< De co casa a Cuadonga [6]: Sietes - Anayo - Borines>

              << De co casa a Cuadonga [6] : Sietes - Anayo - Borines >>

                                                          << ¿Una partida a los bolos ? >>

                                       << SIETES  -  ANAYO  >>

¡Qué bien me venía ún d'estos...!
De Sietes a Anayu ¿por qué nun faelo a caballu ?

      Tamos en Sietes, esi célebre pueblín de la parroquia El Vallés - xunto con Piedrafita y Samartín - que pertenez al conceyu Villaviciosa.
      Sí, Sietes ye célebre por sopelexar, como yá vimos, una de les poques manifestaciones renacentistes qu'hai n'Asturies: la Ilesia de Santumederu, mandada construyir por Fernando Suárez del Cantu a mediaos del XVI pa perpetuar el nome de la familia; y cumplióse. ¿Qué pinta esa catedralina tan alloñada de los centros de poder?.
Sietes tamién ye famosa por tar semada d'horros (44 cuntando les paneres, claro), lo que nos fala d'una tierra granible y bayurosa.

Perdíos por Sietes, polo guapo que ye.

¿ Y cuantos pueblos conoces n'Asturies que tengan Casinu?... ¿Nun sabíes qu'había ún?... Normal, los otros tan en Puebles importantes como: Uviéu, Xixón, Avilés, Llaviana, Candás, Castropol, Navia, Pravia, Muros, Sama LL., Figueiras, Villamayor... Bueno, espera un poco, en seguida te lo cuento, que vamos pasar per delantere d'elli de la que vamos p'Anayo.
Anque igual val más nun recordalo Sietes tien un de los cementerios más reconocíos del Principáu gracies al procuru de los vecinos.
Por si fuere poco nel añu 2009 el xigante informáticu Microsoft col enfotu de tapar el fiascu que tuvo Windows Vista sacó un nuevu sistema operaticu: Windows 7. ¿Sabéis ónde fizo la campaña de llanzamientu?... Pos nel pueblín de ¡Sietes!... ¡Vaya ocurrencia! ...{Windous 7=Sietes}. Nun van escaecer los <pelegrinos de Sietes> l'ochobre del 2009, esos díes nel qu'acoparon tolos telediarios del país.  Clases particulares pa tola vecindá de la parroquia y al endefechu quéden-yos de papu tolos equipos la empresa instalare pal eventu nel Casinu, cómo non.
        Cola conciencia que tamos nun llugar percelebráu vamos entamar la xornada de güei solhorru d'una de les construcciones más típiques de la nuesa tierra, al par d'un finxu renacentista y cola vista puesta nel Casinu, puntu d'aunión pa la vecindá y puntu de fuga d'esti pueblu.
      Oi, ¿permítesme una chancia?... [Siete's 7x7=49] . ¿Sabes cuátos vecinos tenía Sietes en 2009?..¡49!, ta too estudiao. Teníes que velos enredar per aquella pantalla táctil... Paecíen guajes el día los Reis Magos.

Esnalando pal Casinu 
Güei tenemos Windows SIETE

       Ente pitos y flautes son les once (11:oo); ye que cavez que vengo a a Sietes apalanco. Pal Chigre nun miro si non.... Escaecemos el verde, el roxu, mariellu ya azul mientres baxamos la Cuesta la H.uente y dexamos a mandrecha una llamatible casona, por mor de los reflexos del sol na so galería, hasta dar con una capiella d'ánimes. Yá veis lo frecuente que ye alcontrase con dalguna n'esti camín aniciáticu: Grases, Breceña, Sietes... Una pequeña oración, a ver si-y facemos a madre más llevaderu'l Purgatoriu, y empobinámos pol ramalín de La Cuesta les Pedagueres, una amplia caleya que nos dexa delantre'l Casinu, nel Barriu d'El Cotaraxu, célebre tamién pol so texu.

Recuerdos del "Casinu"
Muséu del Horru.

        [[ Lo que fuere'l Casinu de Sietes, que ye anguaño Centru Social y Muséu del Horru, foi fundáu en 1914 polos indianos qu'emigraren a Cuba y creando ellí la Sociedá de Recréu y Auxilios: "Casinu de Sietes polos sos fíos en Cuba". La intención primexenia foi llevantar un Consultoriu Mélicu con casa y que sirviere tamién pa fuelgue y cultura de los vecinos. Echó andar en 1928 y funcionó bien nel periodu d'entreguerres pero la Guerra Civil del 36 acabó col so puxu. Nos años 70 convirtió en Teleclub, por mor de la venida Mister Marshall, digo de la Tele, y agora Muséu y  Centru Social]].

      Dexamos el Casinu y embredamos dica'l Barriu de Perviyao, apartaos de la carretera xeneral y sol abellugu del biescu, polo que ye la Cuesta del Campu. Un requexu candial semaú con asines de corredor, otres de tipu indianu rural y siempres d'horros, otramiente esto nun sedría Sietes.

-Hola, rapaza; ¿vais camín de Cuadonga?
- Sí ho; vamos  faciéndolu poco a poco.
- Sabes, ne; cuasi tolos romeros sienten nesti bancu.
- Nun m'estraña, fíu, ye de lo más cómodo.
- ¡Ta lluéu! Que vos afayéis, pelegrinos.

      De  sutrucu una pareya xinetes apruz pela llomba. ¡Qué guapo!. Sentamos nun banquín pa velos pasar y, de pasu, face-yos unes semeyes previa consulta. Aprovechamos pa sacar el llibru del <Camín> a ver que trai d'esti barriu. Resulta qu'equí vive - espero siga con bona salú - el <Curanderu de Sietes>. Manuel García García nun yera curanderu de profesión como podéis pensar. Esti apodu vien-y del rol que desempeñó nuna obrina de teatru -"Más que Paulino"- que representaren los del pueblu; como él interpretaba a un curanderu, y lo facía tan bien, quedó-y pa siempres esti alcuñu. Norabona, Manolo.


     Mientres tamos sentaos unos perrinos vienen a golifar; nun pasa muncha xente y présta-yos el cotilléu. Dalgún acompáñanos al tiempu que terminábemos de percorrer el Barriu d'El Cuetu.  Per una caleya zahorra, a vegaes aformigonada, vamos camín de Llares - yá na parroquia d'Anayo -  arrodiaos de sebes y praos. De sutrucu, apegada a la muria'l camín, apruz una capiella d'ánimes -¡otra! - mirando, clisada, al Sueve.

Un oasis na murnia carretera
de Sietes a Anayo.

      Un poco más alantre empatamos otra vuelta cola carretera xeneral AS-332. L'asfatu ándase bien seique se faiga abegoso, sobremanera al xubir la Cuesta los Malatos. Naide sabe'l porqué del nome pos nun hai alcordanza denguna de malatería nin se tien alcontrao rexistru d'ella; pero ehí ta.
      Enllanamos y, pali-pali, pasamos la Riegabona a la solombra del altu arbolíu que l'abelluga. Y cambiamos de terciu, o meyor de conceyu, pos tamos llegando a Llares que pertenez al conceyu Piloña, tierra de magüetos (que ye como apelliden a los de Piloña).  La primer casa ta nuna revuelta no que se conoz como El Campu, tarrén yá mas abierto que lo que venimos de pasar. Tres dexar atrás la Casa Raigoso , la de La Molinera y la fonte conocida como "La Poza Santiago" la carretera torna otra vuelta a la solombra l'arboláu y vamos faciendo zis-zás de cotino peles curves de La Campona, El Prenel o La Riegona, bien cerca yá del chigre d'Anayo. Como que nun quier la cosa aportamos al puntu más altu del Camín: Anayo, a 467 m/snm. Tamos nel Barriu La Capareda y, ensin saber cómo, delantre'l Bar La Bolera , ¿tienen los chigres imán?.  Son les doce y media (12:30). Hora y media pa 5,5 km; somos la H., la envidia de Zátopek.

Anayo, el puntu más altu la ruta (467 m/snm)
Bar La Bolera

   [Anayo ye una parroquia asitiada al noroeste del conceyu Piloña conformada por ocho núcleos o barrios onde namás vivíen 115 persones nel añu 2014. Tien una estensión de 8,8 km2, ta a 467 m/snm y llenda colos conceyos de Cabranes y Villaviciosa.]

      El pandu d'Anayo, onde acabamos d'aportar, ye como un carrefour: carretera pa Infiestu, carretera pal Altu La LLama (Colunga), carretera pa La Villa (pola que vinimos), carretera pa Robléu, pa Fresnosa... Nosotros restolamos un poco pela rodiada y embredamos dica lo más llamatible, que ye la torre la ilesia.
 

< Santa María d'Anayu
tien raigaños perantiguos,
yá la donare Ramiro (II)
- el ñetu d'aquel Rei Magnu -
a la catedral d'Uviéu
que siempres taba nel ayu:
¡ Venga a nós el to reinu !
Sobre too si ye de papu. 

    [[ La ilesia de Santa María d'Anayo tien pinta ser de los sieglos XVII ó XVIII, mui iguada, eso sí, pero sabemos que ya esistía nel sieglu X por mor d'un documentu donación  por parte del rei de Lleón-Asturies  don Ramiro II (931-951), nietu d'Alfonso III, a la catedral d'Uviéu (ónde nun metíen el cazu los clérigos de la civitas).
     La ilesia tien una nave rectagular y dos bonos cabildros, ún al norte ya otru al sur, quedando la cabecera pal este,como Dios manda. Accédese al templu pela portada l'oeste per aciu d'un soportal embaxo una torre peralta que más paez un turruxón de vixía. Dicen que nun asemeya a denguna otra de la redolada pero a min traime n'alcordanza la de Samartín de Borines, que queda bien cerca. El turruxón ta cubiertu por una cúpula d'arista, abombiada, a cuatro agües, y d'un colorao llamatible dende dellos kilómetros a la redonda.

