 |
| Dende Baiña a Olloniegu Rigio y so amada neña van percorriendo'l Camîn que-yos dicta la conciencia |
Aniciamos el Camín de Niria saliendo dende Cenera con Vettel y Tabo (Clodo ya Onirio), como nun podía ser d'otra miente. Esi día aportamos a Baiña onde vinieren a rescatanos darréu un prestosu menú d'aldea en Ca Seva. Güei queremos algamar al Garapiellu Históricu d'Olloniegu:Ponte, Palaciu y Capiella, tres degolar el míticu Padrún pa rindinos al medievu. Unos 10 km de xubi, baxa y pandea.
Los nuesos collacios Clodo ya Onirio nun puen acompañanos güei. Yá sabéis que tamos faciendo'l Camìn por estayes; nun disponemos de tres o cuatro díes siguíos. Asina qu'esta vegada llevamos la compaña de la costiella. ¿Viviríenlo asina Rigio y so fía Niria?. Bueno, ellos llevaben una carreta o xarré y nós vamos caminando, pasu ente pasu, pa saborguiar, entá más, el tránsitu.
 |
| Aparcamos xunto a la estación de la FEVE ¿Guapu dìa; eh, Pola? Pero pal amor nun hai torga. |
Llovía. Yera un día buxu col cielu encapotáu ya unes ñubes tan baxes que suañábemos palpales coles manes.
Aportamos a la entrada de Baiña y dexamos el carru frente l'apeaderu del tren de la FEVE, cerca del Cementeriu, que nos emboca nel pueblu.
Al lleer el cartelu indicativu: <BAIÑA> remembramos aquel industrial pioneru, Numa Guilhou, que morriere n'esti pueblu y que ta enterráu a cuatro pasos d'equí, en frente la Fábrica Mieres, nun cementeriu civil, al par de la carretera.
Como referencia histórica más antigua sabemos que en 1103, Alfonso VI, fai manda de la villa de Baiña a San Salvador d'Uviéu a sencia que llevante una alberguería nel monte Copián, cerca del Padrún. Más tarde, en 1139, Alfonso'l VII apurre-y esta alberguería al conde Lluna, Gonzalo Bermúdez. Bona xugada, Fonsín. En 1143 esti conde regála-y a la Catedral d'Uviéu: Baiña, Lloreo y Aguilar (onde ta'l monte Copián). Esto ye lo que se llama:
<< Nun dar puntá ensin filu>>
Enseguida tenemos que preguntar pol camín mása afayaizu p'algamar al Padrún. Ún diznos que podemos tirar de frente, hasta'l Palombar, y depués ascender a la Sierra de Llagos... Pero facemos alcordanza de la novela y sabemos que ....
<< Los nuesos protagonistes alcanzaren el Camín pela parte más oriental de la Sierra de Llagos ya amiyaron hasta Niego >>
 | ||||||||||||
| El Llavaderu Baiña, aniciu la ruta de güei. |
Ansí que debemos xubir hasta'l Padrún dexando la Sierra de Llagos a manzorga. Una señora camienta que tiremos hasta'l Llavaderu y agarremos, a mandrecha, un caminucu perpindiu que nos ha llevar a Valmurián. Depués tou asfalcao hasta'l Novalín, nel Padrún. Si quies siguir pa Uviéu tienes que baxar hasta Ollonigu pero...
Pasu ente pasu, eh.
 |
| Nel centru pue apreciase el camín terreru de Baiña-Valmurián-Padrún |
"Baiña - Llagos - Baiña". Ye circular, d'unos 6 km. Yá tenemos otru oxetivu pa un futuru cercanu: conocer la Sierra de Llagos y el Campu les Monxes.
El llavaderu ta a teyavana pero yá quixeren munchos ser tan grandes y perguapos. Amás ta en medio'l pueblu, nun hai que dir a ca dios col fatu la mina.
Pa salir del llavaderu hai que facer una "S" al 40%, polo menos. ¡Vaya paré!. Pali-pali.
Poro, enantes de salir de la plazoletina'l llavaderu rociámonos col agua d'esta fonte asonsañando los devotos feligreses cuando entren na ilesia pa encamentase al Altísimu. ¡ Qué bien ficimos! Pa xubir a Valmurián per esta caleya cualisquier sofitu loxísticu vien de perilla. Vais velo agora mesmo.
 |
| <Pel camín enllamergáu colaren Rigio y la fía pa escaecese del amu ya nun-y torgar la vida. Que los sirvientes nun tán p'algamar la fidalguía> |
 |
| Altu nel Camìn: Acolumbrando la BAIÑA industrial. Aquel regalu d'Alfonso VI a la Catedral d'Uviéu. La llomba central, a mandrecha del valle, ye la primer parte de la estaya que debemos percorrer güei: Baiña-Padrún. |
Ye un día serondiegu. Salir del pueblu y metese nuna viesca enfollerada ye tou lo mesmo. Ta cayendo a mamplén la fueya de les castañales, que ye l'árbol dominante. Nun hai munches castañes nin tenemos tiempu a pañales. Güei nun ye día p'andar a la gueta. Con esfronase y patexar ente'l barru tenemos bastante. Camentamos na dificultá de xubir p'equí col carru talo que Rigio y Niria na carreta.
