¡Bon Camín!. < Territoriu Comanche [1]: La Batalla del Clavih.o>

            ¡Bon Camín! Al rodiu'l Camín Primitivu.

                           < Territoriu Comanche [1]: El Clavih.o >
                   
                                            <Camín de Niria> na Batalla del Clavijo>

< El  Clavih.o>
Llugar de la mítica batalla onde Ramiro I derrotó a les güestes d'Abderramán I cola andecha de Santiago.
Nel Clavijo ñació'l mitu de Xacobu como Patrón d'España.
<Camín de Niria> pue dar fe d'ello; patió'l campu de batalla y desencantexó'l Castiellu. 

       Na última entrada qu'espublizamos al rodiu'l Camín Primitivu <¡Bon Camín [1]: Uviéu - Grao> quedamos en cumplir una promesa delantre del Palaciu de Miranda-Valdecarzana, en Grau:

El Palaciu la promesa: Miranda-Valdecarzana,
al pie la mítica muralla de la villa moscona.

    - Esti escudu de los Miranda - Ponce de Lleón fai referencia a la "Batalla del Clavih.o", na Rioh.a, cuando Ramiro I derrotó a les güestes d'Abderramán II nos campos d'Albelda. Cuido que nun taría mal averase hasta ellí pa comprobar si hai daqué de cierto nesa lleenda. ¿Nun te petez conocer el Monte Laturce? Igual tenemos una ruta afayadiza pa facer pela redolada.
    - Tu quies volver a Logroño, ¿eh?. Facer alcordanza de los bonos tiempos, cuando yéremos chavales y díbemos camín de la Côte d'Azur o a Barcelona ...
    - Home, anque namás sea por tomar unos pinchinos na Ruta los Vinos ...
    - ¡Vaya cogordes!
    - ¿Cómo? ... ¿Quién s'enfiló?
    - Naide, refiérome a les setes; ellí descubrimos les setes con xamón.
    - Ah, que n'asturianu les setes llámense cogordes; yá dicía yo. ¿Entós qué, repetimos?
   - Acuéi, fecho. Cuando los guajes marchen pa Roma nós tiramos pa la Rioja, ¿cómo lo ves?.

      Camín de casa ficimos alcordanza del escudu d'armes qu'hai a la entrada de palaciu, la nuesa xida del viax:

[[El blasón de los Miranda Ponce de Lleón ye un escudu circular orláu por dos sierpes entellazaes y col campu partíu. Nel primer cuartel les armes de los Miranda, cinco veneres en souter, y nel segundu’l lleón rampante  cola corona real por mor de los Ponce de Lleón.]]

- ¿Y qué más alcontrasti n'internet?

- Bayura de coses, van prestate, yá verás.

- A ver, ¿sabes el porqué de les doncelles?

- Pos paez qu’en tiempos de Ramiro I, el Vara de la xusticia, un caballeru nomáu Miranda pudo comprobar “in situ” como los moros llevaben prisioneres una partida de doncelles camín de Córduba, por mor d’aquel pautu de Mauregato colos moros.

-Bueno, eso nun ta claro; pue que fuere propaganda subversiva del Scriptorium de la Corona, roceana cola rama ¿golpista? Cántabra.

- Bueno… Yá tamos maquinando… Sigo. El casu ye que’l Miranda, un paisanu de pelo en pechu, cuando vio la comitiva allancióse enriba los soldaos moros con un estandoriu y lliberó les cinco doncelles.

- ¿Él solu?

- Eso dicen. El fechu llegó a los oyíos del Rei Ramiro, que daquella andaba en campaña escontra’l sarracenu per tierres de La Rioh.a, y llamólu a files. Cuenten que’l tal Miranda foi un finxu perimportante na célebre “Batalla del Clavih.o”.

- Esa sí que te la clavaron, ¿Ramiro nel Clavih.o?…. Lleenda …Hasta dicen que la batalla foi namás una lleenda…

- De lleendes tamos falando, en cualquier casu qué pienses tu, cuentista consumáu.

- Polo que tengo entendío nun hebo una batalla del Clavih.o, hebo dos.

- ¿¡¡¡?

- Sí, dos; pero en tiempos del so fíu Ordoño I. Si quies cuéntelo pero tienes que pedímelo por escrito, agora nun hai tiempu, tenemos que siguir. Y piensa qu’esta hestoria, asina como l’escudu los Miranda, ta rellacionada en ciertu mou col Camín Xacobéu, ¿cómo te quedó’l cuerpu?….

- ¿¡Con Santiago!?

- El mesmu.

- ¡Ah, sí! ,¿eh?… Y esto que te digo, ¿esi Clavih.o esiste de verdá?

- Creyo que sí; pámique ye un pueblu de La Rioja, a cuatro pasos de la capital.

- Asina que’l Clavih.o ta al par de Logroño… ¿Alcuérdeste d’aquella ruta de los vinos?…

- Como pa nun alcordame… Cómo nos punximos de vinu y cogordes (setes) con xamón…

- Sí, bones cogordes…. Pos mira que te digo, monín; voi mandate una solicitú.

       Y llegóme l’escritu esa mesma nueche, yá en casa:

<< Mon cher ami:

Dao que la Batalla del Clavih.o ta rellacionada dafechu col Camín Xacobéu, y per ende col Camín Primitivu, tengo a bien

SOLICITAR

de la bayurosa bondá de V.I., que la so vida guarde Dios munchos años, fer una visita al pueblu del Clavijo, y redolada, cola fin de poder dar fe d’esi fechu milagrosu y d’esta miente esparcer la noticia ente los nuesos llectores. Si nos lleven aguantando tantu tiempu per estes caleyes de Dios bien merecen ser bendecíos pol sangre rioxano.

Ye gracia qu’espero algamar del so sabiu entender y proceder cola ayuda de Santiago, si fuere menester.

La Parienta >>

                                      *****************
    Al alborecer d'un martes d'estivu salimos camín de La Rioja a la fin de buscar los raigaños de la mítica Batalla del Clavijo, la que dio orixe a la lleenda de Santiago como patrón d'España. Un Camín Xacobéu que s'aprecie como ye'l ¡Bon Camín! nun pue escaecer esta circuntancia asina que ruta del norte hasta Laredo y darréu 90º dica'l sur.

Puertu Los Tornos (915 m/a). Salimos de Cantabria
pa entrar na Merindá de Montih.a.

       El Puertu los Tornos ye la llende ente Cantabria y Les Merindaes de Burgos. A 915 m. daltor presenta unes vistes ablucantes del Valle del Soba, una panorámica maxestuosa, una parada obligatoria nun mirador onde te sientes talo un Dios. Yo toi bien seguru que per equí pasaren bayura de repobladores camín de los Valles de Mena y Carranza, quiciabes hasta Vítulo ya Ervigio-yos cayere una llárima de señaldá .....
       - Nun vos esmolecer, gallos; espéravos el Paradisu de les Merindaes; doi fe d'ello. Pa que nun vos sintáis solos vamos faevos compaía.
     La capital de la Merindá de Montija ye Villasante, un pueblu preciosu onde pienso parar la próxima vegada que vuelva a les Merindaes.

Palaciu Alvarado (El Ribero),
onde agospió'l propiu Carlos V, y nós.

Palaciu Alvarado (El Ribero), 
onde agospió <Camín de Niria>. 

      Pos sí, a primeros d'Agostu del 19  tábemos camín de la Rioja pela ruta costera de Laredo: Xixón, LLanes, Unquera, San Vicente, Torrelavega, Laredo (casi). Equí disviamos dica'l Sur pela N-232 y tres xubir el puertu Los Tornos (915 m)  tiramos dica Oña pasando pel Ribero*, Mediana de Pomar y Trespaderne, territoriu comanche de Les Merindaes bastante bien conocíes por nós. Salimos pelos Montes Obarenes, N-623, pa embocar na Bureba per aciu del Escobiu de Pancorbo, mesmo onde en 816 tuvimos - los cristianos del Norte - una amarraza pistonuda coles güestes d'Alhakem I (796-822) al mandu del sempiternu d'Abd al-Karim.

La cama de Carlos V
¿Por qué voi ser menos qu'un Rei?

* Nel Ribero hai un palaciu, El Palaciu Alvarado, onde agospiáremos l'añu pasáu, na visita anual que facemos a Les Merindaes. Tres díes nuna suite, con dosel, como manden los cánones; por una vez na vida ... Enteré que nesa mesma cama aseló Carlos V pa escaecer los problemes del Imperiu. Yo fici otru tanto mientres camentaba na Reina, Doña Isabel de Portugal (interpretada na tele por Blanca Suárez); nueches inolvidables.


Siguimos la mesma ruta qu'emplegaben siempres los caldeos cuando veníen de vaciones braniegues camín  d'Álava: Haro, Briones, Vivanco, Torremontalvo y Cenicero enantes d'aportar a la capital rioh.ana: Logroño. La verdá que bien que los comprendo y hasta, casi, los disculpo; yo esfruto como un verderón per estos pandos de viñéu y cereal onde enantes la mirada y el finxu'l cielu piérdese nel infinitu; son una pasada ...

TARANCO, añu 800: Rindiendo homenax a CASTIELLA
Nesti Monesteriu llevantáu pol abá Vítulo
aprució por vez primera el nome de CASTILLA.

      Cuando'l reló marcaba  les diez y venti (10:20) y corríemos paralelo al Ríu Trueba  pasábemos per delantre'l Palaciu los Alvarado, na zona del Ribero, onde agospíaremos l'añu pasáu durante tres díes. ¡Qué recuerdos!.  Foi d'ehí onde nos movimos pa visitar el Pantanu d'Ordunte nel Valle de Mena asina como Taranco, un pueblín onde Vítulo ya Ervigio fundaren el Monesteriu de San Emeterio, nel añu 800, (anguaño hai una ermita a Santu Medel),  por mor de les repoblaciones d'Alfonso II el Castu. Equí caltiense un monumentu a Castiella dao que nun documentu qu'apruciere en San Millán de la Cogolla da fe d'esti fechu <<in territorio Castielle>>, la primera vez que la Bardulia ye bautizada como Castiella (pue que'l documentu nun sía del to creyible, pero qué guapo queda), en cualquier casu ellí tuvimos. Tou'l Valle de Mena ye una gozada; pienso en tornar pero agospiando na capital, Villasana.

Castiellu de Cebolleros

      Llegamos a Medina de Pomar a eso de les 10 y media pero esta vegada nun paramos; adiós al Alcázar de los Condestables (Muséu Históricu de Les Merindaes ) y al Conventu de Santa Clara onde s'abelluga'l Panteón de los celebérrimos Velasco. Dexamos atrás Moneo y pasamos per Nofuentes, capital de la Merindá de Cuesta Urria, nos rimeros de la Sierra de la Tesla ya onde s'alcuentra Mijangos, un finxu de la dómina visigótica talo que Tedeja o Santa Mª de los Reis Godos. Un pelín antes acolumbramos Cebolleros, onde un particular llevantó un castiellu con regodones del ríu, doi fe d'ello.
 Siguimos pelos meandros del Ríu Nela hasta qu'esti empata col Ebru, na villa de Trespaderne, municipiu del Partíu X. de Villarcayo pero que caltién el coral na Merindá de Cuesta Urria. Al finar la Sierra de la Tesla el gran Ebru da un reblincu pa crear l' Escobiu de la Horadada. Ensiguida lu imita'l Ríu Oca con otru acoldu pa entrar n'Oña; un fermosu cuellu de botella de dos beyos pa entrar o salir de la Meseta Castellana.
       - Sarracenos, si queréis venir al Norte habéis pasar peles Forques Caudines* del Ebru.

* Les Forques Caudines: Dos foces consecutives peles que se vieren obligaes a pasar les tropes romanes na so llucha colos samites (Benevento-Italia). Pero a la fin siempres ganen los romanos.


       Al pasar per Trespaderne nun pudimos evitar fer alcordanza del Castiellu de Tedeja onde l'añu pasáu (2018), na tercera visita a Les Merindades, tuvimos el gociu de xubir pa conocer el territoriu de Hernán de Mena, el protagonista de <El caballero del Jabalí blanco>, una novela de JJ Esparza autor al que siguimos dafechu per aciu les sos noveles al rodiu'l Reinu d'Asturies que pa min nun son otro que <Cróniques>. Gracies, valencianu.

Castiellu-Fortaleza de Tedeja (Trespaderne)

        [[ El castiellu-fortaleza de Tedeja - del llatín "tetelis"=tutela, xixila - ta asitiáu en Burgos, nuna fastera de los montes de La Tesla, a la entrada del Escobiu de la Horadada - un cañón tallaú polos ríos Oca y Ebru - controlando'l pasu a la Bureba, a Castiella, pol sur; al este'l Valle de Tobalina que da pasu a Álava; al norte el valle del Ríu Nela que sigue pa Medina de Pomar, Villarcayo, Espinosa y Cantabria.
       Seique les primeres cites documentales son de 790 cuando l'Abá Quelino fai una donación al Monesteriu de San Xuan de Cillaperlata, <subtus Tetelia>, embaxo l'abellugu del castiellu de  Tedeja. Pero les escavaciones demostraren que tien tao en funcionamientu dende muncho más antiguo, dende la dómina romana, y si siguen escavando ... Tamién ye de presumir que fuere un baluarte durante'l Reinu d'Asturies y antes pos hai historiadores que camienten fuere l'abellugu de Pedro de Cantabria, el suegru de don Pelayo, darréu la estriza d'Amaya - la so capital - polos bereberes. Asina que polo menos romanu y con munches igües al traviés del tiempu, sobre manera de la dómina goda.
     Tien un fuerte componente defensivu con una muralla de mampostería de 3 m. d'altor y dos d'ancho sofitada en seis cubos semicirculares ya aterrazaos amás de tar arrodiáu de fosu y contrafosu. Una puerta al este abellugada por una torre cuadrangular de sillería - ¿romano? - apurre la cronoloxía más tempranero (de momentu).

