OTRA VUELTA a ÍTACA(6): Y NESTES llegó CALYPSO
 |
| Y NESTES llegó CALYPSO (LINGUISIMO.COM) |
Ulises taba solu. Nun tenía a NADIE.
Los collacios degolaren pola mor de Caribdis. El bufón fuere fagocitando los marinos itacenses ún tres d’otru. La tempestá siguió atacando dellos díes más. Ulises pudo soportar aquella tarrecible tormenta encadenáu a un mástil de la nave. L’héroe griegu hasta llegó a perder el conocimientu pero salvó la vida, tal como taba escrito.
Les foles de la marea alta dexáronlu esvanecíu na sablera d’un islla paradisiaca. La playa diba despertando a modo cola tibia lluz del alba y los cánticos de les gayoleres aves marines que trataben d’alimentase pola mor de la marea .
Y NESTES llegó CALIPSO ....
 |
| Y nestes aprució Calypso |
- ¡Por Zeus, qué ye esto !...Paez un home... Va tar muertu...
Calipso averóse a la bisarma ..... Tentó comprobar si respiraba ...
- ¡Ta vivu!
Xiró-y la tiesta pa tratar d’averiguar si yera daqué conocío.
- ¡Oh, cuido que ye Ulises! Ansí que tengo delantre mío al héroe de Troya .... ¡Ixuxú! .
La ninfa Calipso – hermana de Circe -, la fía del titán* Atlas y la oceánide** Tetis, moraba n’una romántica islla del Mediterraneu ¿occidental? conocida como la mítica Ogigia***. Nesti oníricu llugar ye onde vieno arribar Ulises tres la tremenda torbonada llétrica que desencadenaren los dioses darréu que los marinos itacenses partieron de la islla del Sol.
.........................
NOTES:
*Titán: Los titanes son los poderosos dioses primixenios de la primer xeneración - fíos de Cronos y Gea - y anteriores a los dioses del Olimpu. Yeren 12, seis homes y seis femes.
**Oceánide: Les oceánides son ninfes acuátiques de la mitoloxía griega fíes de los titanes Océano (ríu qu’arrodia la tierra) y Tetis (diosa del mar). D’estes ninfes conócense polo menos trés mil (3000); tela ...
***Ogigia: Esti míticu ya oníricu llugar suel tar representáu por una islla paradisiaca asitiada en ....¿Gozo (Malta)? ...¿ Othonoí (c. Corfú)? ... ¿Perexil (Marruecos)? ... O ... yá metíos nel Atlánticu, como camienten Estrabón y Plutarco, na Islla de Cádiz ... ¡¡¡¿¿¿ Eh...???¡¡¡Conoces daqué más guapo pa pasar unes vacaciones que la Tacita de Plata, Santi Petri o la islla de Lleón? ... Cuido que non.
................................
Namorada
.jfif) |
| Calipso namorada (Rebeca Matte) |
En cuantes Calipso pudo poner nome a aquella esfarrapada figura yá quedó prendada del célebre héroe de Troya dao que la so fantástica lleenda analayaba per tol cosmos Mediterraneu.
- Esti guayabu va ser pa min. Los dioses ansí lo quieren... Voi fer toles del trapu pa qu’Odiséu nun se mueva d’equí ... Yá tien la efímera gloria de los mortales, namás-y falta la eternidá, que ye lo que-y pienso dar yo.
Nel PARAÍSU
Calipso pasaba’l tiempu escuchando les aventures de la boca d’Ulises mientres filaba con una llanzadera d’oru. N’una cova asitiada na entena d’una viesca tenía Calipso la so morada aviada con tou’l lluxu de comodidaes. L’entornu yera exautamente eso, un paradisu, una carbayeda orniada por una gran variedá d’especies : carbayos, pláganos, álamos, umeros ya castaños ... Y sobre manera aquellos tipos onde los dioses taben representaos: La Olivar (Atenea), El Lloréu (Apolo), El Roble (Zeus), El Fresnu (Poseidón), El Salgueru (Perséfone).
La fauna avícola llenaba l’espaciu con los sos atrayentes cantarinos melodiosos. Yera guapo contemplar les gaviotes, al rodiu les meses de l’antoxana, picotiando les migalles que sobraben del amor de los dos tortolinos Ver planiar a los ferres penriba los cantiles o al martín pescador facer l’agostu na ría que bañaba la sablera yera talo un regalu de los dioses.
Sicasí’l verderríos* tamién yera un páxaru que-y trayía n’alcordanza a Ulises los oníricos mares salaos de la so Grecia del alma ... (Mal asuntu pa Calipso ...). El Verderríos representa l'asosiegu, el cuayu y el xacíu; la necesidá de vivir en consonancia cola conciencia.(¡Ai, Calipso!)