<< La nueche de los festeyos - n'honor de los santos mártires S. Cosme y S. Damián - l'alfareru Rigio y la so fía Niria desapovisaron de Cenera. Echóse en falta una carreta, dos caballos y dellos preseos personales >>
[En confianza, agora que naide nun nos siente.... Numio, el pá de Melendo, andaba casi más esmolecíu porque guah.e conociere a L.l ena - la fía del Conde Riosa - que por la romería entamada]
 |
| Cuayu, chaval; que tas llegando a Valmurián. |
Pasín a pasu, dexamos l'avesíu camín del castañéu y enfrentamos un tramu perpindiu de yerba que debemos salvar con dificultá mirando bien ónde poner el pie. ¿Cómo se les arreglaron el pá y la fía con aquella carreta magar los dos asturcones?
¿Xubiríen d'aquella per otru sitiu? El casu ye que mirái cómo nos agarramos al tarrén. ¡Menuda cuesta! Tien lo menos el 40%.
Equí entramos nun ocalital qu'abeyuga el tendíu del GAS NATURAL que vien de Lleón.
 |
| A teyavana, Camìn de Valmurián |
De xemes en cuando alcontramos dalguna cuadrina, cabaña o chabola a teyavana. Entá se caltienen les costumes tradicionales: el ganao. Mayormente oveyes, tengo la impresión.
- ¿Y si nos atechamos n'aquella cabaña?
- ¿A teyavana?
- Ye lo nueso. ¿Alcuérdeste en Baselgas?
- ¿ Cuándo andábemos tres les güelgues del Conde Cuaya?
- Facía un día de perros. Llovía tayao y nin la capa yera pa protexenos. Y aquel xubi y baxa...
- Y nun llevábemos pan. Tuviemos que xintar el chorizu coles casadielles...
- Foi un día inolvidable. ¡Venga, vamos atechanos un poco!
 |
| << El Cuélebre apagáu >> <<Na cueva segura un sóledu cuélebre gusmia señardosu y sensual la escamosa armadura que ye agora la güesa del que fuere'l so acérrime rival>> (A partir a Xabel Almuzara) |
- << Atechase a teyavana
ye pa nosotros un ritu
que se caltendrá nel tiempu
tiempu nel Camìn del rixu >>
- Tamos mui poéticos güei.
- Poéticos y misteriosos.... ¡Mira lo que toi viendo!
- ¿Aú?- respondí faciéndome'l sorprendíu ensin saber por qué.
- Naquella castañal...
- ¡Coimes, ye verdá! El Cuélebre...
- Tranquilu, nun ye peligrosu. ¿Nun ves que tien la peselbera al lláu?
- Paez un morrillu inxertáu nos raigaños... Esmúcense nos bocaxos de los árboles.
- Traime n'alcordanza'l cuébre d' El Principín valiente. [Entrada: "Olloniego-Vegalencia"]
- El que Pere y Mina hubieren d'esaniciar..
- Nada, nun t'esmolezas. Facémonos los fatos. Como que nun lu viemos. Mientres nun s'escombulla...
 |
| Aportando a Valmurián d'Abaxo sopla'l vientu, entá más cuayu. Si tires dica manzorga vas pa la Escalabá, si empobines a mandrecha termines en Valmurián. |
El casu ye que tres descansar un poco - yera más el petite d'atechase a teyavana - siguimos xubiendo l'emprunu camín hasta calar a Valmurián d'Abaxu. Llevamos percorríos 2 Km anque paecen cuatro. Pero esto ye otra cosa. Entramos nuna carreterina formigonada onde un horru pergrande, entamilgáu nun cuetu, vien a danos la bienvenía.. Enseguida vemos xente. Tan camentando cerca d'un pozu artesianu recién iguáu. Viennos n'alcordanza'l Pozu de Xacob. Nun sabemos por qué.
 |
| SOFITU: Agua pal camín |
<< Averámonos al pozu pa chisbar un poco. Nun yera'l casu del Galiléu cuando, casu y sedientu, s'averó al Pozu de Xacob pa pidi-y a una samaritana que-y apurriera un vasín d'agua porque andaba desgualaríu. La muyer quedó ablucada. Nun esperaba qu'un xudíu s'atreviere a pidir un favor a un samaritanu porque tradicionalmente andaben a la tema. Yá veis qu'entós pasaba como agora:
"Vecinos cercanos
talo que perros y gatos"
Yá sabéis como acabó. Yera mui difícil resistise a la pallabra del galiléu. Amás esti home vieno a echar gabitos, non a llevantar muries. Igual Rajoy - y dalgún políticu más - tenía que repasar el Nuevu Testamentu>>.
 |
| METÁFORA: Feble equilibriu |
 |
| ¿Paezte guapo? |
Dexamos a los xubilaos col alderique y siguimos xubiendo hasta Valmurián d'Arriba. al venos pasar una señora mayor saliónos al pasu y aprovechamos pa entrugar:
- ¿Vamós bien pal Padrún?