<Paseando per Anayu
vásete'l santu al cielu,
sobre too si ye a caballu>.

     Dos ayalgues cuando menos tien esta ilesia: Una pila bautismal nel interior ya una estela n'arenisca asitiada enriba la puerta entrada.

         < NA ERA 1215 (1177) MARTÍN Y MARÍA VÓS ROGAI POR NOS>

         Algunos arreglucos debieron facer nel templu estos señores - Martín y María - que se ven con puxu pa pidir a los pelegrinos, sobre too los que van a Cuadonga, qu'echen por ellos unes plegaries a la Virxe (el Purgatoriu debe ser bien h.odíu). Yo tamién voi echar otru, por si acasu... ]]

                     Tres visitar la ilesia xubimos hasta La Bolera a tomar el vermú. Como yera temprano bastante fuimos a xintar a casa, igual nos daba tiempu segar un poco. La verdá ye qu'esti tramu de camín pela carretera Sietes-Anayo ye bien murniu. Que me dean caleya, por dios; pero pa ganar el cielu (Cuadonga) hai que sufrir nesta vida... ¡Viva'l Renacimientu!.

[[ La cuatreada ye una modalidá de bolos que se practica n'Asturies dende...... Ye un xuegu perinteresante pos nun se trata solo de tirar bolos seique hai que facelo con xacíu y según unes normes establecíes nesque l'habilidá xuega un papel perimportante.
 Lo primero hai que conocer el terrenu de xuegu (25x5 m. como mínimu): Un castru, onde tán los bolos, ya un tiru, dende onde los xugadores llancen les boles. La distancia del tiru al castru - ente 10 y 20 m.) depende de la edá y del sexu (teníeis que conocer a la mio prima Lidy).

       El castru ye'l sector comprendíu dientro d'un arcu de ferradura. Lleva once tacos onde van asitiaos los diez bolos: nueve más el biche que se cambia a manzorga o mandrecha según se tire "pa la mano" o "pal pulgar", esto igual resulta un poco más difícil. Bueno, sacante al mio vecín Enrique, qu'algamó a campeón del mundu va yá un tiempu... Dicir que los bolos tán distribuyíos en files de 3x3 colocando'l biche nel estremu de la fila trasera.

Partida BOLOS d'antaño.
Esto ye afición.
(Semeya d'Interné)

   
   Les tiraes más importantes son les cuatriaes, cuando valtes un bolu y depués el biche o pasa pela zona de la cuatriada: La pequeña (11 bolos o más...) si'l primer bolu que tires ye'l de la filera axugada al biche. La mediana (9 bolos o más...) si el bolu que pilles primero ta na fila del medio ( si ye'l del mediu del too, el coloráu =10) y La grande (14 bolos o más si van cayendo otros bolos...) si'l primer bolu que valtes ye'l de la filera más alloñada al biche. Amás, si te para la bola dientro'l castru yá te dan tres puntos de papu. Si la bola pasa pente'l castru, magar nun tire dengún bolu, tamién val tres (porque per fuera val cero) poro a midida que van cayendo bolos vas sumando un puntu por cadún. ¿Paez complicao, eh?.  Ye como la vida mesma, o espabiles o nun faes bolu. Lo meyor que pues faer ye allugate a una bolera y escuchar los armadores (los que coloquen los bolos nos tacos) mientres van cuntando los tantos.
     Hai una que nun te dixi, la cinca = el cenizu; si valtes de mano'l primer bolu de la fila'l biche : CERO PATATERO, magar tires darréu tolos bolos del castru ( esto h.ode muncho).

                            ************************************************

                                                ANAYO - BORINES 

< Si Anayo ta no más alto
toca baxar a Boriñes,
  vamos baxar coles agües
vamos correr llibres, llibres... >

        Salimos tarde de casa, como siempres; el lema ye nun apurase. Total que partimos d'Anayo a eso de les diez y media. ¡Vaya hora pa unos caminantes! Aparcamos el coche nel cómodu parking de La Bolera pero nun pudimos tomar el cafetín porque'l chigre taba zarráu; nun acertamos col día.
       Si Anayo ye'l puntu más altu'l Camín ye nidio que toca baxar, lo pior sedrá la vuelta (nun nos imaxinábemos cuánto); vamos camín del valle. Pasamos a la vera la ilesia y facemos alcordanza de Ramiro (II) ansí como de la estela rogativa la portada; pero nun ye hora pa parase.
       Tres abandonar  les últimes cases del pueblu y llegar a una curvona,  metémonos per un arremadiellu pensando sedría l'atayu que Xurde mienta nel so llibru. Depués d'un ratín...

Baxando pal valle,  camín de Boriñes.

 - ¡Qué vamos al aviesu! ¡Pero nun ves que nun hai señal denguna!...
       ¡Bona la ficimos!. Aquello nun tenía pinta de ser el camín braeru. Al valle llegaríemos pero nun yera cosa d'andar saltando praos, asina que tornamos a la carretera AS-258 . Camentando, roceanos, sobro la direición a siguir aportó un señor que vieno sacanos d'apuros y empobinónos otra vuelta pela carretera hasta que diéremos cola garrapiella afayaiza. ¿Entós pa que tán? . Que nos pase esto a estes altures...
      Nel cruce la parada l'autobús tiramos de frente y depués d'un par de curves vemos la señal a mandrecha.
     -  ¡A la orde!. Entramos nuna pista amplia que nos tien de llevar a Borines.
Tres una  revuelta'l camín dexamos a mandrecha'l caseríu de La Retuerta y nós embredamos pel pandu la izquierda hasta algamar a un cruce onde ...
    - Anda, otra capiella d'ánimes, y dedicada a la Virxe, faltaría.
    - Sí, pero a la Virxe Madre y presidida por un crucifixu.

Entrando en Boriñes

       La Santa tuvo a bien unvianos un caminante que nos indicó'l ramal más llevaderu p'algamar al pueblu, dao que los dos lleven a Borines:
    - Esto yá ye Borines. El pueblu tal ta ehí mesmo. Aquello del fondu ye Vallobal, per onde pasa'l Camín de Cuadonga, si ye que vais p'allá y aquello otro los montes de Viyao.
    - Diremos, pero otru día; güei vamos dar la vuelta en Borines. Ye que tamos faciendo'l Camín a cachinos.
    - Mui guapo, envede dar los paseos pel pueblu tolos díes vais cambiando de paisaxe. Bona idea.
    - ¿Oiga, y aquel pueblu d'a manzorga entamilgáu allarribones?
    - Ye Sieres, un barriu de la parroquia Borines.
    - Gracies, señor; que tenga un bon día. Ta lluéu.
    - Curiao cola cuesta, que'l formigón moyao ye mui resbarioso ...
          Tendrémoslo bien en cuenta porque viennos n'alcordanza'l día que baxamos del Picu La Vara agarrándomos a lo que podíemos.

Metanes del pueblu.
Baxando y baxando...

       Pasamos una casería onde les vaques tan pastiando mansiamente. Baxamos retorciéndonos pela terrible Cuesta Borines y entramos nel pueblu per delantre ca Cardín. Vamos saludando los vecinos pel mediu'l pueblu; algún va collaborando:
     - ¡Per ehí!- indíquente. Nun fai falta preguntar, la pinta dizlo too. En cualisquier casu delles cases amuesen imáxenes y referencies a Cuadonga; ye como si fueres pasando los pasos d'un viacrucis, pero menos ingriento, claro.

- ¡Eh, asina poques gracies!
(Pela Caleya Paderna)

      Baxando'l camín formigonáu pasamos l'horru d'El Brixón, la H.uente la Bolera col so abebentaderu y la célebre casona Palaciu de Borines, asoleyando'l so llamatible palombar. Na parte final de la cuesta, el migollu del publu,  hai una parte asfalcada pero entá nos queda un tramu abegosu, empiedráu, que resbaria que se mata: la caleya Paderna, ausente yá de cases.
     Terminamos el pindiu pueblu y aportamos al ríu. El Ríu Borines , afluyente del Sella, lleva agua enforma. El ruxerrux de les agües exerz sobro nós una poderosa atraición.
    - Peteme quedar a xintar equí; ùltimamente nun alcontramos sitios tan bucólicos como esti: sol, agua y verde.
    -Claro, por eso a esta zona-y llamen la Soledá, magar que yo tengo un ruxerrux internu  como si nun tuviéremos solos del too...
   - Sí, ho; espera un pocu qu'igual vienen falate los ancestros.... Ande, nun se fale más que yá ye tarduco y la vuelta va ser abegosa por mor d'esa cuesta. Son cinco kilómetros, vamos echar el guixu.
   - Si eso averamos depués hasta la ilesia, ta ehí mesmo.
   - Vas tu solu, yo tengo que reservame pa la cuesta; yá sabes qu'entá nun respiro bien por aciu'l catarru.

¡BORIÑES! Megollu del pueblu.

       [[ Boriñes, unos 13 km2,  ye una de les 24 parroquies de Piloña (partíu xudicial del Infiestu) qu'a la so vez ta conformada por once núcleos de población onde conviven escasamente 200 habitantes (igual había más neandertales al rodiu la Cueva'l Sidrón), aumentando enforma'l númberu en vacaciones y fines de selmana dao que muncha xente que pasó a trabayar nes ciudaes sigui calteniendo la remocicada casona heriede. El trasiegu aumenta si cuntamos tamién los romeros del Camín y los turistes qu'apiguñen les sos Cases d'Aldea.

