R. C. [2]:"Boroña".- Anexu II: "Carreño Miranda"

                          ANEXU II: "CARREÑO MIRANDA" 
                          
                                RUTA CLARINIANA [2]: "BOROÑA"
                   

¿Facémos-y daqué visita a Xuan Carreño Miranda?

                          "Pintor don Xuan Carreño Miranda "

                                         Barrocu             
                             Barrocu                                Barrocu

                                        ¿Perlla irregular?

 " Ilesia de S. Antonio de Padua", Madrid. (W. Live)

          El poderíu la Ilesia Católica plania sobro un imperiu - l'hispanu-xermánicu - que domina'l mundu: Europa ya América. Una falcatrúa maxestuosa que camufla la decadencia la monarquía española, la de los austries.  
          Dende aquella andrómina nun llevantamos más cabeza. Seique l'arte y la lliteratura surdieron como l'ave fénix pa dexanos bayura tala d'obres y artistes que sedrá ¿imposible? algamar un altor comparatible.

                          << Que tola vida ye un suañu
                                                     y los suaños, suaños son>>

              Sí, eso foi la vida Carreño, un suañu. Pa un guah.e que ñaz n'Asturies nuna dómina abegosa - Barrocu - onde lo más probable ye que muerra en daqué guerra y por embargu algama a pintor del rei, con una vida acomodada... Vivió "apartáu del polvu", como diría un mineru del Pozu Carrio. Nun ye pa quexase, eh.

Centru Niemeyer: Avilés

                El pintor barrocu don Xuan Carreño Miranda pertenecía a una familia de fidalgos cabezaleros de
 raigaños carreñenses. Yá conocemos el prestosu palaciu y les bayuroses tierres que teníen nel valle Guimarán, bien cerca la Quinta Clarín, farda d'estes histories (¡Quién lo diría!)


           Vien al mundu n'Avilés nel añu 1614, nesa estaya del tiempu que se tien nomao ¿Siglu d'Oru?. Pero si les monedes d'oru y plata pasaren a ser de cobre....
          A los once años queda güérfanu de madre, lo qu'aprovecha so padre pa colar a Madrid onde queda asitiáu definitivo. Seique tuvo delles estancies n'otres provincies, una d'elles en Valladolid, en ca so tíu, tratante de pintures.
 Y como nun vía otro que colores y paletes, dellos años más tarde,  tracamundió a María de Medina - fía d'otru pintor - con una d'elles. Terminó'l cuadru nel altar. (¿Ónde, sinon?)
          Malpenes vieno per Asturies; nin tan siquier cuando lu nomaren "Alcalde de Fidalgos" n'Avilés, d'ehí esa cara atristayada qu' apreciamos nel so autorretratu.

Talamente paez que Carreño estudiare nos "baberos"

               Tampoco ye d'estrañar qu'amuese esa cara murnia que resalta'l claruescuru... Tenía que sufrir Carreño, pintor d'un rei enxencle - Carlos II, el Fechizáu - ya incapaz de mandar pero al que de xuru-y tomare afeutu. Tenía que sufrir Carreño  viendo aquel probe inxeme manexáu por tol mundu. De primeres pola madre, doña Mariana d'Austria (nun-y quedaba otra, tenía Carlos 4 años cuando algamó al estrellastu) y darréu poles camarilles de dambes muyeres, que dos tevo, masque denguna guañare... ¡Que Carlinos nun ta pa esos trotes, ho!.

                   Namoráu los pinceles dende la cuna - so tíu yera pintor y so padre, amás "d' arbitrista" , tamién trataba en cuadros - féxose profesional a los venti años dempués de pasar l'apredizax en delles escueles de pintores conocíos.
                   Nesa primera estaya fartucóse a pintar santos por encargu del cleru. Too ésto na dómina Felipe IV, que tenía por Pintor de Cámara a Velázquez. Diego echó-y el güeyu y llevólu pa con él de pinche. Nun debía faelo mal porque trabayos que se creyíen del maestru yeren en realidá del alumnu.

