¡Bon Camín [2b]:< Bernardo del Carpio, la lleenda >

                                         ¡¡Bon Camín!!

                << La lleenda de Bernardo del Carpio >>

                                           << De Bernardo ye'l blasón 
                                                les desdiches míes son  >>

(Semeya tomada en xusticia de 
<emiliofs.SEXTANS>)

                                                         ROMANCE  I 
                                                < < Pela ribera'l Pisuerga
                                                    Bernardo'l Carpiu cabalga,
                                                    nel so caballu morcillu
                                                    apareyáu con so lanza;
                                                    toa la xente Palencia
                                                    mira pa él espantada
                                                    porque nun se suel armar
                                                    seique a cosa señalada.
                                                      - Nosotros tamos con él,
                                                   pos ye asturianu, de castra,
                                                   y n'Aguilar de Campoo
                                                   pretendemos sentar plaza
                                                  y rindir caldiu homenax
                                                  al nuesu fíu de Saldaña.
                                                  Que nel Carpiu nun s'anoxen,
                                                   pos sabemos per Asturies
                                                  de la so grande estimanza.
                                                 Y un amor talu ente pueblos 
                                                  bien merez una xuntanza,
                                                  cuando'l cielu lo permita
                                                   y pille los dioses de chancia.>

            Cuido, seguidor del <Camìn de Niria>, que tarás un pelín ablucáu al ver rellacionáu nos titulares d'esti post a Bernardo del Carpio col <¡Bon Camín!>, ye dicir, col Camín Primitivu. Pero si te pares a pensar y prestes un pocu atención decataráste qu'hai motivos a esgaya pa que-y dediquemos una entrada a esti mitu español colos raigaños n'Asturies y rellacionáu dafechu col <Camín Xacobéu>.¿Y qué ye'l <Camín Primitivu> sinón qu'una variante del Camín de les Estrelles que nos lleva a Santiago Compostela?

Alfonso'l Castu 
(Semeya:ABC.es)

   Cuenten les Cróniques series que'Alfonso II d'Asturies, conocíu como'l Castu, morriere ensin tener descendencia, que nin tan siquier tuviere la gracia de conocer esposa dala pero ... ¿Sedrá eso verdá del too o será lo qu'interesó cuntar naquellos momentos? ... Porque cuenten les males llingües que llegó tar esposáu con Berta, la hermana Carlomagno, ¡hala!, magar nun tuvieren fíos. Sicasí ¿acabó col Castu la castra de Pelayo?... Porque hai quien cuenta qu'Alfonso tenía una hermana, Ximena, y qu'andando a los sos deleres algamó a tener un fíu natural col Conde de Saldaña, San Díaz.
¿Nun pudo esti neñu, al que la lleenda conoció como Bernardo del Carpio, ser el sucesor d'Alfonso II? ... A fin de cuentes el Rei Mauregato yera fíu natural d'una mora y Silo puede que tamién ( y ye que l'AMOR nun ntiende de races, compañeru).

       Y a lo que vamos, pa xustificar la farda d'esti post entendemos que: "Tolo que tien rellación con Alfonso II ye xida más que suficiente pa formar parte de la hestoria del nuesu <¡Bon Camín!>".
¿Y nun ye esti Rei'l promotor del <Camín Primitivu>?. A fin de cuentes ¿nun ta Carlomago rellacionáu dafechu col Camín Xacobéu cuando en realidá morriere dellos años enantes de  descubrise la tumba del Apóstol? ... ¿Y nun ye Bernardo coetaneu del Emperador y hasta adversariu suyu? ... ¿Y nun ye Bernardo sobrín del inventor del Camín Primitivu?...
        ¡¡Puxa Bernardo del Carpiu!!  ....  ¡¡¡Puxa'l <¡Bon Camín!>!!!

Bernardo del Carpio, na
Plaza Mayor de Salamanca.
(Semeya: Wikipedia)

           Cuenta la lleenda que Bernardo del Carpio ta enterraú n'Aguilar de Campoo. Por eso nós queremos fer un viax al Medievu, a los sieglos VIII y IX, o quiciabes dalgo más, hasta'l sieglu XII polo menos... Mas vós sabéis que los nuesos viaxes son reales, qu' analayamos pela hestoria pero patiando les tierres que vieron espoxigar los nuesos mitos. Queremos ver la tumba del nuesu mocín, del héroe medieval que fizo tremar el mitu ¿del más célebre?, el mesmísimu Cid Campeador.
       Pero hai al endefechu otra razón que nos emburria a visitar n'Aguilar la tumba del Carpiu y ye'l nueso ciñu pola poesía ... Sí, ho, nun pongas esa cara, la POESÍA. De lo que tenemos lleío al rodiu'l paladín Bernardo hai un artículu de D. Luis Rubio García que nos llamó poderoso l'atención: <Historia y Poesía de Bernardo del Carpio>, y eses dos pallabres son pa nós "pallabra de llei", por ello a hora de construyir esta inventio pola parte de mio voi siguir los pasos d'esti Profesor.

      Sí, queremos dir a Aguilar de Campoo , ¿petezte venir con nós? ¿Y si enantes restolamos un pelín pel camín de la hestoria, de la lleenda y de los romances p'averanos a la realidá del nuesu héroe?

                                           ***************************

AGUILAR de CAMPOO n'antiquité: Plaza España.

      Enantes de  colar camín de la montaña palentina pa visitar la tumba del mitu, nuna vega del Pisuerga onde s'asitia Aguilar de Campoo, facemos un pequeñu croquis de la villa de realengu qu'algamó la so Carta Puebla en 1255 pola gracia d'Alfonso X, el Sabiu. Pa ello descargamos de la páxina web del Ayuntamientu (¡norabona, aguileños!)  los mapes afayaizos: planos de la ciudá y redolada colos finxos a visitar.
       Cuando lleguemos al pueblu tenemos que siguir un orde preconcebíu que depués pue cambiar sobre la marcha, como ocurre davezu. Esta mesma páxina bríndanos tres posibilidaes pa conocer bien la ciudá - Patrimoniu Históricu Artísticu - ensin que nos volvamos llocos, ¡hai tato qué visitar!. Propón tres rutes estremaes (pero mecíes dafechu):
            A) Ruta de los Monumentos .
            B) Ruta de la Muralla (les Puertes de la villa).
            C) Ruta de los Palacios.
                y como complementu :  D) La redolada d'Aguilar.

Puerta de Reinosa, entrada a la villa d'Aguilar de Campoo.
(Semeya: santamarialareal.org)

      Tamos mirando'l planu de la villa y entá nun sabemos qué camir tomar. Cuido que vamos entrar na ciudá pela Puerta de Reinosa pos píllase de mano viniendo precisamente de Reinosa, carretera Santander. Darréu tiraremos dica'l Castiellu pasando per Santa Cecilia; equí tenemos un mirador pa contemplar una panorámica la ciudá insertada na granible vega del Pisuerga, nos rimeros de la montaña palentina. . Yá naguo faciéndome una idega de lo muncho que nos queda por tastiar. Tres ponenos "en trance " - yá toi - con panorámica tala calletramos dir de mano a ver la tumba del mocín, aquel astur-lleonés ( y castellanu tamién) que derrotare al paladín galu, Roldán, na célebre < Batalla de Roncesvalles >, la clave, quiciás, d'esti entueyu. Vamos intentar charrar un poco con él faciendo alcordanza de los romances, cantares de xesta y comentarios miles (nós repararemos nunos pocos que vamos remanar a la manera de nueso) que se tienen fecho al rodiu d'elli. Asina que ¡pal cagüercu! .

                                                    ***************************
     El VIAXE de Xixón hasta Aguilar de Campoo yá te lu cuntaré nuna entrada próxima que vamos entitular [¡Bon Camín! Territoriu Comanche [2b] <Aguilar de Campoo>]

Utópica Semeya  d'Aguilar de Campoo colos finxos más bultables: El Pisuerga, el Castiellu, Sta. Cecilia, la Colexata, la Plaza España, Sta Mª la Real, les Clarises, el Bº Xudíu, Ponte Mayor, el Portazgu y les GALLETERES. 

                                                      ***************************

    Agora vamos tirar imaxinario hasta la tumba del Carpiu  pa intentar conocer al mitu, asina que falamos talo tuviéremos ellí.

        La Primera Crónica Xeneral  d'Alfonso'l Sabiu diz - tiro de memoria - que:
< Nel añu XXI del reináu d'Alfonso III (866+21=887) morrió'l noble caballeru Bernardo del Carpio, como cuenta Lucas de Tuy>. Mui tarde m'abulta, pero bueno, les lleendes ...

        La tumba de Bernardo del Carpiu ta asitiada nuna cueva d'orixe kársticu na rimada la Peña Llonga, bien cerquina del Monesteriu de Santa María la Real, ye dicir que debemos travesar el pueblu
p'algamar al barríu que lleva'l so nome: Barriu de Bernardo'l Carpiu. Col envís de nun perder un minutu decidimos dir en coche, asina que ficimos l'Avenida de la Ronda y darréu l'Avenida Cervera p'aparcar cerca del Monesteriu Santa María.

La tumba de Bernardo del Carpio.
(Semeya:elretohistorico.com)

       La cueva kárstica tien un profundidá d'unos 7 m y ye posible que fuere un eremitoriu medieval, onde vivíen mediu apartaes del mundu delles persones en réxime monxil.  Nel documentu de fundación de Santa María del añu 852 faise referencia a un fechu qu'acaecire en 822 cuando'l caballeru Alpidio, tando de caza pela zona, dio con dos pequeñes ermites abandonaes. Xunto col so hermanu Opila, abá del monestriu de Samiguel de la Tablada (Burgos), afayaron se trataba de cueves visigótiques conteniendo la primera reliquies de los apóstoles Pedro y Pablo y la segunda de dellos santos, a saber, Santa María, Sta Engracia, San Pelayo, San Xuan Bautista y Samartín Confesor (¡vaya chollu, manín). Opila camentó qu'aquel yera'l llugar más afayaizu pa llevantar un monesteriu, el Monesteriu de Santa María la Real.
        Si como cuenta l'epitafiu la so tumba Bernardo morrió hacia 850 - cuando se taba llevantando'l monesteriu -bien pudo ser enterráu na primera de les cueves, Cueva de Bernardo del Carpio, conociéndose la segunda como la Cueva los Xitanos, seguramente porque sirviere de refuxu a dalgún d'ellos, pasáu'l tiempu. De palmar el Carpiu en 887 como piensa'l Tudense tamién pue tar enterráu equí.

Énte la tumba del héroe.
Aguilar reivindica a Bernardo del Carpio.
¡Menos mal!
(Semeya: Diario Palentino)

      Anguaño la cueva del sepulcru del héroe vese abandonada práuticamente dafechu (lloro), menos mal que ta protexida por una rexa de fierro, otramiente nun quedaba nin la roca madre tres les numberoses espoliaciones que sufriere a lo llargo de los sieglos, ¡pena!. En cualquier casu  cuido que'l Ayuntamientu debía fer daqué más; un mitu ye un mitu y non tolos pueblos tienen la suerte de tenelu. Cuántos hai, Señor, que tán llevantando piedres peruquier a ver si dan con dalgo primitivo, dalgo que los enraigañe cola hestoria. Aguileños, nun desaprovechéis esa suerte y remocicái la tumba d'esti héroe que tantes páxines llenó. La HESTORIA  escríbese con fechos verdaderos - la verdá depende del color con que s'amire - y tamién  con lleendes y cantares que son los suaños de lo quixéremos ser; ¿qué sería d'un pueblu ensin quimeres?...

