< De co casa a Cuadonga [2]: Pión - Altu la Cruz >

           << Camín de Cuadonga [2]: Pión - Altu La Cruz > >
   

Camín del Altu la Cruz cola corona d'espines: El Calvariu.
< Seique paeza un calvariu
ye pa nós un privilexu,
una ayalga, ser romeru
 del Camín de Cuadonga, 
  de los caminos primeru. >

          L'ultimu día arribamos a Pión tres salir de Santurio degolando pel Altu del Curbiellu. Una guapa caminata d'unos 8 kilómetros. En Casa Pepito tomamos daqué aprovechando pa preguntar a un cliente onde quedaba'l Palaciu del Conde.
    - Tenéis que coyer la carretera d'Arroes , la VV-7; la Casona Palaciu de los Cienfuegos-Xovellanos ta pegada a ella, a mandrecha.
    - Gracies, señor, mui amable. Vamos averanos pa sacar unes semeyes...
    -  ¿Unes qué...?
    - Unes fotuques.
    - Sí, sí; yá sé lo que son une semeyes. ¿Pero vosotros sabéis <Lo que-y aconteció al Mociquín de Pión, aspirante a paparazzi >?. Bueno, pos facéi la visita y llueu tornáis per equí.
    - ¿Nun podía echanos un trayler ?
   - Bueno... Si vos val p'algo...

Palaciu'l Conde Cienfuegos-Xovellanos (Buznego-Pión),
Embaxo la A-8 que pasa por terrenos que'l Conde facilitó.
Equí ñaciere'l pá de Don Gaspar M. de Xovellanos. 

    - [ Ello yera una vegada un mociquín de Pión, conocíu como Xuanín, que por andar de cotilla terminó encantexáu de por vida. Convirtió nuna especie de trasgu candial y revolvín que de cuando en vez daba algún sustu a la xente; más por aprucir ensin cuntar con elli que poles trastaes que ficiere. Los pas del pueblu evocábenlu cuando los guah.es nun yeren pa dormir; santu remediu, esmucíen entre les sábanes y terminaben por quedar como troncos.
      Ello asocedió un día, enantes d'atapecer, cuando Xuanín quixo  averase al Palaciu col envís de sacar unos bocetos de la Torre por mor d'un trabayu la escuela. 
     Tiró pel camín d'Arroes y llegó nun visveo a l'antoxa'l palaciu. Mirólu per delantre y pelos llaos, tomó dellos apuntes y averóse tolo que pudo pos andaba arranáu por ver un castiellu per dientro, yá que nunca nun viere dengún, como ye de suponer. Les histories medievales que'l mayestru-yos cuntare na escuela tamién puxaben lo suyo.
    Como nun tenía bastante tomo'l determín de dir velu per detrás, igual pescanciaba algún misteriu... Dao qu' al rodiu'l palaciu había dellos praos separaos por alambrera, afitao en bárganos, decidió saltar penriba la portiella ya enfusase praos adientro....

Llucerín déxase querer, ye feliz en Palaciu.

   Paciendo mansiamente nel prau contiguu al zarru la finca palaciega alcontraben delles vaques, oveyes ya un caballu per guapu col que quixo entamar amistá.
    - Esti llucerín na frente ye signu de bona suerte; güei ye'l mio día.
          Nesto, una de les vaques, un dolme viviente, el mesmísimu minotauru, que taba amamantando un xatín tuerce la cabeza p'hacia elli coles oreyes tieses ...

 Xuan mira pa ella ... La de Guisando sigue arremellada n'elli... De sópitu'l triceratops, ensin perde-y la mirada,  empieza a rascar el suelu coles pates delanteres, alternativamente, al tiempu qu'echa les oreyes p'hacia atrás ... Xuanín queda varáu.  Decátase del xatu y ponse no peor...

Dende lluéu la "vitorino", güei, tien los cables cruzaos

         Aquello nun yera una vaca corriente... El bóvidu avanza unos pasos hacia elli... Nun esperaba esto d'una vaca por más grande que fuere... Xuanín recula... La vaca entama correr como un miura tres la capa... El de Primaria da les fusties talo alma que lleva'l diañu... Nesi momentu alcuérdase de la Santina; na ilesia de Pión hai una imax de la virxe recordándola...
    - ¡ Santina de Pión! ¡Santina de Cuadonga! Si me saques d'esti entueyu  prometo que nun voi esgolifar más nesta vida...
          ¡Zacatapás - plin -plon!. Y Xuanín quedó tendíu a la otra parte la barganal, como muertu...
    - Lo mas que pueo facer por tí ye convertite nun trasgu bonu, porque esto nun tien igua- terció la Santina.
   

La Santina Cuandonga , los caberos pensamientos
del Mociquín de Pión.

       El guah.e nun recobraba les constantes vitales ... Magar que'l cuerpu taba caliente.... Dexáronlu na pedrona a ver si recuperaba pero'l neñu dormía'l sueñu de Morfeo ... Un día... Otru día... Pero al terceru  nun taba, esapaeciere dafechu ... Y más nunca se supo... Naide nun lu viere... Sacante ... Cuando los neños nun yeren pa dormir dicién-yos los pas:
    - Si nun duermes llamo al Mociquín...
Nun había meyor melecina, el guah.e arrebuyaba ente les sábanes y ceo quedaba talo un esbardu n'iviernu .....
      Al otru día toos dicíen tenelu visto y daben cuenta dafechu de cómo yera...  ].

                                                       **********************************

                   ¡Venga, vamos pal Altu La Cruz! 

      Llevantamos ceo, sabíemos que nos esperaba una caminada pindia. Xubir al Altu La Cruz pue facese abegoso y enantes teníemos que visitar el Palaciu'l Conde, un finxu d'esta ruta.
      Aparcamos... Bueno, el coche dexónos nel aparcamientu de Casa Pepito, como siempre. Entrugamos a unos señores....

El turruxón Medieval de Pión.
Nesta torre suañaba Dona Victoria, gran escitora. 
¿Tien los oríxenes nun santuariu celta?

    - ¿ Por favor, pue dicinos ánde ta'l Palaciu'l Conde?
    - Na zona de Buznego, como a un kilómetro d'equí. Tenéis qu'agarrar esa carretera, la d'Arroes.
    - Gracies. Ta llueu.

       Entá col pensamientu nel Mociquín averamos ceo a palaciu. Unos pinos peraltos que paecen sombrilles dan abellugu al conxuntu.  Lo que más nos llama l'atención ye la torre circular, que-y da glamour al garapiellu palacial: casona-palaciu, ermita, horru y casa pa los caseros.
    - La Torre ta esenta, disimía de la casona. ¿Son del mesmu tiempu?
    - Según tengo lleío, non. Lo primero foi la torre circular; debió sirvir de vixía pa la zona. Debe ser del s. X ó XI...
    - Ponémonos n'Alfonso III, el Magnu.
    - Nun t'estrañe nada. El Magnu esdificó monesteriu y conxuntu palacial en Valdediós y debió llevantar delles torres pela redolada, por seguridá.
    - Paezme un poco baxa pa chisbar.
    - Enantes yera más alta, tenía dellos pisos.
    - Talo que la de Banduxu, asemeyen enforma, hasta na mampostería.
   - Sí, tamién equí se camudaren los vanos pa facelu más práuticu y habitable.
   - ¿ Y la casona ?
   - Sábese que nel XVII vivieren equí los Estrada y depués los LLabandera, como amuesen los escudos de la torre y palaciu.

