SUAÑOS de MERINDADES (8B).- Una RUTA HERÁLDICA per Espinosa los Monteros.- MISIÓN:PATERNA (8b)

 < SUAÑOS de MERINDADES (8 B)>

                 <RUTA  HERÁLDICA n'Espinosa los Monteros>

                                   < MISIÓN : PATERNA (8 B) >

 

Escudu ZORRILLA-ARCE, nel Palaciu CHiloeches
(Semeya: lasmerindesdes.com)

                        ..... zzzzz ..... SUAÑU nº (11)   ..... zzzzz  .....

      Yá saben los nuesos llectores pol mor del post anterior que la comitiva que salió de Medina de Pomar camín de Sotoscueva col envís de visitar el complexu kársticu de Güeyu Gureña  y la ermita rupestre de San Bartolomé terminó'l día agospiando nel conventu doblu de Santolaya, mismo enriba d'Espinosa los Monteros. Como yera la FERIA d'esta naciente villa no que fuere parte del Área Patriniani romana decidimos quedar equí dellos díes pa conocer tol entornu, en plenu procesu de REPOBLACIÓN, y de pasu esfrutar de la feria y esplayar la figura de Paterna, la posible futura Reina d'Asturies a la que pertenecíen toes estes tierres tan difíciles de caltener por mor de les razies árabes, tan frecuentes, por desgracia. Nun pasaren cuatro díes dende que los moros colaren de la Torre los Azulexos y de Mediana de Pomar, sicasí yera fácil qu'estos volvieren pa quedar, por eso la Repoblación yera tan importante; a naide-y presta que lu echen de so casa, ¿ o non?.

<Bolos 3 tablones.com>

            Tres visitar Espinosa dellos díes, esfrutar de la Feria (concursos, carreres, mercáu, verbena...) y hasta participar nel Concursu de Bolos "Tres Tablones" tornamos a la nuesa residencia en Medina de Pomar.

         ¿Qué pasó el martes nel Campeonatu de Bolos?. 

            Foi un espectáculu ensin igual. Yera tal el xentíu qu'había - yá s'esperaba - que na Plaza nun cabía un alma más. Los soportales, los balcones, les galeríes y les ventanes de les cases particulares taben acorropinaes d'un públicu fanático y afervorecío que nun paraba de glayar. 

A min nun se me dio del tou mal y pudi algamar les semifinales pero Paterna llegó a la final. Tevo que vese les cares col célebre Bertu, un mozu que ganaba campeonatos como rosquilles y que yera almiráu nes Merindades talo fuere un héroe llibertador. Bertu, el Vitorianu,  algamó ¡384 bolos! con 80 boles; una media de 76,8 sobro 80, una marca namás propia d'un xeniu. Paterna teníalo crudo; nunca dengún rival-ylo punxere tan cuesto. Pero Paterna yera la Reina. La Reina de la Feria, la Reina de Les Merindades, la -reina de los Bolos, la ¡Reina d'Asturies!... Por ser muyer tenía la ventaxa de poder tirar dende un poco más cerca pero ...¡había que tirar 80 boles!. Tomólo con paciencia y foi faciendo tantos a mamplén tanto de baxada como de xubida. Faltába-y una bola por tirar y tenía fechos 378 tantos,  precisaba 7 bolos pa ganar. Por un momentu la Plaza quedó en silenciu sepulcral, nun se sintía nin l'aliendu cuando la condesina llimpió cola mano la bola cabera. 

Bertu faciendo una de les suyes.

     Afitó los pies en suelu, permedió bien el cuerpu y echó'l brazu atrás p'agarrar impulsu. Yera talu'l silenciu que l'esnalíu de la bola cortaba l'aire.... ¡ 7 bolos! . ¡Increyible!. ¡Paterna campeona énte el meyor xugador de BOLOS TRES TABLONES que diere Castiella!. El ¿perdedor?, entá ablucáu foi a saludar a la campeona abangando la tiesta, pero esta averóse a Bertu y arremangó-y un par de besos nes mexelles. El probe chaval asemeyaba la estatua de la Plaza, namás lu despertaren los apellidíos del públicu que clamiaba:¡Paterna!, ¡Paterna !... Pero ella empobinóse a los otros xugadores y dio-yos indicaciones pa que dieran la vuelta a la Plaza con Bertu al llombu. Entós si que foi gorda ... La xente apreció'l detalle y a puntu tuvo d'esbarrumbar la Plaza colos glayíos n'honor de dambos xugadores que quedaren nel intre convertíos nunos mitos ...¡Paterna! ,¡Paterna!, ¡Bertu!, ¡Bertu!... La Plaza yera un clamor. 

        .. El baille de la verbena que siempres abre la pereya de ganadores de la Carrera Caballos Llosinos esti añu tuvo d'abrise con dos pareyes por aclamación del públicu, los ganadores de la Carrera y los finalistes del Campeonatu de Bolos Tres Tablones. 

        -¿Quédate dalguna dubia, Selim, de que Paterna tien de ser la futura Reina d'Asturies?- camenté pa min.

    . En cuantes terminó l'adorable baille d'honor la xente tiróse al ruedu y nun paró de baillar en tola nueche;  hubo d'aprucir el sol y la Comisión de Fiestes aportar los churros y el sidre duce, costume que da por finada la Feria. ¡Cómo se punxo la parroquia! .... 

