< De co casa a Cuadonga [0]: La xida >

                                        De casa a Cuadonga, ¿por qué?  

                                             << Quiero dir a Cuadonga
                                       quiero averame hasta'l cielu
                                       quiero ver a la Santina
                                       onde prende, madre, el sueñu >>

                                                            << CUADONGA >>

¿Porqué dir a Cuadonga?

Porque ellí ta l’escomienzu.

   Munches son les amarraces

que colos moros tuviemos

pero la de Cuadonga (722)

foi la que biltó dafechu.

   Siendo Anbasa ben Suhaym

l’Emir n’aquelli momentu

decidió que yera hora

de poner Pelayo arrechu.

Nun paraba l’asturianu

de monta-yos enguedeyos:

acesmar, embiescar… Lo meyor,

nun pagaba los impuestos.

   - Munuza, gobernador,

¡Pónme esos asnos tiesos! .

Toi d’astures y de godos

hasta los mesmísimos ….

Ruta Xixón - Cuadonga Ruta escape güestes d'Alkama

<<Enterase l'agarenu
que yo diba a Cuadonga
y colar camín del Puertu
nun-y llevó ni media hora.
Cuando tres delles xornaes
arribé a la Cuevona
dejá los Munuza-bois
taben tendíos na lona.
 Lo que quedaba del peciu
  la espuela tomó en Cosgaya.
Qué contentu ta don Pedru
al ver  llibre so Cantabria>>.

    Vieno Munuza pal norte,

consigo al l’Alkama trexo,

y entró nuna ratonera

tres de Pelayo, ciegu.

   - Vais conocer les Asturies

de primer mano, agarenos.

Vais conocer Cuadonga

la nuesa Meca, mio neños,

col agua de la fontica

vais sentivos como nuevos…

     Nun taba solu, Pelayo,

los cántabros vienen con ellos

pos Ermesinda y Alfonso

yá tán esperando un neñu;

yá va d’un tiempu a esta parte

que fai comuña con Pedru

aquel duque de Cantabria

que vien de ser so consuegru.

Aquel día en Cuadonga

atronicaron los cuernos

y les voces de ultratumba

d’aquel clangoriu de muertos.

   - Col agua de la fontica

vais a quedar como nuevos,

repetíen los astures

llarando entanto'l cagüercu. 

                                                             <Xenerosa, Deva, .....

     Los que con vida quedaren

colaren camín del puertu

que la vuelta peles Cangues

 torgada taba dafechu;

bien sabía don Pelayo

onde pone-yos el cepu

pos nos Montes de Cosgaya

esperábalos Don Pedru

que cola ayuda divina

esanició al sarracenu.

    Quiero dir a Cuadonga,

quiero allugame nel cielu,

quiero tar cola Santina

onde prende, madre, el sueñu.

La SANTINA, y punto. 

         Tres d’un célebre Conseyu Pelayo yá fuere elexíu en 718 como cabezaleru (primus inter pares) de la Resistencia cristiana polos astures y godos asitiaos nestes tierres, tres los Montes Cantábricos. Dende entós nun facía otro qu’acesmar al enemigu con pequeñes escaramuces* pillándolos davezu por sospresa.

[* Escara-muza= Igual esta pallabra la inventamos los astures: ¡Cómo-y quedare la cara a Munuza!]

         Nel añu 722, siendo l’Emir d’Alandalus Anbasa ben Suhaym al Kalbí ordenó al xeneral Munuza , por aquel entós Gobernador de la zona norte, dar una lleición a los “asnos del norte” que nun paraben d’incordiar “un día sí ya utru tamién” y, por si fuere poco, refugaren pagar los impuestos.

        Cuentes les Cóniques , quiciabes recoyío na lleenda, que Munuza – el xeneral qu’acompañare a Tariq nes primeres batalles de la Invasión y depués a Muza nel avance hacia’l norte – yá les tuviere tieses con Pelayo por mor de los amores cola hermana de so, Ermesinda (Adosinda). Aprovechando l’ausencia de Pelayo, que taba d’intercambiu boloñés per Alandalus  con otros astures cabezaleros, Munuza tiró-y los texos a la hermana y, al paicer, con munchu éxitu. 

<<Per Fomento'l gran Munuza
a Ermesinda cortexaba,
a la segunda botella
yá la tenía embobada.
Don Pelayo, na tribuna,
tuerci pa un llau la cara:
- Qué tas faciendo, Ermesinda;
esta nun ye la mio hermana.
- Pero qué dices, Pelayo,
voi ser la reina Las Cangas.
- Ai, Señor,
 O la arregla la Santina
o bye, bye a la mio Hispania.>>

     De xuru que guapa yera

(asturiana, de primera),

roxa, de face cande,

- ¿gotes de goda ascendencia?-

dexó a Munuza clisáu

del instante en que la viera.

Pero’l petite más grande

taba en quedar cola herencia **

Si Pelayo yera’l gallu

de tol norte, la Cornisa,

elli, cuñáu heride

de la Hispania revolvina.

   - Un casoriu tan propiciu

¿nun valdrá bien una misa?

Ría Munuza en Fomento:

¡qué guapa tas, mio chatina!

    Mientres Pelayo estudiaba

árabe n’Isbiliya

Munuza llevaba al güertu

a la fata d’Ermesinda.

**[Ente los astures -celtes- la herencia tresmitía vía matriarcal. De faltar Pelayo igual Munuza ...]

         Si los asturianos dábemos guerra a los moros estos tampoco s'echaben  p'atrás, poro Pelayo (1) hebo d’abellugar na llana les Cangues d’ Onna (C. d’Onís),  pero cerca les montañes que tan bien conocía, pa poder escatamucir en casu de visita poco afayaiza.

          Cuando Munuza – residente a vegaes en Xixón (2) – ordena al capitán Alkama someter a Pelayo d’una vez, esti, tómalo a pechu y va ciegu por él. Nun repara nos peligros y Pelayo, xunto col so xenru Alfonso Pérez – dux de Cantabria - , prepara-y una encerrona nes faldes del monte Auseva, nuna angostura que termina na <Cova d’onna = Cueva de la fonte, del ríu >, una cueva con un valor simbólicu pergrande pos yera venerada dende antiguo polos celtes. Nesta dómina cristiana la cueva taba presidida por una imax de la Virxe María. El cristianismu sigui calteniendo los centros espirituales de los druides celtes.

      [ Convién fer alcordanza que Favila foi sapozáu na ilesia de la Santa Cruz qu’elli mesmu mandare llevantar sobro un dolme celta; sigui la tradición].

<< Baxo'l Monte de l'Auseva
tres cruces veo clavaes
por una Patria perdida
en traidoro debate.
La Deva tuvo que ser
la qu'entamó col rescate
per aciu la Nueva Virxe
qu'agabitó nel embate.
Baxo'l Monte de l'Auseva
tres cruces veo clavaes;
voi Camìn de Cuadonga
a da-y por ello les gracies >>

         De xuru qu’hebo munches amarraces, seique les hubo más importantes pero la que pasó a la historia, novelada nes cróniques por Alfonso III, foi la de Cuadonga seguramente pol valor simbólicu qu’encerraba al ser, dende los llonxanos tiempos del fierro, un santuariu celta.

 El Magnu sabía bien lo que facía, quería una xustificación, una xida que lu emburriara a la Reconquista, daqué que xunciera a tolos pueblos que moraben nel norte – astures, godos, cántabros – embaxo una mesma bandera. Pa ello Alfonso III presisaba de símbolos, La Cueva yera venerada polos astures autóctonos, los celtes, y dende la Batalla Cuadonga tamién por godos y cántabros. L’ayuda d’una imax de la Virxe alendaba los guerreros que consideraron la victoria como suya; dentós p’acá sedría la <Cova dominica = Cueva de la Señora >. 

Otru símbolu, seique’l más importante, foi la Cruz que sopelexó Pelayo nesa mítica amarraza; una cruz de madera carbayu qu’él mando llarar d’oru y piedres precioses y que se convirtió nel <santu y seña> del Reinu d’Asturies: La Cruz de la Victoria. (< Con esti signu vencerás a los tos enemigos>)**

** [Esti slogan, a mou de "signum salutatis", amuesa nel blog. <<mirabiliaovotensia>> onde vos encamiento entrar de cuando en vez.]

          Alfonso III el Magnu, propagandista onde lu haya, tamién Reconquista faciendo intervenir nes sos Cróniques a los protagonistes del momentu: Munuza, Alkama y Ambasa polos moros y Pelayo – el so antepasáu - polos astures. Y al endefechu … l’elementu que los xunce y que los separa: Oppas, l’obispu traidor que vendió la Patria en Guadalete, volvió vendela en Toledo cuando tragó'l trespasu  de la corona d'Hispania a les vidayes del Califa omeya y cuando por tercera vegada cantó'l gallu en Cuadonga:

     - << Torna al alcuerdu, Pelayo, nun vas poder pa con ellos>>**

     Agora tóca-y el turnu al Magnu:

      - Los godos perdimos la tierra, los godos tenemos la obligación d’encabezar la reconquista.

       Entamó con ello Pelayo, dio-y consistencia’l Católicu, restauró <tol orde góticu> El Castu y punxo la guinda’l Magnu. Cuando falamos d’Alfonso’s hai que quitar la boina. 

       - ¡Chapeau, Reis Alfonso!

