, ella ye  <la de Dios>, la ma. Y terminó por entender. 
     - Queridos feligreses, esta Señora ye la Virxe, del Ablanu.
Hasta equí la lleeenda...
   
¿Ta la Virxe enrexada pa que
nun s'escape al Ablanu?
   La realidá ye qu'esti edificiu ta llevantáu sobro otru anterior de planta rectangular cubiertu a tres agües, con muries de mampostería ya un adriu asemeyáu al d'otres ilesies de la redolada. Ye a mediaos del XX cuando se-y añede la cabecera y el cuerpu d'entrada. La imax de la Virxe, que nun ye otro que la la Santina, ta agospiada nun interesante retablu barrocu y celebra la so onomástica'l 8 de Setiembre - como nun podía ser d'otra miente - con una procesión del Cuetu a San Andrés baxo una descarga pirotécnica digna de les mesmes Cangues.

La Ilesia de San Andrés:


San Andrés.
ILESIA de SAN ANDRÉS
 Saint Andrew's d'Ayande tien sos entamos nel sieglu XIII seique la traza principal pertenez al XVI. Ye una construcción nobiliaria onde predomina l'estilu góticu y  tien un calter parroquial y funerariu dao que foi'l mausoléu de la familia Cienfuegos, la so promotora.
D'una sóleda nave repartida en cuatro tramos tien lóxicamente l'altar y dos capielles nos lladrales. Los tramos tán cubiertos con bóveda d'estrella mentanto les capielles cúbrense con sendes bóvedes de crucerìa. Son bultables los retablos interiores. A primeros del XX llevántose una cabecera nueva ansí como una torre-campanariu d'aire hestoricista al estilu francés. A mediaos del XX llevóse a cabu una intervención perdiscutida tanto n'interior - coro, illuminación y bóveda de colores - como na cubierta, que pasó de teya a pizarra. San Andrés ablucaba con tantu modernismu y a finales del siglu hebo una "contrarreforma" ...
   A ver si me dexáis en paz, que yo nun toi pa otro que xugar al golf. Y si un día me queréis dar un subidón lleváime al Llagu Tiberiades, onde pescaba de mozu cuando me sorprendió'l Señor.
     [San Andrés, un pescaor, que como Pedro foi prindáu pol celote pa esparder la Bona Nueva morrió predicando en Patrás (Grecia) claváu nun cruz en sotuer (X), tan emplegada n'heráldica. Igual Ayande debería llevala nel so escudu en cuenta de la Victoria, o la de Los Anxeles, que lleven algunos.]

El Monumentu al Emigrante:

Monumentu al Emigrante
 Dende la mesma Casa de Cundo, a la otra marxe del ríu y un poco elevada sobro la carretera AS-219 que nos tien de llevar a Campiello, vese la escultura d'un mozu antiguu, fuerte, de bronce, que va caláu con boina y n'actitú de marcha; trátase del Monumentu al Emigrante.
       Seique más tarde que n'otros conceyos d'Asturies, debío a lo apartao y mal comunicao d'estes tierres, Allande unvió munchos moz@s a "fer les Amériques". Los destinos preferíos fueren Puerto Rico y la República Dominicana principalmente pero instaláronse en México, Cuba, Arxentina ya Uruguay. Munchos d'estos rapazos tornaron ricos a la "Patria chica" ya invirtieron bona parte d'eses ganancies na tierra que los vio ñacer y pola que tanta señaldá sintieren. Esto foi perimportante p'Allande qu'esperimentó un pusu bien bultable con aquelles perres que veníen del cielu (dende Colón p'acá América foi'l cielu pa muncha xente).
Esti monumentu, xunto con otros dos hermanos qu'hai en San Xuan de Puerto Rico y Stu. Domingo (R. Dominicana), nun faen otro que da-yos les
¡Gracies, indianos!.

Tolos años se celebra equí'l Día del Emigrante.

L'Ayuntamientu:

Ayuntamientu de La Puela (Allande)

Un pelín más alantre, a manzorga, vemos un edificiu porticáu d'estilu eclécticu (meceura d'estilos clásicos)  que concentra la so decoración na fachada principal onde destaca'l recercu de los huecos, la cornisa y el cuerpu del reló, mui decoráu con motivos florales y xeométricos.
Tamos falando del  Ayuntamientu.
Ente planos y remates dilatóse cinco años (1905-1910) la so construcción; por mor de la tela, manín.
Nel interior destaca la bultable escalerona imperial sobro la que s'articula la planta. En 1993 tevo una igua pa modernizar esti noble edificiu qu'en socesivos momentos de la hestoria algamó a ser: Cuartel G.Civil, cárcel, escuela, Oficina de telégrafos y hasta de viviendes s'ocupó.

L'arquiteutu del proyeutu fuere don Regino Pérez de la Sala.

Villa Rosario:  El xalé de Cadierno

Villa Rosario 
            Otra vuelta tornamos a la xeneral, esta vegada per un un llugar emblemáticu; tenemos énte nos la Villa Rosario. tamién  conocía como'l Xalé de Cadierno. Nun se pue entrar meyor na Villa  que per aciu d'esta ayalga.
     Construyida en 1924, n'estilu montañes,  pol puxu de Don Manuel Cadierno Rodríguez-Argüelles (vaya, ¿ye ancestru míu?) ye una de les cases d'indianos más guapes de la redolada. Don Manuel y el so hermanu Segundo emigraren a Puerto Rico y, tres munchos trebeyos, algamaren a llevantar en 1902 la casa de comerciu nomada "Sociedá Cadierno López y Cía" y darréu Cadierno Hermanos . Tornaron ricos, indianos, y a don Segundo nomáronlu alcalde y a don Manuel diputáu provincial (qué cucios, los ayandesos). Iguaron caminos ya escueles y crearon la Asociación Agrícola Allandesa. 
Don Segundo vivió en Cereceda, onde nacieren, y don Manuel llevantó esta villa no alto'l pueblu. Como nun tevo fíos la casa terminó mercándola otru indianu, don Donato Fernández (el de les célebres Tiendes Donato), que casó con doña Rosario Molero Moa, y d'ehí-y vien el so nome: Villa Rosario. La cai consistorial lleva'l nome del maríu poles munches aportaciones que fexo al conceyu. Norabona, don Don Donato Fernández.    