                                                    ::::::::::::::::::::::::::

Capiella de Santolaya (antiguu Monesteriu)

         Salimos de Santolaya tres almorzar y despidinos d'aquellos flaires y monxes que tan bien se tuvieren portao con nós. Quicibes dexaron con picardia'l platu más esquisitu, o cuando menos el más célebre, pal últimu día:  <Truches a la espinosiega>  . Pescaes la tarde anterior por dellos vecinos de Santolaya que les coyeren a mano, unos nel Regueru de Santiago, que pasa pel mesmu pueblu ya otros foron por elles a los veneros del Trueba, nos regatos de Les Machorres, que yá teníen encargaes. Yéremos munchos comensales y había qu'asegurar.  

        Al colar pa Medina de Pomar apurriéronnos como regalu dellos tarros de barru con miel de brezu casero ya unos quesos de vaca, cabra y oveya en estaos estremaos de formación: mui fecho, semicurao y requesón. Paterna correspondió  a la so amabilidá con una bultable Cruz de Plata con piedrería encastrao ya una imaxe de la <Virxe de les Ñeves >, patrona de Les Machorres, que foi colocada nuna forniella amirando pa otra que yá había y representaba, cómo non :  <El martiriu de Santolaya>. 

        La torna a Medina (13 milles) foi de lo más gayolera; había tantu que cuntar  que nun dábemos a bastu. Foi una esperiencia preciosa y de lo más candial. Paterna terminó de coronase nes Merindades; en realidá yá yera reina de facto nes Bardulies, na naciente Castiella. 

                < Ramiro diba tener el gabitu d'una muyer especial, 

                   sabida y afable yera imposible, d'ella, nun s'enamorar. >

                          zzzzz ….. FIN DEL SUAÑU  Nu.( 11 ) …… zzzzz

                                                ::::::::::::::::::::::::::::::::::::::

                        < UN  PELÍN d'HESTORIA  SO LA VILLA  d'ESPINOSA >

La lleenda de los Monteros d'Espinosa : Sancho García descubre la conxura. 

        . Espinosa de los Monteros ye’l municipiu más septentrional de Les Merindades. Llenda al norte con Cantabria lo mesmo qu’al oeste onde s’alcuentra cola barrera los Montes de Somo y Valnera (onde s’alcuentra’l célebre castru). Si tires al sur-este entres na Merindá de Montih.a (Villasante, capital) y hacia’l sur-oeste vas camín de Sotoscueva (Güeyu Guareña yel so finxu principal).

        Tien una estensión d’unos 138 km² pa una población cercana a los 1.700 habitantes distribuyíos en seis barrios: Santolaya, Berrueza, Quintanilla, Para, Bárcenas y Quintanilla de los Praos.  

Casa espinosiega

   Xunto coles llocalidaes cántabres de Vega del Pas y San Pedro del Romeral forma’l conxuntu de Les Trés Villes Pasiegues.

        Espinosa y el so entornu tevo habitada dende tiempu inmemorial como amuesen les güelgues de Güeyu Guareña ya otres de les Edaes del Bronce y del Fierro. La villa – Vegulia - foi formada por pueblos celtes, cántabros-conisios, unos 800 años e.X.C. 

        Los romanos asentaron equí tres cruentes batalles colos nativos, qu’obligaron al mesmu Octavio César a tomar cartes nel asuntu y dexar construyida una barrutha - muralla - al rodiu de Velliga (que por dellos nomes se conoz ). 

        Más tarde – 600 / 700 – foron los visigodos d'Atanagildo (554) los qu’asitiaron nel Val d’Espinosa (tala yera la bayura d’espinos qu’había) tres apurrir a los romanos una zurra pistonuda. Dexare el valle  - por desgracia -  talo un solar y anguaño nun tenemos güelgues romanes qu'amosar. ¡Qué torollos sois, visigodos!, colo bien que nos veníen agora cuatro piedruques pa vacilar ... 

        Escasamente dos sieglos más tarde vien otra invasión.... ¡Musulmanes!.... Los espinosiegos defendiéronse como gatu panza arriba y de nun ser por gabitu de los collacios moros de Medina de Pomar ... Pero hebo qu'achantar, yeren demasiaos.  Menos mal que ceo  llegó'l Bon conde Fernán González (910-970) pa xubir a Castiella la moral, pero tantes guerres dexaron n'Espinosa a sucu baxeru la natalidá.

         Quiciabes el más célebre personax d’Espinosa sía’l Conde Sancho García (c. 1006) - ñetu de Fernán González -  que-y dio’l nome a la villa al crear el Cuerpu de los Monteros de Cámara o Monteros d'Espinosa; hestórica-lleenda que yá vos cuntare nel post anterior y qu'embaxo torno a repetir. 

        Alfonso VI (1040-1109) encargó a los hermanos navarros Ruíz de Berrueza (qu'andaben a la tema col rei de Navarra) la reconstrucción del Val d'Espinosa y en verdá que se punxeron manes a la obra (1084). El barriu de Berrueza lleva'l so nome. 

        Otros celebérrimos personaxes d'Espinosa foron: Xuan de Salazar y Espinosa los Monteros que fundó Asunción - capital de Paraguay - en 1537. Gonzalo Gómez d'Espinosa foi'l segundu navegante que circunvaló la tierra (1527) poco depués de Xuan Sebastián El Cano (1522). 

        La Guerra la Independencia (11-12 Payares de 1808) dexó un mal recuerdu na villa al perder colos gavachos una batalla decisiva nesta sangrina ya estúpida guerra. La venganza gala foi de lo más ….. DESPRECIATIBLE.   (Espinosa nun s'escaez d'ello magar nun tornen en son de paz a visitar Les Merindades, con abondes perres en bulsu,digo). Cuántu sangre espinosiego, cuántu sangre castellano, cuántu sangre español.... Pa trayer de rei un gochu que nin Dios topa'l perdón. (De quedar Pepe Botella España espoxigare seique meyor, pero a la fuerza non, Napoleón).

