<¡Bon Camín! [1] El Camín Primitivu: Uviéu - Grao >

 
         << El Camìn Primitivu:Uviéu - Santiago de Compostela>>
                         
                              ¡Bon Camín! [1] :Uviéu - Grau (26 km) >>

¡Bon Camín, pelegrines!

                                                     <<   Dos pelegrines van
                                                         caminín de Compostela,
                                                         sintieron daquién falar 
                                                         de Xacobu, allá en Galecia
                                                         y ensin pensalo más
                                                         agarraren la fardela.
                                                            Tres pidir na Catedral 
                                                         al Salvador, so tutela, 
                                                         empobinaren camín 
                                                         de Lloriana y La Balsera 
                                                         por fer la primer estaya 
                                                         qu'en Grau va tener la Meta. 
                                                            Muncho queda per delantre
                                                         p'algamar la Xacobea
                                                         mas esta tala ilusión 
                                                         cuido tendrá recompensa >>
  
      Cuando entamamos un Camìn por estayes de primeres, mientres nos asitiamos, echamos dellos díes runciando alredor del puntu de salida, conocelo bien, como si precisáramos iguar bien la basa onde se va sofitar el restu la obra, nesti casu <El Camín>. Ye como una rocea por mor d'equivocanos, de nun fer les coses bien o como si nun llegáremos a creyer que tal cosa sía posible. Arriendes d'ello sentimos escitación, ansiedá por conocer, ganes d'aprender... Rixu.
       P'algamar hasta Grau tenemos per delantre unos 26 km pero nun vamos facelos d'una tacada, qué va... Vamos repartilos en ¡cinco estayes! : La Florida- Lloriana- L'Escampleru- Premoño y Grao. Hai que tener en cuenta que estes etapuques son d'ida y vuelta, quier dicir que la primer estapa -ente ida y vuelta - va quedar en 52 kilómetros, polo menos...

                                           UVIÉU - LLORIANA
 

CAMÍN  PRIMITIVU: Mapa del probable percorríu que fexo Alfonso II, el Castu, nel sieglu IX.
(SEMEYA facilitada por EROSKI CONSUMER, gracies)

         Cuando nos entamos del sieglu IX l'obispu d'Iria Flavia, Teodomiro, comunicó al so Rei Alfonso II el Castu qu'un anacoreta descubriere en Campus Stellae 'l probable sepulcru del Apóstol Santiago esti nun tardó un res en iguar un viax pa confirmalo y dar fe d'ello. Esa caminada ente Uviéu y Compostela ye lo que conocemos por <Camín Primitivu>. Y esti paseín ye'l que queremos facer nós siguiendo los pasos d'aquel míticu Rei, alma y principiu del Reinu d'Asturies.
                                       ¡¡¡ Viva'l  Rei  Alfonso !!!
       Pa tramar una caminada de más de trescientos kilómetros hai que tener un plan y nosotros vamos llevar la traza que propón <EROSKI CONSUMER> asina como un cartulariu, una crónica de "La Peregrina", la  <Crónica d'Alana > d'Isabel San Sebastián que nos va dir amosando los pasos a siguir y la que vamos dir interpretando na nuesa llingua, la LLINGUA ASTURIANA, más afayaiza pa los nuesos propósitos (¿tengo'l so perdón, Doña Isabel?).
.  Hai delles cróniques más nes que nos vamos sofitar, sobre manera <El Camín Primitivu> de Xurde Morán, un finxu de la cultura asturiana en xeneral y de la caleyera - tal como yo la siento - en particular; los demás yá lo diremos comunicando pasu ente pasu.
(Más tarde vendrá <<www.guiavisualdelcaminprimitivu>> del eternu pelegrín Miguel Hernández)

Charrando con Xacobu, n'Uviéu,
 al que piensa visitar en Compostela.
(Semeya descontestualizada)

    Tábemos arranaos por emprentar esti Camín y por fin llegó'l día. Lo normal ye salir de la Catedral y tirar dica San Llázaru Paniceres - barriu les afueres (4,6 km) -  pasando pela Florida onde s'alcuentra la estatua'l pelegrín, una escultura de Pilar Fdez Carballedo asitiada nuna rotonda, cerca'l parque del barriu.
    - Asina que vamos dar un vuelta per Uviéu.
    - Sí, la mayor parte yá lo conocemos por mor del <Camín de Niria>: Schultz, San Xuan, Xovellanos, La Lluna, Cuadonga, Melquiades Álvarez, Independencia, les Torres de Cervantes, La Llosa, Samuel Sánchez, L'Argañosa, eñ cruce les víes de la FEVE y... el primer moyón del Camín a (2,6 km). Per Bermudo I llegamos a José Mª Fdez y darréu a La Florida. Yá pela cai Muros del Nalón empobinamos dica San Llázau Paniceres (4,6 km).
    - Menudes vueltes p'algamar a La LLosa, ¿nun podemos tirar pela Cai Uría, y yá ta?
    - Sí, podemos, y amás la cai Uría ye'l centru comercial y a min traime perbonos recuerdos de cuando neñu, y d'estudiante. Pero'l Camín ye'l Camín y nun ta demás axustase un poco a los patrones.  ¿Acuéi?
   - Andando, entós. (Y andando. Yá sabésis quien tien siempre la última pallabra)

La CRUZ de SANTIAGO

<El Principiu y el fin>
La Cruz de la Victoria nel entamu
y la Cruz de Xacobu pal  final;
el coral d'una madre nel recuerdu , una mano
 qu'al mio neñu  protexere de  tou mal.
Son les armes qu'emplego, pelegrín 
del Camín Primitivu, l'anicial 
que tres munches fatigues y velees
 daqué día a Santiago va aportar.
Ten paciencia, Xacobu, con estos asturianos
 que pa munchos trotes, fíu, yá nun tán;
en cualquier casu, oh, Apóstol Patriu
<O DEI VERBUM>  sedrá'l  canciu  FINAL .

   

El Salvador, na Catedral.
Enantes d'entamar el <Camín>
hai qu'encamentase a elli.

         La Catedral de San Salvador d'Uviéu yá debía tar llevantada (bueno, una cosina más pequeña) cuando Alfonso II emprentó'l CAMIN  PRIMITIVU.
El primeru que construyó una ilesia n'Uviéu, dedicada a San Salvador, foi'l Rei Fruela (757-768), el pá del Castu, pero Abd al-Malik en 794 y el so hermanu Abd al-Karim al añu siguiente nun debieron dexar piedra sobre piedra, asina que'l bonu d'Alfonso tevo qu'entamar dafechu cola construcción; diba ser - probablemente - el finxu más importante de la so <Civitas Episcopal>.

Alfonso II, el Castu.
<Ave, Caesar, los que vamos 
a Santiago salúdente>

      Munches hores pasaba esti hombre Castu recreándose nos planos que-y tresnaba l'arquiteutu Tioda: San Salvador, San Tirso, Nuesa Señora (Panteón Real), l'Acueductu, la Foncalada (quien quitate'l méritu, curiao)  y el mui amáu Santullano , colos sos palacios y la basílica a San Xulián qu'entá podemos contemplar (nun sé si por munchu tiempu de nun  tratar les humedaes).... Había qu'oxixenar, salir de la ciudá, y fuisti a Santa María de Bendones y hasta San Pedru de Nora.... Qué vida más emocionante la tuya... Bueno, nun te venía mal pa compensar los anoxos de la política propiciaos por popios y ayenos.

La CATEDRAL de San Salvador d'Uviéu.
Entamu del <Camín Primitivu>

 
      La Catedral actual, Sancta Ovetensis, ye d'estilu góticu tardíu, flamíxeru. Entamóse nel sieglu XIII pola Sala Capitular y el Claustru y finó nel XVI cola torre (teníemos previsto dos, pero acabamos les perres).
 Nel XVII amestóse-y la xirola asina como delles capielles. Y claro, con tantos años penitenciando aprucen nella dellos estilos arquiteutónicos: Prerrománicu (Cámara Santa), Románicu (bóvedes y apóstoles de la Cámara Santa), Renacentista (remate la Torre) y Barrocu (Xirola y delles capielles como la del Rei Castu).

La Cámara Santa ye una ayalga única nel mundu. Ta declarada Padremoñu de la Humanidá y caltién xoyes que nun hai otro igual, talo: la Cruz de la Victoria, la Cruz de los Ánxeles, la Caxa de les Ágates y l'Arca Santa col Santu Sudariu. ¡Madiós!, ¿hai quién dea más?...

Cámara Santa,
entrada al Santa Santorum de les reliquies.

       [[ La Cámara Santa ye un edificiu prerrománicu de primeros del sieglu IX  que forma parte del conxuntu catedraliciu. Obra d'Alfonso II el Castu según la tradición, seique l'arqueoloxía entá nun lo acaba d'afitar,  foi llevantada col enfotu d'abellugar les santes reliquies, eses ayalgues que formen parte del padremoñu cultural d'un pueblu y sobremanera del espiritual, pa los creyentes. De fechu, xunto cola Torre Vieya, ye lo más aneyo de la Sancta Ovetensis.
      Esti santu edificiu consta de dos partes superpuestes pero estanques, vamos, que nun tán comunicaes entre sigo. La parte baxa caltién una capiella o cripta dedicada a Santa Leocadia y la superior - o propia Cámara Santa - nómase Capiella de Samiguel. Dambes tan asociaes - apegaes - a otra torre más antigua conocida tamién como Torre de Samiguel, y bien cerca d'otra torre, la Torre Vieya, que tresnó Alfonso III pa defender <l'Aula del Tesoro> (Cámara Santa) de les incursiones xentiles,  normandes o otres... como nos dexó escrito nuna llábana:
     << Nel nome del Señor y Salvador.... y de la gloriosa Virxe María ... de los doce apóstoles ya otros santos mártiles.... yo, el príncipe Alfonso, fíu del rei Ordoño, mando llevantar esta fortificación xunto cola mio muyer Ximena col enfotu de defender l'aula del Tesoru de la cobicia  los xentiles y pirates navales.... Dios nun lo quiera ...>>

    - Cóimes, y valió-y.