Adxunta al Palaciu

    - ¿Y qué tien que ver este palaciu con Xovellanos?
    - Más tarde vinieren los Cienfuegos-Xovellanos, antepasaos de don Gaspar. L'ilustráu pasaba equí munches temporaes pel branu; prestába-y pasiar pel entornu. Venía del palaciu Cimavilla pel Camín Real de Pión, talo que nós.
    - Bueno, menos chismorréu que voi sacar unes semeyes.
    - Nun tardes, que queda muncho por andar.
   - Y nun te metas onde nun debes...
   - Eso quedóme claro
         Yo tamién m'emocioné y retraté y retraté...
    - Mira, la VACA vien a por ti...
       Y tamién salté ... Y tamién corrí...Y pasóme como al Mociquín pero llibré por poco... Nunca mais.
    - Gracies, doña Parda, agora yá podemos entamar cola ruta.... Bueno, por qué mientres vamos caminando nun nos cuentes daqué al rodiu'l Condáu de Pión?
    - Tampoco creas que sé muncho. Algo qu'alcontré per interné.... Lo primero...
    - ¿Ye mui antigüu'l Condáu?
    - Non  muncho, va pol tercer conde, creyo. El primeru foi don José Mª Cienfuegos-Xovellanos y Bernaldo de Quirós, casáu con Doña Victoria García Baxter, de raigaños irlandeses. Don José María yera'l Direutor de les Caballerices Reales con Alfonso XIII col que lu xuncíu, amás de la rellación profesional, una amistá pergrande; arriendes dello concedió-y el títulu de Conde de Cienfuegos, pero como venía pasar temporaes a Buznego los románticos vecinos encumárenlu a Conde de Pión. 
    - ¿Y quién fo'l segundu?
    -El so fíu Don Alfonso Cienfuegos y García-Baxter, que viniere al mundu nes propies caballerices reales na cai Bailén, en 1922.

     - Coño, eso sí que ye ser profesional... ¿ Á tu, nun t'escaecisti del apellidu Xovellanos?
    - Al que se-y olvidare foi al padre, que lu  rexistró ensin elli. Con tantos nomes ...
    -  ¿Y cómo se llevaben los condes col pueblu?
    - Divino de la muerte. Había una gran consonancia ente los condes y la vecindá de Pión. De fechu esti palaciu tocare-y n'herencia  a la hermana'l  primer conde pero Doña Victoria empeñóse en mercalu polo a gustu que s'alcontraba equí. Don Alfonso, que morrió en 2013, yera perapreciáu en pueblu; ayudaba en tolo que podía. Por exemplu, l'autovía A-8 pasa per tierres del Conde. Foi despedíu con un sentìu homenax popular el día que finó.
               
                                                   ************************************
   

Entamu o final: Tolos caminos conducen a Casa Pepito

       Tornamos al Llantáu, onde Casa Pepito, y tiramos pal Barriu de Casamoria, camín de la Escuela, onde tamién s'alluga la Ilesia. Vamos xubiendo a modo polo que yera'l Camín Real de Pión dica la parte más antigua la parroquia magar que yá se mecen les caseríes d'antaño colos xalés d'anguaño. Una de les quintanes ta reconvertida en Casona Rural
 < Peregrinos>.

     El Camín de Cuadonga coincide a vegaes col C. Xacobéu, como nesti tramu, pero otres veces van cuasi paralelos. P'averase a la Ilesia de Santiago y/o a la Escuela hai qu'agarrar un desvíu a mandrecha que nos lleva a una llanera onde tán asitiaes. Son munches les ilesies que se tienen llevantao al rodiu'l Camín Xacobéu y lleven l'advocación de Santiago.

Escuela de Peón: CRA de la Marina.
(Señor Alcalde, hai qu'iguar esti folleru)

       [ La ilesia de Santiago de Pión, por mor de la so torre cuadrangular, acolúmbrase  dende cualquier parte. La primer mención a ella data del tiempu d'Ordoño II (910-914-924) que la dona a la Catedral d'Uviéu, asina que pue tener oríxenes prerrománicos seique ta mui, pero que mui remocicada.  En 1216 Alfonso XI da-y el celleru de Pión al Monesteriu de Valdediós (bueno,torna pa casa). 
       Trata d' una ilesia rural, grande, de planta rectangular con tres naves - a distintes altures - rematando la central nuna llamativa torre cuadrada. Embaxo d'ella alcuentra'l cabildu que da pasu a dos portaes romániques que, xunto a los canecinos, pudieren pertenecer a otra ilesia más antigua del mesmu barriu (El MADOZ diz que na Rectoral había una capiya dedicada a San Xuan ). ]

L' Antoxana, nel Barriu Casamoria.

         [La Escuela entá sigui n'activo, ¡ qué preste! y cuenta con Pista Polideportiva dende 2012 asina como Aula d'Artesanía que n'iviernu fai les veces de Ximnasiu.  La mayoría de les escueles rurales van desapaeciendo al llevar los escolinos a concentraciones. Esta pertenez al CRA de la Marina (Centru Rural Agrupáu) qu'engloba les escueles de: Pión, Pión-Bárcena, Argüeru, Oles, Quintes, Castiellu y Tazones. ]


     Retornamos al camín braeru y en seguida algamamos a un biforcu onde nos entren les duldes:
Na muria vemos una flecha azul  ya otra mariella qu'indiquen a manzorga, cuestarriba. Tamién hai una azul, en suelu, que manda de frente.
   - Fíxate bien... Esta de manzorga ta tachada.
   - Oi, pero va tiempu yá subiemos per ella, y tamién da al Altu La Cruz.
   - Sí, pero esto debe ser una correición reciente... Vamos tirar de frente, que ye lo que nos manden.
   - A la orde, frai Romeru.
         Mientres cruciábemos el Barriu Casamoria (Casomera, diz el Madoz) echamos la vista a la derecha y acolumbramos l'aldea Candanal, bañada pol Ríu España y abellugada polos altos del Fariu (cola Peña los Cuatro Xueces) y la Llomba de Rioseco.

¡Siguíime, soi'l Contador del Camín Real de Pión!

      Terminamos pasando toles cases del barriu  y tenemos qu'entamar a xubir en condiciones per un camín de zahorra bien anchu pero con xial asgaya.Tenemos l'Autovía a la vista colos güeyos de los túneles de Niévares, puntu siguiente de la ruta tres algamar al Altu La Cruz. Nuna entena'l camín, a manzorga, hai una llarga caseta prefabricada con delles chimenees, ¿sedrán respiraderos de los túneles?. Unes marques afayaices dícennos que vamos bien, d'otramiente tendríemosa duldes. Baxamos unos metros - los caberos pa güei - y echamos a andar hacia arriba per un antiguu y ampliu camín de piedra y zahorra nel que, de xemes en cuando, amuesen delles llábanes; dos carros tienen pasu al empar. Esto nun fai otro qu'afitar que tamos nel Camín Real que saliendo de Xixón llegaba a Villaviciosa pasando per Pión. Les zones peligroses por mor de los escobios tan protexíes por muries de piedra que dan enfotu al viaxeru.

El Camín Empiedráu de la ocalitera tamién tien les sos espines...

