{Camìn de Cuadonga (3) : Altu la Cruz - San Xuan d'Amandi}
<{Per tierres del Rei Alfonso, el Magnu}>
 | |
| < Por qué dir a Cuadonga? Porque ellí ta l'escomienzu. ¿Algamaré seique na Cova solución al fin caberu? |
< Quiero ver a la Santina,
quiero averame hasta 'l cielu
porque en Cova Dominica
prendió daqué día un sueñu.
Entamola un tal Pelayo
y entá dura aquel formientu
de la España bien xunida
de pueblos que nos queremos
magar delles diferencies,
caxigalines de neños.
¿Por qué nun podemos, xuntos,
caltener aquel inventu?
Voi pidi-y a la Santina
que nos igüe esti enguedellu.
Cataluña,
¿y si te xunces al cuentu?
Nun vais alcontrar nel mundiu
otru pueblu ansí de prestu.
Piénsalo bien, Cataluña,
¿sedrá posible un arreglu?
Pensémoslo per Hispania,
faigamos toos esti esfuerciu.
Voi pidí-y a la Santina
que nun quede too n'embelecu>
******************************
 |
| Pel Camín Real degolamos el valle de Pión. |
< Salimos el otru día
de la parroquia Santurio.
Tres pasar per El Curbiellu
llegamos a ca Pepito
y del Barriu Casamoria
hasta'l pinal ascendimos.
Agora vamos p'Amandi
del Románicu un finxu.
Va ser perguapa la ruta
per praderes, con castiyos,
y nel adriu San Vicente
a los llugones pidimos
que Tabalieno nos guíe
per estos sacros caminos...
La Santina ta esperando,
queremos da-y dellos mimos.>
Nesta próxima estaya tenemos pensao alcanzar Amandi - una bendición del Románicu - al traviés de Niévares y Grases.
Sol. Por fín salió'l Sol. Dos estayes pasaes per agua son abondo pa unos caminantes ruinos como nosotros, xente de pequeña travesía. Quiciabes por ello esta vergada nun vamos solos, los collacios habituales de rutes deciden acompañanos nesti Camín Aniciáticu. Presta la compaña.
Sol, sí; pero fríu tamién. Salimos de casa con una cande alborada. Quedáremos en Pión pa xubir xuntos, en coche, hasta l'Altu La Cruz, onde tenemos pensao aparcar y entamar cola estaya.
Cuando tamos a puntu salir recibimos una llamada; por problemes d'última hora los nuesos collacios nun puen venir. Nun mos ablayamos por ello, tenemos que dir solos asina que tomamos el determín de facer namás un cachín, el tramu:
<Altu La Cruz - Niévares >
 |
| El turruxón de Niévares. |
Salimos de casa a eso de les diez y cuartu; como yera poca cosa lo que pretendíemos andar nun facía falta esparavanase tanto en madrugar.
Pa llegar a La Cruz fuimos pelos llugares conocíos del Camín de Cuadonga: Deva, La Olla, El Pinal, Alto'l Curbiellu, Pión y xubida al Altu.
- Á ne, ¿petezte dexar el coche equí abandonáu?
- Pa nada. ¡Tan nuevín !.... ¿Por qué nun facemos la ruta al revés?
- ¡¿ Cómo?!
- Primero xubimos dende Niévares y darréu baxamos....
- Bona idega. Andando.
A eso de les once menos diez tamos aparcaos nuna plazoletina, delantre la Fuente Nueva de Niévares, nel cogollu del pueblu. Amás de la fonte hai un llavaderu mui remocicáu y cuido qu'un bebederu pal ganáu.
 |
| Algamando al cogollu de Niévares |
- Bonos díes, señora, ¿per ónde podríemos xubir al Altu La Cruz?
- Tenéis dos maneres. Una per equí mesmo y otra más p'alla, namás pasar la Ilesia.
- Tamos faciendo'l Camín de Cuadonga a cachinos. Güei toca Niévares- Altu la Cruz.
- Coimes, tais faciéndolu al revés - terció'l maríu, qu'acababa d'aportar.