                                                 ****************************
       Tan esmolecíos andábemos col cambiu de carretera que nun nos decatamos de la señal de tráficu qu'había nel suelu polo que la policía viose obligada a llamanos l'atención. La cara de panoyos y la camiseta'l Sporting llibráronnos d'una multa merecida (la bandera de Santiago tamién ye raxona, h.a, h.a). Ai, Señor; nun se pue llegar a vieyu, y si nun llegues ... GRACIES de toes maneres, prondremos tol procuru pa que nun vuelva asoceder.

La  SANTINA 

<La Virxe de Cuadonga>, en Cillaperlata .
 Trespaderne - Merindá de Cuesta-Urria - Burgos

      Pero sigo cavilgando ... ¿Nun tendría algo que ver la Santina nesti MILAGRU ? ... Vamos ver, equí cerquina, en Trespaderne, na carretera que te lleva al Valle de Tobalina hai un pueblín mui célebre, a la vera d'un embalse, qu'aprovecha un meandru del Ebru: CILLAPERLATA.
¿Qué hai en Cillaperlata?... Nin más nin menos que la imax más antigua que conservamos de la Virxe de Cuadonga. Sí, sí; de la nuesa Santina, como lo oyes. Hasta hai quien afita que la braera Batalla de Cuadonga ocurrió equí, en Cillaperlata, a la vera d'un eremitoriu sobro'l Ebru. Lo qu'oyes, manín. Y ye guapo informase porque nun son bales de foguéu.... Equí cerquina había - queden güelgues - un monesteriu beneditín, Santa Mª de la Foz, onde estudiare Ermesinda, la fía de Pelayo y muyer d'Alfonso I, el Cántabru, a la vez fíu de Pedro duque visigóticu de Cantabria. Y yá sabes lo que se camienta, qu'en Cuadonga llevantó esti rei Alfonso I un monesteriu benitu; ¿trexo los monxos de Cillaperlata por mor de la <Tierra quemada>?... Si entres n'esti mesmu blog de "Camín de Niria" nel post:
<De co casa a Cuadonga [ y 10] : Cangues d'Onna-La Cuevona> pues enantar la información. Yo cópiote un migayu pa que nagües...

Cillaperlata: Ilesia Santa María (agospia la Santina)
y Fonte de Cuadonga, inmigrante (¿Cabeces de Picu?)

       [[   Claudio ye un paisanu d'unos setenta, afable y servicial. Nun tardó cinco miunutos en aportar con una sorrisa d'oreya a oreya; taba feliz de la vida porque diba face-y un serviciu a la Virxe, a la so Virxe, a la Santina y de pasu a la comunidá pos ye una forma de tener a Cillaperlata nel mapa. Claro qu'entá tienen más... Yá veremos.
    - La verdadera Virxe de Cuadonga ye esta que ta nel altar, la de fuera ye una semeya. ¿Cómo díbemos tenela nel estragal, ho, sola y pasando fríu. ¡De manera alguna!.
    - Aseméyense pero al empar son bien diferentes.
    -  Esta Virxe estrémase bien de la que tenéis en Cuadonga. Dambes lleven corona, seique diferentes, y dambes tán con el Neñu pero esta tien una cara más amplia y escamplada, talo que Chusín; la vuesa tien la cara más ovalada. La rosa na mano diestra tamién ye común. Y si vos decatáis la vuestra amuésase de pie mientres la nuesa remanez sentada.
     - Claro, ye más vieya y cansa más.
     - ¡H.a, h.a, h.a! . Bueno, nosotros tamién tenemos dalgunes reliquies como una espina de la cruz de Cristu o un güesu del barazu d'un santu.

Eremitoriu en Cillaperlata,
sobro les agües d'El Ebro.
Tamién s'emplegó como Sala de Conceyos y cuadra.

     - Claudio,  ruxe per círculos burgaleses que la Batalla Cuadonga igual tevo llugar n'esta zona...
     - Ye qu'hai delles coincidencies: La batalla ocurrió cerca d'un cueva que cai sobro un ríu, ¿non?. Pos ehí mesmo detrás tenéis una cuevona, un ermitoriu que cai sobro'l Ríu Ebru, depués vais a vela. Y la Virxe de Cuadonga qu'agabitó na batalla ta delantre vuestro. Tenéi en cuenta qu'Alfonso yera fíu de Pedro, Duque de Cantabria, y la Bardulia pertenecía a esi ducáu.
    - Vamos, qu'Alfonso conocía esto como la palma la mano...
     - Yá toi arranáu por vela. Y esto que-y digo, ¿ a qué pue debese la coincidencia de los nomes de la Virxe?
     - Yá sabéis, ye lo que cuenten les lleendes, que'l Rei Alfonso I, el xenru Pelayo casáu con Ermesinda, llevantó un monesteriu mistu (pero ensin ayuntamientos, ¿eh?) en Cuadonga y resulta qu'equí mesmo, nes afueres de Cillaperlata, tamién había - queden los restos - otru monesteriu beneditín onde cuiden que la propia Ermesinda tevo profesando... ¿Sedría una forma de convencer a los monxos/es pa que colaren al norte pofr de la <tierra quemada?...
    - ¡Esto ye mui gordo! ¿Podemos ver los restos? ]] 
Y fuimos, pero pa ver el suañu de Claudio tienes que dir con elli onde te dixi...

                                                           ********************
      Cuando travesamos Oña entá nun nos decatáremos del erru circulatoriu y quedáremos embelesaos faciendo alcordanza del <Cronicón d'Oña>, representación popular nel Monesteríu de San Salvador que tuviéremos el gustu de presenciar el veranu pasáu. Algo tenemos escrito al respeutive, vamos rescatalo ...

EL CHRONICÓN d’OÑA

Per Oña, faciendo tiempu pal Chronicón.

      Ente los díes 8 y 15 d’Agostu (2018) los vecinos del pueblu medieval d’Oña (Burgos) tuvieren el gustu de danos a conocer los anicios históricos del so monesteriu per aciu d’una representación teatral onde los protagonistes tán interpretaos polos mesmos onienses.

Trenta años (anguaño 32) lleven estos increyibles actores metiéndose na pelleya de Tigridia, de Sancho García, d’Urraca, d’Iñigo, de Fernando I y hasta del Cid Campeador. Yo tuvi la suerte de viaxar a la Edá Media sentáu na mesma butaca onde los nobles castellanos aldericaben al rodiu la conveniencia o non de pautar col Victoriosu, Almanzor.

      Si daqué día tienes un suañu mira a ver si pues perdete pela Bardulia medieval y rematar col Chronicón d’Oña, nunca nun despertarás d’esta pantasía.

                                                       ---------------------------------

Monesteriu de San Salvador d'Oña
Vamos siguir a los actores, el Chronicón vien d'entamar.

        El Chronicón cuenta los episodios qu’ocurrieron en Castiella nel añu 1.011
( sieglu XI).

El Monesteriu de San Salvador d’Oña ta asitiáu n' Oña, capital de la Comarca la Bureba, provincia de Burgos y Comunidá de Castiella-Lleón seique por proximidá ya hestoria pue considerase una Merindá más.

     Predominen nél dos estilos:

       . Góticu: Ilesia y Sillería

       . Barrocu: Fachada y Retablu principal.

       Foi fundáu nel sieglu XI (1011) por Sancho García, conde de Castiella y nietu del celebérrimu conde Fernán González. Donó-ylu a la so fía Tigridia como monesteriu mistu o dúplice: con monxes de San Xuan de Cillaperlata y monxos de San Salvador de Loberuela.

Dende’l 30 de xunu de 1033 el Monesteriu pasó a depender namás de los monxos cluniacenses por orde de Sancho’l Mayor de Navarra y la so muyer Doña Mayor. San Salvador llegó a tener más de 70 monesterios del norte Burgos, Cantabria y valle del Pisuerga palentín embaxo’l so abellugu o xurisdición.

1. EL CHRONICÓN: Testu del espectáculu.

      <El Chronicón entama peles cais del pueblu, que ye'l protagonista>

      Nel añu 970 palma Fernán González, el primer conde d’aquelles tierres onde cien años atrás entamaron a llevantar castiellos pa defendese de les continues racies de los moros; tierres de la Bardulia que pasaron a nomase Castiella. Al so bravu fíu Garci Fernández tocó-y baillar cola más fea, Almanzor, y nun paraba de llevar hosties. De manera tala que’l fíu d’esti, Sancho García (995-1017), más políticu y realista decidió pautar con aquel xostrón mentanto se recomponía.

     - ¡Agora verás, Mugait!… ¡Vas enterate lo que ye un cristianu!

     Pasen años d’amarraza, d’espellica n’espellica, hasta la muerte del invencible en 1002.

Tres la muerte d’Al-Mansur (el victoriosu) vienen años d’intriga en Córdoba y Sancho aprovecha pa sacar pechu. Ponse de parte de Suleymán que se convierte en califa y esti, agradecíu, devuelve-y tolo que-y quitare Almanzor pelos rimeros del Dueru.

      - El qu’a bon árbol s’arima…

APOTEOSIS final del Chronicón,

Nós vímoslo asina:

    << Cuatro fíes tien don Sancho

con Urraca de Saldaña,
cuatro fíes a casar
pa facer grande la Patria:

    Doña Sancha va amestar

col conde de Barcelona,

mientres Urraca emparienta

con Guillermo de Gascona

y Tigridia ye abadesa

del Monesteriu d’Oña.

Queda una por casar,

la imponente Muniadonna

qu’echa’l llazu a Sanchu’l Grande,

¡yá ye Reina de Pamplona!.

    

Pero don Sancho nun cansa

de d’afilar la so espadona 

y a lo postrer de la vida

tendrá recompensa bona:

Sancho García,
el de los <Bonos fueros>

    - A la fin yá tengo un fíu

pa que lleve la corona,

va nomase don García

de Castiella, a muncha honra.

El mesmu día que casa

mándenlu pa la piedrona.

Don Sancho palma del sustu

mientres Castiella lu llora.

   - ¿Fuisti tu, Sanchu Garcés,

el que mancilló la honra?

¿Nun fuisti pa conformate

con llevar a Muniadonna

qu’a Castiella dexes vilba

pa engarciar la to corona?

Si tuvisteis parte alguna

nesta tamaña andrómica

que Dios venga y vos demande

dende’l Chronicón d’Oña.

     Tardó Sanchu tiempu a esgaya

en combayar cola tropa:

Chronicón, aplausu fianal.

   - Pa que veáis que nun tengo

ardicia por tala gloria

dexo al mio fíu Fernando

al mandu vuesa corona.

(¿Y quién manda per detrás

como que nun quier la cosa?).

Cinco fíos, polo menos,

tevo ¡ai, señora Muniadonna!;

sedrá’l segundu, Fernando,

el que va algamar la gloria

axuntando yá pa España

Castiella, Lleón y Pamplona.
                                                    - Maríu,
                                                          nunca nun vi cosa tala
                                                          como'l Chrinicón d'Oña. >>

                                             ******************************

Pancorbo, pasu míticu na hestotia d'España.
 Badr, llugarteniente d'Alderramán I, fortificáralu hacia 767.

        Pasu ente pasu dexamos Les Merindaes y vamos averándonos a Poncorbo, el escobiu onde se desendolcó una batalla de trece díes en 816 ya onde pensamos fer una paraina; venimos p'afitar los mitos. Tomamos posiciones tres una visita pel pueblu bañáu pol ríu Oroncillo (antes Orón). Cases antigües de piedra o cargaes d'adobe y madera sofitaes en columnes de piedra formando soportales asina como'l suelu de pavés dan-y a esti pueblín esi sabor vetustu ganáu por hestoria y tradición.
Tase a gustu andoliando pel pasáu. Llegamos a la Plaza l'Ayuntamientu, sofitáu esti por unos pilaronos con arcos de mediu puntu. Enfrente, el chigre onde saborguiamos un vinu de la tierra; seique nun ye como antes cuando te lo sirvíen en xarros de barru. Aquello perdióse pa siempres, malheureusement. 

El Ríu Orón (Oroncillo) al pasu per Pancorbo.
- Qué xida vos trae per equí, Abd al-Karim?
- Vacaciones veraniegues a la fresca del Norte, 
daqué día tiraréis tooos pal Sur, al tiempu. 

