jueves, 21 de julio de 2016

Dica l'Olimpu: Picu Llosoriu


    En ca Dios, nos finxos de Lugh

Nos rimeros deL'Olimpu arrónida : Picu Llosoriu. 
Nel finxu'l cielu - ilusión inalgamable - pues acolumbrar el <<Camín de Niria>>
         Cerca. Bien cerquina... Na última salida a Peña Regá quedamos nos rimeros del arrónida Picu Llosoriu  A tiru flecha lu teníemos pero nun mos dio'l tiempu a contemplar la tierra dende l'Olimpu arrónida* y, con gran duelgu  pero con ansies renovaes, tuvimos que dexalo pa GÜEI: 2o de Xunu de 2016, un llunes como otru cualquiera...

 *Los "arronidaeci" y los "coliacini"  foron clanes prerromanos que dexaren güelgues existenciales nel conceyu d'Aller. Na ilesia románica de San Vicente de Serrapio guárdense delles lápides, una dedicada a Xupiter y Máximo polos arrónides y coliáceos.

Tamos de suerte: ¡¡Pal LLosoriu!!
      ¡ Pero qué día !!!
        Una islla de sol nel mapa del tiempu. Difícil alcontrar otru más axeitáu: calentín y llimpiu, ensin malpenes ñublina, ensin chornu... Un día fechu pa caleyar... Si hai dalgún "peru" que pone-y al día ye que voi solu. Una pena que la costiella nun puea esfrutar d'esta ayalga. Claro que darréu fecha la ruta... Pero pa min que perdió perres... Ganeles yo, yera'l mio día de suerte.
         Salí ceo de casa, bueno... Hacia les ocho y... Siempre salimos más tarde pero güei quería baxar temprano a Cenera u asina poder xintar a  Panoya. El día de Miruxeo comimos perbién nel "Llagar de Cenera".  ¡ Qué fatu ! Esi día unos paisanos camentaren que daquién de Villar ficiérelo ¡ nuna hora!.... Yá te digo...

          Pa llegar a Villar de Gallegos siguimos esta
Ruta d'averamientu:
 Xixón - Camocha -Minera - Mieres (> Figaredo) - El Pedrosu - Cuna - Cenera y VILLAR de Galleos, puntu de partida d'esta caminada.

Villar de Gallegos

                    Aparcamos na plazoletina a la entrá del pueblu. Una fonte modernizada ya una curuxa, entamilgada nun cuetu,dannos la bienllegada. Esta vegada nun alcontré la grana de la reseva d'Hunosa camentando na plaza. Asina que nun pude escuchar los conseyos que precisaba pa esbillar el camìn más afayadizu. Pero fale con una señora:
     - Pal Picu Llosoriu ye per ehí, ¿non? - dixe apuntado dica la empruna cuesta d'amanzorga.
     - Sí, tires hasta un depósitu d'agua, lluéu darás con otru y sigues camín de la Collá. Tu, tou p'arriba. Vese bien cual ye...
           Vese, pero perdíme nel pueblu y vime obligáu a entrugar un rapaz.
     - Sí, ye pel camín asfaltáu hasta los Depósitos d'agua, tienes dos. Lluéu pista ancha hasta la Cuevona.
     -¿Hai que llegar al Mayáu de los Pastores (La Cuevona) ?
     - Non, pues atayar pel monte; pero pela pista ye más cómodo... El Llosoriu veráslu de frente.

Delles rutes pel entornu de Cenera. Güei: <<Villar de Gallegos - Picu Llusoriu>>

. Track de la Ruta d'ida y vuelta:
Villar de Gallegos - Dépositos d'agua (1u y 2u) - Campa Tíu Vicente ( Picu Cuitu) - Colláu Palmir - Picu Llosoriu.


<< Per una camín avesíu
 vamos dexando solombres
 de tarmudos abedurios
        y alcordances d'otros dioses >>

          Pali-pali y primer Depósitu, que ye poca cosa. Siguimos hasta'l segundu, ya dalgo más grande.
          Termina l'asfaltu y entramos nun camín solombriegu, gratible por demás nun día tan calurosu.
Y xubir, siempre xubir, per una afayadiza carreterina que va rayando'l bidular. Sí; l'árbol predominante ya la bidul. Tamién vemos dellos castaños, algún fresnu, ablanos, salgueros y prestoses espineres, salteaes equí y allá...

Espinera o Mayuelu (Crataegus monogyna)
             La Espinera o mayuelu (Crataegus monogyna) - al que la muyer noma "manjolín" - ye un arbolín o arbustu plani-caduci -foliu d'apariencia débil pero perfuerte y resistente como'l que más.
Esti Crataegus pue midir hasta ocho metros. Tien la fueya simple, peciolao y fondamente lobulao. De flores hermafrodites, agrupaes en garapiellos a mou de corimbos, presenten dellos estames ya un únedu pistilu (monogyna) protexíos por 5 pétalos candes (blancos) que llamen munchu l'atención al romper la monotonía  verde primaveral y por un arrecendor carauterísticu. Que-y lo digan a les abeyes...  
     Florez d'iviernu a primavera   frutiando na seronda unos pomos coloradinos, con pevidina dientro, que son el petite de la fauna avícola: ¡ Qué dulcinos tán los pruneles!
     Emplégase como zarru nos praos y, sobremanera, como patrón en dellos inxiertos: perales, mazanos, cadápanos,...).
     Cola flor curao íguense ferviatos sedantes y cardiotónicos (voi tener que prebar...).