                                         ::::::::::::::::::::::::::::::::::::::::::::::::::::::::::::::::::::

            RUTA  HERÁLDICA  d'ESPINOSA  los   MONTEROS

                Cuido que son incuntables los monumentos históricos d'Espinosa los Monteros. Nun das un pasu ensin alcontrate con un par d'ellos: les casones blasonaes, los palacios, torres, ilesies ya otros  monumentos civiles como pontes o'l mesmu ayuntamientu tán al cabu la calle nun pueblu asitiáu al norte de Burgos, nes Merindades que llenden con Cantabria cola que se comunica al traviés de Les Machorres. 

                Pa facer una visita a esta ciudá que recibe'l nome d'Espinosa pola bayura d'espines qu'había abenayá y "De los Monteros" por ser Sancho Espinosa el criáu qu'acompañaba siempres al Rei-conde nes "monteríes cinexétiques" a la que yera tan aficionáu y al que-y debía'l reinu del condáu y la vida; sí la vida ... 

            Cunta la lleenda qu'en tiempos del conde castellán Sancho García esti fizo un pautu d'amistá col árabe Mohamed Al-Mohadí que roblaren con una bona espicha: 

  < Siendo Sancho huérfanu de pá ocurrió pos aquel día 

que la vilba madre namoró d'Al Mohadí a primer vista. 

El moru yera finu y pensó'l llaín, con tola picardía:

    -  Si te cases conmigo, Aba de mio vida,

tuya sedrá toa Hispania, l'arábiga y Castiya.

     .. Póneslo perguapo, Al Mohadí, pero'l conde de Castiya 

nun dexa de ser el fiyín de la mio vida. 

    - Si me quies con tol amor, Aba mía,

 pues mándalu pal Edén, a esotra vida. 

    .. Munchu  pides, cariñín, p'acabar de conoceme l'otru día. 

    - A vegaes l'amor pide grandes sacrificios, cristianina.

      Una pócima a don Sancho, afayadiza,

 y pasará coles huríes el restu de la esotra vida.

            El boicó yera perguapu, ¡ai mamina!,

 pero escuchólu una criada, al acesmu, tres d'una cortina

y punxo sobre avisu al so maríu, compañeru del conde na montería. 

Y el brebaxe, por tomalu'l Rei, apurrió-ylo con tol ciñu a l'asesina:

    -- Tómalu tu, madre, que yes de les muyeres la más digna

y nun hai cosa que yo más quiera nesta vida.

        Plan nun yera d'arrugase y apuró doña Aba la copina  

quedando'l moru al bentestate y la so cómpliz talamente vendida. 

        Gracies al monteru salvó vida y corona'l conde Sancho García. 

D'entós p'acá los Monteros d'Espinosa curien de los Reis la vida.>

                                    ...........................

Escudu d'Espinosa de los Monteros:

          

          El típicu escudu español de forma rectangular cola punta arredondiada. Nun lleva bordura. 

< N'oru, castiellu de gules, almenáu y donxonáu de trés donxones , el central d'homenaxe; mazonaú d'oru y sable y aclariáu n'oru va acompañáu nos lladrales por dos árboles de sinople terrazaos de lo mesmo. 

Al timbre lleva la Corona real zarraza.>

                                        :::::::::::::::::::::::::::::::::::

            Conocida de volao la hestoria de los Monteros d'Espinosa vamos dar un vueltu per esta villa siguiendo, más o menos, una ruta conocida como  <RUTA  HERÁLDICA>, a ver qué sal .... Los finxos principales a agüeyar puen dar algo asemeyao a esti revoltixu:

        <Torre de los Azulexos, Casones Blasonaes, Torre de Pumareh.o (Casa de los Cubos), Casa del Últimu Monteru, Torre de Cantimplor, Torre de los Monteros, Cases d'arquitectura popular, Palaciu de los Fernández-Villa, Casa de los Sainz de Baranda, Ilesia de Ntra. Sra. de Berrueza, Torre de les Ferradores, Edificiu del Aytu., Ilesia de Sta. Cecilia, Palaciu del Marqués de Chiloeches, La Casona, Quinta México, Illesia de S. Nicolás, Palaciu de les Cueves de Velasco, Palaciu del Xeneral Marcide y Torre de los Velasco>. 

            De xuru que nos queda daqué o apruz dalgo nuevo al dar el paséu.  

                                                    ..............................   

RUTA HERÁLDICA 
Espinosa de los Monteros

            Pa siguir un ciertu orde y nun perdenos pela villa vamos entamar la RUTA saliendo dende'l centru neurálxicu de la ciudá: la PLAZA de  SANCHO GARCÍA. Equí, abellugando la estatua del conde Sancho García, alcontramos l'Ayuntamientu, la Oficina d'Información, Santa Cecilia y el llamatible Palaciu de Chiloeches amás de numberoses cases montañeses y bayura de tiendes y restaurantes; naide nun pon en dulda qu'esto ye anguaño'l migollu la ciudá. 

1.- La estatua de Sancho García preside la Gran Plaza, centru neurálxicu de la villa. Equí alcontramos l'Ayuntamientu qu'abeyuga nos sos soportales la Oficina de Turismu. Al llau tenemos la Ilesia parroquial de Santa Cecilia y n'otru estremu'l Palaciu Chiloeches. Llamen poderoso l'atención les cases con galeríes acristalaes sobro los sos carauterísticos soportales. 

       . ¿Quién yera Sancho I García [965 (995-1017)], el de los "bonos fueros"? 