< Quiero colar pal Sueve,
quiero la llibertá >

      Según el Madoz (metanes del XIX) < Boriñes tien un clima fríu ya húmedu por mor de les niebles que la cubren d'avezu. El tarrén ye desbentíu pero granible, sobremanera nes vegues del valle regaes pol Ríu Borines y delles riegues más onde se pesquen - pescaben - bones truches. Producía daquella granu de trigu, maíz y centenu, que se molía en varios molinos cercanos. Tamién se recoyía castaña, zreza, mazana y sobremanera ¡ablanes!, que como sabemos Piloña ye la reina, coronada nel so Festival de l'Ablana. Nin que dicir tien que se caltien el cultivu de patates, hortalices y legumes asina como la cría de ganáu vacunu, llañar y caballar (que'l Sueve ta a tiru flecha) >.
      Y lo que nun podemos escaecer ye'l valor curativu de les sos saludables agües, aprovechaes anguaño na Planta Potabilizadora y antaño nel so célebre Balneariu. Si sedrán bones les agües de Boriñes qu'entá se conserven los güesos d'unos neandertales con cerca 50.000 años d'antigüedá qu'asoleyaron na vecina Cueva del Sidrón, ¡qué te paez, manín!. ]]

El Molín 

             Mientres la collacia reposa yo embredo pela cuestuca que nos separa de la ilesia. Empato cola carretera xeneral (AS-258), la que te lleva a Colunga pasando pel Altu la Llama y a la planta d'Agües de Borines, y xubo hasta la llamatible ilesia del valle. Pel camín alcuentro una sierra llarada de madera peruquier y más al fondu los restos del Molín de Rosequín (¿de Ríu sequín?). Agora ye una periguada casona de piedra visto: Casa d'Aldea El Vallón. A mandrecha, xubiendo un ramalín, aportamos a la esplanada la ilesia. Al cabu'l camín, llaráu de cases perchules, tenemos: la Escuela antigua (Centru social), la capiella y una prestosa Casa d'Aldea: El Raitán de Borines; si quies pasar un fin de selmana tranquilu nun alcuentres sitiu más afechiscu.

                              <Samartín, la ilesia de los Ablaidacos>

BORIÑES: Dende La Soledá vemos a mandrecha l'Aserraderu, siguen la Casa'l Vallón y la Ilesia Samartín, nel centru.
Asoleyada na fastera del monte : Sieres, acolumbrándo'l valle. 

       [[ Samartín de Boriñes ye n'actualidá una ilesia con fábrica barroco-rococó  de los siglos XVII / XVIII magar que les primeres noticies que tenemos d'ella cuerrespuenden al 926, cuando Ramiro II de Llión-Asturies la donare, como non, a la Catedral d'Uviéu.
     Tien una nave rectangular con cabecera plana y  dividida en tres tramos separaos por arcos y pilastres, dos cubiertos por bóveda de crucería y l'otru adinteláu. Nos lladrales lleva adosada una sacristía, al norte, con bóveda d'arista rebaxada. Accédese a ella per aciu de dos portaes, una al occidente, embaxo d'una torre campanariu cuadrada, adelantada al muru, ya otra al meudía.  La ilesia ta mui reformada, claro, pero les portaes, con dovelax radial ya enmarcaes por alfiz, tán dataes nel XVI.

Pintures na bóveda de crucería
ya estela na puerta sur

      Dos coses son de solliñar nesti templu: Una estela de la xentilidá de los ablaidacos, asitiada na puerta sur, con dos mil años d'antigüedá (época romana) y les pintures murales de la bóveda. Igual podíemos meter equí una llápida nel interior de la ilesia emponderando les benéfiques propiedaes salutíferes de les agës de Boriñes y de lo que fuere'l so célebre Balneariu.
       El clan de los ablaidacos pertenecía a  la tribu los llugones, una tribu celta tresmontana que vivía ente los ríos Nalón y Sella con capital en Paelontium (¿Beloncio?)
< La estela ye un ara votiva dedicada por un padre a los dioses manes cola farda la muerte'l so fíu, Antonio Paterno>. Otres xentilidaes llugones fueren: los arganticaenos de Grases, los abilicos de Morcin o los cilúrnigos de la Campa Torres. 
         Les pintures murales, a mou de retícula xeométrica, tán na bóveda de crucerìa y nun tienen otra farda que la decorativa. El patrón de cadún de los cuatro plementos ta formáu por un cuadráu y dos triángulos con motivos vexetales, rocalles, corales o espeyos. ]]

                                  CUMPLÍOS:

Xentilidá de los Ablaidacos,
de la tribu los llugones.

. Al < El Camín Xixón-Cuadonga> de Xurde Morán asina como a la <Asociación Cultural "El Garrapiellu">, los nuesos guíes nesta travesía.
. A la bayura vecinos del Camín que compartieron el tiempu con nós, ¿cómo podríemos  sinón algamar a Cuadonga?
. A los mios diccionarios de la LLingua: DALLA, DGLA, ESLEMA , TEMÁTICU (d'Andrés) y SINÓNIMOS (Prieto y Vicentín el Roxu).
. Blog's: <trurismovillaviciosa.es>. <asturnatura>. <www.lne.es> (artículu Mariola Menéndez). <senderismoenasturias.es>. <pinturamuralasturiana.org>. <www.sanmartindeborines.es>
. A la wikipedia, como siempres. (¿Ánde andabes cuando yera estudiante?)

< De co casa a Cuadonga [5]: Breceña - Sietes >

                   < De co casa a Cuadonga [5] : Breceña - Sietes >

                         ¡¡ A la cata un  culete renacentista !!

¡Curiao colos de Breceña!.  Que son xente encantadoro.
(Faites attention aux Brecegniens. N'alcordanza de Dalia)

                                        <  Dicen que los de Breceña
                                          son xente trabayadoro
                                          nada se-ys pon per delantre
                                          a esta xente entamadoro ,
                                          ¿sedrá la lleche les vaques
                                          o seique la Sidra Coro?.
                                            Preguntarélo en Piñera
                                          qu'en chigre sábese to-o. >

     En Breceña quedáremos el día caberu tres un paseín dende Coru. Col tastu la sidra nel gargüelu  aportamos a un pueblu que lleva nel so ADN esi arume, como canta esta coplina qu'atopamos nel llibru Xurde:
                                       << Pa les fabes Samartín
                                             y el Carme de Santoxenia,
                                            pa facer cares Benitu
                                            y pa la sidre Breceña >>

La primavera bilta en Breceña:
Los mazanos echen flor,
la xente tresna la güerta.

       Agora vamos partir d'esta <Tierra de campesinos> p'averanos a la <revolución renacentista> de 7s.
       Paez qu'entamamos bien el día, pos un migayu antes d'arribar al pueblu sal un rebecu a saludanos. (Cuando digo rebecu pue ser cualisquier animal con cuernucos mayor qu'un caracol y más pequeñu qu'un güe. Perdona, Fredo).  Asitiáu metanes la carretera (AS-332) pega un blincu de los demonios cuando siente'l coche, ruíu raru pa él, y entaina a esmucir pela viesca faciendo zis-zás. ¡Qué pena!. Nun mos dio tiempu a sacar la cámara...
        El rebecu y el sol, que yá anuncia calorín, son badagüeyos de bon día. Aparcamos al cabu'l Barriu del Cuetu, namás pasar el cruce pa Ceyanes, xusto delantre lo que fuere'l  <Salón de Peruyera>, célebre por ser el baille onde tantos mozos y moces de la redolada aniciaren los amores. Cuatro pasos más p'alantre dexamos la nueva carretera xeneral y empobinamos a mandrecha dica la plazoleta'l Chigre, onde tamién tán la Ilesia y l'antigüa "Casa Colmao", otru baille fasmosu que fuere... ¡Anda que nun-yos gusta la folixa a los de Breceña!... Vese que la sidra ¡ye más bono  que la lleche!, que yá ye dicir ....
     Nel Bar de Piñera pues abastecete de cosuques que te puen facer falta nun momentu determináu pos ye tamién una "tienda de pequeñes necesidaes": lates de conserva, embutíu, especies, chuches .... Enantes yera una politienda con toles de la llei, un supermercáu onde alcontrabes pa comer, beber, vistir, calzar o culisquier aperiu de llabranza. Anguaño ta en procesu d'ampliación y quieren poner albergue, dao que'l que había en pueblu peslló. ¡SUERTE!.

La Plazoleta Breceña:
Ilesia, horru y Colmao.

    Sentamos un momentín nel bancu qu'hai delantre' cabildru la ilesia de San Pedru a calzar les polaines; hai que prevenir qu'estos díes (bueno, estos meses) tien llovío a fargataes y nun sabemos con qué se pue ún alcontrar... Tampoco ye que la ilesia sía la <revolución francesa> - pa enriba ta embutía ente les cases -  pero fai les llabores como les más guapes; amás tien una torre cuadrada, bastante alta, que guía los pelegrinos del Camín. Dende un horru antigüu, col solhorru zarráu, echamos una mirada al entornu y darréu vamos baxando a manzorga pela vieya carreterina de Sietes. Hai de too: cases remocicaes y cases clamiando una igua pero'l garapiellu sigui calteniendo'l tastu del pasáu.

