 | |
| << Nun te va ser fácil, amigu, sacame de Picu Castiellu; dellos antepasos míos morararen nel castru vieyu. Enantes prefiero, Imperator, ser cabeza de ratón y Potestas per Asturies, qu'andar a la cola en Lleón tres de les tos pantasíes >> |
Ente salida y visita lleímos el "POTESTAS"- Xulio Arbesú- y tenémonos perdío per dellos blogs, a cada cual más prestosu... Yá toca.. ¡Vamos pa Picu Castiellu!
 |
| << Entamilgáu nuna llomba s'alcuentra Picu Castiellu; suaños de llibertá dende los llonxanos tiempos. Quiero averame hasta ellí pa entender los mios ancestros >> |
- Alcuérdate qu'Olloniegu, onde s'asitia Picu Castiellu, ye casi pasu obligáu pa colate na Meseta. Y la Ponte sobro'l Nalón ye'l llugar más afayaizu pa facelo.
- Pero lo mesmo que se va, viense....
- Efeutivamente, los invasores tamién se colaben per ehí. Los romanos, que nun-yos prestaba cruciar la cordillera pelos valles onde los exércitos se faen más vulnerables, veníen pela ruta La Carisa atravesando los cumales dende Busdongo hasta Uxu. Pero p'averate a Uviéu - la capital del reinu - o al Puertu de Xixón habíen cruciar Olloniegu. Lo mesmo pasare colos árabes; pela Carisa o Payares aportaben a Olloniegu.
- Val, ¿pero en que-y afeuta esto a Picu Castiellu?
- Eso contéstase solo averándose hasta'l Picu. Yá lo verás.
- Pos venga, quiero velo.
 |
| Mapa xeográficu de la zona'l Picu Castiellu (Fonte: Mi Geoblog: Geología y algo más) |
<< Santurio - Vega (Camocha) - Granda - Mareo - Minera, nos Güertos del Ociu - Salida camín d'Olloniegu na rotonda de Valnalón (AS-116) - Garapiellu Históricu de la Villa - Carretera de Mieres pel Padrún - Enseguidina desvíu a manzorga > La Mortera > Camín asfaltáu a La Fócara (Aparcamientu) - Andando a Picu Castiellu >>.
Fais una caminata perguapa si aparques na Mortera y xubes caleyandando al Picu.
 |
| La Mortera. "Echa pata, toma tierra, ponte a andar... Vas pasalo de primera". |
 | |
| << Dende la Fócara güeyes Picu Berrubia hacia'l este onde los ancestros tán esperando que los miente >> |
Pero nós nun andamos apuraos, tenémoslo acutáo en Casa Cristina (igual él tamién...) . Y énte nós una mañana soleyera pa güeyar a tutiplén. ¿Armamentu?... Una Canon corrientina y munches ganes de ver paisax y remenbrar la historia...
 |
| "Munchos pinchos va alcontrar el Rei Lleón per Tudela: - Andái sollerte, Alfonso, qu'allarribones ta Sienra. Dende La Fócara ve siente'l pesu de l'aldea : - Tenéi cuidáu, rei Alfonso, vais camín de la Mortera; si ansiáis ser Emperador yo que vos daba la vuelta: - Faites attention, rei Alfonso, morrer nun paga la pena". |
- Tengo un poco casería... Uviéu a tiru piedra. Mirái, ta p'ellí, al norte. Al sur, Mieres, a menos de venti minutos. ¿D'ónde venís vosotros?
- De Xixón.
- ¿Qué tardasteis, media hora? . Vendríeis pela Minera; asina que yá vos decatasteis, a Llangréu un cuartu d'hora. ¿Creyéis que pueo cambiar esti paisax, esta vida - la güertina - pol trasiegu la ciudá ? Voi de xemes en cuando, y asina préstame más a la vuelta. ¡H.a, h.a!
 |
| <<Al xubir de La Mortera al pasar pela Focara escaecióseme'l tiempu camentando en doña Sancha. ¡Quel dommage , nun soi Gonzalo! Mas siento gayola tala qu'esnalar camín d'un Picu nunca foi cosa tan guapa". |
 |
| << Ocho sieglos nel Castielu lleva esperando esti probe que s'amuese doña Sancha, que repiquen los tambores. Namás sentir un respingu yá se pon sollerte l'home Ye que nun hai burru qu'aguante tan grande ausencia d'amores. Envolubráu nel felechu t'arrecendiendo a pasiones. Sobro'l tapiz del Pteridium s'esanicien los rancores >> |
El felechu - los nuesos plumeros de la Pampa - xurde d'unos rizomes marrones soterraños que dan delles flondes coriaceos de hasta dos metros ( o más) d'altor coles pinnes y pínnules casi opuestes que tienen la facha glabra (llisa) y l'envés tomentosu (con pelusina).
 |
| Les partes del Felechu |
El felechu reproduzse por espores - qu'esparde'l vientu- almacenaes nunos esporangios que s'aconceyen en soros apeguñaos nel envés de les flondes. Esporia ente los meses de Xunu a Ochobre.
Ye una planta mui duradera. Alcontráronse colonies con una antigüedá de 1500 años.
