L'ALMIRANTE de ROCES:
Don Pedro de Valdés y Menéndez de Llabandera
 |
| El PALACIU de Don PEDRU de Valdés, asitiáu en Roces (Xixón) |
Don PEDRU de VALDÉS y MENÉNDEZ de LLABANDERA
Don Pedru de Valdés y Menéndez de Llabandera foi un marín-militar y políticu español que ñació en ROCES (Xixón) nel añu 1544 (ib) y finó nel mesmu llugar en 1616. (Quiciabes se despidiere tando al par de les Termes del Campu Valdés, pero de xuru que con un güeyu mirando a Roces)
 |
| <Los suaños de Pedrín> |
Sicasí la carrera de don Pedru foi muncho más bultable de lo qu’un cenciellu croquis pue amosanos dao que vien a desendolcase tanto nel continente européu ( Nápoles, Península Ibérica, Azores, Inglaterra y Flandes) como n’América (Cuba), eso significa qu’anduvo unos 54 años de marín errante sirviendo a la Patria.
Cuando tenía 16 años, ensin el consentimientu paternu (cosa normal nos de Roces; alcuérdate d’Alfonso Camín), coló pal reinu de Nápoles brindándose a lo que'l virréi d’esti virreinatu español, tuviere a bien menester. Esti dio-y una plaza d’Entrenamientu nel mesmu palaciu .
 |
| <D'equí xurdió la lleenda>> |
Tres
d’un
tiempu prudencial
foi
enroláu
nuna galera que persiguía la morisma turca
y piratera del Mediterraneu algamando, mercé
al so valir, el grau
d’Alférez
d’Infantería
y siéndo-y concedíu
l’Hábitu de la Orde de Santiago
(1565) magar
nun lu recibiere hasta l’añu siguiente dao que’l títulu, robláu
por Felipe II, esmució pel camín. Foi
ún de los primeros asturianos n’algamar a
esi gallardón tan prestixosu.
Embaxo la güeyada del Adelantáu de la Florida (1565) ingresa n’Armada de don Pedro Menéndez d’Avilés que daquella andaba tres los corsarios franceses pel Océanu Atlánticu; d’esta miente don Pedrín consiguió’l cargu de Maestre de Campu y Almirante tres ocho años (1574) de llucha constante cola piratería. Nesti tiempu participó na reconquista de La Florida escontra los hugonotes franceses a los que desaniciaren dafechu. Yá más tarde intervieno na batalla de Salga (1581). ¿Cuéntotelo? …..
Les AZORES: Qué
sitiu tan guapu pa controlar L'Atlánticu y el
comerciu con América. Tol mundu naguaba por dominalo.
 |
| <Les islles AZORES> (Wp) |
…... Ello yera na dómina de Felipe II d’España qu’adebecía por ser nomáu rei de Portugal… Talo que’l rei de Francia o la reina d’Inglaterra, Sabel I. ¿Por qué tantu empeñu en reinar en Portugal?… Porque yeren dueños de Les Islles Azores que teníen una situación poliorcética escomanada pa controlar el tráficu naval coles Les Indies (Hispano-América) y Brasil, por supuestu, que taba tamién embaxo la dómina de Portugal. ¿Facemos una pequeña alcordanza d’esa hestoria?:
………..
 |
| <El mesmísimu Don PEDRU > |
«Pos
resulta qu’Antonio
d’Avis
- prior
d’Ocrato – yera
fíu natural
del
infante Enrique I de Portugal y nietu del gran rei Manuel I,
L’Afortunáu, y
taba
encetáu en ser el siguiente Rei de Portugal. Tenía
bon cartel y
fuere emponderáu pol pueblu como
tal
rei a
la muerte d’Enrique I seique
la élite portuguesa nun taba pa
nada contenta dao que
prefería como rei a
Felipe II d’España (sobrín-nietu
de la reina portuguesa
María d’Aragón, fía de los Reis
Católicos) - qu'a la fin
terminó
quedando
como rei de
Portugal tres
ganar
la
<Batalla
d’Alcántara>.
Entóncenes
los partidarios d’Ocrato refuxaron nes Azores col gabitu los
franceses – que cobraben como prenda na menos que Brasil- y
embaxo la mirada aplacedera de los ingleses que tamién buscaben la
so tayada – lo que ye la vida: ¡francos y britanos amartelaos! .
