{A la cata del románicu: San Xuan d'Amandi }
 |
| La Pantera Rosa queda clisada énte San Xuan d'Amandi, talo que nós. Esta ayalga foi tomada de Facebook; vaya n'estimanza del so Autor: Arsenio. |
Poro nun tenemos pensao andar muncho, seique algamar a Coru saliendo de <Puente Amandi>. Lo de Breceña, el fin caberu la primer de les tres estayes en que dividimos el Camín, vamos dexalo pa praú, hai más díes qu'ún... Pasu ente pasu... A ver cómo se nos da'l día...
A les 9:30 salimos de casa (¿cómo madrugamos, eh?) y a les 10:00 tábemos aparcaos enfrente'l Bar Caso, nel Barriu La Parra (Amandi) onde termináremos el día anterior. Da gustu dir a La Villa per esta maraviosa l'autopista. Un luxu asiáticu, dende lluéu.
Almirando les decimonóniques casines-galería d'arquitectura indiana del Barriu La Parra tardamos más d'un cuartu d'hora n'arrivar al puentín d'Amandi per aciu d'una caleyina que tomamos a mandrecha, a l'altura del Bar-Restaurante "Casa Aurelia", va poco "Bar La Parra".
 |
| ¡Uf!. Xubiendo pel "lombu del asnu" de Puente Amandi. |
Cabo del cuciu práu, o Campu de San Xuan ,vemos una capiya perpiquiñina, d'una mínima nave ya un adríu mui vistosu, cuasi tan grande como la nave: La Capiya San Xuan. Nesti entornu ye onde cada añu se celebra la romería del santu patrón de la parroquia. Antaño había mercáu y la xente aprovechaba pa mercar los aperios y productos del campu qu'ellos mesmos producíen.
 |
| La Casona d'Amandi a manzorga. A mandrecha la Capiyina San Xuan. |
 |
| ¡Tolón, tolón! Les campanes de San Xuan toquen a conceyu. |
- Deben ser les campanes de San Xuan.
- ¿De la ilesia románica que queremos visitar?
- Tienen que ser, escucha.... Ye domingo, de xuru que dicen misa a meudía.
- ¿Quies que vayamos agora visitala y tiramos depués camín de Valbúcar, hasta onde lleguemos?
- Acuéi. Por qué nun nos metemos per esta sienda que va bordiando'l ríu, tenemos tiempu asgaya hasta les doce.
- Val, d'alcuerdu. Esti entornu de los ríos paez mui guapu.
 |
| Tolos caminos te lleven a S. X. d'Amandi |
[El Ríu Linares, que n'otres dómines nomaben Amandi, ñaz nes tierres de Valbúcar tres amestase les agües de Cabranes, Sietes ya L'Infiestu. Ye dicir, ríos como Riega de Puente-Coro, Viacabá, Les Peñes y hasta'l Ríu Valdediós. Cuando se mete na propia Ría yá pierde'l so nome]
 |
| Nun cuerras tantu, muyer, que nun ye día de'Escuela. |
Al par de les Escueles hai una calzada romana, eso quiero ver yo, nesa cuesta empedrada, ornada por platanus hibrida, que nos empericota hasta'l cuetu y remata nun adriu arredondiáu, abiertu al entornu y soportáu por dóriques columnes de piedra, con techu de madera y teya árabe. Vamos xubiendo la empruna cuesta poco a poco, pasu ente pasu, tastiando esi sabor a vieyo, a otra dómina , que se respira nel ambiente. Yá llegamos. Tamos delante d'una ayalga: La Ilesia Románica de San Xuan d'Amandi. Xubimos los gastaos peldaños circulares que nos dexen nel pórticu frente por frente la Puerta del Cielu, al que s'entra pembaxo una arcada decorada, que s'afita sobro unes fines columnes dóriques remataes por vivos capiteles en relieve.
 |
| Voi caminín de San Xuan pela cuesta de l'Algara, dicen qu'ellí ves el cielu talláu en piedra cristiana, seique nun sías creyente va removésete l'alma. |
Salgo del pórticu, doi una vuelta a la ilesia pa ferregüeyar l'entornu .... ¡Qué prestoso! ¡Qué paradisu!...
Camiento... Lo del cielu ta mui bien pero enantes quiero conocer to esto: La Villa, la Ría, Cazanes, los montes de Coru y Breceña...