(¡Toma! Los felechos que nos arrodien son los mesmos qu'acariñaron a Sancha y a Gonzalo)
Nun ye d'estrañar, el ganao nun los come porque son capaces de sintetizar delles sustancies canceríxenes, fatales pal organismu. Seique lo tomen daqué vez pa curar enfermedaes o espulsar les llombrices, al ser vermífugues. Tamién ye bon hipotensor (si te descuides báxate a la pedrona). El fueu ye como abonu pa elli; al quemar retoña con más fuercia. Yo, por si acasu, nun pienso facer ferviatos con ello.
Mio güelu segábalo pa estrar les vaques y darréu facía cuchu con ello.
Na industria emplégase pa obtener colorantes o llograr potasa cáustica (KOH) que s'utiliza pa facer xabón y la potasa (CO3K2) cola que obtener fertilizantes convirtiéndolo en (SO4K2), sulfuru de potasiu*.
 |
| "Sobro'l tapiz del pteridium s'esanicien los rancores" |
* Los fertilizantes contienen principalmente estos tres elementos: NPK
Nitróxenu (N) : Pa qu'espoxigue la planta.
Fósforu (P): P'ameyorar la resistencia de la mesma.
Potasiu (K): P'ameyorar el rendimientu, la calidá del frutu y la resistencia al estrés (enfermedaes y sequía). La potasa amenorga la trespiración de les plantes polo que precisen menor cantidá d'agua y aguanten meyor la sequía (Yá vos espero pal añu entrante, kiwis).
- ¡Miániques! Mira qu'acabo de ver... El burrín de Doña Sancha...
- Anda, calla. Paezme que'l burru yes tu...
- Y nun ta solu, tien pareya... Ye normal. Nun ye quien escaecer que, dellos años atrás, la so ama tevo equí mesmo un alcuentru amorosu, cuenten les males llingües...
 |
| ¿Los espíritus de Dª Sancha y D. Gonzalo pastiando nel fosu enllaráu ? << - Taivos quietos, don Gonzalo, que podéis romper la tregua. - Yo nun pienso n'otra cosa que nel amor, por Tudela. - Pos yo vini en son de paz y vos nun queréis que velea. - ¡Válgame Dios, doña Sancha, tracamundiáisme la idea; si pensáis eso de mio por min siga la contienda. -¿Seique pa ti val too nel amore y la guerra? >> .......................................................... |
- De Sancha Raimúndez, la hermana l' Emperador.
- ¿La hermana de Alfonso VII, el rei de Galicia?
- La mesma; la fía de Doña Urraca I, reina de Lleón, de Castiella y de Galicia.
- Entós tamién de Portugal.
- Efeutivamente; tamién de Portugal pero... Perdayuri andaben llevantiscos. La so medio tía Teresa, casada con Enrique Raimúndez, gobernaba el Condáu de Portugal como si fuere de so. Yá nun s'alcordaba del regalu que-y ficiere so padre, Alfonso VI. Y algamó lo que buscaba, pero yá col so fíu (col que tevo enfocicada) Alfonso Enríquez, que llogró la independencia de Portugal en cuenta de pasar por vasayu del primu, l'Emperador Alfonso VII.
 |
| Fortaleza d'Alfonso I Enríquez, primer Rei de Portugal. (Fonte: "Domno" J.M.Marinas) |
Al algamar a la picalina la llomba, onde taba entamilgáu'l castiellu, y sacar esta semeya que vien darréu viénome de sópitu a la cabeza esti sonetu de Xerardo Diego, foi talo qu'un rayu (Vamos caltenela na so llingua orixinal, porque cuando una cosa ta tan bien fecha, al aplica-y la torna tienes mieu mancala, pero intentarémoslo.... ¿El meyor sonetu escritu en llingua castellana?... ¿Y l'autorretratu de Machado?).
 |
| << Mudu fervor nel Castiellu'l Picu >> |
__EL CIPRÉS DE SILOS___
(Xerardo Diego)
<< Enhiesto surtidor de sombra y sueño
que acongojas el cielo con tu lanza
chorro que a las estrellas casi alcanza
devanado a si mismo en loco empeño.
Mástil de soledad, prodigio isleño;
flecha de fe, saeta de esperanza.
Hoy llego a ti, riberas del Arlanza
peregrina al azar, mi alma sin dueño.
Cuando te vi, señero, dulce, firme,
qué ansiedades sentí de diluirme
y ascender como tú, vuelto cristales,
como tú, negra torre de árduos filos,
ejemplo de delirios verticales
mudo ciprés en el fervor de Silos.
Si cambiamos "riberas del Arlanza" por turruxón " en frente Picu Llanza" y finamos con "mudu Castiellu nel fervor del Picu", por aciu la llocalizacón, podemos caltenelu como ta. ¿O non?
- Oi, ¿y cómo fue esi alcuentru amorosu que t'acabes d'inventar?
- Yo lleílo nuna historia pa Gonzalo Pélaiz, POTESTAS; y tamién nun cómic: "Domno, la vida de Gonzalo Peláez" de J.A. Marinas.