- Sí, teníemos que baxalo pero nun nos peteció dexar el coche abandonáu nel pinal. Asina que primero pensamos xubir...
- Mirái, podéis facer los dos caminos; xubís pol oficial, que s'agarra xunto la ilesia, y depués baxáis pel otru.
- Suéname que vi otru ramal enantes qu'esi oficial, onde había unes garrapielles...
- Exatamente. Esi primeru tara como 700 m. de la cume y l'oficial poco menos que'l kilómetro.
- Mui guapo, vamos facer una ruta circular. Oiga, ¿y esa torre o palaciu que se ve ellí en frente?
- La Torre de Niévares; vais vela meyor cuando tiréis camín de Grases.
- Bueno, entós dexámosla pa otru día. Ta lluéu y gracies. Hasta la vuelta.
**************
 |
| < Los cuatro de Santolaya van a rezar un rosariu porque con un padrenuestru nun son llegar ni a Maliayu. Venga, romeros, que Cuadonga ta a un pasu. > |
Per una carreterina perestrencha y ondulada, onde namás cueye un coche, llegamos hasta la llana la Ilesia.
[[ Santa Olaya de Niévares, ta mui bien asitiada; una pena que, por mor de la ocalitera, s'alcuentre tan solombriega. Otru tiempu tendría vese de tolos puntos del valle y de la fastera los montes; tamién ella quedó ciega.
Tien una nave central peralta abellugada por dos adrios abiertos, ún en cada lladral, que-y dan muncha prestancia, asina como la espadaña, integrada dafechu nel edificiu. Un cura d'oficiu, el mesmu que'l de Pión, diz misa cada quince díes, tará matáu. ]]
********************************
Emprimamos dica la picalina La Cruz per aciu'l barriu de Pueblu; un paisanu bien amable tevo dándonos toa clas d'esplicaciones:
- Perehí p'arriba hasta empalmar cola xeneral, ta bien señalizao. El camín cuido que tea bien, magar podáis alcontrar dalgún cachín de xial, yo va tiempu que nun xubo...
Tanto tenía lleío nel llibru de Xurde Morán, no que cinca a les vistes del valle y lo que yo mesmu barruntaba, que l'anoxu foi pergrande por mopr de ...
 |
| Pel Barriu d'El Pueblu, nel Camín de Cuadonga. |
- Válgame Dios, nun vamos poder ver nada por culpa de la nublina; como si nun tuviéremos a asgaya cola ocalitera....
- Pos mira qu'escoyisti'l día, ¿eh?.
- Yá te digo... Dexámoslo pa un día soleyeru y agora resulta que nun vemos gota...
- Non, les gotes sí que les vemos, seique son demasiaes, y trupes.
- Nidio, danse toles circunstancies: Valle húmedu, sol evaporador y fríu condensador.
- Bueno, nun podemos retratar nada pero vamos intentar chisbar, a ver lo qu'acolumbramos...
Un poco deceicionaos - el día taba perguapu y nun yera pa llorar - vamos ascendiendo en zis-zas; de mano per formigón, depués per pisu zahorra, lluéu un poco d'asfaltu y más tarde otra vuelta'l formigón.
 |
| Xubiendo per onde debes baxar. El Camín de Cuadonga faise p'alantre y/o p'atrás. |
- Meyor que tea seco, porque'l formigón moyao resbaria enforma.
- Sí, ties razón; hai que da-y gracies a la Deva. Mira, nesa recurva hai una entena la viesca; a ver si columbramos daqué...
- Yo toi viendo'l Puente Grases, el de la autopista (A-8). Aquelles cases son les del pueblu ... Tán bien estremaes unes de les otres...Y más p'alla será Amandi, un finxu la nuesa RUTA... Y Fuentes, y Coru y Breceña... Y p'allí y l'Altu La Campa que te lleva a Pola Siero, y al Remediu.
- Sí, d'onde ye'l to callaciu andariegu.
- Arturo sí qu'anda, y non nosotros...
- Facemos lo que podemos.
- Ties razón, amás él ye 5' más mozu que nós. ¡H.a!, ¡h.a!. .Qué ganes tengo llegar a Coru.