Espera un poco Hades (dios célticu del avernu), nun tengas prisa, ho; yá que tamos equí vamos a esfrutalo que pa eso debió ser creao, digo yo.
 |
| <Analayando> Amandi. Al fondu Cazanes. |
< Di-y a Caronte que vare la barca,
moneda nun tengo
más quiero un momento tastiar esta ayalga.
¡Que viva la vida magar toa disgracia !
Que voi a pidi-y a la Deva,
Santina del alma,
m'eche una mano con esto del karma.
Que yá falaremos,
que tome mentantes la parva.
Ún de Llaviana >.
Y eso ye lo que ficimos nós. Baxamos gayoleros la cuesta y fuimos tomar la parva. Taba caldiando'l sol de meudía y andávemos arranaos por un culete. Na sidrería La Ragatina, un barín antiguu, d'esos que tanto s'estilen pela Villa, tomamos el vermú. Contentos como unes castañuelues tiramos como cien metros per una caleya hasta la Casona d'Amandi onde tuviéremos anantes. Salimos de la Fonte San Xuan (¡cómo nun va tener el Bautista una fonte!), pegada a la capiyina, per un ramal dica La Ferrería. Yá tamos camín de Valbúcar. ¿Llegaremos hasta Coru?.
 |
| - ¡Yo flipo! Agora mátate a andar... - El Camìn pue facese de munches maneres. - Claro, estos yá vienen de vuelta .... (Tamos na entrada Valbucar) |
Caminamos paralelos a la carretera nacional As-255, la que va pal Infiestu. A mandrecha la quintana La Ferrería y a manzorga dexamos el Restaurante Amandi y el Llagar Cortina, un emporiu comercial mui prósperu. Pasáu el restaurante "La Canaliega" vemos a mandrecha la vega del Ríu Viacabá . Por fin acabamos esti tramu bien cafiante por falta duna cera afayaiza. Tamos n'antoxana d'una quintana faneguera, un portón pergrande que remeda un castiellu almenáu, pero ye namás una ilusión.
¡Curiao, nun te tracamundies!.
Tienes qu'abandonar la carretera xeneral y metete, a mamanzorga, per una caleya zahorra que va bordiando la muria la quintana. Sembla tar n'otra dómina y lo más seguro ye siguir les garrapielles tou'l tiempu. La Casa la Vega si nun ye un castiellu, ye daqué bultable, pos nun ye pequeña la finca.
Pel camín solombriegu, nos rimeros de la viesca, date la impresión d'andar perdíu; de nun ser poles garrapielles y fleches que vas alcontrando cuando nun árbol, cuando nuna piedra, dabes la vuelta.
 |
| < Romeros que vais xubiendo a la Virxe de Llugás rayinos de Cuadonga sobro so frente verás > (La Virxe de Llugás queda bien cerca d'equí. ye otra collacia de la Santina. <Bona falta nos fadrá un gabitu per esti camín avesíu> ) |
Tevo munches igües. Anguaño lo más antiguo que tien ye del XII/XIII destacando les célebres cabeces de picu que veremos n'Amandi y que namás se dan nel Arcu Atlánticu.
Cerca d'equí, no que yera un castru celta de la tribu los llugones (d'ehí vien el nome de LLugás), ta la "Pica Castiellu", territoriu que perteneció a los condes medievales Berenguela y Piniolo.]
 |
| Antroxando pel Profundu. Tiempos d'esperanza. |
Por fin vemos la lluz. Acabóse la piedrona y entramos nel asfaltu al dar nuna curva. Si tires a manzorga, llegues a la ilesia de Fuentes pero lo nueso ye de frente, más pegaos al ríu.
La ilesia ta dedicada a San Salvador, y tamién a la Virxe María, por alcontrase nel Camín Xacobéu. Nel inventariu del obispu d'Uviéu Gutierre de Toledo (1385-86) apaez nomada como badía.
 |
| <S. Salvador de H.uentes>: Románicu (¿Tevo nesa casona'l primixeniu monesteriu los benitos?) |
La ilesia, asitiada na LLosa de la Badía, consta d'una pequeña nave rectangular techada con madera y rematada por un ábside cuadráu cubiertu por bóveda de cañón. L'arcu de trunfu que les separa ta sofitáu na llinia d'imposta y non nos capiteles que, como dos guardies pretorianos, tán abellugando l'altar, un poco eleváu.