- Dafechu. Siguíi el camín de formigón hasta que s'acabe; depués tenéis una carreterina asfalcada hasta llegar al Padrún. Dalgo más de 2 km. Enantes alcontraréis La Teyera y La Gatera, pero yá vais en llano.
- ¿ Y si quixéremos dir a Llagos?
- Entós pasáis eses cases de La Campa, onde l'horru, y empobinais a manzorga, cuestareriba, hasta una portiella que traviesa'l camín. Abrí-yla con procuru y nun se vos escaez volver a zarrala. El Campu Les Monxes ta a tiru piedra y tampoco nun tardaréisis muncho n'aportar a Llagos. Podéis tornar a Baiña ensin dar la vuelta. Siguíi y baxáis pel Palombar.
- Bueno, eso dexámoslo pa otru día. Güei hasta'l Padrún.
Nestes recibimos un mensax de wasap d'un amigu al qu'unviamos daqué semeya:
<< Menuda tormenta. A ver si tenéis suerte y va amosando'l sol a midida que vos averáis a Olloniegu. Yo tenía familia en Copián qu'agora vive en Xixón >>
- ¡Meca!, los ancestros de Chema son los que debíen llevar la Malatería de Copián. Esti home tien los raigaños na dómina d'Alfonso VI.
- Y del Sétimu. Tamos falando de primeros del XII.... Tela...
Y nun se fizo mucho esperar el tal Mister Helios.
 |
| L'abeya tamién quier participar de la fiesta << Lliba, lliba l'abeyina na corona l'envolucru y ye que la mexicana tiennnos tomáu'l gustu. Por eso los asturianos andamos toos... a capítulu >> |
De primeres sal un sol de matarrocinos. Normal, ta de tormenta.
Arrancamos, pero paramos en seco. Quedamos clisaos delante una muria de piedra engalanada detrás alantre por una mata de zinnies . Son plantes de tallu verde que puen sopasar el metro d'altor. Tienen la fueya opuesto y saxitao pero lo que llama l'atención son los pétalos roh.os coronaos por un aru d'estames mariellos. Paez una fiesta. Una fiesta española. Una feria de Sevilla coles banderes al vientu: roxo y mariello. Un ensame d'abeyes, atrayíes pol fiestín, tán dándose una llacuada. El boréu ye pa tol mundu. Y pa nós tamién que , a la fin, vimos salir el sol. Asina son les tormentes.
La Zinnia:
La Zinnia elegans ( Profusión orange) - CINIA, pa los amigos - ye una planta anual y perenne de la familia de les asteraceaes, porque asemeya a una estrella. Tien la flor dispuesto n'inflorescencia compuesto (capítulu) arrodiao por varies files de bráctees (envolucru).
 |
| <<Vengo del llonxanu oeste, vengo de Guadalaxara p'antroxar con caminantes de tola triba asturiana. Soi la gayola'l Camìn, soi Zinnia, la mexicana >> |
Esta elegante (planta) vieno de les praderíes del llonxanu oeste y México
( apellídenla guadalaxara) onde casca'l sol. Pertenez a la tribu de les heliantheaes (enamoraes del sol) y la verdá ye que namás vela dante ganes de cantar:
<<¡Que viva H.aliscoooo...pallabra d'honooorrr!>>
¿Sabíes que los americanos ficiérenla floriar esti añu -2016 - na Estación Espacial Internacional? Magar que nun son los pioneros pos los rusos, yá nel añu 1982, algamaren lo mesmo cola "Arabidopsis".
 |
| Enantando la mirada: El Caudal, Mieres, Fábrica M, Térmica, Escombrera y carrertera'l Padrún. Presidiendo l'imperiu: el Picu Gúa |
 |
| Sopasamos Valmurián d'Arriba |
Enllanamos. Por fin. Tamos nel barriu La Teyera. Ye fácil imaxinar porqué. Caminamos enantando la mirada . De primeres a mandrecha pa contemplar el valle industrial de Mieres, la carretera que xube dende La Peña al Padrún o la Escombrera de Pumardongo.
- ¿La escombrera lleva muncho tiempu en funcionamientu?
- Lo menos cuarenta años. Pertenez a Hunosa, ye onde echa los sobrantes.
- ¿ Del Llavaderu'l Batán?
- Y otros, como la Térmica.
- ¿Van aterrazando, eh?
- Sí. Y darréu van plantándose árboles. Col tiempu llegará a pasar desapercibía la escombrera, magar que nós nun alcancemos a velo.
- Bueno, ta bien pensar nos ñetos.
Tamos falando con un vecín de la zona al que salen a recibir los ñetos, precisamente. Fai-yos unes carantoñes ya invítenlu a xugar al fútbol.
