Averamientu a la FLORA y FAUNA Caminianes

 Averamientu a la FLORA y FAUNA CAMINIANES:

                                            “Ente mazanos”

<< ADÁN  y EVA nel  PARAISU>>  ( " El cortexu " d' E. Valle)

        ¡Ye imposible!. ¿Imposible?… Tratar d’asoleyar equí tola FLORA y FAUNA Caminianes (de la dómina de Camín) ye una empresa de «buxarda y barrena, y de sol a sol la xornada». Son tantes les especies qu’antroxen esti hábitat que vien a ser una utopía tratar d'amiyales nun cativu llibrín o un post d'un blog.  Sicasí ….

        Ye l’enfotu d’esti post amosar esi PARADISU NATURAL de ROCES, únicu - animal y vexetal- que se sofita en trés fautores abióticos fundamentales: sustratu xeolóxicu (composición mineralóxica ya orográfica), clima (temperatura ya oceoanografía) y pluviosidá. N’esti mundu arcaicu de la Cornisa Cantábrica – (Subprovincia cántabro-atlántica, distritu uvieín) - ye nel que se tuviere desendolcao la esmoleciente y buiciega infancia d’Alfonso Camín y que con tantu ciñu tiénnoslo amosao en cualesquiera de les páxines de la so perbultable obra.

BIOXEOGRAFÍA  d'ASTURIES (Bertu Ordiales)

        Ye de nueso preceutivu empecipiar pol so llibru de memories “Entre mazanos” onde nos cuenta los avantares de la so infancia-adolescencia naquel mundu pre-industrial magar que inxertáu dafechu nun ámbitu fondamente rural y nel que, de xuru, tamos atrapaos por una creciente señaldá. ¿Quién de nós nun llevó la Cordera abebentar a la riega tres de casa? … ¿Quién nun foi a la gueta pa tresnar un magüestu naquelles atapecíes serondiegues?… ¿Quién nun carició daqué vez los güevos d’un nial de malvís? … ¿Quién nun tien andechao en llevantar un balagar? 

<Segando la yerba> (N.P.)

… ¿Cuántos carros de yerba empayaráremos na tenada?… Cuántes mazanes tenemos prebao camín de la fonte cola ferrada al llombu… Cuántes veces fuisti cañicándote nel llabiegu cuando to güelu, arando les tierres, precisaba un poco más de pesu pa que’l riegu de la rexa calare un pelín más fondo …

<Arando la tierra> (V. A. Salas)

       -¡Güelu, que nun soi sosteneme!

                                            - ¡Agárrate al timón, ñerbatu!

        Y les riestres de panoyes pa colgar nel corredor tres una entretenida esfoyaza; aquella que finaba siempres col brindes d’una copina d’anís, xida del cortexu la mocedá… El nuesu recién pasáu nun ye otro qu’una señardosa alcordanza de tiempos qu’enxamás van retornar magar que formen parte imborrable del nuesu mancomún cultural.

                                    ::::::::::: :::::::::::::::::::::::::::::::::

        .. Si echamos una güeyada a la cubierta vexetal europea vemos que se dixebra en dos grandes rexones fitoxeográfiques seique dividíes en provincies coles sos peculiares diferencies. Xeneralizando:

. La eurosiberiana , clima oceánicu ensin periodos de seca, temperatures suavizaes pol Atlánticu y branos con lluvies suficientes. Asturies (Roces) pertenez a esta rexón.

. La mediterránea con clima continental, a vegaes estremáu, y con grandes diferencies de lluvia y temperatura.

                                 ………………………..................

<La Braña - La Perdiz>, na rexón Eurosiberiana.

        Enantes d’entrar dafechu n’esi idílicu paraísu natural nel que se tuviere desendolcao la infancia ya adolescencia de la vida del POETA la Peñuca queremos poner n’alcordanza que’l paisax vexetal cantábricu ye un mosaicu de formaciones vexetales estremaes (viesques, matos, montañes, praos,…) distribuíes dependiendo d’esos trés fautores abióticos que venimos de nomar y nos que se sofita la bayurosa variedá biótica (plantes ya animales) qu’analaya la redolada de Roces: El sustratu xeolóxicu, el clima y la pluviosidá.

                    (1) EL SUSTRATU XEOLÓXICU

        Permitíime, enantes de perdemos nestos pequeños edenes caminianos, sobro’l que s’acostina esta Arcadia asturiana, que me somorguie en delles consideraciones.

        El sustratu xeolóxicu nel que se sofiten la nuesa flora y fauna asturianes ye bien estremáu ente Oriente ya Occidente, sicasí hai una franxa intermedia que gocia de dambes oportunidaes:

        El sustratu ORIENTAL , de naturaleza caliar – carbonatu cálcico o calcita (C03 Ca) , ye un tantu roceanu a disolvese nel agua. Sicasí’l C02 (Anhídridu carbónico ) y la presión atmosférica son a descomponelo en calciu (Ca2) y carbonatu (C03). Esto va dar llugar a los h.ous (fondigonaes) y paisaxes llastrales (llapiaces) en superficie asina como en galeríes cárstiques soterrañes. Los Picos d’Europa son exemplos superiores d’esta amuesa (Que-y lo entruguen a los agarenos tres la escorribanda Cuadonga en 721). Estos suelos eutrofos, de pH básicu, son ricos en nutriente.

        No que cinca a l’OCCIDENTE tenemos sobre manera una roca siliceo (SiO2) cuarcita y pizarra, más duro que’l boxe. Suelos oligotrofos, pH ácidu, pocu carbonu y probes en nutriente.  Aprucen tamién delles especies intermedies qu’aprendieron a adautase a dambos mundos.

        Otra carauterística edafolóxica d’Asturies vien derivada de l’accidentada orografía, con montañes celestiales y beyos zarraos con temperatura y pluviosidá estremaes dafechu de la costa produciendo una bayurosa variedá na ecoloxía les especies.

                                            (2) EL CLIMA

     … Ye fácil pa nós decatase que’l territoriu astur cuenta con climes estremaos. La faza costera y dalgo del interior presenten un clima eurosiberianu (¿lluvia a esgaya? +nuble a fartar + ¿seca enxamás? + débiles contrastes térmicos: día-nueche, branu-iviernu). [El cambéu climáticu da munchu qué pensar… Menos a Trump] . Estos benevolentes fautores (turistes a mamplén) son determinantes pal espoxigue de viesques planicaducifolies: Carbayeres, fayeos, bidulares, … ( Esto ye Hoolywood, señor Trump).

     Al aviesu la faza meridional – Cordillera Cantábrica – presenta un clima submediterraneu onde espoxiguen viesques esclerófiles* planiperinnifolies d’alcines, sufreres, rebollos…. Son eses viesques de fueya duro y afilao, col enfotu d’amiyar la perda del agua que-yos cuesta atrapellar, y que ye preciso almacenar pala seca dómina estival.

*Esclerófila: Perenne y dura

                                        (3) PLUVIOSIDÁ

            … El réxime de precipitaciones (ombroclima) y la temperatura (termoclima) de cualisquier mediu abióticu van determinar les estremaes comunidaes vexetales clasificaes por pisos bioclimáticos:

1º Pisu .- Ombroclima llento: Ente 900 y 1400 l/m2/añu.

2º Pisu.- Ombroclima hiperllento: Ente 1400 y 2100 l/m2/añu. 3º Pisu.- Ombroclima ultrallento: Más de 2100 l/m2/añu.

El pisu “llento” (húmedu y suave), de la faza costera, va ser nel que nos desenvolvemos en Roces (Xixón). Los otros dos danse más dica l’ interior d’Asturies.

                                         ::::::::::::::::::::::::::::::::::

         Si atendemos a los Pisos de Vexetación (termoclimáticos) alcontramos:

                              

<Ferregüeyando Xixón>

                  1º.- Pisu termotempláu (termocolín). Anda pola faza costera ente 0 y 150 m/a . Protexida de los vientos fríos del norte y de les xelaes ya unes precipitaciones ente los (700-900) l/m2/añu asina como una ñublina marina, cuasi permanente, que torga la vaporación da orixe al espoxigue de dellos felechos, relictios del Terciariu ( Davallia, Culcita, Osmunda,Vanderboschia o Woodwaria), uzes (berizos) y toxos que van asociaos a umerales o viesques mestes de suelos fondos y frescos. Inclusive caltiénse la flora lauroide (ardina, sufrera =/alcornoque/, lloréu, olivar y borrachinal). 

..«La parroquia de Roces allúgase sobre manera nesti pisu termotempláu o termocolín»

        2º.- Pisu mesotempláu (colín). El más estensu d’As. Allúgase ente (150-700) m/a. Iviernos templaos, poques xelaes ya escases ñublines marines. Pluviosidá ente (900-1400) l/m2/añu.

    . Ye’l pisu ideal pales viesques plani-CADUCI-folies: carbayos, castaños, tilos, fresnos o ablanos. Pero tamién hai viesques relíctiques plani-PERENNI-folies: sufrera, ardina, borrachinal y lloréu. Como Asturies ye mundial tamién aprucen delles viesques marcescenses (siempres caltienen daqué fueya): caxigos y rebollos.

    .. «Tamién la nuesa parroquia – Roces - participa d’esti pisu mesotempláu o “colín”»

<Semeya:Bertu Ordiales>

        3º.- Pisu supratempláu (montanu). Ente (700-1800) m/a. Pluviosidá (1400-2100) l/m2/añu. Típicu del carbayu albar, fresnos, fayes y bidules. Sicasí , bien alto, afáyense viesques relíctiques (reliquies, queden pocos) de texos, carrascos o de carbayu orocantábricu.

        4º.- Pisu d’Alta Montaña

    - Orotempláu (subalpín), hasta los 2300 m/a

    . Criorotempláu (alpín), > 2300 m/a

            En dambos casos ensin viesques por mor de les xelaes y l’abondosa ñeve sicasí puen amosar viescos de Xuníperos o d’arbustos chaparretos.

                                     .::::::::::::::::::::::::::::::::::

EN RESUME …

        Escaeciéndonos de la turria qu’acabamos de metenos vamos facer una síntesis del sistema biolóxicu d’esa faza idílica de Roces na que se tuviere desendolcao la primera estaya de la vida del heraldu d’Asturies, don Alfonso Camín.

        A lo llargo d’esta soba tendrás dáote cuenta – como si nun lo supieres yá- que’l PARAISU de Roces pertenez a un clima termo-meso-templáu con caldies temperatures, suaves n’iviernu (cada vez más, dicía Camín que nel Picu Samartín enxamás se dilía la ñeve, y yá ves agora ...) ya duces nel branu. Por mor de les lluvies xeneroses (?) abonden los praos, mates y viesques caducifolies, sicasí tamién s’alcuentres dalguna ayalga relíctica o marcescense.

.*Marcescencia: Delles plantes caducifolies caltienen siempres fueya seco nel árbol, magar sía iviernu . Ex: El Rebollu, un tipu de carbayu. La Rebollá, onde nací; por eso somos tan retorcíos, ¿qué me dices Camín?...

                            :::::::::::::::::::::::::::::::::::::::::::::::::::.

<PRIMAVERA> (N. Piñole)

            Enantes d’entrar dafechu nel PARAISU de Roces por qué nun facemos boca con esti sonetu de Camín sobro ASTURIES que, por supuestu, bien podemos aplicalu al casu (Roces):

                                    «ESTO YE ASTURIES»                              

                            Deme’l zrezal perendengues bermeyos

                          que los prenda la moza nes oreyes;

                         vuelen les parpayueles en pareyes

                         multipliquen la fonte risa y güeyos.

                        Añere la calandria nos matoxos,

                        funda l’aráu sos potentes rexes;

                        desate’l sol nel portal les sos guedeyes,

                        cante’l raitán sobro los verdes toxos.

                         Brinde’l pumar la cobiciosa fruta;

                         qu’al cayer la castaña, repercuta

                         talo qu’un tamboril, pela montaña.

                             Salude l’osu que remonta Casu,

                          escancien sidra natural al vasu.

                           Esto ye Asturies, manancial d’España.»

            Y agora, yá, vamos metenos en farina y dir pasu ente pasu viendo con un pocu detalle estos pequeños apartaces, paradisinos, colos que pues alcontrate restolando pela parroquia del Poeta La Peñuca, esi poeta errante que llevaba la flor d’Asturies biltándo-y del corazón. ¿Cuálos son, según les nueses entendederes, los pequeños apartaces d’esta paradisiaca parroquia?:

1.- La Braña-La Perdiz : La Fonte, La Llana y la Fastera : Caseríes cabezaleres, medios de vida. Viesca planicaducifolia. Hábitat acuáticu. - Les vivencies de Camín. 

2.- El Recuestu: El Palaciu. La Baliciega. Les faciendes : Pocatripa, S. Medina, E. Xacobu y Morís .

3.- La Carbayera: La Viesca.  La Ilesia. El Pueblu. Escueles. Chigres. Flor de Lis. El Palaciu.

4.- La Nozaleda: La viesca “LA NOZAL .- Delles Quintes importantes: Parque Celeste, Pachu Alonso, El Rixu, el Chicu ...- La Peñuca : La fonte, los yerbatos, la figar, la parra. La Torre Veriña, La cantera de Claudio, Les Paneres - Cai Corrida.

5.- El Pobláu de Roces : El Paradisu del saber: Biblioteca - Colexu Públicu ya Institutu Alfonso Camín - Escuela de F. P. Ocupacional.

6.- Darréu los cinco Paraísos amiyar un partaz col rol de tola FLORA y FAUNA que nos quede por sopelexar del so llibru “Ente mazanos”. La rellación tien de caltener nome n’asturianu y científicu y ¿pue dir? allugada d’una semeya de la planta o animal. ¡Munchu pides, San Xulián!

                                     ………………………………

                ¿Qué vamos trabayar en cadún d’estos paradisinos?

        Magar qu’en cualesquier d’estos hábitats podemos alcontrar práuticamente de too vamos afitar aquelles especies biótiques que meyor puen representar estos paraxes, siguiendo con procuru los recuerdos de Camín.  De toes maneres convién dicir qu'esti post ye namás un AVERAMIENTU  a la flora y fauna d "Ente mazanos"; seique camentamos poner tol enfotu pa dir completándolu, pasu ente pasu.

                                            :::::::::::::::::::::::

 

< La  Peñuca> .- Casa de nacencia d'A.C.

        Magar que so padre – Manolo Camín - trabayare un tiempu na Fábrica d’Aceros de Moreda elli vivió principalmente de sacar piedra, talo que so padre, Pepe, nes canteres y caleros de la redolada de Roces. Les poques tierres que teníen nun daben pa vivir como unos braeros llabradores, pero yeren - tanto mientres vivieren na Peñuca como cuando se treslladaren al altu La Braña - una importante gabita p’acostellar aquellos pequeños sueldos obreros.