 |
| Nave S.Salvador de Fuentes: Ara, arcu toral, arcos ciegos... |
Tien la ilesia dos portaes: Oeste y Sur.La principal, qu'amira pal oeste, escarez de decoración y la Sur ta cegada dafechu.
 |
| La célebre Cruz de Fuentes |
Una de les pieces que más sonadía-y dio a esta ilesia foi la nomada Cruz procesional de Fuentes, del 3/4 del XII. Ye una cruz de madera, revestida en plata y orná con piedres precioses ya una inscripción onde diz que la donare Sancha González . Mide (59x48) cm. y los brazos enanchen nos estremos onde se pue apreciar pol anversu: La Virxe, San Xuan,un ánxel o Adán y per detrás el Tetramorfos.
Esta ayalga foi vendida pol obispáu d'Uviéu cola fin de financiar la basílica de Cuadonga a finales del s. XIX (y non el probe párrocu al que-y queríen cargar el muertu, col esmolecimientu que trayía). Anguaño pue contemplase nel Muséu Metropolitanu de Nueva York. Quédanos una copia, dalgo menor. ]]
*****************************
 |
| Camentando en quedar na Quinta Villaverde. |
 |
| < Malaya seyan molinos, los ríos y los regueros onde vieno a perecer l'Asistente Vaqueros > (Copla sacada del llibru de Xurde M.) |
Ellí mesmo vemos una plantación d'arbustos pequeños protexíos por plásticu a modo d'ivernaderos. ¿Qué sedrán? ...
-¡Arándanos!.
Yá sintiéremos falar d'estes plantaciones pero nunca nun viéremos una tan de cerca (poco depués tuviemos a la gueta d'ellos cerca de Venta les Ranes, en San Xusto). Cuatro pasos más palantre vemos la entrada a l'arandanera y, bordiándola, pues siguir la "Ruta los Molinos" que t'avera a Breceña.
- Mira, ¿alcuérdeste?... Per ehí, a mandrecha, bordiando l'arandanera yá pasáremos faciendo la "Ruta los Molinos del Profundu".
- Sí, cuando tuvimos que dar la vuelta, poco antes d'algamar a Breceña, por mor d'un argayu.
 |
| La soleyera Casona'l Palomar, cerquina de Coru. Al rodiu la quintana una plantación de mazanos. ¡Asturies xorrez! ¡Nun tamos muertos! |
A mandrecha'l monte y a manzorga la vega. Otra plantación d'arándanos pergrande y nun pandu acolumbramos una casa perguapa con palomar. Según nos camienta un señor ye de los dueños de les arandaneres de la zona.
 |
| El guardíán del Monte Coru. ¿Sedrá la cadarma l'Asistente Vaqueros? |
- ¡Coruuuu!
- ¡Hasta equí llegamos, que yo nun doi un pasu más!.
- Acuéi, vamos xintar daqué y tornamos pa lo civilizao.
< Con chorizu y tortiella
facemos la ruta más llevadera >
La verdá ye talamente vos la cunté sacante..... La cristiana nun quixo nin entrar en Coru, de lo galdía que taba. Yo xubí, más nada nun-y cunté del Asistente Vaqueros, aquel célebre bandoleru que pillaren abellugáu nun molín de la zona y fuere axusticiáu públicamente....
***********************
< CORU - BRECEÑA>
 |
| Per esta cuestuca arribamos a La Venta Coru. Nel cuetu del fondu Los Martilinos. El Canelo, guardián de Coru, acompañónos pel pueblu. |
Tres dexar atrás el Monte Sama calamos a la carretera xeneral (AS-332), que va de La Villa a L'Infiestu, tres un par de revueltes ya una pindia cuestuca manchada formigón. A mandrecha una carreterina que nos lleva al Barriu de Cayao y frente a nós una casa grande de corredor con nicios d'abandonu, tamos na Venta Coru. Va unos años yera un finxu referencia del Camín: bar, tienda y reposu obligáu del pelegrín; anguaño ye una casona pal recuerdu. En cualisquier casu a nós viennos per bien p'aparcar el coche. Como nun conocemos la zona nin tenemos ganes de sacar el llibru <Camín de Cuadonga> por que ta orbayando decidimos esplorar un poco pela carreterina que va a Cayao. Empobinamos dica un garapiellu cases pero'l lladríu d'unos perros fízonos dar la vuelta al puntu de partida. Al dir ferregüeyando la zona acolumbramos nun oteru la silueta d'una ilesia.
 |
| <Los Martilinos>, San Cosme y San Damián |
El canelo tiró delantre per una cuesta que sal a la derecha La Venta. A unos pasos vi un vecín trabayucando na güerta y decidí asegurame:
- Oiga, bonos díes, ¿esa ermita sedrá la de los Mártires?
