Esta ye la que nos encamienta'l conceyu de Sariegu...
La sienda PR AS-197 podía nomase tamién "Xubida al Olimpo" ; porque en realidá ye de lo que se trata, xubir a La Campa dende La Vega Sariegu y baxar pela otra fastera p'arribar al entamu, yá que falamos d'una ruta circular d'unos 15,5 Km.
N'honor a la verdá teo que dicir qu'esta vegada nun pudimos faela entera, miseries de la vida que nos torgaron salir ceo de casa. Pero esto nun quedará asina.....¡prometío!. En cualisquier casu, y magar nun disponía ún de tiempu a esgaya, aprovechamos bien el que tuvimos...Yá te digo...
Aparcamos nel centru neurálxicu de la villa: A la vista l' Ayuntamientu y delantre un parquín que ta al par de la Escuela nueva (como non).
Pel Camín de La Bauga tiramos pal barriu La Canal onde esti panel indicativu nos desplica l'orixe d'esti nome:
 | |
| La Quintana de Pola, embaxo'l cordal de La Llomba |
Como tamos en Payares, na Seronda, nun me resisto n' arreyavos esta cuca.
 | |
| Cuca |
Cuando yá ten pa ello entama la Esfoyaza, l'enristre les panoyes pa colgales en corredor onde acabará faese'l granu. Esti llabor tresnábase n'andecha, vamos, que s'axuntaben varies families nuna casa pa entainar y que nun-yos supliera tanto...Equí ye onde aprovechaven los mozos pa "ligar" y cantábense cancios picardiosos....
Elli: "Una panoya tiréte
mas nun me ficisti casu,
yá verás cuando te quedes
solina, pa vestir santos"
Y Ella arrepóstia-y: " La panoya que tirasti
nun la quixi recibir,
porque mio madre nun quier
que cortexe un mozu ruín".
Con estes tribes na tiesta,y dexando un cachín del coral na Quintana, cruciamos un puente modernu, p'encima l'autopista, camín d'El Villar.
Poco enantes d'arribar a esti pueblín pasamos so esti arcu de trunfu :
Y al par d'esta reliquia que se caltién gracies a dellos tentemozos .
Al algame'l pueblu alcontramos esti cartelu :
Na pequeña plaza'l pueblu alcontramos, amás d'una capiella y el llavaderu, esti....
¡ Qué suerte tuvimos!.......Mirái a quien alcontramos....
Yá creciere'l puñefleru....Mirá-ylu.....¡Tien moza!.
¿Que ye aquello de......
- " Pequeñu, peludu, suave....."
. Bien suave, yá te digo...
- "Que si tien los güeyos d'acebache.."
. Nun va tenelos...D'amirar pa la mulata que ligare...
- "Déxolu sueltu y cola pal práu...Y caricia dulde les florines rozándoles malpenes..."
. ¿Les florines?......Eso yera antaño....Angüaño tien otros pruyimientos...
Bueno, prestóme velu y amás en bona compañia. Asína que colamos cuesta arriba pero daqué más contentos. Darréu acolumbramos no fondero una ilesina perguapa, con un ábside circular, que nos llamó poderoso l'atención (al platu vendrás, arbeyu).
Como nun yera plan de desfacer lo andao dexamos la visita pa la vuelta.
El camín tornóse más montesu y aprucieron los felechos, árgumes y berizos.
 |
| Árgomes (Úlex.....) |
( Ulex ...europeus?)
 |
| Brezu |
Y un cachín más p'arriba dimos con esti carrascu o xardón, conocíu tamién como acebu (Ilex Aquifolium).
L'acebu ye un árbolín plani-perenni-foliu (siempren tien fueya).
Ta allugáu al pisu meso- y supratempláu (150 - 1500 m) y présta-y andar de parranda pelos fayeos con dellos tipos de robles. Adáutase a cualisquier tarrén - meyor si ye caliar, fondu y llentu - polo que pue medrar en sitios degradaos formando previesques pa que darréu vengan otres especies más chules a establecese neses fasteres yá más afayadices. Podemos alcontrar mates d'ellos pel Conniu, La Cobertoria, Brañagañones, el Sueve....
. Dióicu : que tien les flores m. n'un árbol y les flores f. n'otru. Vamos, qu'hai àrboles machu y árboles fema. (un secretu: pue habelos con flores hermafrodites: m. y f. na mesma flor y nel mesmu árbol, claro).
. Florez pela primavera, ente mayu y xunu. Les flores, perguapes ya abondantes, son mui visitaes poles abeyes.
. Tien Polinización entomógama o entomófila, que quier dicir por mor de los inseutos.
. El frutu ye una drupa colorada - con 2 ó 4 pebides dientro - y velenosa, porque caltien una sustancia - ilicina -tóxico. Madura p'hacia mediaos de la seronda.
. La corteya'l troncu emplegábase pa faer lliga, sustacia pegañoso qu'usaba José - un collaciu de la infancia - pa cazar páxaros.
Ye una especie ornamental preciosa a la que nin yo mesmu me pudi sustrayer......
 | |
| Pareya de xardones |
 | |
| Fueya y frutu |
* ( Los comentarios téunicos - ya estrozaos por min - débense a la "Guía de los árboles d'Asturies", de los padres de la Patria : Bertu Ordiales y Guillermo C. Ruiz, unos "güelos" de so).
Y saliendo del "carrascal " nel que nos metiemos pa tornar a la ruta que nos ocupa fuimos pasu ente pasu averándonos al cielu...Bueno...más bien al Altu La Fayuca onde quedamos clisaos contemplando'l Valle de Sariegu ....Insertáu ente montañes, esta ayalga ye un regalu del cielu pa los seres d'esti planeta. Pero lo que fai más solemne y delicada la Vega ye alcontrase protexida pola imponente Peña Mayor....Esa imax que la retina unvía al discu duru pa que nun s'escaeza de por vida...
Pa que quedare constancia tomemos dalguna semeya pela llomba .........
cuernos?....Igual ye qu'a la vera'l cielu nun los precisen pa engardise...
Fasta'l pinar llegamos.....Pero tornamos pa xintar .....Ya empobinámonos camín de la ilesia que dexáremos atrás.....
Santa María de Narzana
Amás de la moderna espadaña podemos ver adosaos: el cabildu y la sacristía.
Esta ilesia románica - Monumentu Nacional - llevantada, más que probable - nel sieglu XII, ta entamilgada nun cantu dientro la mesma llanera de La Vega. Nel entamu foi ,quiciabes, parte aneya d'un conventu del que nun queden nicios. Pasó por dellos asocedíos traumáticos siendo restaurada por Menéndez Pidal - como non - ya en otru arreglín más tardíu añedióse-y l'adriu y la sacristía.
Santa María de Narzana consta d'una nave rectangular cubierta d'una armadura de madera visto y ta illuminada por tres vanos abocinaos en cada llateral. La portada una ayalga abocinada con tres arquivoltes de mediu puntu que se sostienen sobro dos columnes.
¿Echamos una güeyada a los capiteles?
 | |
| Capiteles a mandrecha |
 | ||
| Capiteles a manzorga |
 | |||
| Ábside circular con saetera (ventanu) |
 | ||
| Frisu sobro arquivoltes |
 | |
| Texu, centenariu. |
 |
| Portica |
