" A la cata'l Güeyu Deva"

        " A  LA  CATA'L  GÜEYU  DEVA"
           

Dos Güeyinos tien la Deva pa guianos nesta sienda

          <<  SI DEVA TUVIERE PLAYA....
             Esmolecíu taba Dios
      cuando ideó a La Deva...
      Camentaba si pone-y
      playa a tala maravieya.
      Tardó un bon cachu, pensó,
      que si la bañaba'l mar
      yá naide querdría buscar
      el camín la vida eterna.
      ¿Pa qué esmolecese más
      si l'Edén ta a tiru piedra?
      Y ye que la Deva ye
      dalgo más qu'una aldea;
      ye del cielu un belvedere
      onde Dios nun s'atreviere
      pone-y marcu a esta Marbella. 

<<< SI DEVA TUVIERE PLAYA .... NUN FAIRÍA FALTA'L CIELU >>>

                  Sienda: "El  Molinón - Peñafrancía"
. Percorríu: 6'5 Km, aproximao (Alcuérdate que ties que volver)
. Modalidá: Ida y vuelta ( piensa en 14 Km)
. Entamu: El Molinón, o El Puentín de La Guía (L'oficial)
. Final: Capiella Peñafrancía.
. Tiempu: Tola mañana , o más...¿Petezte pasar la tarde?
. Mediu locomoción: A pata lo más prestoso, mas si te presta la bici....
. Dificultá: ¿Dificultá?.... Venga, ho... Plano y solombriego (nin avesío nin abegoso, eh). Pa guah.es.

        Anque l'entamu oficial ye nel Puentín de La Guía, al pie d'una escultura que prevoca "Sentimientos", yo encamientovos El Molinón porque podéis aparcar fácil y tamién vos va revolver otros sentimientos...
                      
                              "Viva'l Sporting equipu famosu...."

Prinda enerxía positiva nel "Teatru de los Suaños"

           Si nun yes de Xixón has saber qu'al par d'El Molinón alcuéntrase'l Parque Xabel la Católica, enfrente la Feria Muestres y El Palaciu los Deportes. La Ponte'l Piles y la Playa tan a tiru piedra.
          Manuel García Linares dexónos pa siempre nel Puentín una familia pal recuerdu: Un guah.e aporfiando a los pas que lu lleven fasta'l Güeyu Deva, lo mesmo que yo a vosotros. ¿Entamamos?

"Sentimientos" nes Mestes, na mecedura los ríos:
¡Ma, quiero dir al Güeyu Deva! 

        Si yes mui devotu, enantes d'entamar, pues encamentate a la Virxe de la Guía - talo que los habitantes de Somió y los pelegrinos de la Ruta Xacobea- que ta abellugada nuna capiellina, angüaño recontruyida, na plazoleta qu'amesta les carreteres de Somió y Maliayo (Villaviciosa) .

Remocicada Capiella "La Virxe de La Guía", l'amiga'l caminante.

              Tres d'encamentanos a La Virxe de La Guía arrodiamos el Puentín y baxamos a la ribera'l Piles. Un ríu perfechamente encauzáu qu'intenta recuperar la viesca de ribera que tevo antaño: umeros, arces, lloreos, salgueres, zrezos... Unes mates d'espadañes (Tipha latifolia ) introduznos la vista nel agua onde chaflotien bayura de nenúfares (  Nynphaeas )   que se bambolien al son d'acuátiques ondes producíes por dellos corios; presumíos azulones (Anas Plathirynchos) de blancos collares nel gargüelu.

"Azulones"

                    L'umeru (Alnus glutinosa) ye un arbolín (20/25 m) plani-perenni-foliu de groma cónico y trupo. Tueru reutu qu'esforgaxa llonditudinal y escama al medrar orixinando abondes lenticelles; vamos, que pincha.... De fueya simple, alterno, peciolao,col llimbu arredondiáu y el marxe dentáu ya escotáu nel ápiz qu'asemeya enforma a una concha. ¡Ah!, y nun ye asimétrico talo que la Llamera (Ulmus Glabra) o'l Negrillu (Ulmus Minor) que tienen pequeñes flores hermafrodites.
                

Fueya del umeru nes Mestes

                   El nome vien-y de AL=cerca y LAN=vera'l ríu . Lo de GLUTINOSA=pegañosa . Y una particularidá curiosa ye que por aciu d'un sistema radicular superficial con abondos nódulos, asociaos con una bacteria, son capaces de fixar el nitróxeno del aire y tresformalo en compuestos nitroxenaos (abonu).      ¡Qué guapo, nun fai falta cuchar!

