OTRA VUELTA a ÍTACA (1): La de TROYA

                 

                        OTRA VUELTA a ÍTACA

                                                                    «La de Troya»

                       

                                       «Dengún home o muyer, valiente o cobarde,

                                                         pue escapar al so destín». Homero

        Y esto ye lo que me pasa a min. Dende que pasé a morar en N. Roces, a dalgo menos d'un estadiu de la Cafetería «Ítaca», sabía que’l mio destín taba xuníu al d’Ulises y qu’a dambos taba esperándomos una odisea, a elli pel Mediterraneu y a min per Roces, nuna «Ruta Caminiana» - na pelleya d’Alfonso Camín - que debía entamar y finar en casa, ye dicir n’ Ítaca.

        Ítaca ye la patria d’Ulises y Roces la de min magar que por un caprichu del destín dambes pasen a tar xuníes pa gayola de mio. Yá nun voi caminar solu, Fonso, voi facelo na compaña de los héroes de la Guerra Troya, de los dioses del Olimpu, de les muses del templu d’Apolo, de les «circes» del Mediterraneu, de .....

        - ¡Polifemo, tas per ehí? ... 

        ¿Y a ti, collaciu, nun te prúi xunite a esta caravana d’amig@s ? ...

        Dicen que la Iliada – xunida a la Odisea - ye la base de la lliteratura y el pensamientu de la cultura d’anguaño.¡Cuasi nada! . Ye nidio que la cultura grecollatina son el cimientu de sociedaes sólides y bien consistentes.  Arriendes dello amuesa munchos valores como la xusticia, la llealtá, la fidelidá, l'amor, l’amistá, la valentía y l’almiración mutua ente rivales talo Héctor ya Ayax – tras la engarrada intercambien regalos - y qu’al endefechu contrasta cola rabia y l’anoxu ente los nuesos coetáneos, llámense PSOE y PP. ¿Y si estos tuvieren la suerte, o la virtú, de lleer y apropiase de los talentos d’esta epopeya?. Por favor, a ver si sois capaces d’aldericar ensin ofender.

                                                                    .....................

Ítaca

        Foi una gran satisfaición saber que díbemos a finar los nuesos díes d’aventures - talo que’l mocín d’Homero - nun pequeñu apartamentu asitiáu al llau mesmu de la mítica Ítaca, una moderna cafetería, entamu pero sobre manera’l final d’esta nuesa «Odisea caminiana». Magar qu’enantes d’entamar con esta Ruta Caminiana ye de xusticia conocer dalgunos datos más sobro l’orixe d’esta llexendaria pallabra, ¡¡¡Ítaca!!!.

<Ítaca. Puertu y bahía de Vathí, la so capital> Equí vivía Odiseo

        . El nome d’Ítaca vien del griego Itháki. Trátase d’una cativa islla del Mediterraneu asitiada nel Mar Xónicu.

        .Tien una superficie de 118 k m/2 ya un perímetru de 101 Km. N’actualidá nun pasa de 4000 habitantes siendo la so capital Vathí, qu’anda polos 2000 h; cuatro gatos... Paez qu’en tiempos d’Homero (s. VIII e.X) tenía daqué más puxu qu’anguaño.

        Si tienes la suerte de facer una escursión per Ítaca verás una verde islla suavemente montañosa flotando sobro un magnéticu mar azur. La bahía de Vathí, la capital, termina nun puertu bien recoyíu de los vientos qu’abelluga un pueblu de candes casines d’escasa altura. Paez que tamos nel antiguu <Forcis> nos tiempos del idílicu d’Homero ya onde una llamativa estatua d’Ulises vien a danos la bienvenida. 

        Na islla d’Ítaca amás de les sos atrayentes playes ya oníricos senderos vas alcontrar Muséu, escuela superior, estadiu d’atletismu, catedral, lazaretu con ilesia, casones y hasta los restos del palaciu d’Odiseo . ¡Ixuxú!

        Ítaca yera la patria d’Ulises (Odiseo), el so gobernador -¿Rei?-, que participó na Guerra de Troya a favor de los aqueos (griegos). Taba nel bandu del rei Agamenón, del so hermanu Menelao y d’ héroes como Aquiles, Ayax o’l propiu Odiseo. Na bancada contraria vamos alcontrar a Héctor, Paris, Príamo o’l mesmísimu Eneas, el troyanu fundador de la castra romana y protagonista de la Eneida*.

