LEOVIGILDO : REI de los HISPANOS
LEOVIGILDO, el REI de los VISIGODOS
[PRIMERA ESTAYA 1ª]
 |
| << Leo, nun te pases; España va necesitar munchos como nosotros>> |
. ÍNDIZ
0. EXORDIU
1. Entamu. Los reis godos enantes del «Rex hispanorum»
2. Leovigildo (568-586):
2.1. Biografía. Oríxenes. ¿La infancia gala? ¿Qué vio? ¿Ónde puedo tar?
2.2 La xubida al tronu. ¿Cómo taba’l Reinu godu nesi 568 ?
2.3. Actividá política: La idea cabezalera. Les campañes militares. Delles reformes.
2.4. El «Rex gothorum», Leovigildo, na historia.
3. El reinu godu tres « El Rex gothorum».
LEOVIGILDO: DELLES CONSIDERACIONES ( 2ª Estaya. Al pendiente)
4. La invasión islámica (Un post aparte, merezlo):
4.1. Causes.
4.2. Desendolcu de los FECHOS.
4.3. Consecuencies.
5. Dellos APARTAOS complementarios:
5.1.Historiadores godos: Contemporaneos y Modernos
5.2. Personaxes célebres na dómina leovixildiana: Xustinianu I. Masona. Miro.
5.3. Les muyeres del entornu Leovigildo: Gosvinta. Galsvinta. Brunequilda. Fredegunda. Ingunda. Baddo. Rigunta.
5.4. Los CONCEYOS o CONCILIOS visigodos .- TOLEDO.
5.5. La LLEI de los godos. El “Fueru Xulgu” (n’asturianu).
5.6. FECHOS y feches CLAVE na Historia de los GODOS.
5.7. Estructura Alministrativa del territoriu visigodu.
5.8. L’ARTE Visigodu: Arquiteutura. Escultura. Pintura.
Orfebrería: El tesoru de Guarrazar. La corona votiva de Recesvintu.
5.9. RECÓPOLIS. Un suañu d’eternidá (Qué poco te va durar).
5.10. Toledo n’actualidá. Los Museos de Toledo.
EXORDIU
Enantes d’entamar cola dómina de Leovigildo, el rei de los visigodos, cuido conveniente facer una cativa reseña histórica de cómo llegamos equí.
Daqué día'l mio guah.e, cola sida d'algún cumple, tuvo l'aciertu de regalame un llibru al rodiu la historia d'Asturies: << PELAYO>> , de Don José Soto Chica. De mano taba cansándome un poco pola mor de tanta batalla pero fui entrando en fariña y terminó encantexándome. Darréu pasé a otra novela d'esti autor, <<Egilona. Reina de Hispania>> . Y ensiguida alcontréme con <<LEOVIGILDO: Rey de los hispanos>>. Entóncenes dime cuenta que sabía bien poco al rodiu los visigodos y tomé'l determín d'estudiar un pelín aquella dómina a partir de LEOVIGILDO. El resultáu dedícotelu a ti, collaciu, nesti post. ¿Damos un paséu per esto 300 años visigodos?...
Camentar qu'al salime un poco llarga esta historia tomé'l determín d'estremala en dos ESTAYES : 1ª) <Leovigildo. El Rei> y la 2ª) <Leovigildo. Delles consideraciones>. Nesti post va la PRIMERA.
****
1. ENTAMU
Los godos foron un gran pueblu xermánicu del N-E d’Europa que terminó dixebrando en dos corrientes: ostrogodos (Oriente) y visigodos (Occidente) . Los primeros fueron asitiando al rodiu la península Itálica. Los visigodos, que son los nuestros, asitiaron nos Balcanes y darréu foron tirando dica Francia ya Hispania emburriaos por otros pueblos.
Los visigodos fueron de mano aliaos de los romanos aidándolos a controlar a otros pueblos bárbaros. Tou esto yera a cambiu de perres y tierres onde poder establecer dafechu sicasí los romanos nun cumplieren, bonos son estos. Tres la muerte del emperador romanu Teodosio I (395), el fiador de los godos, vieno Honorio, un emperador ensin pallabra.
 |
| <<Alarico I visita'l Foru Romanu>> |
El rei godu Alarico I (395-410) quedó hasta les ñaples del romanu y nel añu 410 – yá lo intentare dos años antes - sitió y saquió Roma seique con cierta benevolencia : «Respetemos les basíliques y agospiemos a los romanos que lo pidan». Asina que yá tenemos el primer Rei visigodu, elexíu pol pueblu, dao qu’afitó la transición goda tervinxia a visigoda, como tal. Por ciertu, nunca nun pisó Hispania. Los líderes anteriores a Alarico nun yeren reis, simplemente xueces o caudillos. «Agora yá tenemos un poder políticu-militar afitáu dafechu».
***
. Muertu de sópitu Alarico - que camentaba asitiar n’África - socediólu’l so cuñáu Ataulfo (410-415) que trató pa volver a Europa. Entraron en tratos colos romanos :« Dámosvos tierres si nos aidáis escontra vándalos y alanos». Dicho y fecho, en 418 pasen a establecer per l’Aquitania y la Narbonensis; en fin, los amos de la costa atlántica dende los Pirineos hasta’l Loira asina como’l valle del Garona poniendo la capital en Toulouse, magar que nunca nun olvidaren buscar una salida al Mediterraneu.
***
. Sigerico (415) duró 7 díes y vieno Walía (415-418) qu’aniquiló a los vándalos silingos de la Bética y a los alanos de la Lusitania en conveniu colos romanos (Honorio). Entós el romanu entregó-y l’Aquitania poniendo la capital en Tolosa (Toulouse).
***
. Socediólu Teodorico I (418-451), xenru d’Alarico I, qu’asentó dafechu n’Aquitania y hasta metió’l cazu n’Hispania. Intentó conquistar la Narbonense pa colar nel Mediterraneu (436) pero nun pudo pa con ello.
 |
| << Campos Cataláunicos: ¡Adiós, Atila!>> |
A lo llargo d'esti reináu apruz otru problemón: Atila, el rei de los hunos. «Hai qu’aconceyar, estos vienen a por toes», glaya’l romanu Aecio. Hebo qu’axuntar romanos con visigodos, alanos, burgundios y francos pa frenar al ferre d’Atila que venía acompañáu d’ostrogodos, escitas, hérulos, gépidos, sármatas y .... Pararon al xatu sicasí a Teodorico costó-y la vida (451) nos nomaos <Campos Cataláunicos>.
***
.. Nel mesmu campu de batalla (In Campi Catalaunici) foi elexíu’l so fíu Turismundo (451-453) que tornó a Tolosa «Cómo fardaba sobro l’escudu que sopelexaben los propios». Sometió a los alanos. Yera un paisanu arrechu y con idees propies. Tenía in mente independizase de los romanos y formar un gran Estáu sicasí estos nun taben d’alcuerdu y aconceyaron colos sos hermanos – xeneral Aecio pel mediu, como non - pa da-y capirote (453).
***
.Yá tenemos al hemanísimu, Teodorico II (456-466), mangáu nel tronu «Caín, a costa de matar al to hermanu». Aconceya (453-53) col emperador romanu Valentiniano III pa lluchar escontra los bagaudas (descontentos de tou tipu col sistema romanu) con ésitu total.
 |
| <Teodorico II, asitiando Arlés> Salió-y torda. |
Fechu un gallu nun hai quién lu pare y hasta ye capaz de colocar en Roma’l so propiu emperador - Eparquio Avito - tres l’asesinatu del so aliáu y del siguiente. Magar que cuando más enchipáu andaba sal-y un granu, yá sabes... Quier apropiase d’una parte del reinu suevu pero’l so rei, Requiario, tórga-ylo atacando na Bética, Cartaxinense y Tarraconense . Teodorico aconceya colos burgundios pa dir escontra los suevos de Requiario. Alcuéntrense na batalla del Órbigo onde’l suevu pierde la cabeza (456) y estos yá queden dafechu arrequexaos en Galicia.
Aprovechando’l baturiciu romanu intenta enantar el territoriu dica’l norte sicasí Mayoruano, gran xeneral romanu, frenólu n’Arlés (460). Pero entá-y surde otra más gorda: Los francos (Egidio), más al norte, quieren más tierres...Y vese obligáu a fer un pautu poniendo una raya nel ríu Loira.
***
. Esti pautu nun-y presta nada a Eurico (466-484) que cola gabita de dellos nobles asesina a Teodorico II y encúmase como nuevu Rei (466) d’Aquitania ya Hispania.
 |
| <<El Códigu d'Eurico>> |
Ye bien interesante esta dómina porque esi mesmu añu significa la destruición del Imperiu Romanu d’Occidente: Odoacro estrona a Rómulo Augústulo, el caberu emperador romanu. «¡Good by, Roma!». Eurico escaez los alcuerdos de federación [foedus] colos romanos fechos nel añu (418). Aprovecha pa facese con territorios galos andando a la tema con francos, saxones ya hispanos. Manda nel Reinu de Tolosa (capital) qu’abarca dende l’oeste del Rin al sur del Loira. N’Hispania quedaben fuera suevos (G-P), astures y vascones.
De tendencia arriana traxo pela cai de l’amargura a los católicos . Por embargu llexisló per aciu del célebre «Códigu d’Eurico».
***
. Alarico II (484-507) asocede a so padre Eurico. Muerre en 507 derrotáu pol rei francu Clodoveo I (481-511) na trescendental Batalla de Vouillé (Poitiers).
¡Adiós Reinu de Tolosa!. Arriendes d’ello piérdese – pa los visigodos - toa Francia sacante la Narbonense (Septimania y Provenza).
***
. Al nuevu rei, el so fíu d’estraperlu, Gesaleico (507-511) nun-y queda otra que tirar dica’l S-W y treslladar la corte (el Tesoru) de Tolosa a Carcasona. Pero los francos nun paren y siguen emburriando; échenlu de Carcasona teniendo que poner la capital en Barcelona [507-510]. Entós l’ostrogodu Teodorico’l Grande vien agabitar los visigodos faciendo fuxir al francu Clodoveo y reconquistando Arlés y la Septimania (Narbona). Pero Teodorico quier el tronu visigodu d’Hispania pal so nietu Amalarico emburriando a Gesaleico dica África, onde entovía fai tratos colos vándalos ...
Torna a Hispania y n’Aquitania combalecha col francu Clodoveo pero’l xeneral ostrogodu Ibba da-y capirote cuando pretendía escondese embaxo les faldes del francu. «Primero perdió l’honor y darréu la vida», según cuenta San Sidoro que lu tenía enfiláu. Diz d’elli que yera un cobarde ya un incompetente de llibru. Yá nun entamó de lo meyor faciéndose l’amu del tronu, que quiciabes-y correspondiere al pequeñu Amalarico, un nietu del ostrogodu (Italia) Teodorico’l Grande. En realidá nun yera pa tanto la cosa dao que la monarquía visigoda, en principiu, yera eleutiva (?) y non heriede. El so reináu ye un fuxir, fuxir y fuxir ....
