OTRA VUELTA a ÍTACA (5): El CANCIU les SERENES
OTRA VUELTA a ÍTACA (5) : Les SERENES. ESCILA y CARIBDIS. La islla del Sol
 |
| < Les Serenes voladores > |
. El Bardu:
Munches foron les almes de los personaxes que desfilaron ente los güeyos d’Ulises y los collacios itacenses: l’adevín Tiresias, la so propia madre Anticlea, Aquiles, el más grande de los héroes griegos, el poderosu Ayax, el cobiciosu Agamenón, el cazador Orión, el famientu Tártalu, l’ incansable Sísifo .... Imposible calcular l’infinitu númberu d’almes en pena que percorríen el tenebrosu Hades colos sos ablayantes llamentos .... ¡Qué ganes de colar, manín! .... Soltaron amarres, levaron ancles, axeitaron veles al vientu y dieron remos a estazón ....
- ¡Adiós, solombres del Avernu! ¡Queremos ver la lluz!
Encartiaron el vientu d’occidente y retorniaron talo golondrines dica la peselbera de Circe.
Tres dar entierru al festivu Elpénor* celebraron la llegada con una pitanza al estilu griegu**. Aquello nun tenía pinta d'acabar... Hasta Circe los tuvo qu’emburriar pa retomar el remu:
- Tira p’allá, Ulises; son munchos los peligros que t’esperen. Fai alcordanza de tolo que te tengo dicho: les serenes, los bufones ...
........................................
* Elpénor: Yera un mozacu de la tripulación d’Ulises que nun pudo baxar al Hades porque na fiesta de Circe sopló lo que nun ta nos escritos y tevo la mala suerte de degolar del teyáu ... Coses perdonables a un bon marín. Sicasí tevo los sos funerales y hasta quedó a postoriu n’un guapu túmulu. - Kali anápaflisi (Bon descansu, collaciu).
 |
| ¿Gustes, amada Circe? (comidayaficiones.com) |
** Una pitanza griega: Pudo ser dalgo pol estilu ...
De mano unos entrantes (Mecedes) a base de yogur, pepinu, ayu ya eneldu. Darréu una ensalada griega (Choriatiki) que nun s’estrema demasiao de lo que conocemos per Roces; siempres con quesu feta y aceite d’oliva, muncha berenxena, aceitunes ya espinaca.
Y pasando a mayores yá vien el suvlaki, o carne asao tipu kebab con salsa tzatziki. Mientres llega’l pulpu a la parrilla con gambes frites van pinchando unes albóndigues griegues (keftedes) con yogur [los yogures griegos que nun falten, please]. Dalgún hasta pidió pastitsio, que ya pues suponer que son macarrones gratinaos con carne picao ... Naide nun pasó del galaktoboureko o pastel de crema envolubrao n’ una masa de filu. [Nun se tuvieren inventao les casadielles, menos mal, otramiente ¿quién baxa al Hades?].
................................
El canciu les serenes (8)
Avezáu al candor de Circe, cola que pasare un añu sabáticu, de sópitu Ulises sentíase perdíu:
 |
| ¡Adiós, Ulises; que se cumpla'l to destín! |
- Nun tengas mieu, mio cativín; tienes fuercia y picardía a esgaya pa salir de cualesquier enguedeyu. Cuentes amás con tolo qu’aprendisti nel Hades y la bayura conseyos que te vengo dao. ¡Vete yá, y que se cumpla’l to destín!.
Y nun pudiendo caltener el llantu ella mesma convirtió nun mar de llárimes; nada imposible, per otra parte, teniendo en cuenta los sos máxicos poderes. El caberu abrazu bastó pa tener un home más seguru y col espíritu remocicáu yá va dispuestu a llanzase a l’aventura....
Bien alvertíu pola maga zarpó al compás d’una sele brisina, l’últimu regalu de Circe. Metanes aquella calma entamaron a sentir una sele musiquina que provenía d’una cercana islla flotante y florida. Un dulce canciu tiraba de la nave talo’l filu d’Ariadna ... Aquel dulzor yera l’imán qu’atrayía los marinos que quedaben engatusaos naquel dédalu de sopranos y contraltos.
- ¡Alto, remeros! ¡ Arriái les veles!
Ulises decatóse nel intre del peligru y mandó taponar con cera los oyíos de los marinos y que darréu lu amarren a elli al palu mayor. Bien sabía que se trataba de les tarrecibles serenes voladores que t’atrapaben los marinos con los sos cantos melodiosos.