Casa Cundo:


Casa Cundo
     Casa Cundo: En 1924 el célebre inxenieru  Francisco Durán Tover diseñó esta casa d'estilu eclécticu que promovió don Segundo González Vitoria tres pidir permisu p'ampliar la casina familiar que tenía averada al ríu Nisón. Nun quería sometese a regla ríxida y siguió les normes d'otres casones d'esta villa: bultables galeríes, güecos en triaes, balustres y arcos rebaxaos estremaos por pilastres, pero siempres respetando l'edificiu orixinal. Destaca, como non, una escalerona de forxa y madera d'aire modernista.
     Con formigón y madera crea una estructura pa que salvar el calce del ríu algamando unes lluces de cerca 15 metros. ¡Ehí queda éso!
      El semisótanu taba dedicáu a cuadres, la planta baxa a llocales comerciales estremaos de los que se caltién el Café Vitoria, con esi tastu antiguu que tanto presta. Les plantes, como nun podía ser d'otra manera, tán  dedicaes a viviendes.

Casa de Carlos Santos:


Casa Santos  L'Allandesa
 Pegando con L'Allandesa ta la estimada Casa Santos (1905-1907), frente al Ayuntamientu, construcción d'estilu pintoresquista , obra de Regino Pérez de la Sala:
<Destaca por so simetría y esi mirador de forxa-fierro con arcos y filigranes (virgueríes)
La casa, faciendo esquina en chaflán y colos lladrales abiertos en güecos recercaos, siempres dedicó la planta baxa pa Banca y el pisu, con balcones de forxa, a vivienda familiar. El sobráu, de cubierta voladiza y balustrada abierta, ye una pasada.
      Don Carlos Santos Santos (1843-1925) foi alcalde d'Allande, como so padre, más de trenta años. Faciendo honor a los sos apellíos creó una Escuela de Música, un Instituto Segunda Enseñanza, y delles escueles pela redolada. Nel so mandáu tamién se trexo'l Serviciu de Correos y Telégrafos, puxo'l cementeriu de S. Andrés en llugar más afayaizu y llevantóse un Censu qu'estimó n'Allande 7.200 almes.
      Pa da-y puxu a la economía ganadera allandesa remanó tres feries: Berducedo, San Roque d'Herías y Santa Coloma (Campu de La Labrada). Tamién creó plaza de Vetrinariu y punxo l'allumaú eléctricu pa gayola los allandesos. Pa rematar la so obra encargó l'escudu municipal.
   - Don Carlos, ye usté un Santu.

El Ríu Nisón


Ríu Nisón al so pasu per La Puela. 

       El ríu Nisón ye l'arteria de la villa. Nos veneros d'El Palu xurden, misterioses y nidies, les sos primeres agües qu'a midida que cuerren van llamando a conceyu a infinidá de regatos qu'acuden veloces al son del ruxerrux acuáticu y aportando al calce principal los sos trinos saltarinos.
 A vegaes paez escondese ente la tarmuda vexetación pero ensiguida xurde, gayoleru, ente les rises de cucies pontes y pequeños  banzaos que se prollonguen en sangríes pa llevar l'oxíxenu y l'alimentu a les praderíes axacentes.
Al so pasu pela Villa tampoco ye que presente un calce preocupante pero ye meyor tenelu a raya, canalizáu, y engalanáu coles típiques galeríes asturianes que-y dan tanta arrogancia.  Claro que si s'enfada.... Nel Área recreativa de Las Vegas hebo qu'adornalu con una escollera pos taba carcomiendo la pradera... Cuando se pon a enredar nun controla, ye como un mozacu que quier facese home amosando'l el so naciente poderíu. ¡Tranquilu, rapaz!.
Más tarde va llevar los sos cantos al Arganza, tributariu del Narcea y esti del Nalón. ¿Ves?, si al final somos collacios...

                                        ******************************************

                                             LA   ES-PUELA
 
El balcón de Riego, en Tinéu.
< El amor a la patria me decidió a ponerme a la cabeza
de los españoles que despreciando el cadalso
juraron libertad o muerte...>
         Pero entovía faltaba'l remate: Una semeya al balcón onde'l xeneral Riego llanzó a los cuartanos, a tolos españoles, aquel discursu tan célebre :
       < L'amor a la Patria emburrióme a ser el cabezaleru de los dignos españoles que refugando'l cadalsu xuraron llibertá o muerte ...>
       De morrer, contentos.... Unos pastelinos d'El Fontán, ellí mesmo,  con un cafetín de La Curiscada ,que supu a gloria, tornaron l'amarguriu en gayola; convién acabar bien los díes.
        Llegamos a casa al atapecer, pero mereció la pena; nunca nun pensé que l'ascensión hasta'l Palu pola sienda del Nisón fuere tan ablucante, idílica, candial.... ¿Quién dixo daqué de Los Hospitales?. Supongo que será'l polu opuestu y... Habrá que facela algún día, a non tardar, pero toi bien seguru que, el día que me presente ente Caronte va dicime:
   - Tu pases gratis, nin. Tas convidáu a una miloxa; y vas cuntame como foi aquello de la Sienda del  Nisón. 
              Yá llevamos fechos 108 kilómetros, un terciu  (33,6 %) del total 321,4 km. ¿Por qué nun vamos llegar a Santiago si'l  Palu ye lo más duro del Camín?.

                                       ¡Bon Camín, collacios!    Espérovos n'A Mesa.

    ¡Ah!, agora tengo qu'avezame a falar en gallego-asturiano.... Dalgo aprenderé..

ESTIMANCES:


. A "La Peregrina", d'Isabel S.Sebastián, que nos lleva de la mano d'Alana d'Uviéu a Compostela.
. A Xurde Morán, padre del <Camín Primitivu> y al que siguimos dafechu, per esti ya otros caminos d'Asturies.
. A Xuan, el taxista de La Puela que nos vino a rescatar de la ventolera d'El Palu.
. A Eroski Consumer pola so "Guía del Camín Primitivu" que nos marca les pautes a siguir.
   Ye un finxu perimportante del nuesu <Bon Camín>.
. A la páxina web del ayuntamientu La Puela. Y a la de Bedri.
. Y a la Wikipedia, como siempres..
. Y a los indianos. Y a más xente, y páxines, y llibros, pero nun m'alcuerdo....  GRACIES. 

jueves, 4 de abril de 2019

Camín Primitivu [4b]: Campiello - La Puela (Allande)

   Camín Primitivu [4] : Tinéu - La Puela (Allande)

