<OTRA VUELTA a ÍTACA(4):
Y Circe quedó clisada>
Sí, sí, sí. Ulises vien de fuxir. Ulises vien de colar de la islla los cíclopes pero nun se decata de la que vien d’armar. Vien de dexar pa la rastre al fíu de Poseidón, el dios de los mares. Vamos ver Ulises, ¡¿cómo pienses llegar a Ítaca?!.. Lleves 10 años fuera casa y Penélope nun aguanta más; los pretendientes tán xubiendo les apuestes y el filu de la rueca yá ta mui gastáu. Telémaco ta creciendo nun palaciu llaráu de xente pretencioso que-y torga una axeitada educación. Vaya xera pa so madre ...
 |
| La maga CIRCE (www.etsy.com) |
Salió Ulises al escape de la islla de los cíclopes mientres los morrillos analayaben penriba les veles de les naves. ¿Ta la suerte con ellos o ye que Poseidón quier facelos sufrir? ... Bueno, dempués de too taba’l día perguapu ya invitaba a navegar asina que ponen rumbu S-E col enfotu de bordiar Sicilia ya empobinar dica l’Exéu.
- ¡Veles al vientu! ¡Proa alta mar! ¡Ítaca, Ítaca, Ítaca!
Y ponen rumbu Eolia, la islla d’Eolo, el dios de los vientos. Eolo, sabedor de les fazañes de los itacenses, recibiólos con tola cortesía y la reconocida hospitalidá griega. Pasaron un mes como príncipes y cuando llegó la hora partir Eolo averóse a la retaguardia la flota con una pipa madera y, nun aparte, comenta-y al capitán:
.jpeg)
- Ulises, métovos equí tolos vientos que nun son favoratibles al vuesu rumbu. Nin se vos ocurra abrila, otra miente esos mesmos aires van soplar escontra vuestra. L’únicu que dexo fuera ye’l Céfiru, el vientu favoratible que vos pue llevar a Ítaca.
Ulises dio-y les gracies pero a los collacios nin pallabra. Arreyó la pipa nun requexu la bodega y a navegar otra vuelta. Nueve díes y nueve nueches tuvieren navegando de lo más guapo y los marinos yá se sentíen como en casa. Ulises que nin durmió nos nueve díes curiando de l’ayalga al llegar al décimu quedó rindíu y Morfeo vieno facéi compaña, mientres los vasallos andaben bien sollertes.
- Mirái pal norte, collacios; ¿quiciabes aquello que s’acolumbra allalantrones nun ye la nuesa Ítaca?
Efeutivamente, taben a la puerte casa. La gayola yera inmensa pero al decatase de la presencia d’aquel barril:
- ¿Qué-y regalaría Eolo que nun mos dixo nin mus?
- Qué callao lo tien el puñeteru... ¿Nun será oru y plata ?...
 |
| < La cobicia ruempe'l sacu > |
La cobicia nunca nun foi bona conseyera. Nun ficieren que xubir el barril a cubierta y al intentar abrilu, vuelta p’acá, vuelta p’allá , ruempen les dueles y entamen a salir los vientos malinos que llevaba zarraos ... Un xiblíu apavoriante y prietes ñubes anubriendo’l cielu. Del sol nin rastru. Los barcos al debalu y los marinos enferronándose a los mástiles y a los cabos de la xarcia; vamos, onde podíen ... Enxamás se viere nel Exéu una tempestá tala. Dellos díes ensin rumbu al aldu los vientos hasta qu’a la fin apuerten .... ¡a mesma islla d’Eolo!. Ulises clamia a voces:
- Eolo, por favor; échanos una mano que los dioses volviéronse escontra nueso.
- Bien nidio te lo dixi, Odiséu. Nun destapes el barril... Agora yá nun pueo facer nada por ti; nin quiero, nun me convién tener los dioses escontra mío. Arréglateles como pueas, marín.
...................................
Magar la terrible tempestá nun tienen otra que colar ... Díes y díes al aldu les foles hasta que al séptimu día encallen n’unos roqueros de la islla de Lamo (Circeo-El Lacio-Italia). Polo menos hai tierra. Tierra probe y ansí, a güeyu, deshabitada. (Más quixerais, muninos)
- A ver, collacios; vosotros trés vais salir n’avanzadiella a ver qué agüeyáis.
Salir, salieron, pero meyor tuvieren quedao a bordo ... Al poco de partir siéntense na islla tales allaríos que semblaba abrir el cielu. Dan les fusties pero’l postreru queda a la mano d’un lestrigón, un XIGANTE talo un castiellu, magar que lo peor venía per detrás; nun yera ún solu, yera una banda ...
- ¡Ulises, Ulises ! ¡Ye una islla de xigantes carnívoros!.
- ¡Xubíi a bordu, collacios; zarpamos darréu!
Cuando la flota pon rumbu a alta mar una banda lestrigones aporta a la playa. Avérense al roqueru y entamen a llanzar cascotes. Tienen más puntería que los cíclopes de Polifemo. De les doce embarcaciones que componíen la flota namás se salva una, la d’Ulises. ¡Vaya estropiciu! . Había que ver a Ulises esnalar penriba les foles ensin saber a ónde...
- Vaya guerra que me tas dando, Odiséu. Yá nun sé qué voi facer contigo . - Atenea yá ta hasta les ñaples del héroe. Nun te queda nada, munina.
...................................
Embaxo l’encantu de Circe
 |
| <Una folgueta nunca nun vien mal> |
Con rumbu N-E van navegando hasta que la embarcación itacense acolumbra una islla. Va ser la islla d’Eea (Italia). Foi fácil varar naquella prestosa playa de sable fino. Esta vegada nin mandaron avanzadura, quedaren dos díes aselando naquel paraísu. Nun yera pa menos darréu les escorribandes que llevaben en llombu. El día terceru ...
- Ulises, cuido que yera meyor dar les fusties, esta islla ye bien xabaz nun se ve otro qu’una viesca bien tarmuda ... Mira lo que tenemos pasao... Nun ye plan de volver a les andaes ...
- Lo que nun ye plan ye colar d’equí ensin saber si ta habitada o non. ¿Nun vos pica la curiosidá? ...Amás, fáennos falta suministros.
- D’alcuerdu, pero cuando repostiemos salimos escapaos.
- Val, val. Mirái, vamos dividinos en dos grupos. Unos vais dir conmigo ya otros van col prudente Euríloco*. Echamos a dites quién queda o quién sal a esplorar la islla. Mirái esta taba, el qu’acierte en qué mano ta espera equí y l’ otru grupu sal d’avanzadiella.¿Acuéi, Euríloco?.
La mano inocente de Méntor escuende la taba....
- Tocóte, Euri. Tira delantre, cuñáu, y anda sollerte. Nun te compliques la vida, a la mínima tornes equí. Val más quedar de cobarde que cayer n’una falcatrúa.