 

Escuela barroca: En ca del Mayestru Diego (Velázquez)

              Nunca tuvo el de "Les menines" otru ayudante tan aplicáu. Por si fuera poco ayúdalu a algamar a caballeru de la Orde de Santiago, reconocencia qu'él mesmu refugare:

<< La pintura nun precisa d'honores. Ella pue dalos al mundu enteru >>

"El Duque de Pastrana" por C. M.  (G. Windows Live)

                [ "Nun pensaba lo mesmo El duque de Pastrana (1644-16)  y dellos títulos más.
 Don Gregorio de Silva Mendoza y Sandoval, aristócrata cabezaleru na dómina de Carlos II fizo los posibles por algamar a  Caballeru de Santiago. 
Y llogrólo. Emprimaba la trentena cuando con títulu talu presentóse, "talo una gocha con torga", na corte francesa llevando en mano un cuadru del rei de les Españes - pintáu por Carreño, claro - y trayendo del brazu a doña María Luisa d'Orleans, la reina nueva d'España que nos endilgaba'l rei Sol, Luis XIV. Yera'l regalu boda .
 Bueno, Carlinos, que yá naguaba pola novia desque  l'agüeyare por otru retratu, retocó-y el de so col "Jim",  que d'aquella consistía en pone-y un marcu de diamantes... ¿Qué reina pue resistise?... (En confianza, ¿quién creyéis que salió ganando?. Mirái'l cuadru que s'amiesta...)
Esfrutó'l de Pastrana la gloria terrenal y más entá cuando algamó a Caballeru de la Orde del Toisón d'Oru pero... un pilancu del caballu  y degoló a ¿meyor? vida. Poco más de los cuarenta...  Guapu motivu barrocu: "La brevedá de la vida" ]

 

<<  Sensual, Mª Luisa d'Orleans, según de Carreño'l cristal >>
¡Vive la France! 
 (Xunta.es)
 

          [Yá ye un mayestru, Carreño. El dominiu'l claruescuru, esa ropa alborotao, esa dinámica pose señorial, esa mirada aliella y esos colorinos que tantu-y presten... ¿Nun ta pa xintala? Pa nun pintar otro que santos...] 

[CHARRANERÍES: Tevo don Carlos namoráu dafechu la francesa seique viéndola nel cuadru nun ye d'estrañar. Guapa, bien proporcionada y con esi "charmante" francés propiu la corte'l Rei Sol trexo a Carlinos encantexáu - que non fechizáu - de por vida. La torga foi... d'esta "delicatessen" popular:

        << Paríi, guapa flor de llis,
              n'esmolición tan estraña,
              si parís, parís a España,
              si nun parís, pa París>>

            Tomó, Carreño, la independencia con venti años . Na primer etapa la so pintura ta mui influyenciada pola téunica del pintor madrilanu Vicente Carducho, l'español más destacáu del primer terciu del XVII, asina como pol color y atmòsfera fluyida de la escuela veneciana de Ticiano.(Qué bien me quedó ésto).
Ente les obres d'esa primera estaya almiramos:
      . "San Hermenexildo na prisión" (MUBA)
      . "La Madalena Penitente"  (MUBA) y
      . "Estigmatización de San Francisco d'Asís" ( Múséu B.A. Uviéu)

"San Hermenexildo na prisión"(MUBA)

"La Madalena Penitente" (MUBA)

      

           Adulces van caltriando n'él los pintores barrocos flamencos talo Rubens y Van Dick o del Spagnoletu  J. Ribera. ¡Ai, esi coloríu ! :
      . " L'Asunción de la Virxe" (57)
      

"L'Asunción de la Virxe"por Carreño M.
(foroXerbar)

             Especialízase Carreño na pintura al fresu y monta un negociu en comuña con Francisco Rizi, al que conociere de chaval: Pirri-Zoco... Puente-Eraña o... Rizi-Carreño, ¡vaya media!.. A la maxa compositiva del primeru xúncese-y el coloríu y concienzudu trabayu del astur. Xuntos faen trabayos perimportantes, como la del Camarín de la Virxe del Sagrariu, na catedral de Toledo o la Cúpula de la Ilesia de San Antonio de los Portugueses primero o de los Alemanes dempués, qu'entá se caltién, en Madrid.
         [ Na primera semeya propia d'esta entrada podemos arrebollanos nel altar de la mesma p'almirar el frescu d'esta cúpula que-y da vida eterna a tola obra].

