RUTA CAMINIANA: .- [ESCAPADA 1ª]

 

<CALEYANDO con CAMÍN>: ENTE MAZANOS (Escapada 1ª):

             Collaci@S, seguidores del «Camín de Niria», traigovos una propuesta nueva : <CALEYANDO con CAMÍN>, una ristra de SALIDES al rodiu la figura d’Alfonso Camín Meana, l’escritor de Roces, que naciere na Peñuca y pasare la son infancia <<ENTE MAZANOS>> . La obra principal va entitulase <RUTA CAMINIANA> sicasí, al rodiu d’ella van espublizase delles ESCAPAES pela redolada Roces que nun tienen cabida nesa RUTA cabezalera pero que son un complementu necesariu nesa vida ya obra d’esti asturianu, POETA ERRANTE, finxu cabezaleru de les <lletres asturianes>.

        La primera que vos cuento ye la ESCAPADA a los Montes de Samartín. Adebezo porque vos preste lleelo – o andalo – tantu como a min. Un abrazu y Feliz Añu Nuevu, 2025.

        « VACACIONES en SAMARTÍN »

    

            « Buscando nel horizonte

                     ñeve, palomba y carmín,

                     colé caminín del monte

                     del Picu de Samartín »

                        << Montes de Samartín dende'l  Camín del Caleyón >>

         La Ruta «Ente mazanos» d’acordies col llibru homónimu al rodiu les memories d’Alfonso Camín (<Entre manzanos>) va tener un testu xeneral – un filu conductor - qu’abarque tolos barrios de la parroquia de Roces y colindantes pero al empar va contemplar delles “ ESCAPATORIES” a llugares que se camienten na obra pero que s’escapen de la ruta estándar que proponemos pal camineru seique ye imposible qu’esta lo abarque too. Una delles ye esta que darréu te camentamos.

        Dexemos que fale la maxinación de Fonsín…..

    «Ello yera l’áñu 1901 cuando la mio hermana tenía 6 años y yo diba cargando colos once (¡Toi matáu!) . Reinaba n’España’l cativu Alfonso XIII pero entá tenía’l mandu so madre María Cristina d’Habsburgo magar nun fuere por munchu tiempu dao qu’al añu siguiente ficieren al guaje mayor d’edá recién cumplíos los 16.

        - A ver si pal gobiernu anda tan espabiláu como pa otros mesteres …

     Yo, talo la Reina rexente, tenía un añu un poco pintu …. La mio hermana nun facía otro qu’acusame delantre los nuesos pas de les mios perreríes:

        - “ Rompió los calzones por coyer unes crezes . Y pa enriba taben calientes ..

         ( - Puñetera, si les meyores teles tengo dáu a tí).

         - Diome unos piescos con pelu, y sabe que me faen dañu ...

        ( - Coimes, nun los tuvieres comío…)

         - Xubiere a un lloréu y desfexo un ñeru de xilgueru.

         (- Fonso enxamás desfai un ñeru.)

        Por si fuere poco mientres taba descansando panzarriba claváreme unes tisories nuna pierna… Salvárenla los años y el xéneru… D’otramiente nin la Reina rexente…

<<El burru xitanu>>

Daqué día los mios pas tiénenme unviao al Molín de la Belga – na llende con Samartín - col enfotu de moler el granu de la collecha cabera.

    - Fonso, esti añu vas dir moler el maíz a La Belga, yá camín de Samartín; a ver si tenemos más suerte y la maquila nun ye tan grande como l’añu pasáu.

    Mangamos el sacu nel llombu la pollina ya empobinéme camín de Granda. Pasé’l Pondal y namás entrar nel Barréu la pollina entierra les pates y sapia’l sacu per oreyes… Lo peor foi que la burra nin pudo salir d’ellí nin yo pudi facer nada … Ella morrió sapozada nel barru y yo casi la palmo con sacu al llombu hasta les llendes de Samartín.

     L’añu aciagu nun acababa y si enantes foi la burra agora ye’l burru que mercare a los xitanos el que tien un percance. Mio padre viendo que comía l’alcacer de les vaques atólu con un nuedu corredizu que terminó afogándolu al intentar comer. Tuvi de sacalu yo mesmu ya enterralu pa que nun fuere pastu de perros y alimañes.