                         Segunda estaya [4b]: Campiello - La Puela

< De Campiello hasta La Puela 
voi pasar per dellos sitios
pa min poco conocíos
pero guapos a conciencia:
Capiella la Madalena,
L'Espín a la mio izquierda;
Borres ta bien cerquina
y el Samblismo y La Mortera
a la vuelta de la esquina.
Tres de pasar per un túnel
arribo a Colines d'Arriba.
Por andar a sopa boba
 nun cruce'l Puente Satorrio,
como que nun quier la cosa
yá toi en Bar Casa Boto.
Yera día de perdese
 y en cuenta buscar la riega
-adiós Ríu y sienda verde  -
xubí pela carretera 

hasta l'Altu Lavadoira.
Per una sienda boscosa
baxé a Ferroy canturriando, 

 y en cuatro pasos llegué 
a la ilesia de Saint Andrews
tres de salvar un regueiru 
per aciu una ponte palu. 
Como que nun quier la cosa
 soi una más de La Puela
desque voi a L'Allandesa 
y m'encamiento al Ablanu.>>
                     
                 ¡Qué trabayu nos ta costando salir de Tinéu!... Bueno, en realidá salimos pero nun colamos.  Y nun ye solo que nos quede otru cachín de coral na tierra de Don Garci si non qu'inda  nos queden por facer delles visites pela redolada'l conceyu - Navelgas, Tuña, Merillés... - pa xubiles nun post paralelu nesti blog. Pero enantes, agora mesmo, vamos entamar cola segunda parte de la estaya  <Tinéu a La Puela > partiendo de Campiello, onde lo dexáremos la última vez; ye dicir :
<Campiello - La Puela>.
            P'algamar delantre Ca Herminia, dende Xixón, fuimos pelo conocío siguiendo lo más posible los pueblos pelos que yá pasáremos otres veces faciendo'l Camín: Uviéu, Grao, Curniana, Salas, La Espina, Tinéu y a Campiello per Piedratecha. Hora y media abondante echamos nel trayeutu.

La última de Sidrín: ¿Un tándem cuadriciclu?
<Con esto llegamos a La Puela nun santiamén>
Tres tomar un cafetín en Ca Herminia arrancamos gayoleros -  yeren les once en puntu - pela TI-3 camín d'El Fresnu.
- Cómo madrugamos, ¿eh?.
El día ta perclaru pero llevantóse un vientu furacanáu, cafiante a más nun poder, que nos trai l'arrecendor del cuchu que los parroquianos tán aprovechando pa esparcer peles tierres de la redolada.
Pa que la gayola fuere más completa alcontramos, abellugáu embaxu un texu, l'últimu inventu de Sidrín: ¡una bici cuatro ruedes!; esti rapaz ye la H.
      ¿Primer intentu d'un tándem?. Esti neñu yá nun mos abandona desque ficimos el <Camín de Cuadonga>, vese que-y prestó esto de la correndera, y ye que la nuesa Asturies ye tan llambiona...

La Ermita la Madalena.
La nuesa diosa viaria. 
        Cerca l'inventu ciclostáticu  apruz énte nós un Área Recreativa integrada nuna carbayerina. Al cabu la mesma alcontramos la cucia Ermita la Madalena, de talla románica: Una mínima nave, con  techume de madera, a cuatro agües tipu panera,  ya un adriu sofitáu en dos parés pergordes de mampuestos de piedra. Ta bien arregladina.
Una imax de la virxe, dolorosa,  yá presaxa la tarde de fogueres que s'avenía. Sí, el vientu, la seca y sobremanera la mala conciencia d'algunos van a favorecer unos díes terribles de fueos nel norte d'España, pero sobremanera n'Asturies.
Tres delles plegaries a la nuesa Diosa Viaria ya unes cuantes semeyes siguimos andando pel pandu soportando aquel airón bien fríu, magar el día soleyeru que se presentaba.
        Como a dos estadios*, tres pasar unos hangares dedicaos a la cría de vacuno y dexar a manzorga el pueblín agrícola-ganaderu d'El Espín, abandonamos la xeneral pa empobinanos per un senderu a manzorga que nos tien de llevar hasta Borres. Ye un camín anchu, de tierra, embarráu de cuando en vez, pero que nun nos torga pa nada facer una allegre caminada saltando d'equí p'allá cuando la caleya se salpicaba de champanes.
*Un estadiu romanu = 185,125 m. 


El Barín de Borres
    A meudía entrábemos en Borres tres pasar un palaciu esbarrumbáu y una vega bien granible surcada por dellos tractores  que componíen una moderna y bucólica estampa. Paramos a abebentar na Fonte los pelegrinos y escaecimos la xubida al Albergue.
Ensiguidina algamamos al Barín de Borres; quedamos coles ganes del vermú pos entá quedaba muncha caminada. Vamos ascendiendo per una pista formigón que pasa per delantre de "Piensos la Figal" poco antes d'empatar cola carretera xeneral (AS-219), la que va a La Puela. Cruciámosla pa pasar per delantre la Fonte Borres, del añu 1937, en plena Guerra Civil; munchu meyor esto qu'andar a tiros.
       Depués de xubir un camín bien pindiu, empiedráu por llabanones, pasamos a llanear nos rimeros d'un pinal onde cuido tán baltando dafechu. Tamién se ve munchu ocalito.

De Samblismo a la Mortera
ves quintanes de primera.
       Son les 12:42 cuando llegamos a un biforcu balizáu con dellos cartelos indicativos: A mandrecha pa la <Ruta de los Hospitales> y de frente pa La Puela, lo nuestro; entá nos queden ¡10 km!. H.oerrr...¿Llegaremos?. Tamos nel pueblu de Samblismo y tres volver a cruciar la carretera xeneral damos con una panera de seis pegollos de madera. Llámanos l'atención  una especie molinillu pergrande con unes aspes dando vueltes por mor del aire:
    - ¿ Oiga, esi apararatu ye pa producir corriente?
    - Sí. 
    - (Val gallu). Gracies. Bon día.
        Hai que ser llistos, a min prestóme a esgaya decatame la xenialidá de les persones. ¡Quién pudiere facer ún!.
     A les trece pasaes tamos na Mortera. Lo que fuere una casona importante llora énte'l pasu los pelegrinos; compénsalo l'adxunta Ganadería Bobes. Embaxo una marquesina lleemos:

Ganadería Bobes, fierru.
                           <Bon camín>
y tres pasar la Riega la Mortera tornamos a xubir per un caminucu.
      De llueñe vemos un pueblu, debe ser Colines. De sutrucu, al dir pela carretera, vemos un cartelu del Camín que nos empobina hacia mandrecha, per una caleya: ¡Qué raro!.
La Parienta diz que nones, qu'ella va polo segao. Métome a ver qué pasa... Doi una vuelta tres cruciar un regueiru - ye'l Ríu Escuru -  y paso per un túnel embaxo la carretera. Al poco yá tengo la costiella, en xarres, esperando por min.
      A les dos menos cinco tamos en Colines d'Arriba. ¡Menuda ventolera!. Como haya un incendiu....


