PrOTESTAS, nel entornu d'Olloniegu.

                     Na sienda Olloniegu -Vegalencia

         << Caminante nun hai camín, faise'l camín al andar.... >>

Astures, romanos, medievos.... Reis y Potestas, renacentistes y neoclásicos , nobles y mineros , merinos y villanos , roxos ya azules.... Toos.... anduvieren peles siendes d'Olloniegu.  Fasta nós, Pr0TESTAS d'esti tiempu, andamos talo que les caparines esnalando de buddleia en buddleia pa llibar el néctar d'estes tierres.

          Tenemos per delantre una xera bien prometedora: Averanos a esi puntu estratéxicu, a esi llugar de pasu obligáu pa colanos na Meseta: ¡Olloniegu!.
         Nun ye un sitiu cualquiera, non. ¡Qué va! . Ye`l llugar afayadizu pa cruciar el Nalón. Sabíenlo los romanos, de xuru; que lo aprendieron too. Y bien lo sabía Gonzalo Peláiz, que lu tenía controláu dende'l Picu Castiellu. Tamién lo sabía'l Pelegrín Valiente, qu'agospiaba los corraxos de pasu a Compostela, fasta que se convirtió n'ún d'ellos. Y Melendo, qu'esprecetáu tres Niria escaeciérese de pagar el pontazgu....
     - ¡ Tas guapu, manín; equí nun se cola nin Dios!.. 
     -  Pero home, ¿nun vos decatáis que toi siguiendo'l << Camín de Niria >>......

Tres d'El Pelegrín valiente (con Antón García), pola estampa d'Ulises Wensell.

C.N.: << Per equí pasaren Rigio y Niria camín de San Salvador, n'Uviéu, aprovechando la Ruta Xacobea. Igual de pasar por pelegrinos nun precisaren de pagar  pontazgu... Claro, qu'aquel carru...>>
 
        ¿Y a ti...  Nun te petez cruciar la ponte y siguir durante unes hores les enseñances de Magilo?...  

C.N.: << Podremos observar delles enseñances del cielu y de la tierra... Y sentir los clamíos de la tierra ... Y estremar lo casual de lo necesario... Y a la fin valorar la PAZ como'l principal manancial de sabiduría. >>

¿Queréis siguime pel Camín de Niria?

      Sienda Olloniegu -¿Bárcena? y lo que te rondaré, morena...
. Tipu de ruta: Llinial. Ida y vueltes.....Ya reversible: Olloniegu < > Vegalencia.
. Percorríu: 4.675 m. Namás la ida. (Unos 10 Km I<>V) . Lluéu les escapadines...
. Tiempu: Unes 3 hores I <> , si namás vas estirar les pates.... ¿Qué tal si tornamos dellos díes?...
. ¿Dificultá?: Hasta se pue dir en bici ..Pero ensin avasallar, ¿eh? (En denguna sienda pa bici alcontré xentre tan correcho). L'ùnicu problema pues tenelu si te topes col Basiliscu...
. Puntu de Salida (pa nós): Polígonu Industrial d'Olloniegu. Al par del Centru Formación pa Conductores.
. Meta: ¿Pero qué ye, yá tas cansáu?... Venga, si andes apuráu déxote en Vegalencia.
. Llocalización: Olloniegu ye una parroquia del municipiu d'Uviéu. Vegalencia pertenez al conceyu  La Ribera (Ribera d'Arriba).
. Track: Polígonu Industrial d'Olloniegu  - La Ponte los Colores - (Una escapadina al Pontazgu: Acolumbramos Picu Castiellu) -La Pita : Garapiellu históricu (2ª escapada) - Barandiella de colores - Camín asfaltáu- Ponte pal tren - Los Navalones: Murralla caliar, estalactites, cuentu... - Ponte la RENFE - Otra barandiella al Nalón -  Tobogán - Ponte l'Autopista - Área Recreativa - Paséu fluvial de Vegalencia: Embalse y Ponte Blanca - Fin de ruta: Soto Rei o un poco más: Soto Ribera. ( Otra escapada: Xinta en Tellego, "Casa Cristina").

                COMPLEMENTOS:
Anexu I: Cuentu "Pelegrinos valientes" (estroza d'El pelegrín valiente, d'Antón García)
Anexu II:  Picu Castiellu y Santuariu de  Berrubia. (Ta pendiente; tate pendiente)

Yá prometía la nueche del día enantes....

"Pela tarde bermeyón, pela mañana non"

         Entamó por ser una d'eses salides curties y cerca casa por mor del tiempu... Por eso tiramos pa Olloniegu ( mecedura de ríos ), poco más de media hora en coche dende l'estrarradiu Xixón. Tres l'avituallamientu na Tahona Vega buscamos la Minera (AS-I) en Granda, cerca los Güertos del Ociu. Na rotonda de Valnalón garramos la AS- 116  en direición a Olloniegu. Dexamos Frieres a mandrecha y tamién la industriosa Tudela Veguín. ¡Mira, un palaciu a manzorga!.. Enseguida vemos el desvíu a Tudela Agüeria. Güei nun ye'l día pa parar equí, pero queda al pendiente. Nun tardamos un res en dar cola señal que nos va meter nel Polígonu Industrial de Tudela-Olloniegu. Siguimos la indicación pa entrar nelli faciendo una rotondina pembaxo la carretera. Percorrémoslu enteru, fasta lo cabero. Aparcamos adelantre l'Area Recreativa de Santianes, al par del Centru de Formación pa Conductores a.s.p.a., dependiente del Principáu. Vese bien el lletreru de Zinco. 

Área recreativa Santianes. Aparcamientu.

         D'entrada un paseín a  la vera'l ríu Nalón -tres pasar la Ponte Azul- pel asfaltu del Polígonu hasta dar col cartelu que nos desplica la ruta a siguir: Sienda verde Olloniegu -Vegalencia. (Bono, el cartelu güei taba desaniciáu pero alcontrarémos otru al final).
 

Entamu la ruta. Ponte de colores sobro´l Nalón.

              Un pequeñu tobogán del camín dèxanos endamiaos nuna Ponte - Pasarela de Colores de lo más vistosa. L'amigu Vettel andaba un poco roceanu... Dába-y como resquildu'l ruíu les pisaes so los chaplones de fierro.... Camina como en precariu equilibriu pero nun hai peligru algún.

¿Partidarios del Potestas
 camín de Picu Castiellu?
¿Fuxen de Suero Bermúdiz
per esta 
Barandiella de Colores?
 ¡Qué guai!

Semeyes d'Alberto LLano

       Enseguida aportamos al barríu La Pita (Olloniegu), nel Camín Xacobéu. Penriba la carreterina que nos mete nel centru d'Olloniegu, per acíu'l Conxuntu Históricu, pasa'l ponte l'autovía Uviéu-Llangréu.

       Daqué vez tenemos aparcao ehí'l coche, pero ye más prestoso dexar el carru al par de la Torre Circular, frente al altar de la capiella'l cementeriu.

 
      Talo fexo Doña Urraca I de Lleón cuando crució les Asturies camín de Galicia a la fin d'apaciguar los ánimos nestes tierres y, de pasu, conformar un exércitu pa dir escontra'l el so EX : Alfonso'l Batallador, rei d'Aragón, que naguaba por facese l'amu de Castiella...

Dª Urraca I de Lleón
pasó per Olloniegu
cruciando'l Nalón.

  
P: << Cuando Dª Urraca aportaba a Olloniegu pola cumal del Padrún un garapiellu de nobles astures, ente los que taben Gonzalo Peláiz y Suero Bermúdiz, salió-y al pasu nel castañéu de la fastera >>.