- Sí, pa tomar un culete sidra...
- Sabes que nun hai sidra como la maliaya, magar qu'en tolos sitios l'haya bona.
- ¡Yá t'oyí, navaya!
 |
| ¡Una fonte escancia sidra! ¿Allucinaciones ? ¡Quiá! . Milagros de la Santina |
De cuando en vez paramos unos segundos pa tomar aliendu, la cuesta ye pindia de verdá. Alcontramos ocalitos talaos per dayuri, vese que ye la época. La viesca reduzse a ocalitos y algún pinu principalmente, raro ver un carrascu o un carbayu. El sotobosque son felechos, árgumes, artos y algún salgueru. Hai un arbustu que vemos en cantidá....
Ellí, de sutrucu, metanes la viesca, damos a una casería con toles de la llei: casona, corte, horru y los propios aperios de llabranza. Cuido debe tratase de la quintana Fernandiz, polo que tengo oyío.
A les 11:45, una hora depués de salir, empatamos cola xeneral VV-8, que vien de Pión y va pa la Villa. Agora tenemos que xubir un tramu d'unos 300 m pa coyer l'otru ramal que nos ha baxar a la Fonte Nueva de Niévares, onde tamos aparcaos. Malpenes pudimos columbrar nada del paisax, a ver si col meudía tenemos más suerte.
 |
| A escontra forga'l tractor, camín de Niévares. |
- ¿Ánde tán Valdediós y el valle de Boides?...
- A ver si lo vemos al baxar... Pero esta ñublina nun tien pinta degolar.
Tiramos en ziszás per una carretereina amplia, de formigón, amás de bastante empruna. La fonte, los xigantescos pinos ya ocalitos buscando la lluz y la flor de los mimosales fáenla al endefechu bien afayaiza. Una de les numberoses revueltes del camín da entrada a una quintana faneguera; la siguiente amuesa delles piles d'ocalitos cortaos, pelaos y llistos pal porte. Agora ye un tractor el que nos fai retiramos al sucu. Como que nun quier la cosa yá tamos arribando al cogollu del pueblu. Los modernos xalés y les casones antigües mécense nos rimeros del monte, bien orientaos al sol.
- Bonos díes, señores. ¿La Fonte Nueva ?...
- Al cabu la cai. ¿Perdísteis el coche?
- Como davezu.
En fin, tres algamar al llavaderu damos por acabada esta pequeña estaya que terminó por ser circular y bien afayaiza.
- ¡Ta mañana, collacios!
*****************************
< Niévares - Amandi >
 |
| Garapiellu históricu: La torre de Niévares. << - Hola, cucios pelegrinos. ¿Vais camín de Cuadonga? - Vamos a ver la Santina, qu'a tiempu qu'adolecemos por facer esta visita. - Nosotres tamos naguando por dir daqué vez nesta vida. - Yá-y diremos qu'en Maliayo toles vaques faen comuña y glayen por mor de la Virxe Cuadonga: ¡Puxa! ¡Puxa! >> |
 | |
| < Fuente Nueva>, entamu la xornada de güei. |
Esta vegada tuvimos más suerte, nun vamos solos. Los collacios uvieinos arremetieron, por fin.
Quedamos, como la vez fallida, venos en Pión p'algamar xuntos a Niévares. Aparcamos, como siempres, en Font Nova, digo en Fonte Nueva (yá me toi catalanizando... ¿cuándo acabará esti supliciu?).
De momento polo segao, el mesmu camín hasta la Ilesia pela esrtrencha carretrerina. Tres echar un vistazu y un encamientu a San Vicente - aquel clérigu qu'algamó'l martiriu en tiempos de Dioclecianu - baxamos la cuestina y empobinamos a mandrecha, como manda la flecha.
Lo primero qu'alcontramos ye una casa d'Aldea - "La casina de Niévares"- enantes de torcer a manzorga y abandonar la carretera xeneral pa introducinos nuna caleya zahorra. P'algamar a Grases vamos travesar los praos del Llivinque, escaeciéndonos ansí del escasu tráficu.
- Al fin tamos delantre La Torre de Niévares.