Cripta de Santa Leocadia
(Semeya :Esacedemic)

        .La Cripta de Santa Lleocadia (Santa Leocadia), semi enterrada, de planta rectangular y techume de ladrillu revestíu formando una bóveda de cañón, consta de dos partes: la nave y l'altar.  La nave tien dos entraes - norte y sur - y caltién tres tumbes perpendiculares a les mesmes. Nel presbiteriu, col pisu orixinal, hai un altar sobro la tumba de Dulcidio, l'embaxador d'Alfonso III el Magnu, que trexo los restos de los mártiles Euloxu y  Santa Leocricia (Llucrecia) - que tamién tán enterraos na cripta -
 tres dures negociaciones col emir Mohamed I de Córdoba en 884 . Al fondu, una dolosía en forma de cruz griega illumina la estancia dende la cai.

Cámara Santa: Capiella de Samiguel.
(Reconstrucción de la capiella primixenia
 por <Mirabilia ovetensia>

                     Sobro la cripta, ensin comunicación con ella, alcuéntrase la propia Cámara Santa, la Capiella de Samiguel. De planta rectangular y bóveda de cañón en ladrillu revestíu, consta de tres partes: Antecámara, a la entrada, nave y presbiteriu.
     La nave pasó por delles igües siendo la más importante'l cambiu la techume de madera por una bóveda de cañón sofitada nel interior por arcos faxones ya seis columnes decoraes colos doce apóstoles en pareyes . Nel esterior unos arcos ciegos sofitaos en columnes de sillares refuercen los contrafuertes; hai que contrarrestar el pesu de la bóveda.
         Sí, nel sieglu XII  la Capiella Samiguel tevo unes igües, camudó la techume, la bóveda de madera dio pasu a una guapa y ¿segura? bóveda de cañón encontiada en doce columnes, los doce apóstoles nos que se sofita la Ilesia. Cuando la Revolución del 34 esta ayalga sufrió gravísimos destrozos pero foi reparada nel 42, a Dios gracies. 

   - ¿Qué sedría de la Sancta Ovetensis ensín toes estes reliquies que sofiten la fe de los creyentes?... ¿Qué sedría d'Asturies ensin esta ayalga?... ¿Qué tendríemos los asturianos qu'ofrecer al mundu, aparte la sidra?... Pero home, por Dios, con estes coxes nun se xuega. 

     El presbiteriu , al que s'accede al traviés d'una verxa de fierro per aciu d'un arcu de trunfu, ye lo que se considera la propia Cámara Santa. Nella tán guardaes les reliquies que xustifiquen la fe de tantos cristianos, de tantos mártiles:

Arca Santa
(Semeya: <abc.es>)

     . L'Arca Santa, restaurada va poco,  ye una caxa  de madera llabrao con baxorrelieves  y revestío de plata ; quedó perguapa. De la so importancia ancestral da fe la visita del rei Alfonso VI nel añu 1075  dexando constancia nun acta roblada por seis obispos y hasta'l mesmísimu Cid Campeador que quedó ablucáu col Santu Sudariu de Xesucristu que tanta suerte-y trexo. Y nun te digo ná colos cachinos de la Santa Cruz, del sangre de Cristu, les migalles de pan de la Última Cena, tierra santo, una lláscara de piedra del sepulcru y un retal de la túnica sagrada. De los güesos de los santos casi nun fizo nin  casu pero eso sí, casó n'Asturies, por si acasu, esto prometía... Y nun s'enquivocó. 
C.G. de Castro diz que foi obra de tres artistes que trabayaron al empar nos años 1096-97, dómina d'Alfonso VI que lo impulsó. Iba destinada a oratorio del Obispu Martín, seguramente, o quiciabes l'obispu Arias.

Caxa de les Ágates

    . La Caxa de les Ágates que foi donada a la Catedral por Fruela II d'Asturies en 910. Quería quedar bien, el h.odiu,  acabante d'armá-yla a so padre, el Magnu, al qu'arramplaron el tronu ente esposa y fíos:

       - Probín, ta tan acabáu .... ¿Y si lu mandamos a braniar a Castiella?
      - <Podréis mandame a Zamora 
         pero sigo siendo'l rei 
         de les Asturies que van
        dende l'Esla hasta Avilés;
        y si buscáis sonadía
        munches sopes tendréis antes que comer>
   

Cámara Santa, esquema: Cripta y Capiella Samiguel
adosaes a la Torre Samiguel. 
(Semeya : <apuntes.santanderlasalle.es >
per aciu de Mirabilia Ovetensia)

    
     . La Cruz de los Ánxeles , una cruz griega que ficieren dos ánxeles lombardos que nos prestó Carlomagnu, bon amigu del Castu, y qu'esti donó a la Catedral per aciu del obispu Adulfo en 808.
    <Esti signu protexe al piadosu, con esti sinu vencerás a los enemigos> que ye l'eslogan de <mirabiliaovetensia>.
     . La Cruz de la Victoria ellaborada nel Castiellu de Gauzón por Alfonso III y que donó a la Catedral nel añu 908. Dicía la tradición que la cadarma, el palu sobro'l que construyó la cruz, yera la mítica cruz que Pelayo narboló en Cuadonga pero C. G. de Castro demostró per aciu del C-14 que yera un carbayu de la dómina del Magnu; bueno, cola intención basta. 
    . El Cristu de Nicodemo, románicu, Cristu en márfil sobro una cruz llatina de plata, de finales del XI o principios del XII. Nel interior caltién un cachín de la Vera Cruz, que pudo pertenecer al pariente de Xesús, Xosé d'Arimatea.

L'Obispu Pelayo

     . El Llibru de los Testamentos , cartulariu del XII obra del celebérrimu obispu Pelayo que caltién documentos de la diócesis d'Uviéu y amuesa aspeutos de la vida medieval. Consta de dos partes: la primera al rodiu'l reináu d'Alfonso VI, del que l'obispu Pelayo fuere preceutor, y la segunda del reináu de la so fía Urraca. 
      L'Obispu Pelayo andaba esmolecíu pola perda de poder del Reinu d'Asturies (y sobre manera de la sede apostólica ) desque la corte se treslladare a Lleón. Pa encima Alfonso VI conquista Toledo y estos quien recuperar la primacía eclesiástica, demasiao pal body: 
    -Esto nun pue ser, hai que dase'l pote. Tenemos que poner enriba la mesa tolo qu' Asturies, y la so Ilesia, ficieren por España y pol cristianismu. Vamos reinventar la hestoria si fai falta... 
    - Curiao nun se te vaya mano, Pelayo.

     . Un Un dípticu románicu del XII.

Liber Testamentorum
(Semeya tomada na esposición sobre
"El libro de los Testamentos")

      APUNTES: La Cámara Santa tien un orixe inciertu. La tradición oral ya escrita atribúin la so construcción al Castu Alfonso II asina como la Crónica Silense del XII que fai referencia a Santolaya y al Arca Santa; tamién el Padre Carballo nel XVII pero ye bien raro que nin el Testamentu del monarca (812) cuando dona a la Ilesia bayura d'edificios, o la entrega a la catedral de la Cruz de los Ánxeles (808) nin tan siquier les mesmes Cróniques caltengan cita alguna.... Tampoco un documentu como'l Liber Testamentorum (XII) fai referencia a ello. ¿Pensaben que nun facía falta por pertenecer al posible Palaciu úrbanu (¿ónde tán les güelgues aqueolóxiques que lo afiten dafechu...?) del fíu de Fruela?.....
     D'otra miente  camiento yo pa min - ye difícil que tanta xente s'enquivoque ya invente una cosa así...  ¿Pue ser que'l Castu ficiere algo poco seguro y que'l Magnu  tuviere que tresnar daqué más competente esaniciando lo primixenio?...  Esti Rei cronista taba bien arguyosu de lo que tenía y quería guardalo "como oru en pañu"; la fama del Tesoru de la Civitas espiscopal uvieina yera bien conocida na cristiandá y sobremanera énte la gandaya de la dómina. Pa ello iguó la Cámara Santa - qu'en principiu tenía calter funerariu -, llevantó la Torre Vieya (tevo qu'amortizar el salutatorium y algún edificiu más), remocicó y enantó la muralla del tocayu edificando al endefechu un palaciu intramuros; y por si fuere poco reforzó la seguridá de la Civitas, y per ende de la Cámara, con un Alcázar (875).
      La seguridá esterna teníala controlá pero... ¿Y la interna?... ¿Quién  cuntaba con que la muyer y los fíos-y ficieren la cama?... Aburríu, matólu la señaldá en Zamora:
      -Pos nada, voi almirar el vuelu de les aves nes Llagunes Villafáfila; son más lleales que vosotros, ¡paxarracos!
      En tiempos d'Alfonso III (866-910) l'obispu Hermenexilgo (869-891) consiguió traer de Córdoba, per aciu l'hábil embaxador Dulcidio, los cuerpos de los martilinos San Oloxu y Santa Lucrecia (Leocricia) que foron enterraos na cripta.
        Mentanto, yo equí sentáu, charrando  cola Rexenta , a la espera que la piqueta nos aporte pruebes más concluyentes sobro los anicios del Reinu. ¿Qué esperáis?.

                                      **********************

Cruz de los Ánxeles . Pa vela ties que
dir a la Cámara Santa. 

       ¡ Qué suerte tengo de ser asturianu!: Uviéu, Cuadonga, Xixón, Avilés, Pravia, Ribesella, Mieres, Cangues... Navia, Ibies, Tinéu... ¿Y les Cuenques?.  ¡ Ai, Dios, cuanta señaldá! . L.luarca, Colunga, Llastres y el Muséu d'Indianos en Colombres.  ¡Viva la madre que me parió! ... Panes, Taramundi, Degaña  y la Peña Santa d'Enol. Y agora voi camín de Santiago per Grao, Salas y Salime tres cruciar l'embalse d'Arbón.  Nun sé que podrá ofreceme Dios que nun tenga visto yá, ¿habrá Paradisu meyor qu'Asturies?.
      -Tendrás qu'esmolecete, Señor, si quieres sosprendeme con daqué. Igual la panorámica l'universu te puea sirvir de salvación. Pero...
                     Nun t'apures, ho, yo toi EQUÍ como Dios. 