- Los neños de Valmurián baxábemos pela Escalabá a la Escuela de Baiña. Paez que foi ayeri...
 |
| << Esti pan nueso de cada día déalo Dios dende'l Picu Gua>> |
Sentamos un ratu nel Área de Descansu del Barriu La Teyera. Nuna mínime esplanada formigón, con vistes impresionantes, hai una cómoda mesa de madera al par d'una fonte. Pa tomar la parva ye imposible alcontrar otru sitiu más afayadizu. A despechu del tiempu echamos la ruindá del cuerpu reponiendo les fuercies que gastamos na xubida.
Pasamos fácil la Teyera y la Gatera porque agora tamos llaniando. ¡Esto ye otra cosa!
Y aportando al Novalín vemos a manzorga los restos d'una cantera. Pero lo que más nos llama l'atención ye un finxu calizu, una especie de torreta, nuna pequeña llomba no más alto del pandu.
Y facemos alcordanza.... El Castiellu d'Aguilar....
El famosu castiellu d'Aguilar nun se sabe a ciencia cierta onde ta pos nun hai los estudios afayaizos que lo avalen. Aguilar ye un llugar que ta nos rimeros del Padrún. Nel medievu debía nomase Aguilar a toa esta zona alta. Enantes taba Copián si xubíes dende Mieres.
¿Qué alcordances tenemos del Castiellu d'Aguilar?
 |
| ¿Tevo equí'l Castiellu d'Aguilar? Traces tien... |
Gonzalo Peláiz I, vamos llama-y, tevo delles amarraces col Rei de León - tamién Castiella y Asturies - por intentar el control de les Asturies Centrales al delláu de Alfonso VII, el rei verdaderu. Perdonó y perdonó hasta que vieno a por elli teniendo qu'abellugar nel Picu Castiellu ( el que vemos al fondu na semeya). Ye de suponer que tamién tenía control de tol valle d'Olloniegu dende'l Castiellu Aguilar pa ver lo que-y venía de La Meseta Castellana.
[ Pa saber cómo acabó podéis entrar n'esti blog :
<< Cola de Lleón o cabezaleru'l Nalón >>
<< PrOTESTAS, nel entornu d'Olloniegu >>]
 |
| AGUILAR, anguaño. A les puertes del Padrún. |
Del que sabemos a ciencia cierta que tevo instaláu nel Castiellu d'Aguilar ye d'otru Gonzalo Peláez, el tristemente célebre Conde de Cuaya. Aconchabáu col Obispu d'Uviéu, Fernando Álvarez ( que yera primu del potentáu Rodrigo Alvarez de les Asturies), tenía amedranao a tol comerciu ente Asturies y La Meseta que nun pagaba relixosamente l'impuestu rebolucinariu: < O me das lo que te pido o t'arrebaño'l gargüelu >, que ye lo facíen davezu. P'acabar con esta peste hebo de tresnase un exércitu comandáu pol mesmu don Rodrigo que lu arrinconó - otra vuelta - nel Picu Castiellu. Pa conocer meyor esta hestoria entra en :
<< Quousque tandem, Conde Cuaya >> [Q.T. - 1]
<< A teyavana en Baselgas >> [Q. T. - 2]
<< Gayola nes Caldes >> [Q.T. - 3]
Camentando naquelles histories pasamos el Novalín y calamos n'antigua carretera xeneral AS-242 :<Mieres- Olloniegu- Uviéu> . ¿Cómo vamos pasar pel míticu Padrún y nun paranos un instante a contemplar esti puertu?. Tiramos a mandrecha y dimos un vueltu pel pueblu. Vese poca xente. Esto nun ye lo que yera...
 |
| Dando un vueltu pel míticu Padrún: 387 m. /s.n.m. |
A la fin aportamos al <Bar> a tomar un vermú, qué menos.
Lleimos el periódicu mentanto saborguiábemos l'Izaguirre. Debió l'arume del alcohol el que nos tresportó, otra vuelta, a la Edá Media. Entramos nes páxines del llibru : <POTESTAS>, de Xulio Arbesú y facemos alcordanza cuando los homes de Gonzalo Peláiz (I) salieron al alcuentru de la Reina Urraca de Lleón. Menudu sustu-yos metieron.... Nun taba la reina pa bromes pos venía espreso a atropar xente pal exércitu que cuntaba emburriar escontra'l so maríu, el rei Alfonsu d'Aragón.
Y al salir a la cai:
- Coimes, paez qu'aclaria'l tiempu.
- Yá podemos desprendenos d'algún fatu.
El Padrún - que pertenez a la parroquia de Baiña - ye un puertín a 387 m. d'altor/ s.n.m. que queda de Mieres a unos 11 km per una carretera mui tendida y fácil de xubir pos la cuesta entama na Peña, a 5 km. Por embargu si lu xubes dende Olloniegu tienes una sierpe enforma pindia d'unos 4 km. escasos. Nós tenemos que baxalu p'algamar hasta'l Garapiellu Históricu : [Ponte-Palaciu - Capiella] pero vamos garrar un atayu que cala na carretera yá cerquina d'Olloniegu. Forma parte del Camín Xacobéu. Too lo que sea apartase del tráficu mecanizáu ye bono.
 |
| ¡Andando, tas nel Camìn de Santiago! (Que yo voi Camìn de Niria, chaval) |
- Pa Casares.