- Yá yera hora... Cuántes veces nos preguntamos, pasando pela autovía camín de Rodiles, qué castiellu sedría aquél... Por fin vamos conocer daqué...
 |
| Palaciu de La Concha: Niévares (Semeya d'Internet) |
Esi conxuntu-fortaleza debió tener caráuter defensivu como se pue deducir de les sos altes muralles de mapostería, de les almenaes y los cubos cilíndricos que la sofiten a mou de contrafuertes y que les faen visible dende cualisquier puntu del entornu, inclusive de l'autopista.
El turruxón ye fácile que fuere'l palaciu d'Alfonso III o polo menos torre de vixía pa protexer el conxuntu de Valdediós, nel valle de Boides (Ilesia, Palaciu y Monesteriu) , qu'él mesmu mandare construyir. Ellí onde pasaba temporaes terminó confináu pola impaciencia de los fíos ("Cría cuervos...." ). La torre taba asitiada nun puntu estratéxicu de les antigües rutes miliaries que comunicaben la costa cola Meseta; cerca del Camín Real y a tiru piedra d'Uviéu, Xixón o Avilés. Hai fontes dignes de créitu que-y atribúin orixe romanu sobro un castru astur... ¡Toma esa!
 |
| La escalerona renacentista. (Semeya d'Internet) |
Acabada la Edá Media'l turruxón pierde'l valor defensivu y los nuevos señores feudales, la nobleza rural, llevanten nel XVI (1501, diz un llabráu a la entrada) la casona-palaciu de planta rectangular, cubierta a dos agües, realzada por una torre cuadrada de dos pisos y embaxo l'abellugu d'una capiya ya un pinu gallegu que-y da señoríu, solombra y sosiegu. Una escalerona esterior, d'estilu renacentista, sirve d'accesu al pisu primeru y pel otru lladral ábrese a un típicu corredor asturianu. La capiella, de forma rectangular y bóveda de crucería, ta adosada a la muralla. L'escudu familiar caltiénse enguapiando la clave.
Nun podía faltar la panerona, d'ocho pegollos, asina como dellos xardinos afayaizos. Fuera la torre hai una casería - onde viven los caseros - tamién perantigua, como nos amuesen les sos grueses muries.
Dende'l sieglu XIX esti conxuntu palacial pertenez a la familia De La Concha.
Quiero pescudar que'l maliayu don Victor García de La Concha - teólogu, filólogu, profesor ya honoris causa de...- y qu'algamare a Direutor de la Real Academia de la Llingua Española y del Institutu Cervantes, pertenez a esta familia. Norabona polos sos llogros y pol so ciñu pa con Asturies, académicu. Bien merecío tien que'l Institutu la Villa lleve'l so nome.]]
*****************************************
< Camín de Grases >
 |
| Camín de Grases vamos a sudar saín. |
Da gustu andar arrodiaos de praos, de sebes y d'árboles como esti roblón qu'acabamos d'atopar. Tamos na zona de La Peña, onde pasamos una casería. Alcontramos un cazador:
- Bonos díes, señor; ¿vamos bien camín de Grases?
- Sí, cuando lleguéis al cruce alcordaivos tirar a mandrecha.
- ¿Sabe qué pueblu ye aquel d'allalantrones tan bien entamilgáu?
- Ye Pueyes, y Valdediós l'otru más escondíu.
Siguimos a lo nuestro, caleyar, pero enseguida s'acabó lo bueno.
- ¿Nun dicíes que taba seco?
- Ta visto que nun ye posible llibrase d'alguna llamuerga...
 |
| ¡A mandrecha! Si tires de frente piérdeste por Sariegomuertu. |
- Aquello debe ser Grases pero vamos preguntar na casería:
- Bon día, señor; ¿aquel pueblín sedrá Grases?
- Non, aquello ye Sariegomuertu. Pa Grases vais mal, tenéis que dar la vuelta hasta un cruce y torcer p'abaxo, a manzorga.
- ¡Meca, el famosu cruce! Por andar entreteníos pasamos de llargo...
- Oiga, ¿ en Sariegomuertu nun ye onde hai una célebre capiella?