***
. Como Amalarico (511-526) yera entá un guah.e tevo unos años (15) gobernando como rexente d’Hispania so güelu, l’ostrogodu Teodorico I (511- 526) el Grande asitiáu n’Italia. Asina que tuvimos quince (15) años presos. Pos mira tu, chachu, hebo una paz como nunca nun se conociere... ¡Toma!. (Eso sí, pagando un impuestu «en granu» enforma desaxeráu. ¡H.eta!)
***
 |
| << Tranqui, guah.e; voi echate una gabita>> |
... Amalarico (526-531) . Tantu esperar pol mamón y saliónos rana dafechu esti arrianu maltratador de muyeres. Obligó a la propia (Clotilde, fía de Clodoveo), arrenunciar al catolicismu consiguiendo que los sos parientes merovinxos vinieren agabitala. Con esta farda los francos entraren en Narbona (531), onde tenía la capital, y Amalarico punxo «pies en Polvorosa» y coló pa Barcelona ¡Vaya regalu!. Nun lu aguantaba nin dios y los suyos diéron-y capirote nomando rei al célebre xeneral Teudis («otra ayalga»).
***
***
... Teudiselo (548-549) fuere un xeneral, d’orixe ostrogodu, bien consideráu por frenar l’avance francu en tiempos de Teudis pero’l gobiernu quedába-y grande. Tenía escontra a los visigodos – yera d’orixe ostrogodu – y a munchos maríos engañaos. Nun-y dio tiempu a nada; una conxura de nacionalistes en Sevilla, hai quien diz qu’Hispano- romanos, dio pasu a Agila.
***
... Agila I (549-555) nun lo tuvo nada fácil, al poco d’instalase yá-y salió una revuelta en Córdoba (¡qué rebeldes salistis!) y parte de la Bética, encabezada por Atanagildo. ¿La faición de nobles que taba de la parte de Teudiselo? ... Agila perdió la batalla (551), el fíu y hasta’l Tesoru pero pudo recomponese dende Mérida. [«Esti cambéu de bandu de los nobles duraría hasta los Reis Católicos»].
 |
| ¡Andes gachu, nin! |
Darréu crecen-y los enanos: vascones, cántabros, astures, ostrogodos y bizantinos (griegos) que queríen aprovechar el saldu... Magar que yeren cuatro gatos los nobles católicos subleven ya entronicen a Atanagildo que pide ayuda a los bizantinos (griegos) pa facese l’amu. Yá tenemos a Hispania partía en dos ... o trés (3), si cuntamos a los bizantinos de Xustinianu que van quedar con parte de la Bética, dende’l sur de Valencia hasta l’Estrechu de Xibraltar « ¡Cuasi nada!».
Atanagildo vuelve a dar caña y Agila queda solu hasta que lu asesinen, los de so «¡qué pena!», en Mérida (555).
Los godos tienen un mantra: «Too por la Patria», y si hai que dar capirote al pá, a la muyer, al fíu o al hermanu nun hai problema dalu ¡Too por la Patria! « Morbus gothorum» :< Doce, de los 33 reis godos, morrieren d’aquella manera >... ¡Cómo anguaño nun vamos andar a palos nel Congresu los Diputaos!...
***
Atanagildo (555-567)
Algamó al tronu de la Hispania visigoda a la tema con Agila I (durante cuatro años), que tampoco tuviere sío mui buenu col predecesor, Teudiselo. Pa ello viose obligáu a pidir ayuda a Xustinianu I, emperador bizantín d’Oriente, seique pagólo cediendo parte del S-E d’Hispania (Bética y Cartaxinense). «¡Qué pensabes, monín, que diba salite de papu!»
Entamó poner orde naquel baturiciu ensin dueñu. Centralizó’l reinu al rodiu Toledo (capital oficiosa) ya unificó bastante Hispania. Home ... quedáben-y los suevos per Galicia , la Oróspeda (Sierra del Segura ), la Cantábrica, la Sabaria (Lleón, Zamora, ...), Vascongaes ... Ye consideráu un rei hábil y diplomáticu que caltuvo la unidá territorial y supo buscar aliances internes ya esternes casando les fíes colos reis francos d’Austrasia* y Neustria**. Él mesmu casó cola fía del gran emperador Mauricio, la pernomada Gosvinta, ¡menuda fema, manín! << Hai que reconocer que los godos teníen .... Lo qu'hai que tener>>
Magar la crisis financiera por mor de la Guerra Civil caltuvo la estabilidá política y morrió ¡na cama! (567) ensin heriedes direutos . ¡A la escoyeta, otra vuelta!. seique tuviwre dos fíes << ¡Qué fíes! ... Brunequilda y Galsvinta >>
*Austrasia: NW Francia + W Alemania + Bélxica + P. Baxos
** Neustria: Cuenca de los ríos Sena y Loira (París, Orleans, Le Mans ...)
Acabó cola Guerra Civil y traxo la estabilidá política a Hispania a base de tolerancia relixosa – hasta los suevos se converten al catolicismu - afitando dafechu la capital en Toledo («Barcelona ta mui amañosa pa que nos la zampen los griegos ...¡Pero voi de vacaciones, eh!»). Más tarde quixo desfacese de los aliaos bizantinos pero nun foi pa ello; anda que nun taben contentos los griegos en Spania: Sur, Llevante y Baleares ... ¡Vaya vacaciones, manín! .<< ¡Esto ye pa los xubilaos, carayu!>>
. [Los bizantinos nun fueren espulsaos d’Hispania hasta (625) durante’l reináu de Suintila. 70 años + tarde].
***
. Liuva I (567- 572), un dux de la Narbonense, foi’l más llevaderu de tolos pretendientes y el qu’algamó al tronu (tratos serios con Gasvinta). Por embargu pensaba que’l so hermanu Leovixildo yera entá más apropiáu pal cargu «¡RARA AVIS!» asina que propón-y al pequeñu gobernar en comuña:
- «Mira, Leo; yo quedo na Septimania pa contener a los francos y tu vas pa Toledo y lleves toa Hispania, ¿cómo lo ves?» .
- «Los dos vamos tener trabayu abondo, hermanu. ¡Que Dios nos cueya confesaos!». Y asina entamó'l reináu visigodu más granible d’Hispania.
 |
| << Pueblos ¿bárbaros? que caleyaben per Europa nel s. VI >> [11] |
2.1... LEOVIGILDO (568-586), el nuesu petite.
 |
| [J. Soto CHica] <Mediterraneu occidental (568)> [12] |
Y con esto algamamos onde queríemos, al rei visigodu por escelencia, Leovixildo, la xida d’esti trabayu.
¿Qué sabemos de la infancia d’esti rei irrepetible?
Direutamente, poles cróniques ya escritos de los autores contemporaneos la verdá que bien poco. Pa poder llegar a entrar nel personaxe ya entender la so forma futura de comportase tenemos que recurrir a autores modernos, talo José Soto Chica, que contestualizaron aquella dómina. (<Gracies MAESTRU por esi “Leovigildo: Rei de los hispanos”>).
Nin tan siquier sabemos a ciencia cierta l’añu del so nacimientu, seique ye posible que fuere nel entornu de (536). Sabemos que se criare na Septimania (Narbonense), al sur de Francia, onde quedaren arrequexaos los visigodos por mor del avance d’otros pueblos francos, tres perder la <Batalla de Vouillé (530)> .
.Ye nidio que pertenecía a una familia aristocrática con importantes sofitos militares, otra miente nin el so hermanu Liuva nin él mesmu tuvieren podío algamar a reis. García Moreno piensa que pudo ser fíu del Liuvirit (Liuverico), un xeneral cabezaleru d’orixe ostrogodu a les ordes de Teodomiro l’Amalo.. Tal paez qu’exerció n’Hispania ente los años (523-526)
¿Qué pue pensar un gauh.e, destináu a mandar, que crez fuxendo y desarraigonáu? ... «Hai qu’aunise y lluchar. Quiero un gran pueblu; basta d’escapar».
Nun escoyó la meyor época pa venir al mundu dao que nesos años tuvieren llugar dos de los fechos más esmolecientes de la E. Media:
 |
| <Peste y solombra na dómina Justiniana> [13] |
.El gran velu de polvu (536) : Un cambiu climáticu del globu por mor de delles erupciones volcániques que traxeron un enfriamientu talu de la Tierra qu’asolombraron el sol provocando ruinoses colleches ya una <fame mayor que la del 41 (1941)>.
. La peste de Justinianu (541): Una epidemia de peste bubónica que llegó hasta la Península pasando per La Galia. Más d’un terciu de la población europea pasó a meyor vida. «Como tea Trump engaramáu munchu tiempu va pasanos lo mesmo»
..Leovigildo foi educáu embaxo la confesión arriana como la xeneralidá de los visigodos. Esto va traye-y abegoses consecuencies. Sicasí ....
**********************************
2.2. Leovigildo foi rei de los visigodos, rei d’Hispania Gothorum*, ente los años (568-586), dieciocho años en total seique bien granibles: unificó’l Reinu visigodu con mano dura y grandes reformes polítiques, militares y alministratives. De mano, durante 6 años, en comuña col so hermanu mayor Liuva I y darréu solu hasta’l 586. Confirmó dafechu la capital en Toledo – onde l’asitiare so padre Atanagildo - y tresformó lo que yera una monarquía eleutiva en Monarquía hereditaria dexando’l poder a los sos fíos Hermenegildo (579-584) y Recaredo (586-601).
Lo d’Hermenexildo foi más bien una sublevación que cortó so padre col calter que lu carauterizaba, yá veremos. («Nel sieglu VI nun s’atolenaba la debilidá»).
Leovigildo algamó’l tronu de la Hispania goda (Reinu de Toledo) per aciu del so hermanu Liuva I (sucesor d’Atanagildo) que yera rei de tolos visigodos d’ente Hispania y Francia pero los «marrones» yeren tantos y tan espardíos que nun daba pa controlalo too*. D’esta miente tomó’l detemín d’asociar al tronu al so hermanu pequeñu, Leovigildo; bien sabía lo que facía:
- Tu vas encargate d’Hispania. Fío en ti. Son demasiaos enemigos. Yo tengo bastante cola Septimania, en Francia; la Tarraconense cosa tuya dafechu ¿eh?. Nun lo tienes nada fácil. Pel noroeste vas alcontrar los suevos dándote la coña y pel sureste a los bizantino-romanos que nun queden atrás. Lo meyor que pues facer ye casar con Gosvinta, la vilba d’Atanagildo, el mio predecesor; d’esta miente igual te quites dalgún problema d’enriba. Pero ten curiao con ella qu’esta manda muncho y tien mui males pulgues... Eso sí, vas tener que dir casar a Toledo, la puñetera nun quier venir hasta Narbona pero cuido que «Toledo (París) bien val una misa ». Tiempu tendrás p’adomala, bonu yes tu ... A fin de cuentes tienes que quedar ellí . Menuda madrasta te cayó, ¿eh?...