Ñetu de Fernán González - el condesu de la Casa Lara qu'algamó la independencia de Castiella - foi conde de Castiella y Álaba dende 995 hasta la so muerte. Fíu de García I Fernández y Ava de Ribagorza rebeló escontra so padre, col gabitu d'Almanzor, quedando'l padremoñu dividíu en dos hasta que finó'l proxenitor. Más tarde, col gabitu de Navarra y los Banú  Gómez lluchó contra los árabes perdiendo o ganando hasta la muerte d'Almanzor (1002); entós la cosa diba meyor.

Sancho García curiando la so Plaza

        Casáu con doña Urraca tevo dellos fíos destacando entre ellos :

    .Tigridia, abadesa del Monesteriu d'Oña que so padre-y regaló. 

    . Muniadona, casada con Sancho III de Navarra.

    . Sancha, muyer de Berenguer Ramón I. 

    . García II Sánchez, herederu del Condáu de Castiella.

            Cuenta la lleenda qu'Aba, la ma de Sancho García, foi la que intentó facese col tronu pol amor que sintía hacia'l moru Al-Mohadí . Pero una doncella decubrió'l boicó y comunicó-ylo al so maríu que participaba nes monteríes del conde Sancho. Gracies al monteru salvó Sancho vida y facienda. Yera d'Espinosa y por eso dende entós son los Monteros d'Espinosa los que curien la vida del Rei. 

2.- L'Ayuntamientu (XIX)

Ayuntamientu

            .. Esti edificiu construyíu en sillares data de finales del XIX; bultable y modernu tien fachada a dos cares. Na fachada principal presenta un soportal con cinco arcos de mediu puntu sobro pilares clásicos. El pisu superior tien cinco ventanales adintelaos que dan una balconada con un balustre de fierro forxao. 

Lleva un escudu que fai referencia a Castiella y Lleón ya otru colos símbolos d'Espinosa: <Un espinu amosando los sos raigaños y con seis llaves colgando de les rames (trés de cada llau) que recuerden el llabor de los Monteros, curiar la seguridá del Rei >. 

3.- La Ilesia de Santa Cecilia ...

Santa Cecilia y Amén.

            D'estilu fondamente renacentista trátase d'un templu de tres naves, planta basilical, muros de piedra en sillería regular y cubierta con bóveda de crucería estrellada de nervios combaos y recuerdos góticos.

         La estructura afítase, amás d'en muros gruesos, en cuatro pilares y seis pilastres de les que salen los nervios qu'ornen la bóveda. L'ábside, bien orixinal, arranca d'una planta cuadrada pa desendolcase nun polígonu pentagonal. ¿Visti otra igual?

        Esta ilesia del principios del XVI ta llevantada sobro les güelgues d'otra románica de la que se caltién una columna asitiada na fachada sur. Ta mui iguada por mor de los estropicios que ficieren los gavachos aprovechando la Guerra la Independencia . (Manda güevos, Independencia pa trayer aquel xostrón de rei que foi'l Borbón Fernando VII. Menos mal que l'actual paez más seriu. ¿Nun sedrá que la Reina ye asturiana?). 

4.- El Palaciu de los Marqueses de CHiloeches o Zorrila-Arce  (XVI-XVII) sedría entá más llamatible si nun tuviere siempres arrodiáu de coches. Tien un escudu na portada que llama l'atención hasta del más profanu n'arquiteutura. (Esto, espinosinos, tenéis qu'igualo. Nun pueo sacar una semeya decente, por favor. Ponéi un aparcaeru xunto al ríu o a la entrada'l pueblu o en ca ... Pero La Plaza tien de tar llibre d'aquello que manca l'alma. ¿O ye pa disimular qu'igual ta ensin pagar?).

Palaciu CHiloeches, na Plaza Sancho García
(Semeya: Todocolección)

        De raigaños renacentistes pero d'execución barroca esti robustu palaciu con dos turruxones prismáticos nos lladrales qu'abelluguen , per aciu d'un arcu escarzanu, un cuerpu central engalanáu con un escudu mui bultable - Zorrilla_Arce - sobro'l frontón de la portada principal. La dureza de les torres vese suavizada por unes ventanes abalconaes de factura renacentista.  

        Construyíu pola familia espinosiega Zorrila Samartín pasó a manes de la Marquesa de Chiloeches, casada con un Porres, a primeros del sieglu XIX dándo-y una bona igua a medios de sieglu dao que nel XVII tuviere ensin habitar y fuere utilizáu p'acuartelar les tropes del exércitu. 

5.- La Casona de los Porres  

La Casona de los Porres
Ilesia de la Soledá

        Llevantóse nel XVIII y lleva acostazada una célebre capiella  dedicada a <Nuesa Señora de la Soledá> ; dambes van xuníes por un cuerpu central más baxu con un portón d'arcu escarzanu que da pasu al patiu interior. La Casona ye una vivienda en tres altures siendo de ramarcar el trabayu en sillería nes esquines y vanos de ventanes y balcones asina como la forxa de los vierteagües, balcones, maceteros y faroles. 

    La Capiella barroca cola puerta adintelá va sofitada nunos pilares-contrafuertes que permiten colocar una gran espadaña con pináculos nos lladrales. Sobro'l dintel l'escudu y enriba un ventanu semicircular.

6.- La Torre de los Azulexos. Llevantada esta casa-fortaleza polos Porres nos entamos del XVI, amuesa nes sos ventanes adintelaes unos llamatibles azulexos de colorinos de los que metonimió'l so nome. Álzase, maxestuosa y desimía, nuna esquina del xardín sobro una planta cuadrada. Presenta les esquines y la fachada sur en sillería tando'l restu'l turruxón en mampostería. 