Bien cerca d'equí degolaren los agarenos, a toa pastiella, camín de Llébana:
< Bien cerca d'equí colaren
a toa pastiella, aviesos,
el peciu los sarracenos
qu'en Cuadonga llibraren.
Magar que-yos presta l'agua
 malpenes tiempu tuvieron
tomar el bañu de la tarde.
Dicen que l'agua los LLagos
seique nun amiya los cielos,
son llárimes d'agarenos
que la llevaron ferriona 
peles Cangues de Pelayo.>

        Nos últimos tiempos trátase de quitar importancia a l’amarraza Cuadonga; de xuro que nun foi la gran batalla que nos cuenta la crónica pero hebo de ser importante. ¿300 escontra cuántos...?  "Nin tantu nin tal calvu",  pero Pelayo nun taba solu.
Fruela ñació precisamente en 722 asina que la fía Pelayo, Ermesinda, y Alfonso de Cantabria – los pas de la criatura – yá taben casaos; ye dicir, Alfonso’l Católicu, el dux de Cantabria, tamién participó de la fiesta. Ye más, tres d’esta escaramuza los ismaelites colaron dica Cantabria pela única  salida que-yos dexaren : Vía Los Llagos, per Buferrera - magar que la torna per Cangues taba torgada dafechu - y foi cuando en Cosgaya, por mor d’un derrabe (¿echaríen una manina los asnos del norte ?), l’exércitu árabe tevo una debacle pistonuda.
        Yá sabemos lo que pasare darréu: Munuza, al nun sentise seguru, quixo colar pa la Meseta pel Camín de la Mesa pero los asturianos atayáronlu en Olalíes (Proaza) cortándo-y el mexu. Unos dicen velu muertu, otros quieren velu dellos años depués pela Septimania... Ermesinda careció de velees tola vida. El compañeru de Tariq nun escaeció enxamás les abluciones nel Sable  San Llorienzu nin les espiches na Cuesta Cholo; el so espíritu sigui analayando sobro'l Cerru...

Tumba de Don Pelayo en Cuadonga

          (1) Pelayo, enantes la visita los ismaelites, debía vivir nel centru d’Asturies, ¿ Siero, Piloña? onde la familia tenía facienda y hasta ye probable qu'un castiellín (3), asina que pertenecía a una familia de postín; yera noble pero más que probable nun fuere godu. 

        El nome de Pelayo vien del llatinu Pelagius y non d’un nome xermanu-godu; Pelayo sedría entós astur-romanu (los árabes nómenlu Belami al-Rumí= Pelayo el romanu=cristianu). P’afitar entá más esta teoría podemos atalantar de la Crónica Isidoriana –  fala de la historia de los godos - que Pelayo nun lo yera pos nin tan siquier lu noma. ¡Vaya propaganda, eh!.

Pelayo sedrá un noble astur descendiente de los romanos - pero entemecíu dafechu colos aborixe - que tendría influyencia y poder nes Asturies Centrales pre y post-invasores. A resultes d'ello formaba parte de l’alministración goda algamando’l padre a dux de Galicia y elli a espatariu real: primero de Witiza y depués – cuando padre y Rei lleguen a les manes – del nuevu rei Rodrigo, normal.

           [Don Pelayo  tevo enterráu de mano n'Abamia, xunto cola so muyer Gaudiosa. Más tarde lleváronlos pa la Cueva d'Onna, como se pue comprobar, bueno...

Santolaya d'Abamia,
finxu espiritual de los astures.

    ¿Pero por qué n'Abamia? .. ¿Qué había n'Abamia?...¿Qué significaba Abamia?.. Paez ser que n'Abamia mandó llevantar Pelayo un monesteriu ya una ilesia. Del primeru nun vemos traza pero de la ilesia queda constancia n'esta que vemosd'estilu románicu,tan tresformada ella,que nun resambla pa nada la prerrománica, d'ella quédanos la intuición (los texos), la lleenda, la tradición y les cróniques.  Pero...
         ¿Por qué Pelayo mandó edificar esti centru eclesiásticu n'Abamia? Pos porque yá yera d'antiguo un llugar santu, yera un santuariu celta; los monxos nun fueren otro que descendientes de los antiguos druides. Esti apegu de Pelayo a les tradiciones astures ye lo que fai pensar que yera ún d'ellos, ún de los NUESTROS, un ASTUR. Embaxo d'esos texos cuido que se celebraren munchos conceyos, quciabes el que lu encumó a Princeps, ¿seguro que foi na llana del Repelao? ]

<< Don Pelayo, rei d'España,
qu'entamasti en Cuadonga
la Reconquista la Patria
di-yos a estos mazacayos
con qué Llingua aconceyabas
a los astures y godos 
o los fíos de Cosgaya: 
¿En llatín, o n'arameo,
o yera LLINGUA ASTURIANA?
Torna, Pelayo, bon rei,
que yá nun soi pa col alma
viendo cómo los míos
faen de la fala un drama. 
Los pétalos esmorecen,
xime la espina clavada.>>

         Tenía Pelayo toles canonxíes - astur ya godu d’adopción - pa ser el Princeps naquellos momentos de confusión . A ver, buscáime otru… Gallu asturianu, educáu na corte goda y bien rellacionáu colos godos treshumantes y con cántabros vecinos. Hai más, Pelayo echa’l ganchu al fíu del dux Pedro de Cantabria (4) – veníu un poco a menos - y casa la so fía Ermesinda col futuru Alfonso’l Magnu; tenía güeyu esti Pelayu.

D’otramiente nun había sitiu n’Hispania más seguru y afayaizu que les montañes d’Asturies. Taba’l País Vascu, pero estos yeren mui suyos, hasta na fala. La zona de Cataluña tamién foi invadida ya otros llugares como Mérida, Toledo, Tudmir p’hacia Murcia o’l Val del Ebru taben acogotaos pola nueva relixón islámica. Ser cristianu o cenciellamente llibre namás taba permitío tres los Montes Cantábricos.
Una pena qu’algunos reis venideros nun supieren valorar la llibertá de cultos ¿indíxenes? qu’atesoraba Asturies. Los mesmos que punxeren el granu de mostaza de la llibertá foron depués perseguíos pol xugu de la cruz. Los suaños de dellos homes son el cepu pa otros. Nun creo que’l galiléu tuviere contentu con ello.


     (2) Cuido que Munuza, el Gobernador de tol norte peninsular, debía tener una corte treshumante:  Xixón, Llión, Astorga, Llugo,... dependiendo les circuntancies del momentu.

Provincies del Reinu visigodu.
¿Yera D. Pelayo fiu del Dux d'Astura?
¿Teníen posesiones pel centru d'Asturies:
Siero (Fozana), Llugones, Uviéu...?

          (3) El castiellín de Fozana . Nel añu 869 el rei Alfonso III, el Magnu, fai donación nel so Testamentu al presbíteru Sisnando de la Ilesia de Santa Mª de Tentiana (Tiñana) y tola so redolada, qu'él heredare de so tíu'l Castu (Alfonso II) y esti del güelu Pelayo. Mui guapo, don Pelayo con posesiones nel centru d'Asturies. ¿Mercóles siendo rei o teníales d'antaño la familia?.
          Cerquina d'esta ilesia hai un picu (400 m) nomáu Picu Castiellu - o Castiellu de Fozana - que nun principiu (1957) foi catalogáu como castru, lo normal.
 Dellos años más tarde, tres estudialu más a fondu y alcontrar algunos restos*, decatáronse que podía tratar d'una fortaleza, tipu Castillu de Curiel en Peñaferruz, ocupada dende'l S. III al VI y que tendría calter militar: muralla agüevada (139 x 94), torre de vixía - controla'l pasu del valle del Nalón-Nora al centru d'Asturies (Lucus Asturum) -, tres fosos y hasta contrafosos . Non menos bultable ye'l fechu que na llomba alcontremos delles cueves con agua corriente.

Castiellu de Peñaferruz asemeyáu a Fozana.
Comandáu por un tenente.

            ¿Si esti fortín pudo pertenecer a los primeros tiempos de la monarquía nun ye farda a esgaya pa facer una excavación fondera?... Ye lo que tu y yo camentamos ¿nun ye asina?... Tamién lo pensare xente preparao como'l arqueólogu Don Alejandro Fanjul que removió cielu y tierra p'algamar una financiación FORIATA; sí, ho, de los EE.XX. El Principáu nun tenía que poner un duru pero ...    ¡ REFUGÓ los permisos d'escavación! porque "nun entra nos planes previstos"... ¡Qué sensibilidá! (esto foi en 2014, y siguen ensin planes) ... Nun quiero nin pensar que llevo más de 50 años metiendo la papeleta enquivocada... Y arriendes del Principáu...

Manifestación en demanda d'ilusión
 polos fíos los qu'aconceyaren nel Monte Auseva.
La Cruz yá la llevamos,
la nuesa espada ye la Razón. 

    - ¿Pero entá hai más, nin?....
    - Sí, ho, sí; agora sabemos que ser falante d'asturianu ye peligroso; sí, sí, ¡peligroso!...   
     - ¿Y la OFICIALIDÁ?...
     - ¡Lo que faltaba!... Otru nacionalismu n'Asturies.... Como si nun tuviéremos a esgaya con Cataluña...
     Resulta qu'oficializar,  ameyorar, desendolcar, intentar NORMALIZAR l'usu de la llingua que dende sieglos llevamos falando - con too y con eso - per estes céltiques tierres ye bien esmolecedor pal PODER ... Tremen, ven tres de la Llingua una espada asolapada, ¡qué miéu!.
    - Pero, Señor Presidente, ¡que somos asturianos, ho! ...  L'antónimu de separatismu... Nun ve qu'hasta cuando esbardayamos un poco espetamos eso de: <Asturies ye España y lo demás tierra conquistao >. Dígame que nun tien perres, pero nun me insulte. Pos yo digo-y lo que siento, un pocu de nacionalismu igual nun mos venía mal... Un migayín d'ilusión pa resucitar esta Patria murnia (Vs. tampoco ye l'allegría de güerta, eh, tien de reconocémelo...) na que vivimos, un símbolu d'unidá, un algo que xorrasque les conciencies y l'espíritu de llucha (los Fondos Mineros paez que nos dexaren apandaos)... Dígame la verdá, ¿conoz daqué menos peligroso qu'una Llingua?... ¡Qué ocasión perdió usté!.. Pudo salir (o entrar) pela puerte grande pero sobre manera de tresmitinos un poco d'ilusión... Qué pocu-y costaba y qué ocasión perdió... Y mire que-ylo punxeron a güevu...
¡Ai, Dios!, <nun alcuentro la mio cara nel espeyu>.