Les Azores veníen-yos como Zeus a los fíos de la Gran Bretaña p'axeitar les sos bases pirates escontra’l comerciu esclusivu
d’España con América.
Nun hebo otra qu’unviar l’Armada española al mandu de don Álvaro de Bazán y poner les coses nel so sitiu. Nestes frecuentes refriegues participó d’afechu'l nuesu vecín, Pedro de Valdés ( nun perdía una, el de Roces).
- Pero, home; colo bien que podíes tar al par de casa, en “Ca Pacorro”, tomando unos culinos mientres xuegues a la “llave” colos collacios de la infancia..
 |
| D. Álvaro de Bazán, el nun va más |
Sicasí que’l nuesu Pedrín, un pelín azotáu, yá tuviere metío la pata por una engañifa que-y colaren na Islla Terceira , nes Azores, onde picó talo un fatu.
-¡Vaya por Dios, home! Esto pasóte por grandón… Los asturianos sois (somos) incorrexibles...»
....................
Bueno…. Hai una infrahestoria portuguesa que cuenta los entamos d’esta batalla … Por si te presta….
« Ello yera’l 25 de Xunetu de 1581 cuando tevo llugar la “Batalla de Salga” un momentu hestóricu pa la Islla Terceira (Tercera) asitiada nes Azores na que’l pueblu y los toros xugaron un papel cabezaleru na independencia de la Islla y que tresciende hasta Portugal entera. Qué guapa la hestoria cuando ye a mecese cola lleenda….
Cuando en 1578 finare’l rei Sebastiao de Portugal xubió al tronu Henrique I pero con tan mala suerte qu' al añu siguiente (1579) siguió los pasos del anterior pero entá peor dao qu’esti nun tenía socesor dalu . Entóncenes abrióse un periodu de lluches col enfotu de facese cola apreciada corona. Trés candidatos: Dª Catalina, Felipe II d’España y D. Antonio Prior d’Ocrato, que yera’l preferíu pol pueblu portugués y al qu' encumare en Santarém. De poco-yos sirviere pos la nobleza lusa prefería a Felipe II, rei d’España. Como los d’Ocrato taben gallinos hebo que manda-yos l’exércitu y na “Batalla d’Alcántara” cortáren-yos la cresta.
- ¡ Viva’l rei d’España y Portugal!.
- ¡Esto nun va quedar equí, dígovoslo yo !
Tou dios se rindiere al español sacante la Islla Terceira, nes Azores, onde la gobernadora doña Violante d’O Canto espetó :
-
“¡Que non, que non, que non!”. Torna p’acá Antonio, nun tamos solos, que
tenemos la gabita de gavachos y britanos,
amigos d’ocasión.
 |
| <La Terceira, la menor de les Azores> |
“Enantes morrer llibres qu’en paz sometíos”
Esta frase quedó grabada pa siempres como lema de Les Azores y ye un recurrente na independencia de Portugal.
Dos años más aguantaron los terceiros…..
Yá sabemos como terminó. Felipe II unvió al meyor: Don Älvaro de Bazán que desembarcó na badea de Mos y esti cuentu yá acabó. Doña Violante embarcó nes Azores sobro una plataforma con tolos barcos españoles en formación mentanto una salva atronadora diba despidiéndola :
- ¡Adiós, Señora; vaya usté con Dios! .- El respetu ente too ...
………………………...
Sicasí d’esta avería na Terceira (nes Azores) y tres demostrar el so valor Don Pedro foi ascendíu a Capitán Xeneral de l’Armada de los Galeones del carreru d’Indies asina como a Capitán Xeneral de l’Armada de Flandes siendo daquella cuando tomó Amberes. Tamién ye verdá qu’esta armada – al so mandu - flétase en corso (ye dicir a lo Drake, atacar col permisu del Gobiernu pero mirando esti pa otru llau; vamos, que s’enteraben pol “periódicu”) pa escorrer los pirates del Mar Cantábricu. Don Pedru fizo un gran trabayu dao qu’estos lladruepos anduvieren fritos munchu tiempu por mor del almirantucu de Roces.