        Yá sabemos que Camín naciere na Peñuca (12-8-1890), un requexu del barriu La Nozaleda, na parroquia de Roces. Dao que vamos facer un percorríu pela infancia y adolescencia de Fonso, recoyida nel so llibru de memories “Entre mazanos”, consideramos lo más axeitao entamar por falar de les mazanes y los sos derivaos, como yá tenemos acordao:

                    La mazana ye la fruta universal y por eso queremos entamar con ella como símbolu y nexu d’aunión d’estos ¿cinco? apartaces – paraísos - señalaos que conformen l’EDÉN de ROCES.

                                 El primer llibru de memories de Camín entitúlase "Entre Manzanos". Los pumares son pa elli'l símbolu d'aquella dómina infantil en Roces que siempres llevó consigo:

                            << ¿Cómo quies alcontrar

                                   l'aldea que voi suañando

                                   si cuando la vi llorando

                                   llevéla conmigo al mar? >>

                                        ::::::::::::::::::::::::::::::::::::::::::::::::::::::::::::::

                                            La MAZANA

    

< Recoyendo la mazana > (N. Piñole)

           .. La mazana [Malus doméstica o Malus pumila] ye’l frutu del ó la mazanal. Malus vien del gri. melón=mazana.- Pumila vien del lla. Pumilus por mor del porte chaparretu del árbol.

         Trátase d’un frutu arredondiáu, carnudu y d’un sabor agradable. A un garapiellu de mazanales conocémoslu col nome de pumarada (pumar), de les qu’Asturies ta enllerada magar que precisamos tener bastantes más, sobre manera dende que la SIDRA ye Patrimoniu de la Humanidá ( 4-12-24), ye dicir, Patrimoniu cultural Inmaterial de la Humanidá. Si vemos a daquién que ta sanu como un coral los asturianos dicimos que “ ta sanu como una mazana”.

         La mazanal (pumar) ye un árbol plani-caduci-foliu hermafrodita (estambres y pistilos na mesma flor) d’ente 10 y 12 metros d’altor. Corteya gris escamoso y cañes con borra (pelusa) . De fueyes simples, alternes, ovalaes ya serraes y cola base arredondiada; llixeramente tomentoses (con pelu) pela facha y sobre tou pel envés. Flores hermafrodites de color blanco-rosaceo axuntaes n’umbeles de pedúnculos llanosos. Florez pela Primavera, abril-mayu o quiciabes enantes, dependiendo de la variedá. El frutu, la mazana, ye un pomu carnosu, con pebides nel mosicu interior y col pulgu ente verde y coloráu, según la variedá. El sabor pue pasar d’un dulce a un agriu mui prestosu seique nunca va defraudate. Tien una polinización entomógama (per aciu los inseutos) por eso hai que tener munchu curiao colos tratamientos. Ye un árbol veceru, qu’en xeneral da ca dos años, magar que dalgunos nun s’aguanten y dan a esgaya tolos años (zurtiaos).

                        VARIEDAES de MAZANES

       

<< La MAYADA >>: Tresnando la SIDRA nel LLAGAR

                         < Mariano Moré dexónos esta realista estampa sidrera: "El llagar">

         . Pa facer la  SIDRA D.O. hai falta mazanes mui variaes ya escoyíes col tastu estremáu (Duces, ácides, semiácides, amargues). Por exemplu:

         . Collaos: Semiácida . Perezosa: Dulce a semiácida

         . Coloradona: Dulce amarga . Regona: Ácida amarga

         . Xuanina: Ácida . Ernestina: Dulce amarga

         . Perico: Semiácida . De la Riega: Semiácida

         . Sanroqueña: Ácida . Blanquina: Ácida

         . Llimón montés: Ácida . Carrió: Semiácida

         . Durona de Tresali : Ácida . Solarina: Semiácida

         . Clara: Amarga . Meana: Amarga-Ácida

         . Fuentes: Ácida . Raxao: Ácida

         . Verdialona : Dulce . Teórica: Ácida

         . Panquerina: Semiácida-amarga. Prieta: Semiácida

          Hai munchísimes más variedaes: mingán, peramingán, ruiloba, reineta, ….

        Camín fálanos delles veces nel so llibru d’esta fruta bíblica y asturiana por escelencia : 

 La mazana, la dueña del Paraísu.           

        ¿Foi pa tanto la cosa? …. ¿Esvaneció, quiciás, el Paradisu?… Si lleemos a Alfonso Camín y nos somorguiamos ”Entre mazanos” podemos decatanos qu’en Roces existíen – ya entá esisten – pequeños EDENES qu’enalten la grandeza d’esi CREADOR. Sabíalo bien la Duquesa del Recuestu - Doña Joaquina – qu’en cuantes punxo un pie nel PANDU, como se conocía d’aquella a Roces, yá nun coló d’aquí hasta que foi amestar dafechu col so Creador; nun podía dir a otru sitiu: Del Edén al Paraísu.¡Qué t'afayes, señora DUQUESA!

      

< Siempre albidrare que'l  "Güeyu Deva" fuere la entrada al PARAISU TERRENAL>                 (Semeya: Bertu Ordiales)

            Poro hai dellos otros  PARAÍSOS     ........…………

          ¿Abebentamos d’eses fontes d’“Ente Mazanos” a ver los edenes qu’alcontramos? ….

        Vamos dexar que cavilgue’l poeta:

1) El  Pandu La BRAÑA y el PARAISU de La PERDIZ

         « Cuando tenía cinco años (1895) nació la mio hermana Felícitas. Yo escomencipié a dir a la escuela de Roces. Seique pol mieu que-y garré al Maestru o porque precisaben en casa de los mios servicios pasaba más tiempu llendando la vaca y la burrina que daprendiendo les lletres. Llindiaba nos campos comunales onde taba asitiada la célebre Fonte de la Braña, abellugada por dellos carbayos centenarios, ya onde acudíen por agua les moces más guapes de la redolada (Rufa y Lola, Carme la de Pinón El Madreñeru o Lupe la de Pepón…..).

         . Llendando con ello había un pradín per onde enredaba un regatu nidiu que, bordiando’l camín, bañaba los pies d’unes tarmudes alisales (umerales) que dexaben sentir una interpretación coral de xilgueros y verderinos.

        Yo daquella andaba más pendiente de guetar los niales, facer volaores colos xuncos o xuncir a unos carrucos artesanos les vacalloríes qu’apigaciaben nes cañes de los carbayos - ¡qué xabaces yéremos! - que de refrescar por aquelles ninfes de la fonte la viesca.

        Otra cosa fuere cuando pasáu’l tiempu Poli y yo escolingábemos sobro la fonte pa guetar l’entamu de les ninfes vecines al abangase pa llavar la ferrada:

        - ¿Échote un gabitu, ne?

         - ¡A ti voi echate yo, pero pol esgoladeru La Peñuca, xostrón!

<< La  FONTE >> ( N. Piñole)

Fonte de La Braña

(Escoyeta del poema d’Alfonso Camín)

« ¡Moces del mio pueblu! ¡Senderos de bodes!

¡Robles y castaños¡ ¡Fonte de la Braña!

Cuando yera guah.e, a ti diben toes

les fontes d’España.

Calces d’espadaña y el berru na oriella.

Fiesta azul del berizu, flor de camomila

qu’aruma la planta que crucia’l camín

álamu onde’l mierlu esgrana’l so trinu

y árgoma onde’l tordu diz la so canción.

Moces de l’aldea;

la ferrada qu’en oru y plata flamea

col so canxilón.

Y el mio corazón

que yá toma idea

del santu Misteriu de la Encarnación:

Rosa de Perico, Rosa de Pinón.

¡Rufa, fecha una moza de senu trunfal

y Xeles con esi aroma rosal!

Canciones que vienen por tierra semao.

Y Lupe, que porta la ferrada

talo corona ducal.

Y Nati, torniada, completa,

gallarda, arumosa que güel a so ser,

como mazana reineta

que siempres nos sabe a muyer.

Yá tien miraes de fruta y de fueu

Marí, la fía d’Anton de Xuandiz;

trés moces rollices de surcu y de riegu

arumen la cuesta que va a La Perdiz.

Pente’l maíz,

delantre los perros y l’alma feliz,

lleguen a la fonte les de La Farola,

les cuatro rapaces de Xuan d’Andarola,

el grupu de moces de La Carbayera,

que nunca quixeron calzón con veyera;

Carola Madrera,

que güel, con rondes de mozos galanes,

a hortensies del vieyu Barón de Rubianes;

y Pilar de Balba,

risueña, ablucante, picante, menuda.

        - Pa nada más guapa, Duquesa d’Alba,

que güei tas nos llenzos de «Maxa Desnuda».

La de Flor de Diego, lluna ente mazanos;

la de Pocatripa, calandria nos llanos;

la de la Estanquera,

tres quien van los mozos cola cabritera;

la de La Marruca,

la d’Antón de Xica,

la flor de la casa de Xuacu’l de Cuca,

pequeña, graciosa, como una cerrica;

la rubia panoya de Xuan de Valiente…

Y el chorru na ferrada, repica, repica

bayura de moces al rodiu la fonte.

Y yo al pie la fonte, mordiendo una rama

del roble’l vecín,

nin siento siquiera la vaca que brama;

nin cuenta me diere qu’esnala’l pollín

detrás de la burra de Pin de La Llosa;

s’enrita, rebuzna, reblinca y acosa

y suelta dos coces al pasu de Rosa;

el perru rabiosu, que va esprecetáu

saltando cunetes, detrás del raposu;

la moza que grita:

«Perico, Perico, ¡hale, hale, hale!»

Crecí. Talo l’ave, perdíme nel vientu

o per la llanura, como’l manancial,

llevé fonte y moces nel mio pensamientu,

torné a la patria, topéla nel cortinal,

¡volví a les foles y al confinamientu

con esta señaldá, sonora y xovial,

de roble, de fonte, de moza y rosal!»

Toxos na Braña

 

        Más p’allá de la Fonte la Braña llevaba mio padre n’arriendu una mata d’árgomes propiedá de mio padrín, Xuaquín de Cuca. Magar que la vaca facía lo que podía naquel berizal-toxal la pollina poníase como una quica. Mentanto esgamotaben yo xubía pela fastera hasta’l castañéu de La Perdiz y dende ellí, a techu nel cabornu, yera como Chus cuando’l Diablu lu tentó col envís de  da-y tolo que vía dende lo alto del ermu si lu reconocía como’l Dios verdaderu:

El mundu dende La Perdiz : < - Tou esto pue ser tuyo... - Pero si yá lo ye, ho ...>

       [[ - Yo acolumbro dende equí <el mundu mundial>, Lucifer; ¿qué más pues dame tu?… Tengo Roces, Contrueces, el mio Xixón del alma y hasta les veles del Cantábricu… (Que tendrá de llevame un día a Ultramar).

        - Eso nun ye nada comparao con too lo que yo pueo apurrite…

        - ¿¿¡¡Ná??!! … Mira, ves el Musel col puertu carboneru, el palaciu Revillaxixéu, el cerru con Santa Catalina, el Cabu Torres… Esfruto viendo funcionar les numberoses fábriques : l’Algodonera , la d’Aceru, la de Lloza, la Sombrerera, la de Xabón, la fábrica Tabacos, Chicolate… Agora date la vuelta … ¿Ves ? … Aquello ye Granda, Caldones, el Monte Deva, Santurio, La Peña los Cuatro Xueces y los Montes de Samartín, onde los ñeveros se caltienen l’añu enteru ... Mira, fatu, hasta tengo un cabornu p’abellugame cuando llueve o fai munchu calor. Anda, entaina, que n’esti PARAISU nun tienes nada que facer. Vuelve por otra, Luci; que la próxima cuéntote cómo lo paso analayando pente la fauna paxaril d’esti Edén. ¿Sabes cazar con un ferre, chatín?» ]]

"Que llueva, que llueva..."

          Al par del cabornu afayaba la caseta del agua que venía de Llantones y abastecía la casa del fotoxénicu Manín d’Antona* – siempre tresnando preseos de llabor- la mina de San Carlos, les finques los Trabanco y Los Cachai , unes cases xornaleres, el robledal (Carbayera) de Ramón Vega, a Florencio García, los collaos de Prudencio La Riega con casona metanes la pumarada con unes mocines roxes como panoyes de maíz, que pa nada precisen los curiaos del nuesu meigu, Perico Mau. Cerca andaba la casería del gaiteru Lin de Pondal, qu’amás de la bona sidra qu’iguaba tenía tres de casa unes peres de «campana» que yeren el maná de los draculinos de lluna llena, ye dicir, los rapazos de la mio quinta. El Praón de Carrió, colos sos vieyos pumares, la tierrona del de Cuca onde les patates salíen más xelaes que’l regatu La Cabaña. La pomarada de Flor de Diego y el castañéu de Pepón de L’Abadía, siempres lleendo «El Noroeste». Qué dicir de la casa Fernándín, yá cayendo sobro Granda, onde vivíamos nós: Padre, madre, güelu, güela y la mio hermana Felícitas.

Pol artista: Manuel Medina

     

   Na llanera de La Braña, al rodiu la «otra» caseta del agua, xurden poderoses les faciendes de Cerón y Manolo Valiente que pa nada oldeen la delicada casa de mio güela María.

* Manín d’Antona fuere’l modelu de Manuel Medina : “El sacador de mueles” y “Lleición de gaita”. 

       [ Mientres Manín d'Antona tocaba la gaita los guah.es de La Braña tocábemos les <campanes>, unes peres campanudes que tenía tres de casa. 

        - ¡Otru culete, Pepón!]

                                         

                                    «La casa de mio güela»

                                [[ Equí, talo si fuere un aeroplanu

                                nel hangar, pero que yá nun vuela

                                alzóse tamién la casa de mio güela

                                 con dos ales de tierra sobro’l llanu.

                                 Nin figar, nin piescal. L’artesianu

                                 pozu ta ciegu no que foi parcela;

                                nin ella ta ellí, nin paso yo pa escuela.

                                 Lo que fuere surcu en flor, ye riegu vanu.

                                 Siempre n’estragal, figura en roca,

                                 los güeyos fixos y l’afán completu,

                                 sigue naguando la mio carrera lloca;

                                brindándome al llegar, cuasi en secretu,

                                 el pan

                                 qu’ella mesma tien quitase de la boca

                                  pa que sirva de merienda al ñetu.>  

                                                ............................................

 

<Niales de pega>

Pega : < Pica pica>

    . Na llanera de La Braña regada pol Ríu Cerón – que pescaba dende casa - praos, xuncales, choperes o alamedes, pomares y nisales a mamplén y aquellos chopos onde unos tremendos niales espelurciaos yeren pa min talo un imán por mor de les pegues que pa nada cuntaben cola visita d’un rapaz de La Perdiz.  

 

  

<La Saltadera>

    Un pelín más p’allá, ente’l pumar y el maizal, destaca l’horru de Manolo Río. Pel Camín de Santa María, y tres abebentar na fonte Palmira pasamos la «saltadera» de Pondal pa entrar nel Paradisu de Granda …. Otru mundu.