Fueya, frutu en sámara y lenticeles del "Negrillu" (Ulmus Minor)

              L'umeru ye un árbol monóicu, de la familia  los bidulios, con flores machu y fema estremaes pero nel mesmu exemplar. Les flores machu son unos amentos allargaos y colingantes y les flores fema son tamién amentos pero más pequeños, arredondiaos y escuros. El frutu ye un biltu tipu sámara, pequeñu ,secu y d'ala estrecho (asemeya un saquín desinfláu)  qu'esparde fácil col vientu al finar la seronda.

Amentos femeninos del umeru

         Al cabu l'Alamea Les Mestes (onde s'amiesten los dos ríos: Peñafrancía y Piles), entá calteniendo na retina'l marieyo d'unos llirios semiacuáticos, agüeyamos nuna rotonda esta escultura de Francisco Fresno: "Dica la lluz". Esparcemos la vista y alcontramos a mandrecha la Escuela d'Inxenieros Superiores y a manzorga el Campus Universitariu cola Escuela d'Inxeniería Téunica, la Escuela de la Marina Civil y el Planetariu. Más al fondu destaca la impresionante torre de la Universidá Llaboral.  Guapa panorámica, dende llueu: Atrás dexamos Les Mestes col Hípicu y el Grupu Cuadonga y al llevantar la vista acolumbramos el Picu'l Sol, motivu pa otra escapada.
 

"Hacia la luz" de Francisco Fresno: Al fondu'l Planetariu y la U. Llaboral

*  " Dica la Lluz" o "El Rallador", como la conoz la xente, ye una escultura n'acero cortén de Francisco Fresno, escultor maliayu perconocíu n'Asturies poles sos obres. Alcuéntrase metanes la rotonda Albert Einstein, ente Viesques y La Guía anque yá pertenez a la parroquia Castiello .Una obra mui reconocida d'esti autor tenémosla nel Parque Moreda: "Torre de la memoria".  

Antigua quintana del Campu Golf

             Cruciamos la carretera'l Campus y tornamos otra vegada hacia'l ríu, agora'l Peñafrancía o Deva. Unos ocalitos pergrandes a manzorga y una viesca de ribera a mandrecha faen la sienda solombriega, que ye d'agradecer en díes soleyeros ( a Dios gracies, ocurre d'avezu en tola ruta). Si andes oriscu pues decatate lo que foi l'antiguu Molín de Castro - nun sedrá l'unicu, claro - acompasáu na quintana por casa, cuadra y panera. Tamos na parroquia Castiellu, llinde con Somió, de la que venimos.

             Ensin danos cuenta algamamos a una finca alambrada, cola yerba al cero y salpicada por delles llárimes llunares que borden aquel mantu verde... Ye'l Campu de Golf del Tragamón, municipal. Antigua casería, con horru y panera, qu'acueye los amantes d'esti sofronizante deporte.

 Pel Campu Golf "El Tragamón"

             Enfrente mesmo'l Campu Golf alcuéntrase El Duque, un restaurante de munchu pedigrí , preciuosu llugar pa facer bodes, comuniones, despedíes....o pa tomar el vermú.

Restaurante "El Duque", clase.

               Pegaos al Golf tenemos los campos de la Escuela de Fútbol del Arenal. D'estos equipinos, formaos en campos de yerba artificial, van tirar del tetu los equipos cabezaleros d'Asturies. En cualisquier casau los guah.es van iguando'l caráuter colos entrenos y apartándose de los peligros de l'adolescencia; guapu llabor social y poco reconocíu.

Campu  fúbol del Arenal

      Un poco desaveraos del ríu - el nuesu enfotu - al qu'acolumbramos pola típica vexetación de ribera vamos tiramos recta alantre Camín de La Islla, pegaos a la carretera per un senderu acutáu, dica la Carbayera'l Tragamón. 

La Curuxa

Esta devesa, restos de lo que foi la primitiva viesca qu'arrodiaba Xixón, ta dividida en dos estayes pola carretera La Madalena-La Islla. La que da al norte ta integrada dientro'l Xardín Botánicu y la del sur ye la que tenemos delantre. Una pradería triangular sustitúi al desaniciáu sotobosque. Güei día ye una allegada área recreativa, fuelgu de los xixoneses. Déxovos dellos detalles visuales, cuasi mitlóxicos...

        El Carbayu (quercus robur) ye un árbol fuerte (robur) y perguapu - quercus vien de kaer=guapu y quez=árbol - y de gran porte; equí dellos puen midir hasta 18 m. pero alcuéntrense espécimes d'hasta 40 m d'altor.

La carbayera'l Tragamón

             Ye un árbol monóicu , con flores machu estremaes de les flores fema pero nel mesmu árbol, y  plani-caduci-foliu de fueya sésil - malpenes tien rabu- y lobulao (¿quién nun conoz la fueya d'un roble?).
Floria ente Abril y Xunu - ta nello - y frutia pela seronda dando unes abeyotes que son el petite de munchos animales; antiguo tamién d' humanoides. De los que más partíu-yos saquen a estes llandes son los gochos ibéricos, sobremanera los qu'empleguen les tarxetes black pa estos delicatessen.
 

