sábado, 26 de mayo de 2018

<< De co cas a Cuadonga [8]: Miyares - Llames de Parres >>

 
  << De co casa a Cuadonga [8] : Miyares - Sorribes - Llames >>

                  Esta vegada nun kart... ¡Toma, Nano !

Tamos a la espera d'un kart medieval, mentanto.... ún de Sotu Dueñes.
(Semeya d'Internet)
     Guapu día, sí, señor; sobremanera en comparanza colo que tenemos pasao. Pero lo pasao, pasao ta y güei vamos intentar facer una bona caminada aprovechando que tenemos la xornada entera pa ello. A ver lo lo que pasa, porque nun tamos avezaos a tantu trote...
    Yá sabéis cómo funciona esto; vamos en coche hasta'l puntu onde quedáremos la vegada anterior y entamamos con otru tramu del Camín,, hasta onde podamos, lluéu tornamos al puntu onde dexamos el coche.

Palaciu l'Omedal cola Torre de Miyares

        Salimos de Xixón a eso de les nueve y media (9:30) y empobinamos dica La Minera (AS-II) pela carretera Vega pasando per Mareo. Entramos na A-64 hasta una rotonda onde tomamos la direición Pola Siero-Santander.... Atrás dexamos El Remediu, Nava, L'Infiestu y Villamayor, siempre pela N-634 hasta la esviación a Miyares y Boriñes, el ramal AS-259. Llegamos a Miyares a eso de les diaz y media (10:30) y aparcamos tres la moderna  Ilesia de <Santa María de la  "O">, frente al Bar del pueblu. Bien cerquina'l Palaciu de los Villa-Estada amuesa'l so finxu medieval, la célebre Torre de Miyares.

Ansí quedó la bici de Sidrón
al aportar a La Figar de Miyares.
Cuido que precisamos otru vehículu...

      Tres calzar el material apropiao y meter na mochila: móvil, cámara, llibrerina d'apuntes, mapes y llibru de ruta ("El Camín Xixón- Cuadonga, de X.Morán) embredamos dica la Casona d'Aldea "La Figar" pa saludar unos amigos; la carreterina que nos lleva a La Goleta pasa xusto delantre so casa.
    - Bon día, Vitoria, ¿cómo andamos?
    - Nunca peor y menos con esti día. Güei vais tener suerte; esti solín promete.
    - Nun sobrará asoleyar un poco, que vaya iviernu d'agua que llevamos...
    - ¿Hasta onde pensáis llegar con esti día tan prestosu? - camienta Alfonso.
    - Hasta Sorribes, lluéu Dios dirá...
    - Que vos afayéis. A la vuelta dai un toque...
    - D'alcuerdu. ¡Ta lluéu!

Goodbye, Miyares !
       Dende'l Barriu'l Cerezaléu, onde tamos, tiramos per aciu un llavaderu camín de la Goleta, primer finxu del día, que queda a poco más d'un kilómetru. Vamos baxando sele per una carreterina estrencha y solitaria emplegada namás polos vecinos que van a les finques y los romeros de Cuadonga. Lo que debíen ser 20' convirtióse  en más del doble per aquella pista a mediu formigonar. Díbemos pasu ente pasu parando ca poco, o bien pa tornar la vista a Miyares o  pa columbrar los montes cercanos o llonxanos como los de Sebares, la Sierra de Ques o los Firmísimos, que per equí apelliden "Pirineos".

Pela Vega Santianes,
 saliendo de Miyares

        No fondero travesamos una riega, onde una pinganiella t'invita a refrescar, y entós el bucólicu camín entama picar p'arriba. Presta ver el ganao paciendo pela vega de Santianes y sentir les esquiles de les vaques na fastera del monte cercanu: La Cuesta Miyares o L'Ordiyón. Vamos notando cómo bilta la primavera nel arbolíu que bordia'l camín o nos pumares de les quintanes. Un edificiu coloráu, con pinta depósitu d'agua, ye l'antoxana del pueblu.


Na Goleta
        Entramos nel cogollu La Goleta pel Barriu de La Estrada, onde ta la casa'l Ferreru como podemos comprobar pol potru qu'entá se caltién n'antoxana la quintana, y enseguidina tornamos a mandrecha y lluéu a manzorga siguiendo la señal clavada nel trabe del horru. Aprovechamos p'aldericar un ratín con unos vecinos apostaos delantre ca El Cutre.
    - Bonos díes.
    - Perbonos. ¿Vais camín de Cuadonga?
    - Eso pretendemos.
    - Va garravos la testera'l sol a mediu camín. Güei sudáis la gota gorda.
    - Nun pensamos llegar hasta la Cuevona. Tamos faciendo'l camín poco a poco, un cachu cada día, según se mos arregle.
    - Ah, bueno, eso ye otra cosa, porque esta calima... Ta bien lo que facéis, a cachiquinos. Nosotros vamos tamién de xemes en cuando y facémoslo nun día. Eso sí, salimos tempranino.
     - ¡H.a, h.a, h.a!. Gracies pol conseyu. Ta la vista.

         Pel camín d'El Llanu'l Cuetu aportamos al Barriu La Quintana. Guapes cases ornaes con flores per uquier, da gustu. Caminando amodo empatamos cola carretera xeneral PI-11 onde acolumbramos, perdía ente maleza, la cadarma  lo que fuere l'antigua Escuela la Goleta (1928); en cuatro díes nun queda nin el recuerdu. Na vega acolumbramos el banzáu de la ñora d'un molín. Colamos per un repechucu metanes  un refrescante robledal hasta dar cola casería La Trapa, xusto onde una indicación t'empobina dica'l Palaciu Cutre. Queremos visitalu pero como ye algo tarde dexámoslo pa la vuelta. En cualisquier casu yo voi cuntátelo agora de pasu que xubo la cuesta ente modernes plantaciones de mazanos, ¡ansí se fai!.

Palaciu Cutre, fachada.
        [[ El Palaciu Cutre de cutre nun tien nada: muralla, torre-palaciu y capiella asitiaos na verde entena d'un biescu son una pasada. L'arrribada a palaciu per aquella cuestina empiedrada ye l'antoxana d'unos momentos de gloria. Los xardinos, el carbayu milenariu  y la decoración provenzal son el complementu perfeutu d'esta ayalga piloñesa. Un llugar ideal - dende 1996 - pa una escapada weekend, una boda, un bautizu o cualisquier celebración. Too curiao col mayor de los procuros. Con ganes me quedare a tomar un vermú n'aquella mesa de mármore viendo esguilar la yedra pelos sillares que caltienen l'escudu familiar de los González Cutre y acolumbrando la ñeve los Picos d'Europa. Daqué vez sedrá. Rezaré pa ello a los santos mártires - San Cosme y San Damián - na capillina desimía (exenta) al suroeste de palaciu.

Palaciu Cutre 
      Algamamos a esti "engoletáu" edificiu per una carreterina mui iguada a poco más d'un kilómetru del cruce que tira pa Sorribes, ande nos empobinamos. Cuentes les crónique que per equí cerca degoló don Pelayo camín de  Cuadonga, talo que nós, seique nun temos perseguíos por dengún sarracenu. Lo qu'en principiu fuere una torre almenada ( entá conserva les saeteres), talaya del valle del Ríu Piloña, terminó convirtiendo nun palaciu pergrande, de planta rectangular y tres pisos con vanos regulares, al dir añediendo contrucciones al orixinal del XVI ( a min qu'estos turruxones suénenme a primeros tiempos de la Reconquista ...). Ocurriere daqué paecío qu'en Miyares, o en Niévares: turruxones de vixía evolucionaos a palaciu. Acutáu por 18000 m2 de finca na fastera más soleyera del Sueve domina tol valle y les montañes. Namás falta una chavolina madera pa min.]]


                                        << - Per equí crució Pelayo
                                            caminín de Cuadonga,
                                            estes agües tán bendites,
                                            son les agües del Piloña.
                                         Voi siguir contra corriente
                                            voi andar escontra forga
                                            voi caminar seliquino
                                            hasta la mesma Cuevona,
                                            ta esperando la Santina
                                            pa dame la norabona,
                                            llevo muncho percorrío
                                            de Xixón a Cuadonga.
                                        Toi naguando por cuntá-y
                                            les mios coses, la mio hestoria
                                            y pidi-y unos deseyos 
                                           del cañu de la Fuentona 
                                           y narboliar la bandera
                                           de la Cruz de la Victoria. >>

         A poco, baxando un pelín, aportamos a otru cuce; tamos nel  Barriu de Brez , l'antoxana* de Sorribes. A manzorga, tirando pa la parroquia Cerecea, anuncien el Palaciu de Rubianes qu'enseguida vamos acolumbrar pero nós tomamos a mandrecha, al par del horru la casería La Trapa.
* [El famosu Palaciu Rubianes - onde se celebren bodes y toa clase d'eventos - pertenez a la familia del Conde Peñalver, talo que'l Palaciu de Sorribes; d'esto vendremos a enteramos más tarde. ].
Brez... Facemos alcordanza de la Crónica Rotense abusando la memoria:

Primer Escudu de Piloña:
<Don Pelayo vadiando'l Ríu>,
 camín de Cuadonga:
<ADELANTE MI ESCUDERO QUE MI CABALLO PIE HALLA>
        << Paez ser que Munuza (walí d'Asturies, residente a vegaes en Xixón) empobina Pelayo a Córdoba por mor d'un choyu seique'l la farda yera camelar a la so hermana Ermesinda a la que llevaba tiempu pretendiendo... Pelayo que s'entera del "consummatum est" torna pa casa  darréu y entama maquinar escontra Munuza, si ye que nun lo venía faciendo... Nun debía tar solu porque'l tarrecible Tariq vese obligái unviar  Asturies un pequeñu exércitu col enfotu de prindar a Pelayo y llevalu a Córdoba encadenáu... Prepáren-y una encerrona nun pueblín nomáu Brece pero alvertíu por amigos llogra esmucir y travesando a nadu sobro'l caballu'l crecíu Ríu Piloña algama los montes (¿Sorribes?) onde acomuña con otra escorripanda aldeanos del mesmu palu... Xuntos esguilen al Monte Auseva y abelluguen nuna Cuevona, asitiada na fastera, per onde cuerre'l Riu Enna (Deva=Onna=   ). Tomen el determín d'enfrentar al invasor y llamen a Conceyu Bable ( ellí debía haber nativos, hispano-romanos, godos fugaos....) a tolos pueblos vecinos de la redolada qu'acordien: 



     - Pelayo, tu serás el nuesu Princeps; nun hai otru como tu pa sacar esto p'alante. 
        Debíen  ser un bon puñáu d'ellos porque la escuadra mora que los perseguía dio les fusties en cuantes  golifó aquel garapiellu revolvinos y sobró-yos tiempu pa poner en conocimientu del Emir la que se taba armando... Enraxonáu'l cordobeyu atropa un exércitu pistonudo a la fin d'esaninicar dafechu aquel biltu rebeldía. Punxo al frente nin más nin menos qu'al so compañeru Alqama y, por si terciaba un apañu, llevó al mesmísimu Oppas, obispu d'aciagu recuerdu....>>
      Oi, nin, ¿nun pensarás que te voi cuntar agora la crónica entera de lo qu'aconteciere en Cuadonga, eh?.... Venga, andando, tira p'alantre; cada cosa al so tiempu.