Adiós, Mortera del alma,
espero volvete a ver
con un pelín de más calma. 
      [[La Mortera ye una aldea de la parroquia de Cerredo perteneciente al conceyu de Tinéu. Equí viven  unos sesenta habitantes, casi que toos mayores. De la importancia que tevo esti pueblín dan fé un Palaciu esbarrumbáu del XV, que perteneció a la casa de Tinéu (1510) y depués a los Maldonado (XVIII) , ya una capiella barroca (XVI-XVII) baxo l'enfotu de San Pascual Baylón.
Les Morteres foron en so tiempu Cotu Xurisdional con capital en Villarmilde y  diminaba les tierres de Colines d'Arriba ya Abaxo, Porciles, Lavadoira, Ríu-Castiellu, La Fanosa, Cerredo y les brañes de Curriel.los y Besapié. Perteneció a la familia Quiñones que la pasó a la casa de Tinéu, estos a los Maldonado y terminó na Capumanes. Nel XIX integróse nel Conceyu de Tinéu.
Cuenten, qu'esta zona viescosa de Les Morteres foi en tiempos mui favoratible pa les engataes de los bandidos a los pelegrinos xacobeos. Nun foi'l casu. ]]

Pelegrina xacobea nel Barín de Borres.
Por andar de comedia nun vimos
la indicación dica'l Ríu. 
       Equí lo normal ye baxar per un senderu hasta'l Ríu Villaverde pero nun alcontramos la señal afaiza, asina que siguimos carretera xeneral (As-219) alantre. Perdimos el pasu por una ponte de madera del añu <2010. José Pérez Satorrio> que te lleva hasta L'Altu de Porciles (773 m/a) per onde s'aprecia una bultable plantación de pinos. Son les dos y media (14:35).


[[ La pallabra "porciles" vien del llatín : "porcella", que se refier a "tormentes". La parroquia ta embaxo l'advocación de San Roque, supercélebre en tou Tinéu, a la que tamién pertenez Lavadoira. Porciles tien escuela, fonte, cementeriu ya la ermita camentada del ¿XVIII? d'una sóleda nave col presbiteriu cuadráu. ]]

San Roque alcuéntrase bien en
culisquier parte, lo d'él ye
aidar al pelegrín. 
      Agora tenemos que dir baxando camín del pueblu de Porciles. A la entrada recíbenos la Ilesia de San Roque, un santu mui apreciáu nestes dómines; sí, el del perru y la pata firía. Nos praos adyacentes tán paciendo unes cuantes vaques ratines. Y al salir del pueblu alcontramos el Bar Casa Boto, una tienda onde hai de too dende 1929, menos un chigreru que nos atienda; vese que nun tamos n'época alta. Taría na güerta. El casu ye que nun pudimos tomar el vermú asina qu'en cuantes vimos unes piedres afayaices ellí que nos sentamos a tomar la parva: Un plátanu ya una galleta enerxética. Nun sé si foi pol chascu del chigreru o qué nun vimos la señal que nos empobinaba hacia abaxo, camín del Ríu Porciles y siguimos pela carretera (¡otra vuelta!).

Per esti túnel del tiempu
arribes a Les Colines
de la parroquia Cerredo
y vecina de Porciles.
Ensiguida Lavadoira,
que tou yera Villarmilde.


  - ¡Cóimes, un pelegrín! ... ¿D'ónde sal esti home?
   - Bon día, ¿ta faciendo'l Camín?
   - Sí, el Primitivu. 
   - ¿Y cómo sal per ehí y nun vien pela carretera?
   - Porque onde'l Bar (Casa Boto) había una indicación a la izquierda.
   - ¿Camín del ríu? (R. Porciles)
   - Sí, sí. Y depués p'arriba salvando unos escalones.
   - Nin nos enteramos. 
   - Pues arrodiasteis un poco...




Colines d'Abaxo,
nel Cotu Les Morteres
      Tres pasar una moderna ponte azul algamamos a les (15.20) al Altu de Lavadoira (806 m/snm). aminamos un poco al empar que'l pelegrín, pero elli e más mozu...
   . ¿D'ónde vienes?
   - D'Uviéu; ayeri dormí en Tinéu. Güei quiero facelo na Puela. 
   . Pero tu nun yes asturianu, ¿eh?
   - Non, soi gallegu, de Vigo. ¿Conocéislo?
   - Poco, va tiempu que nun vamos. Alcuérdome de les Islles y del Mercáu de la Piedra. 
   .. Y yo d'un partíu de fúbol que xugamos los del Sporting contra'l Celta. Empatamos a uno. 
  
       Equí acaba'l conceyu de Tinéu y entramos n'Ayande. Agora toca baxar a La Puela per una viesca onde predomina'l pinu sobremanera. Un respiru pal cuerpu y pal alma ....

[Mientres escribo esti post toi escuchando pola radio'l partíu Sporting-Uviéu (24-3-19)
¡¡¡ Puxa  Sporting !!!
(Semeya d'El Comerciu)

( ¡Y nun lo digo porque-y acaben d'anular un gol al Uviéu! ... ¡¡¡¡Menos mal!!!! ... ¡¡¡Nel últimu minutu!!!..., pero falta la prórroga... 
¡Ai, mamina! . De momento ganamos (1-0)... Xube hasta'l porteru a rematar el corne.... Los del Uviéu venga facer faltes... Mariño, nun te llevantes... 
¡¡¡Corne a favor del Sporting!!... A ver .... ¡¡¡¡¡Final!!!! .... ¡¡¡Ganamos!!!!.... ¡¡¡Viva la madre que me parió!!!! .... ¡¡¡Sporting!!!!..... ¡¡¡Sporting!!!  ..... ¡¡¡Tres puntos a la buchaca !!!..... ¡¡¡¡Puxa Sporting!!!!)]]



