«
CALEYANDO con CAMÍN (1) » "Ente mazanos"
La Parva: Camín de La Peñuca »
 |
| < Recoyendo la mazana> (N. Piñole) |
Estimaos collaci@s. Cuando por mor de la Biblioteca de Roces tien llegao al nuesu conocimientu que se tán formando en delles parroquies de Xixón unos grupos de trabayu col enfotu de poner n’alza’l valir de les mesmes a partir de la historia más recién – alcordanza de lo vivío, nun va tanto – “ d’esta histórica parroquia rural que ta ¿sufriendo? dende va poco más d’un sieglu una tresformación imparable dica al modelu industrial-residencial magar siga calteniendo’l so calter rural, ¡qué maraviya!, somos capaces d’entemecer n’armonía tolos aspeutos d’una gran comunidá: cívitas, agraria ya industrial en sin que la xente se sienta arrequexao o fuera de llugar, más bien al endefechu, tamos encantaos.
Son dellos los campos que l’equipu va tratar. Esti ye l’esquema qu’en principiu se propón, el tiempu dirá en qué queda esa « GÜEYADA D’AYERI A GÜEI»:
< |
| <Una mirada d'ayeri a güei> .- Esquema de trabayu |
Una de les facetes que vamos desendolcar ye una RUTA pelos caminos de la parroquia de Roces – con delles escapaes a les llinderes - siguiendo les güelgues d’Alfonso Camín a partir del so llibru de memories “Entre manzanos” onde cuenta los sos trebeyos dende la nacencia a la pubertá, momentu nel que zarpa d’emigrante a Cuba .
Asina qu’esta ruta que vamos a siguir tien de llevar por nome «Caleyando con Camín : ENTE MAZANOS» más un apéndiz col topónimu correspondiente dependiendo del tramu que teamos percorriendo; hai que tener en cuenta que’l terrenu ye enforma ampliu pero si a daquién-y apetez facela d’un tirón …. En cualquier casu nós … PA-SU. EN-TE . PA-SU.
Esta primer estaya va salir de la Biblioteca de Roces, “Alfonso Camín”, pa empobinase a la casa de nacencia del poeta de Roces, l’heraldu d’Asturies : «Camín de La Peñuca»
Como podéis decatavos el trabayu que queda per delantre ye bien bayurosu asina que conun convién nun perder más tiempu .
Ún de los puntos a tratar entitúlase “Alfonso Camín”. Esti celebérrimu escritor – entá debería tar más consideráu - ye ún de los finxos d’esta parroquia de Roces dao que naciere nun requexu de La Peñuca, barriu de La Nozaleda. D’ente la so bayurosa obra queremos esbillar un llibru de memories - tien cuatro – al rodiu la so infancia, dende la nacencia (1890) hasta que coló pa Cuba (1905) a la edá de 15 años. Nes páxines d’esta caldia Arcadia cuéntanos Alfonso los sos avantares infantiles centralizaos dafechu nesta parroquia asina como les llendantes onde la so familia tien desendolcao la so vida. Col enfotu de conocer al escritor, a la persona y a la parroquia tomamos el determín de crear una RUTA homónima sofitada nesi primer llibru d’alcordances : « ENTRE MANZANOS». Va ser una caminada pelos finxos más señalaos del pueblu que lleven amestao les sos desplicaciones afayadices.
Y fai alcordanza ….
« Caminante, nun hai camín,
faise’l camín al andar.
Al andar faise’l camín
y al tornar la vista atrás
vese la sienda que nunca
ties de volver a pisar.
Caminante, son tos güelgues
el camín y nada más ».
RUTA CAMINIANA (principal) : “ ENTE MAZANOS”
«Biblioteca de Roces – Parque “Salvador Allende” – Los Caleros (Fornu) – Palaciu S. Andrés de Curniana – Ilesia Nª Sª de Contrueces (L’Asunción) - Los Llagares – Los Depósitos – La Pasarela – Nuevu Roces – Área Recreativa (Parque y Fonte de “La Braña”) – Camín d’Alfredón (Cerón de Rendueles – Casa güelos de Fonso – Pepón de L’Abadía – Mina S. Carlos ) – Depósitos de La Perdiz – Potabilizadora (ETAP) – Camín de La Marruca (Casa Cachai y Quinta La Marruca) - El Recuestu (Duardo Xacobu - Palaciu la Duquesa - C. Joselín – Alcordanza M. Medina y La Baliciega) – Carretera Carbonera – La Carbayera – La Ilesia S. Xulián (El Palaciu ) – La Flor de Lis – Parque La Nozaleda – La Peñuca – Camín de la Reina – El turruxón de Veriña – Mascarón de proba (Familia Claudia) – Biblioteca de Roces ».
Que te preste, caminante.
Amás d’esta RUTA cabezalera, y como complementu de la mesma, tamién vamos proponevos facer delles ESCAPAES pela contorna de Roces que tán rellacionaes cola vida d’Alfonso Camín nesa dómina d’ “Ente mazanos” . D’esta miente vas poder averate a les parroquies llendantes: Granda, Porceyo, Contrueces, Llorio (Mareo), Samartín de Güerces, El Llanu, La Villa (Xixón)… Y hasta pue que nos tiremos al matu y fagamos dalguna “virtual” peles amériques de Camín … ¡Esto ye bien llambiono!
…………………………..
Mira que te digo caminante … Por si una sóleda caminada igual pudiere resultate abegosa podemos dividila en dos estayes circulares; entós igual puen quedar d'esta miente :
La Primer estaya de la Ruta “Ente mazanos” per Roces pue ser esta:
« Biblioteca de Roces - La Peñuca – La Nozaleda – Flor de Lis – Barriu de la Ilesia (El Palaciu) – La Carbayera – La Pasarela - Los Depósitos - Carretera del Obispu: Palaciu ya Ilesia Nª Sª de Controces (l’Ascensión) – Palaciu San Andrès de Curniana - Los Caleros (pelos Llagares) – Valles ( El Fornu) – Parque Salvador Allende (El Pobláu) – Entramáu académicu “A. Camín” (Biblio- IES -C.P.E.P- C.F.P. Les Palmeres)» .
La Segunda estaya de la Ruta “Ente mazanos” quedaría:
« Barriu La Ilesia – La Carbayera – Nuevu Roces – Parque “La Braña” (Cerón de Rendueles) – Camín d’Alfredón (Pepón de l’Abadía – Casa Fernandín) – Altu La Perdiz: (Depósitos d’Agua– Potabilizadora ETAP) – Camín de Cachai – Camín de La Marruca – El Recuestu (Duardo Xacobu – Palaciu la Duquesa – C. Joselín) – C. La Carbonera (Los pintores) - Ilesia S.Xulián y Carbayera - Bu. La Ilesia ».
:::::::::::::::::::::::::::::::::::::::::::::
¿Qué vos paez , caminantes, si enantes d’entamar cola ruta más relevante facemos una perpequeñina pa dir faciendo boca…? Esta ye la parva (l’aperitivu) de la ruta que tenemos fecho colos escolinos de Primaria del Colexu Públicu “Alfonso Camín”. Venga, nun te quedes ehí plasmáu, llueu vamos tomar l’aperitivu al bar La Pampa que ye una reminiscencia d’otru tiempu… Ellí podemos enredar con xuegos decimonónicos.
::::::::::::::::::::::::::::::::::::::::::::::::::::::::
Menuda tela… Pero bueno pa dir faciendo boca vamos entamar per una caminata curtia que tuviéremos fecho colos escolinos de Primaria del Colexu Públicu “Alfonso Camín”.
 |
| < Memoria de lo vivío > |
¿Una biblioteca ye un llugar con vida? … Esto ye lo que se taba camentando en delles biblioteques de los barrios de Xixón (La Camocha, Montiana, El Coto, El Llanu y Roces) dao qu’atalantaren que la función d’esti ente podía ser daqué más qu’una oficina de préstamos llectores o un requexu d'aisllamientu pa estudiar un ratu. Con esta farda decidieron embarcase nuna aventura bien singular cola xida d’implicar a la xente la contorna:
- ¿Por qué nun enredamos a tola vecindá en plasmar nun trabayu aquellos testimonios que recueyan tou eso que nos trexo hasta equí como coleutividá? .
D’ehí xurdió < MEMORIA de lo VIVÍO >. Trátase de poner n’alcordanza, en comuña, la historia más fresca del barriu y la evolución que tevo partiendo de lo que conocieron los nuesos antepasaos. ¡Qué guapo!.
 |
| < Biblioteca Pública "Alfonso Camín" |
A esficies de la Biblioteca y vecinos de ROCES queremos saber y plasmar nos medios de comunicación actuales la nuesa evolución como zona rural del sur del conceyu de Xixón hasta convertise nesta mecedura de rural, urbano ya industrial que tantu nos presta. Los nuesos mayores fueron, y son, testigos d’esti cambéu implacable que nun tien retornu. Ye'l nuesu enfotu saber cómo lo viven ellos y lo tuvieren vivío los sos güelos. Vamos adientranos nel desendolcu industrial ya urbanu dende que Roces entamare nel arenal del Llanu hasta la creación de los barrios urbanos y la instalación de los polígonos industriales qu’entá nun pudieren – tiempu al tiempu– acabar, por suerte, cola vida típicamente rural de la que fuimos partícipes y entá siguimos íntimamente encantexaos.