- Nin se vos ocurra soltame, pase lo que pase, hasta que perdamos les serenes de vista.
D’esta miente nun pudieron saborguiar el candor d’aquelles mezzosoprano, por suerte pa ellos, porque Ulises, que sí quixo sentiles, pasó les d’a quilu al nun poder soltase y esnalar tres d’elles cuando-y xuxuriaben :
.jpg) |
| <Ulises y les serenes> Johns Kaminski |
“ Avérate equí, oh célebre Ulises,
la flor de los bravos guerreros aqueos;
atraca la to nave y escucha los cantos
qu’entonen les belles doncelles del mar
con voces más dulces que’l miel d’un panal.
Nosotres sabemos los fechos de Troya
y tolo que pasa en tierra bonaz ...”
Los remeros, al ver l’ablayu del capitán, punxeron toles del trapu pa salir aína d’aquel enguedeyu. Nunca nun vieren al xefe berrar d’aquella manera; nun ye d’estrañar, tener a mano una ópera de la Callas y tener que colar ....
Escila y Caribdis (9)
.webp) |
< Escila y Caribdis > (pintirest.com) |
Sicasí l’allegría dura poco en casa’l probe. Nun-yos dio tiempu a alendar y yá teníen enriba, mediu atapaos pola niebla y el vapor de les foles, dos peñones prietos, dos cancerberos hercúleos qu’ensamblaben coles nubes dexando un pasu bien estrechu qu’asemeyaba un regatu de monte. Nesi intre aprució a la manzorga un remolín que tragaba l’agua y tou l’alredor y que poco dempués escupía en forma de chorru ferviente, un surtidor que xiblaba haza’l cielu talo un bufón ...
- Yá tenemos equí a Caribdis, la tarrecible fía de la titánide Gea y el cafiante Poseidón !!
- Sí, esti puñeteru nun piensa abandonamos en tol viaxe! ¡¡¡ Qué peste!!!
Por pura intuición empobinaren la mirada a la mandrecha. Una cueva, talo les fauces d’un xigante, dibuxaba la base d’aquel turruxón ciclopeu. De sópitu, seis culiebres, fuertemente dentaes, remanecieren d’ente les foles. Col refluxu la marea aquel monstruu marín amosó’l so cuerpu: un troncu de muyer con cola de pez y seis apéndices serpentinos que rematen en cabeces de perru col dentame más afiláu qu’un llobu.
 |
| ¡¡¡¡ Escila non !!! |
- ¡¡¡ Escilaaaaa !!! ¡¡Remeros, averáivos al cantil de mandrecha tolo que podáis!!
- Pero capitán, ehí tán los tentáculos d’Escila!!
- Hai que intentalo, pol bufón nun tenemos denguna posibilidá; del mal, el menos.
Ulises yá sabía que diba perder dellos homes pero nun tenía otra. Y asina foi, mientres unos remeros espardíen hasta la cabera gota de sudu otros seis, menos afortunaos, glayaron por última vez nel Estrechu de Mesina. Yera’l portazgu que cobraba Escila.
Cuando llegaron a mar abierto los marinos itacenses cayeron esbarrumbaos sobro los bancos remeros. Remanecieron abangaos durante un bon trechu hasta qu’entamaron a sentir el balíu d’unes oveyes y los bramíos d’algunes vaques ... Taben arribando a la tarmuda y soleyera islla de Trinacia (Sicilia). *
*Trinacia o Triskele:Ye’l nome antiguu de Sicilia que-y vien de les trés puntes o cabos que la identifiquen: Peloro, Marsala y Passero. Nel so escudu y bandera apaez Medusa con trés piernes flexonaes. Na Odisea d’Homeru sopeléxase como la islla del sol Apolo, al cuidu d’ Helios.
Na
islla del Sol (10) Les vaques d'Apolu
- A la fin vamos poder aselar naquella islla tan prestosa.
 |
| ¡Tengo una vaca llecheraaa!! |
Ulises torció’l focicu al facer alcordanza de los conseyos de Tiresias y hasta de la mesma Circe: «Nin mientes aprovechate de les vaques de la Islla del Sol, son propiedá esclusiva d’Apolo».
- Nun sé si va ser bona idea parar equí a descansar, collacios ...
- Nun podemos más, capitán- glaya Euríloco. - Nun somos a dar pasu ...Ye de recibu aselar unos díes...
- Val; pero, por favor, nun se vos ocurra tocar una vaca ...