NAVIDÁ na Sancta Ovetensis.

       Pero tamos cola Catedral, la Catedral del Salvador, la basílica qu'entamó con Fruela, la qu'esbarrumbó Abd al-Karim, la qu'iguó'l Castu, la Sancta Ovetensis que'l maxistral De Pas tenía como quintana propia, esa que foi llevantándose pasu ente pasu al traviés de los siglos pa que tolos asturianos, y sobre too los vetustos, la sintieremos como propia, esa que caltién la bayura de reliquies qu'anantes citábemos, esa que tenemos equí delantre y que ye'l puntu de partida del nuesu Camín Xacobéu. Nun podemos entamar meyor. 

.......................SEMEYA.............. La CAI   URÍA... SAN FRANCISCO... 

<El Duendu>,
un collaciu d'otra dómina.
 Enantes d'emprentar
El Camín
fuimos a despedimos d'elli.

         La tradición diz que p'algamar a la Plaza de la LLosa ties que salir per San Xuan a Xovellanos y per Melquiades a la Independencia pero a min siempre me tiró enforma la Cai Uría, centru neurálxicu de la ciudá, asina qu'abandono'l palaciu Campusagráu, pasó per delantre lo que fuere l'Alcázar d'Alfonso III (Telefónica) y tres d'un chapeau a la Universidá de Valdés-Salas - onde Clarín y tantos otros impartieren maxisteriu - llegamos a La Escandelera y entramos n'Uría pisando la placa'l Carbayón, esi míticu carbayu que designa a los nacíos na capital. 
Ehí queden, a manzorga, los paseos de los Cures y del Bombé y quiero ver como en suaños el conventu San Francisco... La cai Uría, la cai del ensanche burgués, traime bonos recuerdos de cuando diba y venía al colexu los flaires, allá en Navarra. Ellí enteré que Fidel Castro yera l'amu de Cuba y que'l Degorriu apoderarase d'él faciéndolu comunista. Qué quies... Tábemos pa cures... Otramiente a los guajes prestábanos más aquel canciu que dicía:
       < Tou home blancu
          que vista de negro
          y nun corte caña 
          a comer a España >. 
       Hai que h.odese colos aspirantes a presbíteros. Pero sobrevivimos, a los flaires, a Castro y a Franco, faltaría más. 
    - La mina ye pior -camentaba papa. 
        Y yo tengo que dicir que toi peragradecíu a los PP.RR de Puente la Reina qu' asentaron les bases pa facer de min  un home buenu (si nun lo consiguieron del too nun foi culpa d'ellos).

                                                 *******************************

<< CAMÍN  PRIMITTIVU  (350 KM >>
 - Ai, fía, ¿y tu cómo lo ves?
- De momento mui guapo
- ¿Tu crees que podremos pa con ello?
-Si Alana, con más de 60 (tiro a bultu), algamó hasta Compostela
¿por qué nun vamos poder nosetres?
- Asina me gusta, ne. Pos venga, ¡cuayu y caleyando!

        Yá dexamos la Estación y peles escaleres mecániques entramos na plaza de La LLosa. Agora pa l'Argañosa hasta llegar a San Llázaru de Paniceres. Nel parque infantil de La Florida hai una talla de Santiago, tamos nel camín xacobéu: ¡A saludar!.
      Entramos en San Llázaru Paniceres - onde hebo una malatería - per aciu d'una panera. Llevantamos la vista hacia'l Monte Naranco - ¡Hola, Arturo! - onde tán asitiaos los Monumentos: Santa María y Samiguel de Liño, dos ayalgues de l'arquitectura asturiana ya universal 
        <¡Salve, Ramiro! Los que van al Finis Terrae salúdente> 

Acolumbrando LLORIANA, dende'l Camín Xacobéu.
La torre la Ilesia San Bartolomé o Sta. María ye un finxu pal pelegrín.

                                                 **********************************                       SAN LLÁZARU PANICERES - LLORINA 

Ferregüeyando la Sierra  L'Aramu:
 Gamoniteiru, L'Angliru, El Monsacru...
Más cerquina: San Cloyo.

       Dende la Catedral a San LLázaru Paniceres, dando vueltes pela ciudá,  hai unos 5 kilómetros seique nun lo paeza.  Pero agora entama lo bueno; esti primer tramu hasta LLoriana - unos 3 km. - ye de lo más afayaizo. 
Salimos de la Civitas pa entrar na zona rural, primero per carreterina estrecha y asfalcada y lluéu per un camín de carru col pisu zahorra. L'arbolíu, los viandantes, ciclistes y xinetes tán al cabu la cai y si a esto lo acompañamos con un día soleyeru ¡qué más queremos!. 

LLAMPAXUGA
Arribando a la Capiella'l Carme.

   


   Tres pasar la casona del horru llegamos a un cruce. Dexamos La Braña y La Pachuca a mandrecha y coyemos el desvíu a Villamar. Praos, carbayos, castaños y lloreos a les orielles d'un suave camín pindiu, cuando en tierra cuandu en formigón. Agora andamos per un pandu que nos permite dir acolumbrando la Sierra del Aramo:
   - ¿Veis aquel picu allalantrones?- entrúganos un caminante. 
   - ¿Nun ye l'Aramu?
   - Sí, y aquello'l Gamoniteriru. Nun me canso d'almiralo tolos díes. Cuando lo cubre la ñeve les vistes nun tienen preciu. Una postal, manín; una postal.
    - Neso tábemos camentando.
    - Paecéis pelegrinos con eses mochiles; ¿vais camín de Santiago?
    - Ehí queremos llegar, pero pasu ente pasu, a cachiquinos... 
     - Pos bon día y <Bon Camín>. 
  Vamos ascendiendo adulces hasta Llampaxuga onde nos alcontramos cola capiella de la Virxe del Carme y la fonte - llavaderu  públicu y perbién remocicao. Diba media hora dende que saliéremos de la Florida. 
      Per detrás de la capiella - mirar la indicación - vamos serpentiando camín abaxo - a plombu -pasando'l Regueru de la Güerta y el llavaderu de la Pipera, onde te pues parar a tomar la parva nunos banquinos y meses asitiaes a costafecha. 
     Agora pica p'arriba hasta Llubrió. Ceo entramos na llomba de Lloriana cola so Ilesia parroquial de San Bartolomé (24 d'Agostu)- antes de Santa María- yá citada como una donación d'Alfonso III a la mitra ovetense - San Salvador - nel añu 905 y más tarde confirmada por Gutierre de Toledo nel XIV . En 1929 alquirió definitivo esta pinta modernista, güei a puntu de llorar pol estáu nel que s'encuentra. 

<Villa Rosa>, Lloriana
Palaciu Martínez-Cardeñoso. 

     Al par d'ella una casona- palaciu dientro d'una finca arbolada y acotada por una consistente muria de piedra  pero de la que nun somos aldovinar los  sos oríxenes...¡Ah!, ¿pa qué ta l'interné?... 
Trátase del Palaciu Martínez-Cardeñoso al que pertenecíen la mayor parte de les tierres de la redolada; agora lleva'l nome de Villa Rosa.  Tamién te vas alcontrar cola fonte-llavaderu de Fontepeña, de 1929. Más alantre otru llavaderu, el de La Pipera. ¡Qué frescos!.

      [[ Lloriana ye una parroquia del municipiu d'Uviéu asitiada nuna llomba nos rimeros de la Sierra de LLubrió y bañada pol Regueru de La Güerta o La Güera y que ta formada por  pequeños pueblinos - Lloriana, La Bolguina, Llubrió, Fabarín, ... - per dellos de los cualos vamos  pasar camín d'El Escampleru per aciu la carretera que-y da la vida, la As-232. ]].

N'Homenax a Doña Maruja,
MAESTRA.

      Prestó alcontrar en Lloriana un monumentu dedicáu a una antigua Maestra del Pueblu de los años cuarenta, Doña Maruja, que-y dedicaren los sos alumnos en reconocimientu a la so "profesionalidá ya humanidá". Yera alcalde d'Uviéu naquel entós don Gabino de Lorenzo. Nós tamién nos sumamos a esti homenax, por Doña Maruja y a toles MAESTRES que tanto penitenciaron per esos pueblos de Dios. Chapeau, collacies. 

Puente Gallegos, Ríu Nora. 

      Vamos pali-pali baxando hasta la carretera xeneral (AS-232) entrando na Bolguina. Como'l gargüelu yá nos fai rebulguinos averámonos a un bar pa tomar un vermú asturianu. Más contentos que una Rosa siguimos pela carretera hasta Fabarín y d'ehí a Puente Gallegos, una ponte perconocida pol pelegrín que vadia'l Ríu Nora, afluente del Nalón. Acabóse Uviéu, tamos en Gallegos, un barriu la parroquia La Balsera, conceyu de Les Regueres. 

Un pelegrín sportinguista: Vettel. 
-¡Puxa Sporting!

[ La Ponte Gallegos sirvía pa cruciar el Ríu Nora, pel camín antiguu de Galicia, no que conocemos güei como Camín Xacobéu. La facha actual ye del XVI pero yá hai noticies d'él nel XIII (1247) seique pasó per delles reformes: Una en 1816 tres la francesada (Guerra la Independencia) ya otra darréu la Revolución d'Asturias nel 1934 (de xuru que les igües fueren más). 
       Gallegos ye un barriu de la parroquia de Balsera (Valsera) como son tamién: L'Escampleru, Taoces (Tahoces), y Balsera, pelos que vamos pasar, como tamién lo son Pumea, Quexu, San Pedru Nora, Tamaro y Rañeces.  ]]

A la vista l'Escampleru.

