domingo, 27 de enero de 2019

¡Bon Camín! [3 a] : Salas - La Espina

                     ¡ Bon Camín!   [3ª Etapa]

                                       De Salas a Tinéu pasando La Espina

                          Salas - La Espina ( estaya 1ª)
       
Tunel del tiempu.
 En Salas pues viaxar hasta la Edá Media per aciu d'esti Arcu-Ponte.
¡Qué esperes!
      << Si t'acerques, amig@ , hasta Salas
col alma allegre y sorrisa franca 
algamarás a conocer, de los nobles, la ñata,
una granible familia qu'Asturies pon en mapa.
    Al andoliar peles cais espardiendo to ardiente mirada 
podrás lleer en cada piedra, grabao:Valdés-Salas. 
     Nun faes qu'entrar, pelegrín, na amplia plaza
cuando tienes énte ti la ilustre Colexata,
Mausoléu, de postín, qu'Asturies-y da fama
y au don Fernando reposa enaltando so cadarma. 
Un día aciagu d'esos, en fin, de torba mirada
foi polos vientos de la guerra mutilada,
seique pol xacíu incorrexible de la xente d'esta Patria
güei día l'alcontramos restaurada.
     Al traviés d'un Arcu-Ponte tamos yá na Campa:
La Torre, almenada, al cielu se llevanta 
y a sos pies el Palaciu, rindíu, vasallu d'estimanza.
     A la so vera, llimpiu y raudu, degola'l ríu Nonaya
testigu, altaneru, d'histories d'allabanza
y d'otres, que'l mui cuciu, recuerda, llora y calla.
¿Quién nun tien una Espina clavada na so alma?. 
Yo mesmu cuando xubo, camín d'esta montaña 
soplo, sudo y glayo naguando  pola  Arcadia
y encamiéntome a Xacobu  por mor de las  mios  fallas:
¡Perdóname Señor, que soi de La Chalana.!
- Que'l Camín te sía leve, pelegrín@
       torna ceo a Salas. >>

¿Entramos?
             Cuesta dexar la candial villa de Salas. Nun la conocía (perdóname, Señor) y dexóme impresionáu: La Colexata o Ilesia de Santa María, el Mausoléu de don Fernando (asina nun daba más morrer, teniendo en cuenta onde quedare asitiáu... Magar nun fuere encargu propiu, el mausoléu), el Palaciu Valdés-Salas - col so xardín trapezoidal y la baranda'l primer pisu - xuncíu al Turruxón per aciu d'una llamatible Ponte d'Arcu que más qu'a la Plaza de la Campa métete dafechu en dómines pasaes: Medievu, góticu, barrocu, renacentista ... Tamién tenemos el Palaciu de los condes de Casares, la Casa del Rexente, la Casa de Malleza,... Y la Sienda del Nonaya. ¡I love you, Salas!. 
        Güei queremos xubir La Espina, primer estaya (9 km) de les dos en que dividimos la tercer etapa  del <¡Bon Camín!> , Salas-Tinéu. Yá nos punxeron sobre avisu: p'arriba y p'arriba. Tienes que pasar de los 225 m/snm a los 658 metros; más de 400 de desnivel pa 9 km, aproximao. 
¡Cuayu, rapazos!. 
       
Andoliando per Salas, ¿damos un vueltu?
           Ayeri había una bona xelada y esperábemos un tiempu asemeyáu. Pero nun foi asina, taba nuble y tuviere llovío pela nueche; en cualisquier casu convendría circular con procuru tanto pela autovía A-8  como pela la N-634. Bordiamos  Xixón ya Uviéu y empobinamos dica Grao-La Espina. Salimos de l'autovía pa entrar en Curniana y  algamamos a Salas nun santiamén. 
         Casi lo primero que vemos ye la Fábrica de Danone. que recueye la lleche de la comarca. Yá sabemos que'l vacunu ye perimportante na zona, sobremanera'l llecheru. El Sector Primariu nel conceyu representa'l 50% mientres el Secundariu o industrial significa'l 20%. 
        Vamos ascendiendo pela Avenida Chamberí y alcontramos a mandrecha'l Parque de Carmen Zulueta y darrréu, a manzorga, tenemos el Palaciu de los Casares:


Palaciu de los Condes de Casares (XVII)
        . El Palaciu de la Condesa de Casares (XVII): 
     Un llamatible edificiu, acolorazáu, de forma cuadrada que presenta dos plantes na fachada principal y un patiu central en "U" del que s'organicen les sos dependencies qu'inclúin capiella, llagar y galería sobro 12 columnes dóriques de fuste llisu.
 La fachada del lladral derechu tien tres cuerpos d'époques estremaes, a manzorga ún de dos plantes, el central de tres y a mandrecha un llagar.
 La fachada izquierda ye de dos plantes mientres la posterior ye una tapia con portón. Como se ve ye un edificiu con bayura dependencies onde nun falta la capiella nin una finca arimada. 

        . Bien cerquina, seique malpenes reparamos nella, alcuéntrase la Casa de Malleza, del XVII,  que foi antiguo parada de postas y fonda. Caltién namás, en sillarexu y mampostería, la parte delantera, la trasera foi esaniciada. Tien planta y pisu con vanos enrexaos nos antepechos y un aleru con canecinos de madera.  En llinia cola fachada, onde s'amuesen l'escudu y tres saeteres, ta'l muru de la fincona a la que s'accede per aciu d'un enorme portón adinteláu. 

       . Tamos avistando la Colexata, que yá conocemos de la estaya anterior; tres d'ella hai una capiellina de frontón triangular, la de San Roque, del XVII,  qu'entemez la sillería en vanos, esquines ya espadaña cola mampostería. Presenta una sóleda nave rectangular con bóveda de cañón. 
 Pertenecía al antiguu Hospital de Pelegrinos, nel Camín Xacobéu. 


Navidá, permanente, en Salas.
<< Salas ye un Belén viviente:
palacios, castillos y Casa del Rexente.
Un ríu que vien de la montaña,
la Sienda del Nonaya. 
Falta Herodes,
 los condes son meyores.
El peselbe 
pasó a ser Albergue;
Xosé, María y el Neñu , agospien
 nel coral d'esta caldia xente.>>
      Al avanzar hacia a la Plaza de la Ilesia per un camín empiedráu va aumentando la gayola porque ye cuando de verdá t'asemeyes a un pelegrín xacobéu, vas entrando nel Tunel del Tiempu: La Colexata Santa María col Mausoléu del Inquisidor, la Capiella de Palaciu (Palaciu Congresos), l'Arcu-Ponte que xunce la Torre col mesmu Palaciu.... Siénteste tresportáu a otra dómina: al románicu, al góticu, al barrocu... Al pasáu. 
  
Ansí ve a Salas ¿Jeny Vega?.
  
      Aparcamos na Plaza la Campa tres pasar embaxo paliu per aciu'l Arcu-Ponte y entamamos a facer histériques semeyes a mamplén, y ye que'l pueblu del Universitariu tiennos esprecetaos. Entramos en Palaciu - na Oficina Información y Turismu - por saber la hora d'apertura del Muséu San Martín, pero taba pesllao y naide nun había pa entrugar; a ver si hai más suerte de tarde, pero tábemos gafaos.
 (Al día siguiente informáronnos amablemente dende l'Ayuntamientu qu'entá nun salió la plaza anual del Receicionista; perres). 


Andoliando a la vera del Nonaya
         ANDOLIANDO 
 << Paseante, pelegrín,
 qu' andolies a la vera del Nonaya 
recuerda, cuando troties pel camín
y alces, cariciosa, to mirada 
qu'eses cases y palacios que te pruin 
son la hestoria de la villa d'esta plaza.
    ¿Ves les agües que degolen ensin fin ?
Acompáñeles, anda,
son les mesmes que pasaren per equí
abenayá, tiempos del Obispu Valdés-Salas;
elles, tampoco son a vivir
 munchu tiempu alloñaes de la so casa.
De cuando en cuando, cumplíu yá'l so destín,
tornen de la mar purificadas
    Don Fernando, tu que celebraste en Samartín
tres cumplir tos deleres con España
pídote, como a home de postín, 
que nunca nun escaezas del Nonaya. 
   Y tu... 
Qué quies que te diga, amiguín, 
¿nun ves qu'ensin hestoria somos nada?. >>

                                                  *********************


[[ Tornamos llibremente un párrafu del llibru "La Peregrina " de I.SS. :    

<< Entamamos la marcha al albanciar, a la lluz enfermizo d'un día buxu, embaxo d'un orbayu testerón que caltria hasta los güesos]]  


Equí tamos, Mingo y Teresa dimpuestos a entamar la xubida
a La Espina pero enantes hai que cargar les piles. 
    Cuando queremos entamar cola caminada son les ¡10:50!; esto ye madrugar, sí, señor. Buscamos la Cai Ondinas p'averanos al ríu pos la xubida a La Espina faise escontra forga al discurrir del Nonaya. Hai que reconocer que lo tienen perguapo; ficieren una sienda-parque a la vera del ríu de lo más candial. Nun cartelu xunto a una ponte que comunica'l cascu hestóricu col barriu del Ponteo comprobamos que tamos nel entamu d'una ruta < Sienda de la cascada del Nonaya>.  Dexamos la visita al candial barriu pa la vuelta, d'haber tiempu. Meyor nun se pue entamar.
        Embredamos a xubir la caleya - al llau d'un tendeyón de madera afumiao - cola esperanza qu'esnalare la borrina; daquién nos dixo que podríemos dexar na retina de la cámera unos lienzos de Salas impresionantes. Pero nun yera'l día, el tiempu nun diba cambiar, ¿¡Y qué?¡. 


Sienda'l  Ríu Nonaya al so pasu per Salas.
      Alcontramos un caminante que baxaba del paseín mañaneru pa dir compartir el vinín colos collacios, camiento pa min:
   - Bonos díes, señor; ¿vamos bien pel <Camín primitivu?>
   - Perbién. Cuando lleguéis a un cuce tiráis defrente, a mandrecha hai una cascada perchula,la del Nonaya. 
   - ¿ Nun hai un par de pontes bien cerca?
   - Sí, una antes ya otra xusto onde'l tabayón. Después alcontraréis un par de curves mui pindies  que vos embocarán na carretera xeneral. Ta perbién señalizao. 
¡Bon Camín!
  - Gracies, señor, que tenga un bon día. 
 