.jpg) | |
| <Alfonso Camín > |
Cuando empencipiamos cola aventura coincidimos col profesoráu del Colexu Públicu “Alfonso Camín” que taben desendolcando un proyeutu pa «Conocer Asturies» .
- ¿Por qué nun entamamos por conocer el nuesu Barriu ? - camienten ell@s.
Ye asina que fuimos tresnando en comuña un proyetu de RUTA pa los neñ@s de Primaria; lo más averao al centru escolar por mor de les torgues que presenten les carreteres tan trasegaes que tenemos.
L’ aniciu d’esta ruta caminiana a esficies del so llibru de memories “Ente mazanos” presentámoslu equí : (La ruta completa va ser más llarga, como sabéis, magar que nun ye’l casu de sopelexala otra vuelta dao que nun la vamos percorrela entera esta vegada). Ehí va lo que pensamos facer:
 |
| <Ruta (1) "Caleyando con Camín"> |
SEMBLANZA d'ALFONSO CAMÍN
.Ye’l día del llibru, festividá de Miguel de Cervantes. Aprovechando que fai un día soleyeru de lo más prestoso’l Colexu Públicu Alfonso Camín va realizar la primer parte de la ruta <Ente mazanos> (tamién tenemos rezao lo nuestro). Como’l númberu d’alumnos ye pergrande’l profesoráu decide repartir les salíes del centru en camaes de pequeños grupos, por cursos, pa realizar les visites a cada finxu ensin apiñamientos, torgando’l baturiciu; seique al final van xuntase toos na Nozaleda pa participar na fiesta de los <Xuegos tradicionales>. ¡Qué bona idea!
Puntu 1º: LA BIBLIOTECA
 |
| <Biblioteca Pública "Alfonso Camín"> |
< Alfonso naz na Peñuca, un barriu de La Nozaleda de Roces bien cerca d’onde nos alcontramos; llueu tendréis ocasión de comprobar el sitiu exautu.
Los Camín-Meana yeren una familia mui probe magar que’l padre, Manuel, trabayare na fábrica d’Aceros (Moreda) y tamién ficiere de canteru, dao que Roces yera bien rica en piedra caliar. So madre, Maximina, llaboraba en casa, nel güertu y tamién daba clases de costura a les moces del pueblu. Na so primer casa vivieren hasta que Fonso tevo cinco años. Depués viéronse obligaos a colar pa casa de so güela materna – casa Fernandín - asitiada no alto de La Braña (La Perdiz) y bien cerca de la otra güela – María Lozano, muyer de Pepe Camín – que vivía nos campos de La Braña, nel camín de La Carbayera.
Podemos dicir que magar la so probitú Fonso foi bastante feliz nesta dómina de finales del sieglu XIX y entamos del XX (1890-1905). Lo que más-y prestaba yera andar a niales (nunca nun los estrozaba), cantar tonaes, pescar truches y ranes asina como facer inventos pa entretener la hermana que naciere al poco de llegar a esa segunda casa.
Un poco mayor – pero siendo entá un adolescente - yá andaba pirriáu poles moces a les que-yos ponía güeyos de potru montés. Lo que nun-y prestaba un res yera dir a escuela dao que los mayestros de la dómina solíen daprender los Mandamientos cola vara de Moisés… Hasta trés escueles anduvo y poco sacó d’elles sacante l’amor a la llectura de la que yera un fan empederníu; eso lu salvó, porque esta afición nunca nun la perdió, al aviesu, foi enantando pasu ente pasu col tiempu. D’esta miente llogró algamar una cultura autóctona realmente importante. ¡Quién lo diría d’aquel guah.e xabaz ya indomable que salvó de los garfios del maestru colando pela ventana!. Nesta época de preadolescente tevo trabayando nes canteres de Los Caleros y tamién na Coría. Diba a escuela al atapecer y entá tenía tiempu pa dedicar unes tonaes a les mocines del pueblu:
 |
| "El cortexu" (d'Evaristo Valle) |
- ¡Ehí vien Fonsín cantando la Soberana!
« ¡La Soberana…!
Tienes los mesmos colores
de la zreza temprana!
¡La Soberana…!
¡Al que coma les tos zreces,
non-y dexo costiella sana!
¡ La Soberana!…
¡Nun hai moza como esta
que güei va conmigo a Santana!*
¡ La Soberana!….
¡ La Soberana ! »
* Santana, ye la fiesta de Granda, a finales de Xunetu.
. Por mor d’una rocea con un vecín del pueblu – dellos años mayor -, cuando tenía quince año, Fonso vese obligáu – presiones de la familia – a embarcar camín de Cuba.
- Enantes de que lu estrocen nuna caleya o lu mate la Guerra d’África ye meyor que cole pa Cuba. Ellí pue facese un home al abellugu del so tíu Ramón.
Un cinco de setiembre de 1905 Fonso embarca en Santander camín de Les Indies nel tresatlánticu María Cristina. Nun diba solu, llevaba un nome falsu y dellos collacios más. Cuando Fonso vio per última vez les lluces amatagaes, pero xigantes, de la Villa de Xixón camín de La Coruña sintióse talo tuviere “en capiella”…
< EMBARQUE >
 |
| <El tresatlánticu Mª Cristina entrando n'Habana> (Wp) |
<< Yá ente nube, gaviota y andolina,
quiciás pensáis qu’al tresponer la bardia,
na corrada muxó la vaca parda
y rebuznó con pena la pollina.
Apertáis puños escontra la boina,
la salida la nao enretarda;
hai que ser homes, el dolor nun tarda
y quier facese llantu na ñublina.
De Santander, Xixón y La Coruña,
embarcaos por tipos de garduña,
en pelotón andáis pel mar errantes.
¡ Ya la Torre d’ Hércules papuxa
viendo que, cada barcu d’emigrantes,
dexa ensin xente mozo a España!»
. 1º.- LA BIBLIOTECA:
La Biblioteca Pública “Alfonso Camín” ta asitiada nel barriu d’ “El Machacón”, nuna esquina del Pobláu “Nuestra Señora de Cuadonga” y bien cerca de Los Monteviles, Pumarín y Santa Bárbara. Abellugada pol Colexu Públicu d’Enseñanza Primaria, del I.E.S. “Alfonso Camín” y del Centru de Formación Profesional “Les Palmeres” nun pue alcontrar un sitiu más afayadizu pa xopelexase …
Esta biblioteca, la primera de los barrios de Xixón, xurdió por mor d’una necesidá popular d’alquirir conocimientos. Aquel barriu – ente la Carretera d’Uviéu y La Carbonera - qu’entamare en 1953 por un cuerpu de 20 bloques y 160 viviendes llevantóse col enfotu d’acoyer a los numberosos obreros que precisaba la industriosa y puxante Villa de Xixón. Aquel barriu del sur diba enantando pasu ente pasu: En 1955 son otres 470 viviendes de trés ó 4 plantes y con xardinos ente los bloques; en 1959 son 17 bloques más con un tratamientu más acordies colos tiempos. Estes dos últimes partíes tán acoyíes al plan de Vivienda de Renta Llimitao y fueren llevantaes mercé a la entidá benéfica “Bancu del Probe” y tuvieren como arquiteutu al célebre Miguel Díaz Negrete. Poco más tarde les viviendes rondaben les 800... Los chalés de la redolada entamaron un pelín más tarde; enantes diben instalándose dellos Polígonos Industriales, otra carauterística fundamental d’esta parroquia… Cómo ente tanta xente nun diba surdir la necesidá d’una Asociación de Vecinos, una Biblioteca, un Cine ya unes Escueles más decentes…
 |
| <A. Camín amiya na Biblio > |
Alfonso Camín tórnase humanu ya amiya na Biblioteca ... La Bibliotecaria cuasi muerre del regalu.
La Biblioteca nació en 1968 y de mano tenía calter ambulante; una furgoneta y la voluntá d’un Maestru pelegrinaben de barriu en barriu llevando la llibertá nes páxines d’un llibru …. ¡Qué llabor tan granible! Anguaño la Biblio tien dos plantes : La Superior pa facer reuniones de trabayu y la planta baxa con dellos requexos onde se propicien los préstamos de llibros, Cds, etc. Hai espacios pa lleer – mesmo la prensa - o estudiar asina como una Mediateca con seis puestos d’ordenador ya accesu a internet, per aciu de banda ancha, y cursos de formación. L@s Bibliotecari@s tamién damos cursos d’Animación a la Llectura y delles coses más; siempre andamos aforfugaes… Hai vida nesta Biblioteca que los trasgos velen pela nueche… Nun dexes de visitala. ¡Tamos esperándote!.