               ¿Qué pasó aquel 25 de Mayu del añu 816 a orielles del Wadi-Arun (Ríu Orón)?
       N'Asturies reinaba Alfonso II, el Castu, que por aquel entós yá taba aposentáu nel tronu tres les "vacaciones" d'Ablaña y tenía fecho bayura de coses: Meter miéu a los árabes con delles victories, siguir con una repoblación sistemática, algamar un estatus internacional polos trataos con Carlomagnu y convertir Uviéu na <Civitax episcopal> asemeyada a Toledo: una ciudá amurallada nun cuetu pa caltener les ilesies, les reliquies y los edificios relixosos ya una villa palaciana estramuros, na Vega de Santullano. Alhakem tenía motivos p'andar esmolecíu.
     - Esti rei asturianu ye un peligru, hai que ponelu firme. Pa enriba ta en comuña con francos, navarros y vascones; nun podemos esperar qu'esto siga espoxigando.

Pancorbo, bañau pol Ríu Orón,
que col pasu del tiempu quedó n' Oroncillo.

         Y tresnó un exércitu poderosu que punxo en manes d'Abd al- Karim, de quién sinón. Oxetivu: Navarra al traviés d'Álava, nexu d'aunión del Reinu d'Asturies con navarros y vascones ( la verdá ye que-y papiaba tornar a Uviéu, la última vegada - 795 - sentáron-y mal los carbayones de La Fe; claro, la sidra yera del sapu...).
Alfonso tuvo noticies polos espíes de lo que se-y venía enriba y convocó a conceyu:
        - Precisamos d'una sestaferia ente tola comunidá cristiana, otramiente vamos llamentalo munchos años. Hai que paralos enantes de cruciar l'Ebru. Ente  l'escobiu de Pancorbo y Miranda del Ebru cuerre'l Ríu Orón (anguaño Oroncillo*), esa tien de ser la barrera que-yos torgue'l pasu. ¿Acuéi?

 * Nota: El Ríu Oroncillo - abenayá Orón - ñaz nes fontes de Pancorbo, nos Montes Obarenes, y va desaguar al Ebro cerca d'Orón, una barriu de Miranda del Ebru, tres 20 km de percorríu pel norte La Bureba. 
   

Na Plaza, tomando'l vermú a la salú d'Abd al-Karim.
(Por Alfonso namás tomamos sidra)

    Polos cristinanos andecharon magnates asturianos como García López, el xenru de Bermudo I; navarros como Velasco y Sancho,  o vascos como Zaldún que teminaron dexando casi toos la vida nes amarraces que caltuvieron durante 13 díes. La batalla finó en tables mercé al diluviu que cayó faciendo imposible les maniobres militares. Karim tornó pa Córdoba ensin poder ofrece-y al emir una victoria esllumante na que sofitar el so poder y los problemes internos foron aumentándo-y de plus en plus. Alfonso, pela cueta, pudo continuar cola repoblación y yá diba camentando en fer una visita a Santiago nel Monte Llibredón onde yera preciso iguar una ilesia al Apóstol. La cabeza d'esti home nun para.

Hai delles Portalaes en Pancorbo.

 (Males llingües dicen qu'Alfonso unviara-y a Alhakem una pipa vino Rioh.a ya otra de sidra:
< Dicen que te gusta'l vinu
mas nun te presta rezar;
mientres faes poesíes
pues daprender a escanciar
que la sidra ye perbono
si l'aprendes a mexar;
otramiente vete a misa
que lo tuyo ye cantar,
les batalles palos Reis
asturianos de verdá.
La Batalla de Pancorbo
foi por tiempu recordá. >)


                                              ******************************

Viñéu, tamos na Rioja. 

      La Batalla del Ríu Orón fízonos escaecer el fallu de tráficu. Taba cayendo la una (13:00) cuando nos despidíemos del gran silu de Pancorbo y embredábemos  pela N-232 camín de Logroño, na comarca La Bureba, onde pensábemos agospiar enantes d'anexanos a la Batalla del Clavih.o. Los tímidos viñeos y campos de cereal que venimos de pasar dan pasu a un mar de vinu, escomanaos  plantíos, enormes, de viña per un pandu onduláu que faen más prestosa la ruta.

Parque Rodríguez de la Fuente (Haro)

 D'esta miente llegamos a Haro tres tomar un desvíu na xeneral. Paramos nel Parque Rodríguez de la Fuente a tomar un bocáu, yera la hora, pero nun entramos a visitar La Ferradura, o centru históricu de la villa d'Haro, onde s'alcuentren la Ilesia Santu Tomás o'l Palaciu Paternina. Asina que quedamos ensin  visitar la capital del vinu la Rioh.a y les sos numberoses bodegues, sobre manera nel Barriu La Estación: Paternina (Berberana), Rioja Alta, Ramón Bilbao, CVNE, Muga, López d'Heredia, Martínez la Cuesta, Gómez Cruzado, Roda, conde de los Andes, Hacienda El Ternero, Vivanco, Valencisco, Beronia, Miguel Merino, Valduero, Bohedal B. Boutique, Urbina, Amézola, Junguiti, Berceo, Lecea, Tierra Agrícola, Conejo d'Ollauri, o Santalba; de xuro que me quedó alguna.

Briones.
(Semeya d'INVISIBLE), h.arta de vinu.

      Nun paga la pena cafiase por ello; ensiguida pasamos per Briones, - de los berones celtes -  un pueblu medieval, amuralláu,  asitiáu nuna llomba onde la torre la Ilesia Nuesa Sª de l'Ascensión (góticu-sabelín) paez ensartar col cielu surdiendo de los raigaños d'una cabecera ochavada. Tien Briones en Vivanco'l meyor Muséu del Vinu del mundu.
Viñéu, vide y viñéu hasta algamar a Logroño pasando per San Asensio, Torremontalvo (bañáu pol Najerilla), Cenicero y Fuenmayor onde domina <Rioja Berberana>.


       Quien me viere y quien me ve, perdíme na entrada a Logroño. Centru, centru y centru pero na cabera entrada salíme pela circunvalación y marché pal otru cabu la ciudá; por si fuere poco'l Google maps nun furrulaba y tuvi que tornar tres d'una moza que s'ofreció a llevame ... Nun foi fácil igualmente, tuvi que parar y preguntar un par de veces hasta que di col cartelu afayaizu: <Hotel Condes d'Haro>, ¡salváu!; menos mal que tien aparcamientu.

De vuelta la Cai Laurel.
(Hai que h.odese,
dir a La Rioja pa tomar agua)

      Receición, ducha y salida pela ciudá; destín: ¡Cai Laurel!. Queríemos recordar aquella ruta los vinos que conociéremos nos entamos los setenta (sieglu pasáu). El buiciu asemeyáu, el vinu de botella y los pinchos ... Col tiempu tórnase ún mui desixente, o ye la mochila la edá, o .... Nun ye lo mesmo pero yo púnxime como un quicu colos callos; les cogordes con xamón tomaréles en casa.

                                                 ***********************

    Logroño ye una ciudá pequeña (pa min toes son grandes), bañada por Ebru,  que nun llegué a conocer del too porque tres díes nun dan pa muncho y el nuesu enfotu taba nel Clavijo. De toes maneres ficimos casi entera la <Ruta d'Espartero> , a nuesa manera, eso sí:
     Saliendo de la Oficina de Turismu, na cai Los Portales, embredamos dica la casa del xeneral, anguaño Muséu de la Rioja (1).  Espartero nació en Ciudá Real y casó cola rioxana Xacinta Martínez de Sicilia, d'una familia d'abolengu. El xeneral y Rexente con Sabel II terminó dedicándose a la cultura del vinu col Marqués de Murrieta como sociu (al únicu militar que nun-y gustaba'l vinu yera Franco, y yá veis como terminó la cosa).

El xeneral Espartero nel Espolón

      Y pa siguir col duque tiramos hasta l'axardináu Paséu del Espolón (2) o Príncipe de Vergara que preside una imponente estatua ecuestre, en bronce, del que fuere Primer Ministru que s'instaló en 1895, tiempos d'Alfonso XIII. Esta plaza fuere antaño'l centru físicu de la ciudá y anguañu ye'l centru financieru. El quioscu de la música convertíu n'Auditoriu y La Rosaleda dan-y muncha prestancia a esti paséu que va tiempu sopelexaba los bustos de los reis de Castiella: Leovigildo, Pelayo, Ordoño I, Alfonso'l Castu, Enrique I y Felipe V, pero la República del 31 nun taba pa Histories.
Espartero yera un home lliberal, amáu pol pueblu, y partidariu de la rama oficial de los Borbones (Sabel II) magar consideraba que la reina Rexente taba meyor afilando les uñes en París. Aquello de "los cañones a Monjuit" pasó-y una factura pergrande. Arrebatos.
                                                  ....................................

Santa María la Redonda

        Pela cai Marqués de Vallejo calamos a la Plaza del Mercáu (3) coles sos terraces ya onde nunca nun falta'l carah.illu - a la hora apropiá - mientres contemplamos la so
           Concatedral de Santa María la Redonda. Esta ilesiona del XVI con numberoses reformes nel XVII foi llevanta nel solar d'una primitiva ilesia románica qu'alquirió'l rangu de Colexata al fusionase con San Martín d'Albelda. La portada oeste y les torres dan-y una traza barroca dafechu siendo'l curpu central más antiguu. Ye una ilesia con planta de salón, tres naves a igual altor con bóveda de crucería y col ábside central ochaváu, ¿la moda?.
         Por qué, preguntaráste, pases tantu tiempu na ilesia tando en Logroño, la capital del vinu .... ¿Alcuérdeste la xida d'esti viaxe? ... Tou partió daquel día que llegamos a Grau por mor del Camín Primitivu y delantre'l Palaciu Valcecarzana, énte l'escudu de Miranda-Ponce de Lleón , prometimos visitar el Clavijo, orixe de la lleenda del escudu los Miranda rellacionáu con Santiago. Mira tu per onde nesta ilesia, na capiella de la entrada, ta'l sepulcru de don Diego Ponce de Lleón, la otra pata del escudu, engalanáu con una imax de la Virxe ya una escultura de la Resureición, del Maestre Ansé (XVI). Pos yá axunté los dos cuarteles del blasón: Miranda y Ponce de Lleón. ¡¡¡¡Ixuxú!!!!.

La Ponte Fierro

        De la concatedral fuimos visitar l'Archivu Históricu de la Rioja (4) en Rodríguez Paterna pasando per San Bartolomé. Esta casa-palaciu guarda la historia la Rioja y bayura documentos no que cinca a la familia Espartero.
    Tornamos a la Plaza del Mercáu y metémonos pelo que fuere la llende la ciudá, Cai del progresista Sagasta,  - per onde vivíen los ricos - camín del Ebru al que vamos travesar per aciu'l  Pûente Fierro (5), que fuere construyíu mercé a los bonos oficios d'esti políticu.

Reló de Sol Analemáticu
La solombra la persona marca les once.

       Nun nos aguantamos y pasamos la ponte pa conocer, na otra oriella, la Casa de les Ciencies (6) qu'abrió'l (23-4-1999), asina qu'Espartero nun la conoció.
Ta dedicada fundamentalmente a los neños onde realicen bayura de talleres. Al rodiu l'edificiu, nuna zona axardinada, dellos inventos lúdicos pa que'l neñu se sienta como en casa: Un reló de sol analemáticu, güelgues de dinosauriu, remolín d'agua, discu xiratoriu, xilófonu, telescopiu, piedra saltarina y munchos más.
Bona idega, logroñeses.


       Siguimos caminando hasta la Ponte Piedra (7), o de San Xuan d'Ortega, ellí onde'l pueblu de Logroño recibió talo un héroe a Espartero tres derrotar a los carlistes y firmar l'Alcuerdu de Vergara; yera'l 23 de Setiembre de 1839 y xeneral algamaba l'Olimpu, namás yera l'entamu. Foi llevantáu en 1884 al esbarrumbar l'antiguu que la tradición popular atribuyía a San Xuan por mor de la capiella qu'había na marxe izquierda ya onde s'encamentaben los pelegrinos del Camín Xacobéu. El primixeniu tenía doce arcos y tres torres defensives que s'amuesen nel escudu la ciudá, poro yera perimportante. Les vistes del cascu antiguu dende la ponte son ablucantes; cuando los pelegrinos acolumbraben les torres de les ilesies debíen sentir un daqué espiritual bien esmoleciente.

La Reja Dorada
La bodeguina de Doña Xacinta

     Tres cruciar el Ríu Ebru pela Ponte Piedra entramos na Ruavieya (8) pa dir caleyando camìn de "casa" (Hotel Condes d'Haro) per una cai estrencha y empiedrada que foi abenayá bien importante na producción de vinu; de fechu, nel cruce con Cofradía tenía Espartero dos propiedaes con bodega que cediere al Marqués de Murrieta treslladando la de so a la finca d'Ygay, estramuros la ciudá. La so muyer Xacinta tamién tenía bodega nesta cai, no que se conoz como "La Reja Dorada". Llamóme a min l'atención aquel portón ensin saber tovía a quién pertenecía.

Pasarela sobro l'Ebru

        Hai munches más coses que visitar en Logroño pero nós vinimos a lo que vinimos y el tiempu nun daba pa más. Yá quedamos bien contentos col descubrimientu de la ruta d'Espartero, un personax mui averáu a Sabel II y polo tanto al nuesu Camín de Cuadonga nel tramu que va de Llames de Parres a Cuadonga conocíu como'l Camín de la Reina. Si vos peta restolái en Camín de Niria : <De co casa a Cuadonga> que tien diez (10) entraes bien entreteníes (que voi dicir yo).


