sábado, 20 de junio de 2015

Esguilando pel escobiu Los Arrudos


                                   PEL  ESCOBIU  LOS ARRUDOS  

                                 << Ríu y vientu, vientu y ríu 
                                          el roquéu de Los Arrudos >>

¿Quies siguime pel fayéu de " Los Arrudos"?
          Cuando empencipiamos con esta xera siguiendo  "El Camín de Niria" buscamos información sobre daqué cenciello, siendes catalogaes o perestudiaes que caltuvieren material gráfico ya escrito pa evitar problemes d'antemano. Había coses per casa, amás de les PR - AS que siempre tenemos n'internet, pero dimos con esta ayalga qu'encamentamos a tolos aficionaos: "32 razones para ir al monte con niños" d'Orlando Merás, un médicu que tevo la montaña por bandera. Nós tenémoslu a elli. Allá onde teas, Orlando, tómalo como un homenax. Y has saber que, pasu ente pasu, vamos percorriendo los caminos que tantu te prestaben...

Nun t'esmolezas, del agua La Fontona tas tu bebiendo en Xixón.
           _Sienda "Los Arrudos: Caliao-La Fontona (PR AS-61)     
. Situación: Parque Natural de Redes, nel conceyu de Casu.
. Desnivel: Ente 400 m (Ärea Recreativa Caliao) y 1050 m (La Fontona)
. Tipu de ruta: Ida y vuelta
. Percorríu: Unos 12 km en total
. Tiempu relativu: Unes 4,5 Hores (2,5 h + 2 h ) .
. Dificultá: Baxa con reparos. Tramu caberu pindiu y resbariosu, en moyao. ¡Güeyu al guah.e!

Track del llibru d'Orlando Merás

         Yá tuviéremos per "Los Arrudos" va un tiempu, un añu aproximao. Muncha xente comentó al rodiu una semeya que colgamos nel facebook . Ún dellos foi'l nuesu collaciu Jesús que, por mor del trabayu, ta asitiáu en Girona:
         - "¡Tenemos que faer esa ruta cuando vaya a Xixón!". Neses tamos.

La Campurra, sentimientos tapecíos.
* La "Campurra" foi, non, ye una máquina vapor  que carriaba'l carbón, a la vera del Nalón, dende Riosecu fasta les Tolves de la Estación de Pola Llaviana, onde se llavaba enantes de salir al mercáu de Xixón. De primeres - falamos de 1917 -  yera un tranvía tiráu por mules dende Llorio. Foi diez años más tarde (1927) cuando se mecanizó llegando hasta Riosecu. Podía llevar xente pero nun podía pasar de ¡ 8 km/h ! .... (¿Tendría un motor Mac Laren-Honda?).
 
Un coche coh.onudu pa ganar...¡ el CIELU!
         Un coche pistonudu pa esguilar pelos Arrudos: Fiable, estable, perguapu y...¡d'otra dómina!
 Non ensin antes remembravos que la primera carrera oficial que ganó Alonso - siendo un cabritín - foi en Pola Llaviana. Ta visto que los polesos tenemos la velocidá nel sangre : ¡8 por hora!
         Dexó, la Campurra,  de facer serviciu a finales de los sesenta......   Esta maquinona que nos acompañaba pela carretera (¡qué gochaes me tengo pegao cola bici por aciu les víes! ) ye dalgo más qu'un artiluxu mecánicu: Ye un símbolu d'una domina, la del carbón, na que nós tamos envolubraos dafechu. Tola familia trabayó pa sacar carbón y el que non tastiábalo, respirábalo....
¡Chucu, chucu! ¡Chucu, chucu!...... Esti soníu y esi caminar lentu invitaba los guah.es a garralu darréu parase  delantre la Escuela..... Pero había que tirase en marcha.... ¡Piiiiiiiii.....! Ni puñeteru casu. A ver quién ye más valiente...Y pasó lo que pasó...¡Qué burrinos yéremos!...
El nome vien-y d' El Campurru, Constantino Blanco, un rapaz de Tiraña. Más tarde vendió al catalán Fradera ( les mines de Fradera).