Puntu númberu (2): «EL MASCARÓN de PROBA»
 |
. Salen los neñ@s, como motos, de la Biblioteca cruciando’l barriu de Nuestra Señora y picando un pelín p’arriba van llegando a la Casa de Lolo-Claudio. Como ta al otru llau de la carretera d’Uviéu nun ye plan d’averase a ella pero magar los matos y la distancia pue apreciase dafechu lo que buscamos …
EL MASCARÓN de PROBA del navíu SANTANA
 |
| < La Casa Claudia, col Mascarón de proba> |
Si tas en Xixón y tires en coche (o a pata) pela carretera vieya d’Uviéu (AS-II) al llegar al altu de Pumarín vas ver a mandrecha una vetusta casa de piedra perbién iguada qu’amuesa na so fachada el “mascarón de proba” d’un antiguu navíu de vela. Antaño teníenlu na fachada interior de la casona pero dao que tou quisque-yos pregunta por él decidieron sacalu a la vista del públicu; eso sí, embaxo un techu, como Dios manda:
- ¡Hai qu’abellugalu! - dicen los propietarios de la casa de Lolo Claudio.-
Esti mascarón tréxolu'l mesmísimu Claudio, con so güelu, dende Villaviciosa.
La Casa de Claudio ye una casona perantigua (¿sieglu XVI?) de la que ta bien arguyosa tola familia claudia. Lolo Claudio amás de la quintana, horru, panera y llagar, tenía – en tiempos de Camín - una facienda bayurosa y por si fuere poco enfrente d’ella yera dueñu d’una cantera bien granible y famosa - anguaño desaniciada por mor de la Ronda Sur - que tien acarriao gran cantidá de piedra pa les cases de la contorna y sobre manera pa llevantar el Muru de San Llorienzu y pa tresnar los diques del Musel. Los gües de Claudio yeren célebres en tou Xixón pol so puxu y bravura, non en vanu teníen que xubir el carru pela Cuesta Roces cargaos fasta los topes. Cuando les muyeres, de tou Xixón, taben llenando les ferraes del agua milagroso de La Peñuca* y sentíen l’estrueldu de les esquiles quedaben ablucaes d’aquel cuayu que sopelexaben los gües de Claudio:
<Claudio colos sos célebres gües>
- Mirái, ehí vienen runciando los gües de Claudio camín del Muru.
- ¡Qué arranque tienen! . ¡Van romper les esquiles!
- Nun hai otros como ellos en tou Xixón.
- De xuru que ye por esti agua de la Fonte La Peñuca.
* La Peñuca ye un requexu del Barriu La Nozaleda de la parroquia de Roces (Xixón) xusto onde Claudio facía cantera. Abenayá, naquellos tiempos de la infancia d’Alfonso Camín (1890-1982), había una fonte celebrada en tou Xixón onde veníen por agua dende los puntos más estremaos de la Villa.
- Nun hai agua como esto pa tresnar les fabes, dígotelo yo.
- Ye que cuecen los garbanzos nun plis-plás.
- ¿Y de sabor?… Qué quies que te diga, ne…
- Yo al mio home nun lu engaño, non...Ensiguida se decata cuando l’agua nun ye de la so Peñiquina.
« Nací un doce d’agostu,
nuna humilde casuca
de Roces per La Peñuca
y al pie d’un tarrén angostu.
Una parra d’agriu mostu
qu’al teyáu s’engarama;
daqué nial ente la rama
y, allá al fondu’l camín,
un manancial cristalín
qu’a Xixón lleva la fama.»
En fin, tamos faciendo alcordances pero escaecemos la farda pola que tamos equí: “El mascarón de proba” de la casa Claudia.
Cuenta Alfonso Camín nel so llibru de memories “Entre manzanos” qu’esi mascarón, según la imaxinación de Raúl de Claudia, home aloyeru, algo fantasiosu y amante de la sidra (¡vaya novedá; puntu a favor!), yera procedente d’un barcu que perteneciere al Pirata Drake* (1540-1596) cuando nos tenía amargaos abordando los barcos que veníen de Les Indies cargaos d’oru ya otres mercancíes a los puertos españoles. Y to esto cola venia de la gran reina Sabelita I d’Inglaterra…
- ¡Qué guapo, ne!. Asina nun tenemos un porqué pa facete la guerra, eh?… Yá te cuntaré , morena- camentaba Felipe II. (Taba camentando n’Armada Invencible, pero yá sabéis como nos salió’l negociu ….)
N’otra ocasión tres atacar les nueses posesiones nel Pacíficu arribó al Ríu de la Plata y empobinó dica Les Moluques ya Indonesia pa llueu doblar l’Estrechu Magallanes y llegar a Inglaterra – a bordu del “Golden Hinde” (Cierva Dorada) - onde fuere recibíu con tolos honores siendo’l primer inglés en dar la vuelta mundu. Esto valió-y el títulu de Sir sirviéndo-y p’algamar más tarde a Ministru del Parllamentu.
Tamién participó na batalla naval d’Inglaterra escontra l’Armada Invencible nel canal de La Mancha siendo ún de los cabezaleros y polo qu’a nos interesa foi’l qu’apresó al nuesu vecín Don Pedro Valdés y Menéndez de Llabandera, costándo-y el rescate cinco años na Torre de Londres ya un güeyu de la cara (1500 llibres) polo qu’esta familia tardó años en recuperase.
…………………………………….
Mascarón de proba del navíu Santana (1784-1816) .- Emblema de la Corona Española: «El lleón rampante coronáu». (Wp)
Pero la verdá sobro’l mascarón de proba pue que ….
El navíu Santana, que camienten, pue que sía’l braeru portaestandarte del citáu mascarón. Trátase d’un navíu de llinia qu’arbolaba tres palos : trinquete mayor y mesana portando tamién a proba botalón con bauprés. Diba apareyáu con xarcia – cabos y cables - firme y de llabor con polees y vigotes* (especie de roldanes per onde pasen los cabos col enfotu de cambiar el rumbu del barcu). Les veles son cuadres o redondes na mayor, cebadera nel trinquete y cangreh.a en mesana.
La obra muerta (la parte del barcu fuera del agua) ta compuesta por tres cubiertes coles sos llinies de bateríes correspondientes; en total 112 cañones.
La obra viva o carena (parte del barcu que ta embaxo l’agua) lluz ensin policromía, y baxo’l bauprés - a proba - amuesa’l mascarón , un lleón rampante coronáu y policromáu, emblema de la Corona Española. Na cubierta lleva estibada una embarcación menor (pa esnalar los xefes en casu d’apuru y pa mandar avisos a otres embarcaciones).
Na popa lleva’l timón de codaste y nel espeyu de popa – una virguería de barandiella, iconográfrica y policromada - alcuéntrense les estancies de la capitanía.
El barcu tien una eslora de 313,4 pies ya una manga de 58 pies con un pesu de 2112 tonelaes. Yá sabemos de los sos 112 cañones y los tres (3) puentes nomaos, los Meregildos . Esta estructura foi modelu a siguir pa otros ocho navíos talo’l “Príncipe d’Asturies”.
El Santana en plena refriega na Batalla de Trafalgar (S.:Wp)
 |
| <El Santana en Trafalgar> |
. El navíu Santana foi botáu nel Ferrol nel añu 1784 (Carlos III) y tevo n’activu 32 años [1816 - Fernando VII]. Fuere comandáu por dellos ilustres navegantes como Alcalá Galiano. Tamién participó na célebre Batalla de Trafalgar (21-9-1805) al mandu de José de Gardoqui - que diba en vanguardia - fizo munchos estragos nes naves enemigues. Sicasí desarboláu pol inglés <Royal Sovereing>, comandáu pol almirante Cuthbert Collingwood , tien de rindise seique ye rescatáu pola flota española – pol navíu El Rayu - que lu manda iguar al astilleru de Cádiz; magar esta batalla tien costa-y 97 muertos y 141 firíos. Cuando entama la Guerra la Independencia (1808) el <Santana> nun pue participar por tar n’astilleru reparando la carena. En 1810 treslládase a L’Habana xunto col Príncipe d’Asturies pero en 1816 vien a piques nesi astilleru por fallos na carena, como siempres. Pero entá pue vese en 1832 mediu reflotáu, talo’l “Príncipe d’Asturies”, n’astilleru de l’Habana onde dambos faen de pantalán y sirven de pasu a otros buques. Triste final d’una ayalga de la Marina Española; menos mal que rescatamos el “mascarón de proba” que lluz imponente nel Altu de Pumarín pa gloria de la Villa marinera.