- Afalando. Esa ye la señal. Vamos siguir pel esconderite de los homes de Gonzalo...
- < < A ver per ónde me metes...
Que yo nun soi doña Sancha,
nin tengo caballu o burra
que me salven de la mata.
- Tu fía de mio, cristiana,
qu'onde pasa un pelegrín
bien pue pasar una dama.
- Quedóte'l ripiu perguapu
pero como tea puerco
vas conocer esta ayalga.
- Sía, pues...
Yá pues dir dando la bata > >
Entramos, boca abaxo, per un camìn de carru enllamuergáu por momentos. Pero ye fácil y prestoso andalu por mor de la fueya que lu mulle. Ta estráu de fueya castañal.
 |
| Lo único que pues facer baxando p'hacia Casares ye tresportate nel tiempu y rebolgar les pisaes: << Per equí Suero Bermúdiz y el so primu, un tal Peláiz, xubieron mui seliquino a doña Urraca buscar. Venía la reina madre per Asturies atropar exércitu bayurosu pa fer la guerra al rival, el propiu maríu Alfonso que too lo quier gobernar. - Yo soi la fía del rei de Lleón y vecindá y talo muyer d'esta tierra en casa mando: ¡A callar! >> |
<< Nin en vienres nin en martes
cases les fíes nin MUDES les vaques >>
De mano nun lo entendía. Como les vaques nun se muden de ropa pensé que mudar yera cambiales de llugar. Non, equí mudar ye muda-yos el estru; cambia-yos la "ropa" de les cames.
Lo único que pues facer facer baxando p'hacia Casares ye tresportate nel tiempu y disfrutar les pisaes.
En Casares alcontramos a Paulino que taba faciendo la xinasia diaria: Dar una vuelta al rodiu'l pueblu, o bien baxando a Olloniegu o xubiendo hasta'l Padrún.
 |
| Dende CASARES acolumbramos Picos Castiellu y Berrubia |
- ¿Veis aquella casina qu'echan fumu?. Ye de mio.
- ¿Entá se calientern con carbón?
- Dende lluéu, nun renunciemos al vale. Amás ye que güei tan tresnando'l samartín.
- Y usté yá ta "apartáu del polvu", eh?
- H.a, h.a, h.a.... Eso tamién pero qué más quixere yo poder facer daqué. Tuvi enforma malu esta temporá ya entá ando convaleciente.
- ¿Vive dafechu en Casares?
- Sí, sí; siempre. Antes teníemos escuela. Xuntábemos colos d'Olloniegu y díbemos xugar escontra La Mortera.
Mirái p'allá. ¿Veis aquella fastera? El pueblu más grande ye La Mortera. A manzorga tenéis el Picu Castiellu, enriba La Fócara, onde hebo muncha guerra escontra los moros. (N'Asturies toles "desconocíes "fueron contra los moros). A mandrecha, n'aquel monte amarronáu, ta'l Picu Berrubia. Pa llegar allá pásase poles Escobadielles. Ellí tenemos xugao al fútbol y armala mui gorda...
- ¿Anduvieren a garrotazos?
- Más o menos... Teníemos l'árbitru favoratible y eso los morterinos nun lo llevaben mui bien...
- ¿Ónde trabayó usté?
- Tola vida en San Xosé, d'Electromecánicu. A última hora quixeren llevame p'Avilés pero nun m'apeteció...
- Bueno, Paulino; otru día cuéntame lo de les canteres de la zona. Agora tenemos que colar, faisenos tarde. Vamos Camìn de Niria.
- ¿Pero nun díbeis pa Olloniegu?
- Ye lo mesmo ¡Ta lluéu!
 |
| Gonzalo dica Picu Castiellu |
Suiguimos camìn abaxo hasta calar a la xeneral AS-242. Anque nun lo creas siéntese como un aliviu. Oi, nunca nun se sabe lo que te pue apaecer per esos andurriales...
<< - ¡Meca, un caballu!
- El caballu de Gonzalo.
- ¿Dirá ver a Doña Sancha?
- Cómo s'entere'l so hermanu...
- ¡Ai, Señor; válgame Dios!
- ¿Xuntaránse nel Castiellu?
- Dios los salve, ¿habrá perdón?>>.
 |
| Mina San Xosé: Castillete, planu inclináu, casa obreros, oficines... Veo a mi padre entrar na mina: Señaldá. |
Restolo per MTI :
<< Les mines de carbón d'Olloniegu entamaron nel siglu XIX con capital foriatu. Nel 1917 faise cargu d'elles Hulleres de Veguín y Olloniegu que les moderniza y pon planos inclinaos con un llavaderu na Servanda. Tres la Guerra Civil del 36 esta empresa faise con otres mines del Caudal y del Aller hasta quedar integrada n'HUNOSA en 1968.