Acolumbrando asturcones peles campes del Luxoriu

          Tres pasar el segundu Depósitu d'agua, yá mayor que l'anterior, entramos nun camín malpenes enllamuergáu, magar les lluvies de recién, sobro un pisu de zahorra.
      Dexamos atrás una cuadra abandonada ya multitú de plantes xabaces afatando el camín: felechos, brezos, dalgún toxu, .... Acolumbramos delantre nueso bultables praeríes nos valles de les llombes esmochaes. Vemos caballos pastiando, dalgún con pinta asturcón, nel silenciu la mañana baxo un azur rellumante sobro'l tapiz sinople de la campa.

          Caminamos  per una enantada pista que nos pue llevar a la Campa Viscarrionda* y d'ellí, disviando a manzorga, acercanos a La Cuevona (Ermita del Mayáu de los Pastores) onde yá s'agarra la pista que te dexa na rimada del Llosoriu. Esa ye la idea que tenemos, eso ye lo que nos encamentaren pero como diz el refrán ... <Fíu de cabra.... Cabra o cabritu>. 


Dende´l Cuitu percorremos cola mirada - de momento - 
el Cordal de Cuba, col Picu LLosoriu al fondu.
Esto va de cote: ¡A caleyar!

     De sópitu columbramos unos picos, al este y al oeste, que conflúin nuna campa perprestosa que que da pa los cuatro vientos.       Salimos de la xeneral y tiramos a manzorga p'averanos al carrefour camperu. Unos caballos que pastiaben al rodiu un desfechu peñascal asitiáu metanes la campa espantaren, roceanos, al averanos a ellos colando dica'l picu occidental. Un cartelu diznos que si baxamos pee esa pista algamamos a Villamer (Villameri), cola Vega de Riosa a tiru piedra.

<<Y viennos n'alcordanza l'encargu que-y fixere Numio de Piniolo al so fíu Melendo: 
          - Neñu, ye preciso que t'averes a Riosa. Has llegar un alcuerdu con Gesabo por aciu d'un intercambiu de tierres nes fasteres del Colláu Palmir. Quedó pendiente la robla por mor de la miu malura. De pasu conocerás les sos fíes. Tien una, Lena, que me paez mui apropiá pa ti. Lleva contigo dos criaos ya unos bonos caballos.
        Y empobinó Melendo peles faldes del Llosoriu. Quixo acompañalu'l Principe Magilo pa rindir visita a una familia d'arruxos que moraben allá d'onde ñaz el ríu Llamo, l'arteria de Riosa.
         Cuando entamaben la baxada, un criáu riosanu salió-yos al pasu dando glayíos: 
         - ¡L'andanciu! ¡L'andanciu! ¡Ta tola Vega encetada!
         - ¡La peste! ¡ Hai peste en Riosa! Tendremos d'aselelar unos díes.
         Asina que tuvieron d'esperar l'aleluya, guardaos nueve díes, nuna casería que tenía'l de Cenera en Villamir pal cultivu de l'escanda y l'aceite d'abiyota . Esto nun diba col vagamundu, que se consideraba inmune a les pestes, seique la so vieyera y les munches calamidaes pasaes.
         El casu ye que'l nuesu mocín nun algamó conocer a Lena, resguardada de la peste colos pas nun palaciu'l Monte Trapa. Tevo que conformase con saludar al hermanu, col que robló l'alcuerdu>>.

     Semeyes y más semeyes cola Canon encarnada. Aquel montón de piedra suelto y acorropinao nel centru la campa danos qué pensar. Alcuérdome de los antiguos collacios de Cole y del actual grupu de Families xuncíes pol Asperger . Saco'l móvil pa manda-yos una foto per guasap y... De sutrucu, ensin más nin más, cálaseme la cámera dexando esta nota:
          - <Toi al paru> , o dalgo asina...

¡Plasmo!
Enfilando'l Picu Cuitu dende'l ¿Túmulu? laCampa S.V.

    ¡Dios, qué ye esto!... ¡Yo qué fici!... Nada... ¿Será por mor d'esta rocalla ? ... Y ye qu'en cuantu la vi viénome n'alcordanza un túmulu, un dolme... Porque tengo lleío nel blog d'Acebedo que per esta zona, nun va tanto, había dólmenes, túmulos, esteles y ¡hasta un cromlech!... Tamién tengo alcordanza que los llugares emblemáticos, onde los nuesos ancestros asitiaben estos monumentos funerarios y de poder, precisaben de ciertes caruterístiques:
     . Tar en sitiu altu
     . Averaos a una fonte y...
     . Que tean percorríos por ciertes corrientes magnétiques.



     Aquellos peñones... Aquellos picos... Y xusto un poco enantes d'aportar a la campera vimos pingando sobro'l camín una fonte mui afayadiza p'abebentar el ganao.
     ¿Por qué la cámera del móvil entró n'stand-by?... ¿Soi un manaces? (Soilo)... ¿Foron les corrientes magnétiques?... Siguí tirando de la Canon, cuestarriba, tres los caballos. Allampiaba por guardalos nun videu na rimada d'aquel picu tan prestosu que, camenté, sedría'l Llosoriu. ¡Tenía que selo, coño!

        Algamé la picalina. Ferregüeyé tol entornu. Fartuqué de sacar fotos... Y fici'l videu adebecíu. ¿Quies velu?


          Cuando baxé d'aquel picu, tres percorrer tola pandiella, tuvi la suerte qu'acababen d'aportar a la campa dos paisanos nun quad: ¡Esta ye la mía!
     - Bonos díes, señores. ¿Podríen dicime ónde tamos?