        *Ente los resto alcontraos en superficie tiense dao con cerámica romano y medieval, unes manes pa moler ya escories de fundir fierro (tamién en Curiel).

         Nota: Si daqué ta acertao debèislo a los profesores Fanjul , Patricia Argüelles, Diana Vega, A. Gutiérrez o Menéndez Bueyes; de les FALCATRÚES tien la farda'l mio nacionalismu de caleya. 

Peña Amaya, capital del
Ducáu de Cantabria

         (4) Amaya, la capital d’El Ducáu de Cantabria venía de ser invadida polos moros en dos ocasiones: primero por Tariq (712), onde dexaría un destacamentu y unos cuantos xudíos pa gobernar, y más tarde (714) por Muza de pasu que tiraba pa Llugo tres pasar per Astorga y Llión. Menos mal qu’Al Walid llamólu a capítulu y hebo ce colar pa Damasco…
      - ¡Uf!… De bona nos tenemos llibrao…
 Toi seguru qu’esti, tres arrasar Galicia, plántase en Xixia por mor del aruma la sidre… Lo que queremos dicir ye que los mesmos cántabros tuvieren qu’abellugar tres los montes y teníen per grande interés p’acomuñar colos astures pelaxanos. Lo de Cuadonga foi una andecha astur-goda-cántabra, ¡cómo diba salir mal, co...imes!

Camientu...

     ** << Vuelve al to alcuerdu, Pelayo>>, encamienta-y Oppas a Pelayo, a la entrada la Cueva, cuando quier arrreglalo con elli  enantes d’entamanar la batalla. 
Asina que los cabezaleros d'Asturies tuvieren un alcuerdu colos walís d'Al Andalus que Pelayo rompiere tres esmucir de Córdoba y abellugar n'Asturies.     
  

                                               LA  DEBA  : L'escomienzu oficial 

Nel Güeyu Deva escomienza la Ruta Oficial

                                               

      Si quies dir a Cuadonga andando, dende Xixón, lo normal - l'oficial - ye que t'empobines al Güeyu Deva (tamién pues salir dende'l Camping) pos ye un llugar míticu por antonomasia. Equí ñaz el ríu Deva talo qu'en Cuadonga: <De Deva a Deva>.
      Nós vamos salir dende casa, a tiru flecha del Güeyu, magar que vamos faer tamién esta salida oficial pa que'l pelegrín tenga constancia d'ello. Vamos, entós, a xubir al Altu del Curbiellu que ye onde empatamos si lo faemos dende Santurio.
      Tres visitar San Salvador, somos pelegrinos, empobinamos dica la ponte'l Llavaderu, el Periódicu de Deva antiguamente. Paramos a escuchar el ruxerrux del agua al amiyar de la presa cuando, al mirar al frente, acolumbramos la Ermita de Peñafrancia entamilgada sobro'l manancial del Güeyu Deva. Tamos nel Barriu d'El Pedroco.  Podemos xubir tranquilamente a La Olla per esta pindia carretera asafalcada, que pasa per delante d'El Chabolu hasta dar cola señal afayiza, la garrapiella que nos guíe hasta l'altu pero vamos faelo pol siguiente ramal, el Camín del Faru, que ye más tendíu y caltién tramos de formigón y, a vegaes, de zahorra.
Los primeros pasos discurrir pel territoriu los Solar, son minchos vecinos los que s'apelliden asina. Más arriba alcuentra la casa del que fuere ún de los primeros escritores n'asturianu de la dómina del Xurdimientu:Andrés Solar Santurio (Andresu), algún día tendremos que dedica-y un post. Tienlu ganao.

Cabeza castreña de Deva

        Xubimos zigzagueando pente cases típiques, mui remocicaes, col corredor engalanáu por plantes y flores o modernos xalés con sabor a antiguo; el Barriu del Pedroco ta mui humanizáu. A mediu camín de la xubida vemos la casería de Piñera col so típicu Horru; pero quiciabes lo más bultable sía una figura de piedra incrustada na paré de la casa: la Cabeza Castreña de Deva. Nun ye plan d'aparase, igual otru día, pero facemos alcordanza de las información que tenemos lleío:
        [ Trata d'una cabeza-totem llabrada en piedra de la dómina los antiguos astur-celtes que moraben nos castros. La cabeza p'aquella xente yera perimportante - agora más - pos pensaben que nella taba la enerxía motora de la persona, "l'alma"; quiciabes por eso teníen en vezu de cortá-yla al enemigu, d'este miente yá nun podría resucitar nin cola mediación de los druides].

Per Deva, la escuela nel Bº d'El Pedroco,
depués tomes algo en "Casa Yoli". 

       Tres cariciar el pescuezu a ver si la nuesa cabeza siguía en sitiu siguimos xubiendo pel Camín del Faro u cruciando'l Camín de La Barrea  hasta empatar con una importante carreterina asfalcada; cruciamos y en siguida otra más, la As-331 que te lleva al Curbiellu pasando pel Pinal. Equí tenemos un panel pergrande qu'amuesa la Ruta a Cuadonga y d'él tomamos unes semeyes. Nós, los romeros del Camín, nun vamos pela carretera xeneral, sinon que la cruciamos por mor d'una garapiella que nos empobina pel Camín del Regatu, un antiguu camín de carru, más prestosu.
     Baxamos hasta enriba l'autovía y depués ascendemos a modo, seliquino, pel Camín de Samiguel, entá queda un cachu qu'andar.  Agora vamos pel Camín del Charcu; pensábemos que yera un topónimu daqué antiguu pero sí que lu alcontramos magar nun mos cafiare p'andar. Nel empalme del Barriu Castañera tiramos de frente hasta llegar a un abeventaderu, per onde pastien unes oveyes, y salimos a la AS-331 al pie d'El Pinal, y cerca de la Ilesia del barriu.
       Ye la hora'l vermú pero esta vegada sedrá meyor tomalu arriba, nel Barín del Curbiellu. Y asina lo ficimos, un vinu blancu con azúcare acompañáu d'un caldu dexónos entonáu el cuerpu dafechu. Yá nos petecía baxar a Pión pero eso sedrá otru día, cuando salgamos dende casa. Les paredes del bar tán  llaraes de cartelos  que describen el Camín de Cuadonga, unes ayalgues caseres d'ayuda al caminante de les que tomamos bona cuenta  cola Canon. Nun hai romeru o ciclista - a magüeyu - que nun pare nesti Bar...... Ye como una posta pal intercambiu de caballos, polo menos "eches la burra al agua".
        Toes estes farragose esplicaciones nun deben preocupar al llector que pretenda facer esta xubida  poro la relidá ye muncho más cenciella, ta mui bien balizáu'l camín coles garapielles.

                                       .........................................................

   

Los guerreros de Doña Velasquita
custodiando la parroquia Deva.

           DEVA, LA PARROQUIA

       Deva o DEBA (como reza'l Madoz) ye una de les parroquies más chules de Xixón. La reencarnación de la diosa Deva ta presente en toles partes: Nel sagráu Monte Deva, no alto y nel Güeyu Deva, nel fondu; namás-y falta la playa pero esta tienla a tiru flecha.  
       Na parroquia Deva viven más de 700 habitantes repartíos polos barrios de: El Pedroco, el Fondón, La Reguera, Zarracina, Serantes, San Antonio, La Olla, Rioseco o El Monte. Ta arrodiada al este pol Conceyu de Villaviciosa (Arroes y Pión), al sur por Caldones, al oeste por Santurio y al norte por Cabueñes.
       Anguaño ye una parroquia primeramente residencial y d'ociu con numberos bares-restaurantes  (Casa Yoli, El Chabolu, El Rinconín de Deva, Casa Mario, El Camping, El Cruce...); p'agospiar  hai  l'Hotel Rural Mirador, La Ermita de Deva, l'Hotel-Restaurant-Spa de La Llorea  y el mesmu Camping, abiertu tol añu.  Entá conserva delles caseríes dedicaes al ganao vacuno que caltienen esa vida bucólica de los sieglos pasaos cuando nel Molín d'Euxenio se farinaben el maíz o'l trigu, o los numberosos llagares facíen correr la sidra a golfaraes o la granible tierra la vega taba llarada de fabes, o cuques de llinu y maíz... Riques tierres bendites pola Deva. Güei la parroquia sigui prosperando per aciu d'empreses como Sidra Piñera, el Campu de Golf o Centru Hípicu.

 Nel Camín Xacobéu: San Salvador de Deva
El caprichu de Dª Velasquita Ramírez, y el nuesu. 

       Deva debe'l so nome a la diosa céltica Deba, la Madre Naruraleza, la qu'orixina la vida talo'l nacimientu los ríos: Equí ñaz el Ríu Peñafrancia y en Cuadonga'l Reinazo y pa con él el Reinu d'Asturies, l'orixe de la Reconquista: SÍMBOLOS.
       Deva ye una tierra mítica, la so historia ñaz col orixe de los tiempos.
Nel Monte (426 m d'altor), analayando sobro'l mar, hai una necrópolis tumular con más de 4000 años d'antigüedá, como nos cuenta'l profesor Cortina, l'arqueólogu que lo tien estudiao.
 Nel llanu, bañáu pol Ríu Peñafrancía, podemos contemplar la románica Ilesia de San Salvador de Deva, mui remocicada tres la Guerra Civil, pero con raigaños nel prerrománicu, finales del X , esllabón perdíu ente'l "pre" y el "ro". Formó parte d'un monesteriu dientro del Camín Xacobéu, el Camín Francés, qu'agospiaba los fundíos pelegrinos. De fechu el Camín de Cuadonga coincide munches veces con él. Conserva a la entrada - refecha - la estela fundacional: < Doña Velasquita Ramírez* consagra esti templu a S. Salvador > hacia 984. En 1006 dóna-ylu a S. Salvador d'Uviéu por mor de los cafiantes llobos de la Catedral que nun paraben de roye-y la oreya de la que s'agospió nes Pelayes de la capital.