  De Gallegos vamos ascender 4 kilómetros hasta la Venta l'Escampleru (247 m); pues sirvite de la carretera, con cera en dellos tramos, o metiéndote, a mandrecha, al final del pueblu per un camín de carru al ritmu del Nora y que se mete pel bucólicu "Castañéu del Soldáu" hasta Los Arroxos, al par del Albergue L'Escampleru, tres dexar atrás el Molín de Quintos.  
Pero nós vamos xubir, esta vegada, pela carretera, nun convién anoxar el personal con tantu bucolismu, nun vaya ser qu'alcen el ráu enantes d'entamar. De tener el Castu esta carreterina cuido que tuviere fecho lo mesmo; que yá tenía una edá.... [En 827-760= 67 años]... y cuayu abondo. (Nós tenemos más, y vamos andando). 
      Atrás dexamos l'antigua Escuela, güei vivienda, y munches cases perguapes, acorropinaes de flores. Lo d'engalanar les cases de los caminos transitaos ye una constante de l@s asturian@s, pasaba lo mesmo nel Camín de Cuadonga. 


     Al llegar al Altu l'Escampleru alcontrámonos col Bar-Restaurante Casa Concha, l'antigua Venta, parada y posta de siempres pa caminantes, arrieros, tratantes y pelgrinos; tol mundu paraba nesta venta xusto nuna encruciyada de caminos: Santullano (Peñaflor > Grao > Galicia), Avilés (pueblos de la costa), Uviéu (L.lena > Castiella) y Trubia (Meandros y S. Pedro de  Nora).  

      Nel Escampleru tán documentaos el Monesteriu de Samartín (de 978 al XI), un Hospital de Pelegrinos que funcionó ente'l XV y el XVIII ya una Hospedería. Anguaño hai un Albergue asitiáu n'antigua Escuela y p'agospiar nél pues recoyer la llave nel Bar-Restaurante "El Tendeyón de Fernando", onde tomamos un vermú asturiano de "quítate p'allá". 

La bandera Les Regueres.
(¡Del Betis!)

       Los pueblos, les cases nobiliaries o cualisquier entidá que se precie suel llevar nel so escudu de armes o blasón daqué representativo, algo polo que los demás lu van a identificar dafechu: Castiella lleva un castiellu, Lleón lleva un lleón, Uviéu lleva la Cruz de los Ánxeles...  Y Les Regueres lleven, amás de la Cruz de Los Ánxeles, siete llances. ¿Por qué 7 llances?... Por que nel sieglu XIV ocurrió un fechu nesti conceyu que lu dexó significáu pa siempres.  
      < Corría l'añu 1350 y reinaba en Castiella-Lleón don Pedro I, el Cruel, fíu llexítimu d'Alfonso XI (1312-1350). Esti Alfonso yera un bragueteru y amás de los llexítimos tuvo hasta diez fíos más cola so amante doña Leonor de Guzmán (los de les otres nun los cuntamos). Ún d'estos, d'estraperlu, yera un tal Enrique y tamién naguaba por ser rei, seique nun yera l'unicu... El que más mèritos amosaba yera'l noble ex-valíu real Juan A. d'Albuquerque al qu'Enrique termina xunciéndose, hasta qu'aquel termina misteriosamente envelenáu... Mui guapo, campu llibre pal Enrique Trastámara (esti títulu fuere un regalu del so padre y el de Conde de Noreña del so padrín D. Rodrigo Álvarez de les Asturies).   Echándo-y morru y buscando algunos sofitos ( Francia y Aragón) declaróse aspirante al tronu real. 
   

D'esti alcuentru ente Leonor de Guzmán y
el Rei Alfonso XI surdió Enrique Trastámara,
el primeru d'esta casa, la de Sabel la Católica.

  Naquella dómina los nobles andaben mui enchipaos y hasta los había con más poder económicu que'l monarca, y esto a costa d'esplotar miserablente al pueblu, claro.  Como Pedro trataba de pone-yos cotu per aciu de Cartes Puebla ( pautos ente'l Rei y los ciudadanos onde dambos salién beneficiaos) el tal Quique púnxose de parte de los nobles a los que prometió "l'oru y el moru" pa tenelos como aliaos. Yá tenemos dos reis: Pedro y Enrique y d'esta miente ocurriere la primer guera civil en Castiella. 
    Yá sabéis lo que pasó... Batalluques, rebeliones, exilios (Enrique agospió en Francia), aliances (Pedro con Inglaterra, Navarra, Granada, Mallorca) y asesinatos pola parte del "xusticieru" Pedro, cola diestra, pos "mano zurda" nun tenía: 
   .Les rebeliones terminábales siempre pasando poles armes a los cabecilles ensin considerar el so rangu , inclusive cepilló a varios mediu-hermanos y hasta la Guzmán, so madre .
   . Divorció dos veces a lo fato y coyó la enemistá de dos families importantes. 
   . Nun supo rematar al Trastámara cuando lu tuvo a güevu en Najera y tampoco pagó a les tropes del so aliáu el Principe Negru inglés, que terminó por abandonalu... 
      Na Batalla de Montiel (1369) perdió la vida Pedro nun "mano a mano" col so hermanu, aquel día en que'l francés  Beltrand Duguesclin agabitó al so aliáu Enrique cuando lo tenía too perdío ...  
     < Nin quito nin pongo rei pero ayudo al mio Señor>, vaya cinismu, y punxo al Trastámara enriba.  
       Enrique II Trastámara foi rei de Castiella-Lleón-Asturies ente 1366 y 1379, y nun lo fizo tan mal... supo mirar polos interes de Castiella.
 ¿Y qué tien que ver Les Regueres con Enrique Trastámara?...

Palaciu-Quintana nel Escampleru. 
Bien pudo agospiar equí don Enrique Trastámara

       [[ Cuenten que cuando Pedro I, el Cruel, andaba a la tema col so hermanascu Enrique Trastámara, por mor de la Corona de Castiella, esti hebo d'abellugase n'Asturies al andar escorríu poles güestes del Rei Pedro. Entró n'Asturies per Somiéu buscando les tierres segures del so padrín Don Rodrigo Álvarez de les Asturies, dueñu de los condaos de Xixón, Noreña y dellos más. Pero too nun yera "coser y cantar", equí topó colos alversos Miranda (Belmonte) y al dar les fusties camín de Noreña viose obligáu  a anochar  nel Escampleru.

"La Teyera de Fernando", 
<Bien pudiere D. Enrique,
  futuru Rei  de Castiella,
brindar colos Escuderos 
equí mesmo, na escamplera;
ponen unos vermutinos
asturianos, de primera > 

    El fidalgu Don Rodrigo Alfonso, dueñu d'una casona-hospital qu'albergaba pelegrinos,  acoyólu con tol procuru y hasta-y prestó un séquitu de siete (7) escuderos armaos con llanza pa que lu acompañaren y protexeran hasta la Torre de San Cucao y d'ehí al  castiellu de Noreña, refugando d'esta miente la ciudá d'Uviéu que tamién taba de la parte del Cruel. 
   Cuando'l fuxitivu, que yá venía colando dende Sevilla* pela Ruta de la Plata, algamó a Rei - Enrique II Trastámara - nun escaeció'l favor y concedió a Les Regueres munchos beneficios. Estos, como recuerdu, pusieren nel escudu les siete llances de los
Escuderos de Les Regueres** yá en tiempos de Juan II (1409)  qu'entá-yos apurió más beneficios >> Nun hai nada como alpuntase al carru del vencedor. 

Blasón de Les Regueres
Escudu tipu francés.

* Por cierto, cuando venía'l Trastámara de Sevilla taba protexíu por dos caballeros asturianos: Gonzalo Peláez, el nefandu Conde de Cuaya (vaya amigos que t'echasti, don Enrique), y Pelayo Flórez. Esti conde de Grao terminó perdiendo'l favor real por avarientu y mala persona y foi'l propiu padrín d'Enrique , D. Rodrigo Álvarez de les Asturies, el que terminó con él.  Si queréis conocer más d'esti conde podéis golifar nesti mesmu blog Camín de Niria nes tres entraes (post) : ¿Quousque tandem, Conde Cuaya? 

** Como conocemos los nomes de los Escuderos de Les Regueres cuido que ye de xusticia nomar a los "siete magníficos":
. El propiu Rodrigo Alfonso, l'albergueru.
. Sebastián Alonso de Tamargo
. Mauricio Pérez.
. Pedro Marinas.
. Diego d'Andallón.
. Juan Rodríguez de Balsera.
. Rodrigo de Balsera, hermanu del anterior. ]]
                              

                                      *************************          

                                                        L'ESCAMPERU - PREMOÑO
                                  

¡Tán mataos!,
 nel Altu L'Escamperu

      Salimos d'esta encruciyada de caminos que ye L'Escamperu  dica Santullano, capital del conceyu, esperando pasar per Santa Mª de La Balsera. Tres dexar atrás el "El Tendeyón de Fernando"(Bar-Restaurante) pasamos per delantre un Caserón-Palaciu blasonáu de lo más guapo que tien una panera na quintana . Caminando pela cera tamién dicimos adiós a la Carnicería y a l'antigua tienda de Fernando. Tamos viendo la cande ilesia del pueblu: 

        Santa María la Balsera ye un edificiu modernu nel que destaca'l so blancor y l'alta torre del oeste pela que s'accede al interior  per aciu d'un arcu de mediu puntu. Cubriendo parte de  los hastiales oeste, norte y sur presenta un adriu abiertu, del tipu les ilesies barroques asturianes, sofitáu en columnes cuadraes bien simples. 
Esti templu ye mui recién y tien la so historia.... L'antigua ilesia la parroquia taba asitiada en Balsera, un poco más abaxo d'esta, pero un día esbarrumbó por mor d'un incendiu (1930). Una pena pergrande pos tratábase d'un edificiu románicu, probable del XII (la piedra aprovechóla muncha xente). El casu ye que la nueva construcción decidió facese nun sitiu más centráu pala parroquia y pensaren nel solar de La Carcabina, asitiáu cerca la Escuela, y ehí terminó por llevantase pero.... (Ensiguida te lo cuento, ne).  Tamién  convien dicir que nueva ilesia pasó per munchos avantares cuando la Guerra Civil, hasta foi cárcel republicana. 
De momento siguimos el carretera abaxo hasta un cruce: A manzorga l'Albergue Pelegrinos y defrente'l Camín Xacobéu, el nuesu. Pasamos el barriu d'El Taraniello  y tres metenos por un ramalín en tierrra mayormente damos cola antigua Casa del Cura, un caserón de piedra con sillares nos vanos. 