Aportando a La Puela, no fondero'l valle. 
     Dicimos adiós a Xacobu - qu'ensí se llama'l chaval - porque el so andar tien otru aquel...
    La baxada a La Puela ye perprestosa. Una sierpe solombriega col arrecendor a pinu que nos va llevar a la meta nun visveo.  A media baxada alcanzamos a Xacobu:
   - ¿Qué te paso, ho?
   - Duelme un poco la rodiya, al baxar nótolo más. 
   - Igual tienes que replanteate lo de xubir al Palu, pámique ye mui cuesto... ¿Por qué nun vas al médicu, na Puela?
- Yá sabemos lo que manden, descansu y antienflatorios...
- Sí, d'eso sabemos nós bastante. 
   
Regueiru de Mouras, n'antoxana de La Puela.
       Al salir del pinar, nos rimeros del Picu Corona, entramos nel pueblín de Ferroy. Trevesamos les  sos estreches y formigonaes cais y llegamos a un regueiru: el Ríu Mouras, o'l Regueiru del Caleyu, que dellos nomes tien, que debemos salvar per aciu d'una prestosa ponte de madera. Quixera ver yo quién s'atreve a pasar equí cuando hai enriaes...
     Pasamos unos praos de la vega por mor d'un caleyu de carru y col pisu de tierra húmedo,  ya embocamos, como non,  na carretera xeneral (As-219) , compañera de fatigues. En cuentes de siguir per ella pa entrar na Puela encamiéntennos, a los pelegrinos, a faelo xubiendo una cuestina perfechamente empiedrara y acutada pon una barganal que nos dexa no alto del pueblu. Quieren que conozcamos la parte antigua y qu'esfrutemos cola panorámica de la nueva villa. Pos ¡gracies!.

Villa Rosario, guapa manera d'entrar na Villa La Puela.
             Otra vuelta tornamos a la xeneral, esta vegada per un un llugar emblemáticu; tenemos énte nos la Villa Rosario. tamié  conocida como'l Xalé de Cadierno. Nun se pue entrar meyor na Villa  que per aciu d'esta ayalga.
     Construyida en 1924, n'estilu montañes,  pol puxu de Don Manuel Cadierno Rodrígue-Argüelles (vaya, ¿ye ancestru míu?) ye una de les cases d'indianos más guapes de la redolada. Don Manuel y el so hermanu Segundo emigraren a Puerto Rico y, tres munchos trebeyos, algamaren a llevantar en 1902 la casa de comerciu nomada "Sociedá Cadierno López y Cía" y darréu Cadierno Hermanos . Tornaron ricos, indianos, y a don Segundo nomáronlu alcalde y a don Manuel diputáu provincial (qué cucios, los ayandesos). Iguaron caminos ya escueles y crearon la Asociación Agrícola Allandesa. 
Don segundo vivió en Cereceda, onde nacieren, y don Manuel llevantó esta villa no alto'l pueblu. Como nun tevo fíos la casa terminó mercándola otru indianu, don Donato Fernández (el de les célebres Tiendes Donato), que casó con doña Rosario Molero Moa, y d'ehí-y vien el so nome: Villa Rosario. La cai consistorial lleva'l nome del maríu poles munches aportaciones que fexo al conceyu. Norabona, don Don Donato Fernández. 
               
El <Camín  Xacobéu>
empobina  pela parte alta la Villa.

            El pelegrín que nos fai compaña nómase Xacobu y, mediu coxu por un esguince, entovía anda más que nosotros. Ye de Vigo y ta camentando en tornar pa casa porque nun s'atreve a xubir El Palu; cuido que será peor baxalu.
   - Cuayu, chaval, que tu pues; y amás, a ti Xacobu nun t'abandona nunca. 
   - H.a,h.a,h.a.
      Mientres él s'empobina al albergue nós embredamos dica'l migollu del pueblu.
      La verdá ye que camentando nello depués quedé un poco esmolecíu por nun ofrece-y el coche por si quería venir a Uviéu o Xixón a coyer un autobús. Nun anduve mui oriscu, la verdá. Tengo qu'espabilar, como bon pelegrín.
      Pela Avenida América algamamos a la plaza de la Ilesia de San Andrés.

San Andrés
 Saint Andrew's d'Ayande tien sos entamos nel sieglu XIII seique la traza principal pertenez al XVI. Ye una construcción nobiliaria onde predomina l'estilu góticu y  tien un calter parroquial y funerariu dao que foi'l mausoléu de la familia Cienfuegos, la so promotora.
D'una sóleda nave repartida en cuatro tramos tien lóxicamente l'altar y dos capielles nos lladrales. Los tramos tán cubiertos con bóveda d'estrella mentanto les capielles cúbrense con sendes bóvedes de crucerìa. Son bultables los retablos interiores. A primeros del XX llevántose una cabecera nueva ansí como una torre-campanariu d'aire hestoricista al estilu francés. A mediaos del XX llevóse a cabu una intervención perdiscutida tanto n'interior - coro, illuminación y bóveda de colores - como na cubierta, que pasó de teya a pizarra. San Andrés ablucaba con tantu modernismu y a finales del siglu hebo una "contrarreforma" ...
   - A ver si me dexáis en paz, que yo nun toi pa otro que xugar al golf. Y si un día me queréis dar un subidón lleváime al Llagu Tiberiades, onde pescaba de mozu cuando me sorprendió'l Señor.
     [San Andrés, un pescaor, que como Pedro foi prindáu pol celote pa esparder la Bona Nueva morrió predicando en Patrás (Grecia) claváu nun cruz en sotuer (X), tan emplegada n'heráldica. Igual Ayande debería llevala nel so escudu en cuenta de la Victoria, o la de Los Anxeles, que lleven algunos.]

      Delantre la ilesia alcontramos dos pequeños monumentos: Un monolitu dedicáu a los emigrantes ayandesos ya una placa conmemorando'l VII centenariu de la Villa. 

      Allande "ad lindem", na llende colos suevos , tien Carta Puebla dende'l sieglu XIII cuando (1262-1267) ó (1265-69) l'algamó per aciu l'obispu d'Uviéu, Pedro II. Nesta dómina ainda nun tenía escudu con armes propies pero bien poco depués, en 1277, cuando Allande fai comuña - Carta d'Hermandá - na Espina con colos conceyos vecinos de Tinéu, Cangues, Valdés, Avilés, Pravia, Grao, Salas y Somiedo yá sí que les tenía, magar nun les llegamos a conocer.

