¡¡PEÑAFERRUZ , qué guapo yes!!
%20-%20Wp.-%20OIP.jpg)
...........................................................................................................................................
 |
| ¿Pasamos al castiellu? |
<< Camín de les Brañes de CURIEL >>
Tengo un washap nel móvil. Ye'l mio amigu Vettel:
- << Mañana RUTA: Peñaferruz. Llugar de Salida: Fábrica de PRENOR; xunto l'autovía Xixón-Uviéu >>.
Cuasi siempre salimos a caleyar xuntos los domingos pero pola mor del tiempu y les llaceries familiares va pa trés meses que nun aconceyamos. Yá nos tarrez.
- << Hola, gallu. ¿Tas preparáu pa mañana domingu? Quedamos a les 10:30 delantre la fábrica prefabricaos de formigón. Tómase la Salida-13 dende l'autovía AS- 2: Pruvia d'Abaxo >>.
- << OK. ¿ Por qué nun me mandes un enllaz de la salida? N'interné namás alcuentro una ruta de 30 Km....¿¿ ...?? >>
- << Val. Ehí te va un track, como dices tu, o daqué asemeyao. (Alcordéme y miré en diccionariu track: rastru, güelga, pista, rodada) >> Entiendo lo que quier dicir. Apúrro-y esta ayalga.
 |
| Track del Valle de Peñaferruz |
 |
| Dambes Guíes FMC |
Otra bona parte son semeyes sacaes del llibru "Peñaferruz (Gijón). El castillo de Curiel y su territorio" autoriáu por José Avelino Gutiérrez González ya editáu por VTP . Nun fai falta dicir qu' aquello de "sabio" que podamos aportar ta sacao dambos testos.
 |
| VTP |
- << Bien. Finalmente van a la ruta : A, P ( la muyer de so ), Vettel (M), R y G ( aprovecho pa camentar que son los pas del contertuliu) . Llevaré la radio.....y el minitelevisor.....asina como les piles correspondientes. Y pa calentamientu ehí te mando unos torinos d'Osborne y una semeya de Swet California. Que duermas bien, xampión >>
Ye la mañana'l domingu y, pa espertar, yá recibo unos washaps colos bóvidos correspondientes... Son l'aniciu la ruta... Coyemos pan en Vega y, serpentiando delles carreteres, prindamos la A-2 per aciu la retonda d'Alcampo. Tomamos la salida 13 - Pruvia d'Arriba , non d'Abaxo - y pel ramal de la derecha empobinamos dica Carbainos aparcando cómodamente frente a PRENOR.
 |
| ¿Asustaos?...Venga, ho; que nun hai pantasmes nel castiellu... |
La ruta prevista na Guía de la FMC - al valle de Peñaferruz - ye d'Ida y Vuelta y en forma de Y, pero nós preferimos camudala por una circular (O) pa nun repetir lo visto; ye más prestoso.
Carretera - carretera y llegamos a un cruz onde alcontramos una casería típica, talo se va repetir a la llargo del camín: Casa, cuadra, horru (2), güertu y praos....Antiguo había un potru pa ferrar el ganao - los tractores d'antaño - que nós recordamos por curiosidá:
 |
| Potru pa "calzar" el ganao |
Poco teníemos andao y ensiguidina decatámosnos de la bayura lloréu qu'había. Taba amás bien xorrecío... ¡ Unes ganes de floriar !... Claro, con esti tiempu que vieno....Entá nun cayere una puñetera xelada... ¿Y aquellos carámpanos? ... ¿Y aquelles nevaes?... (( Poco antes de colgar esta salida la Tele ta amosándonos les primeres nevaes...¡toma! ))
. Arbustu plani-perenni-foliu - pue alcanzar hasta los 15 m - de fueya coriáceo (duro) y llanceolao imprescindible na cocina: ¿Pues imaxinate unes llenteyes ensin una fueya lloréu?... Eso sí, << si'l lloréu te cai en platu yá nun cases esi añu >>.
. Los machos y les femes - llorea - suelen tar en pie distintu, asina que son dioicos, pero puen presentase tamién con flores hermafrodites: Un sóledu pie ya una flor con estames y pistilos. Coses de la natura..... . Florez al finar l'iviernu o l'entamu la primavera y los frutos ovales - lluribaga - van camudando dende tonos verdinos hasta'l negru.