  Vamos ganando la fastera sapozaos no que fuere una viesca autóctona pero anguaño nun vemos otro qu'altos ocalitos que nos torguen esfrutar de les vistes del valle. Nel sotobosque predomina la cotoya sobro artos y felechos amarronaos. Los que van ganando la batalla son los plumeros de la Pampa arxentina; alguna buzleya tamién va tomando sitiu, ¡l'invasor ataca!.
     - ¡Vaya, con esto nun cuntávemos!
     - Dende lluéu, estos tremendos socavones nun faen xusticia a esti camín.
    -  Ye por culpa les carrocetes los madereros que vienen pol ocalito.

L'árguma, toxu o cotoya (Ulex europeus) foi l'entamu y el preste del camín.

         [[ Si hai una planta que nos llama l'atención en tola xubida esta foi l'árguma o cotoya (Ulex europeaus) , tamién conocida como toxu. Les variedaes U. Cantábricus, Galli o Minor son sinónimos con pequeñes diferencies, qu'entá se nos escapen.  
Anque alguién la considera una planta cafiante ya invasora tenemos que retrucar na so defensa que n'Asturies ta naturalizada y ye perguapa magar les sos incuntables espines. Por embargu cuando abonda en gran cantidá - dase  dende 0 a 1300 m/snm - ye un espectáculu por mor de sos sos pétalos mariellos (proceden d'una inflorescencia papillonacea). Les mariposes y sobromanersa les abeyes son de la mesma opinión, el so néctar ye un manxar irresistible. 
El tallu ye ríxidu , magar que paeza poca cosa, y pue alcanzar los 2 m. Les espines son reutes y fuertes pudiendo midir 4 cm y calteniendo al empar otres más curties. El so frutu ye una legume agüevá, ancha y peluda que caltien ente 2 y 8 granes, polo que s'esparce de baratu pela redolada.
Puen emplegase como combustible o como setu, pa zarrar praos, pos aguanta perbién la contaminación y la salinidá ya esporpolla fácile en terrenos probes. Les flores -Avientu a Xunetu - son diurétiques y valen pa curar el reuma, el fégadu o la visícula biliar.  ]]

Muria torna-mieu nel Camín Real. Vamos bien.

       Hora y media depués de salir del Llantáu (12:03) llegamos a una curvona que paez traer un cambiu d'habitat.  Los ocalitos esapaecen prauticamente dafechu y son sustituyíos pol pinu americanu (insigne) seique l'arrecendor del australianu (ocalitu) entá se caltuvo un ratu. Pelos claros que nos dexen los pinos podemos facer una panorámica del monte: la parte baxa  ocalital, la superior el pinal.
En venti minutos terminamos el Camín y calamos a la carretera xeneral VV-8.  Echamos mano del google maps y diznos qu'a Peón tenemos 4,3 Km ( per carretera) y al Altu la Cruz 700 metros. A les (12:35) llegamos a la cume y como un ye plan de baxar a Niévares, (5+5) son bastante pa un día, damos por finada esta estaya.
         Otru día, cuando salga'l sol, pensamos visitar los túmulos del pinal, asitiaos nel Área Recreativa que tenemos bien cerquina. Hai meses y barbacoes asina que cuando Helios - el fíu d'Hiperión ya Tea y hermanu de Selene y Eos - tenga a bien amosar titánicu nel cielu fadrémos-y una visita. ¡Prometío!, too forma parte d'esti camín aniciáticu.

Frayaos pero FELICES delantre'l Túmulu.
<Notariu de los díes bronce y fierro 
da fe qu'entá s'alcuentra vida no yá muerto >
(A partir d'un poema Xabel Almuzara, al final)

     Bien cerca d'equí, nel Área Recreativa del cordal de Pión, acorropinada de pinos, dexamos la célebre Necrópolis tumular (otra más) de la Llaguna de Niévares. Nos rimeros del Picu Curiella, el más altu del Monte Cañéu, ta esti cementeriu megalíticu con más de 5.000 años d'antigüedá, como nos cuenta'l profesor-arqueólogu Blas Cortina, el mesmu qu'estudió los de Picu Berrubia, d'onde sacamos el logu del nuesu blog. Don J.M. Glez y Fdez. Vallés alcontró hasta siete, pero son munchos más los qu'había y quedaren desaniciaos cuando se llevó a cabu la repoblación forestal del monte colos pinos, una pena que d'aquella nun tuviéremos la sensibilidá arqueo-histórica de la que presumimos anguaño.

                                              *************************

Pel Pinal, camín del Altu La Cruz

            [[El pinu Insigne (Pinus radiata) o Pinu de Monterrei o Pinu de California ye la variedá dominante nel Cordal de Pión. Estímase que pal añu 2018 tendrá un aprovechamientu de 2.080 M3 nel Conceyu de Villaviciosa. ¿Pero sedrá esta uniforme reforestación lo más apropiao pa estes tierres?.
      Esta conífera monóica (flores masculines y  femenines nel mesmu pie pero en flores estremaes) de porte piramidal y escasu sistema raigañal pue alcanzar ente 30 y 40 m. d'altor que consigue en pocu tiempu, pero escosando'l suelu.  El so troncu reutu, de corteya pardo-acoloratao, enseguida s'agrieta y arruga. La groma ye trupo y les rames verticilaes talo brazos de candeleru. Les yemes son agüevaes y agudes ya poco resinoses, como tou l'árbol, poro s'emplega pa facer pasta de papel.  Les acícules, d'ente 7 y 15 cm, vienen envainaes de tres en tres y son de color verde vivo y caltiénense na planta 3 ó 4 años.

 Les abondantes  flores masculines vienen apertaes y son de color pardo-mariello y visos vinosos, mientres los conos floríferos femeninos tiren a viola. Les piñes (7-14 x 5-8) apaecen en verticilos (piños) de 3 a 5 o apareyaes, asentaes y mui asimétriques con un abultamientu nes escames. El piñón , de 3-5 mm, ye anegrazáu y va inxertu nun ala hasta 4 veces mayor que la grana (semilla). Florez ente Marzu y Abril pero la piña nun abre hasta'l segundu añu y a vegaes.... nin se sabe, cuando-y pete al piñón; hailos necios en tolos sitios.
         Los de Monterrei vieron a Dios al repoblar los terrenos qu'enantes dominaben carbayos, sufreres o borrachinales pos precisen suelos frescos, drenaos , silíceos y poco mestos (compautos).]]

                                            ******************************

Baxando pel collaciu Camín Xacobéu.

       La vuelta a Pión facémosla pela carretera, pel asfaltu; yá tuvo bien de folleros pa un día. Pero.... como <la cabra tira al monte>, depués d'un bon ratu vemos nel suelu una flecha mariella que nos brinda embiescanos per una caleya.
     - Mira, la señal del Camín Xacobéu, ¿qué facemos?
     - Pos tirar per él; l'asfaltu mátame los pies. Amás, igual ye más curtiu.
      Otra vuelta a la caleya: barro, fueya y piedra suelto, pero afayaizo. Con bones vistes del valle algamamos al barriu Casamoria. Al poco tiempu llegamos al bar, onde tamos aparcaos. Y ye que tolos caminos conducen a Casa Pepito, hasta'l Camín Real.

      
                                         **************************

Cabuerniu, notariu d'otru tiempu.

