Camín Aniciáticu [5]: Ules - Posada (Llanera)
 |
| Cuando entamamos la ruta.... |
tala bayura d'ayalgues
nun pensábemos topar
en Llanera, peles Brañes.
Si vos petez galopiales
xibíi a llombu'l caballu
y tres los pasos de Niria
conoceréis tanto, tanto... >>
Llevamos feches cuatro estayes y andao unos 44 Km dende que salimos de Cenera, unos 10 km de media por día. Güei queremos llegar a Posada, asina que nos esperen unos 14 kilómetros. Nun pasa ná, yá tamos fechos a nadar; bueno...
 |
| ¿Petezte venir a Brañes? Si sigues "Camìn de Niria" ablucarás, bien lo sabes. |
" Dexando a mandrecha, nos rimeros del Monte Narancu, les aponderaes construcciones del Rei Ramiro algamamos a un llugar nomáu Brañes".
La ruta que pensamos siguir pue resumir nesti track:
[ Ules - El Violeo - Les Cabañes - Brañes - Tuernes - Agüera - San Cucao - Posada ]
 |
| ¿ Nes Maces o nel Olimpu? |
Esta estaya permite delles variantes que voi indicar oportuno. Yá te contaré...
De momento aparcamos enfrente'l Parque d'Ules. Dexar el coche y entamar a xubir ye tou lo mesmo. Pinta un día espléndidu, pero enantes tendrá que gana-y la batalla a la niebla. Fai chornu. Gúei vamos sudar la gota negra. Y tengo alcordanza del comentariu qu'Ástur-y tien fecho a Arbidel, al alboriar d'un día buxu ensin avíos d'esllendor:
- A la fín, en díes como ésti, de borrina baxo, siempres termina escamplando
Nun ye muncho lo que xubimos cuando ya toca baxar otra vuelta; enseguidina llaneo, claro, tamos en Llano. Nun son munches cases y tán espardíes pela fastera. Salimos camín de Llampaya pero enantes d'entrar nel pueblu vemos un cartelu indicatuvu: Brañes. Tiramos cuestarriba, a mandrecha. Aprovechamos pa sacar unes semeyes d'aquel mar de ñubes que tenemos embaxo, sobre'l valle que va de San Cloyo a Lloriana. Namás vemos la tierra per algún resquiciu que nos dexa El Ñuberu. El puñeteru debe tar pasándolo en grande endamiáu nalgún requexu d'aquel contraste d'azur y algodón. Hai una bona rampla; nómenla La cuesta Brañes. De xuru qu'antiguo había unes bones brañes naquellos rimeros del cordal del Narancu qu'equí vien a nomase la Sierra de Llubrió. Yá nun xubimos más. Toca baxar sele y llanear hasta arribar a una pequeña Ärea Recrativa. Una pena tenga los bancos inservibles; un descansucu nun mos venía mal.
 |
| Área Recreativa. El Tigre y el Canibal acaben de xubir d'El Violeo |
Sí, ho; foi nel Xiru del 72. El primer sector de la 4ª etapa (48 km) terminaba na picalina del Block Haus. ¡ El Tarangu metió-y al Canibal 2' 36"! Claro que'l belga vengóse y ganó la carrera quedando l'astur el segundu. Pero esi añu Eddy nun s'atrevió dir al Tour (el que ganó Ocaña), taba cascáu. Estes alcordances pónenme como una moto y baxé la Cuesta Brañes como si fuere Chechu Rubiera.
Yá fai un calor de la lleche. Menos mal que, de xemes en cuando, quedamos al amparu la solombra de la viesca; bendita Sierra de Llubrió. Abunda'l castañu. Un ramal a mandrecha llévate a Les Cabañes, pero eso nun ye lo nuestro.
 |
| Acolumbrando Brañes |
Per una entena la viesca acolumbramos un pueblu. ¿Sedrá Brañes? Ye lo qu'adebecemos; llevamos más d'una hora caleyando embaxo un calor ablucante por mor de la ñube. Hai qu'echar un tragu. Al cayer les dos hores de viax aportamos delantre'l Llavaderu de San Xuan, en Brañes onde aporta'l Regatu Los Corrales. Llevamos fechos seis kilómetros, asina que vamos a una V=3 km/hora. Tamos pa facer el Camín Xacobéu....
Refresacamos un poco y damos una vuelta pel pueblu enantes de buscar la ponte que crucia'l ríu. Nun alcontramos el camí y entrugamos a unos vecinos:
- Oiga, queremos llegar a San Cucuo ¿cuál sedrá'l camín más afayaizu?