Poco más tarde ye ascendíu a Almirante del escuadrón Andalucía formando parte de l’Armada Invencible (1588) col enfotu de participar na batalla definitiva escontra los ingleses de Sabel I. Felipe II yá intentare casare con ella pero esta nun entraba en razones; claro, nun llegare a “Macorina:
- Yo nun soi platu de segunda mesa. Cola mio hermana María yá tuvisti bastante, Felipín ; agora vete preparándote... Tengo a Drake pa enfilate !
 |
| <Semeya: Wp) |
La Gran Armada, reunía en Llisboa, al mandu del - poco preparáu - Duque de Medina Sidonia , taba dividía en cuatro escuadres mandaes por cuatro almirantes y punxo rumbo a Inglaterra pero por mor de les males condiciones meteorolóxiques tevo de recalar n' A Coruña. Cuando’l tiempu ameyoró navegó agües adientro camín del Canal de La Mancha onde lu esperaba l’otru gallu, Alexandru Farnesio, gobernador de Flandes, que por mor d’una aición conxunta baxaba dende’l norte pa dir direutu a Londres, al so entender, poco fortificada …..
Yá sabemos lo qué pasó cola Invencibe…. El galeón de don Pedru, Nuestra Señora del Rosariu – nun podía nomase d’otra miente - foi prindáu por Drake y tuvo presu cinco años, na Torre de Londres ( o en casa de Drake, esto mui bien nun se sabe) hasta que nun cambéu de presos pagáron-y el rescate a costa de quedar la familia “en bragues”. Munchos años-yos costó a los Valdés salir d’esta p’alantre; elli mesmu morriere d’esta miente: ciegu y ensin un chapu ( menos mal que Pacorro sabía cómo conta-y los chistes calós a lo “Juaquín”). Pero lo que quedó pa la hestoria foi :
El mascarón de proba d’un GALEÓN español (XVI).
GALEÓN: Barcu íberu de vela, grande, pesáu y lentu ; de tres cubiertes y armáu hasta los dientes.- El San Martín (Sao Martiño) por exemplu: 48 cañones, 650 (marineros, artilleros y soldaos). - Desplazamientu :1000 tm.- Eslora: 57,3 m. - Manga : 9,3 m.
El mascarón de proba d’esti galeón ye una ayalga, asemeya al del “Santa Ana”, que ta decorando la casa de los descendientes de Lolo Claudio, no alto de Pumarín (Roces), frente a La Peñuca, onde ñació Alfonso Camín, l’heraldu d’Asturies.
Lo que quedó pala hestoria ....
<El galeón Nª Sª del Rosariu yera un barcu perimportante y bien pertrecháu que salió en retaguardia drecha como buque insinia pero diben tan atacaos (¿de los nervios?) que chocaren escontra otru buque español.
Tamos falando de La Invencible, los meyores barcos, los meyores marineros, los meyores armaos … Bueno, bueno; eso quería’l Rei que s’esplayare pero la verdá cuntada (soto voce) pol Comandante de la mesma, el duque de Medina Sidonia, ye que la Flota fuere preparada con munchu apuru dao que Drake taba faciendo de les suyes – atacando barcos hasta en construición – pa retrasar l'acabáu de la Gran Armada mientres ellos construyíen en Londres una flota importante y rápida na maniobra. Y como los retrasos aumentaben y el presupuestu enantaba una burrada Felipe II mandó lo que tenía, que nun yera poco, pero la toma d’Inglaterra paecía una empresa demasiao grandona pa un Duque ensin la preparación más afayadiza*. Esto y les circunstancies meteorolóxiques ficieron el restu, y asina mos foi. Tuviemos que volver coles oreyes gaches y Sabelita encumada en Londres talo un Dios:
 |
| <S:Wp> |
- ¡Dios salve a la Reina! - Y hasta nel Escorial tiense sentío l’ecu d’aquel clamor.
Foi daquella cuando Felipe II entamó a fumar en pipa… (Consuélate, amiguín; que si ties de dormir con esta… Colo xostrón que salisti… Garres fixo la viruela)
……… Sabelita I d'Inglaterra
* Nota: El Rei Felipe tenía en mente pa llevar el mandu a don Álvaru de Bazán pero Dios tenía otros planes ... Y llevólu con Él (1588) enantes de tiempu. Mal debía andar la cosa pel Olimpu pa tantu apuru ...
..................
El “Rosariu” quedó varáu en retaguardia pero a mercé del pirata Drake que lu asaltó faciéndose esti con una munición bayurosa ya una bona farguetada de perres bien escomanada. ¿Cómo’l Rosariu nun respondió? ¿Por qué nun se desfizo de les armes y de les perres?…. ¿Prindáronles los suyos? …. ¿Llenaron los bolsos los marinos ingleses?… Tengo oyío qu’a la Reina nun-y llegó tantu como dicíen...
 |
| <S: Wp> |
- ¡Ai, don Pedru; vaya marrón pa un marineru! > .