          Darréu garrar el pan na "Tahona de Vega" pasamos a recoyer a Jetu na gasolinera Xove. Nel Llano empobonámonos dica La Minera teniendo na mente Campucasu. Nun se nos escaez aquel viax nel tiempu que ficimos en bici, a la capital d'esti concxeyu, acompasaos un bon cachu pola Campurra Dexamos atrás Llaviana, El Condao y los embalses de Rioseco y Tanes, remate del Parque Redes.


Coballes

           En Coballes abandonamos la xeneral ( A-217) y cruciamos la moderna ponte sobro'l Nalón , onde termina la presa de Tanes, en direición Caliao (720 m); dalgo más de 6 km. Enantes d'entrar nel pueblu, a manzorga, un cartelu indicativu empobínamos dica l'Area Recreativa . Como a doscientos infernales metros (¡coño, cómo nun asfaltáis esto, ho!) , al par de la Ermita San Antonio, tenemos un sitiu acondicionáu p'aparcar. Guapu requexu pa merendar dempués de visitar el pueblu y l'Ecomuséu. Otramiente tienes bien onde xintar nel pueblu: Na "Tierra del Agua", na "Encruceyada" o en "Casa Zulima". Nel Centru d'Ecoturismu de la Tierra L'Agua pues agospiate unos díes pa escaecete del mundu o pa conocer l'entornu.

Caliao dende l'aparcamientu
           Son les diez y media (10:30) la mañana y preséntase un día soleyeru de lo más prestoso. Amás lleva varios díes ensin llover y el camín va tar ensuchu; lo meyor pa facer esta ruta porque cuando ta moyao l'últimu tramu - dende'l Puente la Calabaza d'Abaxo (tamién hai d'Arriba) a La Fontona-  ye enforma peligrosu por aciu les nidies llávanes que conformen la escalera. Moyao, meyor dexalo pa práu. Pero nun ye'l casu... San Antonio ta con nós y agradecémos-ylo con una semeya ya una plegaria.

Ermita San Antón
 El camín ta mui cuidáu. A lo primero va de tierra no llano o formigón no pindio. Ta fecho col envís que los toterrenos y tractores tengan accesu francu a les finques. Camudar la naturaleza, lo menos posible. Los casinos siempre tuvieren fama de llistos.
Y de ricos, too hai que dicilo. Pero lo más prestoso ye venos enllordiaos n'aquella naturaleza. ¡Qué pasada!

Nun ficimos qu'entamar y nos primeros praos del valle qu'alcontramos  dimos con unes vaques, non mui grandes, que del color crema claro tiraben hacia'l roxu. Colos cuernos hacia fuera y vueltos p'arriba nun teníen pinta que nos fueren atacar. (La última esperiencia que tuviere con vaques nel palaciu de Peón, por mor d'unes semeyes, foi saltar un sucu a lo Yago Lamela ). De fechu ehí tenies la preba:

La casina vien a la mano, ye una amiga.
    La casina ye una vaca de raza autóctona del conceyu de Casu- magar que tea estendía per otros llares de la cornisa Cantábrica- pero de probable orixe indoeuropéu. Mui apreciada polos ganaderos por aciu la so polifunción: bona pa trabayar - ¡qué carraos de yerba baxaba mio güelu per aquelles caleyes de Dios!! -, productora d'una lleche rico en grasa - ¡qué mantegues, güela, y agora esta puta lleche desnatao...!- d'onde sacamos los quesos Gamonéu, Los Beyos o Casín. Pero güei día seique lo más apreciao sia la carne ( esi xatu al añu que caltenía la economía de subsistencia familiar). La "Carne de Casín" con denominación d'orixe "Ternera Asturiana" ye lo que comieron tol añu los xugadores del Sporting que acaben de tornar a Primera por mor d'un Pitu Caleya al que nomen Abelardo.
La casina o asturina de montaña entemecióse, dende los años 80 y 90 del sieglu pasáu -¡ h.oder, qué vieyos somos!- cola mui asemeyada asturiana de los valles col envís d'ameyorar la raza y faela más competitiva. Cuntonos Bernabé, espertu que trabaya na Cooperativa d'Agricultores de Xixón, que los gües culones de l'Asturiana de los Valles cruciase coles nuvielles Casines pa criar unos imponentes xatos culones que, por aciu la madre, comen bastante menos que les de Los Valles.  El resultáu d'esta meceura tenéislu a la vista:
Con ales de Pitu caleya 
y Asturiana la Ternera....
 retomamos la ¡PRIMERA
 