Ríu Nisón, al so pasu peLa Puela.
<Ye la sienda del Nisón
una ayalga pa la vista,
nun ye plan qu'equí, na Villa,
ablayémos-y el blasón;
corredor y galería 
son equí, con gran razón,
gran motivu d'allegría
pal indianu que tornó
a la villa adebecida,
a la vera del Nisón.>
-Mui bien, gallu,
p'allá voi.
       Talo cucios pelegrinos vamos restolar pela villa pa conocer un poco'l so desendolcu urbanu turísticu-arquiteutónicu, a ver qué alcontramos....
        Hemos tener en cuenta qu'Allande, 547 s/nm, ye un pueblu que vivió munchos años a la solombra d'una Casa- Palaciu que dominaba tola redolada: la familia Peñalba-Cienfuegos. Munchos años tuvieren a la tema ciudadanos y nobles polos drechos allandesos.
     La emigración, bien tardía n'Allande por mor de la incomunicación tradicional, trexo un espoxigue indianu dende l'entamos del XX; tarde, pero <val más tarde que nunca>. Primero la marxe isquierda del Ríu Nisón a la salida'l pueblu y darréu los barrios d'El Cantu y del Ablanu.
Bueno, vamos caleyar un poco pa dir conociendo algo, pos lo único que recuerdo esta villa ye'l Monumentu al indianu y nin siquier sé onde ta.

      Quedáremos anantes na plaza Saint Andrews, meyor dicho, na Plaza los Hermanos Cadierno , que yà conocemos un poco. Vamos siguir pela Cai Mayor un centenar de metros y torcemos a manzorga nel primer esviación hasta dar col ríu.
        El Ríu Nisón, l'arteria de la villa, la que xunce los barrios estremaos del cogollu la ciudá, ñaz nos altos d'El Palu y baxa gayasperu moviendo los rodeños de dellos molinos, yá esaniaos o ensin usu, de los qu'amuesen constancia delles ñores y algunes presines o banzaos que, con bayura de  ponticos de madera, faen la gayola de los senderistes del Camín Xacobéu. Va verter les sos agües al Ríu Arganza, tributariu del Narcea. Cuido de xusticia dicir que'l Ríu Nisón acueye les agües de los ríos Prada (al norte) ya Abaniel.la (al sur) que llenden la cordal onde s'asitia'l Castru de San L.luís, del que tendremos que falar nun post paralelu.

Fonte Los Burros (MCMXXV)

       Cruciamos la ponte y tres echar un tragu na Fonte los Burros - cuenta Carme n'<asturgeografic> qu'equí había una fragua onde se ferraba a los parientes de Platero. Ye del añu 1925 siendo'l so constructor don Ricardo Casielles y tando d'alcalde daquella don Manuel Cadierno.
N'España gobernaba Alfonso XIII, ñetu de la nuesa estimada Sabel II (yá sabéis del enfotu que tenemos por esta reina por mor del <Camín de Cuadonga>), siendo Primer Ministru don Miguel Primo de Rivera que nos traía a "maza-martillu" cola so Dictadura (1923-1930). ¿Alcordáivos?...
      [[ La Real Dictadura Militar de Primo de Rivera nun fue otro qu'un apañu ente'l Rei y el Xeneral < pa salvar a España de los profesionales de la política> (Tamién la Guerra d'África, que  yera una sangría inacabable).
 Un gobiernu de militares (9) que supende la Constitución, los ayuntamientos, los partidos políticos...
   - ¡Viva la Democracia!
   - Calla, fatu, menos goña.
   - ¿Alcuérdeste cómo entama aquel Manifiestu?.....


¡¡¡ Firrrrmes!!!
El Directoriu de Primo Rivera.
Na dómina d'Alfonxo XIII .
     < ¡Españoles!....
   - Empieces bien, gallu.
   - < ... Yá llegare pa nosotros el momentu más temíu qu'esperáu...
   - Esti fala a la gallega.
   - ... porque tuvieremos preferìo vivir siempre na llegalidá...
   - Vamos, qu'hasta'l que pon la dictadura sabe que nun ye llegal... ¡Bárbaro!.
   - .... pero atendiendo'l clamor popular de los qu'amamos la Patria...
   - ¡Ai, los salvapatries!
   - .... nun vemos otro pa ella que salvala de los profesionales de la política...
   - Oi, tu; cuido qu'igual nun nos veníen mal una temporada... Pa pone-yos les piles a estos...
   - ... que por razones estremaes nun traen namás que desdiches ya inmoralidaes...>
   - Lo que te digo, voi buscalos.
   - Bueno, el Directoriu quería acabar cola corrupción y l'anarquía... a so manera. Pero nel so favor ta que trató con sindicatos y partíos políticos. 
   - Con algunos...
   - Colos anarquistes non, veníen de cometer algunos atentaos ... Pero los socialistes - más razonables - collaboramos p'ameyorar les condiciones de los trabayadores: Besteiro, Largo Caballero, Llaneza.... Magar lo que tuvieren dicho, nel Directoriu sabíen qu'ensin política nun hai nada que facer. Namás hai que dar colos buenos....
   - ¿"Collaboramos"? dices... Pos dalgunos víenlo mui Prieto y torcieron el focicu.
   - Ye imposible tar toos d'alcuerdu, nin tan siquier nel mesmu barcu...
   - Agora que fales de los anarquistes... ¿alcuerdes qu'esta selmana tenemos l'homenax a Dalia - fía d'un célebre anarquista - y la presentación d'un llibru al rodiu escritos suyos?.
   - Sí, cómo me voi escaecer. Dalia ye una d'eses persones que marquen. Intelixente, cultivada, paciente y sobre too cenciella, cercana, tolerante...
   - Tolerante colo que se podía, cola inxusticia nun podía...
   - Los atentaos de París, por exemplu. Ella criárase ellí mesmo, nun ambiente de tolerancia y llibertá... Col radicalismu l'ablucaba. Ella yera -ye - como la antítesis del anarquismu que nos desplicaren cuando la dictadura franquista. Sí, suena a intolerante o vilolento pero les conquistes sociales nun se consiguieren rezando (igual agabitaba), hebo qu'arrincales pola fuercia.
   -  Ella yera la bondá y la correición; dicía: < El verdaderu intelectual ye aquel que trata a los demás como si lo fueren>. ¿Por qué nun seguimos caleyando, ho?... A ver si alcontramos esos políticos bonos que con tantu enfotu busques ...]]