- Lliteratura, y tu sábeslo... Anda sigui.
- Corría l'añu 1133. Yá Potestas y Rei anduvieren a la tema l'añu anterior. Xusto ser nomáu Alférez Real acúsenlu n'Atienza de llevantar contra'l Rei. Abellúgase Gonzalo nel castiellu d'esti Picu de Tudela y ye'l mesmu Rei quien vien en persona p'achaplalu. Dende qu'entra n'Asturies nun alcuenrtra qu'hostilidá. Fogueres y más fogueres ponen sobreavisu al rei que nun va ser coser y cantar; que'l pueblu ta col Potestas. Difícil xera algamar a un castiellu arrodiáu por viesca trupo y cuatro redondeles defensivos.
 |
| Ortofoto del NOA, per aciu "Mi Geoblog: Geología... El manancial estramuros una ayalga pa los llevantiscos del castiellu. Cuéntase qu'entraben y salíen como Peláiz per so casa. |
- Sí, pero mentanto'l Rei espera la so rendición entretiense per Uviéu con unes y con otres hasta que repara en doña Gontrodo Petri, fía del magnate asturianu Pedro Díaz. Nun tarda en dexala preñada.
- ¡Toma! El Rei va tener un fíu asturianu...
Y esta yera la coplina que se cantaba nos chigres per tou l'alfoz d'Uviéu, de Tudela ya Olloniegu:
Romance de Doña Berenguela___
 |
| Doña Berenguela del Barça |
" Ye sabío que'l Rei Fonso
entá nun tien descendencia
y nun-y prui otra cosa
qu'en da-y a la Berenguela,
pero hai veces que nun ta
¡carai!, por mor de la guerra.
Mientres anda per Uviéu,
pa echa-y el guante a Tudela,
busca consuelu en Gontrodo,
señora galana y fresca,
y nun tarda en algamar
a ser padre d'una neña.
Van nomala Doña Urraca,
 |
| Alfonso VII Raimúndez |
talo que so mesma güela,
pos yá se-y ve nes maneres
qu'algún día sedrá Reina;
ansí que la de Tinéu
bien ceo quedó ensin ella.
Va criala Doña Sancha,
seique-y pese a Berenguela.
Nun-y cayó embaxo a la esposa
que-y sentó talo una espuela:
- <Si pu esta da-y un guah.e
más podrá da-y una reina.
Va saber el rei Alfonso
lo que ye fería fema>.
Oi, tu, y cumpliólo,
la catalana foi güela.
Ente medies cai'l Castiellu Gauzón en manes del Rei Alfonso y Gonzalo vese obligáu a un apañu: Un añu de tregua y queda con too lo que tien sacante Picu Castiellu, que se caltendrá baleru. Salvó los muebles Gonzalo por mor d'una campana almorávide.Ye nesti tiempu interín cuando Sancha y Gonzalo tienen un alcuentru en territoriu neutral. Ella quier desplicaciones y elli t'arranáu por da-yles. Y ellí, nel patiu'l castiellu, pembaxo la torre fita, l'amor asela otres pasiones y dase un homenax ...
__ Romance de la robla___
 |
| Asediu a un castiellu medieval |
tres los pasos del Potestas
cuando pola mor del moru
tevo que cambiar de guerra;
que dos frentes son abondo,
meyor firmar una espera.
Salvó Gonzalo los muebles
pero quedó ensin Tudela.
Namás faltaba la firma
pa que finare la guerra.
Doña Sancha y don Gonzalo
van signar a toa priesa
¿Qué meyor sellu ante Dios
que l'amor d'una Princesa?
Les armes pueden parar
pero l'amor nun tien tregua.
Y allá nel fosu enllaráu
la robla sigue revuelta...>>
..................................................
 |
| Buenos vasallos tenía Gonzalo que por afumiar al Rei dexó tal foguera encesa qu'entá nun somos apagala. Al Norte Uviéu, pel camín de La Manzaneda, darréu pagar el Pontazgu. |
- Yo nun veo dengún fumu; nin tan siquier la Térmica de Sotorribera....
- ¿ Ah, non? ¿Entós qué ves, chachu? ¿Tan fumando la pipa de la paz Gonzalo y Alfonso?
- Non, entá non. Tovía tienen les espades tieses... El fumu ye de les fogueres que prendieron los partidarios de Gonzalo pa mete-y mieu al Rei. Fogueres per Olloniegu, fogueres per Picu Llanza, fogueres per El Padrún, fogueres y más fogueres qu'hasta na Carisa vieres... Pa que s'entere'l gallegu (Caldas de Reis) que ta en territoriu comanche .... Qu'Asturies ye d'él... Que torne pa Lleón; qu'amás tien Castiella. Y si-y paez poco que s'empobine pa Aragón, qu'ellí tien drechos por padre.
- Pos va oyite, yá verás si se planta en Zaragoza... Como s'entere qu'hai maña guapa...
 |
| << Don Alfonso, mui ufanu, quixo tomar el castiellu; al poco tiempu coló dexando'l paquete a Sueru >> (Semeya "Domno": J.A.Marinas) |
- Pos equí tieneslo fácil. La vista ye escomanada.Tamos a 431 m/snm.