Abebentando na Fonte de Paín. 
        Abandonamos el pueblu y entramos nuna caleya zahorra un poco enllamuergada, astrada de fueya castañu, sobremanera. Ceo dimos cola Fonte de Paín y ensiguida con una especie de tolva que nos fizo pensar nun depósitu pa cargar el carbón, magar nun se viere carbón per llau alguún. Deben ser suaños, estos díes nun faigo otro qu'alcordame de les mines de carbón de les Cuenques ( y les otres) que tán ...esapaecíes. Lloro. Acabaron aquellos tiempos de guaje onde too yera negro sacante la esperanza d'una vida meyor, magar que tol mundu trabayara como un negru, homes y muyeres;  too diba al rodiu'l carbón, hasta l@s rapazos, qu'entámabemos a estudiar p'apartamos del polvu. 
Lluéu enteré que se trata del cargaderu d'una mina caolín. Y qu'estes mines son mui abundantes nel conceyu de Salas: Bodenaya, La Espina, ....

         [[ La Mina Consuelo de "Caolines Merillés" taba asitiada en Salas, anguaño ta pesllada pero hai delles mines d'esta arcilla nel conceyu y alguna más n'Asturies. Na Sierra de Bodenaya recién acaben de dar lluz verde a la esplotación del caolín a cielu abiertu. 
        El caolín o Arcilla china ye un mineral de fórmula Al2 Si2 O5 (OH)4, ye dicir un silicatu d'aluminiu hidratao que provién de la descomposición de roques feldespátiques per aciu del agua y del dióxidu de carbono. Ye llixeru, 2,6 densidá y blandiu, 2 na Escala Mosh y de color blanco; escama bien y tien una quebra astillosa. 


Cargaderu de la mina caolín (Salas)
    
   El caolín mécese cola chamota, un material granulao rico en alúmina (40%), sílice (30 %) y óxido de fierro (4%) que s'usa en alfarería  ya escultura porque ameyora la testura de l'arcilla, torgando que s'agriete o llamine. Esta chamota sácase del ladrillu cocíu, de piedres refractaries ya otros productos cocíos y depués sirve pa facer cementu ya formigón refractario.
     N'Asturies hai 5 empreses SL - namás la supera Valencia con 7 - que se dediquen al caolín:
       . Caolines de Merillés, Caolines La Espina, Caolines del Narcea, Caolines Ibéricos y Estracciones del Carbón y Caolín.

    El caolín tien munches plicaciones, por eso ta bien demandao:
. En la construcción, pa tresnar cementos, yeso, escayola, ladrillos cerámicos, materiales refractarios.
. N'alfarería, pa iguar obxetos de loza, gres  y porcelana.
. En medicina, como antidiarréicu pol so poder absorvente. Pa la psoriasis y dermatitis. Como dentríficu y pa tratar les estríes de les embarazaes. Reguala l'acidez gástrica y calma les úlceres. Tamién s'emplega como dentríficu.
. En cosmética , al ser suave y absorbente ye pintáu pales mascarilles escontra la grasa y l'acné.
. N'agricultura ecolóxica, pa tratar la Mosca los cítricos, olivos o pomares, ye un insecticida repelente (Surround, caolín 95%) seique val pa cualisquier planta.
. Tamién s'emplega pa facer aprestos d'almidonar, na fabricación de medicamentos, pintures y papel. ]]
     
                                          ********************

        Entesacamos un párrafu de "La Peregrina" (torna llibre) que nos pue dicir un poco cómo nos sentimos al caleyar per esta sienda:
Ponte Borra, nel Camín Real de La Espina
      [[ << Durante un bon ratu siguimos el cursu del Ríu Nonaya que ruxe caudalosu pola mor del desnieve. Cruzámoslu en delles ocasiones obligaos pola traza del senderu, unes por vaos naturales poco profundos ya otres al traviés de rústiques pasareles feches de maderos entallazaos con cuerdes bien poco fiables. La sienda yera tan candial como abegosa; tan llarada de pilancos como armoniosa a los güeyos del que sabe mirar. A los de mio, máxica >> ]]

Pelegrín@ xacobéu@
a la cata la so remisión
en Santiago Compostela
   
  Una casa esbarrumbada cerca del ríu quier recordanos un antiguu molín, paezme ver una ñora cerca. Pero taba enquivocáu, otra vuelta suaño, esta vegada con molinos, ta visto que soi un quixote. Más tarde eneré que se trata d'un curtideru de pieles , abandonáu, claro.
        El camín ye anchu y tien bon pisu; hai munchos tramos bien tresnaos pa salvar el tremendu desnivel, una fana en toa regla, que tienen algunos tramos d'esti ¿Camín Real?... Tengo que buscar, ye lo que ta paeciendo... ¿había un Camín Real ente Salas y Tinéu pasado pela Espina? ...
     Pos sí, yera un Camín Real, por eso tien eses pontes tan importantes, sobre too la del Carcabón, que ta namas salir del Tabayón del Nonaya, de fechu llamónos poderósamente l'atención al ver los tremendos pilares nos que s'afitaba.

Pelegrina xacobea
escaecida nel tiempu
¿por mor
 de les güestes d'Almanzor?.


      De La Espina'l camín real siguía hasta la costa, a Valdés. Cuenten les lleendes qu'Almanzor utilizó esti camín cuando volvía de saquear Santiago de Compostela en 997; asina que per equí pasaron les campanes de la catedral xacobea camín de Córdoba y que foron rescataes en so tiempu por Fernando III, el Santu (1236).
    Nosotros a lo nuestro, vamos siguir pel Camín Primitivu tres los pasos d'Alfonso'l Castu envede dir empalmar na Espina col Camín del Norte, esi pa otra vez.

    Y damos cola Ponte Borra, del sieglu XVII-XVIII como reza un cartelu. ¿Del tiempu los palacios de Salas?.... La riega que debe discurrir la ponte vien seca pero yo pienso que ye más pa salvar el desnivel de la fana que pol agua que pue trayer, seique dalguna vez lo lleve.
  Van ser doce menos cuartu (11.45) aportamos al famosu cruce. Defrente, Camín Xacobéu; a mandrecha <Cascada del Nonaya> a 250 m.
   - ¿Qué faes?
   - Tirar p'arriba, hai que reservar fuercies, queda muncho.
   - Ye mediu km ida y vuelya, deùés nun me martirices por perder esta ocasión:
        - "Que qué fatu soi", "que llegamos sobraos", "que siempre me pasa lo mesmo", que si patatín, que si patatán... ¡Venga, andando pa baxo que nun quiero aguantate tola selmana!
    - (Esta muyer ye una santa, ¡ónde alcuentro otra fatacomo ella?)





     Foi verdá que mereció la pena. El Tabayón del Nonaya ye pequeñu pero prestosu; ta metíu nuna fana metanes una entena la viesca. Embaxo hai un ponticu que salva la riega que forma la cascada. De fechu, l'Ayuntamientu de Salas promociona una <Sienda'l Ríu Nonaya> de 6 km. ida-vuelta. Nun día guapu creyo que tien unes vistes perprestoses; pa otru día.

                 [[ Tamién los protagonistes de "La Peregrina" s'alcontraron col tabayón. Escucha a Alana:
< Al llegar la hora tercia - pasando les nueve la mañana - ficimos una una paradina al par d'una cascada pa que los clérigos pudieren entonar les sos preces mientres los caballos abebentaben na poza iguada pol tabayón . Tamién nós aprovechamos pa tomar la parba con agua fresco, cuidao que les farapes del almuerzu quedaren yá escaecíes > ]]


Ponte del Carcabón,
tamos nel Camín Real

        Son les doce del meudía. Namás salir, la Ponte de Carcabón de los sieglos XVII y XVIII, como la otra. ¿Nel Camín Real?... El camín sigue astráu de fueya de castañal pero los lladrales tan llaraos d'arguma y espineres, tamién vemos dalgún pinu. Llegamos al curvón y a la recurva cuando'l camín , empiedráu, s'oricia dafechu. Sentimos el ruíu sordu los coches. Y empatamos cola carretera N-634, que nos busca de contino. Meyor, por si falla la pata...
     A Salas queden 3 km per carretera, la que nós tenemos que siguir como 500 m.... Y tornamos a la caleya de zahorra, a les escobes y árgumes hasta que damos con una ponte azul, moderna, que traviesa la N-634, cuál diba ser... 

     [[ Sigo cola "Pelegrina" mientres percorre la sienda del Nonaya:

¡¡¡ VIDA !!!
      <<Más d'un troncu cayíu tuvieren d'apartar los siervos a la fin d'espeyar el camín, mientres les ñubes componíen so danza incadigable coles cumes de les montañes que s'acolumbren na llonxanza. 
En puntos estremaos, equí ya acuyá, les corones de los árboles formaben una ablucante bóveda natural , de fermosura superior a cualisquiera que yo tuviere visto, fecha poles manes del home.
Por toles partes la vida s'alimentaba de vida, surdiendo nuna tarmuda vexetación que bien ceo nos tien de brindar los sos frutos >>]]

¡Vaques!. Humanizando.
La célebre borrina
de la Sierra Bodenaya.
     - ¡Vaques!. por fin vemos un par de vaques. Esto empieza a humanizar... como diría Ruth Beitia.
Y entramos otra vuelta nel asfaltu per una carreterina estrecha.
     - Debemos dir pa un pueblu. Mira a ver el google Maps.
     - Tamos cerca de Porciles. Yá atalantamos un pueblu asitiáu na llomba; embaxo, unos praos onde pastien delles vaques, pintes -frisones - nel prau d'abaxo y nel d'enriba otres , pero estes paecen ratines, deben ser pa carne. Tamos nel pueblu de Porciles, barriu de Bodenaya, onde se creye qu'hebo un castru, de fechu hai una llugar conocíu con esi topónimu.  Hai una ermita dedicada a San Roque.
    Nel Conceyu de Salas el Sector Primariu representa representa'l 50% siendo la ganadería del vacunu la que tira del carru. Tamién l'agricultura con fabas y los clásicos prductos de la güerta.

El Cruceru de Bodenaya,
tamos nel ¡Bon Camín!
Un texu xigante y otra ponte y salimos del pueblu per un tramu asfalcáu  hasta que llegamos a Bodenaya; vaya pueblu tan grande y buiciosu, tractores furrulando, coches que van y vienen, xente... Por fin, xente. Unos 140 habitantes - pensé que podríen ser más - pa 7,7 km2.  Un nave pergrande col cartelu d'ASA arrodiada de tractores y de ruedes d'autos...