Desembarcaron los marinos llocos de contentos n’una ensenada de la islla ya axeitaron una bona llacuada coles provisiones de Circe. Cuando taben roncando a pata suelta a Zeus ocúrrese-y desencadenar una tormenta d’eses que faen época. Nun quedó otra que guarecese, con nave y too, n’un covarón onde danzaben les ninfes que taben a cargu del ganao del Sol Apolo. Más a gustu nun podíen tar los marinos pero aquella boriada nun acababa de pasar ... Díes y díes de serenata mientres les provisiones diben llegando al so fin ...
- Nun podemos cazar nin munchu menos salir a pescar; vamos tener qu’echar mano d’alguna d’estes vaques, Zeus va tener qu’atolenar.
- Aguardái un poquiñín, voi intername na islla y buscar un santuariu pa rogar a los dioses...
Salió Ulises escopetáu en busca d’un oráculu o daqué asemeyao. Dalgo tuvo alcontrao porque echó’l so tiempu en regresar... Rezar, rezó, pero claro que col agotamientu quedó ellí consoñentu más tiempu del que cupiere esperar. A midida que diba averándose al campamentu foi sintiendo un golorín que-y resultaba bien conocíu :
- Madiós, que m’aspen si esti arrecendor nun ye por mor d’una xatina culona...
- Siéntolo abondo, capitán – disculpa Euríloco. Nun yera plan de morrer de fame, tu nun acababes de llegar ...
- Bono, el mal ta fechu, que seya lo que Sol quiera.
Calmó la tormenta. Paró’l
vientu. Aprució’l sol y la embravecida flota itacense ponse en
camín .... Yá tán n’alta mar... ¿Sería comprensible Apolo
colos héroes de Troya? ... ¿Escaecería por un momentu Poseidón
los bravos marinos itacenses? ..... Colos DIOSES venimos de topar ...
.................................::::::::::::::::::..................
Nel Ítaca
Na mesa la esquina del fondu dos platicantes embaecíos nes sos histories malpenes son a decatase del baturizu chigreru. Nun ye d’estrañar, tán faciendo alcordanza de les epopeyes homériques.
- ¿Nun crees que ye hora qu’asele un poco y me cuentes tu daqué?
- Qué quies que te diga, nin ... ¡Toi pasándolo tan bien!. Non tolos díes pue ún baxar al Hades, enfrentar unes serenes o escapar del atropamientu d’un bufón ... De les fauces d’Escila val nin alcordase...
- Nin t’imaxines l’ apavoriu que sentí cuando acolumbré les cabeces del monstruu... ¿ Y tu, rocesu, ónde lo tuvieres dexao? ... ¿Tabes baxando La Carbonera, non?
- Vaya memorión que tienes, gallu... Sí, tábemos pel barriu La Ilesia onde visitáremos el Palaciu del almirante don Pedru Valdés. Pos mira, frente la Ilesia, a la otra vera la carretera, tenemos la mítica Carbayera...
...........................:::::::::::::::::::::................................
. La Carbayera (9)
|
|
< La CARBAYERA, nel campu La Ilesia> |
Cuido qu’ún de los finxos cabezaleros d’esta <Ruta Caminiana> ye esti núcléu d’Ilesia-CARBAYERA. N’aquella dómina la Ilesia marcaba les pautes de comportamientu d’aquella sociedá clasista siendo La Carbayera’l contrapuntu d’aquel “fervor” eclesiásticu seique esta mirase <de revisgu> aquella. Equí celebrábense toles fiestes del pueblu y yera un llugar d’alcuentru pa la mocedá de Roces. Si vas a la Ilesia, pases pela Carbayera; si vas pa Siero o pal Recuestu, pases pela Carbayera y hasta pa dir a Escuela ties de pasar pela Carbayera.
El celebérrimu "Carbayón de Valentín " (Tinéu) [vivirasturias] |
[« El carbayu (Quercus robur L) ye un árbol planicaducifoliu, monóicu (flores machu y fema nel mesmu pie), de groma ovoide y globoso que pue algamar hasta los 40 metros d’altor. De madera duro (robur) y corteya escuro que fiende llonxitudinalmente cola vieyera. Fueya simple, alterno y col marxe lobuláu y cuasi sésil (ensin peciolu). Flores unisexuales de tamañu reducíu con cinco sépalos pequeños; les masculines preséntense n’amentos llargos y ramificaos mentanto les femenines asitien, solitaries, na base los amentos. Mercé a una polinización entomógama (per aciu d’inseutos) florez ente Abril y Xunu frutiando nos entamos de la Seronda. El frutu ye una llande nomada abeyota – rica n’hidratos de carbonu- petite de munchos animales: gochos, esguiles, xabalinos, …. Abenayá tamién foi emplegada polos humanos iguando una fariña mui amañosa pa daqué.
