¡Bon Camín! ¡ULTREYA! [2] < A Picaraña - O Milladoiro >

     
                                           ¡Bon Camín!

            [2ª Estaya] < A Picaraña - O Milladoiro >

                            (La primer parte de caduna les Estayes ye común pa les trés)
                     Al rodiu'l Camín Primitivu [ III ] : ¡ULTREYA!

                                La cabera estaya del Camín Xacobéu Portugués:

                  <Padrón - Santiago de Compostela>

La meta del pelegrín: < El PÓRTICU de la GLORIA >
CATEDRAL  de  SANTIAGO  de  COMPOSTELA.
(Semeya tomada d'una postal énte l'imposibilidá del direuto por mor de les obres. Ta al pendiente)

                             Tolos caminos conducen a Santiago, talo qu'a Roma o a Xerusalén, los trés finxos cabezaleros de pelegrinación cristiana nel mundu,. Nós tamos faciendo'l Camín Primitivu, el que va d'Uviéu a Compostela, y yá vamos dándo-y remate (¡¿?!); el Santu ta naguando por venos y nosotros a él.  Los portugueses tamién, solo faltaba, visiten a Xacobu con devoción.
       Por mor de los viaxes del IMSERSO pa xubilaos xurdió la manera de visitar Santiago y d'esta miente fer, al traviés del programa "Turismu de Naturaleza", la cabera estaya del Camín Portugués: <Padrón - Santiago de Compostela>. Paeznos una manera bien digna de "tomar la espuela" no que cinca e esti Camín Primitivu, el primeru que s'estableció pa dir conocer el sepulcru d'aquel Apóstol qu'algamó'l títulu de <Patrón d'España> tres predicar, guapamente, l'Evanxeliu nesta tierra. A nós va aforranos la visita cabera a la ciudá Santa ( o non ... ¡NON!. Eu torna).

       

Caminos Xacobeos portugueses.
(Semeya: wikipedia)

          Como ocurre en tolos sitios nun hai una única manera de llegar a Santiago, los caminos son infinitos, tantos como les persones que los quieran entamar. Sicasí los portugueses tamién tienen dellos caminos oficiales: ún pela costa y dellos pel interior aprovechando a vegaes les  antigues calzades romanes, como la Vía de La Plata Portugesa. Vamos ver:
     . El Camín de la Costa saldría de Setúbal o LLisboa hasta Oporto, tiraría per La Guardia, Bayona, Vigo, Pontevedra, Padrón y yá hasta Compostela.
     . El Camín Central - más al Interior - sal de Llisboa pa Coimbra y tamién s'avera hasta Porto pa llegar a Tuy pasando per Ponte de Lima. De Tuy va a Porriño, Redondela (o Vigo, que nun se nos enfade'l Caballero) y a Pontevedra. Xuntos los caminos de costa ya interior tiren per Caldes de Reis a Padrón y tres fermosu paséu (Ye'l que vamos embredar nós) llegues a la capital espiritual del cristianismu occidental (y del mundu enteru, que equí en Santiago somos toos bien recibíos).

PLAZA del  OBRADOIRU, puntu caberu de la RUTA XACOBEA.
Tán n'obres; 2021 ye añu xacobéu y esto tien qu'esllumar. Toi seguru que lo algamaréis y
pa entós nós taremos rematando'l <Camín Primitivu>: ¡El BON CAMÍN!
La  TUMBA  del  APÓSTOL  ye la nuesa META.

. El Camín de la Plata Portugués (non la Vía de la Plata hispana) que saliendo de Tavira ha pasar per Évora, Castello Blanco, Almeida, Braganza, Verín, Ourense, Lalín y Santiago.

                                                 ********************

       El plan de "Turismu de Naturaleza" pa colos xubilaos por parte del IMSERSO ye facer la cabera estalla oficial del Camín Portugués < Padrón - Santiago> d'unos 25 km, o dalgunos más por mor de les visites optatives, en tres etapines propies pa la edá, que nun tamos pa xatonaes.  Sedrá una cosa aproximativa a esto:

Cabera Etapa del Camín Xacobéu Portugués : <Padrón - Santiago Compostela>
(Semeya: Eroski Consumer)

   . Día 1º : <PADRÓN-ESCLAVITUDE>, unos 6 km con visita a la ciudá de Padrón ya Iría Flavia,                     antigua capital de la diócesis en tiempos d'Alfonso'l Castu y del obispu Teodomiro.
   . Día 2º : <A ESCLAVITUDE - O MILLADOIRO>, al rodiu los 11 km. Yá en Santiago visita
                  llibre pela ciudá, mui guapo.
   . Día 3º : <O MILLADOIRO- SANTIAGO>, como unos 8 km. Darréu visita guiada pela ciudá                        Santa, Patrimoniu cultural de la Humanidá dende 1985.