- ¿Ye verdá que'l castiellu ta entamilgáu enriba un castru celta?
- Eso se camienta, pero seguro nun ye porque nun se tienen fecho les escavaciones afayadices.Ye fácil de suponer, teniendo en cuenta la so situación privilexiada, qu'esta llomba tevo habitada dende antiguo. Tien tola pinta d'un castru y tu yá sabes que los romanos solíen reutilizar estes construcciones tan estratéxiques. L'argamasa emplegada na so construcción tien tola pinta romana. Y hai más, nes poques escavaciones que se fixeren tienen alcontrao una pica romana y un brazal claveteáu. Y de la dómina medieval apaecieron una foceta (¿"La foceta d'oru" d'Asterix?), un colgante y puntes de dardos. Atopárense tamién restos cerámicos, tégules ya molinos de mano.
 |
| Colgante atopáu en Picu Castiellu (Fonte: Asturtsalia) |
- Qué bien vendría una escavación fondera, eh?
- Yá te digo....Lo que se sacó foi namás pa poder catalogalu.
- ¿ De cuándo se tien documentación escrito?
- Bono, no que cinca a esa zona sábese que nel 827 hai una renovación por parte del presbíteru Pelayo a la ilesia de San Xuan Bautista (Olloniegu); tamos falando del reináu d'Alfonso II, el Castu.
- ¿ Pero la data aproximada de la fundación?
- Tiense por ciertu l'añu 854, reináu d'Ordoño I (850-866). Ta documentao, escrito, que l'añu de 857 esti rei dona a San Salvador d'Uviéu delles villes e ilesies, entre otres les de San Xuan Bautista y Santiago, dambes baxo'l control del Castiellu Tudela. Yá nel 893 Alfonso III, el Magnu (866-910), dóna-y a San Martín d'Astorga el fuerte de L'Armatía *, onde èl mesmu residiere algún tiempu, eso sí, darréu igualu bien guapu:
<<Nel nome de Dios Alfonso morando nel Castiellu de Tudela y residiendo nel tronu de la sede d'Uviéu...>>
* La Virxe de l'Armatilla ye la patrona d'Olloniegu. Tien una ilesia baxo la so advocación entamilgada nuna llomba mui soleyera y vistosa, xusto enriba l'actual pueblu. Igual esti cuetu foi l'aniciu del pueblu.
 |
| Ferregüeyando valles y montes dende'l Picu Castiellu. ¿Quién se colaba equí?: Olloniegu y el Padrún a manzorga; a mandrecha pa Llangréu y pela Manzaneda a Uviéu . Pel valle de Vegalencia vamos a Sotorribera y bendiciéndolo too la Virxe de L'Armatilla nel centru la semeya. |
- Alfonso III el Magnu foi'l caberu rei d'Asturies. ¿Qué pasó depués col Castiellu Tudela?
- Al pasar la corte a Lleón foi perdiendo importancia defensiva. La nobleza astur quedó con tierra y faciendes... Alfoces y merindaes yeren propidá d'unos pocos que los gobernaben casi como reis. A lo primero del XII podríemos dicir qu'Asturies taba dividida en tres partes :
La oriental, Asturias de Santillana, taba controlada polos Lara que llevaben tamién la L.liébana y Tierra de Campos.
. La occidental - ente La Cabruñana y el Eo - pol señor de Salas, Cornellana, Tinéu y Cangues del Narcea. Suero Bermúdiz pastoriaba tamién Astorga, L.luna, L.laciana, Gordón y Babia asina como parte del Bierzu.
.Y les Asturies Centrales pol Potestas d'Uviéu don Gonzalo Peláiz. Contraba, dende'l Castiellu Tudela, el camín de la Meseta y los valles del Nalón, Trubia, Caudal y L.lena. Amás yera l'amu los castiellos de Proaza, Guanga, Alesga y Picu L'Alba en Quirós. Les salines de Castrillón, al par d'El Castiellu Gauzón (mandáu construyir por Alfonso III por aciu les invasiones normandes) taben baxo la so influyencia.
 |
| Les Asturies Centrales a primeros del XII. (¿Préstate'l mapín d'Alberto A. Peña? Tienlu fecho pal "Potestas") |
- Sí, esti noble astur escaló posiciones cola reina Doña Urraca. Foi'l Potesatas d'Uviéu; conde, dominante, delegáu rexu, "caput terra".... Y yá col so fíu Alfonso el "Ducem asturianorum", algamó a Alférez Real (capitán xeneral del exércitu). Xusto nesi momentu foi cuando s'alzó escontra'l Rei. ¡¡¡¿¿Inesplicable??!!!...
- ¿Foi mui gorda l'amarraza?
- Yá lo creo. Cinco años a la tema con un par de perdones pel mediu. De la primera yá faláremos: El de Teverga pierde Gauzón y otres posesiones quedando acorraláu en Picu Castiellu. Salva la ferramienta cuando'l Rei tien que colar por aciu la guerra escontra los almorávides. Nun queda mal del too pos recupera lo perdío sacante'l Castillu Tudela que ha quedar ermu.
