< La telaraña del Bon Conde Fernán González. La Independencia de Castiella.>

   La independencia de Castiella: 

                                       El <Bon Conde> FERNÁN GONZÁLEZ.

La telaraña del << Bon Conde >> : FERNÁN GONZÁLEZ

                              El  Bon Conde Fernán González                                                                   (Semeya: biodiversidad cultural. org)

          L’ambiciosu, intrigante, cuciu, valerosu y rebelde Fernán González (910-970) algamó a Conde de Castiella, Burgos, Álava, Llantarón y Cerezo. Pue considerase’l primer Conde Independiente de Castiella.

        < Pero de toa España Castiella ye la meyor,

            porque foi de los otros l'entamu mayor,

            guardando y temiendo siempre a so señor,

            quixo ansí grandecela el pergrande Creador>

           Ñació Fernán al rodiu Lara los Infantes y morrió en Burgos. Yera fíu de Gonzalo Fernández – creador de Lara, conde de Burgos (899- 915/17) y Castiella (912- 915/17) - , y de la cometissa Muniadona, d’orixe poco claru, seique alguién apunta a ser ñeta bastardissima - daquién sobrina carnal - d’Alfonso III el Magnu, Rei d’Asturies; ehí queda eso, por si acasu ... Pero tamién pudo ser la so nuera al tar casada en primeres nuncies col so primoxénitu García I que tenía por xenru al conde de Castiella Munio Nuñez. En fin, opiniones …

< Fíu de Nuño Rasura, home bien entendíu

Castiellu de Picón Blancu (Lara los Infantes)
probable llugar de nacimientu del Bon Conde.

                  

     Lo que paez nidio ye que - Muniadonna - con García nun guañó pero con Gonzalo F. tevo dos fíos: Fernán y Ramiro. Como podemos apreciar hai nicios de que la ma de Fernán tien raigaños asturianos; por eso y porque Castiella yera un condáu del Reinu de Lleón – prolongación del Reinu d’Asturies – ye polo que nós tamos rebuscando na vida d’esti home, el mocín del Reinu de Castiella, aquella Bardulia qu’entamare a repoblar con Alfonso II el Castu – quiciabes enantes - y la que tanto amó Ramiro I, el rompedor, el mecenes del <Arte Prerrománicu asturianu> , que casó en segundes nuncies con una castellana, la barduliana Paterna.
        So padre Gonzalo – un entamador - foi’l que llevantó’l monesteriu beneditín de San Pedro d’Arlanza dica 912, anguaño en ruines. Entá queden güelgues la la ilesia del 1080, de la torre del XII, del claustru y dalgunes dependencies. 

                El pá del rapaz :

                                        < Fíu de Nuño Rasura, home bien entendíu,

                                            Gonzalo tevo por nome, home mui atrevíu.

                                            Tuvo Gonzalo Nuñez tres fiyinos varones

                                            los tres de gran valir , de grandes corazones;

                                            repartieron la tierra ente los Infanzones,

                                            per onde ellos partieron entá ves los moyones.

                                            El don Diego González yera l'hermanu mayor;

                                            don Rodrigo'l medianu, y Fernando'l menor;

                                             los tres fueron perbuenos pero Fernando'l meyor;

                                            pos quitó-y tierra a esgaya al tarrecible Almanzor.

                                                    Morrió Diego González, y Rodrigo nun tardó ,

                                            pasó toa la tierra a don Fernán, el menor. 

                                             Entá lloren los moros , velea el rei de LLeón>

                                            

        El pá del rapaz debió morrer ceo (¿915?) - otra vuelta vilva Muniadona-, cuando’l guaje nun yera otro qu’un ñervatín. Entós so madre agarró los dos fíos – Fernando y Ramiro - y tiró pa les tierres del so maríu: Lara, allugándose nel castiellu de Picón (Sierra de Peña Lara) d’onde algamó exercer como comitissa al empar que’l so fíu Fernán. Hai dellos documentos qu’ansí lo afiten:

    . 929 Un documentu – emancipación de les monxes de Lara - firmáu por Muniadonna y los sos fíos Gonzalo (conde de Lara) y Ramiro.