Como tamién a nós nos dexare ablucaos … Xurgando, xurgando, alcontramos dalguna esplicación seique l’affaire tevo dagunos pros y munches contres:
. « El galeón “Nuestra Señora del Rosariu” que cubría la retaguardia derecha de l’Armada tevo un alifaz al intentar atacar a dos ñavíos ingleses pero con tan mala suerte que llevó per delantre a ún de los suyos y elli quedó varáu ensin poder navegar; hasta baxaron les veles, supónse que pa ponese a iguar les averíes. El casu ye que durmió albentestate porque’l gran capitán de l’Armada, el Duque de Medina Sidonia, aconseyáu pol so asesor náuticu - don Diego Flórez de Valdés, pariente y poco amigu de don Pedru – encamentó-y dexar El Rosariu a la so suerte porque nun yera conveniente romper la formación.
- ¡Fíate de los parientes!….
A la mañana del día siguiente (1-7-1588) don Pedru vio arribar per popa una cuadriella de barcos ingleses capitaniaos pol mesmísimu pirata Drake. L’asturianu, solu y averíau, camienta que val más pautar – llevaba dalgunes perres, pólvora y cañones - que morrer a lo fato asina que queda presu porque l’inglés nun quixo componendes (Bien sabía’l xostrón la bona tayada que podía sacar con esti “affaire”).
Los bilordios preguntábense por qué nun morrió talo un héroe dao que tenía munición a esgaya …
-¡Porque val más un home qu’una mata de cañones!
……..
Como amás llevaba na farda otru escalabru por mor de la conquista de Les Azores; un chivatazu falsu (dalgún “amigu”, qu’hai de too) y bien que la llio:
- ¡Adiós Azores, voi pal cuartón!.
El rei – Felipe II - taba d’elli hasta les ñaples y nunca nun s’escaeciere de la gracia que-y tuviere fecho poco enantes de 1568 cuando-y concedió la mano d'Ana Menéndez d’Avilés, fía del Adelantáu de La Florida. Nun se sabe si la esposa yera un poco cascabelera o Pedrín un poco fatu; el casu ye que la rapaza morrió asesinada dos meses dempués del casoriu. L’Adelantáu pidi cuentes al Rei (pa casase precisó del so permisu) y esti, tres delles pesquises, termina mandando degollar a so pá (Xuan de Valdés, el Vieyu, Rexidor de Xixón) asina como al hermanu de don Pedru y amás ordenó l’estierru de so madre de la villa marinera.
- ¡L’honor de la familia percima de too!…
- Sí, pero hai que tar bien seguru de lo que se fai. Ye mui guapo cargar siempres la farda a les muyeres...
Yo nun cargaría tola farda a la rapaza dao que don Pedru andaba más esmolecíu por escorrer pirates (nos díes d’autos andaba col so suegru piratiando per La Florida) que por asitiar en tierra firme y cumplir como un Santu varón. Bueno, tampoco elli taba mui contentu col asocedíu porque’l marrón de la familia caía enriba d’él direutamente y amás maldita gracia-y facía tar truñando col so suegru, l’Adelantáu de La Florida. Por si fuere poco la metá de los bienes de la familia (de so padre Xuan de Valdés, el Vieyu) pasaben a manes de La Corona) , ¡viva’l Rei!. Coyólo don Pedru tan a pechu que nunca nun quixo casase más nesta vida. En fin, que tampoco ye que’l “picaPedra” anduviere a palu secu. …. Tevo enredáu con delles muyeres; con Isabel de Tovar, por exemplu, tevo cinco fiyos, naturales, naturalmente; nun van ser d’interné… Otros dos, cuando menos, tévolos con otra señora… Y puestos a ello vete tu a saber ... Lo de tener fíos d’estraperlu (seique fueren clérigos los proxenitores) yera normal naquella dómina col enfotu d’asegurar la descendencia y la facienda…
- ¡H.oder, qué morru; don Pedru
tomáre-yslo bien a pechu!…
Hasta los cures, ¡Señor!, tiraben del tetu.
- ¡Tou pola Patria, neñu!
Estos tuvieren suerte que nun los pillara’l Conciliu de Trentu (1545-1563) que-yos amarró un poco’l cintu…. (Tampoco creas… Esta triba nun facía casu nin a dios; hasta que nun víen amosar el filispiu del hacha...)
