" C27H46O...XIXILANDO..."

                                      " C27H46O...XIXILANDO..." 
                 

Xixilando "El Colesterol" dende "El Mirador del Cabu S. Llorienzu" 

                        Xixón. Meudía. Ta murnio ya amenaza lluvia, talo que los díes pasaos.  ¿Ónde dir nunes poques hores?...Tien que ser cerca casa y onde haya un pisu secu, ensin llamargues. ¿Hailu?...Pos claro; una ruta bien trasegada, la socorrida  "Sienda costera : Santa Catalina- La Ñora", más conocía - sobre too na so primera mitá- pola "RUTA'L COLESTEROL". Esto ye lo que vamos facer, ¿merecerá la pena?
                        (Delles imáxenes pertenecen a otres salides pela mesma ruta) 
                                 

                                              

El Cerru Santa Catalina

                  

                            Esti ye l'aniciu propiu de la ruta, al par del Cerru; pero nós dexamos el coche cerca'l Tostaderu ya aforramos el paseu de la playa.
                            Imposible evitar una semeya ente los "CHAPLONES" ....Unes planches escures de fierro que dexen pasar la lluz al traviés d'unos furacos que descubren vistes curioses. Son les cuatro estaciones: Primavera, Branu, Seronda ya Iviernu.
                              

"Sombras de luz": Fernando Alba

                           Dempués de caminar un cachu dexando atrás : Bellavista, El Pery y el Sanatoriu Marítimu pasamos al par de la  Ma del Emigrante, monumentu n'alcordanza al sufrimientu de les madres que vieron  a los sos fíos colar p' América camentando que difícilmente los volveríen a ver .....Mano tendida, despedida y ponte ente dos mundos ....
                                     

La Ma del Emigrante: Ramón Muriedas

                      
     Talamente paez que "La LLoca", de la que despidimos con señaldá, ta curiando la playa y roqueru del Rinconín. Nun hai sitiu más afayaizu qu'esti pa estudiar la "Intermareal", esa zona de la costa bañada en parte pola mar qu'orixina un ecosistema complexu ya apasionante. Xurgando na guía d'itinerarios rurales editatada nel añu 94 pola F.M.C. y la U.P. con autoría de Javier Gil V. y dibuxos de Jose L. Benito vimos la oportunidá  faer esti esquemín y acompañalu d'algún dibuxu por si daqué paganu poco avezáu - talo que nós -  tien l'enfotu d'echar una güeyada a lo que podría alcontrase nuna intermareal...
                         

                          P'aidanos un poco vamos recordar que la intermareal ye esa estaya mariniega o costera que ta influyida pola mor de les marees......
                        La zona más alta: d' Alitu [hálitu] marín o aerohalófila, que recibe l'aliendu la mar (¡cuánta poesía!) y l' agua salao de los chiscazos de la batiente.
                        A continuación tenemos otra - zona Suprallitoral - que ta embaxo l' agua...si la marea ye viva. Darréu queda albentestaste, que ye la mayor parte'l tiempu.
                               

Horizonte Suprallitoral

                    Hai otra un pelín más baxa: la zona Meridional, que tien agua tolos díes - mas non tou'l día - arriendes de les marees diaries...Asina que pasa parte del día somorguiada y esotra a vista de pasiantes, talo ye'l nuesu casu...Esta conocémosla bien ¿eh, gallu?...O vas dicime que nunca nun fuisti a pañar moxones o a la gueta d'oricios ...Bueno, otru tiempu; güei día échente una multa por amirar pa ellos con cara picardiosa...Ye una zona enantada, asina que pa entendela meyor suel dixebrase n'otres tres estayes: M. superior, M. media ya Inferior. Preciso dicir qu'al pasar güei per esta zona, que ta y nun ta, quixi facer una semeya. Saqué-y el zoom a la cámara, recoldéme na barandiella, pa enfocar a lo Marcelo, y apunté al roqueru. D'esmenu vi pasar a carrenderes un cosucu pequeñu, cuadráu, con una reciella pates.... Un guxarapa que más que correr esnalaba...Petecióme baxar a retratalu pero nun taba'l día pa ello; pola mor de la tardanza y del calzáu poco afayaizo que llevaba. Pero esto nun va quedar asina...Voi saber yo quién yes tu, fernandoalonso...Tengo tornar a falar contigo...