<La hestoria d'un publu nun ye otro que'l camín de la gloria> 

      ¿Qué queda na tumba del hèroe? Pue apreciase la llábana del sepulcru con restos d'una inscripción imposible de lleer pero gracies a Xuan Antonio Sánchez que la pudo trescribir cuando entá se conservaba sabemos que trayía dalgo ansi como :
< Equí xaz el noble y esforciáu caballeru Bernardo del Carpio defensor d'España fíu de Don Sancho Díaz conde de Saldaña y de la infanta Doña Ximena fía del rei  Don Alonso II nomáu'l Castu. Morrió polos años de 850 >. 
      ¡Menudu patinazu!. El Castu nun tuvo fíos, d'esistir Ximena tenía que ser hermana, que ye lo cuenten tolos cantares y romances. Vese qu'al autor nun-y cuadraben les feches de ser Ximena hermana del Rei pero hai lleendes que-y dan vida a Bernardo en tiempos d'Alfonso III, el Magnu.

<Durandarte> la espada de Bernardo del Carpio.
La que ganó a Roldán na <Batalla Roncesvalles>
(Semeya tomada del blog <Condado de Castilla>

         Na Cueva tamién había una espada que, según cuenten, yera la que Bernardo-y arrampuñó a Roldán  nel combate de Roncesvalles. Cuando'l flamencu Carlos I foi nomáu rei d'España al pasar per Aguilar visitó la tumba nun par d'ocasiones - 1517 y 1522 - y a la segunda coló con ella como espetando a los Comuneros qu'acababa de derrotar:
    - < Nun sois dignos d'esti héroe nacional; Castiella y España son de mio>.
Yera como quita-yos, quitamos, la bandera, l'estandarte de les llibertaes. Tardó esti rei foriatu n'entender la esencia d'España y de los españoles (siguimos tan complicaos).
      Esta espada, Durandarte, ye la que Roldán recibiere de Carlomagnu cuando, a los 17 años,
 lu nomó caballeru . Anguaño guárdase n'Armería de Madrid un tanto remocidada y col nome de <Bernardo> grabáu; namás que-y falta'l códigu de barres (creo).

       Nun taba mal, aguileños, reconstruyir - remocicar - esta cueva colos sos símbolos. El nietu los Católicos dio-y más valir que vós (lo d'antroxar con ella ta perbien, pero cuido que ye poco).
Xunto la tumba del Carpiu hebo otra, d'un collaciu, que tamién llevaba inscripción y venía dicir:
                        <Seique en vida, Bernardo, 
                          siguimos les vueses aventures,
                          axuntemos les sepultures>

La espadaña de Santa María la Real 
ye'l símbolu d'esa Fundación.
(Semeya:Flickr)

       Cuando Miñano (1829) y Madoz (1845) redactaren los sos Diccionarios Xeográfico-Estadísticos entá repararon nesi enterramientu, pero anguaño nun queda nin rastru.
Na Crónica del Monesteriu de Santa María la Real* fálase que, fuera la cueva, nel suelu de la ermita, embaxo una llábana con una espada grabada, reposaben los restos del caballeru francés Don Bueso derrotáu por Bernardo na fabulosa  Batalla d'Ordeh.ón pero Miñano y Madoz nun se decataren d'ello. ¿Inventos de los flaires pa llenar la masera coles llimosnes de los pininos?... Yo nun vos guardo rensía, de nun ser pola Ilesia quedaríennos bien poques ayalgues artístiques en pie: "Lo que nun mata, engorda".

*Santa María  la Real: Una lleenda cuenta que tando a la cata'l xabaril el conde Alpidio dio coles ruines d'unes ilesies perantigües y desconocíes. Púnxolo en conocimientu del so hermanu, abá d'un monesteriu burgalés, que se treslladó a esta tierra pa llevantar el monesteriu actual; bueno... ta un puquiñín iguáu, ¿eh?, mercé a los procuros de los "Amigos d'Aguilar" (merçi). 

                                                          ****  
   Toi suañando énte la tumba del mio héroe nuna rimada de la Peña Llonga. Siéntome delantre la verxa de fierro y entamo a calletrar faciendo alcordanza del mocín:
                   

Énte la tumba del mitu. Preciso charrar con él. 

                                                   ROMANCE  II                                   
< Pelos reinos de LLeón
el Castu Alfonso reinaba,
fermosa hermana tenía
doña Ximena se llama.
Ñamoricarase d'ella
el conde San de Saldaña,
mas nun vivía engañau
porque la infanta lu amaba.

Ligando
(Semeya:B.blogspot.com)

Delles veces fueron vistos
bebiendo na Foncalada;
otres veces, modosinos,
pelos campos de Saldaña,
y a vegaes tiénense visto
pelando xuntos la pava:
- Ai, Señor, qué pareyina
más guapina, si colara,
pero'l sangre d'esti conde
nun ye azul, ye colorada
y como s'entere'l Rei
va poné-yla amoratada.
     De les veces que se vieron
quedó la Infanta preñada;
lo que nun se pue esconder
queda a pública subasta,
y cuando s'entere'l Rei
¡la de Dios habrá na casa!>

          << BERNARDO del CARPIO, la lleenda >>

 

     <De Bernardo ye’l blasón, les desdiches míes son>

L'Escudu d'Aguilar de Campoo : 
De forma rectangular - típica española - cola punta arredondiada. En campu de plata un aigla esplayada de sable, a vegaes coronada d'oru. En timbre la Corona Real zarrada.

         Bernardo del Carpio pudo ser el fíu natural de Ximena Froilaz y Sancho Díaz que vieno a convertise nuna lleenda. Sabemos que ñació - ensin fecha - nel castiellu de Saldaña (Palencia) pero nun sabemos cuando fineció seique ta enterráu nuna cueva de la Peña Longa, n’Aguilar de Campoo (Palencia). Esti asocedíu llexendariu bien merez una visita pa rindí-y homenax, ye lo que nos proponemos facer la Parienta ya un menda en cuantes los badagüeyos nos sían favoratibles.

¡Puxa Bernaldo del Carpiu! ¡Viva Aguilar de Campoo!

        Que la hestoria de Bernardo del Carpio ye llexendaria ye daqué no que tol mundu ta d’alcuerdu pero si bien dalgunos piensen que nun ye otro qu’una lleenda hailos, como’l padre Vicente José, que tán perconvencíos de la so esistencia sicasí les sos fazañes nun fueren tan bultables como los cantares nos quien facer creyer. ¿Foi l’héroe la Batalla Roncesvalles? … ¿Pudo tar nesa batalla? … ¿Cuántes batalles hebo en Roncesvalles, namás la batalla de 778 o tuvimos otra hacia  808?… ¿En cuála pudo participar Bernardo? … ¿Qué d’otres hestories se cuenten d’él? … ¿Cuála foi la xida o’l petite la so vida? … Pos intentando responder a estes entrugues vamos entretenemos un ratín. ¡Galopiando!

LOS PROTAGONISTES:

        Nun tien la hestoria mui claro qu’Alfonso’l Castu tuviere una hermana - sicasí pue ser posible - dao que los Cróniques asturianes nada cuenten d’ella (¡Ai, cronistes, cuántes coses dexasteis nel tinteru!). Ximena, la posible fía de la vasca Munia y del Rei Fruela ñacería n’Uviéu ente los años 758 y 768 como mínimo y máximo; el so hermanu Alfonso vino al mundu n’Uviéu circa’l 760, magar tampoco s’afita dafechu.

Cuando en 768 so padre Fruela cai asesináu en Cangues d’Onís seguramente tien qu’escapar pa Vasconia con so madre mentanto’l so hermanu Fonso va preparase nel Monesteriu de Samos (Llugo) hasta que, tres la muerte de Mauregato (789), torna a Asturies pa convertise nel comes palatini - xefe de palaciu- de Silo, en Pravia .

Sancho Díaz, prisioneru d'AMOR.
(Semeya:pinterest.com)

         Don Sancho Díaz yera un caballeru fiel a la corona y al Rei d’Asturies Alfonso II. Vivía nel Castiellu de Saldaña*, un llugar averáu al territoriu musulmán polo tanto mui espuestu al peligru. Ye de suponer que taba pervaloráu por Alfonso col que tendría contautos permanentes - daquién lu afaya como Mayordomu Real na corte uvieina - y con tantes visites a la Civitas y vueltes de la dama pa tomar el sol en Castiella ….

      - Xime, toi namoráu de ti.

      - Y yo tamién de to, Sanchín, pero paeces-y pocu al Rei; quier pa min ún del sangre real.

      - ¿Y qué facemos, AMOR?

                                                  ROMANCE (III) 

                                             <  De les veces que se vieron

                                                 quedó la Infanta preñada;

                                                 lo que nun se pue esconder

                                                 queda a pùblica subasta,

                                                 y cuando s’entere’l Rei

                                                ¡la de Dios habrá na casa!
                                                  Nun fai falta que lo diga:
                                                 ¡ Escosó la Foncalada!>

      

        Des les duldes nació un guaje que nun hebo manera de tapar. Punxéron-y de nome Bernardo y col tiempu algamaría a ser una lleenda. Les coples, los romances, los cantares , la lliteratura o’l teatru enaltaron de manera tala les sos fazañes – y les que se-y presumen – que terminaron por convirtilu nun héroe nacional al altor del <Mio Cid>. Por eso quiero dir a face-y un homenax, amiyame énte la so tumba ya embaeceme del so espíritu llibertariu, como home d’izquierdes; que nun sían les dereches les que s’apropien de los símbolos de toos: El Carpiu, El Cid, El Clavih.o y Santiago tamién son de mio, que me lo tien cuntao el mio mayestru, Don José. 
¿Y qué me dices de la Santina, esa Virxe que s’inmoló en 1777 (Cuadonga) pa qu’España tornare la vista a la escaecía Asturies ? Sí, la mesma que s’esilió a Francia porque nun quixo ver cómo los sos fíos , d’izquiedes y dereches, se mataben. Yo tamién analayé peles Naves de Tolosa y sufrí n’Aljubarrota y narbolé la bandera cuando entramos en Granada. Lloré pola Armada Invencible y embarqué n’aventura de Colón porque quería un mundu meyor.

Yo voi dir a Aguilar de Campoo pa ver la mano valera del Carpiu a la que-y falta la espada Durandarte porque un rei, envidiosu - Carlos I - tién-yla arramplao.