*Euríloco: Taba casáu con Ctímene, la hermana d’Odiséu.
 |
| <Camín del Hades, talo si fueren pa Ibiza> |
Taba esta arrodiada por un xardín percuidáu sicasí llaráu d’animales xabaces, ¡llobos y lleones! , eso sí, de lo más candiales. Nun ficieron qu’allugase al barandal y pónense a xugar colos visitantes. ¡Ablucante!.
Taben en plenu recibimientu cuando, de sópitu, apruz una mocina de lo más salada cola piel cande na que resaltaben unos llabios carmín bien xugosos. Una melota verdina con reflexos n’oru descendía sorprendida bañando’l llombu ya unos suxerentes senos que resaltaben naquel cuerpu escultural arropáu por un llargu tul cobrizu azulao. (Si toles bruxes son asina, yo alpúntome).
Yera la maga Circe una misteriosa fechicera célebre hasta entós por tresformar a Escila, la so rival nel amor de Glauco, nun monstruu marín: seis cuellos de sierpe con cabeza de perru, cuerpu de muyer y cola de pexe. En realidá nun se sabe mui bien cómo yera esti enxendru marín porque’l qu’algamaba a velu desapaecía del mapa, o bien porque fuxía – rara avis – o bien porque yera víctima d’aquel dentame perrunu. Bono, pos esta ye la hospitalaria dama que ta convidando a los nuesos amigos pero ellos... (Qué quies, va meses que nun caten una)
El que nun les tenía toes consigo yera’l cucíu Euríloco qu’un tantu roceanu por mor de tolo pasao aprovecha un momentu d’aquella gayola pa quedar arrezagáu y terminar, ensin que naide reparare nello, por escondese nel matu qu’había tres de casa. Saludos amables, risines ya un agasayu por to lo alto que termina con una ensundiosa yacuada.
- Coméi y bebéi a caprichu, héroes itacenses; tenéislo bien merecío dempués de tolo qu’algamastis en Troya.
 |
| ¡Vaya marrón, héroes de Troya! |
Nun terminaren de xintar y los nuesos amigos aqueos ya tán moñas dafechu ... La maga yera una esperta bruxa tresnando bébores máxiques que los comensales trasegaben con enfotu. Euríloco ve como los sos collacios van, pasu ente pasu, tresformándose en ...¡GOCHINOS!!. Esto pa Circe, dempués de lo que tuviere fecho, yera pan comío.
Cuando los marinos se decataron yera tarde pa volvese atrás, nin tan siquier pa pidir ayuda: Nun yeren pa falar, namás emitíen gruñíos.
- ¡H.a, h.a, h.a!. ¡Mirái los héroes de Troya! ¡Ai, si vos viere’l marín Agamenón ... Menuda coña, sí, señor! Vosotros vais pagar l’intentu de violación que tuvi por mor de la tripulación d’un barcu qu’atracó n’ Eea* va un tiempu.
* Eea: L’allugamientu d’esta islla ye un tanto inciertu. Munchos asítienla nel Llaciu, cerca del Monte Circéu, y nel mesmu Mar Tirrenu. Pos val.
...
Euríloco volvió sobre los sos pasos y esnaló al alcuentru d’Ulises.
- ¿En gochos? ...
- ¡Ibéricos! . Con mui bona pinta, por ciertu.
- Val; voi dir buscalos. Voi solu, esto ye cosa mía.
. Siguió’l camín que-y tuviere indicao’l so cuñáu, Euríloco. Ceo algamó a la casona de piedra pero enantes d’entrar daquién-y cortó’l pasu:
 |
| < Hermes a lo suyo> |
- Nun t’esmolezas, soi Hermes. Vengo de parte d’Afrodita que nun s’olvida de ti. Quiero aidate.
- Gracies, fíu; nun sobrará. Falta me va facer, cuido qu’esa bruxa tien munchos poderes.
- Tranqui, gallu; voi apurrite un antídotu, el moly, que torga’l poder máxicu de les sos bébores.
 |
< CIRCE pretende llevar a Ulises al güertu> (tucuentofavorito.com) |
Llegó a la casona. Circe salió a recibilu y siguió’l mesmu procedimientu que colos sos collacios. Comió y bebió como un campeón y ... Nada nun pasó.
- Bruxa, les tos falcatrúes nun valen pa conmigo. – Y sacó la espada que-y punxo nel gargüelu:
- Reconvierte los mios homes que nun son pa nada cuínos. Otra miente date por muerta.
Nun-y quedó otra a la bruxona y , pasu ente pasu, foi tornándolos humanos. La gayola fore inmensa y terminó n’una espicha. El cambéu de la bruxa foi talu qu’acabó por ofrece-yos agospiu pol tiempu que quixeren. Circe vieno namorar de l’astucia – ya otres falcatrúes - d’Ulises ...
 |
| ¿Por qué nun quedes conmigo, tontín? |
- ¿Por qué nun te quedes equí conmigo pa siempres?
- Gracies, ne. Igual quedamos dalgún tiempu, llueu yá veremos ...Tán esperándonos en casa.
- Val. Descansái una temporadina y mentanto yo voi dir alvirtiéndote sobro los peligros que pueas dir alcontrando nel camín.
Un añu enteru tuvieron n’Eea embaxo la proteición de Circe. La maga fexo maxa con ellos y tratólos talo a príncipes de manera tala que los marinos itacenses nin s’alcordaben d’Ítaca... Otra cosa yera Ulises que calletraba de contino en Penélope.
- Circe, llevamos equí un añu enteru y nun podemos tar más satisfechos del tratu que nos brindes pero yá va siendo hora de colar pa casa.
- Tenía la esperanza que vos quedareis pa siempre pero yá me decato que nun pues cola señaldá. Esti tiempu contigo fo’l más granible la mio vida; nunca, nunca enxamás voi poder olvidate y por eso quiero echate una gabita col envís que llegues ceo al to reinu. Ye preciso que t’alvierta al rodiu los peligros que vas poder topar pero enantes teo facete una recomendación.
- ¿ Pue sabese cuála ye?
- Cuido que debíes visitar el Hades, colos collacios, claro.
- ¿Y la farda?
- Falar col adivín Tiresias, nel Tártaru.
- ¿¡¡Ta muertu¡¡?
- Sí. Yá coló pal Hades.
- Pero’l Hades ye’l reinu de los muertos. ¿Cómo podemos entrar nel inframundu si tamos vivos? .. Y amás, ¿Cómo sabemos la ruta a siguir? ... ¿Ónde ta l’Erebu?
- Nun t’esmolezas. Bóreas, el vientu del norte, va emburriar la vuesa nave hasta’l Ríu Océanu, na tierra de los cimerios. Llueu travesáis el ríu y atracáis na playa. Al arribar tenéis que llamar l’atención del adivín pa que venga escontra vuestra.
- ¿Pero cómo podemos falar con elli, si ta muertu?
- Seique tea muertu tien la capacidá de siguir aldovinando. Tu tranquilu, yá t’esplico yo cómo ties de comportate pa poder rellacionate con elli.