* El Verderríos ye’l mesmu páxaru que’l “Martín Pescador” (Alcedo atthis)
 |
"Verderríos" (Martín Pescador) Museobolivariano.org ¡Hola, Ulises; la Patria ta esperándote! |
L’ arume a sándalu y ciprés yera’l complementu perfeutu pa qu’Ulises viviere nun oasis permanente de paz pero él yera un guerreru, un home d’aición, un entamador; aquel asosiegu nun diba pa con él, necesitaba enfrentar, maquinar, urdir trames, solucionar problemes ... o inventalos ... Sicasí aquella bohemia teníalu aparráu; aquella ¿vida? bucólica taba bien pal más p’allá magar que’l más p’acá ye otra cosa... Quería a la inmortal Calipso, hasta tuvo dos fíos cola ninfa - Nausítoo y Nausínoo - sicasí tul día arroz con pitu ...
Señaldá
 |
| ¡Ítaca, Pe, Telemaco! |
Nunca nun hebo nin va haber enxamás una cárcele más prestosa qu’esta de la Islla Calipso. Pero nun hai paz, nin amor, que pueda sustituyir el flaméu d’una vela al aldu del vientu. Cuando Ulises descansaba d’aquella vida llariega yera fácil alcontralu engaramáu nos cantiles o pasiando pel sable cola mirada perdida nel finxu’l cielu tratando de columbrar una nave que lu pudiere tresportar a la Patria: Ítaca, Penélope, Telémaco y los collacios.
 |
| Discutiniu nel Olimpu (iceebook.com) |
Pasaren ¡siete años! como cuentu risa. Pero la señaldá caltrió de tal manera nes coraes del aquéu qu’hasta nel Olimpu recibieren la señal. Atenea foi la primera en decatase qu’aquello nun yera vida pa un héroe.
- Collaci@s, ye preciso qu’echemos un gabitu a Ulises. Lleva siete años d’ enferrona y yá va siendo hora que lu lliberemos d’esta carga .
- ¡¿Carga?!...¡Cuántos quixeren!...- Glayó’l cafiante Poseidón.
- Ye verdá, pero la falta de llibertá ye’l peor de los castigos, inclusive que la muerte.
- Naide nun pue facer tolo que-y apetez, nin tan siquier los dioses; y nós sabémoslo bien. Si por mi fuere esi yá taba dando ortigues va munchu tiempu ... Claro que, gracies a vós....Mirái la vida que lleva.
- Bueno, Poseidón; paezme que yá lo pagó bien, ¿eh?. Apiádate d’elli d’una vez. ¿Y tu qué pienses, Zeus?, que pa eso yes el xefe.
- Toi d’alcuerdu contigo, Atenea; podemos da-y otra oportunidá. Cuido que yá debió curar de la soberbia.
- Demasiao chulería pa un simple mortal .
- ¿Qué culpa tien él de ser llistu?
- Pero llévalo con munchu aquel...Podía ser un pelín más humanu...
- Pa min que-y tenéis un pocu rocea, collaci@s ... Eso tampoco ta bien pa unos dioses ...
Atenea dio nel clavu, los dioses del Olimpu abangaron la tiesta y foron asintiendo. Zeus intervieno, metió el cazu y sentenció:
- Atenea, toi contigo. Mira a ver si pues aidalu a salir de Calipso. Llíbralu d’esi abobamientu.
- Póngome a ello nel intre, mio capitán; voi llamar a Hermes pa que-y lleve un recáu.
Poseidón calló la boca, torció’l focicu y rezungó pa sigo ...
- (Si pensáis qu’esti capuletu va salir cola suya vais arreglaos, muninos.)
...............
Rocea nel Paraísu
 |
| Ítaca, Ítaca... |
Una mañanina de primavera mientres retozaben per ún d’aquellos microclimes que llaraben la viesca onde prosperaben l’ Arce Negundo (Acer pseudoplatanus) y el Cedru del Atles (Cedrus atlantica), ente otres exótiques especies, detuvieron un momentu a la solombra d’un Árbol del Paraísu (Elaeagnus angustifolia) onde Calipso, que tenía conocencia de lo que se tresnaba nel Olimpu, aprovechó pa siguir atestonando col murniu Ulises:
- ¿ Nun tas a gustu equí conmigo, mio cativín?... Véote un poco gachu .