<La Fonte de los dos Caños>. Cuando Alfonso XII (1.883)
       Caleyamos hasta otra fonte cercana: La Fonte los dos Caños del añu 1883, siendo'l so constuctor don Francisco Pérez Fdez- Casariego y alcalde don Carlos Santos.
   - Bueno, ¿y quien gobernaba d'aquella?
   - Prestóte, ¿eh?... Pos mira en 1883, mientres los allandes@s se dedicaben a facer fontes n'España gobernaba Alfonso XII (1874-1885), el fíu de Xabel II de Borbón (la nuesa amiga). So madre tevo qu'abondonar el tronu esiliando en París. Tres dellos avantares el so fíu trexo la Restauración, borbónica . Criáu nel estranxeru daprendió d'otros paises más lliberales y , viendo a España dende fuera, entendió que precisaba d'un cambiu radical, políticu, social ya económicu y yera preciso sacala dafechu del atrasu que significó la "gloriosa" Guerra de la Independencia y del que paecía nun poder salir: Nueva Constitución (1876), temple nos partíos políticos, fin de la Guerra Carlista, paz en Cuba, tranquilidá ya intentu d'establecimientu comercial n'África tres el repartu de la mesma ente les potencies europees, frenu a los fueros... Podríemos dicir un reináu de tranquilidá, viniendo d'onde veníemos. El "Pacificador", lu apellidaben.


Ríu Nisón, l'arteria la villa.

          Nós tiramos polo segao -  Cai Donato Fernández - camín del Ayuntamientu, como indica un cartelu.
   - Mira, L'Allandesa; el célebre restaurant onde cuntábemos xintar. 
   - Sí, de llegar primero, eso teníemos previsto, pero a estes hores.... Mira que te digo, yá que tomamos la parva pel camín y nun se plan de pegase agora una fartura ¿por qué nun visitamos cuatro cosuques de la villa y depués tomamos algo en Casa Herminia, onde aparquemos?. 
   - Val, pero l'Allandesa queda pendiente, ¿eh?. Esta nun te la perdono. 
   - Prometío, nun me gusta conducir tres pegame una yacuada. 



Casa Santos (1907) engalanando a La Nueva Allandesa
      Pegando con L'Allandesa ta la estimada Casa Santos (1905-1907), frente al Ayuntamientu, construcción d'estilu pintoresquista , obra de Regino Pérez de la Sala:
<Destaca por so simetría y esi mirador de forxa-fierro con arcos y filigranes (virgueríes)
La casa, faciendo esquina en chaflán y colos lladrales abiertos en güecos recercaos, siempres dedicó la planta baxa pa Banca y el pisu, con balcones de forxa, a vivienda familiar. El sobráu, de cubierta voladiza y balautrada abierta, ye una pasada.
      Don Carlos Santos Santos (1843-1925) foi alcalde d'Allande, como so padre, más de trenta años. Faciendo honor a los sos apellíos creó una Escuela de Música, un Instituto Segunda Enseñanza, y delles escueles pela redolada. Nel so mandáu tamién se trexo'l Serviciu de Correos y Telégrafos, puxo'l cementeriu de S. Andrés en llugar más afayaizu y llevantóse un Censu qu'estimó n'Allande 7.200 almes.
      Pa da-y puxu a la economía ganadera allandesa remanó tres feries: Berducedo, San Roque d'Herías y Santa Coloma (Campu de La Labrada). Tamién creó plaza de Vetrinariu y punxo l'allumaú eléctricu pa gayola los allandesos. Pa rematar la so obra encargó l'escudu municipal.

Ayuntamientu La Puela, entamos del XX.
     Un pelín más alantre, a manzorga, vemos un edificiu porticáu d'estilu eclécticu (meceura d'estilos clásicos)  que concentra la so decoración na fachada principal onde destaca'l recercu de los huecos, la cornisa y el cuerpu del reló, mui decoráu con motivos florales y xeométricos.
   Tamos falando del Ayuntamientu.
Ente planos y remates dilatóse cinco años
(1905-1910) la so construcción; la tela, manín.
Nel interior destaca la bultable escalerona imperial sobro la que s'articula la planta. En 1993 tevo una igua pa modernizar esti noble edificiu qu'en socesivos momentos de la hestoria algamó a ser: Cuartel G.Civil, cárcel, escuela, Oficina de telégrafos y hasta de viviendes s'ocupó.
L'arquiteutu del proyeutu fuere don Regino Pérez de la Sala.

     Dende'l mesmu Ayuntamientu yá ves, abellugando la plaza axunta Diz Tirado, otra casona importante que cuelga sobro'l ríu Nisón por un lladral:



Casa Cundo, por don Francisco Durán en 1927.
     Casa Cundo: En 1924 el célebre inxenieru  Francisco Durán Tover diseñó esta casa d'estilu eclécticu que promovió don Segundo Glez. Vitoria tres pidir permisu p'ampliar la casina familiar que tenía averada al Nisón. Nun quería sometese a regla ríxida y siguió les normes d'otres casones d'esta villa: bultables galeríes, güecos en triaes, balustres y arcos rebaxaos estremaos por pilastres, pero siempres respetando l'edificiu orixinal. Destaca, como non, una escalerona de forxa y madera d'aire modernista.
     Con formigón y madera crea una estructura pa que salvar el calce del ríu algamando unes lluces de cerca 15 metros. ¡Ehí queda éso!
      El semisótanu taba dedicáu a cuadres, la planta baxa a llocales comerciales estremaos de los que se caltién el Café Vitoria, con esi tastu antiguu que tanto presta. Les plantes, como nun podía ser d'otra manera, tán  dedicaes a viviendes.

Monumentu al Emigrante (1990).
 Donación d'Agnes Fuertes de Carbajal y más.
Escultura del catalán Antonio Prats Ventós y
Mural del allandés José Manuel Vega.
        Dende la mesma Casa de Cundo, a la otra marxe del ríu y un poco elevada sobro la carretera AS-219 que nos tien de llevar a Campiello, vese la escultura d'un mozu antiguu, fuerte, de bronce, que va caláu con boina y n'actitú de marcha; trátase del Monumentu al Emigrante.
       Seique más tarde que n'otros conceyos d'Asturies, debío a lo apartao y mal comunicao d'estes tierres, Allande unvió munchos moz@s a "fer les Amériques". Los destinos preferíos fueren Puerto Rico y la República Dominicana principalmente pero s'instalaron en México, Cuba, Arxentina ya Uruguay. Munchos d'estos rapazos tornaron ricos a la "Patria chica" ya invirtieron bona parte d'eses ganancies na tierra que los vio ñacer y pola que tanta señaldá sintieren. Esto foi perimportante p'Allande qu'esperimentó un pusu bien bultable con aquelles perres que veníen del cielu.
Esti monumentu, xunto con otros dos hermanos qu'hai en San Xuan de Puerto Rico y Sto. Domingo (R. Dominicana), nun faen otro que da-yos les
¡Gracies, indianos!.
Tolos años se celebra equí'l Día del Emigrante.