- ¿Y pa tornar?
- ¡H.a, H.a! Yá te comento, ho; agora vamos a cenar. Y al endefechu, cuando tengas terminao la visita al Hades vuelves per equí; entá tengo qu’encamentate daqué. ¿Acuéi?
Pasaron la cabera nueche repasando les lleiciones .... Alborecía cuando Ulises s’empobinó a despertar los compañeros.
..................................
Nel presente. N’Ítaca.
La cafetería taba acorrompinándose de xente. Va algamando la hora punta. Ulises y yo, el so Alter Ego, siguimos embelesaos na nuesa charra prodixosa, nel nuesu granible alderique.
- ¡Qué guai, Odiséu! ¡Qué histories más allucinantes! ¡Sigui, sigui! ¿Baxasti, por fin, al Hades?
- Sí, ho; claro que descendí. Pasé lo mío, nun creas. Nun ye’l sitiu más afayadizu pa visitar. Pero esto que te digo, ¿ por qué nun me cuentes tu ónde fuisti depués d’algamar a la ETAP, nel Altu La Perdiz?
- Home, veo que ties alcordanza de los mios paseínos. Gracies, aquéu. Pero esto mío nun son qu’anéudotes en comparanza colo tuyo: escapar de les falcatrúes de los lotófágos, teneles tieses con un xigante, lluchar escontra los vientos, entrar nel dédalu d’una maga .... Yá quixere’l mesmu Caballeru de La Mancha...
- Seguramente presta escuchalo pero yo tengo pasao les de Caín...
- Y qué quies, Ulises; yes l’héroe más míticu que conoz la civilización occidental. El que dalgo quier algo-y cuesta, nun se pue tener too. Asina que nun te quexes. Algamasti l’Olimpu pero la gloria tien los pies de barru.
- Val, val, rocesu; yá me faigo cargu. Entós qué, ¿cuéntesme dalgo de lo tuyo o vamos camín del Hades?
- Buenu, anda, voi siguir cola RUTA CAMINIANA, asina aseles un poco. Quiero tenete enteru pa baxar al intramundu, qu’eso nun ye cualquier cosa ....
- Tengo alcordanza que la última vez teníes xubío al Altu La Perdiz, onde tán los Depósitos del agua y sobre too ¡eses vistes de Xixón!
Camín de La Marruca (4)
Quinta-Ranchu "La Marruca"
Bordiamos la ETAP nel puntu más altu La Perdiz y adientrámonos dafechu nel Camín de La Marruca. Ensiguida entamamos cola baxada. Una caleyina ensin asfaltar – Camín de Cachay – llévanos talamente a la casona d’estos facenderos que la caltienen munchu más iguada qu’en tiempos de Camín. Dende esta caleya hai unes vistes de Xixón “de toma pan y muella”.
Tres esplayar la vista baxando’l camín asfaltáu podemos siguir recreándonos mirando tamién a manzorga cola facienda de La MARRUCA, un ranchu, como-y prestaba al dueñu que se-y llamara; non en vanu viniere d’indianu en México.
::::::::::::::::::::::::::::::::::::::::::::::::::::
Nel Recuestu (5)
Ensin danos cuenta damos de capitón con una carretera con bastante tráficu, La Carretera la Carbonera. Tamos nel Barriu del Recuestu, cerca de Mareo. Munchu y deben Xixón y Asturies, a esta carretera que traviesa Roces. Asina que vamos tener qu’afayanos un ratín, ¿qué te paez?…
¡Adiós!,
facienda de DUARDO
XACOBU
Xusto enfrente del emboque la carretera tenemos la facienda de Eduardo Xacobu que se caltién talo en tiempos de Camín pero col abandonu del tiempu. Los actuales propietarios nada nun puen facer por ameyorar l’entornu dao que los terrenos de la redolada tán afeutaos pol Plan de Desendolcu Industrial del Ayuntamientu, ya esa zona en concretu queda como faza industrial. Dientro poco esta granible facienda va ser pastu de les naves… ¿ La Santana?.. ¡Non!.. ¿ La Golden Hind? ...¡Non!… ¿La Virxen del Rosariu? … ¡Non!… De naves industriales… El progresu ye lo que tien, hai que mudar los suaños. Val, que sía pa meyor.
………...
Dende la facienda de Duardo Xacobu acolumbramos ente les rames d’una tarmuda viesquina una casona perimportante : « ...y la Quinta de Cangas o de Bambín, yá sobro’l camín de Mareo que ye un barriu de La Pedrera», ye dicir, lo que fuere’l Palaciu de la Duquesa de Riánsares.
 |
| LA DUQUESA |
<Doña Joaquina, la Duquesa de Roces, ¿guapa, eh? |
Doña Joaquina Muñoz y Canga Argüelles foi una dama de l’alta sociedá española ya asturiana que nació en Somió (Xixón) nel añu 1904 y falleciere en Barcelona en 1967 magar toa la so vida tevo venceyada a la parroquia de Roces (Xixón) de la que siempres foi una namorada. Yera’l so sentir ser enterrada en San Xulián de Roces pero’l so hermanu nun quixo concede-y esi pruyimientu seique la Duquesa lo tuviere pautao col nuesu párrocu, Don Anselmo (¡Vaya rebote que trayía’l santu!). El que si reposa ente nós ye’l so maríu D. Ramón Menéndez-Morán y Llames (14-7-1891 ** 8-6-1955). Casaren na Ilesia de San Pedru, sobro les Termes Romanes del Campu Valdés, un primaveral dos de Mayu de 1950 (pillóme de chicu, que si no …….).
Doña Joaquina, la Duquesa*, alcuñu pol que tol mundu la reconocía, yera descendiente de Agustín Fernando Muñoz y Sánchez, primer duque de Riánsares que tuviere casáu con Doña María Cristina Borbón Dos-Sicilias, vilba del rei Fernando VII pero güeyu al datu, pa nada llevaba’l sangre del felón.
* NOTA: En realidá Doña Joaquina nun fuere Duquesa por títulu, eso correspondía-y al so hermanu, pero’l verdaderu títulu dió-ylu el PUEBLU pol so fustaxe, ¡qué prestancia y saber tar!. ¡Salve, SEÑORA Duquesa!.
COTILLÉU:
ARMES DE RIÁNSARES:
«Escudu tipu español, rectangular y cola base arredondiada. Ta dividíu en dos partes:
A mandrecha en campu azur trés coríos (ánsares) en sable picaos de gules nuna franxa de plata siguiendo esa mesma llinia.
A manzorga, nun campu azur, con bordura de gules, trés flores de lliriu (lis) , n’oru, bien distribuyíes.
La corona ducal : Ta compuesta por un cercu d’oru orniáu de perlles y pedrería, decoráu con ocho florones en forma de fuelles d’apiu que se sofiten sobro puntes ellaboraes col mesmu metal que la base.»