            Más tarde diseñen xuntos l'escomanáu llenzu pal altar los Trinitarios de Pamplona:
                       . " Misa de San Xuan de Mata"
  

Llenzu al óleu: "Misa de San Xuan de Mata"
 (Muséu del Louvre - trinijoven.com)

                    Caltién la trama de Rizi: << Composición dinámica col sentíu monumental de la escena>> pero fírmalu Carreño, que foi l'executor. Pon n'elli tola bayura conocimientos qu'atesora:
 << Paleta veneciana, bayura flamenca, tranquilidá aristocrática y téunica velazqueña. Too esto dientro d'una perspeutiva inclinada y una plasmante rotura de gloria celestial >>. 
¡Pa salise!

**Rompimientu de gloria:
     Espectacular escena pictórica en perspeutiva, propia del barrocu, na que s'amuesa 'l cielu illumináu al traviés d'unes ñubes coles figures de Dios, la Virxe, los santos... ¡Plasmante!

           Darréu, yá solu, suèltase con:
                             . " La Inmaculada Conceición" 
   

"La Inmaculada Conceición" C.M.
(Españolessinfronteras.com )

              Cansáu de pintar santos pásase a retratista (los santos enxamás lu abandonen) . Sigue cola pose aristocrática de Velázquez pero da-yos un aire más bullandiegu, talo Van Dick:
. "Duque de Pastrana" (66)
. "Los Marqueses de Santa Cruz del Viso".
. "Embaxador moscovita Pedro Ivanowitz Potemkim "

    

Esta "Santa" nun la conozo pero prestaríame, ¿quies aidame ?..

 

"Selmo, especilista en Nazarenos"

               Nel añu 1969 escala a pintor del rei y dos años dempués algama a  Pintor de Cámara del novísimu Carlinos II, l'Encantexáu. Arriendes d'esti nombramientu'l so sociu ya amigu Rizi enfocicóse con elli, andaba un poco roceanu... (Tranqui, Richi, yes un grande pero hai qu'amirar pa en casa...)

"Andamios Selmo", pa entamilgase nel cielu.

           Coles rebuscaes postures de Van Dick, la puesta n'escena flamenca y el máxicu xuegu los espeyos de Velázquez dexa un guah.e pa enmarcar:

                                                    "Carlos II con diez años"

¿Tien que toi bien guapu,eh?... ¡Tantu metese conmigo, coño!
(MUBA)

    [ Solemne, austeru, con colores refinaos y escasu realce de la dignidá del retratáu dientro d'esi airón dinásticu qu'agabita col mobiliariu * ] .

* Nun foi a fueu muertu "Ayuda de la Furriera", o dicho d'otra manera, encargáu del mobiliariu na corte. Oi,tu... Eso suéname al "cabu furriel" de la mili...
   
           Por mor del cargu pintó munches veces al rei. << Bonu, inxenuu, cenciellu y hábil...>> , camentaba'l rei de Carreño. Una pena que'l guah.e careciere de lo último. Tuvieren feeling.

 

"Semeyes Selmo, últimos tratamientos"

          [ Carlos II, d'alcuñu l' Encantexáu (1661 - 1700), foi'l caberu monarca de la dinastía Austria que reinó n'España (¿Lo de la Merkel cómo se llama?). Tevo siempre mui malín. Pagó los platos rotos d'una cadena  matrimonios endogámicos, ente propios familiares (so padre yera al empar tíu segundu y so madre prima ¿carnal?). Col fin de que medrara cambiáron-y d'ama de cría más de 14 veces...¡Cómo nun diba refugar la teta! ; pruyía-y más el chocolate (igual nun yera tan fatu...).