    Esti añu dexé de dir a la Escuela de Granda pa cargar piedra nos caleros de Contrueces; prefería ser esclavu d’Alejandrín - yá camentaremos - que caleyar per Roces ensín oreyes, yera l’habilidá del Maestru, según cuenten… (¿Nun será que t’aburríes na Escuela, neñu?. .. Fácil nun yera ser Maestru – nin alumnu – naquellos tiempos…). Lo qu’echaba de menos yeren les engarradieles que teníemos los de Granda colos de Vega (Esto de les guerres siempres me pillare en mediu… Tenía pegamín ). Hasta que’l maestru s’enteraba y darréu…

        - Yá tengo conocimientu de la Batalla del Puente Granda. Nun dexasteis una teya sana y nin siquier les muyeres podíen pasar al Molín del Ríu. Dir enfilando les oreyes…

         - Yá t’oyí, navaya … A min vas pillame tu …. ¡Adiós, escuela de Granda! . Di les fusties y nun paré hasta casa.

         .. Llegaos a esti puntu naide nun creía en mi, sacante’l cura Don Ceferino y los mios vecinos Cerón de Rendueles y Pepón de L’Abadía :

         - Esti guaje va ser algo, tien unes coses…

         - Sí, “pollín agostiegu”, lleva camín d’ello - arrepostiaba mio padre.

                                                …………………………………

<<Casería de Pepón de L'Abadía>>

        Aquella mañana nun saqué les vaques del corral. Aprovechando que mio madre taba arrendando unes plantes tres de casa abrí la tapa la masera y agarré un cachu pan, un pedazu de boroña ya una sardina arenque; despidíme del Muley, mientres lu cariciaba diba atándolu cola cadena a fin que nun me siguiere y salí escopetáu pola corrada camín de Los Barreros. . Ponía tol procuru en nun facer ruíu pa que nun me lladraren los perros de los vecinos, talo’l de Pepón de L’Abadía. que lu tenía enfrente. Per ellí quedaren el gaiteru Lin de Pondal, el mélicu Perico Mau o los de Flor de Diego… Baxé una fondiega, xubí la cuestuca y travesé’l robledal de Ramón Vega, ya ensin fueya por mor de la Seronda. [El Camín de la Belga paez el sitiu más afayaizu pa llegar a Samartín seique son delles les caleyes que nos empobinen ellí].

 

<<GLAYU (Garrulus Glandarius L.) >>

         Anduvi ya anduvi hasta dar con una viesca pinos y darréu aporté a otru castañaéu per onde corría un regatu travesando’l camín. Senté nel tucu un pinu recién cortáu porque taba un pelín aforfugáu y sobre manera pa sentir el conciertu d’aquellos glayos [Arrendajo] policromaos qu’esnalaben d’equí p’allá ya escandalizaben a otros páxaros migratorios retrasaos talo’l mierlu o’l raitán.

         Metanes aquella interpretación aproveché pa pizcar un poco de boroña con sardina y del curruscu de pan duro nun dexé una migaya. Nun tuviere caminao nin trés kilómetros y yá camentaba yo tar n’otru mundu, alloñáu de la familia. [Bien cerca d’equí años más tarde tiénense llevantao les Mines de La Camocha y a tiru piedra d’onde m’alcuentro la xente pue esfrutar anguaño de les célebres “Güertes del Ociu” ; un tantu pal Ayuntamientu].

                     < El MOLÍN de LA BELGA >

                    « El Molín de la Belga nel nubláu.

                Entá nun sal el carbón de La Camocha.

                Yo ente’l vuelu del mierlu y de la chocha,

                voi sobro’l burru garañón montáu.

                 Dexo atrás la xunquera y el colláu,

                la castañal que ye’l frutu qu’en min derrocha;

                crucio ente cerques talo en trocha y mocha

                 y dexo atrás el ríu conxeláu.

                 Pienso que ta nel cumal la frontera,

                 que ye Samartín el Picu de los Andes,

                 que crez más y más la mio Cordillera.