……………………………………………….
 |
| <La quintana de Joselín> un gran paisanu |
Baxando La Carbonera, nel cruce col Camín de La Perdiz, bien cerca d’Eduardo Xacobu, y frente a lo yera la facienda de Silvestrón Medina (Cooperaiva d’Agricultores) hay otra quintana que se caltién talo nos tiempos de Xosé, más conocíu por “Pocatripa” (¡vaya suerte!). Anguaño sigue habitada pol so nietu “H.oselín Pocatripa”, una candial persona cola puerta siempre abierta pa convidar a los amigos. Que los dioses te protexan, Xoselín.
Cuéntanos Camín nel so llibru “Entre manzanos” que nuna ocasión hebo un fregáu de los gordos nel barriu La Perdiz:
« Les faciendes de Pepón de L’Abadía y Diego’l Mayorazu, que llendaben entre sigo, yeren talo un Campu d’Agramonte (discordia). Dueños y criaos batíense de contino tantu de día como nes nueches de lluna, lo mesmo quemaben les colleches que rompíen la pata a una vaca que cometiere’l delitu de pacer nel prau del vecín; ¡cuántes quedaren moches por nun entendese los amos! . ¿La farda?… ¡La política!. Si ún yera de Cánovas, l’utru de Castelar … Si ún republicanu, l’otru carlista…
Hasta qu’un día apaez muertu’l fíu del Mayorazu ente la casa de Pocatripa y el castañéu de La Perdiz, vamos, a la vera los dominios de Xosé. Resulta deteníu por ser vecín y por calzar asemeyao a unes güelgues qu’había nel camín, seique foi lliberáu ensiguidina. Nel pueblu naide nun sabía nada: “Fonteabeyuna”.
Col tiempu súpose que fuere un tal Quilo El Machu, tamién vecín y amigu d’Alfredo de Pepón. Fredo fuere presu durante cinco años por nun acusar a Quilo. Tevo’l so momentu de gloria cuando h.opió de la cárcel pa facer una visita a la so muyer. Gracies a les monxes de la cárcel nun sufrió aumentu de condena pero por cuenta la visita ñació una rapacina… Vaya bilordios que surdieren, manín ...
…………….…………...
Otru fechu que camienta Camín nel so llibru “Entre manzanos” no que cinca a Pocatripa. Un día de branu Fonso fo echa-y una gabita a Xosé pola época la yerba dao que tenía a esgaya. Bien de mañana Fonso presentó na facienda de Xosé :
 |
| < Atropando > N. PIÑOLE |
- Xosé, mandóme padre cola fin que t’echare una gabita; nós yá terminamos cola yerba d’esti añu. ¿Véngote bien?.
- Viénesme talo aniellu al deu. Yá sabes lo qué facer: vas detrás los segadores espardiendo los marayos y más tarde vas dándo-yos vuelta. Cuando tea curao yá vamos faciendo balagares y colo verde unos borbutos. Tu yes pintu pa pisar les vares, va aidate la mio fía. Llueu vamos a cargar el carru pa metelo na tenada.
Lo de la tenada yera lo meyor. Mientres Xosé diba apurriéndonos la yerba p’asitialo na tenada la neña y yo aprovechábemos por enredar un poco. A vegaes Xosé quedaba cola trente en ristre esperando que l’apañásemos pero…
- ¿Qué carayu tais faciendo?
- Nada, papa.
- Mañana, tu a la tenada.
- ¿Y yo?
- Tu, al carru.
Acabó lo que se daba. »
………………………………..
Frente la casa de Joselín hai un camín , el “Camín de La Baliciega”, onde Fonso tuviere pasao mui bonos momentos na so infancia. Cuerre al empar del camín un regatu bien grande que termina en formar el Ríu de Tremañes.
< Formábase nesa zona una charca pergrande por mor de les lluvies y les numberoses riegues que mecíen na llana (Ríu Pilón, Ríu La Pedrera, Riega La Rastrera, Riega Robirón, Riega’l Recuestu, …). Naquel paraísu d’agües yera onde aprovechaben los coríos de la Quinta de Morís pa boriar y reproducir. En realidá los coríos yeren unos aprovechaos porque aquel banzáu natural yera onde los guah.es de Roces acudíemos durante ‘l branu pa <vivir la vida>. Los coríos aprovecíen aquel entornu acorrompináu de vexetación perguapa p’añerar: xuncos, espadañes, felechu, artos, salgueres ya una viesca peralta de fayes y carbayos .
NOTA: Anguaño tán repoblando la viesca aprovechando la resilencia d’ esa flora autóctono que nun quier desaniciar porque siente la señaldá d’aquel EDÉN y ta lluchando por aguapiar el Polígonu industrial ROCES-PORCEYO.
Arriendes d'esti Edén cuéntanos Camín una de les suyes:
<<Fermín de Pepe La Llana (Ca Pacorro) y yo enllenábemos la boina de güevos y díbemos al bar de so casa col enfotu que la so hermana nos tresnare una tortiella. El chigre yera conocíu tanto pola bona sidra como pola bona tienda; arrecendía a xicolate y pan español.
- Hermana, si nos igües una tortiella repartimos ente los trés.
Sentaos nel prau contra una vara yerba y mirando a «Pumarín, punxímonos manes a la obra.
- Hermanina, vaya secañu que tengo …
Enllenó la bota de vinu y gaseosa y nun plis-plás dimos cuenta d’aquella “rueda de molín” colos güevos de coríu.
Cuando la madre vio la bota vacía …
- ¿ Quién bebió’l vinu?
A Fermín púnxo-y el culu como un tomate y a min …
- ¡Y a ti porque nun te pillo! »
...............................................................
El
poeta de La Peñuca visitando al pintor Manuel Medina.
Onde anguaño tán la Cooperativa d’Agricultores y los Campos de Fútbol de la Federación afayábase daquella la facienda de Silvestrón Medina, el pá del célebre pintor Manuel Medina.
Manuel Medina nació en Roces nel añu 1881 y tres una vida arrequexada a la pintura arrinconó la paleta en 1954. De familia llabradora, faneguera, pudo estudiar nel Belles Artes de Madrid por mor d'una beca del Ayuntamientu de Xixón. Dende guah.ucu yá apuntaba maneres por eso so padre alpuntólu a la escuela d’Artes y Oficios de la villa. Na capital namoró de … ¡Velázquez!, sicasí hebo de conformar con D. Lluis M. Pidal, que nun ye poco. Algamó un 3er premiu (1906) na esposición Nacional con “La primera tonsura” y, por agradecimientu, donó-ylu al nuesu Ayuntamientu.
 |
| <La tonada> M. Medina |
*NOTA: D’esti pintor vamos facer un apartáu pa conocelu meyor: «Manuel Medina, el pintor de Roces»
:::::::::::::::::::::::::::::::::::::::::::::::
. La Carbonera (6)
La histórica Carretera de la Carbonera (AS-376) ye una importante vía de comunicación – foilo más – que saliendo del Llanu va arribar a Llangréu. Traviesa Roces de norte a sur y dexa’l so calquier nos Monteviles y nos barrios de Valles, la Ilesia-Carbayera y El Recuestu .