- Vamos ver.... Lo normal ye que tiréis de frente pela carretera xeneral ( LL-6 ) . Al salir del pueblu encontráis una de les canteres del Nora: Caleros de Brañes S.L.
 |
| La Calera de Brañes S.L. vien a bañase nel Ñora |
[Estos caleros son una empresina familiar nacida en 1968 que trabaya con caliza de Moniello pon tol procuru en caltener l'equilibriu ecolóxicu del entornu. Tresna productos como:
. Äridos pa formigón (sable, trito, grava fino, grava gordo)
. Äridos pa pavimentos superficiales de carreteres o aeropuertos mecíos con sustancies bituminoses.
. Äridos pa dellos usos como la zahorra, escolleres, piedra en rama o trabayos d'albañilería o xardinería.]
- ¿ Hai que cruciar una ponte romana?
- Non. Hai una ponte moderna, xusto al pie de la cantera. Cuantayá había una antigua, pero cayó. Vosotros debéis falar de la Ponte Medieval.
- Seguramente, pero ehí mesmo hebo yá una ponte romana, según tenemos lleío.
- Bueno, pos p'algamar a esa ponte tiráis a manzorga. Al llegar a un restaurante torcéis a mandrecha y ellí mesno veis la ponte romana.
- ¿Podemos llegar a San Cucao siguiendo la ponte romana?
- Sí, ho; llegar llegáis... A Tuernes el Grande. Ellí volvéis a entrugar.
- Bueno; pa conocer el pueblu vamos llegar a la Cantera de Brañes y volvemos pa cruciar pela ponte medieval; fainos muncha ilusión.
- Allá vosotros....
Pali-pali, pela recta Brañes, llegamos a la cantera y facemos unes semeyes. Al pie d'ella tenemos la ponte moderna y los restos de l'antigua.
Damos la vuelta pero nun entramos nel pueblu pel mesmu sitiu. A mandrecha acolumbramos la ilesia y p'allá nos embredamos.
 |
| Ilesia de Santa María de Brañes. Al fondu, na llomba, Castiellu onde xubimos un día: Control total de la zona. |
[ La ilesia de Brañes ye perantigua. Claro, yá nun ye lo que se ve - XVIII - pero siempres tevo embaxo l'advocación de Santa María. Ramiro II ( yá rei en Lleón) dio-yla a la catedral de San Salvador nel añu 926 (s.X), asina que la orixinal yera prerrománica (¡qué pena!). L'actual tien una sóleda nave en planta de cruz llatina per aciu de les dos capielles llaterales que conformen el cruceru. Ye nomáu'l coru de madera arriendes de l'arcu de trunfu de mediu puntu y les bóvedes de crucería que cubren los cuatro tramos. Un orixinal crucifixu medieval, en donda actitú, asina como un San Roque barrocu dan-y sonadía a esta ilesia rural d'ecos prerrománicos ].
 |
| Centru Social - antigua Escuela - na vega de Brañes |
Tamos en plena llanera, na vega del pueblu. So l'abellugu d'una visca de robles y castaños, nos rimeros del cordal de Llubrió, alcontramos esti tarrén dondu pa trabayar y granible a esgaya bañáu por Riu Nora y delles fontes más provinienters de los veneros del Monte Narancu.
Güei día ye más bultable'l práu que l' eru - qu'entá se caltién - pero si facemos casu del Madoz (1845/50) veremos que nel XIX yera ricu por mor de los sos productos agrícoles:
.Trigu, maíz, fabes, llinu, miel, patates y fruta a magüeyu (mazanes, peres, zreces, figos, nisos.....)
. De la viesca sacábase muncha castaña y pela boriza'l monte y les brañes abondaba'l ganáu vacunu, llanar y cabríu.
. Nun mos escaezamos del Nora, nin de los regatos que lu caltienen, ricos en pesca ( n'aquella dómina : truches, salmones y anguiles)
- ¿Qué-yos falta a esta xente? ..... Una vega pergranible y sonces montes averaos al pueblu ricos en pastu, madera y piedra pa edificar (será por canteres ...)
 |
| ¿Fadríen fonda los nuesos mocinos nel Fondín? |
Embredamos vega alantre y en seguidina alcontreamos un edificiu que nos llama l'atención. Nun ye una casa como otra cualquiera, danos la impresión ..... Y ye que les escueles golifámosles a distancia. Ye lo nueso. Foi, y ye, la nuesa vida. Pero agora tamos equí, en Brañes. Otru tiempu, cunta la lleenda, tien pasao per equí un mozu tres una moza...
 |
| - ¿ Agospiamos nesti horru? |
Tamién nosostros tornamos al pueblu.