Saliendo del pueblu
camín de Sietes (7s)

       Abandonamos el cogollu'l pueblu y empatamos cola carretera nueva onde un cartelu t'invita a xubir al Barriu del Pandu, pero nun ye'l día. Siguimos baxando camín del Barriu La Infiesta onde s'acolumbra la poderosa escuela. No fondero destaca una quintana mui afatada, col horru n'antoxana, que se tien tresformao en xardín; ¡qué guapo!.
Tamos delantre la Capiella d'Ánimes, por fin remocicada dafechu, onde echamos la plegaria de siempres. En frente destaca un cartelu pergrande amosando l'itinerariu del Camín de Cuadonga puestu por la Asociación Cultural "El Garrapiellu".

Capiella d'Ánimes.
(-Xubi per onde la Escuela)

   
             Pero lo qu'apodera'l pandu ye'l <roxo caldera> de la maxestuosa Escuela. Dos pisos tien esta construcción rectangular de principios del XIX. Llevantada pol Conceyu en 1919, col sudu económicu de la vecindá, terminó por convertir en Casona-Albergue tres pasar dellos años ensin llabor mandáu por mor de les concentraciones escolares. Angüaño ye <Centru Social>, la cabera utilidá de cuasi toles escueles rurales. Nun ta mal.

L'antigua Escuela, llueu albergue.
Anguaño Centru Saocial (AA.VV)

 

      Nel prau axacente una señora trata de tresnar el xardín de l'antoxana.
    - Nun acaba de biltar la primavera, ¿eh?
    - Vaya iviernu que llevamos... Frío y llover, llover y frío. ¿Ves qué atrasao lo tengo too?... Nin xardín nin güerta, nun tengo manera de semar nada.
    - Nun faltará muncho; cuando vengan tres díes de sol siguíos vamos tar toos clamiando del llumbagu. En Xixón tamos igual, como ye de suponer. Esto que-y digo... ¿ye verdá qu'en Breceña hebo una fábrica de quesos?
    - Eso se camienta, pero yo nun la conocí.
    - Tenía que ser guapo, ¿eh?, si la tuvieren agora...
    - Yá te digo, cola falta trabayu qu'hai... Probes mozos.
    - ¿Oiga, pa Sietes ye per ehí?
   - Sí, a manzorga, per esa cuestina; per esta otra vas pal Barriu Ñovales.
   - ¿Ye too carretera asfalcada hasta Sietes?
   - Ehí p'arriba das con un cruce. Si tires de frente vas pela carretera xeneral y si tuerces a mandrecha llegues a Busllaz, lluéu...  ¿Hasta ónde quies llegar?
   - Namás a Sietes, lluéu doi la vuelta. Voi faciendo'l Camín de Cuadonga a cachinos.
   - Mui guapo; qué prisa hai, el casu ye entretenese.
   - Bueno, pos cuando llegue al biforcu, decido. Que tenga un bon día, señora, güei hai qu'aprovechar esti caldiu solín.
   - Ta lluéu, que t'afayes nel camín.   
       Mientres paso'l Barriu la Infiesta voi camentando na fábrica de quesos....

(Semeya del blog:<Castiellu de la Marina>
Tamién pues vela nel llibru:
<Villaviciosa y su progreso, 1928>)

        [[El breceñanu Don Constantino Riera foi'l creador de la fábrica  "Quesos de Breceña". Camentaba que yera conveniente aprovechar la riqueza ganadera ellí onde la hubiera, y foi lo que fizo. Les vaques y oveyes de Breceña dieron un quesu y una mantega perapreciao pol so tastu y les sos cualidaes nutritives. 


Los sos fíos Belarmino y Lauriano sacaron la fábrica de casa pa llevala a Careñes y darréu a Venta les Ranes, col nome "La Corona", pa facilitar la so esportación  y venta. Dellos años depués Belarmino independiza y Lauriano (el fundador del Teatru Riera de Villaviciosa) llega a alcuerdos con Nestlé. Depués Belarmino tamién funda una sidrera en Venta Les Ranes, onde taba la Teyera.

(Semeya d'Internet)

Don Constantino tamién ye'l fundador de la sidrera "Escanciador" col so fíu Manuel, que pa to valía esti home. 
Otru fíu de don Constatino, Francisco, tamién independizó del pá y fundó una fabriquina quesos n' Herrera de Pisuerga y otra n'Avilés, "Granja la Luz", que lluéu vendió a Nestlé. 
Entá queda otru hermanu, Maximino, que  tres independizar del pá fundó la quesera "El Molineru" que más tarde vendió a Nestlé, como non, pero quedó col repartu y terminó por fundar LAGISA (Lácteos Gijón S.A.). ¡Vaya saga emprendedores!
Esto ye lo se llama, Don Costantino, "llevar los fíos pol ramal", ¡quién pudiera!]]

       Esin dame cuenta yá toi nel biforcu; nin m'enteré de la cuestuca que vengo de xubir.
Ta nidio: De frente, pela xeneral, a Sietes y a mandrecha una carreterina que t'empobina a Busllaz [500 m], que ye per onde te manden les garrapielles. ¡A obedecer!.

Abebentaderu Busllaz.
Pa Xanes, cuélebres y trasgos en xeneral.

      Da gustu caminar per esti sele oleax a la solombra la viesca, plagada d'ocalitos. Na comba'l camín una riega desemboca nun abebentaderu y pocos pasos más p'allá, tres pasar una casa abandonada,  damos con otru. Peles entenes que me dexa l'arbolíu voi viendo'l pueblu y dellos otros más esparcíos pela montaña.
    - Oi, tu; agradezse... Sientes como abellugu porque un alma nun alcuentres y nada nun me presta andar solu per estos andurriales. La parienta nun acaba curar del catarru por más comedies que-y da'l mélicu.
     - ¿Ves?... Si tomares ferviatos como antiguamente: romeru, oriéganu, yerbaluisa ..... Pero faes casu d'estos cativinos que pretenden curate namás con mirar pa máquines y papeles... A ver, ¿ miróte a la cara como facía Granda?... ¿Cómo va saber lo que tienes?.

Entrando en Busllaz.
 Per detrás de la Capiella , al fondu, tires pa 7s. 

     Pa entrar en Busllaz tengo que xubir un repechu que me dexa nuna encruciyada, a la entrada'l pueblu. Son les once menos cuartu (10:45) . ¡Vaya andariegu!, tres cuartos d'hora p'andar un kilómetro.  Fisgo un poco y busco les garrapielles.
    - ¡A manzorga!.
 Delante mío tengo una capiellina per antigua de la que nunca nun sintiere falar...
   - ¡Voi fisgar!
    Xubo la media ocena peldaños de piedra rústico y quedo nel pequeñu estragal que d'otramiente ye la mitá de la ilesia. Meto les ñaples pela rexa y paezme ver que ta dedicada a San Antón. La cadarma'l techu ye de madera y les cuatro columnes que sofiten aquel aspirante a adriu tamién; siéntome como indefensu y baxo corriendo los seis peldaños....
    - Pero home, ho, cuantos años llevará esto equí... Amás vese que ta atendío.  Debe ser la soledá la que me tien amedranáu... ¡Vaya gallu que toi fechu!

Busllaz

      Busllaz ye un pueblín (315 m/snm) con sabor a antiguo poles sos numberoses cases-corredor y la bayura d'horros, dalgunos con detalles al estilu Villaviciosa. Busllaz ye'l final de la "Ruta los molinos del Profundu" (PR AS-137) qu'entamare en Valbúcar, como yá sabemos, pos tenemos pasao per ella. Esti pueblu tien tamién una Casona-Palaciu del XVIII  y otra ilesia dedicada a Santa Mª la Real.

    Alcuentro la garrapiella mirando p'arriba, per una caleya ensin .... bueno, virxe: prau y llábana. A lo primero mui guapo, ta pindio pero sequino, l'agua nun para. Pero al llegar a una llana que llenda con una plantación de mazanos: barru, llamuerga, charcos y ... ¡A saltar al prau!. Ta llarao de güelgues del xabaril. Unes espineres floríes devuélvenme la gayola por un instante y aprovecho pa facer unes semeyes.

Espinera blanca
(Crataegus Monogyna)

        Ta mui solitario, tengo mieu enquivocame de camín y sigo por intuición el de mandrecha; busco les garrapielles como llocu y voi alcontrándoles, a dios gracies. Llevo andando desde Busllaz más de media hora; fáiseme abegoso.
      Toi altu; nes entenes de la viesca veo un pueblu allargáu a manzorga, ¡vaya grande!. Por fin el camín enancha y siento'l ruíu de les chocarites.
     - ¡Vaques!, por fín nun toi solu.
Enllano. Veo como una nave pintada n'azul y un vecín que s'aproxima con un carretillu cuchu.

Nel Barriu d'El Campón.

    - Bonos díes, señor; ¿pue dicime ande toi?
    - Tas usté en Sietes. Esti ye'l Barriu d'El Campón.
    - ¡ Gracies a dios! Nun taba seguru. Conozo la entrada a Sietes viniendo pela carrtera pero esta....
    - ¿Entós cómo parasti equí?
     - Vengo de Breceña, faciendo'l Camín de Cuadonga, ya una indicación al salir del pueblu empobinóme a Busllaz. Lluéu too caleya arriba... Nun sabía lo que podía alcontrar pel camín...
    - Nun hai pueblu dengún pero la xubida ye un poco abegosa pol barru, ¿eh?
    - Yá te digo, tuvi que saltar a un prau...
    - ¿Pienses llegar güei a Cuadonga?
    - Que va, ho. Voi poco a poco, a cachinos. En cuantes visite'l pueblu yá doi la vuelta.
    - ¿D'ónde vienes?
    - Vengo de Xixón, pero téngolo fecho en munchos díes. Llevo andao unos 30 km. oficiales.
    - Más los de la vuelta, claro.
     - Nidio.
     - ¿Qué pueblu ye esi que tenemos ehí detrás, a manzorga?
    - Eso ye Piedrafita, un barriu de Sietes - dizme'l señor averándose a un claru pa poder acolumbralu. Un poco más p'allá tienes l'Área Recreativa de Campa LLuexe  y los montes aquellos son los de La Soma.