Esta histórica vía foi concebida col enfotu de tresportar al puertu del Musel el carbón de les mines de Llangréu y Siero. Son d’esta miente 35 km qu’entamen na Felguera y terminen na Puerta la Villa (Plaza Europa). Foi construyida ente los años 1842-1844 pol banqueru andaluz Alejandro Aguado seique Xovellanos yá acolumbrare esa idea nos entamos del XIX. La idea yera perguapa magar qu’al tratase d’una carretera de pagu – la primera d’España - l’éxitu foi escasu, salía mui caro trayer el carbón en carros. Al endefechu sale-y un competidor tan fuerte - el Ferrocarril de Llangréu (1846) - que vense obligaos a pesllala en 1852 pero darréu entama como carretera conveicional, tantu qu’aprovecha’l cuciu Fernández Duro pa instalar en Llangréu la siderúrxica Fábrica de La Felguera , <nun hai mal que por bien nun venga> . Por mor d’ello esta carretera enantó’l kilometrax, llegando hasta Llaviana (49 km), col enfotu d’aprovechar el carbón de tola Cuenca del Nalón. Gracies a ello los vecinos de L’Arcadia pudimos conocer el mar, magar que yera más prestoso viaxar nel ferrocarril que venía drechu a Xixón y non como a la capital (Uviéu), <En Noreña cambiu de tren>…
…………………
< Carretera La Carbonera > |
Pos bien, yá vamos baxando pela Carbonera dexando atrás El Recuestu mientres enantamos la mirada contemplando la gasolinera, la Cooperativa d’Agricultores y los Campos de fútbol de la Federación. Algamamos a una retonda y enantes de tirar de frente vemos a manzorga’l polígonu industrial Roces-Porceyo y si torcemos a mandrecha, bordiando otra gasolinera (Bellanoil), adientrámonos nel barriu de Nuevu Roces, pero quieto parao, que nun vamos pa casa.
Asina que nós siguimos caminín del mar per aciu La Carbonera. Pasamos l’ALDI, el Centru d’Ociu, el Centru de Refuxaos de la Cruz Roxa y el campu onde tuviere ubicada la Planta de Tabaco.
.. Y yá , por fin, algamamos a un puntu perimportante na infancia de Camín, el Campu de la Ilesia xuníu a La Carbayera per aciu de la Carretera Carbonera.
::::::::::::::::::::::::::::::::::::::::::::::::::::::
Dende L’Ítaca
 |
| < ÍTACA > |
Narrador:
Los nuesos mocinos siguen na Cafetería Ítaca narrando, como puen, les sos odisees. Ye la hora punta, la del vermú y hai un baturiciu asemeyáu al que tuvieren vivío ente les muralles de Troya. Asina y too, cadún a so manera, son capaces de tresmitir el so enfotu pola vida. Porque la nuesa vida ye eso, una odisea onde lo mesmo tienes la suerte d’averate al Olimpu – siempres dura poco – qu’asomate al Tártaru. Sicasí, ¿ paga la pena, non?
- Bien, bien, rocesu; veo que lo pases dabute restolando pel pueblu. Si ves a Xoselín das-y recuerdos. Ye una pena nun tener conocío a la Duquesa, esa ilustre señora ye digna d’una aristocracia griega. Ya veo que la carretera Carbonera significó muncho pal espoxigue de la to Asturies del alma y pa ti en particular.
- Asina ye, Odiséu; per ella venía a cortexar. Y nun sabes cómo me presta esi interés qu’amueses pola nuestra Patria. Pero yo toi arranáu por saber cómo te desenvolvisti nel reinu de los muertos.
- Como pudi, como pudi, xixonés. Eso sí, cola gabita de los dioses y les indicaciones de la maga Circe.
- Quién te lo diba dicir, ¿eh?... Qu’aquella que te quixo convertir nun xuguete sía la mesma que te vaya conducir polo segao camín de to casa ...
- Yá ves... Mira que te digo, póngote en manes del Narrador, él cuéntalo con munchu enfotu.
Narrador:
 |
| < El HADES. L'Avernu. L'inframundu > |
... Tenemos dexao al nuesu amigu itacense camín de la nave onde dormíen los collacios. Un poco amoriáu tres una nueche mui productiva nel cuartu de Circe salía coles lleiciones bien aprendíes. Nada nun dixo a la tripulación de los planes inminentes que tenía, esperó a tar n’alta mar. Una vez que la nave tomó vuelu mandó aconceyar la tripulación.
- Aqueos, tengo que davos una noticia; nun vamos direutamente a Ítaca, enantes debemos pasar pol Hades.
- ¿Al inframundu? – glayaron toos asustaos. Ye imposible entrar nel reinu de los muertos.
- Non del too si lleves les CLAVES afayadices. Tengo conocimientos, y conseyos, por mor de Circe; ella sabe coses que los simples humanos desconocemos. Ellí, l’adivín Tiresias tien de danos les pautes p’alcontrar el rumbu afayadizu p’algamar a Ítaca.
.Los marinos griegos nun yeren a salir del plasmu. Entós Ulises vieno a sacalos d’aquel arrobamientu.
- ¡Cuayu, aqueos!. ¿Cuándo un itacense tuvo mieu?... ¿Cuándo un griegu refugó la voluntá de los dioses? ... Si ellos quieren que pasemos pol Hades enantes d’arribar a casa ye que tienen motivos sobraos. Darréu tornaremos a Eea pa da-y les gracies a Circe y recibir les caberes instruiciones. Ye la voluntá de los dioses.
. Los marinos torcieron un poco la cabeza con eso de tornar a Eea pero terminaron capitulando. Ponen rumbu al Ríu Océanu (Mar abiertu) na tierra de los cimerios onde too ta cubierto por una trupa niebla . Nunca nun salía’l sol y en mediu d’esta nueche eterna arriben a la sablera que da pasu al Reinu de les Tiniebles. Cerbero ta curiando la puerta pero Ulises nin lu ve, nun piensa cruciar l’Aqueronte (¿Estigia?).
 |
| Nel HADES: una GÜESTIA en toa regla. |
Un marmullu apavoriante precede al heraldu del Avernu: una banda espelurciante, son les almes de los muertos; una Santa Compaña en toa regla. La primera en dar un pasu alantre foi l’alma d’Anticlea, la madre d’ Odiséu. Amira p’aquel home y malpenes lu reconoz, tantu tiempu y aquel ambiente ...
- ¡Mama, tas muerta! Yo dexéte con vida cuando salí de casa.
- ¡Ai, fíu; nun fui a soportar tantu tiempu la to ausencia!