            Vamos averándonos al Riu Los Arrudos que recibe l'agua de dellos regatos a lo llargo de la foz.  Güei día salvámoslos con puentes de madera . Antaño p'arreblagar los tabayones o distintos desniveles de la roca emplegábense unes escales de mano; sí, ¡de mano!. Unes pértigues de carrascu, d'unos dos m. y mediu (2,5 m), con unos travesaños curtios a mou de peldaños : ¡los arrudos!

"LOS ARRUDOS", un mesón na Calzada. Búscalu.

       Enseguidina topamos la primer ponte: Ponte Xenra, sobro'l regatu Pasera. Un suspiru y otra ponte: la Ponte de Riufresnu- ya nel ríu Los Arrudos- que nos mete nuna garganta, el Saltu Rodrigo, ente la Peña Corona  y la Peña Los Roques. Metanes la mesma damos con un antiguu molín reconvertíu,  con gustu, en cabana fin de selmana. En piedra visto, como nun podía ser d'otra manera, caltién aperios de llabor -espuestos talo un muséu - que s'emplegaben va cuatro díes.

El Molín de la Ponte Corona
         A la vera'l ríu siguimos pasu ente pasu. Viesca de ribera na media montaña - bidulios, umeros, ablanos, salgueres, fayes,castañales, fresnos...-  y una fonte-abrevaderu . La Fonte d'Agualmayu, que surde d'una roca, condúznos dica les Cabañes d'Agualmayu; en piedra y madera.
         No abierto la vallina alcontramos el Mayáu de Fresneo. La boca de la foz nun anda lloñe.

El Mayáu de Fresneo
*El fresnu (fraxinus excelsior), mui abundante nesta sienda, ye un árbol plani-caduci-foliu de fueya compuesto, imparipinnao - 9 a 13 foliolos (fueyines) ya opuesto. De corteya pardo y fendío pue alcanzar fasta 35 m. terminando nuna groma ralo ya ovalao. El so nome provién del griego "phraxos"=sebe (emplégase como zarru) y del llatín "franguere"=francer (esguaya fácil). Ya "Excelsior"= mui altu. 
 

Ye un árbol monoicu - flores machu ya fema nel mesmu pie - y polígamu (¡pillín!), ye dicir, amás de flores machu y fema por separao tienles hermafrodites: estames y pistilos na mesma flor. Nun hai peligru que se desanicie. Les flores- uni o bi - aprucen enantes que la fueya ya escaecen de sépalos ya pétalos, talo que les ximnospermes. Tienen dos estames ya un pistilu. Florez n'iviernu per aciu del vientu y madura a lo cabero'l branu.
  El frutu ye una sámara allargada col biltu dientro.

 
         El frenu ye un árbol mesohigrófilu, gústa-y el clima templáu y el tarrén llentu (húmedu) y fondu sobro sustratos básicos (ricos) magar que, agradecíu a tope, tamién espoxiga nos ácidos (probres). A la vera los ríos ye fácil velu curiar les truches colos sos collacios : umeru (alnus glutinosa) y llamera (ulmus glabra). Tamién ye corriente atopalu cerca les cases o les cuadres por aciu la fueya, con propiedaes diurétiques, llaxantes y antirreumátiques. El ganáu sábelo, por eso ramonea d'ello.


A la solombra d'un fresnu
 tomábemos la parva
 en casa mio güelu.
La madera - fuerte, flexible y fácil de trabayar - emplegóse pa facer preseos: gaxapos, estiles, xugos, garabatos, collares o raquetes p'andar pente la ñeve. Pol so guapu vetiáu vese tapizando muebles. Doi fe d'ello.