- Sí, ho, la Capiella de los Martilinos, como dicimos per equí.
- ¿Per ónde pueo xubir a ella?
- Per cualisquier sitiu, si vas de frente hasta les cases tuerces a manzorga; tamién pues dar la vuelta y onde'l cruce tires a mandrecha.
El llabriegu ye un chaval, aproximao a min, que lleva unos pocos años xubiláu. Yá tien plantaes les patates (equí nun tienen torga pa ello), mui guapes por cierto, les cebolles, los ayos, los arbeyos y verdura. ¡Qué adelantu!. Nós entovía nun entamos cola sema ¿por mor del tiempu?... Disculpes.
- Esto ye'l Barriu Moratín, enantes había xente a pandiar pero namás quedamos cuatro vecinos. Y nos otros barrios de Coru pasa lo mesmo. Aquello d'arriba, xunto la carretera, ye Piñera y aquelles otres cases de Cayao. Mira si había guajes qu'ehí, xunto la capiella, teníemos una escuela, agora esbarrumbada, que llegó a tener más d'ochenta rapazos. Anguaño nun hai ún, ¿tu vístilu?... ¡Un guaje ye un milagru!
- ¿Ónde ta núcleu principal de cases?
- Igual te refieres a Solares, el más pobláu de los barrios de Coru, ya onde ta la ilesía de Santu Tomás, d'un tiempu aproximáu a esta de los Martilinos.
 |
| Piñera, dende l'adriu Los Martilinos. (Moderna plantación de mazanos. ¡Asturies bilta!) |
- Esto que-y digo... ¿Lo de la Sidra Coru, qu'agora tien la planta productora en H.uentes, tien algo que ver col pueblu?
- Claro, ho; el fundador foi Ferino Peruyera allá pol 1914 tres venir de Cuba y mercar la casa d'Antón de la Venta Coru, onde punxo bar y entamó a corchar sidra col nome de "Sidra Coro". Los fíos siguieren con ello y nos años 60 Manuel instaló la planta en H.uentes, onde ta agora. Nesti momentu va pola tercera xeneración y el xerente ye Manolín Peruyera fíu.
 |
| Sidra Coru |
- La mazana ye too asturiano, la mayor parte del entornu la Villa.
- Por eso tien un palu únicu tan buenu.
- Sigui calteniéndolu, magar qu'anguaño ya tienen prenses redondes d'aceru inoxidable, pero tovía furrulen les cuadraes tradicionales de madera.
- ¿ Y les pipes?
- Tien toneles de madera de castañu y tamién depósitos de fibra de vidriu; hai que modernizase que la competencia aprieta enforma.
- ¡Pos viva la Sidra Coru!.
[[ La centenaria Sidra Coro ta mui modernizada y ofrez a los sos fieles clientes formes estremaes de facese col productu: la botella sidra normal, la de siempre, que pues llevar por caxes de plásticu con 12 botelles; embases reciclables con 6/12 botelles; estuches con dos o tres botelles y tamién botelles de sidra gasificao, talo que'l xampán.]]
 |
| Barriu Moratín, colos Martilinos. (Pente les cases colamos pa Breceña) |
Falamos del tiempu, de cómo sollevalu y de como matalu, anque viendo la güerta (ún tamién carez d'esta enfermedá) yá se fai una idega... Tamién me camienta so la bayura ratones qu'hai per güertes y praos...
- Acaben con too; yo esti añu tuvi que volver plantar tres mazanales que plantare l'añu pasáu pero esi vecín de Piñera, que produz mazana al por mayor, tevo que replantar más de doscientos... ¡Una ruina!
- Y que curie del xabaril, qu'onde vivo yo...
- ¡A esos nin los mientes!...