                                

Horizonte mediullitoral superior

                Entá nos queda otra zona embaxo, la Infrallitoral, que ta somorguiada de contino sacante....les marees mui vives, qu'amuesen hasta los refaxos. Pero ésto pasa poques veces al añu, ya hai que dir a velo espreso...Nun se sopelexen les partes íntimes de buenes a primeres...Estes coses hai que sudales, ¿o non?. Si quixeres poner unes gafes de buceu y date un vueltu embaxo l'agua veríes una función espelurciante:  un vals de Schubert interpretáu por unes Laminaries (algues) pergrandes al compás de la marea...Dellos peces y actinies colándose pente'l mediu y, chisbándolo too, esponxes, moluscos,...Nun se pue dir pal otru mundu ensin conocer, in situ, un pelín esti inframundu...Si tienes edá pa ello, claro. Otramiente confórmate coles andariques del chigre...
                 Dexamos atrás esta ayalga costera y pasando ente la playa y les cases del Rinconín aportamos delantre un parque que caltién esti orixinal monumentu: "Solidaridá": Unos esllabones entrellazos ya abiertos...Xuntos, pero llibres.
                                         

"Solidaridad": Pepe Noja

               
                               

"Solidarios"

           

                Bien cerca d'elli atopábase esti otru monumentu: "Ensin Títulu", que nos facía camentar nun
equilibriu imposible en permanente tensión...Bueno, tala yera la tensión que terminó por desprendese en parte...

Sin Título (antaño)

Ensin tensión...(anguaño)

 
                 Siguimos caminando pela enllabanada sienda, dexando atrás el camping, hasta algamar a los cantiles del Cervigón.  Darréu xubir un cuetu apruz ante nós la vistosa casa de Rosario Acuña. Dende llueu bien agüeyó esta muyer pa entamilgar la casa; hemos vela dende cuaquier puntu de la ruta. Esta placa danos una pista sobre tan célebre señora.

                              Rosario  Acuña foi una figura relevante de les lletres españoles de finales del XIX ya entamu del XX. Muyer adelantada al so tiempu: feminista, republicana, masona - como Riego -  y escritora apasionada de teatru; anque tocó tolos palos. Tuvo bien considerada pola crítica coetánea, como Clarín o Galdós, que tenía a gala ser amigu suyu. Pasó los caberos años de la so vida en Xixón. Dende la llomba la  casina, onde suañaba cola llibertá, cantaba:
                             

Casa de la escritora Rosario Acuña

     " ¡Xixón! ¡Xixón! El mar a llugaes                        esmaralla en tí so infinita poesía..."

                                                                                       
                                



   



                   Nel Cervigón, esmuciendo sobro'l cantil, atopamos esta cenciella poliescultura...
                                                         

"Cantu a los díes fuxíos": Adolfo Manzano.

                 Asientu pa pescadores de caña y sedal. Caminantes fatigaos alcuentren un bon requexu pa ponese a camentar nos díes fuxíos .......Nós, miramos enfrente y sentimos una fonda señaldá....
                                         

Vela, Musel, trabayu...

 
                      Colingando sobro'l cantil decatámonos de la presencia d'una abondante planta rastrera de fueya gordo ya aciculiforme. De cuando en cuando unes florines fusia paecen bordar esi mantu verde. ¿Cómo pue resplandir en suelu tan probe onde l'agua dulce malpenes apara y entá recibe les chiscadures los refolones?.  Creemos recordales pero asina y too consultamos un llibrín de plantes que davezu va con nós. Y alcontramos : Uña de lleón (Carpobrotus edulis). Tien bayura de nomes, como "Uña de gatu" (el gatu debía ser pintu..), "Figu marín", "Yerba de cuchiellu" ...Tamién los hai que-y llamen "Diente de lleón", pero esta ye otra.
                                 