Ulises cayó a tierra, de rodiyes suplicó’l perdón de so madre. Intenta abrazala pero aquel espectru esmuzse-y de les manes. Sacrifica’l corderu que-y tuviere regalao Circe ya intenta que beba’l sangre a esficies que-y tornen les fuercies, pero l’espíritu de los muertos ye imposible d’abrazar. Con un xestu refugó’l fíu a los dioses la poca paciencia que tuvieren pa con so madre. Yera demasiada la farda pa cargar el solu con ella. Ye lo que facemos toos cuando nun somos pa entender les desgracies que nos pasen.
 |
| < L'adivín Tiresias nel Hades > |
Tres la deceición aportó l’adivín Tiresias. Ulises acercó a él col enfotu de fala-y pero Tiresias seique nun yera pa reconocelu sí podía decatase d’elli:
- Ulises, ¿cómo ye que tando vivu vienes al reinu de los muertos?
- Vengo buscándote, amigu, preciso la to ayuda pa poder algamar a Ítaca. Son demasiaes les torgues que me ponen.
- Yá sé de les tos andancies, conozo la ira de Poseidón y siento dicite que esto va siguir los mesmos carreros durante un tiempu. Pero escúchame bien, voi date dalgunos conseyos ... N’unos díes vas algamar a la Islla del Sol, una tierra fértil onde pastien les vaques d’Apolo. ¡Nun mires nin pa elles! ¡Cuida los tos homes y tórga-yos el rixu hasta d’un filete! Otra miente vas pasales bien torniaes y pa más INRI mas bien solu vas a llegar. Y entá t’encamiento daqué más : Cuando llegues a Ítaca nun vas alcontrar un camín de roses, vas tener que LLUCHAR. Sí, escuchasti bien, una brañada de gatuñones tán al acesmu de Penélope y la probe tienlo bien complicao. Va dándo-yos llargues sicasí ... nun debíes entardar. En cualquier casu yá aldovino’l to ésitu pero .... En cuantes pongas orde en to casa ties de volver a partir a la cata de nueves aventures, esi ye’l to SINU: la odisea.
- ¿Nun t’abulta que yá ta bien? . Lo que pasé y lo que tengo de pasar p’algamar a casa ...
- Son los pruyimientos de los dioses, yo namás pueo aldovinar lo que camienten.
- Nun merez la pena ser un héroe, una lleenda, un iconu ... Namás quiero ser un esposu, un padre, un fíu, un amigu ...
- Nun llores, Odiséu y fai alcordanza: «Naide pue escapar al so destín» . Un día vas alcontrar nun llugarín de les Asturies, nun chigre de Roces, esti cartelu que te fai los honores:
« TEN SIEMPRE A ÍTACA NA TO MENTE. ALGAMAR ELLÍ YE’L TO DESTÍN. MEYOR QUE SUPLA ENFORMA Y ATRACAR, VIEYU YÁ, NA ISLLA, ARRIQUECÍU DE CUANTO GANASTI NEL CAMÍN » Amén.
... Dicho esto Tiresias esmuzse como por arte d’ensalmu. Ulises queda clisáu hasta que so madre, Anticlea, vien a despertalu.
- Fíu ...
- Ma, ¿ que desgracia te trexo equí?. ¿Cómo tán padre, Penélope y el neñu?
- Nun pienses en min, fíu. Yo soi feliz pol fechu que los dioses te permitieren venir a veme. Esto quier dicir que tán esperándote grandes coses por facer. To padre sigui aguardando por ti , lo mesmo que Penélope y los criaos; Telémaco va creciendo en sabiduría, ye un guah.e mui llasparderu, nun piensa n’otro qu’en conocete.
%20cladicasusal.es.jpg) |
| "Ulises intenta abrazar a so madre |
Pero'l desfile de solombres entá nun terminare. El plasmu d’Ulises siguía llatente. Caravana de princeses, muyeres de soldaos ya una bona montonera d’héroes de Troya. N’estes ve averase a Agamenón, y tres d’él al gran Aquiles, l’héroe más celebráu de tola pléyade griega.
Agamenón cúnta-y cómo foi la so muerte a manes de la so esposa Clitemnestra col gabitu del so amante Egisto. Nunca-y perdonó que la dexare por dir a la guerra pero sobre manera por sacrificar a la so fía – Ifigenia - p’algamar el beneficiu de los dioses. Nun foi un asesinatu, cumplió col so deber.
- ( Pero ¿a qué tas dispuestu tu, Agamenón, por ganar una guerra?..Si matasti a la to fía bien muertu tas, xostrón. Yá sabía yo que lo d’Helena nun yera otro qu’una SIDA pa facer la guerra. Cómo va estrañame lo que pasa na política d’anguaño ente PSOE y PP... Val cualquier cosa por apañar el PODER. Que vos dean, mamones, sobre tou al pepé).
<Aquiles faciendo méritos p'almar daqué día'l Hades> |
¿ Y Aquiles*, qué piensa anguaño de la so vida nel Hades? .... L’héroe mirmidón taba bien alvertíu por so madre:
- « Aquiles, tienes qu’escoyer. Si vas a la guerra algamarás el títulu d’héroe llexendariu, esa va ser la to gloria, pero nun vas volver, ta destinao. Si quedes, vivirás munchu tiempu y serás rei y padre, ¿feliz?... ¡Escueyi!»
- Yá sabes lo que fici, Ulises. Tu, precisamente, fuisti’l que m’emburrió a la GUERRA, nun debí facete casu. ¿Qué gloria ye ser célebre y lloáu na Tierra y Rei nel Inframundu? ... Val más ser un probe padre nel reinu de los vivos que Rei nel Avernu.
- Nun t’esmolezas, Aquiles; taba escrito. Naide nun pue escapar al so destín; nin tu nin yo. La LLIBERTÁ nun ye otro qu’una ilusión.
* NOTA: Aquiles foi "bautizáu a la griega" por so madre, la diosa Tetis, col envís qu'algamare la inmortalidá. Al somorguialu nes agua del Ríu Estigia pasaba ser invulnerable sicasí..... el tobiyu per onde lu tenía prendíu nun tocó l'agua .... Mala suerte, collaciu.
 |
| < Nel HADES: Una GÜESTIA en toa regla> |
Cuando terminó’l desfile d’dalmes en pena Ulises tornó al barcu que yá taba llistu pa zarpar. Magar el sufrimientu por tanta desgracia salía bastante confortáu pol destín que-y esperaba: tardaría pero daqué día aportaría a casa.
- Adelante, compañeros; rumbu a los dominios de la maga Circe. Gracies a ella yá tenemos claro lo que nos espera. – Claro qu’Ulises nada nun dixo sobro’l destín que-yos esperaba. Mui propiu d’Ulises ... (Por dalgo Atenea te tien ficháu, bribón).