* [ Esta  Velasquita ye la playa, la nuesa, non la Xiráldez uvieina. Podéis ver dalgo más na entrada :
<A la cata'l Güeyu Deva>, n'esti mesmu blog Camìn de Niria.]

Palaciu Conde Revillaxixéu.

        Otru, otros, edificiu emblemáticu ye'l Palaciu del Conde de Revillaxixéu. El Palaciu Antiguu (seique hebo otru más primitivu), el que ta más averáu al Ríu Peñafrancia, tien una estructura complexa con dependencies estremaes na forma y nel tiempu pero distribuyíes racionalmente y onde destaca una torre cuadrangular d'estilu historicista.
El títulu del Condáu de Revillaxixéu foi donación de Fernando VI nel añu 1749 al cántabru  Xuan Francisco de Güemes y Hocasitas que creó la Compañia Comerciu de La Habana onde foi nomáu Capitán Xeneral algamando darréu a Virrei de la Nueva España. Don Álvaro Armada de Barcáiztegui ye n'actualidá el IX Conde, amás de Marqués de San Esteban del Mar y Conde de Güemes. La historia de Xixón sedría otra ensin les filántriques aportaciones d'esti Condáu.
        El Palaciu d'Arriba - el de los cuatro picos - ye un xalé palaciegu d'harmonioses proporciones onde se mecen les formes ecléctiques cola tradición francesa y la cubierta piramidal coles torres angulaes; la escalera norte, con accesu al pisu primeru, da-y , si cabe, más glamour a esta ayalga.

Ermita La Peñafrancia (Deva): La Virxe Prieta
Tres Estaos: Tres pisos que s'entemecen. 

         Tamién pertenez a palaciu la Capiella de la Ermita de Peña Francia. La orixinalidá d'esta capiella  vien dada tanto pol so asitiamientu como pola so estructura. Construyida en tres pisos con forma d'escalera sobro'l nacimientu del Güeyu'l Ríu Peñafrancia sirve de panteón familiar a los Condes. Aprovechando'l desnivel del tarrén llevanten tres plataformes asignaes a los estremaos  estamentos sociales de la dómina: el pueblu reza nel más baxu, na segunda terraza ora la familia condal (y, una vez al añu, les mios sorrisones vecines) y na superior ta l'altar onde se celebra la misa. Podíemos dicir qu'hai un cuartu estáu, cuidao que per un lluceru nel techu pues algamar al cielu y/o a.... "El Chabolu".
        Cuenta la leenda popular qu'un día  8 de Setiembre - qué casolidá -  la Virxe, la de verdá, aprució de sópitu nesta capiella al par d'una imax de la mesma. Una vecina que lo viere comentó cola vecindá y estos decidieron qu'aquella fermosa y prieta imax debía ser treslladada a un sitiu con más sonadía y facilidá de visitar: la ilesia de San Salvador, que ta elli mesmo. Asina se fizo, pero al otru día la Virxe Prieta tenía camudao pal antiguu aposientu en Peñafrancía. Varies veces aporfiaron los vecinos p'asitiala en Salvador pero... ¡ganó la Virxe!, pa gayola'l pueblu que d'esta miente pue rindi-y visita tolos años el ¡Día de la Virxe de Cuadonga!, precisamente. ¿Nun xustifica esto'l nuesu enfotu nel viaxe a Cuadonga?:  
                 
                              <De Deva a Deva y de Peñafrancia a Cuadonga>. ¡Andando!

                                           ......................................................................

                   
                                      Cumplíos   

Andrés Solar Santurio:
 ún de los primeros,
ún de los meyores. 

       . Primeramente cola Asociación Cultural "El garapiellu" pol so enfotu col Camín de Cuadonga encabezáu por Xurde Morán col so llibru: <El Camìn Xixón - Cuadonga >, edición n'asturianu. Nun damos un pasu ensin él y ensin les "garrapielles".
      . Consultamos les <Cróniques de los Reinos d'Asturies y Lleón>, de Jesús E. Casariego.
      . Tamién lo ficimos col Madoz 1845-1850 (Asturies).
      . Mercamos un llibru en francés (hai que repasar un poco) de Emiliano de la Huerta: <Covadonga>, onde tamién pidimos prestaes unes semeyes.
     . Pela Wikipedia andamos restolando a toles hores, cada vez me gusta más.


     . N'Interné alcuentro munchos comentarios; ahi PDFs que son una bendición. Sobro'l Castiellu de Fozana o Abamia lleí tolo que pillé. El mio aplusu al profesor-arqueólogu Alfonso Fanjul Peraza.
   
. A la Santina, que nos dio la farda pa estudiar esti camín y sobru tou a la de casa, qu'un día sí ya otru tamién déxalo tooo pa que nun andemos solos per estos caminos ¡ de la virgen !. 

L'Aldea perdida [2] < Camín del Picu la Vara: Demetria>

                   < Belén de cumes nel Picu la Vara >

         [Nun quiero otres montañes qu'estes que me vieron ñacer, la Peña Mea, la Peña Mayor y el Picu la Vara]

¿Vienes con nós al PICU la VARA? 
Pel camín tamos camentando en visitar a DEMETRIA...

         Siguimos restolando per <L'Aldea perdida>. Al facer alcordanza de la historia, de los amores de Nolo y Demetria, sentimos como una punzada nel coral al arribar al final de la mesma. Demetria nun pue terminar asina, les mines nun puen quedar de mala manera, los mineros son xente noble y trabayador y nun puen terminar como <los malos de la película>; Plutones hailos en toles partes, pero nós sabemos que Joyanes y Plutones son la esceición que sofita la regla.  Armando, el progresu tien les sos torgues pero tamién trae avances: riqueza, trabayu, gayola... Prosperidá.

¡Menudu xolgoriu, eh! Que nun ye como entama...

Escucha al to sobrín Antero:
    - [Amaneció a la fin el día pol que tanto naguamos, el día nel que'l nuesu valle salga del so fondu y secualar letargu.... Los disgraciaos habitantes d'esta rexón que malpenes son a llevar un cachu boroña a la boca, d'equí a pocos díes, y gracies a una poderosa minera francesa... van ganar xornales qu'enxamás pudieren suañar.]

¿Demetria? 
(Semeya:"Viax per L'aldea perdida")

         Güei queremos dir en busca Demetria, consolala y remembrar <los buenos tiempos>, aquellos tiempos felices de L'Arcadia y aquellos otros nos que'l prieto carbón contrastaba col blanco de la ñeve, bayuroso,  que nos visitaba cada iviernu o la rebelión de los candes traxes de primera comunión, col que terminábemos la etapa d'alevinos/esguinos.  Güei - y con permisu de Don Armando - vamos indultar el carbón de Coto-Musel en ca del  tíu Goro, nel balcón de Demetria. El carbón y l'Arcadia nun tienen por qué tar a la tema, pa nós van xuncíos, son los lladrales del mesmu carru. Y como tamos aportando a Navidá pensamos ofrece-y a Demetria'l <Belén de Cumes> d'esti añu 2017 dende'l Picu la Vara, xusto enriba de Canzana, bien cerquina de so casa.

      " Demetria yera de Canzana, fía de la tía Felicia, que taba per ellí sentada con otres muyeres, y del tíu Goro, que fumaba en pipa tranquilu charrando con dellos vecinos.... Nun tenía más de quince años, anque'l so altor nun lo diere a entender".

La ponte El SUTU, sobro'l Ríu Nalón.
Fechu con materiales de Fábrica Mieres.  
Por eso se caltién.

    - ¿Ánde vamos esta vegada?
    - A los montes de La Pola.
    - ¿¡Pa Siero!?
    - Non, pa Llaviana.
    - ¿Otra vuelta?
    - Entá nun alcontramos L'Aldea Perdida, asina qu'hai que siguir patiando y, de pasu, arrancar un poco carbón.
    - ¿Ónde tenemos que dir  picalo?
    - A la Mina Coto-Musel, bien cerca de La Pola y tamién de Canzana.
    - ¿Y cuala ye la xida de güei?
    - Demetria, l'amada de Nolo'l de la Braña, ¿alcuerdes?
    - Sí, yá me tienes cuntao daqué. ¿Y aprovecharemos pa poner el Belén de Cumes, non?
   - Tas en too, rapaz. Esti añu dedicáu a Demetria, la flor y ñata de Canzana.
   - Val, anda; ¿ónde aparcamos?
   - Nel Polígonu Industrial del Sutu. Ta xusto al entrar en Llaviana cuando vienes pola Minera.
   - Creo que pa esta salida vamos tener compañía non habitual...
   - ¡Dios lo quiera! Y la Virxe del Carme tamién.

Nun ficimos qu'algamar al Área Recreativa y...
Dalguién yá s'esmució,  y ...
Daquién yà se sienta a tomar la parva .
- ¡Eh, venga arriba,ho! Esto nun fexo qu'entamar. Y
guardái los cayaos, aldeanos, ¿ánde creyéis que vais?.

              Pensamos siguir esti track, más o menos; lo nuestro siempres ye más o menos...
<< Salir del Sutu, pasar poles Inariegues (Les Llinariegues), tirar pa Mardana, xubir hasta'l Meruxalín y, yá en Canzana, repostiar en ca del tíu Goro (igual tenemos suerte y Demetria mos brinda una sorrisa). Depués yá tiraremos dica'l Picu la Vara - pasando cerca Les Bories y Corián -  pa entamilgar el Belén na picalina  y, con un pocu suerte, ¡nevao! (esto namás ye una plegaria).