           Amodo vamos avanzando pente la tarmuda vexetación, siempre col ríu como compañeru. Práuticamente llano y en solombra permanente nun pasamos gota calor. ¡Qué suerte tenemos col día!

La ponte d' Agualmayu
          Anda, que yá nos llovió bastante esti añu. La pena va ser que dalguna pequeña cascada, que nos clisare la vez anterior, nesta va dexanos a dos veles. Pero vosotros nun vais quedar naguando; téngovosla guardaina..... ¿Qué? ... ¿Saldrá la Xana a ligar?... Falta poco pa san Xuan...¡Qué surdencia pa Malinos! ¡Qué casina de Busgosos tapecíos!...

Agua y piedra, piedra y agua
embaecen esta ayalga.

      Tantu agua faieme remembrar l'entamu d'un poema d'Almuzara: "Al marxe de la vida"
           << Quiero esti quietu instante repetíu
                 a la vera del ríu que nos lleva
                 y ver pasar tol agua que se queda
                 esperando'l mio tácitu cadabre >> 
   Pos sigui esperando, monín, qu'entá nun t'acompaño. Sigo'l ríu escontraforga... Voi Camín del cumal fonderu. Amás, preciso prebar les mios fabes...
   *Javier Almuzara ye un poeta uvieín ( naide nun ye perfeutu) qu'algamó'l premiu de poesía "Emilio Alarcos" col poemariu "Constantes vitales", onde tan incluyíos estos versos en castellán.
 
            Ocho pontes vamos topar; fasta diez, dicen algunos... Tamos faciendo eses. Dellles veces dexamos el ríu a mandrecha y otres a manzorga. Otru puentín de madera.

Na ponte "La Fuminosa", l'antoxana del Cañón
         Los inxanos, que nun siguen el camín de los humanos, van faciendo equilibrios per pasos como esti:

Pasu d' inxanos, Malinos
 y tola triba vecinos.                
Nes viesques del Parque Redes pues alcontrarte con cualisquier ser mitolóxicu que te pueas imaxinar: Al Busgosu, la Xana, el Cuélebre, el Nuberu, la Llavandera, el Diañu Burllón o al Trasgu... Pero del que tenemos anuncies bultables ye del Malinu. Sábese qu'esti invisible espíritu malín tien la mala costume de colase nes fontes pa prevocar enfermedaes a les persones. ( Tengo que dicir que ye de les poques rutes que nes fontes nun reza dengún cartelu que nos torgue beber. Nunca nun vi: "Agua non potable". ¿Sedrá que'l Malinu los escuende pela nueche?) . 

Gatu prietu, escontra'l Malinu  inquietu.


Ye perconocía la historia d'una muyer de Caliao qu'enlloqueció dafechu por beber agua d'una fonte camín de Los Arrudos:
<< Reunióse'l pueblu enteru
nuna campa solitaria
teniendo como testigos
gatos negros qu'amiraban.......
Sobro'l tocón d'una faya
fueya verde
 y una servilleta blanca. 
Ya escuchaos Cura y Maestru 
al Alcalde se la encargan :
Por un tiempu
tienes tenela enzarrada.
Como cuartón nun había
nun horru tevo trancada.


Pasó un tiempu la paisana 
tomando llechi y boroña,
nin que lo tomare a coña,
la llocura nun pasaba...
Dieron-y fueya de fresnu
 a ver si al purgar lo mexaba...
 El mal siguía nel alma. 
Un guah.e mui esmirriáu 
 que to aquello escuchaba
 dixo mui aplomáu
 que'l ayu tolo curaba;
que-y lo dixera so madre 
que pa l'anemia-ylo daba:
o arrevienta o sana.
 Ansí llibró la cristiana,  
col ayu vino-y la calma.
        ¿Nus quies tu un pocu d'ayu
         pa tornar l'aliendu al alma?>>

              Un cartelu informativu desplica el porqué de Los Arrudos, esa escala de madera qu'emplegaben los llugariegos pa vencer tanta peñea. Tamién nos da una pista xeolóxica:    
       L' escobiu Los Arrudos escávase sobro materiales caliares ( ¿d'aú vien el nome de Caliao ?) y cuarcíticos a los que corta tresversal permitiendo'l drenax d'una cuenca, d'unos 12 km, que presenta surdencies  d'agua que remanecen nes calices de la formación Barcaliente.