                            ***********************************

       L'escudu La Rioh.a  ye xunto cola bandera y l' himnu ún de los finxos históricos que-y dan identidá propia a la Comunidá. Foi adoptáu dafechu dende 1985 magar yá s'emplegare davezu dende 1957. 
       Trátase d'un escudu partíu nun campu rectangular acabáu en punta siguiendo la moda francesa . El cuartel de la diestra amuesa en campu d'oru la Cruz de Santiago campeando poderosa sobro'l  Monte Laturce siendo abellugada en punta por dos veneres esmaltaes de plata y orniaes de gules. 
       Nel cuartel de gules a sinestra un castiellu d'oru con tres torres almenaes cabalgando sobro una ponte d'oru mazonada de sable que remanez sobro'l Ríu Ebro n'azur y plata. 
      Orniando l'azur de la bordura tres flores de lis, dos nos lladrales del xefe ya otra en punta. 
    En timbre la Corona Real zarrada. 

                               ***************************************

El  Clavijo
< ¿Ye'l Clavih.o una lleenda?
 ¿Ye´'l Clavih.o una verdá?
La hestoria dulda que dulda
si ye mitu o realidá
 poro nós yá embredamos
el camín d'abenayá
cola fe del pelegrín
y daqué pelín d'ansiedá,
mas llevo caballu blancu
y por bandera la Paz.
Los tiempos yá son mui otros
y España tien d'amosar 
que na unidá de naciones 
ta la braera verdá.
Yá Ramiro a la fin duerme,
nun lu pienso despertar. >

       Al día siguiente, cola moral a tope d'Espartero, teníemos decidío visitar el Clavijo, la xida d'esti viax. Yo andaba esprecetáu, diba cumplir el suañu infantil de cabalgar tres de Santiago nun caballu blancu penriba la cabeza de los moros.
    - Gracies, don José, porque siendo bien d'izquierdes supiste contame histories que me llevaron bien derecho pola vida. Güei voi facete un homenax. ¡Santiago y zarra España!.
     Nun ye que madrugáremos pero a eso de les diez tábemos desayunando nel hotel; hai que ponese fuertes. El Clavijo ta cerca de Logroño, como a 16 km tirando por Alberite. Tuvi que preguntar enforma porque piérdome en tolos sitios: Cai Chile pa tomar la circunvalación y salir de la ciudá pela Avenida Madrid, LR-254, hasta Alberite; equí LR-344 y pocu después LR-345 hasta'l Clavijo pasando per La Unión de los Tres Exércitos, no que se conoz como "El Campu la Matanza".
P'algamar al Clavih.o hai que xubir una carreterina llarada de curves. Enantes de llegar al pueblu yá acolumbres na llonxanza un picu tallaú na roca, un llugar afayaizu p'asitiar un castiellu, pídelo a gritos.

        Tuvimos que parar delles veces pel camín a sacar unes semeyes, la vista d'aquel finxu yera ablucante. Por poco baxo en plancha un terraplén por mor d'alcontrar un planu afayaizu. Si tuviere qu'atacar esti castiellu nun creyo tuviere'l valor de tirar cola bombarda, sería una pena destruyilu; meyor emplegar la mano zurda.
    - Igual-y pido al moru casar cola fía ... 
    - ¿Cuántes muyeres quies tener?... Nel fondu nun yes otro qu' un moru, yá te lo camenté daqué vez..
      Aparcamos, por fín, a eso de ....  delantre de la ilesia de manera que'l carru nun me fastidiara les semeyes. Dimos una vuelta alredor de la ilesia, tomando semeyes, como si quixéramos dilatar el tiempu. El castiellu taba a tiru flecha y de cuando en vez echávemos-y una güeyada, claro, si vas asaltalu tienes que'estudia-y los puntos febles. Yera una manera d'enantar el esfrute de l'ayalga.

Nuesa Señora de l'Ascesión (XVI)

         La ilesia parroquial de Nuestra Señora de l'Asunción (antes de l'Anunciación) ye una edificación bien bultable d'estilu renacentista que fore construyida ente los sieglos XVI y XVII. Esta mole sillería de 30x16 y 22 m. d'altor vese tovía sobrepasada por una torre cilíndrica qu'algama los 26 metros seique les constantes campanaes de medies, hores y cuartos faenla más humana. Nun-y sobrará porque na fachada entá caltién delles referencies a un pasáu reciente que me pon los pelos de punta. Pero esti detalle nun me va afandar; ser asturianu, español y d'izquierdes nun quita pa que sienta ciñu, pasión y argullu (alguna vez amiro pa otru llau) polos fechos históricos d'un país - el de mio - que nun s'atreve a poner lletra a la música marcial del himnu nacional. Ye verdá que somos diferentes, sí, nun somos a damos una tregua duradera y a respetar les opiniones del contrariu que tamién foi elexíu n'urnes democrátiques. Col cuchiellu ente los dientes ye mui difícil formar un gobiernu afayaizu; a esti pasu vendrán los "sinescrúpulos" a arramplar colo que puedan pisotiando los derechos algamaos con tantu sufrimientu.

¡Santiago y puxa Asturies!

       Yo tamién reivindico'l Clavijo, dende la manzorga asturiana, como una llucha polos drechos que nos fueren rabuñaos violentamente. Yo quiero analayar talo Santiago penriba les almenes del Clavih.o, p'algamar lo meyor pal mio país y clamiar dende Monte Laturce:
       - ¡Puxa Asturies! ¡Viva España!  (Quiero Gobiernu d'una p. vez, nun vaya ser que tenga que volver al Clavih.o cola Tizona pa recuperar lo que, d'otramiente, van a rampuñanos)
    Niégome a pensar que Santiago namás fuera de dereches siendo un humilde pescador y discípulu d'Aquél al que daquién calificó como'l primer comunista: Santiago lluchaba polos drechos d'un pueblu oprimíu; Santiago yera, sobre tou, d'izquierdes.

      Andábemos como apuraos y xubimos derecho, per mandrecha, ensin decatanos que pel otru estremu había un camín acutáu seique daba delles vueltes. Al final llegues al mesmu sitiu.
    - Oi, rapaz, agora que tamos nel llugar de los fechos¿por qué nun refrescamos la memoria con eso la Batalla del Clavijo?

       Un señor mayor... Non, un güelu entá mozu, que aprució na Torre l'homenax colos sos nietinos y el xenru, decidió tomar parte na batalla y camentó:
      - Dicen que la batalla del Clavih.o ocurrió en 842 siendo Rei d'Asturies Ramiro I (842-850). Foi equí embaxo, nesa llanera que se conoz como'l "Campu la Matanza". ¿Veislu? ...

Los campos de Logroño
 quedaren tiñíos de Rioja

     - En campu abiertu nun tendríemos muncho que facer ... 
      - Abderramán II comandaba l'exércitu árabe y diónos a estazón nel primer envite viéndonos los cristianos obligaos a abelluganos nel Monte Laturce, ellí arriba.

    - Asina que'l Monte Laturce ye esi picu que tenemos enfrente.
    - Sí, podéis xubir allá, hasta la picalina, onde hai una cruz. Pel camín vais alcontrar una ermita, la Capiella de Santiago. Dende ellí tenéis unes vistes ablucantes a dambos llaos de la sierra Los Cameros.
    - Asina que perdimos la célebre Batalla del Clavijo ....
    - ¡Quieto parao!. Equí ye cuando entró en xuegu Santiago.
    - Menos mal ...
    - Tando Ramiro afandáu dafechu aprucióse-y en suaños Xacobu y díxo-y:
         <Gallu, si fais lo que te digo pues algamar el trunfu na batalla>.
   - Lo que mandes, Santiaguín, pidi per esa boca.
   - < Mañana llevantáis ceo, al riscar l'alba vais a misa, confesáis y comulgáis y darréu disponéis pala batalla. Nada nun temáis, yo taré con vós. Veréisme analayar pelos montes del Clavih.o montáu n'albu caballu y aportando una bandera blanca. Siguíime. ¡Cuayu y zarra España!> . Eso foi lo que-y dixo Xacobu, eso foi lo que ficieren los cristianos y aquel trunfu algamó tal sonadía qu'enta se sienten los ecos güei en día.

La Cruz de Santiago preside'l Castielllu del Clavih.o:
<Oh, Santiago Apóstol, cabeza rellumante y Patrón d'España>

    - Asina que d'entós p'acá esti castiellu pasó a ser cristianu.
    - Sí, y Santiago pasó a ser el referente de la Reconquista, el Patrón d'España.
    - D'esta miente cumpliéronse los badagüeyos de Beatu:  < Oh, Santiago, Apóstol , cabeza rellumante y Patrón d'Hispania, abelluga a esti pueblu que te fuere encamentáu>.
     - Gracies, señor, ¿podría dicime per onde tirar p'Albelda?. Pensamos dir más tarde.
    - ¿Veis esi caminín que va serpentiando per detrás del castiellu?. Ye estrechu per tien poco tráficu; nun tien perda.
        Despidímonos del feliz güelu, vascu de nacencia pero fíu adptivu la Rioja, y afitáu nel Clavih.o de por vida. Nun ye d'estrañar, estos paraxes son bien candiales; doi fe d'ello.

       Baxamos del castiellu al pueblu, esta vez pelo segao, col enfotu de xubir al Monte Laturce. Tanto tenemos lleío d'él que nun tábemos dimpuestos a marchar sin visitalu. Queremos pisar onde pisó Ramiro, ver el cielu qu'analayó Santiago y contemplar el Campu la Matanza llaráu de viñes que van convetir el sangre en vinu, la violencia en caldíu bienestar.

Monte Laturce :Yá queda poco p'algamar a la
Ermita de Santiago

      Tres pasar la ilesia l'Asunción xubimos cuestarriba per una carretera asfalcada hasta la Ermita de Santiago, onde'l Rei Ramiro duerme a la puerta mentanto-y fala l'Apóstol. Yá cerca de la cume acolumbramos una cruz, la Cruz del Monte Laturce (1039 m).
La ermita ye del XVII pero alza sobro un proyeutu del sieglu anterior siendo remocicada en 1944 por Euxenio Lavilla a partir d'un presupuestu algamáu con donativos. La capiella, 18x15, tien planta cruz llatina y cúpula de crucería. Nel retablu un cuadru pergrande de Navarrete'l Mudu que sopelexa la Batalla del Clavih.o con Santiago analayando sobro'l Campu la Matanza. Nada nun falta nesti cuadru: Santiago y Ramiro, moros y cristianos, El Castiellu, el Monte Laturce y les cien doncelles, la xida d'esti enguedeyu, que si tamos equí ye por mor de sacales del supliciu (quixere saber yo si dempués d'un añu na corte del Emir dalguna tuviere dimpuesta tornar a machacar tarrones).

       Les vistes del valle de Logroño, dende los rimeros la Sierra los Cameros, son impresionantes. Un sitiu bien guapu pa suañar y recordar la hestoria qu'un día cercanu escribimos y quiero compartir contigo. Ehí te va ......

         <LA LLEENDA QUE SE CONVIRTIÓ N’HISTORIA>: 

                               
                                              <La batalla del Clavijo>

Per estos campos analayó Santiago a la grupa d'un caballu blancu, cande bandera ya albos ropaxes. 

        Lo normal ye qu’una historia termine convirtiéndose en lleenda. Pero esta vegada foi al revés: La inesplicable batalla del Clavijo entamó por ser una lleenda y col tiempu pasó a formar parte de la memoria histórica de los reconquistadores españoles y del pueblu en xeneral.

       Corría la primavera del añu 844. Dos años d’alloriante reináu llevaba Ramiro (842-50) – el fíu de Bermudo y sucesor del Castu Alfonso – nel espinosu tronu d’Uviéu. Ya tuviere qu’andar a la tema col Cognatus Nepociano, y ye que daquella nin de los cuñaos te podíes fiar ( y agora menos). Tamién tevo que poner firme a un tal Aldroito asina como a Piniolo y fíos, a los que dio capirote … Por si fuere poco yá s’acolumbren nel finxu’l cielu los drakkars vikingos…

          - <Eli, eli, lamac sabactani> - clamiaba Ramiro.

   

Monte Laturce 
- ¡Madiós, que vienen los cristianos!
¡ Al abellugu !

       La muerte d’Alfonso pilló a Ramiro de cortexu pela Bardulia (Les Merindades) – taba viudu, ¡eh! – y el cuñadísimu (Nepociano) aprovechó’l tantu pa coláse-y nel sillón:

- Otra como esta nun la pillo, manín. - Y el magnate arrepanchígase nel tronu valeru.

        Ramiro hebo dexar los galanteos pa otra y esnalar dica Galicia, onde tenía los sofitos afayadizos. Tresnó un exércitu y salió al encuentru de les dubitatibles güestes de Nepocianu. Armó-yla na redolada la Ponte de Curniana (Cornellana), pos conocía bien el tarrén. Cuando les topes pro-nepocianes del este (vascones ya uvieinos ) vieron aquel despliegue táuticu camentaren roceanes:

- ¿Morrer por un rei inciertu?... ¡Qué va,ho! – Y abandonando les ales del campu batalla dan les fusties dexando al comes palatinus vendíu dafechu.