BATALLA de TRAFALGAR: Equí pue apreciase como l’Almirante inglés , Collinwood , a bordu del Royal Sovereing, ataca al navíu Santana que contratacaba en primera fila. L’inglés tampoco salió mui bien paráu (Que-ylo entruguen a Harry Kein, capitán de l’Armada inglesa na celebérrima Batalla de Berlín 14-7-2024). (Wp)
.Taría bien recordar que la flota inglesa – en Trafalgar - diba comandada pol celebérrimu almirante Nelson, que muerre na empresa (Qué bien nos tuviere venío pocos años dempuès pa lluchar escontra’l mesmu Napoleón que nos declaró la Guerra la Independencia. ¡Cómo cambien les tornes!, agora amartelaos colos “fíos de la Gran Bretaña” y escontra de los “gavachos”). Tamién ye de xusticia facer notar la presencia heróica de los marinos españoles: Churruca, Gravina, Alcalá Galiano y el Brigadier Valdés, asturianu de pura cepa, qu’algamó a capitán y Ministro de la Guerra (los Valdeses n’Armada faciendo méritos y alquiriendo relevancia, prestixu y perres, ¡menuda castra!). Del que val más nun alcordase ye del francés Villeuneuve – l’almirante cabezaleru de l’Armad hispano-francesa - que nos llevare a la derrota más triste (debió morrer, de mala conciencia, al añu siguiente).
.
¿Qué
pasó col mascarón
de proba
del navíu Santana
? …. Ye
fácil de suponer que varáu y fundíu’l
barcu daquién se tien fecho cargu d’elli dao que los mascarones
son mui apreciaos.
Dalgún indianu que lu mercó y tréxolu p’Asturies con tolos honores. Lo que sí se sabe ye qu’aprucío en Villaviciosa d’onde lu trexo’l mesmímu Claudio cuando yera guah.e. Anguaño, el que fuere’l modelu del pabellón del reinu español ye “santu y seña” de la Casa de Lolo-Claudio, asitiada nun modestu barriu de La Nozaleda (Roces-Xixón).
* NOTA: El mascarón nun ta enteru; los avantares de la vida .....
::::::::::::::::::::::::::::::::::::::::::
 |
| < Caminantes nel tarmudu "Camín de La Reina > |
Una vez que los neños tiénense puesto al corriente sobro la casa de Lolo-Claudio entamen camín del Puntu n.º 3 , la panera d’Ángela per aciu de la cai Matilde de la Torre. Al cabu d’esta moderna cai tomen un ramalín estrechu y tarmudu pero encantexador, el Camín de la Reina, talo sacáu d’un cuentu. ¡Qué pena que sía tan curtiu!
Antaño esti camín llegaba hasta la Ilesia; ¡qué contentu taba San Xulián cuando vía la Casa de Dios acorrompinada de guaḥes!. Bueno, Donvi tampoco pue quexase seique anguaño haiga qu’averalos en coche … ¡Anda que nun había guaḥes esti añu pa facer la Primera Comunión! ...
Puntu nu. (3): La Panera d’Ángela
Pillamos el Camín de la Torre y al cabu la mesma damos cola panera esperada. Ellí taben aguardándolos Ánxela y Paz, dos componentes del grupu < Una mirada d’ayeri a güei. Alcordances de lo vivío> . Van desplica-yos les partes d’un horru y la diferencia ente un horru ya una panera asina como’l serviciu que-y facíen a los propietarios.
 |
| < Una aldeana de Roces, esperando polos guah.es> |
Les partes principales d’un horru son les que nomamos darréu: El teyáu - a 4 agües -, les colondres (cureñes), el puntal, el corredor, la subidoria, los pegoyos, los pilpayos, les mueles, los trabes, la puerta (puertes), el moñu (moños), les vigues del quesu, el tentemozu, los llinios, les viguetes, l’aguilón, la bocateya, los cabríos, …..
¿Qué diferencia hai ente un horru ya una panera?
L’horru suel ser cuadráu y más pequeñu mentantes la panera ye allargada (rectangular) y más grande; seique la diferencia principal ta nel teyáu: L’horru tien namás un moñu (vértice), nel centru, y les cuatro aguaes son iguales; mentanto la panera tien dos moños y les aguaes son iguales dos a dos. Tamién ye normal que l’horru tenga namás 4 pegollos (pue tener más) mientres la panera tien 6, 8 ó más.
¿Pa qué sirven los horros y les paneres?
Sirven pa guardar la collecha : el granu (maíz, sobremanera), les mazanes ya otres frutes, les fabes, les patates, los arbeyos… Y los recuerdos de los que nun te yes quien a desaniciar dafechu. Tamién s’emplegaron como cuartos pa dormir cuando la camada aumentaba poles fiestes y la casa enllenábase de primos fandangueros qu’esperaben l’alba pa esguilar a gates pela subidoria …
Anguaño tán faciéndose paneres emplegaes como Fin de Selmana y pueo aseguravos que vivir nesos palafitos terrestres de madera (carbayu o castañu) ye un placer inesplicable; procura sustituir delles cureñes por puertes-correderes-acristalaes; d’esta miente caltienes dientro una lluz natural perprestosa…
La Panera d’Ángela …..
Esta panera d’Ángela foi llevantada a mediaos del sieglu pasáu a partir d’otra más antigua, vamos, que ye una igua en condiciones. Nun ye d’estrañar porque consiguir estes cureñes (colondres) y esos trabes lleva varios años: árboles poderosos, talalos na época afayaiza, dexalos unos años que vayan curando, cortar les pieces a midida … Anguaño ye perdifícil poder alcontrar árboles asina. Los horros de madera lleven dellos sieglos llevantándose pero los romanos yá los teníen ¿inventaos o copiaos? nos primeros tiempos del Imperiu, seique yeren de piedra; na Villa de Veranes dexárennos unu; ta pa velu.
Bueno convién dicir qu’a vegaes los horros nun pertenecen a un solu dueñu sicasí puen ser dos o dellos más. Esti ye’l casu d’esta panera – de mediaos del sieglu pasáu - tan interesante que ta dividida en dos partes pos tien dos propietarios. Un detalle perguapu d’esta panera ye’l ventanu del sobráu (buhardilla) que da muncha claridá al interior. Hai que tener en cuenta qu’esa parte central del horru sirvió de cuartu pa dormir al criáu qu’atendía la granible quintana, nun va tantu tiempu ...
::::::::::::::::::::::::::::::::::::::::::::::::::::::::::::
Puntu nu. (4): La PEÑUCA
Los neños salen encantaos. Nunca nun imaxinaron les utilidaes que podíen tener eses antiguayes de madera, coses del pasáu. Tornen un cachu ya entren nun caminucu que ta cortáu por una sebe enllena d’escayos que-yos torga’l pasu… Pero danse de capitón (de focicu) con una pancarta, una señora ya ¡un señor d’otru tiempu!…
- ¿Quién ye esti puntu?…
“ De capa, pipa, cayada , chambergu y sombreru” …
Efeutivamente, esti paisanucu nun ye d’esti tiempu… Vamos escuchalu .
¿Yá vos maxináis quien soi, eh?… Pos sí, soi Alfonso Camín Meana poeta y periodista que viví ente 1890 y 1982. ¿Por qué toi equí?… Porque nací nuna casina que taba asitiada xustamente ehí, embaxo la Torre.
¿Veis la torre?… ¿Yá vos camentaríen daqué na escuela sobro la mesma, non?… Nun vos esmolecer, si eso yá vos cuento yo algo…
« La CASA La PEÑUCA »
“ Equí onde hai cantera y hai camín
que cuerre hasta la villa marinera,
enantes ser camín y ser cantera
foi cuna y pedestal del mio destín.
 |
| <Barriu modernu La Peñuca fagocitáu pola Ronda> |
Ellí ñací talo na roca’l pinu
y, cuál si ellí ñacer delitu fuera
la casa humilde, ente nozal y figuera,
foi firida por un pie y embaxo vieno.
Y magar de la casa destruída
talo ta nel aire la mio fortuna
la mio cuna ta nel aire suspendida.
Naide nun espere’l mio feroz reproche.
Suspendida nel aire ta la Lluna
y ye la qu’enllena d’esplendor la nueche. »
<<.La casa de Camín, yá modernizada, na Peñuca; bien cerca del Polígonu Industrial Roces- Porceyo. El progresu fagocita los recuerdos, ¡ perdónalos, Señor!>>
… [Nesta semeya superior, fecha dende la Torre de Gonzalo Menéndez Valdés (¿XVI?) o Turruxón de Veriña, pue apreciase La Peñuca – casina blanca a mandrecha con ventanes coloraes – la carretera que va a Porceyo y l’afamáu chigre de La Palmera. Esa casa yá nun tenía nada que ver cola de Camín; nin chigre nin casa puen vese anguaño, cayeren nes fauces de la Ronda Sur. Lo que sí se caltién ye’l Polígonu Industrial Roces-Porceyo pero agrandáu. ]
...............................................