                              EL   ESCRIBA  SENTADO  
Reposa en cristalino mausoleo
expuesto mansamente al homenaje
del que apenas vislumbra su viaje
por el Nilo del tiempo hasta un museo.
    La mano prevenida, el cuerpo inerte
esgrimiendo las armas del oficio,
ajeno a todo excepto su servicio
escriba ahora al dictado de la muerte.
    ¿Quién fue? ¿Quién es? ¿Qué escucha al otro lado?
¿Hombre o Dios? ¿La minucia o el portento?
¿De qué deja constancia en el atento
papiro entre sus piernas desplegado?
    Notario de los días del desierto
da fe que aún hai vida en lo que ha muerto.
                           Javier Almuzara

Hai qu'atechase en Pión.

AGASAYOS
. A la wikipedia.- Al <MADOZ>. - <Crónicas de los Reinos de Asturias y León>.
. Blog <Plantassilvestresdeasturias.>
. <Guía de los árboles d'Asturies>, de B. Ordiales y G.C. Ruíz.
. Poemariu <Constantes Vitales> , de Xabel Almuzara.
. <Diccionariu Temáticu Asturianu>, de Ramón d'Andrés (fíu de Manfred de la Llera), onde me presta bucear de cotino.
   < Diccionariu Academia Llingua Asturiana (DALLA) ya  ESLEMA (traductor).
   < Diccionariu Sinónimos> de Luis A. Prieto G.
. <La Nueva España>, artículo del (1-9-2013), al rodiu'l Conde de Pión. 
. A <El Camín Xixón-Cuadonga> de X. Morán y la <Asociación Cultural "El Garrapiellu">, los nuesos guíes nesti viax aniciáticu.

< De co casa a Cuadonga [0]: La xida >

                                        De casa a Cuadonga, ¿por qué?  

                                             << Quiero dir a Cuadonga
                                       quiero averame hasta'l cielu
                                       quiero ver a la Santina
                                       onde prende, madre, el sueñu >>

                                                            << CUADONGA >>

¿Porqué dir a Cuadonga?

Porque ellí ta l’escomienzu.

   Munches son les amarraces

que colos moros tuviemos

pero la de Cuadonga (722)

foi la que biltó dafechu.

   Siendo Anbasa ben Suhaym

l’Emir n’aquelli momentu

decidió que yera hora

de poner Pelayo arrechu.

Nun paraba l’asturianu

de monta-yos enguedeyos:

acesmar, embiescar… Lo meyor,

nun pagaba los impuestos.

   - Munuza, gobernador,

¡Pónme esos asnos tiesos! .

Toi d’astures y de godos

hasta los mesmísimos ….

Ruta Xixón - Cuadonga Ruta escape güestes d'Alkama

<<Enterase l'agarenu
que yo diba a Cuadonga
y colar camín del Puertu
nun-y llevó ni media hora.
Cuando tres delles xornaes
arribé a la Cuevona
dejá los Munuza-bois
taben tendíos na lona.
 Lo que quedaba del peciu
  la espuela tomó en Cosgaya.
Qué contentu ta don Pedru
al ver  llibre so Cantabria>>.

    Vieno Munuza pal norte,

consigo al l’Alkama trexo,

y entró nuna ratonera

tres de Pelayo, ciegu.

   - Vais conocer les Asturies

de primer mano, agarenos.

Vais conocer Cuadonga

la nuesa Meca, mio neños,

col agua de la fontica

vais sentivos como nuevos…

     Nun taba solu, Pelayo,

los cántabros vienen con ellos

pos Ermesinda y Alfonso

yá tán esperando un neñu;

yá va d’un tiempu a esta parte

que fai comuña con Pedru

aquel duque de Cantabria

que vien de ser so consuegru.

Aquel día en Cuadonga

atronicaron los cuernos

y les voces de ultratumba

d’aquel clangoriu de muertos.

   - Col agua de la fontica

vais a quedar como nuevos,

repetíen los astures

llarando entanto'l cagüercu. 

                                                             <Xenerosa, Deva, .....

     Los que con vida quedaren

colaren camín del puertu

que la vuelta peles Cangues

 torgada taba dafechu;

bien sabía don Pelayo

onde pone-yos el cepu

pos nos Montes de Cosgaya

esperábalos Don Pedru

que cola ayuda divina

esanició al sarracenu.

    Quiero dir a Cuadonga,

quiero allugame nel cielu,

quiero tar cola Santina

onde prende, madre, el sueñu.

La SANTINA, y punto. 

         Tres d’un célebre Conseyu Pelayo yá fuere elexíu en 718 como cabezaleru (primus inter pares) de la Resistencia cristiana polos astures y godos asitiaos nestes tierres, tres los Montes Cantábricos. Dende entós nun facía otro qu’acesmar al enemigu con pequeñes escaramuces* pillándolos davezu por sospresa.

[* Escara-muza= Igual esta pallabra la inventamos los astures: ¡Cómo-y quedare la cara a Munuza!]

         Nel añu 722, siendo l’Emir d’Alandalus Anbasa ben Suhaym al Kalbí ordenó al xeneral Munuza , por aquel entós Gobernador de la zona norte, dar una lleición a los “asnos del norte” que nun paraben d’incordiar “un día sí ya utru tamién” y, por si fuere poco, refugaren pagar los impuestos.

        Cuentes les Cóniques , quiciabes recoyío na lleenda, que Munuza – el xeneral qu’acompañare a Tariq nes primeres batalles de la Invasión y depués a Muza nel avance hacia’l norte – yá les tuviere tieses con Pelayo por mor de los amores cola hermana de so, Ermesinda (Adosinda). Aprovechando l’ausencia de Pelayo, que taba d’intercambiu boloñés per Alandalus  con otros astures cabezaleros, Munuza tiró-y los texos a la hermana y, al paicer, con munchu éxitu. 

<<Per Fomento'l gran Munuza
a Ermesinda cortexaba,
a la segunda botella
yá la tenía embobada.
Don Pelayo, na tribuna,
tuerci pa un llau la cara:
- Qué tas faciendo, Ermesinda;
esta nun ye la mio hermana.
- Pero qué dices, Pelayo,
voi ser la reina Las Cangas.
- Ai, Señor,
 O la arregla la Santina
o bye, bye a la mio Hispania.>>

     De xuru que guapa yera

(asturiana, de primera),

roxa, de face cande,

- ¿gotes de goda ascendencia?-

dexó a Munuza clisáu

del instante en que la viera.

Pero’l petite más grande

taba en quedar cola herencia **

Si Pelayo yera’l gallu

de tol norte, la Cornisa,

elli, cuñáu heride

de la Hispania revolvina.

   - Un casoriu tan propiciu

¿nun valdrá bien una misa?

Ría Munuza en Fomento:

¡qué guapa tas, mio chatina!

    Mientres Pelayo estudiaba

árabe n’Isbiliya

Munuza llevaba al güertu

a la fata d’Ermesinda.

**[Ente los astures -celtes- la herencia tresmitía vía matriarcal. De faltar Pelayo igual Munuza ...]

         Si los asturianos dábemos guerra a los moros estos tampoco s'echaben  p'atrás, poro Pelayo (1) hebo d’abellugar na llana les Cangues d’ Onna (C. d’Onís),  pero cerca les montañes que tan bien conocía, pa poder escatamucir en casu de visita poco afayaiza.