<Turruxón de los Azulexos>
 (XVI)

La puerta de mediu puntu orniada por delles moldures ya una clave esculturada ta asitiada nel lladral sur. Enriba, un tanto descuadrada, asoleya una ventana cuadrada engalanada por columnines ya una llenda nel frisu:

< Do se alcança tal victoria deve osar morir el onbre muera el i biba el nombre>

Enriba d'ella'l escudu de los Porres. Nel llenzu de mandrecha otra ventana con azulexos y embaxo l'aleru apreciamos otra ventanina perguapa asina como una cornisa con delles moldures qu'abracen unes simbóliques torrines sofitaes en canecinos.  

L'interior ta periguáu llegando a considerase una de les torres más chungues de Burgos a lo qu'agabita'l xardín esterior. Saeteres ya Escudos heráldicos ornien entá más esta ayalga. 

7.- La Casa de los Cubos o Torre de Pumareh.o ye un turruxón rectangular de nidiu caráuter defensivu - nes afueres de la villa - que remata nes esquines nunos cubos circulares defensivos que terminaron por da-y nome a la mesma: <Casa de los Cubos> 

Casa de los Cubos o Torre de Pumareh.o

        Seique delles inscripciones fechen la casona nel XIV sabemos que los Porres, los sos dueños, treslladaron la so vivienda de        Valdeporres a Espinosa nel XII (1011), pero tamién ye verdá que los Porres tienen delles posesiones nesta villa como puen ser la Fábrica de "veles de lona" pa los barcos  l'Armada o  La Casona, con capiella dedicada a <Virxe de la Soledá>.  Esti edificiu de planta rectangular con tres plantes ta mui iguau (gracies a Dios). Les ventanes apuntaes , una d'elles xeminada y con escudu, resalten sobro la mampostería que relluz engalanada cola sillería de los vanos. La puerta d'accesu, d'arcu apuntáu, lleva una inscripción lo mesmo que la puerta adintelada de la entrada ya otra nel estragal. Los cubos, los balcones, les ventanes, los aleros, los arcos apuntaos y los escudos asina como'l curiao de la piedra faen d'esta casa una ayalga que me tien enamoráu. 

8.- Torre de Cantimplor (XV). 

Torre de Cantimplor

        Arrodiada de pastizales por tar asitiada na redolada de la ciudá, nel barriu antiguu de Berrueza y cerca la Torre los Monteros alcontramos la tamién conocida como <Casa de Cantinflor>. 

        Esta casona hermética de forma rectangular (18 -10 - 1,20) perteneció en so momento a los abaes de Vivanco y cuenten que tenía un pisu más y taba almenada. Tien la entrada pel sur al traviés d'un arcu oxival de doveles bien llamatibles y mui trabayaes. Magar les igües entá caltién delles saeteres ya escudos asina como dos pequeños aximeces col escudu de los Alvarado del Ribero (castiellu nel que dormió un servidor, precisamente na suit del Señor). El llenzu menor del sudeste caltién un ventanal y dos saeteres lo mesmo que la cara opuesta pero con aximez.

         La casona ta bien iguada rompiendo la monotonía de la mampostería los sillares de les esquines y tanto puertes como ventanes, adintelaes unes ya otres axemizaes o oxivales. 

9.- Torre de los Monteros

Torre de los Monteros

           Esta torre-fortaleza almenada del XIV a la que s'entra pente dos poderosos turruxones qu'abelluguen una puerta adintela con frontón y escudu los Angulo perteneció a los Marqueses de Legarda y tien cierta semeya col Palaciu Alvarado del Ribero. Tres pasar la portona entres nun patiu amuralláu, antoxana de la propia Torre. Llama l'atención qu'esi escudu sía l'únicu blasón y que tea mirando, como homenax, dica la torre de Cantimplor.

        La torre, que fuera almenada, ye de forma rectangular con dos cubos circulares nes esquines y va  alternando la sillería cola mampostería. Anguaño les almenes tán convertíes en ventanes embaxo la cubierta a cuatro agües. La puerta d'entrada a la torre ye apuntada y enriba amuesa un balcón que tamién lleva la puerta oxival. Los llenzos de les fachaes presenten escasos vanos destacando un aximez ya una ventanona adintelada na fachada norte. 

        Esta guapa torre, tán descuidada, foi n'algún momentu casa de ganaderos. N'otru momentu esto pudo entendese pero anguaño... ¡Por Dios, espinosiegos! ... ¿Quéréis iguame esta ayalga?

10.- Cases populares nel Barriu de Berrueza. 

        El Barriu antiguu d'Espinosa ye'l conocíu como Berrueza. Argaiz diz que < cuando Martín Ruís repobló Berrueza yá esistía la Ilesia de Santa María>. Esto vien a indicanos que la so fundación - asina como la del Monesteriu axuntu - pue asitiase na segunda mitá del sieglu VIII. El barriu foi repobláu dafechu ente los sieglos IX y X, cuando la capital del Reinu ye treslladada d'Asturies a Lleón.  Martín Ruiz de Berrueza yera navarru pero nun se llevaba nada bien col rei asina qu'agarró'l petate y coló pa Les Merindades - mandatu real d'Alfonso VI- , nel reinu de Lleón. Establecióse nuna zona espinosiega, nun barriu la parte alta onde ya taben la Ilesia y el Monesteriu. 

    [ Los nuesos protagonistes, Paterna y Selim, arribaron a estes tierres a mediaos del sieglu IX (841), cuando entamaba'l puxu la repoblación nesta zona].