                                                                        .....

< ÍTACA: ULISES xixilando la mar >

        Ulises, home bien astutu foi determinante al idear el Caballu de Troya, engatada que dio llugar al asaltu final de la ciudá.

        Cuando finó la guerra tornó pa casa pero perdióse nel camín de vuelta – dellos dioses nun-y perdonaren la engañifa – y tevo otros diez años vagando – d’escursión – pel Mediterraneu nuna epopeya qu’Homero nos cuenta na Odisea. Y mentanto Penélope siguía esperando... ¡Va vagate, munina! ...

        *Eneida : Eneas fo un héroe troyanu qu’escapó de la engatada final de Troya y tres vagar pel Mediterraneu terminó por algamar a rei del Lacio, siendo los sos descendientes, Rómulo y Remo, los fundadores de Roma. Los avantares qu’hebo de pasar cuéntanoslo Virgilio (s.I e.X) que yá conocía de les andancies d’Eneas, nuna obra titulada La Eneida (12 llibros). Al tratase d’un encargu del emperador Xulio César lleva a la familia Xulia-Claudia, de la que provenía l’emperador, al orixe y cumal del Imperiu Romanu. ¡Menudu pruyiciu tenía César con esto de la estirpe!

                                                            ..................................

                            La Iliada . Avance

        Nel sieglu VIII enantes de Cristu (e.X) aqueos (griegos de la dómina) y troyanos andaben a la tema por mor d’una señora. Helena, fía de Zeus (enmazcaráu de Tindáreo) y de Leda - ansí poques gracies - tuvieron esta rapaza petite de tou’l planeta Mediterraneu.

        

< HELENA, arde Troya>

        Casada la espartana col aquéu Menelao namoró del troyanu Paris que la terminó raptando (ella púnxo-ylo a güevu) . Cómo diba’l Rei Agamenón – l’amu de la zona - y cuñáu de la víctima, consentir tala afrenta.... Nin que lo tuviere preparao elli porque alcontró la sida perfeuta p’arremeter escontra Troya (Ilión), una puxante ciudá pola que andaba arranáu dafechu dende abenayá. (Troya controlaba’l tráficu ente’l Mar Egéu y los de Mármara y Negro).

        Diez años-yos llevare tala empresa que dexó fechos remembrables pa la humanidá ya encumó héroes pa la eternidá por dambos bandos : Aquiles, Héctor , Ayax... Con tal de ganar daqué batalla los guerreros buscaren la proteición de los mesmísimos dioses, siendo esta rellación ún de los ites que lleva a estudiar la célebre epopeya. Los héroes non solo s’encarien en batalles sangrientes seique tamién por dilemes éticos y morales derivaos de la gloria, l’honor, la valentía y los enguedeyos humanos.

        Homeru cuéntanos na Iliada los caberos 51 díes de la guerra de los aqueos escontra Troya.

Troya

<Allugamientu de Troya ya Ítaca nel Mediterráneu>

        Troya, Ilión o Wilusa en hitita, ye una mítica ciudá mediterránea asitiada n’Anatolia cerca l’ Estrechu de los Dardanelos y qu’anguaño pertenez a la provincia de Çanakkale, en Turquía. El xacimientu arqueolóxicu que nos lo amuesa apaez andamiáu na llomba de Hisarlik. Anguaño esta xaceda* ta declarada como Patrimoniu de la Humanidá <pola so importancia nel desendolcu de la civilización occidental asina como de les artes creatives nos dos caberos milenios>.

< Troya >

        * Les escavaciones más relevantes debémosles a Calvert y Schliemann. Diez ciudaes tien alcontrao, siendo la VII la de autos.Gracies, amiguinos. Qué importantes son les escavaciones ....

         Troya (Ilión) según l’arqueoloxía y les fontes históriques tá habitada dende’l comienzu del tercer mileniu e.X.

        Per aciu de la mitoloxía griega sabemos que la familia real troyana foi fundada por Zeus y la pléyade Electra que tuvieron a Dárdano . Esti casó con Batiea y fundaron Dardania. Tres el reináu de Tros, un nietu suyu, algamó a rei’l so fíu Ilo que fundó la ciudá d’Ilión (Troya).