Sobrevolando pela Campa'l Tíu Vicente

    - Tas na Campa'l Tíu Vicente - dixo'l mayor, amosando una sorrisa.
     - ¡La Campa'l Tíu Vicente!.. ¿Sabe si hai otra col mesmu nome nel entornu de Cenera? - entrugué medranosu lo soltare a gargaxaes...
     - Que yo sepa, non. Esta ye la Campa'l Tíu Vicente de siempre.
     A min nun me cuadraba pero amiré'l planu del I.X.N. y... ¡Nidio!... Vese bien cerquina del Llosoriu. La mio rocea venía del día que nos perdiemos faciendo una ruta pela Segá. Yera la primera, claro...
     - ¿Entós esti picu que vengo de baxar?
     - El Picu Cuitu. Nun lu tracamundies col Cuetu, que ta p'hacia Villar.
     - Entóncenes el Llosoriu...
     - Quédate un cachu entá. Ta tres d'esi y d'otros picos... Lo meyor tirar pela pista hasta la Campa Viscarrionda. Ellí tornes a manzorga dica la Cuevona, onde los pastores faen la fiesta, y pali-pali hasta'l Llosoriu , que verás enfrente.
     - ¿Y si atayo pelos picos?
     - Cosa tuya...

Pa sentir l'arume la campera,  déxote esti ramín benditu polos dioses arrónides, ¡sei feliz!
         Aquel primeru, el picu la Carba, nun lu agarré. Salí a la pista y tuvi que baxar un poco pa volver subir otra vegada pel colláu Palmir.Y asina, faciendo la montaña rusa pel Cordal de Cuba, aporté a la base l'acebecíu Picu Llusoriu.
     - ¡Per equí xubo yo! ... - ¡Y xubí!...
        Subí per aquel arrimadiellu... Y volví baxar... Y volví xubir... Y torné baxar otru poco pa coyer el definitivu...


Asturcones faciendo'l botellón por mor del beleñu.
 Da-yos por baillar la "Danza Prima"

       - ¡Carah.o!. ¿Esos postes son de zarru o tan puestos p'agarrase a ellos?
Ye lo que fici. Dir faciendo zis-zas, llomba arriba, per un xial de mata baxa y aidame con aquellos finxos
     - ¿Merecerá la pena?... ¡Vaya xatá que llevo!... ¡Mira, qué caballinos!...

     << Nuna enllanada, onde asitiara'l clan de los arrónides, veo morando unos caballos a la solombra d'unes espineres que paecíen esgatuñar l'aire. Poca vexetación tien el picu, espuestu por demás a los vientos: Espineres, árgomes y llingües de perru, a la solombra les peñes, son les escoses plantes qu'albidramos. Delles veces vense acompañaes por dalguna vulneraria marillenta (Anthyllis vulneraria) y por unes plantines (< 1 m) de fueya verde y llanuxo, de flor mariello-ocre  con venines viola: el beleñu (Hyosciamus niger). Ye sabío qu'esta solanácea yera emplegada polos druides como afrodisíacu. Pero si se pasaben.... Igual nun despertaben en tola selmana. Como pa volvese llocu...      
         Güei día emplégase n'homeopatía, en cantidaes risibles, claro. Pero eso nun lo sabíen los druides celtes de la Edá del Fierro.
         Lo que sí sabíen les bruxes medievales - polo tanto les coetánees de los nuesos protagonistes- yera tresnar una pócima satánica, nomada eufemísticamante" fervíu máxicu ",  qu'emplegaben nos aquelarres: 
          - Con beleñu, belladona, estramonium, adormidera y dalguna planta más pretendíen amenorgar los dolores por so caráuter narcotizante ( una bona anestesia pa sacar una flecha) anque yera fácil que-yos provocara allucinaciones y hasta la llocura (¡ cuántes veces lo facíen a remente!). Tamién podíen añedir estratos de piel de sapu o d'escabayu con fines afrodisíacos... Debíen ponese como búfalos; de fechu tenemos visto ún na Cuevona, onde'l Mayáu de los Pastores.
Les bruxes más sabichegues prevocaben la llocura, ensin llevantar sospeches, per aciu del fumu llográu al quemar les semilles del beleñu..Eso sí, tenía que ser "a la hora de Saturno".... >>
   

                        ¡Y, por fin, algamé L'Olimpu! ¡Toi nel Picu Lluxoriu! 

Una mirada aliella dende L'Olimpu arrónida : Picu Llusoriu
<<Lo importante nun soi yo seique'l llugar onde atopo>>

          ¡ Qué luxu! ... ¡Les vistes son impresionantes! Nun sé per onde voi entamar: Si sentar a descansar, si enantar la mirada, si facer delles semeyes... Vamos por partes, qu'ando un poco esprecetáu... 
          Primero amirar, darréu retratar... Por cierto, la cámera del móvil sigue furrulando. ¡Los dioses tán conmigo! Nun podíen faeme otra mala pasada... 

Dexé un mensax pa los dioses nos finxos de Lugh.


           Veo'l bote-buzón, onde los caminantes dexen los sos mensax, y miro a ver.... Un papel en blanco. Déxolu ellí pero escribo'l míu. Nun me resisto. Que quede constancia:   



<< Son les 13:35 .
 "Camín de Niria" blogspot.com tevo equí - xintando un bocata - el día 20 de Xunu de 2016.
¡Uf! Pensé que nun aportaba. 
 ¡Veo'l mundu enteru!.
 Que t'afayes.
Selmo.

P.D: Nun habia dengún mensax nel bote >>.