Carbayu albar (Quercus petrea) con amentos masculinos

. Nesta semeya podemos apreciar que la fueya, con 5 a 8 pares de nervios, ye peciolao; tien rabín y nun ta direutamernte pegao a la caña. Nun pue ser Quercus Robur; yo diría Carbayu Albar (Quercus Petrea).
                Vemos una pega picotiando nel caboxu (güecu) d'un carbayu ya intentamos saca-y una semeya; nun se dexa. Viven ente nós  pero son mui espantibles; nun se fíen.... Sígola cola mirada dica'l Xardín Botánicu y dame un valtu'l corazón. Daqué tien esa mancha verde, esa viesca milenaria, que me produz aforfogu... Otru día fadrémos-y una visita. Agora siguimos el rastru los carbayos camín de Los Maizales. Nun vamos aparanos, masque remembramos con señaldá los Díes de la Cultura, na etapa La Transición, cuando cantates comprometíos pidíen a gritos la democracia; talo qu'agora pola OFICIALIDÁ.

¡Clamiando pola OFICIALIDÁ!

 

          Cola música estos sones dexamos atrás dalguna quintana con horru, llagar y cuadra. Tamos n'aldea; barriu Cefontes, parroquia Cabueñes. Hai un cachu mal camín, anchu mas sin iguar; nin tan siquier asfaltáu. Daslo por bien emplegao por alcontrate somorguiáu nun ambiente rural. Tirando dica manzorga termines saliendo a la carretera Santurio.
¡Qué panoráminca tenemos de la Universidá Llaboral!

Capiella de La Virxe de La Corrada, cola U. Llaboral de fondu.

              Un poco más cerca vemos una capiellina en piedra visto dientro una finca: Nuestra Señora de la Corrada. Del sieglu XVI o anterior ta na finca los Cifuentes, a tiru piedra la casona solariega, una quintana como Dios manda: casa, cuadra, horru, práu a esgaya y el llagar a manzorga (anguaño emplegada como oficines del Botánicu). Güei día ta habitada por un rapaz de Llangreo que cola so muyer son  los guardes de la mesma. Si t'apetez visitala facilítente la llave ensin dengún problema. Yo tuvi esa suerte tando preparando esta entrada. Déxovos la muestra...

La Virxe de La Corrada. ¿Rasgos indíxenes?  
¡Guai del Paraguay!

             Cruciamos  la carretera y pel Camín del Ríu tornamos al mesmu Peñafrancia. Travesando una pontica nel Xigal  empobinámonos dica la casona  los Ramírez - Xove que, como tolos ricos, tien la so capiellina particular. Da gustu andar per equí.

¿Vas pal molín?

            Un senderín frescu qu' arreciende a  xabú y cola vexetación típico de ribera: salgueros, chopos, ablanos, fresnos, lloreos.... onde columbramos daqué molín: El Molín de Lucinda.

Llagar d'El Trole

              Amodo aportamos a la quinta La Castañal, ¡otra ayalga!, enfrente'l Llagar del Trole. ¿Petezvos un culete sidra?. Ehí tenéis un requexu de lo más afaizo: prau, ríu y asientos a la solombra un ciprés de Lawson (Chamaecyparis lawsoniana).

Ciprés de Lawson

Fueya y frutu del "Lawsoniana"

              Pero tienes dalgo meyor si crucies la Carretera'l Trole. Otru requexu idílicu. Una minúscula Área Recreativa a la solombra unos bambués con Charca embaxo la ponte, llavaderu, fonte y unes meses con asientu pa tomar la parva ... Mira a ver qué te paez....

Área Recreativa: "La Charca la Castañal"

            Pela caleya'l Molín de Valiente damos con una presa que disvia l'agua dica'l nomáu molín. Agua, viesca, pontes y güertes guíennos de molín en molín dica'l barriu La Reguera, yá na parroquia de Deva. Danos la bienllegada la quintana Euxenio'l Molín tres de cruciar l'autovía p'embaxo un modernu puente qu'abeyuga'l Peñafrancia.
  

La quintana d'El Molín d'Euxenio

         Un poco más escondíu ta El Rinconín de Deva, onde pues tomar n'aperitivu, merendar....
         So la vega domina la perllonga muria piedra que zarra la Quinta'l Conde, dueñu y señor, nun va tanto, de tola redolada, y más. La entrada, amoyonada d'almenes, danos idea la importancia d'esti pernomáu personax.

Entrada a la Quinta'l Conde

                 Chisbando, chisbando pudimos sacar unes semeyes de palaciu y antoxana, asina como del ablucante xardín. Sabemos qu'hai dos placios (¿ nun son tres ?) . El más antiguu, el d' Abaxo, ye del XVIII. D'estilu neoclásicu presenta una torre historista ya ecléctica. El d'Arriba, tien más pinta chalé francés del XIX. La cubierta piramidal en pizarra negro y una escalera esterior dan-y un aire imperial, ¡faltaría más!.