        Yá sabemos cómo acabó la cosa, de momento : cabeces rapaes, güeyos saltones… Nepocianu pal cuartón y Ramiro a poner orde cola barduliana (castellana ) al llau. Bueno, dalgunos castros astures nun taben mui d’alcuerdu con esa manía de los impuestos, de los exércitos, de la cruz… Pero si yá teníen la lluna pa regula-yos la vida….Y los ríos … y los montes… Y los ritos…

      - ¡Pero qué coño-y pasa a esti fatu de Ramiro !…. Colo bien que tábemos con Alfonso…

                                        *************************

<El tributu de le 100 doncelles>,
la xida la <Batalla del Clavijo>
(Semeya, blog:<Bajolamiradadecordoba>)

       Cola llegada la primavera de cada añu les güestes d’alandrines solíen trayer una aceifa musulmana; la del añu 884 foi una d’elles. Esta vegada tocaba pal este, camín d’Álava. ¿Andaben revueltos los Banu-Qasi pela Rioh.a y había que ponelos firmes?... Cuenten qu’hasta’l mesmu Abderramán II venía al frente. Sedría difícil, porque naide s’imaxina a esti emir tan allonáu del harén, seique quixere cobrar, de pasu, el < tributu les cien doncelles>, vete tu a saber…

- A min los cristianos nun me pillen ...
Au revoir!

      La lleenda, siempre la lleeenda, les males llingües o la propaganda neogótica del scriptorium del Magnu tresmitieron que durante’l reináu del tiránicu Rei Mauregato los cristianos viérense obligaos a pagar n’especies – cuando poco – un tributu a los caldeos: “Cien doncelles al añu”. Aquel tributu abegosu taba establecíu pero un día ....
       Cuéntanos tamién la lleenda qu'un día, nel entamu del reináu de Ramiro I, pasando pela vera del ríu Narcea (daquién tienlo llevao hasta'l Sil) una reciella de moros camín de Córdoba coles cinco doncelles de cupu que'l condáu de Tinéu y Miranda taben obligaos a aportar aprució pela redolada un destacamentu de cristianos proviniente de Santiago por mor del Camín Xacobéu  comandaos pol valiente Álvaro Fernández, de Miranda. Al sentir los llamentos, les súpliques d'aquelles mocines, y nun pudiendo soportalo más agarró un estandoriu y ensin pensalo dos veces allancióse enriba los moros nun dexando ún solu con vida quedando, d'esta miente, les doncelles lliberaes. Fazaña tan bultable nun cayó en baxo y de boca en boca llegó a los oyíos del Rei Ramiro. Esti sintió un poco vergoña y entendió que'l pueblu nun yera pa con aquel tributu tan cafiante, tan despreciatible, asina que tomó un determín:
    - El pueblu nun aguanta más l'amiyante <tributu de les cien doncelles>, y yo tampoco, asina que vamos a la guerra. Voi por ti, Abderramán.

Monte Laturce

   
      El casu ye que’l rei Ramiro I – cuenta la lleenda - que nun taba dispuestu a soportar esta contumelia nin un minutu más, sal-y al pasu. Pero’l Vara de la Xusticia vese sorprendíu nos campos de Náh.era y Albelda (La Rioh.a). Los cristianos, menos numberosos, tienen qu’abellugar nel castiellu del Clavih.o, asitiáu nun coteru la rimada’l Monte Laturce. La cosa pinta mal. Ramiro nun duerme. Na so velea tien una visión…

    << El moru sabía,

      el moru aguardaba,

      y nos campos de Nah.era

      sal-y al pasu al de la Vara.

      Ramiro queda ablucáu

Al ver tala fargatada

De moros engafentaos

y pal Clavih.o esnala.

•    Nesti castiellu taremos

Hasta que l’enemigu afanda.

        -   Vas a saber, Alfonsín,

Lo qu’un sarracenu aguanta.

De fame vais a morrer

y yo, fartucu cristiana.

      La tregua, al atapecer,

Nun va aselecer l’alma.

La velea de Ramiro

Nun hai dios quien la comparta.

Nesto, una llucecina

Vien a prende-y l’alma.

Del claror d’aquella llume

Salió una figura humana:

Ermita de Santiago,
onde l'Apóstol s'aprució al Rei Ramiro

¿Quién yes tu, home de Dios,

que me despiertes al alba?

- Soi l’Apóstol Santiago

patrón de la Nueva España.

Vengo echate una gabita

Pa ganar esta batalla.

• Nun sobrará, Santiaguín.

Nun sobrará , fíu del alma;

Que tan dándonos pal zorru

Dende güei pela mañana.

Yá nun soi a caltener

La moral d’esta mesnada.

- Tu tranquilu, Ranimiro,

que Santiago nun s’ablaya.

Si facéis lo que vos digo

El de Córdoba s’ensama.

• ¿Y qué s’espera de nós

Pa tornar l’aliendu al alma?

- Tomái misa y confesión

enantes de rayar l’alba.

Y siguíi detrás de mio,

yá veréis qué escorripanda…

• ¿Cómo te conoceremos

ente tala garuyada?

- Veréis un caballu blancu

analayar la batalla.

Blancu será’l mio estandarte,

Blanca mano pala espada

Y nel centru la bandera

Una cruz roxa yantada.

Ramiro I, el Vara de la Xusticia.
Fechu polvu tres la célebre batalla.
(Semeya LNE)

• Pos entós nun s’hable más:

¡Santiago y zarra España!

La victoria de Ramiro

Trespasó la Marca Hispana.

Entá güei día, amiguinos,

entá l’ecu lu acompaña,

entá suenen les campanes

per El Campu la Matanza.

   ¿Sedrá lleenda o verdá?.....

Entrugá-ylo per España.

En cualquier casu, Ramiro,

foi’l gallu la quintana

y Santiago abanderáu

de la Olímpica batalla>>.

— Yo quiero dir a Santiago,

Yo quiero dir per Hispania

pa cuntar a los mios ñetos

qu’entá sigo na batalla

porque Asturies ye mui grande,

ye la cuna de toa España.>>

La única mora que quedaba nel castiellu del Clavijo.
Y yo por Santiago faigo lo que sea ....

    El cayu ye que'l Rei Ramiro llamó a files al tal Álvaro Fernández de Miranda que foi ún de los caballeros cabezaleros n'aquella célebre <Batalla del Clavih.o> polo que'l Rei concedió-y armes a la Casa de Miranda sopelanxo dende entós un escudu con cinco doncelles en sotuer (aspa) nes cinco veneres o conches de pelegrín.

    Les cróniques de la dómina nun gurguten al rodiu d’esta batalla, nin tan siquier les mores, claro. Nun foi hasta’l XII cuando Pedro Marcio camienta que-y camentaren …. Nel XIII, Lucas de Tuy y Ximénez de Rada falen de la batalla del Cavih.o como si tuvieren tao nella….

      Sabemos qu’Abderramán II (822-852) tiró personalmente, pal norte una vegada con gana murga; magar diere la vuelta pel camín …

        - Qué cuayu, Abderramán ...
        - Qué quies, guaje; a min ensín harén nun me presta vivir y pa enriba escondéisme les doncelles..

Dende les almenes del Castiellu del Clavih.o

        En tou casu sabemos que n’Albelda – bien cerquina del Clavih.o - nun hebo una batalla, sinon dos (852 y 859) , pero yá con Ordoño I, qu’asitió’l campamentu nel Monte Laturce – na contorna del Clavih.o precisamente. Sabemos qu’Ordoño perdió la primer batalla (52) y que ganó la segunda (59)*.… Claro que pa estes feches de (52-59) l’emir yá yera’l so fíu Muhammad I . Pero esta batalla del Clavih.o, d’Albelda, nun la tuvo Ordoño contra Córdoba , túvola escontra Musa, el Banú-Qasi que controlaba’l valle del Ebro . Tamién sabemos qu’azeifes per Álava hebo a pandiar… Vamos, que pue ser creyible lo de Ramiro, pero incierto … ¿Diba callar la oficina propagandística uvieina d’Alfonso III fazaña tala? … Coño, si hasta hebo qu’inventala más tarde por necesidá moral … ¿Cómo aunamos los esfuerzos cristianos ? ¿Cómo llevantamos la moral de los soldaos? … Con un lider espiritual, con un santu varón (a Santolaya nun yera plan metela nestos fregaos) que comandara na batalla, con Santiago Matamoros, que precisamente dende tiempos de Mauregato, per aciu del himnu <O dei verbum> de Beatu, fuere declaráu Patrón d’España.

 La LLIGA  CELTA abellugando na Batalla del Clavih.o
Al averame al castiellu los moros desapovisaron de secute;
nun tuvi con quien echala al baltu, namás quedó una mora .... 
Nun tuvi valor pa desabeyala, los celtes somos asina. 

       Bueno, alcuérdome yo cuando Don José, nos primeros tiempos del franquismu, nos llevantaba l’ánimu cola batalla del Clavih.o. Y ye que nel patiu la escuela había yancáu un barracón moru, pero enllenu de moros, eh… (Bueno, igual yeren dos o tres pero a mi aquello paecíame l’exércitu d’Abd al-Malik) y teníemos que compartir el patiu’l colexu con ellos. Cuando la pelota pasaba a la parte mora a ver quien yera’l guapu que diba por ella… Por eso pa nós la Batalla del Clavih.o yera daqué más qu’un actu de fé… Pero tamos equí, supervivientes de moros, Francos , flaires … Y ye que Sophía Loren – l’asturiana muyer del Cid - tresmitía munchu cuayu, más incluso que Santiago que pa enriba celebra la so fiesta'l 25 de Xunetu, en vacaciones.

                                      ……………………………………………

Los vikingos nun pudieron resistir la tentación
de visitar Xixón pero traíen tan mala pinta que
nun los dexamos desembarcar, ¡pena!.
Tornái cuando queráis, seréis bienllegaos.

         Los que sí quixeren mete-y la claviya nel branu d’esi mesmu añu (844) foron los vikingos, que tres una visita de cortesía a Xixón – bueno, per tola costa oriental d’Asturies – colaren pa la bayurosa Galicia (daquién-yos tevo falao de les ayalgues de Santiago, onde s’alcontrare la tumba del apóstol nel 813) . Pero vese que’l centollu tira enforma más que’l oru y , Ramiro , darréu una escorripanda al rodiu la Torre Brigantium, atrapólos cerca Tuy faciendo una mariscada.

     - ¡Al platu vendrás, arbeyu!. - Y de los 115 drakkers , aproximao, que traíen quedáren-yos na mitá; y de paisanos otru tanto. Entós sintieron la voz salvadora  d’Odín que los empobinó dica’l sur:

- ¡Sevilla, Sevilla, Sevilla!
- ¡Hala, allá tais bien!

      Y camudaron la caldereta norteña polos caldios pescaitos sureños ….

- ¡Ta llueu, fiorderos! Yá veréis la que vos espera…

      “Adiós de tou corazón

       que col mio alma nun pueo ”…

         Los wikingos tornaron a Asturies, pero dellos años más tarde. Y ye que la tierrina tira abondo…

LA BATALLA D’ALBELDA

      ¿Afondamos al rodiu la posible y braera Batalla del Clavih.o?

¡Qué guapu ye'l castiellu!
¡Cuántu te voi echar de menos!

         Los Banu-Qasi yeren una poderosa familia de godos que, darréu la invasión árabe, cambió la cruz pola media lluna y formó un pequeñu reinu, ¿ensin rei?, que dominaba’l Valle del Ebru: Tudela, Güesca, Calahorra, Daroca , Zaragoza y parte de la Rioh.a yeren el so territoriu. Esto permitía-y controlar el pasu a los Pirineos , a Al-Andalus, al reinu d’Asturies, al condáu de Barcelona, a Xaca … El “Tercer Reinu d’España” - como-y prestába a Muza lu nomaren - yera un cuellu de botella, un incordiu pa tol mundu pero calteníase práuticamente independiente mercé a un sistema d’aliances cambiantes colos sos vecinos: navarros, francos, cántabros-astures-vascones, árabes… Tamién echaren llazos en Guadalaxara, onde colocó una fía y en Toledo, casi ná, onde’l so fíu Lope yera l’amu. Dios y el Diañu yeren los cabos del cordel que los xuncía. Teníen un armariu atarraquináu de chaquetes de colores estremaos pa según la ocasión. Los Reis Católicos debíen conocer el so dilir ...

     - ¡Hai que vivir! - dicía’l Muza. Vaya morru, Muza ibn Muza ben Fortún ibn Casius.

        Yera’l Rei del Reinu de los Fulambulistes. Y foi-yos bien esa partida d’axedrez durante munchu tiempu, pero … El Banú Qasí cometió un erru…

¿Cómo andaba la cosa na dómina d’Ordoño?

<El Nuberu ta cargando
la escopeta nel Clavijo
por si torna Abderramán
a reclamar el tributu >

        Pos el tal Musa tenía llevantao un fuerte nuna llomba d’Albelda – Monte Laturce o del Clavih.o - que yera’l centru comunicaciones a los cuatro puntos cardinales. A Ordoño fastidiábalu enforma al nun poder abanzar cola repoblación pel Ebro y La Rioh.a - amás de tener qu’aguanta-y el saquéu d’Álava – pero’l Qasí vivía sofitáu na soberbia de les aliances. Mas cometió un erru…

-¡ Hasta equí llegasti, Musa ibn Musa ibn Fortún ben Banu-Quasi…..!