        Fechos los llabores - semeyes, dexar constancia d'estancia, enantar la mirada y ferregüeyar tola redolada - senté satisfechu col llombu afitáu nel finxu xeodésicu. El sol, amatagáu pola bruga, dábame na cara. Quedé adormiláu y dexéme llevar polos suaños mitolóxicos nel carru Faetón... Ye día pa los dioses....
        ¿Ónde toi? ¿ Nel Picu Llosoriu? ¿D'aú vien esti nome? ¿De Lugh ? = ¿Lux?... Debía nomase Llux-oriu...
        Lugh, el pancélticu Dios. Aquel que dexó constancia per topónimos a esgaya: Llugones (Siero), nes Asturies centrales; Llugo de Llanera (Llanera); Lúgido (LuXido),  al par de S.Esteban de les Cruces y al que los nativos d'anguaño nomen Lloxio (¡toma!). En Grases, nel camín de Xixón a Cuadonga, atopóse una llávana que fala de los luggones arganticaenos. Na redoma del Sueve apaeció un finxu (estela) que fai alcordanza a la gens de los luggones. Nun podemos escaecenos de la ciudá de Lugo, en Galicia y sobre tou del Picu  Llosoriu (Lluxoriu) que ye'l que nos trai güei equí.
 

 Dicen que la roca caliar ye bona pa frutiar. Tan granibles son los Montes del Monsacru que dieron como frutu a Riosa y a Morcín: Un romance de la Sierra del Aramu con dalgún dios d'esti Olimpu .
<< Son les tierres de Gesabo, el Señor de Riosa, que la so fía Lena foi prometida a Melendo,
 fíu heriede de Numio de Cenera>>.




        Esconsóñame un ventolín repentín... Siento'l sele tanxíu d'unes esquiles... Llevanto adulces ya miro'l reló... ¡ Van dar les dos! ¡Tengo que colar! Fino'l suañu... Nun soi un dios; en tal casu un humanu endiosáu... Espero tener perdón... Ye tan fácil endiosar teniendo'l mundu a los tos pies... (Riosa, Morcín, l'Aramu, el Monsacro, Mieres, Cenera...).  Trazo cola mirada'l Camín de Niria y quedo, señaldosu, na capital del Reinu: ¡Uviéu!, que tengo delantre mesmo'l focicu... Eso voi percorrelo yo en cuantes dea col tiempu afaizu...
 
"Los Güeyos de Riosa", na trasegada Campa La Braña.


     Y vuelvo endiosar otra vegada, pero esta vez cuestabaxo, pel mesmu camín d'ida... Camentaba cambiar, pa faelo más llevadero, pero... ¿En qué taba pensando?...
Tuvi que baxar faciendo s...s...s... y agarrarrándome, de primeres, a los postes de llendón (ente Riosa y Cenera?), y darréu  a les mates de sabines o árgomes qu'alcontraba. ¡Mira que si restuerzo una pata!... ¡Ai, hai que ser burru!...
Pero con tou y con éso entá tenía tiempu a ferregüeyar pel Aramu y baxar cola mirada a bañame a La Vega de  Riosa o a perdeme pela viesca de Gallegos camín del Palaciu de Cenera...
N'esta baxada, lo que más me llamó l'atención foron dos güeyos nuna prestosa campera que cayía sol valle de Riosa: "Los güeyos de Campabraña" ¡ Qué cantidá de ganao! Tiro de semeya y enanto'l zoom de la cámera pa ver de qué se trata.... ¡Vaques!. La mayoría son vaques pero tamién hai dalgún caballu ...  Cómo tien de tar la xata de Riosa pastiando nel Edén, n'esti Paraísu ¿Terrenal?...
          ((El día que'l Señor de Cenera m'encamiente daqué xera n'estes tierres de Gesabo, camiento en pidir osobucu de Riosa pa comer; prometío))

El cordal de Cuba xunce'l cielu cola tierra



     Llomba o llomba voi aportando otra vegada a La  Campa'l Tíu Vicente. ¡Ai, aquelles piedres! ¡Y aquel Picu nel Cuitu! ¡Y el carrefour de caminos¡ ¡Y les corrientes !.... Y vuelvo pasar pela fonte enllamuergada, onde abebenta'l ganáu.




          Y ye tou un cuestibayu hasta apotar al Villar colos Depósitos d'Agua como referencia.... Y alcuentro, sol'horru la plazoletina, la señora que me informó pela mañana charrando con otros vecinos. Cuando-yos dixi per onde xubí nun pudieron aforrar una sorrisa...
     - Nun te lo espliqué bien. Teníes que llegar a la campa Viscarrionda y torcer pa la Cuevona...
     - Camenté n'ello, dixérenmelo unos chavales pero <Fíu de cabra...>> .
 Amás, nel Mayáu Pastor ya tuviere va poco. Mirái, tengo equí la foto....


Camín de la Cuevona (Mayáu de los Pastores )
 onde yá tuviemos na salida a Peña Regá. 
Al Llosoriu - que s'amuesa al fondu - vamos güei per otra ruta. 

     - Bueno, anda, conociste otres coses... Pa la prósima baxes per Miruxeo, dende Viscarrionda.
     - Eso camiento facer, porque quiero tornar a Viscarrionda, onde tevo asitiáu'l crómlech. Magar que tea tapáu quiero que me caltrien  les corrientes magnétiques pa sentime talo un arrónida por una vegada na vida. (Bueno, esto pensélo. Nun lo dixi por si me torgaben la entrada nel pueblu pal futuru... ¡Hai muncho llocu!, sélo yo).

Y tres cinco hores y media d'averamientu a los dioses xubo, enchipáu,  al coche pa colar camín de casa. Una pena que les corrientes magnétiques nun pudiesen caltriar nel ánima  la parienta. Tendré que da-y otra oportunidá...

         << Yá tán caldios los motores.
              Yá toi llistu pa entamar . 
              Yá güelo'l Camín de Niria
              Yá ceo voi degolar >>.

     <Adebezo'l día que Niria cole de casa, que dexe'l Palaciu d'Arriba p'abellugase nuna aldeina mariñana en ca de los sos parientes. Naguo por siguir tres los sos pasos...>

       Namás queda despidime, collacios, por esta vegada. Fáltame escazar un poco poles coraes de Lugh, la divinidá celta más bultable. Póngome a ello pa dexavos un apéndiz con delles semeyes. 