             Tres d'aparcar nel Polígonu, al par de la chimenea ladrillu refractario qu'entá se caltién,  tiramos hacia'l sur en busca de Les Inariegues (perdonáime la llicencia) pa dir xubiendo pali-pali faciendo zig-zag camín de Mardana dexando de llaú La Peruyal. Pero anantes tenemos una sospresa; un cartelu diz que tamos nel Aula d' Interpretación de la mina Coto- Musel; ta nuna llanada al aire-llibre.
Dellos collacios, roceanos, vienen armaos como en tiempos de <L'Aldea perdida>, un cayáu tipu Toribión.
    - ¡H.a, h.a! . Venga, ho; qu'en Llaviana yá tamos civilizos...

Planu Inclináu del Cantiquín.
<¡ Brío cola carrucha!>
Esti artiluxu xuncía la montaña col valle.
(Semeya blog Acevedo)

             < ¡Brío cola carrucha! >
        < La Mina de Coto-Musel foi la primera que s'habrió en Llaviana, corría l'añu 1876 cuando l'empresariu vascu José Martínez de las Rivas - propieteriu de la siderurxa San Francisco - decidió invertir n'Asturies. Una pena que dengún burgués asturianu quixera invertir equí como ficieren tamién belgues, ingleses, franceses, catalanes y hasta rioxanos. Paez ser qu'esta falta de visión entá la tamos pagando. L'inxenieru qu'entamó cola esplotación nomábase Juan Gandolfi y planificólo abriendo delles galeríes a niveles estremaos aprovechando'l declive la fastera.
          El puntu principal d'estracción tuvo nel Meruxalín con delles boques, como l'Amada. D'equí llevábase al Cantiquín per aciu d'un pequeñu ferrocarril. Darréu baxábase'l carbón en vagonetes hasta'l llavaderu del Sutu por mor d'un planu inclináu bien visible que yera'l petite de los guah.es. Los cargaderos de Llaviana taben al par del ferrocarril de Llangreo.
          De la carrucha tengo bona alcordanza; cuando la vagoneta enllena carbón baxaba pel planu facía xubir otres vacíes. El mineru encargáu de dar la orde siempre glayaba:
    - <¡Brío cola carrucha!>, y escomenzaba la función. La Chocolatera, una locomotora asitiada na llana'l Cantiquín poníase en marcha faciendo xubir y baxar el carbón.
     El mayor puxu de la mina - llegó a tener 600 obreros - viéno-y por mor de la Primera Guerra Mundial (1914). El carbón llegaba hasta'l Musel de Xixón - onde tenía dique propiu - y una flota de barcos repartíalo per Europa. Al acabar la guerra baxó la producción que tuvo repuntes nos años 50 y 60, los que yo conocí de guaje. En 1970 entró formar parte d'HUNOSA, pero nel 72 peslló dafechu.
Siempres foi una mina mui granible polo que la familia tarrecía desprendese d'ella. ¿Nun sedría tamién que nun podíen pasar ensin caleyar per "L'Aldea perdida"?
Cuando paso pel Sutu siempre m'alcuerdo  del turullu sordu de les doce.

Ehí los tienes; a pidir modo nes oficines del Cantiquín.
Daquella trabayaben na mina homes, muyeres ya neños.
Claro que...  Igual enantes...
¿Nun vos valdría más encamentavos a la Virxe del Otero?

         Tres una xubidina sele aportamos a una llanera con un Área Recreativa, onde podemos apreciar dos bocamines. Un poco más arriba, na esplanada El Cantiquín, vemos los restos de la construcción qu'abellugaba l'entamu del planu inclináu  y una nave peralta, con arreglos recientes, que sirviere de cuadra embaxo ya oficina enriba. Iguara col enfotu de caltener un Centru d'Interpretación que nun se llevó a cabu. Güei ta en nicios de convertise nun rocódromu. Suerte y que 600.000 E. que s'echaren allá tienen un fin provechosu.

        Al ver les bocamines facemos alcordanza d'aquel día en que Demetria salió de casa en busca de fueya pa tresnar una boroña. Solíen dir los hermanos pero esta vegada...

       " Salió de tarde cargada d'un focín y metióse pelos castañeos de la rodiada buscando ún que yera pripiedá de so padre. Taba bastante lloñe; facía falta baxar a un regatu - el Regatu'l Meruxalín - que separaba la parroquia d'Intrialgo de la de Carrio, y depués xubir un cachu más.
         Al cabu d'un ratu creyó sentir un ruíu sele y tornó la mirada. Delantre d'ella, bastante cerca, taba Plutón, negru como un carbonizu, y cola lámpara prendida colgada del brazu, como si acabare de salir de la mina".

Dellos salieron a buscar la neña, otros ...
taben convencíos que tornare  pa Uviéu.
- ¿Aú te metisti, Demetria?, camienta Celso ...
Yá sé que pasó: Demetria cayó per un pozu la mina.

         Yá tamos xubiendo pel castañéu del tíu Goro, onde se perdiera Demetria. Nós tenemos más suerte y envede la chimenea la mina alcontramos un pequeñu Ärea con bancos y meses.¡Qué vista de La Pola!   Pel trazáu de l'antigua vía del ferrocarril, anguaño una pista de lo más afaiza, aportamos a Mardana; tamos a unos 500 m. d'altor/snm. En Mardana tenemos un amigu que nos llonxanos tiempos del Instituto, siendo profesor de matemátiques Don Raimundo, yera capaz de resolver cualisquier problema cola "Regla de Ruffini", hasta pa conseguíi'l puntu  al arroz con llechi.
Topamos un cartelu informativu de la ruta al aportar a un cruce: O pa Los Cuarteles- haciarriba- o de frente pal Meruxalín, que ye la ruta a siguir. Tampoco ta mal visitar Los Cuarteles, anque demos la vuelta, pa conocer les cases d'obreros que construyó la empresa y contemplar la célebre bocamina de L'Amada.
      Yá tamos camín del Meruxalín, una aldea de la parroquia d'Intrialgo a 480 m d'altor asitiada na marxe derecha del riacu Les Cuertes-L'Agüeria (el regatu del Meruxalín, onde tuvo baxao Demetria). Entá pue apreciase al par del caseríu una llamatible escombrera, xusto embaxo'l Picu la Vara (942 ).
        - ¿Pero qué pasó con Demetria? - entruga'l rapaz esmolecíu pol final de la historia.

Plutón, un gallu escrepáu, negru como un carbonizu,
arremete escontra Demetria.  El Picu Mea ye testigu
de l'afrenta:
- ¿Por qué nun sigues cantando, muyer?
- Porque nun tengo ganes... ¡Nun t'arimes!.

       - " Demetria púnxoxe pálida pero nun dio un pasu atrás. Plutón avanzó dellos pasos y ella reculó otros tantos, xopelexando'l focín na manzorga. 
     Detrás d'ella, a dos pasos namás, había una chimenea o boca de respiración de la mina qu'él mesmu acabare d'abrir y que naide nun conocía.
      Retrocedió los dos pasos que-y faltaben y cayó pal furacu".



                      Y col cuentu la perda de Demetria vamos aportando a Canzana.

Bocamina... ¿Sientes les voces de Demetria?

    
 < Yá tamos, amigos , llegando a Canzana
buscar a Demetria , cola mirada 
puesta dafechu  nel Picu la Vara 

brinda-y un Belén, oh venus l'Arcadia:

Sedrá un homenax, oh neña, galana,

que disti la vida por pola ya santa.

Queremos llegar al altu la braña 

 poner el Belén nel Picu la Vara >. 

    - Déxate de ripios y cunta lo que-y pasó tres cayer al pozu.

    - Pero home, ho. ¿Tu nun ves que pueblu tan guapu? ¡Mira que panorámica!.
     - Mui guapo L'Arcadia pero yo ando arranáu pola fin de la historia.
     - Pos venga, damos una vuelta pel pueblu y suélto algo más.
    - Lo primero buscar la casa de Demetria, quiero ver onde vivía.
    - Yá sabes que vivía col tíu Goro y la tía Felisa. Vamos preguntar a esa señora
    - La casa del tíu Goro, como ye conocida, ye aquella del corredor.
    - Madre, que abandonada ta...
    - Sí, ye una pena qu'un finxo la nuesa historia tea d'estes traces.
         Pero nós... Pesllamaos los güeyos y vemos a Demetria en corredor.

El CORREDOR de Demetria, en ca del tíu Goro.

      "Dende aquel corredor emparráu descubríase más de mitá del valle de Llaviana. Abaxo, naquel requexu que forma'l Nalón col so afluente Villoria, Intralgo, arrodiáu de pomares.... Y sigues pa Villoria, Tolivia, Freneo... Frente por frente la capital, la Pola... Ríu p'abaxo Los Barreros y Peña Corvera y ríu p'arriba, cruciando la ponte La CHalana, llegues a Inguanzo, Puenti d'Arcu, Llorío, El Condao..."

     - Ehí embaxo La Pola, detrás, allárribones, los montes de Trocea, la Campa Gües, Cayacente ya Breza na Sierra de Peña Mayor.  ¿Ves a mandrecha'l Picu Mea? . A manzorga tienes Ribota y les foces del Raigusu. 
    - Sienta naquel bancu, voi regalate los oyíos...
    - ¿Nun sedrá'l bancu onde Demetria ya Nolo paraben a cortexar?
    - Sí, ya onde'l tíu Goro pasaba bonos ratos lleendo lo que pillare mientres fumaba en pipa. Quedamos cuando Demetria dio p'atrás y cayó pela chimenea pero...
          " Plutón diere un saltu prodixosu y agarrándola pel brazu  azotó con ella pel furacu sofitando los pies nes escaleruques. Baxaron hasta la galería la mina y ellí cayeron: Plutón de pies; Demetria d'espaldes. Él quixo aidala a llevantar pero ella alzó valiente y recoyó'l focín que rellumaba nel suelu...
    - Lo único que quiero ye que pagues el portalgu".

        - Equí tol mundu tien que pagar el portalgu.
        - Nesta vida tol mundu tenemos que pagalu...
        - ¿Tol mundu?
        - Algún día yá te decatarás d'ello. Bueno, vamos dar otru paseín.
        - Mira, la fonte.