          Cuando Munuza – residente a vegaes en Xixón (2) – ordena al capitán Alkama someter a Pelayo d’una vez, esti, tómalo a pechu y va ciegu por él. Nun repara nos peligros y Pelayo, xunto col so xenru Alfonso Pérez – dux de Cantabria - , prepara-y una encerrona nes faldes del monte Auseva, nuna angostura que termina na <Cova d’onna = Cueva de la fonte, del ríu >, una cueva con un valor simbólicu pergrande pos yera venerada dende antiguo polos celtes. Nesta dómina cristiana la cueva taba presidida por una imax de la Virxe María. El cristianismu sigui calteniendo los centros espirituales de los druides celtes.

      [ Convién fer alcordanza que Favila foi sapozáu na ilesia de la Santa Cruz qu’elli mesmu mandare llevantar sobro un dolme celta; sigui la tradición].

<< Baxo'l Monte de l'Auseva
tres cruces veo clavaes
por una Patria perdida
en traidoro debate.
La Deva tuvo que ser
la qu'entamó col rescate
per aciu la Nueva Virxe
qu'agabitó nel embate.
Baxo'l Monte de l'Auseva
tres cruces veo clavaes;
voi Camìn de Cuadonga
a da-y por ello les gracies >>

         De xuru qu’hebo munches amarraces, seique les hubo más importantes pero la que pasó a la historia, novelada nes cróniques por Alfonso III, foi la de Cuadonga seguramente pol valor simbólicu qu’encerraba al ser, dende los llonxanos tiempos del fierro, un santuariu celta.

 El Magnu sabía bien lo que facía, quería una xustificación, una xida que lu emburriara a la Reconquista, daqué que xunciera a tolos pueblos que moraben nel norte – astures, godos, cántabros – embaxo una mesma bandera. Pa ello Alfonso III presisaba de símbolos, La Cueva yera venerada polos astures autóctonos, los celtes, y dende la Batalla Cuadonga tamién por godos y cántabros. L’ayuda d’una imax de la Virxe alendaba los guerreros que consideraron la victoria como suya; dentós p’acá sedría la <Cova dominica = Cueva de la Señora >. 

Otru símbolu, seique’l más importante, foi la Cruz que sopelexó Pelayo nesa mítica amarraza; una cruz de madera carbayu qu’él mando llarar d’oru y piedres precioses y que se convirtió nel <santu y seña> del Reinu d’Asturies: La Cruz de la Victoria. (< Con esti signu vencerás a los tos enemigos>)**

** [Esti slogan, a mou de "signum salutatis", amuesa nel blog. <<mirabiliaovotensia>> onde vos encamiento entrar de cuando en vez.]

          Alfonso III el Magnu, propagandista onde lu haya, tamién Reconquista faciendo intervenir nes sos Cróniques a los protagonistes del momentu: Munuza, Alkama y Ambasa polos moros y Pelayo – el so antepasáu - polos astures. Y al endefechu … l’elementu que los xunce y que los separa: Oppas, l’obispu traidor que vendió la Patria en Guadalete, volvió vendela en Toledo cuando tragó'l trespasu  de la corona d'Hispania a les vidayes del Califa omeya y cuando por tercera vegada cantó'l gallu en Cuadonga:

     - << Torna al alcuerdu, Pelayo, nun vas poder pa con ellos>>**

     Agora tóca-y el turnu al Magnu:

      - Los godos perdimos la tierra, los godos tenemos la obligación d’encabezar la reconquista.

       Entamó con ello Pelayo, dio-y consistencia’l Católicu, restauró <tol orde góticu> El Castu y punxo la guinda’l Magnu. Cuando falamos d’Alfonso’s hai que quitar la boina. 

       - ¡Chapeau, Reis Alfonso!

Bien cerca d'equí degolaren los agarenos, a toa pastiella, camín de Llébana:
< Bien cerca d'equí colaren
a toa pastiella, aviesos,
el peciu los sarracenos
qu'en Cuadonga llibraren.
Magar que-yos presta l'agua
 malpenes tiempu tuvieron
tomar el bañu de la tarde.
Dicen que l'agua los LLagos
seique nun amiya los cielos,
son llárimes d'agarenos
que la llevaron ferriona 
peles Cangues de Pelayo.>

        Nos últimos tiempos trátase de quitar importancia a l’amarraza Cuadonga; de xuro que nun foi la gran batalla que nos cuenta la crónica pero hebo de ser importante. ¿300 escontra cuántos...?  "Nin tantu nin tal calvu",  pero Pelayo nun taba solu.
Fruela ñació precisamente en 722 asina que la fía Pelayo, Ermesinda, y Alfonso de Cantabria – los pas de la criatura – yá taben casaos; ye dicir, Alfonso’l Católicu, el dux de Cantabria, tamién participó de la fiesta. Ye más, tres d’esta escaramuza los ismaelites colaron dica Cantabria pela única  salida que-yos dexaren : Vía Los Llagos, per Buferrera - magar que la torna per Cangues taba torgada dafechu - y foi cuando en Cosgaya, por mor d’un derrabe (¿echaríen una manina los asnos del norte ?), l’exércitu árabe tevo una debacle pistonuda.
        Yá sabemos lo que pasare darréu: Munuza, al nun sentise seguru, quixo colar pa la Meseta pel Camín de la Mesa pero los asturianos atayáronlu en Olalíes (Proaza) cortándo-y el mexu. Unos dicen velu muertu, otros quieren velu dellos años depués pela Septimania... Ermesinda careció de velees tola vida. El compañeru de Tariq nun escaeció enxamás les abluciones nel Sable  San Llorienzu nin les espiches na Cuesta Cholo; el so espíritu sigui analayando sobro'l Cerru...

Tumba de Don Pelayo en Cuadonga

          (1) Pelayo, enantes la visita los ismaelites, debía vivir nel centru d’Asturies, ¿ Siero, Piloña? onde la familia tenía facienda y hasta ye probable qu'un castiellín (3), asina que pertenecía a una familia de postín; yera noble pero más que probable nun fuere godu. 

        El nome de Pelayo vien del llatinu Pelagius y non d’un nome xermanu-godu; Pelayo sedría entós astur-romanu (los árabes nómenlu Belami al-Rumí= Pelayo el romanu=cristianu). P’afitar entá más esta teoría podemos atalantar de la Crónica Isidoriana –  fala de la historia de los godos - que Pelayo nun lo yera pos nin tan siquier lu noma. ¡Vaya propaganda, eh!.

Pelayo sedrá un noble astur descendiente de los romanos - pero entemecíu dafechu colos aborixe - que tendría influyencia y poder nes Asturies Centrales pre y post-invasores. A resultes d'ello formaba parte de l’alministración goda algamando’l padre a dux de Galicia y elli a espatariu real: primero de Witiza y depués – cuando padre y Rei lleguen a les manes – del nuevu rei Rodrigo, normal.

           [Don Pelayo  tevo enterráu de mano n'Abamia, xunto cola so muyer Gaudiosa. Más tarde lleváronlos pa la Cueva d'Onna, como se pue comprobar, bueno...

Santolaya d'Abamia,
finxu espiritual de los astures.