El Pozu Sanxosé echó andar nel 58 . Tenía 10 plantes y algamó 650 m. de profundidá. Peslló nel 72 darréu tirar n'elli más de 140 millones de pesetes nun segundu pozu, que nun llegó entrart en funcionamientu. Será por perres...
Abrió otra vuelta nel 82 poniéndo-y el cierre definitivu en 1993. Güei ye una triste llaceria >>
 |
| La Fonte los LLocos: Curiao... |
El casu ye que camentando en too esto tamos llegando a Olloniegu. Enantes tenemos que dexar atrás L'Alcantarillón y poco más abaxo pasar delantre la Fonte los Llocos. Ye d'estilu barrocu.Ta fecha nel XVIII (1775) por Francisco de Pruneda. ¿Por qué-y llamen de los llocos? .... Tengo d'averigualo.
<< Bien cerquina la umbría la fonte alcontramos esta planta verde, colos tallos rastreros que pue alcanzar hasta un metro d'altor o, meyor dicho, llargor.
Tien la fueya ovalao ya opuesto a lo llargo del tallu que s'acuesta sobro otres plantes por mor del pesu les bayes, coloradines primero y prietes cuando maduren yá metíos nel branu. Y ye que la flor ñaz precisamente nel estremu del mesmu.
 |
| Androsemo, flor del Diañu, eses bayes coloraes tan reclamando'l pecáu |
Pos meteles ente les pàxines de la Biblia p'atrayer la bona suerte.
Por embargu nes Islles Hébrides ( noroeste d'Escocia= celtes ) pensaben, qu'estes bayes tan guapes, prevocaben la llocura y por eso les nomaben Les bayes del Diañu. ¿Sabríenlo per Olloniegu? De xuru que sí; les coses nun ocurren por casualidá... Que tean al par de la Fonte los Llocos...
¡Ah!, escaecíaseme dicítelo; esta planta ye de la familia de les gutíferes y tien por nome científicu Hypericum androsaemun. N'Asturies llamámosla Flor del castellán o Insulina (¡toma p'allá!) y los vieyos-vieyos apellídenla sanalotou (too menos la llocura, claro).
¿Tomaría Gonzalo Peláiz un ferviatu d'estes bayes? Porque hai que ser mui arrechu pa enfrentase al Rei... Bueno, al Emperador.
<< Probable s'enquivocó
cola Flor del castellanu
y por tomar Doña Sancha
tomó les bayes del Diañu.
Tomasti Picu Castiellu,
mas l'erru saldráte caru >>
Vamos faciendo zig-zags pela carretera. Yá nos queda poco pa llegar a un puntu clave nes comunicaciones medievales: Olloniegu. Enantes sobrevolamos una moderna ponte que salva una vallina pela que cuerre La Riega de Sanfrechoso. Sí, la de la mina Sanxosé y La Servanda, onde había'l lllavaderu.
 |
| A ESCONTRAFORGA < Olloniegu ta baxando. Por mirar Picu Castiellu igual la tamos armando. Da-y la vuelta, doña Sancha, que l'amor yá ta escapando> |
- Yo ehí nun xubo. Yá baxará él. Tengo tiempu...
- Muncho non, maxestá. Los moros tán dando guerra... Y el tocayu Alfonso d'Aragón... Y la pariente, Teresa de Portugal... Que se-y prestó un condáu mas ella echó-y el candáu.
- Bueno, voi pasar una temporaina na zona, que me ta prestando abondo. Igual tengo tiempu echar moza, dao que Berenguela ta lloñe...
- ¿Dalguna en particular, Señor?
- Hai una tal Gontrodo...
- ¿La de Tinéu?
- La mesma.
- Acertada decisión, Señor. En Tinéu hai bon xamón.
<Y del xamón de Tinéu
ñació Urraca, l'Asturiana,
que tamién algamó a reina
reina que foi de Navarra;
masque pal Rei y pa nós
ye la reina la mazana>
Y col rixu altu, por mor de Sancha y Gontrodo, siguimos baxando adulces pela recta d'Olloniegu -l'Avenida del Principe d'Asturies- el núcleu de la villa: cases guapes - dalguna con corredor -, el cuartel, la escuela antigua, un monumentu a ........ A Felipe II, non. Home, teniendo en cuenta qu'esti rei tien-y vendío esta villa a Bernaldo de Quirós por 608.080 maravedíes ( que too se sabe) igual había que pone-y una placuca... Lo que ye la crisis, hasta nos reis percute. Claro, guerres y más guerres ...
A mandrecha una señal que nos lleva a L'Armatilla, la Patrona d'Olloniegu. Ta abellugada nuna ilesia allugada na llomba del probable l'orixe poliorcéticu del pueblu, cuando había qu'asitiase n'alto pa tener meyor defensa. Celébrase la fiesta el dìa la Santina, 8 de Setiembre, y rematen cola Armatillina al día siguiente.
Destaca, como nun podía ser d'otra miente, la torre de la ilesia parroquial baxo l'advocación de San Pelayo, claro. La Primitiva ilesia románica, qu'anguaño ta formando parte la cadarma'l cementeriu, yá taba embaxo'l patrociniu d'esti santu. San Peleyo yera un neñu cuando foi presu en Pamplona poles güestes d'Abderramán III al tiempu que so tíu Hermoigio, obispu de Tuy (920). Nin por perres pudieron lliberar al neñu, petite del califa. Poro foi martirizáu'l rapaz que nun s'avieno a los sos caprichos. Les sos reliquies terminaron aportando nel monestriu les benedictines d'Uviéu, quedando embaxo la so advocación: Les Peleyes.
Emperu lo que nós andábemos arranaos por atopar yera l'antigua alberguería...
 |
| ¡¡Cuánta historia n'ALBERGUERÍA d'Olloniegu: ¿Cuánta xente tendrá parao equí? Tiremos de la lleenda... Sabemos de Mina, la corraxina francesa. ¿Ónde diben tar meyor Gonzalo Peláiz y el so primu Suero Bermúdez colos sos amigones ? ¿Tomaría unos culinos el mesmu Alfonso VII enantes de tirar camín del Picu Castiellu? ... Yo toi viendo a Doña Urraca refrescar con una cuayada na terracina l'albergue mientre ferregüeyaba los bonos mozos del pueblu... (cola fin d'incorporalos al exércitu). |
 |
| SANTIAGO: ¡La que armó esti home! |
" El que va a Santiago
ensin ver El Salvador
visita al criáu
ya escaezse del Señor"
 |
| Pere ya Mina col caballu de Santiago camìn d'El Salvador |
Un día unos corraxos (pelegrinos xacobeos) dexen al procuru los albergueros una neña que ta malina mientres van unos díes a visitar al Salvador, n'Uviéu. La neña escapa tres d'ellos y Pere (el fíu de la patrona) va dir con ella... ¡Menudes aventures-yos tienen pasao!... ¿Por qué nun lu lleéis?>>
 |
| ¿L'Alberguería, xacobea, d'Olloniegu ? |
 |
| La Virxe de L'Alberguería o Los Remedios |
Como nun ye plan d'andar dando palos de ciegu entrugamos a unos policíes municipales que nun paecíen tar al corriente (?). Entós dimos con un andariegu que tenía pinta ser del pueblu.
- Esti home pue que sepa... ¿Señor tien oyío falar de l'antigua alberguería del pueblu?
- Claro, ho. Ta na Plazuela. Ye aquel barriu que veis ellí, tres de la ilesia.
- ¿Ónde la Plaza los Remedios? . Ye lo que veo nel mapa...
- Daquién-y llama asína. Ye qu'hai una virxe con esi nome. Pero tamién se conoz como la Virxe de l'Alberguería.
- ¿Y cómo podemos dar con ella?
- Rebuscando un poco podéis alcontrala na fornica d'una ventana. Ta nuna plazoletina, cerca d'un horru.
 |
| GARAPIELLU HISTÓRICU: Ponte, Palaciu coles dos Torres y Capiella románica (frente torre circular) <Cruciarás la ponte si darréu rezar na capiella (amuesa espadaña) pagues el PONTAZGU> |
- Tamién sabemos qu'antiguo ( XVIII) hebo un Hospital de Pelegrinos, cosa que paez normal, n'esta villa de tránsitu.
- Rúxese que pudo tar nel mesmu sitiu, o apegáo; porque taba asitiada nel Barriu La Plazuela. Güei ye una vivienda. Ya un poco más alantre daréis col Conxuntu Históricu. Eso sí que ye un clamor...
 |
| ¿Capiya románica o corripa pa los gochos? |
Enantes de salir del pueblu yá acolumbramos la torre circular. ¡Cómo presta!. Daste cuenta que tas entrando n'otra dómina, como cuando xubimos a Banduxu. Esti Garapiellu Históricu ta formáu por una capiella, un palaciu con torre circular ya una ponte.
. Lo más antiguo ye la CAPIELLA.
Nun falamos d'una capiella que ta nel güertu'l palaciu. Non. Ye una capiella pequeñina que ta a mandrecha, dientro'l cementeriu. Lo que se caltién ye l'ábside cola puerta n'arcu apuntáu, De mano yera más gande (8x5). L'arcu d'entrada al cementeriu yera'l de la capiella.
 |
| ARA: <¡Lo que yo daría por tar nel Muséu Arqueolóxicu!> |
Dicen que tien nicios prerrománicos y que xurdió a la vera d'un manancial paganu y cristianizáu más tarde ( hai que h.odese) al abellugu de San Xuan Bautista y que más tarde pasó al amparu San Pelayu (como la ilesia parroquial). Caltién un altar románicu, una ayalga en cualquier casu, que s'alcuentra nel mesmu estáu llamentable que la capiella. Pero home, ¿nun sabéis qu'esto pue dar perres?