Pero namás ye una tregua... Tornar el rei y tornar la engarradiella ye lo mesmo. Dan-y per tolos hastiales y atrinchérase sorpresivamente na torre de Proaza , envede nel castiellu de Guanga. El mesmu Rei quixo participar nesa toma cabera pero recula cuando una flecha- y mata el caballu... Cuenten que foi a posta pa que'l Rei garrara mieu y tuviera a bien perdonar ...
 |
| "Dende la Torre Proaza voló una nidia alvertencia : -<<Proaza ye de Gonzalo el rei debe dar la vuelta>> Repetilo nun fai falta fuxo'l rei como una flecha. (Fonte: "Domno" J.A.M.) |
__ La flecha de Proaza___
(En "Potestas", de Xulió Arbesú, tienes el romance completu)
 |
| Asina lo vio Berto Álvarez Peña pal "Potestas" |
Yá llega quemando aldees
con perabundante tropa
el rei Alfonso Raimúndez
trota con aire a la escontra,
bermeya capa de seda,
caballu con siella mora,
monta tiesu y en silencio
lleva puesta la corona,
a la mandrecha don Suero,
Pedro Alfonso a la manzorga,
y el nuevu obispu d'Uviéu
tamién per detrás asoma.
.............................
Dende la torre Proaza
daquién columbra la estroza.
........................
-<<Arqueros, tai preparaos
van llover fleches de torba>>
.........................
El rei facelo nun osa,
manda l'obispu d'Uviéu
a ver si Gonzalo afloxa.
-<<Que-y digáis a don Alfonso
que d'él ye la culpa toa,
que recule mientras pueda
que nun-ylo digo en broma.>>
.........................
Los sos doce capitanes
avancen ensin demora,
yá tan pasando la llende
cuando sal la flecha sola,
tan certera como un rayu
del arqueru Asur de Ponga.
......................
Marchó camín de Lleón
ensin camudar de ropa,
bermeya capa de seda,
lleva puesta la corona.
Cola'l Rei amedranáu pa Castiella y dexándo les coses en manes de Suero Bermúdiz y el so fieru sobrín Pedro Alfonso. Prepáren-yla muy gorda a Gonzalo que se ve obligáu a ensamar pa Proaza, perdiendo Guanga y Alba de Quirós. Nun perdió la culera porque se metió pel mediu l'Obispu Arias de Lleòn (¡ qué suerte tienes colos obispos, xostrón!). Pierde Asturies, salva'l culu...
Y por si fuere pocu asitia na corte, en Lleón (sedría pa tenelu controláu). Debió de portase perbién y poner cara de santu porque cuando'l rei Alfonso ye coronáu Imperator na catedral de Lleón ellí taba elli con tola frasca. Nun-y duró nin dos meses...
 |
| Semeya histórica: L'Obispu Xelmírez coronando a Alfonso VII como emperador énte la so esposa doña Berenguela de Barcelona y los notables del reinu, talo que Gonzalo Peláiz. (Equí nun faltaba nin dios) |
Vio Gonzalo al Rei tan contentu que s'atreve a pidi-y el Castiellu de L.luna, pa dir faciendo boca. L'imperator, manudu, concéde-ylo, magar qu'un pelín roceanu...
¡Yá ye l'amu!... ¡Al ataque! .. Y la segunda amarraza.... Dexando como la gocha Obispu, hermanes (Sancha y Aldonza) y hasta la mesma Reina Berenguela ( les coses como son: esti tenía mano pa les faldes...) Con L.luna como base pretende tomar Asturies... Queda reducíu a Guanga, a nada... Confisquen-y les posesiones que son repartíes ente fieles, los fieles nobles al Rei. Más nun debió de ser mui gorda, o yá taba avezáu`l misericordiosu Rei, porque foi perdonáu de nuevo y hasta apaez confirmáu nun diploma real. ¡PAZ!.
¿Pa siempre?.. ¡Non!
 |
| ("Domno" J.A.Marinas) |
- <<Yo soi Gonzalo Peláiz
y enxamás me rindiré.
Soi un osu de Teverga
y nun faigo casu al Rei.. >>
En 1137 torna pa Les Asturies y encabrítase otra vez, la ¡tercera! Pero'l sobrín de Suero, Pedro Alfonso, príndalu y tra-ylu cargáu de cadenes. ¡Qué afrenda pa un PrOTESTAS! Pero a la tercera foi la vencida. Yá nun hai más perdones. Alfonso destiérralu a Portugal, allonáu de <<tota terra sua>>, reconociendo de fechu la práutica independencia de Portugal.
¿Cómo pue vivir Gonzalo ensin la so sonadía? Ensin los montes d'Asturies, la borrina, les playes, los corderos a la estaca o los culinos de sidra ..... Muerre de pena, per aciu d'unes fiebres, na tierra vecina ("febre corruptus peregrinus in terra aliena"). Nin de muertu pue aguantalo y pide asilu <<post mortem>> pa ser enterráu n'Uvieu, la capital del so reinu.
 |
| << Don Gonzalo nun fue foi santu pero merez un respetu pol so amor a les Asturies y por lluchar por un sueñu. Bienveníu a casa, bienllegáu a Uviéu. Que t'afayes>> |
- Pue considerase G. Peláiz en primer independentista?
- Igual nun yera eso. Seique quería andar a so aire, ensin depender de les velees d'un rei o una reina con idees centralistes que lu traíen de cotino de la ceca a la meca. El yera feliz equí, ente la so xente, colos sos lleales, colos sos amigos. Por ellos llevantó la espada esti guerreru ensín pendón, ensin causa. Nun lluchó pola cristiandá, nin pol Rei, nin polos drechos feudales... Nin tan siquier por porgüeyu personal, yera desinteresáu.
 |
| << Ye l'Obispu d'Uviéu l'autor del Liber sagráu Testamentorum los fechos. Pa más señes: Don Pelayu >> |
- ¿Entós por qué lluchó?
- Por amistá, esi don más preciáu que'l amor...
- Déxesme ablucada, manín... Yo contaba un guerreru engafentáu, un cabezaleru independentista...
- Pos igual non. Tu yá sabes qu'a los asturianos nun nos presta muncho mandar (¿de xuru?)... Y menos que nos manden...
- Sí, d'esto yá doi fe... ¿ Y a ti quién te dixo esto?
- Un señor perimportante n'aquella dómina. Namás y nada menos que l'Obispu Pelayu, que lo foi de la diócesis d'Uviéu.
- Suéname esi puntu... Nun ye'l qu'escribiere'l Liber Testamentorum?
- El mesmu que viste y calza. Perafamáu poles semeyes que caltién. Ficieren escuela.
- ¿Les semeyes?
- Sí, ehí te dexo una: La "P" de Pelayu.
- Y la "P" de Potestas.
- ¿De PrOTESTAS ?
- ¡H.a, h.a, h.a!
 | |
| <<Cola Ilesia topasti, compañeru Neto>> |
-Ye la hora de colar. Yá sabes que nos esperen en Casa Cristina.
- Vamos xintar el corderu pol que naguaba Gonzalo. Y de xuru qu'alcontramos semeyes pel camín.
- ¿Quedó baleru'l Çastiellu Tudela darréu l'affaire de Peláez?
- ¡Qué va, ne!. Entá tiró otros dos sieglos...De momento, Alfonso VII céde-ylu a la ilesia, a S.Salvador d'Uviéu.
- En bones manes quedó...
- Sí, "atopemos cola ilesia". Debieron d'abusar un poco los clérigos porque hai conocimientos de les quexes los vecinos d'Olloniegu....
- Dexástime un poco ablucada colo de Gónzalo Peláiz. Tengo entendío que yera un noble sangrín que tenía axorizao tola Asturies Central...
- ¡Eh, quieto parao! Nun convién tracamundiase; que ye fácil d'otra miente. Lo que dices ye bien cierto. Un tal Gonzalo Peláez tevo en xaque a media Asturies pero, ¡qué casualidá!, esti nomábase Gonzalo Peláez de COALLA. Yera natural de Grao y vivió a llombu ente'l XIII y el XIV.
- ¿Yera noble o un currante?
- Bueno, hasta pa NOBLE yera baxu; y más que Coalla: ¡canalla!. Fidalgu ricu, con tierres y castiellu en Villanueva de Grao, aspiraba metese na "jet" pero faltába-y daqué. Adolecía d'escrúpulos y taba dispuesto a enantar el patrimoniu familiar a como diere llugar. Yá entamó de mozacu a emporcase en fechoríes más propies de bandoleros que de xente de porqué.
- Sí, y un crápula. Cuando recibe la herencia yá enseña la orella fortificando'l castiellu familiar. Darréu solicita al cativu Rei Fernando IV - corría l'añu 1295 - la villa de Grao, entós de realengo. ¡Cómo se ponen los moscones, manín!-
- Vese que yá lu conocíen .¡Qué morru! ¿Qué fazañes aportaba?
- El tenelos amargaos de tiempu atrás con robos y fechoríes. Asina que s'empobinen al Rei a roga-y tolo contrario : Siguir baxo l'amparu real.
- ¿Y el rei tragó?
- Tenía bonos conselleros - porque'l rei yera un nenín- que-ylo torgaron.
- ¿Y conformó'l xostrón?
- Con años de tropelíes escontra facienda y persones. Asina llegamos a 1238 cuando arrasa cola villa de Grao matando, violando y robando too lo que pue magar nun s'establez na ciudá pos yera propiedá del rei. Como-y abulta poco fai lo mesmo col Castiellu d'Aguilar, tamién de realengu. Entós ye declaráu proscritu, fuera de la Llei.
- ¿ Y qué se fai al respeutive?
- La situación yera insostenible. Naide taba seguru y les faciendes y mercancíes yeren atacaes de cotino. Sicasí los cabezaleros de les Asturies Centrales, sobremanera d'Uviéu y Grao, aconcéyense conformando un exércitu que lu acorrala nel Castiellu d'Aguilar.
