Un Belén na Pica Sergio

                          " Camín  de  les Brañes  de  Curiel"
    

¿Pasamos al castiellu?.....

             Tengo un wasap nel móvil. Ye'l mio amigu Vettel:
  - <<  Mañana RUTA: Peñaferruz. Llugar de Salida: Fábrica de PRENOR, xunto l'autovía Xixón-Uviéu >>. 
              Cuasi siempre salimos a caleyar xuntos los domingos pero pola mor del tiempu y  les llaceries familiares va  pa tres meses que nun aconceyamos. Yá nos tarrez.
  - << Hola, gallu. ¿Tas preparáu pa mañana domingu? Quedamos a les 10:30 delantre la fábrica prefabricaos de formigón. Tómase la Salida-13 dende l'autovía AS- 2: Pruvia d'Abaxo  >>.
  - << OK.  ¿ Por qué nun me mandes un enllaz de la salida? N'interné namás alcuentro una ruta de 30 Km....¿¿ ...?? >>
   - << Val. Ehí te va un track, como dices tu, o daqué asemeyao.  (Alcordéme y miré en diccionariu track: rastru, güelga, pista, rodaura) >> Entiendo lo que quier. Apúrro-y esta ayalga.
 

Track del Valle de Peñaferruz

              Tanto esti mapa como otros dibuxos que vamos xubir nesta entrada son semeyes d'un cuadernu- guía editáu pola FMC del Ayuntamientu de Xixón nel añu 92 - completáu nel 2005 - y autoriáu por : Guillermo Barroso, Clara Yata , Esther Martínez y dibuxos d' Eduardo Carrero; toos ellos comandaos por Xulián Ximénez. Aprovecho pa da-yos les gracies por tolo que ficieren en favor de los escolinos de Xixón, y de los enseñantes (pongo la mano nel coral).

Dambes Guíes FMC

 

Otra bona parte son semeyes sacaes del llibru "Peñaferruz (Gijón). El castillo de Curiel y su territorio" autoriáu por José Avelino Gutiérrez González ya editáu por VTP . Nun fai falta dicir qu' aquello de "sabio" que podamos aportar ta sacao dambos testos.

VTP

 
             - << Bien. Finalmente van a la ruta : A, P ( la muyer de so ), Vettel (M),  R y G ( aprovecho pa camentar que son los pas del contertuliu) . Llevaré la radio.....y el minitelevisor.....asina como les piles correspondientes. Y pa calentamientu ehí te mando unos torinos d'Osborne y una semeya de Swet California. Que duermas bien ....>>
     Ye la mañana'l domingu y, pa espertar, yá recibo unos wasaps colos bóvidos correspondientes... Son l'anicu ruta... Coyemos pan en Vega y, serpentiando delles carreteres, prindamos la A-2 per aciu  la rotonda d'Alcampo. Tomamos la salida 13 - Pruvia d'Arriba , non d'Abaxo - y pel ramal de la derecha empobinamos dica Carbainos aparcando cómodamente frente a PRENOR.
 

¿Asustaos?...Venga, ho; que nun hai pantasmes nel castiellu...

           Peñaferruz ye un pueblín de la parrroquia de Cenero asitiáu al suroeste del términu municipal de Xixón, llindando colos conceyos de Siero y Llanera.
     La ruta prevista na Guía  de la FMC - al valle de Peñaferruz - ye d'Ida y Vuelta y en forma de Y, pero nós preferimos camudala por una  circular (O) pa nun repetir lo visto; ye más prestoso.
           Carretera - carrertera  y llegamos a un cruce onde alcontramos una casería típica, talo se va repetir a la llargo del camín: Casa, cuadra, horru (2), güertu y praos....Antiguo había un potru pa ferrar el ganao - los tractores d'antaño -  que nós recordamos por curiosidá:
           

Potru pa "calzar" el ganao

            Poco teníemos andao y enseguidina nos decatamos de la bayura  lloréu qu'había. Taba amás bien xorrerecío... ¡ Unes ganes de floriar !... Claro, con esti tiempu que vieno....Entá nun cayere una puñetera xelada... ¿Y aquellos carámpanos? ... ¿Y aquelles nevaes?... (( Poco antes de colgar esta salida la Tele ta amosándonos les primeres nevaes...¡toma! ))
   