P'allá vamos,
dimpuestos a too. 

      Estes tres estayes son les qu'en principiu taben alcordaes pero a la fin foron un pelín tracamundiaes por mor de la bona esperiencia de la nuesa GUÍA: SUSANA. Ye dicir, pa faceles más homoxénees el primer día llégase a "A Picaraña", 2 km más p'allá d'A Escravitude; d'esta miente queden unos 8,5 km de media diaria; bona idea, señora Susana. Les etapes quedaron asina:

        1º .- < Padrón - A Picaraña >
        2º .- < A Picaraña - O Milladoiro >
        3º .- < O Milladoiro - Santiago C. >


         ********************************
   (2)         << A PICARAÑA - O MILLADOIRO  [< 9 km] >>

                 < Na carballeira alcontramos el nacimientu d'un manancial. SUERTE >


                  El Miércoles 11 de Marzu ficimos la 
                            Segunda Estaya:<A Picaraña-O Milladoiro>  
de la Etapa Oficial <Padrón - Compostela>, lo que supón unos 9 km, más o menos. 
         Amaneció dalgo nuble, más pola neblina qu'otra cosa pero yá la xente del hortel camentaba que seguramente espeyaba, como de contino. Y nun s'enquivocaron; un solín tibiu, seique agradable,  ensiguida salió a acompañanos. 

< A PICARAÑA>, salida 2ª Estaya.

        Aparcamos delantre'l Bar y entá nun nos diere tiempu a baxanos del Bus cuando yá vimos a daquién doblar la esquina; nun dimos cuenta d'ellos hasta Milladoiro. 
Nun me presta un res estes escorripandes, llévenme col ganchu y malpenes tendría tiempu a tomar delles semeyes de nun ser pola bondá de la Guía, Susana, que muncho m'aguantó, la probe. Claro, escribir na llibreta nin una lletra de manera tala que la mayor parte les fotos nun sé onde asitiales; ¡al carayu!, pondrévos dalguna pa que tengáis daqué idega de cómo ye aquello. Lo que sí vos dexo nidio son los finxos xacobeos importantes, como'l Castru Lupariu (O Faramello). 
         

FÁBRICA, soterraña, de PAPEL (Pazu "O Faramello")

          Namás salir embredamos per un arcén de la N-550 casi un kilómetro pa entrar en Faramello*, estremáu polos conceyos de Rois y Teo. Agora va ponese un poco pindia la carretera hasta llegar a Rua do Francos.

Rúa do Francos

      Bien cerquina d'equí (2,5 km) alcuéntrase'l Castru Lupario - fechu una gocha - onde según la tradición vivía la Reina Lupa, que tanta importancia tevo na traslatio del Apóstol Santiago. Pos esti santuariu xacobéu ta, al paicer, fechu una triste llaceria; mereció-y la pena a Lupa agabitar el treslladu del Apóstol a Compostela  poniendo gües y carru  y terminar convirtiendo al cristianismu. ¡Santa, qué escaecía te tienen!. 
* Del "Pazu O Faramello" yá fadremos un aparte, que vien que lu merez.

                                                                                                                                       *****************************

Castru Lupario
(Semeya:pintirest.com)

        [[ El Castru Lupario o Castru de Beca o de Francos - BIC 2009 - ta asitiáu nel conceyu de Teo,  ente les parroquies de S. Xulián de Brión y Rois. Esta acrópilis tevo una gran reconocencia na dómina los amaecos . Más tarde algamó a parroquia propia col nome de San Antonini de Castro hasta que nel XVII foi esaniciada. Ye xustamente equí onde la tradición xacobea alluga la morada de la vilva Reina Lupa. 

       La Raiña Lupa (Lloba) fízose percélebre por mor del Códiz Calistinus que cuenta'l final de la hestoria la traslatio: 
     "< Cuando llegaron a Galicia los restos del Apóstol Santiago quisieron asentalos nos dominios d'esta Reina pero ella, roceana, enviólos talo Pilatos al gobernador de Duio qu'intentó desfacese d'ellos consiguiendo únicamante la so muerte. D'estamiente los discípulos tornen a Lupa otra vuelta por una resolución. ¡Menudu papelón! ... ¿Qué faigo con ellos? ... Son peligrosos ... 