- Debe tener mieu separtase del Tesoru. Yá sabes qu’ente los nuestros el que tien el Tesoru ye’l que manda. Pero tiempu va haber pa ello.
- Sí; h.a, h.a. Nun-y arriendu les ganancies.
* NOTA : Los visigodos taben asitiaos no qu’anguaño ye la Francia central pero, eso sí, arrodiaos «d’amigos» mui llambiones, los merovinxos. Y más: el Reinu de Chilperico (Neustria) , el de Sixiberto (Austrasia), los longobardos (pel norte d’Italia) y hasta los romano-bizantinos na zona’l Mediterraneu ... Pa dormir tranquilu, nin....
*************
. Leovigildo yera un paisanu de calter fuerte, enérxicu, despiadáu y pragmáticu. Destacó como un estratega de primera tanto militar como diplomáticamente. Nun andaba con monaes : «Voi aunir toa Hispania, cueste lo que cueste». Y pudo pa con ello. Y mira que tenía marrones per delantre... Pero yera llistu, caletró un programa y foi por orde, con métodu ... Falta-y facía porque la Hispania visigoda qu'él alcontró nun yera prauticamente un reinu, los visigodos controlaben bien poco de la Península, faltaba una alministración central y había una serie de pueblos que pa nada dependién de Toledo, cadún andaba a lo suyo ... <<¡Vais enteravos quién ye LEOVIGILDO!>>
2.3. Les CAMPAÑES MILITARES
 |
< Esta ye la HISPANIA qu'alcontró LEOVIGILDO > <<¿Per ónde empiezo, manín? >> [14] |
. Campaña de 570: Imperiu Hispanu-Romanu d’Oriente (conocíu como Spania) nel sureste la Península, dende l’Algarve hasta Denia: Málaga, Baza, Cartaxena, Islles Baleares, Ceuta...
- « Ansí que los lombardos tán atacando a Bizancio... Mira qué bien, vamos aprovechar p’atacar Spania* – glaya Leovigildo. Tengo que demostra-yos quien manda n’Hispania».
*Spania:Rexón nel S-E d’Hispania en poder de los bizantino-romanos dende Atanagildo que pidió ayuda a Justiniano I p’acabar con Agila I (552) viéndose obligáu a dona-y esta rexón que nun pudimos recuperar hasta los tiempos de Suintila (624).
Afararon los campos de Baza, Granada , Antequera y Málaga... Foi una cosa rápida y sorpresiva al traviés de l’Oróspeda (una tierra llibertaria que tolera mal a godos ya romanos) pel territoriu de La Bastetania*. Namás llevó dos mil homes y cuatro mil caballos, nada de material pesáu d’asaltu. Nun acabaron con ellos, nun yera la intención, pero metieron una cuña pa desamestar esa rica Spania bizantina ente Llevante y La Bética.
- «Tiempu habrá. Al platu vendrás, arbeyu». Pero Leovigildo entamó amosar el dentame y les intenciones ... Y ganó sonadía ente los hispanos, partidarios o non de Gosvinta ( la so muyer de tronu, menos de cama... ) onde nun fuere mui bien recibíu dao que venía de la Septimania.
*La Bastetania: Un territoriu qu’abarcaba zones de Málaga, Jaén, Almería, Albacete, Granada y Murcia y tenía la capital en Baza. Formaba parte de la Spania bizantina, pero esta yera más grande.
*
. Campaña 571: Asidona (Medina Sidonia) . Bastetania (Baeza).
Nun se conforma Leovigildo colos llogros consiguíos sobro’l territoriu bizantín, sabe que la memoria ye fráxil y los enemigos siempre tán muertos de sede. Aprovechando la coxuntura xeopolítica decide atacar por sorpresa Asidona, en tarrén bizantín. ¿Qué ta pasando col imperiu romanu d’Oriente?. ... Los perses tán dando guerra na frontera con Armenia. Per Italia los longobardos d’Alboino ya otros pueblos de la redolada tán atacando ciudaes ensin parar. N’África’l rei Garmul va de victoria en victoria....
- « Nun tengo munchu exércitu pero si ataco una ciudá guapa pel occidente nun creo que puean defendela. ¡A por Asidona!» Y asina lo fizo: De nueche, por sorpresa y cola gabita d’un traidor ostrogodu (Framidaneo), que facilitó la entrada, tomó Medina Sidonia como’l que llava. Bono, la verdá que Leo yera un verdugu de primera. ¿Por qué Asidona? .... Cuestión xeopolítica: Controlaba la vía d’Emerita -Hispalis- Puertu de Transducta (Alxecires ) y con Septem (puertu romanu) enfrente dominaben l’Estrechu de Xibraltar. Tamién yera’l camín afayadizu pa tirar dica Astigi (Ecih.a) o Málaga, etc.
- « Buenu, vamos chulear un poco a Toledo, que se vayan enterando los collacios de Gosvinta quién soi yo».
*
. Campaña 572: L’abangu de Córdoba.
Los soldaos encerriscaos de gloria y cacida yá taben clamiando por otra victoria. «Esta vegada téngovos una ayalga. Vais ser ricos, visigodinos. Vamos pola capital de los romanos, ¡Córdoba!».
Emplegaron el mesmu sistema que tan bon resultáu-yos taba dando: Al alborecer y a velocidá supersónica. Nueche de llobos. Nueche de venganza. Ventiún años antes yá intentare Agila conquistar Córdoba. Perdió la batalla, perdió’l fíu y cuasi pierde dafechu’l Tesoru. Llegó’l día del desquite. Cayó Córdoba y los pueblos de la redolada. Acabó la independencia de godos y bizantinos. ¡Cuántos campesinos armaos cayeron!.
Xusto nesi intre al so hermanu Liuva I ocúrrese-y colar d’esti mundu (572). ¿Quién va ser el rei de la Septimania? ... El so hermanu Leovixildo que taba asociáu al tronu de tolos visigodos. Nun podía llegar en meyor momentu, Leo nun facía otro qu’atropar trunfos. Suerte tuvieron en Spania que’l nuevu rei precisaba ocupase d’esa parte francesa del reinu; otramiente los bizantinos diben tenelo crudo «Yá vendrán tiempos más afayadizos». Por si fuere poco colos problemes d’esa ampliación de la Narbonense los suevos tírense al monte. El nuevu rei Miro quier enantar el reinu suevu a cuenta de los runcones*: Pero’l rei de los visigodos nun pue permitilo. «Si hai daquién con poder pa enantar el territoriu esi soi yo: Leovigildo, a ver si vos enteráis, gallegos».
. Runcones: Astures del norte Lleón, oeste d’Asturies y este de Galicia.
*
. Campaña (573-574). Lo siguiente que fizo Leovigildo foi someter la Sabaria, el territoriu de los sappos, un pueblu prerromanu qu’ocupaba les tierres al rodiu del Llagu de Sanabria, avisu a navegantes suevos. Tamos en 573 y el rei asocia al tronu a los sos fíos Hermenegildo y Recaredo.
- « El sur sambla tranquilu, agora vamos pal norte».
Los cántabros a tremar. Arrasa la so capital, Amaya (574)*, y decapita los terratenientes hispano-romanos cabezaleros. Agora yá domina’l norte: Cantabria, Altu Ebru, Burgos, La Rioh.a, Álava y Palencia. ¡Adiós a la pequeña independencia, norteños! Y empieza a camentar:
 |
<Leovigildus Rex> ¡Guapu, eh! |
- «Yá va siendo hora qu’entame acuñar moneda propio, toi fartu de ver la cara de Justiniano».
* NOTA: Tarik ben Ziyad volvió arrasar Amaya en 712 que tevo desaniciada hasta 860 cuando foi repoblada pol conde Rodrigo por orde d’Ordoño I (850-866) d’Asturies. Nel s. XII los sos habitantes pasaron al llanu abandonando la fortaleza-castiellu onde antiguo hubiere un castru de la Edá del Fierro.
Pero güeyu al datu, nel iviernu de (754-55) Leovigildo nun pudo dar descansu a les sos tropes ... Resulta qu’en Constantinopla palma’l bederre de Justino I y xube al tronu Tiberio que reorganiza l’exércitu y entama poner n’orde les fronteres: «Cuidadín longobardos, francos, borgoñones (burgundios), africanos ya .... ¡hispanos!» .Toos coles oreyes tieses.
¿Qué fai Leovigildo? ... ¿Dir al paru? .... ¡¡¡Non!!!. Mira pal noroeste, al señoríu de los Montes Aregenses (=aunonenses).
*
. Campaña (575): Sumisión de los aregenses (Orense, Llugo, Lleón, Asturies).
El señoríu de los Aregenses (araucones), nominalmente baxo’l xugu suevu, cayó en poder de Leovigildo que fizo prisioneru al so loci senior Aspidius, a la señora y a los fiyos « Ta llueu, Lucas». Palos y más palos a los suevos a los que va amenorgando y aislando pasu ente pasu : «Tranquilinos, collacios, ensiguidina voi con vosotros».
*
. Campaña (576 ) . Ataque escontra’l Reinu Suevu. «¡Paz, paz y paz!»
Y fue. Fue por los suevos a los que acongoxó con un exércitu mayor qu’otres veces atacando ciudaes importantes del reinu.
Miro, rei de los suevos, enfocicó seique nun-y quedó otra que parllamentar. Andaba en bones rellaciones con francos y bizantinos pero estos nun taben en disposición d’echa-y una gabita «Nesti momentu nun podemos aidate». Leovigildo yá lo sabía seique tampoco tenía l’exércitu afayadizu pa dominar un reinu tan estensu como’l suevu. Asina qu’ocurrió lo más axeitao: PAZ. Miro compromete a pagar impuestos y aporta guerreros pal exércitu del godu. «Yá vendrán tiempos meyores pa dambos».
*
.Campaña (577). Conquista de la Orospeda y dalgunes pieces bizantines (¿Y Baza, Guadix y Granada?).