Palaciu del Conde de Revillaxixéu (el primixeniu)

               Tiense establacío'l Conde nun llugar con hestoria. Los precedentes familiares dicen que Juan García de Jove (qu'entá nun yera conde) mercó nel sieglu XVI, a Miguel de Valdés, la casa d'Armando con tola facienda: horros, molín, frutales y güerta, amás de la Torre Deva.
                Bordiando la escomunada finca, al par de la carretera que nos mete na parroquia Deva, alcuéntrase la Ilesia de San Salvador de Deva. Preciosa. Mui reformada pero con gustu.  La cabera foi cosa d'un xenru'l Conde nel 1.941, tres los estrozos la Guerra Civil del 36. Sobro la puerta d'entrada caltiense una recompuesta estela en llatín que da fe l'orixe la so fundación.

Estela fundacional S.Salvador de Deva

             El templu de San Salvador de Deva foi consagráu por doña Velasquita Ramírez hacia l'añu 1000 de la nuesa dómina. Seique ye un esllabón ente'l final del Prerrománicu Asturianu y l'aniciu del Románicu. De la etapa fundacional malpenes se conserva nada: Lo meyor el "puzle" fundacional entamilgáu so la puerta principal y un arcu ciegu inxertáu na facha norte. Nel interior pues alcontrar unos cachinos de zócalu en forma serruchu y un capitel con motivos vexetales.

Arcu ciegu

              Fía del conde Ramiro Menéndez - doña Velasquita - y non del rei Ramiro II (anque d'estos nunca puea ún fiase) tevo casada col rei Bermudo II, que la repudiare, magar la so fermosura, por nun da-y un fíu varón. En fin... Bueno, tevo una neña, Cristina, que col tiempu casó con infante y fundó, nel añu 1024, el Monasteriu de Cornellana. Nun hai mal que por bien nun venga. 

             *  Nun hai que confundir a Doña Velasquita Ramírez ,la nuesa, con Doña Velasquita Xiráldez , la uvieina d'ascendencia gascona (vinieren munchos franchutes a Uviéu por mor del Camín  Xacobéu). Féxose famosa nel s. XIII por aciu del so testamentu: Dexare un hospital, p'atender a probes y pelegrinos, ya enforma facienda a la Cofradía d'Alfayates (Xastres) de la capital. Eso sí, estos teníen qu'echa-y una misa de por vida una vez al añu na capiella de San Tirso, enfrente la catedral. Tomáronlo tan a pechu que terminaren convirtiéndolo nuna fiesta - La Balesquida - onde "l'escanciante" repartía vinu y ablanes a los presentes. Caltiénse angüaño (Martes de Campu: finales de Mayu , el martes que vien, el 26) pero camudaron les ablanes por un bollu preñáu. Por munches faltes que tuviere la santa de xuru que yá les tien perdonaes pero son tantos los pecaos carbayones...

El Coru

              Esti templu inxeríu nel Camín Xacobeu, ta dedicáu al Salvador, como tantos otros d'Asturies, por mor d'aquel dichu medieval ....
                   << El que va a Santiago
                        y nun va al Salvador
                        visita al criáu
                        ya escaezse del Señor >>

San Salvador de Deva

             Pola mor d'esta salida fuimos a visitar la ilesia un domingu, a lo hora misa, col enfotu de tomar unes semeyes. Ficímoslo satisfechos cola bendición del señor Párrocu.

Interior de San Salvador de Deva

               Fáltanos poco p'algamar a la meta; percorrer una refrescante avenida carbayos y al cabu quedamos varaos enriba una anacrónica ponte. Tenemos que tomar aliendu, esparcemos la vista per dayuri  .... A manzorga, ente la ponte y un banzáu superior qu'aporta l'agua al llavaderu, vemos una veyada olla, quelle donmage!, onde en tiempos se pescaba... Claro, daquella, el Conde pagaba a perrona la goxa pa caltenela perllimpia.  Embaxo, na fondigaya, una esplanada interrumpida por una monolítica fonte, << ¡nun bebas! >>.
 A mandrecha'l antiguu llavaderu, mui remocicáu, y a manzorga un camín empiedráu que nos conduz  mesmo a la esplanada qu'al ríu. Esti pergrande llavaderu foi conocíu como "El Periodicu de Deva", porque ye onde s'aconceyaba tol mundu pa camentar les noticies. Agua, piedra, chopos y bayurosa vexetación . Baxo y arímome a un bancu. Nun lo soi quien a creyer: ¡Toi nel Güeyu Deva !. Ehí lu tengo, delantre min. Saco l'arma y disparo... ¡Tomái, ye vuestru!.