- Toi bien contentu, ninfa de mio, pero escucho equí dientro una llamada poderosa que m’emburria haza la Patria; nun soi p’aguantar esti resquemor ... Siento les moliciones del mio fíu, les caricies de Pe, les voces aporfiantes de los collacios .... ¿Por qué nun me dexes colar, amor?... Lo nuestro foi tan guapo... Nun merez que lo empuerques.
 |
| - Pero será posible .... (William Flint Russel) |
- Pero home de dios, ¿nun te decates que si.., quedes conmigo pues algamar la ¡inmortalidá!?.¿Crees que merecen la pena cuatro díes d’aparente felicidá ?...Fai alcordanza d’esta máxima: «MOMENTO MORI » (Fai alcordanza que ties de morrer)......
- Yá soi inmortal, dulce Calipso. Les mios fazañes vivirán nel mancomún popular per toa la eternidá, ¿nun te decates, ne ?. Soi Odiséu, el viaxeru incansable, la musa d’Homeru, el rei de la mítica Ítaca, l’héroe de la llexendaria Troya, el David de Polifemo, el caprichu de Circe y hasta l’amante de Calipso, ¿abúltate poco, amor? ... ¿Qué m’ofrez una inmortalidá muerta? ... La vida ye pa vivila, non pa mantenela, pienso yo ...Por eso te digo: «CARPE DIEM» (Aprovecha’l día), y yo nun tengo tiempu que perder.
- ¿Y Poseidón? ¿Crees que va escaecer de ti?..
- Sé que’l dios de los mares va ponémelo difícil pero la vida ye esto, llucha y AMOR.
Calipso abangó la tiesta y quedó camentando cómo Ulises nun se decataba de qu’AMOR ye lo que-y sobraba pa repartir con él. Y quedó cola sensación que taba dando en fierro ...
...........................
Una visita
. Una tarde primaveral, mientres Ulises andaba andamiáu pelos cantiles de la islla ferregüeyando dalgún posible veleru, la ninfa Calipso pasiaba pente los frutales del güertu cuando de sópitu sintió un ruíu raru, seique agradable :
 |
| HERMES, el carteru |
- ¿Quién anda ehí? ....
- Soi Hermes, Calipso; nun temas, namás vengo a date un recáu de los dioses.
- ¿De los dioses? ¿Qué tienen los dioses pa min? – arrepostió roceana.
- Hebo CONCEYU nel Olimpu. Atenea anda bien esmolecida por mor d’Odiséu y convenció a Zeus pa que-y soltares les cadenes de la prisión.
- ¿Qué prisión? .... ¿Veis cómo vive? ... Elli llegó a min fechu una llaceria y yo fici d’él un paisanu. Ta equí porque quier, ¿nun tará, quiciabes, namoráu de min? ...- entrugó desafiante.
- Tiente munchu afeutu, quierte de verdá pero echa munchu de menos la tierrina y la so familia. ¿Nun ves la señaldá qu’arrastra? ... Tul día solitariu y escullindrando la mar ... Sigui’l conseyu de Zeus y déxalu colar. O más bien, aídalu a tresnar una balsa con tola intendencia que precisa p’algamar a ÍTACA.
._Ceuta_(Espa%C3%B1a).jpg) |
| <Calipso>, de Rebeca Matte |
Calipso nunca nun conociere mortal na so esistencia, porque vida nun tenía; quiciabes por eso comprendía a Ulises meyor de lo qu’esti pensaba; al escuchalu naguaba d’alguna manera por participar naquella vida de riesgu, sacrificiu, ilusión, llucha, amor, ... ¿Nun sería qu’ella, inmortal, allampaba por tener vida humano? La ninfa namás conociere la bucólica felicidá del BEATUS ILLE .... Pa ella Ulises yera’l Dios qu’adebecía, el dios salvador. ¿Cómo podíen Zeus y tola corte celestial pidi-y sacrificiu talu? ...
- ¡¡Quiero ser una MUYER!!
Pero ta escrito. Unos nacen dioses ya otros humanos y cadún tien la so función. Ye verdá que puen axuntase y dar semidioses pero como humanos son llibres pa escoyer ... Ya Ulises escoyó a Penélope. Y Calipso sabíalo bien. Tardó en decatase pero a la fin comprendió ... Diose con un cantu nos dientes y claudicó énte el dios viaxeru.
- Ta bien, Hermes; di-yos a los xefes que va cumplise la so voluntá. Viviré col so recuerdu pero sabéi qu’elli tampoco va escaecese de min ...
....................................
Iguando la partida
Y Calipso cumplió lo prometío, vese que nun se dedicaba a la POLÍTICA.
Demientres un par de meses trabayaron xuntos na igua d’una balsa de madera. Valtaron árboles. Serraron rames. Clavaron tables. Llantaron un mástil y tresnaron una vela. Darréu ficieren probaderes na badea hasta que tou axeitó a satisfaición.
 |
| Tresnando la balsa salvadora |
- Sí, facemos un gran equipu magar tu nun yes a date por enteráu (fatu).