Uña de lleón: (Carprobrotus Edulis)

Qué bien suena lo d' edulis. Suaño en seta : ¡Boletus edulis!. Pero nun ye'l casu. Esos, pa otru día. Xurgamos un poco so la información. Quedamos sorprendíos como siempre que caltriamos na vida de cualquier ser vivu: La fueya carga la enerxía solar de día, claro, pero zarra los estomes pa nun perder gota d'agua pola mor de la evaporación. Asina que trabaya de nueche; como los panaderos tien fotosíntesis noctuna. El frutu (karpo), una especie de figu pequeñu, ye comestible (edulis) si ta madurín pero nun convién pasase, a menos que teas "blandiu"; ye mui astrinxente.Tamién s'emplega la fueya en ensalaes. Debió ser una planta mui recurrida polos marinos d'antaño por aciu de la vitamina C, pa evitar l'escorbutu. Lo mesmo ocurre con otra del mesmu entornu : El Cenoyu marín (Crithmum maritimun), pero güei pasóme inalvertía.         
                    Pasu ente pasu vamos averándonos a los cantiles de la playa de Peñarubia, que debía nomase "Peñaroxa", porque roxa queda al atapecer nos díes que la baña'l sol...Guapa semeya será'l día que la sorprendamos ansí...Entrín y non dexaremos esta :

                                      

 

<<Peñarroxa>>

                  Los afloramientos xurásicos n'Asturies tan comprendíos ente'l Cabu San Llorienzu (Xixón), el que visitamos güei, y la playa d'Arra (Ribesella). Les roques que podemos alcontrar puen amosase en forma d'estratos o de conglomeraos. Pa conocer un poco la hestoria d'esta fastera vamos tentar d'interpretar a  CHema:
                Nos primeros tiempos del Xurásicu (X. Inferior) había nesta zona una mariña baxa, rica en basa carbonatao que va conformando una sucesión d'estratos  fósilesde caliza y marga. Más tarde'l nivel del mar xube quedando somorguiada la mayor parte d'Asturies ( y norte de Lleón, qu'en Babia ta enlleno fósiles marinos - y del carboníferu -  colos que tengo compartío munches vacaciones).
                Pero tiempu más tarde, na dómina del Xurásicu Superior, hai un cambiu total nel paisax por aciu de delles falles folixeres qu'entren n'actividá. Arriendes d'ello les capes que taben embaxo l'agua salen a la superficie y entamen a cambiar pola mor de l'atmósfera...El mar retírase, la flora cambia y el nuevu llitoral ye un petite pa dinosaurios, pexes, llagartos y hasta reptiles voladores...¿Maxínestelo?...Los de güei día son asina:
             

"PARAPENTALIA:  Volador del Cuaternariu"

                  Estos chavales tuvieron afalagándonos tou'l camín. Taben empeñaos que diéremos un vueltu  entamilgaos n'artiluxu talu...Nun sedría mala idea faer un reportax fotográficu dende altures movedices.... Pero ún siéntese más pexe que páxaru. En cualquier casu igual tu yes más arrechu y t'apetez alquilalu. Por eso voi dexate equí les señes d'esta empresina; hai que da-yos bola a los mozos con iniciativa:
                                  parapentalia@gmail.com 

                   Los superpuestos estratos de marga y caliza, perteneciente a la formación Rodiles de la dómina'l Xurásicu, déxennos bayura de fósiles: ammomites, belemnites, griphaees, rynchonelles, trigonies, terebrátules....que fueron el nuesu petite en tiempos más bien ¿llonxanos?....Agora voi apurrivos unes semeyes de fósiles que podéis atopar:
                                         

                                   . Ammnites (3-4-5-6)    . Belemnites (1-2)
                                   . Bivalvo (8)                   . Griphaea (7)
                                   . Rynchonella (10)          . Terebrátula (9)
                         
       Quedo al pendiente d'amosavos la semeya - entá nun fecha - d'un anmonite xigante al cabu'l roqueru.... Pa ello preciso d'una baxamar en condiciones. Mentanto conformaivos con estes:
                                    