                                    .................…………………………

< Soi un raitán, según Eva Coto > 

  PÁXAROS YA OTROS ANIMALES que tienen el so hábitat nesti paraísu: vaca, burru, perru, pites … 

        Alfonso foi de siempres un amante de la naturaleza que lu arrodiaba. Elli yera una especie más d’aquella biocenosis o comunidá biolóxica na que taba envolubráu. Les plantes y animales d’aquel hábitat termo-colín de Roces yeren parte del so mesmu ecosistema.

        Del mediu vexetal yá tenemos dao bona cuenta. ¿Por qué nun vemos cómo se rellacionaba con dellos animales?. L’enfotu y conocimientu que tenía dalgunos PÁXAROS tiénnoslo afitao dafechu. ¿Vemos unos exemplos? …..

1.-      « El mio amigu Poli yera un artista cazando páxaros con lliga, una masa pegañosa que sacábemos del arfueyu (muérdagu) que xurdía nes cañes de los mazanos. Colocábemos la trampa nos xuncos qu’abondaben xunto la fonte La Braña o los regatos de Cerón o la Cabaña tendíos sobro una llábana al par del agua. La seronda yera’l tiempu más afayadizu pa prindalos cuando xilgueros y verderinos aportaben en bandaes a abebentar tres una bona llacuada pelos praos de la contorna. Vendíemoslos na Villa talo rosquiyes de San Blas. 

< Dime, xilguerín parleru >

  

  .. El xilgueru (Carduelis carduelis) ye un páxaru granívoru ya inseutívoru que tien un cantu mui allegre y viste con una policromía de colores bien llucíos, sobre manera por esa mázcara facial prietu-colorada ya una capa preti-gualda. Por esta razón vese davezu sometíu a cautividá; bien lo sabíen Fonso y collacios que solíen vendelos a los villanos de la Villa.

 

<Verderín> (Wp)

     

 

   .. El Verderín (Serinus serinus), páxaru pequeñu de rabu llargu y que viste d’un plumaxe mariello-verdoso. Présta-y andar colos xilgueros dao que tienen el mesmu tipu d’alimentación. N’época de celu presenta un vuelu mui amorosu y xuguetón, asemeyando a la caparina, con xiros rápidos y recortes.

                  «Ente la cume y el mar

                                                yo yera una garra nel llanu

                                                y hasta-y tengo quitao

                                                les palombes al bilanu»

            … El bilanu, bilán o milán (Milvus migrans ) ye más conocíu como ferre. Ye un ave rapaz diurna y migratoria. El nome de ferre pue aplicase a dellos páxaros de distintu xéneru magar que toos ellos sían rapaces. Pa Camín ye’l milán. Pa Alfredo Noval el "gavilán". Pa min cualesquier ave rapaz que me coma les pites...

<Ferre o milán > (Wp)

       2.-  Fonso alcontró la forma de cazar palombes a cuenta del milán. En cuantes esti aprucía analayando sobro los teyaos de les faciendes de Pepón, Valiente, Río, Venancio o Lin de Pondal - acorrompinaos de palombes - Fonso, güeyu sollerte, poníase en guardia porque sentía que taba a puntu d’atacar. El ferre daba unes vueltes de reconocimientu coles ales tenses ya estiraba’l picu espada, afilaba les garres y cayía sobro una infeliz que nada nun tenía que facer; sicasí precisaba baxar a tierra pa esplumala. Buscaba una fondiga tapecida y …

         «Yera cuando yo, guarecíu tres del bardial o d’un carbayu, aprovechaba pa llanza-y un cachu teya… Raro yera que nun-y acertase… Cuando alzaba’l vuelu yera la mía:

            - ¡Palomba pa cenar!. »

< CIGOREYA > (Wp)

     3.-  Lo de cazar cigoreyes (Vanellus vanellus) yera otru cantar …. “Pibi, pibi!” … “L’avefría”, cola so carauterística cresta india y les ales verdi-azul tien un volar llentu y melgueru asemeyáu al de la caparina y va percorriendo los praos n’iviernu col so “¡pibi, pibi!”.

        Cola escopeta dos cañones al llombu, polaines de cueru ya unos perros oreyones y pintos aportaben a Roces delles bandaes de cazadores de lo más granao de la Villa. ¡Qué envidia!

             - Hai que tirar del maxín… - Camentaba Fonso .

        Con un tubu vieyu de fierro, una culata d’andrín, pólvora de la cantera y perdigones de grixu espantaba yo más cigoreyes qu’estorninos esnalaben pelos chopos de la llanera….

                -¡Piensa, Fonso!...

            Los escopeteros actuaben en grupu. Cuando una banda cigoreyes andaba pela zona’l ¡pibi, pibi! d'un cazador facía de reclamu a la bandada enemiga qu’acudía nun santiamén: ¡Pibi,pibi!. Apostaos tres los bardiales, los cazadores, y yo, dábemos un conciertu de pólvora colo que numberoses aves dexaben de volar. Cuando taben repartiendo la cacida aportaba'l gallu La Peñuca:

                 - ¿Y les míes?

                 - ¿Con qué cazabes tu, guah.e?

                 - ¡Con esto!

             Nun sé si por compasión o por nun tener una refriega colos aldeanos del llugar – pisáben-yos los semaos - apurriéronme dalguna pa min:

                 - ¡Mama, cacé tres cigoreyes!

             Mio padre ximelgaba la cabeza ... »

 

<Ñerbatu, machu> (Asturnatura)

              4º.- Los ñerbatos …. Amuésanos Camín na so novela “La Carmona” la intelixencia del ñerbatu . El cura Martínez y el maestru Don Sidoro caltienen un alderique al rodiu esta cuestión de la que caleyaben a la vera del ríu, cerca del llavaderu, cuando una fiesta de trinos llenaba l’atapecida d’aquel cielu azul del branu :

            - ¿ Qué sabe usté daqué de páxaros, Don Sidoro? ..

             - “Rien de rien”. Yo namás entiendo de llibros.

             - ¿Ve usté esa cerrica?… Ye una víctima de so mesma obra. Fai un nial perguapu y redondín pero namás dexa una puerta d’entrada… Los güah.es tápen-y la salida cola gorra y yá ta perdida …

         .¿Yá esi raitán que nos mira de regüeyu dende’l mazanal.

         . ¿Siente la parpayuela (cogorniz) cantar ente l’alcacer?… Nun intente buscar el nial; los pitinos salen disparaos namás nacer llevando la cáscara de culeru… El que canta ente los umeros ye un verderín … Siempre cuelga’l nial na rama más nuevo, lo mesmo que los xilgueros. , seique estos prefieren el lloréu o los frutales al pie de casa. Tamién el pinzón, arrechu y musical, présta-y tar cerca de nós. Pero'l más llistu de la clas ye’l ñerbatu.

         - Del “mirlo”, quedrá dicir …

         - N’asturianu ye un ñerbatu de tola vida. Pero vamos al casu. El nerbatu ye un páxaru señorial tou vistíu de negro, talo Felipe II, y col picu y les pates d’oru ya una garganta tenorial.

         - ¿Y qué tien d’esceicional?

         - La llibertá. Da mano, si lu pillen de mayor déxase morrer, nun aguanta la rexa. Ruempe’l picu y esplúmase hasta morrer desangráu. Cuando fai’l nial busca un sitiu alloñáu y enantes d’entrar chisba en busca l’enemigu. Si acasu lu güelen abandona la construición, de caña y barru, que tanto-y costó enantes de sorber los güevos. Si los pollos fueren mui pequeños mátalos y si tuvieren pluma arrástralos y caltiénlos separaos col enfotu que puea salvase dalgún.

         - Esto ties de mandá-ylo al Rei Alfonso, que roba los “pollos” a les madres pa condergalos a la muerte d’África.

         - El ñerbatu nun cría fíos pal dolor, tienlos pa la vida.

         - Oiga, señor cura; ¿ y por qué nun vamos quitar esti resquemor con unos culetes de sidra?

         - Los asturianos tenemos suerte; con unos culetinos curámoslo too (Gracies, Eva).

                                     :::::::::::::::::::::::::::::::::::::::::::::.

                  <<  ROL de los PÁXAROS d'Ente mazanos >>

<Picutorneru>

            Vamos facer una rellación , de xuru qu’incompleta, de les aves que’alcontramos nel paradisu de Roces na dómina de Camín y a los que fai referencia en delles ocasiones.

. Malvís ( Turdus ... X..) . Parpayuela (Coturnix coturnix)

. Calandria (Alauda arvensis) . Tordu (Thurdus merula)

. Pinzón (Fringilla coelebs) . Cuervu ( Corvus corax)

. Pega (Pica pica) .      .  Ferre (Accipiter nisus)

. Milán ( Milvus ….)   . Gurrión ( Passer domesticus)

. Andarina (Hirundo rustica)   . Avión =Venceyu (Apus apus)

. Xilgueru (Carduelis carduelis)      . Palomba (Columba palumbus)

                         << Hasta los estorninos vienen antroyar pela Perdiz >>

. Cuquiellu ( Cuculus canorus)         . Estornín (Sturnus unicolor)

. Verderín (Serinus serinus)              . Verderón (Cardelius chloris)

. Cigoreya=chova (Vanellus x 2 )     . Glayu (Garrulus glandarius)

. Raitán (Erithaculus rubecula)         . Picatueru (Dendrocopos major)

. Andarón (Apus melba )                    . Chova (Pyrrhocoras... )

. Curuxa ( Tyto alba )                         . Codorniz (Coturnix X 2)

. Bircharchar (Xarxícola torcuata)     . Malvís (Thurdus filomelus)

. CUÉLEBRE :  Páxaru culiebrón que curia l'encatamientu les xanes.                                    

.                                        :::::::::::::::::. :::::::::::::::::::::::::::

         Bien. D’esti paraisu que conformen La Braña y La Perdiz entovía hai munches coses que cuntar … De fechu entá se caltién anguaño como la zona más rural de Roces. Vamos siguir somorguiándonos “Ente mazanos” a ver que plantes o animales alcontramos naquella dómina de la infancia del Poeta. 

 

< L'antropismu avanza pero La Perdiz caltién l'hábitat relícticu d'aquel PARAISU CAMINIANU>

        « Mientres el ganao pastiaba yo diba xubiendo al castañar de La Perdiz dende onde acolumbraba’l pueblu enteru de Roces, el barriu de Contrueces, ya un cachu más al fondu la Villa marinera y hasta les veles del Cantábricu.

        Cuando a meudía Faetón ponía’l carru a lo «fernandoalonso» yo arrequexaba nel cabornu d’un castañu que, magar el tueru güecu, siguía dando abondes castañes y al endefechu tamién daba la hora. El reloxeru yera Manín d’Antona, el mesmu que facía carros y llabiegos.

        - Qué hora será, Manín? .- Una güeyada ... Nun tenía otro que mirar la solombra'l castañu...

         - Cuido que van dar les doce...

         Nun s’enquivocaba, non. Nun pasaren dos minutos y yá sentíemos el turullu de toles fábriques de Xixón:

         - Ye la hora la xinta.

< ¡Vaya magüestu! >

        La CASTAÑAL ( Castanea sativa ). Bautizada polos celtes da un frutu secu abellugáu dientro un oriciu que fuere un alimentu básicu na dieta d’antaño. Una especie mesófila (templadina) que se da nos pisos llentos y nes fasteres de vallines termo—mesotemplaes xunto col carbayu, borrachinal y sufrera. Présten-y los suelos sueltos y escarbonaos antes que los ácidos.

        El castañu ye un árbol plani-caduci-foliu, monoicu (flores machu y fema nel mesmu pie), d’hasta 30 m d’altor. De groma trupo y amplio y la corteya nidio de color gris-pardo. De fueyes simples, alternes, grandes y llanceolaes que tienen el marxe serráu y el peciolu curtiu. Les flores masculines n’amentos llargos y les femenines allugaes na base de la inflorescencia en grupinos de trés abellugaes por una bráctea. Florez pel branu y frutia pela Seronda tres polinizar per aciu de los inseutos (entomógama). El frutu ye la castaña y pue comese … ¡Nin me lo mientes!.. Yá toi arranáu por facer un magüestu , ¿y tu? …. 

    … El castañu ye una especie única con más 70 variedaes que s’estremen nel tamañu, color, produición y tastu siendo la valduna una de les más apreciaes por Camín (y por tou quisque):

        <<Yera un atapecer serondiegu en casa del Mayorazu de Samartín de Güerces. Tábemos aldericando tola familia alredor del fueu mentanto faciemos un magüestu cuando la señora Ramona miró pa Telvina y pa min y esplayó’l so sentir:

            - Dao que nun tenemos fíu dalu, si vosotros dos llegáis a entendevos, podéis quedar dueños del Mayorazu. ¿Tu qué dices, Telvina?

        Telvina nada nun dicía. Abangaba los güeyos, arroxáben-y los carriellos y siguía comiendo castañes como si tal. Por cierto, yeren unes castañes valdunes, grandes, fines y coloraes d’una calidá especial de les qu’había poques en Roces. Unos cuantos exemplares nel castañéu de Lin de Pondal ya otros pocos al cabu del castañéu de Pepón de L’Abadía y para de cuntar. »

                                                             ………………………….

 

Panera de CASTAÑU, eterna.  Na Peñuca

        La castañal ye una especie perapreciada dende l’antigüedá tanto pol so frutu como pola so madera (muebles, preseos y aperios de llabranza, ¿ónde meteríemos la sidra ensin pipes ? ). Foi mui abondosa mercé a los desvelos del Imperiu Romanu que favoreció la so distribución de manera tala que daquién llegó a pensar que fueron ellos los entamadores n’España magar que yá s’afayaba ente nós dende va más de 16.000 años porque trátase d’una especie espontánea que sobrevivió a la cabera glaciación Würm calteniéndose rexistros polínicos con más de 30.000 años. Sicasí anguaño ta pasándoles torniaes por mor del abandonu y delles enfermedaes (Phytophthora) provinientes de la grana del continente asiáticu (¿otru COVID, campeones?)

<Nel Parque Celeste>

        .. La importancia les castañes yera tala qu’hebo una dómina, reciente, na que los castaños yeren consideraos como un inmueble, lo que oyes. Los vecinos teníen el drechu d’abrir poces – pa plantar castaños – nos terrenos comunales siendo l’árbol y el frutu d’absoluta propiedá; inclusive cuando se permitiere facer llosa individual nesi tarrén el castañu siguía calteniendo’l so drechu consuetudinariu (pola costume). 

            - El  prau ye tuyu, pero la castañal ye mía. 

      Sicasí les castañes que cayíen nel camín podíen ser guetaes
pola gandaya, escrito taba, ye dicir: tu y yo.

            - ¿Vienes a la gueta, Fonso?

                         - «La mañana ta seca. Sopló anueche’l nordeste,        

                             desdentó los oricios qu’enteabrió la orbayada,

                             abangó los felechos, llevó al fondu les fueyes

                             y, cola lluna, durmióse ente la rama.

                         - ¡El maná de los probes! ¡Ye la gueta, la gueta!

                            Dica los castañeos

                            p’allá va la gandaya*,

                            ye la xente cenciello

                            d'esta aldea asturiana»

*Gandaya: Castañes que caen nel camín y que la guah.ería aprovecha pa llenar el fardel. Costume perantigua de drechu consuetudinariu (la costume).