<La
Peñuca. Llugar de nacencia d'Alfonso Camín. La
Torre Veriña, escucando,
abellugaba tol barriu La Nozaleda.>
 |
| <Torre, cantera y Camín> |
. - “Bueno, esti camín onde tamos yá veis que ta cortáu y nun tien salida pero esto antiguamente nun pasaba, el camín llegaba hasta empalmar cola carretera que pasa per ehí abaxo; podía llevanos hasta >Uviéu. . Pos bien, esti requexu nómase La Peñuca y equí embaxo taba la casina onde nací, pegada con otra. Mirái esta semeya del cartelu pa ver cómo yera naquella dómina; más probe nun podía ser...”
« ¿Cómo quies alcontrar
l’aldea que voi suañando
si cuando la vi llorando
llevéla conmigo al mar? » …
....………
« Como si por tenío habeme
ya fuere una aición maldita,
volaren con dinamita
la casa onde naciere.
Nun soi yo’l que perdiere
la mio probe casa aldeana,
seique la propia quintana
que magar lo esbarrumbe too,
pa honrase d’aquel mou,
va tener qu’alzala mañana.»
… [Yá ves, Camín; nada nun queda,
nin el to arguyu, nin la quintana.
Somos polvu, somos magaya,
nun somos nada]
...............
Bono, nel cartelu d'arriba podéis apreciar delles semeyes míes a lo llargo del tiempu, lo que nunca pueo escaecer ye’l tabacu (pipa, puru) , la cayada, el sombreru y el chambergu; coses d’aquel tiempu … Hai equí delles portaes de los llibros qu’escribí cuntando les fazañes de la mio vida, son autobiográficos: La primera infancia ya adolescencia cuando viví na Peñuca y na Perdiz , “Entre manzanos” (Ente mazanos). El segundu ,“Entre palmeras” (Ente palmeres), de cuando tuvi en Cuba. Nel terceru, “Entre nopales” (Ente nopales), cuento lo que m’ asocediere mientres viví en México. Y nesti últimu, “Entre madroños” (Ente madrueños), faigo alcordanza de la mio estancia en Madrid. Son los cuatro finxos más cabezaleros d’esta vida errante que viví: Roces, Cuba, México y Madrid; seique tamién pasé per dellos sitios más. Nun pueo quexame, semé de polen mediu mundu y tastié’l néctar de les flores más guapes de dambos mundos. (Esto pensélo magar nun lo camentare colos guaḥes).
En Porceyo. Con Rosario
y la mio afiada.
Nesta foto podéis veme cola que fuere la mio muyer (nun yera la primera), Rosario Armesto Jurgo, natural de Porceyo (Xixón), onde pasáremos los caberos años de la nuesa vida. Equí tamos, delantre casa cola nuesa afiada, talo fuere una fía adoptiva . Acompañónos siempre, ellí y equí, hasta qu’entragamos l’ánima al Creador.
- ¡Que los espíritos te protexan ellí onde t’alcuentres, fía del alma!
………………………..
… Queridos escolinos, cuido yo que tener que poneme equí a falar de la mio obra ye un pelín abegoso, ¿eh?… ¿Qué tal si vos dexo unes notes o un pequeñu escritu n’internet? … Dao que viaxé enforma y que la mio vida pue repartise ente Roces, Cuba, Madrid y México, magar que tengo visitao dalgunos llugares más, voi entitulalu : « Alfonso Camín, el poeta errante ». Ehí vos lu dexo, pero pensái que la mio vida ya obra son abondo más granibles; foron 92 años « a picu y pala», « a buxarda y martiellu» . Gracies pola vuesa comprensión.
…………….
Tres dexar, con gran pesar ya un tastu a hestoria bien recién, los escolinos siguen caminando y namás dase la vuelta danse de capitón col siguiente puntu d’interés :
« EL PARQUE CELESTE »
 | |
| << La quintana'l Parque Celeste>> |
Según D. Pedro Hurlé Manso que tien percorrío col so fíu ya un amigu los Barríos del sur de Xixón a mediaos de los años 40 del sieglu pasáu La Quinta del Parque Celeste perteneciere a la familia de los Álvarez Tejera; siendo poco enantes d’esta dómina`l propietariu D. Matías. D’entós p’acá la mansión Celeste - ¿yera aquel xardín el cielu o venía’l nome por mor de la muyer? - tien cambiao delles veces de dueñu pero entá caltién esi tastu a mansión vetusta que tanto-y presta a la xente. La pena foi que pola xida de la Ronda Sur la casona quedóse arrequexada nel barriu de La Peñuca (La Nozaleda) ensin poder amosar el so glamour a un públicu más bayurosu. Naquel tiempu llucía dos escudos d’armes a la entrada de la finca; daquién dixo pertenecieren a les capielles del Carme y La Barquera, qu’Hurlé nun taba d’alcuerdu . Feos nun yeren porque ensiguida arramplaren con ellos…
Tamién Alfonso Camín tien falao d’esta quinta nel so llibru de memories “Entre manzanos” – claro, yeren vecinos :
* « La Fonte de La Peñuca daba a los bardiales de la facienda de Manolín de Blás, cara a la Nozaleda y nel camín qu’entra nel pueblu, la Quinta de Teh.era ...»
** « … Virginia la que curiaba los rosales de la Quinta de Teh.era...»
<< Les madreñes de Pinón van soles pa Xixón >>
.. Dao qu’ún de los caberos dueños de la quinta fuere madreñeru equí los neños van tener una amuesa de dellos tipos de madreñes y faciendo referencia a un célebre madreñeru que viviere na dómina d’Alfonso Camín van alcontrar esti cartelu:
«Les madreñes de Pinón van soles pa Xixón».
Les madreñes yeren el calzao más emplegao n’Asturies na dómina d’Alfonso Camín.
Podemos resumir les partes d’una madreña:
. Picu: Parte superior delantera.
Papu: Parte delantera o curva frontal.
Capiella: Parte delantera superior que tapa los deos.
Boca: Abertura per onde se mete’l pie.
Flequillu: Rebaxe que bordia la boca pela parte superior.
Casa: Cavidá interior qu’ocupa’l pie.
Calcañar: Parte trasera de la madreña onde va asitiáu’l calcañu.
Pies: Los trés soportes o tacos inferiores, dos delanteros ya ún traseru, onde se van dir colocando los tarugos a midida que lo pida’l desgaste.
Tarugos: Suplementos de madera que se van reponiendo cuando ruempen o desgasten los pies al caminar. Suelen tar fechos de madera d’ablanu o de carbayu xoven. Caberamente en vez de tarugos colóquense clavos o tacos de goma.
……………………………………………
6. LA NOZALEDA: “Xuegos tradicionales”
 |
| < Bolera y Castru pala Cuatreada > (La Jueya) |
Tres de salir del “Parque Celeste” los neños van embredando dica’l Parque La Nozaleda pasando pela célebre ya homónima “Cai Corrida” onde puen esfrutar de más paneres. Equí viviere’l famosu indianu conocíu como “El Llocu Muñiz”, seique naide nun pudiere imputa-y fechoría dala.
Llegó la xuerga y el desfuegue pa los neños y neñes. Van empobinándose a la plaza verde de la Nozaleda onde piensen participar nuna riestra de xueguinos tradicionales a los qu’estos rapacinos internautes nun tán avezaos pero los profesores creen conveniente que los tengan presentes pa que la tradición nun se pierda. Distribuyíos pola plazuela van deprendiendo a xugar cola: rana, la cuerda, el pañuelu, les chapes (siempre ganaba con Bahamontes), la taba, los bolos o la llave. Son dellos de los xuegos onde tábemos envolubraos los rapaz@s caleyeros del sieglu pasáu pero angüaño les cais son pa los motorizaos.
Los bolos:
 |
| < Los bolos > |
Por suerte ye ún de los xuegos que se caltién n’activu magar que nun tea tolo espardíu que dalgunos quixéremos.
Hai delles modalidaes pero la más común ye “la cuatriada”.
« Nueve bolos iguales más un pequeñu nomáu biche tán asitiaos simétricamente nun castru, que ye una superficie casi circular marcada por unes alambres. Trátase de tirar con una bola de madera’l mayor númberu posible de bolos pero con ciertes regles que nos va marcando’l biche; esti ye’l que nos dicta la forma de tirar: “pal pulgar”, cuando’l biche lu tienes a mandrecha y pa “la mano” si’l biche ta a manzorga; non por tirar más bolos faes más tantos.
Ye un xuegu d’habilidá y de cierta picardía.
La cuerda
Fórmense dos grupos iguales de guaḥes a cada llau de la cuerda y cadún tira pa consiguir vencer a l’otru, ye dicir, que pase d’una raya establecida.
Ye un exerciciu bien guapu pa fortalecer los músculos y sobre manera’l trabayu n’equipu. Ye preciso aunir esfuerzos ente tolos miembros del grupu. Cuando lo repitan delles veces los guaḥes van decatase que ganará l’equipu que tea más coordináu, ¡viva l’equipu! Ayuda ameyorar les rellaciones sociales – que buena falta nos faes - como tolos xuegos.