¿ Pa qué quier playa esta aldea si yá tien El Güeyu Deva?

             Nun me conformo y ametrayo a tutiplén.... Busco posiciones, encuadres.... La Ponte, el Güeyu , la fonte, el llavaderu; el ríu y otru puentín más pequeñu... Quiero retratar  l'agua, el ruxerrux de la Deva y emburrio'l botón coloráu que recueye'l llantu d' Ella... La Deva... Esa diosa celta que namoró d'un humanu una nueche de San Xuan... Nunca nun  tevo consuelu cuando espertó a la mañana y l'humanu yá nun taba... Tantu lloró la pagana qu'orixinó un regatu, el Ríu la Penafrancía.... Al tar el agua salobre, pola mor de tanta llárima, tornóse la mar salada....

El Güeyín

           Cuenten los espeleólogos d'Ensame Aguarón, que p'arriba'l  Güeyu Deva, xusto embaxo una peña, hai una galería soterraña onde surden 10 sifones, orixe del niciu'l ríu. ¿Son les agües somorguiaes del Riusecu ?... En cualisquier casu tol entornu ye un misteriu... Cola fin d'averigualo, o a lo menos acercase, hebo xente, grupos espeolóxicos que, xurgando nel Güeyu Deva, buscaron el surdimientu les agües... Alcontraron una bocana per onde colase - la Boca'l Cuélebre-  y, tres munchos meses de trabayu, fueron descubriendo pasu ente pasu hasta 10 sifones, diez galeríes somorguiaes, a lo llargo d'un kilómetru  percorríu, más o menos... El misteriu sigue entá pos al nun  llevase a cabu'l procedimientu de colorar les agües nun puen certificar definitivo que seyan de Riosecu; amás, hai dellos fuexos o dolines kárstiques (poces en roca calizo) nel monte Deva (426 m ) que puen aportar agua al Güeyu...

Banzáu, entrada a la Cueva

       Cuenta Ensame Aguarón que cuando buscaben la salida la Cueva nuna de les inmersiones, cuando merguyaben pel Cuartu Sifón, sientieron un ruíu perraru, diferente... Quedaron varaos, sollertes... Y esmolecíos como taben y colos güeyos clisaos vieron pasar per delantre una anguila perxigante... Yera un 22 de Xunu, la viéspora la Nueche de San Xuan, cuando'l Cuélebre descansa y les xanes suañen col desencantu... Enferronaos al  filu vida colaron silencioso camentando'l socedíu... ¿Yera de verdá una anguila?... ¿Yera'l Cuélebre amomiáu a puntu entrar en letargu?... ¿Qué pinta esa imax del Cuélebre al par de la santa Ermita ?... ¿Sedrá que daquién lu tien visto y por eso la esculpió?... Misteriu, misterios na Peñafrancia ....

El Cuélebre que curia La Peñafrancía.

                   Enriba una peña francía,d'estratos horizontales, sobro'l nacimientu'l ríu, ta entamilgada una ilesia: La Ermita Peñafrancía. Capiella particular y panteón familiar del Marqués de San Esteban del Mar , que xunciere más alantre col Conde Revillaxixéu, foi llevantada nel XVI pol prior la Catedral d'Uviéu don Luis Ramírez Valdés. Tien forma de cruz llatina col cruceru penriba la nave y una cabecera poligonal. ¿Aprovechó aquel requexu tan singular por caltener daqué edificiu de cultu "paganu"?...  Yera cosa corriente.

Ermita Peñafrancía.

             Esta ilesina tien una construcción mui pensada. Al tar llevantada na fastera un monte posibilita da-y delles altures: Yo diría 3+1. Nel nivel más baxu va tar la xente'l pueblu. Dos puertes y un ventanón escomanáu permiten a la plebe participar más activo del fechu eucarísticu. Si te petez compartir, cada 8 de Setiembre (la Santina), en Deva pues aprucir.

Panteón del Conde Deva

          Nun nivel superior, el segundu peldañu, apreciamos dos capielles - pal Conde y los familiares- col panteón nel mediu.

   
 Nel  tercer peldañu alcontramos l'altar -natural- cola imax de la Virxe La Peñafrancia. ¿Y qué pue haber enriba d'ella? . El cielu. O'l monte sacru de Deva. O'l Chabolu, si te peta.

"El Chabolu", onde'l Cuélebre festeya
el ser l'amu de la Cueva.

       Pa poder sobrellevar tantu misteriu, tanta devoción, lo meyor escanciar ehí mesmo  unos culetes....
       Baxes otra vegada al Güeyu y, a manzorga, pues tomar el vermú en Casa Yoli, y unos pinchinos si t'apetez, ye lo que fai tol mundu...