- Yá me decato, amor, pero tamién conoces los badagüeyos de los dioses. Ye preciso que parta. Ta escrito.
- Fai alcordanza que nun te va ser fácil. Yá sabes del anoriciu que te tien Poseidón; va ponete pilancos a mamplén.
- Sélo, pero solventiar enguedeyos ye la mio especialidá; y tu bien lo sabes, Calipso.
..................
. La partida quedó fixada pa un día qu’encartiare colos dioses de los vientos.
.Ulises cargó los fatos y fixólos al mástil per aciu d’enredaderes: agua, pan, quesu, pases, frutos secos ya unos chorizos. Pa los primeros díes metió delles frutes talo mazanes, naranxes ya unos plátanos. Pel camín yá diría arrampuñando lo qu’alcontrara.
.Un cielu llimpiu y soleyeru acompañó la despidida .
. ABRAZÓ a Calypso por cabera vez.
. Subió a la balsa.
. Foi alloñándose de la oriella col sofitu del únicu remu que tenía. Y orientó la vela con tol procuru dexando la estrella Orión siempre a manzorga.
L’adiós a la tentación
Siete años d’AMOR, d’amor de verdá, d’amor humán, fueron talo un suspiru pa Calipso ... Esto ye lo que tien la vida, munina; que tou pasa nun santiamén ... Sicasí merez la pena, ¿a qué sí?. La vida d’un ser ye una pequeña historia que xunto coles demás van formando la HISTORIA de la HUMANIDÁ. Y esto ye lo que la fai interesante ...¿Quiciabes dalgún día podamos remanecer, y llegar a comprender, la verdadera historia de la CREACIÓN? ...
- ¡Adío, AMOR! (Adiós)
- Méjiro pánta, mio dios. (Hasta siempres)
...........................................
¡Rumbu Ítaca!
 |
| ¡Adío, Calipso! |
. Les dos primeres selmanes la navegación foi de lo más dulce que te pueas imaxinar.
- Igual Calypso entendió mal a los dioses .... - Aquello yera un verdaderu relax.
.. El día decimoctavu Ulises acolumbró una llomba verde y tarmuda.
- ¡¡¡Una islla!!! – A midida que s’averaba a la costa foi decatándose que se trataba de les sableres de la islla d’Esqueria, la tierra de los feacios.
- ¡Qué potra tengo!. Los feacios son xente de lo más hospitalario. Nun pudi alcontrar un sitiu más afayadizu pa recargar les piles. Dos o trés díes de descansu y otra vuelta a navegar. Yá tamos al par de casa.
¡ Puxa Atenea! ¡Viva l’Olimpu! ¡Y viva la madre que vos parió! .
.. Nun terminare de glayar cuando, de sutrucu, siente un aventón por papa ... Da media vuelta y ....
- ¡¡¡ Nonnnnn !!!
............:::::::::::::::::::::..................
Nel Ítaca
Los nuesos amigos, Ulises y el so Alter Ego, siguen reuníos nel chigre Ítaca (Gastrobar, dicen anguaño) frente a un cuadru del Mar Mediterráneu en tiempos d'Homeru. Los principales finxos de la dómina la Guerra Troya y la Odisea (s. VIII e.X) tán perbién indicaos nel mapa asina como los protagonistes d'estes epopeyes. Mirando fixamente a Helena ún ye capaz de tresponese y entrar en contautu direutu con Atenea que ye la mediadora ente Ulises y el so Álter Ego, ye dicir, l'autor d'esti post.
 |
| Navidá en Roces |
- Despierta, caminante. ¿Qué te paez el mitu de Calipso?
- Bien, bien interesante. Los alderiques ente Ulises y Calipso son de lo más allucinante. Algama la conclusión qu' El PODER nun lo pue too. Por más PORGÜEYOS que-y ofrez Calipso nada nun pue col AMOR de verdá, l'amor a la familia y a la Patria. Nin la promesa d'una ¿vida? eterna son p'abangalu.
¡Quiero tornar a Ítaca! - glaya l'héroe del AMOR.
- ¿Sabíes de los poderes del "Verderríos?
- Sabía de la so fermosura, poques aves son tan llamatives, sicasí estrañóme alcontralu tan cerca del mar pero, claro, el ríu ta ehí. Encantárame el so simbolismu: la valentía, l'amor a la llibertá y l'aventura y sobre manera la vida con xacíu d'alcuerdu cola conciencia.
- Bueno, gallu, como dicís vosotros, ¿ y qué me cuentes tu desque salisti del barriu la Ilesia? .