¿Antero y el Capitán ?
 - ¿Qué te pasa, tíu; yá nun pues col alma?
- Ai, neñu; lo que'l mio alma nun lleva 
ye ver esta tierra afuracao.

                   " La fonte taba un poco separada del pueblu. Llegábase a ella per caminos estrenchos cargaos d'ablanos. P'allegase hai que xubir per un senderín llabráu nel verde polos pasos de los vecinos. Al pie d'una peña mana un chorru d'agua nidio"

      - Esta fonte yá tien poco que ver con aquella, ta mui remocicada.
     - Y yá forma dafechu parte del pueblu.
     - Bien que tendría gustao a Demetria qu'antaño tuviere nel pueblu, que buenos apuros tien pasao al alcontrase equí col malváu Plutón.
      - ¿Yera Plutón vecín de Canzana?
      - Sí, antes vivía de posada en Carrio pero más tarde, enceláu como taba pola neña, pasó agospiar en ca de Xosepe, equí en Canzana. ¡Cuánto s'arrepintiere esti home me metelu en casa! Pero a ver quien lu echaba...
     - Quedamos cuando Plutón quería cobra-y el portalgu a Demetria...

          "Plutón avanzó rápido y quixo echa mano a la rapacina; pero ella, tirándose p'atrás igual d'apriesa, llevantó'l focín y azotólu con tola fuercia del so brazu sobre la cabeza del traidor que cayó en suelu. Violu inmóvil y creyó ver tamién el sangre pela cara... Pensó que lu matara y fuxó apavoriada pela mina".

La lluz venía d'una chimenea hermana d'aquella
pela que baxaren....  Pegó voces... Pero ....

         "Al cabu paeció-y ver lloñe un feble rayu de lluz".
    - ¿Una salida?
    - "La lluz venía d'una chimenea hermana d'aquella pela que baxaren".
    -¿Y qué fexo entóncenes?
    - "Pegó voces... Pero naide nun-y contestó. Siguió andando coles manes espurríes siguiendo la traza la galería, cayó... Llevantó, tornó andar ya otra vuelta cayó ... Quedó un bon cachu colos güeyos mui abiertos mirando aquel puntín claru de cielu... Morría la tarde... Quedó a escures... Entós cayó de rodiyes y rezó con fervor..."
     - ¿Vendría-y aquella canción de la Virxe del Otero que me tienes camentao?
     - ¿Alcuerdes cómo ye?
        < Virxen Santa del Otero*
            oi Madre la oración...
            Cuando a ti torno los güeyos
            al instante de morrer>
* Na Pola, Llaviana, "L'Otero" ye una cosa y "L'Oteru" otra.
 (Perdón pola torna l'himnu)

< Suaños de mina >

     "Cayó desfecha sobre aquel suelu duru y quedó durmida... Suañó milenta mil coses..."
     - ¿Pero entanto que facíen los pas, y Nolo y los vecinos?
     - Bueno, neñu, nun pueo cuntátelo too, tienes que lleer la novela...
    - Venga, ho, otru poco namás...
    - Tol mundu se punxo a buscala pero al nun apaecer.... Los vecinos camentaben que tornare a la vida señorita d'Uviéu y hasta'l mesmu Nolo lo llegó pensar de mano... Hasta que s'enteró por una vecina, Pepa, que tuviere falando con Plutón nel castañéu...
    - Y claro, Nolo púnxose no peor...
    - Yá te pues maxinar... Pero siguieron buscando hasta que Celso'l de Canzana, el de la tía Basilisa, el que tuviere faciendo la mili per Andalucía tevo una ocurrencia:
    - ¡Demetria cayó per una chimenea la mina!

La Pola, capital de L'Aldea Perdida.

         " Pal despertar creyó sentir una voz que-y llegaba dende la tierra, pel respiraderu.
           - ¡¡¡ Celsoooo !!! 
    Y cayó en suelu encayada". 
     - Bueno, amiguín, ta faciéndosenos tarde. Hai que siguir camín del Picu la Vara. Entá nos queden cuasi cinco kilómetros.
    - ¿Pero alcontráronla o non?
    - Pos claro.
    - ¿Viva?
    - Por supuesto, pero muda.
    - ¿Del ablucamientu quedare ensin fala?
    - Nun quixo cuntar lo que-y pasare. Tenía miéu que Nolo nun la creyere.
    - Pero coles sospeches que tenía...
    - Esi foi'l problema. Nolo dexó de visitala, nun pudo soportar el ruxerrux del pueblu hasta qu'un día...

Ponte La CHalana sobro'l Ríu Nalón,
Antaño trayía agua como pa tirase de cabeza dende la barandiella.
Per equí cruciaben en chalana los vecinos d'Intrialgo
pa dir a La Pola cuando nun había puente. 

     - Bueno, collacios, sentimos interrumpir; nós nun podemos siguir, tenemos que tornar pa Uviéu; asuntos familiares inescusatibles.
    - Entós podéis baxar pela carretera hasta Intralgo y ensin cruciar el Puente la Chalana siguís baxando pela marxe izquierda del Nalón hasta'l Sutu, onde quedó'l coche. Nun tien perda, hai una sienda trazada, el Camín de la Curuxera.
      Al llegar a la ponte facéis alcordanza del día la purificación de Demetria. Precisamente na Chalana, col envís de cruciar el ríu,  tuvieron l'alcuentru Nolo y Demetria.
     - ¿Por qué nun venís con nosotros y dexamos el Picu la Vara pa otru día, con más tiempu?
     - Pensándolo bien tenéis razón, vamos facelo asina. Taba diciendo que los novios alcontraron en sin querer a la hora de cruciar el ríu na Chalana:

La primer Ponte na Chalana (1895)
Casi prefiero la chalana...
(Semeya: Blog de Acebedo)

        " Apararon a la oriell'l ríu, nun sitiu solombriegu d'ablanos, onde s'agarraba la chalana. Entós mesmo llegaba'l chalaneru. 
            Blincaron los tres - Nolo, Demetria y Flora - a la chalana y Flora asitió sola a proa pa dexar los novios a popa. 
           El chalaneru, de pies, emburriaba la chalana gracies a una maroma que diba d'una oriella  a la otra. 
     - ¿Qué tienes conmigo, Nolo?
     - Cuéntase que nun zarapicasti na mina; que te llevare Plutón engañada  y qu'ellí fixo contigo tolo que quixo...
     - ¿ Y tu créeslo?... Xúrote que nun ye cierto. Zarapiqué yo, él agarróme y .....
     - ¿Y por qué nun falasti asina cuando salisti de la mina?
     - Pensé que lu matare y nun quería dir presa... ¿Asina que nun me crees?
     - Non, Demetria, nun te creyo.
     - Nolo, la mio vida dará testimoniu de la verdá. Adiós.
   
    - ¿Y qué pasó?

La Chalana naquellos llonxanos tiempos...
Semeya: "El Trasgu la Fronda", ¿ yá daquella 
dedicaba a estes actividaes?
Norabona.

        - La mocina dexó cayer p'atrás nel medio del ríu. La corriente arrastóla pero...
              "Nolo tiróse tres d'ella...
               Sacóla del agua ensin sentíu".
          - ¿Y ficieren les paces?
          - Demetria prendió los güeyos y, con una sorrisa atristayada, dixo:
      -" ¿Créesme agora, Nolo?
      - Créote, Demetria. - y apurrió-y un besu a lo Gary Cooper.
          - Bueno, tampoco te pases qu'esti Gary nun yera precisamente l'allegría de la güerta atorniellando...
         - ¡H.a, h.a! Necesitaba polo menos dos películes pa tener el rixu altu...
         - En fin, ¿veis ónde tamos? Too esto ye la Chalana, que debe'l nome a una barcuca qu'había antaño pa cruciar el Nalón cuando nun había ponte. Hebo varies, la de mio ye esta. Nesta zona, nos años sesenta, nun cabía otru alfiler los díes d'estivu, sobremanera fiestes ya domingos. Miles de persones de la Cuenca (Nalón) andaben asoleyándo per estos praos pa darréu tomar un bañu nestes agües cristalines. Taba equí tou Sama, La Felguera, L'Entregu, Sotrondio, Blimea y Los Barreros; bueno, y de tolos pueblos del Conceyu.
       - ¿Y por qué nun se bañaben  cerca casa?
       - ¿Nun t'alcuerdes que nel Sutu dexáremos un llavaderu de Carbón?. D'ehí a Pravia 'adiós a les truches!
       Echo la cabera güeyada pal puente y quiero ver a José Adolfo llanzase al vacíu, rompiendo l'aire, acompasáu por Fonsi y Fernando Corral ya interrumpiendo la respiración de la xente mientres los tres ánxeles se calteníen n'atmófera. Unos instantes máxicos hasta que sentíemos: ¡plaf!, un ruíu sele al travesar el cristal del agua. Depués, los aplausos.

Ehí los tienes, Demetria afogándose y ellos....
¡¡comiendo regodones!!

           Paramos a tomar el bocadillu a la vera del ríu, cerca de lo que llamábemos "El Pozu los Xerrones". ¡Cuántes moyaures, cuántes alcordances!. Depués pasamos enfrente'l Práu Julia, per onde atayábemos pa entrar nun biescu de ribera atarraquináu de tordos y malvises. Andar a niales yera una de les nueses aficiones preferíes. La otra yera'l fútbol. Xugar nos permanentes barrizales de la dómina  o dir a ver al Titánico yera muncho más emocionante que sentir pola radio meter goles a Basora, Kubala, Puskas o Di Stéfano; anque yo yera más de Puchades o del mocín Biempica depués; lo mio yera'l medio campo, ¿pa repartir?... Que va, pa pasar desapercibíu (pero si yá pasabes, jodíu), o tar en toles partes o ... en ninguna.