        N’actualidá Troya ye un finxu turísticu de primer orde como se deduz de la riada de turistes que visita la xaceda de les numberoses escavaciones d’esti patrimoniu de la Humanidá asina como’l Muséu que sopelexa la bayura d’artiluxos alcontraos en Troya.

<Les 7 pléyades y los sos pas>

    *Pléyade: Les pléyades son les siete fíes del titán Atlas y la ninfa Pléyone. Foron convertíes n’estrelles por Zeus y casaren, sacante una, con dioses. Anguaño tán nel cielu formando una constelación. 

                                                               ..........................

La Guerra de Troya:

                          Qué foi, carauterístiques, personaxes causes y consecuencies.

        . Trátase d’un enfrentamientu ente los ciudadanos de Troya escontra los aqueos de Micenas y los sos aliaos, dánavos y argivos.

        ¿Foi real esta guerra o namás mitolóxica? .... Los griegos d’agora y de siempres nun tienen dubia dala, real como la vida mesma. No que nun se ponen d’alcuerdu ye na fecha ... Eratóstenes ponla nel s. XII e.X. Parum ya Herodoto nel XIII e.X. (dómina del Bronce). La verdá ye que por mor de les escavaciones y del mundu que retrata Homero asemeya más al sieglu VIII e.X (dómina del Fierro).

        Nunca una guerra a la que nun somos datar y hasta quiciabes pudiere nun tener esistío doi tantu que falar... El llegáu que nos dexó Homero na Iliada ye de tala importancia pa la cultura occidental qu’eses <caxigalines> malpenes tienen importancia dala. Asina que nós vamos dala por real y somorguiamos naquel míticu mundu de dioses ya héroes.

        - Zeus, manda enfrescar l’Olimpu porque voi facete una visita. Ta llueu.

        ..Homero ye’l más que probable autor de La Iliada y La Odisea. Magar qu’hai estudiosos qu’aprecien más d’un autor.

                                                        ............................

Los fechos

< Enxamás un caballu doi tantu qué falar >

    Paris, príncipe troyanu, visita Esparta por negocios, la tierra de Menelao. Cuando ve a la so muyer, Helena, queda ablucáu... Aprovechando que’l rei tien de resolver unos asuntos en Creta – enterrar al güelu - el troyanu rapta la rapaza (un apañu como’l de Primo y Alfonso XIII). El rei de Micenas, Agamenón, capu de la zona y hermanu de Menelao aprovecha'l tantu pa declara-y la guerra a Troya. ¿Teníalo falao col hermanu?... Seique non, Helena yera perguapa, pero ... ¿tan guapa como p’ armar la de Troya?... 

        En realidá Troya yera puntu clave nel comerciu ente los mares Egéu y Negru, al traviés del Mármara*. El micenu amesta un poderosu exércitu en comuña colos pequeños reinos de la redolada, mares Xónicu y Exéu, y va escontra Troya.

    * Hai de tener en cuenta que naquella dómina l’entornu de Grecia taba formáu por bayura de pequeños reinos independientes construyíos al rodiu d’una ciudá amurallada. Pa poder sobrevivir precisaben d’un comerciu esterior bien puxante. Esto daba llugar a munchos enfrentamientos como’l que nos ocupa na dómina micénica (1600 -1200 e.X).

        ¿Con quién axunta l’aquéu Agamenón? ... Con pueblos danaos y argivos : Micenas, Salamina, Atenas, Fócide, Rodas, Creta, Etolia, Argos, .....

 Orcómeno, Fócide, Lócrida, Eubea, Atenas, Salamina, Argos, Micenas, Lacedemonia, Pilo, Arcadia, Élide, Duliquio, Cefalonia, Etolia, Creta, Rodas, Sime, Nísiros, el Argos Pelásgico, Fílace, Feras, Metona, Trica, Ormenio, Argisa, Cifo y los

        Troya nun taba sola, tamién aconceya lo suyo : Caria, Zirconia, Amazonas, Etiopía, Frigia, Licia, Mileto, Tracia, Zelea ....

A saberTroya, Adrastea, Álibe, Amazonas, Caria, Ciconia, Colonas, Caucones, Dardania, Etiopía, Frigia, Larisa, Léleges, Licia, Meonia, Mileto, Misia, Paflagonia, Pelasgos, Peonia, Percote, Tracia, Zelea

        .. Neto que nun foi nada fácil acomuñar a tanta xente. Munches disculpes, hasta de los más grandes: Ulises faciéndose’l llocu con un aráu, Aquiles enmazcara de muyer (coses de madre) seique aprovecha’l tantu pa encargar un guah.e cola fía del rei d’Esciro; el chipriota promete la lluna pero, sacante’l Real, manda pal conceyu cincuenta barquinos ... ¡de barru!. Con eso y too Agamenón amiesta más de mil naves ... ¡Probe Troya!

                                                    .. .................

        La paz qu’intentó’l troyanu Antenor - Héctor taba d’alcuerdu - con una llucha ente Paris y Menelao paez que nun interesó. Sicasí aquello fuere una pantomima dao qu’Apolo sacó a Paris de l’amarraza y dende la muralla Páramo firió a Menelao con una flecha cuando diba cantar victoria. ¡Asina qu’a la guerra !.

<¡A la guerra! ¡ A por Troya!>

        Sicasí nun yera nada fácil tomar Troya. Más de nueve años llevaben los aqueos intentándolo poro nun había manera. Durante esti tiempu tuvieron llugar munches engarradielles, dalgunes heroiques ya otres non tanto. Los Dioses tamién tomaron parte na refriega a favor o escontra d’un bandu y dalgunos como Ares camudaben de cuando en vez de partíu (Esti lo que quier ye guerra) . El primeru que cayó foi’l filacéu Protesilao a manes d’Héctor.

        De mano los aqueos lleven les de ganar y tomen la playa. Aquiles mata un fíu de Poseidón (esto va sali-y caru a Ulises) ya otru de Príamo, el llexendariu Troilo. Ulises tamién se venga en Palamedes. Agamenón secuestra a Criseida, la fía d’un sacerdote d’Apolo.

        - O la devuelves o vais tenelo claro con Apolo. Va mandavos una plaga.

        Devolvióla pero entós encapricha de Briseida, un amiga d’Aquiles. Yá tenemos al invictu enfocicáu. So madre, Tetis, que tien mano colos dioses pide a Zeus que castigue a los aqueos. Héctor aprovecha pa escorrelos hasta les naves firiendo a tolos xenerales griegos, sacante Ayax, que-y salieron al pasu. Esti consigue apagar el fueu de les naves cola gabita de Patroclo, l’amigu d’Aquiles. Mientres, l’invictu echando un pitu. Héctor contrataca y da muerte a Patroclo, mazcaritáu d’Aquiles.

        - Bona la ficisti, manín.

<Aquiles arrebollando a Héctor alredor de Troya>

        Aquiles mata a Héctor tres una épica llucha y arrastra’l so cuerpu alredor de Troya hasta qu'el rei Príamo, va pidi-y clemencia pal so fíu na compaña del dios Hermes, el de los pies alaos. ...

        Al quedar los troyanos ensin xefe natural, Héctor, estos corrieron a pidir socorro. Memnon d’Etiopía, que tuviere matao a Antiloco, foi unu d’ellos. La reina de les amazones, Pentesilea, tamién vieno agabitar a Troya magar qu’Aquiles, tres dar cuenta d’ella, termina namoráu de la guerrera.

        - Estos griegos son la monda.

                                                                    .....

<Paris dipara a  Aquiles>

            - Esti Aquiles ye un problema.

    Eso ye lo que piensen los troyanos.

        - Hai que da-y capirote.

        - Nun sé cómo, ye inmortal.

        - Igual non; acuérdate que cuando so madre, Tetis, lu bañare nel ríu Estigia agarrólu por un todiellu y esa parte quedó mortal. L’encargáu de llevalo a cabu fo’l más implicáu, Paris. D’esta miente, amás de defender a Helena, vengaba al so hermanu Héctor y refugaba’l casamientu de Políxena, hermana de so, col mesmu Aquiles.

 L’AMOR nun tien fronteres, y menos p’Aquiles.

        Una flecha de Paris, que dirixó’l mesmu Apolo, acabó cola vida de superhéroe por escelencia, AQUILES ¡Menudos xuegos funerarios celebraron los aqueos!. Nun yera pa menos. ¿Y agora, cómo ganamos esta guerra?...

                                                        .....

        Otru héroe llexendariu foi l’aquéu Ayax que lluchó pola armadura d’Aquiles col cuciu d’Odiseo. Al perder la engarradiella terminó por suicidase. Paris tamién morriere a consecuencia de les fleches d’Heracles (Hércules) qu’unviara Filoctetes.

    Nestos diez años hebo muertos a mamplén . Los dioses auguraron que la guerra nunca nun acabaría sin participar nella Neoptólema, el mesmísimu fíu d’Aquiles.

    Tevo qu’apaecer la gracia divina pa que los aqueos tuvieren una ocurrencia que los diba llevar a la victoria. A Odiseo llegó-y una inspiración :

    -<Construyamos un caballu pergrande de madera pa meter nelli unos cuantos soldaos>.

"Un regalu pa los dioses"

       Dexaren el caballu na playa cerca de la entrada a la ciudá, ficieron como que marchaben y, per aciu d’un engañu, los troyanos metieren el caballu en casa talo si fuere un regalu, una ufrienda pa Atenea.*Los troyanos meten la raposa nel gallineru.

        - Cómo se vos ocurre, troyanos; nun sabéis qu’Atenea nun engarcia con Paris...**

        - Vais tastiar el regalu, dígovoslo yo ... – arrepostia Hera.

            Aquella nueche de lluna prieta los aqueos salieren del caballu, abrieron les puertes de la ciudá y ... armaren <la deTroya> . Pocos troyanos pudieren escapar de l’amarraza. Eneas, el creador de La Eneida foi ún de los pocos ...

    * Otros dicen que’l caballu yera una ufrienda al dios Poseidón, gran amigu de los troyanos. Tien más sentíu.

** Una vez a Paris metieron-y un marrón pistonudu:   

        - Paris, tienes qu’escoyer la más guapa d’estes trés: Hera, Atenea y Afrodita. Esta prometió-y a Helena ...Y París nun duldó, pero Atenea xuró-yla de por vida.

                                                ::::::::::::::::::::::::::::::::::::::::

La Odisea

            < Un camín d’enseñanza, pertenencia, responsabilidá, valentía, enfotu y madurez>, esto ye la <Odisea>.

    El remate de Troya

¡Adiós, Troya del alma! ¡Viva Ítaca!

         Tres la engatada del Caballu los aqueos pudieren entrar na ciudá y <armar la de Troya>. Los homes que nun escaparen foron pasaos a cuchiellu. Les muyeres y los neños tomaos como esclavos. Helena volvió pa casa, qué contentu taba Menelao. Los aqueos repartieren la cacida y tornaron pali-pali pa so casa. Al que nun perdonaren dellos dioses, Poseidón el campeón, foi al gallu la quintana .... Ulises taba percontentu. Por embargu’l dueñu de los mares taba encrespáu dafechu ...

        - Voi dicite yo a ti, mentecatu, pa cuando vas llegar a to casa ... A Penélope va da-y tiempu a ser güela enante qu’arribes tu a Ítaca .

    El vientu emburrió les naves d’Ulises escontra forga...

        - Odiseo, cuido que tamos enfilando Tracia.

        - Sí, esto ye’l puertu d’Ismaro. Tamos na tierra de los cicones.  El xostrón de Poseidón yá entamó a facer de les suyes ...

    Y equí empecipia la ODISEA ....

    Pero esto dexámoslo pa otra entrada; nun queremos aforfugate, collaciu@. Prepárate pa facer una <ODISEA CAMINIANA>, una ruta per Roces col sentimientu n’ ÍTACA y el coral <Ente mazanos>.

                                        ::::::::::::::::::::::::::::::::::::::::::

         «Una Odisea caminiana» : LA RUTA

        .. La nuesa propuesta nun ye otro qu’una caminada pela parroquia de Roces col envís de facer alcordanza del aniciu históricu de la mesma y el so desendolcu haza l’actualidá teniendo mui presente la dómina qu’Alfonso Camín sopelexa na so novela autobiográfica <Entre Manzanos>.

<Ruta  Caminiana>  por Pepe González

        Consideramos que’l nuesu viaxe pue ser una “Odisea” porque vamos entamar con una ruta inédita seique nada nun conocemos de tou eso que nos puea aportar ... ¡Odiseoooo.... Adebecemos por entamar! ...