- Pero, home; ¿vas dexame en fierros cuando Odiséu quedó a piques de .... de qué, si pue sabese?
- ¡Ah! Eso déxolo pa poner la espuela a esti post ...
- ¡Bruxu! Por dalgo yes Ulises ... ¡Bribón! .
Una carcaxada foi l'entamu d'un brinde:
- ¡Por Ulises!
 |
| ¡Hola, Atenea! |
- Un momentín collacios; tengo un recáu pa vós ...
- ¿Un recáu, de quién? . Tu dirás ....
- Del Olimpu.
- ¡¡¡¿¿¿...???!!!
- Sí, tán camentándome los dioses que sería bien prudente que L'Alter Ego sopelexare en cada post el TRACK de la RUTA CAMINIANA . Que tienen munchu xaréu y esto diba facilita-yos el camín.
- ¡¡¡¿ ¿Tán los dioses faciendo la RUTA CAMINIANA??!!!
- Nun pierden una. Que tán pasándolo dabute y hasta camienten de pasar unes vacaciones nel entornu de Xixón.
- ¡Fecho!. Equí yá agospiaren reines, reis y políticos cabezaleros decimonónicos. Podemos ofrece-yos en Roces el Palaciu la Duquesa (hai qu'igualu un poco), el Palaciu que fuere del Almirante don Pedru (los dueños actuales tiénenlu como un h.aspe) o si prefieren el centru podemos tresnar el Palaciu Revillaxixéu o hasta la Casa Natal de Xovellanos. Tamos a disposición del OLIMPU.
- Yá mando a Hermes que-yos tresmita'l recáu nel intre. - Atenea cegúña-yos un güeyu y dando un soplíu al cárabu que llevaba na regaza piérdese de vista.
:::::::::::::::::..............................:::::::::::::::::::::::::::
.. Por suxerencia de los dioses del Olimpu vamos sopelexar el mapa con el TRACK de la RUTA CAMINIANA enantes de camentar los finxos correspondientes al post qu'apurrimos güei.
 |
| < TRACK de la RUTA CAMINIANA > |
La PEÑUCA (12)
 |
| Dende La Peñuca: <Polígonu Roces-Porceyo> |
Siguimos caleyando pel barriu La Nozaleda dica La Peñuca, per aquella carreterina que cruciando la falda la llomba enantes llevábanos a ALCAMPO, tres pasar el Puente Roces, pero anguaño ta cortada xusto na Peñuca, el míticu llugar de nacencia del Poeta. Yá dexamos a manzorga la facienda de ¿Pachu Alonso?. Na parte superior de la llomba, onde la casa Muñiz, hai unes cuantes cases más abellugaes por una panerona d’ocho pegollos qu’ocupa media “Cai Corrida”.
 |
| "El Chicu " afaenando per La Nozaleda |
Pel camín principal entá se caltienen les casones d’unes faciendes decimonóniques como Pachu Alonso, La Balba y la finca del Parque Celeste, <La Quinta> que perteneciere a los Álvarez Tejera y según cuenta l’escritor <tamién taben la Casa de Balba (lNun se trata de les “Balbones”, unes moces que vendíen pescao hasta n’Uviéu) y la facienda de Pachu Alonso. Al otru llau del camín les cases de José’l Monte (onde la ma de Camín tenía un taller de costura pa les moces del pueblu), la de La Chepa , Juanín de la Farola, Antón de la H.oroba y más cases xornaleres que de facenderos>.
 |
| <Casa de nacencia del Poeta La Peñuca> |
.. Frente al Parque Celeste tenemos sobre nós la casa d’ El Chicu, col so horru bien iguáu. Una caleya asfaltada, <Camín de Torre>, conduznos a la finca onde ta asitiáu’l <Torruxón de Veriña> que ferregüeya les poderoses faciendes d’El Rixu y de los Entrialgo asina como la casona y Panera d’Ángela, seique sía a medies colos Entrialgo
………………………………………
El Turruxón de Veriña: La TORRE de los Menéndez Valdés
<El Turruxón de Veriña: La TORRE de los Menéndez Valdés>
< Ñací sobro peñascales
y al abellugu d’una torre
mirando l’agua que cuerre
embaxo, ente los nozales>.