        El Real Titánico ye un club de fútbol con tradición u solera. Fundó en 1912 pocu depués del fundimientu del famosu Titanic, d'onde tomó'l nome n'alcordanza d'aquella traxedia. Esto debió marcalu pa siempre pos foron delles les veces que se "fundiere" pero volvió a resurdir como l'ave fénix. L'artífice d'esti inventu foi Chepe, un rapaz que taba estudiando en Navarra (como nós) y nos enseñó les regles d'aquel xuegu nuevu que recién s'inventare n'Inglaterra. El primer presidente foi'l abogáu Aquilino Zapico seique'l más célebre fuere l'empresariu Tino Cuesta; entá recuerdo les arengues que nos echaba a los guajes col envís d'animar al Titanic. Daquella - agora más - taba convencíu que nun había meyor equipu nel mundu que'l Titánico y meyores zapatos que los de Cuesta.
        Pero nun quiero pasar per delantre lo que fuere'l Campu de Fontoria en sin facer alcordanza d'aquella aliniación lexendaria del Titánico que me tocó esfrutar de neñu:
                              < Santos
           Armando   Manolo   Echevarría
                         Tani   Daniel
Tolivia (el mio Maestru)*  Botero  Eloy  Velasco y Quini > 
* Había que tar animando los domingos onde'l córner (xugaba d'estremu) por si de selmana escaecíes los afluentes del Miño...

¡¡Adiós, collacios!!
Si pensáis perdevos  alguna vez o por
algún tiempu nun alcontraréis sitiu
mas ayaizu que  <L'Aldea Perdida>.
¡¡Fasta ceo!!

       Y como que nun quier la cosa vamos aportando al Sutu. Yá nun hai tren, nin cisca nin turullu ... Yá nun ves mineros en bici nin fumo salir de la chimenea; agora tienes un Polígonu Industrial onde s'entra per aciu unes gasolineres, una la de CHemari, el primer "gasolineru" de la Pola y amigu nuestru.
        Namás queda despedise, pol momentu. En cuanto se dean les condiciones afayaices entamos cola segunda parte de la ruta: <Canzana-Picu la Vara> col envís d'entamilgar, como tolos años,  el Belén de Cumes de la A.ASPERGER d'Asturias; esta vegada camentando en Demetria.

                         

                         2ª ESTAYA: 
                       CANZANA - PICU la VARA  
       

< Belén de Cumes nel Picu La Vara >
L'Asociación Asperger d'Asturies nun pierde añu d'entamilgar el so Belén
y como siempre deseya paséis una <Feliz Navidá>.

         Amanez.... Por fin paró de llover, yá yera hora. L'agua fai muncha falta pero n'Asturies precisamos d'una tregua, otramiente vamos quedar amusgaos dafechu. ¡Puf!... Nun se ve nube alguna nel cielu, entá azul escuru. Va facer un día pistonudu, la rosada nel Corredor del Nalón ye de les buenes, sobremanera nos requexos onde tarda en pegar el sol.
      Ye una pena que los collacios que participaren na gayola la primer estaya de la ruta <El Sutu-La Vara> nun puean tar na segunda, a ellos en particular-yos dedicamos esti BELÉN.

La Pola dende'l Restaurente Canzana,
onde aparquemos los caballos.

        Tenemos ¿mui claro? lo que queremos... Llegar a Canzana temprano, echar una güeyada pel pueblu pa tomar puxu y tirar dica'l Picu la Vara; hai qu'entamilgar el Belén de Cumes  nel mesmìsimu picu, s'il est possible. Nun entramos na Pola, siguimos dica la rotonda La Chalana y torcemos pa Intrialgo; pasamos seliquino per delantra casa'l Capitán nun vaya ser que se despierte don Félix....
(Nós siempre queremos asimilar la casa de don Armando cola de don Félix, seique nun fuere asina...)
      - Tranquilu, que'l capitán  ye home de pocu dormir; pasa cuasi tola nueche lleendo o camentando nos asuntos pendientes.
     - Claro, por eso depués queda fritu en cuantes s'arrequexa en cualisquier asientu...
      "De día avezaba a echar pigazos repentinos y pantásticos onde menos se pudiera imaxinar; na corte... na ilesia... y hasta xubíu al caballu..."
        - Oi, pero si t'alcuentres con elli nada nun-y digas, que paez-y fatal...
         Disviamos a mandrecha nel primer cruce: <Canzana : 1 km >. Travesamos la ponte sobro'l Ríu Villoria y na primer revuelta la carretera vemos un senderu astráu de fueya onde una mula ta invitándonos a siguila pela <Sienda L'Aldea Perdida>.

Entamu la <Sienda L'Aldea perdida>
Nolo xubía en caballu a cortexar con Demetria.

    - Mira, esta mula reconvirtió. Ye de les que trabayaben na mina pero supu adautar a los nuevos tiempos, agora ta de "guía turística".
    - Anda, tira pela carretera hasta Canzana que depués tenemos una bona caminada hasta La Vara.
              " La cuesta de Canzana ye pindia"
         Una curtia ya agrable xubida - sobre tou en coche - hasta Canzana, la poliorcética villa astur-romana de Cancius. Sabía bien esti romanu onde s'asitiaba. Una llomba peramplia paez controlar los valles de los ríos Nalón y Villoria. Enseguida alcontramos l'Hotel Restaurante Canzana onde aparcamos tres consultar cola dueña del negociu. Tien unes vistes precioses de La Pola, nun m'estrañaría nada qu'equí mesmo tuviere asentáu'l guerreru imperial; imposible alcontrar otru sitiu más afayaizu pa descansar y más granible p'arriquecer: Agua a esgaya y tierres feraces nel valle mentanto les brañes queden a cuatro pasos del pueblu. Les tierres tan amaes por don Félix, Cerezangos, de xuru que taben na propiedá del romanu. D'aquelles brañes venía la llechi - sacante los xueves que nos lo baxaba güela de la Rebollá -  que tomábemos en casa de guah.es; yera Socorro la encargada d'apurrínoslo per aciu d'un carricoche tiráu por una burra. Más tarde foi Sabel, la d'Entrialgo, una bona muyer que trabayaba de lo lindo.

Cerezangos yera'l rixu del Capitán del Félix,
La Pola foi'l miu. 

         "Cerezangos ye un gran práu separáu menos d'un kilómetru de la casa. Ta asitiáu na falda d'ún de los cuetos qu'aprieten la estrencha foz per onde cuerre'l riucu de Villoria.... Aquella campera abierta yera la finca predileuta del capitán, la so allegría y los sos amores".

      A midida que xubimos vamos comprobando la riqueza d'esta xente reflexada nunes cases pimpanudes; ricos ante y ricos agora. Aprovechamos pa restolar un poco pel pueblu y recordar a Demetria delantre ca'l tíu Goro, allá no cimero l'aldea:

Delantre casa, Demetria camentaba delles veces
 na vida señorita que llevare n'Uviéu, 
pero ella nun cambia
<L'Aldea Perdida> pola <Civitax episcopal>.

      <Demetria, símbolu de Démeter (Ceres pa los romanos), la diosa griega de l'Agricultura, ya símbolu nesta novela de l'Arcadia, de la vida bucólica y campesina, de la felicidá .
 ¿ Va poder  resisitir esti paraisu l'emburrrie de los tiempos nuevos o va vencer énte'l carbón? . Lo que paez nidio ye que la so vida ta en peligru.... Plutón anda a l'acesmu...
Estos problemes nun los tuvo Cancius, él sí que viviere n'Arcadia>

         Tres les semeyes afayaices terminamos cruzando'l pueblu p'abandonalu pela parte alta, onde descubrimos otra fonte que nun conocíemos.
    - Esta sí que paez la fonte de Demetria, ye muncho más antigua. Ponte ehí que voi inmortalizavos, a ti y a la fonte.

La Fonte vieya, no ciemero del pueblu,
onde Demetria diba coyer l'agua.

         Tenemos dalguna dubia sobro'l camín a siguir magar la señal afayaiza asina qu'entrugamos a unos señores (bueno, en realidá ye tamién por tener daqué información al rodiu'l camín, nun vaya ser que nos perdamos, amás hai que confraternizar).
     - Vais perfechamente per esti camín de formigón; eso sí, tenéi curiao nun resbariar, sobre too pa baxar... Ye lo que tien el formigón, sobre manera xelando.
     - ¿Tárdase muncho en llegar?
     - Nuna hora, o pocu más, tais arriba.
     - Mui poco m'abulta...
     - Non, echáis más d'hora y media, que ye enforma pindio - arrepostia otru vecín que vien a sumase al alderique. Lo que nun tenéis ye perda: Primero pista formigón hasta una campa y depúes camín anchu de zahorra ensin malpenes charcos.
    - Cuando lleguéis a una campa nin pola derecha nin pola izquierda, pel mediu. Bueno, va guiándovos una caseta d'Hidroeléctrica que tenéis na picalina. Bueno, mirái p'allarriba, ¿veis aquelos picos?... Nel de mandrecha pue apreciase la caseta y con una de ferre hasta'l poste formigón?
    - El finxu xeolóxicu. ¿y la mina Amada queda...?
    - Embaxo'l picu. Aquel pueblu grande ye Mardana y más p'acá'l Meruxalín. Xubiendo un poco tenéis la bocamina Amada, casi nun s'aprecia tapecida polos artos. Pero tovía respira, eh. Tuvi yo va poco que fui enseñá-yla a un ñetu.
          Ente pitos y flautes son les 10.40. Yá ye hora d'entamar.

Canzana dende'l Km-5
Cómo supo asitiase'l romanu Cancius.