Cuando los aqueos llegaron a Eea Circe ya Ulises tuvieron la cabera conversación:
- Realmente yes un home valiente, más que munchos semidioses. Enfrentasti munches dificultaes pero yá sabes que los peligros nun acabaron. Vas perder los compañeros y vas pasar les de Caín enantes de llegar a Ítaca pero al final trunfarás si faes esto que digo:
« Cúriate de les serenes taponando los oyíos y amarrándote al mástil del barcu. Navega cerca del estrechu pa llibrate de la bestia Escila seique pierdas dalgún home. Na islla d’Helios pon tol procuru en nun tocar dengún güe. Párate lo menos posible y navega direuto a Ítaca».
Dame l’últimu abrazu que voi echate muncho de menos. – Cuando Ulises s’embozó na maga yá taba camentando en Penélope ...
- Tira p’allá, Ulises; que se cumpla’l to destín.
...................................
[[[ Y qué se camienta nes redes sobro’l mitu de Circe ... El PODER ye mui peligrosu, tien dos filos: Pue emplegase p’abusar y facer tropelíes como convertir los homes en gochos o bien pa buscar la igualdá y el bienestar común talo l’amor compartíu de Circe ya Ulises. ¡¡El cuchu pue muncho pero l’amor más!¡]]]
...........::::::::::::::::::::::::::::................
Na onírica cafetería Ítaca
. Tomaron un par de culetes pa escapar d’aquel tastu acibre del inframundu.
 |
| < Echa, un culín, aquéu > |
- ¡Qué pasada d’asocedíos! Dende llueu lo que te pasa a ti nun-y pasa a naide. ¡Cómo t’envidio, aquéu!.
- Uno ye cuntalo ya otro pasalo. Por ciertu, tu tamién conoces a daquién que baxó a los Infiernos. ¿ Un italianu ?...
- ¡Ah... Dante! . Sí a esi tamién-y prestaba enredar...
- ¿Vamos dexalo güei equí o preferes dame l’últimu paseín per Roces?.
- Venga, voi cuntate dalgo más lliviano pa salir del Hades, ¿qué te paez?.
- D’alcuerdu, rocesu. Yo tamién ando esmolecíu por descansar un poco.
::::::::::::::::::::::::::::::::::::::::::::::::::
Tuviéremos camentao al rodiu del Barríu del Recuestu onde alcontramos célebres personaxes como Joselín, la Duquesa, Eduardo Xacobu o’l pintor Manuel Medina, tos ellos xuníos per aciu la carrereta Carbonera. Esta importante arteria entá nos tien munchu qu’aportar... Y yá , por fin, algamamos a un puntu perimportante na infancia de Camín, el Campu de la Ilesia xuníu a La Carbayera per aciu de la Carretera Carbonera.
::::::::::::::::::::::::::::::::::::::::::::::::::::::
El barriu La Ilesia (7)
 |
| < San Xulián de Roces, la Ilesia de DONVI > |
. La Ilesia de San Xulián de Roces tien un fustax perguapu y sembla ser decimonónica per aciu d’un revestimientu pedrés pero en realidá ta modernizada dafechu dao que foi esaniciada na dómina de la Guerra Civil (1936). Un lletreru que porta nun lladral diznos que foi construyida en 1762, n’época barroca, pero’l so estilu actual tien un calter popular mui candial. Según cuenta J.A. Bonet les pequeñes ilesies de la redolada de Xixón foron creándose a partir sieglu IX seique dellos historiadores yá les afayen dende l’octavu (VIII). En documentos de la diplomacia Asturiana cuiden que Sta M.ª de Coltroces (Contruces) nacío en 905, dómina d’Alfonso III, el Magnu; el caberu Rei de Monarquía Asturiana. Cabe suponer que San Xulián de Roces pudo ser coetánea.
UN POCO MÁS D' INFORMACIÓN :
Según un cartulariu de San Vicente d'Uviéu la ilesia de San Xulián del Pandu - ansí se nomaba Roces - apruz en documentos del sieglu XII. Darréu qu'Alfonso II el Castu llevantare Santuyanu embaxo l’evocación de los santos esposos Xulián y Basilisa fueren munches les parroquies que siguieren el so exemplu. El templu de San Xulián del Pandu - románicu rural - perteneciente al arcedianu de Xixón, quedó embaxo la soberanía del obispáu d'Uviéu. Tenía delles capielles y cruces de caminos venceyaes al so territoriu. Nel XVIII (1762) y XIX, tres unes reformes neoclásiques, el topónimu Pandu (casi llano,ya un poco alto) camudó en Roces (de rozu). Tres sufrir los avantares de la guerra del 36 foi reformada otra vuelta y terminó por afitase como San Xulián. Tres la industrialización de Xixón San Xulián siguió teniendo un puxu importante nel nuevu barriu urbanu. Celebra la so fiesta'l 7 de xineru como correspuende a los santos Xulián y Basilisa. Anguaño pertenez al Arciprestazgu de Xixón (Archidiócesis d'Uviéu) siendo'l so pastor el cercanu DONVI. .....
LO QUE VEMOS: Trátase San Xulián d’una ilesia pequeña de planta basilical con trés naves siendo la central más ancha y xunida a les lladrales per aciu d’arcaes. Ta dividida en cuatro tramos cubiertos por bóveda d’arista que se sofita en dos pilares bien competentes. El cuciu cabildu de la entrada soporta una preciosa torre-campamariu, de cuatro tramos, con vanos ya óculos coronaos por arcos de mediu puntu.
El presbiteriu, un poco eleváu, abraza l’ara con un retablu onde podemos contemplar, al llau del santu patrón del barriu - San Xulián - a la Virxe col Neñu , a San Antón, …. La Virxe del Rosariu, patrona de Roces, caltiénse metanes la nave arropando al pueblu. Unes vidreres policromaes tresmiten paz y color a la vida los parroquianos. Un llugar tan afayadizu como esti metanes un pandu ya una viesca cuido que pudo ser antaño un llugar de pelegrinación dende abenayá.
¿Quién foi San Xulián?…
Hai dos “ San Xulián” de la mesma dómina y cuasi vecinos que dan llugar a la confusión, San Xulián d’Anazarbus y San Xulián d’Antice, l’esposu de la Santa Basilisa. Dambes histories asemeyen enforma:
SAN XULIÁN d’ANAZARBUS
|
De Cilicia xurdieron dellos santos cristianos qu’afrentaren el paganismu: San Xulián d’Anazarbus, San Xulián y Basilisa, Pablo de Tarso, cuasi nada...Hai quien considera a Cilicia la “cuna del cristianismu”
…………..
Hai otru santu del mesmu nome, de la mesma dómina y de los mesmos precedentes: San Xulián, l’esposu de Santa Basilisa. Que según les caberes informaciones ye’l verdaderu patrón de Roces. Ye lo normal, vien precedíu pola fama del San Xulián de la Vega al que dedicare’l nuesu Alfonso II el Castu la ilesia prerrománica de Santuyanu de los Praos, a la entrada d’Uviéu.
Foi un mártir exipcianu (Antince) que tamién padeció la persecución de Dioclecianu y Maximianu a finales del S. IIIº.