Nel barriu La Nozaleda de Roces, al cabu del Altu de Pumarín y xixilando cual aigla poderosa una bona parte de les parroquies de Xixón y hasta les veles vivientes que decoren el Cantábricu remanez un sufríu torruxón que tapecíu pola maleza y l’abandonu cuésta-y amosar el so blasón qu’en tiempos llonxanos foi un estandarte que la célebre familia de los Menéndez Valdés tenía asitiáu na zona rural de la villa de Xixón.
 |
| El torrexón de Veriña (nel s. XX) |
Esta torre solariega d’estructura cúbica y trés plantes ye un paradigma de los torrexones que tuvieron de moda ente los sieglos XV y XVII nos conceyos asturianos. Ésta que contemplamos llevantóse no postrero del XVI per aciu de Gonzalo Menéndez Valdés, <El bon caballeru de Roces>, y polos probes materiales emplegaos decatámonos que se trata d’un edificiu perteneciente a una familia rural de recursos llimitaos. A ello bien a sumase la so deformidá por mor de delles construiciones venceyaes al edificiu principal asina como dalgunos vanos talamente mal alliniaos. La cenciella puerta ye adintelada magar tea formada por fuertes sillares de piedra llabrada. Caltién el escudu d’armes de la Casa Valdés – Banduxu colgáu d’ún de los bien sobresalientes aleros.
Pasáu’l tiempu esti torruxón terminó convirtiéndose nuna vivienda particular que foi espropiada por mor de la Ronda Sur. La verdá, la ronda venía facer falta, ye’l progresu, pero lo que ficieron con esta torre y l’arrodiada ¡ye una gochada!, con perdón. ¿Qué pinta esi esgoladeru que mete mieu a los nacíos?
……………………………...
Pero lo que nos trae esmolecíos ye’l final del <Camín de Roces a La Nozaleda> que termina cola facienda de “Manolín de Blas”. Embaxo’l bardal, al llau de lo fuere la cantera (que yá nun canta) de Claudio esistía’l Barriu La Peñuca onde s’asitiaba la casa de nacencia del Poeta d’Asturies ya una fonte percélebre onde abebentaben les meyores cocineres de Roces, por nun dicir de Xixón. Por mor de la Ronda Sur esaniciaron tantu la casa l’escritor como la Fonte La Peñuca. La cantera yá tuviere pasao a meyor vida talo delles casines como la d'Alfredo Cortés. El turruxón quedó asemeyao una pantasma qu’amedrana dende l’altu los vehículos que pasen pel Puente Roces, y non menos a los neños que xueguen per aquellos llares. ¡Quién te viere y quién te ve, Torre de los Menéndez Valdés!.
« Nací un doce d’agostu,
nuna humilde casuca
de Roces per La Peñuca
y al pie d’un tarrén angostu.
Una parra d’agriu mostu
qu’al teyáu s’engarama;
daqué nial ente la rama
y, allá al fondu del camín,
un manancial cristalín
qu’a Xixón lleva la fama.»
::::::::::::::::::::::::::::::::::::::::::::
«Camín de La Reina» (13)
 |
| Caleyando pel tarmudu Camín de la Reina. |
« Caminante, nun hai camín,
faise’l camín al andar.
Al andar faise’l camín
y al tornar la vista atrás
vese la sienda que nunca
ties de volver a pisar.
Caminante, son tos güelgues
el camín y nada más ».
El
curtiu Camín
de la Reina entama
na Nozaleda y ehí se queda. Magar qu’antaño llegaba hasta La
Ilesia de San Xulián bordiando la Quinta Celeste, les faciendes de
Pachu Alonso, del Saleru y la Flor de Lis. Yera un camín afayadizu pa que los guah.es de La Nozaleda fueren a Misa y al
Catecismu los domingos. Qué contentu taba don Ceferino.
::::::::::::::::::::::::::::::::::::::::::::
«El Mascarón de Proba» (14)
La familia CLAUDIA
 |
| El Mascarón de Proba, emblema de la Casa Claudia |
… Tres salir del bucólicu “Camín de la Reina” tiramos a manzorga pela cai “Matilde de la Torre”, que ye la llinde ente la Nozaleda de siempres y el barriu modernu de Roces. Con un pelín d’atención decatámonos qu’a la izquierda surde ente la maleza una torre – Torre de Veriña - un tanto esmanganiada, escaecida por Fomentu que cuido sía l’amu. ¿Esperen qu’esbarrumbe ? … Por si fuere pocu al suspendela nes alambres queda olvidada pala xente. Paez mentira pa esti Ayuntamientu tan progresista que nun-y pegue un toque a Fomentu.