    . 929 Un documentu – emancipación de les monxes de Lara - firmáu por Muniadonna y los sos fíos Gonzalo (conde de Lara) y Ramiro.
    . 932 Documentu donaciones al Santuariu San Cristobal de Vallegimeno, firmáu pola comitissima Muniadona y el so fíu, el conde de Castiella, Fernán González.
    . 938 Dona al Monesteriu de S. Pedro d’Arlanza les sos posesiones en Valzalamio, siendo conde de Castiella - <pola gracia de Dios> – Fernán González.
     . Foi enterrada en San Pedro d’Arlanza onde Sandoval y Yepes vieron la so tumba asina como la de Fernán pero nel sieglu XIX, tres la Desamortización de Mendizabal, foron treslladaos a la Colexata de San Cosme y San Damián, en Covarrubias, onde les podemos visitar. 

                                                               

                    < Quixo Dios al Bon Conde esta gracia facer,

                     que moros y cristianos nun lu pudieren vencer >

                                                    ***************************
Casó'l <Bon Conde> Fernán González con :

                                           

        . Sancha de Pamplona (c. 932), el más granible tantu políticu la so carrera porque siendo un noble de mediu pelu pasaba a emparentar cola realeza – UN BRAGUETAZU EN TOA REGLA - , los poderosos reis de Navarra seique pa ella yera’l tercer matrimoniu. El 1º col rei Ordoño II col que nun tevo fíos; el 2º col conde alavés Álvaro Herraméliz – llevaba como dote’l Señoríu de Burgos - col que tevo dos fíos y el 3º con Fernán Glez col qu’algamó una reciella:
. Gonzalo Fernández (932-960), Señor de Lara, Bureba y Aza .
. Sancho Fernández.
. Munio Fernández (933-949).
. García Fernández, algamó a Conde de Castiella. El sucesor.
. Urraca Fernández, que casó con Ordoño III (944, yera una ñervata) y Ordoño IV de Lleón (958) y darréu con Sancho II de Pamplona (970), conocíu como Sancho Abarca.
. Muniadonna Fernández, casada con Gómez Díaz, fíu de Diego Muñoz, Conde de Saldaña.
. Munio Fernández tomó’l camín de flaire. (Por si se preciaba un gabitu eclasiásticu).
. Fronilde Fernández, que casó con Rodanio Díaz, conde les Asturies de Santillana.
. Urraca Garcés, infanta de Pamplona (García Sánchez I y Andregoto Galíndez). Con Fernán tevo un fíu: Pedro Fernández pero col 2º maríu, duque de Gascuña y conde de Burdeos, tevo 4, un poco afrancesaos.
        Yera bravu’l castellanu pero texó la so telaraña al rodiu les muyeres: esposes y fíes.
            - La cama ye mui sana pa trepar a la montaña.

        Al rodiu la boda de Sancha con Fernán - ¡cómo lo pasaron! - cuenta’l PFG, cola venía de la torna n’asturianu :

            Fiesta Medieval en Burgos : ¿Les bodes de Sancha  de Pamplona y Fernán González?

< Colaron toos pa Burgos namás qu’ellos pudieron
en cuantes aportaron gandes bodes ficieron
nun allongaron plazu, bendiciones pidieron
toos, grandes y pequeños, muncha folixa hubieron.
Allanciaben tablaos* cuasi toos los caballeros,
a tables y axedreces xugaben los escuderos,
d’otra parte mataben toros dellos monteros,
sonaben los citoles, tocaben los violeros.

*Allanciar tablaos: Derribar unes torretes de madera con unes vares.