 
       
         Darréu tomar nota'l panel volvemos cruciar el ríu y, per una pista estrencha, algamamos a la cabaña de Prendeoriu.

Cabaña en Prendeoriu
          ¡Uf! Toi secu.... Magar la tarmuda vexetación que nos abelluga tol camín vamos sintiendo sede. Pero güei ye un día de suerte... Cuatro pasos.... y ¡una fonte!. Esto ye cosa de duendos...

Nos Arrudos bebes agua puro
si t'atreves desafiar los "Malinos"
Los calzones del cuquiellu.
 Ahora entramos nun senderu de montaña que nos ha llevar a una ponte madera, colingando metanes la foz, y qu'acolumbramos dende lloñe. Una varganal que nos sirve de sofitu un instasnte pon-y el marcu a estos calzones de cuquiellu. 
 * L'aguileña  (Aquilegia vulgaris), conocida n'Asturies como Los calzones del cuquiellu, ye una planta ranunculacea de pétalos viola qu'asemeyen les garres d'un aigla. Guapa y munches coses más ... Antiguo emplegóse p'ameyorar l'apetencia, pa miccionar o sudar abondo (yo quédome colos cafés de coñac a los que m'obligaba mio madre por mor de les gripes), escontra l'escorbutu y .... Hai quien diz que, coles semilles, se tresnen perfumes afrodisíacos.... Les cortesanes sabíen d'esos poderes poro les vestales romanes teníen que refugar el so contautu... Esta flor - l'aigla -  ta nel escudu d'armes de la Casa de Guisa, en Francia. Por algo sedrá... Nun sé si meteles na ensalada la próxima vegada... Pa la fame nun hai pan duro...
               
L'aigla - los Calzones del Cuquiellu - nel escudu d'armes del Ducáu de Guisa

          Da un poco repelús la ponte La Calabaza.... El saltu ta bien fonderu pero los xuegos del agua pente bayura de piedra consiguen escaecer la medrana de l'altura.

¿Paso o nun paso esta ponte colingante? 
Si paso, La Calabaza d'Abaxo,
 toi de plano en Barcaliente...

            Agora podemos dicir qu'entama el verdaderu escobiu Los Arrudos. Piedra y más piedra. Caliza.  El camín tórnase pindiu y, a vegaes, ta talláu na roca. 
L' Escalerón

 Ye'l tramu más impresionante (nun dixi'l más guapu, ¿eh?). Ye la zona les cascaes, los tabayones ... Equí sí qu'habíen usar los arrudos pa escalar. Un poco peligroso pa los guah.es masque tea acutao por barandielles. La caliza toma postures inverosímiles.

¡ I love you !
  Más qu'andar tenemos qu'esguilar. Tardamos cerca una hora n'arribar al Collaín. ¡Qué aliviu!. Precisamente equí vomos xintar a la vuelta. Meses y asientos naturales a plena solana. L'aire fresco torga la insolación. Y l'arrecendor de la tortiella invade la collá. Al empinar el coldu acolumbramos el fayéu de Los Arrobellaos sobro'l mayáu d' El Roxecu. A mandrecha un cartelu indica l'ascensión al mayáu del Robre.

              Yá tenemos la Fontona a tiru piedra, nunca meyor dicho. Un manancial nel barrancu del Robre  acutáu por una presa. Cuatro pasos y l'edén. Rises d'agua que salta  inundando una vallina tamizada ente'l fayéu. Tarmuda naturaleza. El banzáu artificial, maquilláu por líquenes y mafa, queda integráu dafechu naquel paraisu natural. D'esti agua cristalino tamos bebiendo en Xixón; bendita ocurrencia, señor. Con un artiluxu modernu tomamos unes semeyes. Sí, dalgo que s'asemeya. La realidá nun me la dibeis creyer... ¿O sí?.....