…………………………...
 |
| < Casa CLAUDIA, col célebre mascarón na fachada > |
Nun facemos más sangre y siguimos caleyando dica l’autovía (AS-II) que nos lleva a la capital o al Polígonu Roces-Porceyo pasando per “Puente Roces” y ALCAMPO asitiaos nel barriu de La Fana; esto tamién ye Roces, seique les nueves carreteres samblen dicir lo contrario. Cuando s’acaba el fierro (Matilde de la Torre) entramos nun prau y al otru llau de l’autovía acolumbramos una vetusta casona engalanada con traxe pedrés: la Casona Claudia, la casa de Lolo de Claudia, mui amigos d’Alfonso Camín. La Quintana faneguera de los Claudio tenía – tien – metanes unos grandes praos, una casona periguada, llagar, horru, corte y panera. ¡Casi nada!. Cuando Camín facía una escapada dende les Amériques a Roces siempre visitaba la Casa de Lolo Claudio. Muncho-y prestaba escanciar unos culinos con Raúl de Claudio, otru emigrante que según cuenta Alfonso foi’l que trexo de l’Habana’l Mascarón de Proba *que relluma na fachada que a da l’autovía. (Sicasí esto nun ye cierto, el Mascarón aportó a esta casa dende la Villa maliaya).
* El <Mascarón de proba>, pue lleese nun ANEXU aparte nel Blog "Camín de Niría"
«Biblioteca de Roces» (15)
Cerca Casa Claudio tamién s’afayaba, talo nos cuenta Camín, la célebre facienda <Casa’l Carretu> o Casa La Pata, anguaño “Muebles Varela”. Yá tamos arribando al pobláu < Nuestra Señora de Cuadonga > pero enantes damos col Institutu “Alfonso Camín onde abenayá taba asitiáu’l “Patiu la Rosala’”. La Rosala yera una tía d’Alfonso Camín que tenía dos fíos emigrantes en Cuba pero nun s’alcordaben de so madre pa nada. Vaya fíos más descastraos.
Bueno, y yá xusto enfrente del Institutu afáyase la BIBLIOTECA de Roces, un finxu cabezaleru d'esta RUTA CAMINIANA y sobre manera de Roces. ¿Quies saber daqué al rodiu la Biblio y del barriu? ....
 |
| Biblioteca Pública de Roces "Alfonso Camín" |
La Biblioteca Pública “Alfonso Camín” ta asitiada nel barriu d’“El Machacón”, nuna esquina del Pobláu “Nuestra Señora de Cuadonga” y bien cerca de Los Monteviles, Pumarín y Santa Bárbara. Abellugada pol Colexu Públicu d’Enseñanza Primaria y del I.E.S. “Alfonso Camín” nun pue alcontrar un sitiu más afayadizu pa sopelexase.
Esta biblioteca, la primera de los barrios de Xixón, xurdió por mor d’una necesidá popular d’alquirir conocimientos. Aquel barriu – ente la Carretera d’Uviéu y La Carbonera - qu’entamare en 1953 por un cuerpu de 20 bloques y 160 viviendes llevantóse col enfotu d’acoyer a los numberosos obreros que precisaba la industrial y puxante Villa de Xixón. Aquel barriu del sur diba enantando pasu ente pasu: En 1955 son otres 470 viviendes de trés ó 4 plantes y con xardinos ente los bloques; en 1959 apúrrense 17 bloques más con un tratamientu más acordies colos tiempos. Estes dos últimes partíes tán acoyíes al plan de Vivienda de Renta Llimitao y fueren llevantaes por mor de la éntidá benéfica “Bancu del Probe” y tuvieren como arquiteutu al célebre Miguel Díaz Negrete. Poco más tarde les viviendes rondaben les 800... Los chalés de la redolada entamaron un pelín más tarde; enantes diben asitiándose dellos Polígonos Industriales, otra carauterística fundamental d’esta parroquia… Cómo ente tanta xente nun diba surdir la necesidá d’una Asociación de Vecinos, una Biblioteca, un Cine ya unes Escueles más decentes…La Biblioteca nació en 1968.
 |
| Alfonso Camín y el so Alter Ego (Yá quixera...) |
De mano tenía calter ambulante, una furgoneta y la voluntá d’un Maestru, Don Rafael, pelegrinaben de barriu en barriu llevando la llibertá nes páxines d’un llibru …. ¡Qué llabor tan granible! Anguaño la Biblio tien dos plantes : La Superior pa facer xuntes de trabayu y la planta baxa con dellos requexos onde se faciliten los préstamos de llibros, Cds, etc. Hai espacios pa lleer – mesmo la prensa - o estudiar asina como una Mediateca con seis puestos d’ordenador ya accesu a internet, per aciu de banda ancha, y cursos de formación. Acaben d’unviar esta anuncia per internet:
« Les Bibliotecaries tamos arranaes por amosar a los guah.es les infinites histories que se camienten pel mundu. ¿Nun t’apetez venir a visitanos? . Hai trasgos esperando por ti ....»