Cases típiques nel Barriu de Barrueza 

            La primer amentación documental a Berueza y a so ilesia data del añu 1075 cuando doña Mayor dona al Monesteriu d'Oña Santa Mª de Berrueza y S. Pedro de Robledo de Valdezamancas, siendo'l testigu principal don Lope Díaz d'Haro. Otru datu a señalar interesante ye cuando Alfonso VII, l'Emperador (el pá d'Urraquina l'Asturiana), dona a Oña (Venga a nós el to Reinu) les propiedaes que tenía en Berrueza (1133). Ye muncha la xente  importante que tien propiedaes per equí. Foi Sancho García, <el de los buenos fueros> el que donó esti Monesteriu - ya otros de la zona - al Monesteriu d'Oña, controláu pola so fiya Tigridia. 

 Sabemos qu'en 1165 entá furrulaba el Monesteriu, seique en manes llaiques. Siguen nos sieglos XII  y XIII les donaciones a Oña por parte d'Espinosa y Berrueza seique los espinosiegos tán fasta les ñaples. En 1293 Berrueza y Quintanilla anden a la tema nel Xulgáu pos pretenden desllindase d'Oña y pasar de parroquianos a Santa Cecilia (n'actual Plaza de Sancho García); los maravedinos qu'aportaba yeren mui llambiones pa perdelos ya  Oña ye munchu Oña. 

Turruxón de los Velasco nel Trueba

        Nel sieglu XIV los Velasco meten el cazu n'Espinosa pos quien facese los amos de toles Merindades. ¿Daisvos cuenta del turruxón que controla el Valle espinosiegu asitiáu nel camín de Santolaya?. 

Nel XVI (1520) Oña arrienda a un vecín del Valle la ilesia Santa María y el Monesteriu - pero nun cede la propiedá - poniéndo-y como obligación que los parroquianos de Berrueza tuerzan el focicu a Santa Cecilia. Oña ye insaciable y tovía algamó a que doña Nuña-yos donase en 1582 dos palacios nel entornu d'Espinosa. Magar Oña, el Barriu de Berrueza espoxigó y son munches les families cabezaleres qu'equí se tienen asitiao. Siguimos cuntando...

11.- Palaciu de los Fernández Villa. 

Palaciu de los Fernández Villa (XVI)

        Trátase d'un palaciu renacentista qu'entamó llevantase nel XVI acopláu a una casona-fortaleza d'época anterior, cuadrada y de tres pisos. Precisamente l'elementu más señaláu ye esi cubu occidental góticu que da pasu al interior al traviés d'una puerta adintelada y abellugada por columnes estriaes que van sofitaes sobro un pódium y rematen nunos capiteles qu'acostinen l'entablamentu.         L'edificiu va organizáu al rodiu dos torres rectangulares (yá van trés) ya un cuerpu central dalgo más baxu, tou ello engalanao con saeteres, puertes y ventanes adintelaes, balcón y solana. 

        Ye un edificiu perguapu y bien curiáu qu'entemez con maestría la sillería cola mampostería. Ta asitiáu a la entrada del pueblu y yo aproveché p'aparcar delantre por aquello faceme daqué importante. 

12.- Antiguu telar de veles pa los barcos de l'Armada.

        Edificiu asitiáu  a la vera del Ríu Trueba, nel Barriu de Berrueza,  bien cerca de la Ilesia de  Nuestra Señora y de la Torre-Palaciu de los Fernández Villa. 

13.- Ilesia de Nuesa Señora de Berrueza (¿XVIII?)... 

Sta. Mª de Berrueza 

        .. Flai Gregorio Argáiz, bibliotecariu del Monesteriu d'Oña, cuenta que cuando Martín Ruíz (XI) - a la tema col so rei de Navarra - recibió l'encargu d'Alfonso VI (1085) d'asitiase nel Val d'Espinosa pa repoblar  y reconstruyir lo que fuere l'antigua Velliga romana y más tarde goda yá esistía nel Barriu de Berrueza una ilesia dedicada a Santa María polo que consideramos que la so fundación podría datase ente los sieglos IX y X. Ye fácil que la ilesia llevare yá adosáu un Monesteriu benitu que tenía 3 ó 4 monxos, dao que les repoblaciones casi siempres diben amparaes pola Ilesia per aciu de pequeños monesterios con monxos de munchu cuayu y valor. Tomemos les pallabres del bibliotecariu : < Martín Ruíz tomó asientu n'Espinosa y pobló'l barriu altu onde taben yá la Ilesia y el Monesteriu de Santa María>. Más claro, l'agua. 

        Tanto'l Monesteriu como la ilesia pasaron  embaxo l'abellugu de San Salvador d'Oña (creáu en 1011 por Sancho García) unos años más tarde  la so fundación pos en 1075 sabemos que Doña Mayor dóna-yos Santa Mª de Berrueza y S. Pedro de Robledo. Tamién Alfonso VII (1105-1157), l'Emperador, doña a Oña dos propiedaes que tenía en Berrueza lo mesmo qu'otros vecinos en 1165. Yera cosa mui corriente ceder propiedaes d'Espinosa a Oña pero a partir de primeros del XIII surden conflictos ente ellos porque los espinosiegos prefieren ser parroquianos de Santa Cecilia d'Espinosa que de Oña. (<Diste en fierru, manín. ¿Perder 80 maravedinos de renta?... ¡Tilí, tilín!>). 

Sta. María de Berrueza. Interior.
(Semeya robada al blog: <tomas-misfotos.com>)

        La Ilesia de Santa María ye mui cenciella. Ta fecha en mampostería sacante nos vanos,  esqu

ines y l'ábside abovedáu - con dos bonos contrafuertes - que van de tosca sillería a base de "soga y tizón". A la puerta principal s'accede al traviés d'un pórticu de triple arquería . Algunes ventanes tán abiertes con arcos de ferradura, tipu visigodu. Adosada lleva la Capiella de San Xurde colos restos de Ladrón de Guevara y la so muyer Zorrilla Arce, casi nada. Onde taba'l Monesteriu anguaño ye un Centru de Salú. [Él lladrón y el zorilla y tán enterraos na ilesia. Que venga Dios y los vea].