Aportando a Sorribes
         Bueno, pos con estos camientos vamos colando de Brez y entramos nuna zona tobogán; primero xubimos hasta La Espilonga y lluéu baxamos hasta'l llanu de Sorribes, onde ta'l migollu la parroquia. El solín, la tranquilidá y una cierta altura fainnos esnalar cola mirada pente les montañes del Sueve, a manzorga, los candes picos d'Europa al frente y los montes de Sebares a mandrecha. Ye meudía. Munchu-yos presten les flores a la xente d'estos pueblos: antoxanes, corredores y sebes tán engalanaes con estos colorinos naturales.


       Per un desvíu a mandrecha vase a la ilesia parroquial de San Pablo de Sorribes (XVII). Baxamos un poco con enfotu de visitala pero queda algo más lloñe de lo que cuntábemos, asina que dimos la vuelta por mor del tiempu; nun queremos madrugar y ..... otru día será. (Un día tengo que visitar tantu la Ilesia como'l Palaciu de Sorribes, apunto na llibretuca... De pasu aprovecharemos pa dar una vueltuca per Sebares, que te bien cerca, nel valle y allegamos hasta'l Palaciu de Sorribes, bien cerquina, a tiru flecha la mentada ilesia)*.
*Yá lo fici, lluéu te lo cuento.


Clisaos camentando nel curiáu Palaciu de Sorribes

    [[ El Palaciu de Sorribes, a mediu camín ente La Torea y Sebares, del que fueren propietarios los Condes de Peñalver foi edificáu nel sieglu XVIII. Tien forma rectangular con tres pisos en mampostería visto y sillares en vanos ya esquines. Sobro les moldures de la adintelada puerta d'entrada, abellugada por pilastres, vuela un balcón de fierro forxao acompañáu por otros dos nos lladrales.  Pequeñes ventanes y balcones tán harmónicamente distribuyíos nes tres cais de la fachada protexida por un aleru bien salíu. Tres ventanuques arquitrabaes (adintelaes) rematen l'ultimu pisu de la cai central.
Frente la fachada de palaciu vemos una pequeña capiella porticada  y na mesma plazoleta tamién s'alcuentren les caballerices, les cocheres y la casa los caseros. ]]

Nel Cotal.
Acolumbrando'l Picu Anayo

      Del migollu de Sorribes xubimos hasta'l Barriu d'El Cotal  que, como'l so nome indica, ta engaramáu nun cuetu. Dende'l pandu onde ta asitiada l'Área  Recreativa aprovechamos  pa echar un tragu d'agua, sentaos nun bancu,  y al empar siguir enantando la bucólica mirada pente valles y montañes. El maxestuosu Picu Anayu ferregüeya, talo qu'un Dios, tola redolada.


Casona d'Albergue Rural (La Torea) 
       Tres pasar el Cotal vamos alcontrar otru puñáu de cases... Qué casaces tien La Torea, el barriu nel que nos alcontramos. Falando  con un vecín enteramos qu'una casona corredor pergrande - paez un palaciu - ta dedicada a turismu rural; ye una de les nueve qu'hai na parroquia dedicada a estos menenesteres. De fechu, mientres sentamos a falucar hebo ciertu trasiegu de clientes. Tamién nos enteramos que pertenez a la célebre familia Martínez Noriega, dueña d'otres casones y quintanes, hasta'l mesmu Palaciu de Sorribes (Sebares), o'l de Rubianes, na Cerezalea.
A la vuelta volvimos alcontrar co ca d'Ánxel y Marina al mesmu señor y, amodo, visitamos la so güerta, al par de casa. Tienla mui puapa, hasta con patates, equí nun tienen torga pa plantales. La tierra ye d'eso colorao y dondo pa trabayar seique- y pase'l retovator de xemes en cuando. Por cuchu nun tien problema nesti pueblín, ganaderu,  como tolos de Sorribes (Brez, La Espilonga, El Cotal, El Robedal y los Riegos)  con vaques, cabayos ya oveyes a estrapallar.  Gracies al invernaderu consigue tomates como puños, ensin miéu a la borrina. Yá nun echa de menos la fábrica  Nestlé de Sebares, onde trabayare tola vida ansí como la mayoría de los homes y muyeres de la redolada. La Nestlé pa Piloña ye dalgo serio.
    - Mirái ellí enfrente, ¿veis el Picu Pienzu?
    - ¿Cuál d'ellos ye?
    - El que lleva la cruz na picalina. Vese bien.
     - Pos sí, porque hasta yo la veo. Tuviemos una vez arriba. Menuda xatada nos dimos depués de comer... Namás se nos ocurre a nosotros. Xubimos pela otra fastera, dende'l Fitu.
    - Bueno, señor, que tenga una bona tarde. Vamos dir colando qu'entá queremos visitar el Palaciu Cutre.
    - Hasta la vista, entós; que nun vos sobra nada.

La  FÁBRICA de NESTLÉ
 
Fábrica de Nestlé en Sebares.
   [[ L'alemán Henri Nestlé ñacíu en Franfurk en 1814 pero afincaú en Suiza dende los 29 años inventó una fórmula a base de lleche, zucre y fariña trigu (Fariña Lacteada) que sirvió pa paliar muncha de la mortandá infantil de la dómina por mor de la fame, dende 1876. Eso fueron los anicios agora... (¡cómo ta esa lleche condensada!) tenémosla instalada en 137 paises (España 1905)  y tien más de 340.000 empleaos (¡H.oder, qué bien podía ser unu'l mio fíu!... Pediré-ylo a la Santina de pasu que voi a Cuadonga).


Pelargón de Nestlé (y de mio)
        La Nestlé tamién sacó al mercáu la lleche en polvu Pelargón (güelu, debisti vender la lleche a la Nestlé y a min dame más pelargón, igual medrare algo más...),  café Nespresso (cápsules) , el Nescafé y la pasta Maggi pa platos preparaos; dende que se convirtió(2011) en Nestlé Healt Sciencie tamién prepara: cereales desayunu (tomo), xelaos, chocolates,  tomate Solís (el guaje lo abrasa), lates alimentos Litoral , cuando acabo les mios fabes qué pensáis que como...
     Y el mio perru ¡Friskies!, talo que'l gatu. En fin, veo qu'en casa - y nada nun sabía - somos un subproductu de Nestlé, por eso soi un vieyu resultón, talo que madre, que nos dexó l'otru día con 95 años y nun tenía nin engurries... Claro, tomaba complementos alimenticios del alemán (Meritene)... GRACIES, Nestlé ]].

El Robedal de Sorribes

          Al dir baxando La Torea - de xuru qu'había munchos toros per equí a tenor de les vaques que vemos - acolumbramos un garapiellu cases nun cotaraxu, ¡qué guapo!; nómase El Robedal por mor de los carbayos qu'había. Pasamos la Casería "Les Vallines", la casa d'aldea "Jesús", el desvíu pa la Collá d'Ardavín y llegamos a La Teyera onde hai una casona impresionante y perbién iguada.

        Yá tamos llegando a Cúa, el caberu de los llugares o aldees de Sorribes en direición Cuadonga y dan les 12:40, vamos sobraos. Va poco esti pueblín tenía 34 habitantes repartíos en 13 cases.

Faciendo l'osu per Cúa: guardando la Vega'l ríu.
< - ¿Ande vas, guapa cristiana?
- Voi camín de Cuadonga
a visitar la Santina.
- ¡H.a, h.a, h.a.
 ¿A estes hores tas en Cúa?
Como nun cambies la marcha
llegarás pa la hora prima.
- Pos que seya en bona hora,
maldita si tengo prisa >. 
        Entramos per aciu la "Casería la Gallega", nel barriu La Ferrera. Malpenes hai xente; una muyerina trapichando nel soportal d'una casa antigua, embaxo'l corredor.
   - Que tenga bon día, señora.
   - Igualmente, ¿vais camín de Cuadonga?
   - P'allá vamos poco a poco. Ta lluéu.
       Sí, cases antigües, delles descuidaes, alguna abandonada, onde namás tropezamos con xente mayor. ¿Ónde tán los guajes?... Nin tan siquier tan xugando na h.uente.
       Echamos la mirada a la vega d'a manzorga onde se ve dalguna casa nueva al frescor de les agües del bravu Ríu Cúa, que ya recibiere les agües del nuesu compañeru, el Ríu Sardea, y que cuatro pasos más p'alantre va desembocar nel Riu Piloña. Camiento pa mín que Pelayo debió cruciar esti ríu al entamu la primavera, cuando la ñeve les montañes taba esneviando y por eso llevaba tantu agua naquel momentu.

Señaldá:Nin un calderu, ni un guaje...

     Tamos llegando al llanu. Abandonamos la cabera casa'l pueblín tres pasar delantre la capiellina del XVIII, baxar una soleyera cuesta y cruciar la segura Ponte Cúa. Paramos pa tomar unes semeyes.
     Tres cruciar la ponte La Fontina empobinamos a mandrecha como marquen les garrapielles antroxando col ruxerrux de les agües y el canciu los malvises en primavera pela vega La Bolén onde'l Ríu Cúa ha d'empatar col Piloña. De sutrucu vémonos embaxo un tunel pel que circulen los coches de la carretera xeneral N-634 que va de L'Infiestu a Les Arriondes. De sópitu...
    - ¿Qué ye aquello?
    - Vamos fisgar... Ellí hai un cartelu...
    - ¡Un karting!... ¿Un Karting?... Pamidea nun conocía namás que'l d'Alonso en Llanera.
    - Carái, agora yá sé ande tán los guajes....

El KARTING de SOTUDUEÑES:
     
Karting de Sotudueñes, el suañu de munchos alonsinos.