Tranquilizaos los suevos y ensin peligru aparente pola parte d’Europa y África Levogildo torna la vista al sur: La Oróspeda, una rexón asitiada ente les sierres de Segura, Cazorla y Alcaraz y qu’abarca parte d’estes provincies: Jaén, Albacete, Granada, Murcia y Almería que tán faciendo llende cola Spania bizantina, amás de la Bética goda, la Carpetania y la Cartaxinense. «Yá te toca, chatina; ¿qué faes tan sola?».
El godu toma les ciudaes y castiellos importantes y derrota los campesinos rebeldes, yá h.artos de los atropellos del godu. Los métodos val más nin camentalos, nun quería dubies pa colos siguientes rivales. Yá tenía en bote los «cinco estaos independientes d’Hispania: Córdoba, La Oróspeda, La Sabaria, Cantabria y Aregia. Avisu a navegantes: «¡ Suevos y bizantinos, andái sollertes!». Sicasí la traición acechaba .... ¿Diba quedar Gosvinta, la so muyer, de manes cruzaes? ... Tanta fama d’un maríu, metíu col calcetu, nun yera p’aguantalo. «Peor pa ti, munina»
*
. Campañes (579-584) . Guerra civil escontra’l so fíu Hermenexildo
Leovixildo yera arrianu. Los visigodos ya ostrogodos yeren arrianos. La mayoría los godos yeren arrianos seique non toos... N’Hispania había católicos, los hispano-romanos yeren católicos dende que l’emperador Constantino’l Grande (272-337) estableciere’l catolicismu como relixón oficial (312). En Mérida había un obispu católicu (convertíu), Masona, que s’opunxo a Leovixildo. Nun quixo apostatar y tevo que colar hasta que llegó’l Recaredo yá católicu (otru convertíu, por conveniencia política). Y presidió’l «III CONCEYU (Conciliu) de Toledo». ¡Qué importante!
. Gosvinta yera la muyer de Leovigildo (visigodu de la Narbonense) que representaba la llexitimidá de l’aristocracia goda n’Hispania («¿Vamos dexar qu’esti rei gabachu mos quite los privilexos a los hispanos de siempres?»). Y tamién significaba la resiliencia del arrianismu escontra l’avance católicu (a la nieta cuasi la mata por ello). Al endefechu tenía gran influyencia xeopolítica porque yera la madre de les reines franques Brunequilda (Neustria) y Galsvinta (Austrasia).
. Hermenexildo, fíu de Leovixildo, taba asociáu al tronu por so padre. Yera arrianu, como toos, seique pola mor de la so católica muyer, Ingunda, cambió de bandu.
 |
| < Sí, anda; faite'l santín...> |
So pá taba que se xubía poles parés . «Quiero que tol mundu comulgue cola mesma relixón; arriana, por supuestu. Quiero toa Hispania centralizada en Toledo. ¡Y el rei soi YO!». Gosvinta y la so banda d’hispanos metieron tola cizaña que pudieren y animaron al fíu a la rebelión. Naturalmente l’obispu católicu de Sevilla, San Leandro, echó más lleña al fueu . Y el mui fatu (Hermenexildo) picó nel anzuelu y por si fuere poco buscó l’ayuda de suevos y bizantinos. ¿Nun conocía a so padre?.... ¿Nun sabía del so pruyimientu? ... «¿Pero cómo se t’ocurre poner un gobiernu independiente na Bética, babayu?»... Duró-y poco la calentura. En (584) Leovigildo ataca Sevilla (Itálica) y darréu’l castiellu-fortaleza d’Osset (San Xuan d’Aznalfarache) y fai al fíu prisioneru. De mano so pá esterrólu pero nun escarmó y tevo que ... Da-y capirote (585). Buenu, igual se-y adelantaron.... cuesta matar un fíu seique te llames Leovigildo. La Ilesia pela so parte canonizólu: San Hermenegildo. (Yo poníate una corona de ... espines).
.Y como contrapartida Leovigildo somete al rei Miro de los suevos que vieno agabitar :« Acabó’l filandón, munín». El reinu suevu quedó incorporáu definitivo (585) a Toledo (Hispania).
¿Qué-y queda al Rex gothorum por anexar ?... S-E d’Hispania, lo que se conocía como Spania [Septem (Ceuta), Malaga, Cartaxena y Baleares] dependiente del emperador romanu d’Oriente (Bizancio).
Magar que la fiesta nunca ta completa y xurde un problema en Francia. Pero esto yá ye muncho pa él. «Recaredo, fíu, esto voi dexalo pa ti».
2.4. EPÍLOGU sobro LEOVIXILDO:
Si tuviéremos que facer un pequeñu resume de la obra del rei de los visigodos podríemos dexalo n’esti cuadru:
 |
| < ¡El más grande!> |
. Foi’l más importante de toos ellos por ser l’arquiteutu y ensamblador del estáu godu na Península Ibérica.
. Amestó’l territoriu sometiendo a suevos, càntabros, vascones, y amenorgando al imperiu bizantín (Spania). Lo mesmo que fexo con otros pueblos menos sobresalientes pero importantes: Córdoba y campiña, la Oróspeda, La Sabaria (los sappos), los rucones (As-Lle-Gall) y hasta na Septimania tuvo de poner paz.
. Promulgó’l «Códigu de Leovigildo (Codex Revisus)» autorizando los matrimonios mistos (arrianos y católicos) ya igualó los drechos de visigodos ya hispanorromanos.
. Acuñó moneda propio abandonando la sumisión a los bizantinos.
. Dexó al so fíu Recaredo pensatible a piques de la unificación relixosa (católica).
***************************** *
3. El REINU GODU tres el REX GOTHORUM
Lo de Leovigildo nun salió nada bien. Pones tol enfotu y dante una morrá. Pero home, ¿nun conoces a la to madrasta? ... Si to padre nun ató cabos con ella ¿quies facelo tu? ...¡Ai, Señor! ¡Cuánto hai qué ver!
. RECAREDO I [559 (586-601)]
Yera fíu del rei Leovigildo y Theodosia - ¿una hispanorromana católica?- ya hemanu del fracasáu Hermenegildo. Tevo casáu con Baddo una muyer de cuna humilde cola que convivió d'aquella manera enantes de pasar pol altar. Tuvieren ¿ún fiyu?: Liuva II , magar que delles cróniques quieren ver hasta dós más: Suintila y Geila pero esto nun ta confirmao de manera dala.
 |
| <Recaredo da'l pasu: ¡Visigodos, yá somos católicos!> [17] |
Seique nun-y quedara otra Recaredo yera un rei pacifista. Consiguió que los visigodos arrenunciaren al arrianismu y se ficieren católicos quedando’l reinu pacificáu relixosamente (¡yá yera hora!). Pa ello convocó’l «III Conceyu de Toledo (8-5-589) » organizáu por San Leandro de Sevilla, Eutropio de Valencia y Masona de Mérida. A esti fin tamién contribuyó una llei que tuviere sacao Leovigildo aboliendo otra que prohibía los <matrimonios mistos> ente godos ya hispanorromanos.
Un fechu desacostumáu pa la dómina d’esti conciliu foi la presencia de la Reina Baddo firmando les actes ,«gloriosa reina», talo si fuere un paisanu. La nobleza goda yá la miraba de revisgu por escarecer d’orixe noble, asina qu’agora yá te digo ...
Lo primero que fizo Recaredo foi dar capirote a Sisberto, l’asesín del so hermanu Hermenegildo : «El sangre ye’l sangre», seique nun tuvieren d’alcuerdu en munches coses.
Magar de too Recaredo viose envolubráu en delles amarraces porque’l cambéu d’estatus d’arrianu a católicu nun yera fácil d’asimilar por munchos obispos y nobles. Pa dir quitando muertos d’enriba ofreció perres y paz a los reis merovinxos d’Austrasia (Childeberto) y Borgoña (Gontán), seique esti nun l’aceutó y viose obligáu a enseña-y los dientes. Hasta pensó en casar cola hermana del austrasianu Childeberto pero Gontrán torgólo un tiempu y cuando se dieren cuenta «l’amante plebeya (Baddo)» yá taba enferronada a la suite nupcial. Los antiguos arrianos enfocicaron y sublevaron en Mérida pero Recaredo solventó l’asuntu per aciu del conde Claudio. Hebo otra revuelta arriana na que taba envolubrada Gosvinta (<<yá t'oyí, navaya>>), la vilba de Leovigildo, la so madrasta, seique nun tuvo munchu percorríu.
Entá-y prepararen otra los borgoñones pela Septimania (589) pero’l célebre Claudio acabó ceo cola rebelión arriana. «Xefe, yá pues iguar el Conceyu, esto ta visto pa sentencia».
A última hora de la vida Recaredo entovía tevo otra refriega colos bizantinos de la que nun salió mui bien paráu y hasta pidió ayuda al Papa pa qu’impusiere la paz y marcare bien les llendes de la Spania leovixildiana; entós el Pontífice díxo-y: «Déxalo tar que pues quedar peor».
Recaredo - ¡nun lo vas creyer! – morrió na cama como un santu siendo asocedíu pol so inespertu fíu Liuva II (601- 603), que tampoco yera una ayalga.
******************
... LIUVA II [583(601-603)] .
Con 18 años un rei godu nun ta esos trotes. Tol trabayu de so güelu Leovigildo venía a sucu baxeru, a los godos nun-yos presta la monarquía hereditaria (l’orixe plebeyu de la madre tampoco agabitaba), ellos tán avezaos a matase ente los nobles por algamar al tronu ya un guah.e nun suel tener les agayes pa eso. Claro qu’esti ... ¿Sabes que se tuvo rebelao escontra so padre?... Hai que ser fatu pa enfrentase al mesmísimu Recaredo, l’home qu’aunió relixosamente’l reinu calteniéndolu tamién políticamente. « Pero guah.e, ¿qué faes? .. Que nun te coman el tarru; los mesmos que t’encumen son los que van desaniciate». Witerico movió los filos pa quitalu del mediu hasta da-y capirote (603).
La verdá ye que’l home intentólo: Siguió cola política relixosa de so pá cristianizando fiestes paganes (Talavera Reina) y poniendo a los xudíos a los pies de los caballos; tamién acuñó moneda en ceques talo Barcelona y Mérida.
**************
WITERICO (603- 610) .
Por muncho que Recaredo algamare oficializar el catolicismu nun yera nada fácil desaniciar la tradición arriana de los godos qu’amás lo emplegaben como xida pa enfrentase a los nuevos reis visigodos. Esto ye lo que ficieren los nobles Segga y Vagrila amás de Sunna, l’ obispu arrianu de Mérida, que conspiraron ya intentaron asesinar a Masona, l’obispu católicu y al dux de Lusitania, Claudio, gran xeneral de Recaredo. Pero salió-yos torda y Claudio dio bona cuenta d’ellos. Claro que siempres te sal dalgún finu y Witerico, que taba ente los opositores, arreglóseles pa ser nomáu rei.
 |
| [18] |
Apresó y cepilló a Liuva II pa torgar rebeliones pero’l reinu entró nun periodu conflictivu a más nun poder. Como los conspiradores yeren arrianos intentó volver a l’antigua herexía pero’l fatu nun entendió qu’aquello nun yera otro qu’una disculpa pa quitalu del mediu. Asina que nobles y cleru enseñáron-y la espada cola que cortare la mano – y más - a Liuva , «el qu’a fierro mata a fierro muerre». Nun se salva nin por tener intentao conquistar dalguna plaza na Bética. Y mentanto Gundemaro más contentu qu’otru poco.
*********
GUNDEMARO [539 (610-612)].
Yera un noble soldáu católicu qu’algamó a gobernador de la Septimania onde acoyó amistoso a los refuxaos del acérrime Witerico, al que dio capirote.
Fizo una espedición de castigu escontra cántabros y vascones por aciu les correríes qu’estos facíen pela costa y pelos valles del Ebro y del Duero (« al vino, yá sabes»). Buenu, nunca hebo rei visigodu que nun tuviere de xubir a mete-yos mano. Facer alcordanza que Leovigildo arrasó la capital, Pamplona y fundó Vitoria a la fin de poder controlalos más de cerca. Cuando años más tarde (711) los árabes invaden Hispania’l rei, Rodrigo, andaba a la tema con ellos.
Tres el Sínodu de la Cartaxinense consiguió treslladar la capital metropolitana de Cartaxena a Toledo.
Intentó tener bones rellaciones con Neutria y Austrasia escontra de Borgoña pero nun tuvo muncho ésitu por mor de la reina Brunequilda d’Austrasia. Morrió en 610 de ¡muerte natural!, eso dicen les cróniques pero yo nun taría tan seguru seique los milagros esistan.
************
SISEBUTO [ (612-621)]. ¿Ún de los grandes??????....Una pena que fuere tan sectariu.
Tres delles engarradiellles ente nobles algamó al tronu’l cultu Sisebuto que foi’l promotor de la Ilesia de Santa Leocadia en Toledo onde se celebraríen más tarde hasta cuatro Conceyos (Concilios). Yo lo de “cultu” póngolo en cuarentena porque refugaba’l teatru talo San Sidoro «Nada nun hai perfeuto».
. Tenía enfilaos a los xudíos y ensiguida-yos torgó’l poder tener esclavos o manumitíos pero llegó más p’allá obligándolos a convertir al cristianismu so pena d’espropiación de bienes (criptoxudaismu), castigos físicos o del exiliu (616). «Ah, y nin se vos ocurra echar novia o noviu cristiana/u». San Sidoro, más llistu y benevolente xuxurió-y a la oreya :
 |
| < Sisebuto tómala colos xudíos > [19] |
- « ¿Nun tarás pasándote un pelín, Sise? ... Por qué nun tratamos de convencelos pola de buenes, ¿nun ves que son fíos de dios ya un finxu perimportante na economía del reinu?» Pero’l que ye burru, ye burru magar qu’esti home fuere escritor: “Epistula sisebuti “y “Vida y pasión de San Desiderio”( el santu que se cepillaron Teodorico y la güelita Brunequilda). Estos fánaticos relixosos son insufribles.
.Católicu convencíu intentó convertir al rei lombardu Adaloaldo seique nun hebo manera qu’esti refugase del arrianismu. Mui mandón nomaba hasta los obispos magar que nun yera partidariu qu’estos entraren en monesterios.
.Convocó en 619 un Sínodu na Bética (Sevilla) con 8 obispos presidíu por San Sidoro (II Conceyu de Sevilla). Tevo gran importacia pola confirmación de «les dos naturaleces – seique una sola persona - de Xesucristu: divina ya humana», escontra los monofisistes que namás reconocen una naturaleza nel fíu de Dios. Tamién trató de la secularización del cleru treslladando la competencia de los obispos al Sínodu
. Les CAMPAÑES MILITARES de Sisebuto:
Aprovechando’l baturiciu de siempres, cada vez que palmaba un rei y mientres venía’l siguiente, los Astures entonaron l’ <Asturies patria querida > y nun hebo más remediu que mandar al tjiufadi Riquila pa metenos en cintura. Y los cántabros y runcones*, como bonos envidiosos, siguieron cola murga hasta qu’aprució’l mesmísimu Suintila... Los vascones nun quixeron ser menos y entamaron col saquéu y hasta’l mesmu rei tresnó ¡una flota!.** p’atacar les costes del norte: Cántabros y vascones...«¿Ónde vas Alfonso XII? »... Nun debió de ser mui grave la cosa porque más o menos toos entraron en cintura, claro que los del norte, con eso del muru orocantábricu siempres fuimos un poco ¿llibres?...
 |
| La flota de Sisebuto [20] |
Con aquell biltante flota atacó l’Imperiu Bizantín consiguiendo ésitos en Ceuta, Cartaxena (615) y Málaga (616). Quiciabes tuviere podío acabar colos bizantinos de la Spania pero estos, bien llistos, pidieren clemencia como católicos y ablandiaron el coral de Sisebuto. Tabayu pal siguiente, Suintila alcontró el terrén abonáu.
.En 614, nel Sínodu de la Tarraconense confirmáronse les cuestiones trataes nel Sínodu de Güesca (598) sobro’l celibatu de los clérigos « Una vez ordenaos yá nun podéis casavos. Los que tán casaos enantes d’ordenase puen siguir cola muyer y los fiyos pero.... Acabó’l contuberniu, nin averase a la muyer, y ella tien de tar d’alcuerdu. Los Obispos queden encargaos de velar por ello». (<Yá t’oyí, navaya>).
*Runcones (Rucones): Un pueblu asitiáu al N de Lleón, SW d’Asturies y E de Galicia (según Soto Chica).
**Flota¨: Los visigodos mui poco favoratibles al mar nun tuvieren flota hasta los tiempos de Sisebuto, seique fuere un poco de risa. Pero foi’l biltu. Vinó-y mui bien pa lluchar escontra los bizantinos.
Sisebuto foi ún de los reis godos más cultos que tuviemos. Amás d’escritor promovió la cultura al traviés de San Sidoro de Sevilla al qu’agabitó pa qu’escribiere, ente otros, «La historia de los godos: visigodos, ostrogodos, suevos, vándalos y alanos» asina como «Les Etimoloxíes» o «De natura rerum».
*****************
A Sisebuto sucediólu’l so fíu Recaredo II (621-621) pero esti probe duró menos qu’un carambelu a la puerta d’un colexu. ¿Tevo dalgo qué ver el gran xeneral Suintila? ...
SUINTILA (621-631). Otru que pondría ente los cabezaleros
Suintila fíu del célebre Recaredo I y de Clodosvinta (2ª esposa), princesa austrasiana, algamó al tronu por mor de la muerte, un tanto prematura, de Recaredo II, el fíu de Sisebuto ya una princesa d’alta cuna de la familia de ¿Riquila? ... El casu ye que Suintila, un bon xeneral que-y fizo’l trabayu a Sisebuto (vascones y bizantinos) nun taba dispuestu a escaecer el tronu al que se sentía xuníu por drechu propiu, por familia y méritos nel campu de batalla. ¿Tevo dalgo que ver na muerte de so suegru Sisebuto? ... Porque ye verdá morrió na cama pero de síntomes poco nidios ... En fin, yá sabemos que pa los godos yera un deporte nacional l’emplegu de cualesquier arte pa sentar nel tronu. Yá vemos que Suintila ye sospechosu de cargase al padre (so suegru) y al fíu (el cuñáu)... Y por embargu foi un bon rei, mira que te digo ... (Tamién Alfonso I que-y regaló un osu a Favila pa la fiesta <los Reis Magos>. <<Esto ye cosa mía ...>>).
. Yá sabemos que Suintila consiguió de los vascones una dilitio – rindición incondicional – y pa qu’esto se cumpliere fundó la fortificada ciudá d’Ologite (Olite=Erriberri) :« Agora movéivos, vascones, que vos tengo a tiru flecha».
 |
| <Suintila despacha los bizantinos> [21] |
. Otru fechu encumable del so reináu foi la espulsión definitiva de los bizantinos de la franxa mediterránea que denominaron Spania; nun tuvo pa con ellos la condescendencia del so rei Sisebuto cuando él yera’l xeneral al mandu. D’esta miente podemos afirmar que’l rei Sisebuto completó la unificación de la Península Ibérica baxo’l control visigodu. «¡Qué contentu se pondría Leovigildo! Daba saltos na so tumba»
. Intentó, como siempres, dominar a cleru y nobleza amenorgándo-yos los privilexos (« a bona vas parte, cativu esperteyu») y promoviendo una monarquía heride nel so fíu Ricimiro. En 631 terminó depuestu pola nobleza revolvina ( Sisenando) cola gabita de los francos (Dagoberto). - «Agora que tenemos un solu reinu vais y vendéisvos a los gabachos... Pa nada nun escarmáis, puñeteros bárbaros». Nun merecía esti gran guerreru, políticu ya estratega terminar escomulgáu y ensin un puñeteru chapu .
- « ¡Cobardes! ¿Quién vos dexó un país unificáu? ¿Quién llaró Hispania de ciudaes y castiellos a la fin de controlar les posibles sublevaciones ? Oligicus (Olite), Vitoria, Recópolis,Toro (Villa Gothorum) ... ¿Nun vos dicen nada? . ¡Bellacos! ... Hasta un CONCEYU (Conciliu IV de Toledo 633) inventastis pa dexame a sucu baxeru ... ¡ Miserables, la HISTORIA ha dame’l braeru reconocimientu!>> . («Alcuérdate Suintila, cómo algamasti al tronu ... Amor, con amor se paga). Morrió apartáu del tronu en 634.
*****************
SISENANDO (631-636)
. El mayor ésitu d’esti berriaca foi convocar el < IV CONCEYU de Toledo (633)> baxo la direición de San Sidoro de Sevilla. Nelli aprovechó pa deponer oficialmente a Suintila, so padre. Yá lu tuviere apartao tres sublevar na Septimania cuntando pa ello col gabitu de los francos - Dagoberto de Neustria - al que conocía bien de cuando fuere gobernador (dux) de la Septimania. Reunió un exércitu en Tolosa, tomó Zaragoza y Toledo faciendo fuxir al rei Suintila. «¡ A los cuervos! ¡Que’l diañu te lleve, mastuerzu!»
 |
| <IV Conceyu de Toledo> [22] |
El < IV CONCEYU> (633) foi clave p’afitar dafechu l’Estáu Visigodu: Instauró una monarquía eleutiva, como antaño, ya unificó la lliturxa con un pautu ente la Ilesia y l’Estáu (antecedente constitucional): El rei sal elixíu tres un pautu ente los obispos y los nobles.