Sietes: horros, paneres y corredores.

          El casu ye que tuviemos calechando un ratu buenu. Los dos tamos xubilaos y yá sabéis qu'últimamente andamos mui sublevaos. Esto del 0,25 echónos otra vuelta a la cai; somos una xeneración de pitu caleya. A Rajoy y la del máster (Cifuentes) deben ruxi-yos los oyidos cosa fina.
    - El cachorru del C's ye del mesmu palu.
    - ¿Pienses que Pedrito pue arreglalo?
   - ¡Quiá!, ta más verde qu'un prau. Nun hai políticos socialistes como los de antes. Nun sé por qué xente como Borrel o Jáuregui nun vuelven al ruedu... Hasta Felipe y Guerra echo de menos.
    - Bueno, esperemos que nun haya que baxalo.
    - ¿Baxar más dalgunes pensiones?...
      El que tien que baxar la cuesta p'algamar al cogollu'l pueblu soi yo. Ta llarao de casines, talo la de Domitila, como reza nun cartelu.

Santumederu de Sietes, cara Norte. 
Nesi cabildru dieron los guajes escuela
enantes de construyir la oficial;
nun m'estraña que munchos colaren pa l'Habana.

         Yá veo la imponente ilesia. Tengo sentío falar d'ella. Ruxe enforma la so portada renacentista pero lo que me sorpriende al vela dende'l cuetu ye la so fortaleza con esos contrafuertes tan altos qu'arrodien la nave ya esa torre-campanariu desafiando al Sueve.
   -¡ Madre, qué ilesia tan grande pa un pueblu tan pequeñu!
         Desemboco na plazoletina aparcamientu que da pal norte sol abellugu d'un texu centenariu, símbolu de conceyos ancestrales. Arródiola mientres voi faciendo semeyes. Al llegar a la portada principal tomo bona cuenta los detalles pero quedo embebecíu al contemplar el Portalín: el Neñu en brazos de so Madre, énte'l miramientu de so Padre y l'abellugu la Mula y el Güe asina como una retafila d'anxelinos.

Santumederu sur. 

      [[ La ilesia  Santumederu de Sietes foi llevantada nel 1555 por encargu de don Fernando Suárez del Canto, provisor de la Catedral de San Salvador d'Uviéu, que metió nella bona parte del so padremoñu personal. Quería dexar  les güelgues de los Del Cantu reflexaes eternamente na piedra mariñana d'un panteón familiar. Trexo pa ello los Maestros de prestixu que taben rematando la catedral de San Salvador, n'Uviéu. La familia Del Canto, colos raigaños en Sietes, pertenecía a la cabezalera burguesía rural de la dómina.
      Yá tamos a mediaos del XVI, les tendencies medievales van camudando.... Yá nun ye solo Dios, agora piénsase tamién nel home. Nesti mundu tamos de pasu pero... ¿por qué mientres vivimos  nun vamos poder esfrutar de toles maravíes que la creación nos brinda? ... ¿Pa qué les creó Dios?...

El cogollu de Sietes

     Llegó'l Renacimientu, y esto va notase nesta catedralina de Sietes. ¿Ves lo humanizaos que tán los eternos Sol y LLuna del frontispiciu?. ¿Y la candial imax del Dios creador bendiciendo la Tierra?
     La renacentista iglesia de Santu Mederu (San Emeterio), nun principiu embaxo la Tresfiguración de Nª Señora y darréu a Santumederu por coincidir esi día'l mercáu,  presenta una nave rectangular que remata nuna cabecera cuadrada ya una torre-campanariu a los pies con un cabildru que da pal norte.
     La nave ta acuarteronada en tres tramos separaos por tres arcos de mediu puntu carpanel que separa de la cabecera por un arcu toral de mediu puntu.
     L'alta bóveda - sambla una catedral - ye de crucería colos nervios descansando en ménsules sacante'l tramu la tribuna que ye adinteláu y estrelláu na capiella. Ente los nervios del cielu celebramos una fiesta renacentista llabrada en piedra: Preside'l Pantocrator arrodiáu polos por ánxeles y el restu la creación: L'Árbol de la vida, la Muyer-Sierpe, el Sol, la Lluna, les Estrelles, páxaros y culiebres y hasta'l Cuébre volador, tan célebre na mitoloxía asturiana. Nun falten tampoco los grifos renacentistes decoraos con animales que recuerden los evanxelistes, como'l toro aláu o'l ferre  amás de símbolos del Calvariu: la cruz, la escalera, el martiellu, les tenaces....

Célebre portada
Renacentista.

     Preside l'altar un retablu de madera, de corte renacentista, que lleva nel mediu una Piedá n'actitú perhumana.  Illumina l'interior per aciu d'unes ventanes de mediu puntu, abocinaes, asitiaes al sur.

El Portalín

     Si esto yera un mausoléu nun puen faltar los sarcófagos como'l que caltién los restos del fundador y con una inscripción funeraria de 1607.
       La llamatible decoración d'esta ilesia amuesa na cara sur, la más vistosa y soleyera, que mira pa la carretera xeneral. La portada principal, de grandes doveles conformando un arcu de mediu puntu, ta enmarcada por dos columnes de fuste estriáu y capiteles vexetales que descansen sobro'l  basamentu. Como protexendo l'arcu, a modo guardapolvu, un entablamentu decoráu  ente dos cornises  que remata nun frontón triangular representando'l Portalín: Xesús, María, Xosé, la Mula y el Güe. Les enxutes, ente cornisa y doveles, tán ornaes col sol, la lluna y les estrelles, símbolos de la eternidá, como pretendía'l constructor. Presidiendo esta ayalga terrenal, un poco eleváu, Dios creador n'humana actitú.   
       ¿Qué más quies pa una aldeina como Sietes, onde Dios perdió'l zapatu ? (Qu'alcontraren los Del Cantu, por cierto, tresformándolu nuna de les poques muestres renacentistes que n'Asturies habemos).
 

Casa Prida
¿Faite falta gasolina?

         Restolo pel pueblu. Lo más llamatible ye la bayura d'horros qu'hai. Dalgunos sirven de cochera pero toos tán llaraos d'aperios, la mayoría obsoletos. Reparamos nes ruedes en H carauterístiques de la zona. Siguimos sacando semeyes buscando ángulos imposibles pa retratar los corredores de les cases, semaes a voleú na fastera la llomba. Dacuando siéntome caleyar  pente cais medievales ya otres veces rurales.  Cuando aportamos al chigre, "Bar Prida", son cerca les doce y media (12:30). Entramos al tiempu que la Cartera. Nun hai naide.  Mientres tomábemos un piscolabis y echábemos una güeyada al Comerciu díbemos falucando col chigreru, que nun paraba de traxinar.
      - Sí, ho; equí tamién ofrecemos posada - retruca mientres tresna una mesa del comedor. Quédense munchos grupos d'escursionistes que faen el Camín de Cuadonga en dellos díes. Tamién hai xente que vien a xintar namás, sobremanera les fiestes y domingos, talo que güei.

<Casasietes>, a la entrada'l pueblu
si vienes pela carretera.

   La próxima estación ye Anayo, a 5 Km pela  xeneral (AS-332). Pero nun ye hora, quedé de comer en casa, igual vienen los guajes. Fixi la vuelta a Breceña pela carretera, yá tuvo bien de folleros y soledá pa gúei; polo menos equí veo coches. Depués de pasar <Casasietes> alcontré el célebre cementeriu, que tien ganao'l premiu al meyor curiáu. Delantre tien un aparcamientu mui afayaizu.

     Poco más alantre una carreterina periguada pue llevate a Piedrafita, ún de los tres barrios de Samartín del Vallés (conceyu Villaviciosa), xunto con Sietes y el propiu Samartín .

    Al llegar a la Infiesta eché la cabera mirada a la escuela, ¡cómo me presta!.                                             
                                             *************************************

-¡Guau, guau! ¿Qué traes pa comer, rapaza?
- Tortiella, xamón y llambionaes asgaya.
 - Entós ponme mesa, mantel y cuyara
que tengo floxera y entá nun toi estragada.

   ESTIMANCES:
. N'alcordanza de Madre y de Dalia, de les que tanto aprendimos de la vida.
. Blog <Castiellu de la Marina>, al rodiu Villaviciosa.
. Artículu lne. <<Todas las ventanas de Sietes> de Xuan Carlos Busto.
. A Xurde Morán y l'Asociación cultural "El Garrapiellu", pol so enfotu col Camín y l'ayuda que nos presten a los romeros poco avezaos, como yo.
. A l'Academia la LLingua, J.LL. Arias y L.A. Prieto, S. Vicente y R. d'Andrés, fontes onde abebento de cotino.