                                                 ***

       ¿ Y qué pasó darréu, entrugaréisvos? …. Pos que terminó enterando’l Rei Alfonso y consideró aquel actu d’amor como una traición al Reinu y a la so confianza mandando pesllar al conde Sancho – de por vida - nun Castiellu y a Ximena nun conventu.
         Pasaron los años y el guaje - que creció col pruyiciu de nun conocer a so padre – algamó convirtise nel guerreru más célebre de la dómina . Como por un actu de xusticia divina un día enteró de la verdá y coló a baramente hasta la Corte. Amiyándose énte’l Rei suplica-y el perdón pero esti da-y llargues, y llargues ….. Cuando por fin el monarca s’apiada del guerreru – Bernardo - que tantes fazañes ficiere por él y pol reinu empobina dica’l castiellu de Lluna a rescatalu pero …. ¡Llevaba dos díes muertu!

             ROMANCE (IV): Nacimientu de Bernardo

< La infanta parió a Bernardo

y darréu a monxa entraba;

mandó’l Rei prender al Conde

y ponelu a teyavana:

-Ente fierros vas quedar

mientres yo viva, malaya;

nel Castiellu de Lluna

vas pagar afrenta tala.

(Semeya:elretohistórico.com)

   - Foi amor, non traición,

lo que nació en Saldaña,

pídovos, por compasión,

eduquéis la nuesa ayalga

qu’a fin de cuentes tamién

lleva’l sangre de la Infanta

Real, como la vida mesma

porque ye la vuesa hermana.
   - Curiarélu mientres viva

pos nun va falta-y de nada;

a querelu yá veremos

porque l’AMOR sí se gana

con fechos que t’enaltezan

y non humilden la castra.

   Bernardo vivió na corte

talo fuere fíu d’ Infanta

y algamó a caballeru 
de la nobleza asturiana.

Nun hai otru en tou’l reinu

que se-y suba hasta la barba,

más arrechu nun s’alcuentra

en toa la murnia España

que plagada ta de moros,

francos y xenticaya.

Y cuando Bernardo prinde

l’estandarte de la patria

vais a saber, invasores,

lo que ye comer fabada.

Cuando’l Carpiu pon el monu

de trabayu, por España,

hasta’l mesmu Carlomagnu

reza, cabilga y combaya.>

                  ANEXU I: Los ancestros de Bernardo del Carpiu

        Si Bernardo fuere fíu de Ximena Froilaz y del fíu del Duque de Saldaña (San ó Sancho Díaz) el so Árbol Xenealóxicu vendría a tar determináu por esto:

Por parte de madre yera fíu de Ximena, la hermana d’Alfonso II el Castu, y ñetu de la vasca Munia y del Rei Fruela I ( pá d’Alfonso II, fíu d’Alfonso I y ñetu de Pedro de Cantabria).

Ximena yera fía del Rei Fruela y de la vasca Munia López, fía esta de Lope d’Álava y hermana de García López (el magnate asturianu que morrió en 816 na batalla del Ríu Orón, en Pancorbo).

. < Hipotéticu Árbol xenealóxicu de Bernardo por parte de madre>. ***

                         PEDRO duque de CANTABRIA

ALFONSO I <>Ermesinda       FRUELA, duque de CANTABRIA** <> Menina

Fruela I <>Munia                   Aurelio + Bermudo + Fía <> (Lope d’Álava)….. Nunnabella

Alfonso II y Ximena <> San Díaz          Ramiro        García López y Munia<>Fruela I*

                     BERNARDO                    Ordoño I                           Alfonso II y Ximena<>SanDíaz 

                                                               Alfonso III                                                  BERNARDO

*** En <<www.abcgenealogia.com/AsturLeon 00 html >> diz que’l Duque de Cantabria, Fruela Pérez (.-758), tevo con Menina (1) otros fíos amás de los Reis Aurelio y Bermudo I:

. ¿Anónima?(2). Casa con Lope d’Álava y tienen a García López y Munia (<>Fruela I)

. Rodrigo Frolaz, conde Castiella. Pobló Amaya.

. Gonzalo, pobló Lara. Restaura con Singerico’l Monesteriu S. Pedro Arlanza.

. Singerico, pobla CastroXeriz

. Nuñabella= ¿Nunnabella, l’abadesa de Samiguel del Pedrosu (759), prima de Fruela I y tía de Munia?.

Fruela Pérez, duque de Cantabria, foi un gran guerreru
(Semeya: Wikipedia)

     * El Rei Fruela I d’Asturies casa con Munia d’Álava, prima-sobrina (segunda) suya pos yera fía d’una hermana ensin nome (1) d’Aurelio y Bermudo. Al casar la FÍA con Lope - el que morrió n’Orón - debió marchar vivir p’Álava pos Munia yera alavesa. Por embargu’ l so hermanu, García Lope, debió educase n’Uviéu pos nomábenlu “Lope d’Uviéu”.

. (1) Menina, la muyer del duque Fruela de Cantabria, pudiere ser fía del conde Gundesindo.

. (2) La hermana ensin nome pue que fuera fía d’un tal Aurelio, sobrín llonxanu del santu Eparquio, lo qu’esplicaría que-y punxere esi nome al so fíu Aurelio I (Rei d’Asturies). Tamién sería tía d’Aureolo d’Aragón(2)

. (3). Ente 798 y 802 árabes y francos lluchaben por controlar la Marca Hispana. Teníen control los moros pero los francos tomaron con astucia , ayudaos por hispanoárabes, Zaragoza (798) y Huesca (800) pero Amrus ibn Yusuf reconquistóles en 801 magar que los francos siguen controlando Jaca ya otros castiellos pela Barbitania nomando a esti Aureolus como Gobernador o Conde d’Aragón y cuando esti morrió (809) punxeren a Aznar Galíndez I.

** Esti duque Fruela de Cantabria (fíu del Duque Pedro de Cantabria) yera un gallu, tanto de la estratexa militar como política. Magar les sos numberoses conquistes a los moros, agabitando al so hermanu Alfonso I, dos fíos de so algamaron a reis d’Asturies: Aurelio y Bermudo, y a la fía casóla con Lope d’Álava - un cabezaleru na corte del Castu - p’atrayer a los vascos.

                       . Alfonso II, el Castu (791-842):

Alfonso II el Castu.
Tumbu A Catedral Santiago.
(Semeya:Blogspot.com)

         Alfonso II (760-842) foi’l Rei más bultable de los trece que gobernaren el Reinu d’Asturies, y mira que hubo buenos, como los otros dos Alfonsos. Nació na biltante ciudá d’Uviéu qu’él convertiría na capital del Reinu onde creó la <Civitas Episcopal>. So padre foi’l Rei Fruela, fíu d’Alfonso I y ñetu de Pelayo. So madre yera la vasca Munia a la que so padre trexo por un pautu d’estáu ente vascones y asturianos; eso que la “robó”, nada, yeren parientes; cuido qu’a la rapaza costaría-y alloñase de la rica y fermosa tierra alavesa, pero terminó namorada d’Asturies.

Alfonso II nun casó – seique n’alguna crónica tardiega quier velu enllordiáu na familia Carlomagnu – porque nun tenía tiempu. Guerreru, constructor y estadista dedicó la so vida a construyir un Reinu col que facer frente al imperiu árabe ya enanaltar la ciudá d’Uviéu como la primera de la Hispania cristiana de la Península, o más.

    Ganó munches batalles: Llutos, Arón, Anceo ….. Tevo la osadía d’averase hasta Llisboa (798) d’onde trexo bona cacida ( pa chulear con Carlomagnu) ya empató en Pancorbo (Batalla del Ríu Orón) y anque perdió daqué vez y sufrió delles escorripandes – como la del Babies - al final siempre salía cola suya.

      Enantó’l Reinu al que diba repoblando pasu ente pasu sobremanera hacia’l este y consiguió llevase bien coles tribus indíxenes astures (Ramiro piró la clas esi día).

     La ciudá d’Uviéu ye’l suañu d’un Rei que llevantó una <Civitas Episcopal> dientro d’una muralla: Reedificó la Ilesia de San Salvador (catedral) llevantada por so padre y que los Mugait esaniciaren dafechu (794-795); llevantó Santa María (Panteón Reis), San Tirso, Cámara Santa (?)*; la Foncalada y l’acueductu; los palacios de la Vega cola Ilesia Santuyano … Cerca la capital Santa María de Bendones y nos meandros del Nora la ilesia San Pedro. Si ye verdá que-y trixeren a Doña Berta dende Francia la probe tuvo que colar, aburría, porque esti Castu nun tenía tiempu nin pa dase un chapuzón na Foncalada, qu’acababa de reinventar. (Nun tuvo tiempu casar y quedamos ensin un herederu acordies cola grandeza del Castu.¡Fatu!).

¡Bon Camín!  <Camín Primitivu:Uviéu-Santiago Compostela>
(Semeya:Eroski Consumer)

     Pero hai un fechu perimportante nel reináu del Castu del que les Cróniques – ai, Señor – nun faen la menor alusión y que tevo una sonadía ya unes consecuencies bien bultables na hestoria de la Reconquista d’España: El descubrimientu de la tumba de Santiago en Compòstela (diócesis d’Iria Flavia). El mesmu Rei visitó la inventio hacia 829 – inventando’l Camín Primitivu  - y mandó llevantar una ilesia prerrománica que más tarde enantó’l so tocayu, Alfonso III el Magnu, en (872-896). Tamién esti Rei visitó Compostela en dos ocaciones : En 874 p’arrealos y en 889 pa fardar, acompañáu de la muyer ya un séquitu de postín. Home, tamién adebecía que’l Papa Xuan VIII-y apurriere la bendición; claro que’l romanu andaba roceanu pos tenía mieu perder el momiu de la pelegrinación a Roma (a la fin too son perres). 

* La Cámara Santa: La tradición atribúi la C.S. a Alfonso II el Castu magar que l’arqueoloxía nun lo afite; otramiente tou paez indicar que foi cosa d’Alfonso III el Magnu. Mentanto nun se pongan los sabios en total alcuerdu nós vamos regalá-ysla a dambos.

                                                      ********************

ANEXU II:

                         Al rodiu’l Castiellu de Saldaña:

        Inda queden restos del Castiellu de Saldaña, el que según la lleenda gobernare’l pá del Carpiu na dómina d’Alfonso II el Castu (791-842). Nun pertenecen a los primeros qu’hebo nel altu de La Monterona, onde enantes pudo tar asitiáu un fuerte sobro lo que fuere un castru vaccéu-romanu.
       Nel sieglu VI Leovigildo toma la ciudá de Saldaña – seguramante ocupada por rebeldes cántabros - asina como’l Castiellu y dende ellí emite moneda per aciu una ceca que creare al endefechu seique nun foi la única pos taba tamién la ceca de Mave [ bien cerquina, n’Olleros de Pisuerga, ducáu de Cantabria] que tuvieren n’activo hasta la dómina de Chendasvinto.

Castiellu de Saldaña
(Semeya:Wikipedia)

        Cuando en 711 los árabes entren n’Hispania lleguen hasta Saldaña, ocupando la villa y el castiellu d’odobes. En tiempos d’Alfonso I, el fíu del Duque Cantabria y xenru de Pelayo, recupérase la villa de Saldaña gracies, eso sí, al gabitu de la Virxe de Nuestra S.ª del Valle. Esti monarca asturianu al nun poder defender les numberoses ciudaes tomaes a los moros na Meseta aconseyó a la xente qu’emigrare a tierres más al norte del Duero dexando una franxa de “tierra ermo” como llende ente los dos reinos. Saldaña debió quedar semiabandonada entamando una biltante repoblación en tiempos del Castu dao que’l Castiellu tama gobernáu pol valiente Sancho Díaz, según cuenta la lleenda.