. Ye’l PRIMER marcu llexislativu na historia del Drechu, antecedente del Liber Iudiciorum. «Menos ye ná»
. Colos xudíos siguió la mesma política represiva anterior: evitar
 |
| Tremis de Chintila [23] |
CHINTILA (636-639)
Siguiendo les pautes del <IV CONCEYU de TOLEDO> (636) al morrer Sisenando – que dexó un reinu ciertamente inestable - los nobles ya Obispos alcordaron subir al tronu a Chintila. Nun debía alcontrase mui seguru porque ensiguida convocó’l <V Conceyu de Toledo> onde amenazó a los tiranos que se sublevaren escontra’l rei con penes perdures.
Debíen presta-y enforma los xareos porque al añu siguiente entá tocó a conceyu: <VI CONCEYU de Toledo> onde volvió cola mesma cantinela sobro les condiciones p’algamar al tronu.
Lo que si fizo a conciencia foi repartir tierres ente los nobles afines (<el que parte y bien reparte ....>). Yera un facha de munchu cuidáu.
.Obligó a los no católicos al exiliu, <más palos a los xudíos> . Yá les pagaréis visigodos .... Foi asocedíu pol so fíu Tulga.
********
TULGA (639-642)
Heredó a so padre, cosa mal vista pol CONCEYU – dellos nobles ya obispos – dao que’l tronu debiera ser eleutivu. Home de calter débil ensiguida alcontró oposición y un tal Chindasvinto, destacáu pa controlar los vascones, aconceyó ricos y probes y dio-y una patada nel culu ... Tonsurólu ... Yá ye monxu. Pero ... Nun cuntó col cleru, y eso pagólo (<paez mentira pa ti, vieyu, revieyu>). Volvieron llamar a Tulga (< val más lo malo conocío ...>) hasta qu’esti morrió cuasi de sópitu. Esta vegada llaró-yos el cepu y ¡toos contentos!
CHINDASVINTO (642-653). Un grande con dalgún matiz
Equí tenemos un gran rei que según l’arzobispu Eugenio de Toledo yera < criminal, impíu, xostrón, infame, cabileñu ya inicuu>. Cola Ilesia nun rezó mui bien seique terminó agabitando lo suyo; inclusive fundó’l Monesteriu de San Román d’Hornija (Valladolid).
 |
| ¡Toos per equí, nun lo repito! |
. Durante’l reináu d’esti ancianu (79 a.) estadista saneóse l’Estáu, acabóse cola corrupción, les revueltes pasaron a meyor vida y sacáronse lleis nueves que traxeron estabilidá.
El cleru y la nobleza pasaron pol aru, eso sí, a costa del sangre: 200 personaxes d’alta cuna y 500 de mediu pelu xubieron al cielu talo la Descarga del Carme (Cangas del Narcea) . Otros colaron pa la Narbonense dexando les tierres al albidru del Rei que convocó’l <VII CONCEYU de Toledo (646)> a la fin que tou fuere llegal: <Adiós oposición, yá te veré nel cielu >. Hasta-y roblaron que la monarquía fuere heriede nel so fíu Recesvinto. Regularizó les fundaciones eclesiástiques privaes pa que nun escaparen del control de los obispos a los qu’él mesmu tenía controlaos. « Qui comando io y nun se mueve nin Zeus».
. Chendasvinto saneó l’Hacienda pública con lleis más xustes nel repartu d’impuestos. Arriqueció’l Tesoru a cuenta los bienes de la oposición. Militarmente sofocó rebeliones de vascones (<¿ dalguna vez estos tuvieren contentos?>) y lusitanos. Tocántenes a los xudíos nun tenemos noticies, igual ye que taben felices ... Colos que nun foi tan benevolente fuere colos cristianos qu’esfrutaben colos ritos xudíos. La verdá ye qu’algamó una estabilidá institucional como nunca nun se conociere. Foi un poco burru, eso sí ...
Tamién ellaboró un códigu únicu pa godos ya hispano-romanos que sería rematáu pol so fíu <Códigu de Recesvinto>* que revocaba los Códigos d’Alarico y Leovigildo (<hai que ponese al día>).
* Liber Iudiciorum (654)= Lex visigothorum (< Toos somos iguales énte la Llei> <Nada d’interpretaciones, tou tien d’estar escrito. Si daqué nun tuviere escrito’l Rei tien la última pallabra>)
. Cuenten qu’embaxo’l so reináu los árabes (Islam) visitaren, tiempos del califa ortodoxu Otman (644-656), les costes visigodes.... (< ¡yá los tenemos equí! ...>).
***
RECESVINTO (642-672) Grande'l pá y GRANDE'l fiyu
Qué bona escuela tuvo esti rei visigodu qu’entamó gobernando en comuña con so pá nos caberos años de la vida del vetustu llexislador. Remató’l “Liber Iudiciorum” y foi l’impulsor del “Tesoru de Guarrazar”.
 |
| <<Corona votiva de Recesvinto>> [25] |
. Como nun hai nada perfeuto volvió a dar caña a los xudíos... ¿Nun habrá manera de llevase bien con ellos? ... «¿Qué te dixo to padre, ho?»
. El so reináu ye recordáu pola so política de reconciliación tanto cola Ilesia como la nobleza, eso sí, porque nun-y quedó más remediu. Aquella política de so padre d’encumar a los suyos y arruinar a los opositores llegó a un puntu insoportable. Nel <VIII CONCEYU de TOLEDO> punxéronlu pintu y viose obligáu a repartir tierres y canonxíes cola oposición qu’amás fizo-y alcordanza que la monarquía nun yera hereditaria: <El rei ponémoslu nosotros, más que te preste, o non >; vamos, nun cónclave como pal Papa. Llueu quixo recuperar sacándo-ylo a los probes xudíos, que, como siempres, terminen pagando’l patu.
.Esti rei punxo tol procuru nel inxertamientu social ente godos ya hispanorromanos aboliendo la torga de los matrimonios mistos.
< Tolos súbditos somos iguales, toos tamos rexíos pola mesma llei>, dizlo'l “Liber Iudiciorum”.
***
{WAMBA {633(672-680)}. El rei de los “cuentos”
Conocíu como’l Rei Llabrador tuvo un reináu embaxo les mesmes carauterístiques que cuasi toos: A la tema cola nobleza y cola Ilesia amás de represor de rebeliones. Taba a gustu como miembru del Conseyu Palatín pero los nobles necesitaben unu un tanto afayadizu pa los sos intereses ya obligaron a esti home “mayorín” (42) a facese cargu de la corona.
- « ¡Ah, sí ....! Pos con toles de la llei. Quiero ser unxíu en Toledo pol obispu metropolitanu y na ilesia pretoriense (l'averada al palaciu)».
¿ Nun dicíemos que yá yeremos un país amestáu no político y relixoso? ... «¡Yá t’oyí, navaya!» ... Nin dios taba d’alcuerdu con nada: Los nobles contra los nobles, los nobles escontra’l rei, los católicos a la tema colos arrianos, los hispanorromanos a palos colos visigodos... ¿Quedá daquién?... Sí, ho... Los de siempres, ¡los vascones! ... Curiao, y hasta los ¡astures! ¿¡Pero esto qué ye, manín!?.... ¡Coimes...! ¡Veo árabes per Alxecires! (672).... «Wamba, fíu; vaya marrón que te metieren!»
.jpg) |
<<El rei Wamba baxando los fumos al conde Paulo>> [26]
|
- «Cuando vos llame vas venir corriendo coles armes na mano pa defender al rei y a la patria, mazcayos»
El llexendariu Wamba- dicien que yera un llabrador obligáu a gobernar - promovió’l «XI CONCEYU de Toledo» (675) col envís de meter a la Ilesia al riegu: « Munchu viciu y más abusu».
Si los nobles son malos los obispo son peores. Cuenten que Xulián II, el metropolitanu de Toledo, foi quien movió los filos pa desprestixar a Wamba. Engañáronlu, narcotizáronlu y tonsuráronlu ... «Yá nun pues ser rei, namás vales pa monxu». Acabó los díes nel Monesteriu de San Vicente de Pampliega (Burgos). La so cadarma anduvo esnalando d’ilesia n’ilesia hasta que terminó en Toledo, quedando en Pampliega un monolitu pal recuerdu. (Los más agradecíos).
WAMBA ye’l caberu rei visigodu qu’intentó organizar l’Estáu, tanto l’exércitu, como l’alministración y/o el cleru, l’eternu triunviratu que llevó a esti pueblu al desaniciu (711). «Vamos a sucu baxeru, Leovigildo; tantu trabayu pa nada».
***
... Naturalmente, tres una conspiración palaciega, aupa al tronu ERVIGIO (680-687), el primu de Recesvinto, bisnietu de San Hermenegildo y tataranietu de Leovixildo. Vamos ver pa qué sirve esta carta de presentación.
Tal paez que los últimos reis visigodos andaben más esmolecíos por asitiar nel tronu que n’ocupase de los problemes xeopolíticos que-yos veníen enriba: Los islamites. Por embargu Ervigio pasó los 8 años de reináu a la tema colos nobles y la Ilesia, lo de siempre. <Mui guapo, capuletu>.
. Ervigio incapacitó a Wamba p’arramplar col tronu. Llevó a cabu delles reformes que favorecíen a la nobleza y al cleru («Qué baxada de pantalón!») revisando’l Liber Iudiciorum per aciu del Códigu de’Ervigio qu’anidiaba la llei militar de Wamba « En casu de guerra vais aportar namás que la décima parte de los siervos» ; tamién arremetieron escontra los xudíos, otra vuelta. « Hispanos, visigodos, nun mos aceutáis como somos pero ceo vamos tomar el desquite ... Un sunami arábicu va damos la oportunidá ». [«Lo de los xudíos nun yera otro qu’una xida pa quita-yos les perres y propiedaes. ¿Por qué nun trabayáis, godos?»].
A finales del so reináu (687) hebo un intentu d’incursión peninsular del Islam siendo Califa Abd al Malik I (685-705), que treslladare la capital de Bagdad a Damasco (661).
***
 |
| <<Les invasiones islámiques (VII-VIII) [27] |
*[Mahoma entamó haza 610 col procesu de creación del islamismu y pue dicise que quedó consolidáu nel añu 622 cola Hégira, la fuxida de La Meca a Medina, espardiendo a una velocidá de vértigu. En (630) conquistaren La Meca seique yá teníen unificaes les tribes árabes de la Península Arábica. Ente (632 -661) yá habíen conquistao, amás de la Península Arábiga , Mesopotamia, l’imperiu persa sasánida y dellos territorios del Imperiu Bizantín: Siria, Palestina, Exiptu y nel norte d’África yá teníen bases n’Ifriqiya (Libia y Túnez).