La Balsera:
Capiella la Virxe de Fátima

       Otra vuelta na xeneral siguimos pali-pali hasta qu'algamamos.... Una ilesia: La Virxe de Fátima, na Balsera. Sí, los vecinos de Balsera nun taben conformes de quedar ensin ilesia y decidieren llevantar otra por so cuenta nel mesmu llugar onde s'alcontraba l'antigua pero esta vegada embaxo l'advocación de  La Virxe de Fátima.  Y ficiéronlo, el resultáu pue comprabase na semeya: un santuariu pequeñín y mui modernu asitiáu nuna pradera que fai d'Área Recreativa. 
Caminamos. Otra vuelta tornamos a la caleya, esta vez de formigón pero más afayaizo, ente sebes y praos. De sópitu una casona perantigua:
    - Meca, hasta tien escudu y too...
    - Debe ser el célebre Palciu de Balsera (Valsera). 
    - Vamos buscar información, mira n'internet. 
     - El Palaciu de Balsera yá ta citáu por Tirso d'Avilés nel XVI magar que de Balsera yá se falaba nel X y ta nel Camín Real de la Mesa. Pol momento nun alcuentro más. 

Vadiando'l Ríu Andayón

     Ensiguida salimos de Balsera y vamos cuestabaxo en direición a La Rabaza y  Picarín. El camín tórnase cada vegada más bucólicu y ábrese ente grandes praderíes ente llombes calices; paez que respiramos magar teamos nuna vaguada. En Picarín cruciamos el Ríu  Andayón y a l salir a la carretera pista hasta Premoño, agora toca xubir un bon tramu. 

PREMOÑO: Al fondu l'Hospital de Pelegrinos.    

                Entramos en Premoño, un pueblu abiertu nuna llomba que pertenez a la parroquia de Valduno y al conceyu Les Regueres. Lo primero que facemos ye echar un tragu d'agua na pequeña Área Reacreativa qu'hai a la entrada del pueblu. Varios pelegrinos foriatos tán descansando. Esti Camín tien munchu tirón, cada vez se conoz más. 
    Xubimos un poco más, hasta la dar cola capiella Santana (Santa Ana) -XVII- a la vera la carretera, enfrente una quintana. 
 Ye conocida pola imax de la virxe, del XVIII, en madera policromao. 
Sabíemos d'un antiguu hospital pa pelegrinos xacobeos pero nun víemos traces del edificiu. Entrugamos.
      - Oiga, ¿sabe d'aquel hospital de pelegrinos que tantu se fala?
      - Sí, ho. L'hospital yera aquella casona de piedra, la Casona de La Portalada.  Agora ye una vivienda. Agospien nella delles families.
Quedamos más tranquilos. Ye una casona-torre perguapa, de planta casi cuadrada y  mampostería fino con sillares nos vaos ya esquines. Queda mui vistoso. Cuido qu'esto ye solo una parte de lo que fuere, teniendo en cuenta que la capiella Santana pertenecía al hospital. 

Vese que Sta Ana tuvo falao con Dios
 pa que'l Maestru ganare'l xuiciu.
¡Toma!

         ¿Conoces
La lleenda del "Dios de Premoño"?
    < Ello ocurrió abenayá cuando en Premoño nin tan siquier había Maestru nel pueblu. Un home buenu que nun llevaba aquello con paciencia y dábase cuenta que, de nun educar a los neños, el pueblu siempre sedría "un esclavu" entamó a poner escuela a los guajes na sacristia la ilesia.
 Guajes y padres taben como unes pascues, tol pueblu lo taba, sacante.... El cura del pueblu - hai que h.odese - taba celosu del Maestru y alegó que la ilesia nun yera'l sitiu adecuáu pa esos menesteres. Como tol mundu taba a la tema con elli, esti, enfocicáu, terminó llevándolo a xuiciu. Víase ganador seguru. Presumía na homilía de que Dios taba con elli pero.... Por una vez, ganó'l Maestru. Dende esi día tol mundu-y llamaba "El Dios de Premoñu", un maestru. 

                                       PREMOÑO - PEÑAFLOR de GRAO
     Nun ye plan siguir caleyando camín de Compostela d'esta miente: Cinco kilómetros y vuelta. Nun mos alcanza la vida p'andar esos 350 km, asina que decidimos mudar la táutica: andar 10 ó 12 y dar la vuelta en taxi. 
     - ¿Y cuándo teamos lloñe?
     - Podemos agospiar un día nun hotelucu y facer dos o tres tramos n'otros tantos díes. 
      Dexamos el coche al final del pueblu Premoño, xunto a la ilesia. Cuando entamamos pasaben de les once la mañana; nun se pue dicir que madrugamos, ¿qué prisa tenemos?. 
Baxamos pela carretera xeneral ( AS-234 ) y dende'l Barriu Casanueva yá tenemos guapes vistes del valle de Valduno. Acolumbramos la Ilesia ya una Granxa pergrande a los pies del viaductu l'autovía. Nun tenía'l Rei Alfonso esa ayalga pero ¿tendría Casa Dylsia?... 
           Aportamos al llanu, a un biforcu de caminos onde lo primero qu'alcuentres ye la Casa Dylsia (nome cubanu), un Bar-Tienda-Restaurante onde pues alcontrar de tou: pa comer, beber o llevar. Foi creada en 1890 y siempre tuvo al serviciu del pelegrín o cualisquier viaxeru fuere o viniere de Grao o Galicia. Equí paraben dilixencies y autobuses de rabil. Si pares en Ca Dylsia - tataranieta de la primer Dylsia - pues tastiar cualisquier platu típicu asturianu; el rollu de merluza ye una de les especialidaes de la casa.  Otru tiempu tenía cine y tres la guerra pasó a facer d'ilesia onde se celebraben mises y funerales. 

Termes romanes de Valduno.

 Bien cerquina d'equí (200 m), tán les Termes de Valduno.
     [[  Un día de setiembre de 1868, mientres Sabel II diba camín de París, el llabrador Domingo Tamargo alcontró, trabayando la güerta, unos ladrillos raros y una especie de molín de mano. Por si fuere poco dio, ente la Torre vieya y la Ilesia, con unos cimientos antiguos d'un edificiu pergrande... Acababa de descubrir l'asentamientu d'unes termes romanes. J. Manuel Glez descubrió en 1945 una llápida a sextio Munigálico
Ciriaco Miguel Vigil alcontró en N'escavaciones posteriores]].

Per Valduno, en territoriu romanu.
Al fondu la ilesia bañá poles Termes Romanes.

       Tres tomar el vermú en Ca Dylsia siguimos camín de Paladín per una granible vega llarada de plantaciones de maíz y fabes, sobremanera. Hai un hangar pergrande y dellos vehículos dedicaos a la collecha del maíz. Hai vida, hai esperanza. Nun hai nada que más nos preste que ver la xente trabayar; nun hai monumentu nin accidente xeográficu que sía más gratu a la nuesa vista qu'alcontrar  a la xente llaborando. El trabayu ye'l segundu finxu de la felicidá; el primeru ye la salú, claro.

Entrando en Valduno, camín de les Termes. 

       Al llegar al final de la vega, tres echar un sorbu na Fonte, entamamos a caminar cuestarriba sobro les agües del ríu Nalón. Unos piragüistes tán pasándolo en grande énte la mirada sorpresiva d'unes garcies reales (Arcea cinera ). Estes aves talo que los azulones (anas platirynchos) y cormoranes aumentaron consirablemente la comunidá nos últimos años; los que nun paecen tan contentos son los pescadores.
     Ensiguida vamos a baxar camín de Paladín. Cuando avistamos el pueblu dende la llomba yá sentimos una gayola pergrande. A les 11:52 entrábemos Paladín.

Paladín, candial.
Al fondu, na llomba, El Palciu Bolgues.
Territoriu Tirso

   - ¡Mira que pueblu más guapu nel valle!
    - Tien que ser Paladín. Mira allarribones, naquella llomba. ¿Nun ves una casona asturiana?
    - Eso tien de ser el Palaciu Bolgues.

   La sierpe la carretera contribúi a aumentar la gayola que tenemos al contemplar la panorámica.  Hai unes cases, perguapes, colos corredores y antoxanes  acorropinaos de flores. Una gran casona asturiana paecíanos la guida del pastel hasta qu'empatamos con otra que nun-y quedaba atrás. Esti pueblín tien clase.
Un cartelu anuncia la próxima apertura de la  "Villa Palatina", un albergue turísticu de categoría. ¡ Suerte, emprendedores! .
Hai dellos cartelos, ún diznos que tamos na comarca Camín Real de la Mesa ya otru qu'equí fina la Ruta los palacios, hai que tomar nota por si algún día...

        De Paladín ye natural el célebre investigador ya historiador  José Manuel González y Fernández Valles, descubridor de castros, cueves, túmulos y dólmenes . Dio a conocer la influyencia celta n'Aturies y n'Europa per aciu la llingua, el folklore, la toponimia y l'arqueoloxía.