                 Y a la fin, nacíu pa empreses bien grandes,

                 enamoro a la rubia molinera,

                 talamente fuere un español en Flandes. »

    << Los  Montes de Samartín (Picu'l Sol), dende la Carbayera de Llorio>>

        La soledá enantaba l’universu sobremanera naquel despobláu, dos o trés cases y para de cuntar. Sentía’l marmullar de pequeños ríos que desbordaben en xuncales o bañando aquella tierra acolorazao; mufu a esgaya festoniando les riberes y fueya seco afatando les caleyes. Tamos nel fondu del valle nes llendes de Granda y Samartín y acolumbro’l Molín de la Belga. Magar que’l molín coxicaba al son del agua amenorgué’l pasu pa nun facer ruíu dao que me conocíen por mor de la molienda cabera onde la maquila exerció, sin piedá, los sos deleres. Entré per un camín d’ortigues apartándome del lladríu de los perros a los que sopelexaba la verdiasca de carbayu que tuviere agarrao al salir de casa.

    [Esto del verdiascu diba ser una constante na mio vida: Puru, capa, chambergu, sombreru y bordón, que suena más fino].

        Atapecía cuando entré nel pueblu. Camentaba pa min:

        - Esto tien de ser Samartín. ¿Qué faigo?

        Nun debía tar lloñe’l pueblín de Llabandera. Yá tuviere daqué vez ellí por mor de la familia de mio madre; los Meana tienen los raigaños nel pueblu de la madre de don Pedro de Valdés y Menéndez de Llabandera (Doña Ana Menéndez de Llabandera). Seique empoboiname haza ellí yera renunciar dafechu al Picu de Samartín y a sapozame ente la ñeve d’esa máxica montaña, pero a eso nun taba de manera alguna dispuestu …

         - Tan cerca como te tengo, picu del alma …

 

   << La Fonte'l Cagüezu.- ¿Bebería Fonso d'equí?

     Tenía sede. Vi aprucir una señora con una ferrada na cabeza ya empobinéme tres los sos pasos…

         - ¿Aú vas , neñu?

         - A beber agua.

         - ¿Tu nun yes de p’equí, eh?

         - Non, soi de Llantones.

         Atapecía. La tarde esmucía pela contorna al empar que’l cielu diba zarrando pasu ente pasu mentanto le solombra enantaba pente robledal y los castañares. Embredé camín del Picu y al poco decatéme que taba más altu qu’aquelles ñubes qu’analayaben al rodiu aquel picaxu maxestuosu, blancu de la ñeve de la Seronda. Pelegriné dica’l finxu los mios amores hasta que la nueche torgóme’l pasu y el fríu esmorecíome’l cuerpu de manera tala que tuvi de buscar un requexu p’abellugame.

<< ¡¡IXUXÚ!! Casona del Mayorazgu de Samartín>>

    Seríen les ocho o les nueve cuando aprucí delantre la portiella d’una quintana. Lladraben los perros desesperaos, bramaba’l ganao na corrada ya enseguidina fui acolumbrando la lluz amatagada d’un candil mientres sonaben los cadenciosos pasos d’unes madreñes… Pasín a pasu foi apruciendo la figura d’un home ente la ñublina y les solombres de la nueche. Adelantóse’l perru a saludame; gusmiaba alredor míu mientres movía’l rabu ya ensiguida taba’l can faciéndome les visaxes de reconocimientu.

         - Hola, rapacín; ¿que se t’ofrez a estes hores?

         - Bones nueches. señor. ¿Nun precisará d’un criáu?.

         - ¿D’ú vienes, nin?

         - Soi de La Pola; los mios pas diérenme permisu pa buscar trabayu.

         - ¿Tan neñín?

         - Vengo de cumplir los once.

         - Yá veo, yá. Anda pasa; güei duermes na tená y mañana yá falamos, ¿paezte?. Son munchos los probes que s’averen a esta casa pa agospiar. Otra xente nun los quier; a min nunca nun me llevaron nada.

        Empobinamos dica la casa allumaos pol candil del amu.

         - ¡Ramona!

         - ¿Qué quies, ho?

         - Baxa, tenemos novedaes. - Salió la patrona con cara tala de bondadosa qu’esmucióseme la rocea.

         - Esti rapaz quier quedar de criaú.

         - Bueno, pos en vez d’un fíu vamos tener dos. ¿Cómo te llames, neñu?

         - Fonso, asina me llama mio güela.