         El karting de Sotudueñes tien una pista de 750 m de llargor onde se puen realizar diverses actividaes, según la ocasión. Tamién cuenta con aparcamientu, cafetería, tienda de karts y accesorios, boxes o taller, aula multimedia y carpa multiusos onde se faen cursillos de Seguridá Vial.
     Pa que te faigas una idea por si quies probar l'artiluxu: Una carrerina de 8 vueltes (unos 15') más otra de gloria son 20 euros, lluéu... Claro que pues llevalu de casa y entós salte más barato, por 350 € pues rodar tol añu. En fin, yo voi pasar un día d'estos pa ver cómo ye la fiesta... ¿Nun te petez venir dar un vueltu, collaciu@? . Equí llégase rápido pos ta perbién comunicao: menos d'una hora de Xixón, poco más dende Avilés, tres cuartos d'hora d' Uviéu y entá menos dende LLanes. Echa una güeyada: <kartingsoto@hotmail.com>

El Puente, casona perguapa.
A mandrecha pal Karting,
pela Ponte a Villar de Güercu
(el braeru Camín a Cuadonga)
        Llegamos a Les cases del Puente - primer poblamientu de LLames -  en media hora abondante, lo que debíen ser 15', pero les paxareres de La Bolén tuviérennos la mar d'entreteníos. Quedamos un poco ablucaos metanes d'aquella esplanada ensin saber qué facer: ¿siguir pa Llames o tornar?.... Ye temprano a esgaya pos nun ye preciso tar a les cinco en casa.
    - ¿Cómo t'alcuentres, petezte siguir? ¿Yá tas recuperá de la gripe?.
    - Pos mira, toi bien; creyo que podemos siguir otru poco. ¿Qué vien agora?
    - La próxima cita: LLames de Parres, como dos kilómetros y mediu.
    - Eso ta chupao, andando.
       Yo ablucaba porque tuviere más d'un mes ensin dar un pasu y bastante amalicada, pero.... Una orde ye una orde, y a ver quien lleva la contraria a una babiana... El casu ye que nun sabía per onde tirar. Había una ponte grande y perguapa que te dexaba na otra marxe del gran ríu, yá'l Piloña. Tenía tola pinta ser per ellí pero por si acasu entrugué a señor que venía tirar la basura a los contenedores:
    - Bonos díes, señor. ¿Cúal sedrá'l camín más afayaizu p'algamar a Llames? ¿Hai que cruciar la ponte?
    - Nun te metas nesi berenxenal, valvos más dir pela carretera xeneral.
    -Pero'l Camín de Cuadonga....

¿El Fielatu?
    - Faime casu. Sí, el camín va per ehí, travesando la ponte de lo que fuere l'antigua carretera y pasando la Casa'l Fielatu pero nesti momentu nun vos lo aconseyo, llovió muncho... Mira, siguíi pela actual carretera que tien bonos arcenes y depués de pasar Soto llegáis a un cruce, a mandrecha, que trai Llames (1 hm). Cruciáis la ponte y, namás pasala, a manzorga, siguís a la vera'l ríu pelo que llamen "El Camín de la Reina"; ta bien señalizao.
   - Coimes, qué bona pinta tien eso...
   - Ye superafayaizo. Igual un pelín más llargo que pela carretera pero merez la pena, dígovoslo yo.
   - Yá lo creo, un camín real ya una Reina... Qué bona pinta tien eso.
   - Ta lluéu.
      Y asina lo ficimos*. Enseguida pasamos Sotudueñes y algamamos al cruce que nos indicare'l vecín, non ensin antes entrugar una señora si díbemos pel bon camín, por si acasu. CxB. A manzorga la carretera vemos l'antigua escuela de 1939, recién terminada la Guerra Civil, y a mandrecha, talamente na ribera del ríu, otru núcleu cases del pueblu.

*NOTA: Asina lo ficimos ... Pero tornamos otru día y percorrimos el camín que va de La Venta Sotudueñes a Villar de Güergu, que ye'l camín braeru. Lluéu siguimos ruta hasta la ponte'l Piloña, cerca  la Estación, onde entama lo que conocemos como "Camín de la Reina".

      [[ Sotu Dueñes ye una llocalidá de la parroquia Sorribes, nel conceyu de Parres (cap. Les Arriondes). Tien alredor de 50 habitantes y más de 70 cases, lo que reflexa a les clares l'abandonu los pueblinos pa colar dica les villes onde la vida se fai ¿más llevadera? y te da otres oportunidaes.  Parres tien 17 parroquies y nosotros vamos pasar peles de Sorribes, San Xuan de Parres, Viabañu y Villanueva (zona cpmpartía con Cangues d'Onís). 


Sotu Dueñes, el cotu de les monxes benites.
       Seique si por dalgo ye famoso Sotudueñes ye polo que fuere'l so Conventu  de monxes benites, Les Dueñes, acoyíes embaxo l'abellugu Samartín y que fueren, coles de Villamayor, les úniques beneditines del mediu rural asturianu.  
      El monesteriu Les Dueñes andevo al aldu l'obispu de turnu y les circunstancies relixoso-polítiques de la dómina asina como polos llevantos, verdaderos o non, que cayíen sobro les monxes.
      Creáu nel sieglu XII tevo vida hasta'l XVI o .... ¿nun siguirá vivu'l so espíritu nes piedres que conformen l'actual capiellla de San Martín d'Escoto?... LLuéu falamos d'ello, ¿paezte?. ]]

Cruciando'l Piloña.
Cuando crució Pelayo llevaba
 enforma más agua.

       Tal como nos dixeren llegamos al emplame, col apeaderu la estación enfrente, y entramos na ponte'l Ríu Piloña. Unes pareyes d'azulones (Anas platyrhynchos) enrieden peles agües del Cotu trucheru. Paramos un cachín pa refrescar la vista y empobinamos pel Camín de la Reina (o Camín Real de Viabañu), perbién balizáu por un cartelu anunciador ya esplicativu de lo fuere y ye esta estrada.

La Reina caleyando dica Samartín d'Escoto.
   


   [[ El Camín de la Reina ye en parte l'orixe de l'actual N-634 que servía pa comunicar el centru col este d'Asturies y foi un inventu romanu por mor de les guerres astur-cántabres. Daquella xuncía, aprovechando les vegues del ríu Piloña, Cánicas (C. Onís) col centru de poder romanu: Lucus Asturum (Lugo Llanera). 
Ye fácil que Pelayo pasare per él cuando fuxía los moros camín de Cuadonga, y ye que too coincidía: Brez, el monte, Cuadonga y el Ríu Piloña que tien d'atravesar a nadu sol caballu... Na baxa Edá Media, cuando funcionaba'l Monestriu femenín de Sotu (Les Dueñes), había una chalana pa crucialu dao que les granibles tierres qu'abarcaba taben en dambes orielles del ríu (LLames y Sotu). 

       Pos bien, esti caminín tan chungu, iguau ex profeso pa Isabel II (Sabelita pa los amigos)  ye'l que vamos percorrer nosotros hasta Cangues d'Onís, entá meyor acondicionáu, y esto ye que los romeros de Cuadonga somos la monda (que nun vamos dicir "la corteya" o otra cosa más... benita). Nel próximu post <Llames-Cangues> afondaremos dalgo más sobro'l camín real, ¿cómo lo ves?. ]]
   
        Esti camín, esta pista de riegu asfálticu primero y zahorra y xial depués, que nos ha dexar en Llames, puntu caberu d'esta xornada, percorrímosla como embruxaos pola reina, el dondu pisu de tierra y el frescor del arbolíu la viesca ribera. Pero entá nos quedaba una sorpresa: la Ilesia de San Martín de Scotto (Samartín d'Escoto).
       Sí, tres caleyar un ratu a la vera'l ríu pela Pista los Perales fasta L'Areneru xubiemos una cuestuca metanes un biescu. Poco depués de salir yá vamoles primeres cases del pueblu, el Barriu d'El Caspio; tien bona pinta. Aportamos a un cruce onde alcontramos el segundu finxu del Camín de la Reina: nel cartelu cuéntase que Reina, cansada por mor d'esta Pista Picuda, paró a descansar nun bancu de piedra qu'entá se caltién na Quintana d'El Caspiu.

Llames de Parres, dende la capiella Samartín.
       Escaecemos la xubida al Barriu La Pesa onde entá se caltién, mui remocicada, la Casa les Monxes cerca la quintana onde los caseros pesaben el granu (maíz, trigu, escanda) que darréu pasaba ser molío nel célebre Molín de la Pesa, d'onde vien el nome del barriu. Enriba ta'l Picu Reborión al que s'asciende pela Cuesta Bodes. Nós entrugamos nel albergue Casa Mariana pol camín afayaizu pa Cuadonga:
     - Nun tenéis falta xubir a La Pesa p'algamar al Colláu onde veréis la señal que vos empobina a Viabañu. Nel cruce qu'acabáis de pasar tiráis a mandrecha según se baxa.
       Da gustu facer el tobogán per esta vistosa Pista Samartín, na fastera la llomba, camín del Albergue  La Venta, nel barriu d'El Colláu: El Sueve, el Fitu, l'Altu la LLama o'l Picu Viyao tán a vista de páxaru. Pero enantes d'agamar a la plazoleta ... ¡Sospresaaaa! : Una capiella antigua asitiada nun rellanu apaez como disimía del mundu pero al empar controlandolu enteru. Empobínamos dica'l cartelu: "San Martín de Scoto". Tamos embaxo l'embruxu les Dueñes del conventu.

<Samartín d'Escoto>, románicu y más,
llevantada coles penitentes piedres de "Les Dueñes"
           [[ La ecléctica ilesina de Samartín d'Escoto (San Martín de Scoto), de <ex coto> sedría meyor dicir, ta asitiada nos ex-terrrenos de lo que fuere l'abadía benita de Samartín de Dueñes. Anguaño pertenez a la parroquia de Santa Mª de Viabañu, nos terrenos del Cotu Llames.
      ¿Por qué la entamilgaron ellí, exenta, como desimía del pueblu?. La verdá ye que ta perbién asitiada nun pandu que controla tol valle del Piloña y al endefechu paez ser que foi adosada a otra ermita prerrománica existente, l'actual capiella de Santa Llucía, nel lladral sur. Asina pues ye una mestura de prerrománicu, románicu veníu de la ilesia conventual de Sotu Dueñes y el góticu de les portaes.
    
 
Portada principal Samartín d'Escoto

     
   A simple vista paezte tar énte un románicu. Llama l'atención les escases ventanes abiertes nesos murones de mampostería, con sillares nes esquines, sofitaos en poderosos contrafuertes na cabecera. A min dame la impresión qu'esta ilesia foi más alta n'otru tiempu. Les dos portaes de mediu puntu tan decoraes por un alfiz moduláu que caltién figures antropomorfes.


        Tien, como otres ilesies rurales asturianes, una sóleda nave rectangular con techume de madera a dos agües ya un ábside cuadráu con gótica bóveda de crucería apuntada. Los capiteles troncopiramidales del arcu de trunfu tán decoraos con motivos románicos de fueya de palma y los nervios de la capiella mayor descansen en ménsules historiaes con figures antropomórfiques femenines y d'animales, como un toru. Del monesteriu de Sotu vieno l'ara del altar , una piedra rectangular d'arenisca que ye otra de les chalgues d'esta ilesia.


Esta ye la COPA que te dan
por algamar a Samartín d'Escoto.
Pelegrín, ¿vas quedar ensin ella?
         De la cabecera tenemos pasu a la abovedada capiella  Santa Llucía, al sur, que lluz nel cañón una rústica pintura del ¿Pantocrator? separada por una cenefa de les pintures qu'hai nes paredes llaterales: Santa Llucía nuna y Samartín na otra.