         En 920 los reis de Lleón y Navarra - Ordoño II y Sancho Garcés I- pierden la Batalla de Valdejunquera escontra Abderramán III y échen-yos la culpa a los condes castellanos Banu Ansúrez, Nuño Fdez (tíu de Fernán González) y Banu Gómez (familia Diego Muñoz) por nun dir agabitar nel combate.

         Seguro ye que la repoblación tevo un avance importante en tiempos de Ramiro II de Lleón (931-951) que creó’l Condáu de Saldaña, siendo’l primer conde’l magnate d’orixe llebaniegu Diego Muñoz, de la familia Banu Gómez, collaciu del célebre Fernán González col que compartió celda por alzase escontra’l Rei Ramiro II (931-951).

Almanzor, en 998, arrasó la villa de Saldaña y el castiellu cuando diba camín de Compostela. Nun dexó esti “títere con cabeza” pero énte la tumba del Apóstol amiyóse de rodiyes talo un pelegrín más. ¿Ta esti milagru alpuntáu na llista de Xacobu?.

                             *************************************

         NO QUE CINCA A LA LLEENDA del Carpiu qué podemos calletrar … Si él, el Castu, nun se permitía ciertes allegríes menos diba consentiles a la hermana; amás, ¿nun podía alegar Bernardo fundaes aspiraciones al tronu dao que’l Rei nun tenía fíos? … Colo que tuvo pasao p’algamar al cargu yá tenía bastante; un bastardu (Mauregato) arrampló-y cola corona ¿diba permitir agora qu’otru fíu natural, ilexítimu, fuere’l valedor de la so obra?. Hai que ponese na pelleya del Castu.

                
         ROMANCE (V): La infancia de Bernardo

   < Na mesma corte del Castu

Bernardo a placer vivía

mas inoraba dafechu

que’l padre presu vivía;

tol mundu taba enteráu

mas naide valor tenía

pa canta-y tola verdá,

bien sabíen lo que-y pruyía.

Suplicando al Rei
(Semeya:employees.oneonta.edu)

    Dos dames con muncha maña

ponen a Bernardo al día,

casi lu maten del sustu

pos malpenes lo creyía;

tornando pa la posada

¡qué esparabanes facía!,

y vistiéndose de duelgu

corriendo a la corte diba.

    El Rei que lu ve de lluto

los badagüeyos albidra:

  - ¿Acasu mio buen Bernardo

cobicies la muerte mía?

   - Pa nada, mio buen señor,

la vuesa muerte querdría,

mas pídovos, yo, deudor,

qu’a padre abráis la portica

pos si presu ye d’amor

bien pagare yá la xixa.

Mas el Rei arrepostió,

con rabia y con farta ira:

    - Nun va salir de prisión

mientres yo, Alfonso, viva,

que les faltes de traición

son farda pa tola vida.

    - Rei sois, Señor, y faredes

lo que’l gobiernu dexixa

pero mal obráis, Señor ,

si pagáis d’esta manera

al que por vós da la vida.>

                     . ¿Quién afita la verdá histórica del Carpiu?

. L’Obispu Pelayo. Magar sía consideráu un falsariu Menéndez Pidal diz qu’él inventa coses partiendo de realidaes históriques, seique se-y baya un pelín la mano.

. L’eruditu Arzobispu toledanu Rodrigo Ximénez de Rada que considera al Carpiu imprescindible na vida del Castu. Home concienzudu que bebe de toles fontes posibles: cristianes, árabes o mesmo de los romances y cantares de xesta. (Col asuntu  la "inventio" de Santiago andaba daqué más roceanu;  claro, tocaba-y la mitra y el calcetu...)

Alfonso X el Sabiu pregunta por Bernardo del Carpio
pa escribir la Primera Hestoria Xeneral

. Alfonso X el Sabiu que na so <Crónica Xeneral d’España> trata con llargueza la vida d’Alfonso II y camienta delles xestes del Carpiu.

. Una carta del añu 1377 onde fala del encierru de San Díaz nel castiellu de Lluna, onde ñaciere, asina como de la so descendencia al traviés de Bernardo. Los Bernaldo de Quirós puen ser descendientes de so. (Ai, dios, ¿quién la escribiría?)

. El Padre Yepes (XVI) dalu como históricu, anque fabuláu, y diz tar enterráu n’Aguilar de Campoo y los padres de so n’Uviéu (ella) y en San Román d’Entrepeñes (él).

. Ambrosio de Morales sigui la mesma llínia que Yepes, ciertu pero noveláu (bueno, romanceáu).

. Flai Lope de Vega y Carpio - cómo presumía de ser pariente de so - que tien una obra de teatru dedicada al personax, amuesa nel so escudu les armes del Carpiu con esti emblema:

<De Bernardo ye’l blasón, les desdiches míes son>.

. Cervantes, poco amigu del “fénix de los inxenios”, dalu por buenu magar vea abultaes les sos fazañes. Hasta pensó n’escribir un llibru caballería al rodiu’l personax.

. Balbuena nun alcontró otru héroe na historia d’España dignu de ser cantáu con tantos méritos como’l Carpiu.

. Tamién el Padre Mariana ye seguidor del caballeru palentín (y asturianu, ¿eh?).

. A min quédame por nomar al Padre Don Vicente José González García estudiosu onde los haya sobre’l tema y que da por real a Bernardo del Carpiu partiendo de que la braera Batalla de Roncesvalles nun foi la de 778 sinón la de 808 en la que participaría’l Carpiu.

           ROMANCE (VI): La esperanza de Sancho de Saldaña.

 (Un arreglín de "Les mocedaes de Bernardo del Carpio", de Lope de Vega)

Castiellu de Saldaña
(Semeya: Wikipedia)

< Cuando entré nesti castiellu
malpenes tenía barba
y agora, pa mio desdicha,
téngola crecía y cana.
¡Qué descuidu ye esti, fíu!
¿Cómo a voces nun te llama
el sangre que tienes mio
a socorrer onde falla?
Sin dubia que te detíen
esa que lleves de mama
que como ye la del Rei
xulgará por él mio causa.

Los que me vienen a ver
dan cuenta de la to hombrada. 
Si pa to padre nun ye, fíu
 ¿pa quién guardes tala ayalga?
Perdóname si t'ofiendo,
mas descanso na pallabra;
que yo, como vieyu, lloro,
y tu ... meyor nun me digas nada. >

         A la escontra de la esistencia de Bernardo del Carpio tán Pedro Mantuano y sobremanera Pellicer. ¿Qué aleguen? …. Que’l Carpiu nun pudo por edá participar na primera, y pa ellos braera ya única Batalla de Roncesvalles (15-8-778), [seique sí na segunda (16-6-808)] teniendo en cuenta que so madre pudiere ñacer ente 760 y 768.

         Otru que tamién anda a la escontra ye l’ilustre Menéndez Pidal, que tracamundia al Bernardo de Saldaña col conde aragonés Bernardo de Ribagorza (quiciabes basáu na obra del catalán 
Ramón d'Abadal i de Vinyals : "El conde de Ribagorza y la lleenda de Bernardo del Carpio"), que muerre nel sieglu X, y foi un guerreru percantáu.

       A min el que más me presta ye l’estudiosu y seriu del profesor de la Universidá de Murcia
Don Luis Rubio García:“ Historia y poesía de Bernardo del Carpio” (que tamién abebenta de Don Ramón d'Abadal) onde amuesa la xida del nacimientu d’esta inventio qu’a lo llargo d’esti post intentaremos resumir entemecía con dalguna otra teoría que l'acota.

                              *************************************

La Batalla Roncesvalles (15-8-778), la clave pa la esistencia del Carpiu.

               << LA BATALLA RONCESVALLES , la clave>>

             En 776 – tiempos de Silo y Abderramán I – el Valí de Barcelona, Suleyman, aspirante a Emir de Córdoba, fai un tratu con Carlomagnu en Paderborn:

      - Si m’eches un gabitu col asuntu l’emiratu nun pongo torgues pa qu’asientes la to <Marca Hispánica>, que yá se te ve venir. Husayn de Zaragoza ta d’alcuerdu.

      - ¿ Y qué precises de min?

      - Yá sabes que soi yemení y los omeyes de Córdoba mìrenme de revisgu y cada día quieren más impuestos y más xixila nesta zona nordés d’Hispania que tenemos controlada, gústanos andar de por llibre. Tu tienes un exércitu poderosu y …

      - ¿Y qué gano yo a cambiu?

     - Podemos date unes places equí pel sur de los Pirineos, Zaragoza por exemplu.

         El zorru galu pensólo y a la fin atolenó:

         (- Si Pamplona ye aliada

             y l’Astúrica tamién

             con Zaragoza nel bote

             veo España a los mios pies)

Batalla de Roncesvalles
(Semeya:socialhizo.com)

Mui Guapo. El francu pica p’acá, toma Pamplona poles buenes pero, por si acasu, y cola fin d’asegurar la retaguardia destrúi les muralles la ciudá y embreda pa Zaragoza.

      - ¿Ónde tan les llaves la ciudá?

     - Yá t’oyí, navaya; como otra nun veas… - arrepostió-y Husayn, el gobernador de la plaza.

A última hora’l mañu echóse p’atrás, quiciabes presionáu polos vecinos Banu-Qasí que víen como-yos sentaben l’enemigu a la puerte casa, quiciabes porque quedaba al debalu, quiciabes ...

  Carlomagnu enfocicáu pon-y sitiu a la ciudá pero cuando lo tien casi iguao dan-y l’anuncia d’una revuelta sah.ones na Renania:

      - Lo primero ye l’imperiu, hai que tornar pa casa.

       Lleva consigo a Suleymán, como rehén. Al pasar per Pamplona desanicia la ciudá, por si torna escontra d’elli (esto va costate caro, Carolo). De moros pue que tea llibre pero colo que nun cuntaba….

       Al cruciar los Pirineos per Roncesvalles, ente Ibañeta y Valcarlos, ye atacáu por los vascones , navarros y/o gascones , y tropes árabes – los fíos de Suleymán - causándo-y una destroza pergrande na retaguardia l’exércitu. La <Canción de Roldán> diz que muerre l’héroe Roldán, sobrín del emperador, asina como <Los Doce pares de Francia> y dalgún cabezaleru más como l’escritor Eginardo* (770-840) o’l comes palatini Anselmo pero… Según el padre Vicente nun paez creyible que dengún d’ellos pudiere morrer nella como tampoco pudiere tar presente’l cohéroe español BERNARDO DEL CARPIO.

       Si la pantasía franca fizo de Roldán un héroe la española – nun díbemos ser menos - inventó’l suyu propiu, Bernardo del Carpio, un sobrín del Rei d’Asturies – Alfonso II el Castu – fíu natural d’una hermana de so, Ximena, y del Conde de Saldaña, Sancho Díaz. Pero estos héroes mitificaos por xuglares y romances nun tienen cabida nesa batalla, según el padre Vicente; neses feches tendríen que ser mui nenos, apunta’l clérigu. ¿Entós?…

Entós el Padre Vicente – V. José González García – l’eruditu más estudiosu sol tema carpianu - propón una solución a esti entueyu: Nun hebo una sola batalla de Roncesvalles, ¡hebo dos!, ¡toma esa, manín!