        Nel interior hai un baldaquín nel presbiteriu con una imax de la Virxe María, patrona del barriu de Berrueza. Tien dos retablos nel capielles los lladrales asina como una capiella funeraria. 

14.- Torre de los Ferradores. 

      Mui cerquina del Trueba y de lo que fuere la Fábrica de Veles pa l'Armada acolumbramos nuna pandiella esta torre solitaria arrodiada de vexetación. 

Torre de los Ferradores

        Trátase d'una torre-fortaleza de planta rectangular llevantada en mampostería con sillares nes esquines, nos vanos adintelaos  y doveles nel portón d'entrada, un pelín apuntáu. Sobro la mesma una  saetera, zorramplona, amuésanos esi calter defensivu de la fortificación. Añguaño queda entá más mazcaritada por mor del escudu que la sobrepón.

        Los vanos nun son munchos y tán un tanto desiguaos por mor de les diverses remodelaciones que sufriere esti turruxón. Vese que cola fin d'enguapiala abriéronse delles ventanes qu'engañen a la vista produciendo un efeutu gayoleru de vanos aximezaos. 

        La Torre de les Ferradores - pos conozse ansí tamién - ye xunto la Torre de Cantimplor y la Torre de los Velasco los únicos turruxones medievales defensivos que queden n'Espinosa los Monteros. Los dos primeros camudaron les almenes por modernes cubiertes a dos agües de teya árabe. 

    -<Yo toi contigo, Velasco, les almenes fáenme esnalar sobro la Edá Media talo fuere un  Bruxu, ¡Quini!>. 

15.- Torre de los Velasco o Torre de la Riba: 

        Controlando, ferregüeyando'l Val d'Espinosa, dende una llomba asitiada sobro'l Ríu Trueba, llevantaron los Velasco un turruxón-fortaleza col envís que nun se colare nin dios en dengún de los dos barrios del pueblu: Quintanilla y Berrueza. Foi eso nel sieglu XIV cuando esta familia, enferronada en dominar toles Merindades tiense asitiao nesti valle tan prometedor. Si quies averate a elli pues facelo viendo dende Sotoscueva (Güeyu Guareña) pela carretera BU-526  y saliendo a Para p'algamar la torre. D'otramiente, si vines d'Espinosa pues cruciar la Ponte Ilustre sobro'l Trueba y tirar dica Santolaya; ensiguida l'alcuentres pel camín. 

         Esti turruxón, Ilustre, de mampostería y sillería ta compuestu de dos partes: una, la propiamente torre rectangular ya otra anexa, más baxa, que facía de caballeriza.  Ye l'únicu d'Espinosa que caltién les almenes defensives por ello ta consideráu como'l símbolu por escelencia de la ciudá.  Los Velasco llevantaron esta torre nel sieglu ¿XIV? sobre otra en ruines que yá esistía, seguramente dende l'escomienzu de la Repoblación magar hai daquién qu'asegura  que tamién los moros tuvieren llevantao ellí daqué. Nun ye d'estrañar dao la  situación privexada que caltién. Nos sos entamos tenía una galería qu'arrodiba dafechu'l turruxón. P'algamar al pisu noble de la torre ascendíase per una subidoria (patín) esterior, talo los horros. Tampoco lo que nun falta ye l'escudu la familia, daquella un pelín primitivu. La torre primixenia foi ampliada n'altura nel sieglu XVI. Anguaño, esta propiedá privada, ta un tanto desdexada; una pena teniendo en cuenta lo que representa pa la ciudá.

        Dende'l sieglu IX l'advocación a Santiago foi una constante en tola España cristiana y Espinosa nun foi la esceición. Paez ser que na zona de La Riba, nel Barriu de Quintanilla, tres del turruxón Ilustre, tiense llevantao un monesteriu embaxo esta advocación y patrociniu de los Velasco. Anguaño namás queda'l nome del pequeñu Regatu de Santiago que baxa de Santolaya. Pero l'enfotu de los Velasco pa  con Santiago queda reflexáu nuna ermita amestada al Palaciu de los Marqueses de Les Cueves de Velasco, un pelín más p'abaxo que foi llevantada en tiempos de Felipe IV (XVII) por un tal Pedro de Velasco, ayu de Xuan Xosé d'Austria (fíu natural del Rei y la Calderona). 

.  

        [ A min faime tilín esti turruxón porque ta camín de Santolaya - l'orixe , probable, d'Espinosa -  y porque los protagonistes de les nueses aventures peles Merindades - Selim Marwán y Paterna - tuvieron per equí a mediaos del sieglu IX falando colos guardies d'aquel primerizu turruxón. Nun convién escaecer qu'agospiaron nel Monesteriu qu'había al par de l'actual iglesia.]

 

Escudu de los Velasco: 

        El clásicu escude español, rectangular cola punta arredondiada ya una bordura considerable y engalanada: 

< Xaquáu de quince pieces d'oru y veros (8 + 7) con bordura variable: en gules con aspes o souter d'oru o coles armes de Castiella-LLeón, alternatives, como nel casu del Ducáu de Frías, que pertenecía los Velasco. >

16.- Casona de los Marcide:

Casona del Xeneral Marcide
(Semeya:mapio.net)

            Nel barriu de Quintanilla, xunto la Ponte Ilustre hai una casona en sillería isódoma (sillares iguales) de planta en forma de "L" y patiu recercáu conocida como la "Casona del Xeneral Marcide".  Dende'l patiu - cubiertu y embaldosáu -  éntrase na casa per aciu d'un adríu de columnes con éntasis (más flaques na parte superior). 