                                            ******************

FECHOS HISTÓRICOS SO LA VIDA DEL <BON CONDE>

     . Pa 932 - ¿tenía 22 años? - Gonzalo Fernández yá gobernaba los condaos de Lara, Burgos, Llantarón, Cerezo Álava . Bien ceo, el rei de Lleón Ramiro II (931-951) debió nombralu conde de Castiella (932) al qu’aidó na guerra escontra Abderramán III (912-929-961) y al aviesu, como n’ Osma. Ye nidio que yera mui mañosu, naide como él sabía trepar per una telaraña que’l texere pasu ente pasu sabiendo ganase al personal como lo afiten los cantares de xesta per aciu del so poema :<El POEMA DE FERNÁN GONZÁLEZ>. El pueblu adorábalu y el cleru tamién como lo demuestren les numberoses donaciones que fexo a la Ilesia, una forma mui guapa d’algamar el cielu.
     . Pero Abderramán III nun perdona y dos añu más tarde – 934 – fai una razia per Castiella – Álava, Burgos, Cardeña …. - de les que tarden n’olvidase. Mas Fernán, col gabitu del Rei Ramiro, tán esperándolu n’Osma onde-y dan cumplía venganza.
     .[En 937 apaez l’únicu documentu orixinal firmáu por Fernán: un acta notarial pola que dona’l Monesteriu de Sta. M.ª de Cárdaba (Segovia) al Monesteriu de San Pedro d’Arlanza. ]
. En 939, n’andecha col Rei Ramiro, tien una participación exemplar na toma de Sepúlveda a la repobló al añu siguiente (940) asina como Riaza y Fresnu. A Sepúlveda concece-y un Fueru mui llambión dao la alleganza al territoriu moru (¡Serás bribón!).

 

Ramiro II, Rei de LLeón 
(Semeya: Raigañu)

 

       El <Bon Conde> taba faciendo un bon trabayu conquistador y repoblador y sentía l’apegu del monarca pero cuando esti – qu’andaba roceanu cola soltura del castellanu que casare con Dª Sancha, hermana del Rei de Navarra, y más tarde cola fía de Garcés, Urraca – nombró a Ansur Fernández conde de Monzón púnxose como un basiliscu porque-y cortaba’l pasu dica les adebecíes tierres del Cea y el Pisuerga, sacante’l condáu de Saldaña, tarrén de los Muñoz…. 

     - Asina nos lo pagues, compañeu … Nosotros mataos colos moros y tu dándo-y de comer a la mano al condesu de Monzón …. Castiella siguirá enantando por munches torgues que nos ponga’l    Rei de Lleón.
     . En 944 ficieren andecha Fernán y Muñoz y fueron a pol rei …. Pero esti cuciu Ramiro yá lo taba esperando y garrólos por sorpresa ….
            - <Unu pa Lleón ya otru pa Gordón pero dambos al cuartón>.

Ramiro II dio’l gobiernu de Castiella a l’infante Sancho’l Craso, tutoráu por Ansur Fernández. 

        Tres un añu presu queda llibre darréu xurar fidelidá a Ramiro y alcordar la boda la so fía Urraca con fíu del Rei, Ordoño, hermanu del Crasu. Nun taba Ramiro II como pa prescindir del valir d’un guerreru tan barvu como Fernán …. Estes lluches internes traen al endefechu delles razies árabes pero namás pela zona de Lleón; ¿teníen una secreta <entente cordiales> Fernán y Abderramán?…
     . En 951 palma Ramiro II y otra guerra sucesión: Sancho I escontra Ordoño III. Fernán agabita a Sancho pero ceo tien que cambiar de bandu porque’l Crasu (Gurdu) nun da la talla. 

      - ¡Nin tan siquier ye capaz de montar a caballu ! ¿Pa qué queremos esti rei?…

        Entós el Gurdu tira pa Córdoba onde un mélicu árabe va déxalu talo una sílfide y cuando torna pa casa, dos años más tarde (958), bien calos avales del califa córdobés.

                                        <La corte d'Abderramán III en Córdoba>

     . Mentanto, en 955 Fernán derrota a les tropes mores en Sanestébanu de Gormaz.
     . Pero Ordoño III muerre ceo (956) y el castellanu garra iniciativa pero incomprensiblemente nun agabita a Sancho, como antes, que diba amás patrocináu pol rei de Navarra García Sánchez creándose dos poderosos enemigos d’una tacada. Mas  Fernán faise’l cabezaleru d’un grupu de magnates (958) que s’oponen al Crasu que vese obligáu a abellugase embaxo les faldes de so güela, la Reina Toda de Navarra y consigue poner como Rei de Lleón al so xenru Ordoño IV, el Malu. Entós ye cuando’l Gordu tira pa Córdoba y bien como un pincel dos años más tarde respaldáu por Abderramán III. Pamplonicas y cordobeyos derroten a Fernán (960) en Cirueña, onde lu faen prisioneru y Sancho va gobernar por segunda vegada hasta 966. Queda llibre Fernán y casa a la so fía Urraca con Ordoño III - fíu de Ramiro I – y a la muerte d’esti con Ordoño IV, amigu de so padre. Pero la ñeña nun andaba con bromes, tres cepillase tamién a Ordoñín casa col rei de Navarra Sancho Garcés II de Pamplona; ¿tu atreveríeste a casate con ella? …. 