Roncesvalles: Bernardo y Roldán a la tema.

   La

<Segunda Batalla Roncesvalles> 

tendría llugar el 16 de Xunu del añu 808 n’ Ibañeta trenta años más tarde; equí sí que los protagonistes sedríen yá unos mocinos, los nuesos. ¿Qué datos aporta’l Padre Vicente amás de los posibilistes cronolóxicos?:

1º.- Diz un cantar que daquella Carlomagno llevaba 7 años gobernando n’España y si tenemos en cuenta que tomó Barcelona en 801 , danos 808.

2º.- L’epitafiu d’Eginardo que fecha la so muerte en 840, vamos, que nun morrió na 1ª batalla (bueno, pero como esto lo cuenta la lleenda ...).

3º- La veracidá del personax históricu de Bernardo que nun pudo tar en Roncesvalles na 1ª batalla (778) pero sí na 2ª (808). Dellos otros personax de los cantares de Bernar y Roldán tienen cabida dafechu na segunda: Roldán, Oliver, Turpin, Alfonso II, Ximena (d'esistir), el Carlomagno canu y tola so parentela: la hermana Berta, Milón d'Angers ...

¿En qué la xustifica?:

3.1.- Los sepulcros de Bernardo (Aguilar de Campoo), Ximena (Uviéu) y del Conde San Díaz (S. Román d’Entrepeñes).

3.2. Los <Cantares de Xesta> que faen referencia al Bernardo, caballeru medieval.

3.3. La Tradición española, que tresmite les fazañes, dómina a dómina, dende’l sieglu XI.

3.4. La carta de 1377 [Reinando Alfonso XI (1312-1350)] de la que pue deducise la esistencia de 

       San Díaz, el so encierru en Lluna y la so descendencia. (?).

3.5. Lo escrito por personaxes cabezaleros hispanos como:

      . L’Obispu Pelayo [1063-1153] (¡Ai, Dios!) que si bien pudo inventar coses foi partiendo de

fechos reales o de cróniques antigües.

      . Lucas de Tuy (XII-XIII) nel so <Crónicum Mundi>, con bayura de datos.

      . Ximénez de Rada, sabiu obispu de Toledo, que da importancia a los cantares de xesta.

      . Alfonso X el Sabiu (XIII), que paez dar fé a los dos anteriores.

      . El Padre Yepes (XVI), Ambrosio de Morales (XVI), Lope de Vega (posible descendiente),

Cervantes, Balbuena o’l Padre Marina tamién paecen agabitar la so esistencia.

[Igual-yos pasa como a min, que nos presten los cuentos. ¿A ti, non?]

*Eginardo (770-840): Secretariu de Carlomagno, escribió la <Vita Karoli> enantes de 822. Esti Eginardo nun pudo tar na 1ª de Roncesvalles (onde muerre según "La canción de Roldán") pos tendría 8 años; pero na 2ª R. sí (38 años). 

        Pero esto que me pregunto yo…. ¿Qué pintaba’l Carpiu ehí? ….¿Quién yeren los contendientes? …. ¿Cuála yera la xida? …. Tengo que consultar a los “supercicutes” porque esto ye mui gordo, polo menos pa min. ¿Existió Bernardo del Carpiu? …. A min prestaríame, yo agárrome a cualquier cosa pero … ¿Figura en parte alguna esa batalla de 808 nel entornu Roncesvalles? … ¿Cómo andaba la cosa per aquella dómina nes llendes de la Marca Hispánica* y la Marca Superior omeya**? ….

Cuando la <Marca Hispana>

** [[ La <Marca Hispánica> foi una barrera político-militar que los francos carolinxos establecieron na contorna los Pirineos (España-Francia) pa torgar les invasiones árabes en territoriu francu (y si de pasu podíen sacar dalguna qu’otra tayá...) . Taba en contraposición a la <Marca Superior> árabe, una serie de cores pel valle del Ebro dependientes de Córdoba [Barbastro, Güesca, Lleida, Zaragoza, Calatayú, Tudela y Molina d’Aragón] que naguaba por enantar el territoriu pela actual Cataluña, la Septimania francesa y … Los suaños omeyes*** nun tienen llende.

*** Los omeyes, tres la invasión d’España (711-716), siguieron avanzando más allá del Pirinéu tres facese enantes con Huesca, Barbastro, Lleida, Tarragona, Barcelona y Girona; tamién pautaron con Pamplona y n’Asturies colocaron a Muza de Gobernador (717).

Yá na Septimania llegaron a tomar Perpiñán y Narbona (720) col valí Al Samh.

. En Toulouse (721) Al Samh, muerre ensin tomar la ciudá. Al Gafiqi torna colo puesto.

. En 722, tando de valí’l chupasangre Anbasa, sufren la derrota Cuadonga (Alkama).¡Nun pagamos más!

Carlos Martel, a palos colos moros na célebre
BATALLA de POITIERS (732)
Semeya. (Wp)

. Anbasa (725) toma Nimes y en Carcasone partiendo de Narbona, onde muerre en 726.

. Al-Gafiqi (732) arrasa’l Monesteriu Samartín de Tours pero pierde la célebre batalla de Poitiers a manes de Carlos Martel, el primer carolinxu. [Pa Narbona, a sapozalu].

. En (733) Abd al Malik al-Fihri anda de razia pel Ródanu y en (734) intenta tomar Pamplona (ondelos aquitanos tienen una base) y yá en Gascuña – tres unos exitosos fuegos artificiales- termina derrotáu dafechu.

. Uqba Al-Hajjaj en (735) gana una batalla n’Asturies de Pelayo (dicen ellos). En (736) toma Pamplona - mora hasta (740) – y llibra a Norbona del asediu francu pero Carlos Martel failos retirase del valle del Ródanu. En (737) derrótalu otra vuelta Carlos Martel pero la Narbona van conservala hasta (759) cuando los sos habitantes la entreguen a los francos de Pipino’l Breve. Reinaba daquella n’Asturies el fieru Fruela I .]]

                                                   ****************

        La primer Batalla Roncesvalles ocurrió na parte d’allá los Pirineos, na zona de Valcarlos el 15 d’agostu del añu 778; reinaba daquella n’Asturies el magnate Silo - cola prima donna Adosinda - siendo l’omeya Abderramán I il capo n’al-Andalus.

Nella va cayer – según cuenta la <Chançon de Roldán> - la retaguardia l’exércitu de Carlomagno ( <Roldán y los 12 pares>, Anselmo y Eginardo ) que nun cuntaba col ataque de los vasco-navarro-¿gascones?.

       - Pero home, Carlos, ¿nun te decatasti la cantidá d’enemigos que te fraguasti pela redolada? . Amás d’aquitanos y gascones agora tienes a tola triba árabe (sur y norte), los navarros (fuisti poco respetuosu con ellos esbarrumbando-yos la muralla), los Banu Qasi, dellos condaos pirenáicos y hasta nobles asturianos un tantu roceanos a los pautos con francos (según cuenten les lleendes).

                    <La chançon de Rolan>

          La <Canción de Roldán> ye un poema épicu de cientos de versos (4002 decasílabos y 291 estrofes) y escritu en francés antiguo (la primer llingua romance d’Europa) a finales del XI atribuyíu al monxu normandu Turoldo. El testu del manuscritu que lu caltién alcuéntrase en Oxford por eso se conoz como’l <Manuscritu d’Oxford>.

       La verdá yá la conocemos: Carlomagno vien a España pa quedar con Zaragoza por aciu d’ un pautu con moros del norte la península. Delantre la ciudá vuélvense atrás y nun teniendo tiempu’l galu pa tomala pola fuercia por mor d’unes revueltes n’Aquitania tien que colar darréu. Pa nun tener problemes desanicia Pamplona pero …. La venganza va costa-y caro: los navarros y vascones ataquenlu pela retaguardia al pasu per Roncesvalles que diba comandada po Rolando, el prefeutu de Bretaña.

La Muerte de Roldán en Roncesvalles.
Bernardo faise cargu la so espada "Durandarte"
(Semeya: Wikipedia)

       Tres sieglos más tarde la PANTASÍA gala, espresada al traviés de los romanceaos Cantares de Xesta, tresformó aquella pequeña engarrada nuna hestoria novelesca onde’l sosprendíu conde de Bretaña resulta ser un héroe que cai por mor la traición del zaguín Ganelón – padrastu de Roldán - que nun vivía de la envidia y aconchabó con Marsil (Marsilio), el rei moru de Zaragoza, el fin del so fíu; claro, pa ser mártiles precisaben finar nuna Guerra Santa, nun podíen ser cristianos los sos enemigos. Con Roldán van cayer los <Doce Pares>* de Francia (los Mosqueteros amigos del arzobispu Turpin que me traen n’alcordanza a los <Caballeros de la Tabla Redonda>), el so amigu Oliver y el sursumcorda.

Cuando Roldán toca l'olifante yá ye tarde.
La batalla Roncesvalles ta perdía.
- Buena la ficisti, compañeru; XII sieglos más tarde
entá se fala d'ello.
(Semeya: getimage)

   


       La inconsciencia de Roldán al nun facer sonar l’olifante p’avisar a la vanguardia conviértese en valor nel romance; cuando toca yá ye tarde y nun xestu postreru de gallardía intenta romper la so espada Durandarte pa nun caiga en manes enemigues pero … la espada fiende la roca y queda nella yantada dafechu (¿nun te recuerda a Excaslibur?) …

Carlomagnu sospecha la traición de Ganelón que se defende acusando a Roldán de mandalu lluchar escontra’l moru ensin la loxística afayaiza. L’alderique tien de resolvelu’l “Xuiciu de Dios”: Un duelu ente caballeros representantes de los dos antagonistes : Thierry d’Anjou, por Roldán, acabará con Pinatel que lluchaba por Ganelón.

        Carlomagno – vieyu y cansu - tornará a España y tres derrotar a Marsil y dellos más conviértese nel héroe de la Reconquista (¡Venga, ho! … Nosotros VIII sieglos penitenciando col moru y agora venísnos con estes …). Tamién ye verdá que los carolinxos tornaren conquistando Barcelona y gran parte de Cataluña, la <Marca Hispana> .

                   ROMANCE  de RONCESVALLES ( VII )

   << - ¡ Cuentame una hestoria, güela!

        - Siglos ha, que con gran saña
       per esta prieta montaña
       amosó un emperador:
       Yera francés, va vestíu
       con capa color de fueu
       y plumbes d'azur color.

            - ¿Y qué quería, güela?
            - ¡La Corona de Lleón!.

        Bernardo'l del Carpiu, un día
     cola xente que trayía:
           - ¡Ven por ella! - arrepostió -.
      Dentós suena pelos valles
      y clamien los montañeses:
      ¡Bona cuelma, ai, franceses,
      vais llevar en Roncesvalles!
        

Carlomagno, con Roldán y los <Doce Pares>

     ¡Cómo me prui esta hestoria, güela!