Ammonite

Belemnite

                  Si de verdá queréis saber lo que pasó en Xixón, na dómina del Xurásicu, lo que tenéis que faer ye metevos nesti blog:
          << Mi  Geoblog: Geología y algo más >> de José María Montes Villa.
 Y buscáis la entrada de la "Playa de Peñarrubia". Naide nun conoz meyor qu'elli lo que tien ocurrío naquél entós.....Y n'otres dómines....Faéime casu y nun vos lu perdáis... Les semeyes qu'aneyo equí tómoles prestaes del citáu blog, faltaría más...
                 Cruciamos una guapa ponte de madera hasta que damos con esti testimoniu: "Enxamás" n'alcordanza los asturianos que regalaron la vida a la llibertá y finaron nos campos d'esterminiu nazi.

                                                     
                  Averámonos al Área Recreativa "Joaquín Rubio Camín", artista xixonés qu'ideó - cola "zapatiella" un barcu - esti <<naufraxu en tierra>> arriendes de la recuperación del peciu "El Castiellu de Salas", buque graneleru fundíu, enllenu carbón, nel añu 1986. Taba fondeáu fuera del Musel y al garriar l'ancla - vamos, que nun agarró - embarrancólu  enfrente Santa Catalina.  Aprovechando la campera pue esfrutase d'una afayadiza tranquilidá. Bon sitiu pa tomar la parva, si ye que madrugastis...Como nun ye'l nuesu casu, nós al kiwi, les ñueces y galletuques de casa...(Oye, y que nun s'entere'l mélicu...Un plizcu chorizu...pero yera de la "Cai Tras", eh...Y el pan de la Camocha ....Amás, unes pingaretes de vinu ensiguida dilíen la grasa, que'l sangre tien que correr bien.... Cuando voi de ruta suelo llevar xinta mista: una parte pal colesterol y otra pa min ).
                            

 

Área Recreativa "Joaquín Rubio Camín"

                   Por cierto, falando de zapatiella y obxetos voladores....Tengo n'alcordanza que mio madre yera la meyor llanzadora de zapatiella de la dómina franquista na cuenca minera. (Claro que... siempre me pillaba descuidáu asemeyando a Biempica..)

                Xubiendo estes escaleres de madera .....
                                       

enllordiaes ente toxos, salgueres y plumeros invasores algamamos dica "La Peñona fabuda"- como se la noma nel argot -, un conglomeráu o pudinga, que domina tol valle de Peñarrubia. Un llugar ensin comparanza pa reponer fuercies si amás tas acompañáu por una cometa faciendo parapente.  
                                      

"La peñona fabuda". Merenderu.

                       El conglomeráu o pudinga ye roca sedimentario compuesto por xial y sable que ye arrastrao pol agua - d'ehí esa forma arredondiada- hasta'l fondu d'un valle fluvial. Gracies a la presión, al tiempu y a un cementu que los xunce van tomando l'aspeutu actual. Por cierto, les meyores muestres de pudinga que te pueas alcontrar verásles nesta fastera de la costa asturiana. Un poco más allá tan les inigualables de La Ñora. Pa otru día.

                        Nesta semeya pues apreciar meyor lo que ye un conglomeráu...
                         

Conglomeráu, a vista de páxaru

                               Siguiendo los xuegos de la sierpe tripulada adentrámonos nel parque del Cabu San Llorienzu. Al entamu fuimos gratible sorprendíos polos xiblíos d'una banda de paxarinos col llombu verde-oliva: ¡xip!¡xip!....¡Raitanes!. Saltaben dende les cotoyes - ¿territoriu comanche? -al camín y d'ehí al verde inmensu qu'acoricia'l mar . Paecíen buscar daqué; yá sabemos lo que-y presta al Raitán  ( Erithacus rubecula, ) enredar pel suelu, a la cata merucos. Igual nun alcontraben inseutos bastantes pa fartucase, yá que'l tiempu nun yera de lo más afayaizo pa ellos.   ¿Sabes qu'amidida se faen mayorucos va gustándo-yos la fruta, cuantu más dulce meyor?... Estos llambiones nagüen polos pasteles- tienenme dicho -, y si-yos das unos tortinos de maíz con miel...talo qu'a nós, claro.
                       Paecíame qu'había muncha mocedá ente ellos. Fixéme n'ún....    