. Darréu vien la PONTE.
El pasu natural a La Meseta, y darréu empalmar n'Astorga cola Vía de La Plata, pa los astures centrales pasa per Olloniegu. Pero hai una torga importante: El Ríu Nalón. Seique nada insalvable con una bona ponte. (Un sitiu mui guapu pa facer perres). Los romanos, buenos yeren ellos, yá llevantaron la suya cola fin de xuncir Lucus Asturum (Llugones) con Astúrica Augusta (Astorga). Más o menos nel mesmu sitiu alzóse otra nel XIV (dellos dicen nel XIII).
 | ||
| < Esti probe torna a casa, la Meseta Castellana> (Dibuxu d'Ulises Wensell nel Pelegrín Valiente") |
Nun yera fácil cobrar el pontazgu . Alfonso X (1221-1284) hebo de llamar l'atención pa que se respetaren estos drechos.
En 1676 una riada camudó'l cursu del ríu y la ponte quedó obsoleta. En 1780, l'arquitectu Manuel Reguera, llevantó l'actual nel Portazgu (AS-242) onde se puso un fielatu.
 |
| El PALACIU QUIRÓS, coles dos torres. |
. Cola fin de facer respetar los drechos de pontazgu foi llevantada la TORRE MUÑIZ. Hai que poner respetu, y guardies.
Dominando una gran zona la familia Muñiz asitió esta torre circular de tres pisos en mampostería allá polos sieglos XIII ó XIV. Nel sieglu XV pasa a manes de los Bernardo Miranda siendo Lope d'Estrada, yá nel XVI, el que llevanta la torre cuadrada y el PRIMER PALACIU: fachada con tres ventanales y portón de grandes doveles. El restu les construcciones - incluyendo otra capiella - son cosa de Felipe Bernaldo de Quirós nel XVII.
- ¿Hai quién dea más? : Torre cuadrada, torre circular, palaciu, dos ilesíes... ¿Cómo pue ser qu'esta ayalga tea neses condiciones?
- Yá se tien fecho dalguna reparación pero vese a les clares que quedaren curtios.
- ¿Imaxináis un complexu turísticu n'esti entornu? Palaciu- hotel habitable, ponte transitable sobro un desvíu del ríu ya un parque temáticu...
Y vamos algamando'l final de la estaya prevista. Tenemos percorríos unos 10 kilómetros, por mor d'alguna vueltuca, seique algo más.¡ Qué más da! ¿Pasástilo bien?. Los que nun lo pasaren tan bien foron los nuesos mocinos... Vamos a la lleenda (novela):
<< N' aldeina del Portagu, Melendo entrugó a unos llabriegos que veníen de los güertos de la vega si tuvieren visto pasar, diba unos tres amaneceres, dos caminantes nuna carreta tirada por dos caballos: Un pá ya una fía. La neña tenía'l pelo prieto y la ermis blanco como la ñata...
Tornó-y la esperanza a Melendo. Sintió que se-y sentaba na golupa del caballu cuando'l llabriegu y afitó del so pasu. Él mesmu hebo d'aidalu a iguar una rueda la carreta. La gayola de Melendo foi indescribible:
- ¡Zapatu! >>
 |
| Aportando al fielatu del PORTAZGU. Cuestarriba a Picullanza << Pelegrina, vei sacando faltriquera que'l pontazgu d'Olloniegu tien perReal la so pecha >> |
 |
| A Uviéu 1 1/2 llegües ¡Andando! Güei nun hai portiella que zarrar, queda munchu caleyar. |
Llegamos al fielatu y buscamos el moyón que nos indica dos coses:
.Una, les llegües que falten pa llegar a Uviéu:
<< A Uviéu llegua y media>> Unos 8 kilómetros.
. Otra, el caminín tapecíu , y a cachos empiedráu, que debemos tomar pa xubir a Picullanza .
Pero esto ye fariña d'otru costal. Sedrá la prósima estaya:
<< EL PORTAZGU - SAN SALVADOR d'UVIÉU >>>, tela...
Y yá llevamos percorríos unos 23 Km. (12 + 10) del Camìn Aniciáticu.
AGASAYOS
. A Fulgencio Argüelles, como siempre, padre espiritual d'esta criatura (Camìn de Niria)
. Al <<blog d'Acebedo>>, onde escaribicamos davezu. y al que lleemos con preste.
. A Wikipedia, la chivata insolente que too lo sabe. ( I love you )
. Al ESLEMA , al DAGLA y al DALLA ( anque últimamente malpenes pueo entrar per interné).
. A la parienta, que solleva con paciencia cuestes, folleros y sesiones fotográfiques.
. A Demetrio, Paulino ya otr@s que tuvieren el miramientu de parase a charrar con nós.
. A Antón García, que me presta davezu " El Pelegrín Valiente".