        Qué fina ye la cuerda la política… Verás, Musa tenía una alianza con Navarra pero rompióse cuando los vikingos secuestraron al so sobrín García Íñiguez y el Qasí nun quixo soltar un duru pal rescate.

       - Sobrín sí, pero de segunda.Ye más navarricu qu’otra cosa; paga tu.

        Amás, pa completar el chuleo, saqueó les tierres pamploneses - ¡madiós! - , adiós alianza.

        Tamién el Muza Banu-Qasi andaba a la tema, de rebote, con Córdoba al casar un fíu cola fía’l gobernador de la llevantisca Toledo - a la tema también cola capital del emirato - ya una fía col valí de Guadalaxara … Vamos, que los cordobeses andaben la mar de roceanos con ellos. Asina que’l sobeyosu Qasi perdió casi toes les aliances.

- ¡Otra más gorda nun la veo ! ¡Vaya ocasión se me presenta! – clamió Ordoño.

La Lliga Celta abellugando (despistando)
 na Batalla d'El Clavih.o.

        Apañó un exércitu, crució La Bardulia, onde s’amestó col conde Rodrigo de Castilla, y metió -y al mañu tala goleada que por poco pierde hasta la vida; tuvo que salir por pates y fechu una llaceria. Trató de reponese pero ensin sofitu algún nun se pue ganar un Tour. Morrió cuando intentaba asaltar Guadalaxara.

- ¡A repoblar! – glayó Ordoño.

        Pa mayor tranquilidá Ordoño casó la so fía col rei de Navarra, García Íñiguez; guapa alianza, lo qu’unos nun quieren …

        Darréu la batalla d’Albelda – nel Clavih.o - la Reconquista tomó otru carís. Tres d’Alfonso III, el fíu d’Ordoño, la corte pasó a Lleón.

- Paez que la cosa marcha. - (Mas Asturies entamó cayer nel olvidu ...)

        Pero la vida da munches vueltes … La Reconquista diba durar sieglos… Sicasí Santiago foi dende’l Clavih.o l’abanderáu d’esta epopeya.

         Y nós nun ficimos otra cosa que dir a comprobalo pa dar fe d’ello.

              ¡Xacobu y puxa Asturies !
         - Quedrás dicir ¡Xacobu y puxa España!
         - ¿Nun ye lo mesmo?. 

                           *****************************
    - ¿Pa ónde tiramos agora?
    - P'Albelda; hai que rematar la batalla y de pasu buscar una copia de la <Crónica Albeldense>. Camiéntase qu'hai un monesteriu con un Scriptorium únicu nel mundu.
   
     Depués de tanta velea teníemos fame y yera la hora de comer. Nel Clavih.o nun había onde y decidimos dir a Albelada siguiendo el caminín que nos indicare'l feliz güelu. Baxamos del pueblu y d'esta miente pudimos apreciar la parte trasera del castiellu, los insuperables cantiles que-y dan esa forma tan espectacular. Baxar y baxar.
      - Cuido que per estos paraxes tuvieron de pasar les güestes d'Ordoño p'atacar la ciudá d'Albelda, ye lo más afayaizo. 
     - Anguaño tán llaraos de viñéu. 

La Peña Salagona foma parte del "Conxuntu Rupestre Samartín"
cola Panera y el nomáu Grupu Norte, onde tán les bodegues
y el celebérrimu Scriptorium.

       Entramos n'Albelda d'Iregua pela parte superior - la muralla debió esaniciala Ordoño - y ensiguida entrugamos a un chaval por un chigre onde xintar daqué. Empobinónos a la Plaza Mayor del Pueblu onde hai dellos bares pródigos en pinchos y tres aparcar na zona baxa, cerca del ríu tiramos andando pa la PLaza en busca d'un chiringu. Quedamos n'ún con terraza- El Códice, como non -, el más ambientáu, y pudimos tomar un platu combináu, dao la tardiega hora.
    - ¡Qué queréis, carayu; si venimos de la Batalla del Clavih.o .
 Tarazaos de fame como tábemos tres la esfriega nun lu vimos per delantre. Aselamos un ratu mientres degustábemos el café y salimos a conocer el pueblu magar el calor asfisiante que facía. Embredamos resoplando per unes caleyuques estrenches, y a vegaes escalonaes, a la parte alta del pueblu pa tener una panorámica afayaiza y de pasu visitar una especiu d'eremitoriu escaváu nuna cotariella arciellosa.
    - Esto nun ye ná, hermanos; si llegáis a venir la selmana pasada ... Nun baxamos de 40. Güei ye una romería, malpenes pasamos de 30º, por eso salgo yo de casa; estos díes nun había nin el tato pela cai a estes hores de la tarde. 
    - Dende equí arriba hai una vista mui guapa del pueblu. 
    - Sí, vese casi too. Equí tamos nel Santuario o Monesteriu Rupestre de San Martín, que tien ilesia ehí embaxo, cerca la Plaza Mayor onde ta l'Ayuntamientu . Allalantre, tres pasar la Cooperativa d'Albelda y cruciar la Ponte, alcuéntrase la zona baños, les piscines del Ríu Iregua que más tarde va desaguar nel Ebru.  
    - ¿La Coperativa ye de vinu?
    - Non, ye de frutes de la zona: zreces, piescos, peres, mazanes, ... Esto ye mui rico, non tou ye vinu. 
     - Yá mos dimos cuenta pel camín qu'abonda la fruta, el xirasol y el cereal. Normal, con agua y sol dase cualquier cosa. ¿Quier echar un pitu?
     - Munches gracies rapaz, que tengáis bon día. 

Restos arqueolóxicos del antiguu Monesteriu Samartín.

      Tres compartir unes bocanes con aquel amable vecín - morenu talo un bereber - paseamos un cachu al rodíu' l Conxuntu Rupestre Samartín; de primeres la Peña Salagona onde ta la Panera y darréu empobinamos camín de les bodegues porque'l Scriptorium tráinos a mal trayer.


       Col alma en fierros baxamos dica la moderna Ilesia San Martín, por si víemos daqué interesante. Nun nos defraudó la visita, nel pórticu había una esposición de material arqueolóxico procedente de l'antigua Colexata de San Martín del sieglu XII. Esta ilesia vien a ser un homenax.

Pelos xardinos del Ríu Iregua.

       Travesamos otra vuelta La Plaza y empobinamos camín del Ríu onde s'apreciaba la zona baños. Taba enlleno mocedá enredando pelos praos alrodiu les piscines. Casetes, Restaurante ya un buen aparcaeru completaben les instalaciones. A la vera'l ríu había un parque axardináu travesáu por un senderu ampliu curiáu a conciencia. Un chaval taba regando con aspersores y desbrozando tolo que franciera l'harmonía:
    - Oiga, esi edificiu tan grande sería onde taba l'antiguu Monesteriu medieval ?
    - Nun sé, fíos; simpre lu conocí asina, valeru y mediu en ruines. Tengo oyío que lu mercó un magnate pa llevantar un emporiu turísticu. Ye mui grande y les tierres axacentes lleguen allalantrones. 
     - A ver si tenéis suerte y se remocica de verdá, nun tendríeis paru nesti pueblu. 
     - Que Dios t'oiga. 
  Al llegar a una ponte madera cruciamos a la otra oriella a buscar el coche, nun queríemos dir tarde pal hotel. Llegamos ensin perda y en bona hora, eso pensaba yo entóncenes ....

Albelda d'Iregua
L'Ayuntamientu formando la esquina La Plaza 

   Albelda , l'aldea blanca, ye un municipiu de la comunidá de La Rioh.a que ronda los 3500 habitantes pa una estensión de 23 km2; t'asitáu al sur de Logroño, capital y bañáu por Ríu Iregua, que desagua nel Ebru. LLenda al norte con Lardero y Alberite, al sur con Nalda, al este col Clavih.o y al oeste con Sorzano y Entrena.
Seique la tradición popular gusta por dicir qu'Albelda ye una ciudá fondamente árabe llevantada pol Banu Qasí Muza nel sieglu IX , sicasí l'arqueoloxía - y les Cróniques - vienen a demostrar qu'esto nun ye verdá del too... En 1927 Blas de Taracena alcontró en Les Tapies (a 1 km) les güelgues d'una ilesina visigótica del VII (planta en cruz griega, teya romano y pila bautismal) y con sapozamientos alredor.
¿Y el cenobiu rupestre de Samartín?... Na parte alta la ciudá, nel interior de la Peña Salagona, hai maraviosu entramáu de cueves que tuvieren habitaes por monxos, probablemente dende'l sieglu V,  que más tarde siguieren la Regla de San Benito: cuartos, ilesies - como La Panera o capiella Santa Catalina- ya un Scriptorium amuesen vivencies altomedievales. La importancia d'esti cenobiu supo vela'l rei de Pamplona Sancho Garcés I - del que dependía la Rioh.a - qu'en 924 , xunto cola so muyer Toda, llevantó un poco más abaxo un braeru monesteriu, el Monesteriu de Samartín d'Albelda.

Camín del Scriptorium, tamos nun santuariu rupestre ...
- Chissss, dexemos a los monxos trabayar. 

     Un monesteriu nun ye una reciella de místicos amurniaos que deciden apartase del mundu; un monesteriu ye un centru de poder. El Rei Sancho quería convertir a Pamplona nun reinu como Dios manda y pa ello tenía qu'organizar el territoriu. Los monesterios formaben parte d'esti organigrama, yeren un braeru Gobiernu Civil: controlaben la población, cobraben los impuestos, enseñaben - el camín del cielu y el de la tierra - exercíen de xueces (un abá mandaba más qu'un marical) aplicando la llexislación y llevaben el control de la tierres que-yos donare'l rei al endefechu les donaciones que fueren amestando ...
      La obra cume d'esti monesteriu ye'l "Cronicón Albeldense" o Vixilanu de 976  si bien yá yera célebre desque en 950 l'obispu aquitanu de Le Puy encargare a esti escritoriu - mientres diba de pelegrinación a Compostela - una copia de "De la perpetua virxinidá de la Virxe María" de San Idelfonso de Toledo.
                                                    ---------------------------------
   

Códiz Albeldense o Códiz Vixilanu

      El Chronicón albeldense o "Codex Conciliorum albeldensis seu Vixilanu" , o "Codex vigilanus" ye un llibru que salió del Scriptorium del Monesteriu de Samartín d'Albelda nel sieglu X ; terminóse d'escribir en 976 de la mano del monxu Vixilano y los sos ayudantes Sarracino y García siendo rei de Pamplona Sancho Garcés II, Sancho Abarca (970-994), casáu con Doña Urraca.
      Esta enciclopedia medieval consta de 429 pergaminos en lletra visigótica d'un tamañu de 455x325 mm y que caltién 82 miniatures, unos verdaderos "beatos". Esta ayalga pasó a Santa Mª la Redonda , en Logroño, cuando'l Monesteriu perdió'l so puxu y anguaño ta peslláu nel Monesteriu del Escorial dende que'l conde de Buendía-ylu amosó a Felipe II.
    - H.e, h.e; esta ayalga queda pal mio esfrute, vosotros entá nun tais preparaos . 

Scribes Codex Vixilanus: Sarracino, Vixila y  García.
- El centru'l campu del Logroñes na dómina medieval.
Los del Sporting siempre tuvimos a piñón con ellos. 

    Los más de 200 monxos que llegó a tener el monesteriu debieron tar agabitando a los tres escribes pos son munchos los temes - relixosos, históricos, lexislativos - qu'abarca esti códiz:
   . Los Concilios que hubo hasta la dómina tantu n'España como nel restu'l mundu tán equí trataos.
   . El Fueru Xulgu, la vixente llexislación visigoda (Liber Iudiciorum: Recesvinto 654) tien un llugar importante nesta obra.

El Mundu na Edá Media:
Europa, Asia y Äfrica.

   . La Crónica Albeldense (883), quiciabes la más antigua de les cróniques al rodiu'l Reinu d'Asturies y escrita nel Scriptorium ovetense d'Alfonso III el Magnu (866-910) amuésase nesti códiz enciclopédicu. Tamién recueye la Crónica Profética y la Vida de Mahoma ...
   - Mui bien, Vixila; por si vienen los moros... Nunca nun ta demás un salvoconductu. 
   . Empleguen el calendariu y los númberos arábigos sacante'l cero. El  mundu conocíu: Europa, Assi y Äfrica tien la so miniatura afayaiza.
       Si quies antroxar cola lletra y dibuxos d'esti códiz pues facelo na mesma Albelda, onde tienen una copia. (Podíeis tenelo dicho antes).

                                 ------------------------------------------------

      Yá tenemos camentao que'l Scriptorium  del Monesteriu d'Albelda yera célebre antes d'escribir el "Chronicón Albeldense"o "Códix Vixilanu" por mor d'un obispu aquitanu.

 Don Andrés Cámara atoldando'l Scriptorium
por si tien qu'echa-y una mano a Gomesano.
 - Ansí se fai, gallu, pa un albeldense esto: "pan comío"
(Semeya diariu La Rioja)

      Cuando nel añu 950 Ramiro II de Lleón* (931-951) taba a piques de dar les boquiaes viendo la que s'avecinaba ente los sos fíos Ordoño y Sancho  l'obispu y conde aquitanu Godescalco tomó'l determín de visitar la tumba de Santiago en Compostela; ye'l primer pelegrín foriatu del que tenemos noticies. P'algamar a Compostela decidió facelo averándose a la Meseta escaeciendo la travesía norteña; cuido que pudo ser l'inventor del "Camín Francés".