. Tien enemigos: Amás del fríu intensu - ¡el clima calentín, eh! - un himenópteru, la Trioza alacris, produz-y un bogayu que nun lu dexa espoxigar en condiciones.
Como nun podía ser menos nes fiestes navidiegues nun faltaba nes cases el brinde a Papá Nöel...
 |
| En plenu asaltu al castiellu... |
 |
| ¿Qué esperes pa siguime?... |
El " Camín de les Brañes de Curiel" ha llevanos a un castiellu, que ye la farda d'esta salida. Yá teníemos conocencia que na parroquia Peñaferruz hebo un castru, o daqué asemeyao, n'otra dómina. Y como nós entá nun tenemos superao esti pruyimientu medieval infantil polos castiellos - que culpa tien ún de tener medrao al empar que Robin Hood nel cine - alcontramos la farda pefeuta.
Nun diéremos cuatro pasos y al chisbar nuna facienda quedamos sorprendíos con esta casa mariñana, (¡esto entama bien!):
 |
| "Mariñana": Asina la viemos.. |
 | ||
| "Mariñana": Asina presta más |
La casa mariñana ye una construcción típica asturiana, mui presente ente los sieglos XVI y XIX, de la zona mariniega y les llaneres inteiores: Xixón, Uviéu, Siero, Llanera, Noreña, Les Regueres y, con delles variantes, en Villaviciosa.
Esta casina, orientada al sur o este, tien una planta rectangular, cuasi cuadrada, de unos 100 m/2 de superficie ya una cubierta a dos agües.
Aparte los muros esteriores tien otros dos muros maestros interiores perpendiculares ente sí que determinen la distribución de la casa. Esta parte d'un portalón - centru de rellaciones sociales - nel mediu la fachada principal que tien a dambos llaos los "cuartos d'afuera" con unos ventanos que tal paecen los güeyos de la casa. Nel fondu'l portal ábrense dos puertes: a manzarga la corte, con una tenada enriba, y a mandrecha la cocina, que pue tar compartimientada por tabla o cebatu en mediocasa - un caxón de xastre - y dalgún cuartu más.
 |
| Casa de "Portalón" |
1. Portalón
2. Cocina
3. Mediocasa
4. Cuadra (corte)
5/6.Cuartos
La "casa de portalón" ye talo la mariñana sacante los cuartos d'afuera que na mariñana tan dientro los muros maestros mentanto que na de portalón queden fuera, vamos que tan amestaos, como esta que vemos nel dibuxu d'arriba.
Andando un poco damos con esti "trastu" perteneciente a "Distribuciones G". Va unos años foi una esplotación caballar, con picaderu y too: "Quelle donmage!" .
 |
| Más a gusto me vería con dalgo "chapa y pintura" |
 |
| Ponis d'angüaño, praos d'antaño. |
 |
| Perguapa casona |
Hai qu'entamilgase n'aquella picalina a como dea llugar...L'Olimpu los dioses de Cenero....
 |
| Guardando lo sagrao... |
El CARBAYU ( Quercus robur ) ye un árbol fuerte (robur) tocante a lo duro la madera, planicaducifoliu y monoicu (flores machu y fema nel mesmu pie pero por separao) . Convién estremalu d'otru bien asemeyáu, el Roble albar ( Quercus petrea) que se da en zones más altes. Diferencia básica ye la fueya, que nel petrea tien un peciolu (rabu) llargu pero les abeyotes, al revés, tán sentaes (ensin rabu).
 |
| Carbayu: fueya sésil (sin peciolu), abellota peciolada. |
Algamamos a lo fondero'l camín onde cuerre'l Regueru Lamiana que desagua nel Ríu Peñaferruz.