Lloréu: Laurus Nobilis

            El Lloréu ye un arbolín mileneriu mui apreciáu pola nobleza (Nobilis) d'antaño por consideralu intocable a los rayos - nin Zeus podía con elli - y símbolu de la inmortalidá, de la victoria y de la paz na cultura mediterránea. Por embargu güei día nun somos tan respetuosos con elli. Caltiense verde  (Laurus) tol añu y tien perbona poda, vamos que nus seca fácil. Ye bárbaru pa zarrar finques anque nun s'emplega tolo que se debiera, al mio modo de ver...
           . Arbustu  plani-perenni-foliu - pue alcanzar hasta los 15 m - de fueya coriáceo (duro) y llanceolao imprescindible na cocina: ¿Pues imaxinate unes lenteyes ensin una fueya lloréu?... Eso sí, << si'l lloréu  te cai en platu yá nun cases esi añu >>.
           . Los machos y les femes - llorea -  suelen tar en pie distintu, asina que son dioicos, pero puen presentase con flores hermafrodites: Un pie y una flor con estames y pistilos. Coses... 
           . Florez al finar l'iviernu o l'entamu la primavera y los frutos ovales - lluribaga - van camudando dende tonos verdinos hasta'l negru.
           . Tien enemigos: Amás del fríu intensu - ¡el clima calentín, eh! - un himenópteru, la  Trioza alacris,  produz-y un bogayu que nun lu dexa espoxigar en condiciones.
 
           Como nun podía ser menos nes fiestes navidiegues nun faltaba nes cases el brinde a Papá Nöel...
                

En plenu asaltu al castiellu...

           Aportamos a un  cruce y agarramos el ramal de la mandrecha :
 

¿Qué esperes pa siguime?...

                                 El " Camín de les Brañes de Curiel" ha llevanos a un castiellu, que ye la farda d'esta salida. Yá teníemos conocencia que na parroquia Peñaferruz hebo un castru, o daqué asemeyao,  n'otra dómina. Y como nós entá nun tenemos superao esti pruyimientu medieval infantil polos castiellos - que culpa tien ún de tener medrao al empar que Robin Hood nel cine - alcontramos la disculpa pefeuta.

              Nun diéremos cuatro pasos y al chisbar nuna hacienda quedamos sorprendíos con esta casa mariñana, (¡esto entama bien!):      

                           

"Mariñana": Asina la viemos..

  

"Mariñana": Asina nos gustaría vela

            La casa mariñana ye una construcción típica asturiana, mui presente ente los sieglos XVI y XIX,  de la zona mariniega y les llaneres inteiores: Xixón, Uviéu, Siero, Llanera, Noreña, Les Regueres y, con delles variantes, en Villaviciosa.
             Esta casina, orientada al sur o este, tien una planta rectangular, cuasi cuadrada, de unos 100 m/2 de superficie y una cubierta a dos agües.
             A parte los muros esteriores tien otros dos muros maestros interiores perpendiculares ente sí que determinen la distribución de la casa. Ésta parte d'un portalón - centru de rellaciones sociales - nel mediu la fachada principal que tien a dambos llaos los "cuartos d'afuera" con unos ventanos que tal paecen los güeyos de la casa. Nel fondu'l portal ábrense dos puertes: a  manzarga la corte, con una tenada enriba, y a mandrecha la cocina, que pue tar compartimientada por tabla o cebatu en mediocasa - un caxón de xastre -  y dalgún cuartu más.
 

Casa de "Portalón"

 Elementos:
1. Portalón
2. Cocina
3. Mediocasa
4. Cuadra (corte)
5/6.Cuartos

La "casa de portalón" ye talo la mariñana sacante los cuartos d'afuera que na mariñana tan dientro los muros maestros mentanto que na de portalón queden fuera, vamos que tan amestaos, como esta que vemos nel dibuxu d'arriba.

            Andando un poco damos con esti "trastu" perteneciente a "Distribuciones G". Va unos años foi una esplotación caballar, con picaderu y too: "Quelle donmage!" .   

Más a gusto me vería con daqué "chapa y pintura"

             N'alcordanza de lo que foi amosamos estos ponis perguapos. Alcontramos varios per Peñaferruz; debe ser bona fastera pa ellos.

Ponis d'angüaño, praos d'antaño.

          Por embagu, baxando un poco, alcontramos esta ayalga: Casona + pumarada moderna:
    

Perguapa casona

             Al danos la vuelta una vez tomada la semeya dámonos de focicu con otru magnífucu carbayu que nos torgaba ver en plenitú La Pica L'Alba, que ya la mesma Pica Sergio, pero que nos produz una atraición irresistible..
        Hai qu'entamilgase n'aquella picalina a como dea llugar...L'Olimpu los dioses de Cenero....
                 

Guardando lo sagrao...

             ¿Qué meyor qu'un perru fiel y un carbayu centenariu pa guardar los suaños del pasao....
              El CARBAYU ( Quercus robur ) ye un árbol fuerte (robur) tocante a lo duro la madera, planicaducifoliu y monóicu (flores machu y fema nel mesmu pie pero por separao) . Convién estremalu d'otru bien asemeyáu, el Roble albar ( Quercus petrea) que se da en zones más altes. Diferencia básica ye la fueya, que nel petrea tien un peciolu (rau) llargu pero les abeyotes, al revés, tán sentaes (ensin rau).
 

Carbayu: fueya sésil, abellota peciolada.

          Algamamos a lo fondero'l camín onde cuerre'l regueru  Lamiana que desemboca nel Peñaferruz.
Vemos esti cartelu :                    

Entama l'ascensión al Olimpu...