………………………………………….
 |
| < Semeya: Wikipedia) |
Equí unvió, de “vaciones”, Felipe III al nuesu vecín Don Pedro de Valdés y Menéndez de Llabandera nel añu 1602 col enfotu que pesllare la islla a los pirates de toles tribes: ingleses, franceses, …. Pa ello yera preciso fortificar l’Habana y a bon seguru lo consiguió: « Los 12 apóstoles entovía tán ehí pa ver» ….
El tiempu pasa y tres Felipe II vien Felipe III y vuelve don Pedru a tomar cargu. Esta vegada ye nomáu Gobernador de Cuba (1600/1602) , igual lo de la Invencible nun fuere pa tanto, que’l rei podría ser un poco fatu, pero tuntu non. Como Gobernador tenía, ente otres, una misión perimportante: Reforzar les defenses de Cuba y sobre manera les de L’Habana pos los pirates ingleses – ya otros – andaben de contino al acesmu p’atacar el comerciu naval y terrestre ente España y Les Indies (Virreinatu de Nueva España y Virreinatu de Perú). Don Pedru cumplió esta misión a conciencia :
. La so alministración foi la más favoratible a la conclusión de les muralles de L’ Habana, onde s’allugaren, durante’l so gobiernu, los «Doce Apóstoles» (entovía tán pa ver), una batería de doce pieces d’artillería asitiaes sobro plataforma bien resistente de carayu.
. Otru asuntu feu col que tevo de bregar foi col contrabandu, de los suyos…. Tol mundu trapichaba con tol mundu ensin el menor reparu; aquel baturiciu nun podía ser… Tomó cartes nel asuntu y metió en cintura a los mayores contrabandistes. El so llabor foi mui beneficiosu pa la Corona qu’aumentó bultablemente la recaudación al amenorgar el númberu de los poco cumplidores pa col erariu públicu. Sicasí estos “gánsteres” buscáron-y les cosquiyes acusándolu de facese ricu a cuenta d’esti negociu … Menos mal que’l Rei – que fizo les sos pesquises – nun tragó.
. Convién tamién poner nel so valir l’enfotu que punxo en ameyorar el tratu respetuosu ente les clases sociales que taba fechu “unos zorros”. Nun había respetu dengún polos mandos nin por los títulos; aquello yera un “tú por tú” inalmitible pa un Valdés.
Semeya: Llibru “Los Valdés” (Lucía F. Secades)
ARMES de los VALDÉS de Xixón:
« Escudu estilu español, rectangular cola base arredondiada: En campu de plata tres franxes d’azur. Ente les franxes 10 roeles en gules cargaos con una cruz de plata y dispuestos (3-2-2-3)»
 |
| <escudosdemontalban> |
La revesosa vida de Don Pedru Valdés y Llabandera foi tou esto y munchu más…. Los historiadores considérenlu un paradigma d’una alta clase social y ye mui estudiáu pa ver como se desendolcaba esa castra: cómo vivíen (palacios); a qué se dedicaben (Política, Alministración, Guerra, Armada…); cómo y con quién se casaben col enfotu d’agrandar el patrimoniu…
Los
Valdés son una familia mui amplia con munches derivaciones y mui
asentaos n’España pero
sobre manera n’Asturies. Los oríxenes d’esta familia tán un poco anubríos magar que yá entamaba falase d’ellos nel sieglu X. Pal XIV yá taben asentaos dafechu.
Quiciabes el más célebre d’ellos sía l’Arzobispu ya Inquisidor Xeneral don Fernando de Valdés y Salas, entamador de la Universidá d’Uviéu; cuasi nada, “l’anxelín” ….
Los Valdés quedaron integraos nel marquesáu de Sanestébanu del Mar en 1793 per aciu d'un enllaz matrimonial. (¡Vaya braguetazu, vecinos!)
Fernando Valdés de Salas, l'Inquisidor (XVI)
Semeya del llibru "Los Valdés" (Lucía Fdez Secades)
( Por cierto, esti relixosu tan devotu taba casáu cola Ilesia pero tevo un guah.e con otra… Vese qu’andaba a la moda).
Los Valdés de Xixón tán representaos, amás del Palaciu de Roces (El Palaciu), nel Colexu Santu Ánxel - antiguu Palaciu Valdés- asitiáu nel Campu Valdés al abellugu de la Ilesia de San Pedru y sobro la cripta de Les Termes Romanes: la tierra y el cielu.