     Pasamos un cruceru al par del cementeriu que nos lleva hasta la ilesia, embaxo la encomienda de la Virxe de la Marina, abogada del agua.
Bodenaya:<La Parada'l Pelegrín>
     -Yá te digo.... Güei tará contenta.
Bodenaya ye famoso poles mines de caolín y caltener na Sierra del so nome - Sierra de Bodenaya - una gran cantidá de molinos eólicos pa producir lletrecidá, el célebre Picu de las Penonas (810 m) da fe d'ello. La verdá yeque nun pudimos velos por mor de la borrina, famosa nestes dómines al rodiu La Espina.
Tierra vaqueira entá caltién delles brañes, anguaño caseríes, como son: Brañameana, La Cuerva y El Couz. Tamién tien Bodenaya Tanatoriu.
       Per una caleyina empobinámonos dica la carretera pero damos con una casona-albergue de lo más guai. Ye La Parada'l pelegrín pero ta zarrao hasta que Carricondo, el relevu d'Alex, nun lu abra en Febreru; una pena pos ye la hora'l vermú (13:30).

       Cruciamos  la carretera xeneral y embredamos per un camín que nos va llevar derechinos a braña vaqueira de La Espina, a esi cruce de caminos ( Venta les Cruces) per onde pasó Almanzor en 997.  El camín xacobéu va paralelu a la carretera xeneral y, tres dexanos contemplar la Escuela, encamínamos al Albergue  y a la Ilesia.

Ilesia de San Vicente
      La ilesia de la Espina ta embaxo l'advocación de San Vicente y tenía compartimientos estremaos pa vecinosy foriatos (Equí vos pasasteis, vaqueriros, anque a lo meyor nun taba mal fecho... ¿alcordaisvos cuando n'Asturies toles romeríes terminaben a palos?.. ¡Qué burros somos!).
Celebren la Festona'l primer domingu xunetu, en Setiembre Cuadonga y al domingo siguiente la Feria les Oveyes.

     Na Espina (658 m /snm) hebo abenayá dos hospitales de pelegrinos; ún fundáu en 883 colos donaciones qu'Alfonso III el Magnu fexo al santuariu de Compostela ya otru sufragáu pol nuesu amigu l'Inquisidor, don Fernando Valdes-Salas. Taben desimíos de pagar impuestos como sabemos poles donaciones concedíes por Alfonso IX en 1224 y tuvieren n'activo hasta'l XVIII dependientes de la Malatería.

La ESCUELA de  La Espina.
      En 1277 La Espina firmó un Pautu d'Hermandá con otros ayuntamientos llinderos: Avilés, Pravia, Grao, Salas, Somiedo, Valdés, Tinéu, Cangues y Allande pa tener más fuerza nel Principáu y defendese escontra'l poderíu de la nobleza ya otros menenesteres. Asina que na Espina tevo llugar la primer confederación de conceyos asturianos. Esti ayuntamientu vaqueiru perteneció a Tinéu hasta'l sieglu XVI y yá nel XIX pasó a formar unu propiu xunto con Bodenaya, Idarga y Brañalonga.
     La Espina foi siempre mui transitada, por exemplu, durante les guerres carlistes pasaron per equí los xenerales Gómez ya Espartero, ganador a la fin, qu'algamaría a Rexente con Sabel II.

     Pero nós  damos la xornada por terminada y cola mente puesta en tantos caminantes ilustres que pela Espina pasaren empobinamos a un chigrín pa tomar daqué  pos yá yeren les dos de la tarde; salió  meyor de lo que contábemos.
     - Señorita, ¿ónde podriémos comer algo na Espina?
     - En Casa Vane, fíu; lo más amañoso que tienes. 
Nun fizo falta andar muncho; namás dar la vuelta a la esquina, na carretera xeneral, ta Casa Vane; un menú superabondante por 10 € ya una camarera peratenta que nos indicó la parada l'autobús, a puntu de pasar de vuelta a Salas; nun fexo falta llamar al taxi. Volveremos a sacanos La Espina.
       Llegamos a Salas nun santiamén. Yera temprano, entá, y atrapaos pol embruxu magnéticu d'esta villa decidimos dar un vueltu pel barriu afondáu na marxe izquierda del ríu Nonaya. Tien sabor a antiguo y permítenos ver con otra perspeutiva'l Turruxón de los Valdés, arrechu, argullosu y  dominante sobro esta parte de la villa onde s'alcuentren: La Casa del Rexente y la Casa de Miranda como símbolos más sobresalientes del pasáu.

La Casa del Rexente (XVII)
Anguaño Casa d'alquiler
(Semeya Aytu. Salas)
        . La Casa del Rexente, como tantes coses en Salas, foi llevantada nel sieglu XVIII. Ye un edificiu de planta rectangular con un cuerpu saliente en cada lladral.
Cargada y pintada de blanco pa cubrir la mampostería amuesa los sillares en vanos, zócalo, esquines ya impostes. La cubierta a cuatro agües lluz con delles bufardes ya un aleru sofitáu en caceninos de madera.
De les cuatro fachaes dos dan a sendes places y les otres dos al interior de la finca a la que s'accede per aciu d'un arcu rebaxáu (unos 60º).

Casa del Rexente.
(Semeya del Currante)

        La fachada principal tien cinco exas tando la primer planta separada tamién por cinco llínies d'impostes con balcones d'antepechu de fierro siendo volaos los tres del mediu y presentando una entrada de portón adinteláu.
Anguaño La Casa del Rexente - 400 m2 - ye una casa de vacaciones mui apropiá pa grupos pos dispón de cinco habitaciones onde pueden agospiar hasta 14 persones. Con vistes a la Torre, les montañes y el Nonaya tien un xardín mui afayaizu pa calechar y hasta pa xugar los guajes. Sobra dicir que dispón d'una cocina equipada d'afechu asina como Wifi y TV.

La Casa de María Veiga o Casa de Miranda.
(Semeya Ayuntatu. Salas)
      . La Casa de Miranda o Casa de María Veiga foi llevantada tamién nel XVII (dende lluéu nel xvii nun hebo paru en Salas) no que güei conocemos como la Veiga del Rei. Trátase d'un casa de dos plantes - rectangular - con dos fachaes al esterior ya otres dos al interior de la finca, como la del Rexente. De la mesma manera ta llevantada en mampostería son sillares a soga y tizón nos vanos, dinteles ya esquines.
La fachada principal ye una pasada, una especie de palaciu típicu asturianu con un cuerpu central engalanáu con corredor-galería d'antepechu de madera ya escudu sobro l'estragal abiertu y cubiertu con vistosu texaroz de madera.
 Los cuerpos llaterales tan abiertos a la cai per aciu de sendos balcones con antepechos llabraos y cubierta a cuatro agües rematada con esa doble filera, tan vistosa, de teya superpuesto. La fachada trasera y les de los lladrales yá tienen menos vanos.
Anguaño tamién esta casona-palaciu ta decicada al turismu rural.

                                                     *******************

HERÁLDICA:
          L'escudu oficial de Salas tien forma cuadrillonga cola punta en picu, tipu francés, y el timbre ornáu cola corona'l Príncipe d'Asturies.


      Presenta un campu cuarteláu - cuatro partes - en cruz.
    N'oru, el cuartu superior de la diestra amuesa una torre de piedra de la que sal un lleón y tres veneres de plata, dos nos lladrales ya una en punta. Falamos del llinax de Salas.
    En campu de gules el cuartu superior de la sinestra onde un lleón, en posición d'adiestramientu d'un castiellu, afita un balcón; la punta de sinople con dos columnes d'oru formando un aspa. Referencia a la congregación pucelana de los benitos.
   En campu de gules cinco veneres  en souter  (aspa) arrodiaes por dos cordones anudaos en sinople (referencia a les armes los Miranda) conformen el cuartu inferior diestru.
   Cuido que'l cuartu inferior sinestru ye'l más propiu, identificativu, pos fai referencia  a los Valdés. En campu de plata cuatro faxes d'azur y diez roeles de gules cola cruz n'oru y distribuyíos (3-2-2-3).
       En timbre la Corona del Principe d'Asturies que ye un círculu d'oru y piedres precioses decoráu con ocho florones d'oru perllaos n'azur qu'asemeyen a la fueya d'acantu y al empar van alternaos con otres ocho puntes d'oru perllaes en plata.
   Salas, Valdés, los benitos y Miranda tán equí representaos ya ornaos colo Corona'l Principe. 
       
<< La parienta anda y calla
per del Nonaya, la sienda.
 La mui cucia, roceana,
manda un wasap a la Tierra:

- ¿Toi en Salas
o ando pela Edá Media?

- Nun t'esmolezas, cristiana,
la ruta paga la pena.

Nun queda otro qu'andar
y dar les: GRACIES, Parienta.>>
ESTIMANCES:
. A la Parienta, que que ye capaz d'aguantar - estoicamente - díes como'l de güei, casi, ensin reburdiar.
. A Isabel San Sebastián que nos prestó (seique ella nun lo sepa) a "La Pelegrina" Alana pa que se nos ficiere más dondu'l camín. Gracies. A ver si na próxima presentación d'un llibru podemos da-yles personalmente.
. A la Wikipedia, como siempres, onde paso media vida restolando.
. Páxina web del Ayuntamientu de Salas. Bien-y tiramos del tetu esta vegada.
. www. senditur.com.
.  www.bookin.com
. A la camarera de Casa Vane, que foi bien amble con nós asina como a los vecinos qu'alcontramos    pel  camín y nos apurrieron información o cenciellamente cambiaren impresiones con "estos   desconocíos".
. Y a Xuan del Baltu, un collaciu de facebook, que tien el sangre mecío coles agües del Nonaya, pásen-y per delantre casa.

       

martes, 8 de enero de 2019

< ¡Bon Camín! [2]: Camín Primitivu: Grao-Salas >

                        < Camín  Primitivu [2] : Grao - Salas >

                                           ¡ Bon Camín !