Carlos II,  Maestre la Orde'l Toisón d'Oru
(Galería W. Live)

          Con Carlos II aquel imperiu onde'l sol nun se ponía ( España, Alemania, Portugal, Sicilia, Nápoles, Paises Baxos ya... ¡América!) terminó a xucu baxeru. Yá venía d'atrás. Tol mundu quería metenos mano y nun salíemos d'una guerra pa entrar n'otra. << Pestes, fames y mortandaes>> ye lo que s'apalpa nesa dómina'l Barrocu. 

"Santiago na batalla del Clavijo" (FXB)
(foroxerbar.com)

         Felipe III yá espulsare los moriscos, que trabayaben el campu, y la economía sintiólo abondo. Non contentu con eso métenos na Guerra los 30 años , ¿un anticipu la I Guerra Mundial ? .
         Lo que de mano yera una rocea ente Francia y Alemania por mor de la relixón (reformistes - escontrarreformistes) termina nuna batalla campal qu'arreya al mundu enteru. Gana Francia, perdemos toos; fasta la Ilesia va perder poderíu en favor de los estaos-nación emerxentes. N'España ¿notase? tarde, como siempre.
    (( ¿Qué carayu trendrá que ver, toi entrugándome yo, la "Guerra los 30 años" coles "Rutes Clarinianes". En fin, como ta lloviendo y nun pueo dir pa la güerta... Pero ye que poner la tele pa ver batise'l cobre - que l'oru ta a recaldu en paraisos resplandientes - a los políticos d'angüaño... ))

  Asina vio Carreño a doña Mariana d'Austria

. (FXB)

            Como nun ye plan dexalo equí xurgamos na vida Felipe IV, el pá de Carlinos, y peteznos echar a correr. ¿Pa ónde?.... Como trabayar ye h.odío, y más pa un rei tan folixeru, escaez les coses en manes d'un grandón - el Conde-Duque d'Olivares- que con Francia baxó'l pantalón. Eso sí, pa caltener la faza en Llorina dexónos la facienda esquilmada... Ya a Portugal ya Holanda dándonos un corte de manga. Pero siempres nos queda Tara, digo, la Ilesia . 
[Bueno, como foi'l padrín de Velázquez vamos perdonalu... Ye qu'equí pal arte y la folixa somos coh.onudos pero... Mira que vieno oru d'América, eh... Y nin siquier pudimos preparar una industria medianina...¡Hai que ser..... fatos!].

Carreño M: "D. Xuanxosé d'Austria" (Foroxerbar)

         [Don Xuan Xosé d'Austria yera hermanascu de don Carlos II (esti reconocíu). Nun hai más que ver la semeya pa decatase que lleva'l cuñu la casa. Fíu ilexítimu de Felipe IV pasó tola vida esmolecíu por exercer de rexente, yá que rei nun podía ser . Cuando por fin algamó al cargu nun foi quien poner a España onde debía; los que lu auparon teníen pretensiones demasiao altes...  Los catalanes - onde foi nomáu virrei - tuvieren relativamente contentos porque-yos reconoció los fueros. Amás, con un exércitu del Barça marchó camín de Madrid consiguiendo que'l valíu de turnu colare... ¿Faltó-y un poco cuayu p'agarrar el sartén pel mangu?]
 
           Como'l tema la descendencia yera esmolecedor y María Luisa finare, sospechosamente, d'aburrimientu por una apendicitis - camentaben les males llingües, masque nós sabemos que nun foi asina - terminaron casándolu en segundes nuncies con una alemana que tenía 22 hermanos; a ver si esta vegada quedaba embarazada, por contaxu... ¡Nada!. La Neobourgo, doña Maria Ana, nun foi a quedar guañada. 