Enantes de baxar a la carretera pa tomar el desvíu que nos lleve a Breceña calentamos les oreyes col Principáu, Icona, Seprona y tolos estamentos oficiales que tuviemos a bien de recordar... Nun hai cosa más relaxante qu'echar la culpa al gobiernu de tolo que te pasa...
 |
| H.uente de Moratín: llavaderu |
El camín estrecha de cuando en cuando y hasta te molesten los artos. Por vegaes ta fechu una llamuerga y n'otres caltiénse la llábana vivo y resbarioso por mor del agua; más d'una vez tuvi a puntu de llevar una gochá. Molestábame too per aquel Atayu de la Cuesta Coru: los artos, la piedra, l'agua, los folleros, la capa, el gorru, la mochila, la cámara y el paragües... Cuando me di cuenta el Canelo nun taba, normal.
- ¡Qué bien tuviere dío pela carretera!....
 |
| Pel <Atayu la Cuesta vas de Coru a Breceña> |
Cuando trato de recomponer la mochila veo que tengo les gafes rotes - ¡otres! - y el paragües nun taba, esmuciere pel camín
- Pos ¡bye, bye, campeón! que yo la vuelta nun doi y la torna voi facela pela carretera...
 |
| Entrando en Breceña, pel Barriu d'El Cuetu |
Xubimos pali-pali siguiendo cola mirada la torre de la ilesia entamilgada no cimero del pueblu. Sabemos qu'ellí ta'l Bar y ye la hora de tomar el vermú. ¿Nun ye hora d'un culete Sidra Coru?...
Amás ye sábadu de Pascua, ¡qué carayu!.
Y equí finamos la primer estaya: Santurio - Breceña. Llevamos unos 27 km oficiales que tenemos fecho en ¿cuatro? xornaes. Lo normal sedría parar a dormir equí talo otros andariegos pero... ¡La Casona peslló!
ANEXU (I): < San Xuan d'Amandi>
 |
| Abducíos pola "Puerta'l Cielu" nun mos queda otra qu'entrar nesta nave espacial. ¿Vienes con nós? |
La ilesia de San Xuan d'Amandi, embaxo l'advocación de San Xuan Bautista, ye un santuariu católicu, faltaría, asitiáu nel caseríu d'Algara, na parroquia maliaya d'Amandi (Villaviciosa). Esta ilesina rural ye un finxu del románicu asturianu, la nuesa capiella sistina, camienten fontes bien informaes...
San Xuan ye un templu románicu tardíu (primer cuartu del XIII) con delles incrustaciones gótiques. Claro que.... Hai nicios que yá pudiere esistir a finales del X (990) por una inscripción grabada nuna llábana funeraria. Y por si fuere poco'l Padre Carbayu (XVII) tien rexistráu a San Xuan de Malayo como conventu benitu (beneditín) en tiempos d'Ordoño II (850-865). Ye fácile pensar que, tres la invasión árabe (711), munchos cristianos abellugaren n'Asturies y bien pudieron repoblar la Villa y el so entornu onde fabricaren el conventu; dende lluéu'l cuetu nun pue ser más afayaizu: eleváu, soleyeru y con terrenos bien granibles al rodiu la Ría; pa quedar. ¿Y si'l solanu procedía d'un cultu más antiguu?.... En Moriyón había un castru.... Bueno, en 1270 yá esistía dafechu esta ilesia al ser nomada na Carta Puebla de Maliayo.
 |
| <La Puerta'l Cielu> |
La sóleda planta < ye una nave paralelograma de 51 pies de llonxitú por 25 1/2 de lalitú y 35 p. d'altor hasta la bóveda > (14,178 m x 6.95 m x 9,63 m) que remata nun ábside semicircular cubiertu con bóveda de fornu.
La rica cabecera y la cenciella nave comuniquen per aciu d'un arcu toral de triple arquivolta de mediu puntu que sofita sobro columnes dobles de fuste llargu y capiteles decoraos. La cenciella nave contrasta cola artística arquería de la cabecera, sofitada sobre dos fileres de columnes coronaes por capiteles historiaos, lo más in del románicu astur.
La entrada principal, que da al oeste, ye una portada abocinada con cuatro arquivoltes oxivales (goticismu) y concéntriques, tres d'elles sofitaes en columnes redondes y la cuarta, decorada en ziszás xeométricos, sobro dambes xambes. Entrar per ella ye como entrar pela Puerta del cielu. La portada sur, con arquivoltes de mediu puntu, ye más cenciella.