        Namás nos queda evocar al gran poeta de la nuesa lliteratura pa entamanar col camín:

« Caminante, nun hai camín,

faise’l camín al andar.

Al andar faise’l camín

y al tornar la vista atrás

vese la sienda que nunca

ties de volver a pisar.

Caminante, son tos güelgues

el camín y nada más ».

                                                                :::::::::::::::::::::::::::

                                ANEXU

        Y pa finar una pequeña reseña de los dos verdaderos protagonistes d’esta odisea caminiana: Ulises y Alfonso Camín.

        Ulises .... El Rei d’Ítaca, Odiséu.

< Geronimo Stilton >

        Nun hai evidencia dala de qu’Ulises (Odiséu) esistiere realmente sicasí Homero dexónos esti personax mitolóxicu y llexendariu como protagonista dos poemes épicos, La Iliada y La Odisea, onde los fechos tán ambientaos naquella sociedá micénica na que pudo tener llugar la Guerra de Troya.

        Según la lleenda homérica Ulises yera’l fíu de Laertes Rei de la islla d’Ítaca y dellos territorios anexos. Casáu con Penélope foren los pas de Telémaco, un rapaz que tevo gran importancia na dómina la Guerra de Troya seique nun participare direutamente nella.

        Odiséu yera perconocíu per aquellos llares mediterráneos pola so perclara intelixencia, un picu d’oru talo’l de Melquiades Álvarez ya una plasmante astucia. Sicasí la guerra nun-y prestaba un res. Cuando Agamenón vieno buscalu pa formar parte del bloque aquéu féxose’l maula y quixo despistar los emisarios enmazcarándose de llabriegu. Palamedes, otru espabiláu, arrepostió:

        - Ulises, o vienes o’l to guah.e va pagar les consecuencies...

        Nun fixo falta repetilo. Foi ún de los comandantes cabezaleros d’aquella alianza y el ideólogu de la estrataxema definitiva. L’ardiluxu del Caballu de Troya foi cosa suya.

                                            ::::::::::::::::::::::::::::::::::::::::::::::::::::::

                                        Alfonso Camín, el poeta errante

«Averamientu a la figura d’Alfonso Camín »

         Alfonso Camín Meana, el Poeta d’Asturies, nació’l el 12 d’Agostu de 1890 – dómina d’Alfonso XIII – na Peñuca, un requexu del Barriu La Nozaleda de la parroquia de Roces (Xixón). El so llar, una casuca xornalera, taba abellugada pol Turruxón de Veriña o Menéndez Valdés y regada pola célebre Fonte de La Peñuca.

         Los Camín-Meana yeren una familia mui probe. So padre, Manuel, trabayaba na Fábrica d’Aceros de Moreda y al empar yera canteru nos caleros de la contorna. So madre, Maximina (pequeñina y galana), curiaba de casa y familia, trabayaba la güerta y daba clases de costura a les moces de la vecindá.

        Cuando Fonso tenía cinco años viéronse obligaos a camudar de residencia pasando a vivir colos güelos maternos a La Braña, na fastera La Perdiz, yá cayendo sobro Granda. Na llanera de La Braña vivía so güela paterna, María Lozano, vilba de Pepe Camín, otru dexaragáu de la cantera.

        Fonso entró en contautu col saber na escuela del pueblu, nel centru de Roces, al par de La Carbayera que miraba de revisgu a la Ilesia. Nun sacó muncho provechu por mor del tarrecimientu a la vara de Moisés que sopelexaba’l Maestru y a la necesidá d’agabitar coles xeres de casa. Tamién pasó peles escueles de Contrueces y Granda al empar que trabayaba – dende los 11 años – nes canteres de la rodiada. Nun sacó provechu dalu d’aquelles lleiciones sacrosantes sacante l’amor a la llectura, que siempres llevó por bandera y que terminó siendo’l so <gagne pain>, la so manera d’interpretar la vida.