La carrera de sacos
Un xuegu d’equilibriu y coordinación motora que tamién ayuda a fortalecer los músculos de les piernes. Cuido que nos campamentos romanos yá xugaben a esto. Quién vería a los soldaos narboliando’l pabellón de la centuria, nun-yos gustaba perder nin a les boliches.
- ¡Ave César! .- Un saludu de los escolinos del Colexu Públicu “Alfonso Camín" .
La rana
Un tableru portátil onde hai una rana cola boca abierta, un molinucu, dos pontes y cinco furacos llibres de pilancos. Trátase de meter una ficha de fierro – el petancu - pel cualisquir abertura pero la puntución varía según per onde cuele; si cuela, …. Otramiente nun puntues.
Si entra pela boca la rana 50 puntos, pel molinucu 25 , peles pontes 10 puntos y pelos furacos 5 puntos. El xugador tien de colocase a 3 m y mediu y va llanzar 10 petancos. El que más puntos faiga saldrá coronáu col llaurel. Nun ye tan fácil como paez …
Los páxaros del Parque La Nozaleda tán ablucaos cola farguetá de puntos que saquen estes neñes ¡Ixuxú!
Les chapes
Un circuitu enrevesáu y marcáu con clarión nel suelu va sirvir pa que les neñes vayan tirando alternativamente cola chapa d’una botella dende la SALIDA hasta la META refugando los pilancos que vaya alcontrando nel camín: una ponte, un ríu, un pozu, un tendíu llétricu, la morte … Otramiente han d’esperar dellos turnos pa siguir la carrera o inclusive puen tornar otra vuelta a la SALIDA .
Naquellos tiempos de la posguerra’l xuegu les chapes yera de lo más famoso y creativo… Iguábamos les chapes con una semeya del nuesu artista preferíu abellugáu por un cristal acomodáu y fixáu con masilla: Bahamontes, Berrendero, Fausto Coppi,… o Kubala, Puchades, Molinicu, Quini ... Les neñes cuido que poníen a Cary Grand, Sarita Montiel o James Dean…
Hebo más xuegos como "El pañuelu", La taba", .... Llueu nós camentábemos nos incontables ...... (Tiru con arcu, Roma, ...)
La vuelta al colexu yá vien d’otra manera. Los neñ@s siéntense partícipes de la historia del pueblu. Van pal colexu Alfonso Camín, un poeta que nació ente ellos. Al llau tienen el mascarón d’un barcu onde quiciabes navegare un vecín. No alto del barriu hai un turruxón d’un cabezaleru que gobernaba aquella zona … Siéntense más importantes, ellos tamién tán faciendo historia.
:::::::::::::::::::::::::::::::::::::::::::::::::::::::::::::::::::
ANEXU Iº
ALFONSO CAMÍN: Averamientu al poeta errante
Ello yera l’añu 1890. Reinaba n’España Alfonso XIII pero por mor de la so corta edá (4 años) venía a ser so madre, María Cristina d’Habsburgo (Casa d’Austria), la que cortaba’l bacalao ya oficiaba de Rexenta mentanto’l guaḥe cumpliere los 16 años. Ye nesti intre cuando xurde entre pumares y caleros una nueva vida en Roces (Xixón) que tuviere de llevar a Asturies al parnasu de la lliteratura hispanoamericana na primera metá del sieglu XX.
< Ñací sobro peñascales
y al abellugu d’una torre
mirando l’agua que cuerre
embaxo, ente los nozales>.
De ñacer ente pumares, polvu y piedra de les canteres de Roces algama l´honor de frecuentar a la élite lliteraria y artística de la dómina: Rubén Dario, los hermanos Machado, Palacio Valdés, Valle Inclán, García Lorca, Pedro Salinas, Jorge Guillén, Gerardo Diego, Romero de Torres, Manuel Medina, Dionisio G. Fierros, el conde Romanones, Emilio Martínez, Constantino Cabal, Ramón y Cajal, el músicu Luna, Victor Macho y tantos otros ……
< Ellí onde hai cantera y hai camín
que cuerre hasta la villa marinera
enantes de ser camín y ser cantera
foi cuna y pedestal del mio destín>
Podríemos dicir qu’Alfonso Camín ye un poeta modernista a escontra forga. Siguidor de Rubén Dario (1867 – 1916) cuando entamó a facer poesía – espubliza la so primer obra “Adelfas” en 1913 – xustamente morría’l nicaragüense. Asina ye que Camín fizo una poesía modernista cuando yá taba pasando de moda porque los que puxaben naquel momentu yeren los escritores de la Xeneración del 27 (seique yá entamaren haza l’añu 20): Lorca, Machado, G. Diego, V. Aleixandre, Altolaguirre, Dámaso Alonso, Alberti, Salinas, Guillén y dellos más).
 |
| < Rubén Darío, el Maestru del Modernismu> |
< Foi nes mios hores de fiebre. Pelegrín
güérfanu y solu, pel mundu andaba;
toqué nel to corazón, sonó l’aldaba
y salióme lo to imaxe al camín.
Xurasti xuncir la to suerte al mio destín,
cerca de mio la tempestá sonaba
y, por nun ser nel amor más brava,
tornasti al to balcón de rosa y xazmín*.>
* Escribe Camín: “de rosa y trino”. Pero por mor de la rima …. Tomámosnos esta llicencia.
Acreedor d’una poesía de impulsos y de rixu – tal yera’l so calter – nun tenía reposu nin control; cuando s’embalaba yera un faunu en plena viesca caribeña onde arramplaba colo que fuere pa sobrevivir. Nun quedare ninfa n’aquella islla a la qu’él nun escorriere… Bravu, arrechu y pendencieru enxamás s’echare p’atrás ante nada nin ante naide (¿l’agua de La Peñuca o la sidra de Roces?...).
- <Dicen que la vida ye mala.
¡ A quién-ylo vas cuntar, amigu,
que siempres llevé conmigo
la desventura y la bala !>.
- <Crecíu ente guerres civiles y mundiales
cómo queréis que sía yo un corderu pascual.
Soi la foguera y la pólvora sobro los vendavales
ya un reflexu dramáticu del duelgu universal>
D’otra
miente yera una persona
reconocida
nel ambiente lliterariu
pola so sensibilidá y saber tar.
De tratu francu, y
abiertu; espléndidu y
agradecíu, amás de cultu, amenu y respetuosu cola obra ayena a la
que sabía emponderar cuando yera menester. Hai gustos estremaos,
mas cuando consideraba que dalgo nun lo merecía yera satíricu
y sogón ensin
contemplaciones, sobre manera con aquellos que lu achacaben de poeta
menor: faltu de preparación (nun fuere a la universidá), de versu
fácil
y superficial. Della
vegada arrepostió-y a ún d’esta
miente:
< Sopla un vientu, ciertamente,
sobro la faz conocida
que, señores, pa nada nun ye frecuente
qu’a manotazos s’intente
esborrialu de la vida ...>
Nel haber del poeta de Roces tien la renomadía de ser consideráu como’l aniciador de la poesía afroantillana y por vez primera xube a la raza negra a la palestra; non en vanu pasare más de media vida n’ultramar: Cuba y México. Ensin que por ello s’escaeciere un momentu d’España y sobre manera del so Roces natal del alma:
< Nada m’importa, bon amigu,
tener el terruñu a distancia,
Asturies, dende la infancia,
va por aire y mar conmigo.>
Pesarosu, magar de too, por esa distancia involuntaria tiense entrugao camín del retornu caberu a la so Patria (1967):
< Si soi’l roble col vientu en guerra,
¿cómo viví cola raíz ausente?
¿Cómo se pue florecer sin tierra? >
Y pa poner la espuela sentímoslu cantar:
 |
| < San Xulián de Roces > |
< Voi de palu
y de cortexu.
Voi de Roces
hasta Granda,
voi de Granda
hasta Mareo,
voi de Roces
a Porceyo.
¡Soi de San Xulián de Roces
yo’l mio pueblu nun lu niego!>
- ¿Qué me dices, Flor de Diego?.
Como exemplu d’esa POESÍA
AFROANTILLANA podemos recordar dellos versos de la so obra más
conocida - en Cuba ye un himnu popular, talo l’«Asturies» de
Victor Manuel-, < La Macorina> :
.png)
< Venti años y ente palmeres.
Los cuerpos, talo banderes.
Noche. Guateque. Danzón.
La orquesta marcaba un son
de viesca ardiente y caprina.
El cielu, un gran frenesí:
“Pon,
ponme la mano equí,
Macorina”.
Allumen el barracón
grandes faroles de China.
¡ Fines plantes de criolla
que borden el canevá
d’aquel danzón, que s’enrolla
como na palma’l “mah.á”;
y alguien que diz qu’ «arrolla»
to cuerpu, ritmu y pasión!