- Hola, señora, ¿pal puente romanu?
- Mirái aquella flecha. Siguí-yla y dais con un restaurante: El Fondín ( ¿sedría la fonda los nuesos mocinos?). Xusto a mandrecha tenéis la ponte sobro'l ríu.
- Gracies.
El Fondín ye un restaurant con sabor a antiguo. Planta baxa, forráu con piedra y pintáu d'un azul que t'atrapa (yo tamién vivo Na casa azul del Mestru Escuela). Pa entrar na terraza l'antoxana tienes que pasar al par del horru al que ta abellugáu. Too mui bucólico. Ya díbemos cola cuenta tomar el vermú pero aquel arume...Golía a fabes.... Si Melendo nun pudo resistise a la cecina ¿cómo díbemos nòs a pasar de les fabes?... La ¿farda? yera que entá nos quedaba la mitá del camín.
Sentamos na terraza a tomar una clara, pa pasar el sofocu, mentantu iguaben la mesa. Nun requexu, a la solombra del horru, vemos una muyerina pervieya que nos ta faciendo señes.
- Sentivos pidir una fabada, ¿queréis que vos cuente cómo se tresnaba antiguamente?
- Por supuesto, nada nos prestaría más. A ver si coincide cola receta MaríaLuisa que seguíemos en casa nun va tanto. Tuvimos cocina carbón hasta l'utru día, como quien diz.
- Pos lo primero ye preparar los ingredientes. ¿Sabéis lo que lleva?
- Home, claro. Verá....
Una fabada asturiana, como pa cinco
 |
| Otru que se suma a la fiesta. ¡Adiós compangu! |
. 3/4 de kg de fabes de la Granxa (polo menos) . 1 Fueya de lloréu
. 3 Morcielles de gochu
. 1 Ayu, 1/2 cebolla, perexil
. 3 chorizos de La Pontona
. Un chorrín d'aceite virxe estra.
. 1/2 kilo llacón
. Azafrán, unos filinos.
- Oi, nin... ¿Nun-y eches un poco tocín?
- Claro, ne; 100 gr. de tocín .
- Ibérico munchu meyor, dígotelo yo. Agorta voi dicivos cómo ye la
Preparación : ¡A tresnar!
- La nueche enantes echáis a remoyar el llacón n'agua templao, eso sí, depués de chamusca-y los pelos. ¡H.a, h.a!
- Anguaño yá vien ensin ellos, a dios gracies.
- Tamién ponéis les fabes a remueyu, pero n'agua frío, ¿eh?
Si nun quiés engordar pones a desgrasar el chorizu y la morcilla.
- Tamién podemos quitar un chorizu y una morciella, digo yo.
- Pero un día qué más te da. Pégate un caprichu, ne.
 |
| A l'antigua y a la moderna. |
- Al utru día agarráis una perola, proporcionada a les cantidaes, y metéis nella tolos ingredientes: fabes y COMPANGU: llacón, chorizos, morcielles, tocín, la cebolla cortá en cuatro cachos, l'ayu picáu, la fueya lloréu, el perexil atao y regáislo too con un remexu d'aceite. Darréu cúbrese too con agua frío y avérase al fueu. De xemes en cuando vais esplumándolo con muncho procuru. Rotu'l fervor apártase del centru la cocina - o báxase' l nivel de la flama - pa que vaya cociendo seliquino. Ayuda si destapes un poco procurando que les fabes nun queden ensin agua y suelten el tegumentu (la pelleya).
 |
| Preba si tien sal. |
- Y vas añediendo chorrinos d'agua frío de cuando en cuando, qu'eso facíalo mio güela.
- ¿ Y qué más facía to güela?
- Remover la pota , nun vaya ser que se te peguen les fabes.
- ¿ Y cómo se xeringa ?
- Talo si fuere'l volante d'un coche.
- Perfeuto. Tenéis bien aprendía la lleción. ¿Sabéis cuanto dura'l proceso?
- ¿Unes dos hores?.....
- Sí, más o menos. N'otru tiempu, mientres cocíen les fabes, les muyeres ye fácil tuvieren que dir a sayar. ¿Cómo s'arreglaben?
 |
| ¡Sienta!. Esto nun tien espera. |
- Ye verdá. Pasába-y a güela. Paezme que ponía la tapa de la pota al revés y enllenábala d'agua.
- Sí, señor; col pesu malpenes podía escapar el vapor del interior y ansí nun cocíen en seco.
- Pero había qu' esclucar de cuando en cuando porque lo que s'evaporaba llera l'agua de la pota, ¿non?