La cai Menéndez Valdés y la cai Marqués de Casa Valdés representen l’espoxigue y la castra d’esta xente. ¿Ye pa mal?... ¿Ye pa bien?.. Ye lo qu’hai… ¡Puxa la Casa Valdés! ¡Cuayu don Pedru! ¡Viva Roces! .
::::::::::::::::::::::::::::::::::::::::::::
Por facer un poco d’alcordanza del nuesu paisanu, tan desfamáu delles veces tanto pol so valor estremáu como polos enemigos de fuera y la envidia de los cercanos, queremos sopelexar con esti cursus honorum los cargos y galardones a los qu’algamó:
. Entreteníu del virréi de Nápoles.
. Hábitu de la Orde de Xacobu (Santiago).
. Alférez d’Infantería.
. Maestre de Campu , Llugarteniente , Almirante y Teniente Xeneral de l’Armada del Adelantáu de La Florida, don Pedro Menéndez d’Avilés.
. Comisariu d’Infantería .
. Capitán Xeneral de la Flota de Flandes.
. Gobernador de Cuba y Capitán Xeneral de L’Habana.
... (Cliente de Ca Pacorro, de Ferino, de La Pampa, de La Mina ...).
PIESLLE
Ya esta hestotia tan festiva
Alfonso Camín bien podría
pone-y la espuela:
«Voi de palu y de cortexu.
Voi de Roces hasta Granda,
voi de Granda hasta Mareo;
voi de Roces a Tremañes
Voi de Roces a Porceyo.
¡Soi de Xulián de Roces,
yo’l mio pueblu nun lu niego!»
Y Pedrín tampoco ….
¡¡Ixuxú!!
:::::::::::::::::::::::::::::::::::::::::::::::::::::::::::
Home, ho; don Pedru bien podía cantala asina:
< San Xulián de Roces, la Ilesia de Donvi >.
« Voi de barcu y de cortexu.
Voi de Roces hasta Flandes,
voi de Flandes a L’Habana,
Voi de Roces a Terceira,
voi de Roces a Inglaterra.
¡Soi de San Xulián de Roces,
soi del barriu de la Ilesia,
y bien pueo dar a voces
talo fuere una tonada:
El mio pueblu ye una ayalga!»
::::::::::::::::::::::::::::::::: FIN :::::::::::::::::::::::::::::
ESTIMANCES:
Cualesquier cosa que s'escribe siempres tien de tener unes bases nes que sofitase, escritores, llibros, páxines web, blogs, comentarios de coetáneos, ...... Pa escribir esti post voi facer alcordanza d'esos gabitos nos que tengo abebentao.
Ye de propiu dicir que los erros que puea cometer nun son de manera dala atribuyibles a estes fuentes, seique más bien a la farda d'esti autor: pocu afondamientu nel tema, mala interpretación o que ..... DEBO TRABAYAR MÁS. Si vieres daqué que te raye taría bien contentu que me lo ficieres saber. Equí tamos p'APRENDER.
 |
| <www.pintirest.com> |
. Wikipedia ye una enciclopedia que m'aporta de contino bayura de conocimientos como tamién me proporciona semeyes a mamplén.
. Foron, y son, fundamentales estos llibros :
. "Los Valdés. Una casa nobiliaria en el Gijón de los siglos XVI y XVII" de Lucía Fernández Secades. (Premiu "Padre Patac" 2008)
. Otru llibru bien interesante que fala de don Pedru M. Valdés ye l'entituláu: <<Nobleza y Ejército en la Asturias de la edad Moderna>> pero que tamién abarca otros temes como l'ascensu social de la nobleza, la Guerra la Independencia n'As, o la Milicia nes Indies .... La mesma Llucía ya otros ilustres callaci@s (Lidia, Helena, Xuan, Marta y Ángeles) son los autores d'esta ayalga.
. La semeya telonera ye propiedá d'un sirvidor seique la mayor parte d'elles tán sacaes d'Internet. Les de Don Pedru de Valdés y l'Inquisidor son robaes del citáu llibru de doña Lucía : "Los Valdés".
. Préstame camentar que los propietarios del Palaciu de Roces, asitiáu nel Barríu La Ilesia, caltienen esta propiedá particular d'una forma esplendorosa, rara avis, porque n'Asturies son demasiaos los tán esbarrumbaos. Gracies nel nome de los amantes del Patrimoniu Nacional.