La madera del carbayu (roble), dura y donda de trabayar, foi y ye, peremplegada a la llargo de la historia, lo mesmo pa barcos, cases ya horros, preseos de llabranza o muebles de munchu aquel.
El carbayu ye mui lligón y por eso enllacia fácil con otros árboles de la mesma especie Quercus, tou queda en familia.
EL carbayu ye una especie de clima atlánticu mui presente n’Europa sacante’l Mediterraneu. Nun-y presta andar solu por eso s’amuesa en viesques con otros árboles caducifolios. N’Asturies ta como nel Paraísu sobre manera ente 600/700 m/a magar que la urbanización ye un enemigu acérrime; cuido que por eso tiense desaniciao na Carbayera de Roces.]
NOTA: Estes coses de los àrboles sácoles del llibru “Guía de los árboles d’Asturies” de Bertu Ordiales y Guille C. Ruíz. Nun canso de davos les gracies, MAyESTROS.
Anguaño La Carbayera ye un Área Recreativa- Parque Infantil con unos cuantos árboles p’asolombrar un poco’l campu. De mano quedé varáu porque lo te tenía delantre mío yeren tilos y pláganos ... Pero ensiguida vini a decatame qu’había dellos carbayos, inclusive tuviérense plantao de recién un par de docenes col enfotu de recuperar l’antigua Carbayera. ¡Bien pol Ayuntamientu!… N’ún requexu, mirando a La Carbonera y desafiando a la ilesia, sopelexa un monolitu n’homenaxe a Alfonso Camín que tien grabada na piedra la so canción a <Cuadonga>. Vamos caltener el sonetu tal como elli nos lu tresmitiere, en castellán:
 |
La Virxe de Cuadonga amiya en Roces |
"Covadonga"
Desde el alto peñón baja el torrente
y ora es manto de espuma en el vacío,
ora un collar que se nos fue en rocío,
ora epopeya de tambor batiente.
Llega hasta abajo, se transforma en fuente;
va mas abajo, se transforma en río;
más abajo, un clamor, un vocerío
de alguien que lucha con extraña gente.
Voz que en el viento su vigor prolonga,
de pastor en pastor, de braña en braña,
ruge en Onis y repercute en Ponga.
¡Es la voz de Pelayo en la montaña,
que empieza resonando en Covadonga
y acaba resonando en toda España!
¡Viva la madre que te parió, Fonso!
……………………………...
 |
| La mítica CARBAYERA mira de frente a la ILESIA de San Xulián (el Soldáu) |
Nesta Carbayera de Roces tien pasao lo suyo Alfonso Camín cuando yera guah.e, la rocea colos Pirolo, que determinaren el rumbu la so vida. Cuento ….. (Métome na pelleya Fonso):
. Tando un día na Carbayera ballando con una mocina siento un emburrión nel llombu y caigo de focicu …
- ¿Qué carah.o te pasa a ti, Pirolo? ¿ A qué bien esto?
- A nada, ye que me caes gordu …
- Agora verás, zamploñu.- Nun esperé más, tiréme a elli y de la farta palos que-y solmené quedó talo un “Ecce Homo”.
Esi día, pa tornar a casa, tuvi de dar un rodéu por si la banda del Rata venía por mi.
Pero la cosa nun paró ehí:
- Ten curiao, Fonso; qu’esos vienen a por ti.
 |
| Escuela antigua de Roces |
Dambos díbemos a la Escuela Nocturna de Roces, un bon sitiu pa entamar un duelu na pequeña viesca de la redolada. Por si acasu entré na Escuela con un cayáu escondíu nel pantalón.
- Poli, Sidro; pase lo que pase nun vos metáis, esto ye cosa ente homes.
Yá dientro la escuela pasa’l Rata a la mio vera y sóplame a la oreya:
- Tenemos qu’arreglar cuentes.
- Eso, fuera; tamos na Escuela.
- Voi buscate.
- Vas alcontrame.
Poli avérase a mi:
- Curiao con esti, que va a les males. ¿Lleves arma?
- Llévola.
Salimos cerca de la medianueche. La lluna diba amosándose nes entenes de la viesca que cubre’l camín que va de la Escuela hasta los chigres de Sabel de Sidro y Pepe La Llana. El Rata glayaba :
- Güei va haber quimera. ¿Ónde tas, fíu de TAL?