          Siguimos per él dexando a mandrecha la finca Bravo y a manzorga una aliseda o viesca de ribera onde predomina l' humeru ( Alnus Glutinosa),  el chopu ( Populus Nigra), el salgueru prietu ( Salix atrocinera ) y dalgún qu'otru castañu esparcíu per dayuri. Aprovechando'l nitróxenu que fixen nel suelu los alisos vemos abondar el felechu común (Pteridium aquilinum).  Y pa que seya más prestoso  escaecémonos del asfaltu y entamamos a ascender per una enantada pista de zahorra, ¡ por fin!, camín del míticu cumal.
               

Pindio, pindio...pero afayadizo.

              Ye la cara norte  La Pica. Ta fresco. A mandrecha dannos la bienvenía unos cuantos exemplares de pinu gallegu o marítimu (Pinus pinaster) que se carautericen por tener la fueya aciculao, llargo, d'unos 10 a 15 cm que se presenta en grupos de dos ( talo que'l Pinus Sylvestris o Pinu Albar ), pero n'esti les acícules nun suelen pasar de 7 cm.). Ye un árbol monóicu con flores en conos machos y femes por separao. Nagua polos suelos fondos y arenosos asina que nes dunes siéntense como en casa.

 

Pinu gallegu (P. pinaster) con procesionaria.

              Dalgo más arriba reparamos nuna pequeña plantación d' ocalito ( Eucaliptus globulus). Sentímoslos falar ente ellos. Aplicamos el sestu sentíu y .....
  << -  Mira, collaciu. Ehí pasen unos caminantes...Deben tar dando un vueltu pela redolada.
       .  Pa min que van a la cata'l castiellu. Dalgo-yos quixi sentir... Que pel camín de Curiel tenía que llegase al antiguu castiellu...
       - Anden roceanos. Nun mos ponen bona cara...
       . Como cuasi tol mundu...Considérennos una especie invasora. Ehí queda éso. Talo que viniéremos con pistola...
       - ¿Y ye nuesa la farda ?... Si nun gastaren tantu papel nin tuvieren necesitao tanta madera igual el capitán Cook nun nos importare dende Australia. Nosotros tábemos ellí como dios.
       . Dígotelo yo. Abusen de nós y dempués despréciennos, nun te h.ode.
       - Nun nos quieren nin los propios colegues de profesión, los árboles autóctonos. Dicen qu'acabamos con ellos, que-yos robamos la comida, el sol...
       . Sí, ho....L'otru día sentí a ún llamame : "¡ Chupón! ¡ Garet Bale!"
  

Fueya y frutu en cáusula del ocalitu.

    - Y a min otru espetóme: " ¡Llambión!", que te zampes lo más rico del tarrén...".
       . Y pa encima critíquennos porque nun reciclamos.
       - ¿Y qué culpa tenemos nós? Escaeciérense d'importar tamién daqué gorgoxu que nos descompón...El Gonipterus Scutellatus, por exemplu.
       . Home, ho...Esi precisamente que nos dexa tan debilitaos...
       - Nun sé que ye peor, si tar febles o tar aisllaos.Nosotros quixéremos faer viesca con ellos, pero nun somos quien..
       . Yá verás; estos terminen por desaniciamos. ¡Colo a gustu que se vive n'Asturies!
       - Vamos ver quién-yos cura los catarros...
       . Gracies a nós podéis daprender en llibros como esti - diz amirando al caminante.

  

El  Llibru del caminante

          Vien una llugaina d'aire fresco y failos abangase, como pa despidise...¿ O tan pidiendo perdón? . Nós facémos-yos una semeya - que tamién son fíos de Dios - y tiramos cuesta arriba.

         Como nun podía ser d'otra manera díbemos saludando les perguapes árgumes: toxos (Ulex europeus) y brecines (Calluna vulgaris...) o Daboecia cantábrica - cola so flor fusia y la fueyina planifolio - qu'alcontrábemos pel camín.

Arguma zarrando pumarada. Al fondu ocalitos

            Tamos arrodiando'l conu caliar. Dexamos la fastera W. y aportamos al pandu Sur. Danos, por fin, el sol y vamos escaleciendo. Vense varies cases; un par d'elles bien cerca la picalina y empobinámonos p'allá...
            Tropezamos con una señora que taba echando de comer a les pites. Charramos y cuntónos:
            -" L'otru día tuvieren per equí una pareya y pidieren permisu en ca "Pica Sergio" pa entamilgar no cimero un belén, el Belén de Cumes, entendí.