La Virxe del Ablanu:


La Virxe del Ablanu
     Asitiada  nun cuetu nel barriu de .... , camín de  Palaciu, alcontramos una ilesia dedicada  a una señora mui asturiana, La Virxe del Ablanu:
Llevantada nun estilu modernu, metanes del XX, la virxe lleva esti nome porque - cuenta la lleenda - unos pastores alcontraren esta imax ente'l ramax d'un ablanu. P'abellugala como Dios manda'l cura treslladóla  la ilesia parroquial pero, ensin saber cómo, a la mañana aprució otra vez entamilgada nel mesmu ablanu. Nun taba'l cura p'amiyase ente los sos feligreses y aporfió con baxala a la Puela. el cura aneciaba y añeció pero la Virxe ye la virxe , ya otra vuelta al ablanu... El párocu terminó por entender que si elli tamién ye <la virxe>, ella ye  <la de Dios>, la ma.

Esta Señora, collacios, ye <La Virxe>

La realidá ye qu'esti edificiu ta llevantáu sobro otru anterior de planta rectangular cubierta a tres agües, con muries de mampostería ya un adriu asemeyáu al d'otres ilesies de la redolada. Ye a mediaos del XX cuando se-y añede la cabecera y el cuerpu d'entrada. La imax de la Virxe, que nun ye otro que la la Santina, ta agospiada nun interesante retablu barrocu y celebra la so onomástica'l 8 de setiembre -como nun podía ser d'otramiente - con una procesión del Cuetu a San Andrés baxo una descarga pirotécnica digna de les mesmes Cangues.

      Güei namás nos queda visitar el palaciu que domina La Puela, esi símbolu de poder señorial del que munches veces refugaron los allandeses. A ver...
         El  Palaciu de Cienfuegos o de Peñalba o de los Señores d'Allande:

Parte trasera del Palaciu Peñalba
          A partir d'un edificiu del XIV don Rodrigo González de Cienfuegos , señor d'Allande, reedificólu en 1520 pasando depués por delles igües siendo mui bultable la del XVIII por Baltesar González de Cienfuegos, tamién conde de Peñalba, arriendes dello namas se caltién de lo antiguo la parte baxa.
    De calter defensivu tien forma de L y ta reforzáu por tres turruxones - dos cuadraos ya un rectangular, ampliáu, que-y dan munchu barafuste al edificiu. De manos ye más que probable que fueren almenaos pero anguaño tan cubiertos, por teya árabe, a cuatro agües.


     Una galería de finales del XIX ruempe l'armonía d'esti conxuntu góticu ( a min nun me presta un res magar la so reciente recuperación) con dalgunos, pocos, elementos decorativos renacentistes asitiaos nel interior
    Tamién el patiu interior gocia d'una galería de madera sofitada en tosques columnes de mampuestos.
     Ye una pena qu'esti Señor d'Allande tea a puntu d'esbarrumbar - sigui na Llista Roxa de los edificios "en peligru de..." - sicasí les sos caberes igües, dignes toa allabanza. Esti edificiu ye'l finxu d'una dómina, más o menos gratible, pero iconu al fin y al cabu. Como símbolu d'Allande dedicáu a llabores culturales sedría una gayola ya un emburrión turísticu, de xuru, bien bultable.

                                ************************************
       Tres visitar el palaciu Cienfuegos dimos la caminata por terminada y fuimos a tomar la espuela a Casa Herminia. Un taxi llevónos pola AS-219 hasta'l restaurant pero pel camín fexo daqué mui prestoso.... Al camentar con elli les duldes sobro la Ruta los Hospitales tevo a bien acercanos en Samblismo hasta'l puntu exautu onde podíemos entamar esta sienda y arriendes d'ello onde podríemos aparcar. Él ofrecióse pa dir buscanos al Palu y llevanos de vuelta a Samblismo, onde  dexáremos el cohe; un detalle.
      Yeren cerca de les viespores - casi les seis de la tarde - cuando terminábemos de reponer fuercies. Poca cosa porque nun ye conveniente andar en coche cansaos y con una importante fartura. Sícasí facía alcordanza de la yacuada que'l abá de la Oubona tresnare a la comitiva real del Rei Castu según nos cuntare la dama Alana en "La Peregrina":
      <L'abá, puestu al corriente de la nuesa llegada, mandare aviar un convite: pote ellaboráu con toa mena de verdures, bon tocín y sollombu de gochu, capones rustíos nel so zusmiu, delles variedaes de quesu, pan blanco de trigu recién cocío y mazanes asaes, adulzaes con miel. Tou ello regao con sidra de mazana seleicionao, que tresnaben nel propiu monesteriu. >

                    Y cola mente puesta na llacuda damos por finada esta caminada. El Palu ta al acesmu.
APÉNDIZ:
      Siempres, tres cualisquier ruta, nos queden deberes por facer pero cuando arribes a un pueblu grande, a una POLA con hestoria entós estos agrandecen. Quédanos por tantu un post estra por realizar onde podremos camentar al rodiu la xeografía ya etnografía del conceyu, la so hestoria y personaxes más bultables .... Tán esperándonos el castru de San L.luis, l'horru allandés, los mazos hidráulicos, los indianos ....

AGASAYOS:
<Con esti ramillín de flores
agasayo los mios amores>

. A Isabel S.Sebastián, l'Alana del nuesu Camín.
. A Xurde Morán y el so <Camín Primitivu>.
. A la Wikipedia, compañera de fatigues.
. A dellos blog's o páxines web como:
   <La Página de Bedri>, <Asturgeografic>, <www.allande.es>, 
   <www.elcomerciodigital.com>.
. Al taxista que nos llevó a Samblismo, onde se biforca'l Camín de la <Ruta los Hospitales> asina como al barman del Bar Queipo que nos apurrió delles informaciones. Tampoco podemos escaecer los vecinos del Camín que nos apurren información y alderique.