                                       ::::::::::::::::::::::::::::::::::::::::
                                     …………………………………….

        Ún de los animales cabezaleros tantu de Roces como de toa Asturies ye la vaca (Bos taurus). Esti vertebráu, mamíferu, domésticu, herbívoru y artiodáctilu que pertenez a la familia de los bóvidos y ye descendiente del Uru xabaz indoasiáticu (Bos primigenius) . Trátase d’un animal de temperatura constante y col cuerpu cubiertu de pelu, como bien sabemos.

    D’esqueletu óseo con 7 vértebres nel cuellu y cuatro estremidaes que terminen en pezuñes pares (artiodáctilu); una válvula na larinxe (glotis) y diafragma nel tórax. El sistema nerviosu ta mui perfeicionáu con gran desendolcu de los sentíos (v.o.g.t.o). Caltién la especie per aciu d’una reproduición interna y muérganos complementarios estremaos (machu y fema). 

<Vaquería nuna Quintana>

           Alienda por pulmones y tien una circulación sanguinea doble y completa. L’estómadu, como tolos rumiantes, ta dividíu en cuatro cavidaes y tien una dentadura onde predominen los molares pola sida de rumiar. 

        Esti animal domésticu ( Oriente > 10.000 años) foi’l símbolu d’una dómina bien amplia na cultura sedentaria del home modernu; podíemos dicir que la prosperidá d’una familia venía determinada pol númberu de vaques qu’una facienda podía criar.

         « - Pepón de L’Abadía tien una facienda perimportante, da pa mantener ocho vaques; amás de caballu, burra ya un rebañu d’oveyes.»

         Esti rumiante sirve pa muncho - ara y tresporta - y d’elli aprovéchase too: la carne, la lleche, la piel y hasta los cuernos. Los escrementos - <Dios pue muncho pero‘l cuchu más>- son fundamentales p’abonar los semaos.

        Que-ylo pregunten al pá de Rosa y Pinín que cuando quedaren sin vaca, quedaron sin vida. Sabíalo bien el vetustu Clarín:

        - ¡Adiós, Cordera!

                                                 …………………………………………………..

EL MAÍZ (Zea mays)

  

<Per Roces:Trabayando nel maizal>

    «Allalantrones, ente unos árboles, el prau y el maizal, col horru enfrente, como casi toes les cases llabradores del pueblu, la facienda de Manolo Río. »

    Como cuenta Fonso toles quintanes del pueblu teníen el so horru – o panera - pa curar el maíz nel corredor. Si les vaques fueron l’animal más simbólicu de l’Asturies decimonónica’l MAÍZ (La Revolución Industrial de l’Agricultura) foi’l vexetal más importante que tuvimos los asturianos dende la so introduición na Tierrina nel sieglu XVI; nel XVII yá taba amestao dafechu na dieta diaria de los asturianos:

<< BOROÑA>>

    «Munches fames mató’l maíz»: Pan de maíz, BOROÑA (preñada, si’l bolsu y el cuerpu lo permiten), fariña y fariñes, tortos (¡con picadiellu!), xarabe….. Y anguaño palomites, corn flakes, aceite y maicena... ( Dellos americanos sacaben hasta whisky, nun-y lo digas a naide)

    El narbasu sirvía pa mullir el ganáu y facer cuchu; l’únicu abonu que teníen. Toa facienda que s'apreciare debía tener una bayurosa estaya pal cultivu del maíz.

    Nos maizales tamién se semaben fabes, que s’engaramaben poles cañes de la planta. Tal yera l’enfotu que Fonso tenía pol maíz que-y ponía’l rixu altu al tresnar la comparanza ...:

«La casona ente mazanos – Prudencio La Riega- aleyada por moces rubies talo les panoyes del maíz»

     La familia de Fonso tamién semaba una estaya bien escasa qu’había qu’estirar, polo menos hasta mayu. Dicía madre:

             “Dios nos llibre

             el mio xentil,

             de la fame de Mayu

             y del fríu d’Abril”

         Pa Mayu yá nun quedaba nin un rispiu de collecha.

        . El fríu tardíu ye malo pa lo recién plantao… Y pa ún mesmu. Entá faigo alcordanza cuando n’Abril del ¿74? teniendo entamao dir a la Playa Rodiles el domingu viniente… ¡El Condao alboreció vistíu de blanco! ¡Qué pasada, Manín!.

« La boroña y les fabes con sal yera lo cotidiano en casa mio güela, la vilba de Pepe Camín»

                                                El MOLÍN de La Coría

      Col enfotu que la maquila nun fuere mui grande víense obligaos a cambiar davezu de molín:

        - « Fonso, esti añu vamos camudar de molín, a ver si la maquila ye más benevolente. Vas llevalo al Molín de la Belga».

        . Póngome a ello, cargo’l sacu nel burru xitanu y al pasar pelos Barreos el burru entierra les pates, sapia’l sacu y … Por más qu’intenté sacalu lo único que consiguí foi sapozalu entá más… Sacu al llombu hasta’l molín y burru al cagüercu:

        - ¡La madre que lo abatanó! ¡Qué temporada llevo!»

                                        …………………………………….

-¿Qué quies? ... Pónesme la burra a tiru ...

         Esta nun foi la sóleda vez que camudamos de molín: Molín de la Belga, Molín de La Piedra, Molín de La Vega … Molín ...

         - Tou queda pala maquila. El sacu bien más fluxu que la gaita de Lin de Pondal. Fonso, esta vegada vas llevalo a Granda, al Molín del Ríu.

         Paso la ponte de Granda y tuerzo per una caleya estrecha a la vera del ríu. El burru, mui apañáu, andaba a sos deleres y yo a los míos, camentando na Escuela. Taba Platero tan guapu ramoniando unes fueyes d’un umeru cuando, de sópitu, estira les pates, toma carrera, tira’l sacu y yo salgo catapultáu “per oreyes”… La farda, la burra del molineru que taba poniendo postures…El burru col rixu altu y yo .... ¡A sucu baxeru!

         - ¡Mal rayu t’escazuele!.

                                                     …………………………

< Curiando les panoyes de l'afán de los ñerbatos >

     

       El Maíz (Zea mais =<lo que sustenta la vida>) ye un cereal meso-americanu (zona templao) de la familia les gramínees, “infrutescencia femenina” que se carauteriza polos sos tallos llargos y macizos, al cabu los cuálos xurden unes espigues con semillees de granu - panoyes – , dispuestes a lo llargo del so exe. La planta compónse de raíz, tallu, fueyes y panoya, siendo esta l'enxundia por ser comestible (¡Yá te digo!) Ye’l cereal más granible del mundu penriba del trigu y de l’arroz. Ye una planta yerbácea, monoica, de flores unisexuales con inflorescencies masculines y femenines bien estremaes ( ye dir, nun ye hermafrodita) onde se dan les panoyes, unos granos que se componen del ñácaru y l'albume. 

< Celebrando la Pachamama>

   Los hispano-americanos son capaces de sacar del maíz una bebida, ¿bébora?, fermentada y nomada chicha *– pue tener alcohol o non – y que ye’l petite de cierta parte de la población sobre manera nos díes de La Pachamama: La Diosa de la Tierra

* Mira tu per onde los asturianos dicimos chicha a daqué importante y sustancioso.

                         

                               ::::::::::::::::::::::::::::::::::::::::::::::::::::::

                Otru animal al que fai davezu referencia Fonso Camín ye'l BURRU. El pollín yera un animal prauticamente imprescindible en cualesquier familia magar el so poder adquisitivu. A poca facienda que tuvieren un burrín - burreñu o garañón - nun solía faltar en casa ... En casa Fonso teníen unu, amás del que elli mesmu mercó a los xitanos....  Dos especies yeren les dominantes: El burreñu- híbridu de caballu y burra - y el garañón, un amestu de  burru y yegua.

< ¿El burru xitanu de Fonso? >

     En casa Fonso teníen un burreñu, una mecedura de caballu y burra. Yera pintáu pa dir col sacu a la molienda.  Yá sabemos lo que-y tuviere pasao a Fonso cuando foi camín de Granda, al Molín del Ríu... El sacu a la maquila, el burru a refrescar - cola la burra'l molineru - y Fonso a la consulta del magu Perico Mau. 

     So güela tenía un burru garañón - del que supo saca-y bona tayada; falta-y facía... 

   El garañón (burru + yegua) de la güela paterna, María, nun quedaba atrás... Un espécime grandón, propiu de raza aria, que cuando rebuznaba yera arrepostiáu por tol coru de yegües y burres de la redolada... Como los vecinos tamién queríen ameyorar la raza hasta-y pagaben a Doña María por iguar un flirtéu con aquel Donxuán.... 

        -  Si quies un burru grande, tanto por tanto, Valiente .

                                             .................................................................

        Los pas de Fonso, cuando meyor se vieren nun fueron dueños d'otro que nun fuere una vaca, una nuviella - pa pagar la renta - una pollina, un perru ya unes cuantes pites ... El perru, Muley, yera arrechu, noble y más rápidu que'l tren de La Camocha. Cuando lu llevaba con elli a escuela los raposos aprovechaben pa dir a la gueta y facer un magüestu na Carbayera La Perdiz. Elli ya una pega foron los meyores amigos de la infancia del poeta.

                                            :::::::::::::::::::::::::::::::::::::::::::::::::

    2) EL PARAÍSU d'El RECUESTU    

2.1. 
           Cuéntanos Camín ….

        . « Malpenes los guah.es nos víemos llibres de llenda y escuela buscábemos dalguna de les munches formes d’antroxar pela contorna del pueblu. En cuantes aportaba’l calor del branu sóliemos dir a la Charca la Baliciega, cerca la Quinta Morís, a peganos un bon chapuzón na compaña d’un bálamu de coríos que yá nos tomaren la delantera. Aquel boréu de l’alberca, remansu y alcuentru de lluvies y mananciales de la contorna (Ríu de La Pedrera , Riega de Robirón, Riega de la Rastrera, ...) que terminaben por conformar el Ríu de Tremañes o Ríu Pilón, ye ún d’esos pequeños edenes que nos brinda la parroquia.

<El coríu Apolo: ¡Qué guapu soi!>

      Los coríos yeren la gayola de la viesca que flanquiaba la Quinta Morís. Naquel sotu de xuncos, felechos, espadañes y escayos qu’espoxigaben al abellugu de fayes y carbayos teníen los coríos la bendita costume de anialar. Aquellos santos pardos, pintos y gayoleros poníen unos güevos gordos como’l puñu. El so amigu Fermín, del chigre-tienda Pepe La Llana (Ca Pacorro), tenía una hermana, bien guapona, que cuando nun escanciaba culetes atendía primorosa la Tienda – ¡cómo arrecendía a pan español y chicolate! …(¡La tienda!)

        Fermín combayó con Herminia, la so hermana:

            - Traemos güevos de coríu; si nos faes una tortiella comémosla ente los trés.

         Con docena y media de güevos salió una tortiella como la muela d’un molín. Sentaos nel prau, a escondíes de les güeyaes del chigre, y mirando pa Pumarín, tábemos pegándonos una fartura solene..

            - ¡Ai, qué secañu tengo!.. Unos culetinos pa emburriar…

             - ¿Qué quies, que me mate madre?

             - Nun tien por qué enterase…

        Una cabezadina tres d’una vara de yerba foi’l remate d’aquella guapa yacuada. Bueno, la espuela púnxola la madre’l día que m’averé pel chigre:

            - ¡Cuerri, cuerri, pirabán; yá verás cuando te pille,!. Probes collacios, ellos nun tuvieren escapatoria.

                                         …………………………..

 Mientres la fema incuba los machos de murga

Los CORÍOS son aves acuátiques y palmípedes de la familia ANATIDAE. Tienen el cuerpu arredondiáu y el picu anchu y achapláu. Per aciu d’una glándula, que segrega una sustancia graso, convierte les plumbes n’impermeables (asina cualquiera…). Sicasí cuando mayores son mayormente herbívoros magar que suelen comer de too: guxanos, pequeños artrópodos, yerbes, granos…… (écha-yos unes palomites y yá te cuntaré...)

Tando antroxando pel agua nun-yos cuesta un res salir volando, surden escopetaes, ensin carrera dala.

Anguaño les anatidaes más comunes nos nuesos ríos son los Anas Platyrhynchos, (Ánade real), l’azulón, por mor del azul de les ales remeres (en machu y fema) magar que lo más llamatible nel machu sía’l verde metálicu de la cabeza que remata nun collar blancu. A vegaes camuda’l color pero la fema guípalu pol mariellón del picu:

        - Tu a min nun m’engañes, azulón; esi picu mariellu qu’amueses... Anda, tira pala viesca, coríu...

        La fema ye más discreta, col picu prietu y el cuerpu pardu ye la única que guaria la docena abondante de güevos nel nial; y curia la reciella más d’ocho selmanes hasta que son a volar . So pá anda de parranda colos demás collacios que tienen el mesmu cantar; nin tan siquier algamen a conocer los sos fíos.¡Vaya morru, Donal Trump!.

La Quinta Morís

     Hai munchísimes especies de coríos, emigrantes-residenciales en xeneral, pero afáyense ente nós de manera tala que tarrecen dexar esti paraisu; vemos Anas Platyrinchos en cualesquier época del añu. Hai que tener en cuenta que col cambiu climáticu esto tornóse muncho más templao.

            -¿Fonso, ónde ta la ñeve perpetuo del Picu Samartín?…

       L’ hábitat de los coríos son les agües corrientes o remansaes, talo ye’l casu de los que s’afayen al rodiu la Quinta Morís, nel Camín de La Baliciega.»

                                                    …………………………………..

        Ún de los arbolinos qu’espoxiga naquel entornu llentu, caldiu y soleyeru del Recuestu, y sobre manera pela Baliciega, ye l’ablanal.

L’ABLANAL (Corylus avellana.- Koris=cascu , Avellana=ciudá italiana onde abondaba) ye ún de los numberosos árboles que xorrecíen pela redolada la Baliciega; bien a la vera los regatos, caleyes o na mesma viesca, onde carbayos y castaños yeren los dominantes.

         Trátase d’un arbolín planicaducifoliu, monoicu (flores machu y fema por separao pero nel mesmu árbol) que nun pasa de los 12 m d’altor amosando una groma poco denso y espelurciao. Perramificáu dende la base y con retueyos a mamplén tien la corteya nidio y buxo. 

 

< Amentos masculinos>

        Les sos típiques fueyes simples, rugoses, arredondiaes, pero terminando n’ápiz, tienen unos nervios mui llamativos . Les flores – salen antes que la fueya - masculines son amentos pedunculares mientres les femenines van en grupos reducíos al cabu les cañes. Florez ente xineru y marzu y poliniza per aciu los inseutos. El frutu, la ablana - ¡ai, Dios; qué peligru! – ye una ñuez oval y causular de tastu secu y sabrosu – ponles a tostar – que se presenta en carapiellos de 2 ó 3 granos. Qué gustu pasiar pela Villa delles tardes serondiegues con esi arume d’ablanes y castañes asaes caltriándote los sentíos. 