¡¡¡ El SOL !!!
(Tuvi que venir a 7s
 p'alcordame qu'existía)

. A los vecinos de los pueblos, que me saquen de tolos enguedeyos asina como al perru Canelo que tevo a bien compartir xinta en Perviyao.
. A los collacios y parienta que me faen compaña nesta travesía.
. A la Wikipedia, compañera de viaxe, compañera del alma.
. Al Camín en sí, nel que tanto aprendemos y tantes allegríes nos da.
. Al Sol, esi bien tan preciáu, que tevo'l detalle d'amosar, ¡por fin!, les ñaples quedando reflexáu na portada de Santumederu. 

< De co casa a Cuadonga [1]: Xixón - Pión >

                         ENTAMU [1]: Dende  SANTURIO a  PIÓN

                                          ¿Por qué dir a Cuadonga ?

                                           Porque ellí ta l'escomienzu.
                                           << Quiero dir a Cuadonga
                                                 quiero averame hasta'l cielu
                                                 quiero ver a la Santina
                                                 onde prende, Madre, el sueñu >>

El Güeyu Deva, escomienzu oficial del <Camín Xixón - Cuadonga>. 
L'azur ye'l color que nos va acompañar tol Camìn. 

   < < Dende Santurio a Pión
y pasando pel Curbiellu
entamamos el camín
que tien de llevanos al cielu.
   Esto parte de co casa
pos ye Deva l'escomienzu,
sedrá la Deva'l final
 pa los viaxeros del tiempu:
 De Xixón a Cuadonga
sedrá bien guapu'l paséu...
          Años va que yá naguamos
por facer esti trayeutu
pero por uno o por otro
nunca damos col momentu.
   - ¿Por qué nun andalu a cachinos,
si andamos escosos de tiempu?
Ansí tastiámoslu a dulces
 talo fuere un carambelu.
Como diz Xurde Morán
el casu, nin, ye faelu.

Salimos de Santurio col abellugu L'Arcu La Vieya.
¡Nun podemos entamar con más suerte!
La céltica diosa Deva ta con nós.
¡IXUXÚ!
¡Yá somos romeros!

   - ¿Pos Sabes qué te digo, ne?

 Qu' acabes de da-y nel centru.
Esta selmana entamamos,
acabó dar tiempu al tiempu
que si siguimos ansí
va pasásemos el tiempu.

   - Tranquilu, ho, nun t'apures
qu'entá tamos bien en tiempu.
    - Tiempu nun hai que perder,
tira p'allá, ¡a degüellu!
   - ¿Vienes con nós pelegrín?
¿Nun t'apetez dar un vueltu?
Una vegada na vida
tien de senta-y bien al cuerpu.
         Dicen que ye obligación
la Meca, pa un agarenu
 ¿qué ye, que pa un asturianu
la Santina va ser menos?...




   Ellos Tienen la Kaaba
nós la Cova d'orix célticu.
Magar nun se va pola Piedra,
magar nun se va por el pielgu,
vase porque nesi espaciu
mecen la tierra TIERRA y el CIELU.

Ye La Deva  l' escomienzu,
sedrá la Deva'l final,
has de sentir l'abellugu
de tanta divinidá.

      Pues ser creyente o paganu,
bien cristianu o agarenu,
mas siempres te queda un resalvu
 de lo que oyisti de neñu.
 Sías creyente o paganu
 ha carriate'l sentimientu .
     ¿Y si fuere la Santina
 la Kaaba del remediu
a los problemes del día
seique tamién los del cuerpu?
 Vamos dir a comprobalo
 ensin perder  más el  tiempu.
     ¿Déxesme solu, collaciu?
Anda, ho,
namás cono pensamientu..... >>


         Enantes d'entamanar con esti viax aniciáticu lo primero sedrá facer un PLANIG - depués yá veremos si se cumple, lo más probable que non - del percorríu, dividiéndolo n'estayes ente 5 ya 7 kilómetros caduna. Tengamos  en cuenta que lo andao pela mañana hai que desandalo pela tarde hasta'l puntu onde dexemos el coche (esto ye lo que más fiede...)

<P'algamar a Cuadonga
ties que xugar a la oca:
Garrapiella a garrapiella
aportarás a la meta >

          Pa preparar esti viax lo primero que ficimos foi buscar el célebre ya interesantísimu llibru de Xurde Morán, miembru destacáu de l'Asociación Cultural "El Garrapiellu": < El Camín Xixón - Cuadonga >; él sedrá'l nuesu sofitu, la nuesa guía y el nuesu mayestru de ceremonies. Gracies.
                 < Gracies,
                    munches gracies Garrapiellu
                    por balizame la ruta
                    y sacame d'un apuru
                    cuando'l camín se biforca.
                    Que nun me falte'l trisquel,
                    que nun me falte la pista,
                    porque entós a Cuadonga
                    pa min que nun llego nunca >
               
         Tamién buscamos l'amparu d'unos mapes xeolóxicos, d' internet ( wikipedia y dellos blogs) y hasta del Madoc, llibru que nos presta restolar de xemes en cuando.
         Nel llibrín citáu <El Camín Xixón-Cuadonga> proponen facer el viaxe en tres díes d'unos ventitantos kilómetros cadún:
               1. Xixón-Breceña    2. Breceña-Llames  y     3. Llames-Cuadonga
Nós vamos dir trociando caduna d'estes etapes n'estayes más llevaderes, a ver...

                                               PLAN: < De co casa a Cuadonga >
0. < De co casa a Cuadonga: La xida > 0 km.
1. < Xixón - Pión >, unos 7 km.
2. < Pión - Altu La Cruz >, al rodiu los 5 km.
3. < Altu La Cruz - Amandi >, cerca de 7 km.
4. < Amandi - Coru >,  5,5 km.
5. < Coru - Sietes >, cerca de 6 km.
                              ********
6. < Sietes - Anayo >, unos 5,5 km.
7. < Anayo - Borines >, 5 km buenos (yá te digo cola vuelta...)
8. < Borines - Sorribes >, cerca de 7 km.
9. < Sorribes - Llames >, más de 6 km.
                           ******************
10. < Llames - Villanueva >, dicen que 6,5 km
11. < Villanueva - Sotu de Cangues >, 7 kilometrinos.
12. < Sotu Cangues - CUADONGA > , otros 7 km.
                  En total unos 75 kilómetros que como son d'Ida y Vuelta faen 150 km, munchos m'abulten....

Núcleu social de la parroquia Santurio: Escuela, Parque ya Ilesia. 

        Lo normal, lo oficial,  en Xixón ye entamar el Camín a Cuadonga saliendo de Deva, o bien dende'l Camping o bien dende "El Güeyu" p'algamar al Altu del Curbiellu pasando pel Barriu de La Olla. Nós queremos faelo dende casa, partiendo del Barríu L'Aldea, na vecina parroquia de Santurio; a poco más d'un kilómetro del Güeyu.
      Nel post anterior yá esplicamos cómo xubir a la Olla pel Camín del Faru y pasando per El Pinal arribar al Altu'l Curbiellu, puntu onde se mecen el camín oficial y el nuesu particular.  Darréu yá baxaremos a Pión per una caleyina vecina de la carretera xeneral AS-331, más afayaiza por mor del tráficu; pero esto ya forma parte de la ruta oficial
         Sí, emprentamos dende casa pero enantes d'entamar colo que va ser el camín braeru averámonos hasta'l puntu cimeru del pueblu (el núcleu social de la parroquia onde se celebren los conceyos vecinales), el campu qu'abelluga la Escuela Antigua (sede de la AA.VV.) y la Ilesia. Ye preciso que'l espíritu maxistral caltrie en nós asina como'l de San Xurde, el nuesu patrón, que precisa ser conocedor de les nueses fazañes; igual se ve nel crompromisu d'echar una mano cuando'l camín se pon avesíu ...
         Salimos del Barriu L'Aldea a eso de les nueve pa buscar el Camín de la Quintina, yá nel Barriu Carceo. Ta un día de tormenta: lo mesmo-y da por xarazar mesto que por salir el sol de matarrocinos, asina que vamos armaos pa la ocasion: capa, gorru, botes, polaines y hasta un paraguucu pa tornar lo más gordo. Igual tenemos suerte y pillamos l'Arcu La Vieya... Sedría un bon escomienzu.

Peles fauces del Camín Empiedráu.

        Baxamos pel Camín de la Ilesia hasta la Riega de Santurio que s'aprovecha para iguar el llavaderu públicu  del Ponticu.  Xubimos per una carretera perfechamente asfalcada ente les faciendes de Cuesta y Piñera. Yá tamos delante casa Álvaro y Rosario ( q.e.p.d.), anguaño Villa Sara , na curtia caleya formigón del Camín de la Quintina. Empatamos col asfalcu del Camín de la Bermuria qu'aina nos introduz nel Camín del Xial (n'otros llugares nómenlu Xigal), antiguu senderu de piedruca pequeño y arredondiao, como sacao d'una pudinga.

              . Dexamos atrás ca d'Ansón, Nava ya Rey qu'esfruten d'una vista peramplia ya inigualable de toa la redolada - del conceyu - hasta empalmar con otru cachín de formigón , el Camín del Monte, qu'empata col Camín del Picu Roca, que xube dende  Barriu Serantes (Deva). Nosotros a mandrecha, p'arriba. Paramos un cachín p'acolumbrar el territoriu la Deba, "el mundu mundial" (¡qué vistes!, pero sobremanera p'asitiar lo conocío nes paroquies de  Santurio y Deva. 