- ¡Equí!. – Y apruciendo de la solombra solmené-y un garrotazu que quedó espanzurriáu dafechu. Pero llevantó, el puñeteru, y sentí la chaira:
- ¡ Ris, ras!
- ¡Ris, ras!.- Perdí la cuenta de los estacazos y navayazos que-y tengo dao. Tuvieron que quitame d’enriba, otramiente nun lo cuenta.
 |
< El "Reina Mª Cristina" arribando al Morru L'Habana> Alfonso Camín tenía billete. ¡Adiós, Fonsín! |
Vieno la Guardia Civil. Yo siguía ellí, garrote en mano, seique la de <siete muelles> encargóse Poli d’escondela. Quedé deteníu, entrín y non el Pirolo diba camín del hospital nel carru d’Antón de Xica.
- ¿Manolo Meana?
- ¡A la orde!
- El rapaz quéda-y en depósitu hasta que lo determine’l Xuez. Ye menor d’edá.
Salí llibre d’aquella por mor de les 50 pesetes que pagó de multa’l mio tíu Blasín .
- Sí, señor; ficisti bien. Tu tienes el sangre de los Meana. ¡Viva la madre que te parió!
Pero los míos pas nun pensaben igual:
- Valnos más mándalu pa Cuba, col so tíu; equí nun doi un duru por él.
El 5 de Setiembre de 1905 – tenía 15 años – embarcó pa Cuba nel Reina María Cristina. El 4 d’Ochobre acolumbraba El Morru del puertu de L’Habana. El Paraísu de La Braña daba pasu a l’aventura del <Poeta errante>. »
::::::::::::::::::::::::::::::::::::::::::::::::::::::::::::::
. Nel ÍTACA
Camín del Amor: Calipso
- Oi, ho; nun me dexes col miel nos llabios. ¿Cómo saliestis d’aquella islla del Sol?
 |
| Aldericando nel Ítaca |
- Malamente, manín, malamán. De mano mui guapo; sol, brisina y bona harmonía pero yá n’alta mar entama zarrase’l cielu y aprucen unes nubes prietes como l’ acebache. Nun santiamén el firmamentu entra en guerra cola Tierra ya unos truenos apavoriantes samblen voltiar el mundu; nin les ordes soi pa tresmitir. Abre’l cielu ya un rayu espelurciante precede al diluviu universal. De sutrucu vémonos envolubraos por unes foles escomanaes que terminen por dar vuelta a la embarcación....
- ¿Y cómo salistis d’esa, griegu?
- ¡¿Salimos?! .... Nun salimos, non, señor. Los collacios foron esmuciendo ún tres d’otru hasta que namás quedé yo ...
- ¡¡¿Toos?!!...
- Toos.... El bufón Caribdis tuvo cebera pa una bona temporada.- Al facer alcordanza Ulises cai dafechu nun ablayu de lo más frustrante.
- ¿Y tu cómo t’arreglasti? ...
 |
| ¡Atenea, échame un gabitu! |
- Como pudi. Dempués de tar batíu por aquelles espantibles foles pudi a la fin abrazame al mástil del barcu qu’andaba navegando al debalu. Y nun foi solo eso... Aquella mar encrespada diba arriostrándome, pasu ente pasu, al algame de Caribdis; yá te pues imaxinar la pavura que diba sintiendo a midida que m’averaba al remolín... L’últimu pensamientu foi miagar a la mio diosa Atenea ... Una fola salvadora vieno a socorreme dexándome a tresmano del campu gravitatoriu del terbolín ... Cuando pudi llevantar la tiesta entá alcancé ver como Caribdis fagocitaba la embarcación asina como los mios caberos collacios.
- Ansí que quedasti solu metanos la tempestá ...
- Nun soi aldovinar les hores que pasé encadenáu a aquel mástil milagrosu ... Cuido que llegué a perder la consciencia....
- Por suerte pa ti. ¿Ónde recobrasti‘l conocimientu?...
- Como cuasi siempres n’una playa prodixosa yá Camín del Amor .... Pero esti ye otru cantar; agora tócate a ti cuntar....¿Ónde lo tuviéremos dexao, rocesu?...
- Baxando La Carbayera onde vamos alcontrar la posesión más granible de Roces en tiempos del nuesu POETA ERRANTE, la Flor de Lis.
.............:::::::::::::::::::::::::::::::.................