  

        Les cañes son perbones pa cebatiar, dao que son flexibles y resistentes: paxos, carros, macones y hasta pa tabiques d’habitaciones. Los cilúrnigos cebatiaben les cabañes que llueu cubríen con barru.

        Cuido que ye un arbolín perguapu pa llarar fasteres emprunes de poca desixencia edáfica; y si va aterrazao tantu meyor. N’época de Xovellanos Asturies esportaba ABLANES y ¡naranxes! a les Islles Britániques, qué te paez.

        Pa los celtes yeren sagraos, la kryptonita pa les culiebres , creyencia que se caltién hasta’l sieglu XXI.

                                        ::::::::::::::::::::::::::::::::::::::::::::::::::::::::::::::::::::

 

<Los xuncales de la finca Morís. Ríu Pilón>

        Nun podíen faltar, non. Los xuncos (Juncus L.- “Jungere=xunir) son una de les plantes perennes ya imprescindibles nuna charca permanente como esta de La Baiciega. Les xuncaees agabiten pa caltener l’equilibriu del ecosistema acuáticu; son capaces de llevar a cabu’l procesu de fotosíntesis por mor de les sos fueyes magar que tean somorguiaes embaxo l’agua. Los coríos, gayoleros, pásenlo dabute pente los xuncales a la cata de la ceba.

                                                                                                       ………………………………………………...

        El Camín de La Baliciega pue considerase’l centru del PARAISU del Recuestu – sacante l’edén de la mio princesa. Al entamu la caleya viviere, años más tarde, el pintor Urbano Cortina, l’home que nos dexare pal recuerdu valles y montañes d’Asturies. 

 

< El ranchu "La Marruca" >

        Sicasí hai munches coses más que sopelexar nesti candial apartaz del Recuestu: La casería de Joselín Pocatripa, el Palaciu la Duquesa, la quintana d’Eduardo Xacobu y la mui granible facienda de Silvestrón Medina, el pá del pintor Manuel Medina. Angüaño tenemos los Campos de Fútbol de la Federación (paraisu de tantos chavalin@s), La Cooperativa d’Agricultores (paraísu de los amantes de la Natura) y el ranchu de La Marruca, indianu de México que sopelexa les palmeres talo bandera.

                                                                    ..................................

        …2.2) De la casería de Joselín “Pocatripa” (home afable y candial onde los haya) podemos contar una historia que-y tuviere pasao a Fonso con so padre, José:

< La facienda de Joselín; tal cual >

        «Otru fechu que camienta Camín nel so llibru “Entre manzanos” no que cinca a Pocatripa. Un día de veranu Fonso foi echa-y un gabitu a José pola época la yerba dao que tenía a fargataes. Bien de mañana Fonso presentó na facienda de José :

- José, mandóme padre cola fin que t’echare una gabita; nós yá terminamos cola yerba d’esti añu. ¿Véngote bien?.

    - Viénesme talo aniellu al deu. Yá sabes lo que facer: vas detrás los segadores esparciendo los marayos y más tarde das-yos la vuelta. Cuando tea curao vamos faciendo balagares y colo verde unos barbutos. Tu yes pintu pa pisar les vares, va aidate la mio fía. Llueu vamos a cargar el carru pa metelo na tenada.

        Lo de la tenada yera lo meyor. Mientres José diba apurriéndonos la yerba p’asitialo na tenada la neña y yo aprovechábemos por enredar un poco. A vegaes José quedaba cola trente en ristre esperando que l’apañásemos pero…

            - ¿Qué carayu tais faciendo?

             - Nada, papa.

             - Mañana, tu a la tenada.

             - ¿Y yo?

            - Tu al carru.

                                Acabó lo que se daba. »

                                                         ...........................................

 

< La relíctica casería d'Eduardo Jacobo, n'actualidá >

        … 2.3) Un pelín más p’arriba, camín de Mareo, afáyase la Casería de Duardo Xacobu. Por mor del Plan d’Urbanización y Desendolcu Industrial - nun podíen construyir nin iguar - caltiénse tal como taba a mediaos del sieglu pasáu seique más abandonada, forzosamente: Casona con portalón, edificiu anexu, hangar p’aperios de llabranza – ehí los tenemos n’alcordanza d’otra dómina – ya un horru delantre casa, resilencia d’otros tiempos. Entovía hai daquién que la curia dando vida a la güerta, pastiando con unes oveyes y regando les flores que s’afrenten a la ruina y al desaniciu d’una quintana que, bien ceo, va ser pastu d’algún Polígonu Industrial o Parque Teunolóxicu; ye lo previsto n’honor del PROGRESU.

< El  Palaciu la  Duquesa >

         2.4) El palaciu la Duquesa. Vida y familia.

        Al cabu del barriu del Recuestu, yá cayendo sobro Mareo había una facienda perimportante – la Quinta Bambín – y con munchu abolengo dao que la dueña yera doña Joaquina, la mesmísima DUQUESA de Riánsares, que magar viviere nun palaciu taba integrada dafechu na parroquia talo una feligresa más.

La DUQUESA de ROCES

< La  DUQUESA>

        Doña Joaquina Muñoz y Canga Argüelles foi una dama de l’alta sociedá española ya asturiana que nació en Somió (Xixón) nel añu 1904 y falleciere en Barcelona en 1967 magar toa la so vida tevo benceyada a la parroquia de Roces (Xixón) de la que siempres foi una enamorada. Yera’l so sentir ser enterrada en San Xulián de Roces pero’l so hermanu nun quixo concede-y esi pruyimientu seique la Duquesa lo tuviere pautao col nuesu párrocu, Don Anselmo (¡Vaya rebote que trayía’l santu!). El que si reposa ente nós ye’l so maríu D. Ramón Menéndez-Morán y Llames (14-7-1891 ** 8-6-1955). Casaren na Ilesia de San Pedru , sobro les Termes Romanes del Campu Valdés, un primaveral dos de Mayu de 1950 (pillóme de chicu, que si no …….).

        Doña Joaquina, la Duquesa, alcuñu pol que tol mundu la reconocía, yera desdendiente d’ Agustín Fernando Muñoz y Sánchez, primer duque de Riánsares que tuviere casáu con Doña María Cristina Borbón Dos-Sicilies, vilba del rei Fernando VII pero, güeyu al datu, pa nada – nuesa amada - llevaba’l sangre del felón.

<Nesta ilesia tan chunga tiense casao la nuesa DUQUESA>

COTILLÉU: Muertu’l felón (F -VII) y tres la rexencia de María Cristina algama al tronu la so fía Sabel II magar el baturiciu que tevo col so tíu Carlos, otru que naguaba pol sillón, y ente los dos abrasaron España coles Guerres Carlistes .

 La reina traga como pue’l matrimoniu de so madre con un guardia del Corps (Pero home,¿nun tuvimos bastante con Godoy?), seique vese obligada a concede-y dellos títulos pa que pudiese tar al altor: «Duque de Riansares», «Duque de Tarancón» , «Marqués de San Agustín», «Duque de Montmorot» (esti vien-y de Francia pero ellí tán sordos ..), menudu momiu, Señor … Bueno, esto yera pa tenelos tranquilos dao que’l matrimoniu fuere morganáticu, ye dicir, que los fíos que tuvieren nun podíen aspirar al tronu d’España (sicasí quedaren bien abrochaos, ¿eh?…).

Armes del Ducáu de Riánsares:

  «Escudu tipu español, rectangular y cola base arredondiada. Ta dividíu en dos partes:

A mandrecha en campu azur trés coríos (ánsares) en sable picaos de gules nuna franxa de plata siguiendo esa mesma llinia.

A manzorga, nun campu azur, con bordura de gules, trés flores de lliriu (lis), n’oru, bien distribuyíes.

La corona ducal : Ta compuesta por un cercu d’oru orniáu de perlles y pedrería, decoráu con ocho florones en forma de fuelles d’apiu que se sofiten sobro puntes ellaboraes col mesmu metal que la base.»

        Bueno nosotros vamos centranos nel IIIº duque: el mayorazu Fernando M.ª Muñoz y Bernaldo de Quirós (1864 -1913), pá de la nuesa protagonista, Doña Joaquina. Foi un militar que casare con doña Ana Canga-Argüelles y López-Doriga [1868 -1942] .

        Tuvieren siete fíos, trés homes y cuatro muyeres de los que Joaquina fuere la postrera.

Hermanos (6+1)

• Ana Muñoz y Canga-Argüelles, Vizconde de Rostrollano 1890-1921 Casada con Pablo López-Dóriga y Blanco-Recio (1887-1968)

• Fernando Muñoz y Canga-Argüelles, Duque de Riánsares (1894-1925)

• Juan Muñoz y Canga-Argüelles, Marqués de San Agustín (1897-1970) Casáu con Filomena Acebal Muñoz (1898-1985)

• José María Muñoz y Canga-Argüelles (1900-1910)

• Eladia Muñoz y Canga-Argüelles 1900-1927 Casada con N Medio

• María Cristina Muñoz y Canga-Argüelles (1901-1989) Casada en 1920 con José María Sagnier y Sanjuanena (1893-1966)

• x Joaquina Muñoz y Canga-Argüelles 1904-1967 Casada con Ramon Morán y Yamas (1885-1953) [La MOCINA]

                                                ……………………………………….

Hemos decatanos d’algunes cosines :

1.- Que cuando’l padre de Joaquina morrió la neña tenía 8 años.

2.- Un hermanu suyu – Fernando – algamó’l títulu de Duque de Riánsares, seique-y durare pocu; morriere con 31 años y ensin descendencia. Por embargu a Joaquina tol mundu la conocía como La Duquesa, magar nun lo fuere realmente pero’l fustax d’esta dama yera IRREPETIBLE.

3.- Los «Sagnier» yeren cuñaos de Joaquina. Una hermana – M.ª Cristina – casó con José M.ª Sagnier . Estos son unos de los protagonistes de la novela “El heredero”, d’ún de los sos descendientes: Rafael Tarradas Bultó. (Guapa novela; sí, señor. Hasta Teruel me ficisti llegar, señor Bultó, buscando los escenarios de’aquella maldita Guerra. ¡Qué pasada de mudexar!)

4.- Esta «cronoloxía», (Geneanet), téngola sacada de don Luis Manuel de Villena Cabeza, n’internet.

                                 ................ ……………………    

        Otru fechu que nos cuenta Camín nel so llibru “Entre manxanos” ye aquel ….

« Dende’l castañéu de La Perdiz vía yo analayar sobro ‘l pueblu’l globu aerostáticu de Fernández Duro, nietu del celebérrimu industrial xixonés (adoutivu) Don Pedro Duro, fundador de la siderurxia Duro Felguera.

< ¡L'Alcotán!>

 Aquel glogu dirixible conocíu como L’Alcotán sobrevolaba davezu los cielos d’Asturies col rumbu. Xixón – Uviéu – Siero – Noreña y les Cuenques … Al pasar per Roces tomando impulsu pa garrar altura metía un ruíu escomanáu ya estrañu qu’axorizaba aldeanos y ganao:

            - ¡ Mar rayu vos parta, mastuerzos!

            - Ye'l progresu - camentaba Pepón de L'Abadía. 

        Naquel dirixible antroxaben sobro’l nuesu PARAISU los cabezaleros industriales Fernández Pola (fábrica de Lloza), Cifuentes (puxante emprentador de proyeutos estremaos), Vázquez Alas, el Marqués de La Rodriga ya un pariente de la nuesa Duquesa del Recuestu.

        - ¡Adiós, Duquesina!

                                         ::::::::::::::::::::::::::::::::::::::::

… 2.5) La facienda de Silvestre Medina

            «MANUEL MEDINA: El Pintor de Roces»

                        <El pintor Manuel Medina charrando col Poeta de La Peñuca>

        Onde anguaño tán la Cooperativa d’Agricultores y los Campos de Fútbol de la Federación afayábase daquella la facienda de Silvestrón Medina, el pá del célebre pintor Manuel Medina. 

 

< Concha>: La lluz de Manuel  Medina.

        . Manuel Medina nació en Roces nel añu 1881 y tres una vida arrequexada a la pintura arrinconó la paleta en 1954. De familia llabradora, faneguera, pudo estudiar nel Belles Artes de Madrid mercé a una beca del Ayuntamientu de Xixón. Dende guah.ucu yá apuntaba maneres por eso so padre alpuntólu a la escuela d’Artes y Oficios de la villa.

Yá na capital d’España namoró de … ¡Velázquez!, sicasí hebo de conformar col Maestru D. Lluis M. Pidal, que nun ye poco. Algamó un 3er premiu (1906) na esposición Nacional con “La primera tonsura” y, por agradecimientu, donó-ylu al nuesu Ayuntamientu, de Xixón. Dos esposiciones nacionales más (1908 y 1910) y una en 1911 nel Xovellanos de Xixón. Como yá tenía trillaos tolos museos de Madrid decidió dir perfeicionase al Belles Artes de Roma. Dos añinos pasiando pela ribera del Tiber con una beca de la Diputación (1911-1913). D’ellí vienen: “Castor y Polux”, “Foro romano”, “Coliseo”, “Arco de Tito” … Más esposiciones a lo llargo de los años : 1920-24-30-34-36. Tien una bultable obra que nun ANEXU aparte pensamos sopelexar.*

        Los sos temes: el paisaxe, bodegones, el retratu ya escenes costumistes. Los detalles y la lluz son más esmolecientes pa él que’l vanguardismu de la dómina.

*NOTA: D’esti pintor vamos facer un apartáu pa conocelu meyor: «Manuel Medina, el pintor de Roces».

                                ................................................

        Nun había quintana en Roces y en cualisquier otra d'Asturies onde nun hubiera una granxa con pites, otra de les aves doméstiques imprescindibles na base alimentaria de la población, tantu rural como urbana. 

        Na semeya de la "Escena campesina" que seguramente reflexa la vida na quinta de Silvestre Medina vemos a Concha, l'asistenta y fía adoptiva del patriarca la familia.

                                :::::::::::::::::::::::::::::::::::::::::::::::

(3) El paraísu de La CARBAYERA

                “ Si soi un roble col vientu en guerra

                   ¿cómo viví cola raíz ausente?

                 ¿Cómo se pue florecer sin tierra?” 

 

< Yera'l llugar más emblemáticu de Roces:  La Carbayera y la Ilesia>

        El CARBAYU, o roble, malpenes s’utilizaba nesta época como alimentu humanu pero les abeyotes yeren daqué importante pa munchos animales, primero los gochos de casa, pero tamién palos xabalinos ya otros ¿xabaces? como l’esguil, o páxaros talo los ñerbatos…

        .Otra xida pa tener el carbayu ente los más apreciaos ye qu’en Roces había, y hai, una CARBAYERAmui célebre, allugada al Barriu La Ilesia, onde se celebraben les fiestes y feries parroquiales, mui concurríes naquella dómina. 