         AlHakén II (960-976) quería quedase col prisioneru Fernán pero’l navarru García Sanchez I prefirió pautar con elli tres xurar-y fidelidá y refuxase en Burgos d’onde echa al so xenru Ordoño IV.

    . En 963, tres ser derrotáu en Sanestébanu de Gormaz por Alhakén II (un grandísimu califa) pauta una tregua con él, al delláu del Rei de Lleón, Una espina que llevó clavada na so alma y perduró tres la so muerte.

        Debió morrer a finales de 969 o en xineru del 70 porque’l 22 de Febreru yá exerce como conde de Castiella’l so fíu García Fernández.  
                                 
NÓMINA de los CONDES de CASTIELLA:

                                                

   Los Bisxueces: Calvo y Rasura
                                                    
        Metemos ente los condes de Castiella a los <Bisxueces> , dos persones de gran valir dlexíes por pueblu qu'exercieron el poder naquel biltu de Condáu que yera Castiella, mui alloñada de LLeón polo que la xusticia siempres llegaba tarde: Nuño Rasura del que desciende Fernán y Laín Calvo (xenru del anterior) del que saldrá'l Cid. 
. Nuño Nuñez Rasura y Laín Calvo, Xueces de Castiella.
. Don Rodrigo (860-873). 1ª Conde oficial. Repuebla Amaya=capital
. Don Diego Rodríguez Porcello (873-885) .- Funda Burgos (884)
. (885-899) ??????? Munio Nuñez??? ¿¿¿Gonzalo Fdez??? … ¿¿¿¿¿ ????
. Munio Nuñez (899-901) 1ª vez.
. Gonzalo Tellez de Llantarón (901-904).- Conde Llantarón y Cerezo.
. Munio Nuñez (904-909).- 2ª vez .
. Gonzalo Fernández (909-915).- C. Burgos. Constrúi castiellu Lara los Infantes:Muniadona
. Fernando Ansúrez (916-920).- 1º vez.
. Nuño Fernández (920-926) .- Hermanu Gonzalo F. y tíu de Fernán González
. Fernando Ansúrez (926-929).- 2ª vez.
. Gutier Núñez (929-931) .- ¿Fíu de Nuño Fernández y Primu de Fernán?
. Fernán González (931-970). 1º Conde independiente Castiella. Casa con Sancha S.
. García Fernández (970-995). Casa con Ava de Ribagorza. Tocó-y Almanzor. 

                                  Monesteriu d'Oña: Polupar Representación Teatral 

. Sancho García (995-1017), el de los <bonos fueros>. Fundó Monesteriu d’Oña. Ñetu de Fernán. [Dalgunos tuviemos la suerte de visitar Oña y ver la representación teatral que faen los habitantes -amateurs – d’esti pueblu, añu tras añu. Si pues nun la pierdas, hai muncho que ver na redolada: Les Merindaes y la Bureba, por exemplu).]
. García Sánchez (1017-1028).- Asesináu. Caberu conde de Castiella y tamién de Monzón. Hermanu de Muniadona.
. Fernando I, el Magnu (hereda por so madre Munidona) .- El primer ¡¡REI!! de Castiella.

. EL POEMA de Fernán González PFG

 

                           

                        Monesteriu de San Pedro d'Arlanza                                                         

                               (Semeya: Portal de Turismo Castilla y León)

            El <Poema de Fernán González> ye un Cantar de Xesta (Cantar de Fernán González), un poema épicu del Primer Mester de Clerecía que narra los fechos históricos, ya inventaos, del que ye consideráu’l Primer conde Independiente – ye muncho dicir – del Condáu de Castiella. Elli, dende llueu, fexo tolo posible por escaecer de Lleón. Foi escritu por un monxu del monesteriu de San Pedro d'Arlanza (Burgos) ente los años 1250-55. 