           << AYERI  TUVI  UN SUAÑU NEL  PICU  LLOSORIU>>

        Cuando algamé'l Picu Llosoriu taba fechu polvu pero cola gayola la fazaña nin siquier reparé nello. Yera màs importante ferregüeyar la redolada y sacar semeyes a toes manes que tomar un descansu. Dexé una nota nel buzón de montañeros y tomé la parva: Chorizu, plátanu ya una barrina enerxética. Arrequexáu al sol escontra'l finxu xeodésicu quedé adormecíu. Entós tuvi un suañu...
Vi al dios Lugh montáu a caballu arremetiendo escontra los fomorianos ... Acababa de matar al dios Balan clavándo-y la llanza nel güeyu traseru... Acababa la guerra pero... ¿cómo entamó too?...

Les islles Britániques: Gran Bretaña ( Inglaterra-Escocia-Gales)  ya Irlanda (N-S)


        << Ello yera una vegada una islla maraviosa a la que nomaben Irlanda. Nun país tan ablucante yeren munchos los que queríen vivir, poro tevo delles invasiones: La ¿quinta? corrió a cargu de los Tuatha Dé Danann. 
        Los TUATHA DÉ DANANN son el pueblu de la diosa Dana, la primixenia, la má de too, de dioses y d'homes... Vamos, la nuesa ttataraaaagüela; por eso la mio perra apellídase Dana.
        Un primeru de Mayu (la fiesta de la Beltanae) d'abenayá los Tuatha Dé tomen el determín d'abandonar les llonxanes tierres del Norte d'Europa pa buscar otros eros más caldios onde establecer. Nunos barcos voladores colen dica l'oeste envolubraos nuna nube perprieta. Amillando dende'l cielu posen nes verdes y feraces tierres d'Irlanda, habitaes nesi intre polos Fir Bolg (enantes yá lo tuvieren polos Nemed y, más p'allá, polos Partholon). De mano nun son aterrizar por mor d'unes corrientes magnátiques inducíes polos fomoireos, los sos dioses soterraños. Masque si hai un llugar na Tierra que s'asemeya al cielu, esi ye IRLANDA...
 
     - ¡ Amiyando, aportamos a la tierra prometío! - dixo Nuada, el xefe tuatha, impresionáu pola Verde Eirínn.
     Tres la dura batalla de Moytura, na costa Oeste, los Tuhata, más preparaos teunicamente, algamaron la victoria y asitiaron n'Irlanda. Seique nun esiste la gayola completa y el xefe Nuada pierde un brazu...
     - ¿Cómo vamos tener un rei mancu?. Les nuese regles torguen tal deshonor - clamia la diosa Brigit, la muyer de Bres.
     Asina que hebo dimitir demientres y componíen un brazu nuevu de plata. 

Los fomorianos a lo suyo. ¿La güestia? (Semeya SelenitaConciente.)

     Entrín y non, y pa contentar a tol mundu, nomen un rei mistu: medio tuatha y medio fomorinanu: Bres*, nidio. Pero resultó un tiranu... Asina que Nuada, con un brazu máxicu de repuestu, torna a la xefatura. 

*Bres: Yera medio-fomorianu y medio-tuatha por ser fíu del fomor Elatha y de la tuatha Ériu. Taba casáu con Bridgit, diosa de la fertilidá, cola que tevo a Ruadán y dos fíes más (como cosa oficial).

     Pero esti paisanu - Nuada -taba abocáu al baturiciu y los fomorinos declaráren-y la guerra: Segunda Batalla (Mag-Tured). Magar el so brazu máxicu Nuada foi asesináu pol güeyu velenosu de Balor, el xefe fomorianu ( hai quien diz que foi Miach, el mesmu que-y iguare otru verdaderu brazu de carne y güesu pero con poderes permáxicos; los celos)
     El casu ye que tamos ensin rei y nun paez fácil alcontrar otru afayaizu.... 
     Entós ye cuando entra n'escena LUGH.
     Por cuenta d'una fiesta palaciega, el fíu de la tuatha Eri (Ethlinn ó Ethne) y del fomorianu Del-baet (Cian) preséntase tou pinchu na corte de Tara a pidir modo. De mano'l porteru nun dexa entrar aquel enigmáticu personax. Pero'l guapu y rellumante personax nun tarda en ser recibíu nel palaciu tuatha, onde causa plasmu xeneralizáu col so torque nel gargüelu ya una sierpe cola tiesta de carneru.
     - ¿Y tu, esllendosu, quién yes? 
     - Soi Lugh, el fechiceru.
     - ¡Ai, non; d'esos tenemos a esgaya! Talo que de druides.  
     - Sé facer otres coses.
     -  Nun sé, guaperas, qué podrás facer tu.... Pero con esa manona tan grande que tienes... ¿ podríes mandar unos rayos qu'acabaren col enemigu?
     - Soi zapateru.
     - ¡H.a, h.a, h.a!. Mira tu la falta que tenemos d'un zapateru pa lluchar colos fomorianos... Igual nun ye mala idega que nos faigas unes madreñes máxiques pa soltar unes coces a los fomorianos..
     - Tamién soi albañil.
     - Mui guapo, nin.Yá te daremos modo cuando acabe la guerra. Habrá que remocicar los castros...