         - Bueno, Fonso; vamos cenar un daqué, ¿paezte?. Depués yá veremos ...

<<La panera de lo suaños de Fonsín. Equí dormía meyor qu'Alfonso XII>> (Wpedia)

        Salió d’un cuartu una neña d’unos 8 años, rubia como una panoya . Telvina-y llamaren. Y tamién aprució la criada, morena y bona moza, qu’ensiguida iguó la mesa. Farté de castañes con lleche y darréu unes oraciones pasé a dormir al horru talo que Senda, la criada. Tenía l’engüelgu cuatro pegoyos y entá arrecendía a nuevu, a castañu ya carbayu (teníeis que velu agora...). Lo más llamatible pa min ye que taba astráu de mazanes y les vigues acorropinaes de matanza: xamones, llacones, corres de chorizos, moscancia y tocín a esgaya

        - (¡¡Ixuxú!! . Dalgo haime de tocar…)

        Casa de llabradores talo que la de Pepón de L’Abadía. Munches mazanes tengo comío daquella...

                                ………………………….

         Yá picaba l’iviernu y el ganao nun salía de la cuadra sacante pa dir beber agua. Trabayu pa min: atoldar les ocho vaques, los cuatro xatos y la burra.

         - ¿Sabes montar?

         - Tengo domao burros na Pola.

         Pa da-yos de comer diba buscar narvasu a les cuques que arrecimaben la tierra; cortábalo en pequeño y a comer. Tamién partía lleña con vistes al iviernu y cuando’l troncu yera gurdu aidabame’l patrón col hachu grande.

        Naquella casa, el Mayorazgu de Samartín, había magüestu tolos díes y yo ensiguida téngome fecho cargu de poner les castañes a magostiar nel fueu per aciu d’una cantimplora afuracada que colgaba de les trébedes.

         - ¡Vaya castañes valdunes que tien usté, doña Ramona! Vense poques pela Pola… (quería dicir en Roces, pos namás les tenía visto nos castañeos de Pepón de L’Abadía y del gaiteru, Lin de Pondal).

         Cómo echaba de menos al Muley… El perrucu de casa facía bona compaña pero yera simplón y nun tenía maldita ocurrencia… Nes nueches de tormenta l’horru tentaba tremar pero yo nun tenía mieu, maxinaba que diba nun barcu sobro les foles del Cantábricu; toos (Senda, la criada) teníen yerza, menos yo, el patrón del pesqueru … Un día parió la “Canela” dos xatinos ximielgos:

         - Unu pa ti, ya otru pa Telvina. ¿Gústate la neña, eh? … Pos tiempu al tiempu; daqué día too pue ser vuestro…

         Como’l llabrador se decatase de cómo amiraba’l monte un día tres otru averó a min ya entrugóme:

         - ¿Nagües por xubir al monte, eh? …. Nun t’esmolezas, cuando pase l’iviernu xubimos los dos; agora ye peligroso por mor de la ñeve y sobre too pola farda de los llobos. Precisamente embaxo’l Picu Samartín (Picu’l Sol) ye onde se dan les castañes valdunes que son la ceba l’ exércitu de xabalinos qu’estra los Montes de Samartín.

                     ………………………………..

<<Ilesia de Samartín de Güierces>>

  Cuando llevaba unos dos meses naquel paradisu de Samartín: comida a esgaya, ropa llimpio y curioso, bona paga – venti duros al añu – y espeutatives d’algamar un día a mayorazgu sentí tocar les campanes de la ilesia como nunca les oyere …

 

<<Ilesia de Samartín de Güierces - semeya, Abel Coto>>

        - Yá entamó la novena Samartín; el domingu llévote a misa y darréu a la bolera que tantu eches de menos …

        Volaores, misa cantada, procesión, gaita y tambor, sidra a esgaya ya un bálamu d’invitaos … Si yá se comiere bien de cotino nun te digo nada pela fiesta’l patrón… Fabada con compangu, xatu, corderu… Yo nun sé cuantos platos d’arroz con llechi tengo zampao … Tres la siesta de la yacuada l’amu y yo empobinamos dica la bolera de Samartín. Cuando más emocionante taba’l campeonatu veo aprucir una pareya de la Guardia Civil con un cabu detrás …. Llamen aparte al Mayorazgu y príndenme a min ablucáu dafechu:

     - Tu yes el neñu de Roces que tamos buscando dende va dos meses… To padre llámase Manuel y to madre Maximina. Tán a puntu de volvese llocos al date por perdíu…

     El Mayorazgu nada nun dixo, volvimos xuntos pa casa ya invitó a comer a la Guardia Civil. La patrona quedó como Lot, seique de piedra; a Senda cayéron-y los platos y Telvina tevo de refuxase a berrar nun requexu l'estragal… Adiós a los xatos, adiós a la bona mesa, adiós a Telvina, adiós a los santos patronos, adiós al suañu del Monte Samartín. ¡Adiós a la vida prometida! ¡Adiós! …

     Un sentíu abrazu del mio Mayorazgu ya una pena infinita pa dambos dos:

     - Daquién te tien reconocío en Misa.

     - ( Yá te digo… Pa una vez que voi…)

         Embaxo’l mandu de la Guadia Civil llego a Roces fechu un pincel. Ropa nuevo, con boina y zapatos y hasta cuatro pesos de plata ya un reló… Mio madre nin lo vio. Acoricóme nos sos brazos dando gracies al Cielu:

     - ¡Benditu sías, Señor!

     La mio hermana, Felícita,  nun paraba de berrar magar que mio padre dio la espalda rumiando pa sigo. Al dir acostame miróme de frente ya entrugó:

     - ¿Cómo te dio por facer eso, Fonso?

     - Quería trabayar y ganáme la vida como cualisquier paisanu.

     - Pa eso nun facía falta escapar. Mañana mesmo vas a les canteres de Contrueces; Alejandrín precisa d’un pinche pa los caleros.

     - ¿Y eso de que yes de La Pola?

     - Siempre sentí dicir que los guajes ricos vienen de París y los probes de La Pola. Yo soi probe y quería trabayar. Amás … Mama diz que los Camín vienen toos d’un pueblu cerca de La Pola, igual que los Lozano vienen de Pión y los Meana tienen los sos raigaños en Llabandera…

     - Bueno, voi falar col Mestru de Roces pa que vayas a escuela pela tarde; igual Cerón, Pepe y Don Ceferino tien razón y tu pues algamar a ser daquién…

                         ::::::::::::::::::::::::::::::::::::::::::::

EPÍLOGU:

La Ruta d’un caminante d’anguaño

  Parque LA BRAÑA SEMEYA   

 

<< Parque La BRAÑA - Área Recreativa.- Entamu la Ruta >>

           ¿Y por qué nun tento yo de percorrer esi camín de Roces a Samartín? ... Intento faceme cargu de la ruta que tuviere fecho Fonso dende La Braña a Samartín y decátome – teniendo en cuenta los caminos actuales – que pudo percorrelu per dellos sitios; yo mesmu tengo andao per unos cuantos empero voi proponevos ún mui asemeyáu al orixinal, a ver qué vos paez:

<< La BRAÑA: Casa de Cerón de Rendueles y Mª de Perico Marcos>>

         Los güelos de Fonso vivíen a la vera de lo qu’anguaño ye’l Camín d’Afredón (daquella fechu una llaceria), ente l’Autovía Minera y la facienda de Pepón de l’Abadía. Asina que nosotros vamos salir onde entama’l Camín d’Alfredón, bien cerquina de la casa de Cerón de Rendueles o María de Perico Marcos, ellí onde naz el Ríu de La Braña o Cerón que traviesa una moderna Área Recreativa( Parque de La Braña), folixa de los vecinos de Nuevu Roces.

<<Camín de La Belga dica Montes de Samartín >>

    Xubimos la cuesta del Camín d’Alfredón y al llegar al empalme col camín de La Perdiz torno a manzorga como buscando la Carbayera de Granda pero en cuantes veo a mandrecha’l Camín de la Matona sigo pel mesmu hasta que tropiezo col Camín de La Belga y faigo alcordanza qu’al cabu del mesmu había un molín que ye onde Fonsín tuviere fecho la molienda cabera. Esti camín de la Matona entá remanez ensin asfaltar y da gustu caminar per él, una vega impresionante de maíz, talamente paez que tas naquella dómina alfonsina. Paro un momentín pa retratar los campos de cereal (maíz) colos Montes de Samartín nel finxu’l cielu. Véngome arriba, tengo’l rixu altu. 