::::::::::::::::::::::::::::::::::::::::::::::::::::::::::::::::::::
Finxu Nº (2) « El Parque Salvador Allende»
Tres dexar la Biblio embredamos pel cuestibayu bordiando’l Parque Salvador Allende, gayola del pobláu “Nuestra Señora de Cuadonga”, el cuálu procesu de formación venimos de camentar.
Esti parque, asitiáu nel patiu La Pata, foi ún de los cinco primeros de Xixón nos que, tres una igua afayadiza (1998), tiénense repuesto un calderáu de xuegos infantiles. Esti momentu aprovechóse p’ameyorar l’allumáu y el saniamientu; los paseos interiores foron embaldosiaos y l’escasu arboláu tevo un espoxigue espectacular. La estatua a Salvador Allende, obra de Mónica Bunster, foi asoleyada en 1999; el parque quedó completu.
 |
| <Parque SALVADOR ALLENDE . El Presidente arropellando al pueblu > |
¿ Por qué Salvador Allende? … Un barriu obreru como esti nun pudo alcontrar un meyor símbolu pal barriu: Un lluchador polos drechos humanos.
Salvador Allende (1908-1973), mélicu de profesión y políticu de vocación, foi’l cofundador del partíu políticu socialista chilenu algamando a la presidencia del país en 1970 y siendo derribáu por un güelpe militar pinochetista très años más tarde.
Allende, demócrata ya izquierdista enferronáu, foi diputáu a cortes delles veces y, por fin, terminó participando nel gobiernu del demócrata radical Pedro Aguirre Cerda (1938-41): «habitación sana, trabayu abondante y aumentu de la cultura» . Tres dellos intentos d’algamar la presidencia de la nación termina consiguiéndolo en 1970, pero por tan escasu númberu de votos que tien de ratificalu’l Congresu. Por más qu’intenta aconceyar los partíos demócrates les dixebres y les fuerces de la drecha – col gabitu norteamericanu descaráu (tuviere nacionalizao les mines de cobre que los yankis esplotaben como suyes) – mónten-y la barrila ( güelgues a mamplén, baturiciu nes cais) y terminen bombardiando’l Palaciu La Moneda. Cuando entró Pinochet l’héroe yá taba muertu. ¡Adiós a la «Vía chilena al socialismu!»
:::::::::::::::::::::::::::::..........................::::::::::::::::::::::::::.:::
Otra vuelta al Ítaca
- Yá pue tar contenta Atenea pos cumplimos el recáu al pie la lletra. ¿Qué te va paeciendo'l pueblu, Ulises?
- Una pasada como yá sabes. Tenéis histories bien interesantes ya otres bien risonderes, como esa del Mascarón de Proba. Tolos pueblos tienen la so historia , munches veces una odisea.
ESTIMANCES
Tengo que dar les más fervientes gracies a dellos escritores asina como a blogs, páxines Web, editoriales, pintores ... Pero enantes de nada voi facer referencia a la IA, esi recursu máxicu, ¿cuasi? divín qu’acabamos de descubrir y pensamos va suponer un antes ya un dempués nel nuesu métodu d’información. ¡ Bien llegada, IA! .
Sacamos semeyes de: <Pintirest.com>. <iceebook.com>. <linguisimo.com). <museobolivariano-org> . <
. A la escultora Rebeca Matte pola so obra Calypso.
. Al pintor William Flint Russel por " Ulisses e Calipso"
. Wikipedia, onde abebiento de contino, ye un sofitu fundamental pa nós. Tamién restolo per <ASTURNATURA>
Ya unos cuantos Llibros:
. <Las aventuras de Ulises> de Geronimo Stilton. ¡Un AMOR!. Testos ya ilustraciones de A. Denegri, CH. Aliprandi, C. Forcelloni, E. Giulivi, Rosa La Barbera, D. Loizedda, A. Rea, R. tedeschi, ,Kuca Usai, C. Valentino,y D, Barozzi. ¡Sois lo máximo!
. <La fabulosa historia de Ulises> de B. Coppin y A. Ronzon
. <Helena y la guerra de Troya>. ANAYA
. <El regreso de Ulises> ANAYA
. < La cólera de Aquiles> ANAYA
. < La guerra que mató a Aquiles> de Caroline Alexander. ¡Norabona!..
. <Naves negras ante Troya> Rosemary Sutcliff . Tengo decidío mercalu.
. < Las aventuras de Ulises> Rosemary Sutcliff. Idem
:::::::::::::::::::::::::: FIN :::::::::::::::::::::::
El próximu post va entitulase : OTRA VUELTA A ÍTACA (7): <NAUSÍCAA>
No hay comentarios:
Publicar un comentario