El Finxu de Fal : La Piedra del Destín
(A esto Revilla llamaría-y " El falo cántabro")

     - Por cierto, pueo ponevos la Piedra de Fal nel so asientu oficial. Ta un poco escuadrá.
     - Venga, ho... Si fain falta milenta gües pa movela...
     - O un paisanu de pelo en pechu.- Y énte'l plasmu xeneral de la corte llevanta la Piedra Máxica y asiéntala nel llugar afayaizu 
     - Pos sí que tas como güe, manín. ¿ Y qué más sabes facer? 
     - Sé tocar l'arpa.- Y nin curtiu nin perezosu emprima con un aire irlandés qu'aconceya'l personal y termina ballando enlloquecío. Darréu camuda l'aire y failos recordar les batalles perdíes, poniéndose tol mundu a berrar como castrones...
     - Oi, tu... Igual per ehí.... ¿Pues tocar daqué aselecío?  Mira ver si yes quien adormecer los fomorianos y podemos pillalos descuidaos...
     - ¡Soi un  campeón guerreru! - clamia enraxonáu, arrampuñando al empar la llanza d'un guerreru del séquitu.
     - Nun t'enfades, ho. Yá tenemos ún y viéndote la pinta... Ye que paeces más un artista qu'otra cosa.
     - Eso ye lo que soi. Prautico toles artes ya oficios. Y hasta soi ferreru.
     - Ye qu'equí colos caballos echamos carreres nel agua... ¡H.a, h.a, h.a!... Y sóbrennos les ferraures.
        Demientres rin, Lugh, vio que'l rei taba arrinconáu pol contrincante echando una partida al axedrez (hnefatafl). Y empobinó hacia elli:
     - En dos xugaes: "xaque-mate", xeneral.
          Nuada, roceanu, enarquia una ceya ablucáu. Llevanta de la siella ya invitalu a sentar. Efeutivo, con dos movimientos, Lugh, dexa al oponente ensin salida. ¡Partida ganada! 
     - Bueno, val. Quédate equí; yá alcontraremos daqué afayaizo pa les tos cualidaes. 

Lugh, el tricéfalu. (wp)

         Adulces, Lugh, foi faciéndose imprescindible na corte. Sacábalos de tolos enguedellos y yá nun daben un pasu ensin consulta-y. D'otra miente como Nuada andaba a sucu baxeru, por mor de la mano de repuestu, y nun acababa de consiguir los resultaos adebecíos terminaren cambiándolu pol mediofomorianu Bres, que tamién-yos salió rana: ¡un déspota insoportable!
     - ¿ Y agora qué? ¿ Y si ponemos al mandu a Lugh, que tien recursos pa tou?
         Dicho y fecho. Lugh pasa a ser el comandante en xefe. Organiza defenses ya ataque; Orgánica y Loxística; Intendencia y Sanidá... demostrando unes cualidaes esceicionales. Poro Xulio César - por mor la guera les Galies - compáralu con Mercurio, el dios del comerciu y de les artes

*Mercurio, tamién se representa con una vara que lleva dos sierpes entellazaes, una llira ya un carneru ¡Qué coincidencia!.

      Bres, que se pasare con so madre al enemigu, cae prisioneru. Perdónen-y la vida a cambiu los secretos de la prosperidá pero.... 
<<Fíu de cabra....>> 

Lug cola "Llanza máxica"
(Selenitaconsciente)
 

      El cabritu tiró al monte y el mesmu Lugh hebo matalu cola llanza prodixosa. Enantes yá-y sacare l'apovoriante eyu occipital al rei fomorianu Balor (Balar), con un güelpe de flonda. Cumplióse asina la profecía d'una druidesa que badagüeyare la so muerte a manes d'un ñetu (Lugh). De nada-y sirviere tener pesllada a la so fía seique foi encantexada por Cian (Dian Cécht), el dios sanador de los Tuatha Dé, que-y encintó tres guah.es: Lugh, el más bultable. L'enemigu fomorianu quedó a mercé de los tuatha y tevo que colar somorguiándose nel inframundu: El reinu de les solombres y los muertos.

      Entá hebo más guerres pero... ¿Qu'hai agora de los Tuatha?... ¿Son los ancestros d'estos guerreros que vimos na Eurocopa de Francia?... 
      Cuenta otra lleenda que... Un primeru de Mayu, como nun podía ser d'otra manera, un exércitu d'homes altos guapos desembarcó na costa suroeste d'Irlanda... ¡Tatarííínnn!.. Veníen de Brigantium ...(¡gallegos!, d'aú, sinon)...comandaos pol rei Milé y pasaron a gobernar la islla darréu unes cuantes batalles. Los tuhata somorguiaron y pasaron a vivir nos soterraños de los sídh : túmulos, dólmenes, cromlech... de les pruides de la Verde Eirín. Ellí siguen cuntándonos hestories de fades y fairíes...


         Preguntaréisvos cómo los Tuatas podíen algamar tantes coses y consiguir tales victories... Taben en posesión de ciertos preseos máxicos qu'aportaron dende so país d'orixe, ¿les Islles Forcaes?.
 

Les cuatro ayalgues d 'Irlanda:

. EL Finxu de Fal: La Lia Fáil o Piedra del Destín (Saxun fatale) provién de la islla mítica de Falias. Ye un menhir que s'alcuentra na llomba de Tara, nel condáu de Meat, y foi la piedra de coronación pa los reis d'Irlanda. Si la piedra ruxía tres veces cuando'l candidatu s'avera a ella quedaba elexíu... 
(¿ A que Rajoy apaez con una nel Congresu  esta vegada?...De xuru qu'alcuentra per Galicia...El jodíu, dalgo de bruxu tien...). 
 Tol pandu ta atarraquináu de monumentos megalíticos; ye un llugar máxicu. En dalgún momentu de la so pre-historia Tara foi'l centru políticu ya espiritual de la islla.