El xeneral Uqba ibn Nafi fundó Kairuán (Túnez) hacia (670) [yera califa’l primer omeya: Muawiya I [(661-680)]* qu’usaron como base pa dominar les costes d’Argelia y el Magreb ( N-W d’África: Marruecos, Argelia,Túnez, Libia y Mauritania Sáhara Occidental) ].
Pal AÑU (694) LOS VISIGODOS YEREN SABEDORES DEL PELIGRU D’INVASIÓN MUSULMÁN per aciu de daqué traición xudía «¡Cómo non!. De llibru». Esti asuntu foi tratáu nel <Conceyu XVII de Toledo> en tiempos d’Egica y siendo Califa Abd al Malik ibn Marwan (685-705), estadista, aunificador y reformista qu’estableció l’Árabe como llingua oficial pala alministración. « ¿Y l’asturianu, qué?... Voi tener que llamar a los omeyes...»
****
Ervigio asoció al tronu al so xenru Égica (687-702) que casare cola so fía Cixilo. Al empar yera sobrín del célebre Wamba y ñetu de Chindasvinto. <<¡Vaya cartel d'entrada; a ver qué faes!>>
 |
<< Trés reis godos chuleando col "Liber Iudiciorum>> Semeya mozárabe del "Códice Albeldense (X)" [28] |
El so reináu tevo marcáu pola inestabilidá política permanente y l’enfrentamientu con nobleza y cleru «¿Dalgo que nun sepas?»
Al algamar al tronu intentó protexer a la so familia teniendo qu’enfrentar cola vilba ya entornu del rei anterior, Ervigio, a los que xurare protexer magar qu’estos nun-y lo punxeron nada fácil. «Y yo que vos devolví lo que vos tuviere quitao’l mio antecesor» . Esto trexo como consecuencia una rebelión del metropolitanu de Toledo – Sisberto - que pretendía entronizar a Suniefredo (692). Égica pudo paralo a tiempu poniendo duru castigu a los revolvinos, qu’hasta intentaren matalu. « ¡Escomulgaos! Y vais entregame los bienes que vos devolví. Nun tenéis arreglu. Y la vilba – Luivigoto - al conventu» Pa consiguilo anduvo de Conceyu en Conceyu camudando la llei, el Liber Iudiciorum.
Como <a perru flacu too son pulgues> resultó que los xudíos, aprovechando l’averamientu de los islamistes a la península, quixeren aconceyar con ellos «Peor que tamos nun vamos quedar...».
- «Eso yá lo veremos, mazcayos». XVII Conceyu de Toledo.
Nunca una represión fuere tan gorda: « O conversión o confiscación de bienes y esclavitú; otramiente la diáspora. Los vuesos guah.es queden embaxo la proteición de cristianos colos que yá nun vais poder mercar («¡Esto ye l’acabose total!») . Los xudíos de la Septimania quedaren escluyíos d’estes midíes por mor de la peste que traxo al endefechu una ruina económica ablucante. Como veis, collaci@s, poniéndolo a güevu pal combaleche colos árabes. «¡Los omeyes tán equí! Yá tembla la paxarina»
******
WITIZA (702-711) entamó a gobernar en comuña con so padre Egica nos caberos años d’esti rei faciendo méritos na Gallecia; a partir de 702 yá lo fizo en solitario. Por embargu nun se sabe a ciencia cierta si Cixilo, la muyer conocida d’Égica, fuere so madre. ¿Ye por esto que la Crónica Alfonsina «Ad Sebastianum» diz d’elli que «Yera home d’infames costumes talo <caballu y mulu qu’escarecen de xuiciu>? Según la crónica esti rei llevó una vida llibertina permitiendo que’l cleru ficiere lo mesmo, siendo esta la causa de la invasión árabe.
A esti home <cabe-y l’honor> de ser ún de los causantes direutos de dar capirote al REINU VISIGODU, esto sí que ye seguro.
La «Rotense» nun queda atrás poniendo a esti rei <a cayer d’un burru> ya insistiendo que la causa de la invasión nun fue otro que quedar ensin guía espiritual, dao que’l cleru taba corrompíu dafechu; hasta los CONCEYOS nun fueron otro qu’un recuerdu. Seique la «Crónica de 754 » fuere más conciliadora con elli.
Witiza punxo más procuru que so padre en llevase colos nobles y la ilesia restituyendo lo que-yos tuviere quitao. Tamién devolvió al Tesoru estremando lo personal de lo estatal. Al endefechu foi víctima de la peste que prevocó <una fame mayor que la del 41> (1941).
¿Qué nos cuenta la “Crónica Albeldense” sobre Witiza? . Gobernó 10 años. En vida de so padre, Egica, residió en Tuy, la capital de la Gallecia. Ellí tevo serios problemes col duque godu Favila, al que terminó matando, pola farda la muyer (toes-y paecíen poques). Cuando Witiza algamó’l tronu desterró al fíu del difuntu de Toledo (don Pelayo). ¿Vieno esti a vivir a Asturies? ¿Yera asturianu?. ¿Yera so madre astur-cántabra? ...
Witiza morrió na cama (710) «¿ónde sinón?» ya otra vuelta cola torga la socesión. Los fíos entá son pequeños ya un conceyu de nobles alcuerda elevar a DON RODRIGO <<¿Ensin palos? ... Munchu m'estraña>>. Como siempres l’entornu del susodichu nun ta d’alcuerdu y los omeyes yá tán llamando a la puerte.
{NOTA: Witiza nun merez una semeya por tener quitao la vida al pá de don Pelayo }
**************************
DON RODRIGO (710-711) . El ¿caberu? rei visigodu d'Hispania.
 |
| <Na batalla del Guadalete (Las Jandas)> [29] |
. Pero nin, ¿cómo se t’ocurre metete nesti fregáu?. El reinu arruináu pola peste. Los nobles a la tema como siemprres (¿cómo algamasti tu al tronu, Rodrigo?). El cleru que paez Pigale. Los islamistes buscando la manera d’entrar (pa quedase). Los xudíos hasta les ceyes de los visigodos y con ganes de cambéu. Y, cómo non ... Los vascones de correría pola Rioh.a «que quieren tol vino pa ellos». ¿Yá acabasteis col chacolí? .
- «Per ehí nun paso», glaya Rodrigo, al que malpenes-y da tiempu a estrenar la corona y yá tien que vistir l’armadura y salir escopetáu. ¿Qué tendrá La Rioh.a que toles invasiones quieren dir bautizase ehí? ...
.L’ascensión al tronu de Rodrigo crea una esmoleciente confusión. Les cróniques aporten datos estremaos talo lo que pasa con Witiza, del que nun se sabe a ciencia cierta quién ye la madre. L’ascendencia de Rodrigo tampoco queda clara seique lo más probable ye que fuere nietu de Chindasvinto y polo tanto fíu de Teodofredo, al que asesinare Egica’l pá de Witiza. ¿Cómo nun diben los fíos de Witiza – Agila - traicionar a Rodrigo? .A la espera d’una asunción de criterios sacamos en conclusión que Rodrigo baxó del norte, reunió un exércitu na Bética (Córdoba), d’onde fuere Dux, y xunto colos fíos de Witiza atacó al exércitu árabe al mandu de Táriq ibn Ziyad, manumitíu de Muza, cerca les Llagunes de La Janda (Cádiz) y por mor de la traición de los witizanos, que comandaben les ales del exércitu, sufrieron una tremenda derrota onde’l mesmu Rodrigo perdió la vida. Poco dempués tienen otra estroza n’Ecija y darréu paséu militar bereber hasta Toledo. Los xudíos diben faciéndose cargu de l’alministración de les ciudaes conquistaes, siempres embaxo’l control militar árabe.* El conde de Ceuta, don Xulián, agabitó lo suyo tresportando a la Península l’exércitu de Táriq.
[ El CNI da l'avisu ....<<Hai nun movimientu de moros dica'l norte de Marruecos ablucante>> .....¿Qué fai'l gobiernu? ... Dir de ¡VACACIONES! mientres Ceuta ye invadida por ¡ + de 80.000 VERANEANTES!. <<Tócate l'alma, manín!>>]
|
| << TURISTES subjetivos en CEUTA>> |
* 4. NOTA: La invasión musulmana (711) ye farda asgaya pa otru post que s’espublizará .... Cuando los dioses nos seyan favoratibles.
::::::::::::::::::::::::::::::::::::::::::::::
. FECHOS y FECHES CLAVE na historia de los VISIGODOS
¿Y si facemos un repasu de los fechos y feches clave en la historia de los visigodos?
Esta historia podemos dicir qu’entama nel añu 376 cuando los godos crucien el Danubio fuxendo de los hunos y va ¿terminar? en 711 cuando los árabes omeyes ganen la Batalla del Guadalete . Otros puen pensar qu’esto entama con Alarico (410). A nun ser que pienses que la historia remanez con don Pelayo, d’esta miente somos fíos de los visigodos y ...
Los fechos más señalaos na historia de los VISIGODOS podemos resumilos n’estos puntos (Nunca naide va tar d’alcuerdu total sicasí...).
 |
| <La Unidá de la Hispania visigoda>[31] |
. Añu (376). Los godos crucien el ríu Danubio persiguíos polos hunos (orixe asiáticu) y entren en territoriu romanu.
- [Añu (409). Invasión del imperiu romanu por suevos, vándalos y alanos]
. Añu (410). Alarico, el lider visigodu, arrasa Roma y los visigodos asienten na Galia.
. En (416) Pautu con Roma. Los visigodos entren n’ Hispania como aliaos de Roma col envís d’esaniciar de la Península a otros pueblos “bárbaros”, talo vándalos y alanos.
. En (418) fúndase’l Reinu visigodu de Tolosa por mor d’un pautu (FOEDUS) con Roma ensin escaecer la escorribanda prometía a esos otros pueblos ¿bárbaros?.
- [Añu (434) . ¡Llega Atila! , «L’azote de Dios». Ente los años (434-453) amarga la vida a godos y romanos. En 451 crucia’l Rin y tien de ser frenáu, «Campos Cataláunicos*» , por una andecha de visigodos y romanos (Teodorico I-Aecio). Menos mal que’l Papa (León I) y les epidemies tiénenlu parao (552)].