         «Na carbayera de Roces vivíen ocho o diez families, xornaleres cuasi toes, qu’esfesoriaben un güertu con más parés que tierra: unes eres de berces, cuatro lechugues, très pites y pocu más. Otres poques, les más afortunaes, dedicábense a la matanza y a vender la carne na Villa; llevábenla nun carru de toldu y caballu con tantos cascabales como matadures»

<A. Recreativa- Parque La CARBAYERA>

       

  Anguaño, La carbayera, ye un Parque Infantil onde los guah.es pásenlo dabute a la solombra d’unos … ¡tilos !. ¡Qué horror!. ¿Quedá carbayu dalu? … Nun ye qu’al carbayu-y preste muncho tar <civilizáu> pero home, una ocena un poco curiosos… Hasta n’Uviéu que quedaren ensin el so símbolu – el Carbayón d’Uría – afayaren otru perguapu a la vera’l Campoamor n’alcordanza del icónicu decimonónicu. Agora yá puen presumir del so xentiliciu más célebre ¡carbayón!. ¿Vamos ser menos nós colo que la Carbayera – el centru neurálxicu - importa pa Roces? … 

Buenu, una cosa tengo qu'aclariar... De mano vi tilos y asustéme porque esperaba una bona farguetá de carbayos, nun ye'l casu pero hai unos cuantos y espero que nel requexu que tán enantando nesti intre na Carbayera  amiyen unos cuantos más. Cuando'l el parque La Carbayera tea acabáu prometo facer un ANEXU específicu más completu, esto ye namás un trailer.

     Yá sabes que’l carbayu ye un árbol icónicu del pueblu celta, d’onde venimos. El roble foi de siempres el símbolu de la fuerza, la vitalidá dionísiaca y de la encumación espiritual. Yera un DIOS. (¿Por eso la Ilesia San Xulián ta asitiada metanes la Carbayera?.. ¿DONVI nun será otro qu’un druida internauta?..).

                 Nel Parque "La Carbayera" hai un monumentu dedicáu a Alfonso Camín. Un monolitu cola so canción, grabada en piedra,  a "Cuadonga".  

<Semeya: Wp>

        …[« El CARBAYU (Quercus robur L) ye un árbol planicaducifoliu, monoicu (flores machu y fema nel mesmu pie), de groma ovoide y globoso que pue algamar hasta los 40 metros d’altor. De madera duro (robur) y corteya escuro que fiende llonxitudinalmente cola vieyera. Fueya simple, alterno y col marxe lobuláu y cuasi sésil (ensin peciolu). Flores unisexuales de tamañu reducíu con cinco sépalos pequeños; les masculines preséntense n’amentos llargos y ramificaos mentanto les femenines asitien, solitaries, na base los amentos. Mercé a una polinización entomógama (per aciu d’inseutos) florez ente Abril y Xunu frutiando nos entamos de la Seronda. El frutu ye una llande nomada abeyota – rica n’hidratos de carbonu- petite de munchos animales: gochos, esguiles, xabalinos, …. Abenayá tamién foi emplegada polos humanos iguando una fariña mui amañosa pa daqué.         

     La madera del carbayu (roble), duro y dondo de trabayar, foi y ye, peremplegao a la llargo de la historia, lo mesmo pa barcos, cases ya horros, preseos de llabranza o muebles de munchu aquel.

    El carbayu ye mui lligón y por eso enracia fácil con otros árboles de la mesma especie, Quercus; tou queda en familia.

     EL carbayu ye una especie de clima atánticu mui presente n’Europa sacante’l Mediterraneu. Nun-y presta andar solu por eso s’amuesa en viesques con otros árboles caducifolios. N’Asturies ta como nel Paraisu sobremanera ente 600/700 m/a magar que la urbanización ye un enemigu acérrimu; cuido que por eso tiense esaniciao na Carbayera de Roces.]

        « Yá-y cayó la fueya al roble

         yá floreció la espinera;

        de la flor de los bonos mozos

        faise yá cargu la Reina »

El CICLU de la VIDA

        Esta cativa fueyina de carbayu yá ta a piques de zarrar el ciclu la so vida. D’una glande que cayere en bona tierra xurdió un biltu buscando l’aire y la lluz, mentanto que d’esa mesma masa orgánica brota un entamu de raigañu que va afitándose na tierra col enfotu de sirvir a posteriori de sofitu a esa planta que va formándose d’esi biltu aéreu que termina por convertir n’árbol ; y tou por mor d’esa fotosíntesis que tresforma l’alimentu – agua y minerales - en troncu, rames, cañes, fueya, frutu … Esta fueyina qu’equí vemos ta a piques d’esvanecese pa tresformar n’esi humus que precisa l’árbol y siguir dando frutos nuevos al empar que nos oxixena y va llibrándonos del escesu del anhídridu carbónicu del aire que precisamos pa respirar. 

                                                            ...................................................... 

N.P. <Tornando de la romería> ¿ De Roces?

 

    Los vecinos de Roces esfrutaron milenta mil años d’una tarmuda Carbayera, talo que toles parroquies de la redolada: Granda, Llorio o La Rastrera, por exemplu. La Carbayera foi siempres un llugar máxicu y d’alcuentru onde los vecinos amestaben los sos sentimientos. Cuéntanos Camín dalgún d’ellos:

                … « El robledal tarmudu (La Carbayera) onde celebraben les fiestes de L’Asunción y San Xulián de Roces ».

                                                        …

        … « La Escuela de Roces, probe d’estructurada , desanxelada y espuesta a los barrenos de les canteres vecines, taba asitiada metanes el pueblu frente a l’antigua Carbayera ya mirando de revisgu haza la Ilesia y el Camín de Siero».

                                    ………………………………..

        « Na Carbayera de Roces – como en tolo pueblos - tienen pasao coses…

        Un atapecer del branu diendo camín de la Escuela decatéme de sópitu que toles muyeres salíen de casa y arrodiellaben na Carbayera mirando haza la Ilesia col rosariu ente les manes: 

<San Xulián de DONVI>

 - “Padre nuesu que tas nos cielos… “

- “Santa María, madre de Dios, ...”

Yo quedé varáu contemplando aquella ablucante escena:

- Arrodíyate, nenín, ¿ nun ves que’l mundu ta a piques d’esaniciar?

        - Pos yo nada nun veo. – arrepostié yá cola boina na mano.

        - “Yo pecador me confieso …. “

         - “ ¡El Diañu ganó a Dios!”

         Los guah.es tiramos pa Escuela y entrugamos al Maestru:

         Nun se trata del acabu del mundu. Son los reflectores de los barcos “Cardenal Cisneros” y “Carlos V” que tán nel Musel faciendo maniobres ya enfilen los focos sobro llanos y montañes .

                     Esi yera’l fin del mundu … ¡Menos mal!»

< La CARBAYERA>

            ... La Carbayera yera ‘l centru neurálxicu del pueblu. Pa dir a la Ilesia había que pasar pela Carbayera, Y pa dir a Escuela,  pa baxar a Xixón, pa xubir al Recuestu o mesmo pa dir visitar al Pollu de Mareo; hasta pa tomar un vasu ( Pepe la Llana) o echar un pitu (chigre-Estancu de Sabel de Sidro) ,….

         « - Oi, Fonsín vas dime por tabaco al estancu. Y pa que te preste déxote montar el potrín que tenemos a medies.

        - ¡Ixuxú! Gracies, tíu Blasín!. Naguo por ser el primeru.

        Montó Fonsín a pelu gochu vacilando a les moces de la contorna (Lupe, Lola, Rufa, Carme… ) y glayando fachendosu al pasar delantre casa so güela, María:

        - ¡Adiós, güela! .- Vila clamiaral cielu mientres cruciaba La Carbayera a tou trapu…

        Nun cuento equí la gochá que-y ficiere un parroquianu – un patibulariu - del chigre… Fonso terminó talo un “Ecce Homo” y el burrín, ciegu, presu d’un carru xitanu. »

                                     …………………………….

            … ¿ Y qué vamos cuntar del “affaire” que tuviere Fonso col Pirolo, per Roces? …

        « Fiestes de L’Asunción. Baille na Carbayera. Fonso echando una pieza con un guayabu. Un emburrión pola espalda y el de La Peñuca tomando la cebá…. Nun t’arriendo les ganancies como quedó’l Pirolo…. Sicasí la cosa nun quedare ehí. Dalgún tiempu dempués la “vendetta” tuvo’l remate definitivu: El Rata nel hospital y Fonso ….

        - Mira, Maximina; val más mandalu pa L’Habana col to hermanu que dexalu equí ensin aldu, al enfotu del Rata o del Rei» .

                                                            ..........................

        3.2) El TILU o Teya blanca         

        L’árbore que lluz angüaño na Carbayera ye’l TILU. Hai dos (+) clases de Tilia cola que pues alcontrarte: La Tilar Negral (Tilia cordata) y El TILAR (Tilia platyfphyllos=fueya ancho). Son bien asemeyaes, asina que vamos comparar eses carauterístiques a ver si alcontramos daqué diferencia, seique va ser poca cosa.

Tilia Cordata (Köhler's)

La Tilia Cordata, o negral, ye una especie mesófila (de zona templada) qu’espoxiga a la vera los ríos o en vallines más elevaes, seques y abiertes de pisos meso o supra templaos formando mases solitaries o amestando col carbayu. Nun ye qu’abonde muncho pero présta-y andar dende’l centru al oriente d’Asturies siendo más umbrófila (solombriega) que la negral. 

         Trátase d’un árbol plani-caduci-foliu, hermafrodita,(una flor con estames y pistilos; por ciertu, bien guapa ya orixinal) como de 20 ó 30 m. d’altor y de groma arredondiao. Tien les fueyes simples, alternes, pequeñes, aserraes y en forma de corazón (cordata) y con pelu anaranxao nes axiles de los nervios. Les flores – tiles - blanques vense en grupos de 4-15. Florez de xunu a agostu y el frutu – una cáusula enllena grana - madura pera seronda.

                                                        ......................

      La TILAR (tilia=ala), planta melífera y malvacea,  siempres foi un árbol bien interesante  por mor de les sos propiedaes  tranquilizantes y anticatarrales; sábenlo bien les abeyes que nagüen pol so néctar. Nes ciudaes ta cada día más enllantada tanto pola so guapura como pol so agradable arrecendor. Y yo creo que por ser una especie bien llonxeva, pue - podía - vivir hasta ¿¡900!? años. Otra propiedá interesante ye'l fechu de producir un humus bien ricu en nutriente.  Abenayá taba consideráu como una  árbol sagráu; eso sí, embaxo d'él nun se podía facer xuramentu dalu . 

<T. Platyphyllos> Wp

3 . B-2) La Tilia Platyphyllos (fueya ancho y más grande que'l  Cordata) - más conocía como teya *- ye un árbol plani-caduci-floliu, hermafrodita (estames y pistilos na mesma flor), de groma ancho y qu’anda ente los 20 y 30 m/a. De fueya simple, grande, aserrao, alterno y acorazonao; tomentoso polos nervios y axiles del envés . Flores (tiles) colingantes en grupos de 2 ó 3 insertaes nuna bráctea amarillenta. Florez en branu y madura pela seronda. Poliniza per aciu de los inseutos y da un frutu secu, de tipu capsular coles costielles bien marcaes.

* De teya salen estos topónimos :Teyeo, Teyea, La Teyera, La Tilar, La Teyada, Teyego (Tellego), El Teyéu … GÜEYU: A vegaes estos topónimos puen corresponder al llugar onde hai “un fornu pa tresnar la teya” o tamién onde s’alluga dalgún texu.

    . La tilar ye una especie mesófila (clima templao) y más umbrófila (présta-y la solombra) que la nigral. Suel acompañar a los carbayos y hasta les fayes nel pisu mesotempláu (un poco más altu y fríu que’l termotempláu) sobremanera en suelu caliar. Tamién abunda más del centro al oriente, talo’l negral.

    Ye un árbol mui apreciaú dende abenayá (pue vivir hasta 2000 años) poles sos flores melíferes, antiespasmódiques y narcótiques, calmantes, sudoríferes y diurétiques (vamos tener que cambiala pol café). En ca Camín tomábenla pa los nervios y pa los catarros y el guaje sacaba de la madera un pegamín pa cazar páxaros.

        - Mama, cómo me presta la tilia pa los catarros….(¡Mentirosu!).

    … La madera del tilu nun ye mui resistente y trabáyase bien poro emplegábase munchu pa facer preseos talo mangos, madreñes, caxines, gaxapos y hasta dellos instrumentos musicales, lo mío, un <tocaxiblatos>.

    … Les dos especies de tilos que falamos puen cruzase nun híbridu nomáu Tilia híbrida que s’emplega muncho ornando les cais. En llugares altos los tilíos echen una fueya pubescente (con unos pelos bien gordos) por mor del fríu. Hai más clases ….

¿Cómo estremamos estes dos especies? .... (Colos híbridos val más nun metese ....):

    . La fueya del Cordata ye más pequeño que'l Platyphyllos.

    . Los pelos de los nervios son de color teya-ladrillu nel Cordata y blancos nel Platyphyllos.  

    . El frutu , causular, nel Cordata ye más chicu, ensin nervios y ruempe fácil. 

    . La yema del cordata tien dos escames y la del Platyphyllos presenta trés. 

    . Les ramines de la flor del cordata son glabres mientres les del Platy son pubescenses.

                         :::::::::::::::::::::::::::::::::::::::::::::::::::::::

                         4) El Paradisu de la NOZALEDA

            Fáiseme difícil escoyer el segundu árbol más representativu de la infancia de Camín: ¿El Nogal... El Carbayu … El castañu … La peral … la nisal … L’ablanu … ? . Toos fueren perimportantes naquella dómina de probitú onde esos frutales significaben una base sólida na alimentación d’aquella población fondamente RURAL.

4.1) LA NOZAL

<Elementos del NOCÉU> (Wp)

[El nocéu (Juglans regia L-) ye una planta mesófila (nin fríu nin calor) cultivada dende abenayá na península Ibérica y que n’Asturies alcontró’l Paradisu mercé a los nuesos terrenos sueltos, llentos (húmedos), eutrofos (ricos en bases) y descarbonataos: Nozalín, Nocéu, La Nozal, Nogueira, El Nozalón, Los Nozalinos, El Nozalucu, Los Nozalinos, La Ñozaleda, El Nocíu, ….. La Nozaleda, en Roces <ta como en casa güelu>

La Nozal ye un árbol planicadufoliu, monóicu (flores machu y fema nel mesmu pie) d’ente 15/25 m.a. Tien la groma (picalina) amplio y arredondiao y la corteya buxo (gris pálido) con munches fendedures. Les sos aromátiques fueyes son alternes, compuestes y paripinnaes de ⅞ foliolos elípticos y glabros (ensin pelusa). Muncha xente emplegaba les fueyes pa curar les firíes dérmiques o pa tresnar ferviatos escontra les enfermedaes de la piel. Flores machu n’amentos pendulares, solitarios y allargaos mientres les femenines preséntense n’amentos de pequeños grupos sobro les cañes del mesmu añu. Florez na primavera y poliniza per aciu de los inseutos (p. entomófila). El frutu, una ñuez comestible, ye una grupa globosa ya aceitosa protexía por un cascu marrón que a la so vez vien envuelta por una corteya carnoso que nomamos muerga , caceyu o berriu (verriu). Al conxuntu de la ñuez más la muerga suel nomase-y muergu.