* Alfonso III el Magnu, caberu rei d'Asturies,  tuviere dellos fíos que tamién algamaron la corona - yá de Lleón - pero non precisamente como hermanos:  García I (910-914), OrdoñoII (914-924), Fruela II (924-925). Depués yá vienen los ñetos, fíos d'Ordoño II:
. Alfonso IV, el Monxu (926-931) y Ramiro II el Grande, el Diablu pa los moros (931-951). Algún d'ellos tamién foi Rei d'Asturies, nun aparte. 

       Esti conde francés - Godescalco, de noble de familia - , yera obispu de Le Puy y conocía la obra de San Idelfonso "Libellus de virginitate", al rodiu la virxinidá de María y pruyía-y tener una copia de la mesma; ¿ónde meyor que nel Scriptorium d'Albelda? . Empobinó dica'l monesteriu y tres falar col abá esti encamentó-y la obra al monxu Gomesano. Llegó fecho polvu a Compostela - magar la bayurosa comitiva* que llevaba - y tres recomponese un poco per aciu del pulpu y el Ribeiru foi postrase énte la tumba del Apóstol pa suplica-y un gabitu colos moros. Un añu más tarde, nel iviernu del 851, taba picando a la puerta del cenobiu mozárabe con enfotu de recoyer la copia del códiz adebecíu. Cuenta Gomesano, seique los franceses nin lo mienten, que coló como unes castañueles; nun yera pa menos.
Años más tarde sedría Napoleón, sí, Bonaparte'l que fexo treslladar esta ayalga a la Biblioteca Nacional de Francia, en París.

-Nin una gota más de vinu, amiguín,
 Lo tuyo ye'l pergamín.

      *La comitiva del conde-obispu taba compuesta por unes 100 persones ente heraldos anunciaores, paxes, trovadores, xuglares, cortesanos, senescales, barones, cures, monxos y soldaos. Camienten les males llingües que mientres l'obispu rezaba na Panera los 99 restantes encamentábense a Dios per aciu San Rioja nes bodegues axuntes; un métodu bien melgueru p'algamar el cielu. 
      Yo tomé nota pero salióme torda. Unos díes depués d'algamar a casa llegóme un papelín de la Oficina Tráficu de Logroño onde aseveraben qu'esi día entrare nel aparcamiento soterrañu del hotel per ¡direición prohibía!; vamos, qu'entré per onde tenía que salir. Nun lo pueo creyer pero - pagué la multa como bon cristianu - tomo nota:
    - Dao que nun toi preparáu pa tomar Rioja pienso escaeceme d'ello de por vida y tornar a la sidra, el mio mediu natural. Perdón y <¡viva'l sicere, Don Beito!>**

** Pa entender esto hai que lleer nesti mesmu blog de Camín de Niria la entrada
 <Bon Camín [ 4 ]. Camín Primitivu :Tinéu- Campiello>                     
                                --------------------------------------------------------

Ordoño I d'Asturies
El braeru ganador de la <Batalla'l Clavih.o>

     Albelda tien una importancia decisiva na hestoria de la Reconquista por mor de "les batalles" del Clavih.o. La lleenda cuenta que'l rei d'Asturies Ramiro I derrotó nel Clavih.o a los árabes col abellugu de Santiago que quedó dende esti momentu como "Patrón d'España". La realidá fuere bien otra, el Rei Ordoño I anduvo a la tema col "tercer rei d'España", el proárabe Muza de la familia Banu Qasi que quería facese l'amu de la franxa comprendía ente'l Reinu d'Asturies y la Marca Hispana: Aragón, Pamplona y la Rioh.a, llevantando pa ello una barrera con dellos castiellos na tierra del vinu, talo Nah.era, el Clavih.o, Albelda o Viguera. Ordoño I nun podía permitilo y foi a por él. De mano recibió bones morraes  (851) pero en 859 acabó con Muza dafechu al qu'echalu del Clavih.o y d'Albelda teniendo qu'agospiar en Náh.era. Esto fexo posible la repoblación cristiana de la zona, Pamplona respiraba, de momento ... Pero al siguiente (860) los mesmos árabes arrasaron Pamplona que tevo que buscar l'abellugu del Reinu astur.

Sancho Garcés I de Pamplona,
rei de La Rioh.a.
(Semeya:puzzledelahistoria.com)

     Nel añu 920 l'Emir Abderramán III derrotó en Valdejunquera a los exércitos d'Ordoño II de LLeón y Sancho Garcés I de Pamplona, ¡menuda escabichina!. Pero'l moru nun conocía al astur-lleonés, al añu siguiente (921) llega de razia hasta Guadalajara y en 923 andecha con Sancho Garcés y tomen Viguera y Nah.era, onde'l pamplonica asitia la corte ente medies con Pamplona.
 Pero basta yá de guerres... Angüaño Albelda ye un municipiu prósperu que vive del vinu y los frutales y caltién una Asociación cultural, presidía por D. Andrés Cámara, col enfotu de recuperar la so hestoria y ponela "en candelabru". (www.albelda.info). Cuayu y suerte, albeldense.

                                 **************************************

El pelegrín entra en Logroño per aciu una ponte piedra 
sobro'l Ríu Ebro. Tien ente sí una estampa espiritual:
Les aguyes de los templos asemeyen escales del cielu.

NOTA: Nel post qu'espublicé en Facebook resulta travesé'l Ríu Duero tando en Logroño.. ¡Ai, Señor! Siéntolo abondo.  Tola culpa ye del bodegueru Espartero. Nun vuelvo tomar una gota vinu, polo menos de Rioja.   

     Al cruciar la Ponte Fierro por mor de la <Ruta d'Espartero> pasáremos per delantre una bodega, <Bodegas Franco-Españolas>, y como yera la más cercana a la ciudá decidimos visitala al día siguiente; la verdá ye que tábemos mataos tres la <Batalla del Clavih.o>, de xuro que m'entiendes... Nun yéremos dar pasu, asina que llamamos por teléfonu p'acutar sitiu y quedamos citaos pa les seis memos cuartu de la tarde.
     Un guapu paséu dende l'hotel - xintamos nel <Bar Les Teyes>, na mesma cai - a la bodega cruciando delantre la fonte qu'hai na Plaza l'Alférez Provisional y dexando a mandrecha l'edificiu la Oficina de Turismu onde entramos pol mapa que perdiéremos. Esta vegada nun reparamos siquier nel Parllamentu la Rioh.a nin na Sala Esposiciones Revellín, cruciamos l'Ebru pela Pasarela Peatonal y pelos xardinos del Paséu Fermín Manso algamamos la bodega. Un poco d'espera na sala de Receiciones y pa dientro tres l'amable señorita Eva.

                                <Bodegas Franco-Españolas>

Los fascistes italianos de Musolini vinieren agabitar a Franco na Guerra del 36
(Por qué nun vos perderíeis pel camín). Mandárenlos repostar los tanques y
vinieren facelo a les <Bodegues Franco-Españoles> ¿Sedría un erru?
Debieron de trompicase por mor del nome ... Pa min que foi a posta ...

    Nun pensábemos qu'una bodega fuere tan grande, entendimos que diba embaxo tierra de la ¡Ponte Fierro hasta la Ponte Piedra!. Tamién nos llamó l'atención lo llimpio y bien cuidao que taba too asina como la nueva teunoloxía qu'empleguen con aquelles pipes d'aceru onde se trabaya per aciu d'ordenadores y máquines que garanticen casi al 100% que tola uva qu'entra sal convertida en vinu. Vinu , con Denominación d'orixe Rioja , que como toos sabemos pue ser "xoven" o cosechero si ye del añu; de "crianza", con dos o tres años ente barrica y botella; "Reserva", cuando yá pasa de tres y Gran Reserva .... D'estos nin m'ocupo, pue tener algún ¡más de 100 años!, bueno polo menos han de tener 2 años en barrica y más de 3 en botella, habrá qu'esperar una solemnidá.

- ¡Ummmmm! ¡Qué palu tien esti vinu!
Échame la espuela, anda. 

       Cuando en 1890 la filoxera taba faciendo estragos en Francia un viticultor francu, Federick Anglade Saurat, vino a La Rioh.a en busca de cepes "llimpies" pa repoblar los sos viñeos. D'esta xuntanza nacen les  <Bodegues Franco-Españoles> y na primera vendimia va dar el Diamante y el Estilo Borgoña, depués Rioja Bordón y Bordón.
En 1920, fallecíu'l señor Anglade, los descendientes desfaense de les acciones y Les Bodegues queden totalmente españoles. La "Llei Seca" (33) nos EE.XX. asina como la creación del Conseyu Regulador (54) dan-y al Rioja un puxu tremendu y esti vinu pasa vendese nes principales capitales europees ya Americanes. En 1964 tenemos la meyor collecha del sieglo XX, y quiciabes d'esti.
En 1984 Marcos Eguizábal merca <Franco-Españolas> y en 2013 algamen el premiu "The Best of" de Turismu enolóxicu. En 2016, al añu siguiente del 125 cumpleaños, toma'l mandu Borja Eguizábal y en  2017 el Bordón , col nuevu enólogu, pasa a ser "descaradamente clásicu".

- ¿Por qué nun repetimos, ne?

       De too nos camentaba Eva, de les cepes de tempranillo pal tinto, que si bien puen durar cien años anguaño precisense ser más "moces" y han podase de cotino; o del blanco, de producción bastante menor  a partir de Macabeo, Malvasía o Garnacha blanco anque últimamente fáenlo con Verdejo, Miñón Blanco y Chardonnay. Tamién nos faló de la importancia los trasiegos, cada cuatro meses, pa que'l posu de la uva nun dea un tastu fuerte amás de da-y claror, y tamién de los corchos d'alcornoque necesarios pa oxixenar el vino.
        Recordónos qu'había dos fermentaciones: alcóholica y maloláctica. La primera cuando pola falta d'oxíxenu les bacteries camuden los azucres pa dar etanol y la segunda pa convertir l'ácidu málicu n'ácidu lácticu, ye dicir pa quitar l'agrín al vinu; calmar el vino, dicía Eva, qué guapa metáfora.
     Nun ye too "coser y cantar" nesto de la vinicultura, l'oidium , esi fungu blanquecín qu'ataca fueya y tallos mozos, ta namoráu de la vide  asina como la filoxera . Magar d'esto los vinos han llevar metasulfitos pa desinfectalos y conservalos. Agora cuando habro una botella y vierto un culín nel ya nun ye como antes, qu'emburriaba ensin más; anguaño miro pal color, do-y vueltes al caldu pa que vaya oxixenando y suérbolo pasu ente pasu pa saca-y el tastu. En fin, esto foi al final, enantes de colar, cuando nos brindó con unos letibles vinos - siempre quedo naguando - ya unos míseres pinchos de chorizu; Evina, tuvi que dir a la Cai Laurel a rematar. Na tienda mercamos unes botellines pa los amigos, o por si nos entraba la delgaina pel camín. En cualquier casu la visita foi granible y perprestosa.

                                       ********************************

                        < Dica'l  Camín de la Lleenda: BISXUECES >

Ilesia renacentista (XVI) de San Xuan Bautista de BISJUECES. El pòrticu ye una ayalga del platerescu que
caltién les estátues sedentes de los míticos Xueces de Castiella: Lain Calvo y Nuño Rasura. 

        Por esta vegada damos por finada la visita a Logroño, namás queda tomar la espuela pel camín de vuelta, nes Merindades. ¿Qué queremos visitar?... Munches coses, pero hai que dexar daqué pa más veces, güei queremos facer honor a Castiella visitando los dos xueces que'l pueblu nomare pa gobernar les sos tierres de La Bardulia; la capital, Lleón, quedába-yos mui lloñe .... Vamos pa Bis-Xueces, ¡vamos en busca de la tradición!
      Salimos de la tierra d'Eguizábal pela Cai Chile - nun conocemos otra - pa buscar la N-232, norte La Bureba, camín d'Oña pasando per Briones, esa ciudá de los berones qu'un día queremos/debemos visitar. Tres pasar Oña, siempres col alma en vilu esperando que Tigridia nos chisque un güeyu, llegamos a Incinillas pa tomar un desvíu a la derecha, per carreteina estrecha, BU-5601, hasta llegar a Bisjueces, unos tres kilómetros escasos.

Pórticu de San Xuan de Bisxueces. 
(Juan de Vallejo y Simón de Colonia)
Ayalga del Platerescu, onde tán inmortalizaos
 los xueces que propiciaron la independencia de Castiella.

     Bisjueces ye un pueblín de Burgos, nos rimeros de la Sierra de La Testa (641 m/snm), que pertenez a la Merindá de Castilla la Vieya con capital en Villarcayo, a menos de 6 km.
Los escasos sesenta habitantes que lu habiten celebren la fiesta de San Xuan Bautista, patrón del pueblu, al rodiu una Ilesia renacentista del XVI - sobro cimientos d'otra románica anterior - xoya del platerescu.
 De planta rectangular con una torre cuadrada bien bultable presenta la singularidá d'un pórticu abovedáu de crucería y sofitáu en potentes columnes qu'al traviés los arcos de mediu puntu amusen na portada un retablu - pa min la "xoya la corona" - dos estatues sedentes abellugaes por apóstoles y tres condes chuliando nel entablamientu que representen los dos xueces de Castiella: Laín Calvo y Nuño Rasura qu'exercíen la so maxistratura equí al llau, en Fuente Zapata, daquella'l centru de Castiella. Qué maraviya pa nun ser namás qu'una lleenda.
La ilesia mete un poco miéu, de nun tomar cartes nel asuntu pue pasales torniaes en pocu tiempu. Una pena polos canecinos románicos y tamién pol retablu del altar mayor, iguáu nun va tanto.