    ¿Pero por qué n'Abamia? .. ¿Qué había n'Abamia?...¿Qué significaba Abamia?.. Paez ser que n'Abamia mandó llevantar Pelayo un monesteriu ya una ilesia. Del primeru nun vemos traza pero de la ilesia queda constancia n'esta que vemosd'estilu románicu,tan tresformada ella,que nun resambla pa nada la prerrománica, d'ella quédanos la intuición (los texos), la lleenda, la tradición y les cróniques.  Pero...
         ¿Por qué Pelayo mandó edificar esti centru eclesiásticu n'Abamia? Pos porque yá yera d'antiguo un llugar santu, yera un santuariu celta; los monxos nun fueren otro que descendientes de los antiguos druides. Esti apegu de Pelayo a les tradiciones astures ye lo que fai pensar que yera ún d'ellos, ún de los NUESTROS, un ASTUR. Embaxo d'esos texos cuido que se celebraren munchos conceyos, quciabes el que lu encumó a Princeps, ¿seguro que foi na llana del Repelao? ]

<< Don Pelayo, rei d'España,
qu'entamasti en Cuadonga
la Reconquista la Patria
di-yos a estos mazacayos
con qué Llingua aconceyabas
a los astures y godos 
o los fíos de Cosgaya: 
¿En llatín, o n'arameo,
o yera LLINGUA ASTURIANA?
Torna, Pelayo, bon rei,
que yá nun soi pa col alma
viendo cómo los míos
faen de la fala un drama. 
Los pétalos esmorecen,
xime la espina clavada.>>

         Tenía Pelayo toles canonxíes - astur ya godu d’adopción - pa ser el Princeps naquellos momentos de confusión . A ver, buscáime otru… Gallu asturianu, educáu na corte goda y bien rellacionáu colos godos treshumantes y con cántabros vecinos. Hai más, Pelayo echa’l ganchu al fíu del dux Pedro de Cantabria (4) – veníu un poco a menos - y casa la so fía Ermesinda col futuru Alfonso’l Magnu; tenía güeyu esti Pelayu.

D’otramiente nun había sitiu n’Hispania más seguru y afayaizu que les montañes d’Asturies. Taba’l País Vascu, pero estos yeren mui suyos, hasta na fala. La zona de Cataluña tamién foi invadida ya otros llugares como Mérida, Toledo, Tudmir p’hacia Murcia o’l Val del Ebru taben acogotaos pola nueva relixón islámica. Ser cristianu o cenciellamente llibre namás taba permitío tres los Montes Cantábricos.
Una pena qu’algunos reis venideros nun supieren valorar la llibertá de cultos ¿indíxenes? qu’atesoraba Asturies. Los mesmos que punxeren el granu de mostaza de la llibertá foron depués perseguíos pol xugu de la cruz. Los suaños de dellos homes son el cepu pa otros. Nun creo que’l galiléu tuviere contentu con ello.


     (2) Cuido que Munuza, el Gobernador de tol norte peninsular, debía tener una corte treshumante:  Xixón, Llión, Astorga, Llugo,... dependiendo les circuntancies del momentu.

Provincies del Reinu visigodu.
¿Yera D. Pelayo fiu del Dux d'Astura?
¿Teníen posesiones pel centru d'Asturies:
Siero (Fozana), Llugones, Uviéu...?

          (3) El castiellín de Fozana . Nel añu 869 el rei Alfonso III, el Magnu, fai donación nel so Testamentu al presbíteru Sisnando de la Ilesia de Santa Mª de Tentiana (Tiñana) y tola so redolada, qu'él heredare de so tíu'l Castu (Alfonso II) y esti del güelu Pelayo. Mui guapo, don Pelayo con posesiones nel centru d'Asturies. ¿Mercóles siendo rei o teníales d'antaño la familia?.
          Cerquina d'esta ilesia hai un picu (400 m) nomáu Picu Castiellu - o Castiellu de Fozana - que nun principiu (1957) foi catalogáu como castru, lo normal.
 Dellos años más tarde, tres estudialu más a fondu y alcontrar algunos restos*, decatáronse que podía tratar d'una fortaleza, tipu Castillu de Curiel en Peñaferruz, ocupada dende'l S. III al VI y que tendría calter militar: muralla agüevada (139 x 94), torre de vixía - controla'l pasu del valle del Nalón-Nora al centru d'Asturies (Lucus Asturum) -, tres fosos y hasta contrafosos . Non menos bultable ye'l fechu que na llomba alcontremos delles cueves con agua corriente.

Castiellu de Peñaferruz asemeyáu a Fozana.
Comandáu por un tenente.

            ¿Si esti fortín pudo pertenecer a los primeros tiempos de la monarquía nun ye farda a esgaya pa facer una excavación fondera?... Ye lo que tu y yo camentamos ¿nun ye asina?... Tamién lo pensare xente preparao como'l arqueólogu Don Alejandro Fanjul que removió cielu y tierra p'algamar una financiación FORIATA; sí, ho, de los EE.XX. El Principáu nun tenía que poner un duru pero ...    ¡ REFUGÓ los permisos d'escavación! porque "nun entra nos planes previstos"... ¡Qué sensibilidá! (esto foi en 2014, y siguen ensin planes) ... Nun quiero nin pensar que llevo más de 50 años metiendo la papeleta enquivocada... Y arriendes del Principáu...

Manifestación en demanda d'ilusión
 polos fíos los qu'aconceyaren nel Monte Auseva.
La Cruz yá la llevamos,
la nuesa espada ye la Razón. 

    - ¿Pero entá hai más, nin?....
    - Sí, ho, sí; agora sabemos que ser falante d'asturianu ye peligroso; sí, sí, ¡peligroso!...   
     - ¿Y la OFICIALIDÁ?...
     - ¡Lo que faltaba!... Otru nacionalismu n'Asturies.... Como si nun tuviéremos a esgaya con Cataluña...
     Resulta qu'oficializar,  ameyorar, desendolcar, intentar NORMALIZAR l'usu de la llingua que dende sieglos llevamos falando - con too y con eso - per estes céltiques tierres ye bien esmolecedor pal PODER ... Tremen, ven tres de la Llingua una espada asolapada, ¡qué miéu!.
    - Pero, Señor Presidente, ¡que somos asturianos, ho! ...  L'antónimu de separatismu... Nun ve qu'hasta cuando esbardayamos un poco espetamos eso de: <Asturies ye España y lo demás tierra conquistao >. Dígame que nun tien perres, pero nun me insulte. Pos yo digo-y lo que siento, un pocu de nacionalismu igual nun mos venía mal... Un migayín d'ilusión pa resucitar esta Patria murnia (Vs. tampoco ye l'allegría de güerta, eh, tien de reconocémelo...) na que vivimos, un símbolu d'unidá, un algo que xorrasque les conciencies y l'espíritu de llucha (los Fondos Mineros paez que nos dexaren apandaos)... Dígame la verdá, ¿conoz daqué menos peligroso qu'una Llingua?... ¡Qué ocasión perdió usté!.. Pudo salir (o entrar) pela puerte grande pero sobre manera de tresmitinos un poco d'ilusión... Qué pocu-y costaba y qué ocasión perdió... Y mire que-ylo punxeron a güevu...
¡Ai, Dios!, <nun alcuentro la mio cara nel espeyu>.


        *Ente los resto alcontraos en superficie tiense dao con cerámica romano y medieval, unes manes pa moler ya escories de fundir fierro (tamién en Curiel).