Casa Yoli (L'Estancu)

             Si tas a lo cabero'l mes pues xintar el bocata  al son del burbús del Deva; agora ye'l Güeyu'l que te contempla... Como l'agua la fonte'l Güeyu nun ta pa beber pues dir buscar bebida a Sidra Piñera siguiendo'l camín de la flecha.

Casa Mario, la casa marieya.

Sidra Piñera, el recambiu l'agua Deva 

      Bueno, como la sienda finó
 y toi fechu una llacería
 pesllo la puerta, ¡adiós!
que yo quedo en Güeyu Deva. 
 Y si tu yes forasteru
 y precises dar la vuelta
 pues llegate a Casa Mario    y tomes ellí la espuela.
                                                        Encamientu:
                                                                De tornar nun t'escaezas.
                       

Zarra la puerta, romeru;
 y si prestó, chisca un güeyu.

                                
                    ANEXU  I   : " CONDE PER UN DÍA"   

               Vengo de lleer nel "Comerciu" que don Álvaro Armada Barcáiztegui, IX Conde Revillaxixéu, IX Marqués de San Esteban de Mar, VII Conde de Güemes.... tien un proyeutu perguapu pa la ciudá de Xixón. Quier abrir al públicu, na so finca de Deva, 23.000 m/2 de los 260.000 totales pa faer un complexu turísticu na parte más averada a la Ermita de Peñafrancia. ¡Guau!
Mira que llevo tiempu pensándolo.... Y non solo no que cinca al palaciu Deva, sinon a la bayura d'ellos qu'alcontramos pela xeografía d'Asturies. Sedría una forma recuperalos  faciéndolos caltenibles. A ver si por fin pueo un día retratalu. Tantos díes, tantos años pasando al pie d'elli...
           Ye Deva un requexu afayadizu. ¿Cuánta xente va casar a San Salvador? Cuando pretendemos armar una familia intentamos sofitala so pilares ancestrales buscando una capiella antigua que nos dea ciertu pedigrí, tradición. Tenemos l'enfotu d'asentar el futuru nos raigaños del pasáu. En Deva, amás tener S. Salvador y la Virxe la Peñafrancia, nun xardín paradisíacu habrá serviciu de restaurant pa celebrar el convite y quiciabes un palaciu onde festeyar esa nueche (moda mui estendida n'actualidá y con gran aciertu). En Deva podrás ser conde per un día. Bona suerte, paisanu.

Güemes: Mantu "Grande d'España"

                     ANEXU II : " ¿PeñaFrancia o Peñafrancía?

          Na fala siempre dicimos Peña-Francia, ye lo que nos sal. Hebo un tiempu, hai xente entá - sobre too asturianistes, ente los que m'alcuentro- que nun tando conforme con esi nome (¿qué tien que ver Deva con Francia?) buscaron los oríxenes del nome na peña rota - francía - na que se sofita la Ermita. Camentaba yo que tenía sentíu pero nun taba conforme del too... Asina que xurgué per interné na vida los condes de Deva a ver si alcontraba daqué.... Hebo ocho, l'actual ye'l novenu conde de Revillaxixéu.
 Vamos al granu. Reparamos na V Marquesa de Rxx: María Manuela de la Paciencia. So güela política (¡qué retorcíu soi!), Mª del Carmen Ramírez de Jove y Cienfuegos, yera vizcondesa La Peña de Francia. Felipe V, nel añu 1.708 concedió a Carlos Miguel Ramírez de Jove y Vigil el títulu de Marqués de San Estebán del Mar y Natahoyo col prevíu del Vizcandáu de La Peña de Francia. Deduzco que van apareyaos dambos títulos y que'l nome del ríu, de la ermita y del títulu ye "Peña-Francia". Y yá sabemos que'l  VI Conde Revillaxixéu - D. Alvaro Armada Fdez. de Córdoba - pasó tamién a ser el Marqués de S. Esteban del Mar... ¿Tamién vizconde de Peñafrancia? ... Nun vamos esmolecemos por ello los asturianistes, tenemos batalles más importantes... Pero la peña haila, y francía ta... ¡Cómo cuesta dar el brazu a torcer!....

         Por curiosidá déxovos la llista  los Condes de Deva, digo, de Revillaxixéu:

Cuando sías Conde, masque seya per un día, vivirás equí...