Cuando yera rapaz fexo votu de castidá seique los sos pás, que nada nun sabíen, decidieron casalu con una señorita al so altor, tamién de familia bien.
- ¡Vaya puru, amiguín!
La suerte que tuvo foi que la mocina tenía fechu’l mesmu votu.
- ¡Allabaú sía’l Señor!
Dambos retiraron a dos casines na redolada la ciudá que terminaron convirtiendo en monesterios, masculín y femenín, con numberosos discípulos . Esto nun gustó nada al emperador y someten a Xulián a un “tercer grau”:
- Soi cristianu pola gracia de Dios y pienso siguir siéndolo. Nun tengo más xefe que Cristu Crucificáu.
-Tiéneslo claro, monín; vamos ver lo qu’aguantes.
Tres numberosos escarmientos termina degolláu. Muncha xente se tien convertío pola mor de San Xulián.
Alfonso II, el Castu, el meyor rei d’Asturies, llevantó’l templu de Santuyano (Uviéu) n’honor de los santos Xulián y Basilisa. Gracies, don Alfonso, pola ayalga que nos dexasti. Esperemos que los actuales mandatarios alcuentren na xaceda de La Vega, el restu que nos falta. Mieu me dan …
………………………………..
. Alfonso Camín y la Ilesia
<Ilesia de San Xulián de Roces (Xixón)>
… Ye de toos conocío la poca empatía qu’A. Camín tenía pa colos preceutos de la Fe católica, y de les otres tamién. Dende chicu yá refugaba tantu catecismu na Escuela.
- Menos catecismu y más escuela. – Y ye que los maestros de la dómina – y la mesma sociedá – taben talamente adoctrinaos por aquella Ilesia tan retrógada.
- Los cures son toos unos fartones. – Bueno, toos sacante Don Ceferino, que yera de los pocos vecinos de Roces qu’apostaba por Fonso. Eso sí, enxamás pudo llevalu al catecismu magar l’apreciu que se teníen. Les esperances de Camín taben puestes n’otra parte: el Conocimientu y la Lliteratura. Y acertó. Dexónos una obra tan rica y tan bultable qu’aquellos que debíen ponderalu nunca nun algamaron a conocelu bien. Ellos se lo pierden porque tola OBRA de Camín ye un poema permanente, un cantu a la vida y a la llibertá.
…………………….
Na redolada del campu la Ilesia afáyase la casina la Rectoral, lo que nun vemos ye al cura que pola farda de vocaciones sacerdotales tien varies parroquies al so cargu, habrá que rezar … El modernu edificiu de la AAVV de Roces ya unes casines perguapes, tantu antigües como modernes, completen l’aforu del campu pero … Un pelín más p'allá acolumbramos una casona impresionante…
<<El
PALACIU >> de D. Ramón .
<El PALACIU de D. Pedro De Valdés y Menéndez de Llabandera>
- Oiga, señor; ¿ y eso qué ye?
- El Palaciu, coimes, ¿tamos asina?
- Perdone pero ye que soi nuevu...
- Non, perdóme usté, ye que ciégame la pasión. ¿Quier que-y cuente una historia?
- Por favor, nun naguo por otra cosa.
- Venga, voi cuntá-yla nun APARTE.
*«L’ALMIRANTE DE ROCES» va nun apartáu específicu. Nun te lu pierdas, D. Pedro de Valdés y Menéndez de Llabandera ye ún de los personax cabezaleros na historia de Roces.
Equí tenéis un anticipu:
 |
< Los suaños de Pedrín Valdés, un guah.e de Roces (XVI)> |
«Don Pedro de Valdés y Menéndez de Llabandera foi un marín-militar y políticu español que ñació en ROCES (Xixón) nel añu 1544 (ib) falleciendo nel mesmu llugar en 1616.
Tres una vida esmoleciente ya azarienta sirviendo a la Marina algamó en tiempos de Felipe III (1578-1621), ente los años 1600-1607, a Gobernador de Cuba y Capitán Xeneral de L’Habana. Esta afición marinera vien-y del so tíu segundu, Jordan de Valdés , que foi’l primeru d’esti llinaxe qu’indroduxo esta vocación a les armes na familia Valdés.»
::::::::::::::::::::::::::::::::::::::
N’Ítaca
Siguimos aldericando, na mítica Cafetería Ítaca, col héroe de Troya. Atenea ta na rede tresnando esta HISTORIA . (- Gracies, chatina)
- ¿Qué tal Odiséu, ta prestándote la mio historia? ... Yá sé que nun hai comparanza pero ye lo que toca. Yo tampoco pueo escapar al mio destín. Pa nada sirve quexase, nin tampoco lo pretendo. Soi feliz d’esta manera, restolando peles vides de propios y foriatos. Ansí s’escribe la HISTORIA.
- Yá te dixi que me presta esta vida más tranquila sicasí munchos de los personax qu’amueses tienen la so propia ODISEA. Y ye que la vida ye eso, una aventura, a ratinos paraísu y a vegaes una traxedia.
- Camentaba’l nuesu poeta Camín al rodiu la vida: «Dicen que la vida ye mala. ¡A quién-ylo vas cuntar, amigu, que siempres llevo conmigo l’infortuniu y la bala. Crecíu ente guerres civiles y mundiales cómo queréis que sía yo un corderu pascual. Soi la foguera y la pólvora sobro los vendavales ya un reflexu dramáticu del duelgu universal.» . Asina que venga, nun te pongas tráxicu y escancia otru culín pa escaecer l’infortuniu.
- ¡Salú, rocesu! ¡Puxa Roces!
- ¡Salú, aquéu!.¡Puxa Ítaca!
.............. FIN de la 4ª ENTRADA :< OTRA VUELTA a ÍTACA (4) >.......
. ESTIMANCES
 |
| < CIRCE, cortexando a Ulises >. Quién lo diría .... |
Tengo que dar les más fervientes gracies a dellos escritores asina como a blogs, páxines Web, editoriales, pintores ...
. Pintirest.com . - Manuel Medina ("Lleición de gaita") . - E. Valle ("La Quintana") -
. www.etsy.com - www.haciendosidra.com .- www.domusnatura.com .- www.tumomentofavorito.com .- www.clasicasusal.es .- www.Academia Play.com (Jan Styka).- www.instagram.com (greciafilia).
. Wikipedia, onde abebenta de cotino.
Y los Llibros:
. <Las aventuras de Ulises> de Gerónimo Stilton. ¡Un AMOR!.
. <La fabulosa historia de Ulises> de B. Coppin y A. Ronzon
. <Helena y la guerra de Troya>. ANAYA
. <El regreso de Ulises> ANAYA
. < La cólera de Aquiles> ANAYA
. < La guerra que mató a Aquiles> de Caroline Alexander. ¡Norabona!..
. <Naves negras ante Troya> Rosemary Sutcliff . Tengo decidío mercalu.
. < Las aventuras de Ulises> Rosemary Sutcliff. Idem
No hay comentarios:
Publicar un comentario