             Les dos portaes gótiques de mediu puntu y con alfiz sogueáu (XVI - XVII) nun paez que vengan del monesteriu. La principal, al oeste, como dios manda, tien un escudu grabáu cola Cruz de los Ánxeles y a mandrecha otru escudu acuarteláu: caballu y caballeru de rodíes, una flor de lis, una cruz llatina y cinco puntos, blasón d'alguna familia.
      Esta ilesia foi restaurada en 1985 y declarada  monumentu históricu en 1994.]

Aportando al Colláu.
A mandrecha pa la Venta,
a manzorga pa Cuadonga.
        Xubimos, amodo, per una candial pista de tierra (lo malo sedrá cuando llueva)  arrodiaos de praos y ganáu. Pente cases antigües bien remocicaes, ente les qu'acolumbramos la Escuela, aportamos a la plazoleta del Barriu d'El Colláu. Nel centru un área de descansu con mesa, bancos ya una fonte  a la solombra d'unos plataneros ya un castañu d'Indies pergrande. A manzorga una mazanina cases onde tán el Bar, el Centru Social y l'Asociación d'amigos "La Cuesta Bodes"; un poco más arriba vese'l  Barriu L'Oteru. A mandrecha tenemos la carreterina que vien del barriu La Pesa y enfrente un caserón perremocicáu con pinta de posada medieval, ye l'Albergue La Venta. Tamién tien bar pero ta zarráu, igual que'l Bar El Colláu. Yá nun hai tantu trasiegu como va unos años y namás que deben abrir les fiestes y fines de selmana. Asina que tres asegurame que'l Camín de la Reina continuaba pente La Venta y L'Oteru sentamos a descasar un migallu nun bancu del parquín y tornamos per onde vinimos, camín de Miyares. Son cerca les tres de la tarde y entá nos queden unos doce kilómetros de vuelta asina qu'hai que reponer fuercies... ¿Ónde meyor que na soleyera mesa de madera qu'hai delantre la ilesia Samartín?.  La xinta va sabenos a poco camentando na Reina, nes Dueñes...

Cola Dueña l'Albergue La Figar
        La torna foi llevadera, ensin prises, ensin agua... entovía tuviemos tiempu pa charrar un bon ratu con un vecín de La Torea que nos punxo al oru sobro los aconteceres de la zona: el puxu les casones rurales, la familia Noriega, la importancia la Nestlé... Y entovía rematamos colos los productos de la güerta y ..... Cuando baxábemos de visitar el Palaciu Cutre xuncimos los pasos col d'una vecina de la Goleta que baxaba de La Madalena, un paseín perguapu qu'acostuma fer de cuando en cuando. Ella quedó nel Barriu La Quintana y nós - que llevábemos un día redondu - tomamos el ramal enquivocáu p'algamar a Miyares... Contentos depués de too por cumplir el badagüeyu: < Nun hai día ensin perda> terminamos tomando una cervecina fresca nel < Albergue La Figar > a eso les ocho la tarde...
     - ¡Qué raro se nos fai andar a estes hores per ehí!.
        Pa rematar el día pasamos a retratar la casa los Malatos en Vallobal, la estela los ablaidecos en Boriñes, la embotelladora d'agües.... Y tres xubir al Altu la Llama y pasar per Llibardón (la cuna'l Gaiteru) baxamos a La Villa... Yera nueche de lluna cuando aportamos a casa.

ANEXU  I:
                             << Armes  de  Piloña >>
<El blasón  de Piloña>
           
       L'escudu d'Armes  de  Piloña tien dao guerruca enforma nos últimos tiempos hasta que se s'aprobó la versión definitiva nel Plenu Municipal de 25-5-17 . Los problemes nun yeren daqué fundamental porque no esencial siempre se tuvo d'alcuerdu: < Don Pelayo y el so escuderu cruciando'l Ríu Piloña surmantaos por una cruz y la lleenda:"Adelante mio escuderu que'l mio caballu pie halla".
       Azur y Plata son los colores del escudu definitivu - más acordies colos cánones de la heráldica - tien forma cuadrillonga con base arredondiada y non en punta como figura n'algunos d'influyencia borbónica talo que'l primeru, en piedra, del que se tien conocencia asitiáu anguaño na fachada l'Ayuntamientu y que provién d'una antigua escuela de Piloña (1789).
      << El blasón de Piloña tien forma cuadrillonga cola punta arredondiada. Nel centru del campu azur dos caballeros contorniaos en plata y sable - Don Pelayo ya escuderu - surmontando, en punta, el Ríu Piloña en foles de plata y azur . Nos lladrales y en xefe la célebre lleenda : "ADELANTE MI" (diestra) , "ESCUDERO QUE MI CABALLO"(xefe), "PIE HALLA" (siniestra). En xefe, surmontando los caballeros, la Cruz de la Victoria n'oru y piedres precioses.
Al timbre la Corona Real española zarrada con pedrería (de gules, sinople y plata), forrada de gules y con ocho florones (5 visibles) d'onde xurden diademes en perles de plata y too ello coronao por un orbe d'azur ya una crucina n'oru>>
   

ANEXU II:
                 << El Monesteriu femenín de Samartín de Dueñes>

Monasterio de Villamayor, cerquina de Sotu Dueñes.
¿Yera ximielgu col de Samartín?
Semeya: <Blog. Cosiquinesdevillamayor>
        Yá diximos qu'esti MONESTERIU beneditín de Sotudueñes , embaxo l'advocación de Samartín de Tours, foi llevantáu nel sieglu XII y tevo vida - yo creyo qu'entá la tien - hasta el XV (en 1441 peslló como tal) , cuando en 1558 l'abadesa San Pelayo, dueña yá d'esti momesteriu y del de Villamayor,  autoriza los habitantes de LLames a llevantar coles sos piedres una capiella a la entrada'l pueblu embaxo l'advocación de Samartín, claro, como pudisteis comprobar poles semeyes que vos dexé enantes (lluéu póngovos más, to sea poles monxes). Claro que yá en 1552 yá roblaren el desaniciu...

Samartín de Tours, el soldáu romanu
 que compartió la capa con un probe.
      El monesteriu de Sotudueñes, qu'algamó un poderíu pergrande na zona, foi llevantáu nel sieglu XII embaxo la influyencia de la poderosa famila <Álvarez de les Asturies>. Nel sieglu XIV l'abadesa  tenía poder xurisdicional, civil y criminal, sobro les persones del cotu (¡toma esa!) qu'abarcaba dambes orielles del ríu Piloña (pa crucialu teníen un serviciu chalanes propies). D'esta miente l'abadesa podía nombrar cada añu  xuez, alcalde, procurador xeneral, a la rexidora y al depositariu xeneral mandaba más qu'Espartero).

Monxa beneditina S. XI
¿Sedrá la nuesa abadesa 5' antes
d'entrar a falar con don Gutierre?
    Los problemes pales monxes vinieren entraos nel XIV por mor del celebérrimu obispu don Gutierre de Toledo*. Esti acusóles de <llevar una vida relaxada y nun vestir l'hábitu>. Llamóles a capítulu, xunto coles de Villamayor, nel monesteriu de San Bartolomé de Nava:
     - Andàis davezu ensin hábitu y vèsevos charrar enforma colos homes...
     - Pero señor obispu, ¿cómo podemos dirixir los trabayos del conventu y resolver tolos problemes de la xurisdición ensin falar colos homes? 
     - Tengo entendío que lo tomáis mui a pechu... Cuido qu'emplegáis toles armes de muyer...
     - El conventu marcha como una seda y nun hai paru en toa la redolada...
     - Son munches les quexes que tengo escontra vós, vais pasar una temporada recluyides n'esti monesteriu de Nava. 
     - ¿Y quién va curiar de toa esta xente?
     - Los monxos del cister.
     - ¿Los del Conventín?
     - Los mesmos. 
     - Claro, asina esos rebeldes viénense-y a la mano.
     - ¡Pa Nava!

* Hai  qu'estremar ente'l reformista Gutierre Gómez de Toledo (hebo otros prelados col mesmu nome), obispu d'Uviéu ente (1378-1389) y el celebérrimu  Gutierre Alvarez de Toledo (1376-1446), obispu de Palencia, arzobispu de Sevilla, primáu de Toledo y primer señor d'Alba de Tormes, una ayalga, vamos.

Exemplu de Monesteriu femenín:
 Samiguel del Pedrosu (Burgos).
Llevantáu en tiempos de Fruela I.
                       Pue que les monxes nun llevaren una vida mui d'acordies coles esixencies d'una norma relixosa pero tengo entendío que'l obispu fizo algo trampa... Los monxos citercienses de Valdediós nun acataben de bona gana la obediencia al obispu y esti, cola fin de metelos al riegu, fízo-yos un regalu mui golosu como yera la xuriscición del Cotu Dueñes... Aprovechó la coxuntura.
    Col siguiente obispu tornen a Sotu y yá nel XVI, col obispu Guillermo de Verdemonte, axunten coles de Villamayor onde viven de les rentes. En 1545 pella el monestriu de Villamayor y les monxes pasen a San Pelayo, n'Uviéu.
     En 1558 l'abadesa de San Pelayo, Toda Suárez, autoriza a los vecinos de Llames a llevar la cantería de la ilesia monacal pal pueblu cola fin d'emplegala nuna ilesia; ésta nun ye otra que Samartín d'Escoto <ex coto>, el cotu de Sotudueñes.
     La Desamortización del XIX y la Nacional-634 (Uviéu-Santander) completaron el desaniciu.

ANEXU III:              <<Isabel II n'Asturies, branu del 58>>




< El viax de la REINA >


La Reina Isabel II cola infanta Isabel
poco antes de colar p'Asturies.
       Corría l’añu 1858 y reinaba n’España Isabel II de Borbón (M.ª Isabel Luisa de Borbón y Borbón-Dos Sicilias), la fía que Fernando VII (el que peslló les Universidaes) tuvo al cuartu matrimoniu con M.ª Cristina de Borbón-Dos Sicilias; hasta pa eso yera malu’l mui xostrón.
       Per aquel entós venía de ñacer Fonsín, el futuru Alfonso XII [1857 (1874- 885)] y la España agrícola entamaba recuperase de la cris del 54 per aciu d’una biltante industria onde’l carbón d’Asturies yera un finxu perimportante; la mesma familia real tenía aiciones n’ello y había que atendelo.
       El xeneral O’Donnel, d’aquella recién nomáu presidente de Gobiernu (terminaba’l “Bieniu progresista”), encamentó a la Reina fer un viax propagandísticu per provincies p’averar la monarquía al pueblu (so padre dexare la Monarquía fecha una gocha). ¿Qué meyor que visitar la cuna de la mesma precisamente col trubiecu del futuru rei?. ¿Qué meyor que confirmar un rei ellí onde entamare too, na Cuevona de Cuadonga?…

Playa del Pandu nel XIX.
Semeya de "Juanele" 
       Dicho y fecho, la Reina aprovecha’l branu del 58 pa dase un “bañu de multitúes” nel pozu la Cuevona de pasu que trataba l’herpes na playa’l Pandu, cuando non en San Llorienzu. La Monarquía punxo de moda los baños marinos, cosa que-y agradeceremos de por vida.
       Nun yeren namái los baños lo que la reina buscaba seique mirar poles inversiones familiares na biltante industria asturiana. El so padrastu – el duque de Riansares – yera aicionista del ferrocarril de Llangréu (la primera locomotora nomóse Maria Cristina, por so madre,) y ella mesma tenía’l güeyu puestu na mina carbón d’Arnáu.
        El 21 de Xunetu de 1858, nun coche percómudu de cuatro caballos – regalu del rei de Francia-, la Reina emprimó de Madrid camín de la Cuna d’España col trubiecu embaxo’l brazu, la infanta Isabel de la mano y arreando con una pata al consorte Francisco d’Asís .
         El primer día anocharen en Villacastín. Dos díes más tarde taben en Valladolid y tres pasar per Medina de Riosecu y Lleón xubieron el puertu Payares y plantaron en Mieres, ande anuecharen, agospiando nel palaciu del Marqués de Campusagráu (nun sedría la cabera vez). Na capital de les comunicaciones la reina visitó Fábrica Mieres, per aquel entós controlada pol grupu del so padrastu, el marqués de Riánsares.