¡Qué sospresina, eh!... Con esto nun cuntabes... ¡Tas de plano nos Arrudos!... Y ensin movete de casa... ¿Y si vinieres?... ¿Nun quies falar cola Xana?... ¿Dexate guiar pol Musgosu?... ¿Enredar con daqué Trasgu?... Escucha'l burbús del agua y esnala per esti escobiu...

* De la Fontona sal una tubería que. tres recorrer 56 km., lleva l'agua hasta Xixón dende l'añu 1950. Tien un caudal de 200 l por minutu, ye dicir, 700.000 l/hora.

          Escaecióse'l cansanciu. Amatagamos la sede con una mirada aliella.. Semeyes y más semeyes col enfotu d'integranos naquel ambiente. Nun apetez colar. Cruciamos la ponte sobro'l banzáu y anduviemos un cachu pel fayéu que va al Roxecu. Más alantre el Llagu Ubales... Pero esto sedrá otra vegada. Un día mui tempraneru cuando teamos asitiaos en Llaviana. Tenemos un pruyimientu: Percorrer L'aldea perdida y toa la redolada... Y cuntávoslo, collacios, que por mor d'eso alicamos...
         Agora vamos xintar; tenemoslo merecío. La poesía da pasu a la prosa ... Xamón, chorizu, tortiella y pan de Vega, que por aciu del Malinu regamos con vinu Ribera. 
        Hai que tornar...

¿Qué tendría fecho Vincent Van Gogh nel fayéu del Robre?
           La faya ( Fagus Sylvatica) ye un árbol plani-caduci-foliu, mui abundante nel Parque Redes, que pue alcanzar los 40 m. d'altor. De tueru reutu, corteya nidio y buxo claro tien una groma trupo y globoso. El nome vien-y de Fagus=frutu comestible y Sylvatica=selva, propensu a faer viesques. Los fayeos de Redes (10.000 ha.) son los más bayurosos y meyor conservaos de la C. Cantábrica; hasta lleí que d'Europa.
Estes viesques misterioses danse nes zones altes - 600 - 1700 m) con abondoses precipitaciones. Poro prefieren les fasteres avesíes y los espacios onde la borrina l'estivu caltien la humedá que precisen. Pa recoyer esti agua tienen nel marxe la fueya unos pelinos sedosos. Adáutase tanto al suelu siliceu como caliar mientres sía fondo y fresco.
Ye un árbol monoicu - flores machu y flores fema nel mesmu pie - que florez na primavera y frutia pela seronda por mor d'una polinización entomógama (inseutos). L'aqueniu, de forma piramidal, ye comestible en pequeñes cantidaes por aciu de daqué tóxico.


Fueya y amentos ( ^ ) de la faya
          Al dar la vuelta al camín, embaecíos naquel edén, nun dexamos de preguntanos cómo entamaría too....
          ¿Sabemos? - porque xurgamos - que'l Parque Redes, dende'l puntu de vista estatigráficu, tien bayura materiales estremaos tanto pol so orixe y composición como pola dómina na que fueren depositaos. Ta situáu al sureste de la zona Cantábrica, la más estensa de les zones xeolóxiques nes que se divide el macizu Hercinianu Ibéricu, y forma parte de la nomada rexón de Mantos, al este de la Cuenca Carbonífera Central.
El roquéu Redes ye d'orixe sedimentariu marín, sobremanera, de la dómina'l Poleozoicu ente'l Cámbricu (540-485 Ma) y el Carboníferu (340 ~ 230 Ma).  ¡Vale, tío!
Los sedimentos depositaos sufren oroxenies, levantamientos, como'l de Riego. Digo yo que nun deben aguantar enriba tantu pesu y tantu tiempu. La zona Redes tevo dos "pronunciamientos". La Oroxenia Herciniana o Varisca y la O. Alpina.

Oroxenia humana. ¿O son coses de trasgos?