El Bautismu de la Raiña Lupa
Fornicu na Fonte del Carme (Padrón)

       Col envís de desfacese d'ellos mándalos con unos gües ensin domar a buscar les lloses del sepulcru al Monte Llicinu (Picu Sacro) porque sabe qu'ehí ta la ¡Cueva del Cuélebre! Mercé a una cruz que llevaben los discípulos el monstruu queda fulmináu al empar que los bravíos gües vienen tornase mansulinos dafechu. 

    - Traéime a esos cristianos, quiero que me falen de lo so relixón.
      La Reina convirtióse al cristianismu y tres bautizase - como apreciamos na Fonte do Carme de Padrón - agabitó pa que'l Santu fuere enterráu como se merecía, na tumba marmórica d'un cementeriu romanu>".
    Hai quien ve na Reina Lupa la representación d'una diosa precristiana, la deidá femenina de Lugh; vamos, qu'esta Reina Lupa ye de los nuesos.  

Cruciando la Ponte sobro'l Ríu Tinto
Camín de les Muralles del Castru Lupario
al traviés del Pazu O Faramello

     Anguaño el Castru Lupario ta n'estáu de mediuabandonu magar se ficieren dalgunes - escases - escavaciones amosando un castru imponente (2 Ha) con unes bultables muralles (nun son de módulos, como les nueses) entá bien conservaes. Nel 18 fízose un poco llimpieza col envís de promocionar una ruta pel entornu; ta bien, hai que sacar perres, pero yo nun me conformo, ¡quiero arqueólogos!

        Cerca del Castru Lupariu hai una ponte medieval, d'un solu güeyu, sobro'l Ríu Tinto pol que transitaben los pelegrinos xacobeos; anguaño buscóse daqué más cómodo escaeciendo'l mitu de la Reina Lupa; una pena pergrande ya incomprensible porque pa min ye tan importante'l Camín como'l fin; ye dicir, tolo que vas esfrutando, aprendiendo y compartiendo. 

                                                   *********************
Siguimos cola ruta prevista:  

<Pel  Camín Xacobéu Portugués>

      Al par d'un cruceru, de los más antiguos de Galicia, pasamos per delantre la Ermita San Martiño . Per una pista asfalcada arribamos a Osebe na parroquia de San Xuan de Calo y cruciamos les víes pa entrar en Casallonga. Tomamos el Camín de Riotinto onde cruciamos una riega y d'esta miente entramos en Pedreira. 

Caleyando per una CARBALLEIRA

         Salimos per una pista que va ascendiendo sele pente una carbayera y  dexando a los llaos les casines de Lamela y Areira. Cruciamos una pista y tres pasar un aserraderu algamamos  a A Grela.
 Darréu xubimos una carretera que nos introduz, per aciu la Travesía Do Porto, en Milladoiro, el más bultable núcléu poblacional del Conceyu d'Ames. A les 12 y media (12:30) ya tábemos buscando l'autobús,, aparcáu cerca la Casa Cultura pero enantes vínonos perbién refrescar nel Bar, que lo teníemos bien merecío. Cuando llegamos los porras dalgunos yá paecíen amoriar. 
Ensiguida llegamos al Hotel Congreso (enteré más tarde con satisfaición que foi ún de los centros escoyíos en Santiago pa collaborar cola pandemia del "coronavirus". Chapeau.) y  a les tres y media (13:30) yá tábemos otra vuelta n'autobús camín de Padrón pa una visita guiada.

FIN de la SEGUNDA ESTAYA.

                                       *****************************************
ANEXU   a la 2ª Estaya: < PAZU "O FARAMELLO" >

Mañana del Vienres, 13 de Marzu de 2020.
          El vienres, tres la xinta, colamos de vuelta a Asturies, pero na mañana tenemos una visita guiada a un pazu. Nós alpuntámonos de mano ensin saber ónde díbemos, námas queríemos conocer un PAZU, el Pazu "O Faramello". Cuando miramos el mapa y vimos que'l pazu taba n'antigua Ruta Xacobea, al par mesmo del ¡Castru Lupario! cuasi nos desmayamos. Díbemos dir a ún de los icononos xacobeos por escelencia, a la morada de la Raiña Lupa: ¡Guauuuu!. Bueno, al par ...

PAZU: " O  FARAMELLO", onde algún día antroxare la Raiña Lupa
Cuando l'home se mez cola Naturaleza alcuentra'l Paradisu.