La reina Isabel y el so maríu
visitando Fábrica Mieres.
(Semeya:Blog de Acebedo)

       Algamaron a Uviéu la tarde del 31 (diez díes Madrid-Uviéu) tres xubir el Padrún, baxar a Olloniegu y xubir la Manzaneda. Entró na capital per San Llázaru y foi recibida como una reina por toles autoridaes provinciales y nacionales asina como aclamada por un pueblu xenerosu y agradecíu (¡Cuántu-y tuviere prestao al obispu Pelayo tar ehí! ¡La Reina n’Uviéu! ¡Colo qu’él trepó cola so reina Urraca!. De xuru que-y tuviere pestao a esgaya confesar al confesor real Antonio M.ª Claret y a la inquietante confidente Sor Patricia). Lo primero que fixo foi visitar la Catedral al sentir del “Te Deum” talo que la so tocaya Sabel la Católica cuando foi coronada en San Miguel (Segovia). Dende’l balcón de Campusagráu ofreció los guajes al pueblu y la ciudá d’Alfonso’l Castu resplandió esa nueche embaxo una lluvia de fueos artificiales, presaxu d’un viax inolvidable, qu’ella festexó dende Prado Picón.
        El 2 d’Agostu paséu folklóricu pela ciudá, dende Santa Clara (edificiu Facienda) hasta’l Bombé (Parque San Francisco) pasando pela Universidá (de xuru qu’en Rialto la brindaron con unos carbayones).
         El día 3 visita la fábrica de Trubia onde ye recibida embaxo un arcu de cañones; el de mayor calibre llevará’l nome d’Alfonso y ella mesma coloca la primer piedra d’un taller que’ha de forxar fierro duce ya aceru.


         El día 4 llacuada y teatru enantes de colar pa Xixón la tarde del 5 d’Agostu. Tres selmanes tuvo la Reina en Xixón tomando baños de sol, de mar y de pueblu. En San Llorienzu y nel Pandu yá había casetes de bañu, los balnearios vinieren nel 74 y fueron usaos por Alfonso XII nel 77. La célebre Reina nunca nun escaeció’l recibimientu que-y ficieren los diez mil habitantes de Xixón acorropinaos embaxo un arcu de trunfu na cai Corrida. Si en Mieres ya Uviéu agospiare en dos talos palacios en Xixón nun díbemos ser menos y abellugámosla en Sanestébanu, nel mesmísimu Palaciu del Conde Revillaxixéu y Marqués de San Esteban del Mar, Grande d’España, enfrente la playa’l Pandu. Viéndola tan contenta los políticos llocales aprovecharen pa ponela al oru no que cinca a les necesidaes municipales, como yera la ampliación del Puertu. Lluéu vinieren les hosties ente los “apagadoristes”, que preferíen iguar el que había y los “muselistes”, que yeren partidarios d’unu nuevu nel Musel. Yá sabéis quien ganó: Xixón.

La Reina Isabel na Mina d'Arnáu (Castrillón)
Semeya única del arqueólogu Iván Muñiz López,
Direutor del Muséu d'Arnáu.
        Nun perdió’l tiempu la rapaza y aprovechó pa mecese col pueblu baxando a la mina carbón d’Arnáu (24-8-58), de la Real Compañía Asturiana, talo que la de Santa M.ª del Mar. P’algamar a la mina de primeres garra una falúa nel Puertu hasta San Xuan de Nieva y darréu un tren quela lleva a Arnao (yá tenía gana ella de xubir en tren…). Baxó más d’ochenta metros y, fecha una llaceria – un hecce homo, dicen agora – tomó un vinu español na Campa Arnáu colos esmadexaos políticos que la acompañaren nel tránsitu. Dende’l Cabu Peñes sintieron los glayíos de los mineros cuando-ys regaló 4000 riales d’oru que tuvo a bien roblar con una vela na paré de la mina: “I” (Isabel). Tres el trunfu tomó un merecíu descansu nel Palaciu de Ferrera, qué menos.


       Tamién nos cuntaron que se dio un vueltu pela ciudá de Ruy Pèrez (¡Meca, yá tengo entamada otra ruta!):
<<Arcu los Molinos, Plaza la Constitución (España), ilesia San Nicolás, capilla de los Alas, Muelle, Ponte vieya de Sabugo, cai d’El Cañu, Campu la Mercé, Puente Nuevu, cai San Bernardo y Colexu les Monxes>>. Cumplía los deseyos d’O’Donnel al pie de la lletra.


        Agora vien lo más gordo: ¡El viax a Cuadonga!
Cola piel moreno y la herpes esaniciada dafechu (la mar de Xixón ye única, yá sabes) entama la visita al orixe, el camín aniciáticu a la Cuevona onde Pelayo dio un repasu a los moros, confiaos na so superioridá militar. La Reina quier ver la cueva, el santuariu celta, y narboliar la Cruz de la Victoria talo d’un Alfonso se tratare.
Deciden que tire pela Carretera la Costa – yo creyo que foi pola carretera Pola Siero - y el 27 d’Agostu sal la reina camín de Cuadonga, n’honor de multitúes, acompañada pol maríu, los dos infantinos, don Antonio M.ª Claret y un séquitu de políticos de “quítate p’allá”. Quería dar el campanazu p’anubrir la visita a Cuadonga que ficieren l’añu anterior los Duques de Montpensier y que tantu rixu llevantare n’Asturies cola so visita del añu anterior:

       - Va enterar la mio hermana quién ye la Reina.


        El día 27 d’Agostu la Reina , tres ser aclamada en Pola Siero y Nava, algama a L’Infiestu y fai una parada obligatoria na capiella rupestre de La Virxe de la Cueva. Tien que salir de la ruta, pero merez la pena. Asitiada a un kilómetru de la capital, na carretera que tira pa Campucasu, hai una capiella “a teyavana” al abellugu d’una roca caliar; algo digno de ver, según el so confesor Antonio M.ª Claret, y nun dulda en visitala. Los piloñetos saben de la importancia del envite ya igüen-y una ponte provisional sobro’l Pilona, ancha y segura, pa que la ilustre pelegrina s’arrodiye énte la Virxe ensin pilancu algún y poder escuchar la misa qu’oficiare’l Patriarca de les Indies. Darréu una comida campera onde la Reina invita a 1000 probes del entornu.

Pel Camín de la Reina.

        Y agora camín de Parres peles tierres de les Dueñes tres dexar atrás Villamayor y Sevares… Otra vuelta cruzar el ríu Piloña (quería ser más que Pelayo) y xubir seliquino hasta Llames. Equí entama lo que güei conocemos como

El Camín de La Reina :

<Llames – Viabañu – Romillo – Romillín – Vega los Caseros - Villanueva - Cangues d’Onís y Cuadonga> 
y que nun ye otro que la farda d’esti post.

   
En Llames tuvo la Reina que sentar nun bancu qu’entá anguaño se conoz como’l “ Bancu la Reina”. Quiciabes se parare a contemplar el paisax o la ilesia de San Martín d’Escoto. De xuru que-y cuntaren, con munchu procuru, la historia d’esta capilla y del esaniciáu monesteriu de les Dueñes de Sotu, nun fuera que camentara en comparances luxurioses…
         Nada fácil foi tresnar esti camín pa que la Reina nun careciere de respigos. La verdá ye que nin tan siquier taba del too temináu cuando llegó y diben iguándolu sobre la marcha, al son de la xarré real. Pero quedó ehí pa los restos y bien que-ys vino a los vecinos, talo qu’a nós, magar reburdiaren un poco d’aquella por mos d’algunos esbardagüertos. El comerciu con Cánicas, l’antigua capital del Reinu, diba ameyorar bien dello.

Cangues d'Onís: Ponte Romana
        Llegó la Reina a Cangues d’Onís el mesmu día 27 embaxo un artu de trunfu d’estilu asturianu y un cartelu que rezaba:
                                   <A la Reina, la Corte de Don Pelayo >.
Agospió nel Palaciu Cortés, en ca del Abogáu de los Reales Conseyos, don Antonio Cortés y Llanos. Esi día l’anfitriona tuvo l’atrevencia de parir un guaje que la mesma Reina bautizará por poderes, na ilesia de Santa Mª del Mercáu (Muséu la Reconquista), unos díes más tarde.




Cuadonga: La Cuevona.
(Esperando pola Reina)
 
     Al día siguiente, 28 d’Agostu de 1858, la Reina Isabel II pisaba la Gruta sagrada tres ferregüeyar en Repelao l’obeliscu a Don Pelayo que la so hermana regalare a Cuadonga.
Baxo paliu y énte’l clamor del xentíu, el repique la Campanona y tola corte celestial de políticos, la Reina traviesa l’arcu vexetal onde ye recibía pol obispu que l’acompañará hasta la Cueva. La misa solemne cuerre a cargu del so confesor Antonio M.ª Claret y la confirmación de los infantes como Pricipes d’Asturies del Patriarca de les Indies, Tomás Iglesias Barcones. Darréu la receición ( por nun dicir yacuada) na Sala Capitular de la Colexata vien celebrase una procesión nel Campu del Colláu onde la Virxe lluz el riquísimu vestíu que-y donare la propia Reina (dexó-y otru de repuestu pa que, a poder ser, nunca nun punxera’l de los Montpensier; coses de reines).
     Enantes d’atapecer colaren pa Xixón y el día siguiente pásenlu despidiendo los amigos y faciendo les maletes mientres los guajes berren al altu la lleva.

             - ¡Mama, yo quiero quedar en Xixón! - reburdia Sabelita.