La Espada de Nuada: "Nun t'escuendas, churru que te vi"  (Semeya de "Selenita consciente". blog)

. La Espada de Nuada: Esta espada traxéronla dende la islla de Findias. Yera propìedá del rei Nuada, "Brazu de Plata". Si la sacaba..."Date por muertu". Buscaba al enemigu ellí onde tuviere. Enxamás tornaba a la vaina ensin sangre.


. El Calderu de Dagda: Esti calderón (barcal, diría yo...) que provien de la isllla de Murias, podía dar de comer a un exércitu y siempre quedaba daqué pa los gochos (celtes, claro...) Yera como "la cesta de los panes y los peces"... Cómo se repiten les histories... ¿D'ehí nos vien a los lugones d'angüaño'l caprichu po la "caldereta"?

 
Güei al atapecer, por mor de La Samhain,
 "Caldereta celta", tresnada con sidre esplumoso.
 Ingredientes:
.Gochu celta, xabaril galu, caballu asturcón, llebre
 corciu y venáu. Si nun quedes fartucu
 pues complementar con osobucu de ternera asturiana.
El postre, de quesu Gamonéu, dirá amenizáu
pola gaita de Xuacu Amieva y 
les tonaes d'Anabel Santiago.


 Esta especie de Santu Grial, mui socorríu ente los dixebraos pueblos celtes, tenía otres funciones:
      <<El guerreru que tenga la desgracia de cayer en combate tendrá la suerte de recuperar l'aliendu nel calderu máxicu de Dagda>>
        Tolos clanes disponíen de calderos. Na Campa Torres (Xixón) el clan de los cilúrnigos yera conocíu polos sos calderos de bronce, onde montaron la primer(?) siderurxa d'Asturies.

. La Llanza de Lugh: La invencible llanza de Lugh taba fecha na islla de Gorias. ¿Problemes?... Dengún:
      - "Llanza en ristre... y batalla al bote".

         Los Tuatha Dé Danann yeren un pueblu pre-célticu. Pero tamién los celtes asitiaren nes Islles Britániques. Ello foi como 400 años E.C.

El llaberintu de los llaberintos en Glastonbury : Camín n'espiral de siete niveles (Cosasdemeiga.com)


        Yeren los celtes pueblos creyentes en daqué y teníen munchos SÍMBOLOS MÁXICOS, ferramienta  qu'emplegaben p'amosar el camín a siguir en cada momentu: Puen dar puxu al guerreru, protexer de daqué, y hasta p'almar l'amor.. . Los druides yeres los encargaos de tresmitir ¿oralmente? eses creyencies, esos conocimientos. Pa que resultaren más comprensibles sofitaben en símbolos. ¿Facemos alcordanza d'alguna d'estes druideríes

L'aween (t.q.)

 . L' Aween: Si te falta la inspiración ¿qué sedrá de ti?... Esti ye'l símbolu de la illuminación y la xunción de lo estremao. El rayu d'amanzorga representa l'home y el de mandrecha la muyer, que tán armonizaos pol medianeru. Esti símbolu ye cuasi esclusivu de los druides, ¿ prestaríate tenelu, eh ho?... Fácil; namás precises caletrar na verdá, amala y mantenela:
                -  <Cuayu, pequeñu saltapraos>


Trisquel (tierraquebrada)

. El trisquel: La tierra, l'agua y l'aire. L'equilibriu ente la mente, el cuerpu y el espíritu. TRES brazos, tres: Pasáu, presente y futuru. Yera'l logu los maestros.

La Cruz Solar (terraquebrada)
 . La Cruz Solar: Símbolu primixeniu. D'él surden otros, como'l trisquel. El calendariu solar marcáu polos solsticios ya equinoccios nun círculu col sol nel centru. Nun ta mal. Daquién nómalu como: La Cruz d'Odín.

. La Cruz de Bridgit: Esta bruxa - digo, Diosa - ta asociada a la fertilidá ( y al Fuéu), a la infancia y a la inspiración. tamién a les Artes, a la Maxa, a la Guerra y a la melicina.Diosa pa too. 
Los cuatro brazos de la cruz simbolicen les cuatro estaciones coles cuatro festividaes fundamentales: 

La esllendiosa Bridghit al par de la so Cruz.
 (webmitologia.com)

    . La Beltaene, el primeru de Mayu, cuando asitien y ponen casa n'Irlanda.
    . La Lughnasad, el primeru d'Agostu. Gracies, Tierra, por esta collecha.
    . L'Ymbolc, la purificación y el recoyimientu ivernal. Primeru Febreru.
    . La Samhain, 31 d'Ochobre, la cabera nueche del añu druídicu, los difuntos.. Haloween..


L'Árbol de la Vida (t.quebrada)

. L'arbol de la vida, que podía ser el carbayu, comunica los tres niveles cósmicos: soterrañu (polos raigaños), terrestre (pol tueru) y celeste (poles rames). Representa'l mundu espiritual y la integridá de les aldees. lluéu cada árbol tien un sinificáu propiu.
< Nel escudu de Cenera apaecen unos abedurios, qu'imploren proteición >

. Los llaberintos, son un símbolu mui socorríu nos túmulos (veslos tamién en catedrales). Puen referise al "camín de la vida": ñaces, vives, muerres, reñaces...


La espiral (t.q)

. La espiral: 
   - Simple - a min paezme la "Vía láctea" - reresenta'l sol que s'encueye, si xira a manzorga o'l sol creciente de branu, si xira a mandrecha.
    - Doble, la dualidá de les coses, el Yin y el Yang, los equinoccios (díes y nueches estremaos).
    -Triple, que deriva nel trisquel.



La wivre (terraquebrada)

. La wivre, dos sierpes entellazaes que se refieren a les fuercies de la tierra: amor y poder.  ¡Nunca nun deben tocar l'agua salao!, pierden el poder. 