- ¡Por fin!
 |
| <<Qué pena que los moscones nun tuvieren bicicleta pa esmucise d'aquel conde, pa colar de Villanueva>> |
- ¡Qué va!.... ¿Sabes quien vien a salvalu?
- Nun lo acierto acolumbrar.
- ¡El mismísimu Obispu d'Uviéu!... Nun yera'l famosu Pelayu, ¿eh?. Sí, otru lladrón,esti de guante blancu , que tenía esprimíos a los habitantes de la capital.
- Nidio. << L'enemigu del mio enemigu ye'l mio amigu >>
- Asina ye. Y por si fuere poco, y pa tenelu dafechu de la parte de so, regala-y los castiellos de Priorio y Tudela. Llegamos onde nos interesa, a Picu Castiellu.
- ¡Lo que faltaba!. Agora controla les mercancíes de la Meseta...
- Yá te digo. Agora roba la mercancía que va y les perres que vienen.
- Y viciversa, seguro. ¿Entós nun son pa con él?
- Contraten a un tal Suer, Suero del Dado, pos la guerra, naquel añu de 1309, yera xeneralizada en tol centru d'Asturies. L'alleranu controlalu pero tampoco pue con elli dafechu. Años más tarde (1316), el nuevu rei Alfonso XI alvierte al Obispu pa que dexe d'amparar al malfechor.
 |
| << Más finu que les arañes - y hasta que'l mesmu Xelmirez - esti noble magnate asturianu foi l'árbitru la política de la dómina. Respetáu por amigos ya enemigos (¿teníalos), por buenos y malos (¿habíalos?, por nobles y reis... Naide como'l camaleónicu Rodrigo Álvarez de les Asturies pa "nalar y guardar la ropa". |
- Por fin el Rei toma cartes nel asuntu....
- Sí, y ye gracies al importante magnate asturianu, preceutor del Rei, Rodrigo Álvarez de les Asturies qu'esta guerra llega al so fin. Axunta'l so exércitu a les fuercies centrales y sítialu nel Castiellu de Tudela.
- Y terminó na forca...
- Pa nada. Esmucióse-yos y refuxase en Navarra. Eso sí, les sos posesiones queden arrasaes y los sos partidarios pasen a meyor vida.
- Pos mira que-yos costó, ¿eh?. Nun paez que'l poder real tuviere munchu puxu n'Asturies. Nun ye d'estrañar que xurdieren casos de separatismu.
- Yá te digo... Vivíemos apartaos de la mano de Dios. Si coles posesiones reales pasaba esto ¿qué sedría de les feudales?
 |
| Alfonso XI, Trastámara |
- Bueno, ¿pero qué pasó col Castiellu Tudela, esaniciáronlu?
- Non, entá non.Yera un llugar mui estratéxícu y daba perrres. Pero nun va durar muncho.
- Ye qu'esti castiellu diere siempre guerra a esgaya...
- Claro, con unes condiciones poliorcétiques esceicionales yera refuxu afayadizu pal que s'abellugase n'él. Volvió a pasar años más tarde, cuando les guerres de los Trastámara.
- ¿D'esa casa nun yera Sabel la Católica?
- Pos sí. Antepasaos suyos. Rebobinamos... Tres morrer Alfonso XI vien a ser rei'l so fíu llexítimu Pedro I pero súrde-y un competidor. El so hermanascu Enrique, educáu como un principe baxo la tutoría del magnate astur Rodrigo Álvarez de les Asturies, declára-y la guerra. Col gabitu del mercenariu Beltrán de Duglesquin termina dándo-y muerte a Pedro nun combate cuerpu a cuerpu:
<<Nin quito nin pongo rei, námas ayuda al mio Señor>> - dixo'l cínicu Beltrán dándo-y vuelta a la tortiella, cuando'l so protexíu taba a mercé del sanguinariu rei Pedro.
 |
| "Casa de Trastámara" |
- ¿Quedó entós Enrique de rei?
- Sí, foi Enrique II, el primer Trastámara ( tras= más p'allá y Tamaris= el ríu Tambre, en Galicia).
- ¿Foi mui llarga esta dinastía?
- Non, terminó con Xuana la LLoca.
- Entós la más grande, Xabel I de Castiella, yera tamién Trastámara...
- Dende lluéu. Y tamién el so home, Fernando'l Católicu, primu carnal per otra parte.
- Bueno, ¿pero tien algo que ver esta dinastía col desaniciu del Castiellu Tudela?
- Segurísimo, y bien ceo. Bueno,enantes de qu' Enrique II diere un fíu llexítimu (Xuan I ) yá se tuviere estrenao aportando un vástagu estra, el pendencieru Alfonso Enriquez, que nunca nun se conformare con ser el segundón siendo ñacíu'l primeru.
-Asina que dio guerra a esgaya...
- Tola vida. Magar que so padre-y concediere los condaos de Xixón y Noreña más tierres que pertenecieren a Rodrigo Álvarez de les Asturies (per Ribesella, Nava, Villaviciosa, Llaviana y tamíen per Cuideiru, L.l uarca o Pravia). Tamién llevó enforma per Lleón (Sahagún, Valencia de don Xuan, Paredes de Nava (Palencia) y los señoríos de Cabrera y Ribera. Y por si fuere poco tenía'l control de Les Babies, en Lleón, asina como la tierra d'Argüellos.