         Nota: Si daqué ta acertao debèislo a los profesores Fanjul , Patricia Argüelles, Diana Vega, A. Gutiérrez o Menéndez Bueyes; de les FALCATRÚES tien la farda'l mio nacionalismu de caleya. 

Peña Amaya, capital del
Ducáu de Cantabria

         (4) Amaya, la capital d’El Ducáu de Cantabria venía de ser invadida polos moros en dos ocasiones: primero por Tariq (712), onde dexaría un destacamentu y unos cuantos xudíos pa gobernar, y más tarde (714) por Muza de pasu que tiraba pa Llugo tres pasar per Astorga y Llión. Menos mal qu’Al Walid llamólu a capítulu y hebo ce colar pa Damasco…
      - ¡Uf!… De bona nos tenemos llibrao…
 Toi seguru qu’esti, tres arrasar Galicia, plántase en Xixia por mor del aruma la sidre… Lo que queremos dicir ye que los mesmos cántabros tuvieren qu’abellugar tres los montes y teníen per grande interés p’acomuñar colos astures pelaxanos. Lo de Cuadonga foi una andecha astur-goda-cántabra, ¡cómo diba salir mal, co...imes!

Camientu...

     ** << Vuelve al to alcuerdu, Pelayo>>, encamienta-y Oppas a Pelayo, a la entrada la Cueva, cuando quier arrreglalo con elli  enantes d’entamanar la batalla. 
Asina que los cabezaleros d'Asturies tuvieren un alcuerdu colos walís d'Al Andalus que Pelayo rompiere tres esmucir de Córdoba y abellugar n'Asturies.     
  

                                               LA  DEBA  : L'escomienzu oficial 

Nel Güeyu Deva escomienza la Ruta Oficial

                                               

      Si quies dir a Cuadonga andando, dende Xixón, lo normal - l'oficial - ye que t'empobines al Güeyu Deva (tamién pues salir dende'l Camping) pos ye un llugar míticu por antonomasia. Equí ñaz el ríu Deva talo qu'en Cuadonga: <De Deva a Deva>.
      Nós vamos salir dende casa, a tiru flecha del Güeyu, magar que vamos faer tamién esta salida oficial pa que'l pelegrín tenga constancia d'ello. Vamos, entós, a xubir al Altu del Curbiellu que ye onde empatamos si lo faemos dende Santurio.
      Tres visitar San Salvador, somos pelegrinos, empobinamos dica la ponte'l Llavaderu, el Periódicu de Deva antiguamente. Paramos a escuchar el ruxerrux del agua al amiyar de la presa cuando, al mirar al frente, acolumbramos la Ermita de Peñafrancia entamilgada sobro'l manancial del Güeyu Deva. Tamos nel Barriu d'El Pedroco.  Podemos xubir tranquilamente a La Olla per esta pindia carretera asafalcada, que pasa per delante d'El Chabolu hasta dar cola señal afayiza, la garrapiella que nos guíe hasta l'altu pero vamos faelo pol siguiente ramal, el Camín del Faru, que ye más tendíu y caltién tramos de formigón y, a vegaes, de zahorra.
Los primeros pasos discurrir pel territoriu los Solar, son minchos vecinos los que s'apelliden asina. Más arriba alcuentra la casa del que fuere ún de los primeros escritores n'asturianu de la dómina del Xurdimientu:Andrés Solar Santurio (Andresu), algún día tendremos que dedica-y un post. Tienlu ganao.

Cabeza castreña de Deva

        Xubimos zigzagueando pente cases típiques, mui remocicaes, col corredor engalanáu por plantes y flores o modernos xalés con sabor a antiguo; el Barriu del Pedroco ta mui humanizáu. A mediu camín de la xubida vemos la casería de Piñera col so típicu Horru; pero quiciabes lo más bultable sía una figura de piedra incrustada na paré de la casa: la Cabeza Castreña de Deva. Nun ye plan d'aparase, igual otru día, pero facemos alcordanza de las información que tenemos lleío:
        [ Trata d'una cabeza-totem llabrada en piedra de la dómina los antiguos astur-celtes que moraben nos castros. La cabeza p'aquella xente yera perimportante - agora más - pos pensaben que nella taba la enerxía motora de la persona, "l'alma"; quiciabes por eso teníen en vezu de cortá-yla al enemigu, d'este miente yá nun podría resucitar nin cola mediación de los druides].

Per Deva, la escuela nel Bº d'El Pedroco,
depués tomes algo en "Casa Yoli". 

       Tres cariciar el pescuezu a ver si la nuesa cabeza siguía en sitiu siguimos xubiendo pel Camín del Faro u cruciando'l Camín de La Barrea  hasta empatar con una importante carreterina asfalcada; cruciamos y en siguida otra más, la As-331 que te lleva al Curbiellu pasando pel Pinal. Equí tenemos un panel pergrande qu'amuesa la Ruta a Cuadonga y d'él tomamos unes semeyes. Nós, los romeros del Camín, nun vamos pela carretera xeneral, sinon que la cruciamos por mor d'una garapiella que nos empobina pel Camín del Regatu, un antiguu camín de carru, más prestosu.
     Baxamos hasta enriba l'autovía y depués ascendemos a modo, seliquino, pel Camín de Samiguel, entá queda un cachu qu'andar.  Agora vamos pel Camín del Charcu; pensábemos que yera un topónimu daqué antiguu pero sí que lu alcontramos magar nun mos cafiare p'andar. Nel empalme del Barriu Castañera tiramos de frente hasta llegar a un abeventaderu, per onde pastien unes oveyes, y salimos a la AS-331 al pie d'El Pinal, y cerca de la Ilesia del barriu.
       Ye la hora'l vermú pero esta vegada sedrá meyor tomalu arriba, nel Barín del Curbiellu. Y asina lo ficimos, un vinu blancu con azúcare acompañáu d'un caldu dexónos entonáu el cuerpu dafechu. Yá nos petecía baxar a Pión pero eso sedrá otru día, cuando salgamos dende casa. Les paredes del bar tán  llaraes de cartelos  que describen el Camín de Cuadonga, unes ayalgues caseres d'ayuda al caminante de les que tomamos bona cuenta  cola Canon. Nun hai romeru o ciclista - a magüeyu - que nun pare nesti Bar...... Ye como una posta pal intercambiu de caballos, polo menos "eches la burra al agua".
        Toes estes farragose esplicaciones nun deben preocupar al llector que pretenda facer esta xubida  poro la relidá ye muncho más cenciella, ta mui bien balizáu'l camín coles garapielles.

                                       .........................................................

   

Los guerreros de Doña Velasquita
custodiando la parroquia Deva.