- Claro, nin. ¿Y cuándo s'echa el azafrán?
- Cuando veas que ta cociendo adobes con azafrán TOSTAO y bien desfecho.
- Nun echasteis la sal....
- Madre diz que cuantu menos sal, meyor. Yá cocíes, probaba, y si facía falta añedía un poco.
- Mui bien, eso depende de la salaura del llacón. Y pa rematar escuchaime bien: agarráis unes cucharaes, pasaisles pol pasapuré y volvéis a echales a la pota. Yá veréis cómo'l caldo queda espesino.
 |
| Güel a chamuscu (golía) |
- ¿Yá nun se cuecen más?
- Sí. Sigues cociéndoles un ratín y lluéu déxesles reposar como media hora. Enantes de pasales a la fuente quites el perexil, la cebolla y el lloréu y pones la carne enriba les fabes, pero cortadino en cachos, bien presentao.
- ¿Y pa postre?
- Home, ho. L'arroz con llechi fai bones migues cola fabada.
 |
| - Ensellái los caballos, colamos darréu |
[Tendíu nel xergón de yerba entrugábame si Rigio tendría pasao periquí. Les idees agolpiábenme na tiesta como les gotes d'aquel agua que nun se detenía y tresformaron el mio ánimu nuna sensación tala de fracasu que terminaron por convertise en llárimes de suspiru.
Clodo decatóse y, pa dame cuayu, prometió que los díbemos alcontrar. Vime na obliganza d'esplica-y qu'adebecía por casar con ella. Elli camentó que yera una moza sana y más preparada que la mayoría les muyeres seique nun tenía d'esmolecer por mor del so estáu.
- ¿ Cúalu estáu?
- Señor, bien sabéis qu'espera un fíu...
- ¿Un fíu? ... ¿Cómo lo sabes?
- Señor, la nuesa hermana Celaida ye amiga de so...
Nada nun sabía y petecíame matalu porque naide me lo tuviere dicho. Entá faltaba p'alborecer pero...
- ¡Ensellái los caballos, colamos darréu! ]
 |
| Praderíes de Brañes acariñaes pol Nora |
Enfrente El Fondín, na rimada d'amanzorga, vemos una casona-palaciu nun estáu llamentable. Naide nun supo danos referencies (de momento) que se trata de La Torre pero déxovos la semeya por si daquién quier apurrir dalgún datu. A min dame'l tastu qu'equí vivíen unos los señores de la zona que controlaben tantu la vega como la viesca cercana.
Enantes de colar del pueblu igual ye hora de facer alcordanza d'un artículu en castellán qu'espublizare M.B. San Pedro V. "Poblamiento medieval en la parroquia ovetense de Brañes: La Alta Edá Media". Namás el resume:
 |
| Casona-Palaciu rural de Brañes: La TORRE (topónimu) ("Camìn de Niria" a mandrecha) |
[ L'espaciu de Brañes paez tener sio utilizáu como llugar de pasu dende époques prehistóriques masque nun tengamos constancia d'asitiamientos estables enantes la época antigua. L'orixe del poblamientu debió ser el Picu Castillu (Castiello) na dómina romana por mor de la so situación privilexada pa controlar les comunicaciones foriates con Lucus Asturum (Lugo de Llanera) asina como colos castros de la redolada.
Nos sieglos altomedievales hai poques referencies a Picu Castiellu agrupándose la población nes granibles vegues del Nora (Brañes). El principal elementu d'ordenación urbana ye la villa, onde s'alcuentra la ilesia de Santa María. Nel llugar d'Escontrella vese nidio el procesu d'implantación señorial sobre esi espaciu lleváu a cabu pol presbíteru Gundisalvo Ioh.annes y pol monesteriu de San Vicente d'Uviéu.
Na fase d'aniciu vemos como les tierres pertenecen por drechu a bayura de pequeños propietarios y como depués van pasando a manes de l'aristocracia, eclesiástica o civil. Esti tipu de sociedá va dir viéndose alteriáu tanto pola creación de les redes parroquiales como polos drechos que van alquiriendo los conceyos].