                               <<Colo poco que me queda

                                                    pa nada pienso adicar

                                                    tirando pa Llabandera>>

        Baxo Camín de La Belga, agora yá per asfaltao, hasta qu’empato cola carretera que va de Mareo (Llorio) a Granda. Decátome que na redoliada’l camín hai munchu arbolíu – carbayos, castaños y dalgún pinu aislláu - ¿reminiscencies de les viesques qu’atravesare Fonsín? . Llego a un carrefour y quedo camentando per onde tirar (?)

        Si crucio la carretera xeneral y sigo amiyando pel Camín de La Belga dizme’l Google Maps qu’esti camín queda cortáu, seique al final tengo entendío qu’ellí mesmo afaya’l famosu molín (M. de La Belga) . Tomo un determín, tuerzo a mandrecha pela carretera xeneral de Mareo a Granda, sicasí voi a escontra forga, y a la primer ocasión tuerzo a manzorga dica los Güertos del Ociu; el Camín de la Quintana ye’l más afayaizu por tar ensin asfaltar. Adiós a la Estación de CEPSA que saludo a la drecha …

<<¡Pero si lo tengo a tiru piedra!>>

   << Colo poco que me queda

      pa nada pienso adicar

    tirando pa Llabandera>>   

          Yá acolumbro los Almacenes Pitti al par de los Güertos. Tán faciendo unes igües a la entrada y aquel entornu promete quedar plancháu.

 

 

<< GÚERTOS del OCIU, antoxana de Samartín >>

         Qué idega tan xenial esto de tresnar unos güertos pa escontra l’estrés ciudadanu… ¡Viva l’Ayuntamientu!. Crucio una ponte sobro’l Ríu Llantones y xusto al final veo una facienda antigua que me da la sensación de tener un molín pos veo una canal que xunce casa y ríu… (Tengo preguntao y vienen de dicime que’l molín - ¡hailu !- ye conocíu como’l Molín de Cagüezu. Tengo la esperanza de conocelu daqué día porque entá furrula el rodendu. ¡Ixuxú!, Fonso sigue nel pensamientu)

<< La Fonte'l Cagüezu >>

    

    Efeutivamente toi nel barriu de Cagüezu . Ensiguida vengo dame de capitón con una fonte, escosa por ciertu. ¿ Va ser esta la mesma onde l’amigu Fonso s’alcontrare cola vecina que diba por agua y tuviere parllamentao col guaje ?… Pue ser pero había más fontes pel camín, ensin dir más lloñe mesmo en Santa Cecilia que va ser el próximu barriu onde entrare Fonsín camín del Picu.

        Mientres sentaba a la vera la fonte veo un ablanu acorropináu d’oricios con unes ablanes más grandes qu’una bolicha… Gueto les que tán nel suelu, que nun ye plan de poneme a maquilar a estes altures … ¡Llástima nun atopales va setenta años!…

<<Llavaderu de la Mina La Camocha>>(Wp)

     Más abaxo quedaren los praos onde tuvieren afayao les Mines de La Camocha (1935-2008); entá queden los remanes daquella aventura: les xaules, les oficines, les montañes de cisca y dellos artiluxos más pos va poco que se pesllaren seique Alfonso Camín nun llegó a conoceles enantes de zarpar p’América (1915).

        Empalmamos cola carretera xeneral que va de Vega al Altu La Madera pasando per Samartín de Güerces. Dexamos atrás el Llavaderu del barriu y aportamos xusto nuna plazoleta onde s’afayen la Ilesia de Samartín y l’antigua Escuela de neñes, anguaño AAVV. ¡Qué vistes dende’l miradoriu de la plazuela! . Unes semeyes ya un rezu por mor de la bona suerte col enfotu d’aportar a la casa del Mayorazgu de Samartín. Tiénennos dicho qu’entá se caltien la facienda, con casa ya horru, seique en condiciones deplorables… De cualisquier manera l’afayu tien pa nós tantu valir como la tumba del apóstol Xacobu (Santiago). Vamos a ello.