Como guitarra en tensión
tu dibes tremando, tremando;
yo diba pulsando, pulsando
un bordón ya otru bordón.
¡Entá nun sé ónde queda
la piel y entama’l llinón!
Pa min que tou yera seda
caliente naquel danzón!
Un pañuelu carmesí
que voló del corazón
d’algún negru “lucumí”,
y ente magaya y pasión
quedóse tremando ellí.
«Pon,
ponme la mano equí,
Macorina»
..........
Yo bebo l’últimu ron
y quedo pensando en ti.
En ti y naquel danzón.
Nel vieyu barracón
yá nun hai faroles de China.
¡Tán toos fechos carbón!
«Pon,
ponme ….. >
Agabitu:
Canevá:Tela gordo afuracada – escarcavonada - pa bordar.
Majá (mah.á): Una culiebra pinta, cubana; non venosa.
Lucumí: Persona que pertenez a una relixón afro-cubana.
Bagazu: Magayu (a): Restos que queden de pisar la mazana, o vete tu a saber...
Llinón: De lliña: Correa que s’emplega p’atar la llana que se tien de filar na rueca.// Tela de filo poco trupo, claro y bien engomáo.
Caprina: (Faunu, perseguidor de les nifes de la viesca). De cabra o cabrón con cuernos.
Bordón: Pestaña o reborde que sirve d’adornu. // Palu llargu con dellos botones que-y aguapien la cabeza.// Versu quebráu que tiende a repetise tres de cada copla (estribillu).// Cayáu del pelegrín.
Chavela Vargas convirtió’l poema de Camín nun himnu nacional, dalgo así como l’ “Asturies” de Victor Manuel.
-----------------------------------------
Alfonso Camín foi de siempres un rapaz rebelde, xabaz ya inamansiable:
<Enantes
quiero ser Lluzbel
que l’Ánxel Buenu;
yo nun m’avengo a soportar el pinu
fechu una cruz, talo que’l Nazarenu.
Y por mor del mio perfil lluciferín,
repica roncu’l so tambor el truenu
y el rayu va allumándome’l camín.>
Arriendes
d’ello, como nun podía ser d’otra
miente, Camín yera un lliteratu de ruempi
y riesga:
irónicu,
sogón
y sarcásticu
por demás; tenía por bandera la poesía de Quevedo. Si los poetes
de la Edá d’Oru yeren críticos cola falsa política imperialista
de los reis Habsburgo (Austria)
qué diba salir d’un escritor que naciere
ente canteres y vivía
col
desastre del 98 al llombu
(Antilles y Filipines) y
por si fuere poco del “mataderu” de Marruecos.
< Diznos Carlos Aboyáu (Abollado, en castellán):
Debe España fabricar
más y meyor acabáu
si ye que nun quier palmar.
Ya olvida’l desconocíu
con prosa de Cascabel,
que tien d’entamar él
por iguar el so apellíu.>
:::::::::::::::::::::::::::::::::::::::::::::::::::::::::::::::::::::::::::
D’OTRES CONSIDERACIONES AL RODIU d’A. CAMÍN
NO QUE CINCA a la SO FAMILIA :
 |
| < Camín y Aurora > (S: xww.lne.es) |
Alfonso Camín Meana ñació na Peñuca, un barriu de La Nozaleda de la parroquia de Roces (Xixón), nel añu 1890 en tiempos de la Rexenta María Cristina d’ Habsurgo muyer d’Alfonso XII y madre d’Alfonso XIII, rei dende’l so nacimientu.
El pá de Fonsín nomábase Manuel Camín Lozano, yera fíu de Pepe Camín y María Lozano que vivieren na Braña, ente la Perdiz y la Carbayera de Roces (asitiada a la vera de la Ilesia de San Xulián). Manuel yera un home de mediana estatura, flacu y nervudu, bona persona y vecín comprometíu pero’l so calter tamién tenía el so aquél… Yera mui apreciáu nes canteres de Roces polos sos conocimientos pa trabayar la piedra amás de la so seriedá. Hebo un tiempu que tamién trabayó na Fábrica d’Aceros de Morea, a onde la so muyer debía lleva-y la comida al turullu de les doce. Maximina yera una santa y dalgo más emprentadora que los Camín. Viviendo na Peñuca llegó a tener un taller de costura – na casa de Pepe’l Chicu - pa les moces del pueblu de La Nozaleda.
Cuando Fonso tenía cinco años – tres que los consumeros esguayaren la parra La Peñuca – los Camín treslladaron a vivir nos altos de La Braña, la familia viose aumentada con una guaja a la que Fonsín mimaba talo una princesa, seique la puñetera siempres taba faciendo-y perreríes; pero l’AMOR ye ciegu, eso dicen… Años más tarde reclamóla pa vivir en L’ Habana.
Pepe yera un home fortachón y afayadizu que pasó los caberos años de la so vida semiderrengáu por mor de los trabayos nes canteres de Roces y l’húmedal de los campos de La Braña qu’abrasaben la rema. María, que nun llegaba a llabradora (una vaca, un burru y cuatro pites), viose obligada a pidir aida pelos pueblos de la redolada sacante San Andrés de los Tacones, onde tuviere nacío (arguyu).
La madre d’Alfonso Camín yera conocida como Maximina Meana – “pequeñina y galana”-, fía de Celesta y Fernandín Meana que vivieron na cuesta La Perdiz, nos altos de La Braña, frente a la facienda de Pepón de L’Abadía y el práu de Carrió, onde más tarde hebo prospeiciones carboníferes (San Carlos) que nun llegaren a bon puertu por mor de la poca fiabilidá de les mesmes; el grisú facía estragos irremediables. Maximina tenía dellos hermanos que, de primeres, vivieren nel Llanu: María y Teresa que cuando morrió so madre Celesta pasaren a vivir nes cases de la Fábrica de Lloza, nel Cerilleru, onde trabayaben. Manolín, emigrante en Cuba que al ponese malu , por mor de les fiebres d’ultramar, tornó pa casa y perdió la vida na Riega de La Cabaña (La Perdiz), ensin tener recibío un chapu de les perres que-y quedaren ellí, amigos …
Cuando Maximina morrió – nun diba tanto que Fonso colare p’América – so padre tomó otra señora en matrimoniu cola que tevo, polo menos, dos fíos siendo Corsino’l más conocíu.
- Fíu, a to madre queríala; esta ye sobre too por necesidá.
Fonso comprediólo y siempre tuvo muncho respetu por ella asina como polos sos hermanos postreros: Corsino y Lluis.
Otru yera Blasín, un echáu p’alantre qu’instaló una panadería onde la Fábrica de Xabón del Llanu y como nun tenía abondo p’alimentar los 22 fíos que-y encalomare a Elvira punxo otra nes Mariñes de la villa de Maliayo. Fuere’l padrín de Fonsín xunto con Pilar de Balba, ¿la más guapa del pueblu?. Ficiérese famosu en Xixón por mor del inventu del “panchón de trigu”que dende aquella nun podía faltar na casa de cualisquier llabrador que se preciare.
Otres tíes (paternes) de Fonsín, bien apreciaes por esti, yeren tía Luz y La Rosala* que vivíen no alto de Pumarín, cerquina de la bultable facienda de Pepe Claudio – el del Mascarón de Proba – célebre pola so cantera (pegando a La Peñiquina) y sobre manera polos sos gües pa tresportar les piedres a Xixón o au fuere menester; el muru de San Llorienzu tien munchu qu’agradecer a los caliares de Roces.
* NOTA: Nel Patiu La Rosala ye onde anguaño ta asitiáu l'Institutu Alfonso Camín.
L’ ABONDOSA OBRA de CAMÍN:
Yo creyo que naide nun sabe lo que realmente algamó a escribir Camín. Ye tán bayurosa la so obra que cuesta trabayu numberala por completu. D’una imaxinación desbordante y tala facilidá pa versificar que podía ser consideráu – sálvense les distancies - como’l Lope de Vega del modernismu tardíu o un románticu Espronceda talamente desferráu.
Por mor d’esta falta d’acomodu nel tiempu lliterariu que-y tocaba vivir y la falta d’estudios normativos ye polo que quiciabes Camín nun tevo en vida’l reconocimientu oficial y públicu que tuviere bien merecío.
¿Ye que l’abondosa cultura personal autodidacta qu’alquirió - lleía na tená, enriba la masera y hasta debaxo la mesa; por nun poner otros exemplos más caprinos - ¿nun tien inclusive tantu valir esta enseñanza como la mesma académica?… ¿ Y entós Cervantes y tantos otros? …
Bueno, a fin de cuentes si escuchamos el sentir de Vargas Villa (París, 1925) podemos entender onde ñaz un Poeta:
.«El verdaderu Poeta nun tien Maestros nin nagua por selo. /
. Canta como ruxe’l Mar, como marmuria’l vientu, como trina’l reiseñor. /
. Puen existir códigos d’Arte pero nun hai códigos de Poesía; la inspiración siéntese, nun s’enseña. /
.Hai regles pa facer versos pero nun hai regles pa facer poesía.» .