        - A ver les manes, quiero ver les que tán pintaes de berriaca ...-Probes guah.es, esi verdín nun hai cristu que lo quite.

        Coles ñueces – y ablanes – ígüense n’Asturies ún de los duces más estimaos que se conocen: les casadielles. Los asturianos pa entrar nel Paradisu nun tienen qu’apurri-y a San Pedru un óbulu talo a Caronte, seique media docena de casadielles faen un efeutu máxicu.     La madera ye perapreciao n’ebanistería asina como pa facer preseos agrícoles (mangos, estiles, gaxapos, madreñes llixeres,…).

        Cuenta’l Poeta:

<Xugando a la RANA>

...« Na Nozaleda tamién había unes cuantes figares que daben los figos moraos y de los que nun soi a escaeceme».

… « Nel Paraisu la Nozaleda ye fácil que nos pueas alcontrar, a Poli y a mi, xugando a la llave o los bolos, con una bolera que nós mesmo tenemos iguao»

                             :::::::::::::::::::::::::::::::::::::::::::::::::::::

4.2) LA FIGAR

    La Figar o Figal [Ficus Carica L.] vien del griegu (sykon=figu) y Carica=rexón d’Asia Menor d’onde procedíen los figos.

    Árbol plani-caduci-foliu d’ente 5 y 7 m. d’altor, de groma amplio y trupo. Corteya nidio de color blanco-grisaceo. Fueya simple, alterno, de tamañu grande, palmiao-lobulao (3 a 5 lóbulos) , grueso, subcoriáceo y áspero al tautu. Les flores son de tamañu reducíu qu’axunten n’inflorecencies zarraes sacante un poru.

    Florez ente la primavera y la seronda. El frutu, el figu (higu), ye un siconu que cuerrespuende a tola inflorescencia, siendo la parte carnosa la base onde s’asienten les flores. Comestible, por supuestu (Pero nun te pases…).

4.3) La FONTE : La PEÑUCA

                 «Ñací sobro peñascales

                    al abellugu d’una torre,

                     mirando l’agua que cuerre

                        embaxo, ente los nozales»

<La Peñuca: P. Roces-Porceyo>

        < Sobro un cantil caliar tien la so vivienda la familia Camín Meana: casuca xornalera, d’una sola aguada, que mira a la carretera al empar que cola so compañera amestada; dambes xuníes y elevaes ente ortigues, lloreos y parres xabaces. Faciendo compaña una figal ya una parra; miguelinos ya uves yeren el postre serondiegu de la so infancia. Delantre casa dos güertos pindios y pedregosos onde mio padre bramaba pa sacar cuatro patates ya unes poques cebolles y ayos; igual algunes lechugues y delles coles esmirriaes.

        - Papa, nun glayes tanto, qu’hasta la Torre de Veriña ta tremando.>

                                         …………………………..

         Embaxo La Peñuca, colingando sobro la carretera d’Uviéu, pingaba una fonte escondía ente ortigues, lloreos y escayos negrales. Toda la rodiada yera una fiesta de plantes melicinales: ruda, cenoyos (anisinos), yerbaluisa, oriégano y parres xabaces. Lloreos, figares y salgueros lluchaben naquella xungla buscando’l cielu talo’l turruxón que los abellugaba. Naquel paraisu caliar y tarmiegu surdía un agua milagroso -¿por mor de les plantes?- que yera’l petite de les ames de casa:

         - Esti agua cuez les fabes en menos que canta un gallu.

        - Yo namás quiero agua de la Fonte La Peñuca.

                                            …………………………………..

ROL de les PLANTES qu’afayamos per La Peñuca:

. Ruda (xéneru Ruta). Planta melicinable de flores marielles y grandes.Ye buena p’ameyorar los dolores del “periodu”femenín.

. Cenoyu (Foenicumlum vulgare=”Hinojo”). Planta de rabu llargu y flores marielles qu’arrecienden al anís (anisinos). Antioxidante y antiinflamatoriu (múscular y víes respiratories). Aida facer la dixestión y ye bona pa los dolores menopáusicos ya escontra’l cáncer.

. Oriéganu (Origanum vulgare). Ye una planta perinteresante, propia de la zona suroeste de la rexón Eurasoasiática: Antioxidante, antimicrobiana, antiséptica y … Madre siempres me la daba ferviatos d’oriéganu pa curar el catarru. Equí toi.

. Xabú (Sambucus nigra), ye un arbustu con numberoses especies repartíes pela zona templada euro-norteamericana pero que yá tien colonizao delles rexones d’Asia. Tien aceites, taninos, alcaloides y … ¡Vitamina C!. Pa catarros y problemes respiratorios nun tien rival. Conozo un rapaz que curó so padre - ¡mélicu desesperáu! – per aciu del xabú de problemes pulmonares ¿incurables? cola venia d’una curandera. ¡Toma!

. Cirigüeña (Chelidonium majos) ye una papaveracea perenne, euromeditirránea pero que tamién emigró a América, como Camín. Dase bien en hábitats llentos, frecos y solombriegos. A la vera los caminos y terrenos desventíos vive talo un dios, por eso lluz ese flores amarielles pa da-y gracies al Señor.

    ¿Pa qué la usamos los mortales?… Pa curar repulgos (firíes) nun hai otra; sí, señor. Cómo curó esti menda los estragos de la sidra ( nin de la bébora del Señor debe ún abusar)… Una cucharina de la bébora d’esta planta – fueya, flor y tallu machacaos – nueve díes sí, y nueve díes no… Ensiguida daste cuenta que’l Señor perdonó. Pero... güeyu al datu, qu’hasta Dios tien un tope nel caxón.

    Una cosa sí te digo; el golor d’esta bébora nun lu aguanta nin el mesmísimu Plutón.

. Ortiga ( Urtica dioica* ó Urens) .  

 

Hailes más grandes y más pequeñes (les peores) pero toes ortiguen … ¡Ag!… Curiao , «Fêtes attention», les ortigues son de les plantes que más y meyores aplicaciones tienen ( los pelos que urtiquen namás son de proteición, pa elles) :

Estomacales, diuréticas, hipogluceniante (amiya la glucosa na sangre, ¡qué suerte pa los diabéticos¡), y tamién s’emplega pa tratamientos de la piel.

*Dioica, ortiga machu ya ortiga fema, dos pies.

                                             …………………………………….

        Nel paraisu La Nozaleda tamién vamos alcontrar dellos salgueros:

4.4) Los SALGUEROS (Salix ….).

     Hai munches especies del xéneru “Salix” sicasí la mayor parte les veces son primes y vecines ya una cosa tienen en común: Toes caltienen salicinina (antiinflatoriu, anelgésicu, antipiréticu) na corteya. :

4.4.1) La salguera capruna (Salis caprea).

 

<Saliz caprea: Inflorescencia>

        . Mi guapa y mui común. Ye la qu’apreciamos nos ramos de cualisquier casa moderna; los sos amentos capsulares, grandes y llanoso-platerescos (tomentosos) son el petite de cualisquies persona que nagüe por tenerr una casa moderna y floridiana. Hasta les cabres se ponen como lloques poles fueyes d’esta salguera, pariente de la blimal; “Sauce capruno” dicen per Castiella. A min encántame, va ser que soi un poco “cabritu”? … ¡¡¡Ixuxú!!!.

        D’otramiente nun dexa de ser un arbolín plani-caduci-foliu , dioicu, d’ente 6 ya 15 m/altor que crez bien ramificáu dende’l pie . La corteya del tueru ye daqué buxo y les sos cañes son llargues y flexibles (blimal). Tien les fueyes simples, alternes, ovalaes y col marxe un pelín aserráu; ya’l peciolu (5-14 mm) vese llixeramente tomentosu . Les peludes flores masculines llucen estames d’un mariellu rabioso mentanto les femenines son averdosaes, esto ye pa poder lligar dao que tán en distintos árboles. Lliga bien con otros primos (sauces) dando híbridos intermedios. El frutu – madura ente abril y mayu - vien nuna cáusula tomentosa qu’al abrir llibera una grana peludo bien fácil d’esparcer pol aire (anemófila).

        Pos mira, esta bimal nun ye se pirrie del too por allugar a la vera los ríos; magar que-y prenten los suelos llentos ya arenosos gústai abellugar, a vegaes, en viesques de fayeos y carbayos sicasí alcuentrase de viciu ente pedragales; eso sí, pisos termo –-- supratemplaos (hasta 1800 m) . Vamos, que lu alcuentres perdayuri.

     4.4.2) . La salguera negra (Salix atrocinera).- Salix=Cerca del agua.- Atro= escuru, cinereo=cenicientu. Presenta un color buxu por mor del pelu les fueyes y les rames. 

<S. atrocinera: f. machu>

         Esta salguera ye un arbustín planicaducifoliu, dioicu (dos pies), que malamente algama los 10 m d’altor. Cañes elástiques y llargues y les vieyes tirando a coloraes. Fueya simple, alterno y llancelao. Peciolu curtiu con marxe finamente dentáu y pelo en dambes cares blanco-acolarazao, qu’asemeya a ferruñento. Flores n’amentos ereutos, cilíndricos y sésiles (que sienten direutamente nes cañes, ensin peciolu) : les masculines (arredondiaes) con dos estames vellosos y femenines (más estilizaes) con estilos curtios. 

<S. atrociunera: F. fema>

 

 Florez ente xineru y marzu dando’l frutu ente mayu y xunu. Poliniza per aciu los inseutos (entomógama). El frutu ye secu de tipu cáusula y lleva una mata de pelos blancos, talo algodón, que al abrir llibera la grana alao (dispersión anemócara=per aciu del aire). Espoxiga en suelos llentos y en pisos de termo- a supratemplaos (0 -1900 m) siendo la pionera en colonizar suelos despoblaos. La corteya les cañes contién salicilina (anelgésicu) y ye permelífera poro les abeyes nagüen pol so granible polen. Esta salguera (atrocinera) tien una xenética bien plástica y ye a cruciase con munches otres de la mesma especie (híbridos).

 

        4.4.3). La blimal (Salix frágilis), tamién conocía como blimeru, salgueru, …  

 

    Ye un árbolín plani-caduci-foliu, dioicu (flores machu y fema en pies distintos) que pue algamar los 15 ó 25 m ensin problemes . Ye mui ramificáu dende la base col tueru de corteya buxo y cañes llargues y perellástiques de color mariello-verdoso que va tornando a colorao. Los guaños mariellos y les fueyes - col peciolu mui curtiu son mui verdoses, simples, alternes, llanciolaes y brillantes pela facha. Les flores masculines en amentos y les femenines con un pistilu pediceláu ( talo un rabín). Florez ente febreru y abril y poliniza per aciu los inseutos (entomógama). El frutu, secu, ye de tipu causular y llibera la grana nun grupín de pelos asemeyando al algodón y que tresporta’l vientu (dispersión anemócora, ¡qué guai!).

        La blimal ye una especie heliófila (helios=sol y filos=amante) que s’alluga peles veres de los ríos en los pisos termo—supratemplaos (0–1400 m) siendo’l so petite los suelos de sablera (llentos ya arenosos).

        Lo más guapo de la blima ye la so flexibilidá poro foi -ye) - mui emplegáo pa facer paxos y bayura de cestes y preseos d’usos estremaos.

        Neto que tolos salix caltién salicilina nel tueru que deriva en ácidu salicílico, d’onde sal l’aspirina. ¿Sabíes que los neanderthales del Sidrón emplegaben el sálix pa calmar los dolores?…

4.4.4) . La salguera de fueya estrecho=angustifolia (Salix elaeagnos).

<S. elaeagnos angustifolia>

         Árbolín plani-caduci-foliu , dióicu (árbol machu y árbol fema por separao), d’ente 2-6 m d’altor y perrramificáu dende la base. De tarmu (tueru) pardu-buxu que fiende llonxitudinal según va faciéndose mayor. Cañes llargues y perelástiques. Fueya simple, apeciolao, llinial-llanceolao qu’enancha a lo cabero y col marxe suavemente dentáu; de nueves presenten pelos blancos y sedosos per dambes cares y siendo trupamente tomentoses (pelu asgaya) pel envés, yá de mayores. Flores unisexuales – asépales y apétales - en amentos que surden enantes que la fueya. Florez ente febreru y abril. Da un frutu secu, capsular, qu’esgrana con un penachu de pelos.

        Seique a la vera los ríos vive talo una señora dase fácil en pisos termo-supratemplaos (0 a 1700 m/a) naguando siempres por suelos caliares y pedregosos. Présta-y acompañar a fresnos ya umeros asina como a otros primos de la familia salix.

    4.4.5). La salguera mariella (Salix triandra).- Triandra= Trés Andra= 3 estames masculinos.

  

<S. mariella>

        Cañes llargues color mariello verdoso.. Planicaducifoliu, dioicu. Fueya simple, llanceolao ya dentao y con dambes cares pubescentes y el envés revolutu. Flores unisexuales con3 amentos erutos abellugaos por una bráctea. Frutu secu y causular qu’esparde envulubrao nun penachu. Namás espoxiga nos calces acuáticos importantes faciendo compaña a fresnos, umeros ya otros salgueros. La corteya salicinoso, como toes.  

 

 

< S. alba>

4.4.6). La blimal blanca (Salix alba).- Del celta: “al”=próximu y “lis”=agua.”Alba”= Pelo blanco asgaya.

        Les mesmes carauterístiques de tolos “salix”: planicaduci… dióicu, La fueya col ápiz apuntáu ya l’envés tomentosu . Los amentos masculinos con dos estames abellugaos por una bráctea y femenines con un pistilu sésil (sin rabín). Del frutu casular sal una grana plateresca (blanca y peluda). Bueno, esti tien la groma cónico. 

 4.4.7). La salguera blanca (Salix salviifolia)

        De carauterístiques asemeyaes a otros salgueros: caduci folios y dióicos. Frutu secu, tomentosu ya entomógamu . La fueya, llanceolao, verde y brillante pela facha magar que revoluto (enroscao) y nervudo pel envés sicasí, de mayor, queda glabrescente (sin melena). Présta-y el sol como carambelu.

                    ::::::::::::::::::::::::::::::::::::::::::::::::::::::::::::::::

 

5 ) EL PARAÍSU de la LLIBERTÁ 

         L’ÁRBOL de la CIENCIA: ¿Bien o mal?        