      Foi llevantada nel XV con elementos góticos y renacentistes. El portón d'accesu ta conformáu por un arcu de mediu puntu y enriba lleva'l bultable escudu familiar. A entrambos llaos lleva un balcón de fierro forxao ye un ventanal adinteláu protexíu tamién por un balustre de fierro forxao. 

17.- Palaciu los Marqueses Cuevas de Velasco:

Palaciu de los Marqueses "Cueves de Velasco"
Capiella de Santiago

            Lo primero a tener en cuenta nesti edificiu ye que ta compuestu de dos partes: El Palaciu y la Capiella  de Santiago.     

        Esti palaciu en mampostería tien trés pisos marcaos por llínees de'imposta de sillares. Tamién presenta sillería nel frisu, les esquines y los vanos.  L'accesu a la casa faise al traviés d'un arcu mediu puntu ente pilastres. La fachada contigua a la entrada la capilla ye una virguería con un mirador mui trabayáu, vidrieres y ornamientos de ferrería.

        La capiella ye una construición de calter clasicista con arcu de mediu puntu y moldura de trés faxes ente pilastres. Entamó facese nel añu 1632 por orde del Rei Felipe IV como regalu a Pedro Velasco que s'encargare de la enseñanza del so fíu natural, don Xuan Xosé d'Austria. Y bien que lo presumíen pos tienen el so escudu esculpíu per delles partes. 

18.- Casona de los Velasco: 

        Trés d'una verxa de fierro forxao asitiase una guapa casa metanes d'un xardín de los más curiao. Siguimos tando nel barriu de Quintaniella cerca de la carreterina que nos xube a Les Machorres y a Llunada. 

19.- Ilesia de San Nicolás:

Nave, presbiteriu y Retablu de S. Nicolás.
(La semeya ye de Tomás)

        .. Consagrada nel sieglu XII tuvo de ser reconstruyida nel XVII. D'aspeutu mui primitivu esta ilesiona en mampostería tien una nave sola y la techume va  cubierta a dos agües. 

        Ye mui valoratible'l retablu góticu del XV con  pintures de flai Alonso de Zamora, monxu d'Oña, onde causa almiración una de les poques representaciones del Espíritu Santu en forma de muyer. Ta  dividíu en trés cais y sofitáu sobro un bancu o predela partíu en cinco espacios. Esti retablu taba dividíu per aciu d'una cruz (queden les güelgues) que foi llevada pal Monesteriu d'Oña del que dependía.

Llama l'atención la pila bautismal de forma cuadrada asina como un conxuntu de casulles bien antigües. 

 

20.- La Cabaña 

        Ta asitiada al entamu del Barriu de Quintanilla, al cabu del Paséu de la Castellana, que separa los dos barrios d'Espinosa: Quintanilla y Berrueza. Tamién ta mui cerca de San Nicilás. 

                ... 

21.-  La Torre Chica

        Lo mesmo podemos dicir que pa La Cabaña pos tán casi pegaes. Barriu Quintanilla, Paséu la Castellana. Cuando torne a Espinosa (tengo de volver, nun me queda otra:Bolos, Teatru popular medieval, Les Machorres, La LLunada ya unes cuantes Casones nes que tuvi tiempu reparar) daqué semeya vos tengo d'amosar. Siempres me queden deberes por facer; yo creyo que ye bona cosa, ¿non? 

                ... 

 22.- La Quinta México

                ... Ye una casona impresionante de planta rectangular y  col teyáu a dos agües que ta  llevantada en mampostería -  qu'anguaño ta cargada -  pero que caltién una sillería perguapa nos vanos adintelaos; sicasí tamién presenta dalgunos de mediu puntu que ruempen la monotonía de les fachaes. Una d'elles ta arrodiada d'un bultable alfiz que lleva un escudu del sieglu XVI.

ESTIMANCES:

Un monteru
 sportinguista. 

.. A Mariano Cano Gordo por "Las Merindades de Burgos", guía los nuesos suaños.

. . A Fernando Corella pol so llibrín: "Así nació la Guardia Real", una gociada pa un Maestru. Róbote delles semeyes, Fernando.

..  A Mª del Carmen Arribas Magro pol so llibru: "Espinosa de los Monteros. Los Montes de Somo y de Pas". Préstame a esgaya, señora; ye un llibru onde nun aparo de  consultar. Gracies.

. . A dellos blogs y páxines web, talo:  <LaLiga Sports> .  <Todocolección> .  <Lasmerindades.com>.  Al <condadodecastilla.es> A la páxina web d'Espinosa los Monteros asina como a la chica que nos atendió tan candial nel  "Muséu de los Monteros". 

A <Castillos del olvido.com>. A <Asturnatura>. A <castellavetula.wordpress.com>. A <Las 7 merindades>. A <berrotza.com>. A <castillos.net>. A <tomasmisfotos.com). A <espinosadelosmonteros.burgos.es>. A <wikiburgos.es>.  A <www.espinosadelosmonteros.es>. Al semeyeru <Tomás b >. A <mapio.net>

.. A la wikipedia, como siempres; veneru inagotable del saber. 

.. Mientres escribo estos spots al rodiu "Les Merindades" toi lleendo al tiempu estos llibros: <Ziryab. El despertar d'Al Andalus> de Jesús Greus y <Ecos de Bardulia. El brazalete dorado> de Juan R. Moya. Entrambos tán aportándome muncha información, el primeru sobro l'emiratu d' Abderramán II y el segundu sobro la Bardulia en tiempos de Hixam I. Nin que dicir tien qu'Alfonso'l Castu siempres ta presente.