                         (1ª Estaya)      Grau- Curniana 
 
< El Molín d'El Meredal
ta bien cerca La Doriga ,
námás pasar Samarciello
y mirando a La Rodriga;
Curniana a cuatro pasos
y ensiguida Suburriba.
Tres de pasar per Santueña
Llamas y Casazorrina
aportaremos a Salas
fin de la segunda cita.
Voi pel Camín Primitivu
a Santiago, de visita.
Con esti cuayu que tengo
¿algamaré daqué día?
 - Si nun agabites, Xacobu,
veo la cosa... h.odida>
       Muncha xente da por finada la primera estaya nel Albergue de San Xuan de Villapañada, y nun m'estraña. Agora que conozo la xubida de Grao al Freisnu yá entiendo por qué ponen el final a media cuesta, val más repartila. ¡Menudu arrimadiellu!.
        Préstame llegar a Grao porque ye la tierra de nacencia de mio güela que, por cierto, nun conozo nada bien, y habrá que remedialo. En realidá yá entamáremos cuando ficimos les rutes del Conde Cuaya (3, nesti blog Camìn de Niria), aquel Gonzalo Peláez (XIII-XIV), tan malu, del que mio güela tenía alcordanza polos ecos de la tradición oral, ¡ai, hai que ser malu!. Pero cuando embredo la recta de Peñaflor, travieso San Pelayo y crucio'l ríu Cubia buscando'l cascu antiguu siento namás la gayola de la hestoria; yá soi otru.

Saliendo de Grau.
       Nós salimos de Grau tres aparcar nel parking públicu que'hai a la vera l'Ayuntamientu, embaxo la muralla medieval que los habitantes de la Villa llevantaren pa defendese de los malinos condes de la dómina ; ¿quién nun oyó falar del cafiante conde Cuaya?*. Bueno, tamíen-yos valió pa cobrar los drechos de portazgu, yá convertida en Villa por Alfonso X, y pa defendese de los franceses cuando la invasión napoleónica (lluéu los que defendieren foron los franchutes).
       Bueno, ente pitos y flautes yeren les once menos cuartu (10:45) cuando entamamos a xubir pela carretera N-634; claro, yéremos cinco más Rei y Canelo qu'entá nun tienen pedigrí pa montar nun taxi, asina que tuvimos que dexar un coche en Curniana - puntu caberu de güei -  y dar la vuelta hasta Grao, col otru coche, pa entamar cola ruta.


Fonte de Carlos III, un gran Rei constructor.
Los moscones saben bien a quien encumar.
Chapeau.
       Ensiguida vemos, a mandrecha,  la indicación dun albergue pero siguimos andando y damos con otru, l'Albergue la Quintana, una colorida casa indiana de 1900 formada al estilu los palacios asturianos por dos turruxones llaterales ya un cuerpu central; na parte trasera tien un xardín morrocotudu, más de dos mil m2. Dende equí vemos nun cuetu, a andrecha, el Colexu Públicu La Cruz "Bernardo Gurdiel".
Poco  depués una fonte bisiega, yá te digo, la Fonte de Carlos III (1759-1788), un gran rei constructor que nun debió morrrer nunca.
  Llegamos al barriu La Cruz, como bien nos lo recuerda una cruz de piedra qu'hai a la vera la carretera, a mandrecha, pa indicar a los pelegrinos xacobeos que tán nel ¡Bon Camín!.

El Cruceru de Grao.
¡Bon Camín, pelegrinos!
Y tres cruciar la soterraña Riega Gaspar o La Cruz qu'antiguamente llendaba la Villa pel sur y que busca como lloca la llana del Ríu Cubia, vemos, un poco más arriba, a manzorga, una indicación que diz <Acevedo> (Acebéu, debía dicir) y ye la que nós demos siguir, caleyando metanes un barriu vieyu, mui antiguu, nel que tienes la impresión de tar perdíu, polo que nos vemos obligaos a entrugar:
   - Señor, ¿vamos bien pa Villapañada pel Camín Xacobéu?
   - Sí, sí; per estes caleyuques ente les cases, aportaréis a Acebéu y depués al Albergue Villapañada.
     ¡Bon Camín!.

- Sabes que te digo, ne,
qu'al to home voi matalu,
 díxomos que yera llana...
     Xubir y xubir hasta dar con una llana, ¡qué aliviu!, llarada de castañales onde rosa se puso les botes con frutu serondiegu. A les 11:30 llegamos al barriu La Barrera, que yá pertenez a la parroquia d'Acebéu, talo qu'El Cascayal, que tamién dexamos atrás, y el Barriu d'El Valle .

Albergue S.X.Villapañada.
(Semeya d'internet)


   Un cachu más p'arriba vemos un cartelu: <Albergue San Xuan de Villapañada> a 1.5 km, a mandrecha. Sentimos falar perbién del dueñu Domingo Ugarte, home acoyedor y afable. Esti Barriu La Reguera perteneció a l'antigua encomienda de Villapañada, orde de San Xuan de Xerusalén que curiaba los caminos xacobeos.; agora ye Domingo'l que los curia. 

< La santa Virxe del Freisnu
ta perbién entamilgada,
nun hai pelegrín qu'escaeza
echa-y una donda mirada >.
         A siguir esguilando, como quien diz. A les 12:30 pasamos pel Barriu La Pelona (nome en consonancia cola que llevábemos) y too xubir hasta'l Colláu del Freisnu (Fresnu), 366 m/snm marca l'altímetru, onde s'alcuentra'l Santuariu de la Virxe d'El Fresnu. Nesti barriu alcontramos el Llavaderu-Fonte de Fresnu.
    - ¡Por fin, yá nun hai que xubir más!
    - Yo que tu nun clamiaba victoria...
(L'allegría dura poco en casa'l probe, pero foi más sonce qu'esto)
     Hai daquién qu'aprovecha pa facer una oración a la Virxe:



Santuariu la Virxe d'El Fresnu.
< Sorrisa franca, mirada aleya,
cuando la Virxe agabita
los collaos .... una comedia.>
 
   <Sei pa nós, oh, Virxe d'El Fresnu, faru lluminosu que nos guíe, ánxel custodiu que nos defenda, y cayáu que nos sofite>. Amén.
   
     Nun sé si ye peor pa les rodiyes, y sobre manera pa los nuesos cadriles averiaos, xubir que baxar... Pindio, pindio; fano, fano, y amás el camín  de xial . Hai que poner tol procuru pa nun resbariar; la gochada ta al cabu la cai que nun hai onde agarrase.  Lo que paga la pena son les vistes de les aldées esparcíes pelos montes y pel valle, caltriaos pola autovía que s'escuende delles veces de nosotros.



         Baxar y baxar pelo que foi un ramal de la Vía de la Mesa (nun somos naide). Una hora más tarde (12:30) tamos, por fín, sentaos n'antoxana d'una casona tres pisos , en Samarciellu (San Marcelo), que nos trai n'alcordanza a Primo Rivera (1921, reza na fachada), cuando taba tramando con Alfonso XIII la Dictadura Militar, que me trai n'alcordanza a mio güelu faciendo la carretera de Llaviana a La Rebollá.


      Al dar cola rotonda la carretera torcemos a manzorga y , per un senderu, travesamos una pomarada buscando una pasarela que nos permita cruciar La Riega Meredal,  de la  vamos sintiendo'l so ruxerrux. Entramos, siguiendo'l cursu del agua, nuna viesca solombriega de ribera, llarada de fueya y barru que travesamos dando saltiquinos a la fin de llibrar los foyeros. Un molín esbarrumbáu, el Molín de la Reaz, recuérdanos qu'allí había una vega bien granible.
     De la que baxábemos entretúvime a esgaya intentando retratar una caparina de les que ye mui habitual alcontrar peles siendes de montes y viesques, dalguna salióme bien. Yá-y tenía yo ganes, asina que-y entrugué:
    - ¿Cómo te llames, ne?. Va años que m'acompañes y entá nun sé como te llames.
    - ¿Nun ves los colores que tengo, ho?
    - Verde y mariello claro... 
    - Talo un llimón, soi Llimonina. 
    - Tantu gustu, caparina.

LLIMONINA: Compañera de viaxe.
<Baxando pa Samarciellu
alcontré esta caparina,
quedé clisáu un instante,
paecióme cosa divina.

- ¿Como te llames, rapaza?
- Dicen que soi Llimoniana,
un inseutu Lepidópteru
Prieridae de Familia.>
     [La Llimonera o Llimonina (Gonepteryx rhamni Linné) ye una caparina d'un tamañu aceutable, ente 4 y 6 cm, qu'amuesa cuatro ales terminaes en punta triangular. Los machos tienen les ales mariello-llimón y les femes de mariello-blanquecín pero toes presenten una manchina naranxa nel mediu, marca de la casa. Hai quien diz qu'estes caparines enxendren tres xeneraciones al añu: Marzu, Xunu y Setiembre pero ASTURNATURA ya otros dicen que namás una que vive de Febreru a Payares ivernando durante'l branu nel envés de la fueya de la yedra o sol tueru una rama. Pa xintar présta-y l'aladiernu o l'arraclán. 
Como toles caparines tien un ciclu vital que pasa poles cuatro estayes de tresformación (metamorfosis): güevu, larva (oruga), pupa (crisálida) y adultu (imago).
Présta-yos vivir nos praos, cerca la viesca, porque la falta d'humedá produz-yos estrés, talo qu'a min. Danse muncho pel norte d'España pero hailes hasta en Sierra Nevada y norte África. Yo alcuéntrola muncho pelos matos de les caleyes, búscola ensin querer, ye una compañera de viaxe.  ]

Fonte La Reaz : Secos, nun puen col alma.
- Eh, eh, eh... Los chuchos primero.
¿Cuándo se vio qu'un caninu
ficiere'l Camín Xacobéu?
     
  Y llegamos a La Reaz a les dos (14:00). Abeventamos nuna fonte (1903) mui cuidada delantre una casería remocicada dafechu; asina me gusta. Per aciu d'un túnel embaxo l'autovía calamos a La Doriga. Mira que tenía ganes de conocer la ilesia y el palaciu d'esti pueblu... Cuántes veces los tengos güeyaos al pasar camín de les Babies, o pa Salas... Yá tocaba.
Tres falar con un vecín delantre la ilesia p'afitar el camín de Cornellana y entrugar pol palaciu, que perdiéremos de vista, entamamos a facer semeyes de la ilesia de Los Dorigas, que tienen el Palciu a tiru piedra.