         El 30 d’Agostu xinten n’Uviéu y agospien en Mieres, en ca don Bernaldo. Muncho-y costó a la Reina despidir Asturies; nunca nun va alcontrar xente tan encantadoro nin paisaxes tan allucinantes. Asturies ye un fierru que te dexa marcáu de por vida.


AGASAYOS:
. Don Francisco J. Fernández Conde: <Gutierre de Toledo, obispo de Oviedo (1377-1389).
. A Xurde Morán pola so llabor en favor del asturianu y no que cinca a esti post pol llibru:<Camín de  Xixón a Cuadonga>. 
. A l'<Asociación cultural El Garrapiellu> por balizanos la ruta.
. A la wikipedia, como siempres. 

viernes, 18 de mayo de 2018

< De co casa a Cuadonga [7]: Boriñes - Miyares >

                            << De co casa a Cuadonga [7]: Boriñes - Miyares >>

                                                {Un paseín neandertal }

Enantes foi a caballu, agora.... nesta bici neandertal hasta Miyares.
Pero nun vamos solos, < Los 13 del Sidrón > vienen con nós.

<<
Salí de co casa a pata
pero en Vallobal prindé
esta bici tan prestosa
qu'en San Llázaru alcontré.
Que nun s'esmoleza l'amu,
que-y la pienso devolver >>

                                                        <<  Quiero dir a Cuadonga
                                                             quiero averame hasta'l cielu
                                                              porque en Cova Dominica
                                                              prendió daqué día un sueñu.
                                                              lo que biltó con Pelayu
                                                              nun pue cayer en cagüercu.

¿ Presu ta del Congresu
 de la Santina'l so  sueñu?
              Pienso dir a Cuadonga
            pa rescaldar esti fueu
            porque pa min ye importante
            España, nun ye un embelucu.
               Perdiré-y a la Santina
             que se pierda pel Congresu
             pa que xorreza la flama
             y que-yos igüe'l celebru,
             la Política, de verdá,
             anda a xucu baxeru.
              Yo, pola parte mio,
             faigo, manín, lo que pueo,
             sascudir a la Santina
             pa que resuelva l'entueyu. 


                                                   
                                                 
                                                            Al pasar per Vallobal
                                                         asoleyó un garapiellu,
                                                         quimera o realidá
                                                         yo alderico con ellos:

Sidrón de Vallobal
(Cliché atopáu nel h.ou del Sidrón) 

   - ¿Sos quiciabes homo sapiens ?
   -- Nun cuerras tanto, morenu,
    somos  cucios  neandertales
   y na Cueva del Sidrón
   caltenemos entá'l ñeru.
   - ¿Sabéis si pa Cuadonga
   tira per equí'l senderu?
   -- Namás siguir les flechines
  que t'amuesa'l Garrapiellu.
    - ¿Queréis venir con nosotros?
  Igual cumplís daqué sueñu...
  -- Pos voi pola bicicleta
 que vien de faceme'l neñu
 que tien el sangre de playu
 y más llistu ye qu'un arbeyu.
Coles ruedes d'aquel carru
vien da-y la vida a tou esti inxeniu;
que nun ruxa per Asturies
que'l neandertal ye un felpeyu.
 - Sía, entóncenes, Sidrón,
 sigamos de Pelayo'l carreru.


                     
      Cuando diba pa Boriñes pel Camín de Cuadonga sentí les campanaes del 
Monesteriu San Salvador de H.uentes llamando a maitines, y nun pudi resistime....
¿ Nun te petez escuchales?



     Toi solu.
     El gripe d'esti añu bien pegañoso y cuando prinda a daquién nun hai manera soltalo, como ye'l casu la parienta.  Asina qu'aprovechando'l bon tiempu decido avanzar un poco nel Camín, un paseucu de 3 km pa nun encambriar (amás de la torna y les vueltes pela redolada).
     P'averame a Boriñes dende Xixón colo pela autopista (A-8) hasta Maliayo y depués sigo pola AS-332 hasta Anayo.  Poco depués agarré la AS-258 hasta Viyao y d'equí baxé a Boriñes per una carreteruca estrencha, perpindia y permala - más baches qu'un ermu - que me dexó na vega del pueblu, na Soledá; a tiru flecha la Cueva'l Sidrón.
    - Ten curiao; pon tol procuru al baxar que tien unos baches del copón.
    - Van iguala, yá hai presupuestu, pero entrín y non...
       Nun di la vuelta porque nun alcontré onde, y por vergoña.... Bueno, y porque les vistes son impresionantes... "París bien val una misa".  

Dende Viyao tomamos esta semeya l'entornu.
Al valle ye onde tenemos qu'algamar: Boriñes.
El Sueve, a manzorga, sedrá'l nuesu testigu.
        La farda de dir pela Villa yera xubir a San Xuan d'Amandi pa facer unes semeyes guapes de les cabeces de picu. Tamién quería comprobar si les había en S.S. de Fuentes, pero nun les vi. Paré pa facer unes fotuques a La Venta Coru y a la estela de los ablaidacos na ilesia Samartín de Tours asitiada na puerta sur, al abellugu del adriu. Total, que cuando llego a Boriñes - tres pasar Fuentes, Coru, Breceña, Sietes, Anayo y Viyao - yeren les doce menos cuartu (11:45), bona hora pa entamar la caminada un montañeru. Tenía pensao aparcar delantre la ilesia pero taba petao por mor de la misa los domingos asina que tiré un poco más alantre, xunto la escuela antigua ya una capillina, la de San Roque, patrón del pueblu. Precisamente ente estes dos ilesies celébrase una procesión a mediaos de'Agostu, con "puya de roscón" incluyida y  "cucaña", onde los mozos intentarán coyer el ramu entamilgáu na picalina d'un poste d'ocalitu, peláu y engrasáu. Igual esta ocurrencia-yos vien de los ancestros neandertales del Sidrón... (Más tarde va camentame Sidrín que foi cosa d'elli, aprendiólo de so madre, playa onde les haya, que lo tenía visto facer nel Cai de Xixón, xunto l'ismu que daquella daba pasu a la islla Cimavilla).

Andechando en familia
(Semeya DibuixRocaBousreduit)
      Tres falucar un poco colos dueños de la Casa d'Aldea "El Raitán" y confirmame la esistencia la cueva del Sidrón ellí cerca - magar nunca la visitaren -  embredamos dica Vallolbal pasado per delantre la ilesia, ehí onde la carretera empina pa Sieres. Buscamos el barriu La Soledá tres dexar atrás la casona d'aldea "El Vallón" y la Sierra. Tenemos el ríu Borines al llau onde vemos, creemos, dos molinos a xucu baxeru. Enfrente, na fastera del monte, el cogollu del pueblu, lo que llamen La Cuesta, onde destaca'l cilíndricu palombar de la Casona Palaciu.

Equí veníen a bañar los neandertales del Sidrón.
El Puentín de La Rebeca
          Yá tamos baxando sele pela carretera Vallobal (AS-259), al son de les agües del Ríu Borines y daqué otres riegues que bañen la vega. Enseguida alcontramos una, La Rebeca, lo que nos obliga a pasar un puentín antigüu, con tornamieos de piedra.
   Siento como si me tuvieren siguiendo. Dende que conocí la esistencia la cueva'l Sidrón,  ellí mesmo, a tiru flecha la Soledá, onde tuviéremos xintando la xornada pasada, tengo como una rocea.... A ver si se me presenta un neandertal d'aquellos de va unos 50.000 años... ¿Nun taría mal, eh? ¿Y si somos nós los que vamos a buscalos magar nun sía namás que virtualmente?... Igual ansí dalgún ancestru m'acompaña y escaezo esta soledá ablucante.

                                                    << Sidrín, Sidrón >>


Sidrín cliché.


   << Hola, gallos, soi Sidrín
        el fíu neandertal de Sidrón,
        hai quien diz que toi mecíu
        con una sapiens Xixón
        por aquello los inventos
        que me xurden a montón.
          Preguntaré-y a mio padre
       onde alcontró esti bombón:



¿La MA de Sidrín?,
los suaños de Sidrón.

(Semeya arrancada de la memoria coleutiva
del < Terceru del 68 >)






   -Foi un día na berrea
Camín Real de Pión,
cuasi ensin dame cuenta
terminé nel Molinón.
Vi de sutrucu una neña
¡vaya cazu, qué pibón!;
yo namoreme nel actu,
ella enchipóse del too
y nel sable San Llorienzu
l’amor nes foles biltó.
Nun me preguntes, magüetu,
qué coño ellí asocedió,
el casu ye que la playa*
dexó por mi’l so Xixón
y a los nueve meses xustos
ñacisti tu, l’inventor**.
   - Pos esta vez voi facete
una bici d’un portón
p’arribar a Cuadonga
dexando peraltu’l pendón;
que s’enteren per Asturies
quien son <los trece’l Sidrón>.

Nota:

* Yá sabéis, foriatos, que los playos son los habitantes de Cimavilla o perende Xixón.
** Por estudios fechos colos neandertales de l’asturiana Cueva de la Güelga (Cangues d’Onís) sábese qu’estos convivieren colos sapiens. Vete tu a saber si’l mio Sidrín nun ye la confirmación de la teoría…

Dende La Iría tornamos la vista pa despidinos de Boriñes
       Vien un tramu de carretera plana y recta pero agradable d'andar por mor del ruxerrux del ríu, daqué molín y los  ciclistes o corredores de fondu que van o vienen .... Alcontramos una nave-cuadra, pa ganao vacuno, y dalguna casona importante como na Iria (¿mediaos del XX?),  a la que s'accede per aciu d'una escalinata abalustrada; o'l migollu de Casa Nueva, que destaca tanto pol so color acolorazáu como pola piedra visto. Tres dexar a manzorga'l cruce pa xubir a Muñío llegamos a otra ponte dende onde acolumbramos un núcleu de población sobro'l que destaca la ilesia, entamilgada nun cuetu y tapecida pola viesca de ribera.

L'antoxana Vallobal: Horru y LLavaderu.
        Per un ramalín a la izquierda, que te lleva al llavaderu, vemos la cadarma d'un horru que nun va tanto taba bien gayasperu, como comprobáremos por una semeya qu'esplubliza Xurde nel so llibru. Una casona abandonada ye l'antoxana del pueblu: VALLOBAL. La primer impresión ye perbuena; una filera de cases antigües, como la de Mundo, pero iguaes con gustu dannos la bienllegada. Ponemos la Canon a funcionar tres pidir permisu a una vecina col enfotu d'inmortalizar l'ayalga.
A mandrecha, dominando'l cogollu del pueblu, vemos  la Ilesia de San Llázau. Semeyes, postures, ángulos y un paséu pel adriu pa rematar la faena.