Sí, desque acolumbres la ilesia de la carretera xeneral hasta que llegues al ábside tou te va dir invitando a la cata'l puntu de fuga de la perspeutiva: l'ara. L'amplia avenida empiedrada va estrechando hasta algamar n'arredondiada escalinata del adríu que tamién s'aboquiella. Entós ye cuando quedes delantre la portada que t'abduz, abocinada y misteriosa, al traviés de sos arcos y columnes al interior del templu.
 |
| Los anxelinos analayando pela <La cabecera del cielu>. Una estampa celestial embaxo l'arcu toral. ¡Una entrada trunfal! |
[Amás güei tamos de suerte. Al entrar un garapiellu rapacinos tán tomando la Primera Comunión. Nun ficieren qu'aselar les lletaníes del cérigu cuando una procesión d'anxelinos apruz pela cabecera'l cielu al tiempu que'l coru y los parroquianos entamen un melgueru cantar. Una algarabía celestial percorre'l presbiteriu y la nave mientres les campanes tañen con fuercia l'aleluya. Al aportar la comitiva al adriu la multitú ruempe l'encantu con un aplausu estreldosu. Esto sí que ye una entrada trunfal]
 |
| <Cabeces de picu> na segunda arquivolta. |
 |
| <Capiteles historiaos> Escuela del Pueblu. (Semeya: Arteguías) |
Y como del cielu se trata podemos atalantalu per unes estrenches saeteres -como non, abocinaes - qu'illuminen esti requexu del firmamentu.
Seique la carauterística más bultable d'esti edificiu ye la so decoración pedresa: nes portaes, nos capiteles, nos canecinos o nel arcu de trunfu con representaciones sagraes o profanes, bien vexetales o en zis-zás, antropomorfes o zoomorfes. D'estes últimes destaquen unes "cabeces de picu" -paxarones perraros de picu llargu que paecen morder les arquivoltes de la portada - que namás se dan nel románicu inglés, na Normandía bretona y n'Asturies. Asemeyen enforma a los mascarones de proba de les naves wikingues; igual lo copiamos d'ellos darréu se tresformaren en candes mercaderes. Sía como fuere la decoración de San Xuan d'Amandi ye una fiesta: mozos puxando al "baltu", guerreros peleando a caballu, escenes de caza, moces tocando el panderu ya otros instrumentos musicales... Namás-yos falta vender papeletes pa la xata.
 |
| La Rectoral frente al Adriu. |
Nun podía faltar el típicu reló de sol mirando al sur. El tiempu ye daqué importante, inclusive n'otres dómines. Frente l'imafronte la ilesia una casina corredor bien cucia sembla ser la Casa rectoral; tán bien curiaos los cancerberos del cielu.
Magar que San Xuan d'Amandi tuviere un poco clisada pol cercanu Conventín los maliayos fueron siempres mui conscientes de lo que teníen: una ayalga única del románicu. Poro nel s. XVIII cuando se decataren que la cabecera "la puerta del cielu" taba en peligru d'esbarrumbe punxéronse manes a la obra y, tres desmontala dafechu, tornaron a reconstruyila "piedra a pìedra". Cuando la Guerra Civil tamién fue dañada enforma (prendiéron-y fuéu), menos mal qu'andaba per ellí l'Arquiteutu del cielu na tierra: l'incombustible Menéndez Pidal.
Si depués de too nun tas convencíu camienta na posibilidá de facer el Camín de Cuadonga.... Namás la Santina podría iguar lo tuyo.
ANEXU II : << La Carta Puebla de Maliayo >>
 |
| Don Alfonso y Doña Violante naguando por roblar la <Carta Puebla de Maliayu> |
Esta concesión real venía precedida d'incuntables querelles puestes polos maliayeses escontra caballeros, escuderos y dellos malfechores de la redolada que nun facíen otro que robar y violentar a los vecinos del llugar. Al endefechu les rivalidaes ente les families dominantes - Balbín, Busto, Pidal, Pión, Hevia, Quexal o Valdés - fueren sin dulda determinante a la hora la concesión del fueru. Maliayu precisaba de <paz y xusticia> y el Rei perres.
 |
| Con esti sellu robló Alfonso X la <Carta Puebla Maliayo> (A ver quien chista, patriciu) |
Si daquién franciere estos privilexos tendriá que pagar al Rei 58 maravedinos y a los pobladores afeutaos el doble de lo dañao.
Ta claro que les villes y cartes puebla xurden por una necesidá de xusticia real escontra los abusos de la nobleza (de pasu'l Rei sacaba unes perres mui guapes que tampoco-y veníen mal pa sacar cabeza énte los pares). Qué coses, el Rei tien qu'apoyase en pueblu y el pueblu nel Rei pa defendese énte los abusones.