      ... Salimos del Hotel Congreso tempranino, a eso de les nueve y media (9:30). En menos de media hora yá tábemos delantre les boles d'entrada al Pazu que tuviéremos visto'l miércoles al salir d'A Picaraña: < O  FARAMELLO > 

¡BIENLLEGAOS!
< Que vos afayéis nesta casa >
GRACIES.

       Recibiónos un señor de mediana edá, seríu y afalagosu qu'ensiguida se-y vía quería quedar bien porque aquel sitiu prestába-y a esgaya, sentíalu como propiu (Y yera).
    - ¿Veis estes boles de la entrada? .... Eso significa qu'equí lluchóse escontra los franceses na Guerra la Independencia.  Lluéu veréis unes cadenes porque equí quedó'l Rei. Y asina foi, Alfonso XIII  agospió nesti Pazu'l sieglu pasáu. 
Al entrar, tanto'l Rei como nós somos saludaos con esta inscripción de bienllegada:
< Pax intrantibus. Salus inhabitantibus. Foelicitas exeuntibus > .
-  GRACIES.
        Namás dar una güeyada al entornu yá nos dimos cuenta que'l Rei sabía bien onde quedar de posada: Metanes d'una viesca de carbayos una casona-palaciu blasonada, una capiella desimía, xardinos per uquier, terraza barroca, un Ríu que nos separa d'un cuetu de carbayos, una Ponte piedra que nos xune a un camín, roques, estanques, palombares y muries de piedra, una Fonte decimonónica y delles coses más qu'en principiu nun somos a estremar. 
     - Una inmensidá d'historia tien d'escondese nesti Pazu - camiento cola muyer. 
     - Vamos escuchar el guía. 
  

XACOBU curia "O Faramello" abellugáu pol Castru Lupario. 

      - Bon día. Yo soi Gonzalo Rivero d'Aguilar, el vuesu guía nesta visita (ye ún de los tres heriedes d'esta ayalga). Esti Pazu foi obra d'un ancestru de mio, el xenovés Marqués de Piombino, que dio col llugar nun viax que fexo de pelegrín a Compostela y en 1710 púnxose manes a la obra. Como veis tenemos equí más de 300 años d'hestoria.
        El Pazu tien una estensión de 126.000 m2 y la Casona-Palaciu ocupa 2100 m2 distando 12 km tantu de Padrón como de Santiago. Como veis  ta asitiaú nel calce del Riu Tinto, afluyente del Sar y pertenez al Ayuntamientu de Rois. Los carrascos más antiguos del país podéis velos nesta viesca y por eso tán representaos nel Escudu del Ayuntamientu.   

El MOLÍN.
A manzorga, soterraña, la FÁBRICA PAPEL.

         La importancia del Pazu nun ye pola mor del so palaciu d'estilu barrocu-compostelanu d'influyencia xenovesa  o por ser un arsenal durante la Guerra la Independencia seique por ser un referente industrial a  primeros del XVIII: Equí mesmo, embaxo onde tais pisando, hebo una fábrica de papel qu'entamó en 714 con 15 operarios llegando a dar trabayu a más de 50 families siendo les muyeres la mano d'obra más bultable. Pa llevar a cabu esto hebo que llevantar esta presa, que tamién foi la pionera de la dómina.  
     - ¿Taba la fábrica embaxo tierra?
       Como veis eso de la "cubierta vexetal" , que tan de moda ta agora, yá lo tuvo esti Pazu va 300 años. ¿Cómo lo veis?. ¡Ah! Y Felipe V nun quería otro papel que nun viniere d'O Faramello. 

RETABLU ROCOCÓ
José Gambino

      De ringlón siguío fuimos visitar l'abovedada cappiella, d'estilu barrocu rural gallego, que foi consagrada en 1727.

    - Si vos fixáis esta capiellina carez de Cristu, la figura central ye la Virxe, arrodiada polos apóstoles, esto vien dicinos la gran importancia que tenía la muyer nesti Pazu (como en toos, fíu). El retablu ye cosa de José Gambino, un célebre escultor del rococó ñacíu nesti Pazu, que trabayó na fachada del Obradoiru, nel conventu d'Herbón, nel Palaciu Rajoy, nel pazu d'Oca (Pontevedra) .... Nun paraba; trés fíos de so ya un xenru siguieron la so llinia. 
      Tamos ablucaos nesti padadisu d'agua, piedra, viesca y coloríu que vamos percorriendo embebíos tres de Gonzalo.

CONXUNTU: Capiella, Horru, Cruceiru y Cenador.