                            

" Papín Coloráu": Raitán (Erithacus rubecula)

                    Vilu a tiru piedra - por dicir daqué -  y preparé la máquina....En cuantes que se decató'l  puñefleru  púnxose bien sollerte, remingó la cabeza ya amirónos de llau con esi güeyu saltón que tien, inxertáu nun mar de colorao, que-y vien dende'l  blancor de la panza.  Dionos buena guerra pa poder toma-y esta semeya. Nun paraba quietu, andaba a carrenderes, paraba y saltaba. Cuando díbemos colar entamó a  mover la cola como faciéndonos una reverencia...¡Très poli! 
       Pero mereció la pena ¿eh?..Quedó plancháu'l Petirroxu, como se lu conoz davezu.
Entós amirónos y dio un esnalíu...¡Ta llueu!. Yá falaremos....Esto nun va quedar asina Papín coloráu.... Tornaré a vete. Toi faciendo munchos amigos nesta ruta...¡Qué prestoso!
                             Si siguimos caminando pela sienda más averada a los cantiles damos con una escultura, n'aceru cortén,  n'homenax a "Galileo Galilei XV ", d' Amadeo Gabino, que fai referencia  a la bayura de planetes que Galileo buscaba nel comos. ¿Veis los planetes alredor de la figura?...¡Coimes, que poca fe!

"Homenax a Galileo Galilei ": Amadeo Gabino.

                        A la vuelta la esquina un requexu increyible : la Islla La Tortuga convida a una reflexón so la vida. 
           

Islla La Tortuga.

                      No cimero la llomba, presidiéndolo too, sobresal la imponente proa d'un barcu, fecha en formigón, que nun ye otro qu'un Mirador que te permite contemplar una parte importante del llitoral del conceyu Xixón y de los vecinos: al oeste'l Carreño y al Este Villaviciosa. Meyor volver un día claru.

Mirador y....almirador.

              

                 Entamó a orbayar. Abellugámonos un ratín embaxo'l monumentu mientres lleíamos los grafitis que dellos poetes de caleya , ¡grandes!, nos dexaron pal recuerdu. ¿Queréis velos?:
 

      

                               Miguel Ángel Lombardía tamién dexa constancia de la so imaxinación - y de la nuesa - con esta esculta en bronce: " Paisax xerminador". 
                                            

"Paisaje Germinador" de Miguel A. Lombardía

                             Salimos con murnia del parque.  Enseguidina aportamos delantre d'una capiella: La Ermita de  La Virxe de la Providencia qu'abelluga una virxen negra - talo que La Virxen de La Caridá, na Rebollá (Llaviana) - que recibe cantidá de romeros a diario y sobre too nel caberu domingu de Mayu, que celebra la  fiesta grande: misa cantada (na que s'abracen los cures), procesión alredor de la ermita, volaores, puya'l ramu, xuegos y concursu d'arroz con llechi.
                           

Vidriera

La Virxen Negra 

Ermita de La Providencia

           Damos cuatro pasos y tamos na "Colina'l Cuervu". Prestosu nome pa Rosario, celebrada avicultora ya amiga de los páxaros. Ellí, esmuciendo na pequeña rasa, mirando al mar, acolumbramos un panel indicativu con un poema de Rosario Acuña que nós intentamos interpretar na nuesa llingua; defeutu que nos prui davezu pero que col tiempu y trabayu igual se torna nuna virtú...
                       

                                        _"¡¡¡ ASTURIES !!!"
                              Altes xerres arispies, coronaes
                              por daqué cendal d'impoluta ñeve:
                              praos cercaos de floriada sebe;
                              maizales, viñeos, pomaraes.

                              Onde nin el sol a caltriar s'atreve;
                              regatos nidios de corriente sele,
                              y ríos que descienden en cascaes.