           DEVA, LA PARROQUIA

       Deva o DEBA (como reza'l Madoz) ye una de les parroquies más chules de Xixón. La reencarnación de la diosa Deva ta presente en toles partes: Nel sagráu Monte Deva, no alto y nel Güeyu Deva, nel fondu; namás-y falta la playa pero esta tienla a tiru flecha.  
       Na parroquia Deva viven más de 700 habitantes repartíos polos barrios de: El Pedroco, el Fondón, La Reguera, Zarracina, Serantes, San Antonio, La Olla, Rioseco o El Monte. Ta arrodiada al este pol Conceyu de Villaviciosa (Arroes y Pión), al sur por Caldones, al oeste por Santurio y al norte por Cabueñes.
       Anguaño ye una parroquia primeramente residencial y d'ociu con numberos bares-restaurantes  (Casa Yoli, El Chabolu, El Rinconín de Deva, Casa Mario, El Camping, El Cruce...); p'agospiar  hai  l'Hotel Rural Mirador, La Ermita de Deva, l'Hotel-Restaurant-Spa de La Llorea  y el mesmu Camping, abiertu tol añu.  Entá conserva delles caseríes dedicaes al ganao vacuno que caltienen esa vida bucólica de los sieglos pasaos cuando nel Molín d'Euxenio se farinaben el maíz o'l trigu, o los numberosos llagares facíen correr la sidra a golfaraes o la granible tierra la vega taba llarada de fabes, o cuques de llinu y maíz... Riques tierres bendites pola Deva. Güei la parroquia sigui prosperando per aciu d'empreses como Sidra Piñera, el Campu de Golf o Centru Hípicu.

 Nel Camín Xacobéu: San Salvador de Deva
El caprichu de Dª Velasquita Ramírez, y el nuesu. 

       Deva debe'l so nome a la diosa céltica Deba, la Madre Naruraleza, la qu'orixina la vida talo'l nacimientu los ríos: Equí ñaz el Ríu Peñafrancia y en Cuadonga'l Reinazo y pa con él el Reinu d'Asturies, l'orixe de la Reconquista: SÍMBOLOS.
       Deva ye una tierra mítica, la so historia ñaz col orixe de los tiempos.
Nel Monte (426 m d'altor), analayando sobro'l mar, hai una necrópolis tumular con más de 4000 años d'antigüedá, como nos cuenta'l profesor Cortina, l'arqueólogu que lo tien estudiao.
 Nel llanu, bañáu pol Ríu Peñafrancía, podemos contemplar la románica Ilesia de San Salvador de Deva, mui remocicada tres la Guerra Civil, pero con raigaños nel prerrománicu, finales del X , esllabón perdíu ente'l "pre" y el "ro". Formó parte d'un monesteriu dientro del Camín Xacobéu, el Camín Francés, qu'agospiaba los fundíos pelegrinos. De fechu el Camín de Cuadonga coincide munches veces con él. Conserva a la entrada - refecha - la estela fundacional: < Doña Velasquita Ramírez* consagra esti templu a S. Salvador > hacia 984. En 1006 dóna-ylu a S. Salvador d'Uviéu por mor de los cafiantes llobos de la Catedral que nun paraben de roye-y la oreya de la que s'agospió nes Pelayes de la capital.

* [ Esta  Velasquita ye la playa, la nuesa, non la Xiráldez uvieina. Podéis ver dalgo más na entrada :
<A la cata'l Güeyu Deva>, n'esti mesmu blog Camìn de Niria.]

Palaciu Conde Revillaxixéu.

        Otru, otros, edificiu emblemáticu ye'l Palaciu del Conde de Revillaxixéu. El Palaciu Antiguu (seique hebo otru más primitivu), el que ta más averáu al Ríu Peñafrancia, tien una estructura complexa con dependencies estremaes na forma y nel tiempu pero distribuyíes racionalmente y onde destaca una torre cuadrangular d'estilu historicista.
El títulu del Condáu de Revillaxixéu foi donación de Fernando VI nel añu 1749 al cántabru  Xuan Francisco de Güemes y Hocasitas que creó la Compañia Comerciu de La Habana onde foi nomáu Capitán Xeneral algamando darréu a Virrei de la Nueva España. Don Álvaro Armada de Barcáiztegui ye n'actualidá el IX Conde, amás de Marqués de San Esteban del Mar y Conde de Güemes. La historia de Xixón sedría otra ensin les filántriques aportaciones d'esti Condáu.
        El Palaciu d'Arriba - el de los cuatro picos - ye un xalé palaciegu d'harmonioses proporciones onde se mecen les formes ecléctiques cola tradición francesa y la cubierta piramidal coles torres angulaes; la escalera norte, con accesu al pisu primeru, da-y , si cabe, más glamour a esta ayalga.

Ermita La Peñafrancia (Deva): La Virxe Prieta
Tres Estaos: Tres pisos que s'entemecen. 

         Tamién pertenez a palaciu la Capiella de la Ermita de Peña Francia. La orixinalidá d'esta capiella  vien dada tanto pol so asitiamientu como pola so estructura. Construyida en tres pisos con forma d'escalera sobro'l nacimientu del Güeyu'l Ríu Peñafrancia sirve de panteón familiar a los Condes. Aprovechando'l desnivel del tarrén llevanten tres plataformes asignaes a los estremaos  estamentos sociales de la dómina: el pueblu reza nel más baxu, na segunda terraza ora la familia condal (y, una vez al añu, les mios sorrisones vecines) y na superior ta l'altar onde se celebra la misa. Podíemos dicir qu'hai un cuartu estáu, cuidao que per un lluceru nel techu pues algamar al cielu y/o a.... "El Chabolu".
        Cuenta la leenda popular qu'un día  8 de Setiembre - qué casolidá -  la Virxe, la de verdá, aprució de sópitu nesta capiella al par d'una imax de la mesma. Una vecina que lo viere comentó cola vecindá y estos decidieron qu'aquella fermosa y prieta imax debía ser treslladada a un sitiu con más sonadía y facilidá de visitar: la ilesia de San Salvador, que ta elli mesmo. Asina se fizo, pero al otru día la Virxe Prieta tenía camudao pal antiguu aposientu en Peñafrancía. Varies veces aporfiaron los vecinos p'asitiala en Salvador pero... ¡ganó la Virxe!, pa gayola'l pueblu que d'esta miente pue rindi-y visita tolos años el ¡Día de la Virxe de Cuadonga!, precisamente. ¿Nun xustifica esto'l nuesu enfotu nel viaxe a Cuadonga?:  
                 
                              <De Deva a Deva y de Peñafrancia a Cuadonga>. ¡Andando!

                                           ......................................................................

                   
                                      Cumplíos   

Andrés Solar Santurio:
 ún de los primeros,
ún de los meyores. 

       . Primeramente cola Asociación Cultural "El garapiellu" pol so enfotu col Camín de Cuadonga encabezáu por Xurde Morán col so llibru: <El Camìn Xixón - Cuadonga >, edición n'asturianu. Nun damos un pasu ensin él y ensin les "garrapielles".
      . Consultamos les <Cróniques de los Reinos d'Asturies y Lleón>, de Jesús E. Casariego.
      . Tamién lo ficimos col Madoz 1845-1850 (Asturies).
      . Mercamos un llibru en francés (hai que repasar un poco) de Emiliano de la Huerta: <Covadonga>, onde tamién pidimos prestaes unes semeyes.
     . Pela Wikipedia andamos restolando a toles hores, cada vez me gusta más.


     . N'Interné alcuentro munchos comentarios; ahi PDFs que son una bendición. Sobro'l Castiellu de Fozana o Abamia lleí tolo que pillé. El mio aplusu al profesor-arqueólogu Alfonso Fanjul Peraza.
   
. A la Santina, que nos dio la farda pa estudiar esti camín y sobru tou a la de casa, qu'un día sí ya otru tamién déxalo tooo pa que nun andemos solos per estos caminos ¡ de la virgen !.