Tres la paradiña obligatoria tornamos a manzorga y p'arriba - a mandrecha vas Camín de La Cuesta - un atayu mal afechiscu de regodón; yo llamo-y El Camín empiedráu , sí, ho, tamién en Santurio tenemos un "camín empiedráu", d'esos que 'alcuentres nel Camín Xacobéu o nel Camín de Niria. Per esti camín paso de cuando en vez y enxamás que cruciare con naide, paez míu. Sé que tamién lu patien los madereros que vienen a la tala l'ocalitu, pero nunca di con ellos. Va dexanos mesmo n'Área Recreativa del Monte Deva. De xemes en cuando xubimos equí pa poner unes costielles a la brasa o namás por dar gayola a la vista; tienes a los tos pies el Conceyu de Xixón. Yá llevamos andaos dos kilómetros y mediu (2,5 km), pero abulta daqué  más por mor lo empinao de la cuesta. Nun paramos de xubir dende que salimos de casa. 

Al dexar atrás l'Área Recreativa y entrar nos Pozos de l'Arena
 nun podemos evitar la gayola de la vista al comtemplar la Xixia. 

      [ L'Área recreativa del Monte Deva - 426 m - ye un espaciu natural con más de 220 Ha destinaes a ser unu de los barquinos o polmones del Conceyu per aciu la recuperación d'una viesca autóctona onde se ta esaniciando l'ocalitu y el pinal pa llaralu de: bidulios, carbayos, ablanos, crezos, tilos, pláganos, capudres (Serval de los cazadores),dalguna castañal ..... Los pinos tovía van durar munchu tiempu, güelen tan bien...
Arriendes d'esto tamién pues esfrutar nel Monte d'una entena con barbacoes y xuegos infantiles asina como d'un Centru d'Interpretación, un Apiariu y un Obsevatoriu Astronómicu, territoriu comanche de Vidal, miembru cabezaleru de la Sociedá Astronómica Omega y amante inseparable de les estrelles, quiera la Deba por munchu tiempu].

Necrópolis tumular del Monte Deva. 
Faciendo alcordanza los ancestros, tan presentes. 

            Salimos pelos Pozos de l'Arena que nos pue dexar nel aparcamientu del Centru d'Interpretación del Monte Deva pero güei nun tenemos tiempu pa ello. Tornamos a manzorga pel Camín Forestal; son más de 4 km de pista zahorra per un viesca solombriega onde nos presta ver tantu árbol autóctonu. En munchos momentos el sufríu abeduriu pasa a ser el dominante.Tovía vamos alcontrar otru Área recreativa hasta dar con unos cartelos qu'anuncien una Necrópolis Tumular, ye dicir, un cementeriu megalíticu. Equí les tumbes - más de 9 núcleos espardios pol Monte - tán enterraes, maxino que pa evitar estrozos, ¡qué pena! (peor sedría quedar ensin ellos). Salimos del Güeyu Deva, la diosa celta de la tierra astur, de les agües, de la fertilidá, y siguimos per tierra de dioses ancestros. El Monte Deva foi ún de los centros sagraos más importante de la rexón, xunto col Monte Areo, dende va más de 4000 años hasta los tiempos castreños en pierden importancia.

SERIDA: Centru Esperimental Biotecnoloxía Animal.
(Per esa carreterina de mandrecha llegues al Curbiellu)

          Al final de la viesca empatamos con una encruciyá : a mandrecha pal Apiariu, otra pal Valle Rioseco, a manzorga camín de Cementeriu y del Barriu de la Olla. Lo nuestro ye de frente, camín del Altu'l Curviellu, masque tengamos que baxar.
Lo primero que nos llama l'atención son unes oveyes pastiando nun zarru con unes construcciones modernes que nun son nin cases, nin cuadres... Buscamos dalgún lletreru: Centru de Biotecnoloxía Animal (SERIDA= Serviciu Rexonal Investigación y Desarrollu Animal), ye dicir, un centru d'investigación.
Dispón en 12 Ha. d'unes instalaciones con Oficines, Llabortoriu, Bancu de Recursos Zooxenéticos, Acuariu, Sala de Necropsies, Cuadres y Almacenes. Lo más bultable ye'l so trabayu en cuanto a la conservación de races autóctones y en peligru d'estinción; hai qu'ameyorar la cabana ganadera asturiana con nueves tecnoloxíes reproductives y control sanitariu.  El SERIDA tien otros centro n'Asturies: Villaviciosa, El Carbayal d' Illano, La Mata Grao y la Cueva Palacios de Quirós.
      
                                              ***********************************

Baxando dica Pión...

PIÓN, a teyavana. Puntu caberu 1ª Estaya onde debemos llegar pel Camín Real de Pión.

        [ El Camín Real de Pión yera nos sieglos XVIII y XIX la vía principal d'accesu ente Xixón y La Villa (Maliayo) siendo mui utilizáu pola xente en xeneral y los pelegrinos del Camín Xacobéu y C. Cuandonga en particular dao que yera más curtiu - pesie les xubides y baxaes - que'l Camín de les Mariñes que diba per Oles, Quintes y Quintueles]

Altu d'El Curbiellu, embaxo la llomba'l Castru.

            Per una carreterina estrencha, d'asfaltu y con tendencia a baxar vamos empobinamos camín del Altu'l Curbiellu, sitiu míticu pa montañeros, ciclistes y caminantes de medianu percorríu, talo nós ( esto echándonos un "pegote"). Preguntamos a una señora cómo se llamaba esi ramal:
     - Nun tien nome; nós dicimos el Camín de casa Tal, según el vecín afayaizu.
Asina que tomamos el determín de bautizala como'l Camín del Serida.  
       Tres un kilómetro, más o menos, aportamos al Altu del Curbiellu y empatamos col Camín Real de Pión.  Echamos una güeyada a toa la redolada y tornamos a quedar clisaos cola fermosura de la costa y l'entornu. Bien sabíen los moradores del Castru del Curbiellu , un poco más p'arriba, ande s'asitiaben. Dende equí vémoslo too, esto ye un Elogio del Horizonte : Igual ye eso lo que quixo encumar CHillida: La mar y San Llorienzu, Santa Catalina y el Cerru, el Puertu y el Muelle, l'Azur y el Verde... Nun s'escapa el Cabu Torres nin La Campa, nin Les Marismes per Oles, Quintes y Quintueles, y hasta acolumbramos Cabu Peñes ... Una ciudá abierta que tien tresportao por mar los suaños de tierra: fierro, carbón, sidra o productos agro-ganaderos alluendi los mares.  Cilúrnigos y romanos, moros y cristianos, nobles y plebeyos, lliberales o absolutistes, roxos y azules .... toos, esfrutaren d'esta ayalga.

¡Què gociada tabayón!
- Vamos tomar un sorbiatu.

         Enantes d'arrancar entramos n'El Barín del Curbiellu, obligao pa tou bon caminante ; nun hai romeru que pase de llargo.Ye un chigre-tienda mui antiguu, onde te sirven un caldu caseru de lo más reconfortante. Peles estanteríes vese de too: chorizos esperando'l pote, madreñes o hasta un garabatu p'atropar la yerba los pros onde tan pastiando vaques y oveyes.   Gracies a l'Asociación Cultural "El Garapiellu" les parés tan llaraes de cartelos naif colos finxos del camín de Cuadonga, asina que sacamos unes cuantes semeyes que van ser la meyor referencia que tengamos. Amás, cuando te ven la pinta, siempre hai daquién que t'entruga o t'informa:

     - ¿D'ánde venís? ¿ Vais pa Cuadonga? ¿Pensáis llegar nel día? ¿Cúentos díes echaréis? ¿Ónde pensáis quedavos? . Vaya tiempu qu'escoyisteis...
    - Somos de Santurio y queremos facer el Camín de Cuadonga a cachinos, ente 5 a 7 km al día. Nun tenemos prisa nin tiempu pa facelu en 2 ó 3 díes. Hai qu'arreglase...

FINXU: Vamos bien pel camín enllamuergáu. 
La garapiella del fondu
diz que tas bien afayáu.

    - Pa llegar a Pión podéis baxar per esta caleya, a manzorga. Pero colo que cayó esta temporá sedrá más una llamuerga. En Bárcena tará meyor. La ventaxa son los 2 km qu'aforráis de dir pela carretera.
          Los primeros pasos, per una carreta asfalcada, prometíen pero enseguida tuvimos qu'abandonal per una antigua caleyuca de carru.
     - Esto ta peoer de lo que cuntábamos. ¡Valla llamuerga! - Y empezamos a saltar de sucu en sucu pa nun empotranos hasta la rodiya, menos mal que traemos polaines.

Pasamos una fonte nuna llana y darréu un pequeñu tabayón, de lo más prestoso. La fastera rezume agua per dayures pero polo menos nun llueve. A lo llargo d'un poste la lluz lleemos:

SEMBLANZA: La mesmíma GRUTA nel Monte Auseva.

                                                             D.E.S.P.A.C.I.O.
                                                                                    - ¡Vaya, ho; nun me diere cuenta!. Gracies

D.E.S.P.A.C.I.O: Aportamos a Bárcena

         Y por fin aportamos a unes cases; yá teníemos ganes onde, pa contener la fastera que-yos venía encima, llevantaron una rocalla. Aprovechando los entrantes y salientes de la mesma crearon una semblanza del Camín de Cuadonga: Nun resquiciu taba la Santina abellugada na cueva, a manzorga la Cruz de la Victoria, enriba la Basílica vemos la Cruz de Priena sobro un abultamientu la roca. Embaxo la Cueva una piscina azul que resembla'l pequeñu llagu que se forma por mor del tabayón del Deva, nin la Fonte de los Deseyos.  Nun pue faltar la escalera que nos asciende a la Cueva nin les tres cruces, dolosía de la Basílica. L'albergue pelegrinos incrustáu nuna fondiega y la escolanía cerca la Basílica. Equí nada nun falta porque Pelayo xurde arrechu enarboliando la Cruz de la Victoria.
     Prestó a esgaya alcontrar esti rústicu "panel", semeya rupestre del finxu caberu la ruta, pero hai que siguir. Nel zarru una finca, recortando'l cierre d'escalomia, pues lleeer dellos cartelos alrodiu'l Camín: Xixón, Cuadonga, Pión.... Too nos evoca'l motivu del viax, visitar a la Santina.