La Flor de Lis (10)
 |
| < Flor de Lis>, na Nozaleda (Fábrica de Muebles) |
|
|
Dexamos esti nucleu máxicu de la Ilesia-Carbayera y siguimos caleyando dica’l norte per aciu d’una moderna ponte que sobrovuela la Ronda Sur (Autopista del Cantábricu) y fiende al mediu la parroquia de Roces,¡ag!. Tou sía por un futuru meyor. Ablucaos sobro la ponte azul facemos alcordanza de lo qu’esta regaya tiennos arramplao: La Escuela de Neños, el Chigre-Estancu de Sabel de Sidro que más tarde va convertise nel Merenderu La Parra . Tres cruciar la ponte una casina a mandrecha tráenos n’alcordanza lo que fuere la Tiendina de Julia y a manzorga queremos acolumbrar el Llavaderu, pero esti tienlu zampao tamién la Ronda Sur. Faciendo esquina, a manzorga, alcontramos anguaño los Almacenes de FRUASA*.
GRUPU
FRUASA*, Ye un conxuntu d’empreses creáu na dómina de los
sesenta, que se dediquen a la collecha
,
distribución y tresporte de frutes y verdures.
Las
estremaes empreses que formen el GRUPU tán asitiaes en diferentes
comunidaes autónomes ( Asturies, Galicia, Castiella y Lleón,
Andalucia y Cataluña). Estes empreses productores tamién dediquen
parte de la so produición a otros tipos de clientes.
Pali pali ...Yá algamamos a lo que fuere otru finxu neurálxicu de la parroquia, la Cruz de Carreteres : Carretera de la Carbonera cola Carretera del Obispu.
- Hola, Lupe; ¿quies qu’echemos un bailucu en Ca Pacorro?
- Val, pero dientro, ¿eh?; que fuera dame aquello …
Na redolada de la Cruz de Carreteres, del que Camín fala davezu, hai delles coses a les que faer referencia:
. El chigre-estanco de Pepe la Llana, onde’l cura D. Ceferino – manes perdíes na sotana y bonete de cuatro picos - xugaba la partía toles tardes, y que tiempu depués pasó a ser el merenderu Casa Pacorro, perconocíu pol baille de los domingos. Cuántos amores surdieron equí na dómina de los 60/70 del sieglu pasáu.
El chigre de "Pepe La Llana", más tarde <Casa Pacorro> |
.Tres de Ca Pacorro anguaño afáyense les instalaciones de EMULSA y El Parque de Bomberos:
- EMULSA ye una empresa pública que xestiona la llimpieza urbana, el reciclaxe, la señalización y el mantenimientu de les zones verdes de Xixón. Ye de reconocer el so gran trabayu. Gracies.
- El PARQUE BOMBEROS ta asitiáu na Carretera Carbonera, al llau de EMULSA, magar que yá se tea planificando la construición d’unu nuevu , bien cerquina d’esti, xusto enfrente de FRUASA. El Serviciu d’Incendios de Xixón tiense creao oficialmente en 1890. De mano acupaba un pequeñu recintu na Cai Capua pero tamién pasó por Hermanos Felgueroso hasta llegar a Roces, onde va quedar por munchu tiempu. Non solo s’ocupa d’apagar incendios sicasí desendolca otres actividaes: Salvamentu a persones o situaciones en cualesquier tipu de riesgu.
………………………...
. Na finca L’Azotada, faciendo esquina, taba daquella’l cuartel de la Guardia Civil de Roces que dalgo más tarde sería la finca Los Madrera y anguaño la urbanización “Los Pedregales”. …………..
Al llau de FRUASA , na mesma Carretera del Obispu, alcontramos una verdadera casona: La Flor de Lis, que n’actualidá ye una fábrica de muebles. Na dómina de Camín yera la quinta más bultable de Roces; eso nos diz el poeta:
« La Quinta del Barón de Rubianes, la meyor posesión de Roces, arreciende a llimoneros y a naranxos, a hortensies ya otres flores que medren soles, xunto los horros aldeanos»
FLOR de LIS.
Quinta del Barón de Rubianes
. La quinta del Barón de Rubianes yera daquella – tiempos de Camín - la posesión más bultable de Roces. Arredendía a flor d’azar de llimoneros y naranxos asina como a otres flores que davezu nun fai falta nin plantales : romeru, tomillu, lloréu, yerbabona ya carrizu.
El Barón atalantaba ser bastante estrañu. Cuenten que yera albinu y nun podía ver el sol, de manera tala que pa pasar d’un llau a otru de la finca fizo construyir un tùnel soterrañu y d’esta miente nun lu amburara’l sol.