Vemos esti cartelu :
 |
| Entama l'ascensión al Olimpu... |
 | |
| Pindio, pindio... pero afayadizo. |
Ye la cara norte de La Pica. Ta fresco. A mandrecha dannos la bienvenía unos cuantos exemplares de pinu gallegu o marítimu (Pinus pinaster) que se carautericen por tener la fueya aciculao, llargo, d'unos 10 a 15 cm que se presenta en grupos de dos ( talo que'l Pinus Sylvestris o Pinu Albar ), pero n'esti les acícules nun suelen pasar de 7 cm.). Ye un árbol monóicu con flores en conos machos y femes por separao. Nagua polos suelos fondos y arenosos asina que nes dunes siéntense como en casa.
 |
| Pinu gallegu (P. pinaster) con procesionaria. |
<< - Mira, collaciu. Ehí pasen unos caminantes...Deben tar dando un vueltu pela redolada.
. Pa min que van a la cata'l castiellu. Dalgo-yos quixi sentir... Que pel camín de Curiel tenía que llegase al antiguu castiellu...
- Anden roceanos. Nun mos ponen bona cara...
. Como cuasi tol mundu...Considérennos una especie invasora. Ehí queda éso. Talo que viniéremos con pistola...
- ¿Y ye nuesa la farda ?... Si nun gastaren tantu papel nin tuvieren necesitao tanta madera igual el capitán Cook nun nos importare dende Australia. Nosotros tábemos ellí como dios.
. Dígotelo yo. Abusen de nós y dempués despréciennos, nun te h.ode.
- Nun nos quieren nin los propios colegues de profesión, los árboles autóctonos. Dicen qu'acabamos con ellos, que si-yos robamos la comida, que si-yos quitamos el sol...
. Sí, ho....L'otru día sentí a ún llamame : "¡ Chupón! ¡ Garet Bale!"
 |
| Fueya y frutu en cáusula del ocalitu. |
- Y a min otru espetóme: " ¡Llambión!", que te zampes lo más rico del tarrén...".
. Y pa encima critíquennos porque nun reciclamos.
- ¿Y qué culpa tenemos nós? Escaeciérense d'importar tamién daqué gorgoxu que nos descompón...El Gonipterus Scutellatus, por exemplu.
. Home, ho...Esi precisamente que nos dexa tan debilitaos...
- Nun sé que ye peor, si tar febles o tar aisllaos. Nosotros quixéremos faer viesca con ellos, pero nun somos a quien..
. Yá verás; estos terminen por desaniciamos. ¡Colo a gustu que se vive n'Asturies!
- Vamos ver quién-yos cura los catarros...
. Gracies a nós podéis daprender en llibros como esti - diz amirando al caminante.
 |
| El llibru del caminante |
Vien una llugaina d'aire fresco y failos abangase, como pa despidise...¿ O tan pidiendo perdón? . Nós facémos-yos una semeya - que tamién son fíos de Dios - y tiramos cuesta arriba.
Como nun podía ser d'otra manera díbemos saludando les perguapes árgumes: toxos (Ulex europeus) y brecines (Calluna vulgaris...) o Daboecia cantábrica - cola so flor fucsia y la fueyina planifolio - qu'alcontrábemos pel camín.
 |
| Arguma zarrando pumarada. Al fondu ocalitos |
Tropezamos con una señora que taba echando de comer a les pites. Charramos un poco terminó cuntándnos:
-" L'otru día tuvieren per equí una pareya y pidieren permisu en ca "Pica Sergio" pa entamilgar no cimero un belén, el Belén de Cumes, entendí.
 |
| Camín de " Pica Sergio" |
Dixeren pertenecer a nun sé qué Asociación; bueno trailo'l papel que dexaren al par de les figures. Víense percontentos por aciu del antiguu castiellu qu'hebo ellí va cuantayá.
Pero nun yera plan pidir permisu otra vegada, asina que tornamos a baxar mientres camentábemos...
Los que tuvieren la selmana pasada colocando el Belén de Cumes fuimos nòs. Pa que quede constancia apurrimos esta semeya :
 |
| "Belén de Cumes" nel castiellu La Pica Sergio (Peñaferruz) |
- ¿Cuándo se fizo esi castiellu? ¿Quién lu llevantó?
. Ye un castiellu medieval. Acordies coles escavaciones arqueolóxiques realizaes tien nicios de tar fechu durante'l reináu d' Alfonso III el Magnu, el caberu rei de la monarquía asturiana (866-910). Depués los fíos treslladaron la corte a Lleón pa poder avanzar cola Reconquista (alcordáivos que fuimos invadíos polos árabes nun diba tanto). Hebo delles fases constructives ya ocupacionales, siendo les más pergüeyoses les tres primeres.