                              ¿Quién pue, ho, describir les fermosures
                              qu'Asturies toa guarda en sos rincones?
                    
                             ¡ Cuando l'Home se cure de llocures
                              ya odie l'odiu ya encalce sos pasiones,
                              podrá vivir la vida d'aventures
                              que brinda una rexón con tales dones!.

                   Collacios, dempués de lleer esto yá nun soi dicir más nada....Ye la hora de colar... 
                   Agarro la puerta y pesllo.
                                             

                                                     
                                                           ¡¡ Fasta ceo, romeros!!

P.S.: ¡Ah!, encerriscáu como taba nos "affaires" de la ruta pa nada nun m'aldordé del COLESTEROL : C27H46O. Noto que me muevo meyor, que respiro más fondo y que tengo unes ganes tremendes de faer los deberes que m' encamienta la ruta ....Porque siéntome como'l Sporting, col  "H" xubíu y l' "L" a sucu baxeru...Pa min que nun paso de los doscientos (200 mg/dl)...¡Vamos pa primera!

Pela redolada' l cielu

                         La sienda "Pela redolada' l Cielu" (PR AS-197) ye una de les seis rutes temátiques que propón La Comarca la Sidra  [Bimenes, Cabranes, Colunga, Nava, Sariegu y Villaviciosa] pa sacar el carné d' Amigu de La Comarca; quien diz amigu, diz: conocedor, andariegu, antroxador...
Esta ye la que nos encamienta'l conceyu de Sariegu...
                                      

                          Asina ven dende'l cielu ..... La Vega de Sariegu

                             La sienda PR AS-197 podía nomase tamién "Xubida al Olimpo" ; porque en realidá ye de lo que se trata, xubir a La Campa dende La Vega Sariegu y baxar pela otra fastera p'arribar al entamu, yá que falamos d'una ruta circular d'unos 15,5 Km.    
                               N'honor a la verdá teo que dicir qu'esta vegada nun pudimos faela entera, miseries de la vida que nos torgaron salir ceo de casa. Pero esto nun quedará asina.....¡prometío!. En cualisquier casu, y magar nun disponía ún de tiempu a esgaya, aprovechamos bien el que tuvimos...Yá te digo...
                                Aparcamos nel centru neurálxicu de la villa: A la vista l' Ayuntamientu y delantre un parquín que ta al par de la Escuela nueva (como non).
                                                        

                                                Ayuntamientu de Sariegu.

                              Pel Camín de La Bauga tiramos pal barriu La Canal onde esti panel indicativu nos desplica l'orixe d'esti nome:                                             

                                  Nesti barriu alcontramos una ayalga : ¡¡ La Quintana de Pola!! ....Nesta afamada quintana  grábase pa la TPA el programa diariu d'esi mesmu nome. Célebre n'Asturies tanto ente la xente antiguo - mio madre por nada lu pierde y yo véolo con ella siempre que puedo - como ente la xente mozo, ye apreciada inclusive pola guah.ería.
                                        

La Quintana de Pola, embaxo'l cordal de La Llomba

                                Como soi un enfotáu del programa nun pueo menos qu'axuntar delles semeyes como    homenax al mesmu, ehí van:                        

                               Guapa semeya, ¿eh?....Podemos apreciar el famosu  Invernaderu, La vara yerba, La parva cuchu, Les paques-tiestu ( onde semaron unes florines perguapes), y una mesa pa tomar la parva cuando se rueda mui temprano....¿A que sí, Pola?
                                 Como tamos en Payares, na Seronda, nun me resisto n' arreyavos esta cuca.
                                       