Sí, hai una ilesina románica. Antiguo, cuando los reis d'Asturies, cuenten que tenía monesteriu, seguramente de calter benedictín, como'l de Valdediós. Cuando la guerra quemó pero iguóse otra vuelta. Hubo un señor estudiáu mui interesáu nesta ilesia; dixo que yera daqué mui importante y había que curiala.
 |
| Camín de la quintana. |
[[ La Ilesia de Santa María de Sariegomuertu tien orixe prerrománicu (IX) pero nel s. XII foi remocicada dafechu al estilu románicu y nel XVIII adornó cola espadaña típica del barrocu. Amburada nel 36, por aciu la guerra civil, foi declarada en 1965 "Monumentu históricu-artísticu" gracies a los procuros de Magín Berenguer.
Santa María tien una nave rectangular, abovedada por cañón ya una capiella cuadrada con techume de madera. Lo más bultable son les portaes d'accesu, l'arcu trunfal que da al altar y un ventanu del ábside. Presenta los clásicos zis-zas del románicu asina como axedrezaos na piedra. Los capites tamién tan ornaos con dibuxos vexetales, aves ya antropomorfos. ]]
 |
| < Pel camín del Llivinque van romeros caleyando abellugaos por llugones benditos dioses ¿paganos? > |
 |
| Llegamos a Grases pembaxo'l viaductu l'autovía. |
- Siguir la flecha, mira nel suelu.
Xubimos una cuestina y entramos nel cogollín del pueblu que mez caseríes con casines modernes; hasta hai una con capiella particular.
- Bonos díes, señora; ¿podrá indicanos el Camín de Cuadonga?
- Si vos fixáis nel suelu tenéis la flecha pero yo nun vos aconseseyaría tomar el camín del ríu; va tar intransitable. Lo meyor tornar pa Grases d'Abaxu pela carretera xeneral de la Villa.
- Gracies, señora; ¿tarán contentos cola aupista, eh?
- Sí, mui contentos; agora pa dir a Rozaes tenemos que dar la vuelta a España...
Ye imposible que llueva a gustu de toos; cualisquier obra pública trai les sos grandes ventayes y los pequeños pilancos.
Como somos mui necios asomamos el focicu pel camín que baxa al ríu pero tuviemos que dar la vuelta col rau ente les pates. Meyor pola xeneral seique haya qu'apartase de cotino de los coches. Hai bastante tráficu, ye la hora dir a misa y güei ye fiesta en pueblu, asina que vien munchu familiar a pasear el santu, amás de comer.
 |
| < Nel adriu de San Vicente abelluguen los llugones; son estos mesmos vecinos aquellos vieyos roccones > |
San Vicente de Grases ye una ilesia mui guapa, pintada de blanco, y asitiada nun pandu a la vera del ríu. L'alta espadaña y una alameda de plátanos invítennos a entrar nel pórticu onde s'alcuentra lo que ye'l finxu más bultable: una estela de los llugones arganticaenos qu'alcontró'l párroco, por mor d'unes obres, allá per 1925.
La estela ye una llábana d'arenisca (0,59 x 0,29) que s'empotrare na paré so l'abellugu del adriu. Piénsase qu'esti ara votiva ye del sieglu II d.X., cuando los romanos taben asitiaos dafechu nel territoriu astur pero siguíen respetando les tradiciones ya cultos de los celtes asturorum. Vien a dicir que:
<< los llugones arganticaenos dediquen esta llápida al dios Tabaliaeno >>
 |
| Implorando a Tabalieno, por si acasu. |
Los llugones tuvieren la primer capital en Paleontium (actual Belonciu, a 5 km del Infiestu) pero lluéu pasárenla pal bien asitiáu Lucus Asturum (Lugo Llanera), centru de les rutes N-S ya E-W. De la gens de los llugones queda constancia en nomes como: Llugones, Picu Llosoriu (Mieres), Lluxio (al par de Sanestébanu de les Cruces) o Llugás, per onde vamos pasar, o casi. Tenemos conocencia que los llugones -o roccones como los nomaben ellos - tuviéron munches rocées colos godos de la que vinieren facese cola zona,tres la caida l'imperiu romanu. ESTO nun foi fácil pa naide, hebo que rucalo, ¿Por eso-yos llamaben roccones?. Y ésto que me pregunto....