Palaciu Bolgues, casa natal de Tirsu d'Avilés

 [[El Palaciu Bolgues 
ta asitiáu nuna llomba a 110 m d'altitú nel pueblu del mesmu nome. Ye un palaciu rural del XVI famosu sobre manera por ser el llugar de nacimientu del célebre historiador Tirso d'Avilés hacia 1530. 
(Y yo que nun fui a velu... ¿Ves?.. Siempre me queden coses, tengo que volver pela zona). ¿Creístilo?..... A bona vas parte. A estes altures yá fuimos a visitalu asina como a les termes... (y too por mor d'un vermutín en Ca Dylsia).
Tardamos un cachu en dar con él, nun había manera arribar a la llomba magar que lu veíemos per dayuri. Una señora mui amable camentónos:
    - Podéis aparcar delante mio casa, nesa esplanada. Per esa puerta podéis ver la entrada principal y la capiella si la verxa ta abierta. Pa sacalu completu podéis saltar a esi práu, tien una vista preciosa. 
     Tuvimos que conformanos con retratalu al traviés de la verxa pero les semeyes nun quedaron na mal, ¿eh?. (yá nun tengo güela, seique siempres ta presente).

La capiella de Palaciu,  abellugu d'un texu. 

      Sobriu, robustu y de planta rectangular ta fechu mampostería con sillares nes esquines y tamién nos vanos, que guarden una simetría perfeuta. Tien un corredor nel primer pisu del que s'acolumbra  tola vega del Nalón. Na fachada principal lleva l'escudu familiar y frente la puerta principal tien una capiellina a dos agües, con espadaña, dedicada a la Santa Cruz a la que s'accede per aciu una puerta mediu puntu. Tuvimos que conformanos con vela dende fuera,una verxa de fierro torgábamos la entrada nel patiu. ]]

Paladín, corredor engalanáu.

   Pa siguir ruta ye precisamos vadiar les agües cristalines del  Ríu Soto, afluyente del Nalón, per aciu una ponte. Llegamos delante Ca Felícitas a les (12:10). Tamos en Puerma y tenemos que volver a xubir. Adelántenos un grupu de canarios que tán faciendo'l Camín Primitivu.
    - ¡Buen camino, asturianos!
     - ¡Bon Camín, canarios!
     Anden como demonios, esi ritmu nin ye pa nós, amás nun resistimos la tentación d'apañar unes castañes nel camín.

- ¡Buen Camino, asturianos!
-¡Bon Camín, canarios!

       Alcuérdome de guaje, nos castañeos de la Robellá (Llaviana) cuando díbemos a la gueta con unes fusties ya una  cesta de blimes que precisaba enllenase enantes d'aportar a casa güela. A la nueche tomábesmosles con llechi, asaes al fuéu, mientres cuntábemos les fazañes de la gueta y los paisan@s camentaben les noticies que daquién-yos apurriere últimamente. Pero a min les que más me gustaben yeren eses histories misterioses, de la guerra, que marmullaben entecortao, pa que los guajes nun mos decatáremos dafechu, nun fuere que se nos escapare la llingua en llugar inapropiáu. Asina que yo nun m'enteraba qué yera eso de la FAI, o por qué nun podía saludar : ¡UHP!, como tenía oyío a otros collacios.
    - ¡Calla, guaje, mecagon mi alma, que puen oyite!
    - ¿Quién?
    - Cualquiera. 
    - Y qué mas da, somos toos vecinos. 
    - Nunca nun se sabe. Pue pasar daquién...
     Y marchaba pa la cama con un lío de la hostia por mor de la CNT, la FAI, los nacionales, los roxos, los socilistes, los comunistes. la Pasionaria... Lo que tenía claro ye que Franco nun yera de fiar y que más valía nun prevocalu, por si salía del cuadru... Cuando me revolvía nel xergón de fueya maíz suañaba que si un día m'alcontraba con Belarmino Tomás - esti debía ser de los nuestros porque siempre lu alponderaben - diba saludalu col puñu n'alto: ¡UHP!. Pero pa min tou aquello nun yera otro que misterios que namás entendería cuando fuere GRANDE. De momento tenía que conformame con asonsañar a Molinucu (entérome que acaba de morrer. RIP), Lángara, Botero (del Titánico), Di Stéfano, Puchades, Gainza, Basora, Kubala, que vino del Telón d'Aceru... ¡Cuándo me traerán los Reis una camiseta del Titani!.

     [[ Los díes 11 y 12 de Payares (noviembre) celébróse nes Regueres el
"Festival de la castaña valduna".

A la gueta la castaña "valduna"
¡Queden poques, aprovecha!

        Esta castaña ta en "cuarentena", ye dicir, a puntu d'esaniciase. Como lo oyes, si nun se tomen midides podemos quedar ensin ella. L' "avispilla" la castaña, un parásitu que vieno de la China - mira, tu, qué nos manden - ta embriviendo la producción hasta un 80%. Una estensión de 2500 m2 qu'antes daba una tonelá d'esta "pata negra" - dulzona y colorada - esti añu anduvu la collecha polos 100 kg., pa morrer. Si a esto añademos el poco curiáu de los castañeos y la falta de corros y nun emplegar téuniques como'l vareado son los motivos de les plagues, asina como la contaminación ambiental. 
     De nun ser pola finca municipal de "Les Ablanoses", onde tán implicaes tantu l'Alministración LLocal como la Central per aciu de la Comisión de Montes y del SERIDA yá podríemos tar falando de la "castaña valduna" como d'un fósil viviente, un nautilus vexetal ]]

... Dexamos la carretera pa entrar nuna sienda carru, a vegaes formigonada.  Vamos caleyando al compás de la correntía del ríu Nalón del que nos suel separar delles fanegueres plantaciones de maíz. De cuando en cuando aparámonos a pañar alguna castaña, tampoco hai munches, pero ye lo que te queda de la dómina infantil, ¿cómo vas ver una castaña y nun parar a coyela?. El ruíu sordu del pasu del tren prevoca una sele algaravía de páxaros que taben abellugaos na viesca de ribera ferregüeyando, camiento, les panoyes del maíz. Tengo alcordanza de mio güela (debe ser que voi pa Grao) poniendo espantapáxaros na era del Nerugustín mientres soltaba riestres d'inútiles bocayaes,  cada cual más simpática, o eso me paecen ahora. El casu ye que'l máiz arriendes de matar munches fames tamién fizo aumentar la camada  d'aves n'Asturies.

          Per esti afayaizu camín vémonos obligaos a vadiar una riega per aciu la Pasarela les Xanes y ensiguida salimos otra vuenta a la xeneral AS-234 . Son les (12:47) cuando llegamos a L'Arache (o Laracha). Por un momentu, namás un momentu pasamos por conceyu de Candamu.
    - Esti nome suéname a guerra, a les Guerres de Marruecos. 
    - Sí,  lo del Desembarcu de Larache. Vamos mirar en google mientres descansamos un poco nesti bancu. 
    - ¿Y si tomamos un sorbu nun bar qu'hai a la entrada Peñaflor, xunto a la ponte?
    - OK, ye la hora'l vermú. 
    - Pa tí siempres ye la hora'l vermú....
    - Non, enantes yera la de la parva. 
    - ¡Ah! . Hai qu'estremar; val, Dioniso.

         Cinco minutos más tarde tamos en  Casa Aurina, xunto a la percélebre Ponte de Peñaflor, hai unos bancos bien afayaizos, a la solombra, que t'inviten a parar, paez difícil pasar de llargo (sobre too siendo la hora que ye).

       [[ El Desembarcu de Larache tevo llugar el 9 de de Xunu de 1911, siendo rei d'España Alfonso XIII y José Canalejas y Menéndez -partíu lliberal - como Presidente de Gobiernu. El comandante en xefe de la flota yera don José Dueñas Tomaseti y lluchaba escontra de les Cabiles del Raisuni, pocu antes de la Primera Guerra Mundial (1914-19) y de les Guerres del Rif (1911-1927). 
 Larache ye un puertu de mar asitiáu nel noroeste de Marruecos ente Tánxer y Tetuán.]]

                               ***********************************

HERÁLDICA: L'Escudu de Les Regueres

Armes de Les Regueres
(Como pa metese con ellos)

    Ye un escudu cuadrillongu (6x5) arredondiáu na base, tipu español o ibéricu, qu'a vegaes tamién se presenta  rematáu en punta, tipu francés, que non apuntáu tipu aragonés. 
     El blasón de Les Regueres ye un escudu partíu. El cuartel diestru presenta en campu azur la Cruz de los Ánxeles, n'oru y plata, simbolizando'l poder que tuvo l'obispáu d'Uviéu al que pertenecía.
    El cuartel sinestru, tamién an campu azur, lleva siete llances d'oru cola punta en plata hacia arriba que faen referencia a los siete escuderos qu'escoltaren a Enrique Trastámara dende L' Escampleru a Noreña cuando esti andaba a la tema col so hermanascu Pedro I, el Xusticieru.
    Al timbre la Corona Real: Un círculu d'oru y piedres precioses decoráu con ocho florones d'oru perllaos n'azur qu'asemeyen a la fueya d'acantu y al empar van alternaos con otres ocho puntes d'oru perllaes en plata. 

 Préstame esti escudu porque siendo tradicional -  forma, figures y corona- presenta la orixinalidá de les llances pola mor d'una hestoria llocal. ¡Diez puntos, collacios!

                                                  ******************************
                                               PEÑAFLOR - GRAÚ 

Ponte de Peñaflor 

      A la una menos cuartu (12:45) tamos delante <Casa Aurina>, un bar mui afayaizu, con meses a la solombra, a la vera del Ríu Nalón y xusto al pie de la percélebre <Ponte de Peñaflor>, pasu obligáu del Camín Xacobéu. Ye la hora’l vermú, siempre llegamos “a puntu” pa estos menesteres.

     Sentaos na terraza facemos alcordanza de delles hestories que pasaron al rodiu esta ponte singular - conocida yá nel sieglu XII - fecha de sillares y cinco arcos desiguales debío a les munches igües que tuvo por mor de les riaes y avantares de les guerres.