     ¡ Con qué exércitu, Dios míu
       de tan grande poderíu
      llegó Carlomagno acá!
               ¡Cuántos soldaos, manín!
      Nun hai más gotes nun regueru,
      nin más estrelles nel cielu
      nin más sablera nel mar;
      hasta los Pares de Francia
      taben per ellí tamién.
            Salió'l mocín lleonés,
      salió Bernardo lluchando,
      a too quisqui liquidando,
      yá matare plus de cien.

                  - ¿Y qué, güela, ganaron?
      Dicen que diz un archivu
      que nun quedó un francés vivu 
      tres del horrible fiestín.
          Dentós suena pelos valles

      y clamien los montañeses:
      ¡bona cuelma, ai, franceses,
      llevasteis en Roncesvalles!. >>

                          *Los doce pares de Francia

¿Carlomagnu en Compostela?

         Los Doce Pares yeren unos nobles caballeros – 6 relixosos ya otras 6 llaicos- que formaben la “guardia pretoriana” de Carlomagnu. Paez ser que toos yeren sobrinos de so (puestos a inventar…). Más tarde fueron 12 caballeros de la nobleza, feudatarios del rei.

   De los primeros – los que más nos interesen - tenemos constancia: Roldán, Oliver, Gerin, Gerier, Beranger, Otón, Sansón, Ivón, Ivoir, Girard, Anselmo (esti, seguro) y L’Azobispu Turpín.

Otros dicen que se nomaben: Roldán, Oliver, Baldovinos, Arnaldo, Terrin, Ogier de Dinamarca, l’Arzobispu Turpin, Gualdabuy, Reinaldos, Salomón, Angelero y Escolt. ¿Y Gui de Borgoña? (Esto de los Pares tienme esmolecíu, non siempres apaecen los mesmos nomes).

Hai un llibru de caballeríes que cuenta la historia de Carlomagno y el nacimientu de los Doce Pares. Ta dividíu en tres partes:

¡Adiós, Ferragús!
(Semeyua: Wp)

     . La Primera entama cola llegada al poder de Pipino’l Breve, pá de Carlomagno. Tamién fala fel futuru emperador y de los nobles caballeros que lu acompañaben: Los Doce Pares de Francia.

    . La Segunda ye una inventio al rodiu les lluches de Carlomagnu escontra l’almirante Balán y el so fíu Fierabrás que teminen tomando prisioneros a Oliver y otros Pares. Pola mediación de Florina que s’enamora del par Guy de Borgoña terminen lliberaos.

    . La Tercera cuenta les batalles de Carlomagnu n’España tres l’apaición de Santiago Apóstol. La victoria de Roldán sobro’l xigante Ferragús, la Batalla Roncesvalles cola muerte de Roldán por mor de la traición de Ganelón tamién tienen ecu equí. Termina cola muerte del rei carolinxu n’Aquisgrán.

        Bueno, ando restolando pela escala de la Hestoria y nun alcuentro batalla alguna en Roncesvalles per eses feches (808). La única qu’alcuentro con seguridá ye la del 778 con una xida ya unos contendientes, la verdá, non del tou claros. La retaguardia l’exércitu de Carlomagno sufrió un varapalu en Roncesvalles, Valcarlos – valle de Carlos - seguramente a cuenta de ¿vascones hispano-navarros?, ¿vascones aquitanos – gascones - acosaos polos carolinxos? , ¿árabes de la Marca Superior?, ¿una andecha de toos ellos? … Eso nun ta claro, pero la cuelma foi gorda seique les cróniques franques nun tienen falao dello hasta yá bien muertu l’emperador; nin sentilo siquiera pela corte d’Aquisgram.

                         La esplicación

           Un poco mosca tres tanta llectura CONTRADICTORIO – lleenda o realidá - tomo’l determín de poneme a la fala colos supercitues ya entrugo, derechu:

       - ¿Qué pasa con Bernardo’l Carpiu, lleenda o realidá?…

       - Una lleenda perguapa pero una trola mui gorda.

       - Non, por Dios, que quiero dir a Aguilar de Campoo ya otramiente quedo ensin xida.

       - En Campoo, y redolada, tienes muncho que ver amás de la tumba del héroe inventáu: El conventu Santa Clara, el Monesteriu de Santa María la Real, la Capiella de Santa Cecilia, el Castiellu, los numberosos palacios, les Pontes, la Muralla, les Puertes de la villa medieval, les fábriques de galletes, el Muséu Sacru, El Muséu románicu … Y cerquina l’Embalse del Pisuerga, les Tuernes … Nun vais aburrivos, non.

       - ¿Cómo xurdió entós esta lleenda tan asentada na tradición y de la que tantos autores hispanos dan cuenta?.

       - Don Luis Rubio García (Uni. Murcia) n’<Historia y Poesía: Bernardo del Carpio> cuéntalo perbién [tamién l'historiador catalán Ramón d'Abadal i de Vinyals], que lo estudiare a fondu: 
<La lleenda de Bernardo del Carpiu surdió nel sieglu XI, inventada pola nobleza hispana en contraposición a la Canción de Roldán – tamién del XI - y sobremanera al poderíu insufrible que la Ilesia franca algamare n’España, de manera tala qu’hebo un momentu en que quasi tolos Obispos cabezaleros yeren de p’allá (ente Francos y cures …. Hai enfermedaes cróniques). Basta echar una güeyada al reináu d’Alfonso VI* ...

       - ¿Ánde colocamos a los nuesos fíos?. Tenemos qu’amenorgar el poderíu francu, tiénennos invadíos.

      - Hai que facelo a lo soca. ¿Por qué nun inventamos un personax que faiga contrapesu al so héroe nacional, Roldán?… Ye peligroso enfrentar direutamente al Rei; si acabó col so hermanu (Sancho) qué fadrá con nós ...

        

            Condados Ribagorza y Pallars, onde pudo
              abebentar la lleenda de Bernardo del Carpio.
( eukomedia.org)

     
             Hai per esa dómina dellos Bernardos bien célebres : Bernardo de Tolosa* ; B. Rei d’Italia (810-817), ñetu de Carlomagnu; B. primáu de Toledo o Bernardo de Ribagorza**, casáu cola fía’l conde Jaca (Galindo) y que lluchó de contino contra los árabes na zona pirenáica. Coles fazañes d’ún y de otru ….

*Bernardo de Tolosa , duque de Narbona, ye'l braeru fíu de Timbor que muerre en 844 y nada tienen que ver con Carolomagno, pero les sos fazañes puen valir pal nuesu héroe. 

** Bernardo de Ribagorza, (880-955), fíu de Raimundu I,  foi'l 2º Conde Ribagorza dende (920-955) y hermanu de los condes de Pallars: Lope I ya Isarno I. Andechó en 919 col so primu Sancho Garcés I (1º Rei de Pamplona) pa tomar Monzón a los Banu Qasi. En 928 acpyeron al caberu Banu Qasi - Muhammad ibn Lope - al que cepillaron al añu siguiente pa quita-y lo que llevaba. 
Casó con Toda, la fía del Conde d'Aragón y Jaca Galindo II Aznárez ya Acibella de Gascuña. Tuvieron una fía (Aba) y dos fíos: Raimundo II, conde de Ribagorza (muertu en 970), y Galido de Ribagorza que casó con Velasquita de Pamplona, fía de Sancho Garcés I y Toda de Pamplona. 

Condes de Ribagorza
(Semeya:nabarlur.blogspot.com)

                          ROMANCE (VIII)

- <Que Bernardo sía l’héroe

y qu’afeche con Roldán,

nada de vascos y moros

que per Roncesvalles van;

que muerran talo felpeyos

por a España menaciar.

Durandarte pasó a manes

del nuesu mocín nacional;

entá sienten pel Pisuerga

los clamíos de Roldán.>

        Asina foi como nació’l nuesu héroe nacional n’oposición a Roldán, nada d’una piedra estraviada en Roncesvalles, meyor un cuerpu a cuerpu ente’l Bernardo astur-lleonés y el foriatu Roldán. D’esta miente’l prestixu nuesu va en consonancia col desprestixu de so.

       * [[ Alfonso VI [1040 (1065-1109)] ,un grandísimu Rei que naciere en Compostela, tevo bien emparentáu cola nobleza francesa. Casó con Inés d’Aquitania, de la que nun tuvo fíos. Cola amante Ximena Muñoz tevo dos fíes qu’emparentaron:

            . Elvira, que casó con Raimundo IV de Tolosa y

            . Teresa, que casó con Enrique IV de Borgoña.

Alfonso VI reconquista Toledo (1085)
El francu Bernardo de Sèdirac sedrá l'Arzobispu .
(Semeya:blogspot.com)

      Más tarde él mesmu casó con Constanza de Borgoña, sobrina del abá Hugo del Cluny, importante Orde instalada yá n’España y algamó a colocar un Papa, Calixto II, que tanto favoreció a Compostela y al Camín Xacobéu (Vaya momiu, Alfonso). La fía dambos, Urraca, casó con Raimundo de Borgoña – hermanu del Papa Calixto – y tuvieron al emperador Alfonso VII, discípulu de Xelmírez, como gran bienfechor de Compostela.

       Tamién casó con Berta de Saboya, Isabel de Francia y más tarde con Beatriz de Poitiers. Ta visto que-y gustaben les foriates.

       El mesmu Alfonso VI tando presu en Burgos por orde del so hermanu, el Rei Sancho, pudo lliberase per aciu d’unos monxos cluniacenses qu’acompañaben al legáu papal Hugo Candidato que s’alcontraba daquella n’España por mor de la reforma eclesial del papa Gregorio. Por ello Alfonso protexó a la Orde del Cluny que colocó nel Monesteriu de Sahagún – tres espulsar a los benitos – onde’l mesmu asitió la capital del reinu. Darréu’l Cluny espardió talo la pólvora per tola España cristiana: Náh.era, Carrión, Galicia, Asturies, Navarra … Ficiérense los amos de Compostela y promotores del Camín Xacobéu Francés al que llararon de pontes dándo-y seguridá, <lo que nun mata, engorda>. Los Papas Calixto II (Códiz Calixtinus) y Urbano II yeren clunyacenses.

       - ¡Adiós liturxa mozárabe! ¡Viva’l ritu romamu!

       - ¡Adiós a lletra visigótica! ¡Viva la lletra carolina!

       - ¡Adiós a los obispos hispanos! ¡Viva los obispos franceses!

       El francés Bernardo de Sèdirac*, abá cluniacense de Sahagún, foi l’elexíu pa la reconvertida sede toledana tres ser conquistada por Alfonso. Bernardo de Agén, francés, yera l’obispu cluniacense de Sigüenza. La <invasión francesa> **qu’entamare con Alfonso’l Castu algama’l puntu cimeru con Alfonso VI; España ábrese a Europa, mui guapo, pero …

                - <Das la mano y agárrente de ...>

         Y esto va trayer como consecuencia la invención d’una lleenda onde un español, un astur, Bernardo del Carpio, va ser l’azote y desprestixu del héroe francés por antonomasia, Roldán. El <Romance de Bernardo del Carpiu> va ser el contrapuntu a <La canción de Roldán>. Yá nun son los vascones navarros y/o aquitanos, yá nun son los árabes los qu’acaben con Roldán y los Doce Pares>, va ser un noble español, asturianu (tábemos, d’aquella, bien consideraos) el que desmitifique al héroe “francu”, foriatu, en Roncesvalles.