 - Habéis de reparar nos cruceiros, esti ye'l más altu de tol Camín Portugués y ta esculpíu a 4 cares, a ver onde alcontráis cosa tala. 
       Pasamos  l'adriu de camelies, l'antigua caballeriza convertida en Salón d'Eventos y sintiendo'l ruxerrux del Ríu Tinto cruciamos la Ponte da pedra que nos dexa nun camín de poco pisar.
       - Esti camín que tais pisando ye'l verdaderu Camín Xacobéu, per equí pasó'l cuerpu de Santiago camín de Compostela pa ser enterráu nel Arca Marmórica. 
        - ¿Queda cerca'l Castru Lupario?
        -  Tais delantre d'él. ¿Nun ves eses muries de piedra?... Son les llendes del Castru. Ehí vivió la Reina Lupa qu'a la fin foi la qu'andechó col treslladu de los restos hasta Santiago. 
       Yo nun podía creyelo, ¡taba delantre l'adebecíu Castru Lupario! . Tuvi a piques d'alquilar un taxi'l llunes que llegamos p'averame hasta elli y .... ¡Teníalu delantre mio!.
        - Andamos en tratos colos ayuntamientos a ver si torna pasar otra vuelta per equí pero tienen que cumplir con delles condiciones imprescindibles. 
        Yo rezo pa que s'arregle, tanto'l pasu pel camín como la igua del castru que ta medio abandonáu; fáiseme imposible: ¡un finxu xacobéu d'altor escaecíu de la mano de Dios! .
        Na Casona-Palaciu entramos; nun podemos dar fe porque nun ye conveniente explayar los muebles sabelinos, los tapices flamencos o les lámpares de cristal de Murano, ayalgues adebecíes por ciertos cacos.

El CARRU la TRASLATIO
Con esti y un par de gües llevaron a XACOBU a Compostela 

        Vimos más coses y ficimos más semeyes: fontes, molinos, horros, camelies, carbayos, carros y cadenes .... A la fin entramos n'antigua Bodega onde l'anfitrión nos convidó a un vinu y nós aprovechamos pa mercar una botellina d'oruxu, acua vitae pal nuesu cuerpu rendíu. 

   Xusto al cruciar una riega un campu plantáu de carbayos  xóvenes recuerdanos una traxedia d'autobús reciente, pero val más pensar en positivo.  Al salir pa dir coyer l'autobús de vuelta vimos los cartelos anunciando la xubida al Castru asina como una célebre Ponte Medieval de piedra; pa otra vuelta. 

                                                                        

                                               ********************************************

PRIMAVERA  en COMPOSTELA

. Gracies al Estáu Español, y al IMSERSO en particular, por financiar en bona parte estos viaxes tan prestosos, otramiente munchos de los xubilaos nu podríemos facelos.
. Gracies al Hotel Congreso por agospianos y pol candial tratu recibíu. SUERTE.
. A la nuesa Guía, Susana, pola so paciencia y el tratu tan candial que tien pa los "mayores" asina como al chófer Jaime, que conduz como los ánxeles. MILENTA MIL GRACIES.
. A los Guías Gabriel y Ana asina como a la Meiga que me salvó del "coronavirus" por mor de la queimada.
. A la chicas d'Información y Turismu de Padrón y Compostela que nos atendieron candialmente y nos apurrieron bayurosa información. GRACIES.
. A los allegres compañeros de viax - madrilanos y asturianos - que tuvieron un comportamientu de primera.
. A Don Gonzalo Rivero d'Aguilar por amosanos con tantu ciñu un llugar mácicu como'l "Pazu O Faramello", territoriu que fuere de la Reina Lupa. Per equí pasaren los restos del Apóstol camín de Compostela. Una ayalga histórica, un llugar máxicu que nun pues dexar de visitar.
. A Don Manuel Garrido pol so llibru :<Guía de Padrón>, prestosu de lleer y que tanto nos aportare.
. A Wikipedia, pola bayurosa información que nos apurre. Gracies.
. ¿Y la Xacopedia, de la que toi tul día tirando de la teta? ... GRACIES.
. A Eroski Consumer, que nos guía pel <Bon Camín> y nesti casu nel <Camín Portugués>.
. A dellos blogs, talo: <arteguías.com>. <parquefluvialdesantiago.org>, <elrincónpoliticamenteincorrecto.blogspot.com>.
. A XACOBU, que nos llibro del "coronavirus" y pudimos fer el viaz ensin torgues. ¿Tara esti milagru anotáu na llista del <Códiz Calistinus>?