Santolaya la Doriga
<- Tenía ganes de conocete, Olaya de Los Dorigas,
cuantes veces te achisbé, pasando pela autopista,
per aciu'l Camín Xacobéu, pueo ,
al fin, echate  la vista enriba;
nun me defraudasti, non, románica y clasicista,
si aquel Pelayu, l'obispu, llevantare de la tumba
quedaría satisfechu ver qu'entá sigues tan viva.>
       Ilesia de Santolaya la Doriga, consagrada pol obispu Pelayu nel s. XII (¿sedría verdá?) - como reza una inscripción na fachada -  tien orixe románicu, ye lo que te diz al ver les muries pergordes y contrafuertes que la sofiten, asina como les partaes de mediu puntu.
 Remocicada más tarde alquier tamién una traza neoclásica. Ye planta cruz llatina con turruxón a los pies ya un pòrticu que lu xence coles ales. L'ábside ye cuadráu con bóveda de cañón y los brazos tan cubiertos con bóveda de crucería. Los arcu toral ye de piedra llabrao sobre imposta y pilastres.
Abelluga delles sepultures col escudu de Los Dorigas.
           Tres salir de la ilesia fuimos a visitar un palaciu que ta tiru piedra:
Palaciu La Doriga : Curniana (Salas)
El Palaciu de La Doriga ye una construcción señorial - defensivu y residencial - formada por una Torre almenada del XIV ya un edificiu rectangular del XVI adosáu a la mesma que tán alredor d'un patiu porticáu de columnes toscanes. Llama l'atención la muralla almenadas que lu arrodia calteniendo un xardín con árboles pergrandes que-y dan muncha sonadía. La entrada al traviés d'un arcu de mediu puntu con escudos familiares ye perprestosa. L'interior ye sobriu pero maxestuosu, con unes dependencies onde pues xugar al fútbol.
          Cuenten que la torre ye de les poques que salvó n'Asturies por mor del desaniciu palaciegu de los Reis Católicos pa refugar les rebeliones nobiliaries (Yá padeciéron otra enantes en tiempos de Xuan II, si nun recuerdo mal). Tamién se cuenta que nesti palaciu tevo agospiáu'l xeneral napoleónicu Ney, tres de dar el paseillo per Curniana, cuando diba camín del Freisnu. ¡Como pa dici-y que non!

Curniana, dende "Los Pilares de la Tierra",
 onde'l romanu Cornelio llevantó una villa.
Bien cerquina d'esta ponte l'autovía , hebo, a mediaos del
sieglu IX, una batalla decisiva pal Reinu d'Asturies:
Ramiro I espantó al cuciu Nepociano. 

        Pena foi que'l chigre Pacita tuviere cerráu pos yera  la hora'l vermú. Asina que pillamos el caleyu p'arribar a Curniana, entá nos falten cerca tres kilómetros. Tábemos tan felices llaneando pero... Cuesta arriba otra vuelta pela Veiguina onde lo más bultable son los pilares ¿de la tierra?, non, de l'autovía. Pal paisax son matadores pero... hai qu'acostumase,  el progresu pide sacrificios.
       ¡Curiao!, menos mal que ta bien señalao por unes fleches; hai que metese a manzorga per un senderu abegosu, una viesca a la oriella del Ríu Narcea, bien resbariosa por cierto. Desembocamos na N-634 cerca d'una vaquería, frente una plantación de kiwis y delantre unes cases...

Cases de la Ponte.
La Ponte vieya andaba xusto per equí.

         Les cases que vemos equí son les Cases del Puente o'l Barriu La Ponte. Aquella ponte esbarrumbó dafechu en 1580 por mor d'una riada - yá taba mayorín y poco curiáu - y namás nos queda'l topónimu y unos pocos restos qu'alcontró va poco l'arqueóloga O. Requejo. Asina qu'un poco ablayaos , más que ná pol cansanciu, siguimos pela oriella la carretera camín de la ponte moderna del Narcea  col envís d' entrar en Cornellana city; la colexata ta esperándonos. Pero antes damos con un Ârea recreativa onde vamos parar a xintar porque son cerca les tres de la tarde y andamos, en verdá, famientos. Cuatro hores caleyando, pa unos paisanucos, nun ta mal.

      Va ser "La Peregrina", Alana de Cuaña la que nos inxerte nel Pueblu:
[[ Por fortuna tábemos cerquina d'una antigua villa romana, propiedá d'un potentáu nomáu Cornelius, que gracies al so bon estáu de conservación va brindanos esta nueche un agospiu de lo más afayaizo. Nun ye lo que fue pero dende lluéu ye daqué más  candial que dormir al cielu rasu, o nuna tienda, baxo un orbayu trescaladizu y testerón que nun ve manera d'abocanar. ]]

"A papu enllenu"
Área Recreativa "La Rodriga"
CURNIANA
  <  Pelegrinos xacobeos
  dando cuenta d'unas viandas
onde Ramiro ganó  
  una célebre amarraza. 
      Cerca'l Puente Curniana 
Nepociano degoló
y escaeció la batalla. 
     Naquella acibre mañana
el Narcea contempló
un xiru na historia asturiana.
      Pelegrinos xacobeos
¿sícasi nun sentís nada?
Venga, facéi'l favor,
pasáime un cachu empanada.>

       Mientres xintamos nuna daquelles meses tan afayaices vienme n'alcordanza la Batalla Cornellana, aquella del añu ¿842/43? cuando Ramiro I tevo la engarrradiella definitiva con Nepocianu.
       Les Cróniques cuenten qu'al morrer Alfonso II quedó como Rei Ramiro pero como andaba peles Bardulies  (la naciente Castiella, norte de Burgos) a la cata d'esposa, Nepocianu, noble palaciegu, aprovechó pa sentar nel tronu y tomó-y gustu talu que yá nun vía manera llevantar. Tevo qu'ayudalu Ramiro que tornó de Galicia - d'onde yera Gobernador - y, tres reunir un exércitu per ciu'l so fíu Ordoño,  empobinó camín d'Asturies.
      Xusto equí onde tamos, a la vera del Narcea, y cerca l'antigua Ponte Curniana, ocurrió la batalla. En plena refriega daquién traicionó a Nepocianu (talo qu'en Guadalete, los godos nun son de fiar) y Ramiro ocupó'l tronu durante los próximos ocho años (qué afayaizo debe ser esto de la poltrona). De nun ser por esa felonía nunca nun tuviéremos visto los monumentos del Narancu y seique Santa Cristina de L.lena o San Pedro de Nora; y Asturies sedría otra cosa. (Los godos tamién tienen coses buenes, ¿eh?).
    - Mientres damos cuenta de les viandes siento'l cutir de les espades, el  rinchar de los caballos, los clamíos de los homes, los glayíos vencedores, les berríes perdedores.... Gayola y rabión al empar, ríu abaxo, colos vikingos de cabotaxe y los moros al acesmu..... ¡Puxa Asturies!.


                                                                                          < Villa   Cornelius >
Aportando a CURNIANA
per aciu la Ponte'l Narcea.
<<Tres montones de fatigues   
  los romeros  Xacobeos
van aportando a la villa
darréu cruciar donda ponte
y  xintar per La Rodriga. 
       Atrás queden Santolaya,
     La Reaz y La Doriga,
    San Xuan de Villapañada
    y Grau, bañáu pol Cubia. 
    Nagüen pola Colexata,
     l'amor la infanta Cristina
    qu'una osa amamantó
    mentantes tebo perdida. 
A la vera del Narcea 
ocurrió esta maraviya.
Yo amoroso por la osa 
                                                                                       Curniana, de por vida.>>
   
      Llevantamos campamentu pa dir conocer el Monesteriu que d'otramiente ta nel Camín Xacobéu. Nun fai falta entrar na villa p'averase al monesteriu pero tampoco podemos dar un pasu ensin tomar el cafetín, asina que nun bar, al par de la gasolinera, sentamos a degustar esi productu foriatu que nos dexa como nuevos. Yá tamos pa dir a rezar colos monxos y mientres nos averamos al monesteriu vamos camentando:

¡Un barcu en Curniana!
¿Modelu vikingu?
     - Vaya ríu más anchu, ¿eh?. ¿Sabéis que Curniana foi puertu de mar?
     - ¡Puertu.... de mar...! - plamo. 
     - O de ríu, como quieras. Yá sabéis qu'esti ríu, el Narcea, emboca nel Nalón en Forcinas, pegao a Pravia. D'equí a Sanestébanu y San Xuan de L'Arena yá conocemos que sí yera navegable. 
    - ¿Y cómo sabes que los barcos podíen llegar a Curniana?
    - Porque s'alcontraron nel monesteriu unes teyes grabaes con unos barcos - tán nel Muséu Arqueolóxicu - que nos dicen a les clares qu'esos artiluxos llegaben equí. 


Los barcos del Monesteriu:
¿Una carabela en Curniana?
   - ¿De qué época falamos?
   - De la Baxa Edá Media. Les embarcaciones son de tipu medieval. Pa min una asemeya un barcu vikingu y la otra paez un cascarón y pensé nuna carabela. 
   - Anda, ho; a ver si Colón vino a Asturies a buscar financiación... 
   - D'esi que nun t'estrañe nada.... De xuru qu'alguna vez s'encamentó a la Santina.   
   - Tamién pudo l'artista veles n'otru sitiu.
    - Sí, pero eso nun mola tanto. Amás... H.e, h.e... Tu sabes que'l Padre Carbayo* dexó constancia d'ello nel so llibru "Antigüedades y cosas memorables del Principáu d'Asturies"?. Diz l'historiador que vecinos del pueblu camentáron-y al rodiu d'unes cartes de fletación de navíos que tuvieren visto colos sos propios güeyos. ¿Qué te paez? Les teyes colos grabaos de los barcos nun faen otro qu'afitar lo escrito. Qué contenta se pondría l'arqueóloga Gema Adán cuando nes escavaciones de 98/2001 alcontró eses milagroses teyes. Norabona. 

*El xesuita cangués (C.N.), Padre Carballo, vivió a caballu ente'l XVI Y XVII (1571-1635) y namás vio los barcos llegar, malamente, hasta Pravia.



- Pasen, señor@s, pela Puerta de la Osa,
vamos conocer el monestriu. 
HESTORIA del Monesteriu:
           [El Monesteriu de San Salvador de Curniana - conceyu de Salas y Partíu Xudicial de Grau - foi fundáu pola Infanta Cristina Bermúdez al entamu del XII (1023). Fía de Bermudo II de Lleón y de Doña Velasquita Ramírez, la xixonesa, yera vilba d'Ordoño'l Ciegu y mandó llevantar el monesteriu al par d'una ilesia yá esistente al que-y apurrió mobiliariu y tierres, siendo polo tanto de tipu familiar.
Doña Velasquita- nun ye la del Uviéu - morrió ensin fíos y los descendientes esmembraren  les sos posesiones delles veces hasta qu'un bisnietu de so, Suero Bermúdez, tornó faese con too alendáu pola so muyer Enderquina. Pero tampocu tuvieren neños y foi cuando lo donaren, en vida, al Cluny (1122). Los franchutes mudaron l'orde visigodu pol romanu y a don Suero sentó-y como una pata en culu, asina que pretendió quitá-yoslu pa donalu a l'obispáu d'Uviéu. Pero ai, manín, l'emperador (Alfonso VII) díxo-yos:
      - <Santa Rita, Rita. Rita..... Lo que se da nun se quita>
      -  Ai, don Suero, ¿ves pa que te valió agabitar al Rei escontra'l to primu Gonzalo Peláez?... ¿Nun sabes que los reis nun tienen memoria?... Viven namás del presente. 
             Con eso y too entamóse cola construcción del Claustro, primero l'ala este y darréu la oeste. Nel XIII redificóse la Ilesia y ficiéronse los ábsides. A partir del XIV yá los del Cluny pintaben poco pero llegó la dómina de les teyeres nobiliaries, los condes rapiegos ya inhumanos... Y los monxos tamién se contaxaren... Bandoleros y lladrones, llamáben-yos, por abusar del cobru los impuestos:
   - Too pol monesteriu, hermanos, tenemos que construyir un claustru, remocicar la ilesia...

Maqueta agospiada na ilesia la Colexata.
      Nel XVI pasen  a formar parte de la congregación beneditina con sede en Valladolid y ponse l'escude de Castiella na fachada. Al mesmu tiempu  produzse una gran reforma como l'abovedao de les naves elevándose les llaterales quedándo-y un aspeutu cubicular a la ilesia.
   Nel XVII a la fachada románica superpónse-y la barroca. Depués vien el claustro y s'adelanta la fachada comiendo media torre de la ilesia. S'enanten les zones habitables o galeríes del claustru y se instalen dos patios de serviciu: graneru y llabores artesanos.
    Los franceses empleguen el cenobiu como caballeriza enantes d'amburalu. Cola Desamortización de Mendizabal (1835) véndense edificios del conventu, dalgún pasó a ser mantequería. Pero l'amor de la Ilesia por esti cenobiu yera talu que l'obispáu d'Uviéu tornó mercalu en 1878.
     Tres la Guerra Civil LLuis Menéndez Pidal reformó ilesia, torre y claustru pero va sufriendo deterioru poco a poco hasta que, ya en Democracia,  la xente'l pueblu movilizase formando una
 < plataforma salvadora > (de San Salvador) y algamando delles ayudes pa iguar los techumes.]

La hestoria de Curniana: El Monesteriu.
        El conxuntu arquiteutónicu de Curniana  asitiáu na meceura los ríos Narcea y Nonaya, al par del Camín de la Mesa, consta de dos partes, una ilesia ya un monesteriu:
. La Ilesia , consagrada a San Xuan Bautista, ye de planta basilical con tres naves siendo la central enforma más alta que les otres tando decorada con pintures al fresco la so bóveda de cañón.
   La cabecera tien tres ábsides circulares illuminaos por saeteres y decoraos con retablos barrocos de principiu del XVII.
   La fachada y el claustro, de dos plantes, son n'actualidá d'estilu barrocu. La planta baxa presenta bóveda de cañón xunía por arcos de mediu puntu.
   La ilesia tien tamién una torre, cuido que l'orixe de too, que fai de campanariu.
. El Monesteriu , d'estilu barrocu rexonal , forma un ángulu reutu cola ilesia y asemeya un palaciu de planta rectangular. La obra duró de 1696 a 1719 , 23 años, nun ye tanto; se conoz que-is sacaron bien el sain a los cornianos, seique los canteros de la portada - Domingo y Paco - yeren avilesinos. La cara norte presenta dos portaes, una gótica ya otra romanánica, con doble arcu. Nun capitel-imposta reza: < Féxome la diestra mano de Mascaroni>, yá sabemos l'autor.
   - A min esto préstame a esgaya.
   - ¿El qué?
   - Que cuando se tratra d'una obra importante búsquense oficiales foriatos reconocíos de cualisquier nacionalidá:d' Ávilés, italianos... Había intercambiu cultural, rellaciones internacionales, nun tábemos encerraos. Yá Alfonso II tuviere rellaciones con Carlomagnu...
   - Pa algo valía'l Camín Xacobéu qu'entamó, precisamente, Alfonso'l Castu. 
   - El mesmo que nós tamos faciendo agora. Algo aprenderemos.

La lleenda..


<< La lleenda diz qu' OSA
los del Cluny que LLEÓN
yo, como soi asturianu,
plantígradu, sí, señor.
El zoomorfu que sía
de la neña namoró;
ye que les asturianes
pa ligar ¡son la de Dios!.>>
       L'emblema del Monesteriu ye la Puerta de la Osa. ¿Por qué se llamen ansí?. Porque hai una puerta bien antigua que lleva sobre l'arcu de mediu puntu una osa acuruxando una neñina.
     Cunta una lleenda que tando una tarde paseando a les orielles del Narcea - daquién diz que del Nonaya - una doncella a la Infanta Cristina nun momentu de descuidu la rapacina esapaeció, esfumóse pela viesca de ribera... Buscóla como lloca pero nun dio con ella asina que pidió ayuda en palciu. Rexistraren tola rodiada durante díes, y nada.
Entós a un criáu ocurrióse-y pasar nadando a la otra oriella y ... ¡Quedó ablucàu!.... Una osa, una escomanada osa taba dándo-y de mamar a la neña. LLamó a los otros con tol xixilu y estos cruciaren'l ríu nuna chalana. Nun da ben créitu a lo que vien...
Allá como pudo'l sirviente llogró atrayer l'atención de la osa, o espantóla, vetu tu a saber cómo yera'l curnianu, mientres los collacios arramplaben col cutupiellu y embredaben camín de palaciu.
La Infanta creció, casó y cuando quedó vilba d'Ordoño'l Ciegu vino vivir a Curniana onde llevantó, meyor, enantó un monesteriu. N'alcordanza d'esti fechu milagrosu, mandó colocar sobro'l dintel de la puerta oeste, la que da al güertu, un grabáu con una osa amamantando una neña. Ye l'emblema o distintivu del conxuntu arquiteutónicu de Curniana: <La puerta la Osa>, merecío se lo tien esta ma adoptiva.

       Al aviesu...


<Duérmite, mio neña,
duérmite, ñam, ñam,
como venga l'ogru
vas pasalo mal.
Tu yes la mio h.illa
por siempres, xamás.
Duérmite, Cristina,
 duérmite, ñam,ñam >.

       Hai quien diz que la osa nun ye tal osa, que ye un lleón, y que nun ta amamantando seique vomitando la neña qu'antes tuviere comío... ¡Hala!...
Esto dícenlo los estudiosos porque al  buscar fundamentu a esta historia de <Rómulo y Remo> a l'asturiana alcuentren semeyanza, paralelismu, ente esta escultura ya otres dos qu'hai en ¡Navarra!, na catedral de Pamplona y nel Monesteriu d'Artaiz, onde se ve al ...¿Osu?.. ¡Non!, a un lleón que vien de degolver una criatura. Na tradición simbólica cristiana'l lleón vien a ser Xesucristu Salvador (el monesteriu ta dedicáu al Salvador); darréu comer a la persona y regurxitala, tres una catarsis nel vientre, sal un resucitáu nuevu, purificáu, pos a eso vino Xesús, nidio. Hai quien diz que'l lleón ye <Cristu custodiu > guardián del alma. En fin, hai delles interpretaciones, too depende de la cantidá de sidre que se tome.
      La coincidencia con Navarra pue debese a que'l Monesteriu de Curniana tevo dirixíu pola orde francesa del Cluny, talo qu'en Navarra.  Y los cures yá se sabe, con tal de comete'l tarru pa tenete nun puñu inventen cualquier cosa...
    El casu ye que na nuesa escultura nun figura un lleón, seique una osa, porque equí nun hai felinos d'esi tamañu pero sí unos osos perarraigaos a la nuesa historia (que-ylo pregunten a Favila). Amás, ¿nun va saber Cristina quien l'amamantó?... Ye lo que faltaba.

*[Si quier saber daqué más sobre'l malinu conde de Grao pues  mirar n'esti mesmu blog , Camìn de Niria, los tres post dedicaos a esti conde   <¿Quousque tandem, Conde Cuaya?>

CURNIANA:

En CURNIANA, la villa de Cornelius,
 manda la Colexata. 
        El pueblu de Curniana ye una parroquia (10,43 km2) del Conceyu de Salas (Asturies) y del Partíu Xudicial de Gráu con 17 poblamientos y que celebra la onomástica'l día San Xuan, 24 de Xunu.
       Asitiáu ente los ríos Narcea y Nonaya tien un desnivel que va de los 38 m/snm a los 478 de Santueña (Santa Eufemia) y dista 10 km de Salas y 30 d'Uviéu pela autovía A-63, un pasu. Esta villa tamién ta  comunicada por carretera con Sotu'l Barcu, Puertu Cerredo (>Lleón), San Román (Grau) y Pravia. Abenayá'l Ríu Narcea fuere navegable hasta Pravia, ye dir, hasta'l fin del mundu. Qué gozada, ¿non?.
       Debe Curniana'l so nome al romanu Cornelio, dueñu de la Villa Cornelia pero sábese que la hestoria entamó muncho antes, nel paleoliticu inferior, pos tiénense alcontrao restos d'homínidos en Suburriba  (Sobrerriba). Hai reconocíos dellos castros pela zona, como'l de Peña la Cabra, nes Nisales. Na Edá Media alcanzó sonadía por mor de la batalla Cornellana en 843, cuando Ramiro apartó del tronu a Nepocianu que se-y colare de rondón. Tamién hai nel IX una donación de la ilesia Samartín a la Catedral d'Uviéu (¿¡Cómo s'arreglaben estos tíos p'arramplar con too¡?).
Nel XI (1024) ye cuando la nuesa amiga Cristina llevanta'l Monesteriu que foi durante munchu tiempu'l centru vital de la zona hasta que la Desamortización acabó con él. (¿Realmente la desamortización foi un beneficiu?... ¿Pa quién?). 
    Un día guapu pa visitar esta villa ye'l 14 d'Agostu porque los vecinos faen una espicha - hai  qu'aportar daqué, eh - nel claustru del monesteriu. Otru momentu afayaizu ye a mediaos d'Abril (Asturpesca 14 y 15) cuando s'abre la temporá del salmón y los pescadores anden esprecetaos a la cata d'El Campanu (el primer salmón pescáu reconocíu oficialmente).

         Curniana ta incluyida na Comarca Vaqueira (Allande, Cuideiru, Salas, Tinéu y Valdés) seique non tolos conceyos de vaqueiros d'alzada tán dientro. Estos vaqueiros pertenecen a tres grupos sociales estremaos: maranuetos, na costa; xaldos nos valles interiores y vaqueiros que son tresumantes.
    
                                             CURNIANA - SALAS (2ª estaya) 

La granible vega de Curniana 
bañada pol Narcea y Nonaya.
 
La segunda estaya de la segunda etapa - yá sabéis que van ser 13 - va de Curniana a Salas, de colexata a colexata, podíemos dicir. Asina que tomamos l'Aupista A-8 en Deva y tiramos per Avilés hasta Sotu'l  Barcu onde torcemos camín de Pravia  pola AS-16 y darréu pa la Villa Cornelio.
   Aparcamos delantre la colexata de Curniana y dimos les vueltes afayaices pa remembrar la Puerta de la Osa, les torres, les entraes al conxuntu arquiteutónicu y bordiando los ábsides circulares  emprimamos pela SL-7  camín de Suburriba (Sobrerriba). Tenemos per delantre L'Altu, Llamas, Quintana, Casazorrina y Mallecín enantes d'aportar a la Villa de Salas, unos 13 km. ¡Qué ye esto pa nosotros!. Eso sí, la vuelta fadrémosla en taxi, más que ná por dar algo ganancia al pueblu...

Atayando en Suburriba.
    ¡Bon Camín, pelegrinos!
       Al pasar per delantre los tres ábsides semicirculares vimos un par d'albañiles trabayucando nel edificiu, eso quier dicir que se sigue manteniendo, menester tendrá pos da la impresión qu'esta ayalga del nuesu padremoñu precisa una igua más fondera. ¡Qu'ansí seya!.
       Enseguidina vemos la flecha mariella: A mandrecha y cuestarriba pel asfaltu de la SL-7 camín de Suburriba. Según xubimos podemos contemplar la ciudá del monesteriu decatándonos lo bien asitiada que ta nel tarmudu valle. Nun yera fatu'l tal Cornelius. D'esta miente mañpenes reparamos na empruna cuesta.
Vamos llegar ceo a Suburriba, namás pasar p'embaxo una ponte l'autovía Cornellana-Salas y dexar atrás el viaductu'l Ríu Narcea (875 m).

<Pela viesca'l castañéu
ye'l camín afayaizu,
lláráu de fueya y de mufu
tien un pisar dondu y finu
talo moqueta de luxu.>
     Al travesar Suburriba, nel Barríu Ramón, atayamos per un senderucu y tres cruciar la xeneral tornamos a la caleya otra vuelta. Pali-pali llegamos al Altu Santueña o Santa Eufemia (180 m/snm). Ye l'altura máxima d'esti tramu, agora to baxar prauticamente hasta LLamas per una sienda inxertada na falda d'un castañéu llarada de fueya y dalgún qu'otru oriciu. Nun hai perda pos ta cuayao de moyones col logu del Camín xacobéu. Esta zona ye mui llevadera y afayaiza magar haya dalgún tramu estrechucu pero la parienta, por eso de llegar a la hora la xinta a la ciudá los Valdés, sometióme a una carrera persecución que yá quixera Guillermo Timoner, Albert Torres o la mesma Sandra Alonso. ¡A degüeyu!.


                                                   <<Sílices La Cuesta (Cornellana)>>
                                 
      Allacuyá acolumbramos una cantera con pinta de tar n'activu:
   - Bueno, hai algo trabayu, menos mal. 
       Siguimos antroxando pel camín astráu de fueya semeyando una moqueta. Dacuando vemos alguna granxa, vaquería, manada o rebañu y sentimos una gayola pergrande por mor de los puestos de trabayu que suponen;Asturies sigui viva. Yá nel llanu vemos que la cantera pertenez a "Sílices La Cuesta (Cornellana)". Paramos a tomar unes semeyes y colamos per detrás de los hangares tres xubir un arrimadiellu.
 
La granible vega de LLamas.
Al fondu La Quintana, ilesia San Salvador.
        Entramos na Vega de LLamas a les  doce y diez (12:10) tres cruciar la Riega Les Castañalines", normal, tola viesca ye un casteñeín. El Ríu Nonaya, el maíz y les oveyes son los amos d'esta vega que travesamos per un ampliu camín de zahorra bien prensao. Agora va ser un caleyar sele y  ascendete hasta Salas pasandeo de los 90 m a 225 m/snm. Cerca un cilíndricu y preciosu palombar vemos un cartelu que diz: A manzorga vas pa Monteagudo.- Tú nada, defrente hasta dar una revuelta que te dexa delantre una ponte so'l Nanaya; nun la pases, sigui reuto-reuto, como un kilómetro, hasta que llegues a Quintana, un pueblín mui soleyeru asitiáu na fastera d'un cuetu onde lo más llamatible ye la ilesia'l pueblu dedicada a Santiago y el viaductu l'autovía, al fondu. Nun s'entra nel pueblu; al bordialu pa salir alcontramos una pequeña Área Recreativa con unes meses de madera al rodiu una fonte-llavaderu ; un poco más alantre otra fonte, la Foncaliente. 
Ponte de Casazorrina, yá queda poco.
         Vamos xubir un poco y entrar nuna sienda que s'apaña como pue a les vueltes del ríu Nonaya. La Trocha, ansí se conoz, tien algunos folleros pero ¿qué ye esto pa los que ficimos el Camín de Cuadonga?. Amás termina na Ponte Casazorrina tres cruciar la Riega ¿Los Verdugos? y dexar atrás unos invernaderos (más trabayu).
      Pasa de la una y cuartu (13:20) cuando cuando la ñora d'una casa-molín nos empobina dica'l pueblu de Cazorrina que tardamos un cachín en pasar pos ta perestendíu. Pero los pueblos son guapos, siempres me gusten los pueblos: Xente que s'axunta pa tener más comodidaes, hai que poner de cadún pa que les coses marchen bien. Bueno, a Salas 2,5 Km, chupao.

Pasarela de La Debesa, ensiguida'l Palaciu. 
     Un rebañu oveyes merines, guardaes por un mastín, acércanos a un puentucu que da pasu a la Pasarela la Debesa, esto namás ye l'antoxana de la cucia Casa-Palaciu de La Debesa, una virguería d'otru tiempu iguada p'anguaño. Yá queda nada pa cruciar la carretera N-634 , ¡¡Attention!! , y entrar nel Mallecín, antoxana de Salas, per aciu d'un tunel embaxo l'autovía. La parienta nun pue más y sienta nun bancu pa echar unos traguinos d'agua mientres un perru, mui cumplíu, la saluda efusivu dende l'horru.
                       
                   ¡¡Salas!!, una gran desconocida pa nós, a ver qué nos depara.

SALAS , dende La Campa:
Palaciu, Torre, Arcu y Colexata.
(D' un Cuadru na Oficina Turismu. ¿Jeny Vega? )
       Xubimos per L'Avenida del Llaniello y travesamos a l'Avenida Chamberí p'arribar a la Plaza de la Ilesia, enfrente de Correos, cara a cara col Ayuntamientu ya onde quedamos clisaos almirando la Colexata. Esto de mano. Miramos, almiramos y hasta entramos dientro dao que la puerta permanez abierta.

Colexata y Ayuntamientu: Salas.
      La Colexata de Santa María la Mayor de Salas ye un templu católicu (solo faltaría) de la primera mitá del XVI mandáu edificar pola familia Valdés-Salas, perenraigada nesta zona. Don Fernando, fíu del fundador, creó la universidá d'Uviéu y ... , yá te cuento.
Arquiteutónicamente trátase d'un nave rectangular con una torre bien llamatible y  un ábside cuadráu al que se-y fueren añediendo capielles. Dichu ábside abovedáu ta decoráu y caltién dos retablos del XVII, ún de la escuela Valladolid con escenes de la Biblia y Samartín partiendo la capa ya otru de Pedro Sánchez (non el que tu conoces) con escultures de Lluis Fdez de la Vega.

Colexata Salas : Ábside Ilesia Sta. Mª la Mayor.
       Cuido que lo más interesante d'esti edificiu ta nel mausoléu que Don Fernando encargó a Pompeio Leoni, que trabayare pa Felipe II; quería ser recordáu y, a ser posible, que los pelegrinos lu sacaren del Purgatoriu cuanto antes per aciu les sos preces. ¡Qué cuciu!.
    - Ta bien, don Fernando, yá echo una oración por ti, qu'una Universidá nun la llevanta cualquiera, pero los palos que disti como Inquisidor van tardar tiempu en depurase...
      El mausoléu ta formáu por tres cuerpos:
         Inferior:  Biografía y blasón de los Valdés.
        Mediu (únicu-y llamen): Les escultures de la Caridá y la Esperanza custodien al Arzobispu 
(que ye él, claro).
       y Superior: La Fé, la Xusticia, la Templanza, la Prudencia y la Fortaleza sobro la Herexía. 
   
El  MAUSOLÉU
< Esto pensó Don Fernando
pa congraciase con Dios

seique fuere don Pompeio
el que a la fin lo tresnó:
-Perdonáime los pecaos
magar Santa  Inquisición,
bien lo saben per Asturies
que tolo fici por Vos. 
- Que tampoco hai que pasase
Don Fernando, ¡válgame Dios!,
pero esti Mausoléu
 va salvate, alma de Dios. >

         Don Fernando Valdés-Salas 
(1483-1568), ñacíu en Salas, algamó a Arzobispu de Sevilla pasando pel cargu d'Inquisidor Xeneral y tres dexar constancia del so buen facer como obispu d'Elne, Ourense, Uviéu, Lleón y Sigüenza. Tamién exerció de Presidente del Conseyu Real de Castiella y Conseyeru del Estáu (n'estáu dexó una de la que tuvo un fíu, pero esta fueya arrincóla del llibru la Inquisición).
       - Pero home, ¿ves que cerca tas d'Erasmo? ¿Por qué-y tienes tantu anoriciu?. 
       - ¡Había que salvar la Ilesia d'herexes y luteranos!
       - Tranquilu, gallu, que sembles un fanáticu. Y qué me dices de flai Lluis de Ganada, San Xuan d'Avila o San Francisco de Borja, ¿tamién yeren luteranos?
      - Protestaben enforma...
      - ¡H.oder!, yá nun se pue nin pensar... Queríen cambios na Ilesia pero nun alcontraren en ti, precisamente, l'espeyu onde amirase. 
     - Yá lo sé, la carne ye débil, pelegrín, y los tiempos difíciles... ¿Pero nun ves nel mio currículum dengún méritu?
     - Home, sí; gracies a ti - y a to familia - tenemos Universidá n'Uviéu, Colexata y Palaciu en Salas, en Salamanca'l Colexu San Pelayo... Y esi mausoléu en propia casa pa combayar col Altísimu... Y pensar que punxisti n'apuros al mesmísimu Pompeio, el creador...
     - Naide nun podía escapar a <la vara de la xusticia>, ¿ pero ves?... ¡ Nunca nun m'escaecí d'Asturies!, 
     - Eso te salva, 2don Ramiro", y tolo que los Valdés ficísteis en Salas, que nun ye poco...
     - Pos reza un poco aquí y depués otru poco nel Palaciu y darréu ...
     - Val, coño, val; rezaré mientras tea na Villa de Salas, depués apáñateles como pueas. 
     - H.e, h.e... Tengo un rosariu seguru. Tu sáquesme del Purgatoriu, pelegrín, al tiempu...