  Bien pudo la reina escaecese del sustu bebiendo del manancial allugáu al par de la capiella primixenia, onde de xuru s'encamentare a Dios por aciu la xera que-y esperaba, camiento yo.

           Pero un momentín... Nun cuerras... Contempla esti maizal. ¿Tu sabes de les fames que quitó'l maíz?. Pos esta vega debió ser mui granible. ¿Nun visti la escomanada ñora que termina nesa casería? El cartelu de la entrada diz: "El Molinón". Y nun  ye'l Teatru de los Suaños que toos conocemos, non. Ye por mor la bayura maizales de la vega que precisaben molienda.

Maizal na granible vega del Portazgu. Clima suave y agua a esgaya.
      "El maíz la cabera selmana d'Abril
y la primera de Mayu 
la meyor sementera del añu"

El maíz:
            ¡El maíz! (Zea mais).Palllabra máxica pa un asturianu. ¡Cuántes fames quitó'l máiz!. El maíz, << lo que sofita la vida >>, dicíen los indios caribeños. ¿Qué tendría sío de los asturianos de nun ser por esta planta graminia, de ciclu anual, importada d'América nel sieglu XVII ?. Y nun ye solo pa nós. Ye'l cereal de mayor volume productivu nel mundu, sopasando inclusive al trigu y al arroz, ¡quién lo diría!. Los arqueólogos tienen alcontrao nicios de maíz nel valle de Tehuacán (México) con una antigüedá de 7000 años. Mayes y azteques, que bendicíen esta planta nes fiestes, afirmaben que <la carne y el sangre taben fechos de maíz>, y nun-yos falta razón. Los asturianos sabémoslo bien: na portada la catedral d'Uviéu ta representada una panoya. Nós, tamién la bendicimos.

Panera en Sotorribera

La costume de plantalo con fabes ya vien de los nativos caribeños; nun son ocurrencies nueses.  Ellos plantábenlo con fréxoles , que s'enroscaben na caña nun precisando de palos, y con calabaces, ya que les fueyes torguen el crecimientu de males yerbes. Y les fabes tan contentes con eses vecines d'andecha que caltienen la húmedá del tarrén, una bendición pal so sistema radicular.

          El maíz ye una bendita planta monóica - flores machu (racimos) y flores fema (espiga) independienes nel mesmu pie (¿habrá que facer esto colos catalanes?) . De tallu macizu, al aviesu d'otros parientes que tienen el tueru güecu, dan de frutu unos granos mariellos apetiguñaos nuna panoya. Una vez maduro pasa de les cuques al corredor pa terminar de secar.
 Fácil de moler da una fariña blanco que permite facer farrapes, boroñes o tortos :

                        TORTOS  CON PICADIELLU  

Ingredientes: 
. Picadiellu de gochu. (Carne picao y adobao con pimentón, sal y ayu).
. Fariña de máiz
. Sal
. Agua
. Aceite
            ....................
Precisamos de cazu y cocina .
El restu de productos de la Seronda acompasen al platu principal, d'entrante o de postre: mazanes, figos, castañes, tomates, pimientos, ablanes y ... una Botella sidra, pa esparcer la calor del fueu según vas friendo.

Preparación:
Tresnamos la masa estendiendo la fariña na mesa. Echámos-y sal al agua y vamos añandiéndolo a la pastia. Ye importante que tea perbién bregada y nun quede coxa de sal. (Cuando la parienta nun te vea echés-y tu un poco más, si nun tienes problemes d'engorde, de diabetes...) .

Cuando camientes tar yá bien amasao faes unos churros, que vas cortando. Achápleslos pa que te queden en forma de hostia (esto nun dexa de ser un ritu cuasi relixosu ), pero grande. Si te gusten churruscaos pon tol procuru en que les "hosties" seyan fines; agora, si tienes los dientes mal... un poco gordines.
Prendes la cocina y pones el cazu al fueu con un poco d'aceite. Cuando tea bien caliente vas echando los tortinos a freir procurando da-yos vuelta pa que turren per dambos llaos. Metes y saques colocándolos nun platu.

 Agora tóca-y al picadillu. Écheslo nel cazu, con un poco aceite caliente, y vas revolviendo con una cuyar de madera. (¡Que nun te queme!. Nun te pongas a ver la Champion...). Cola mesma vas colocándolo con ciñu enriba los tortos...
 Pues regalos con vinu tinto pero yo tomaría sidra....
¡Qué! ¿Nagües?... Sigui andando, anda.... 

                                 ************************************

                     ¿Y qué ye eso?... Al contemplar una vaquería , a mandrecha, nuna vuelta'l camín vemos una perllonga muria de piedra. Según espurrimos la vista decatámonos que se trata d'una ponte sobro'l ríu; una ponte antigua, pergrande ... Ye que'l ríu enantia enforma ... Hai que pisala... Percorrémosla... Un cartelu diz : Nalón. Y nosotros dicimos: ¡Amén!.

Primera escapadina: El Portazgu

El Portazgu. Ponte que desemboca nel fielatu, al fondu.

             Vemos otru cartelu : ¡Portazgu!. ¡Cuántes coses nos remembra! Pero tiramos palantre. Esta ponte construyida nel 1.780 por Manuel Reguera tenía un fielatu pa cobrar el pontazgu por aciu les mercancíes que diben o veníen, sobre too, camín de Castiella. Yera pura necesidá esta ponte darréu camudar, nel añu 1676, el cursu del ríu por mor d'una riada que dexare al paru l'antiguu puente de San Pelayo, l'históricu, el qu'emboca dafechu nel Conxuntu Históricu.

La Oficina del Pontazgu: El Fielatu.

                   Namás cruciar, a manzorga, vemos un edificiu singular: La Oficina d'El Portazgu (El Fielatu), un edificiu neoclásicu de 1833.  Pocu tiempu tevo n'activu. Dexó de prestar serviciu a lo cabero'l sieglu; hacia 1883.

A Uviéu 1 y 1/2 Llegües
A iguame... ¡Soi una ayalga!

 C.N.: << ¡ Cuayu, Clodo, que namás nos queda llegua y media p'aportar a la Puerta Rutilante!... Entós verás les torres más altes qu'imaxinar pueas... Masque esta vegada serán de pasu, porque  andamos apuraos. Tres díes d'avance nos lleva Niria, camienten esos llabriegos...>>

         Pero güei nun vamos tres Niria. Otru día. Que la siga Melendo. Nós damos la vuelta pa desandar El Pontazgu y retomar el camín de Vegalencia...  Alzamos la vista pa situanos nel entornu...
- ¡Mira, no alto!..
 Ferregüeyando l'entornu, controlando'l valle, la ponte y el palaciu acolumbramos nuna pica les ruines d'un castiellu... ¡Picu Castiellu!... 

 

Picu Castiellu , al fondu, dende'l Portazgu

         ¡Por fin!. El castiellu referencia de Gonzalo Peláiz. Ehí féxose'l fuerte nes sos engarradielles escontra'l Rei de Lleón Alfonso VII, el Raimúndez. Equí y n'otros castiellos: Alba, Alesga, Proaza... ¡Menuda puya  caltuvieren!... Fasta tres amarraes tuvieren nos caberos años la vida Gonzalo... Esti, llevantiscu... El Rei, que perdonaba... Dos "entente cordiale" pero... A la tercera foi la vencida .... Y el nuesu mocín morrió nel destierru portugués...
        - "¡Qué faigo yo equí!... Soi'l Potestas d'Uviéu ... Soi l'asturianu de los asturianos... ¡Llevá-yme pa casa! . Qué remediu... Ta enterráu n'Uviéu.
         - Que non, ne; que non... Que'l PrOTESTAS nun yera independentista, que los asturianos nos somos asina... ¿Qué te paez si tornamos otru día y, allárribones, te lo cuento too?...