       - Esto nun se pue aguantar; si perdemos el control de la Ilesia perdemos al pueblu y les nueses posesiones van dir pasando a manes foriates. ¡Hai qu’acabar con esta plaga!.

Constanza de Borgoña, muyer d'Alfonso VI
ye la que corta'l bacalao.
(Semeya: Wikipedia)

*Bernardo de Sèdirac: Esti espabiláu  monxu beneditín pasó - de la mano de Constanza de Borgoña, muyer d'Alfonso VI - a Abá en Sahagún y depués a Primáu de Toledo consiguiendo que toles dióceis hispanes - Uviéi, Tarraco, LLeón, Palencia -  tuviesen qu'alzar la boina cuando pasaba él. 

Convertíu al Cluny fizo grandes coses na Ilesia instalando dafechu la Reforma Gregoriana y la implantación del Ritu Romanu. A los Papes Gregorio VII, Urbano II y Calixto II túvolos comiendo de la mano. 

** La <invasión francesa> : El "Camín Xacobéu" va propiciar la venida a la España cristiana medieval de numberosos pelegrinos europeos, sobremanera francos, quedándose munchos d'ellos a vivir equí. Los reis hispanos van favorecer con fueros y lleis especiales a la xente foriato. Sancho III  (992-1035) de Pamplona camudó'l pasu del País Vascu pa La Rioh.a, faciéndolu más llevaderu.
Sancho Ramírez (1063) concedei un fueru a Jaca - el primeru y modelu pa otros que llegaríen hasta'l XIV - asitiando a la xente en barrios ( burgos francos) estremaos del restu la población nacional y teniendo muncha consideranza pa con ellos.  Pamplona, Puente la Reina, Estella (Sancho Ramírez en 1090 pon-yos hasta un castiellu). Depués Logroño (1095), Navarrete (1195), Nájera (1020-1076), Santo Domingo (1187), Albelda, Santa Coloma .... La Reforma los clunyacenses nos sieglos X, XI y XII va agabitar lo suyo, sobremanera con Alfonso VI (1048-1109) que paez nun dar un pasu ensin cuntar con ellos. Cuido que Bernardo del Carpiu  tórnase necesariu, tanto pala nobleza como pal pueblu; seguramente por ello esa lleenda caltrió tan ceo y fondero. 

         Pero esto nun se pue presentar asina, hai que da-y una xida camuflada y comprensible pa la xente’l pueblu que va ser la correa tresmisión d’esta inventio; entós llevamos a Bernardo a Roncesvalles y, n’andecha col moru Marsilio de Zaragoza, naturalmente, va derrotar a les güestes franques dimpuestes a conquistar España col preste del Rei Castu (qué poco conocíen a esti Rei) que nun tenía descendencia direuta seique Bernardo fuere sobrín, natural, suyu. Pa la Canción de Roldán esti ye un héroe que muerre en Guerra Santa escontra’l moru; pal Romance de Bernardo del Carpiu Roldán nun ye otro qu’un invasor al que ye preciso derrotar; cola Patria nun se merca.

                                             *********************

             ¿Quién ye entós Bernardo, l’héroe nacional ?

       Bernardo del Carpiu ye una lleenda, una inventio que xurde a finales del XI como contrapuntu al héroe galu, Roldán, a la fin de desmitificar la influyencia franca nes intituciones castellanes: eclesiástiques, polítiques, sociales, culturales ya económiques:

. Los galos ocupaben casi toes les obispalíes . Les abadíes benites tresformáronse en prioratos clunyacenses, ye dicir, francos. De la liturxa mozárabe pasóse a la cluniacense, romana.

. Les ciudaes teníen barrios francos con “réxime especial” y bicoques nos impuestos.

. La población hispana tevo que sufrir l’espilfarru francu nes numberoses fiestes que facíen mientres los nuesos apertábense el cinturón.

. Carlomagno paecía ser l’inventor de Santiago ayudáu pol <Camín xacobéu francés> mui ameyoráu por Alfonso VI, ye verdá con bayura de pontes Hasta s’inventó una fecha pa la inventio (813) – cuando en realidá tuvo que ser hacia 829 – pa xustificar la presencia del Emperador que palmó en 814. El Códiz Calistinus foi’l panfletu propagandísticu por escelencia del Camín de les Estrelles (Vía Lláctia) y de la “invasión” franca. Cantábase d’esti Rei que salvare a España de los moros y hasta llegare a Córdoba na so cruzada (Sí, ho; a tomar fino con Alhakem). Yá sabemos que vino por llana y salió tresquiláu (Roncesvalles 778). Pero los xuglares y romanceros cantaben a lo llargo del Camín Francés les fazañes fabuloses de Carlomagnu, yera una invención, digo una “invasión” en toa regla.

     La otra Batalla Roncesvalles, la segunda y braera, según el Padre Vicente tevo llugar nel valle d’Ibañeta, na parte d’acá los Pirineos el 16 de Xunu de 808 (si pones un unín delantre vien Napoleón:1808). Enfrentaben los exércitos francos comandaos por Roldán, Olivier y Turpin escontra los hispano-árabes al mandu de Marsilio y Bernardo. N’esta batalla foi na que morrieren Roldán y los <12 Pares de Francia> que son consideraos mártiles al cayer en Guerra Santa (pos los enemigos yeren moros). Pa estes feches sí que-y cuadren les edaes de los héroes; yá lo camentamos anantes.

      Coincide cola lleenda en que los enemigos yeren árabes pos son necesarios pa redimir a los mártiles francos pero’l Padre inclui a los cristianos - castellanos, lleoneses ya asturianos – que lluchaben escontra un rei foriatu que quería quedar cola corona d’Asturies dao que’l Rei Alfonso nun tenía descendencia direuta. Equí hai que tirar de los romances al rodiu de Bernardo del Carpiu.

                  ROMANCE (IX) : Bernardo xustifica la so castra

       
          Onde Bernardo xustifica la so castra ya esplicita ente’l Rei que nun ta dispuestu a consentir qu’entregue’l Reinu Astrur a Carlomagnu.

          Los romances de la dómina trabayen bien la idega de la traición del Rei Astur-Lleonés dimpuestu a entregar la Patria a los galos. Esta caltiense nel tiempu y llega hasta Alfonso VI, afrancesáu dafechu, como sabemos. Estos romances son el caldu de cultivu pa que’l pueblu refugue a los foriatos; nos sieglos XI y XII los gavachos tienen el control de les instituciones castellanes tomaes dafechu. La nobleza hispana ta qu’ambura.

                                              

   <Bastardu me llamen, Rei,

siendo fiu de la to hermana,

tu y los tuyos lo dixísteis

pos dungún otru l’osara.

Mas cualisquier que lo diga

miente por toa la barba

que nin padre e traidor

nin mio madre muyer mala

magar que cuando nací

madre yá yera casada

a furto nuna capiella

prerrománica, asturiana.

Bernardo del Carpio pidi al Rei Alfonso
 la lliberación de so padre, el Conde de Saldaña.
(Semeya: Aso. Cult. Trad. Fernando III Santu)

   Metisti a padre ente fierros

y a madre n’Orde bien Santa

y pa que yo nun heriede

quies da-y el to reinu a Francia.

Morrerán los españoles

enantes de ver cosa tala.

    A padre mando que sueltes,

dístime la to pallabra,

y si te vuelves atrás

en campu será demandada,

y si te vuelves atrás

nin la Santina te salva.>

     
    Pa que la idega caltrie nel pueblu ye preciso enfrentar al Rei pero… ¿quién lo va facer?. La nobleza, al traviés de Bernardo, será la encargada d’evitar esta traición; cualquier ocasión e bona restrega-y en focicu al Rey que nun ta d’alcuerdu con delles decisiones suyes y engardirán por cualquier cosa: pol encierru los amantes, pol castiellu del Carpio, pola entrega del Reinu … Prendió rápido nel pueblu, h.artu tamién de "Fueros Francos" y canonxíes pa colos estranxeros. 

                         ROMANCE (X): El Carpiu ye de mio.

       Bernardo ye’l Señor del Castiellu del Carpio, en Salamanca, por una donación del Rei como agradecimientu por sacalu daqué día d’un entueyu. Debía tar un poco celosu del sobrín, qu’últimamente nun lu vasayaba como-y prestare, y decidió que-y devolviere’l regalu:

   < Les cartes y mensaxeros

del rei a Bernardo van

pos quier velu peles Cortes

pa con elli negociar.

Bernardo, que ye mui cuciu,

- roceanu cuantayá-

echa les cartes al fueu

y manda los suyos llamar:

Castiellu del Carpio
(Semeya:(enredando.com)

- Cuatrocientos sois lo míos

los que comedes mio pan;

nunca fuereis repartíos

mas llegó la gran verdá;

yá nun pueo escaecer

el llamáu de Maxestá .

Ciento queden nel castiellu

pal Carpiu poder guardar,

otru cientu a los caminos,

que naide puea pasar;

la metá vendrá conmigo

pa poder col Rei falar.

De doscientos que llevaba

a cientu mandó quedar

a les puertes de palaciu

pa xixilar la ciudá.

Col cientu qu’entá-y quedaba

embreda al Palaciu Real;

cincuenta dexa a la puerta

qu’a naide dexen pasar

y pon trenta na esacalera

palos que vienen y van.

Colos venti que-y quedaben

camienta col Rei falar

y a la entrada de la sala

con elli vieno topar;

la mano-y pidiere al Rei

mas nun-y la quixo dar:

- Dios vos guarde, mio bon Rei,

y a la compaña real.

- Bernardo,

en mala hora viniste

traidor, fiu d’otru tal;

doite yo El Carpio en tenencia

y tómeslu por heredá.

- Mentides, bon rei, mentides,

que nun dicís la verdá,

enxamás fui traidor

nin nunca se vio otru tal.

Alcordáivos d’aquel día,

el día del alcinal,

cuando dellos enemigos

vos pretendíen matar.

¿ Nun foi Bernardo, el traidor,

el que foi a agabitar?.

El Carpiu entonces me disteis

por xuru y por heredá,

y tamién me prometísteis

pa padre la llibertá.

< Pa colate nel castiellu
precisarás d'esta llave,
esperando ta Bernardo
que lu lleves con so padre.>

- Prendé-ylu, mios caballeros,

qu’igualado se me ha.

Tol mundu mira pal conde

mas naide se-y va allegar

pol respetu que-y tienen

y pola orde que da:

- Equí, los mios caballeros,

los que comedes mio pan,

llegó’l día de la honra

que lo habedes de ganar.

Y desenvainen la espada

los venti que con él tán.

Viendo’l Rei lo nunca visto

procurólu d’amansiar:

- Males mañes, has, sobrín

¿nun les pues quiciá olvidar?

Lo que te dicen de burlla

tómeslo talo verdá.

- Eses burlles, mio bon Rei,

nun son burlles de burllar.