Val de Pión, ente'l cordal de Pión, Picu Curiella (nel Monte Cañéu), Altu La Cruz y ..........

      Un poco más alantre, charrando nuna caleya formigonada, frente un garapiellu cases, tán tres paisanos del pueblu.
     - Bonos díes, ¿puen dicinos ónde tamos?
     - Bárcena. Tán nel Bº de Bárcena.
 [Y facemos alcordanza la etimoloxía d'esta pallabra celta: bark= barga (bargina=campu inundáu) . Per otra parte una bárcena ye un tarrén inclináu. Les dos coses coinciden equí: una parte pindia ya otra na vega]

El Ponticu del Llantáu, na Vega.

      - Asina qu'esti barriu llega hasta'l fondu...
     - Sí, hasta la vega.
     - Onde pasa un ríu...
     - Sí, el Ríu la Vega, qu'un poco más abaxo mez col Ríu España.
        Una carreterina recién asfaltada llévanos hasta la riega que paez l'Amazonas; últimamente nun fai otro que llover... Pasamos la ponte y empatamos cola xeneral As-331Siero, que vien de Xixón y llega hasta La Pola (Siero). Nós tiramos a manzorga, camín de Casa Pepito, pel Barriu del LLantáu, onde damos por terminada esta estaya.  Yá tamos en Pión, a unos 8 km de casa.



                               [ PIÓN ye una de les 41 parroquies del Conceyu Villaviciosa (Maliayo na Edá Media). Ta asitiada nun valle, con tierres de perbona calidá, barríu por los cuatro vientos y al que se llega por cuatro cuestes que vienen del Cordal de Peón (Altu La Cruz), del Altu'l Curbiellu, Monte Curiella y ..........
Llenda al norte con Arroes y Quintes, al sur con Candanal, al este con Niévares y al oeste con Deva. A mediaos del XIX tenía 204 cases repartíes polo que güei son los barrios de: Bárcena, Casamoria, Fonfría o el Llantáu. Tamién tenía - y tien - una escuela pa neños y neñes, al par de la Ilesia San Salvador, en Casomera (Casamoria).]

-Venga, sienta y toma un pinchín.

        Hai delles coses que ver en Pión amás de casa Pepito: Alguna casa típica de corredor (tamién vimos una mariñana), La Escuela, La Ilesia, y sobre manera'l Palaciu del Conde, onde nos acaeció una aventura (<Lo que-y aconteció al Mociquín de Pión, aspirante a paparazzi>). Pero esto yá vos cuntaré na próxima salida. Agora vamos dar una vuelta pel pueblu y rematar nel afamáu bar-restaurante, puntu caberu esta estaya, como sabéis. Ta llueu.
     En principiu namás pensábemos tomar el vermú pero... Llegaron cuatro señores, sentaron nuna llarga mesa, acutada cerca d'una estufa, que caltenía una cocinuca llétrica: ¿ ?. Esperamos hasta que llegó'l camarero con una bandexa carne cortao talo si fuere xamón. Nun-y diere tiempu a posala y yá taben los comensales  pasándolo pola piedra...
      - ¡Esti güe ta superior!
     Total, quedamos a comer; y nun sedrá la cabera vez. Al endefechu, quiero saber daqué más al rodiu'l Mociquín de Pión....
    

                 SANTURIO : La perlla verde del conceyu Xixón  

SANTURIO, en primer términu, la perlla verde de la Costa Verde.

                                   
       Santurio ye una de les 26 parroquies rurales que formen parte del Conceyu de Xixón (capital de la Costa Verde) qu'al tiempu ta dividíu en seis distritos con 24 barrios ( nos que s'inclúin: Xove, Tremañes, Veriña, Roces, Contrueces o Ciares).
        Conocida como la perlla verde del conceyu ta asitiada nel centu-este del mesmu, llendando con Deva, Caldones, Castiellu Bernueces, Cabueñes y Vega.
Cerca 300 vecinos (nel añu que s'espublizó'l Madoc tenía 493 ) viven nuna alfombra verde d'unos .pocos  km2 repartíos per tres barrios: Carceo, La Cuesta y L' Aldea.
         Los neños acuden - n'autobús de Medina - a la Escuela de Cabueñes n'horariu de mañana, si bien puen quedar a almorzar teniendo actividaes hasta les cuatro la tarde. La escuela antigua, una orixinal ayalga arquiteutónica mui remocicada, abelluga l'Asociación de Vecinos onde realicen bayura d'actividaes: Llectura, Marroquinería, Baille, Pintura, Yoga, Pilates y Teatru.  Tamién faen salides pel entornu ya escursiones culturales a otres provincies. Nun falten celebraciones como la llegada los Reis Magos, l'Antroxu o'l Magüestu que lleven apareyaes representaciones teatrales, normalmente polos propios vecinos per aciu'l grupu caseru "Los intrépidos de Santurio" (El so Direutor ye'l cébre Lisado S., cabezaleru incombustible de la Compañía Rosario Trabanco). La AA.VV. agasaya, un añu sí ya otru tamién, a los vecinos de la Tercera Edá nuna comida homenax onde se premia la casa más engalanada del añu.
  

..................................................

        La ilesia parroquial, embaxo l'advocación de San Xurde, tien un cura compartíu coles parroquies vecines que les atiende como puede. Los domingos diz misa normal a eso de la hora prima (les 10 de la mañana)  mientres se celebra misa cantada'l día del patrón (23 d'Abril) y na Sacramental de primeros de Setiembre; una pena nun se caltenga la Fiesta cola descarga de Fueos Artificiales, fía la
del 14 d'Agostu, que tantu puxo nos tien dao n'años bien cercanos.

Llavaderu d'ElPonticu (XIX), nel Camín de la Ilesia.
Iguáu delles veces, la cabera dnel 2013.

       Entá se caltienen na parroquia dos llavaderos públicos mui remocicaos: El de Viacao, tirando pa La Cuesta y el d'El Ponticu, baxando de la Ilesia pal regatu.
[Esti llavaderu
        Santurio foi dende siempres , y entá sigui siendo en parte, una parroquia rural: El ganao vacuno, maíz, castañes asina como los productos de la güerta (fabes, arbeyos, patates, tomate, pimientu, y verdura) y sobre tou les mazanes yeren el mou de vida de los nuesos mayores. En tiempos del Madoc el maestru tenía derechu a maíz y¡ trigu!, que de too había nesta parroquia. La sidre yera la bebida típica y dominante nuna parroquia qu'esportaba a fargataes por mor de los pimpanudos llagares existentes; nun había vecín ensin él. Esto sí que yera <denominación d'orixe>, doi fe.
       Va un par d'años, aprovechando l'añal Homenax a los Mayores, fízose un reconocimientu a les muyeres de Santurio, a les que trabayaben la facienda y depués diben vender al mercáu. Na Escuela Antigua queda como recuerdu una escultura fecha pol Alcalde Barriu (Presidente de la AA.VV.) ; nós queremos contribuyir a esi homenax con esti humilde poema:

Homenax a les MUYERES de Santurio
(2017. J.L. Pérez)

              <   ORACIÓN    >
    << Sirva esta bucólica escultura
d'homenax a les muyeres de Santurio.
trabayar a modo con denuedu ya altruismu
pa brindar de la güerta sos productos
a la civitas Xixón, los sos vecinos.
     Que Dios vos bendiga y premie
tantu sacrificiu . Agora y siempres
polos sieglos de los sieglos.
¡Ai, muyeres de Santurio!>>

       Tamién ficimos una torna en castellán:

Esposición de trabayos
nos diversos talleres de la AA.VV.

               < ORACIÓN >
    << Sirva esta bucólica escultura
de homenaje a las mujeres de Santurio.
Trabajo sordo, ejemplo de valor y de altruismo
para ofrecer de la huerta sus productos
a la ciudad de Gijón, a sus vecinos.
      Que Dios os bendiga y premie
tantos sacrificios. Ahora y siempre
por los siglos de los siglos...
¡Ay, MUJERES DE SANTURIO!>>
 
       Si te petez dar un vueltu per Santurio, fáilo, nun quedes coles ganes; hai entovía xente Xixón que nun conoz esta parroquia. Ven en coche o n'autobús de Medina, pero ven. Cuando te fartuques d'andar déxeste cayer pol Bar Les Peñes o Casa Carrió (namás abre'l fin de selmana) y si quies cocina gourmet vas al restarant de Los Nogales, toi seguru que güelves.

La nuesa guía y madrina

                 AGRADECIMIENTOS

. A Xurde Morán, guía d'esta travesía per aciu'l so llibru:<El Camín Xixón-Cuadonga>.
. A la <Asociación Cultural el Garrapiellu>, promotores d'esta ruta.
. A la Wikipedia, onde siempres rebuscamos.
. A don Pascual Madoz, perconsultáu p'andar de pueblu en pueblu.
. A la costiella, que s'escaez de so casa pa contemplar les ayenes. por nun dexame solu.