     

Camín de " Pica Sergio"

               Dixeren pertenecer a nun sé qué Asociación; bueno trailo'l papel que dexaren al par de les figures. Víense percontentos por aciu del antiguu castiellu qu'ellí hebo".
              Pero nun yera plan  pidir permisu otra vegada,  asina que tornamos a baxar mientres camentábemos...
              Los que tuvieren la selmana pasada colocando el Belén de Cumes fuimos nòs. Pa que quede constancia apurrimos esta semeya :

 

"Belén de Cumes" nel castiellu La Pica Sergio (Peñaferruz)

                      La curiosidá de Vettel llevólu a facer delles entrugues que tratamos de satisfacer acordies colo lleío nes Guies y llibru qu'anantes aportamos.
    - ¿Cuándo se fizo esi castiellu? ¿Quién lu llevantó?
    . Ye un castiellu medieval. Acordies coles escavaciones arqueolóxiques realizaes tien nicios de tar fechu durante'l reináu d' Alfonso III  el Magnu, el caberu rei de la monarquía asturiana (866-910). Depués los fíos treslladaron la corte a Lleón pa poder avanzar cola Reconquista (alcordáivos que fuimos invadíos polos árabes nun diba tanto). Hebo delles fases constructives ya ocupacionales, siendo les más porgüeyoses les tres primeres.
   - ¿Qué misión tenía?
   . Xixilar dalguna posible incursión dende'l sur, yá que al tar alto y bien asitiáu teníase una estensa visión de la llanera.

(F-1) Vettel xixilando la llanera: "¿Habrá pizza pa xintar? "

   - ¿Quién lu mandaba, dalgún conde?
   * Non. Había un tenente - non teniente, ¿eh? - nomáu por Rei que s'encargaba tamién d'impartir xusticia y recaudar los impuestos, que repartía a medies col xefe. Pero nun yera l'amu les tierres.
   - ¿Cuando dexó de ser importante esti fuerte?
   * A finales del sieglu XIII, al crear les poles de Xixón y Sieru les tenencies quedaren desfasaes por aciu del nuevu sistema alministrativu, los alfoces: varies tenencies rurales dependíen d'una villa. La nuesa Xixón, a la que s'algamaba pel Antiguu Camín de la Villa.
    - ¿Yera guapu'l castiellu? ¿ Paezse al de los templarios de Ponferrada?
   * ¡Que va, ho!. Na que ver...Yera un castiellu primitivu  qu'asemeyaba más a un castru. Mira, taba entamilgáu n'aquella pica y de mano tuvieren qu'allanar hasta dexalo afayadizo. Nada fácil, teniendo en cuenta que se trata de roca calizo...
    - ¡Coimes!, qué manera trabayar...¿Qué forma tenía'l castiellu, ho?
   * Yera agüeváu. Tenía una muralla pergorda con una entrada pela facha sur protexida por una torre.

 

Recreación F-1 (Inventa Multimedia)

   - ¿ Y cómo sedría per dientro?
   * Pos teníen la zona doméstica, el llar, onde cocinaben y dormíen. Taba la fragua, onde se trabayaba'l metal y, bien cerca, un fornu o caleru qu'emplegaríen tanto pa la metalurxa como pa iguar l'argamasa que precisaben pa construyir muros, suelos...

ENSIDESA  &  PRENOR  na Edá Media

  
   - Oye, y si los arrodiaben durante munchu tiempu ¿qué bebíen?
   * ¡Ai, amiguín!. Teníenlo too previsto. ¿Nun sabes que s'alcontraron los restos d'un barcal o cisterna? 
   - ¿ Un barcal? Oye, nun barcal ye onde se bañaba mio güela cuando neña; pero esclarávense  metanes el llar, que taba más calentino...
   * Sí, tamién. Pero esti yera enforma más grande y taba escaváu na roca, talo qu'un pozu artesianu, pola mor d'un sumidoriu soterrañu...
   - ¡Vaya chorra!
   * Y que lo digas, pero nun ye tan raro. Si vas al castru  La Campa Torres entá pues ver en perfeutu usu un par de pozos enllenos d'agua. 

Xarru caseru gastáu en Cenero

          Con esti xarru diben por agua al barcal les moces de La Pica. ¡Vaya chulada,eh!...Teníeis que veles ciñíes con aquellos cinturones doraos por febielles de llatón... ¿Y los colgantes d'azebache?.... Sí, sí... d'azebache... Pa espantar la cigüa y los moscones de la Villa que gustaben de les moces sanes, salaes y bien alimentaes de Cenero.
  

Febiella de llatón
 qu'una chula de Cenero
  llucía nel cinturón.

   - Lo de salaes qué ye ¿comíen mariscu?. ¡H.a, h.a!
   . Pos sí, mocín, comién mariscu...y tamién pescao fresco; que bien cerquino teníen el cai de Xixón.
   - ¿ Y sábese qué especies saborguiaben ?
   . Los moxones (mexillones), ostres, llámpares, berberechos y amasueles (almexes) taben al orde del día...


 

¿Pota pa cocer oricios? .....

   - ¿ Y los centollos tamién?
   . D'esos nun tenemos niciu... Igual ye que comíen hasta'l cascu... Pero'l de los oricios non.
    - Igual ye que se pinchaben... ¿Tomaríenlos con sidra?
   .Ye de suponer; yá sabes que los asturianos ñacemos cola botellina embaxo'l brazu...
 