[[. En 1586 y 1756 malpenes pudo soportar unes enriaes escomanaes. La del XVI cuéntanosla Tirso d'Avilés, que yera de la zona (Paladín):

   < L'agua entró per toles cases, que quedaren llaraes de truches y salmones.... Les pipes de vino andaben nadando poles bodegues... Delles cases cayeron (como l'hospital) y el camín quedó esaniciáu d'afechu....> 

Ponte de Peñaflor.

. En 1809 el pueblu de Grao – civiles y soldaos - enfrentó coles tropes napoleóniques del xeneral Ney na redolada la Ponte Peñaflor. Nada pudieron facer los bravos moscones con un cañon énte la cañoda franca magar el sofitu del capitán inglés Parker. Darréu los gabachos pasaron a tomar el vermú na villa de Gráu...

. N'Ochobre de 1934, durante la revolución anarquista d'Asturies, los obreros, armaos, torgaron el pasu al xeneral Ochoa que diba ciegu hacia Uviéu; tevo qu'arrodiar pel norte.
    - ¡Bravo, moscones! ]]

Capiella de San Xuan, Peñaflor. 

       Tres cruciar, a mandrecha,  el ríu Nalón per aciu la Ponte de Peñaflor siguimos andando pela carretera xeneral N-634 camín de Grao. Ensiguida damos con una ilesina conocida como ye la Ilesia de San Xuan de Peñaflor.

    D’estilu románicu rural seique mui remocicada neñ XVIII y XIX caltién de la etapa primitiva, amás de la cadarma o estructura, l’arquivolta la portada, l’arcu de trunfu con columnes de capiteles decoraos y dellos canecinos. El templu ye d’una sóleda nave con arcu de trunfu y ábside cuadráu. Lleva un pòrticu unu de los lladrales ya una espadaña d’arcu doble.

Esta ilesia piénsase que tevo drechu d'asilu y taba en consonancia col hospital de pelegrinos d’esta mesma llocalidá que mandare construyir el rei Alfonso VII, l'Emperador, cola so muyer Dª Berenguela en 1144 que tamién apurrieren lo suyo pa llevantar la ponte dao qu'otra qu'había un poco más arriba, na Carril, viniere d'esbarrumbar tamién. 

   - Alfonso, nun podemos dexar incomunicao'l centru col occidente.

   - Nun t'esmolezas, Berenguelina, vamos face-yos delles donaciones pa que puean salir p'alantre. 

TREN en PEÑAFLOR.
A l'atenciaón d'Abel y Vettel,
dos namoraos de los trenes. 

     [Peñaflor ye una parroquia del conceyu de Grao de 8,57 Km2 ya unos 270 habitantes repartíos per Anzu, la Veiga d’Anzu, Sestiello y la mesma Peñaflor. 

Per Peñaflor pasa'l ferrocarril dende 1904 cuando'l Vasco punxo una llinia pa llevar el carbón de la Cuenca del Caudal dica Sanestébanu de Pravia, que lo esportaba pal estranxeru. Hasta 2009 nun hebo apeaderu en Peñaflor; ¿nun lo tendríen bien ganao colo qu'esta xente apurrió a la economía rexonal tantos años?... ¿Nun lo tendríen bien ganao aguantando a los Señores del Cotu de Peñaflor que nun pasó al municipiu hasta 1827 reinando Fernando VII, ¡qué contradicción!]

Pela Veiga, camín de Grao.

       Dexamos la veiga de Peñaflor y empobinamos pela veiga de Grao camín de la capital de la villa, la que consiguió la so Carta Puebla en 1256 por mor del afán repoblador d'Alfonso X, el Sabiu.   
  Pasamos horros, cases y xalés perchulos como la "Villa Carmen y Aurelio" de 1948. Travesamos una rotonda y enfilamos una recta llarada de talleres y cases comerciales.

      Entramos na villa per aciu la capiyina de San Pelayo, que da nome al barriu. La estación del tren a mandrecha y darréu el Ríu Cubia que travesamos per una ponte importante, perpendicular a les víes del tren. Pue dicise qu'entramos na Villa pela cai del Puente y vamos ascendiendo ensel, avenida principal, camín del Ayuntamientu onde fina esta etapa. Atrás dexamos el Parque San Antonio, la Muralla, Valdecarzana .... De la Plaza de Dolores pasamos a la del Xeneral Ponte y sentamos nuna terraza pa contemplar l'edificiu albiceleste que tenemos enfrente: L'Ayuntamientu. Un vermutín ya unos pinchos dan por finada esta estaya pero quédanos volver un domingu de mercáu pa visitar la Villa qu'enfrentó al conde Cualla:
      -  Naide va pisar los nuesos drechos
         por munchu qu'incendiéis esta ciudá. 
         Nin condes nin obispos 
         cola real villa de Grao podrán. 

Entramos na villa moscona
cruciando'l Ríu Cubia. 

 Per un desvíu, a mandrecha, tírase p’Avilés - Avenida Vistallegre - per aciu’l Barriu Azul, La Matiega y el Campu’l Cura pero nós siguimos carretera xeneral N-634 camín del albiceleste.

Tres pasar una rotonda entramos na cai Valentín Andrés - ensiguida falamos d’él – que nos lleva a otra segunda rotonda.

- Mira, a mandrecha tenemos un parque pero según les indicaciones l’Ayuntamientu queda a manzorga.

- Meyor finamos la ruta y depués echamos una güeyada al parque, si tamos pa ello.

Dicho y fecho. Tornamos a manzorga y entramos nel Cerru de la Muralla. Frente a nós un entramáu de piedra artificial, simulando l’antigua muralla la villa, ya un edificiu notable “ El Palaciu Miranda - Valdecarzana”.

         La villa de Grau tiense llevantao poliorceticamente nuna llomba sobro la rivera izquierda del Ríu Cubia. El Ríu ya una muralla dáben-y cierta seguranza naquella dómina (XIII – XIV) onde los condes malfechores queríen emponer el so dominiu tiránicu sobro la ciudadanía.

- ¿Vamos echar una güeyada a la muralla y de pasu comprobar la naturaleza d’esti antiguu edificiu ?

Muralla y Palaciu Miranda Valdecarzana

Y eso ficimos, dir ver la “moderna” muralla llevantada sobro unos contenedores metálicos rellenos de xial calizo y enantes

El Palaciu Miranda-Valdecarzana, ye’l clásicu palaciu asturianu con un núcleu central rectangular abellugáu por dos torres nos lladrales. Del siglu XV pero con unes importantes igües barroques nel XVII y XVIII – aprovechando la construcción de la capiella de los Dolores - , tien anguaño un usu polivalente, alberga la Casa de Cultura, la Biblioteca, l’Aula de les Metáfores (qué guai!), el Telecentru y emplégase tamién como Salón de Plenos del Ayuntamientu; bona idea, moscones.

Éntrase nesti edificiu de tres plantes per un portón asitiaú na parte central de la fachada, la qu’amira pal Cubia protexida pola muralla. Tres pasar l’estragal entres nun patiu máxicu onde l’agua d’una fonte salpica un pavés de piedra arredondiao ornao con dellos arbustos. Unes curioses columnes octogonales sofiten el corredor de madera del pisu superior al qu’accedes por mor d’una espectacular escalerona que nun me resisto de xubir:

- ¿Ánde vas, cacipleru?

- A dar un vueltu, quiero pisar onde pisó’l Marqués y asomame al corredor pa ver el patiu en picao.

- Bueno, yo voi facéi una semeya al escudu qu’hai enriba la puerta d’entrada.

     

    Cuando salí de l’ayalga alcontré la Parienta sentada nun tueru, xunto a un monumentu al <Biblio-Árbol > , una obra de con diseñu d’Abel Alonso na plaza del Mestru Acebacheru Eliseo Nicolás.

     - Mientres tabes restolando pel palaciu yo taba chisbando n’interné al rodiu del escudu los

[[El blasón de los Miranda Ponce de Lleón ye un escudu circular orláu por dos sierpes entellazaes y col campu partíu. Nel primer mediu les armes de los Miranda, cinco veneres en souter, y nel segundu’l lleón RAMPANTE cola corona real por mor de los Ponce.]]

- ¿Y qué más alcontrasti?

- Bayura de coses, van prestate, yá verás.

- A ver, ¿sabes el porqué de les doncelles?

- Pos paez qu’en tiempos de Ramiro I, el Vara de la xusticia, un caballeru nomáu Miranda pudo comprobar “in situ” como los moros llevaben prisioneres una partida de doncelles camín de Córduba, por mor d’aquel pautu de Mauregato colos moros.-

-Bueno, eso nun ta claro; pue que fuere propaganda subversiva del Scriptorium de la Corona, roceana cola rama ¿golpista? Cántabra.

- Bueno… Yá tamos maquinando… Sigo. El casu ye que’l Miranda, un paisanu de los de verdá, cuando vio la comitiva allancióse sobre los soldaos moros con un estandoriu y lliberó les cinco doncelles.

- ¿Él solu?

- Eso dicen. El fechu llegó a los oyíos del Rei y Ramiro, qu’andaba en campaña escontra’l sarracenu, llamólu a files. Cuenten que’l tal Miranda foi un finxu importante na célebre “Batalla del Clavih.o”.

- Esa sí que te la clavaron, ¿Ramiro nel Clavih.o?…. Lleenda …Hasta dicen que la batalla foi namás una lleeenda…

- De lleendes tamos falando, en cualquier casu qué pienses tu, cuentista consumáu.

- Polo que tengo entendío nun hebo una batalla del Clavih.o, hebo dos.

- ¿¡¡¡?

- Sí, dos; pero en tiempos del so fíu Ordoño I. Si quies cuéntelo pero tienes que pedímelo por escrito, agora nun hai tiempu, tenemos que siguir. Y piensa qu’esta hestoria, asina como l’escudu los Miranda, ta rellacionada en ciertu mou col Camín Xacobéu, ¿cómo te quedó’l cuerpu?….

- ¿¡Con Santiago!?

- El mesmu.