< Pelayo vieno fugáu de Córdoba y abellugó en Piloña.... ¿sedría un gallu la zona? >
 |
| Los cuatro ases colando de Grases. |
¡Ah!.Escaecíaseme dicir que la Ilesia de San Vicente ye de nave rectangular y ábside cuadráu. Tien dos portaes adintelaes protexíes por un adriu de madera. Presa por una rexa y adosada al muru hai una pila bautismal a la que s'accede per aciu d'una puerta con arcu de mediu puntu que lleva l' alfa ya omega adotaos pola monarquía asturiana.
 |
| Caracolera, ente'l Molín y la Ilesia arganticaena. Un negociu nuevu: ¡Suerte!. |
De siguir el camín braeru en Grases d'Arriba tendríemos pasao per delantre la ilesia asina qu'al sentir el ruxerrux del ríu baxamos a caciplar un poco, nun queríemos escaecer la señaldá de la ponte nin aquel viescu de ribera. Y acertamos. Per aciu d'un ponticu bien antigüu aportamos a una casona venida a menos pero con signos de recuperación.
- Bones tarde, Señor. ¿Esta casa tien molín?
. Sí, teníalu, pero yá nun furrula.
- ¿Qué ríu ye esti?
- El Ríu Valdediós.
- Que nos sos comienzos nómase ASTA, como'l nuesu grupu de Rutes arqueolóxiques.
- Ehí biltó, y d'ehí se tomó'l nome.
 |
| Unos que vienen ya otros que van magar siempres la Santina ta nel caciar. |
Yá tamos na carretera xeneral d'Amandi. Enantes d'emprentar averamos a una Capiella d'Ánimes, onde la xente fai posta, pa rezar un poco a ver si saca a daquién del Purgatoriu. Nos aprovechamos pa echar los llorinos de siempres, por pidir que nun quede. Delles veces pienso que Dios - mui mayor, él - debe tar algo sordu, porque munchu-y encamiento y mui poco frutu veo, o eso me paez a mín. ¿Sedré mui desixente?... Pos yo voi siguir ansí tol camín, yá lo sabes.
Y andando ente caseríes espardíes a llargo de la carretera. Pegada a la mesma una quintana pergrande - La Mota - con tolos elementos típicos: casones, cuadres, panerona y hasta molín. El Molín de Llacones o La Mota ye tan célebre como lo foi'l so dueñu, "El Molineru de Grases", don Belarmino.
 |
| La Venta |
Una de les cases, grande y con corredor, La Venta, ta asitiada xunto a la La Riega del Olivar que va buscando'l Ríu Valdediós pente los güertos del llerón. Un cartelu a manzorga diznos que pues algamar el barriu del Maoxu si tires cuestarriba. ¡Que va!!
 |
| La Casquita, el caberu barriu de Grases. |
Agora tamos caminando per una fondiega abierta que termina nuna cuestuca: La Casquita, dizme una señora qu'ansí se llama esta zona; ye l'últimu barriu de Grases. Efeutivamente, ye talo un casquete invertíu.
El barriu La Barraca alcuéntrase a la otra oriella del ríu. Equí hubo un molín d'agua que pasó convertise nuna Fábrica de Papel (La Esperanza) y terminó siendo la fábrica de quesos "Mantequera Asturiana" hasta los años trenta del sieglu pasáu. Una pena namás nos queden pal recuerdu les chimenees del negociu. ¡Cola falta trabayu qu'hai!.
Nel cruce cola carretera que tira pal barriu La Comoca vemos el llagar El Travisu, a mandrecha , y la Capiella de San Blas - San Bras, diz daquién - a manzorga. Esti nun ye un santu cualquiera ; trainos n'alcordanza una vida llaboral cuasi entera. A la puerta la capilla un cartelu diz que los ocho vecinos de La Casquita algamaron el premiu a L'Aldea más guapa de Villaviciosa en 2016.