¡Bienllegaos a Vallobal!
       Vallobal -143 m/snm - ye una de les 24 parrroquies del Conceyu Piloña perteneciente al Partíu Xudicial de L'Infiestu. Tien unes 34 viviendes seique la cuarta parte sían namás de primera vivienda. Otra parroquia magüeta, non mui lloñe d'equí, ye Belonciu, capital que fuere de la tribu los llugones, según Ptolomeo. Tamién en Piloña se tien abellugao (Brece= ¿Brez?, ¿Brecín?....) don Pelayo cuando colare de Córdoba . Andaba perseguíu por Munuza pero alertáu por amigos crució'l ríu Piloña pa escondese nel monte (el Sueve, ye de suponer):
     - ¡Agora buscáime, sarracenos!
                                                                Si xubís al Picu Pienzu
                                                                bríndovos con dellos fayuelos.
     
San Llázaru Vallobal (XVIII)
       De lo primero que vemos ye la ilesia, antoxana del migollu'l pueblu, engaramada nun cuetu.

    [[ San LLázaru de Vallobal (XVIII) ye una ilesia d'una sóleda nave rectangular con testeru reutu y pórticu perimetral.  El prebiteriu presenta una bóveda d'arista a cuatro nervios con florón na clave y ta separáu de la nave por un arcu trunfal de mediu puntu. El finu retablu ye de mármore y alabastru. 


Dende l'Adríu
     La nave, con cubierta a dos agües,ta dividida en dos partes estremaes con bóvedes de crucería talo que l'Ábside. 
     El pórticu, abiertu nel lladral sur, tien cubierta de madera y ta sofitáu en columnes toscanes que descansen sobro un murín de mampostería. L'interior illumina per aciu d'unes ventanes d'arcu ya un óculu nel hastial (imafronte triangular), que tamién lleva espadaña biocular.]] 

Dende'l Güertu los Malatos: Hospital enfrente,
la Ilesia San Llázaru nel cuetu del fondu.
       Pero San Llázaru de Vallobal más conocíu que pola ilesia en sí yelo pola so célebre Malateria, porque nesti pueblín hebo durante más de quinientos años - del XIII al XVIII - una casa-hospital dedicada al cuidao de los enfermos de la llépara y enfermedaes asemeyaes. Tolo que la piel tenía de raro yera llépara:¡ a correr!.
      La llépara o llepra ye una enfermedá infeciosa y crónica que s'amuesa por manches y deformaciones na piel asina como por debilidá muscular y daños nel sistema nerviosu. Si nun se trata convenientemente (antibióticos) pue ser contaxosa y hasta mortal por mor de la bacteria  Mycobacterium leprae que fue descubierta en 1874 polo que na Edá Media yera poco menos qu'incurable: llavar (agua de Borines), rezar y tocar les tablines de madera pa poner sobre avisu a los vecinos que llegaba daquién coles manches na piel. Si tuvieren antibióticos.... Pero la penicilina nun llegó a España hasta mediaos del XX. Entá m'alcuerdo cuanado padre me trexo a Xixón la primera vegada por mor d'un exame na U. Llaboral. Llevóme al parque Xabel la Católica y delantre la estauta de Fleming va y espétame:

Dr Fleming (Parque Sabel la Católica, Xixón)
Semeya de "Jemper"
    - Fíu, gracies a esti home tas vivu.
     ¡Ondia!.Yo pensare que taba vivu gracies a elli pero esi día decateme que pol méritu  d'una estatua podía siguir garrando moyaures tranquilamente. Lluéu vendríen les inyeiciones d'aceite-hígado-bacalao (oleum morrhuae)*, los curanderos y los ponches de cáscara güevu batíes en vinu blanco ...Pero la media del Titánico siguía siendo Tani-Daniel y yo'l guaje más neciu, digo, más feliz del reinu arrollicándome pelos champanes ( y les perres que tenemos gastao en Milton pal chupu'l guaje....¡Viva la contaminación!). Pero esto son otres histories, que yo nun yera malatu seique un poco malinu.
*NOTA: El nomatu "oleum morrhuae" paezme mui apropiau. Cada vez que diba poner una banderrilla d'aquelles tenía la mesma sensación que si fuere l'oleu pa los muertos... ¡Muncho dolía!.
    - Anda, cativín, dexámoste dir na bicicleta.... 
Sí, una BH que nun s'estremaba muncho de bici de Sidrón ... Por mor de la BH Sidrín, los fungos de Fleming y l'omega 3 del bacalao, que nun podía ver (agora nun m'alcanza'l paguitu pa pagalo), salí del morri-morri y toi nel corri-corri. Gracies. 

La Malatería
   Les primeres noticies desta Malatería vienen del añu 1266 per aciu del testamentu del arcedianau Fernando Alonso (yá corría esti paisanu) . Les lleproseríes manteníense gracies a les subvenciones de la xente, sobremanera de los nobles pudientes, claro. Tamién la ilesia ya órdenes relixoses apurríen lo suyo ensin escaecer les aportaciones de los propios enfermos. Bueno, estos pa entrar - a mediaos del XVII - teníen que pagar un copín (7 kg) de granu pan al añu.

Una Sierra na quintana. 
    Cola fin d'autoabastecese no que podíen a vegaes mercaben algún terrenín pa semar o propiedaes que devengasen dalguna renta. Son conocíes les aportaciones de famosos como Pedro Díaz de Nava qu'en 1289 donó 100 maravedinos  o los cuatrocientos de Rodrigo Álvarez de las Asturias en 1331. L'alministración d'esta malatería corrió a cargu de la poderosa familia Estrada. Entá queda en Vallobal la Güerta y Casona de los malatos.


Caleyando amodo per Vallobal

Curiosidaes:
1 Copín= 7 kg .- 1 Celemín = 2 copinos (14 kg) .- 
1 Faniega=56 Kg ò Litros. = 4 celeminos = 8 copinos. 
      El caberu malatu de Vallobal diéronlu d'alta en 1776 al tiempu que pesllaba d'afechu l'Hospital y pasaba a depender, talo que tolos de'Asturies, al Real Hospiciu d'Uviéu que los terminó arrendando a particulares hasta qu'en 1843 los punxo a subasta pública. La Malatería Vallobal entá se pue contemplar, fecha una llaceria, cerquina la ilesia, xunto al Camín de Cuadonga. Déxovos per ehí una semeya.
                                                   *******************************
                                            De Vallobal  a  Miyares 

Saliendo de Vallobal , Miyares a 400 m.
        Pero yá ye hora dexar les llaceries y siguir camín de Miyares, nos rimeros del Sueve. La verdá ye me da hasta pena colar d'esti pueblu tan guapu; menudes cases tien, vese que foi bien ricu. Pali-pali pola AS-259 vamos saliendo de Vallobal si bien enantes alcontramos un ramal a mandrecha qu'indica: <Pintueles 5 km> ; pa otra vez tiramos per ella pa llegar a l'Infiestu (12 km) al traviés del santuariu de <La Virxe de la Cueva>. Pero'l cartelu qu'agora nos interesa diz: < Miyares 400 m >, una romería.

Entrando en Miyares
        Sí, una romería magar tengamos que xubir un poco pela cuestuca Miyares. Pero la gayola'l sol al empar que la solombra l'arbolíu, domináu pol carbayu, tresmítenos allegría tala que nun santiamén tábemos entrando nel míticu pueblín. Miyares ye un finxu del Camín onde teníemos ganes de llegar, ente otres razones pa saludar unos amigos que tienen una Casona-Albergue Rural, antigua casería de llabranza,  de lo más prestoso; con toles ventaxes qu'ofrez la tranquila zona rural y les comodidaes d'una casona perfechamente adautada a los tiempos d'anguaño. Nada te falta nesti palacete rural a tiru piedra d'Infiestu (8 km), de Colunga (18 km), de Cuadonga (32 km), de Ribadesella (34 km),  del Sueve .... ¡Cómo presta una sidrina embaxo l'horru viendo pasar los romeros camín de Cuadonga!.  Alcuérdate: <La Figar>. Pues alcontrala na web: <www.casonade miyares.com>
      Namás llegar a Miyares yá te das cuenta que ye un pueblín afayaizu. Les cases enfilaes nos lladrales de la carretera como dándote la bienllegada, el megollu del pueblu onde destaca la torre campanariu de la ilesia, y delles casones galería como la de los célebres Estrada,  la llanura del fondu que remata allalantrones colos Picos d'Europa onde s'alza, poderosa, la Peña Santa. Pero más cerquina, al par nuestro, llevanta una torre cuadrada, a mandrecha: señoríu, abolengo, suaños.... ¡La Torre Miyares!.

Desafiando al Sueve, tan cerca; y a los Picos d'Europa, tan lloñe....
La torre Miyares llevanta poderosa, ecléctica, dominante...
Y como non, desafiando al tiempu  dándo-y, angüaño, utilidá . 
         El turruxón de los Villa o Palaciu L'Omedal , propiedá privada, queda metanes la finca asina que nun ye posible averase pero podemos facelo col zoom y dámonos por satisfechos. La Torre Miyares ye un turruxón de finales del medievu (XIV) que se foi complementando con otres construcciones aneyes pa vivienda cuando'l caráuter defensivu de la mesma escaeció'l valor poliorcéticu que tenía. ¡Bona idega!. Dame pena ver per Asturies bayura castiellos, turruxones y palacios escaecíos de la mano de Dios.... y del home. Tamién tien capiella propia ( nun sé por qué los ricos tienen tanta necesidá de rezar, nun hai palaciu ensin capiella).

Casona Albergue "La Figar".
Si faes el Camín de Cuadonga
¿ónde meyor pues quedar?
        Miyares , a 176 m/snm de media, ye una parroquia del conceyu Piloña asiatiada na falda sur de les montañes del Sueve. Tien una estensión de cuasi 4 km2 ya una población d'unos 200 habitantes repartíos pelos barrios de La Goleta, el propiu Miyares (el más poblaú), El Cantil, El Palaciu, El Pandu y El Corral.
       Miyares, amás de palaciu ya ilesia,  tien una arquitectura patrimonial importante tanto de casones asturianes como de tipu indianu. Y que podemos dicir de los horros... Ye un pueblu de ricos.
    La actividá cabezalera ye la ganadería: vacuno y equino. Pel iviernu pastien na llanera, al par de casa, y pel branu nos montes del Sueve. N'Agostu, tercer sábadu, celebren nes brañes la fiesta del asturcón. 

<Santa María de la "O">, Miyares.
        [[ La ilesia de Santa María de la O ye d'estilu eclécticu.Tien planta de cruz llatina y presenta nave, transeptu, sacristía y un llocal auxiliar. L'ábside, más eleváu, ye de cabecera plana con bóveda de llunetos, nervíos y florón. El cruceru tien arcos torales y bóveda d'arista. Les capielles de los lladrales tienen retablos de madera tallao y bóveda de crucería.
         La nave ta dividida en tres partes separaes por arcos de mediu puntu sofitaos sobro columnes adosaes que se reflexen nel esterior per aciu d'unos contrafuertes. Tien bóveda de crucería, ventanes de mediu puntu con vidrieres y dos puertes d'accesu, una pel adriu ya otra per un lladral.
           La torre asitiada  a los pies tien tres pisos: Nel baxu, un adriu perpiquiñín, vemos un batisteriu a un llau ya una escalera pal otru. Nel primer pisu ta'l coru illumináu al traviés del coloríu d'una ventana bífora ornada por un reló que suena marcando'l tiempu . Sigue col campanariu cubiertu con chapitel de pizarra y remata la techume con una cúpula piramidal a cuatro agües presidida por una cruz radial neoclásica.
           L'imafronte presenta portada n'arcu mistillíniu rematáu con frontón curvu y flanqueáu por columnes con base de moldura, capiteles decoraos y arcos de mediu puntu.]]
     