<< El momentu nel que los humanos tomamos les riendes>> (Timetoast.com)

        … Cuenta la Biblia qu’Adán ya Eva, los nuesos antepasos más célebres, vivíen nel güertu del EDÉN. Naquel ecosistema idílicu había de too: Animales, plantes, ríos, fontes, valles y montañes, … Nada precisaben pa vivir, con meter al paxu yá bastaba. Pero al Creador d’aquel inventu escaecióse-y (tebo un lapsus, sicasí dalgún tiempu foi humanu) nun se decató qu’aquel inventu del últimu día nun yera como él, un dios, yera cenciellamente humanu, terrenal, y precisaba d’un complementu col que pudiere esfrutar d’aquel PARAISU incompletu… Y entós d’un garullu de so creó daqué asemeyao a sigo que completare aquella campanuda CREACIÓN: ¡¡¡ Una FEMA!!!.

        Taba Adán como unes castañueles hasta qu’un día Eva aprució con un frutu dionisíacu na mano: una poma coloradina, carnosa y llamatible : 

       - Mira, Adán, ¡qué espectáculu!

        - Quieto parao, chatina. Díxome’l Creador que podíemos comer de too sacante d’esti arbustu tan singular… Otramiente quedamos ensin drechos y ¡a trabayar!… (yá tengo a Eva de sindicalista).

        - Nu será pa tanto, fíu; equí hai pa dar y tomar…

Una culiebruca asomó’l focicu pente la rama y espetó-y :

        - Nun faigas casu, tontina; si comes d’esa mazana sedrás l’asturiana más universal. Vas ser como la mesma Venus de la Creación.

        Diosa yá se sentía pero lo d’asturiana …. ¡Y picó! …

                                      ........................................................................ 

NOTA: El día qu’Eva afrentó al poder el mundu entamó a anovar.

                    ………………………………….

         . La MAZANA foi quien nos fizo llibres. Sí, ye’l símbolu de la LLIBERTÁ. Tú escueyes: El saber o la nada, la sabiduría o la necedá. El poder acercate a la verdá al traviés del conocimientu - nes biblioteques y escueles - o la inorancia, ye dicir, la incomprensión del por qué tamos nesti mundu. El MAZANAL ye’l que nos fizo duldar y d’ehí vieno’l saber y el progresar convirtiéndonos n’ HOMES, en persones, en dalgo asemeyao al mesmu Dios Creador.

        El Parque, dedicáu a Salvador Allende, ye otru símbolu de la LLIBERTÁ, de la democracia que nun atolena la tiranía; esta maldita moda ¿que ta tornando otra vuelta ?…
¡¡¡NON!!!

            Nel pobláu de Roces ye onde alcontramos el PARADISU del SABER. Cuatro son los finxos que nos sofitamos: La BIBLIO, la Escuela d’Enseñanza Primaria, L’Institutu de Secundaria y el Centru de Formación Ocupacional Profesional “Les Palmeres”.

. 1º.- LA BIBLIOTECA:

        La Biblioteca Pública “Alfonso Camín” ta asitiada nel barriu d’ “El Machacón”, nuna esquina del Pobláu “Nuestra Señora de Cuadonga” y bien cerca de Los Monteviles, Pumarín y Santa Bárbara. Abellugada pol Colexu Públicu d’Enseñanza Primaria, del I.E.S. “Alfonso Camín” y del Centru de Formación Profesional “Les Palmeres” nun pue alcontra un sitiu más afayadizu pa xopelexase …

         Esta biblioteca, la primera de los barrios de Xixón, xurdió por mor d’una necesidá popular d’alquirir conocimientos. Aquel barriu – ente la Carretera d’Uviéu y La Carbonera - qu’entamare en 1953 por un cuerpu de 20 bloques y 160 viviendes llevantóse col enfotu d’acoyer a los numberosos obreros que precisaba la industriosa y puxante Villa de Xixón.

             Aquel barriu del sur diba enantando pasu ente pasu: En 1955 son otres 470 viviendes de trés ó 4 plantes y con xardinos ente los bloques; en 1959 son 17 bloques más con un tratamientu más acordies colos tiempos. Estes dos últimes partíes tán acoyíes al plan de Vivienda de Renta Llimitao y fueren llevantaes mercé a la éntidá benéfica “Bancu del Probe” y tuvieren como arquiteutu al célebre Miguel Díaz Negrete. Poco más tarde les viviendes rondaben les 800... Los chalés de la redolada entamaron un pelín más tarde; enantes diben instalándose dellos Polígonos Industriales, otra carauterística fundamental d’esta parroquia… Cómo ente tanta xente nun diba surdir la necesidá d’una Asociación de Vecinos, una Biblioteca, un Cine ya unes Escueles más decentes…

< Biblioteca P.  "Alfonso Camín" >

        La Biblioteca nació en 1968 y de mano tenía calter ambulante; una furgoneta y la voluntá d’un Maestru pelegrinaben de barriu en barriu llevando la llibertá nes páxines d’un llibru …. ¡Qué llabor tan granible! Anguaño la Biblio tien dos plantes : La Superior pa facer reuniones de trabayu y la planta baxa con dellos requexos onde se propicien los préstamos de llibros, Cds, etc. Hai espacios pa lleer – mesmo la prensa - o estudiar asina como una Mediateca con seis puestos d’ordenador ya accesu a internet, per aciu de banda ancha, y cursos de formación. L@s Bibliotecari@s tamién damos cursos d’Animación a la Llectura y delles coses más; siempre andamos aforfugaes… Hai vida nesta Biblioteca que los trasgos velen pela nueche… Nun dexes de visitala. ¡Tamos esperándote!.

                                 …………………………………..

 

            COLEXU PÚBLICU ALFONSO CAMÍN

        El colexu Públicu “Alfonso Camín” ta asitiáu nel pobláu Nuestra Sª de Cuadonga, en Roces, ente les carreteres d’Uviéu y La Carbonera.

    Precisamente nesti momentu’l Colexu Públicu Alfonso Camín ta somorguiáu nun pozu de sabiduría al traviés d’un proyeutu que s’entitula: <Conocer l’entornu> . Trátase d’un trabayu interdisciplinar nel que particen toles aules, tanto d’Infantil como de Primaria.

        El cursu pasáu (23-24) tiense fecho una salida pel entornu más inmediatu del barriu col enfotu d’averase al llugar onde’l Poeta viviere los primeros años de la so infancia. Pues lleer esti post - «Caleyando con Camín» - si t’averes al blog «http://camindeniria.blogspot.com»

                                                ................... ………..

    

CENTRU FORMACIÓN PROFESIONAL – OCUPACIONAL “Les Palmeres”

        Ta destináu a formación Empresarial y Turística tanto por iniciativa del «Principáu como del Ayuntamientu de Xixón. Pensáu pala xente emprendedoro que tenga un proyeutu y quiera desendolcalu.

                                        :::::::::::::::::::::::::::::::::::::::::::::

ANEXU:

        Dao que tamos feciendo referencia al Paraisu del Saber consideramos preceutivu facer referencia al escritor que da nome y vida a esti finxu : Biblioteca ya Escueles. Namás unos cativos apuntes.

    «Averamientu a la figura d’Alfonso Camín »    

         Alfonso Camín Meana, el Poeta d’Asturies, nació’l el 12 d’Agostu de 1890 – dómina d’Alfonso XIII – na Peñuca, un requexu del Barriu La Nozaleda de la parroquia de Roces (Xixón). El so llar, una casuca xornalera, taba abellugada pol Turruxón de Veriña o Menéndez Valdés  y la "Quinta Celeste"  al tiempu que regada pola célebre Fonte de La Peñuca.

         Los Camín-Meana yeren una familia mui probe. So padre, Manuel, trabayaba na Fábrica d’Aceros de Moreda y al empar yera canteru nos caleros de la contorna. So madre, Maximina (pequeñina y galana), curiaba de casa y familia, trabayaba la güerta y daba clases de costura a les moces de la vecindá.

        Cuando Fonso tenía cinco años viéronse obligaos a camudar de residencia pasando a vivir colos güelos maternos a La Braña, na fastera La Perdiz, yá cayendo sobro Granda. Na llanera de La Braña vivía la so güela paterna, María Lozano, vilba de Pepe Camín, otru dexaragáu de la cantera. 

<Escuela de Roces>

 

        Fonso entró en contautu col saber na escuela del pueblu, nel centru de Roces, al par de La Carbayera que miraba de revisgu a la Ilesia. Nun sacó muncho provechu por mor del temor a la vara de Moisés que sopelexaba’l Maestru y a la necesidá d’agabitar coles xeres de casa. Tamién pasó peles escueles de Contrueces y Granda al empar que trabayaba – dende los 11 años – nes canteres de la rodiada. Nun sacó provechu dalu d’aquelles lleiciones sacrosantes sacante l’amor a la llectura, que siempres llevó por bandera y que terminó siendo’l so <gagne pain>, la so manera d’interpretar la vida. 

 

<Trabayando l'azucre>

      A los 15 años embarca pa L’Habana onde trabaya no que pinta: tienda de ropa, inxenios azucareros o de tabacos … Pasa por reporteru del periódicu <La Marina>, abre una editorial, vende llibros – sobremanera los suyos – pela Islla de Cuba asina como per Santo Domingo y Puerto Rico. Visita hospital - fiebres caribeñes – y cárcel en delles ocasiones porque nun atolena la tiranía: <Nun s'abanga énte l'autoridá y pa nada aceuta principiu dalu talo fuere un artículu de fé>. A los 23 años (1913) espubliza la so ópera prima «Adelfas», un poemariu col qu’entama’l camín del Olimpu («Sentíu del ritmu y capacidá comunicativa») . Tamién en 1915 funda la revista «Apolo», cuasi nada, Fonsín, vas llanzáu … En 1929 funda la revista «Norte» que tien de dura-y de por vida. Nella fala de cotino de los indianos y d’otros emigrantes, asina como de les visites que fai a Roces (D’esti paraisu nunca nun ye quien a escaecese, nin lo pretende)

        Pue considerase’l precursor de la poesía afro-cubana. Con aquella vida al debalu percorriendo tola islla «ente basa, palmeres y bohíos algama la síntesis de los elementos raciales, llingüisticos, folklóricos y sociales que son el guañu de la Poesía afro-antillana»*. Con «Macorina» sube a los altares « de los angelitos negros»:

 

<Ticos et Ticas : < guidesulysse.com>>

           « Venti años y ente palmeres.

            Los cuerpos talo banderes.

            Nueche, guateque y danzón.

            La orquesta marcaba un son

            de viesca fina y caprina.

           Ponme la mano equí, 

                                Macorina.>>

 

                     * Doña Mª Elvira Muñiz, qué diba ser de min ensin vós... Gracies .

        Vien a España como reporteru de “La Marina” pa cubrir la Primera Guerra Mundial (1915). Agospia en Madrid pero visita Asturies siempre qu’alcuentra un retayu.

        Torna pa Cuba y vuelve a Madrid ente (1921-29) y tamién más tarde cuando vien a cubrir la <Revolución del 34 n’Asturies> y darréu la nuesa <Guerra Civil (36-39> seique duró bien poco :«Desafeutu al Réxime». ¡Au revoir!

      Yá ta en Cuba pero vese obligáu a colar pa México, ande pasa trenta años, dedicáu dafechu a la lliteratura; sicasí, ensin camudar del to los sos hábitos, hasta guerrilleru foi. 

  

< APOLO y les MUSES>, la xida de Camín.

                Vive a caballu ente México, Cuba y Madrid dica 1967 cuando torna dafechu a la madre patria – Madrid – apegáu a la so muyer, Doña Carmen Armesto, pasando los caberos años la so vida en Porceyo, dende onde parte a conocer el Parnasu ( ¡Ai!, va sentar na mesa con Apolo mientres siente les Muses analayando sobro l’oráculu de Delfos. Al cabu y al fin va alcontrar el xustu reconocimientu). Yera l’añu 1982; yá entamare la Democracia n’España que polo menos reconoció-y el so granible llabor seique nun lu trató como merecía. ¿Nun tenía drechu a un retiru dignu, un currante, un home que trabayó dende antes de tener usu de razón y qu’algamó los 92 años enaltando Asturies ya encumando la llingua de Cervantes dende Roces a ultramar ? … Que nun yera «periodista de carrera», hai que h.odese. Cuántu mangante ta viviendo «como dios» …

        Escolinos, una cosa tengo recomendavos de Camín:

                        L’ AMOR . L’amor a los llibros y a llibertá.

                            ::::::::::::::::::::::::::::::::::::::::::::::::::

ESPUELA a la FLORA y FAUNA

        Vamos poner la espuela a esti capítulu de «FLORA y FAUNA caminianes » con esti sonetu alexandrín que nos brinda’l mesmu Camín, <L’heraldu d’Asturies>:

 

                                     < Escucho a los malvises>

<Malvís: Turdus pilaris>

 

               << Non solo foi mio infancia cruciar los campos solos,

                     el pan y la sadina, la planta que se xela,

                     les tardes pela grava, les nueches pela escuela

                     ya palu ya navaya, reñer colos “Pirolos”.

                     Embaxo los carbayos xuego yo a los bolos,

                     aparo nos trigales al sentir la parpayuela;

                     almiro a la calandria qu’hasta les ñubes vuela

                     y en Samartín contemplo les ñeves de dos polos.

                     Escucho a los malvises cantando sobro’l matu,

                     nos felechales verdes enriedo y desenriedo,

                     revuela y estremez les rames el ñervatu.

                     Piérdome na viesca, embébome en lloréu

                     y llevo a los caminos rumores de regatu,

                     vientu de mar y vientu de roble y castañéu.>>

                                            ........... FIN ..........

                    ESTIMANCES:

<Semeyes de "Llugares máxicos d'Asturies">

   .  De mano, al tratase d'un post de flora, tengo de dar les más sinceres  GRACIES al biólogu Bertu Ordiales, pola so bayurosa obra, un manancial de conocimientos imprescindibles pa nós teflexada nos sos llibros "´Guía de los árboles d'Asturies" en comuña con Guille C. Ruíz asina como " 21 Rutes de Senderismu per Asturies". Tamién abebentamos d'otru llibru d'esti autor :"Llugares máxicos d'Asturies", una ayalga de la quedáremos clisaos.  

    <Asturnatura> tamién nos sirve de referencia amás d'aportar daqué semeya.

        . Delles semeyes proceden  de  cuadros de pintores asturianos talo:  Nicanor Piñole, V. Álvarez Salas, Manuel Medina. 

        .Tamién xurgamos nel fondu fotográficu de Constantino Suárez y Alfredo Truán.  

        .Son varios los blogs o páxines web los que nos tienen aportao dalguna semeya interesante: .<Historias matritenses.bs.com>, <www.todojujuy>, <timetoas.com>, <horizonte cubano.law.columbia.edu>, <ticos et ticas. guidesulysse>, <www.mitosclasicos.com>.

        . Amuesen na nuesa retina dellos actores talo: Conchita del Parque Celeste, Paz de la Nozaleda, la AA.VV de Roces, la Biblioteca y blibliotecaries de Roces asina como Profes y alumn@s  del C.P. Alfonso Camín. 

        . Ún finxu cabezaleru que nos sofita ye la enciclopedia one line Wikipedia, qué dificil diba ser esto ensin ti. GRACIES, milentamil. 

                            :::::::::::::::::::::::::::::::::::::::::::::::::::