- ¡Ah, sí! ,¿eh?… Pos mira que te digo, ¿esi Clavih.o esiste de verdá?

- Creyo que sí; pámique ye un pueblu de La Rioh.a, a cuatro pasos de la capital.

- Asina que’l Clavih.o ta al par de Logroño… ¿Alcuérdeste d’aquella ruta de los vinos?…

- Como pa nun alcordame… Cómo nos punximos de vinu y cogordes (setes) con xamón…

- Sí, bones cogordes…. Pos mira que digo, voi mandate un escritu, monín.

Y llegóme l’escritu esa mesma nueche, yá en casa:

<< Mon cher ami:

Dao que la Batalla del Clavih.o ta rellacionada dafechu col Camín Xacobéu y polo tanto col Camín Primitivu tengo a bien

SOLICITAR

de la bayurosa bondá de V.I., que la so vida guarde Dios munchos años, fer una visita al pueblu del Clavih.o, y redolada, cola fin de poder dar fe d’esi fechu milagrosu y d’esta miente esparcer la noticia ente los nuesos llectores. Si nos lleven aguantando tantu tiempu per estes caleyes de Dios bien merecen ser bendecíos pol sangre rioxano.

Ye gracia qu’espero algamar del so sabiu entender y proceder cola ayuda de Santiago, si fuere menester.

La Parienta >>

       Mañana, a eso del alba, salgo pitando coles güestes de Ramiro pa xuncime a la Batalla del Clavijo. Yá vos cuntaré lo que tenga visto.

    - ¡¡¡ Santiago y zarra España !!!

NOTA:

La <Lleenda la Batalla del Clavih.o punxo dafechu a Santiago como Patrón d’España. A partir del Clavih.o Xacobu agabitó pa siempres la Reconquista ganándo-y la batalla a Santolaya, qu'hasta esi entós yera l'abanderada. (Seguro que munchos nun s'escaecieren d'ella)

                                          *************************************

UNA COSINA enantes de colar:
          Hai nesta crónica sobre los entamos de la Cámara Santa una serie de nomes bien asemeyaos que puen dar llugar a confusión:  Leocadia, Leocricia (Lucrecia) y Eulalia (Olaya). Vamos sacar unos datos biográficos de caduna pa estremales. ¿Acuéi?.

Santolaya de Mérida
na Catedral d'Uviéu

  . Santa Eulalia (Santolaya) de Mérida, yera una neña d'once años, fía d'un senador romanu de Mérida que vivió na dómina de Dioclecianu y practicaba la relixón cristiana. La so fía Olaya, por canta-y les cuarenta al gobernador meridanu, sufrió un martiriu horrible nel añu 304, un añu antes que Santa Leocridia.
Foi durante años - hasta qu'aprució Santiago - la patrona de la Reconquista. El so cuerpu foi treslladáu a Uviéu, la nueva y más segura capital de la Hispania cristiana. Los emeritenses reclamaren más tarde pero yá tábemos tan avezaos a ella... Y ella tan fecha a nosotros
     - Si queréis prestámosvosla un ratín... Pero ensiguida pa casa , ¿eh?, que la xente mayor pierde'l norte si la cambies de residencia.

* Al rodiu de Santolaya recordar que García Lorca tien un romance dedicáu al < Martirio de Santa Olalla> y que Antón de Marireguera - que taba de cura en Carreñu - el primer escritor seríu n'asturianu, escribió < Pléitu ente Uviéu y Mérida pola posesión de les cenices de Santolaya>, aquella vez qu'anduvimos a la tema colos estremeños pola mor de la santa.

     . Santa Leocadia, la que da nome a la cripta de la Cámara Santa, vivía en Toledo a finales del sieglu III, na dómina del emperador romanu Diocleciano siendo Daciano'l prétor d'esta ciudá.
De padres cristianos vivía dedicada a la oración y a la caridá. Perseguida pola so fe Daciano'l prétor, intentó qu'abandonare la relixión de mano con afalagos y darréu cola cárcel.  Nada nun pudo con ella, morrió virxe y mártir nel añu 305, teniendo conocencia del reciente martiriu de Santolaya.
El so cuerpu foi treslladáu, seguramente na dómina d'Alfonso II el Castu, a Uviéu primero (d'ehí'l nome de la cripta) y depués a Flandés hasta que Felipe II la fizo descansar definitivo a la vera del Tajo nuna ilesia que lleva'l so nome.

A Santa Lucrecia,
por guapa y cordobesa. 

     . Santa Leocricia (Lucrecia) yera una mocina cordobesa de padres árabes que se convirtiere al cristianismu poles artes de San Oloxo (Euloxo), obispu de Toledo, del que siguió la mesma suerte martirial nel añu 859, siendo emir de Córdoba Muhamed I y del Reinu d'Asturies Alfonso III,el Magnu.

Nota: Esta florina quiero dedicátela a ti, Santa, que tantu te gustaben les flores, como a bona cordobesa.

     . ¿Y San Oloxo (800-859)? Unes pincelaes. Nacíu en Córdoba de bona familia estudió en San Zoilo onde se fexo amigu d'Alvaro de Córdoba, el so cronista. Ordenóse cura y nun pudiendo pasar a Francia quedó pol reinu de Pamplona predicando l'Evanxeliu faciéndose percélebre.
 Cuido que, un tanto fanáticu, encamentó a munchos cristianos cordobeses a buscar un martiriu voluntariu, ente ellos a Leocricia.
   - Coño, nin; una cosa ye que te prinden ya otra bien distinta dir a buscales. Lo que tenga que llegar, llegará pero convertise poco menos que nun yih.adista..... Nun toi d'alcuerdu contigo, la primer obligación d'un ser vivu ye vivir. (Esti nun conocía la sidra).
    Foi decapitáu nel añu 859 siendo reclamáu'l so cuerpu - xunto col de Leocridia - pol rei d'Asturies Alfonso III el Magnu. Mercé a los ruegos del obispu d'Uviéu, Hermenexildo, y la mano del ardigoteru Dulcidio (en premiu foi enterráu na Cripta) vinieren pa Uviéu siendo sapozaos na Cripta de Santa Leocadia al igual que'l embaxador. Política real pa enaltar la Ilesia carbayona.


                                                     ESTIMANCES:

Despidiéndose de la Casta Ovetao.

. A blog d'Eroski Consumer , cadarma del nuesu <Camín Primitivu>, al que siguimos pasu ente pasu per aciu del móvil.
¿Qué fadríamos ensi ti?..
.  A Isabel S.S. pol so llibru "La Peregrina" ( y dellos otros, sobro'l Reinu d'Asturies") que nos ta agabitando nel <Bon Camín> per aciu d'Alana, la nuesa guía. (Gracies, Señora)
. Xurde Morán ye un guía pa nós - como siempre - col so blog del "Camín Primitivu ". 
. www.senditur.com. onde restolamos davezu. 
. A Rosa y Vettel, que nos acompañaren n'esti entamu de la ruta Xacobea, y nun sedrá l'ultimu, de xuru. 
. A  <ASTURNATURA>, tan recurrida por min. 
.A la web del Ayunatmientu de Grao. 
. A la web de la <www.catedraldeoviedo.com> Y <Los doce linajes de Soria>.
. A <apuntes.santanderlasalle.es>, mui trabayada, que tamién mama, con aciertu, de <mirabiliaovetensia>. Qué semeyes tan ablucantes.
. Al sempiternu blog <mirabilia ovetensia>. Cuando tratamos d'Arte n'Uviéu de mano miro dellos blogs o páxines web, al final vien la esbilla de "mirabilia", vamos, que <vien Paco cola rebaxa>. Gracies, maestru, sigui gasayándonos col to buen facer.
. A la Parienta, que yá tien más ganes de caleyar que yo. 
. A Ester Martínez, por so artículu na "Voz d'Avilés" (9-11-18). 
. A D. Juan Goti Ordeñana, pol so alderique con don Celso nos "Diálogos de Carcabina". Qué bueno. 
. A les <leyendesasturianes.blogspot> de Marisa, la nuesa paisana, que lleemos munches veces.
. A Geni, que me sacó d'apuros con unes semeyes de Paladín -tierra de Tirso - y porque sigui curiando los escuderos de la familia.
. A tolos persones ¡anónimes? coles que converso pel Camín, que son munches. 

                                PIESLLE (fora de concursu): 
      Santolaya (Santa Eulalia) ye una santa percélebre n'Asturies al empar qu'en Mérida, onde vivió y morrió martirizada. Precisamente con esta ciudá tuvimos un tiempu a la tema dexando fe d'ello - na so propia llinua materna - l'escritor asturianu Antón de Marireguerra - cura de Carreñu - nuna de les poques obres suyes que salvaron de la quema: 
<Pléitu ente Uviéu y Mérida pola posesión de les cenices de Santolaya> (1639); que podéis alcontrar n'interrnet. Tamién García Lorca tien-y dedicao ún de los sos celebérrimos romances; yo mesmu-y tengo fecho una torna llibre al nazarín, ¿echóte un trailer?: 

< Pela cai blinca y cuerre
caballu de llarga cola,
mientres xueguen o pigacien
vieyos soldaos de la Roma.
                .....
Nueche de bustos xacentes
y estrelles de napia mocha,
aguarda fiendes del alma
pa esboroñáseme toa.
De cuando en cuando sonaben
blasfemies de cresta roxa.
Al ximir, la santa neña,
france'l cristal de la copa.
La rueda afila cuchiellos
y garfios d'aguda comba:
Brama'l toru de les yuncles,
ya Mérida pon corona
de nardos cuasi despiertos
y escayos d'escura mora. 
         ........
El Cónsul pide bandexa
pa los senos de la Santa.
Un chorru de venes verdes
súrde-y de la garganta.
So sexu trema enredáu
talo páxaru na zarza.
            ::::::::::
  P.D: Si daquién me lo pide asoleyo-y la LLIBRE torna completa. Y que'l buenu de Federico tenga piedá del mio alma.