- ¿Qué misión tenía?
. Xixilar dalguna posible incursión dende'l sur, yá que al tar alto y bien asitiáu teníase una estensa visión de la llanera.
 | |
| (F-1) Vettel xixilando la llanera: "¿Habrá pizza pa xintar? " |
- ¿Quién lu mandaba, dalgún conde?
* Non. Había un tenente - non teniente, ¿eh? - nomáu por Rei que s'encargaba tamién d'emponer xusticia y recaudar los impuestos, que repartía a medies col xefe. Pero nun yera l'amu les tierres.
- ¿Cuando dexó de ser importante esti fuerte?
* A finales del sieglu XIII, al crear les poles de Xixón y Siero les tenencies quedaren desfasaes por aciu del nuevu sistema alministrativu, los alfoces: varies tenencies rurales dependíen d'una villa. La nuesa Xixón, a la que s'algamaba pel Antiguu Camín de la Villa.
- ¿Yera guapu'l castiellu? ¿ Paezse al de los templarios de Ponferrada?
* ¡Que va, ho!. Na que ver...Yera un castiellu primitivu qu'asemeyaba más a un castru. Mira, taba entamilgáu n'aquella pica y de mano tuvieren qu'allanar hasta dexalo afayadizo. Nada fácil, teniendo en cuenta que se trata de roca madre caliar...
- ¡Coimes!, qué manera trabayar...¿Qué forma tenía'l castiellu, ho?
* Yera agüeváu. Tenía una muralla pergorda con una entrada pela facha sur protexida por una torre.
 |
| Recreación F-1 (Inventa Multimedia) |
- ¿ Y cómo sedría per dientro?
* Pos teníen la zona doméstica, el llar, onde cocinaben y dormíen. Taba la fragua, onde se trabayaba'l metal y, bien cerca, un fornu o caleru qu'emplegaríen tanto pa la metalurxa como pa iguar l'argamasa que precisaben pa construyir muros, suelos...
 |
| ENSIDESA & PRENOR na Edá Media |
- Oye, y si los arrodiaben durante munchu tiempu ¿qué bebíen?
* ¡Ai, amiguín!. Teníenlo too previsto. ¿Nun sabes que s'alcontraron los restos d'un barcal o cisterna?
- ¿ Un barcal? Oye, nun barcal ye onde se bañaba mio güela cuando neña; pero esclarávense metanes el llar, que taba más calentino...
* Sí, tamién. Pero esti yera enforma más grande y taba escaváu na roca, talo qu'un pozu artesianu, pola mor d'un sumidoriu soterrañu...
- ¡Vaya chorra!
* Y que lo digas, pero nun ye tan raro. Si vas al castru La Campa Torres entá pues ver en perfeutu usu un par de pozos enllenos d'agua.
 | |
| Xarru caseru gastáu en Cenero |
 |
| Febiella de llatón qu'una chula de Cenero
llucía nel cinturón. |
. Pos sí, mocín, comién mariscu...y tamién pescao fresco; que bien cerquino teníen el cai de Xixón.
- ¿ Y sábese qué especies saborguiaben ?
. Los moxones (mexillones), ostres, llámpares, berberechos y amasueles (almexes) taben al orde del día...
 |
| ¿Pota pa cocer oricios? ..... |
- ¿ Y los centollos tamién?
. D'esos nun tenemos niciu... Igual ye que comíen hasta'l cascu... Pero'l de los oricios non.
- Igual ye que se pinchaben... ¿Tomaríenlos con sidra?
.Ye de suponer; yá sabes que los asturianos ñacemos cola botellina embaxo'l brazu...
 |
| F-2 : Turruxón al Sur - Nueva entrada W |
. Yeren poco vexetarianos. Eso de la güerta... Nun paez que la fabada y los arbeyos fueren platos celebraos.
- ¡Entós yeren de los míos! ¡ Viva Peñaferruz! ¿Gustába-yos la "pizza"?