Na puerta la capiella reza esti poema, dedicáu a San Bras, que nun ye plan de pasar por alto; yá conocéis el nuesu enfotu pola poesía. Va por Patty, la Furagaña la Ría.
 |
| ¡Arreando pa escuela! ¿Qué pensabeis? |
Antiguo yera tradición asistir esi día a misa tantu'l claustru de profesores como l'alumnáu. Tamién yera tradición que'l cura nos brindare con un paquete tabacu rubio bañáu por una ¿pátina de salitre? ... Mal pensaos, la farda yera por aquello de la cercanía'l Musel...].
 |
| Bar Caso: La gasolinera'l pelegrín. |
Pali-pali, ente praos, cases de siempres y dalguna otra coles típiques palmeres indianes entramos n'Amandi per aciu'l barriu de La Parra, l'antoxana la Villa, como lo llama Xurde. Xusto enantes de llegar al cruce alcontramos la Fonte los Pelegrinos, onde tomamos unes pingaretes, por eso del corporativismu.
Nel empate de la carretera Grases - la nuesa - cola que vien de La Campa (As-113) y traviesa'l ríu damos con un remansu de paz: El Bar Caso, chigre tradicional y parada obligatoria pa romeros, pelegrinos, ciclistes y vecinos de toda la redolada; hasta un amigu arquiteutu alcontré equí. Ye la hora: "Sesión vermú".
Mentantu los collacios aselen y refresquen el gargüelu ún nun se resiste y quier rindir visita al célebre Puente d'Amandi, la Puerta la Villa, podríemos dicir. Pela xeneral que va a La Villa, ente prestoses cases de galería, llegamos al Bar La Parra (anguaño Casa Aurelia) y disviamos a mandrecha per una caleya que vien dexanos, tres cruciar la Ponte Romana d'Amandi, nel prau onde se celebra la Romería de San Xuan, .
¿Qué meyor sitiu pa finar una estaya?. Namás queda poner la espuela y vamos a reponer fuercies delantre la Escuela de Grases onde unes meses bien afayaices taben esperándonos.
 |
| - ¡Guau, guau! Eh, romeros, que yo tamién soi de Dios y voi visitar la Santina. ¿Qué ye, que pa min nun hai tortiya?. ¡Guau, guau! - Yá t'oyí, navaya. Va sentite toa España. |
. A les garrapielles, ¿qué sedría de nós ensin elles?.
. A los nuesos collacios uvienos, que nos acompañaron n'esti tránsitu.
. A la xente, vecinos del Camín, que comparten con nós sentimientos ya información.
. A Rei y Canelo, pelegrinos bixorderos del Camín de Cuadonga.
. A Wikipedia, onde consultamos davezu, asina como a dellos blogs....
Y al Madoz Asturies (1845-1850).Y a les < Crónicas de los reinos de Asturias y León >
. A los diccionarios de la Llingua: DALLA, DGLA, ESLEMA, y los de sinónimos (Prieto y X.X).
. Y al maestru Nel Morán, que darréu lleer el so llibru d'aventures : "Tyan", y solliñar bayura de xiros en llingua materna xuxurriónos, ensin sabelo, la idega de repasar lo escrito nesti post pa tratar d'iguar daqué y ameyorar el <nuesu asturianu>.
. A Madre, que vien de dexanos en medio'l tránsitu. Si enantes teníemos enfotu n'algamar a Cuadonga agora abondo más. Yá tenemos otru motivu pa visitar la Santina y pidí-y l'asitie ceo al so abellugu y, de pasu, qu'ente les dos nos echen un gabitu a los que siguimos na brega, que bien conocen dambes la falta que nos fai.
¡Cómo voi echala de menos!. Quién m'entruga agora: ¿Ònde fuisteis güei? A ver, amuésame les semeyes... ¡Pero bueno, so burru, cómo metes a la muyer per esos andurriales!....
Tranquila ma, que tamos abellugaos pola Santina.
<< N'alcordanza d'Alfonso III, el Magnu >>
 |
| Tamos a puntu de cruciar el Rubicón: Puente Amandi. |
Fasta ceo, collacios.