ANEXU  I: 
                                                     Los TRECE del SIDRÓN

Portada del llibru : <Los 13 del Sidrón>
          El complexu cársticu de La Cueva’l Sidrón tiense desendolcao nel interior d’un macizu pedresu del paleóxenu formáu por conglomeraos caliares perencimentaos con arenisques ya arcilles más blandies y travesáu por delles riegues que van formar, favorecío tamién polos plegamientos y la resquiebra de les roques, un llaberintu cársticu de lo más ablucante y prometedor dao que nelli asoleyaren fósiles humanos neandertales y más.

L’endocarst – l’interior – presenta cuatro niveles:
. N. Superior: Más superficial y mui cambiáu dende aquella.
. N. Intermediu 1: Un sistema de galeríes.
. N. Intermediu 2: Onde ta la Galería Principal (G. Ríu) y les tresversales como Galería de la Güesera (Galería del Osarriu).
. N. Inferior: Freáticu activu, accesible namás en dellos puntos.
L’exocarst: Los niveles citaos vense reflexaos nel esterior del h.ou (valle ciegu, depresión o poljé) del Sidrón en forma de terraces.

(Semeya qu'atopé nel blog de Marisa:<Mitoloxía asturiana>)
        La galería más chunga del complexu ye la estrencha Cueva de la Güesera (Cueva del Osario) qu’alcanza los 5 m d’altor y ye onde aprucieron los güesos de 13 humanos y bayura d’aperios de piedra (instrumentos líticos) fechos polos neandertales.

         . ¿Cómo tien llegao tou esti porgüeyosu material a esa sima?
      Al paicer la chalga taba l’abellugu nel esterior pero por mor d’una tormenta foi arrastrada violentamente – una riada - a capes inferiores mecía ente xiga, sable y arcilla que foi, a la postre, lo que-y “dio la vida” al torgar los güelpes rabiosos.

Trabayando na Güesera
(Nel llibru:<Los 13 del Sidrón)
     Los más de 2500 güesos humanos atopaos nel Sidrón, pertenecientes a toles partes del cuerpu- cráneu, cara, troncu ya estremidaes - son la coleición neandertal más completa y allucinante de la Península Ibérica; vamos que los piloñetos fueren lo más florío d’España ( y deben siguir siendo, pos tengo un pariente que pocu camudare d’entós p’acá – 50.000 años - polo que saco de lo lleío n’internet). Un pequeñu “peru” podríemos pone-yos a la nuesa familia de Boriñes…. Dellos güesos – mui francíos - presenten marques …. escamantes, como d’haber arramplao cola carne. ¿Canibalismu, ritos máxicos o les asturianes yeren perguapes?… Falamos d’asturianes en xeneral y non solo de les piloñetes porque sábese polos estudios mitocondriales del ADN que les tres muyeres adultes del Sidrón nun yeren de la mesma triba que los homes; vamos que los de Vallobal diben a “pescar” moza pela redolada, como siempres y como tien que ser pa refugar enfermedaes dexeneratives (ansí salió’l mio pariente de guapetón, intentaré     dibuxalu).

Navayes neandertales "multiusos"
(Yo soi heriede d' una paecía de mio güela)
                  Pa manipoliar los cadabres – y pienso que sobremanera otros animales – emplegaben piedres afilaes - raxoles - de silex de Piloña, una variedá per dura de cuarzu (7 escala Mohs), tan célebre nel Paleolíticu que delles muestres tiénense alcontrao nos valles del Nalón, del Cares o hasta na mesma Cantabria… Coimes, mira tu per onde’l primer negociu de los magüetos de Boriñes nun foi l’envase de les sos sulfuroses agües seique la esportación de piedra de silex (primu Obelix, ¿sedríes tu ún d’ellos?)
Bueno, tamién se descubrieron dellos xenes neandertales, como’l MC1R pol que nos enteramos qu’había piloñetos pelirroxos (yá verás qué guapu me vas quedar…) y la piel claro. Por otru, el FOXP2, supimos que los neandertales teníen capacidá pal llinguax (h.oder, como si nun lo supiere yo, campeón…). En fin, con dicite que pol xen ABO tienen controlaú hasta’l grupu sanguíneu…

Dibuxu neandertal de Sidrón.
< El mio guaje ye la H (llee hache, anda)
que la B -¡BIEN!- póngo-yla yo
pos con esi cambalache
llego ceo qu'un avión. 
Una bici ye BH
lo demás, ¡válgame dios!
¿Cómo yera un bon mozu del Sidrón? 
     Pos un bigardu d’unos 165 cm (la muyer un pelín más piquiñina y galana), col tórax de pipa sidra y les estremidaes curties pero fuertes. Tenía’l celebru grande (1400-1600 cm³) - mayor qu’un sapiens (1350 cm³) – , el cráneu allargáu y aplanáu, los parietales arredondiaos y el moñu (chiñon) occipital abombiáu. Si a esto amestamos un enteceyu abultáu (pero menos qu’otros neandertales, qu’hai niveles, eh) con unes ñaples anches y la frente curtia, inclinada y abultada con un cazu escaedizu dan… (¡ves, al mio primu!).
        Lo que si teníen guapo los piloñetos de Boriñes yeren los dientes (sedría pol agua) que nos apurren bayura d’información. Sabemos que los dientes crecen por superposición de capes d’esmalte y dentina, como los aniellos de los árboles, que nos van desplicando los ritmos de la vida; asina conocimos que les mas destetaben a los guajes a eso de los tres años y que’l cambiu de dieta nun lu llevaren nada bien porque tienense detectao dellos parones nel crecimientu; les coses que te puen dicir unes rayuques que llamen hipoplasia ….

 

< Qué, collacios, soi Sidrín
el fíu playu de Sidrón,
inventé esta bicicleta
de la cadarma un portón
porque un gallu la quintana
nun pue frayar el reñón.
Yo voi dir a Cuadanga
pero talo qu'un gran señor,
¿andar a pata un magüetu
de la Cueva del Sidrón?
Si t'animes, ven conmigo, 
esto pinta ¡como Dios! >






    El dentame de los vecinos del Sidrón tenía muncho valir porque tamién lo emplegaben pa trabayar les pieles y otros aperios talo si fuere una “tercer mano”, inclusive p’afinecer los “hachos”… (primu, un poco xabaces sois, eh). Arriendes d’ello teníenlos curiaos pos emplegaben palillos pa llimpialos, por ciertu, cola diestra. Con esti traxín que-yos daben ye de suponer que carecieren de delles enfermedaes, como’l sarriu. ¿Sarriu?... ¡Qué bien vos vieno, eh, científicos? . El sarrriu ye una mina de xacimientos microscópicos que nos van dicir lo que comíen (vexetales y carne), que vivíen n’ambientes afumiaos y que se curaben con plantes melicinales … Sí, sí… Amás de setes, piñones y mufu comíen un fungu, ¡el fungu del penicilium!; h.oder colos piloñetos que yá conocíen el valor de los antibióticos (¡Fleming, copión!). Ah, y nun te lo pierdas… Tomaben “aspirines” pal dolor de mueles, ya otros trestornos, en forma de fueya d’álamu que caltién ácidu salicílicu. ¿Tresnaríen daqué ferviatu?…. Porque una de les muyeres tomare manzanilla y aquilea (¡Ai, mamina! ...¡Toi perdíu! ¿Sedría una ancestra mio madre?).

< ¡Dios!, intentaba dibuxar al mio pariente y....
¡salióme un AUTORRETRATU! >
(Semeya sacada d'interné y arruinada por mio)
          En RESUME, que l’Equipu A o < los 13 del Sidrón> yeren una familia formada por: 7 adultos (3 homes, 4 muyeres), 3 adolescentes, 2 xuveniles ya un infantil. Los homes adultos yeren del mesmu llinax (hermanos o primos o tíos y sobrinos). Les cuatro muyeres adultes teníen el ADN mitocondrial (que se tresmite namás per aciu d’elles) estremáu, vamos, que vinieren de fuera y caduna yera fía de so madre. La guajería tenía’l mesmu ADN mitocondrial qu’alguna d’elles, ye dicir, yeren fíos, sobrinos o ñetos de so.

(NOTA NEANDER: 
 Sidrón ye'l xefe la triba y Sidrín ñació de los amores del pá ya una playa que pescare un día en Santa Catalina, dando una vuelta pel Cerru. Agora son amigos míos).     

CUMPLÍOS:


Portada del llibrín <Los 13 del Sidrón>
. A <Los 13 del Sidrón>, un llibrín qu'editen la Universidá d'Uviéu y el Gobiernu del Principáu As. per aciu'l Muséu Arqueolóxicu d'Uviéu con dedicatoria especial a Javier Fortea (q.p.d.), padre d'El Sidrón, asina como a tolos que trabayaren nesta chalga: Hoyos, Ortero, De la Rasilla, Rosas, Cañaveres, Lalueza, Rubén Fdezy Riki d'Andrés.
. Un artículu d'El Mundo < El crecimiento de un niño neandertal vs. al de un niño "sapiens"> del profersor Antonio Rosas y robláu por Teresa Guerrero (21.9.17) pretóme a esgaya.
 Otru d'El Confidedencial al rodiu "La Dieta neandertal".
Tamién tienen artículos sobro'l tema "La Vanguardia", "La Nueva España" y la revista <Muy interesante>. Tamién restolé nel "blog d'Acebedo", como non.... (Gracies, paisanu).
. Merçi beaucoup al Doctor Fleming por apurrime la penicilina nun momentu tan delicáu como la infancia y al Gadus morhua que sigue calteniéndome un coral a prueba bomba, una piel como un chaval, un celebru mor o next ya una mata pelu talo un neandertal...
. Que vamos dicir de Xurde Morán ("El Camín Xixón-Cuadonga) y l'Asociación Cultural El Garrapiellu sofitu y guía d'esti andariegu de tercera. Ensin ellos entá taría dando vueltes per Pión...

A Madre, que tres esfrutar d'esti mundu 
foi busca otru ¿meyor?
(Magnolia grandiflora)

<< Soi Selim, el de Xixón,
quiero ufierta-y esta rosa
a Madre, que nos dexó, 
polos años que vivimos
con llucha, amor y pasíon
p'algamar nesta vida
gayola ya educación; 
talo que neandertalis 
fuisti pa min lo meyor. 
Que la Santina t'ampare
y que xuban...
polo menos, el Xixón. >>