.[ I ]  El cántabru Xuan Francisco de Güemes y Horcasitas foi'l primer conde de Revillaxixéu, títulu concedíu nel añu 1.749 pol rei Fernando VI. Creó la Compañia de Comerciu de La Habana, ande tevo nomáu  Capitán Xeneral, y algamó a Virrei de La Nueva España.
.[ II ]  El so fíu Xuan Vicente de Güemes Pacheco de Padilla ya Horcasita d'Aguayo foi'l II Conde de Rxx. Rara avis, amás d'honráu, prudente y xusticieru foi un trabayador mui ardigoteru. En México entá s'alcuerden d'elli. Amás de dexar la capital como " los chorros del oru" foi l'azote criminales y rateros (¡qué bien nos veníes güei, tío!). Nun merecía Carlos IV un funcionariu como esti. La que lo agradeciere, si fuere'l casu, sedría Isabel I la Católica pol so esmolecimientu no que cinca a la enseñanza de los indios. ¡Ah!, descubrió'l calendariu azteca y unes islles del Pacíficu lleven el nome de Revillaxixéu, ¡toma!. 
.[ III ]  Don Antonio María de Güemes y Pacheco de Padilla y Horcasitas foi nomáu al empar I Conde de Güemes y Grande d'España.
. [ IV ]  Carlota Luisa de Güemes y Muñoz de Loaysa, II Condesa de Güemes, Baronesa de Benilloba y Baronesa de Ribarroja.
. [ V ]  María Manuela de la Paciencia Fernández de Córdoba y Güemes que casó col Marqués de San   Esteban del Mar polo que'l so fíu
. [ VI ]  Alvaro d' Armada y Fernández de Córdoba de Güemes pasó a tener un títulu más: VI Marqués de S. Esteban de Mar y Natahoyo. Tamién IV Marqués de Güemes y....

Palaciu S. Esteban del Mar o P. Revillaxixéu

. [ VII ] Álvaro José Benito d' Armada y de los Ríos-Enriquez , V  de Güemes...
. [ VIII ]  Álvaro María del Milagro Armada y Ulloa, que nos dexó l'añu pasáu.
. [ IX ] Álvaro María del Milagro Armada y Barcáiztegui, l'actual. IX M. S. Esteban del Mar y VII Conde de Güemes, amás de Grande d'España y XX Adelantáu de la Florida.... Menos mal que los títulos nun se lleven al llombu... ¿o sí?...

                                 ANEXU III: EL MISTERIU DE LA CUEVA

A la cata de la Deva

            Tamos avaraos so la Ponte Deva sintiendo'l ruxerrux del agua. Echamos una mirada al este, a la poza enllamuergada; esa qu'encamentaba llimpiar el Conde pagando a perrona la goxa.¡Tiempos!. Empobino la vista arriba ya acolumbro un banzáu. Y una ermita n'escalera, na fastera'l Monte Deva. Ye pola mor d'unos estratos horizontales conformaos na dómina del Xurásicu (Sinemuriense Mediu y Superior). Sobro arcilles buxes y coloraes tan materiales calizos dixebraos por capes de marga. Formación Xixón.

"Ensame Aguarón" camentando na "Boca'l Cuélebre": 
Si la Xana nun sal tendremos que dir buscala

             Xusto embaxo xurde l'agua; pela fractura la roca... ¡Cómo nos petez entrar! ...¿Tará esperando la Xana?... ¿Tará'l Cuélebre apostáu?... Preparamos material: traxe buzu, gafes, aletes...Lleva linterna'l cascu y nós botelles de vientu. Manómetru na moñeca, computador a mandrecha y tisories a manzorga ... Cordeles, compás ... Too mui guapo... Ya entá lo más importante... ¿Y pa tornar? ¿Vamos dexando garbanzos como Pulgarcito?. Un poco arriesgao, ¿eh?... Alcordámosnos d'Ariadna y prindamos el carrete'l "filu vida" o la llinia vida, como quieras. Y más coses...

¿Teseo siguiendo'l "filu d'Ariadna"?

                  Damos la espalda a la Peña y vemos rezos, adioses y besos... ¡Nervios! ... Per un boquetucu estrenchu - la Boca'l Cuélebre - colamos dientro'l drenax kársticu.... Algamamos a un sifón (charcos, más o menos fondos, en galeríes soterrañes), el primeru: 6 m de llargor por 3 m d'anchor; profundidá 4,5 m. Tres 15 m. de llinia damos a una campanina ( espaciu d'aire ente l'agua y el techu ) y darréu otra más grande con 2 m d'aire enriba. Dende esta campana pasamos al segundu sifón. L'agua ta tan veyao que nun dimos con duck qu'alcontraremos n'otra esploración.

L'agua ta enforma veyao... Pero tengo'l "filu vida"

          Siguimos dica una campana grande onde podemos apreciar la fractura  la peña que da orixe a la cueva: ¡Peña-francía! . Tornamos a somorguianos y al terminar el tercer sifón : 25 x 5,8   damos con otra galería pergrande onde s'aprecia perbién la fractura.

Talo Pedro per so casa, el casu ye dar cola Xana.

 Ye la Galería Grande: 100 m de llargo por 5 m d'altor. Y enseguida'l cuartu sifón: 30 m  llargor por 2,5 de fondo. Tres una galería de 50 m algamamos al quintu sifón. Yá debemos tar cansaos. Qué bien se ta na salita viendo xugar al Sporting... ¡Toma! Una sala escomanada de 8 m. d'altor y un diámetru ( ye arredondiada) d'unos 15 m. A mandrecha una galería (6x4) ensucha con una  "columna" pergrande en mediu.