F-2 : Turruxón al Sur - Nueva entrada W

   -  ¿Y qué más comíen, ho?
   . Yeren poco vexetarianos. Eso de la güerta... Nun paez que la fabada y los arbeyos fueren platos celebraos.
   - ¡Entós yeren de los míos! ¡ Viva Peñaferruz! ¿Gustába-yos la "pizza"?
   . Ensin tomate pue ser, qu'entá andaba per América. Pero teníen cereal pa faer la masa y llechi pal quesu, y xamón... La dieta, en xeneral, yera proteínica: carne, sobre manera; y tamién moluscos, como yá sabes, y pescao. La carne provenía tanto d'animales domésticos, talo que'l gochu, la vaca y sobre too de cabra y oveya, como de la caza: corzu o xabalín y delles aves.

 

Vettel aidando so madre a tresnar unos oricios..

   - ¿Y el pescao, que tanto-y presta a mio madre?
   . To madre equí taba "como en ca güelu". De mano congriu, dorada , besugu...
   - ¿ A la "espalda"?
   . De xuru. Dempués pasaren a la merluza, chopa, xargu o roballiza (¡llubina a la plancha!)... Bueno, vamos dexalo porque al que ta entrándo-y la fame ye a min. Y yá toi pal postre.
   - ¡Ah!, ¿ pero tomaben postre tamién?
   . ¡Entós! ¿Nun había fruta a esgaya?... Mazanes, castañes, ablanes, zreces...
   - Nun me da más; si fuere quesu...
   . Si ye lo que te prui... Has decatate qu' una de les ocupaciones cabezaleres que tuvieren tola vida foi llindiar oveyes, cabres y vaques (tovía pasa angüaño); asina que'l quesu taba gartantizáu, digo yo... O polo menos cuayá, que con un poco miel ta pistonudo.
  

            Siguimos falando un cachu y vimos un páxaru ferregüeyando la zona.
   - Si tuviéremos un arcu, ¿eh? ¿Ves esi ratoneru?
    . Yà tas metíu en farina, ¿ eh, rapaz?

            Al poco volvimos a sorprendenos al atopar con esta otra casa mariñana que, dichoso, taba habitada.

Mariñanes...

          Esti señor tan bien arrodiau naciere nuna casa mariñana. Esto ye "tener pedigrí".

         Asoleyándose al par de la casina había unes oveyes merines: pallabra d'espertu mariñán.

Oveyes merines, el petite del mundu enteru...

          La merina ye una oveya tranquila, de bon compàs y,como vemos, ancha de culera. De perfil reutu, tamañu medianu, curtia de cuellu y pates y que da abondante llana fino, llargo ya ondulao. Considérase autóctona española y foi importada por tolos continentes.
De la so importancia dan fe la bayura de cañaes reales - anchos caminos -  per onde tienen trashumao. Una d'elles, la "Cañada Real Vizcaina o de La Plata", ta rellacionada col castiellu protagonista d'esta hestoria: Entama n' Asturies y fina en Trujillo (Cáceres). Yá sabemos que'l Castiellu de Curiel ta llevantáu col envís de protexer la Vía la Plata.

     

Guardianes del castiellu. ¡Pa pasar !....

               Siguimos pali-pali tomando la carretera del W.,  la que nos ha llevar a  la autovía . Dexamos atrás paneres como esta:

            

Horru o panera, en Cenero lo que quieras.

           Pasu ente pasu algamamos a la finca "La Calcina" onde un paisanín mui manudu taba entamilgáu podando una miguelina ( figar: . Enseguida nos dio conversación: De poda, inxertos, les rutes que pasaben pela redolada....Resultó ser Albino de Cenero, Presidente de la Asociación de Vecinos qu' unvió saludos pa José Luis, el so colega de Santurio. Por cierto, pasa-y al par de casa la G-100 Ruta de la Plata, célebre dende que la inauguraren los romanos. Tomo nota...

Paisanu en peligru...¿Ónde ta'l fíu?...Onde'l míu..

       La zona rural caltiense gracies, sobre too, a los paisaninos....¿ Y cuando nun temos?...¿Apechugarán?...


          Llaneando, más o menos, y dexando a manzorga les casines de Peña Melicia dimos cola Fonte, un requexu afayadizu onde tienen entamilgada una mesa -¡qu'idees tienen los de Cenero!- qu'ha servinos pa xintar un pocu más tarde.
          Como'l entamu la ruta nun taba lloñe y teníemos tiempu a esgaya  tomamos el determín de xubir una llomba a la manzorga que, pasando pela Llosa, llévate camín de La Barganiza ( Siero ) onde s'alcuentra'l célebre Real Club de Golf. Bien cerca tan tamién les tierres de Llanera. 
               

Ferregüeyando Peñaferruz

           Tamos nun puntu d'amestura de conceyos. Bien cerca tuviemos los túmulos de Peñadrada, mas nada nun sabíemos. Pero alcontramos esta quintana protexida por un texu. ¿Casualidá?.

 

Camentando nel pasáu....¿Señaldá?

        ¡ Qué va!....¡Fame!....Al tornar a la fuente, bueno, a la mesa, vimos estos tomatinos- sedría la fame, porque al xubir nun los vimos - al amparu del texu, supongo. Inspiráronnos esti ripiu:

                                       

"En Ceneru, madura'l tomate en Xineru"

              Lo d'andar ta bien, lo de les vistes tamién; los castiellos nun te digo pero....
¿conoces dalgo meyor que la xinta un bocadillu?

Hasta Canelo nagua en Cenero

         Darréu la xinta yá poco nos quedaba por facer. Fuimos baxando pasu ente pasu pel barriu La Teyera fasta llegar a l'autovía , na redolada PRENOR. Entá tuviemos tiempu pa tomar semeyes como esta:

Nel barriu La Teyera: PRENOR

                Lo del barriu La Teyera llevóme a camentar qu'igual tuvieren un xaréu pergrande los vecinos d'esta fastera de Cenero,  pero ¡que va!.... Pasó qu'equí hebo una teyera con toles de la llei... La mayor parte los vecinos de Cenero trabayaron, nun va tanto, nuna fábrica de teya qu'había nesti barriu. Qué bien venía dalgo asina agora, ¿eh?... Que diera trabayu a tola mocedá parada de la zona.
               Percontentos del día tan guapu que pasáremos - y na esperanza que'l Sporting ganare como tolos domingos - agarramos la puerte y colamos:

                    Esta ye, anguaño, la puerta de los suaños... del Castiellu. 

¡Fasta ceo, Cenero!

" FELIZ SAN SILVESTRE: SÍSIFO"

                                      __"FELIZ SAN SILVESTRE: SÍSIFO "      
     
               

Feliz Añu 2015

      

 Son
 les tres y media la tarde
 cuando arribo al Molinón...
           

      

 De Manolín la sombra...siempre perllonga.

¡ Naide!
 ¿Qué ye esto? ¿ Y la carrera?
¡A que foi pela mañana!.....
Veo a un poli sorriente
ya entrúgo-y pol entamu
la  carrera San Silvestre:
A les cinco, impaciente.
Y esmucióse tan campante.
Mentanto yo quedo a veles
venir, la hora'l certame.
               

Parque "Isabel la Católica"

 Oca faciendo'l Gansu . Ansar común: Vecín del Parque

Atapecer nel Edén: Eva C. Ä

Son
les cinco en puntu la tarde
y yá toi yo bien ardiente;
diera unes cuantes vueltes
nos alredores del Parque....

 

Corredor a puntu d'entamar la salida...

La estampida...

¡¡¡¡Piiiiiiiii!!!!!
Suena'l pitu,
anda la xente,
ya entemecíu nel baruyu
llego al ríu embaxo'l puente.

Agüeyando: Ponte'l  PILES

       
Enriba,
sentáu so la barandiella
veo a Asopo esprecetáu
xurgando como un condergáu
a ver si la fía alcuentra.

Asopo na Ponte'l Piles

Y al echar la vista arriba
y decatase del menda
va y m'espeta:
             - Nun t'escuendas so mazcayu,
                a ti buscábate yo
                pa entrugate sobro'l raptu:
                robóme la fía un xostrón.
                ¿Sabes tu daqué si acasu?
                Dicen que sábeslo too...             
Cuntar, cunté-ylo, quién non.
Mas diba salime caro;
nun calibré bien a Zeus
y tendré que llamentalo.
         

A la cata la gloria.

Póngome yo bien arrechu
y sigo dando la bata.
Duróme poco l'ayalga...
Yá nun lo alcanzo col deu.
   

La Barca de Caronte: Eva C. Ä.

        
     Allá, del cielu nel finxu,
albidro a Caronte en barca;
miro y mira y s'escacharra:
             - ¡Esti yá va echando'l guixu!
S'amuesa,
faime señes cola pala...
Y dándo-y un corte manga:
              - << Aguarda un pocu, pirata,
                 que'l paisanín nun s'ablaya>>.

¡¡ La META !!

Sigo'l cursu la carrera
y a lo cabero la playa
columbro, por fin, la meta.
- << Nun ye tanto lo que falta >>...
 

"Pescadería": Loli Matilla

¡Vaya xaréu tan xigante
al rodiu l'Ayuntamientu.
       

Almirando los trunfadores

Taba yo más que contentu
cuando se punxo delantre
del finxu de la pancarta
un puntu dándome caña :

Nun val colase...Sísifo.

                
        - Qu'esto nun ye la meta,
           qu'inda falta otra vuelta....
       

Ilesia San Pedru, ande s'encamienta'l corredor.

       
H.oder, h.oder cola historia
que se repite otra vez,
Sísifo na memoria
bayura d'años dempués:
         - "Cuando algames a la meta
            ¡hala!, vas y entames otra vez".
   

Un Ayuntamientu d'oru: Xixón

         
     Mires pal Ayuntamientu,
camientes no que te falta,
faeste'l gallu la quintana
 y,¡hala!,
a dar les fusties darréu....

San Bernardo

Plaza "El Parchís"

"Campu Los Patos"

       San Bernardo, Begoña,
una cuesta, ¡vaya coña!,
y una fonte: ¡faenlo aposta!,
nun pues catar una gota...
                   

Lo que mana una fonte ...

 

Lo qu'adevez un home...

 
Y Pablo Ilesies dempués.
¡Cuántos pecaos-yos eché!...
            -   Anda, Sisi, da-y con gracia
                que yá te veré na cena.
           - << Yo con mazcayos nun xinto
                masque sía Nuechevieya;
                y menos entá colos fíos
                que nun cartien la pelleya >>

Probe,  Pablo Iglesias.

  Con estos camentamientos
xusto la curva dando
del Corazón de María,
la Plaza Toros alcanzo.
      

Plaza Toros: "El Bibio"

Dalgunos, naguando gloria,
darán-y una vuelta al ruedu;
casu talu nun ye´l nuesu:
finar ceo ye victoria.
   

Playa San Llorienzu

    
 Y allá al fondu s'acolumbra
la playa, infinita playa
onde Sísifo se tumba
cuando pilla una castaña.
                 

Avenida Castiella

Baxo Avenida Castiella
y agüeyo a Caronte otra vez.
     

Caronte, mazcaritáu, coñándose del Menda

Ta echando un pitu, el xostrón,
quier afogame col fumu,
cortame la respiración
y cañicame na barca
que m'infierne con Plutón.
        - "¡Toma aquí, so mamón!",
            qu'a mi espérame l'Oliumpu,
            yo quiero ser como Dios".
   

Si nun yera dios, taba en toles partes...¡Bienllegáu! (por si acasu)

 Y cuando enfilo la recta
que va d'Ezcurdia al Conceyu
una vieya, talo eu,
 - pa min que-y doi algo pena - 
va y m'espeta:
                - ¡Anda, ho,
                   que'l caberu yá pasó
                   va yá pa un cuartu d´hora!.
       

¿Zeus fuxendo d'Asipo?

¡Coimes!, que bien me sienta
la bendita esclamación....
Torno la tiesta
y arrepóstio-y:
                  - << Claro, mocina,
                       soi'l primeru;
                       toi dando la vuelta honor >>.

Frente al Martiellu de Capua
agüeyo La Escalerona
       

"La Escalerona", xixilando El Cerru.

              - << Venga, Sisi, da-y con gracia
                    qu'esta carrera ye historia >>.
 
Gracies a la paisana
pudi algamar a la META;
diome, la puñeflera,
el cuayu que me faltaba
pa trocame nuna estrella.

Estrelles, ninfes, pléyades...

    Estrella, gloria,
ninfes, pléyades...
¡Hosties!
Media hora de cola
pa una puta coca-cola.
Y yo, como Sísifo,
otra vegada
doi media vuelta
y pa casa.
Pero, ¡coño!,
                ¡¡¡ ACABÉLA !!!        
    

                       
             Y pa rematar, la espuela
                          en Ca Xovellanos, ¡ea!

          

Ca Xovellanos

                       
                                         ANEXU - I

                             Los qu' algamaron L'Olimpu:

                         

¿Egina esmolecida pola mor del raptu? Yo diría que ta na Gloria...

Polos homes:                             Borja García
                             Daniel Bayón                    Martín Acebes

Poles femes:                              Beatriz Alvarez
                              Paula González                  Tania Melero
                                                   

Algamó'l primeru a META...

  Borja García llegó'l primeru a la meta pero...¿Foi'l ganador?......Mirá-ylu...Nun posa los pies nel suelu...
¿Cuerre o vuela?...Esti eventu, señor@s, nómase CARRERA San Silvestre....
Borja, tu salisti cuando los otros, fuisti pelo segao - como toos -, pasasti tolos controles, como casi toos
 ( un pariente de mio tomó un par de copes enantes de salir, ¿eso val?) - y algamasti'l el primeru a meta pero...¿ Por qué entós nun val lo tuyo?...Mira fíu, porque esto ye una CARRERA y tu nun corristi, ¡VOLASTI!.. Y eso nun val...¡Descalificáu!
En cualisquier casu, Borja: ¡Viva la madre que te parió!
     

Los primeros de los Mortales.

                                        

¡Sois unos campeones!

 

¡Ansí se cuerre, chavales!

Pal añu que vien...delantre.

¡Cuayu, atletes! L' Olimpu ta a la vuelta la esquina.

  Los que viven olímpico:
  

  

Los que lo viven:
  

     

 

. Delles ninfes, pléyades, muses...

     

     

   

 

Lo que facemos pa ligar....
                 

                       ANEXU II : Lo que Sísifo nun pudo ver. 
       Bien cerca lo tuvo......
   

Cai Corrida embocando la Plaza'l Sur

Si se-y tuviere ocurrío visitar el país de Los Cilúrnigos, na Campa Torres, al pasar per            

La Calzada

....igual vía a Papá Nöel...

      Que tuvo tomado un café na Cai Brasil...
   

Equí vieron repostar a Papá Nöel

Ya onde sedrán bien recibíos....Tolos Reis Máxicos.
 

Los Tres Reis Máxicos

ANEXU III: Los personax de la Ruta.
                   Guetando na mitoloxía griega damos con ellos.
. SÍSIFO:
                 Fíu d' Eolo ya Enoveta algamó a rei d' Éfira (Corinto). Anque casó con Mérope les males llingües dicen que tuvo un fíu "estra": Odiseo, nin màs nin menos.
                 Fízose célebre arriendes d'un "affaire" nel que se vio envolucráu por cuenta de Zeus. Esti, el putu amu l'Olimpu, nun se-y ocurrió otra qu'arramplar con Egina, la fía d'Asopo. (¡Coño!, nun podía ligala o pidi-y la mano a so padre...).
                 Al sobrevolar los cielos de Corinto, col cuerpu del delitu, foi agüeyáu por Sísifo. Cuando'l pá de la rapaza - qu'andaba esprecetáu buscándola - se presentó n' Éfira entrugando por ella Sísifo, que yera un poco "geta", aprovechó pa saca-y a Asopo - Rei de los Ríos - una fonte perguapa no cimero del pueblu.
                  Pero, ¡ai, manín!; enteróse'l rateru y xuró-yla a muerte: Mandólu pa col so hermanu Hades a los Infiernos, onde tendría que pasar el restu la vida tirando custa arriba per una piedra xigante. ¿Qué pasaba? Que cuando taba a puntu d'algamar a la cimero - fechu una llaceria - el regodón esmucíase-y  cuesta abaxo y, ¡hala!, a entamar otra vegada...(Cuenten que Sísifo - mui manudu pa la política -  llegó a un tratu....)
                
. ZEUS:    Chronos y Rea tuvieron seis fíos: Tres machos y tres femes.
                 . Poseidón : Dios de los Mares. Siempre cola triente.
                 . Hades : Dios de los Infiernos. Invisible pola mor d'un cascu tipu Marc Márquez.
                 . ZEUS : Dios de los Cielos. Y de la Tierra, porque anque yera comunitaria esti tomábala
como propia. Esto traía-y bones engarradielles con Poseidón  ( ¡Dios te llibre del so rayu!)
                  . Hera: Reina de los Cielos, Diosa del Matrimoniu y Ma de los Dioses. Casó col so hermanu
Zeus (ente dioses valía too o quiciabes pa nun repartir la herencia). Sabemos d'un petite suyu: los páxaros, talo que Rosario Acuña. 
                  . Deméter: Diosa de l' Agricultura. [Dio nome a Demetria, la protagonista de "L'Aldea perdida" d' Armando Palacio Valdés, vecín míu...]
                 . Hestia: Diosa de l' Arquitectura, del Llar y La Cocina. Curiaba del fueu d' Olimpu. Pretendida  pol so hermanu Poseidón y pol chuleta  Apolo quedó por embargu célibe y virxe, que yá tenía méritu d'aquella, polo que taba mui considerada en casa: lo primero y lo meyor siempre pa ella.
                 . ASOPO: Nun yera un dios de retintín, pero yera dios: Dios de los Ríos y les Fontes.Casó cola ninfa Metope y tuvieron delles ninfes, ¡a cuala más guapa!, que yeren el petite de los Dioses. Zeus nun vía'l día pa echa-yos el guante hasta que...nun aguantó más y - mazcaritáu d'aigla - arrampló con una d'elles: Egina, y pasó lo que sabemos pero...
                  ¿Quies saber cómo acabó?...
                   Asopo, un pá encabritáu, salió tres del aigla como alma que lleva'l diañu y dio con elli nuna     viesca, el mui xostrón. Esti, sosprendíu y desarmáu como taba - solo faltaría - coló cobarde desiguíu por Asopo. Y a un padre esprecetáu nun hai dios quien lu pare...Llibróse de milagru al tresformase nuna roca -¡que casualidá! - que'l "ciegu" nun vio...
                 . CARONTE: El barqueru de Hades. Yera l'encargáu de tresportar -nuna chalana -a la otra oriella del ríu Aqueronte - onde s'alcontraba'l Reinu de Hades -  les almes de los muertos. Pero eso sí,
 si queríes llegar ceo a Los Campos Eliseos teníes que pagar el porte: Yera imprescindible que te presentares con una moneda ....que llevaben los muertos na boca. D'otra miente teníes qu'esperar un balagar d'años de "purgatoriu"...(Los probes siempre lo tuvieron h.odío...Claro que güei día igual ¿"Podemos"?).

                             

¡Que Los Reis se porten contigo, collaciu!