<Ca Pachón>
< ¡Ai, manín,
 como pa dir visitar m
onumentos
cola fartura que traigo!>

         Nun ficimos que salir - yá tenía ganes, la verdá, aquello ta mui avisiego - y damos col Palaciu xuncíu a una torre per aciu d'un arcu sobro la cai empiedrada. Un poco alloriaos pol cambiu de lluz miramos alredor a ver si víemos algún barucu pa tomar daqué...
     - ¿Busquen algo? - éntruga una moza col dexe de Mieres.
     - Pos sí, un chigrín pa comer un poco.
     - Pa cuyar y tenedor en Ca Pachón, cinco platos y mui arreglao de preciu. Podéis venir conmigo que voi cerquina. 
      La rapaza quedó enantes de cruciar l'arcu:
     - Coláis p'embaxo l'arcu y dais a una una plaza. Ca Pachón ta a mandrecha, veislo dende equí. Qu'aproveche y ¡Bon Camín!.
     - Gracies, mocina, que tengas un bon día.- Xente afayaizo, est@s de Salas.
     
Plaza La Campa: Torre, Palaciu (O. Turismu) y Arcu- Ponte.
        Colamos p'embaxo l'arcu y entramos na Plaza la Campa. Ta como partía en dos estayes a altures estremaes: a mandrecha la cai, tiendes , bares y Casa Pachón; a manzorga una esplanada-xardín sobro la carretera a la que podemos acceder per aciu d'una escalerona bordiando'l mesmu Palaciu. Per un portalón de madera con arcu de mediu puntu entramos ¿a palaciu?... Pos sí, nel estragal del Palaciu ta la Oficina d'Información y Turismu onde coyemos folletos informativos de la zona seique nos faltó ún más afayaizu; nun taba l'empleáu pos yera la hora la xinta. Y nós tamién aprovechamos y entramos en Ca Pachón, un chigre-restaurante a la antigua con muncha caida; tres camareros ya una cocinera vense apuraos p'atender la clientela, habitual la mayor parte. Punxímonos como quicos: garbanzos, arroz con pitu, filete con patates, arroz con llechi... La xarra vinu quedó temblando. <Yo, vuelvo>.

Palaciu-Capiella de la Cai-Torre-Arcu: ¡SALAS!
  El Palaciu Valdés Salas ye un edificiu del XVI en forma de "U" amestáu a una Torre del XV per aciu d'una ponte con arcu de mediu puntu qu'amuesa los blasones familiares y que tien al este la capiella familiar (Nuesa Señora de la Cai)- Llevantáu con una meceúra de mampostería y cantería sigui los cànones de los sobrios edificios civiles de la dómina: dos torres qu'abelluguen un núcleu central más baxu. N'esta planta baxa, onde s'entra per aciu d'un portón de mediu puntu, t'asitiada la Oficina d'Información y Turismu y tien accesu a la Torre-Muséu Prerrománicu.
     Presenta l'edificiu dos plantes al rodiu d'un floríu patiu interior, porticáu, en forma de trapeciu rectangular y que ta percorríu por una barandiella torniada con sofitos en columnes de madera. ¡Una pasada, manín! .
     Entá nun te lo camenté pero'l Palaciu ye anguaño un Hotel-Restaurante de luxu con doce habitaciones, magar los precios son bien algamadizos. Tien  numberosos servicios: Bar, piscina, terraza, biblioteca, sala de lletura, salones sociales y sala de masaxes. Tamién hai un salón p'acontecimientos sociales: bodes, bautizos, comides d'empresa...

Patiu de Palaciu
- ¡¿Qué, sentamos tomar el vermú?!
      La distribución del palaciu tien llugar per aciu d'un estragal asitiáu na parte central del palaciu.
      La fachada principal en mamposteria, al norte, ta dispuesta en diagonal ya escoltada por dos sobresalientes torres - techaes a cuatro agüaes ya una cornisa de teya voladizo - y la Capiella de <Nuesa Señora de la Cai>, anguaño "Sala d'Esposiciones". Esta capiella rectangular, con bóveda de cañón na cabecera, tien dos pisos con unos vanos nel superior d'onde los señores podíen siguir la lliturxa en mou clandestín, claro qu'ellos podíen golifalo too.

      - ¿Habrá daqué nesa torre?
      - Según veo nesti folletu que prindé anantes en Turismu resulta que na Torre hai un muséu. 
      - ¿Con qué xida?
      - Mu-sé-u... Pre-rro-má-nicu.... Sa-mar-tín. Ye dicir, qu'abelluga pieces de l'antigua ilesia prerrománica de Samartín asitiada na redolada la Villa. 
     - Habrá que visitalu, pero agora ta zarráu asina que vamos dexalo pal próximu día que faigamos la estaya :Salas-La Espina. 
     - Ígualo.

Escudu Universidá d'Uviéu:
Armes de los Valdés-Salas
  L'escudu de la Universidá d'Uviéu ta representáu poles armes de los Valdés-Salas n'honor al so fundador, Don Fernando de Valdés y Salas, que fuere Obispu d'Uviéu, arzobispu de Sevilla ya Inquisidor Xeneral ente otros cargos d'altor.
El blasón : 
         Capelu cardenaliciu en sinople con 2x10 borles (10 en cada lladral) dispuestes en cinco órdenes (1.2.3.4) y báculu arzobispal (2 crucetes) d'oru qu'abelluga
        En campu elípticu de plata tres franxes n'azur con diez roeles de gules cargaos con cruceta d'oru y distribuyíos 3:2.2:3 ( xefe - mandrecha - manzorga - punta) que van alternaos coles faxes y componiendo una orla simétrica. 

*Nota: El capelu cardenaliciu ye sinople pa obispos y arzobispos y de gules pa cardenales. La cruz del báculu lleva una cruceta pa obispos y dos nos arzobispos, asemeyando a la Cruz de Caravaca.

                            ....................................

      La Torre de los Valdés , del sieglu XV ( el Palciu ye del XVII) tien forma cuadrada  y ta llevantada en cantería llabrada  dende'l baxu o cuartón hasta les almenes del tercer pisu que rematen nunos llamatibles cubos nes esquines. Namás tien tres ventanos y el restu de güecos son saeteres defensives abocinaes. Un matacán na segunda planta protexe la entrada asitiada na primer planta a la que s'entraba per aciu d'una ponte llevadiza sobro un foxu. Perguapo. Anguaño agospia'l

< Hoc signo tuetur pius
Hoc signo vincitur inimicus>
  Muséu prerrománicu de Samartín, que tien pieces prerromániques procedentes de la Ilesia prerrománica de Samartín, asitiada na redolada la villa: 7 inscripciones y 5 ventanes arrincaes de mala manera de la fachada la ilesia.
     Una de les inscripciones ye una llábana cuadrada ornada con diferentes motivos ente los que destaquen la cruz col Alfa y Omega y la lleenda de la monarquía asturiana:
         <Esta señal protexe al piadosu y con ella vencerás al enemigu>.
     Otra fai referencia a la proteición y salvación d'esta Casa ( los romanos tamién lo usaben), otra trai una lista de les reliquies del monesteriu, otra cuenta la reconstrucción d'un templu y lluéu hay dos oraciones (munchu rezaben) que cuesta interpretar.   De les cinco ventanes cuatro son trífores y traen inscripciones; la otra nun se paez en nada y cuiden que fuere del templu primixeniu.

Ilesia prerrománica de Samartín (Salas)
(Semeya ASTURNATURA)
    La Ilesia de Samartín ta asitiada como a un kilómetru de Salas. Data del VIII / IX , reconstruyida nel X, refecha nel XV, reformada nel XVII y XVIII cuando se colocó la espadaña y anguaño ta declarada como BINHA. Munchos avantares pasó esta santa, a la qu'un arreglucu nun-y venía nada mal.
      L'edificiu consta d'una nave rectangualar con cubierta de madera techada a dos agües. Tien el presbiteriu cuadráu con bóveda de crucería ya un retablu rococó cola imax de Samartín repartiendo la capa con un probe.
     La fachada ye de mampostería y nella puen apreciase delles pieces mui nueves, répliques de los orixinales que tán nel Muséu Prerrománicu de Samartín que crearen na Torre de la Villa (Torre Valdés). Si Alfonsus Confessus llevantare la cabeza nun sé que diría....

ESTIMANCES:

Colexata Sta. María de Salas
     . A Isabel San Sebastián pola so obra sobre Asturies y sobre manera por <La peregrina>, llibru-guía del nuesu <¡Bon Camín!>, que nos dio l'emburrión definitivu asina como a Carme Morán, <La madreña caleyera>, que nos fizo naguar coles semeyes del Camín y nos tresmitió'l so cuayu. 
  . A J. Javier Esparza pola bayura de llibros qu'escribiere al rodíu'l reinu d'Asturies, veneros de mio.
     .Wikipedia, que nos apurre información de cotino, asina como Asturnatura, onde chisbamos al rodiu la caparina, la Llimonina, o Ilesia Samartín...
. https://www.senditur.com/es/poblacion/doriga/ y d'otros dellos blogs onde chisbamos.
. <lne: La Infanta Cristina, la osa y los barcos en Cornellana. Por J.R.M>.
     . Sobre'l Conde Cuaya, de Grao, tenéis esti llibru:
<Coalla el sanguinario>, de Fernando Romero; habéis lleelu.
   . A R. Cortina Mieres pol so <blog de Acebedo> que tantes veces consulto, como güei, al rodiu los barcos de Curniana.
. A tolos autores qu'escribieren histories al rodiu'l reinu d'Asturies, como Fulgencio Argüelles.