La Villa de Maliayu, qu'algamó a la tercera d'Asturies tres Uviéu y Xixón, nun vivía aisllada seique taba integrada no que ye l'Arcu Atlánticu (Gales, Francia o Portugal). ¿Son les "cabeces de picu" de les ilesies romániques - S.X. Amandi, Aramil, Arbás, Llugás, Ciañu, S.V. Barquera - una prueba d'ello?.
Maliayu pasó a nomase Villaviciosa, a tolos niveles, en 1430 <polo granible d'estes tierres>.
[[ Alfonso X, el Sabiu {1221(1252-1284} foi un grandísimu Rei. Fíu de Fernando III, el Santu, gobernó Castiella (Castiella, LLión, Galicia , Asturies...) destacando tanto nes llabores de Reconquista y solución de problemes internos como nes artes y les lletres. Nun podía ser d'otra manera colos antecedentes familiares que tenía...
So güelu, Alfonso IX el "Ciudadanu, foi'l un gran defensor de los derechos del pueblu trabayador siendo'l primeru que convocó Cortes en Lleón (1188) a la qu'asistieron representantes de les ciudaes importantes del reinu, talo qu'Uviéu. Magar s'esmuciere la <Batalla les Naves de Tolosa>, por tar a la tema col Papa y el rei de Castiella, tevo afán reconquistador xunciendo a lo suyo casi toa Estremadura. Entrín y non col so primu, el tocayu Alfonso VIII de Castiella, que-y arrampló con dellos castiellos y alfoces (ún en Siero) terminó casando cola so fía Berenguela (que refugare al fíu de Barbarroh.a) de la que biltaría'l gran Fernando III, el Santu.
El Santu, qu'algamó a rei tres abegosos trapicheos de so madre Berenguela cola primera muyer se so padre, foi'l primer Rei dafechu (Alfonso VII yá lo fuere) de Castiella-LLeón por ser fíu de Berenguela de Castiella y Alfonso IX de LLeón. Gran conquistador tomó: Xaén, Córdoba, Sevilla, Mula y Cartaxena amás del Señoríu de Murcia, onde tuvo de práutiques Fonsín, el futuru rei Sabiu.
Y como lo que se pretende ye encumar al facedor de la <Carta Puebla Maliayu> diremos que tamién xugó a la reconquista tomando Xerez y Cádiz amás de poner firmes a los mudéxares revolvinos de Murcia y Valle del Guadalquivir (Sevilla). Seique más esmolecíu por cantigues y traducciones vióse sorprendíu a última hora por problemes sucesorios teniendo qu'enfrentar al so fíu Sancho. ¡Qué final pa un pá!
En asuntos internos hai que considedralu l'iniciador del Estáu Modernu -que remataríen los Reis Católicos - que fizo de Castiella la primer potencia peninsular. Creó l'Honráu Conceyu de les Mestes que xuncía tolos pastores - ¿gremiu? - del nuevu reinu a los que concede ventayes a embute.
Intentó'l Sabiu unificar y actualizar los estremaos fueros del reinu que culminaríen nel <Códigu les Siete Partíes> onde se llexislaba sobre cualisquier actividá xudicial (penal o procesal), familiar o mercantil yá fuere'l tema políticu, civil, militar o relixosu, que too lo quería tener atao esti estadista. Muncha xente tenía de tar agradecío a esti home pola bayura puestos de trabayu que creó.
Pero lo que güei nos trai equí ye la so faceta repobladora. Cola fin de facer xusticia, reconociendo los drechos de los <ciudadanos> énte los nobles y clérigos, y al endefechu facer recaudación a la fin de mantener <l'aparatu del Estáu> y financiar les guerres, de reconquista o internes, Alfonso reconoció per tou'l reinu bayura de <Cartes Puebla>, como: Aguilar de Campoo, Tinéu, Ciudá Real, Ortigueira, Tolosa, Ordicia Treviño y como non, Maliayu.
Too nun fueron roses pa esti rei intelixente, trabayador y modernu. La rebelión de los nobles (¡pero quién se creyen estos plebeyos que son!), el fracasu la toma d'Alxecires, les invasiones benimerines y sobre manera la muerte del so fíu heriede: Fernando de la Cerda. Pero la vida ye así, <remar, remar y morrer a la oriella>.]]