        A los 15 años embarca pa L’Habana – entama la so Odisea - onde trabaya no que pinta: tienda de ropa, inxenios azucareros o de tabacos … Pasa por reporteru del periódicu <La Marina>, abre una editorial, vendi llibros – sobremanera los suyos – pela Islla de Cuba asina como per Santo Domingo y Puerto Rico. Visita hospital - fiebres caribeñes – y cárcel en delles ocasiones porque nun atolena la tiranía. A los 23 años (1913) espubliza la so ópera prima «Adelfas», un poemariu col qu’entama’l camín del Olimpu («Sentíu del ritmu y capacidá comunicativa») . Tamién en 1915 funda la revista «Apolo», cuasi nada, Fonsín, vas llanzáu … En 1929 funda la revista «Norte» que tien de dura-y de por vida. Nella fala de contino de los indianos y d’otros emigrantes, asina como de les visites que fai a Roces (D’esti paraísu nunca nun ye quien a escaecese, nin lo pretende)

        Pue considerase’l precursor de la poesía afro-cubana. Con aquella vida al debalu percorriendo tola islla «ente basa, palmeres y bohíos algama la síntesis de los elementos raciales, llingüísticos, folklóricos y sociales que son el guañu de la Poesía afro-antillana»*. Con «Macorina» sube a los altares « de los angelitos negros»:

« Venti años y ente palmeres.

Los cuerpos talo banderes.

Nueche, guateque y danzón.

La orquesta marcaba un son

de viesca fina y caprina.

Ponme la mano equí, Macorina...»

              Vien a España como reporteru de “La Marina” pa cubrir la Primera Guerra Mundial (1915). Agospia en Madrid pero visita Asturies siempre qu’alcuentra un retayu.

        Torna pa Cuba y vuelve a Madrid ente (1921-29) y tamién más tarde cuando bien a cubrir la <Revolución del 34 n’Asturies> y darréu la nuesa <Guerra Civil (36-39> seique duró bien poco :«Desafeutu al Réxime». Yá ta en Cuba pero vese obligáu a colar pa México, ande pasa trenta años, dedicáu dafechu a la lliteratura; sicasí, ensin camudar del to los hábitos, hasta guerrilleru foi.

        Vive a caballu ente México, Cuba y Madrid dica 1967 cuando torna dafechu a la madre patria – Madrid – apegáu a la so muyer, Doña Carmen Armesto, pasando los caberos años la so vida en Porceyo, dende onde parte a conocer el Parnasu ( ¡Ai!, va sentar na mesa con Apolo mientres siente les Muses analayando sobro l’oráculu de Delfos. Al cabu y al fin va alcontrar el xustu reconocimientu). Yera l’añu 1982; yá entamare la Democracia n’España que polo menos reconoció-y el so granible llabor seique nun lu trató como merecía. ¿Nun tenía drechu a un retiru dignu, un currante, un home que trabayó dende antes de tener usu de razón y qu’algamó los 92 años enaltando Asturies ya encumando la llingua de Cervantes dende Roces a ultramar ? … Que nun yera «periodista de carrera», hai que h.odese. Cuántu mangante ta viviendo «como dios» …

                                :::::::::::::::::::::::::::::::::::::::::::::::::::::::::::::::::::

        ESTIMANCES:

        Queremos amosar el nuesu agradecimientu a estes persones, instituciones, ferramientes informatives talo blog’s, web, .... que tanto nos agabiten. A saber :

.  <A Humanidades.com>.-  <SobreHistoria.com > .-  <Xochitl.net> .- < Puzzle Factory>

. A la Wikipedia, esti pozu de sabiduría onde abebentamos de contino.

. Al diccionariu sinónimos de Lluis Alberto Prieto.

. Al escritor de La Peñuca, la xida d’esta Odisea Caminana por "Entre manzanos" ya otres         llectures.

. Al Club de Lectura Portal Socio: "Una travesía hacia la redención".

        A los autores d'estos títulos: 

. <Las aventuras de Ulises> de Gerónimo Stilton.  

. "La guerra que mató a Aquiles" de Caroline Alexander (J.M.A-F) 

. EL SENDERO DE LOS MITOS <ANAYA> (Aquiles, Helena,Ulises)

. La fabulosa historia de Ulises <ONIRO> : B. Coppin y A. Ronzon (A.M. Risco)

. Mª Pilar Galán G. : <Ulises y Penélope>. ¡Qué guapo, ne!

                                                                                                                                                                                         ::::::::::::::::::::::::::   VA SIGUIR, EH !  :::::::::::::::::::::::::::::::::::

            La segunda o les segundes partes  de < OTRA  VUELTA  a  ÍTACA > tán nel tinteru ... Nun te les pierdas ...