- Nun taba mancu, non. Tenía como un rei.
- Eso ye lo que pensaba él. Asina andaba d'enchipáu. Pasó tola vida intrigando l'eternu descontentu, deslleal y cobiciosu Alfonso E.
 |
| Esacudu d'Alfonso Enriquez |
- Bueno, y por avanzar un poco que yá me ta entrando la fame...
- Pa altes pretensiones faen falta munches perres asina que se dedicó a primir con impuestos abusivos nes sos señorios ya inclusive nos que nun yeren, polo que'l rei hebo llamá-y l'atención en delles cocasiones. Y hasta-y confiscó los bienes, magar los recuperare col nuevu rei. Por si fuere poco enfrentó direutamente col so hermanascu (Xuan I) pola corona de Portugal a la que dambos teníen pretendiones; claro qu'Alfonso E. yera estra y la so muyer tamién estra del rei portugués....
- Vaya película....
- Una pena que nun haya cineastes que-yos peteza apostar por ello... ¡Tenemos una historia!...Una historia medieval de película.
- ¿ Y cómo acaba la nuestra nel Castiellu Tudela?
- Yá te pues imaxinar... El nuevu rei Xuan I, fartu d'engarradielles col pariente, mandó esaniciar el Castiellu bandera de la insurreción asturiana -onde tamién s'abellugare el Conde-, Picu Castiellu; corría l'añu 1383.
- Oi, y enantes de dir xintar.... Esi Alfonso Enriquez ¿nun ye'l del asidiu la ciudá de Xixón?
- El mesmu, d'aquel incendiu queden los "Fueos" que cellebramos n'Agostu.
 |
| Xixón antiguu. |
- La pena ye que quedamos ensin muralla...
- Nun te pongas señaldosa. Yá te veo mirando los "Fueos" dende la muralla cuando Cimavilla quedaba nuna islla al xubir la marea... ¡Ai, aquel tómbolu!
 |
| << Siempre fino estes histories zarrando daqué portiella, sacante que'l llugar llogre que lu salve de la quema. Ta llegando Navidá y yo fàigome papiella al ver el Portal de Belén fechu una triste llaceria. Va caéseme'l castiellu, el Castiellu de Tudela y la historia va acabar talo qu'un alma en pena. ¿Nun te petez fer compaña? Igual te merez la pena. Díztelo Selmo, un pelegrín que t'aprecia.>> |
_____AGASAYOS____
Talo qu'en cualquier otra salida tenemos que dar les gracies - daquién se nos va olvidar - a tolos blogs que nos ayuden a comprender, a tresnar esta historia.
Dalgunos nun falten nunca:
. "MiGeoblog: Geología y algo más", "Asturtsalia" o el "Blog de Acevedo". Asina como "Asturnatura" que nos sirve de sofitu tanto pa plantes como pa la historia.
Esta vez tamién fisgamos en: "Mirabiliaovetensia" , "Aquerasturias", Elxanulcaborniu" y sobre too "www.corazonleon.bs.com" - un lleonés de pro - que nos metió dafechu na vida de Gonzalo Peláiz per aciu d'Alfonso VII. Tamos al pendiente de mercar el llibru:"Crónica del Emperador Alfonso VII", que nun atopamos - ¡increyible! - en denguna biblioteca d'Asturies ni en llibrería dala. Pero nós vamos facemos con él, porque-ylo debemos a la historia d'Asturies (y a la curiosidá infinita poles nueses coses).
. Esti blog nació con Niria, una rapaza Cenera que vieno al mundu "A la sombra de los abedules", el día que Fulgencio Argüelles dixo adiós a los inxenieros belgas y fexo un viax pola dómina d'Alfonso II, el Castu.
. Enxamás m'escaezo de Neto nin de <<Los nuesos paisanos>>. Esta vegada tuvi l'ayuda de J.A. Marinas que nos dexa na retina - y yo déxote la preba - del cómic: <<Domno>> al rodiu la vida de Gonzalo Peláiz. Sobro la vida del otru Gonzalo Peláez, de Coalla tenemos el llibru: "COALLA el sanguinario", de Fernando Romero.
. Nun pueo escaeceme que lo pasé de viciu lleendo un PDF en "Dialnet" : << El Conde Alfonso>> del profesor Juan Uría Ríu.
. ¿Téngote dicho que paso media vida en Wikipedia?... Hai más sitios, más blogs que lleí, pero a vegaes nun apunto y llueu... Tengo que correxime...
Por cierto, les fabes de riñón y el corderu de "Casa Cristina", en Tellego,..... Bueno, pal que nun-y llegaron foi Gonzalo. Probable que la so debilidá-y viniere d'ehí... Igual tengo yo la farda de qu'Asturies nun seya independiente... ¡Tamos guapos!...
¡ Fasta ceo, collacios! Y felices fiestes.
En cuantes coloque'l <<BELÉN DE CUMES>> cuéntovoslo...