Esti llinaxe, d’ascendencia holandesa, perteneció dende la dómina los Reis Católicos a la Marina de Guerra Española, y nun debíen ser mui malos porque tuvieren toos cargaos de títulos y medalles a mamplén. Dicen qu’esti caberu barón yera amás un espertu en botánica marina ya un gran filósofu; tenía más llibros en casa que mazanes na panera. Vete tu a saber ....
…………………
. Un pelín más abaxo alcontramos la Sidrería Gancedo, célebre d’antiguo poles sos partíes de bolos, amás de la sidra. Cuatro pasos más y arribamos a Casa Ferino, pa la xente de <pico fino>. Si quies xintar equí llama con tiempu, suel tar acorrompinao, por dalgo será... ::::::::::::::::::::::::::::::::::::::::::::::::
La NOZALEDA (11)
Bueno, bueno …. Como nun ye plan de dir tovía a Casa Ferino vamos siguir cola RUTA CAMINIANA. Per una caleyuca asfaltada, ¿300 m?, vamos tirar a manzorga camín de La Nozaleda, otru finxu importante na infancia de Fonsín. A manzorga l’alta muria de Flor de Lis y a mandrecha, tres d’un bardial, los Bomberos ya EMULSA.
Un pequeñu parque – Parque La Nozaleda – tráenos n’alcordanza los primeros pasos del Poeta d’Asturies pel Barriu La Nozaleda.
« Na Nozaleda xugábase a los bolos ya otru xuegu conocíu como la llave»
Años más tarde, y pa matar el rixu los bolos, Fonso ya un amigu ficieron una bolera con unes estaques, seique les boles yeren más bien cuadraes (tantu meyor pa facer les cuatriaes).
LA BOLERA …. Les NORMES de la CUATREADA
..Por suerte ye ún de los xuegos que se caltién n’activu magar que nun ta tolo espardíu que dalgunos quixéremos.
Hai delles modalidaes pero la más común ye “la cuatreada”. Bueno ... (tán cantándome los oyíos)
, « Nueve bolos iguales, más un pequeñín nomáu biche, tán asitiaos simétricamente nun castru que ye una superficie casi circular marcada por unes alambres. Trátase de tirar con una bola de madera’l mayor númberu posible de bolos pero con ciertes regles que nos va dictando’l biche; esti ye’l que marca la forma de tirar: “pal pulgar”, cuando’l biche lu tienes a mandrecha y pa “la mano” si’l biche ta a manzorga; non por tirar más bolos faes más tantos.
Ye un xuegu d’habilidá y de cierta picardía.
…………………….
Nuna pequeña llomba de La Nozaleda, conocida anguaño como la “Cai Corrida”, vivía’l “Llocu Muñiz”. Un señardosu de Cuba que clamiaba, puños zarraos, escontra Xixón y la mar llonxana.
«Los guaḥes al pasar pa Escuela tirábemos-y piedres a los noceos del so güertu, coles muergos enteabiertos, y cuando aprucía l’ indianu dábemos les fusties banciando como llocos el maletu pero coles boines acorrompinaes »
- ¡Ehí vien el Llocu Muñiz! .- Magar que nunca nun pasare nada; de llocu tenía menos que’l Quixote pero taba señardosu por mor d’aquella Habana dulcinea de la so mocedá.
……………
El nocéu (Juglans regia L-) ye una planta mesófila (nin fríu nin calor) cultivada dende abenayá na península Ibérica y que n’Asturies alcontró’l Paradisu por mor a los nuesos terrenos sueltos, llentos (húmedos), eutrofos (ricos en bases) y descarbonataos: La Nozaleda, Nozalín, Nocéu, La Nozal, Nogueira, El Nozalón, Los Nozalinos, El Nozalucu, Los Nozalinos, La Ñozaleda, El Nocíu, ….. La Nozal ye un árbol planicadufoliu, monóicu (flores machu y fema nel mesmu pie) d’ente 15/25 m.a. Tien la groma (picalina) amplio y arredondiao y la corteya buxo (gris pálido) con munches fendedures. Les sos arumoses fueyes son alternes, compuestes y paripinnaes de foliolos elípticos y glabros (ensin pelusa).
 |
Juglans regia (Nocéu) |
Muncha xente emplegaba les fueyes pa curar les firíes dérmiques o pa tresnar ferviatos escontra les enfermedaes de la piel. Flores machu n’amentos péndulos, solitarios y allargaos mientres les femenines preséntense n’amentos de pequeños grupos sobro les cañes del mesmu añu. Florez na primavera y poliniza per aciu de los inseutos (p. entomófila). El frutu, una ñuez comestible, ye una grupa globosa ya aceitosa protexía por un cascu marrón que a la so vez vien envuelta por una corteya carnoso que nomamos muerga , caceyu o berriu (verriu). Al conxuntu de la ñuez más la muerga suel nomase-y muergu.