                     Los celtes de mio

Guerreru celta aborixe, clamiando en galés.
     Los celtes yeren unos pueblos indoeuropeos (Anatolia, Mar Negro, Mar Caspio...) que s'asitiaren nel centru y oeste d'Europa na domina del Fierro (1200-400 e.C). A la Península Ibérica aportaron como 900 años e.C. Per asturies vímoslos un pelín máas tarde, unos 700 años e.C. (que saltar la C.Cantábrica nun ye tan facil).
 Nun se trata d'un imperiu sinon d'un conxuntu de pueblos autónomos con dellos finxos culturales comunes, siendo la llingua - faltaría mása - el denominador común de toos ellos. Entá se caltienen influyencies d'algunes llingües d'aquella dómina: galés, gaélico-escocés, irlandés, bretón, córnico o manés. Los asturianos siguimos calteniendo llazos con esos paises del Arcu Atlánticu y cultura celta.
 Otra caruterística común yera l'espíritu guerreru... ¿Hebo dalgún pueblu que nun lo fuere?... 


     Siendo mui pequeñu ensamé cola familia a una xira nel Cordal de Breza (Peñamayor). Al atardecerín, cuando meyor lo taba pasando por mor de la música y los bailles de mayores, siento una orde tayante:
     -¡Pa casa!
     - ¿Qué coño pasa?
     - El baturiciu ta a puntu d'entamar. 
     - ¿Baturiciu? ¡Si tamos pasándolo como dios!   
     - La de Dios ye la que se va armar nun satiamén. Mira los mozos que tan aportando... ¿Ves qué cayaos traen nes manes?... ¿Crees que son pa guiyar les vaques?.... Son pa solmenase. 

Los "keltois", de los que nun quiero escaecer,
mazcaritaos d'escoceses. ¡Puxa Wallace!
Estos bardos falaben nuna llingua universal: 
¡¡¡LA MÚSICA!!!

          Asina terminaben d'aquella toles fiestes de los pueblos. La mio xeneración foi otra cosa. Yá díbemos al institutu (Colexu Llibre Adotáu), y la mayoría a los flaires. Pero sobre too camudamos al pancélticu guerreru Lugh por otros dioses britanos: Los BEATLES, los melenudos. Los que nos llibraben del xugu franquista per momentos. 
Los  qu'escombuyeron los cimientos del mundu, cola melota al vientu, per aires rockeros.


          Toi fechu polvu. Y entá me queda  zarrar la historia, poner los AGASAYOS  y la bibliografía... Bueno, voi soltávoslo como ta (pa dir faciendo boca) y mañana fino la historia.
lo meyor que pueo faer ye echar un pitu: << Mañana, Lug dirá >>

Tamién Los Celtes puen matar: ¡Nun fumes!
                         agasayos

         Nada. Nada fuere posible ensin aquella hestoria. Un branu, nos cursos de la UBRA, por mor de los encamientos del druida Fdez. Conde, sentamos a la solombra d'unes bidules a lleer esti llibru:
  "A la sombra de los abedules"


       Daquella, y yá al abellugu de les "Lletaníes de lluvia", entré a conocer "El palaciu azul de los ingenieros belgas" y a sentir "Los clamores de la tierra". Decatéme qu'habiendo coses que son "Del color de la nada" hai otres nel mio entornu y na mio Asturies, que merecen la pena ser retrataes. 
          Les enseñances de Magilo, los palacios de Cenera, el santuariu d'Inxertu y los arrónides del Llosoriu lleváronme tres los pasos de Niria nes alforxes de Melendo.Yo tamién llevo les mies pero atarraquinaes de pallabres pa poder contate a ti y arramar per aciu d'esti blog la gayola d'esi alcuentru: lo que veo, lo que siento cuando'l paisax de la redolada caltria na mio retina.

 Al dir caleyando Melendo
 tres les güelgue d'una ninfa
 ensin querer ta faciendo
 el nuesu <<Camín de Niria >>
       Cuando les circunstancies de la vida nos emburriaron a intentar formar un grupín de senderismu lo primero que pensamos foi crear un blog que fuere'l ñuedu de conexón ente los miembros del grupu. 
       Impresionaos pol tratu respetuosu que se-yos da a los Piniolo "A la solombra los abedurios" y tres andar un tiempu al debalu - talo'l vagamundu Magilo - peles caleyes d'Asturies tomamos el determín de poner  al nuesu blog el nome del amor: Niria.  Porque talo qu'a Melendo ye l'amor el 
 que nos fai andar dende Cenera a la mar :
                              <<  Camín de Niria.blogspot.com >>

Gracies, Fulgencio Argüelles, contigo entamò too.

      
       . ¿ Qué cúantos blogs percorrí por mor del Picu Lluxoriu?
  Yo diría un montonín y quiciabes quede curtiu :
      . < El blog de acebedo >, yá m'entra de viciu al abrir l'ordenador.
      .<Runa mágica > ( ¡Muncho lleí - y pienso siguir - nel vuesu blog!)
      .< Selenita consciente > , < Sobre Irlanda.com >, <Mitos y Leyendas>,  <batanga.com>  
 <Tierra quebrada.com> ( munches gracies por "prestame" los símbolos: guapos y claros) . 
. ¿Qué dicir de Wikipedia? Ye'l mio "Calderu de Dagda", maxa pura. A big Kiss to you.

  Bueno, collacios.... Tengo finar del tooo... ¿Pesllo la puerte con llave o echo la tarabica?




                         << "Arímola nada más
                               pa que nun salga'l ganao,
                               por si quies acompañame
                               hasta la Punta del Cabu,
                              que yá toi "Camìn de Niria"
                             en menos que canta un gallu >>