. Ensin tomate pue ser, qu'entá andaba per América. Pero teníen cereal pa faer la masa y llechi pal quesu, y xamón... La dieta, en xeneral, yera proteínica: carne, sobre manera; y tamién moluscos, como yá sabes, y pescao. La carne provenía tanto d'animales domésticos, talo que'l gochu, la vaca y sobre too de cabra y oveya, como de la caza: corzu o xabalín y delles aves.
 |
| Vettel aidando so madre a tresnar unos oricios.. |
. To madre equí taba "como en ca güelu". De mano congriu, dorada , besugu...
- ¿ A la "espalda"?
. De xuru. Dempués pasaren a la merluza, chopa, xargu o roballiza (¡llubina a la plancha!)... Bueno, vamos dexalo porque al que ta entrándo-y la fame ye a min. Y yá toi pal postre.
- ¡Ah!, ¿ pero tomaben postre tamién?
. ¡Entós! ¿Nun había fruta a esgaya?... Mazanes, castañes, ablanes, zreces...
- Nun me da más; si fuere quesu...
. Si ye lo que te prui... Has decatate qu' una de les ocupaciones cabezaleres que tuvieren tola vida foi llindiar oveyes, cabres y vaques (tovía pasa angüaño); asina que'l quesu taba gartantizáu, digo yo... O polo menos cuayá, que con un poco miel ta pistonudo.
Siguimos falando un cachu y vimos un páxaru ferregüeyando la zona.
- Si tuviéremos un arcu, ¿eh? ¿Ves esi ratoneru?
. Yà tas metíu en farina, ¿ eh, rapaz?
 |
| Mariñanes... |
Asoleyándose al par de la casina había unes oveyes merines: pallabra d'espertu mariñán.
 |
| Oveyes merines, el petite del mundu enteru... |
De la so importancia dan fe la bayura de cañaes reales - anchos caminos - per onde tienen treshumao. Una d'elles, la "Cañada Real Vizcaina o de La Plata", ta rellacionada col castiellu protagonista d'esta hestoria: Entama n' Asturies y fina en Trujillo (Cáceres). Yá sabemos que'l Castiellu de Curiel ta llevantáu col envís de protexer la Vía la Plata.
 |
| Guardianes del castiellu. ¡Pa pasar !.... |
Siguimos pali-pali tomando la carretera del W, la que nos va llevar a l' autovía . Dexamos atrás paneres como esta:
 |
| Horru y panera, en Cenero lo que quieras. |
 |
| Paisanu en peligru...¿Ónde ta'l fíu?...Onde'l míu.. |
La zona rural caltiense gracies, sobre too, a los paisaninos... .¿Y cuàndo nun temos?...¿Apechugarán?... Por mira, agora que llega Trump... Igual, igual...
Llaneando, más o menos, y dexando a manzorga les casines de Peña Melicia dimos cola Fonte, un requexu afayadizu onde tienen entamilgada una mesa -¡qué idees tienen los de Cenero!- qu'ha servinos pa xintar un pocu más tarde.
Como'l entamu la ruta nun taba lloñe y teníemos tiempu a esgaya tomamos el determín de xubir una llomba a la manzorga que, pasando pela Llosa, llévate camín de La Barganiza (Siero) onde s'alcuentra'l célebre Real Club de Golf. Bien cerca tán tamién les tierres de Llanera.
 |
| Ferregüeyando Peñaferruz |
Tamos nun puntu d'amestura de conceyos. Bien cerca tuviemos los túmulos de Peñadrada, mas nada nun sabíemos. Pero alcontramos esta quintana protexida por un texu. ¿Casualidá?.
 |
| Camentando nel pasáu....¿Señaldá? |
 |
| "En Ceneru, madura'l tomate en Xineru" |
¿conoces dalgo meyor que la xinta un bocadillu?
 |
| Hasta Canelo nagua en Cenero |
 |
| Nel barriu La Teyera: PRENOR |
Percontentos del día tan guapu que pasáremos - y na esperanza que'l Sporting ganare como tolos domingos - agarramos la puerte y colamos:
Esta ye, anguaño, la puerta de los suaños... del Castiellu.
 |
| ¡Fasta ceo, Cenero! |