. Añu (475). Eurico, aprovechando la debilidá romana ruempe’l pautu de “Foedus” (federaos) con Roma y declárase INDEPENDIENTE. «Odoacro, yá te pues dir al carayu». «Yá somos el Reinu independiente de Tolosa»
- [[Añu 476. L’imperiu romanu entra en colapsu cuando’l bárbaru Odoacro derrota al caberu emperador romanu d’Occidente, Rómulo Augusto. El GRAN IMPERIU va quedar reducíu a I.R. d’Oriente o Bizantín (Constantinopla) ]].
. Tres la perda la Batalla de Vouillé ( 507) los visigodos – con capital en Toulouse - tienen que colar pa Hispania y terminen poniendo la capital en Toledo. Seique dalgunos siguen asitiaos nel S-E de Francia (La Narbonense o Septimania).
. Con Leovigildo (585) Hispania queda cuasi toa unificada tres conquistar el Reinu Suevu; namás falta el S-E la península, nomáu Spania y baxo’l poder del emperador romanu-bizantín Justiniano I.
. En (589) con Recaredo los visigodos abandonen l’arrianismu y converten al catolicismu. Unificación relixosa.
. Sieglu VII: Recesvinto (654) asoleya’l Liber Iudiciorum (Fueru Xulgu) pa tou’l reinu. «Visigodos y romanos somos unos».
. (711): Don Rodrigo pierde la conocida Batalla del Guadalete. «Good by, Hispania» . «Ñaz Al Andalus».
***
Dende l’añu 410, tres el saquéu de Roma por Alarico, hasta 711 cola Batalla del Guadalete pasaren 300 años, son los de la verdadera historia visigoda. ¿Siguimos, quiciabes, con Don Pelayo y .....?
. 722: Don Pelayo. Cuadonga. Cangues d’Onís. Reinu d’Asturies.
. 725. Cai la Septimania y asina ¿acaba la historia de los visigodos?...
***
* Na Batalla de los Campos Cataláunicos lluchen dos aliances: (A) Romanos [Aecio], visigodos (Teodorico I), alanos, francos y burgundios . (B) Hunos [Atila], ostrogodos, gépidos, hérulos y + .
**********************************
****************************
ANEXU:
Col envís qu'esti post nun te resulte un tatu pesáu voi apurrite dellos comentarios más amarillistes al rodiu'l TESORU VISIGODU, la tchorga (ayalga) visigoda por escelencia.
El TESORU de GUARRAZAR
Si en daqué salieron finos los visigodos cuido que la orfebrería yera’l puntu cume. El coloríu, esi lluxu bien pomposu con una téunica bien precisa, mecedura ente la tradición xermánica y la influyencia bizantina. Buscaben la policromía a partir de perlles, piedres precioses, vidríos y pasta de colores estremaos. Gustába-yos l'oru en llámines bien fines sobro otres más barates «hai qu’aforrar». Seique aquello que rellumaba más que’l sol yera la téunica del croisonné, un rellenu d’alvioles de metal con vidriu fundío o piedres precioses que van formando unos dibuxos xeométricos perguapos de vexetales o animales estilizaos. Corones o cruces votives y fíbules son los obxetos que más abonden.
Un día daquién alcontró un tesoru nun pueblín de Toledo; Guadamur ye l’afortunáu. Na güertina de Guarrazar abriéronse les tierres p’amosanos una ayalga ensin igual: ¡El tesoru visigodu por tantu tiempu olvidáu!.
****************************
.webp) |
| < El tesoru de Guarrazar>> [32] |
Ello yera agostu de 1858. Isabel II reinaba n’España y el xeneral O’Donnel taba al frente del executivu.
Llovía a calderaos. El matrimoniu de María y Paco taba enforma preocupáu. Na güerta de Guarrazar asitiada nel pueblín de Guadamur, bien cerquina de Toledo, hebo un movimientu de tierres bien poco habitual. La esmolición dio pasu al ablucamientu cuando de les entreteles de la tierra surdió un brillu escomanáu. Averáronse y llevantaron la llosa de lo que fuere un antiguu cementeriu.
- ¡María, somos ricos, equí hai oru pa pandiar!
- Vamos a tapalo y venimos pela nueche, cuando naide nun nos vea. Neña, tu nun abras el picu hasta que nun sepamos de qué se trata.
Y asina lo ficieron pero siempres hai daquién que ferregüeya ... Asina qu’al día siguiente’l vecín foi a escarbar pela redolada y alcontró otra llosa qu’afayaba una gran cacida de corones y cruces espectaculares.
Callaron como afogaos y vendieron a tratantes aquel tesoru ensin saber lo que teníen entre manes. Los plateros de Toledo tampoco yeren conscientes de l’ayalga qu’acaben de mercar; sicasí yá barruntaben qu’aquello yera daqué d’un grandísimu valir. Una parte del tesoru terminó nel Muséu du Moyen Âge de París (dalgo tornó p’acá en 1941), otra parte nel Muséu Arqueolóxicu Nacional (Madrid) y el ¿restu? nel Palaciu Real de Madrid.
¿Cuálos son los oxetos principales d’esti tesoru?
. La corona votiva de Recesvinto (MAN). Calidá téunica hispa-romana.
. La corona de Suintila (En busca y captura).
. Más de 23 coronas d’otros reis. [Seguramente de Chindasvinto y más]
. Delles cruces (exvotos): cruz procesional ya otros brazos d’oru.
. Cadenes d’oru pa colgar cruces y corones (a la xermánica).
. Colgantes y llámines d’oru decoraes a estilu cloisonné (a la bizantina).
Nota: El tesoru caltién munchos elementos llitúrxicos; les mesmes corones reales taben colingando del techu nes ilesies sobro la cabeza del oficiante, nun yeren pa llucir na tiesta. Esto indica la conexón de la Ilesia y l’Estáu quedando patente nos Conceyos de Toledo (Concilios), sobre manera.
Una parte pergrande d’esti tesoru entá s’alcuentra desapaecida.
La corona votiva de Suintila (621-631)
«SVINTHILANVS REX OFFERET» ye la inscripción que figuraba nuna corona votiva qu’ofreciere’l rei Suintila a la Ilesia toledana nel sieglu VII. Foi una de les pieces que remanecieron nel tesoru de Guarrazar (Guadamur). Tres dellos avantares foi ¿regalada? a la reina Sabel II d’España (ella pagó lo suyo). El (4-4-1921) l’Armería del palaciu Real de Madrid sufrió’l robu de delles pieces del Tesoru de Guarrazar, la más importante la citada corona de Suintila. Nunca más se supo. La perda nun tien igua dala.
[semeya:33]
RECÓPOLIS
(578)
 |
| <Recópolis, quién te vio y quién te ve> [34] |
Na contorna de L’Alcarria (Guadalajara), na llomba de La Oliva, a la vera d’un pueblín nomáu Zorita de los Canes, queden les buelgues d’una ciudá antigua n’otros tiempos conocida como RECÓPOLIS , ¿la ciudá de Recaredo?. Lo propio sedría “Rexopolis”, la ciudá del rei. A fin de cuentes Recaredo yera’l segundo de los fíos y Hermenegildo, el primixeniu, entá nun se sublevare escontra so padre¿celos?... Nun paez sida bastante. En cualquier casu ye la primer ciudá de l’Alta Edá Media llevantada por orde real.
Ello yera 578. Leovigildo fai una pausa nes campañes militares. Col envís de sacar pechu frente a merovinxos y bizantinos acuña moneda y manda llevantar una ciudá col so palaciu, plaza pública, ilesia palatina, cais bien planificaes acorrompinaes de cases y tiendes, muralla defensiva con tramos ente torres cuadraes qu’arrodiaben les 33 Ha del allugamientu ya una Puerta d’Entrada monumental, dependencies comerciales, acueductu ... «Quiero una semeya de Constantinopla».
. Esta ciudá palatina nun tuvo munchu percorríu por mor de la cris del reinu visigodu y la invasión islámica (711) que treslladaron la ciudá a un llugar cercanu seique más poliorcéticu, Zorita de los Canes (Madinat Surita); la mayoría de los materiales primixenios sirvieron pa llevantar el nuevu allugamientu (IX); entá nos queden los restos del castiellu-alcazaba y tamién hai un Centru d’Interpretación en Recópolis.
****************************
. BIBLIOGRAFÍA
P’atopar información al rodiu d’esti post “Leovigildo, rei de los visigodos” pues rebuscar per equí ....
. “Anexo Reyes Godos”.
. “Leovigildo. Rey de los hispanos” (José Soto Chica).
. Wikipedia.
. “Historia de los godos” San ISidoro de Sevilla.
. San Leandro de Sevilla.
. Gregorio de Tours
. La persecución a los judíos en la España visigoda
. El Código de Recesvinto.
. Ducáu d’ Asturias. (Ducado de Asturias)
. XIII CONCILIU VISIGODU (¿6+2 ducaos) Chindasvinto y Recesvinto.
. “La vida y muerte del rey Bamba” de Lope de vega.
. “Reis visigodos: Árbol genealógico”. Linajes.
**************
CUMPLIMIENTOS
 |
| ¡Qu'esfrutes! [35] |
Seique debe quedar claro a lo llargo del post a quién-y debo la mio gratitú por aidame a comprender un poco la historia de los VISIGODOS paezme de recibu remarcalos esplicitamente. Magar que dalgún pue quedame nel tinteru atrévome con esti llistáu:
. Don José Soto Chica per aciu del so llibru: "Leovigildo. El Rey de los hispanos" . Tengo escuchao dellos post coles entrevistes que-y tienen fecho. [Sigo lleendo con prestu, profesor, les sos histories. ¡Que'l ritmu nun pare! ¡Qu'enantes muerra'l que xibla!].
. A la Wikipedia onde consulto de contino y alcuentro bayura de semeyes.
. A dellos blogs y páxines web poles sos histories y SEMEYES, talo: < Pintirest.com>. <blogspot.com>. <pining.com>. <www.alamy.com>. <mundoprimaria.com>. <rtve.es>. <ciudaddelastresculturas.com>. <gettyimages.com>. <um.es>. <hotelconquistadetoledo.com>. <acchistoriablogspot.com>. <blogspo.tripavisor.es>. <www.amazon.es>. <lahistoriadeluniverso.blogspot.com>. <nietos_1 leamoslabiblia.com>. <kokita-eri-historiadelarte.blogspot.com>. <guerrasconhistoria.wordpress.com>. <RTVE>. <es.slideshare.net>. <guarraza.com>. <hoteles.net>.
Tengo escuchao dellos postcard per equí: <@Historia ex Hispania>. <@PostalesdelPasado>. <Pedazos de Historia> ¡Qué entrevista, Alberto Garín!. <@BELLUMARTISHISTORIAR>. < @historiasbelicas (Sergio)>. <@CrónicasdelaHistoria>.