El castiellu ye de mio,

naide me lu puede dar;

quien quitámelu quixera

cuido-ylo sabré torgar.>

                               El  castiellu del Carpio  

(Semeya:blogspot.com)

              El Carpio-Bernardo ye un pueblu d'unos 35 habitantes asitiaú nuna llomba de la ribera del Tormes y perteneciente al municipiu de Villagonzalo, nos Campos de Salamanca. 
Tien orixe castreñu y tevo moráu polos romanos dao que queda a la vera la vía: Salmantica-Alvia (Alba de T). 
Sicasí'l so orixe actual pue considerase medieval y llexendariu puesto que'l so nome algama sonadía desque fuere habitáu pol míticu Bernardo, caballeru que lo fuere de los reis Alfonso'l Castu ya Alfonso'l Magnu  a mediaos del sieglu IX. Lo que paez seguro - falando llexendariamente - ye que fuere una donación real por agabitar escontra'l sarracenu. Cuido tamién como seguro que'l Rei pretendió quitá-ylu por enfrentar a él, ¿pola farda de so padre? ... 
       El Carpiu cayó en manes árabes siendo repobláu depués por Ramiro II (939) y más tarde  por Alfonso IX (1188-1230). En 1465 pertenecía a la corona de Castilla y foi donáu a García Álvarez de Toledo, primer duque d'Alba de Tormes. El castiellu del Carpiu foi esniciáu polos Reis Católicos col envís d'vitar les rebeliones nobiliaries, como dellos más, ¡pena!. 


                  ***************************

    Bernardo enfrenta “a cara perru” al Rei. Esto ye lo que van resaltar los romances, esto ye lo qu’interesa a la nobleza relegada, la que quier recuperar los sos privilexos (¡fora foriatos!). Al pueblu présta-y como'l carambelu, siéntese importante al ver cómo ún de los de so – los mitos son del pueblu - saca la cabeza ente la inxusticia (probes …). Los romances y cantares de xesta cantábense nes places de los pueblos y nos castiellos, tarrén controlao pola ablayada nobleza condal que nagua por desmitificar al mitu francés, Roldán, al traviés de Bernardo. Ensiguida lu veremos en Roncesvalles onde acaba con él dafechu. Ehí onde los francos ven un héroe traicionáu, y rematáu pola Media Lluna, los hispanos van alcontrar la lliberación gala aconchabando con otros collacios foriatos, los mesmos árabes ( na guerra val too, polo visto).

       La LLEENDA del MITU del CARPIU caltúvose NEL TIEMPU pasando del Reináu d’Alfonso II (791- 842) , la xida, hasta Alfonso III el Magnu (866-910) col que fina:

           
         - <¡Llarga vida al héroe!>.

Alfonso III y Ximena
(LLibru de los Testamentos)

         Bernardo, aburríu de lluchar escontra los enemigos del Castu y d’esperar vanamente la redención de so padre, termina colando pa Francia p’agabitar a Carlomagu tres dellos años analayando per España. Cuando torna, vieyu y cansu, presenta énte’l Rei, agora Alfonso III ( yá pasaren entemedies los reinaos de Ramiro y Ordoño) pero tien el mesmu ésitu que col tocayu.

          Sicasí la lleenda de Bernardo carez d'inconsistencia al falta-y esi  pruyiciu de veracidá contrastada como pasa col Cid, el so gran oponente mitilóxicu. Al castellanu presúmense-y munches fazañes fabuloses pero siempres tinenen un rispiu de verdá, sofítense nuna base real.
       El Carpiu ñaz de personaxes posibles pero que nun tán reconocíos históricamente. Les sos fazañes allárguense nel tiempu de manera tala que'l personax pierde credibilidá, ye dificil qu'un home medieval dure tantu tiempu quedando d'èl namás les lleendes  qu'otramiente son contradictories:
lo mesmo s'engafienta con Alfonso II (791-842) que col Terceru (866-910) por cuenta la lliberación de so padre o pola toma del castiellu que-y da nome, el Carpiu. Primero acaba con Roldán en Roncesvalles y depués ye la mano diestra d'un Carlomagnu que finare munchos años atrás y más tarde pasa ser l'héroe del Magnu Alfonso III - al qu'agabitó nuna nueva invasión franca (?) - derrotando nun épicu "mano a mano" al francés Don Bueso. ¿En qué quedamos?... ¿Ye un patriota o un mercenariu?... ¿Un home estraordinariu de carne y güesu o una inventio catalizada pola clas nobiliario-castellana pa desprestixar a los francos? ...
       Per otru llau alcontramos de Bernardo dalquna qu'otra contra-lleenda o lleenda paralela - franceses - que fai a esti héroe entá más mudable:
     . Per un llau una que parte de Berta, la hermana de Carlomagno, que tien a Roldán d'amores impropios siendo los amantes desterraos pero .... La imaxinación popular llibera a Berta casándola con Alfonso II, el Castu. De lo que paecía ser un castigu xurdió un ñarvatu: Bernardo, hermanascu de Roldán al que terminaría derrotando en Roncesvalles (Hala, los malos nosotros).
     . Otramiente cuenta la "Primer Crónica Xeneral" d'Alfonso X el Sabiu que tamién se faló d'un Bernardo fíu de Timbor, hermana de Carlomagnu* (otra que-y salió rana), que quedare preñada de Sancho de Saldaña cuando taba faciendo'l Camín Xacobéu... (esti Sancho ....).

                         ROMANCE  (XI) 

Voluntarios playos, pa lo que pinte.

< Vien Bernardo d'asturiana,
 non de la franca Timbor,
so padre ye de Saldaña
que con Ximena casó. 
La bretona ye un inventu
como'l tal de Ganelón;
estos bilordios foriatos
nun los creyemos, non, non. 
     Mas que venga cuando quiera
la francesa per Xixón,
yá sabremos compensala
nesos asuntos d'Amor>
 

         Santiago ñació por una necesidá histórica; España presisaba d'un abanderáu que la guiara'l pueblu escontra l'invasor árabe: Santiago Matamoros. Bernardo xurdió por otra necesidá histórica: La invasión francesa clunyacense y/o carolinxa, algo que la nobleza castellana nun podía permitise so pena de quedar desasitiada.

* ¿Cuántos sobrinos, hermanes y esposes se-y atribúin a Carlomagnu?... ¿En cuántos fechos fabulosos tevo implicáu? ... Foi un gran guerreru ya estadista pero tampoco nun necesita vese enllordiáu en cualisquier célebre hestoria medieval.

                                   *****************************

   

 ROMANCE (XII), cuando Bernardo torga'l pasu a Carlomago

< Colos meyores d'Asturies
 sal de Lleón don Bernardo
puestos a puntu de guerra
a torgar a Francia el pasu
que vien pa quedar col Reinu
 tres la llamada del Castu,
como si nun hubiere nél
quien meyor pueda heredalu.

Bernardo sal del Carpiu colos meyores caballeros
- los de la ASOCIACIÓN BERNARDO DEL CARPIO -
a torgar el pasu a Carlomagno. Ansí s'enseña la hestoria
a los neños , calteniendo les TRADICIONES.
El mio caldiu APLAUSU. 

   Los llabradores azoten
de les manes los araos,
les foces y les fesories,
los pastores los cayaos,
los mozos, alta gayola,
los vieyos esprecetaos;
tán les ciudaes valeres,
y los pueblos despoblaos,
toos a Bernardo acuden
¡llibertá! apellidando.
     Cuando van colar del Reinu,
nuna llombina del llanu,
mientres faen una parada
alza la voz el del Carpiu:
   -Escucháime lleoneses,
castellanos y asturianos,
de padres llibres nacisteis,
presumís de fiyosdalgos
y pagáis lo que debéis
al bon Rei Alfonso'l Castu;

mas nun quiera Dios del cielu,
que por chanchullos d'estraños,
obliguéis los vuesos fíos
a pasar, madiós, pol aru.
    Colos meyores d'Asturies
sal el valiente Bernardo
nel so caballu morcillu
a Durandal narboliando:
   - Siguíime, los fiyosdalgos,
lleoneses, asturianos
y castellanos que trotien
¡llibertá! apellidando.>

¡El Mocín!
(Semeya: blogspot.com)

         En RESUME:  Yo creo en Bernardo del Carpiu porque quiero creyer, porque ye un héroe talo otros de la mio infancia como'l Capitán Trueno o Roberto Alcázar o Pinín de Telva .... Toos ellos fueron collacios inseparables naquellos irrepetibles (meyor ansí) años de la Posguerra. ¿Cómo daqué tan prestoso que formaba parte del mio pruyir cotidianu pue nun ser real cuando adebecía cada selmana la entrega de la siguiente fazaña? ... 
Yo creo en Bernardo del Carpio porque me ta faciendo revivir la Hestoria d'Asturies, porque m'avienta a la dómina de la granible y trescendental Monarquía Asturiana, porque pola mor d'elli voi, a la fin, visitar la olivada Aguilar de Campoo. 
Yo toi - talo Lope - col Bernardo castellanu-astur-lleonés: el B. que ñaz de puru amor, el B. qu'enfrenta al Rei por mor del padre y hasta'l B. patriota que s'encuma en Roncesvalles; el Bernardo afrancesáu que lu camienten ellos.
     Yo, talo Bernardo, imploro al Rei, miago pol perdón de los pecaos (incluyendo los mios) de tolos prtagonistes d'esta hestoria  :

                        ROMANCE (XIII)                              

            < Si erros foron los suyos,
            bien de fierros-y cargasti;
            que los que son por AMOR
            algamen perdón de baldre.>


    ESTIMANCES:

Asina ven les aigles la villa d'AGUILAR  de  CAMPOO

. Páxina web del Ayuntamientu d'Aguilar y a la Oficina de Turismu, xente bien amable que nos apurrió bayurosa información tanto del pueblu como de la redolada. 
. A la <Asociación del Carpio Bernardo>, un pueblín de Salamanca que sigue calteniendo la llapa del mitu y esperamos poder visitar daqué día, cuando s'axunten pa festexalo. D'ellos tomamos el logu y alguna semeya. 
. A la Fundación Santa María la Real pol so llabor y llucha a favor del padremoñu d'Aguilar de Campoo. 
. A  la Asociación <ARCO>, amigos del patrimoniu d'Aguilar de Campoo.
. A la wikipedia, como siempres y al <condadodecastilla.es>, veneros inescosables.
. <B.www.blogspot.com> aportónos delles semeyes talo que : "El Diario palentino", Fundación Santa  María la Real, ..
. Al Padre Vicente, que si dalgún erru cometiere queda salváu pol so amor a la hestoria y al nuesu héroe astur-nacional (Ego te absolvo a pecatis tuis).
. Al supercicuta  (César GdC) que me punxo na pista sobro "¿la verdá?" del mocín per aciu del historiador Ramón d'Abadal y darréu a Luis Rubio García, xente serio y estudiao (pero qu'a min matóme pos taba namoráu la inventio, Ximena). 
. A la Posada de Santa María la Real onde tuviemos un recibimientu bien cancial.
. Al guía que nos esplicó la hestoria del Monesteriu con una ardiente pasión. t
. A GALLETES GULLÓN, que tevo a bien aromatizanos el viax de vuelta colos regalos que nos aportare si bien llevábemos presentes pa tola familia. Gracies.