            Ta escritu n’estrofes de <Cuaderna Vía>, versos de 14 sílabes (alexandrinos) dividíos en dos hemistiquios de 7 sílabes separaos por una cesura. Ta distribuyíu en XV capítulos - más otros cuatro de les Cróniques del Sabiu - con 742 estrofes Asina entama’l poema:

        << En el nombre del Padre que fizo toda cosa,
             del que quiso nasçer de la Virgen preçiosa,
            e del Spiritu Santo que igual dellos posa,
            e del Conde de Castiella quiero fer una prosa;
            El Señor que crió la tierra e la mar;
            él, que es buen maestro me debe demostrar
            de las cosas passadas que yo pueda contar:
            cómo cobró la tierra toda de mar a mar.>>

       Esti Poema llegó hasta nós per aciu d’un códiz incompletu del sieglu XV que se conserva na biblioteca del Monesteriu del Escorial. L’autor ye un monxu desconocíu del Monesteriu de San Pedro d’Arlanza, onde’l Bon Conde fuere enterráu. Pero los oríxenes del Poema son más antiguos, seguramente provién d’un cantar de xesta (antar de Fernán gonzález) qu’andaba de boca en boca y nel sieglu XIII (1250-52) que ye cuando Pidal lu data – foi cuando’l monxu lu escribió. Taba incompletu pero como yera mui célebre - yá Gonzalo de Berceo ficiera referencia a elli asina como tamién Alfonso X el Sabiu* na so Primera Crónica General o la de (1344) - pudo reconstruyise. 

*El Sabiu nun-y dio muncha bola por ser el tema central la rebeldía, y d’eso yá tenía bastante en so casa (foi depuestu pol so fíu).

     El PFG ta perbién texíu.
          El monxu arlanzón convirtió a Fernán nun mitu, nun cruzáu, nun héroe nacional qu’escontra vientu y marea algamó, en xusticia, la independencia de Castiella. Lo de rebelase escontra los sos señores, los reis de Lleón, son fechos xustificables poles circunstancies polítiques de la dómina asina como les amarraces col Rei de Navarra. ¡Pa eso dio la cara escontra’l tarrecible Adbderramán III y depués contra Alhakén II!. ¡Ye un cruzáu contra l’Islam! ¿Quién como él agabitó a la Ilesia con abondantes y xeneroses donaciones a los monesterios de Castiella?… ¿Nun ta enterráu (taba) en San Pedro d’Arlanza?… Los monesterios siempre precisen financiación y una bona manera de consiguila ye caltener nes sos ilesies reliquies de Santos o de personaxes cimeros. La propaganda de Fernán venía-yos perbién a los arlanzones asina como la del Carpiu a Santa Mª la Real d’Aguilar o la Cid a Burgos. Esto yá yera bastante pa que’l monxu pudiera inventar les amarraces de Fernán con Almanzor (fuera de contextu, nin coincidieron) o la comparanza con otros célebres rebeldes nacionalistes: Bernardo’l Carpiu o’l Cid, héroes nacionalistes que magar pasaren per altibaxos al final siempre salíen vencedores. Tamién Fernán tevo presu y recibió bones camaes tanto de los reis cristianos (Lleón y Navarra) como de los árabes (Abderramán III, ¿Almanzor?, Alhakén II.) 

                                          Tumba de Bernardo del Carpiu (Aguilar de Campoo)

            El Poema ta perbién texíu. Pa xustificar la necesidá del héroe salvador de Castiella, y darréu d’España, entama col final de la hestoria de los godos n’España que perdieron el Reinu por una traición, la del conde Illán (Julián), y que trexo darréu la invasión islamista. Pero nes montañes d’Asturies xurdió un biltu rebeldía con Pelayo, creador del nuevu Reinu godu que sigue con Alfonso I, Fruela y Alfonso II. Equí aprovecha pa espetar la hestoria d’otru salvador, Bernardo’l Carpiu, que s’opón a la invasión francesa de Carlomango cola venia del Castu (yera una trola pa xustificar la necesidá del héroe). 