"María Ana de Neoburgo" de Luca Giordano  (Foroxerbar)

 [ " La Neoburgo arrasando".  ¿Paezvos que'l probe Carlinos taba pa esos trotes?. Alta, guapa, roxa y... ¡esi cuerpazu!... Bueno, alemana. El rapaz tevo-y mieu porque casó por poderes y tardó cerca un añu en ¿consumar?. Nun foi mui popular ente'l pueblu, demasiao prepotente. En cualisquier casu fexo tolos posibles por ser ma. Dicen que taba mui al tantu  los exorcismos del maríu... La xente, que ye'l demoniu, camentaba:
           "Nun conocen que la reina
              mundu, demoniu y muyer
              y, en fin, por dicilo too, 
              que lo demás nun lo sé,
              ye ser la reina de carne,
              ye ser el rei de papel"   ] 

           Una rigorosa investigación de la Inquisición determinó que fuere fechizáu a posta. (La KXB ye una coña). Pa exorcidalu ficiérenlu tomar.... < La P.S.M. >]

"Suel el Rei quexar de viciu porque-yos les tienen puesto talo a Felipe II"

 [La  P.S.M. = Echáben-y pichones recién cazaos penriba la cabeza mentanto xintaba - como parva nun lo veo - les coraes fervientes d'un corderu...
Esto yera pa contrarrestar los efeutos d'una bébora que-y dieren el 3-4-1665 -¡qué nivel!- nuna taza chocolate... que de too s'enteraba la Santa Inquisitio.  A saber:  sesos (heureusement!) d'un axusticiáu, coraes, reñones... ¡H.oder, la que tuvieren fecho media ocena camarones y una botellina sidra...! ]

Preba, Selmo.

                Carreño, home de bon compás y familiar nun tevo por embargu fiyos. Mas el cielu recompensólu (esta vegada hebo xusticia) apurriéndo-y una neña qu'abandonaren a la puerta so casa (mui orixinal). Fía y ñeta al mesmu tiempu ficiéron-y la gayola nos caberos años de vida. ¡Qué envidia, Xuanón!    

Si los GRANDES van pal cielu ¿ónde diba tar CARREÑO? , camenta Selmo.

              Entamamos esta salida - <<BOROÑA>> -  con ella y con ella queremos finar: Euxenia Martínez Vallejo, la maxa Carreño, a la que de xuru tendrá alcontrao nel cielu.
Desubicaos dafechu, alcontrámosla caleyando per Avilés, por mor d'esti blog, cuando entá nun teníemos nin idea quién yera. Aquella rarez ye güei un caprichu pa nós. ¿Y pa vos? ¿Tan siquier una menina?

Euxenia Martínez Vallejo: la Menina de Carreño
semeya  ¿La Maxa Vestida de Goya?
Andromancia del Ayuntamientu d'Avilés.

                                                                         

                         ¿Y el Mayestru?


            Si col  Anexu II a << Boroña >>  pretendíemos face-y un homenax al profesor Carreño  cómo vamos colar d'equí ensin chisbar un migallu nel taller del so Mayestru....
            Diego Rodríguez de Silva y Velázquez foi l'espeyu onde s'amiró Carreño. Como Diego nun toca, y menos m'atrevo a pintalu, quiero namás poner dos brochazos nel bastidor - yá conocéis la mio diestra mano en Nazarenos -  del so CUADRU :  "Les Menines". ¿Tendráse visto atrevencía tala?
             Tola vida tuvi un respetu reverencial a los grandes pintores, a les obres d'arte en xeneral; mieu, diría yo. Pero esta vegada va ser diferente. Voi enfrentame a elli, al más grande, y al so cuadru más famosu, a l'apoteosis de la pintura, a "Les Menines". Acasbóse'l tarrecimientu. Esta vez voi meteme dientro'l cuadru, tastiar esa perspeutiva atmosférica, devolve-yos la mirada a los personax y ... falar col Mayestru. Cuasi ná, ¿eh?

            << La  perlla d'El Sevillanu >>

"Les Menines" (ForoXerbar)

           Ya me decatare que nun se pue dicir barrocu ensin dicir Velázquez.  Si delantre un tibetanu faes un biecu col bigote retrorcíu elli arrepostiate col xeitu Les Menines. Métome n'interné, busco'l Muséu del Prado, paso la Puerta del Cielu y entro nel tunel del tiempu... ( Ye la moda, tan entrando na 1ªTVE).