 |
| ¿Niria colando peLa Ponte Romana de Brañes ? Romana de mano, esta yá medieval. |
[ Enseguidina díbemos enteranos que'l que degolaba pela ponte yera El Valiente, don Diego M. Valdés fuxendo del Rei Enrique ]
[ El Ríu Nora ñaz en Valvidares (Sariegu), traviesa los conceyos de Siero y Noreña y tres faer llinde colos conceyos d'Uviéu y Les Regueres desemboca -paez que de mala gana poles vueltes que da- nel Nalón (Priañes) dibuxando los célebres Meandros del Nora y besando los pies de la Ilesia Prerrománica de San Pedro. Una presa y una Central Hidroeléctrica roblen la fin de la odisea (67 km)]
Nun foi nada fácil saca-y unes semeyes decentes. Pa eso yera preciso baxar a la oriella siguiendo'l cursu la corriente y nun tábemos pa ello. Otra vez será. Cruciamos, a la fin, l'adebecida ayalga infantil. Tiramos a mandrecha per un camín terreru. De sópitu un cruce: A manzorga, hacia arriba, a Castiellu; de frente dica Tuernes el Pequeñu.
 |
| El Val de Brañes, col Narancu al fondu, dende CASTIELLU. |
 |
| Primavera nel camìn de Tuernes |
Cuenta la lleenda qu'ente'l Castiellu y Brañes había una cueva pergrande que xuncía dambos poblaos*. Pero como nun ye plan de buscala siguimos andando pel camín terreru de Tuernes. ¡ Una pasada! Bueno, los que nos pasaren foron unos xitanos mui educaos que nos saludaren dende la fergoneta. Pela bucólica avenida ente praos,vaques, viesca y el ruxerrux del Nora aportamos a Tuernes el Grande. Vemos un cruce ya éntranos la dubia: ¿Manzorga o mandrecha? . Entrugamos a unos guajinos :
- ¿Tamos en Tuernes?
- Sí, Tuernes elGrande
- ¿ Pa dir a San Cucao cuál ye'l meyor camín?
- Llegáis polos dos sitios pero'l pueblu queda a manzorga y ye más fácil nun perdese.
- Gracies. Ta lléu.
Y cruciamos el pueblu, con cases de pueblu y sabor a pueblu. Damos con una especie de Plazoleta. Un empleáu municipal taba analizando l'agua de la fonte.
 |
| Tuernes el Grande. Torna a mandrecha pel Camìn de Niria, bordiando'l Roblón. |
- Oiga, ¿pa tirar a San Cucao?
- Yo voi per esa carreterina asfalcada, la que ta al pie de la Castañalona. Per ella llegáis a la Cantera de San Cucao, ellí garráis la Ll-6 hasta empalmar cola Nacional que vos lleva a San Cucao y Posada.
- Al entrar nel pueblu vimos un desvíu a mandrecha...
- Curiao, llega a San Cucao pero ye más fácil perdese.
- Gracies; vamos bordiando la castañalona.
- Siguíi'l ruxerrux del agua....
(Porque tamos xugando col Ríu Nora y los regatos que lu caltienen)
Baxamos sele hasta'l Regueru de Tuernes (que desemboca nel Nora, claro) y entamamos a xubir hasta qu'alcontramos una capiellina, un poco abandonada. Sentamos cómadamente nun bancu de piedra pa tomar un pinchu: el chorizu la Pontona ye bien socorríu. Un ruíu sordu ponnos sollertes. Ye la moderna de Calera San Cucao. El ruíu de la cantera delantre la Capiella de San Pedro (XIX) traenos n'alcordanza los Monumentos de Ramiro. Paezme ver a los canteros del Rei carriar piedra camín del Narancu. Por piedra nun va quedar, les canteres del Nora son inescosables.
N'Agüera hai un complexu kársticu que se forma na caliza de montaña del carboníferu nel entronque del Regueru de Tuernes (conocíu como Cueves o Eros) col Nora y que presenta tramos subaéreos y soterraños con cueves, foces y arcos. Ye verdá qu'al baxar de Tuernes a Agüera hai veces que sientes el ríu pero nun lu ves... ( A ver si un día podemos visitar esta ayalga conocía tamién como L'Abrigu del Nora, n'Agüera).
[[El casu ye que busco n'internet y alcuentro un blog: << Caleyando con Cienfuegos>> que camienta esta visita, desconocida pa la mayoría la xente, mesmo vecinos de la redolada]]
Calamos a tranquila LL-6 y al pasar per Agüera acolumbramos nun pandu la Ilesia de San Cucao. Yá nun la perdemos de vista. Ella mesma nos guía hasta l'asador d'El Cañal per aciu de la AS-240 y tres cruciar la Riega de Gafaraes.
Frente l'aparcamientu del restaurant ta L'Asturiana d'Avicultura, una empresina industrial - fundada en 1996 pero ya heredie d'otres anteriores como Avícola Xixonesa o Granxa de San Cucao - con caráuter tradicional que reparte los güevos envasaos al día per toa Asturies:
"Yá lo sabes,
nun hai güevos como los de San Cucufate"
 |
| Ilesia de San Cucufate |
San Cucufato foi un santu cartaxinés que pedricó na península Ibérica, sobre manera en Ampuries, a finales del s. III y primeros del s. IV. L'emperador romanu Galerio condergólu a muerte por degallamienttu al non renunciar a so sentir cristianu. Pero costó-y trabayu al paganu... Dios llegó a salvalu del cuartón, de la foguera, d'un acuchillamientu... San Cugat del Vallés lleva'l so nome asina como'l monestriu homónimu].
Un poco más alantre atopes , a mandrecha, la Escuela Pública de San Cucao. Un amigu de nós tevo dellos años enseñando Llingua Asturiana a los neños de la redolada (Cómo lo pasasti, Pepelluís)
Yá lu viéremos munches veces pero enxamás nos tenenemos averao a elli. A tiru piedra tenemos el Palaciu de Villanueva. Fechu una triste llaceria foi reparáu en parte nel 2015, cubriéndo-y los techos con unes estructures metáliques y protexendo les muries con formigón; pero nada de reforma completa. D'estilu barrocu rural foi una de les construcciones palaciegues de LLanera.
 |
| Palaciu de Villanueva (San Cucufate) |
. [Palaciu de Villanueva, asitiáu nel mayorazgu del mesmu nome, foi llevantáu por una rama de los Valdés ( Mª Alonso de Quirós y Andrés Díaz Villanueva) y llegó a pertenecer nel XIX al Marqués de San Esteban del Mar pasando depués al mio ilustre vecín, el conde Revillaxixedo.
Tien l'apariencia de los palacios rurales asturianos del XVII: Un cuerpu central de dos pisos abellugáu por dos torres de cuatro pisos nos lladrales, aguapiaes estes coles vertientes a cuatro aguaes.Ta fechu en mampostería sacante les esquines que lleven sillares. En conxuntu l'edificiu tien planta cuadrada con tres llinies de cruxía
(espaciu que queda ente los muros y los pilares ) que borneen un patiu interior. La fachada principal, orientada al sur, lleva adosada a la torre una capiya abovedada con corntrafuertes y la posterior tien un corredor cola balustrada de madera sofitada en columnes toscanes de piedra. ¿Qué pòdemos dicir de los escudos d'armes qu'aguapien les torres?]
 |
| Nos xardinos de Palaciu |
Damos la vuelta a la xeneral de Posada y embredamos camín de Guyame. Un cartelu indica "Centru ecuestre l'Asturcón". Una carreterina asfalcada llévanos hasta'l Castiellu. Tierra granible, esta de Llanera que da pa repartir ente tantos señores, como s'amuesa polos palacios.
Escaecemos la xeneral AS-240 - que nos llevaría derechina a Posada - porque queremos ver el Castiellu de San Cucaco arriendes del discutíu Centru del Asturcón. Enseguida acolumbramos les almenes d'un Nocastiellu. Vemos unos cuantos caballos na pradería qu'arrodia'l palaciu. Un xinete cabalga adulces pel caminín que vien de la Torre Valdés, como-y llamen al castiellu. ¡Cómo presta! Nun pueo escaecer esa imax de la retina; nun toi avezáu a ello: castiellu, pradería y caballeru. Sigo na Edá Media.
 |
| Castiellu de San Cucao |
[ La célebre TORRE de los VALDÉS ye una construcción de finales del medievu (1393) llevantada nel Picu por Diego Menéndez de Valdés. Asitiada poliórcéticamenter nel Picu qu'arrodia'l Nora foi en principiu una torre defensiva, cuadrada, de planta y tres pisos, con cubierta a cuatro agües. Muncho más tarde camudó'l techu poles almenes con garitones.
El cuerpu rectangular almenáu del norte - dos pisos y desván - foi amestáu a partir de 1880 dándo-y a la torre l'oficiu de castiellu. Nun quedó nada mal esi acabáu final asemeyando a un palaciu rural asturianu.
Ye un edificiu sobriu - con muros de metro y mediu - pero perbién engalanáu: Les almenes, los gaterones, les saeteres orixinales nes esquines del segundu pisu, la bayura de ventanes oxivales, adinteles y sobre manera les xeminaes, remedando al prerrománicu (dolosía en rosetón), asina como les muries, xardinos ya escaleres dan-y un aire encantexador.
Anguaño ta rústicamente modernizáu nel interior cola fin d'emplegalu pa eventos sociales: bodes, comuniones, congresos, comides d'empreses... Nun ye d'estrañar; tien una vista privilexada y controla les cuatro esquines. Ye tala la guapura d'esta ayalga qu'hasta'l mesmu Nora-y rinde cortesía; por nun colar camín del norte va faciendo meandros per toa la llanera: ¡ Quiero quedar en San Cucao!]
 |
| Don Diego llevantó una Torre y otros , depués, un Palaciu. ¿Veis que gustu? Tástialo pasu ente pasu |
[[[ ¿ Y qué cuenten les lleendes d'aquella dómina?
Cuenten que Don Diego, amu y señor de la Torre, refugó entrar al serviciu d'Enrique de Trastámara cuando esti andaba a la tema con Pedro'l Cruel pola Corona de Castiella. Equivocóse de carru y salió-y el tiru pela culata pos Enrique mató a Pedro y algamó a rei.
"Pies, pa qué vos quiero" el Valiente (asina lu apellidaben) dio les fusties y hebo d' abellugase nun monesteriu de Galicia. Pero la hestoria nun fina equí...
 |
| Una TORRE de lleenda: Torre Valdés |
Dellos años más tarde, con Enrique* asitiáu nel tronu, yera costume la dómina celebrar torneos nes fiestes de troníu. Pa que tuvieren más sonadía traíense caballeros profesionales d'otros llares, foriatos. Vamos, como la champion de les xustes medievales. Nuna daquelles unos caballeros franceses (¿ los collacios de Beltrán de Du Guesclin ?) barrieron de l'arena a tolos castellanos ensin alcontrar rival. El Rei Enrique clamió per tolos astiales a la cata d'un caballeru oriundu qu' acabara con aquella afrenta. Presentóse un caballeru vestíu por completo de negro y cola cara tapecida pol cascu. The black man foi dando cuenta, ún por ún, de tolos corraxos. El Rei taba como llocu:
- ¿Podemos tener l'honor de conocer al héroe?
- Yá me conocéis, Señor; soi'l vuesu vasayu infiel, l'asturianu Diego Menéndez de Valdés - dixo'l Valiente fincándose de rodiyes.
- Táis perdonáu, Don Pedro. Devuélvote castiellos y facienda. Nun quiero que les cróniques camienten de min aquello de:
" Qué buen vasayu, si tuviere bon señor"
 |
| Un requexu del castiellu |
............................................................
Una cosa quiero camentavos, collacios. Namás pasar el castiellu, equí mesmo, en Guyame, debéis acercavos un día hasta'l Centru l'Asturcón. Ye una pena que tea en procesu de cierre. Da gustu ver tantu caballeru a caballu per esta maraviosa tierra. ¡ Cómo se-yos nota l'amor por estos animales! El Centru ta nun llugar paradísiacu: Un meandru del ríu Nora - que fai una ferradura acuática - abellugáu por una visca de ribera. Hai equí una sienda idílica que pues compartir con dalgún caballeru a caballu. Llana, solombriega, corta (4 km ?) y festeyada pol ruxerrux del ríu merez que cualisquier humanu pase un día nesti Edén: SIENDA DEL ASTURCÓN. Pues llevar el bocata pero nel Cañal ( per onde pasasti anantes) tienes bonos menús; y na "Cueva'l Pulpu" y en "Peñamea", y na "Mundina"...
 |
| El Diañu pue aprucir en cualisquier parte. |
Maxinamos a Rigio con ganes de cambiar los sos caballos cansaos por un par d'asturcones frescos de Llanera. Y tamién a los nuesos mocinos adevecer por dalgún alazán de los que taben pastiando pela llanera, que de caballos entendíen un ratu... Pero Melendo nun tenía cabeza pa esfrutar d'aquella dondura. Quiciabes nin se dieren cuenta cuando al cabu la recta'l castiellu s'alcuentra un capiellina, a mediu iguar, nomada:
.[ La capiella'l Diañu, de la que nun se conoz data, námas caltién del orixinal la planta y dalgo de los muros. Debe'l so nome a una imax del diablu espulsáu del Paradisu por San Grabiel anque l'inventariu diz qu'hebo una imax de San Antón pisotiando un ser cheirientu, esqueléticu, coxu y guasón que taba arrodiáu de cadenes. Ta la capiella en ladrillu machetón, ensín rematar la faena, qu'hasta'l Diañu tien recortes].
...............................................................................
Del Centru l'Asturcón, de Guyame, xubimos la cuestina de la Capiella'l Diañu hasta enllanar na carretera xeneral. Agora tirar p'alantre hasta llegar a Posada per una cera prestosa que nos da muncha seguridá yá que los coches pasen como tiros pela recta. Pasu ente pasu algamamos al Parque qu'hai delantre l'Ayuntamientu, punto final d'esta estaya y principiu de la siguiente. Pa ello, per una cera bien donda, vamos dexando atrás el Restaurante Peña Mea, L' Institutu, los praos onde se celebren " Los Exconxuraos", L'Institutu, La Ilesia Parroquial de Posada , el Cuartel de la Guardia Civil...
[ LLANERA : Ye un conceyu que llenda con Xixón y Corvera pel norte, al sur con Uviéu, al este con Siero y al oeste con Illas y Les Regueres. La capital ye Posada, onde ta l'Ayuntamientu, siendo Lugo Llanera'l núcleu más pobláu y onde se cree que taba
Lucus Asturum, poblamientu romanu, exa de les comunicaciones de la dómina n'Asturies, sobremanera pola Ruta de la Plata: Al norte con Xixón; al sur con Olloniegu, Lleón (Legio ), Astorga (Asturica Augusta) y Mérida (Emérita Augusta) y pal al oeste con Lugo (Lucus Augusti). Una pena nun tener alcontrao güelgues más palpables d'aquel importante núcléu que debía tar n'actual Castañera (ente Lugo y Posada), sacante una llápida a los llares viales, monedes, fornos, xoyes, oxetos de bronce y cerámica, pavomentos...
Otros puntos bultables d'interés en llanera son: L'aerodromu La Morgal, el Polígonu Industrial d' Asipo, el Palaciu Villaobona, la cárcel, les canteres de Brañes y San Cucao y el Centru Ecuestre L'Asturcón].
ANEXU I:
¿Cómo se forma una cueva kárstica?
 |
| Químicu nel buxu la cueva, camentando n' iguala. |
Les grutes y pozos kársticos fórmense pola descomposicón de roca blandio d'orixe calcáreu como la caliza, dolomía o'l yesu. L'agua , superficial o soterraño, un poco acidoso pola presencia del CO2 (l'agua puro pue erosionar pero non disolver) disuelve la caliza y va formando galeríes. Estes cueves puen llegar un puntu talu de disolución que terminen cayendo, formándose entós: dolines, si caen partes pequeñes y cañones, si caen dafechu.
Siguen esta reversible ecuación química:
CO3Ca + H20 + CO2 <= > CO3H2 + Ca
 |
| A la cata les cueves kárstiques |
. Llastrales (llapiaz): Surcos formaos pol agua qu'escuerre pela roca plano o pindio según va encontrando fiendes per onde metese. Formen unos escares permalos d'andar.
. Polh.es (h.ou) : Son depresiones - fondigonaes- o valles planos y zarraos coles llendes de caliza más elevao. Suelen tar percorríos por dalgún riachu que s'esmuz de sópitu. El fondu caltién un barru nomáu terra rossa proviniente de la descomposición de la caliza, lo que supón la inundación temporal - o permanente - del campu formando un llagu.
. Simes: Abertures nel techu de les cueves que comuniquen col esterior.
. Ponor: Ye una abertura natural, tipu portal, na roca calizo onde la corriente d'agua tiende a facese soterraña.
. Foces o escobios o beyos: Valles estrenchos y fondos fechos por mor del agua que va descalcificando les roques.
Nes cueves kárstiques fórmense estalactites, estalagmites y columnes.
(Un día non mui llonxanu apurrirévos más fotos)
 | ||
| << Ríu Cueves, ríu Cueves, naide acompañate baxa sacante cuatro asturianos que dimos con esta ayalga. Vós, qué esperáis, pelegrinos ¿nun veis prendida la flama? Quédavos la puerta abierta por si queréis visitala. Niria dexó les sos güelgues, güelgues d'amor, d'una Xana >> |
ESTIMANCES:
. "A la sombra de los abedules" caltién la sustancia vehicular que me tresporta pel "Camìn de Niria". Esta vegada cargué na xarré "Los clamores de la tierra". ¿Voi bien aviáu, F.A.?.
. Rebuscando nes Brañes alcontré un artículu d'Ana Belén San Pedro Veledo; nun sedrá la cabera vez que lu llea:<<Poblamientu Medieval na Parroquia de Brañes. L'Alta Edá Media >>
. Siempre llevo la Wikipedia nes alforxes.
. Los blogs: "Caleyando per Llanera". "WWW.castillodesancucao.es"
.<<Caleyando con Cienfuegos>>, pol so post : "Sistema kársticu del arroyu Les Cueves".
. Al MADOZ, onde buscamos información davezu; esta vegada: Brañes.
. A la Oficina Turismu de Posada, pola información que nos apurrió del conceyu.