             < Supo Bernardo del Carpio que los franceses pasaben,

              qu'a Fonte Rabía toos ellí aportaben

              pa conquistar España, cuido qu'ellos pensaben:

             sedrá una romería, ye lo que camentaben.

               Mató ellí de franceses de reis y poderososos    

             qu'hasta los Doce Pares dexen ellí los llombos,>

Vien darréu’l nacimientu y al empar el desamparu de Castiella, la necesidá de los Bisxueces (Calvo y Rasura) antepasaos de Fernán González – elexíos pol pueblu - y del Cid (otru mitu rebelde que Fernán nin conoció). Agora va esplayase a gusto cuntando les fazañes de Fernán y xustificando les sos desobediencies reales:
                  

                                     - ¡Too por Castiella!

            <Toos aquellos castellanos  a una aconceyaron ,

                ya dos homes de prestixu como alcaldes nomaron ;

                el primeru foi don Nuño, un home de gran valor

                que del so altu linaxe vendrá'l Batallador;

                foi l'otru  Laín Calvo, el bon guerreador,

                vendrá de so familia'l Cid Campeador>. 

                                        El Clavijo. Equí tevo presu  Fernán González.

                                            Esta mítica batalla cambió la hestoria d'España mercé al gabitu de Santiago.

        Les batalles de Lara, del Valle del Ebro,Tolosa, d’Hacinas, Cirueña, Valpierre o l’amarraza col rei de Navarra. Hasta Almanzor tienles pasales torniaes con Fernán magar nun coincidieren nel tiempu.
        Nun podíen faltar los gabitos de los santos: Apaición de San Millán y de Santiago (otru Clavih.o), patrón d’España. Y claro ta, tampoco escaecer nun podíen les hestories del conde castellanu nes Cróniques d’Alfonso X, el Sabiu. (Sicasí nun debía cayéi mui bien el rebelde conde, pos yá tenía él bastante en casa). Pa que la hestoria tuviere completa’l monxu ¿inventó? una lleenda al rodiu’l nacimientu del Condáu Independiente de Castiella: <El caballu y l’azor >. El flaire arlanzón, del XIII (1250-52), aprovechó pa enantar aquel primer Mester de Xuglaría con tolo que-y venía bien magar tuviere fuera de contestu. El casu yera poner nun altar a Fernán González p’atrayer los pelegrinos al Monesteriu de San Pedro d’Arlanza. 

  

        COVARRUBIAS : Plaza Mayor y Ayuntamientu (Palaciu del Bon Conde)

            - Y vas consiguilo, bribón, qu’en cuantes pase la pandemia pienso facer una visita a la <RUTA DEL BON CONDE, FERNÁN GONZÁLEZ>. Creyo que voi agospiar en Covarrubias, la <CUNA DE CASTIELLA>.
        El monxu-autor amuésanos un conde “democráticu”, allonáu de la tiranía. Enantes d’una batalla fala colos sos oficiales al rodiu la estratexa a siguir y darréu dexa elli la so solución. Enantes d’atacar a Almanzor convoca cortes pa tomar un determín: atacar o non. Cuando nun-y quedaba otra que lluchar escontra’l Rei Navarru, al tener les sos güestes mui cansaes, propón-y al Rei pamplonica un duelu personal, cuando 

esti nun aceuta ye cuando lo resuelven en batalla. 

      Les muyeres tienen una trescendencia mui bultable na vida del Bon Conde y esto queda reflexao nel PFG. Yá sabemos que casó fíes y fíos por conveniencia propia (¡Too por Castiella) pero tamién él casó - el meyor negociu la so carrera – por interés políticu con Doña Sancha de Navarra que nel PFG va tener una importancia capital al lliberalu a elli de la cárcel por amor carnal y al so hermanu, el Rei de Navarra, por amor filial. 

   <  Túvolo la Condesa por un desaguisáu,

   al ser ella la muyer  del conde castellanu,

    y tener al so hermanu cativu y llaceriáu

    pos yera un bon rei y ricu'l so reináu.

      - Yo saqué del cuartón al conde castellanu 

    pero'l conde agora ye pa mi un villanu

    pos nun quier sacar de prisión al mio hermanu.

       -  Pos que vos lo queréis y con tanta porfía 

    seique sía gran cosa con gustu-y doi la vida:

    la mio venía tenéis, hermanu don García.

    Quitáron-y los fierros, y coló per so vía>

. LA LLEENDA SO LA INDEPENDENCIA DE CASTIELLA
        Por si acasu nun taben nidios los motivos pa la independencia de Castiella el monxu arlanzón crea una hestoria que yá tenía referencies nel siglu V. :

                                                             <El Caballu y l'azor>
                                                           (Semeya:Iberian Darkness)

“<<Tenía don Fernán un caballu y un azor que yeren de Castiella de lo bueno lo meyor.
Cazaba con ellos to lo que-y ponía al so algame Dios, Nuestro Señor.
Enteróse d’ello el Rei don Sancho, ya invitólu a cazar nel Reinu de Lleón.
- ¿Qué caballu árabe! ¡ ¡Qué llistu ye esti azor!
¿Cuánto quies por ellos, Fernando? ¡Pímedi, por Dios!
- Tratándose del Rei de papu sedrá muncho meyor.
- Gracies, mio bon conde, mas nun acepto de regalu tal favor;

    pon un preciu xustu y quedamos tan contentos tu y yo. 

- Con mil marcos yá son tuyos; si los pagues agora, ¡como Dios!
- Agora toi de caza y nun traigo enriba ni un doblón.
- Pos a plazos …. pue costate, manín, un mogollón:
Cada día que pase de la fecha tien doblásete’l montón.
Tan contentu coló’l el rei Sancho pa Lleón
que maldita del negociu s’alcordó.
Cuando’l Conde vino cola cuenta , ¡Dios!
– tres años pasaren d’aquel día del Señor -
nin Carlomagnu pagar podía aquel filón.
- Escelencia, si usté quier, yo pueo da-y la solución:
Cámbio-y la independencia de Castiella pol caballu y l’azor.
El Rei, col rau ente les pates, cola derechín pal Reinu de Lleón.>>

. PERSONAXES INTERESANTES DE LA DÓMINA:
. La cometissima Muniadonna, so madre.
. Don Gonzalo, el pá (Árbol xenealóxicu de Paterna)
. Doña Sancha, la muyer.
. Doña Urraca, la fía.
. Rei Alfonso III, el Magnu (866-910). El 910 pue que ñaciere’l Bon Conde..
. Abderramán III, 1º califa cordobés [912- (929-960)]
. Al Hakén II (961-976).

REIS de LLEÓN RELLACIONAOS COL <Bon Conde>
. Rei García I (910-914).
. Rei Ordoño II (914-924).
. Rei Fruela II (924-925)
. Rei Alfonso Froilaz (925-26), El Xorobáu. Nun duró mediu añu. Escarez d’ordinal.
. Rei Alfonso IV, el Malu (926-31).
. Rei RAMIRO II (931-51)
. Rei Ordoño III (951-56)
. Rei Sancho I, el Gordu (956-58) y (960-966)
. Rei Ordoño IV (958-60)
. Rei Ramiro III (966-985) … El <Bon Conde> muerre en 970. 

. LA RUTA DEL CONDE FERNÁN GONZÁLEZ
        

                                                    (Semeya: Arteguías)

                 La <Ruta del Bon Conde>, una circular d’unos 70 km, ye afayaiza pa facela en coche con dellos tramos pa echalos a pata. ¿Ónde podemos entamar? …. 

    Sedría guapo arrancar dende Lara de los Infantes y visitar les ruines del Castiellu de Picón (1), na Sierra de Peñalara (Alfoz de Lara), porque ye onde ñació Fernán y perende onde va entamar la hestoria del que la lleenda considera’l creador del Reinu – Condáu independiente - de Castiella.
        . Cerca del Picón tenemos la Ermita de Quintanilla de las Viñas (Sta María) (2), una capiella visigoda del VII de la que nos queda la cabecera cuadrada y la nave del cruceru. Per fuera puen apreciase unos relieves perguapos y per dientros dellos capiteles mui chungos.
         .Tiramos pa Covarrubias pasando per Hortigüela y travesando el Cañón del Arlanza (3) arribamos a les ruines del Monesteriu de San Pedro d’Arlanza (4) cola so torre, ilesia, claustru y delles dependencies. Equí tevo enterráu cola so muyer Doña Sancha hasta qu’en 1847? los sos restos foron treslladaos a Covarrubias. Cuenta una lleenda perguapa que yendo Fernán a la cata d’un xabaril blancu aprució un ermitañu que-y agüeyó’l futuru faciéndolu vencedor so les güestes sarracenes. Foi verdá, pero tamién llevó lo suyo … En cualquier casu consiguió que’l gran califa Abderramán III nun 