Nel Carboníferu francióse superponiendo les roques y tresformando la cuenca sedimentaria marina na cordillera Varica. Col tiempu y la erosión volvió tornase aplanada quedandao, en parte, somorguiada embaxo'l mar na Era Mesozóica (250~65 Ma). Y claro, más sedimentos enriba. Y otru pronunciamientu: la Oroxenia Alpina (50~10 Ma). Estos nun andaben con bromes, 40 millones d'años levantiscos. ¡Ansí me gusta, h.oer! Ye neto qu'esta oroxenia tevo tiempu a alzar los Alpes, los Pirineos, el Himalaya...
La erosión diferencial - por mor de los diferentes tipos de sustratos- va emburriando los materiales dica la cuenca'l mar Cantábricu dexando pel camín los arispios relieves que disfrutamos nel Parque.
Cuando teas pel escobiu Los Arrudos alcuérdate que millooooones d'años d'erosión dexaron pa ti esta virguería. Nun la h.odas, pero ámala.
  Bueno, esto ye lo que me cuntaron ,y debe de ser verdá, porque los xeólogos paecen xente cabal. Igual había que tirar más d'esti tetu a la hora faer carreteres y d'otres xeres.

Coincidencia:
Al xubir per Los Arrudos esguilamos a PRIMERA.
La OFICIALIDÁ ¿sedrá la próxima xera?.
Mentanto, equí siguimos de ¡FIESTA!

Añu bonal - 2015 - pa los equipos cabezaleros asturianos. ¡Ñorabona!
Y si la bota se tuerce
y nun somos meter un gol
traemos a la Kardasian,
ta cedida en New York.
Y tamién ta acostumada
a tastiar xatu culón.
¿Nun crees que Messi y Ronaldo
suañarán col Molinón?

La galáctica del  branu. La xana d'un bon asturianu. El postrer fichax roxiblancu .
 Será por perres.. ¡Puxa, Sporting!
          Si me suiguisti hasta equí
          bien mereces una rosa,
          pero esta téngola acutada
          pa la neña más prestosa
          ente Xove y La Calzada.

Te la tienes merecida, Evi.  Esta rosa ye pa ti que suañasti cola ruta. 
¿Prestóte? ¿Nun te petez repetila?
Ctrl Fn + Aniciu
                                             AGASAYOS     
   Si dalgo tien esti blog de prestoso pa min ye que me permite conocer bayura d'autores de palos bien estremaos: flora, fauna, lliteratura, cocina, pintura, escultura, arquitectura, xeoloxía, senderismu.... Esta vegada anduvi rebuscando per:
. "Guía de los árboles d'Asturies" de Bertu Ordiales y Guillermo C. Ruíz, collacios de mochila (siempre van conmigo). Autores tamién de: "21 rutes de Senderismu per Asturies".
. Cuadernu de Campu "Parque Natural de Redes", de les Rutes Botániques pol Cantábricu, editáu pol Xardín Botánicu Atlánticu. Nun alcuentro pallabres p'agradece-yos al Botánicu y a les guíes que nos embaecen na Naturaleza : Ana y Ángeles, los sos conocimientos y desvelos.
  Que nun dexen nunca de facer esti tipu de rutes. ¡Ah!, los llibrinos-guía que nos proporcionen... ¡Una ayalga!.
. Los comentarios d'una páxina web Sobre Leyendas.com de Domingo Gómez Gallego col artículu :"Con ayuda de los Malinos", que bebe en "Mitos asturianos poco conocíos", de Ramón Sordo Sotres.
. Xurde (Morán), esta vez nun precisé de ti, ¡toma! (creo...) .
.Bueno, la wikipedia ye un pozu sabiduría ya esparcimientu infinitu.... ¡Acaben de concede-y el premiu Princesa d'Asturies! ¡¡Guauuuuu!!
.Bernabé, espertu de La Cooperativa d'Agricultores de Xixón.
. La páxina web: www.pueblos-espana.org
. El blog: "villaflaviana.blogspot.com.es"

         Fino siempre cada sienda
        trancando la puerte casa,
        esta vez quédate abierta
        de par en par, talo l'alma.
¿Veis el Busgosu curiando la entrada?
                     ENCAMIENTU:
               Si d'esta sienda, los pontes
               nun te prestaron bastante,
               pues retornar de la Fonte
               pela la Ponte de Monet.
               Llegarás nun instante.
              Y yo diréte: ¡olé!

  
Monet, l'Impresionismu, una ponte ente dos dómines.

No hay comentarios:

Publicar un comentario