- A ver les manes, quiero ver les que tán pintaes de berriaca ...-Probes guah.es, esi verdín nun hai cristu que lo quite.
Coles ñueces – y ablanes – ígüense n’Asturies ún de los duces más estimaos que se conocen: les casadielles. Los asturianos pa entrar nel Paradisu nun tienen qu’apurri-y a San Pedru un óbulu talo a Caronte, seique media docena de casadielles faen un efeutu máxicu.
La madera ye perapreciao n’ebanistería asina como pa facer preseos agrícoles (mangos, estiles, gaxapos, madreñes llixeres,…).
Cuenta’l Bardu de Roces:
« Na Nozaleda tamién había unes cuantes figares que daben los figos moraos y de los que nun soi a escaeceme»
::::::::::::::::::::::::::::::::::::
Nel ÍTACA
 |
| - Va siendo hora de tomar la espuela ... |
Los nuesos protagonistes, Ulises y el so Alter Ego, van amosando’l cansanciu de tantes aventures, seique namás sía de poneles n’alcordanza. Ye preciso tomar un respiru enantes de siguir coles rutes ODISEES.
- ¡Venga un culín de sidra, guah.e !
- Nel intre, amigos bardos.- arrepostia’l camareru.
- Toi arranáu por conocer lo que vos tuviere pasao na ISLLA del AMOR, Odiséu .
- Foron dellos años ....
- ¿Dellos.... ?. Anda que veníes apuráu .... Buenu, ¿ y qué enseñances podíemos sacar del mitu les SERENES?...
- El mitu les Serenes Voladores cuido que nos fai una alvertencia sobro los peligros de dexanos engatusar pol candor superficial de les coses o de promeses rellumantes faciendo alcordanza de la fina llinia ente’l conocimientu que llibera y el conocimientu que destrúi, y cómo eso qu’aparenta ser tan guapo pue esconder un destín fatal.
- Diríamos que bien a ser una lleición atemporal al rodiu la naturaleza humano y les sos debilidaes énte lo irresistible.
- Yá te digo. Bien pudi comprobalo cuando aterricé na Islla de Calipso. Pero va ser otru día, rocesu, güei toi matáu; nueve díes al debalu les foles del Mediterráneu....
Tres tomar la espuela unvíen un saludu a Atenea y van despidiéndose hasta’l próximu alcuentru.
.................::::::::: FINAL del finxu Nu. (5) :::::::::::::::::::::::::............
ESTIMANCES
 |
<Ulises y les Serenes Voladores> (Le vent du sud) |
Tengo que dar les más fervientes gracies a dellos escritores asina como a blogs, páxines Web, editoriales, pintores ... Pero enantes de nada voi facer referencia a la IA, esi recursu máxicu, ¿cuasi? divín qu’acabamos de descubrir y pensamos va suponer un antes ya un dempués nel nuesu métodu d’información. ¡ Bien llegada, IA! .
Somos forofos de Pintirest.com . De los pintores Manuel Medina ("Lleición de gaita") y Evarito Valle ("La Quintana") . . Copiamos de <www.etsy.com> - <comidayaficiones.com> .-<<www.haciendosidra.com> .- <www.domusnatura.com>.- <John Kaminski (Stormfrom)> www.tumomentofavorito.com> .- <www.clasicasusal.es> >.- <www.Academia Play.com (Jan Styka)>.- <www.instagram.com (greciafilia).> . <Le vent du sud >).- Wikipedia, onde abebento de cotino, ye un sofitu fundamental pa nós.
Ya unos cuantos Llibros, y más...:
. <Las aventuras de Ulises> de Geronimo Stilton. ¡Un AMOR!.
. <La fabulosa historia de Ulises> de B. Coppin y A. Ronzon
. <Helena y la guerra de Troya>. ANAYA
. <El regreso de Ulises> ANAYA
. < La cólera de Aquiles> ANAYA
. < La guerra que mató a Aquiles> de Caroline Alexander. ¡Norabona!..
. <Naves negras ante Troya> Rosemary Sutcliff . Tengo decidío mercalu.
. < Las aventuras de Ulises> Rosemary Sutcliff. Idem
....................::::::::::::::::::.......................
EL PRÓXIMU POST va entitulase: <OTRA VUELTA a ÍTACA (6): CALIPSO>
.........................................................