pegara güeyu munches temporaes. 

        

        Pela ribera l’Arlanza aportamos a Covarrubias (5), pallabres mayores …. Los restos de la vieya muralla, los turruones y palacios, y  l’entramáu urbanísticu medieval con abondancia de madera dan-y un ranciu abolengu. Equí pensamos agospiar. Nun se pue dexar de visitar :

.La Escolexata de los Martilinos, San Cosme y San Damián, onde tán enterraos don Fernán y Doña Sancha.
. El Torreón de Fernán González, arquiteutura militar del X .
. La Ilesia de Santo Tomás.
. L’Arcu del Archivu del Adelantamientu de Castiella, anguaño oficina de Turismu.
. La Plaza de Doña Urraca.
. La Plaza de Doña Sancha.
    . Pela carretera que va a Santo Domingo de Silos paramos en Barriosuso pa visitar la Ilesia Prerrománica de Santa Cecilia (6) del sieglu X con un adriu románicu del XII de cinco arcos.
. Carretera xeneral p’aportar a  Santo Domingo de Silos (7) onde tenemos quitar la boina: Núcleu urbanu, muralles del XII y Monesteriu. ¡Chapeau!. El Claustru del monesteriu beneditín – d’orixe visigodu – ye una de les ayalgues del románicu mundial, sobremanera el pisu baxu (XI/XII). Los capiteles a doble fuste con temes orientales y califales son d’una perfeición única. 

    . Cerca de Silos, carretera Caleruega, vamos pasar pel Paraxe de Yecla (8), un escobiu ensin igual que pues percorrer a pata per una plataforma bien estrecha. ¡Qué mieu!.
    . Siguiendo’l camín de Lerma vamos alcontrar Castrillo Solarana (9), onde podemos visitar la so Ilesia.
     . ¡¡¡LERMA!!! .(10). La barroca Lerma. L’exemplu urbanísticu español del sieglu XVII y qu’adquirió categoría ducal mercé al valíu de Felipe III: Don Francisco Gómez de Sandoval y Rojas (1598-1618) . Has ver:

                                                   LERMA , la ciudá ducal.                      

                                                                            (Semeya: flickr)

. La Plaza y el Palaciu Ducal, anguaño Parador de Turismu.
. La Ilesia de San Pedro, con estatua en bronce del arzobispu Rojas y Sandoval.
. L’Arcu de la Cárcel y la Ermita de La Piedá.
. El conxuntu conventual del Duque:
. Monesteriu de San Blas.
. Monesteriu de la Madre de Dios.
. Monesteriu de l’Ascensión.
. Esconventu Santu Domingo.
. Esconventu Santa Teresa.
. Esconventu San Franciscu de los Reis.

                                            ********************

Bono, collacios, agora namás qu'esperar alcuentren la vacuna del COVID y a ponese en ruta. Tamos como llocos. 

ESTIMANCES:
. Wikipedia, fonte inagotable de consulta. Gracies. 
. D. José Soto Vázquez autor d’un: <Comentariu de testos al rodíu’l PGG>
. El <Condado de Castilla>, qué fadríemos sin vós. 
. Un llibru de la Coleición Austral al rodiu PFG. 
. Delles fontes de semeyes como: Wikipedia, elcondadodecastilla, Arteguías, elcaminodelcid.org, biodiversidad cultural.org, Raigañu, Nathional Geofrafic.com, Viajes y Rutas, Portal de Turismo de Castilla LeónIberian, Darknes.   Y dalguna más que pue quedar nel tinteru. 

    

                               **********************