                 ¡¡VIVA LA REPÚBLICA  DE BISXUECES !!

Bisjueces, onde entamó la lleenda
de la República independiente de Castiella.

    La llenda de Bisjueces xustifica los oríxenes mitolóxicos de Castiella y va sirvir de nexu d'aunión con otres lleendes de la columna vertebral castellana como son la de Fernán González o la mesma del Cid Campeador.
      Laín Calvo y  Nuño Rasura son dos mitos que xurden de la tradición y sirven pa esplicar lo que pasaba na naciente Castiella, seique algo habría... Nun se pue inventar too, amás queden restos materiales de qu'esistieren: La llápida de Rasura en Cigüenza, el topónimu de Villaláin, .

        Cuando nos entamos del sieglu X Asturies dexa de ser la capital de la Reconquista Castiella yá tenía una entidá propia, magar siguiere dependiendo de Lleón. Los pasos repobladores de los reis asturianos como Alfonso I, Fruela, Alfonso'l Castu, Ramiro, Ordoño o'l Magnu al traviés de xente como Nona Bella, l'Obispu Xuan, Lebato y Munidona, Vítulo ya Ervixio y tantos otros dieren el so frutu y la Bardulia llaróse de castiellos, d'ilesies, de pueblos, de camperes y de tierres de cultivu, ye por ello que los sarracenos casi siempre nos atacaben per ehí, pel este, tarrén más propiciu pa la razia granible.

Laín Calvo

      Pero los nuevos colonos, más godos, más cántabros y vascos que mozárabes, siempre espuestos al enemigu permanente ( nun había branu ensin la cafiante visita), diéron-y a Castiella (Bardulia) un caráuter singular porque yeren xente de poco, pero suyo, y amaben la propiedá como naide pos temíen perdela cada añu y defendíenla talo gatu panzarriba. Castiella, tierra de fronteres, pasó de los valles de Mena, Losa y Tobalina hasta l'Arlanzón (Burgos) asentando en Valpuesta y Valdegovía, Álava, Trespaderne ya Oca, Miranda o Tirón .... Pasu ente pasu pero pal sur-este. Esto fai caráuter.
      El caráuter d'estos colonos norteños nun pasa pol de servidume, son xente llibertario qu'ama y defende'l so tarruñu y esto va determinar un tipu de rellaciones que se puen concretar no que se conoz como la Behetría (a la qu'un día dióme por llamar <bonfetría>),  ye dicir, < cuando los vecinos aconceyen pa escoyer al so señor> :¡la Democracia!.
       - Daquién tien que mandar pero si podemos elexilu nosotros, meyor. (Por eso hai que votar, joder; nun val quedar en casa).
      De les behetríes surdieron les Merindades, <de mar a mar> o  <de llinax> según escueyan ente cualisquier candidatu o a un noble reconocíu (malo).

Nuño Rasura

     D'estes behetríes van xurdir dos personax de lleenda: Laín Calvo y Nuño Rasura a los que la tradición popular considera los primeros gobernantes autónomos de Castiella: Laín p'asuntos militares y Rasura xuez de lo civil. D'estos xueces, que non señores, van a descender el guerreru Cid Campeador y el políticu Fernán González, primer conde ¿independiente? de Castiella (dellos autores consideren que por aquel entós una autonomía) . Esta lleenda espresa en cualquier casu una realidá, la independencia castellana algamóse pasu ente pasu empezando polo civil. Por ello, amás, vien prestame esta lleenda, ta al mio pensar perbién construyida, entama polo civil, polo cotidiano, polo real, ye dicir, <nun queremos la independencia a palos>.

       ¿Pero esta guapa historia de Bisxueces ye realmente verdá?... ¿Son reales Calvo y Rasura? ... ¿Exerció'l biumviratu al empar sentenciando con fazañes talo xueces aplicando'l Llibre Albedríu y escaeciendo'l Liber Iudiciorum visigóticu? .... ¿Foron los primeros? ... ¿Tuvieren la sede en Fonte Zapata (Bisjueces) dao que Lleón quedaba bien llueñe pa resolver los sos conflicto? ... ¿Cuándo entamó la lleenda? ....

San Xuan de Bisxueces, tente mientres cobro.

        Cuenta una lleenda que tou escomencipió en 842, tiempos de Ramiro I, namás morrer el Castu, cuando tol norte d'Hispania taba, más que menos, embaxo l'abellugu d'Asturies; dende llueu nós sentíamonos "responsables" y actuábemos como talos.
    La Historia Roderici (>1099) , biografía del Cid, y la Crónica Najerense (>1160) falen d'estos dos personax pero ensin facer referencia a la so condición de xuez. ¡Toma esa!, cuido qu'esto afita la so existencia como personaxes cabezaleros en Castiella.
      Noticies escrites d'esta lleenda alcontrámosles nel Fueru Xeneral de Navarra (1157 -1194) que fai referencia al Cid como ñetu de Layn, collaciu de Rasuera, dambos "iudiçes de Castyella".   ¡Agora yá son xueces, entama la lleenda!
      El Liber Regnun o Chronicón Villarense (1196-1211) fala de la nominación d'estos xueces tres la muerte del Castu (842) y llegada de Ramiro I al poder. Nella faise referencia al llinax del Cid como descendiente de L. Calvo y a Fernán González de la familia Rasura.

Escudu de Villalaín

       Pa da-y conteníu a esta lleenda vienen depués l'obispu ya hestoriador Lucas de Tuy y l'arzobispu de Toledo Ximénez de Rada. Lucas de Tuy escribe'l Chronicon Mundi (1236) y "elixe" los dos xueces tres la sublevación de los nobles castellanos escontra'l Rei Fruela II. ¿Qué fadría?...

        Cuenten que la cosa entamó en tiempos d'Ordoño II (910-924) rei de LLéon y Castiella y en ciertu mou de Galicia, Asturies, Cantabria, País Vascu. Nel branu de 920 Abderramán III  tomó'l determín de visitar el norte la península, más fresco que la caldia Córdoba. Como casi siempre camín de la Bardulia pasando pela Rioh.a, seique l'oxetivu taba en Navarra. Ordoño aconceyó con Sancho Garcés I de Pamplona pero foron derrotaos dafechu, primero en Calahorra y darréu en Valdejunquera. En Pamplona nun quedó nin San Fermín.
       El rei lleonés echó la cupa l'escalabru a dellos condes castellanos que nun agabitaren nel envite: Nuño Fdez, Abolmondar Albo y el so fíu Diego amás de Fernando Ansúrez. Con engaños, cuenta la lleenda, citólos el rei en Carrión, onde fueren presos y muertos. La xente - autoro de les lleendes - ye un poco primario pos sábese qu'estos condes, verdaderos, tiempu depués exercíen con procuru'l so oficiu.

Ordoño II de LLeón
(Semeya: Wp)

      En cualquier casu d'esti magnicidiu xurde la lleenda de los xueces Laín y Nuño que fueren elexíos pa gobernar el condáu por rebelase'l pueblu escontra'l Rei, yá tiempos del so hermanu y sucesor Fruela II (924-25) que venía de gobernar n'Asturies. Esti fechu, esta batalla, ye lo que va xustificar la presencia de los xueces, l'entamu la independencia del Condáu de Castiella, ¡la Repúbica!. 
        La cronoloxía mata la lleenda porque Nuño Rasura, por exemplu, de vivir, viviere ente (789-862) y Laín yera xenru suyu. Escontra la veracidá d'esta lleenda tenemos tamién:
   . Que denguna crónica cercana- Albeldense, Alfonsina - o daqué más alloñada - Sampiro, Silense, Pelayo - fala d'estos fechos (¡colo que-y presten los cuentos al obispu!).
   . La contradición nes feches : ¿842 ó 925?. Fernán González, ¿nietu de Rasura?, yá ye conde de Castiella en 932, ¡vaya gallu!.
   . Non hebo <vacíu de poder> cola entrada de Ramiro I nin con Fruela II; los condes castellanos yeren "sumisos" a Lleón, otra cosa ye que tuvieren fasta los mismísimos y naguaren por mayor  autonomía como demuestra'l fechu de qu'en Burgos se quemaren dellos exemplares del Fueru Xulgu (Liber Iudiciorum, del que tenemos copia n'asturianu). 
   . Non hebo <vacíu de poder> cola entrada de Ramiro I nin con Fruela II; los condes castellanos yeren "sumisos" a Lleón, otra cosa ye que tuvieren fasta los mismísimos y naguaren por mayor  autonomía como demuestra'l fechu de qu'en Burgos se quemaren - de mal aquel - dellos exemplares del Fueru Xulgu (Liber Iudiciorum, del que tenemos copia n'asturianu). 

- Oiga, ando buscando la tumba de Nuño Rasura
pero en Bisjueces nun ta. ¿Podría dicime onde s'atopa?
- Teníemosla na necrópolis de San Andrés, equí en Cigüenza,
pero.... desapovisó. Quédese cola lleenda. 
- (Fatos)

        En resume, los personax de Laín Calvo y Nuño Rasura ye fácil qu'esistieran* realmente pero que tuvieren esi cargu .... Nesa dómina (s. X) paez que'l Liber Iudiciorum tovía pintaba enforma. Pero yo amo estos dos xueces que-y dan conteníu a la lleenda, toi más averáu al pueblu qu'a los historiadores formales ( a los que busco ensin desvelu). <La lleenda de Bisxuces> xurdió nel momentu más oportunu, cuando Castiella entamaba'l camín de la independencia con Fernán González; ¿dalgo más gratible qu'una lleenda pa xustificala?.

NOTA:
Algunos (Lucas de Tuy) de los qu'afiten la esistencia de Nuño Rasura dicen que yera catalán.¿El güelu -mentira- de Fernán González, el padre la independencia de Castiella, yera catalán?... Pensá-ylo per Cataluña, los llazos que nos funden son frutu del amor (Nuño casó en Castiella); <non la jodamos> más.

La necrópolis de San Andrés de Cigüenza, onde se camienta
tebo sapozáu Nuño Rasura que llevaba una inscripción:
< Equí xaz Nuña Rasura, xuez castellanu>
(Semeya: Wikipedia)

* Les güelgues de los xueces:
A min - ¿a que a ti tamién? - pruime qu'estos xueces sían reales. ¿Buscamos dalguna pista?...
. Pórticu de la ilesia de San Xuan Bautista en Bisjueces con inscripciones nominatives.
. Villa-laín, un pueblín cercanísimu a Bisjueces, onde teníen la corte xudicial, dicen. Él mesmu pue que tea enterráu na ilesia románica de Sta. Mª de Torrentero, en Villalaín.
. Nel xacimientu arqueolóxicu de San Andrés de Cigüenza - a una llegua de Bisxueces - apaeció una llápida na necrópolis que dicía: "Equí xaz Nuño Rasura, xuez castellanu". (Perdióse, naide nun sabe onde ta).
. Nel Arcu de Santa María, na muralla de Burgos, sopeléxense dos escultures de los xueces con sendes inscripciones.
. Nel interior d'esa puerta, na Sala de Prioridá, hai un escañu madera onde cuiden se sentaren los xueces. Tamién se caltién una pintura al frescu con dambos xueces impartiendo xusticia.
. En Rasueros (Ávila) ta'l Castiellu del Conde Rasura, fundador del pueblu.
. El castiellu de Peñafiel (Valladolid) paez ser fundáu por Laín Calvo o'l so fíu Ruy Láinez.



ESTIMANCES:

Plaza de personaxes ilustres (Logroño)

. A J.J. Esparza, pol so amor a España, pol so ciñu pol <Reinu del Norte> y la so  <Gran Aventura nel Reinu d'Asturies>; poles sos hestories que son <cróniques> onde abebento de cotino y me lleven por oníricos paraxes.
. A la mio librera  <Wikipedia> que m'apurre bayurosa información en tiempu record, ¿qué fadría yo en sin ti?.
. Al   <Condado de Castilla > que caltién viva en mi la llapa de la hestoria amosando y proponiendo les siendes qu'adevezo percorrer. Gracies, de verdá, por rellenar los valeros históricos del mio celebru.
. A dellos blogs o webs qu'alcuentro rebuscando per internet y munches veces nun m'alcuerdo d'amentar como debiere, por exemplu: <curiosidadesdelahistoriablog.com>, <lariojaturismo.com>,
<www.albelda.into>, <puzzledelahistoria.com>. Web del Ayuntamientu d'Albelda (www.albelda.org).
<albeldadeiregua.blogspot.com>.
. A la <Asociación para la historia de Albelda> que preside D. Andrés Cámara; préstame esa iniciativa asemeyada a la de los vecinos de Les Regueres (Asturias) que tán escavando na Estaca (arqueólogos, claro); una villa romana ta al acesmu ...