         Ente  praos y dalguna cabaña de montaña vamos ascendiendo per una sienda enforma pindia. Un moyón marca'l km-5 onde tres caballos pastien xunto una cabaña. Pasamos el portón de fierro forxao <d' El carreteru la Campa> y enseguida "El Montón de Piedra" onde unes oveyes xaldes la gocien ayenes - o non - al máxicu paisax. Yá son les 11:00.
     - ¡Uf!, por fin enllanamos un poco. Vamos aprovechar pa ferregüellar l'entornu: Mira, el valle de Villoria que remata en Picu Mea. Vémoslo too: Peña Mayor y la fastera que baxa hasta La Pola per Cayacente y los montes de Trocea.
     - Mira, aquel praón de Trocea, embaxo Breza, yera de güelu. Taba de monte casi too y a base de trabayu foi faciéndolu más dondu; d'ehí sacaba la mayor parte la yerba pa tres vacuques y algún xatu. Xurdía un manancial naquel práu onde siempre esperábemos qu'apruciere una xana...
        Al llegar al Km-4 aprovechamos pa sentar nun bancu madera, mui guapo. L'altímetro marca 690 m/snm y tamos a 8,8ºC con una humedá del 55%. Y qué más nos da... Lo impresionante ye'l día, les vistes, la paz... Y pa enriba acabó'l formigón, ¡aleluya!.

Aportando a la Campa de Curián.

        Caminando en santa paz vemos un pueblu enforma grande que tenemos a manzorga: Curián. Aportamos a l'abierta Campa al llau d'unos bancos -qué bien preparao lo tienen - donde nos reciben tres asturcones faciendo sonar el cencerru. Una cabaña y un Depósitu d'agua asitiáu nun cuetu son testigos d'esta semeya, nun ye plan d'escaecer la gayola que sentimos.
       

Asturcones na Campa Curián. 

        Travesamos la campa de Corián dexando'l pueblu a manzorga.  Nun taría mal echar una güeyada a esta aldea de la parroquia Villoria regada pol Ríu Mayaín; pero meyor a la vuelta, por si acasu... que ye yá son les 11:45 y l'altímetro marca 745 m/snm.
     - ¡Vaya vistes!. Mira, per ellí na vega, pue vese Inguanzo, Puenti d'Arcu - ¡meca, mira la ponte qué bien se ve acercando'l zoom! - , Ciargüelo, Muñera, Llorio y hasta'l turruxón del Condao.
     - ¿En Ponte d'Arcu nun ye onde entama <El dencensu folklóricu del Nalón>?
     - Afirmativo.
     -Un añu podímos participar...
    - Igual yá se nos pasó l'arroz...

Utre planiando sobro La Vara,
aprovechando les corrientes d'aire
p'ascender en círculos. 

       ¡Andando!... Vemos otru pueblu na parte baxo, a manzorga y pol mapa decatámonos quer son Les Bories.   Depués la campina d'El Dau, como nos dixeren más tarde, y yá son les 12:00 en puntu. ¿Y les campes de Veguellado  y la Vesqueta que tenemos lleío n'algún blog?.  Cabañes, vexetación de montaña ya una ablucante panorámica. Son les 12:25 cuando...
    - Mira, un ferre... Yá lu taba echando de menos.
    - ¡Ya otru!. Serán pareya.
    - Y más, mira, aquel posó nel prau, xunto los caballos...
    - Pero ¿nun te paez mui grande pa ser un ferre, ho?
    - Ye que nun son toos iguales de tamañu. Vamos sacar unes semeyes... Vaya menera de planiar... Esta utre va caenos encima...
    - Ties razón, esto debe ser una utre lleonada... Deben tener un comederu per equí, tan protexíos.
    - De xuru; estí ye'l hábitat afechiscu pa elles: montañes, cantiles, altura y valles onde se producen movimientos anabáticos (ascendentes) de les mases d'aire al calentar nes fasteres asoleyaes. Hai que buscar la información afayaiza.

Utre lleonada ( Gyps fulvus). 

        La Utre (Gups fulvus) ye un ave rapaz diurna de les poques utres qu'entá  queden n'Europa - d'ehí l'enfotu proteutor - que tien una envergadura considerable d'unos 2.50 m (menudu sustu nos dio cuando planió penriba les nueses cabeces). Les plumes son de color canelo que tornen a marrón escuro o negro na cola y nos estremos de les ales. Mui chula ella, y pa da-y más resalte, presenta nel pescuezu una especie de gorguera o collar de filoplumes blanques qu'asemeyen la melena del lleón (lleonada).  Cabeza pequeña y cola curtia presenta'l típicu picu ganchudu de les rapaces pa desgarrar los texíos. Los deos de les pates (1+3), mui separaos, son grandes y buxos, pero más cimbles que los d'otres families, con uñes cortes ya romes; ésto y el gran pesu (hasta 10 kg) que tienen tórga-yos cazar otros animales poro se dediquen a la carroña, mamífera sobremanera, o hai que cebalos si tan protexíos.

De momento, <N'amor y compaña>

Tamos nel "Paisax Protexíu de les Cuenques Mineres", 132,25 Km/2  d'Importancia Comunitaria (Decretu 36/2002) nos conceyos de Llangréu, LLaviana, S. Martín R.Aurelio y Mieres que formen parte - estremu oriental -  de la Rexón de Mantos. El sustratu ta formáu mayirmente por sílice (pizarra ya arenisca con niveles de carbón ) qu'alternen con bandes estrenches de caliza'l Carboníferu.

<A pie de Picu>, na Carbazosa. 

   Al Km-2 aportamos a les 12:25. y a La Carbazosa, nel Km-1, hacia la una. Una casa perguapa y un señor mui amable sáquenos d'un apuru pos los cartelos indicativos nun tán mui finos que digamos, nin el que diz per onde tirar nin el que diz lo contrario.. ¡menos mal!. Si nun sabes qué facer tira a mandrecha y p'arriba, pa onde ta la caseta del picu, la d'Hidroeléctrica.    - Dicen que dende la caseta puen abrir y cerrar les compuertes del pantanu Rioseco, nun sé si será verdá... Ella ta alimentada con paneles solares, yá la veréis. Pero'l camín ye esti y nun tien perda anque equí son munchos los qu'erren por mor de los cartelos.
    - Ta llué y gracies, señor.
         Llegamos a La Vara a les 13:30 y dímonos un respiru nunos bancos bien amañosos pa tomar el pinchu, pero sedrá a la vuela; lo primero ye lo primero: El Belén.  El Picu ta a cuatro pasos. Yá vemos  la caseta y el finxu xeodésicu. Namás queda buscar el sitiu  afayaizu pa entamilgar el Belén, como tolos años, pensando n'ASPERGER. Nun pierdo la esperanza que, daqué día, el <Camín de Niria> tea abarrotáu de xente. Tres dar unes vueltes alredor del finxu alcontramos, a la fin, un requexín onde abellugar el Belén; nun ye plan que'l Neñu pille una tremesina que lu lleve dios por mor de les xelaes que tán cayendo. Cuando quedamos a gustu sentamos a xintar un bocadillu que sabía a gloria, claro; el cuartillu vino y el café aidaron lo suyo.

L'Aldea Perdida, dende'l Picu La Vara. 
Lo que Don Félix nun quería perder.
-¡ Ai,  Armandín, cómo t'entiendo!

        Sí xubir foi un placer magar la cuesta la baxada foi un gayola permanente. Pasu ente pasu fuimos repasando tolos pueblos y llugares de L'Aldea Perdida, los montes, los ríos, los praos y los episodios qu'ocurrieron naquella domina de los anicios del carbón. Sobrevolando aquella alegoría nun pudimos otro que camentar:

       - ¡Ai, Don Armando, cómo t'entiendo! 
Magar les bones perres que'l Capitán va sacar poles tierres de Carrio, afectaes pola mina, nun ye d'estrañar que sintiere una pena escomanada pol acabar d'aquella Arcadia, ta pasándonos a nós... Si algún día vos apetez conocer aquel Edén onde escomencipió la historia de la humanidá con Adán y Eva podéis facelo visitando L'Aldea Perdida; na mente de Dios aquelles imáxenes taben superpuestes.
       Celebramos la película con un carah.illu rebaxáu nel Restaurante Canzana, onde pensamos tornar, ensin tiempu, daqué día; la comida tenía una pinta...
       Siempre zarramos les salides trancando la portiella pero esta vegada déxovos la puerta <ABIERTA DE PAR EN PAR>, por si vos petez perdevos per <L'Aldea Perdida>.
   

" ¡Oh valle de Llaviana! ¡Oh ríos cristalinos!
 ¡Oh verdes praos y mestos castañeos!,
¡cuánto vos amé!
Quel vuesu airiquín arumosu caricie un segundu la to frente,
que l'ecu misteriosu de la vuesa voz suene tovía  nos mios oyíos,
que vuelva ver delantre los mios güeyos les figures rellumantes
de los seres que compartierron les allegríes de la mio infancia"

       Lo que tenga pasao con Demetria nun ye plan de cuntalo nesta ocasión, güei ye día pal BELÉN. Tiempu habrá, tai al pendiente... 

 CUMPLíOS:
. A Don Armando Plalacio Valdés pola so OBRA y sobre too por esta de <La aldea perdida>, patria onde ñacimos y de la que tan argullosos nos sentimos.
. A Sixto Cortina pola so maxistral torna : < L'aldea perdida>, d'onde sacamos les cites.
. A Xosé Mª Vega Blanco por llevanos de < Viaxe a l'aldea perdida > y prestanos delles semeyes.
. A Efraín Canella por <L'aldea perdida, en décimas>.
. A dellos blogs al rodiu la <Mina de Coto-Musel> y la sienda < El Sutu-Picu la Vara>, a saber:
   .<Ayuntamientu Llaviana>, <Wikiloc>, <La página de Bedri>, <andarasturias>. Por mor de les <leyendesasturianes> anduvi una mañana tres los pasos de Marisa, nun ye la primera vez. Tamién visité <MTI.blog.com>,  faltaría más y <viajandopornenyure>, <www.lne.com> asina como'l <blog de Acebedo>, ¿alguna vez nun te consulto?.
. A Wikipedia, como siempre.
. Tamién restolé per <21 rutes de Senderismu per Asturies> de Bertu Ordiales ya Guillermo C. Ruíz asina como <Aves de España>, de E. de Juana y Juan M. Varela.