Picu Castiellu, pel camín de La Mortera.
 - Si t'atreves xubi por min, Alfonsín. 
- Al platu vendrás, PrOTESTAS.

            Col coral nun puñu, de tantes emociones, facemos esnalar la vista dica'l Garapiellu Históricu. Tenemos que dexar un momentín la ruta -¡vaya día!- y averámonos al palaciu. Al columbrar la torre circular - ¿lo más llamativo? -  danos un valtu'l corazón y, talo qu'unos poseíos, abandonamos la ruta - ¡otra vegada!- pa tirar pela carretererina d'anantes, la xacobea, la que nos mete na villa..

Segunda escapadina: (2ª Protesta) 
         - ¡Quieto ehí! ¿Nun veis la ponte oxival? ¡Ah!, y esa torre circular... Nun ta sola. Adosada a ella, faciendo cuerpu, tien un edificiu rectangular que queda llimitáu por otra torre cuadangular. Y al cabu la carretera, frente por frente la Torre, vese'l cementeriu, onde ta la capiella primixenia, la primer construcción. Paga la pena parase, amirar, sacar semeyes, entamilgase na ponte y remembrar la hestoria......

Garapiellu históricu: Capiella, Ponte, Torre y Palaciu.
¿Quedará daqué pa los ñetos?

     El Garapiellu históricu que tenemos enfrente ye una ayalga medieval que - por aciu la crisis, la falta idees o la valgana - ta ¿medio? abandonáu. ¿Ónde podemos alcontrar tanta bayura?... Una obra civil (palaciu), una obra d' inxeniería (la ponte) ya una obra relixosa (capielles) venceyaes a un camín perimportante - Camín de Castiella - ya un manancial al llau del mesmu. Y esto ta a 8 km. d'Uviéu, a poco más de Mieres, cerca Llangéu y a media hora Xixón... 
      Magar que lo más señalao del conxuntu sía la ponte l'edificiu más primitivu ye la capiella - ¿con nicios prerrománicos ? - qu'anguaño ta ancloyada nel cementeriu. Camiéntase qu'esta ilesia pue tener el so orixe por aciu l'averamientu a un manancial de cultu paganu, cristianizáu col tiempu so l'abellugu de San Xuan Bautista. Dellos años más tarde pasó so l'amparu de San Pelayo ( non antes del 925 - la corte yá taba en Lleón -,  que foi cuando morrió esti santu). Tien detalles prerrománicos o asemeyaos, según camienta Xuaquín Manzanares.

Anguaño lo que queda d'aquella ilesia románica (XIV) de 8 x 5 y picu metros d'anchor- según J. Manzanares - ye l'ábside cola so puerta d'arcu apuntáu. Lo que güei ye la entrada al cementeriu sedría la facha  y el portón d'entrada a la Ilesia. Dientro podemos recreanos contemplando l'altar colos sos grabaos y pintures a puntu d'esaniciase. Fáiseme imposible ver eso asina: semiabandonao nun ambiente llento... ¡Entá caltién les pintures!... Dalgunes anubríes d' un azul cielu per aciu d'un curtiu de papu sanu (nun tiempu más bien cercanu foi almacén de pintura). Dende lluéu ye un ¡milagru!. Menos mal que ye bien d'interés cultural dende 1981.

Altar románicu escaecíu de Dios y de los homes.

. La segunda construcción del Conxuntu foi la Ponte.
          Pa pasar - o tornar - a la Meseta  y empalmar n'Astorga cola Vía de la Plata nun había otra que cruciar el ríu. El Nalón yera ampliu y caudalosu; ¿qué forma más segura qu'una ponte? ¿Qué sitiu más afayaizu qu'Olloniegu? ¿Qué chollu más porgüeyosu pa algún llistu?. Ye de suponer, y la tradición oral asina nos lo cuenta, que los romanos - el Puente Romanu, camienten per Olloniegu - yá tuvieren fecho una ponte cerca la ilesia.¿Per ónde pasaba la calzada romana que xuncía Lucus Asturum (Llugones) con Astúrica Augusta (Astorga)?.
          La ponte que vemos güei día - fecha una triste llaceria - cuenten que foi llevantada nel sieglu XIV (daquién emperráu nel XIII). Por embargu hai documentación escrita del XII cuando Alfonso VII l'Emperador, el fíu de Dª Urraca, donó - en 1.145 los drechos del PONTAZGU d'Olloniegu a partes iguales ente: El monasteriu de S. Pelayo (Uviéu), el Cabildru la Catedral d'Uviéu y el Monasteriu de Santa María la Vega (Trubia). Yá habría, entós, una ponte anterior a la que se ve anguaño.
         Otru fechu documentáu vien de la dómina Alfonso X, el Sabiu (1.221 - 1284): << ordenó al Adelantáu Mayor de Lleón y a los Merinos d'Asturies que ficieren respetar los drechos del pontazgu >>. Polo visto yera un mamonéu talu qu'algún tiempu dempués (XIII ó XIV) hebo de construyise la torre circular: Unos soldaos van controlar el pasu. Tevo la ponte igües nel XVI pasando a quedar obsoleta nel XVII por aciu la riada de 1.676 que camudó'l cursu del ríu, como se ve n'actualidá. Por eso l'arquitectu Manuel Reguera construyó nel 1.780 el del PORTAZGU. El casu yera cobrar; como agora. ¿Nun tenemos un fielatu n'autopista?. La Política poco camudó.

**Cotilléu: Como los vecinos d'Olloniegu tamién teníen que pagar pa cruciar la ponte tuvieren enfocicaos cola autoridá por aciu los arbitrios del pontazgu . Terminaren desimiéndolos del pagu cola fin que la zona espoxigare. Si siempre pagamos los mesmos... (Yá verás, a que terminen faciendo lo mesmo colos catalanes...)

Estos pelegrinos tampoco tan dispuestos a pagar el pontazgu... 
Como si hai qu'andar a cayadazos!

          Cobrar el pontazgu nunca foi fácil, asina que se convino en poner una guardia permanente al par la ponte. A esti envís terminó construyéndose un edificiu p'agospiar los centineles y la oficina. Dalgo qu'impusiera... 
         La torre Muñiz, esa tan guapa, circular, de tres pisos y fecha de mamposteria, que domina'l conxuntu y tola redolada, foi llevantada pola familia Muñiz nel XIII ó XIV. Nel XV pasa a manes de la familia Ibán Bernardo Miranda siendo'l so fíu Lope d'Estrada, yá nel XVI, el que llevanta la torre cuadrada y l'edificiu anexu, el primer palaciu, que presenta una fachada con portón de grandes doveles y tres ventanales. El restu les construcciones, incluyendo otra capiella, son cosa de Felipe Bernaldo de Quirós, nel XVII. 
          Hai un vidéu en Youtub : <<Palacio Bernardo de Quirós>> onde vemos l'interior . Da pena y dolor pero ¡ Qué palaciu ! . Munchísimo mayor de lo qu'aparenta per fuera. Tien unos balcones que paecen del XVIII. Has miralu. ¿Nun se pudo tener fecho daqué per aciu los "fondos mineros" ?

El caballu de Santiago vela pol "Palaciu d'Olloniegu"
 que tien un futuru mui prietu...

              Tornamos a la sienda.
     -¿De xuru que vinisti de ruta o tas repasando la historia?.
     -¿Y qué culpa tengo yo si andamos per Olloniegu?. Farda denguna nun tengo. Son "CLAMORES DE LA TIERRA".
              Per un camín asfaltáu, acutáu por una moderna barandiella de colores llamativos, vamos siguiendo la corriente'l ríu. Un requexu pal descansu onde te pues parar a sentir la naturaleza. Páxaros, ánades y viesca de ribera: salgueros, pláganos, umeros y bidulios faen miga con chopos, ablanos, castaños o fresnos.

La barganal de colores

El PLÁGANU:
                   Ún de los árboles típicos de la viesca ribera ye'l Pláganu o Pládanu (Acer pseudoplatanus). El so nome vien-y del celta: Acer > Ac = punta, porque cola so madera, perduro, facíen llances. Pseudo= falsu y Plátanus = pola asemeyanza col plátanus híbrida, el plátanu de los parques.

Tengo los peciolos roxos y la fueya bien palmiao
 como nun ye plan tar solu tengo la Buddleia al llau.

           El Pláganu (Acer pseudoplátanus) ye un árbol plani-caduci-foliu, altu - ente 20 y 30 m.-,  coles fueyes simples, grandes y palmiaes que presenten un peciolu llargu y d'un colorao llamativo. La corteya del tueru esforgaxa de viexo en plaques que se suelten fácil pa defendese de les enfermedaes. De verdoses flores hermafrodites o dióiques o andromonóiques o polígames ( nun tien problemes de sexualidá) dispuestes en corimbos colingantes da unos frutos alaos - mui fáciles d'esparder pel vientu - con dos biltos xuncíos formando una disámara d'ente 60º y 90º d'abertura. Florez na primavera y madura a lo cabero'l branu.

  Onde meyor esporpolla ye a la vera los ríos - collaciu de llameres y fresnos -  en tarrén llento, caliar y fondo pero adáutase a suelos probes, magar que por aciu les sos semilles alaes ye una planta pionera nes previesques monteses. De fechu  hai un pládanu montés (Acer campestre) fácil de ver nos cursos baxos los ríos del sur-oriente d'Asturies (Cares-Deva) pero la disámara d'esti conforma ángulos de casi 180º. Tien otres cuantes variedaes, dioiques o polígames, col ángulu de la sámara mui variable. De madera duro ye un árbol perapreciáu n'ebanistería pol so veteáu.

N'Alsacia francesa cuelguen la rama del Acer enriba les puertes p'afuxentar los esperteyos. Asina que si tienes que dir a Estrasburgo pa defender los tos drechos igual nun te venía mal llevar prendida na solapa una disámara en plan  (V). Tamién la podemos ver na bandera de Canadá simbolizando la nueva nación y el pueblu.

La bandera Canadá tien al Acer por bandera.

              Nun tardando tamos andando pembaxo un puente la RENFE (1), ande un finxu marca'l Km 2. Yo llámo-y La ponte en seco, o´l viaductu, porque nun yes a columbrar l'agua a los sos pies.
 ¡Qué guapo si apruciera'l tren!.  Pero quedamos cola gana.

Ponte RENFE-1 , en seco.

            Caminando a la vera'l ríu alcontramos nes zones húmedes requexos bucólicos como estos:
 

Llingua de ciervu, la reina d'esti cuadru.

Ciclistes y caminantes comparten el ruxerrús del agua y la tarmuda vexetación : 

Ciclistes arribando a Los Navalones.

                    Vamos pasar pembaxo, podríemos dicir, d'una escomunada  muralla de piedra a l'altura Los Navalones. Una parede caliza,en precariu equilibriu sobro'l camín, que paez tener la intención d'engullir al pasiante. Vemos unes estalactites colingando nel muradal. Hai quien aprovecha pa facer alpinismu; da pie pa ello.  ¡Qué pequeños nos vemos! .... ¡Qué poca cosa somos!.

Cuerres peligru de sumite nes fauces del Nalón : Muralla  "Los Navalones"

         Nesta fermosa parede, na que se puen apreciar estraños seres en forma d'estalactites o grabaos rupestres naturales, hai sapiens atrevíos que s'arriesguen a visitalos faciendo espeleoloxía.

                  . ¡Uf! - diz Vettel afitáu na barganal. Pensé qu'esa pareona diba caeme enriba... ¡Qué bien tamos n'esta escamplada!.
                 . Oíi, ¿nun sentís daqué?... Yo siento un ruíu sordu ....Un soníu maraviosu...

      - ¿Nun sedrá'l Basiliscu, eh?....
      - ¡El tren!! ¡Sacái la cámara!

¡¡¡ El tren!!!.  Ponte la RENFE sobro'l Nalón

            Siguimos caminando al pasu per una sienda asfaltada. Va estrenchándose'l camín. Entramos nun tramu  un tanto avesíu, misteriosu... Sentimos a mandrecha'l burbusar de les agües...  A manzorga, medio escondida ente la ramasca, vemos una cueva...  Qué requexu  tan afayadizu pa dalgún habitante misteriosu de la viesca...

Llenta y llóbriga atopamos la ¿Cueva del "Osu Cavernariu"?.
Esta sí que ye apropiada p'agospiar al Basiliscu...

          Menos mal que, de cuando en cuando, pente los claros que dexen umeros, fresnos y pláganos acolumbramos la carretera.... Pero nun ye pa fiase.... El día tornóse propiciu pa que dalgún ser mitolóxicu ande perdayuri....
           Nestes sentimos un arrecendor perfuerte que nun somos a esplicar. Al borde del camín , pente les tarmudes cañes, ábrese una bocana que va dar pasu a la rixa'l ríu. El suelu ta bien trilláu; debe ser grande'l trasiegu.... Miramos unos pa otros y decidimos entrar...

¡Ondia! El mismísimu Basiliscu saliónos al pasu.... ¡ Qué día!

     -  ¡Zas! ¡Ehí lu tienes!.... El cuélebre...
     - Nun sé, amíralu bien...   ¿Nun te decates que la cresta paez d'un gallu perxigante?.....
 ¿Nun sedrá'l Basiliscu?..
     - Y entá tien una cola perllarga escondida ente la maleza... ¿Y esi morrillu na boca?...
     - ¿Ye un regodón o ye un güevu?...
     -¿ Un güevu ? ¡H.a! ¡H.a! ¡H.a!
     - Sí, ho; un güevu de gallu, que non de pita. Tien de metelu ente'l cuchu pa que cola calor guarie...
     - ¿Menudos gallos había antes, eh?
     - ¿Díceslo por mi, ho?
     - Sí, home, sí... ¡Coimes! Oyóte..  Ta mirándote de revisgu...
     - Ten curiao, eh. Que si lu amires direutamente a los güeyos pue esaniciate...
     - Colemos d'equí. ¡Dios! Y pensar que'l Pelegrín Valiente andevo per dayuri...
     - Ta lluéu, campeón. Qu'aproveche'l regodón. Yá tornaré en cuantes faigas la dixestión.

            Salimos pasín a pasu daquel llóbrigu tramín y, per aciu una caparina, posamos los güeyos nesta planta perguapa que nun s'asepara de nós en tol camín. ¡Curiao coles guapes!

Soi la reina de la sienda Olloniegu- Vegalencia: Soi Buddleia.

          A cada pasu que das ¡plaf!, esta planta lila perguapa:


        La Buddleia - de la qu'hai más de 100 variedaes - ye una planta bastante grande  anque rara vez algama a ser árbol y menos per estes lalitúes. Ye foriata. Tamién tien venío del Nuevu Mundu, talo que'l maíz o les fabes, y ye dioica ( árbol machu y árbol fema) . Pero hai variedaes que'aportaren d'Asia y África y son monoiques, flores machu y flores fema nel mesmu pie ( el nuestru casu). 
La variedá que más abunda perdayures ye la Buddleia Davidii. 
 De la familia les escrofulariacies - talo que la dedalera o la verónica - traenos  l'arrecendor dende'l llonxanu oriente, China o Xapón. El casu ye que a la vera'l Nalón espolleta que da gustu, tando yá naturalizada.
Arbustu (2/3 m.) semi ó caducufoliu de fueya buxo y llanceolao presenta unes rames llargues y enarquiaes onde crecen unos vistosos conos de color lila con inflorescencies n'espiga. Les caparines pásenlo de viciu tol branu, y hasta na seronda, llibando'l néctar d'estes ayalgues viola. Pero hai que tener curiao nun s'embabucar con elles - yá sabemos lo que pasa cola flor foriato - , cuerren el peligru de facese invasores... ¡Ai, esa mirada oriental!....

Soi anátida, tengo membrana

 
           Entá ensin salir del plasmu siguimos caleyando... A eso vinimos. Echamamos una güeyada hacia'l ríu al reparar nes numberoses aves que revolotiando nel agua salen a saludanos dende les roques. Ye d'agradecer. Esti xolgoriu avícola va caltenese mientres percorremos tola canal.
Facemos un tobogán del camín guapamente empiedráu y, tres pasar pembaxo la ponte l'autopista A- 66 ( la que va d'Uviéu a Mieres),  aportamos a una vega pergrande de la que malpenes acolumbramos el cabu. Entama per una cativa Area recreativa: Dos mesines en madera de lo más afayaizo pa comer. Güei andamos con tiempu y namás tomamos la parva pa poder siguir caleyando. Igual pa xintar damos con un sitiu más petecible...

Tiramos vega alantre averaos al ríu. Equí'l Nalón ta canalizáu. Una barandiella metálica torga que podamos cayer fácil a la canal. Ye la ñora que da na presa la Central Térmica de Sotorribera; féxose por mor de la mesma. Por cuenta d'ello el tarrén que taba a nivel del ríu xubió unos cuantos metros. Quedó como Dios. Agora la vega nun se ve inundada y los vecinos viven muncho más tranquilos. Un par d'ellos camentáronnos que naide s'esplica d'onde sacare'l Principáu'l nome de Bàrcena (¿Sábeslo tu?).  ¡Esto ye VEGALENCIA!.
 Quiciabes una esplicación tea nel nome:
 / bar- k - ena/ : Llugar fértil a la vera d'un ríu.
. /bar/ : llugar fértil con agua.  . /ena/ : oriella

            Pali-pali algamamos a una ponte blanca y moderna, la Ponte Vegalencia. Ehí fina la ruta. Un cartelu fáinoslo saber. ¿Pero vamos conformanos colo temprano que ye? . Venga, ho; un puquiñín más...

La Ponte Vegalencia

          Al salir de la estrenchez del valle ente la tarmuda vexetación y entrar en Vegalencia sentimos como un aliviu. ¡ Good by, Basiliscu!  
          Alendamos profundo y enantamos la vista: El Nalón, encorsetáu en formigón per dambes orielles, va espurriéndose per una vega peramplia y granible.

"El guerreru l'antifaz"

Una moderna  ponte en blanco xunce les dos poblaciones de la vega: Vegalencia y Soto Rei. Por si fuere poco bayura d'aves de colores espláyense ente l'agua. Unos, los ánades,  van pescando dende la superficie mentanto qu'otros esmucénse embaxo l'agua en busca de presa, como los porrones.

De xemes en cuando - y pa gayola de caminantes - echen unos cancios al empar que cueyen vuelu. Unos salen d'estampida, otros precisen coyer carrerina nel agua enantes de despegar.... Hailos prietos y blancos; azules, verdes y buxos... ¡Qué guapu ye aquel del antifaz verde y la cabeza castaño! ... Eses plumines marielles traenme al alcuerdu delles pincelaes de Piñole...

Otru cartelu desplícanos les diferentes clases de coríos que moren nesti habitat: Ánade Real o Azulón (Anas Platyrhynchos), Porrón européu (Aythya ferina), Porrón moñudu (Aythya fuligula), Cerceta común (Anas Crecca) o la focha (Fulica atra).

Fulica atra, esplayándose nel agua.

          Vemos dalgunes aves que nun tan nel cartelu. Una que reconocemos, por esa careta blanca nun cuerpu pequeñu y prietu, ye la focha. Esta gruiforme vive nel agua seique nun sía un coríu. Chaplotia pela superficie, gracies a unos preciosos deos lobulaos,ensin llevantar vuelu y anda a cachiquinos. Si dalgo me presta d'ella son esos niales pergrandes qu'engarcia con bultables garbos y dexa albentestate pa gayola de los neños na superficie del agua. Pues aprecialos nel Parque Isabel la Católica, si tienes humor pa ello.

          Vamos caminando adulces mientres seguimos el cursu del ríu acompasaos pol batir de les aves, la vexetación de ribera y dalgún deportista en piragua:

El Piragüista

           A mandrecha del Nalón quédanos el pueblu y la estación de Sotorrei. A manzorga hai un senderu, perfechamente arregláu, qu'asciende a l'aldea de Tellego. Ye famosu esti pueblu, na fastera del monte que xube al Picu' l Gatu o'l Mandarrón, por tresnar les meyores fabes de la redolada en Casa Cristina. Ye un poco temprano, asina que dexamos el manxar pa más tarde.
          Como que nun quier la cosa aportamos a una rotonda, un carrefour de caminos: A mandrecha pa Uviéu o a la Central Térmica; a manzorga pa Mieres y defrente, per una moderna ponte colingante, pasamos a Sotorribera. Vamos tirar per esta última. Y dende l'aire, entamilgaos na ponte, vemos colar col agua trenes y coches; xente.

Soto Ribera: ¿Cómo, sinón, podría nomase?

La Ribera (Ribera d'Arriba):
          Teníen que ver esta ponte los antiguos habitantes de la zona; aquellos que moraron nes cueves rupestres - hasta 16 se tienen alcontrao - y que dexaron muestres del so arte n'Entrecueves (Ferreros) o na Cueva los Esperteyos - Murciélagos, dicen otros - per Fresneo. 
          Más palantre trabayaron el fierro - ¿d´ónde vien el nome de Ferreros? - en castros como'l del Cuetu (Sardín) o'l Picu Castiellu (na Carrera) , o nel Picu Llanza, na Corona (Perera) o tamién en Les Pedreyes (Lavareyos). Nun debió escaecése-yos col tiempu porque en Ferreros hebo mines fasta va poco.
         Reinando Ordoño I, nel añu 857, la Ilesia d'Uviéu recibe una donación mui pretosa - les tierres de la Ribera siempre fueren mui llambiones - : La templu de San Pedru, en Ferrero, y delles posesiones per Palomar, Perea y Vegalencia.
         En 1012 hai más donaciones a la Ilesia por mor de Mummadona y nel  1112, la nuesa conocida Dª Urraca, da-y al Obispu Pelayu - favores de cuando andaba a la tema col so EX, el Batallador - la propiedá del conceyu La Ribera - ¡toma! - al convertilu en Señoríu Episcopal, magar que siga gobernáu polos "nobles" de la zona.
          Petite talu nun pasó desapercibíu pa Felipe II que, por aciu una Bula Gregoriu XVII, incorpóralu a la Corona. ¿Pa qué lu quier? Pa vendelu a los vecinos en 1579 (quedando pa siempre municipiu independiente).  Falta perres, p'andar de guerra en guerres. 
         En 1808 - Guerra la Independencia - dellos vecinos empobináronse dica Uviéu a dar cuayu a los capitalinos ( digamos l'Audiencia) qu'andaben un poco roceanos p'allugase dafechu col llevantamientu escontra los franceses. Igual yeren clarividentes y acolumbraben la que se-yos echaba enriba con aquel "fíu de San Lluis" - por nun dicir otra cosa - Fernando VII.
Nel 1836, por mor de les guerres carlistes, hebo una batalla na zona favoratible a los partidarios de D. Carlos que salieron al alcuentru de los gubernamentales provenientes d'Uviéu.
Na guerra civil del 36 La Ribera foi la base republicana pa dir escontra la capital. Saliómos torda; nel 37 hebo que recular...

        Nun acabó equí'l día. Entá nun dimos la vuelta. Tiramos haci'l pueblu siguiendo la carretera Palomar. Una pequeña construcción llamónos l'atención. Cuando tábemos cabilgando qué podría ser aquello unos vecinos sacáronnos de la espirica: ¡Un caleru!

Caleru en Sotorribera

                                     Un caleru:
             P'algamar a Olloniegu, al poco de pasar Frieres,  pasamos per delantre la fábrica de cementos de Tudela Veguín y la cantera de la que s'abastez, que la tien enfrente.
Enorme mole caliza de la que tantos beneficios van obtenese magar que tenga dellos inconvenientes. La contaminación, esi peaxe - pontazgu, dicen per Olloniegu - que paga'l desendolcu industrial. A la fin, tolo que facemos nesta vida tien de pasar pol fielatu.
             De la roca calizo sacamos el cal, ún de los productos más conocíos dende l'antigüedá y que tien numberoses aplicaciones:
.  Siderurxa y Metalurxa: como fundente ya escorifucante.
. Química: Na producción de xabón, cauchu, carburo, papel y na cosmética.
. Alimentaria: Pa tresnar l'azucare de remolacha, na industria cervecera, láctea, vinícola y nel tramientu (trigu y máiz) de conservación d' alimentos.
. Vidriu:  Queda más brillante y faise más rápido.
. Proteición del Mediu ambiente: 
     . Potabilizar agües.
     . Tratamientu d'agües residuales y suelos contaminaos.
     . Depuración de gases industriales (¡ menos ma!)
. Pa curtir pieles y sobremanera na
. Construcción: Amás de la grava y arena, tou tipo de cementos.
    Pongo tos estos beneficios equí pa convenceme a mi mismu que'l fumu ye "saludable". Será verdá, porque yá toi echando fumu...

El Caleru d'Orgaz

          La roca caliar ye sobre manera carbonatu cálcico (CO3 Ca). Si caltien ciertes cantidaes de magnesiu (Mg) nómase caliza dolomítico y si lleva > 90% entós ye dolomía [ Ca Mg (C03)2 ]
          Pa llograr el cal de la roca qu'arrincamos de la cantera tenemos que calentalo. Hasta va poco facíase en caleros, como'l qu'alcontramos en Sotorribera. Tresnar el caleru pa calentar la roca ye tou una ciencia que dexixe munchu procuru, y tiempu a esgaya pa pilla-y el trucu. Magar que tolos caleros nun sean iguales vamos poner l'esquema d'ún que pillamos na rede (El caleru d'Orgaz, na web de <<www.villadeorgaz.es>>:

          Si calentamos la roca de carbonatu cálcico llogramos el cal , o cal vivo (Ca O) , esprendiéndose anhídridu carbónico:
                             Ca CO3 + calor = CaO + CO2.
          Si queremos el cal apagao (hidróxido de calcio) tenemos qu'echa-y agua:
                              CaO + H2O = Ca (OH)2 + calor
Esti cal muerto emplégase pa facer yelsu o morteru, pa basificar la tierra si ta mui ácido (lo contrario que'l cuchu) o tratar agües residuales, por exemplu. Tamién sirve como floculante (ehí queda eso), ye dicir atropa sólidos en suspensión y precipítalos nel fondu. Interesante... ¿ Si alcontráremos daquién qu'aconceyare - floculare - tolos malos y los precipitare nos abismos?... ¿Cuántos quedaríemos ?... ¿Cuántos quedaríen?... ¿Alcordaisvos de Lot?...

Armando'l fornu

          Supón que tienes un fornu y quies echalu a andar; ¿cómo t'arregles?
Lo primero, bueno, darréu acarriar la roca calizo - colocándolo en fileres pol tamañu- y la lleña pa prender ye
armar el fornu: Consiste en colocar les piedres de manera tala que formen al final una bóveda pa que la calor s'esparda por igual a tola estructura y toles piedres calienten al empar. ¡Curiao! que se te pue venir a baxo :
- ¡H.oite, caleru; que se te fundió'l techu!
Asina que lleva un orde: De mano les "armaeres", darréu los "trasquilones", más tarde "regulares", "gordos" y "cantos". Nun ye too echar a correr... Cuando acabes pon-y la tapaera con lates y cascote pa que la calor nun se pierda.
Yá ta'l fornu armáu, agora vamos quemar... Güei non, qu'amenaza lluvia... Al atapecer del sábadu,que van venir díes afayaizos... Sí, ye meyor pela nueche, qu'esto da muncha calor...

          Pasa la nueche'l caleru 
          arimándo-y lleña al fueu
          nun ye casu que s'apague
          y ¡hala!
          otra vegada al entame.
          Un par de díes dempués
          yá ta la cal calcinao;
          namás dexar que s'enfríe
          y podremos emplegalo.
          Si te queda alguna dubia
          pues entrugá-yla a don Paco.
         

Na Meseta Cristalina 
brilla la cal del Caleru
en cada casa encalada
queda l'alma de los güelos. 
(Paco'l Caleru)

Que sirva esti comentariu
d'homenax a los caleros;
primero pa los d'Orgaz
darréu del mundu enteru.
Na Meseta Cristalina
brilla l'alma los caleros.
 Del caleru La Ribera.
xurden modernos cementos,
¡ai! Canteres de Tudela
¡ai!, Cementos d'Olloniegu.

                        *La Meseta Cristalina:
         L'alfoz de la  SISLA ye una llanera comprendida ente los ramales de los Montes de Toledo - al sur -  y el ríu Taxu pel norte.  Llinda al este col ríu Algodor y al oeste col ríu Torcón. Dambos ríos van al Taxu asina como'l ríu Guajaraz que la parte en dos estayes: Sisla Mayor - al oriente - y Sisla Menor pa occidente.

"La Sisla", onde floriaren los caleros; ande un día esperamos percorrer esos senderos. 
España ye Asturias y dellos llugares qu'amar;
si sigues <<Camín de Niria>> de xuru los vas alcontrar. 
(Qué guapo sedría un conceyu de pueblos xuncíos por comunidaes solidaries)

          La Meseta Cristalina tevo formada por gneis y granitu feldespático qu'al desintegrase nos tiempos xeolóxicos por mor de les lluvies enchentes (torrenciales) del Neóxenu, da orixe a unos suelos cascayosos de matriz magriza (arcillosa) onde florien mases de caliar y granitu. Esa roca caliar ye la nuesa protagonista.
                ********************************************
         Col alma caldia por mor del caleru siguimos caleyando camín de Palombar...

El barquín de La Ribera

       


         Cases perguapes; unes modernes ya otres antigües, delles ensin iguar. Y dimos col barquín del pueblu... El que caltién viva la llapa'l  caleru... Como nun podía ser d'otramiente atopamos cola escuela pública: Colexu Públicu "Pablo Ilesies". Más de 25 años socializando conciencies.

Quintana fanegura va mui poco: El Palaciu. 
Güei día ¿faciendo'l burru?
Falaben d'un restaurant.. ¡Perbona idea!
(Comulgar con una fabada na capilla ¡sedría la hostia!)

         Entá siguimos andando un cachu. Vimos delles cases impresionantes y quintanes bien granibes pero echábasenos la hora enriba y queríemos poner la guinda al día - yeren varios los que teníemos venío per equí  - con una bona llacuada. Los señores que nos falaren del caleru tamién nos dixeren que, per esta zona, venía Franco a pescar y que remataba'l día comiendo fabes de la Granxa, de les de Riñón. Francamente, quiximos saber onde podríemos nós saborguiar una bona fabada y encamentáronnos "Casa Cristina", en Tellego; un pueblín mui soleyeru na fastera'l monte qu'amira pa Vegalencia. Y p'allá nos empobinamos. Envede dir pela carretera agarramos un senderu que ta al cabu la vega, bien cerca la rotonda y de la ponte que dexáremos atrás va un cachu. Merez la pena xubir anque namás sía poles vistes...

Vegalencia, dende'l camín la pitanza ( Tellego).

              Tellego ye un pueblín de La Ribera  (Ribera de Arriba), a 2 Km de la so capital ,Sotorribera, y que nun pasa de los cincuenta vecinos. Amás de ser conocíu pola fabada, pote y cabritu - ¡yá te digo!- de "Casa Cristina" tien, al pie mesmo, la ilesia de San Nicolás de Bari, del s. XVII, onde pues pidir perdón polos pecaos, de gula sobre manera. Debe tener bona mano la señora cocinera, porque siempre se perdonen; damos fe d'ello.

Christian, escolín de la maestra Cristina.
"El que a bon árbol s'arima bona sombra lu cocina"

          Tuvimos suerte d'aportar temprano porque nun teníemos reserva. Cuando colamos taba'l restaurante acorropináu de xente. Nun ye d'estrañar; por 15 € tienes un menú espectacular. Llamonos l'atención la cantidá de xente famoso que tevo de pitanza nesta casa. ¡Qué bayura de semeyes !
        ¿Qué más te cuento, manín?
         El día taba fináu.
         Tomamos el cafetín y
         cola música a otru llau.

Esta ruta ye perguapa 
ya nun la soi a finar, 
voi dexar la puerta abierta
por si tengo que tornar;
que'l Nalón siempre acompasa
a tou pelegrín bonaz.

                                              ANEXU - I: ¿Cuentu?

            "El pelegrín valiente" ye un cuentu d'Antón García con estampes d'Ulises Wensell qu'algamó dellos premios. Foi ún de los primeros cuentos que tengo lleío n'asturianu cuando decidí poneme dafechu con esta xera; y siempre lu caltengo n'alcordanza. Farda qu'ha llevame a la ponte d'Olloniegu, nel cruce col "Camín de Niria "... Más tarde alcontréme - nun pudi falar con elli, diba a caña tendida - con Gonzalo Peláiz....
           A min préstame estrozar les coses, pa saber lo qu'hai dientro, lluéu nun soi a iguales como taben... Asina que pido perdón a dellos autores predileutos que tuvieren la mala suerte de cruciáseme nel camín: A Fulgencio Argüelles, mientres taba sentáu "A la sombra de los abedules"; al "Potestas" d'Uviéu, Xulio Arbesú y, n'esti casu, a Antón....

                                      ***

Por Antón García, cola mano d'Ulises Wensell

             << Pedrín ye un guah.e que vive n'Olloniegu, cerquina la ponte.  Fiu de los albergueros del pueblu tien curro palantre; nun para de pasar xente camín d'El Salvador, n'Uviéu.
          Un día piden agospiu nel albergue unos corraxos franceses, de la parte Burdeos. Traen con ellos una neña, Mina, que ta mui malina. Asina que deciden tirar ensin ella dexándola al procuru los posaderos.
          A la rapacina nun-y presta un res y, magar tea fecha una llaceria, escapa pela mañana tres d'ellos ensin saber mui bien per onde... Pedrín embreda tres d'ella hasta que l'alcuentra acurrucada metanes una entena la viesca. Cuando más ablayaos tán apruz un pelegrín a llombu d'un caballu blancu. Diz nomase Santigo y vien dispuestu a aidalos. Darréu auscultar a la neña encamiénta-yos tres coses pa llograr que sane:
     . Prender un foguera, a la fin que-y torne la calor.
     . Llavala y peñala nuna fonte al amanecerín y
     . Algamar qu'espirrie, pa echalo too fuera.
          Pa facelo más  llevadero présta-yos el caballu.
          Pela viesca sienten ruíos de toles tribes y el rapacín tranquiliza la neña cuando-y camienta qu'eso son coses del Diañu Burllón, un trasgu mui comediante pero que delles vegaes gasta bromes mui pesaes. Hasta se camuda nun burru prietu... Pero Pedrín aprovéchalu pa carga-y la lleña'l fueu...
          La del alba sería cuando un esguil vieno a face-yos compaña. Xuntos van caminando cuando sienten el ruxerrús del agua... Ponen la oreya ya unos cantos melgueros envolubra-yos l'alma:
          - ¡La xana!, diz Pedrín.
 Y efeutivo, la fada encantexada ta peñándose nel ríu. Tres d'un apañu con ella Pedrín algama'l peñe darréu face-y tol buizu la cueva. La guah.a va xorreciendo pasu ente pasu...

Si quies que te preste'l peñe 
el buizu la cueva has faceme.

             Quéda-yos la tercera preba. ¿Cómo algamar qu'espirrie?
             - ¿Y si-y faigo rebulguinos nes ñaples?- camienta Pedrín. ¿Y con qué?... - De sutrucu préndese-y la bombilla :
            - ¡Con una pluma de Cuélebre! Pero tengo que dormilu pa quitá-yla.... -Tres rucar un momentín...
            - ¡Miániques, yá lo tengo! Una bona pitanza y queda roqui como un gochu...  Ehí tengo la so comida... ¡Una panoya culiebra!.

"Fueya'l bregón", cebera de dragón

               De primeres , al columbrar na distancia les bolines coloraes, camienta que se trata d'una  Yerba de culiebra (Arum maculatum) pero al averase y ver que taben metíes nuna cápsula colingando d'un tallu flacu y allargáu (30-90 cm) decátase que ta nun erru. Las fueyes tampoco s'asemeyen. L'arum tienles saxitaes y anches magar qu'estes son estrenches y allargaes, paecíes a una llanza verde. Amás, estes  güelen qu'apesten. Asina que nun ye'l Arum, tien de ser la "Fueya'l bregón", l' Iris fetidissima.

Flor de la fetidissima.

 Al aviesu, les flores actinomorfes (Actino= rayu de luz y Morfo: forma) del fetidissima son una virguería: Un estame nel centru la simetria asemeya'l faru qu'irradia la lluz sobro la inflorescencia viola y cimosa. Los frutos, unes semilles oblongues y coloradines que nun tienen maldita prisa por colar de la cápsula, mesmo cuando ésta termina por abrise.
Les semilles y bulbos, de los que nacen esta planta, son emplegaes como antiespasmódicos (relaxante muscular) y como diuréticos y purgantes.

- Bueno, van valime igual. Si come estes bolines de mano va quedame tresveláu, y entós ye cuando aprovecho...

         Pedrín fala-y a la neña:
     - Bono, Mina; agora voi dir a la cata'l cuélebre. Tú espérame equí, qu'entá nun tas pa trotes.
     - Nun lo sueñes, cativín; yá toi enforma alicada y de ti nun m'aseparo. Les muyeres somos más manudes pa tratar coles sierpes. Llevámoslo en sangre. ¿Nun t'alcuerdes d'Adán y Eva?
     - Venga, pos vamos tirando.
     - Oi, mira ellí... ¿Sedrá aquella la cueva'l cuélebre?
     - Pue ser, magar que m'abulta daqué pequeña esa bocana ...  Claro, que dientro..

Bocana trasera de la cueva'l Basiliscu. 
¿Petezte roba-y un figu?

     - ¡Mira, Pétit Pierre, el cuélebre ta apruciendo!..
     - ¡Meca! Nun ye'l cuélebre. ¿Nun-y ves la cresta na tiesta? . Ye un Basiliscu. ¡Ai, mamina! Hai que tener cuayu abondo p'apurri-y la comida- desembucha trémbole'l rapacín.
     - Yá te lo dixi, Pedrín, muncho meyor que-y lo dea yo. Coles muyeres anden más firmes...
     - Sía. Yo mentanto encamiéntome a la Virxe de l'Armatilla, que ye la patrona d'Olloniegu. 

Convidando al Basiliscu... Amansiando la fiera.... Coser y cantar.

                 Darréu una bona yacuada d'aquella garulla, y la siesta correspondiente, foi perfácil saca-y una pluma la cola. A modo foi pasándo-yla repetíes vegaes peles ñaples pero la guah.a nun esperriaba. ¿Taba nerviosa? ¿Esmolecida polos acontecimientos?... Nun lo sabemos. El casu ye que los neños, galdíos de tantos asocedíos, sentaron embaxo un fresnu p'aselar un poco. Pedrín quedara clisáu mirando unos coríos que chaflotiaben nun rabión del riu. P'acolumbralos meyor intentó apartar unos escayos cola mano:
         - ¡Ai!... Pinchéme. -  Entós decatóse lo que tenía delantre'l focicu :

    - ¡Qué rosina tan guapa!.... - Tien los estames acorropinaos de polen. Primero caríciala y darréu córtala con ciñu.
Mira pa Mina y  poussée par un élan irrésistible entama a  prevocala. Va pasándo-yla sele pela cara perrecorriendo les oreyes,  la frente, los papos, el cazu, los llabios...
    - ¡¡¡¡Achisssss!!!! 

Lo que nun consiguieran les plumes del dragón algamáronlo unos cativos graninos de polen. Mina esperrió de manera tala que, los pocos virus que-y quedaben nel cuerpu, esnalaron d'estampida al empar que tolos páxaros de la viesca. Taba curada dafechu.
                    Darréu'l ruíu del espirríu vieno la calma, la naturaleza asela y los animales van retornando al so habitat. Un páxaru grande y buxu, que lleva siguiéndolos tol camín dende que salieren de l'alberguería, avérase a ellos. Cuando intenten retomar el camín colíngase nuna vilortera que taba enfrente d'ellos y entama a glayar d'una forma un tanto estraña:¡ fraaank... fraaank! Los guah.es decátense d'ello:
     - Dalgo nos quier dicir esti collaciu camín. Esos esperabanes nun son normales- camienta Mina.
     - ¿Nun diremos pela sienda enquivocada? - entruga Pere.
     - ¿Paezte probable?. Míralu, da la vuelta...
     - ¡Anda, si ye una Garza Real ! (Ardea cinera) ¿Sabes que ponen los niales en árboles o en xuncales pero cerca d'espeyos d'agua? 

¡Ai!Cómo me presta mirame,
soi la Reina d'estes agües.
Soi una Garza Real
soi Ardea Cinera
de la Vega
la más ¡guai!

             - Vamos siguir esta garza- diz Pedru -, porque magar tea un poco perdíu llevo un cachu camentando qu'esta direición nun cuadra.
            - Regarde, Pétit Pierre. N'aquel reconcu'l del ríu hai un arbolón pergrande que crucia de parte a parte. Y amás la corriente malpenes se nota.
            - ¿Y el caballu?
            - Por elli nun t'esmolezas, nada meyor que nós.
            - Entós tu vas pasar nel caballu y yo crucio pela ponte colingante- afita Pedrín.
          Dicho y fecho. Con un poco de medrana cruciaron a la otra oriella. Siguieron a aquel páxaru grandón, de pates y picu llargu que los llevó hasta'l Pontazgu. Posó sobro un  moxón que trayía: " A Uviéu llegua y media" . Y dando un esnaliu pergrande esapaeció penriba un camín empiedráu.
Quedaron un poco varaos cuando aprució un pescador, con un paxu mediáu de truches, que los alcontró n'actitú dubitatible:
     - ¿Dica ónde vos empobináis?
     - Vamos camín de San Salvador d'Uviéu.
     - Entós tomái'l Camín de Niria . Agarráis esi senderu a manzorga. Per un camín empiedráu alcanzaréis Picu Llanza. Siguíi xubiendo hasta les Cruces de San Esteban. Enseguida la Manxoya y tendréis Uviéu a la vista.

Un Pelegrín valiente bien merez una Puerta Rutilante

         - Mon jois ! - Glaya Mina, al contemplar la ciudá amurallada. ¡Mira cómo brilla aquella puerta!
         -Tamos na Manxoya - afita Pedrín. Agora toca baxar: San Lázaro y El Campillín.
            Tres persignase, al dexar atrás el conventu S. Domingo, xuben arrodiando la muralla hasta dar cola Puerta Rutilante. Paez-yos entrar baxo paliu. Depués de tantes aventures...Queden ablucos delantre de San Tirso: Enxamás podrán escaecese d'aquel trixeme (aximez). Tan al par de la catedral, enllena d'andamios poles obres d'ampliación. Entren en busca Santiago y alcuéntrense con tola familia acabante salir de la Cámara Santa:
        - ¡Guillemette!
        - ¡Grande-père!
            ¿Una semeya pal recuerdu?

<< Si llees esti cuentu 
y nun lleees el d'Antón
 visites al vasallu 
y escaéceste del Señor >>

         Hai muncho qu'agradecer a esti santu. Van quedase una selmana. Un mes se quedaríen si nun fuere poles perres... Esta ciudá d'Ovetao tien tanto que visitar...>>

               
                  *********************************************************

          Nós tamién tenemos qu'agradecer muncho y a muncha xente la bayura información que nos apurrieron. Muncho tenemos lleío por mor d'esta salida. A ver si soi alcordame ....

AGASAYOS:
-  De mano a los tres tenores que sofiten la cadarma d'esta salida:

Edt: TREA

     . Fulgencio Argüelles, que ye'l padrín del <<Camín de Niria>> y que n'esti casu, sentáu a "La sombra de los abedules", vio pasar a los protagonistes d'esta historia al cruciar n'Olloniegu el camín aniciáticu.

Edt: VTP

   . Xulio Arbesú, que nos tuvo como llocos tres los pasos del <<Potestas>>. Perguapa historia.
    . Va unos años Antón García contónos un cuentu. "El Pelegrín valiente" tevo la galanura d'aidanos a percorrer les siendes d'Olloniegu.
   -  "MiGeoblog y algo más", de José Mª Montes Villa al que visitamos en cada salida.
   - Llevamos siempre na mochila la "Guía d'árboles d'Asturies" de Bertu Ordiales y Guillermo C.Ruíz
   - Wikipedia, manancial de sabiduría del que Magilo taría argullosu.
   - El "Diccionario etimológico de toponimia" de Julio Concepción Suárez.
   - " El conjunto monumental de Olloniego", de Germán Ramallo A.
   - "Arte prerrománico asturiano" de Joaquín Manzanares, alma del "Tabularium Artis Asturiensis".
   -  Los  blogs de:
                   . "Acebedo"
                   . "ASTURTSALIA" (Florentino González)
                   . "eltesorodeoviedo.es"
                   . "VIVIRASTURIAS.COM"
                   . "Asturiasparadisfrutar.es"
   - Y a Marián Parra Castaño de "tiendabotánica@gmail.com" que cola so ayuda pudimos dar de comer al Basiliscu.