Y Camín yera la POESÍA n’estáu puru, los versos xurdíen nelli talo’l felechu nos montes de Roces: Instintu, inspiración, ritmu, coloríu, contrasentíu, arrebatu y desenfrenu: AMOR.
«Esti Alfonso Camín, de flor y aceru,
poeta pola gracia de l’aurora;
nietzscheana la pupila esclucadora,
bordón de toxu astur, capa y sombreru.
Independiente y llibre como elli solu,
Marte nes lluches y nel versu Apolu»
Otra esculpa, pienso yo, pa que Camín nun algamase esi merecíu reconocimientu lliterariu – el Cervantes tuviere sío la guinda del pastel a la so obra pero tevo que conformase coles del bardal de La Perdiz - podría ser la falta d’un compromisu políticu esplícitu bultable; nun militaba en dengún partíu magar les sos idegues claramente izquierdistes y el réxime totalitariu de Franco yeren un pilancu insalvable p’asitiase n’España : “ Pendencieru y desafeutu al Réxime”, dicíen los papeles….
Pero nun lluchó na Guerra Civil española, magar fuere un republicanu convencíu… Lo qu’él dixo de Pepón de l’Abadía en realidá dicíalo d’elli mesmu: “republicanu románticu”. La guerra yera la suya personal, nun pretendía otra cosa que ser escritor. Bastante pasare yá dende chicu: La estroza na casa de La Peñuca - con 5 años - polos consumeros que lu dexare marcáu de por vida, la paliza de Flor de Diego por defender un ñeru, la escorripanda del maestru por mor d’una inxusticia, la multa por torear un burreñu ( con estocada incluyida), los trabayos impropios d’un rapaz d’once años nes canteres y caleros de Contrueces y La Coría y sobremanera les engarradielles a garrote y navaya col Pirolo por nun aguantar los abusos de quien atalantaba ser superior. ¿ Y la fame que pasaren unos rústicos aldeanos que nunca nun llegaren siquier a llabradores ?…
::::::::::::::::::::::::::::::::::::::::::::::::::::::::::
EL TRASIEGU LA SO VIDA: Poeta errante
Alfonso … La Peñuca (1890- 1905)
…..> L’Habana...>1905 - 1916
….> España > 1ª G. M. (1916)
.....>Madrid (1916 – 1936) >Torna L’H.. 1936 >México 37
…..> México (1937- 67). Torna definitivu España: 1967....
…...> Madrid (67- 78)
…... > Porceyo - Xixón (78- 82)
Culu inquietu siempres qu’asitiaba nun sitiu facía escapaes a otros llaos…
. 2018 Tando n’España va a México.
. Tando en Madrid vien a Asturies y llueu va hasta L’Habana.
. En 1953 Tando en México va hasta L’Habana (nun podía vivir ensin visitar les sos muses talo un Apolo en Delfos).
Camín: LA GUERRA D’ESPAÑA
Cuando entamó la Guerra Civil n’España (1936) a Camín pillólu en Palencia y d’ ehí yá foi pasando per Valladolid, Lleón, Galicia (Llugo. A Coruña ), Asturies (Cangues del Narcea- La Puela ), Villablino, La Puela, Cangues, Navelgas, L.l uarca (presu 28 díes) - A Coruña, otra vuelta (10 meses colos sublevaos) , Valença do Miño, Lisboa…. > Mayu 1937» L’Habana ...»»» México.
. RELLACIÓN D’OBRES del Poeta (Incompleta) Nun ye fácil clasificar tola obra de Camín Meana. Tengo entendío Daquién apurrió unes 68 obres pero yo mesmo tengo visto haza 74 … Vete tu a saber, cualquier día aprucen más …. Yo dexo una amuesa de daqué rellación :
Adelfas (Habana, 1913. 2.ª ed. México, 1920). La <Ópera prima>.
Crepúsculos de Oro (Habana, 1914).
El valle negro
Los Emigrantes (1915)
Cien sonetos (Habana, 1915).
La ruta (Madrid, 1916)
De la Asturias simbólica (Habana, 1916. 2.ª ed. México, 1918).)
¿Quosque tandem? (México, 1920).
Alabastros (México, 1921)
Hombres de España (Madrid, Renacimiento, 1923).
La moza del castañar (Madrid, Renacimiento, 1923).
Hombres de España y de América (Habana, 1925).
De la Asturias simbólica y nuevos poemas
(Madrid, Renacimiento, 1925).La Carmona (Novela asturiana) (Madrid, Renacimiento, 1925).
Carteles (Poemas) (Madrid, Renacimiento, 1926).
Los hombres y los días (Madrid, Renacimiento, 1927).
La Pícara molinera
Entre volcanes (Novela). (Madrid, Renacimiento, 1928).
Xochitl y otros poemas. (Madrid, Ed. Ibero-Americana, 1929).
Antología poética. (Madrid, Ed. Ibero-Americana, 1930).
Carey (Poemas de Cuba). (Madrid, Ed.Revista Norte, 1931).
La Pregonada (Novela asturiana).
El gallo de Mateón
La Mariscala o el verdadero Bobes
Juan de la Cosa (Madrid, Ed. Revista Norte, 1945).
España y sus hombres
América y sus hombres (México, 1957)
Entre manzanos
Entre palmeras (Vidas emigrantes)
El collar de la emperatriz
El mundo y sus hombres
La moza del molino
La copa y la sed (México, Imprenta Azteca, 1954)
. Poemas para niños de 14 años (E. Nacional 1970)
AMADEO NERVO pon la espuela a la vida de Camín:
“ Misión cumplía, poeta;
pues reposar nel to llechu de llaureles”.
AMUESA POÉTICA
1. AUTORRETRATU
« Yo soi como eses selves que sol esplora;
y a fuerzia de ser bonu, siento’l placer del mal;
la mi vida talo un chozu que’l mio optimismu enfloria,
mios mandes, unes gotes del sangre nel puñal.
Vime nel horizonte, crucié la mar sonora,
la rosa de los vientos marcóme un ideal,
y retornié, trayendo, talo una flor, l’aurora
y l’oru los mios versos por únicu caudal.
Nada importa que güei la Patria, talo una madre ciega,
xulgue foriatu al fíu cuando a los sos brazos llega,
si’l sellu de la so fonduxe nun ye fácil d’esborriar.
Y l’aigla d’oru y fueu, el mio coral románticu,pa cantar dos mundos, lo mesmo que l’Atlánticu
tiende, talo dos veles, les sos ales sobro’l mar»
REMATE:
< Yá sabiendo que sé, que nun sé nada,
voi entamar a lleer la obra entera
de Camín Meana.
¡ Que Dios me cueya confesáu,
musa antillana !. >
ESTIMANCES:
 |
| < Camín, Albino y Corsino> (lne) |
. La primer mención va empobinada, como nun pue ser d'otra manera, al escritor de La Peñuca Don Alfonso Camín, la xida d'esti post y d'unos cuanto más que llueu verán la lluz.
. Los siguidores de <Camín de Niria> saben l'enfotu que tengo cola Wikipedia, un pozu sabiduría con una bayurosa información qu' inclusive tien de permitime aprovechar el so ablucante material gráficu. Si una semeya va ensin referencia espresa ye que procede de la wiki (Wp).
. El Colexu Públicu "Alfonso Camín", tanto 'l Direutor como alumn@s y Profesoráu, son en realidá los protagonistes d'esta publicación por mor del so trabayu interdisciplinar <Conocer Asturies> . Vais pol Camín afayadizu, cologues.
. La Biblioteca de Roces, "Alfonso Camín" y el grupu <Memoria de lo vivío> son el braeru catalizador d'esta historia; mercé a ellos el POETA amiyó en Roces.
. A Beni, l'actual propietaria de la casa Claudia, la del "Mascarón de Proba", que nos apurrió una información bien valiosa al rodiu de la so vetusta facienda asina como del <Mascarón> .
. Tomamos delles fotos de : <www.lne.es>, que siempre estuvo pendiente de Camín. Y tamién de Díaz de Orosia tomamos una semeya (Wp). Gracies, pintor. Y a Rafa Lorenzo, que cantó a Camín, a "Hierro y fuego". Al blog <abebooks.com> y la Editorial "Renacimiento". TamiéAl endefechu copiamos "La bolera" de "La Jueya". Dellos más figuren a pie de foto.
. Una mención especial d'agredecimientu al escritor y poeta de Llaviana Don ALBINO SUÁREZ. El poeta de Llaviana ye'l meyor valedor d'Alfonso Camín y nun hai naide que conozca la so obra tan profundamente como él. GRACIES Albino, nel nome tolos qu'almiramos al poeta de Roces.
No hay comentarios:
Publicar un comentario