ESTIMANCES:
. A Xurde Morán y l'Asociación Cultural "El Garrapiellu", los nuesos guíes nesti camín aniciáticu asina como a la bayura de vecinos que comparten con nós.La Villa de Maliayu, qu'algamó a la tercera d'Asturies tres Uviéu y Xixón, nun vivía aisllada seique taba integrada no que ye l'Arcu Atlánticu (Gales, Francia o Portugal). ¿Son les "cabeces de picu" de les ilesies romániques - S.X. Amandi, Aramil, Arbás, Llugás, Ciañu, S.V. Barquera - una prueba d'ello?.
Maliayu pasó a nomase Villaviciosa, a tolos niveles, en 1430 <polo granible d'estes tierres>.
 |
| Armes de Castiella y LLeón: ¡Por fin xuntos! |
So güelu, Alfonso IX el "Ciudadanu, foi'l un gran defensor de los derechos del pueblu trabayador siendo'l primeru que convocó Cortes en Lleón (1188) a la qu'asistieron representantes de les ciudaes importantes del reinu, talo qu'Uviéu. Magar s'esmuciere la <Batalla les Naves de Tolosa>, por tar a la tema col Papa y el rei de Castiella, tevo afán reconquistador xunciendo a lo suyo casi toa Estremadura. Entrín y non col so primu, el tocayu Alfonso VIII de Castiella, que-y arrampló con dellos castiellos y alfoces (ún en Siero) terminó casando cola so fía Berenguela (que refugare al fíu de Barbarroh.a) de la que biltaría'l gran Fernando III, el Santu.
 |
| Xente de Maliayu suplicando al Rei Sabiu unos fueros, yá nun aguanten más. |
Y como lo que se pretende ye encumar al facedor de la <Carta Puebla Maliayu> diremos que tamién xugó a la reconquista tomando Xerez y Cádiz amás de poner firmes a los mudéxares revolvinos de Murcia y Valle del Guadalquivir (Sevilla). Seique más esmolecíu por cantigues y traducciones vióse sorprendíu a última hora por problemes sucesorios teniendo qu'enfrentar al so fíu Sancho. ¡Qué final pa un pá!
 |
| El Santu pá del Sabiu. |
En asuntos internos hai que considedralu l'iniciador del Estáu Modernu -que remataríen los Reis Católicos - que fizo de Castiella la primer potencia peninsular. Creó l'Honráu Conceyu de les Mestes que xuncía tolos pastores - ¿gremiu? - del nuevu reinu a los que concede ventayes a embute.
Intentó'l Sabiu unificar y actualizar los estremaos fueros del reinu que culminaríen nel <Códigu les Siete Partíes> onde se llexislaba sobre cualisquier actividá xudicial (penal o procesal), familiar o mercantil yá fuere'l tema políticu, civil, militar o relixosu, que too lo quería tener atao esti estadista. Muncha xente tenía de tar agradecío a esti home pola bayura puestos de trabayu que creó.
 |
| La xusticia impresa. |
Too nun fueron roses pa esti rei intelixente, trabayador y modernu. La rebelión de los nobles (¡pero quién se creyen estos plebeyos que son!), el fracasu la toma d'Alxecires, les invasiones benimerines y sobre manera la muerte del so fíu heriede: Fernando de la Cerda. Pero la vida ye así, <remar, remar y morrer a la oriella>.]]
ESTIMANCES:
. A Arsenio, l'autor del dibuxu teloneru d'esti post:"San Juan de Amandi". (Un atracu a conciencia y con placer).
. Blog's : <byronjrt.blogspot.com.es>, Cuéntanos la sienda d'Amandi.(Tengo facela, chaval, siguiendo les tos indicaciones).
 |
| Canecín, en S.Salvador de H.uentes |
. María Muñoz de Miguel :<Cabezas de pico románicas en Asturias e Inglaterrra>
. <asturnatura>, como siempres: "El románicu de S.Xuan d'Amandi". Tamién <arteguías.com>, por supuesto. <www.minube.com>. <otraiberia.es>. <fundacióncardín.es//bibliotecamaliaya>.
. MADOZ y Diccionarios llingua asturiana son fonte onde abebentamos a ca pasu.
. "La Edad Media Maliaya sale a la luz", artículu d'El Comerciu (15.12.15) del profesor A. S.Fernández-Sordo, robláu por Lidia IS.
No hay comentarios:
Publicar un comentario