Cuca

                         Entá nun estucaron, vamos, que nun arrincaron les panoyes pa enrestrales; tovía tan nes cuques....Déxense asina apilaes un tiempu , bien amarraes y cola panoya escondío, al abellugu los páxaros, pa que vaya maurando.
                        Cuando yá ten pa ello entama la Esfoyaza, l'enristre les panoyes pa colgales en corredor onde acabará faese'l granu. Esti llabor tresnábase n'andecha, vamos, que s'axuntaben varies families nuna casa pa entainar y que nun-yos supliera tanto...Equí ye onde aprovechaven los mozos pa "ligar" y cantábense cancios picardiosos....
                                Elli:             "Una panoya tiréte 
                                                   mas nun me ficisti casu,
                                                   yá verás cuando te quedes
                                                   solina, pa vestir santos" 

                        Y Ella arrepóstia-y:  " La panoya que tirasti
                                                          nun la quixi recibir,
                                                          porque mio madre nun quier
                                                          que cortexe un mozu ruín". 
                
                               Con estes tribes na tiesta,y dexando un cachín del coral na  Quintana, cruciamos un puente modernu, p'encima l'autopista, camín d'El Villar. 
                                                             

                                Estos "güeyos de curuxa" esbrugaron los barrios de La Vallina y La Olla pola mor del desendolcu ....La verdá ye qu'en media hora escasa plantéme de Santurio en Sariegu; y nun soi Fernando Alonso....
                                 Poco enantes d'arribar a esti pueblín pasamos so esti arcu de trunfu :
                                       

    Y al par d'esta reliquia que se caltién gracies a dellos tentemozos . 

                                   
    







      Al algame'l pueblu alcontramos esti cartelu :
              

                                  Foi'l pueblín de Villar "Pueblu exemplar d'Asturies" nel añu 2002, lo qu' enllena d'argullu a los sos vecinos. Pa qu'esto cuadre hai que xuncir munches voluntaes y trabayar abondo. ¡N'horabona!.
                            Na pequeña plaza'l pueblu alcontramos, amás d'una capiella y el llavaderu, esti....

                              Bebederu pal ganao y cañu pa la xente.  Enriba, un banquín pa calechar.

                           ¡ Qué suerte tuvimos!.......Mirái a quien alcontramos....
                                    

                                                          ¡Platero!.......
                              Yá creciere'l puñefleru....Mirá-ylu.....¡Tien moza!.
                             ¿Que ye aquello de......
                                     -    " Pequeñu, peludu, suave....."
                                     .    Bien suave, yá te digo...
                                     -    "Que si tien los güeyos d'acebache.."  
                                     .   Nun va tenelos...D'amirar pa la mulata que ligare...
                                     -   "Déxolu sueltu y cola pal práu...Y caricia dulde les florines rozándoles malpenes..."
                                     .   ¿Les florines?......Eso yera antaño....Angüaño tien otros pruyimientos...

                               Bueno, prestóme velu y amás en bona compañia. Asína que colamos cuesta arriba pero daqué más contentos.  Darréu acolumbramos no fondero una ilesina perguapa, con un ábside circular, que nos llamó poderoso l'atención (al platu vendrás, arbeyu).
                                                 

             Como nun yera plan de desfacer lo andao dexamos la visita pa la vuelta.

            El camín tornóse más montesu y aprucieron los felechos, árgumes y berizos.

Árgomes   (Úlex.....)

Árgomes o toxos
 ( Ulex ...europeus?)

                   

Brezu

                                                         
                       Y un cachín más p'arriba dimos con esti  carrascu o xardón, conocíu tamién como acebu (Ilex Aquifolium).
                                           

                                ¿Queréis conocer daqué más del Carrascu?.....Pos vamos a ello...
             L'acebu ye un árbolín plani-perenni-foliu (siempren tien fueya).
Ta allugáu al pisu meso- y supratempláu (150 - 1500 m) y présta-y andar de parranda pelos fayeos con dellos tipos de robles. Adáutase a cualisquier tarrén - meyor si ye caliar, fondu y llentu - polo que pue medrar en sitios degradaos formando previesques pa que darréu vengan otres especies más chules a establecese neses fasteres yá más afayadices. Podemos alcontrar mates d'ellos pel Conniu, La Cobertoria, Brañagañones, el Sueve....
            . Dióicu : que tien les flores m. n'un árbol y les flores f. n'otru. Vamos, qu'hai àrboles machu y árboles fema. (un secretu: pue habelos con flores hermafrodites: m. y  f. na mesma flor y nel mesmu árbol, claro).
           . Florez pela primavera, ente mayu y xunu. Les flores, perguapes ya abondantes, son mui visitaes poles abeyes.
           . Tien Polinización entomógama o entomófila, que quier dicir por mor de los inseutos.
           . El frutu ye una drupa colorada  - con 2 ó 4 pebides dientro - y velenosa, porque caltien una sustancia - ilicina -tóxico. Madura p'hacia mediaos de la seronda.
           . La corteya'l troncu emplegábase pa faer lliga, sustacia pegañoso qu'usaba José - un collaciu de la infancia - pa cazar páxaros.

            Ye una especie ornamental preciosa a la que nin yo mesmu me pudi sustrayer......

Pareya de xardones

                                         

Fueya y frutu

              Nunos pocos díes tarán afataos n'alcordanza la Navidá.
* ( Los comentarios téunicos - ya estrozaos por min - débense a la "Guía de los árboles d'Asturies", de los padres de la Patria : Bertu Ordiales y Guillermo C. Ruiz, unos "güelos" de so).
             Y saliendo del "carrascal " nel que nos metiemos pa tornar a la ruta que nos ocupa fuimos pasu ente pasu averándonos al cielu...Bueno...más bien al Altu La Fayuca onde quedamos clisaos contemplando'l Valle de Sariegu ....Insertáu ente montañes, esta ayalga ye un regalu del cielu pa los seres d'esti planeta. Pero lo que fai más solemne y delicada la Vega ye alcontrase protexida pola imponente Peña Mayor....Esa imax que la retina unvía al discu duru pa que nun s'escaeza de por vida...
                                                 

                                Peña Mayor  guardando'l tresvelar de La Vega.

                   Pa que quedare constancia tomemos dalguna semeya pela llomba .........
                                           

Cuando esti paisanucu andaba a la yerba les coses viense d'esti color.

                                       ¿Por qué les vaques de Sariegu nun tienen
cuernos?....Igual ye qu'a la vera'l cielu nun los precisen pa engardise...






                    Fasta'l pinar llegamos.....Pero tornamos pa xintar .....Ya empobinámonos camín de la ilesia que dexáremos atrás.....
                                                  Santa  María  de  Narzana
                                             

                         
      Amás de la moderna espadaña podemos ver adosaos: el cabildu y la sacristía.









                                       Esta ilesia románica - Monumentu Nacional - llevantada, más que probable - nel sieglu XII, ta entamilgada nun cantu dientro la mesma llanera de La Vega. Nel entamu foi ,quiciabes, parte aneya d'un conventu del que nun queden nicios. Pasó por dellos asocedíos traumáticos siendo restaurada por Menéndez Pidal - como non - ya en otru arreglín más tardíu añedióse-y  l'adriu y la sacristía.
                          Santa María de Narzana consta d'una nave rectangular cubierta d'una armadura de madera visto y ta illuminada por tres vanos abocinaos en cada llateral. La portada una ayalga abocinada con tres arquivoltes de mediu puntu que se sostienen sobro dos columnes.
                                               

          ¿Echamos una güeyada a los capiteles?    

Capiteles a mandrecha

 

Capiteles a manzorga

Ábside circular con saetera (ventanu)

              

Frisu sobro arquivoltes

                       ¿Qué ilesina que se precie nun tien al par d'ella un texu centenariu?.....Nun pudimos resistir la tentación de quedar allugaos a esti retablu .... Da fe d'ello esta semeya.
                       

Texu, centenariu.

             Dexemos con nostalxa la ilesia maxinando histories llonxanes pero ......Pasósenos darréu cuando, cabu d'ella, reparamos n'esta tremenda casona....Quién pudiere conocer delles histories paraleles cola vecina ilesia.....Si daqué o daquién nos pudiere cuntar...               

                           Faise un poco tarde.... Ye hora de colar....Col sentir na Vega zarramos la portica  y....

Portica

                                                              ¡Ta llueu, Sariegu!