 

"La Puerta Velázquez", La Puerta del Cielu nel Muséu del Prado

         Aprovecho un ratín llibre a la hora la siesta, cuando'l trasiegu l'Alcázar se fai más llevaderu, y empobíno dica'l taller del Sevillanu, como lu conoz tol mundu; quiero contemplar el cuadru del que tanto me tienen falao. Por mor del nuevu cargu, Ayuda de la Furriera, tengo accesu fácil a toles dependencies del Alcázar. Abro la puerta ensin necesidá de llave. ¡Qué raro!... A aquelles hores... Hai clariá nel cuartu. Tan abiertos dos ventanales a mandrecha, el primeru y el quintu... Diego, sentáu nuna butaca, ta acoldáu y pensatible mirando'l cuadru de frente, talo que yo... Quedo clisáu, mudu...Saludo a Diego con una mirada de revisgu y  llevanto un pelín la mano... Dame mieu romper aquella atmósfera... Siento l'aire de la estancia, que yo albidro escomanada, y escàpame la mirada dica la puerta del fondu. Ta abierta. Tienla abierto l'Aposentador que remanez petrificáu amirando pa min, tamizando la claridá qu'illumina un espeyu, a manzorga, onde se reflexen los bustos del rei y la reina. ¿Otros dos mirando'l cuadru?, camiento yo. Güei  hai overbooking....

Picasso mira a Velázquez (ArteHistoria.com)

          Miro pa Diego. Veo un home sabiu, mayor, ya espertu.... Ta cansu pero al empar contentu... Los pinceles reposen sobre una mesa; al llau, la paleta los colores, entá tienros, frescos... Predomina l'encarnáu.  ¿ Tevo rematando el cuadru ?... Clavo la vista nél, nel del cuadru... ¿Veslu? ¿Ta un poquiñín maquilláu o ye falcatrúa del tiempu?. Tiesu, arrechu y esi aire satisfechu... Cómo nun diba talo con esa cruz sobro'l pechu.... Nun-y cuerrespondía, non. Yera pintor. Un trabayador manual nun podía nesa España (qué coh.onudos somos) sopelexar la Cruz de Santiago...Ye que caballeru talu nun se pue manchar les manes... ¡Ah!, namás del sangre... Eso pa Diego ye fácil, bermeyón a la paleta y la torga satisfecha... Yá me decato... Cuando finó esti trabayu, va pa tres años, nun fuera entá  reconocíu como Caballeru Santiago... Güei vieno a rematar coles sos armes: una paleta y dellos pinceles. Ye qu' hai caballeros y caballos. Yá se pue colgar el cuadru.

Anticipu de Picasso, voi pola Etapa Azul.

          Quiero recreame... Siéntome en suelu, talo tuviere en familia - yo tamién quiero formar parte del cuadru - y quedo embelesáu... Suaño...
         Un poco chuleta yera... Miro pal cuadru y reparo... Y lo primero que veo ¿ye al rei? ...¡Non!... Pero Diego, ¿qué faes ehí?... ¿Nun ves que yes el pintor?... Y de Cámara, del rei.  ¿Aú ta ?, nun lu veo ... ¡Ah!, que nun quier ponese, que te tien un poco mieu porque lu saques tal cual...(Nun se pue llegar a vieyu)... Coño, tío; nun te pases que ye'l Rei de les Españes... Nun sías tan retorcíu... Sáltate un poco les normes, fai-y un pocu fotoxó ... El realismu 'l barrocu son más lluces que solombres... ¿Por qué pones esa cara?... Tu conoces a don Lope,y a Quevedo y al Quixote... Y a Carreño y Calderòn .. Y a Paul Rubens y a Rembrandt...Y a Montañés y a Fernández... ¡Ai, h.odíu!, ¿por qué ris? ¿Ris d' España? ...

Don Francisco de Quevedo, íntimu enemigu del Conde-Duque d'Olivares
(Ed. Bruño: "La España del Barroco": Marisa Muñoz y F.J. de la Rosa)

          ¿Qué me dices? ¿Que vuelva mirar el cuadru?. Sí, ho... Yá lu veo, nel fondu . Ellí ta'l Rei; cola reina. Pero malpenes s'aprecien, si nun los conoces bien... Bueno, en realidá nun tán; porque nun son más qu'una imax nun espeyu....¿Ye eso'l poder? ...  Claro, pa salir nel espeyu hai que tar... ¿Tán entrando? ¿Tán posando? ¿Tán mirando? ¿Son los fotógrafos? ... ¿O yes tu? .... ¡Ah!, que tu yes el pintor... En cualisquier casu tas colocáu al par d'ellos, a la entrada - cómo sinon pintes el cuadru-, controlándolo too... Talo'l rei, eh, cabronazu... Como si nun se te notara'l poderíu nel CUADRU; cuasi en primer planu, paleta en mano...

Hugo Horita: (www.pinterest.com)

              ¡Ah!, que nun ye por ti; que ye la PINTURA lo que sobresal ... ¿Tan importante ye'l cuadru que nos pintes hasta'l bastidor?... ¡Y menudu bastidor!... Cábete nél el mundu.  Gracies a elli les figures tan casi a tamañu natural na mitá baxa del cuadru. Darréu van faciéndose pequeñes, como si tuvieren lloñe... Paecen reales, son reales, naguo por falar con elles... Salir de dubies... ¡Venga, termina'l cuadru! ¿Sedrá verdá que l'Aposentador ye'l to pariente Pepe Nieto Velázquez? Porque das-y muncha importancia... Ye'l contralluz qu'illumina los reis. El contrapuntu del cuadru. El que lo ve too dende la otra parte: los qu'amiren y miraos. Ye l'escape, el puntu fuga la perspeutiva infinita... Claro, dexes la pueta abierta al espaciu... ¿Hai corriente? siento la bruga llambeme la cara... Oi, y eso de dir, pali a pali, esvaneciendo la nitidez les figures, que van amenorgando'l tamañu, pa dar entá más sensación d'amplitú ya espaciu namás se t'ocurre a ti, Diego...  

"Les Minines": F. Munguía (www.nacional.com)

         Bueno, lo que te dicía; prúime falar con ellos, colos personax. Entruga-yos por eses miraes... ¿Tan amirando pal rei o ye pa min - pa ti - que toi d'intrusu? ¡Pero qué guapo queda nel cuadru! Dan-y tal unidá que, de verdá, paecemos una familia....(Llegáu esti puntu pueo dicir que siéntome talo un rei; ¿nun toi al par d'elli?.  Qué pena que'l espeyu nun sía un poco más grande, o la perspeutiva más llevadera. ¡Oh, la perspeutiva! Tol mundu te la empondera...

Llinies de Perspeutiva (jmora7.com)

             Vamos ver, y eso de que :
             <<La pintura nun precisa d'honores, pue danos al mundu enteru>>
             Yá. Que'l  to escolín, el modestu Carreño, en relidá nun diz otro que tu:
            << La pintura ye sublime, alcánzalo too>> (¡Ai, Dios! ¿Quién s'alcordaría del rei si yo nun lu pinto?)
        Oye, nun enriedes conmigo... ¿Y agora qué faes? ¿Por qué nun tornes pal cuadru? Quiero contemplalu enteru. ¿Por qué apuntes pal espeyu? ... Qué me mandes, ¿que vaya pasando'l  deu?... Val, yá te sigo...
 La facha Velázquez, los cuadros d'enriba l'espeyu, la solombra la puerta, l'Aposentador, el mesmu marcu'l espeyu... Sí too escuro; ficisti un círculu prietu alredor de los reis....

La familia real nel espeyu máxicu. (jmora7.com)

            ¿Y qué quies dicir con eso? ... Que lo amire per interné ... ¡Qué morru!...¡Vaya!.. Asina qu'eso ye'l símbolu  la perfeición, ¿la monarquía, perfeuta?.. Pero Diego... Como si nun supieres onde pasa les tardes el to amigu Filipo ... En cuenta de pensar n'España anda escorriendo artistes pel Corral de la Pacheca; o'l de la Cruz, que tien más morbo... Sí, ho; que "nun hai mal que por bien nun venga"; que gracies a lo que curia les artes y el teatru  tenemos Lope's y Calderones... Sí, yá sé; a les Calderones curiales bien... Por enredase nel Arte escaecióse d'España.  ¿Perdonámoslu?
 

"El Corral de La Pacheca": Palcos y platea. (F.J. de la Rosa: Ed. Bruño)

          ¡Ah!, que nun acabasti... ¿Qué me señales agora?.. ¿Les cabeces principales? (Por cierto, denguna cala sombreru : chapeau) . Entames por Diego, a manzorga; tires pa embaxo, a Menina; pases pola Princesa; sigues per otra Menina y en parabólica vuelta xubes hasta l'Aposentador... ¡Coño, tas faciendo una diadema!.. ¿Una corona?... ¿Una constelación, dices?... La Corona Borealis. Sí, esa que tien la estrella Margarita nel centru... Pero Margarita ye la princesa... Le chouchou du Roi ... El caprichín de papá que tevo'l retratu colgáu nel despachu, talo cualquier otru padre.  (Demasiaes coincidencies, Ánxel del Campo; ¿pudo pensar Diego tanto?).

"La Corona Borealis" con Margarita nel centru. (jmora7.com)

           Bueno, pintor; yá veo que lo de ponete delantre'l rei nun ye namás qu'apariencia; en realidá ye elli quien controla'l cuadru: dende la entrada, dende'l fondu, dende'l cielu... Yes la hostia, Diego....
          Pero esto que toi camentando....Si tas al empar que'l rei, tando dientro y tando fuera, pero con paleta  en mano ¿quién ye'l amu de la fiesta?... ¿El rei, que ye una semeya, o tu que dirixes la orquesta?. ¡Ah!, que nun yes tu'l distinguíu, que lo sublime ye'l cuadru, la pintura... Y claro, si ella ye merecedora los honores del parnasu ¿por qué nun pues tu ser Caballeru Santiago?... En fin, yá te entiendo... Ta el trabayu por finar. Por eso, col bastidor, nun nos amueses el cuadru; tas esperando.... Cuando ellos te faigan l'honor tendrás tu la cortesía pa con nós... Pero eso sí, cola cruz en pechu... ¡Bruxu!.
             Y vós, espectadores de luxu, ¿por qué vos paráis ehí? Si queréis entrar nel Olimpu siguíi'l camín de la lluz. Y yo, amigos míos, ye lo que faigo enantes que se mosquie'l perru. Hasta agora calló por respetu al Rei... Pesllo la puerta ensin llave pa nun fadiar a los santos porque, alcordáivos, ta cayendo Vienres Santu y el Muséu ta zarráu; qué menos, la relixosidá  barroca rínde homenax al CREADOR.

Entré pela puerta'l cielu; salgo pela Puerta'l Tiempu
(jmora7.com)

            ¿Y por qué non?. A fin de cuentes...

                 << Ye la vida una ilusión,
                       daque solombra, ficción, 
                       que tola vida ye un suañu
                       una pintura,  quelle émotion! >>

ANDROMANCIA: Esto ye un blog de senderismu. Mal serviciu y fadríemos si nun cuntáremos lo que tenemos andao por aciu d'esta gayola. Xurgamos per:
. Relleimos "La España del Barrocu" de Marisa Muñoz con semeyes de Felipe Jiménez de la Rosa. (Pa neños)
. Mercamos: " Grandes Maestros de la pintura: Velázquez"(Altaya).
. Entramos davezu na "WIKIPEDIA" , de la que somos fervorosos siguidores.
.Blogs como : "ArteHistoria", "Muyinteresante.es", "Biografíasyvidas.com", "Españaescultura.es", "Pinterest.com", "Nacional.com", "Rimasdecolores.com", "jmora7.com", "ForoXerbar.com", "Trinijoven.com", "Españolessinfronteras.com", "España Eterna"y la "Galería de Windows Live".
. Dellos Museos de Belles Artes: Uviéu, Madrid, Valencia, Sevilla... El Muséu del Prado, el Muséu del Louvre... Muséu Nicanor Piñole (Xixón).