<< Panorámica de la Vega - La Camocha dende'l  Camín de la Gola >>

         Embredamos cuesta arriba, ¡y qué cuesta, manín!, dexando a manzorga un par de faciendes escolingando na falda’l monte; tán aprovechando los escalones que-yos brinda’l tarrén. Son cases escontra l’ablayu les persones, soleyeres y vistoses a más nun poder. Tenemos a los nuesos pies tol valle de Vega y La Camocha: el pobláu y los esqueletos de les mines de Felgueroso. Avístase a tiru flecha Leorio, Mareo y l’Altu La Perdiz con toles connataciones que caltién. Y allá, nel finxu’l cielu acolumbramos el cabu Torres, el Musel y l’infinitu arenal tarmiegu onde s’encuma la sablera de San Llorienzu. ¡El mar, la Puerta de la Villa!. Si sigues enantando la mirada dica’l sur vas alcontrate no alto de la Peña los Cuatro Xueces pa terminar xusto onde t’alcuentres, colos montes de Samartín. ¡Nun hai quien dea más!.

        Miramos hacia lo alto y sentimos la llamada del Picu Samartín, magar quede un bon cachu p’arribar hasta la picalina. Nun andamos nin quinientos metros cuando damos a manzorga con un camín formigonáu qu’embreda hacia abaxu. Trátase del Camín de la Gola; nun m’estraña’l nome, eses faciendes paecen tar asitiaes nun esgoladeru.

        Al poco tamos varaos delantre una bayurosa quintana con casona, hangar, horru y panera. ¿Será la del Mayorazgu?.. ¡Non!.. ¡Qué pena!. Un poco más y yá agüeyamos unos teyaos escondíos ente una maleza bien tarmiega, por cierto . Efeutivamernte tamos delantre de la casa onde Fonso Camín pasó los ¿meyores? díes de la so infancia. Dos meses a cuerpu de rei hasta que una fiesta – Samartín de Güerces - arambló cola felicidá. Tres les semeyes de turnu y p’asitiar l’afayu adiéntramonos na falda’l monte y enseguidina embozamos a la solombra d’una viesca rica en carbayos, castañales ya ocalitos xigantescos. Por momentos sientes tar nuna selva y ver aprucir a la mona Chita escolingando de les llianes.

        Yá nada nos queda por facer, de momentu, en Samartín y tornamos pasiquín a pasu hacia casa, eso sí, desplayando la vista y suañando con otra dómina seique la presente enllena dafechu’l nuesu coral.

 

<< BELÉN   de   CUMES  24-25 >>

        Por circunstancies de la vida llevamos dos años ensin allugar el <BELéN DE CUMES>. Pudo ser esti el terceru pero ….

     - Home, ho; col añu que lleves tres los pasos d’Alfonso Camín nun taría demás que ficieres dalguna referencia a lo que tienes andao.

     - ¿Cuálu te paez el sitiu más afadizu?

     - Pa min ta nidio; el Camín de La Gola, frente a la casa del Mayorazgu.

     - Sí, onde Fonso coló por mor d’esi enfotu que tenía pola ñeve los Montes de Samartín.

     - Pos nun se fale más; sicasí nun podamos andar muncho vamos intentalo.

         - ¡¡Ixuxú!!

ESTIMANCES

     .. << Tas escuchando'l ruxerrux del "Ríu Llantones" tal como lu sintiere Fonso abenayá, nos tiempos de la Reina María Cristina>>

        . Quiero dedica-y esti post a Mari Loli que vino a llarame l’alma d’una caldial allegría cuando una tarde braniega tevo a bien llevame a conocer lo que fuere - lo que ye – la Casa del Mayorazgu de Samartín de Güerces. Los mios ermos sondeos p’alcontrar la <Quintana de los suaños de Fonso > viéronse compensaos cuando tuvi delantre mío la Casa del Mayorazgu. Esto xustificaba dafechu’l mio desvelu. Sentíes gracies, collacia. 

        . Wikipedia ye un gabitu permanente nel nuesu blog                     < Camín de Niria >

<<Alfonso Camín >>

        . El llibru autobiográficu d’Alfonso Camín, “Entre manzanos”, ye la xida y la nuesa guía pa dir de <VACACIONES a SAMARTÍN>. ..Tou surde d’esi manancial de recuerdos infantiles. Gracies eternes, Fonso.