Delri, la cabera columna.

 Ansí queda bautizada: La Galeria la Columna. Darréu lo grande vien lo pequeño y apruz el Sestu Sifón , un charcu de 2 x 1 m. y mediu metro profundo. ¡Caxigalines! . Tres andar 30 m. per una galería curiosa, con formaciones perguapes, damos col Sétimu Sifón, curtiu pero anchu.

Sidro y J.J. siguiendo'l "filu vida"

             Lo meyor vien darréu. Un llagu unos 30 m. qu'al aportar a la oriella déxanos ablucaos...L'agua que cuerre pel techu ruempe'l silenciu la ermita.  Estalagmites, estalactites... ¿O son figures humanes que tan asistiendo a misa ? Igual el tunel del tiempu les convirtió n'estatues de claciu... Tas n' Altar de Deva.  

Teca nel "ALTAR de DEVA"

          Rezamos abondo, por toos. Empobinamos galería alantre y, andaos 170 m., aportamos al siguiente Sifón ....Ya otru...Y diez... Y más...

Teca toca techu nun llaminador del Güeyu.

                 Tiénense "andao", vamos, soltóse filu por más de 1150 m.... Un kilómetru llargu y el misteriu sigue entá pero... ¿Nun lu tenemos más cerca?...

¡Qué respiru, tamos fuera!
 ¿Y esa lluz que tantu alluma?
 ¿Tará llamando la Xana
 o ye la so despidida?
Ye la nuesa,
¡Viva Deva!

* Nota 1: Les semeyes d'esti Anexu , robaes dafechu al Grupu Xeolóxicu Gorfolí (Ensame Aguarón), nun se cuerrespuenden siempre colos comentarios del momentu narrativu.
* Nota 2: Les esploraciones nel Güeyu Deva, per aciu d' Ensame Aguarón, entamaron n'Ochobre de 1996, siguieron nel 97 y  terminaron......¿Terminaron?....¿Quién vos dio permisu?. ¡Quiero más!


          __AGASAYOS: ANDROMANCIES  XUSTIFICAES__

¿Gracies?
Gracies ye poco, collacios,
andromancies digo yo.
¿Qué sedría d'esti santu
de nun dar con Deva y vós?
Apúrrovos un abrazu
mientres clamio: ¡Gracies, a Dios!

. Xurde Morán, padre de la Patria y guía en toles salides. Esta vegada col llibru cabecera: "Xixón: Travesía rural. Los caminos del Arte Románicu".
. Berto Arias, col so blog : "lafuentedeva.blogspot.com". Prestóme alcontrate, vecín. Voi dexate un comentariu nel to blog.
. "Ensame Aguarón".  "Grupu Espeolóxicu Gorfolí" (¡N'asturianu!). "Grupu Espeleolóxicu Astur, del qu'alcontré una páxina web: "www.andinia.com". Pasélo de viciu percorriendo la "ultratumba" La Deva. Entá caltengo l'aliendu coles aventures de: Delri, Manteca, Sidro, J.J., Lauri, Lusarreta... ¡Nun te les pierdas! (Con esto de los grupos d'espeoloxía tengo un baturiciu.... Prometo que, con más tiempu, voi tratar de solventar esti  enguedeyu. Dévo-yoslo).
. "Gijón: La ciudad verde" de Francisco Javier Chao Arana, llibru mui socorríu de la mio biblioteca.
. "Sendas Verdes, pol conceyu de Xixón" de la FMC, que nun se separta de nós.
Y qué dicir de:
. "Guía de los árboles d'Asturies" de Bertu Ordiales y Guillermo C. Ruíz, a los que llevo siempre na mochila.
. "Los nuesos paisanos", de Neto.
. Nin que dicir tien que me tengo perdío n'interné xurgando so la vida de condes y marqueses..."L'árbol xenealóxicu de la PERCEVAL", por exemplu.
. Y a vosotros, collacios, los pocos que me lleéis...
                De nun ser pol monte y vós
                precisaba d'una güerta
                más grade que'l Molinón.
                Mañana hai eleiciones
                ¿ganarán los nuesos, non?
                OFICIALIDÁ queremos
                pa qu'espoxigue Xixón.

Zarro la puerta unos díes, yá que hestoria finé, pa dir a cargar les piles

                                  _____ANEXU  I : El día la Peñafrancia___

           El día 8 de Setiembre, el día de La Santina, celébrense n'Asturies bayura de fiestes n'honor de la Virxe baxo distintes advocaciones. En Xixón, por exemplu, La Virxe de La Corrada en Cefontes, de la que tenemos falao n'esta entrada. Pero a nós interésamos la de Peñafrancia. Ehí van unes semeyes: