¡Bon Camín! [6]: < A Mesa - Grandas de Salime >

          < Camín  Primitivu: Uviéu - Santiago de Compostela >

     <¡Bon Camín! [6]: A Mesa - Grandas de Salime>

                     Del Embalse al Chao, pasando pel Muséu   

 < Onde'l cielu enraigaña cola tierra >
Buspol, nel Camín Primitivu.

<<Vamos Camín de Santiago
a calechar col Apóstol
  qu'amosare en Compostela
    tres d'un tiempu silenciosu.
Bien lo anunció yá'l Beatu:
   - "Santiago tevo l'acoldu
d'apersonase n'España
p'agabitar colos moros".
      Asturies  nun s'escaez
d'esa visita, Xacobu,
pos gracies a Alfonso, y a Usté,
la Reconquista fo un llogru
 y esti <Camín Primitivu>
 nuesu petite ya enfotu.
Cuando llegue al  "Finis terrae"
pienso echátela a los bolos >>.

      Esta vegada sí, sí vamos facer una etapa completa, dende A Mesa a Grandas de Salime, como quien diz 17 km, que yá sabes que son más por mor del andoliar per dellos llugares; a eso vamos, a restolar. 
      Como yera munchu caleyar y La Mesa queda en ca Luhg decidimos salir de casa'l día antes y agospiar nel Albergue Miguelín d'onde saldríemos al día siguiente; un taxi traeríanos de vuelta  al coche. Tres consultar con una collacia de la zona aconséyanos dir pela costa hasta Vegadeo y lluéu tirar per Santolaya los Oscos hasta Grandas:
     - Igual ye un poco más llargo, pero la carretera e más donda, meyor pisu, más ancha, menos curves.... 

Romería intercética en Teberga 
(No que camentábemos pel camín)

         Salimos pela tarde, más p'allá de les seis pos teníemos una comida d'hermandá colos antiguos collacios de trabayu. Too mui guapo pero darréu pasar Vegadeo y xubir La Garganta decatámonos que nel panel del cuadru mandos del coche había daqué raro.... Una llimitación de velocidá de 54 km/h y nun sé qué más... Reduximos la velocidá pero'l casu ye que'l coche andaba a más de los 54 aconseyaos, sobremanera baxando... 

     - Voi dir pisando güevos pero vamos agospiar en Grandas, nun m'atrevo xubir a La Mesa. Mañana bien ceo llevamos el coche  a un taller de la villa qu'acabo d'alcontrar per internet. Dexámoslu iguando y xubimos en taxi a La Mesa.
     - Lo mesmo pero al aviesu, d'alcuerdu.

<Suaños de Salime>
Ferregüeyando talo un ave'l Camín a percorrer.:
Baxar al pantanu de Salime y xubir al pueblu de Grandas.

       <Quixera, talo Hermes, tener delles ales,
 nalar pelos montes con prestes sandalies
viaxado ensin prisa per estes postales.
          Cruciar les fronteres , llibar  enseñances,
calar nos misterios de toles montañes
viaxando ensin prisa  per estes postales.
          Llegar a Santiago con mios credenciales,
cunta-y a Xacobu, oh, simples mortales,
les nuesen hestories, les nuese fazañes,
y da-y al Apóstol, por ello, por too:
                                                                 GRACIES.>
                                                        

       Ansí que llamamos al albergue pa que nun cuntaren con nós y pidimos posada na villa, nel Hostal La Barra, que lu teníemos enfrente. Fuimos probar el pulpu al Bar-Hostal Occidente  y darréu a descansar. 
Andaba roceanu col asuntu'l coche y llevantéme bien ceo p'amirar el llibru, a ver si, más frescu, entendía daqué.
    - ¡La madre'l corderu!... Si esti coche tien esa aplicación de nun pasar de cierta velocidá si nun quies ... 
    Tres maricar un poco quité aquello "raro" del cuadru mandos, sicasí nun atalantaba a comprendelo del too. Llevo añu y mediu con esti coche y nunca nun emplegué lo del "llímite velocidá". Polo visto andaba a más de lo marcao porque nun apretare'l botón de "val, gallu"; asina que l'aplicación taba n' stand bye. Lo que sí prometo ye agospiar un día en Casa Miguelín, el día que vaya visitar el Castru del Chao, el dolmen de San Emiliano y el Muséu (por tercer o cuarta vez pero presta talo fuere la primera); vamos, un día de ruta pol conceyu de Salime. 

<A Mesa>, los Albergues de Miguelín.
Entamu la estaya de güei.

        Xubiónos la taxista del pueblu, y yo encantáu porque les muyeres son más cuidaoses, van más despaciu; los homes paez que llevamos dientro un Hamilton, ¿tenemos daqué que demostrar?. 
Amás metiónos per un atayu y salió más barato. Nun pienso cambiar pa la próxima, tarrezo correr; asemeyo a Fernando Alonso a bordu d'un McLaren F1. (¡Quién me lo diba dicir!. Lo que nun cura "l'acua vitae" cúrenlo los años. Suerte de poder cuntalo.)

< Pelos altos de Buspol
San Antonio ta de fuelgu 
porque'l ganao anda suelto
 so l'abellugu del Cielu>

    
   Son les nueve y media (9:30) cuando emprentamos la ruta. Del Albergue Miguelín sales picando p'arriba, pela carretera, camín de Buspol. Meyor dir faciendo semeyes pa nun afogate cola cuesta. 
   Aquello paecía una romería de la pila  xente que salía; pelegrinos a mamplén.  Pasábennos toos, hasta los de la quinta, pero les vistes de los montes d'El Palu son tan guapes .... (Hai que disimular).
        Enriba nueso'l monte llaráu de los siempre presentes molinillos xeneradores de lletrecidá pero préstennos más les praderíes col ganaú vacuno, los toxos, los gorbizos y los piornos pintando de colores el monte. El ramax d'una bidul danos pie a sacar unes semeyes chungues de Buspol: 

     - Para un poco, ne; fáltame l'aire. 
     - Puf, la coral dame unos baltos... 
     - Hai qu'andar amodo, otramiente nun llegamos... ¡Aire!

Capiella Santa Marina de Buspol
< Si la campana nun suena
ye porque ta a bon recaldu,
yera'l petite d'algún
desaprensivu foriatu>

       Alcanzamos la picalina a les diez y cuartu (10:15); teníemos los molinillos al algame de la mano. Un cuartu d'hora más tarde, per una caleyina, aportamos delantre la:
Capiella Santa Marina, en Buspol. Trátase d'una construcción en mampostería de pizarra, a güesu, y  cubierta a tres agües de chousa prieto. Un portalón con bancos integraos, que fai les veces d'adriu, antecede a la sóleda nave que remata nun retablu ¿románicu? policromáu que pues almirar al traviés d'una verxa de madera a nun ser que la puerta entrada - despintada n' añil ya almazarrón - tea abierta. Esti milagru pue facételu la Virxe de la Marina, representada nuna talla, o la Virxe de la Madalena, que l'acompaña nuna fornacina axacente. 

Santa Marina y Santa Madalena,
 San Antón ta al quite... 
Nun-yos quita güeyu, manín.

        Piquiñina pero galana, esta capiella lleva una espadaña que caltuvo hasta va poco una campana de bronce, ¡toma!, que'asemeyaba a les del Monesteriu de Corias; hebo que guarecela por seguridá... Esto ta mui alto y siempres hai algún .... malfechor... Date cuenta que les dos vírxenes, pa nun sentise tan soles, pidiron la proteición d'un santu y ellí aprució San Antón pa face-yos compaña. Dos moces soles ye un poco esmoleciente. Bien, gallu, foi un detalle pola to parte; y de pasu pues echar una güeyada al ganao qu'abonda per estos montes, eso ye lo tuyo. 

          Un cartelu diznos que nos queden 12,5 Km pa Grandas, pero vamos cuestabaxo, sicasí camienten que'l baxar ye lo pior, lo má abegoso d'esta estaya del Camín; esperemos nun alcontrar muncha piedra suelto; los caminos de xial son bien esmolecientes. Nós vamos encantaos per esta pista; si nun son pinos son piornos o'l bricial-toxal tan amáu pol@s brux@s.  Baxamos seliquino, talo un grupín de moces foriates coles que facemos daqué semeya, pos ye trasegáu esti trayeutu; nunca nu  alcontráremos tantu trasiegu nel Camín ... ¡Da gustu!

Buspol

         BUSPOL ye un pueblín de la montaña occidental asturiana (a unos 1000 m/a) que pertenez a la parrroquia d'A Mesa xunto con estos otros: Buspol, Viliar de Buspol, Toucedo, Valiamayor y A mesa, claro. 
    A Mesa pertenez al conceyu de Grandas de Salime , ye dicir, a la Comarca del Parque históricu de Nava.  Ye una de les siete parroquies que conformen el conceyu : Grandas, A Mesa, Vilarpedre, Trabada, Penafonte, Vitos y Negueira. 

   
   Esta caparina anda despistada (como yo) ente'l manzanillón, que dicía Madre; prometo que'l día que la pille voi pidi-y la filiación y cuntávoslo equí mesmo. 
El mazenellón (Anthemis arvensis) ye una planta yerbácea anual q'alcanza bien el mediu metro d'altor. Anthemis=pequeña flor n'inflorescencia en capítulEmplégo de la familia de les asteracees=estrella, como se pue apreciar pola distribución de los candes foliolos blancos coles flores tubulares, marielles, del centru. El frutu ye un aqueniu, asemeyáu al de la fresa. Emplégase pa baxar la fiebre o en casu d'infecciones; claro, por eso les caparines tán tan guapes. 

       Un moxón indica a manzorga cuando andamos pel pinal, per una pista forestal; quédennos (11,5) km pa Grandas. ¡Esto ye Holywood! 
A les doce meudía (12:00), cuando la pista entama picar p'arriba, namás nos falten (8,5 km) pa la meta. Cuando xubes, cuando baxes .... Media hora depués, a les (12:30).... 
    - ¡Un  cortín! 

El Cortín pa los casiellos.
- < Tengo un cortín a mediu h.acer 
 que preciso acabar cuantu antes>,
camentó Asur con Alana.

          La patrona andaba al pendiente y foi la que primero lu vio. Una mena de muralla circular de mampostería piedra calizo que tien más de 2 m. d'altor - na parte baxo, más - llevantada na fastera soleyera de la viesca y ta construyida col enfotu de caltener unos casiellos d'abeyes al deslláu de la gulisma los osos - son tan llambiones - los lladrones o'l fuéu. 
      Los cortinos - propios del occidente d'Asturies y llendes de Galicia y Llión - llevántense orientaos al meudía y en pendiente, colos trubiecos asitiaos n'escalera pa facilitar la entrada y salida les abeyes y col envís que toos reciban sol. Tamién tienen que tar al abellugu los vientos como'l nordés o'l gallegu , los más comunes de la zona. Hai más per esta sienda de güei pero non mui cerca ente sí; a ver si vemos otru más p'alantre ... 
     Delles veces llevántense cortinos nos castañeos col visu d'apecuñar les castañes, envainaes nos oricios, productu de la gueta. 
     Yá quixere mio güela tener un cortín sicasí munches castañes pañamos  a la gueta que depués asábemos nel llar, nel suelu, talo que los celtes del Bronce:
     - Que non solo d'abellotes vive l'home, Estrabón.

El Busgosu, talo que la Esfinxe de Gizhe,
ta curiando del Camín, seique paeza los contrario.

            Y siguimos caleyando pela pista de la viesca solombriega.  Nun saliéremos entá del plamu del cortín cuando ..... 
    - ¡Mira qué figura!
    - ¿Aú?
    - Enfrente, na roca... ¿Nun ves al Busgosu?

    - Malaya, otra vuelta; yá tas tu cola mitoloxía ... 
    - Fíxate bien, les ñaples y la boca bien bultables, la melota enguedeyada, los güeyos profundos ... Paezse un poco al Raigosu de l'Aldea Perdida, ¿non?.  
   - ¿Pues faceme alcordanza d'aquello?
   - Con munchu gustu: 
<Restolando per l'Aldea Perdida [1]: Foces del Raigusu>
          
    - Bueno, yo tiro; sigui tu coles pantasmes...
    - Voi amosà-yosla a esta pareyina pelegrinos que vienen equí ....

El Raigusu
N'Aldea Perdida.

    - ¡Hellow, mocinos! ...¿Queréis que vos faiga una semeya 
col Busgosu ?
    - ¿ El Bus..... ???
    - El Busgosu o Raigusu, como se conoz per Llaviana. Mirá-ylu. El guarda de la viesca. Ta curiando de los pelegrinos que faen el Camín .
     - ¿Qué sabéis d'esti ancestru vuestru?
     - Qu'entamó amosase per  Asturies nel sieglu XVII cuando los carpinteros vascos vinieren echanos una mano por mor de la instalación de mazos y molinos qu'aumentaren a esgaya por aciu del maíz. Debió venir con ellos porque hasta entós nun yera mui conocíu. 
    - Bueno, pos venga la semeya. 
    - Arimáivos un poco, que paecéis enfadaos... 

         Él ye español, de Mallorca, y ella alemana. Faen bona pareya Kilo y Xulia; vense contentos magar qu'a la  mocina costóme saca-y una sorrisa. Al charrar decatámonos que pa ella'l Camín termina esta nueche en Grandas, pol momentu; coses del trabayu... Otra manera de facelu, cada pelegrín tien que buscar el so modo....

Kilo y Xulia tán encantaos col Busgosu.

       Y camienta Alana:
    <Los viaxes son como una vida concentrada nun espaciu de pocos díes: buscamos una xida que dea xacíu a tanta fatiga, persiguimos una meta non siempre dimpuesta a amosase de manera nidia, contemplamos paisaxes estremaos, tenemos ratos de felicidá darréu d'otros d'amarguriu, rimos, lloramos y cruciamos con xente que percorre xunto a nós un tramu del Camín, pa lluéu dispidise, guapamente, hasta nunca. >


       Y yo faigo alcordanza de <La Peregrina> cuando Americio, el pá de Freya, busca la compaña del Rei col enfotu de facelu ver la necesidá d'una Reina pal país:
            < Una esposa nueva al vuesu lláu diba ser un  fuelgu pergrande pa los años de descansu que tienen de venir, maxestá. ¿Nun camentareis n'ello? . Tou guerreru precisa d'una muyer na que aselar de les sos fatigues ......
 Una moza fiel, entregada, discreta, dimpuesta a escuchavos cuando preciséis desfogavos >

Embalse de Salime, dende <La Boca de la Ballena>, de Xuaquín Vaquero Turcios.
Embaxo estes agües permanez dormíu l'antiguu pueblu de Salime,
quiciabes n'algún requexu queden güelgues del pasu del Rei Alfonso. 

       Charramos un ratín cola pareya pelegrinos pero'l l nuesu ritmu cansín nun val pa dos mozos. Despidímonos, pol momentu, y siguimos caleyando pela viesca solombriega, llarada d'encantos, p'encima'l Pantanu de Salime. Nun tenía qu'acabar esti cachu... Otru <caminín encantáu>...

                                                 ****************************
     Costó-yos a los primeros pelegrinos- la comitiva d'Alfonso II el Castu - baxar de Buspol hasta'l Riu Navia, que ye preciso vadiar. Acamparon a la orilla, ensin cruciar, hasta la mañana siguiente. Nun había ponte d'aquella asina que buscaron el sitiu afayaizu gracies al gabitu d'un vecín de la zona. Nós tenemos la suerte de poder crucialu per aciu d'un ponte asitiada na presa d'un embalse artificial
A la una menos cinco (12:55) fáltennos  7 km p'algamar a Grandas, ye dir, 1 km pal pantanu. Ensiguida damos cola carrtera xeneral (AS-   ) que prauticamente nun ha d'abandonanos fasta'l final. Yá veremos.... A les (13:45) tamos gociándola nel embalse tres chisbar tol entornu dende un mirador fechu a costafecha, la <Boca de la Ballena> de J.Vaquero Turcios.

L'Embalse de Salime

        L'embalde de Grandas de Salime ye'l terceru construyíu nel Ríu Navia, tres los de Dorias ya Arbón, nel añu 1955. Tien una capacidá de 265,60 Hm/3 . La presa, de tipu gravedá, tien 128 m/a y ta astiada n'axuntanza los conceyos de Pesoz, Allande y Salime. Les tierres d'influyencia abarquen 685 Ha ente Asturies (Salime ya Ibies) y Llugo (Negueira de Muñiz). La so finalidá ye hidrollétrica magar se realicen actividaes llúdiques ya sportives nesos 30 km d'agües seles.
      L'embalse de Salime foi idea primixenia de Narciso Hernández Vaquero (1940) siendo Joaquín Vaquero Palacios el que fexo'l proyeutu tres la primera guerra mundial que trabayó col gabitu del so fíu Joaquín Turcios. En 1946 entamaron les obres pola compañía Saltos del Navia, a comuña con Hidroeléctrica del Cantábrico y  Electra del Viesgo col sofitu del Bancu Urquijo que puxo oficines y ellaboró los proyeutos. Anguaño llévenlo al alimón Saltos de Navia C.B. y Endesa Xeneración.

La hidrollétrica Presa de Salime (1955): 265,60 hm3

          Pa construyir la presa foi preciso disviar el calce del Ríu faciendo un tunel de 30725 m/3. El cemento producíase a pie d'obra apurriendo la piedra d'una cantera cercana. El clinker (cemento), yelsu ya otros materiales veníen por vía marítima dende'l Puertu de Navia per aciu un teleféricu de 36 km de llargor; nunca se tuviere visto cosa igual na España d'aquel entós.

Hotel-Restaurant Grandas
Nun entornu paradisíacu. 

       Esta obra titánica precisó de muncha lloxística : ataguíes, almacenes, carreteres, planos inclinaos y cuatro poblaciones nueves p'acoyer a los más de 3500 operarios, veníos de toa España, que trabayaren nel embalse.
           Vaquero Turcios, el fíu, ye tamién l'autor de unos escomanaos paneles desplicativos de la obra na sala de turbines del emnalse - yo téngolos visto - asina como del Mirador <Boca de la Ballena> onde s'aprecia tola monumental construcción, incluyendo los cuatro poblaos llevantaos a costafecha:
     A Paiciega, nel altu; embaxo, más cerca l'embalse había otru más pequeñu, de barracones de ladrillu que comunicaba col anterior per aciu una carreterina bien pindia. Del terceru, a mandrecha l'embalse, entá se puen ver restos de les cases y el cuartu, Vistallegre, el más guai, yera pa la creme: alministración y xefatura. Vino xente a trabayar de toa España, sobremanera d'Andalucía, pos los sueldos yeren buenos pa la dómina.

Hotel-Restaurant "Grandas"

         ¡P'arriba!. Seis kilómetros llargos fasta Grandas; dicen que ye de lo peor pero nun lo creto, lo que pasa que tamos cansaos y l'asfaltu ye perfadiu, calienten los pies y salen los reumes a rellucir... Yá lo vi pior.
           Ensiguida, nuna recurva, una casona pergrande, moderna, como colingando sobro'l pantanu; ye l'Hotel Grandas, siéntese bulliciu... Cuido que cuasi tolos pelegrinos deben parar equí, a comer o a vermutiar. Nós preferimos la yacuada na meta, nun vamos a repetir lo de Berducedo. Efeutivamente, munchos que nos pasaren vuelven a repasanos, ente ellos la pareyina del Raigusu.

      L'Hotel-Restaurante Grandas: Amás de les vistes maravioses sobro'l Pantanu de Salime pue presumir d'una bona cocina; nun dexes de probar les croquetes caseres de cecina, el pulpu o la paletiya de llechazu, pero tola comida ye casero y ta perbono. P 'agospiase ofrez habitaciones simples, de dos cames y hasta lliteres pa grupos.

Área Recreativa
Menú del pelegrín, a lo grande.

        Vamos cuntando los kilómetros que falten, den l'hotel 5 km. Cuatro, tres, dos....
    -¡Mira, un Área Recreativa ! 
    - La Virxe de la Marina alcordóse de nós. 
    - Hasta mesa. 
    - Y mantel. 
       Sí, señor, un Área Recreatica nuna recurva la carretera sobro'l pantanu. Un cartelu diz que bien cerquina d'equí ta Pénjamo, y vienme n'alcordanza aquel canciu tan célebre der Pedro Infante y que mio madre cantaba tan bien como él: "Dicen que soi Pénjamo ... Mi lindo Pénjamo... Yá toi llegando a Péjamo" ...  Siento una emoción indescribible nesti momentu y nun tengo otra qu'entrar en Youtube pa escuchala, torno a los años 50, a la infancia, a l'Aldea Perdida, a los regatos nidios, a la groma azebache del carbón, al agua cristalín de la Chalana, a los balagayes de yerba, a los cromos de Bahamontes y Berrendero, la Orbea verde de Papa, y a los cancios mañaneros de Mama ... Y como nun lo aguanto voi a tomar un vasín, que ye la hora'l vermú.
       Mientres la pelegrina tresna la mesa yo doi una vuelta pela redolada....  Allalantrones, nel fondu, atracada nun requexu'l pantanu vese flotando una barca. Cerca hai una casa pero nun veo modo d'algamar a ella per carretera... Por más qu'amiro... Yá entrugaré...

Arribando a Grandas de Salime
tres salir de la viesca solombriega.

          Tres la xinta pelegrina embredamos cuestarriba pela caldia carretera col envís d'algamar  la capital del conceyu, la percélebre Grandas de Salime.
    - Oi, mira equí... El cartelu empobínanos per esta caleyuca a manzorga.... 
    - Pensé que yera pola carretera...
    - Y yo, pero... ¿Y si nos metemos pel camín afayaizu, el xacobéu puru?
    - Acuéi; nun vamos a chingala a última hora. 
    Salimos del asfaltu pa entrar nuna  sienda estrencha y avesida pero sobre tou ¡pindia!... Más pecaos...
    - ¡Madiós, nun pue pasame esto otra vuelta, depués de comer!
    - Anda, ne; pa lo que queda... Debe ser un atayu, asina que nun falten nin dos kilómetros ... Amás mira, yá enllana'l camín. 
    - Tamién ye mala cigua que toles estayes acaben cuestarriba .... 

      Sí, enllanamos y pa enriba dimos col cortín que nos faltaba, bien cerca del pueblu. Ta visto que los grandeses tán avezaos a lidiar colos osos; tienen el cortín al par de casa, ¡bravo!.

                               ****************************************

Entrando en Grandas de Salime

      Grandas ye la capital del conceyu de Salime. Entramos na villa per aciu del Barriu del Ferreriru onde'l bon profesional dexó les güelgues del so oficiu n'antoxana la casa-taller.
      Una señorina bien mayor indicónos los finxos del pueblu :
    - Mirái, ellí vese la Ilesia la Colexata, que ta cerca l'Ayuntamientu. Detrás d'aquelles cases ta'l cementeriu... - Esto repitiólo delles veces, con señaldá pero ensin amarguriu; de xuru qu'ellí tien dellos amores...
   - Sois pelegrinos, ¿eh?... Ehí cerquina hebo antigüamente un Hospital de Pelegrinos qu'anguaño nun funciona. 
     Un rapaz más nuevu camentó al rodiu'l Ferreiru que tien al par de casa.
     - Oiga, vimos una casa a la otra oriella'l pantanu pero nun apreciamos carretera alguna pa llegar, a nun ser una barca varada nun ancón ...
    - Ye la manera llegar, per barca. Agora nun viven na casa pero vivieren munchu tiempu. Siempre teníen que desplazase en barca; pa too, trabayu, compres, escuela ... Teníen más d'una , claro. 

Caleyeru de Grandas de Salime

       Cruciamos la carretera xeneral AS-14 y entramos n'Avenida del Ferreiru per aciu del llavaderu. A poco damos con una casona antigua, de mamposteria y cubiertu con chousa prieto, a la que s'accede por un portón de madera vieyo; tien un lleteru enriba'l dintel : <Muséu >, ye la vida de Pepe'l Ferreiru.
      Esti Muséu dexise una entrada pa él solu pero güei nun pueo parame tanto, voi Camín de Santiago y ando un pelín apuráu, sicasí voi dexate un resume que te pue sirvir d'aperitivu; bueno, cualisquier visita al muséu ye un entremés porque cada vez que lu visites tasties daqué diferente, imposible saborguialo too d'una tacada.

Planu del Muséu Etnograficu.
(Semeya del propiu Muséu)

          El Muséu Etnográficu de Grandas de Salime ye una institución pública xestionada por un consorciu, una triba d'instituciones talo les conselleríes de C. Turismu y M. Rural del P.A., el conceyu de Grandas, la Universidá d'Uviéu, la Caxa d'Aforros y la A. Amigos del Muséu G.de S .... Namás faltaba yo, y yá toi equí.
       El Muséu de Pepe ocupa n'actualidá unos 3150 m2 y amuesa más de 11.000 oxetos. Ye grande esti Muséu, lo qu'entamó por ser daqué casero terminó por corvertise nuna fonte d'información al rodiu la vida rural y preindustrial del occidente asturianu pero ensin querer zarrase n'autarquía, les sos muries ábrense al mundu y yá recibe fondos d'otros conceyos astures y hasta europeos. Porque esti muséu ye etnográficu y antropolóxicu y sopelexa tolo rellacionao cola vida'l ser humanu - y hasta humanos podemos considerar los animales que conviven con nós - no que cinca a la hestoria, arte, mediu rural, ciencia y teunoloxía, filosofía...

                     
                                  Enantes d'entrar nel Muséu piensa qu'esto tien vida

           El Muséu, al que s'entra pela corrada qu'arrodia la Retoral, ta dividíu en cinco partes principales: La Rectoral, el Corral, la Casa'l Molineru, la Casona y los Esteriores del Muséu.

La Rectoral

      1) A Retoral, mampostería de pizarra, tiénesla namás entrar, a mandrecha, al par del corredor y del tendeyón.
Entamó llevantase nel añu 1814, recién terminá la Guerra la Independencia y el lustru de José Bonaparte (1808-13); prometíamosles mui felices cola vuelta'l Deseyáu .... (¡Santa Maríamadalena, ruega por nós!).  Nella podemos descubrir  lo que yera una casa rural completa col so estragal que da pasu al restu de dependencies: cuartu-sala d'estar o recibir, llar y/o cocina con alacenes, escañu o fornu del pan; cuartos pal matrimoniu y los neños colos sos armarios pa la ropa, trubiecu, andador, bañera cinc...
Tamién nesta casa podemos contemplar  dellos talleres artesanales que puen alcontrase en cualquier casa rural asturiana:

Nel Chigre-Tienda sabes cuando entres
pero si'l chigreru ta pa ello ....
A ver cuando sales.

   . Taller testil, col so telar.
   . Taller del zapateru, zapatería, cola so mesa trabayu y máquina coser.
   . Taller del carpinteru, con carpintería de toneles, cestes y lo que pinte.
   . La bodega, col llagar de viga y alambique pa destilar el vino.
   . La fragua o forxa del ferreiru, oficiu del fundador.
   . El chigre o cantina, con barra, alacenes, meses, bancos ya etc.
   . Taller del torneru, con munchos preseos de la vida corriente iguaos col tornu.
      Nun falta la silla de montar, el gadañu a cabruñar, el xugu pa uncir o una máquina coser .... Nun falta de nada, tiempu pa tastialo amodo, escurque ....
     Al cabu'l corredor, como yera corriente, un water de pulsu, talo casa mio güela, y l'aguamanil cola cofaina o palancana pa llavase.

Requexu asturianu por demás:
<Horru, panera y balagar>

   2) La corrada. En realidá entramos al Mueséu per aciu del tendeyón, onde un carru del país te invita a entrar nel corral.
     -¡Eh, quieto parao, hai que pasar per taquilla!
A mandrecha tenemos el corredor que comunica cola Retoral y a manzorga la oficina de Receición cola taquilla, onde sacamos la entrada.
    - Tranquila, ne; que somos de bon aquél... 


         Enfrente vemos un horru perguapu, col techu de teitu talo'l que hai n' Urria, un pueblín de Somiedu; son los únicos que conozo d'estes carauterístiques. A manzorga, nun tendeyón, alcuentres toa clas máquines y aperios pa trabayar la madera. Si sigues avanzando pel corral alcuéntreste con un pozu d'agua y, a mandrecha, con una panera seis pegoyos y dos moños, claro.

La Casa'l Molineru:
Delantre La Era, el Cabañon y el Banzáu.

   3) Sales de la corrada pa encaminate a la Casa'l Molineru , pero enantes has pasar pola era onde se separtaba'l granu de la paya los cereales, como la escanda. Tamién tenemos el banzáu pa recoyer l'agua que tien de mover el molín ya otros artiluxos.
      Al llau hai otru tendeyón onde s'amuesa un molín de rabil  pa moler la escanda, asina como delllos rodeznos. Y yá por fin, el molín, con tres inxenios hidráulicos qu'aportaren d'otros tantos llugares d'Asturies. Si tienes suerte hasta pues ver una molienda, coles mueles de piedra xirando.
A min esta zona del molín ya entornu ye la que más me presta; nun sé si ye porque tien vida, colos inxenios moviéndose o porque madre trabayó de chavalina nel Molín d'Entrialgo, qu'entá se caltién en manes familiares y que tu pues visitar y hasta comer unos tortos de maíz; naide nun los prepara como Berto. Ehí llegó madre del mercar na Pola, azorada por demás, aquel día aciagu del 18  Xunetu del 36:
     - ¡¡¡ Estalló la GUERRA!!!

La Ñora mirando al  Banzáu

        La casa'l molineru ye un espaciu polivalente porque dientro recueye esposiciones temporales con xides estremaes: La matanza'l gochu, el procesu del café, o como tresnar una mantega darréu mazar la lleche. Alcuérdeste, güela:

    - Güela, ¿déxesme mazar un poco?

    - De mil amores, mio neñu; tengo'l brazu esmorecíu ... 

    Güela facía dalguna mantega, poques, que llevaba vender al mercáu de los xueves na Pola - Llaviana - con daqué par de madreñes que tresnaba güelu o un xatucu, si yera'l casu. Yeren los sóledos ingresos d'una familia campesinos que vivió feliz, magar los avantares políticos (Rei, Dictadura Primo, República, Guerra, Autarquía ...) nos rimeros de Breza, Peñamayor.

A Casoa

   4) La casona y la so corrada tán dedicaos al seutor de servicios nel mundu rural onde se recueye lo funfamental d'aquelles casones de la pequeña nobleza rural asturiano. Nella algamamos a ver:

4.1. La tienda Ultramarinos, onde se mercaba de too y se facíen amistaes. Alcuérdome de tienda d'esta xera en Cabrillanes (Lleón) onde'l dueñu t'invitaba al vinu mientres dibes pidiendo y comiendo pinchos; nun te quedaba otra que salir cargáu, y nun lo digo pol vino ...

La ESCUELA franquista
- Hala, por nun ser buenos
mirando pa la paré.

4.2. La Barbería, que fuere de don Arturo Villaverde.

4.3. La Xastrería, la mesma de don Antonio Vázquez.

4.4. Les comunicaciones ,  como teléfonu y telégrafu.

4.5. La caza y la pesca tán representaes nel primer pisu.

4.6. Y la clínica dental de don Tomás Fernández Linera.

4.7. Y l'hospitalín del Saltu de Grandas de Salime.

La Tienda

4.8. El desendolcu del allumao, dende una urcia hasta la bombilla llétrica.

4.9. Sala d'Apicultura, con tolos preseos.

4.10. Una Escuela de pueblu, que tantos recuerdos me trexo.

4.11. Sala de peses y medies.

4.12. Sales dedicaes al calzao de madera y aperios pa tresnales: zuecos y madreñes.

4.13. Una cocina, onde'l llar da pasu al carbón y lleña.

4.14. Una trastienda que vien a completar la tienda ultramarinos.

El Retablu La Capiella: Nel centru , un celta del Chao
llevantando'l brazu:¡campeón del Baltu! 

       Na contorna la casona hai delles coses que llamen l'atención:

1.Un tendeyón con ferramientes de llabranza.

2. Una capiella rural.

3. Un cabazu, col envís de guarecer el granu, sobre tou'l maíz.

4. Una fábrica de gaseosa y sifones.

5. Una forna pal pan.

El cortín, de pizarra.

5) Nos esteriores del Muséu alcontramos dos construcciones perinteresantes, una d'elles yá la conocemos, el cortín, pa caltener los casiellos les abeyes y un palombar.

 ¿Crees que falta nesti Muséu?

       Ven con tiempu a visitalu, saca semeyes y depués cacipla en casa pa saca-y tol zusmiu a lo que visti.

         

                                                               *****************    

     Ensin salir de la gayola, unos metros más p'alantre, vemos una placina onde destaquen dos edificios: L'Ayuntamientu y la célebre Colexata de San Salvador.

Grandas de Salime
Xuncía dafechu al Camín Primitivu

         El Conceyu de Grandas de Salime, con capital en Grandas, ta allugáu nel occidente del Principáu d'Asturies. Llenda al sur-oeste con LLugo, al este con Allande y al norte colos Oscos y Pesoz. El Ríu Navia con Embalse de Salime, La Colexata San Salvador, el Chao Samartín, el Muséu Etnográficu y la fala típica o gallego-asturiano son les sos señes d'identidá, pero toes elles tán inxertaes dientro una unidá mayor: el Camín Xacobéu, el Primitivu, el que percorriere'l Rei Alfonso II el Castu buscando una señal, un finxu, un sofitu pa xuncir los cristianos llibres del Norte p'agabitar escontra'l tarrecible Islam que crució l'Estrechu en busca la llambiona Europa. Alfonso conocía los badagüeyos del Beatu y foi buscar el milagru camín d'Iría Flavia, l'Arca Marmórea amiyare en Compostela; yera preciso pasar per Grandas. Anguaño los pelegrinos son ún de los finxos económicos del Conceyu. Que dure.

Puñal d'antenes

       El conceyu ta habitáu cuando menos del Neolíticu pos tiénense alcontrao restos tumulares, hachos, cazoletes y hasta figures antropomorfes nel Chao de Cereixeira, nel picu La Cancela o nel de Monte Bornela.
       De los castros del Bronce qué añeder a lo camentao del Chao de Samartín, asina como nos de Pelou o Valabilleiro. Los romanos aterrizon equí a finales del s. I  e.X  a la cata del oru y lo que pintare y fiérense  dueños y señores de los castros;  los celtes astur-galáicos tuvimos qu'achantar. Nos túneles de Peñafurada a Valabilleiro entá queden les güelgues de la so avaricia.
       Na Edá Media Grandas vivió embaxo la influyencia del Monesteriu de Villanueva los Oscos pero Fernando II (1157-88) donó'l conceyu a la famienta Mitra Ovetense que sopelexó'l so podería nestes tierres abondos años, hasta la Desamortización de Felipe II (1556-98) . Esti santu varón pasó la vida guerriando pol Imperiu polo que precisaba perres n'efeutivo a fargataes, ¿ cómo sacalo?... ¿quién lo tenía?... La Ilesia.

La Capiya del Muséu Etnográficu

      -Estimáu Señor Papa, yo agabité Roma escontra'l turcu pero caltener los exércitos cuesta munches perres, ¿ nun cree la so Santidá que merezo una recompensa?
     - Doite bules, indulxencies plenaries .... Tu nun pases nin pel Purgatoriu, fíu de Dios. 
    - Ensín perres toi nel Avernu, Papa. ¿Qué tal si me das delles villes y les tierres los alfoces? D'esta miente yo viéndoles a los ciudanos que me lo paguen en metálicu, y ansí l'Exércitu cobra y la Ilesia queda a salvu del infiel, ¿acuéi?.
     - Ai, Dios; cómo-ys coloco a los obispos que'l Rei vien d'ayename los sos bienes.

              Hebo que pasar per taquilla. Salime, A Mesa, Villarpedre y Samartí d'Oscos diben nun llote, Grandas y Trabada n'otru; igual amenorgaron la lletanía clerical pero'l poder señorial siguió controláu munchos años polos de siempres. En 1836 Grandes y Salime xuncen nel conceyu de Grandas de Salime, qu'en 1886 pasa a formar parte de Cangas de Tinéu.

¿Pepe'l Ferreiru?
En cualquier casu que-y sirva d'homenax.
Nuna xera propia del conceyu.

      Pero antes, a principios del XIX, vióse afeutáu pola guerra la Independencia que llegó albergar la Junta del Principáu nel so pelegrinar per Asturies (cómo nun va pasar el Camín Xacobéu per equí). Tamién les Guerres Carlistes nos aportaren dalgún dolor de cabeza cuando la columna carlista de Gómez espantó a la numberosa brigada Cristina. En fin, unos del Madrid ya otros del Barça, como siempres. Y yo del Sporting, esperando'l maná.
     Tres la Guerra Civil del 36 - d'esto val más nun falar, que yá s'encarguen los nuevos políticos - construyóse la presa de Salime (1954) que de momento dio munchu puxu pero poco depués, por mor de les tierres y  pueblos anubiertos, hebo un éxodu brutal. Agora ta como tolos pueblos d'Asturies, espderando un milagru que faiga repicar la economía y la natalidá. Igual hasta nos vienen bien los emigrantes, ¿tu que pienses?.

                                          ***************************

L’ESCUDU de GRANDAS DE SALIME

       L'Escudu de Grandas de Salime pue representase en forma rectangular, tipu francés, coles esquines de la base mataes y con picu na punta o d'esta miente qu'amosamos, inventu de Belmunt y Canella: Allongáu , tipu español, cola punta arredondiada al tiempu que cuarteláu en cruz.

     El 1º cuartel amuesa la cruz de los Ánxeles en oru abellugada por dos ánxeles en plata. Fálanos del tiempu que'l conceyu de Grandas tevo embaxo'l poder señorial de la Mitra Ovetense.

     El 2º cuartel representa l'escudu Castrol, conceyu al que tamién perteneció Grandas: 

En campu azur una torre, n'oru, almenada y terrasada de sinople al empar que cimada por un aigla y surmontada por un cuernu. Los lladrales tan orlaos, n'oru, cola palma del martiriu.

    El 3º cuartel tres casellos d'oru dispuestos en triángulu - dos ya una -  faciendo referencia a la importancia de la miel nel conceyu, como vimos polos cortinos. 

    El 4º cuartel una ponte n'oru sobro'l Ríu Navia en plata xunciendo les dos vertientes. 

       Al timbre la corona del Principe d'Asturies: Un círculu d'oru y piedres precioses ornáu con ocho florones d'oru y n'acantu ya ocho puntes, perllaes, más baxes. Cuatro diademes perllaes surmonten el conxuntu que remata n'orbe sinople y cruz de plata na picalina. 

                                                                    *******************

La Colexata de San Salvador 

  La  COLEXATA de San Salvador , anguaño namás ilesia, surdió por mor del Camín Xacobéu, d'ehí'l so nome talo que la catedral d'Uviéu, de la que dependía tres la donación de Fernando II de LLeón qu'ideó esta fórmula p'amortizar un poco'l poder de los cercanos monesterios de Meira (LLugo) y Vilanova d'Ozcos.

      D'estilu románicu, yá fuere mencionada nel XII (1186), como diximos,  pero pasó por munches igües nos siglos XVII, XVIII Y XIX polo que puen apreciase nella varios estilos, quedando del primitivu románicu namás la portada, unes gárgoles y la pila bautismal.

      La ilesia tien forma de cruz llatina cola cabecera cuadrada, dos capielles al cabu los cruceros, otres dos sacristíes  ya una torre de planta cuadrada (XVII), calada en blanco, que la destaca del restu del sólidu edificiu de mamposteria visto.

Nave y retablu mayor
de Juan de Castro.

 Si dalgo da barafuste al edificiu ye'l pórticu decimonónicu, sobro arcos de mediu puntu, qu'arrodia tol edificiu, llevantáu nel XIX col envís d'agospiar los numberosos pelegrinos xacobeos. Nel claustru pues contemplar dos sepulcros románicu-gótiques.

 La ilesia primitiva debía ser pequeña, d'ehí les ampliaciones, una delles la nave nueva que comunica la torre col primer arcu (XIX).

       Nel interior destaca'l retablu mayor (XVII) de Juan de Castro que tamién tien otres talles de María, Xesús y dellos Santos. El retablu del lladral derechu ye de José Faxín y Barruego, que tamién apurrió delles otres. Hasta la escuela andaluza aportó un Neñu Xesús.

       Merez atención la portada románica de mediu puntu coles arquivoltes simples pero con unos capiteles decoraos: la Visitación, l'Anuciación, aves bebiendo, animales comiendo d'un árbol, les socorríes fueyes d'acantu... Un caballeru ya una dama, Adán y Eva, figuren nel interior de les xambes, a dambos llaos de la portada,  anunciando la entrada al paradisu.

                                          **********************************

EL  CASTRU DEL CHAO SAMARTÍN
(Les semeyes del castru'l Chao tán sacaes del llibru d'Ánxel Villa: "El castro de Chao Samartín")

Castru del Chao de Samartín
Enantes d'entamar coles escavaciones. 

       Si hai un monumentu que da altor y sonadía a Grandas esi ye'l Castru del Chao de Samartín; esi finxu que xunce un pasáu rescamplante con un presente esmoleciente (talo'l de cualisquier otru puntu d'Asturies, qu'asina andamos, Mon Dieu).

      Sí, yá sé que tán la Colexata, l'Embalse y el Muséu - ¡que runfen, por Dios! - pero El Chao ye un patrimoniu cultural irrenunciable que tien de tratase col tol rigor siguiendo los parámetros de la moderna arqueoloxía; que'l dineru fácil y la premura política del momentu nun sían talo la nublina que venimos de dexar nos montes de Buspol. Según camienten delles fontes cuerre'l peligru  de perder pa siempres una bayurosa información .... Faites attention!

        Pero dexemos les cuestiones político-sociales y demos una vuelta pela antigua morada celta y romana y vete tu a saber... que yo nun lo conozo y entá queden coses qu'aprender. ¿Xubimos hasta allá?

        P'algamar al Chao tenemos que salir de Grandas pola carretera AS-28 hasta'l pueblu de Castro,

6 km. Chupao.

Con esti llibru y algún más tratamos de ponenos al corriente al rodiu la vida los castreños d'El Chao Samartín

         El Castru de Chao de Samartín ye un recintu fortificáu, asitiáu poliorceticamente, que desendolcó la so actividá vital dende finales de la Edá del Bronce  (IX-VIII  e.X.) hasta finales del sieglu II  d.X. cuando foi esbarrumbáu por mor d'un movimientu sísmicu; pero gracies a munchos aqueólogos y sobre manera a Ánxel Villa, direutor de les últimes y modernes escavaciones , sabemos munches coses qu'ellí pasaren cuantayá. Hai llibros que te lo cuenten y un Muséu que te lo esplica.

Cacía cerámico d'El Chao Samartín
(Semeya propia del 
MAPA)

       Súpose de siempres qu'allarribones, nel Chao, había daqué antiguo. El Diccionariu Xeográficu de Martínez Marina yá fala, nel XIX, d'unes fortificaciones como más tarde lo fai Méndez-Valledor pa la obra <Asturies> de Bellmunt y Canella . A primeros de los setenta  J.Manuel Glez yá lu cataloga como castru tres les indicaciones del vecín José Lombardía Z.  Esto causó sensación y xubir a restolar pel castru convirtióse nuna romería; la voluntariedá ye mui guapo seique nun son profesionales .... Pero gracies a la esmolición y desvelos de Pepe'l Ferreiru - José Mª Navieras E.-  qu'atropaba tolo que podía nel so biltante Muséu Etnográficu, asitiáu na capital del Conceyu, emprentaron coles escavaciones profesionales.

   - Pero qué esperáis, yá alcontramos una cabana y cachos de cerámica....

        En 1990 Principáu y Ayuntamientu pónense manes a la obra - les coses de palaciu van despaciu, eh - y la cosa entamó en serio seique partíen de la base que'l castru debió tar ocupáu dende'l s. I  hasta l'entamu la E.M. ( V ó VI) con un pequeñu abandonu nel s. II. Vamos, que yera cosa de romanos, como los castros vecinos del Navia. Tic- tac, tic -tac ...

<Hachu de talón>
Edá del Bronce.

        De mano too empobinaba per esi camín, la sienda romana: Un axuar d'altor,  les muries perfeches, la llosa perdayuri, hasta'l C14 sambla ser romano ..... Pero un lustru más tarde, al tirar par sur-este, la estratigrafía nun ye igual, aprucen materiales cuarcíticos, más potentes que la pizarra, más antiguos.... Una muralla amuesa'l focicu.... ¿Nun ye romana? .... ¡Ye prerromana!... Un trasgu sal del pinal vecín y camienta-yos a la oreya:

     - ¿Nun seríemos celtes?

    El Chao de Samartín, el bastión castru-romanu por escelencia, entra en cris.... Los sos raigaños tamién son prerromanos pero ... ¿De cuándo?   ......

      - ¡A picar!

      - ¿Entamamos equí arriba, nesta esplanada d'unos 30 x 80 m ?

Acrópolis, témenos celta.
1. Bastión d'entrada, imponente roca cuarcítica.
Cerquina ta la cista cola calota.
2. Pira o foguera crematoria.
3. Empalizada, barganal fecha a conciencia.
4. Cabana o Santa Santorum col druida entamando la ceremonia.
5. Fosu delantre la muralla
- Si esto nun ye celta que venga Lugh y vea.

      De finales del Bronce (800 a.X) son les primeres defenses: una empalizada ya un fosu qu'arrodiaben el recintu sagráu (Acrópolis) al que s'accede per aciu d'una portona, a poniente, de  piedres escomanaes qu'asemeyen un poco a Peña Tu. A oriente un crestón cuarcíticu fai imposible l'accesu.  Nel interior, el Santa Santorum, un edificiu pa usos públicos, una cabana de techu vexetal, d'unos 60 m2, bien grande pa la dómina, de planta rectangular coles esquines mataes que se sofitaba nunos postes fondiaos na roca y bien suxetos por mor d'una pequeña muria de mampostería.

La Diosa Navia
(Equí nun fallaba a misa nin Dios)
Semeya: <cosesdemeiga.com>

   - Equí nun se vivía ....

   - Si ye daqué sagrao, igual vivía un Dios...

   - O una Diosa.

   - Meyor. 

   - Ties razón. Esto ye un "témenos". Un tarrén acutáu dientro una viesca y dedicáu a una divinidá.

   - ¿Yes capaz imaxinar la escena?... La entrada al traviés del roqueru, la cista col cráneu, la empalizada, la foguera ardiendo .... Y el druida, o la sacerdotisa, invocando a Lugh o la diosa Navia?

   - Calla, fatu; equí manda la Santina.

   - Representación cristiana de la Deva y de la Navia. 

Cista

     Qu'esta especie d'Acrópolis yera daqué sagrao amuésalo'l fechu d'alcontrar frente a la puerta de entrada - al meudía - una pequeña cista* col cráneu d'una moza nueva, una cigua escontra'l malinu. Intención apotrófica, dicen los sabios castellanos...

     Amás tampoco queden nel recintu restos del quefer diariu: llares, cuartos, cacía, preseos de caza ... El daqué metalúrxico que s'alcontró- como'l discu - llévanos a lo ritual. Yera sagrao, val, pero... ¿cuala foi la xida del incendiu qu'acabó con ella al igual que'l de la empalizada** qu'arrodiaba'l recintu (VIII - VII  e.X)?... Nunca nun lo sabremos, namás queda maquinar una hestoria que finó al tiempu que la Edá del Bronce ....

*Cista: Pequeñu monumentu funerariu a mou de receptáculu paralelepípedu, formáu por delles llábanes verticales cubiertes por una llosina, que caltenía una cigua, un oxetu que refugare'l malinu. 

**Empalizada: Ye un valláu poliorcéticu, una barganal fecha a conciencia, colos postes clavaos nos resquiebres de la roca y sofitaos con calzos.

                                                              ***

Castreños de la Edá del Fierro
llevantando la  Muralla de Módulos.
- Son curiosos, los h.odíos.

      Na Edá de Fierro aquello crez a dar con un palu y hai qu'aumentar les defenses.

Nel s. IV les defenses - remocicaes de cotino - yeren muries de módulos y unos fosos qu'abellugaben delles cabañes circulares o cuasi rectagulares, más grandes, de techume vexetal. D'esta dómina son la primer sauna y los talleres metalúrxicos rellacionaos cola obtención del oro, plata, fierro, bronce ... Amás de metalúrxicos los habitantes de la zona yeren fundamentalmete agricultores. Añguaño, vamos, al recién, piénsase que nos castros namás vivía una élite y que la mayoría la población desendolcaba la so vida en granxes cerca del castru, y si nun queden restos ye porque taben feches con material perecedero, madera ...

Bueno, si nun son aquellos son estos.

Ye normal pensar esto pos los castros nun podíen caltener tanta xente como precisaben los campos pero .... ¿nun tendríen daqué de piedra, dalgo que mos quede p'afitar la teoría? .... ¿Ónde hai una granxa?... Dalgo tengo oyío pero nun m'alcuerdo.... ¿Pues echame un gabitu?... Téngolo equí.... En Les Vallines (Teberga), en Pesadero (Manganeses de la Polvorosa-Zamora) o en  Crestelos (Portugal).

             

La esplanada del Castru.
Si quies visitalu tienes la puerta delantre tuyo,
frente La Plaza.

         Los castros astures, asitiaos según criterios económicos y visuales - hai que miralos como centros de poder llocal sobro'l estensu territoriu, xerarquizáu, que lu arrobella. Nel castru, amuralláu, tómense les decisiones pa la zona, celébrense los mercaos  y les fiestes importantes... Les cases, aisllaes,  nun son toes iguales, hailes más grandes y meyor asitiaes, hai categoríes. Y cuando s'instalen los romanos, más; la diferencia nos axuares ye brutal.

         Y si nel castru tán los mandamás ¿ónde ta'l restu la población que se precisa Pa trabayar los campos o curiar los rebaños? ...           ¿Ya ónde vive esta xente?... Pos nes fasteres más soleyeres y granibles qu'arrobellen al castru, ¿o qué?.

La Plaza, frenta a la entrada.
- A ver qué nos traes, gallu.
- Gallu non, urogallu.
- Curiao que queden pocos. 

       Pero entovía tamos na Edá del Fierro,  tovía nun terminamos de conocer el castru de Samartín, ¿ónde lo dexáremos?.... Ah, sí, nel foru; digo na Plaza, que los ocelanos entá nun conocíen les costumes romanes pero ...

     La plaza : ¡El FORU!

     Frente los basiones  de la puerta d'entrada al castru, l'únicu sitiu ente les cais onde te pues revolver, hai una especie plazuela pavimentada; la llosa regular, les muries a escuadra y los banco corríos son cosa los romanos pero ellos nun ficieren otro qu'aprovechar la gran cabaña elíptica que los castreños del Fierro tuvieren llevantao nesi mesmu sitiu; una igua a la romana sobro una idega asturiana: tomar alcuerdos pa la comunidá.

  ¿Y qué facíen los castreños del Chao acabante finar los alcuerdos tomaos na Plaza del Foru? ... Había que relaxar asina que diben pegase un bañín a la sauna ... Sí, sí; a la sauna:

Sauna del Chao Samartín, magar el toque romanu y
l'esbarrumbe sísmicu ehí la tienes, Estrabón.

       . La sauna castreña del Chao (IV e.X), talo les de Pendía y Coaña, ta asitiada dientro'l castru - en Llusitania tán fuera - non mui lloñe de la entrada, xunto La Plaza. Tien planta rectangular y un ábside arredondiáu na cabecera y cuntaba con fornu, cámara de gas... ¡perdón! (taba pensando nos romanos), cámara de vapores ya un antepar o vestíbulu. Taba cubierta por una falsa bóveda col techu a dos agües y l'interior cargáu; con magre de caolín, supongo.

    - Que non inventasteis nada, romanos. Cómo vos quedó'l cuerpu... ¿Qué pasa contigo, Estrabón, nun somos tan primitivos?... ¿Nun te cuntaren esto los soldaos o nun t'interesaba esplayalo, bribón?... Claro, como yeres griegu teníes que facer la rosca al invasor.

      Claro, estos, los romanos, nun lo llevaben y ficieren delles igües pa dicir "equí toi yo", colo último.

                                                                     ***

      - ¡ Que vienen los romanos!   

La Domus romana
- Estes cabañuques nun me presten un res,
voi llevantar una domus en condiciones.
- Romanos, tais profanando un Santuariu Celta,
la Diosa Navia toma cuenta d'ello.
Vosotros seréis los responsables
de lo qu'equí asoceda.

  Los romanos vienen a quedar n'Asturies a finales del s.I  e.X. Pensaren que'l oru yera un metal mui guapu p'afitalu como "moneda patrón" y había que sacalo d'onde fuere y l'occidente asturianu yera ricu nesa ayalga; Grandas de Salime nun se llibró d'esta llaceria. Los romanos emplegaron los castros como residencia y a los castreños como mano d'obra barato...

    - Y nesto llegó Fidel,* acabó la diversión... 

*Fidel = Cayo Octavio Turino = Cayo Julio César Octaviano= Emperador César Augusto

            Por si fuere poco nos castros alcontraron saunes (Chao, Pendía y Coaña) y d'esta miente compensaben les sos termes, de les que tantu vacilaben. Vamos, que nun-yos faltaba de ná; hasta empleguen La Plaza como foru...

       Cuando nel añu 69 d.X termina la Guerra Civil y s'asitia la dinastía Flavia l'Imperiu respira y los fosos queden amortizaos, les muralles del Chao pierden el so valir poliorcéticu y les piedres son emplegaes n'otros menesteres más urxentes.. Acondiciónase la sauna y la Plaza, enllosada, corviértese nuna especie de foru a la romana:

Cascu urbanu d'El Chao Samartín
La Plaza, a mandrecha, frente la puerta entrada al Castru
con dos de les parés esaniaes dafechu. 

     . La Plaza - frente la puerta d'entrada al pobláu - de forma rectagular d'unos 100 m2 más un edículu axuntu, ta pavimentada con llosa regular y tien bancos corríos nos lladrales pa sentar. Dos pies drechos sosteníen una cubierta de paré a paré; nel Chao llueve a esgaya, los iviernos son fríos y les discusiones comunitaries llargues ... Lo que fuere la cabana elíptica castreña, de calter públicu, pasa a ser una copia reducía de foru romanu; l'usu, asemeyáu.

       A mediaos del s. II d.X yá convivíen nel Chao Samartín - Civitas Ocela, como-y presta nomar a Ptolomeo- ¿en perfeuta harmonía?, les antigües cabañes circulares de la dómina del fierro con les rectangulares romanes, ye más, munches cabanes astures foron ocupaes por families pudientes romanes que de varies facíen una más grande y más alta, aprovechando en parte les paredes circulares como muros de carga y les cais públiques como pasiellos. Hala, como Fraga:

    - La cai ye mía.

<L'alianaza albión> ente
la Bella Ocela y la Puela de Burou.

       Monedes, adornos personales, metalurxa, cerámica d'importación y llaves pa les puertes sopelexen esta evidencia. La Bella Ocela continúa y ameyora la metalurxa castreña y presume les sos xoyes peles cais abarrotaes asina como la cerámica ornao con oru y plata nes fiestes de la urbe que recibe, emocionada, dende los altos balcones  de les nueves cases a la xente los pueblos vecinos - toos somos albiones - , talo los de Puebla de Burón (Burou) como dexa constancia una especie de pota con una dedicatoria nel cuellu; yo llámo-y <L'Alianza albión>. 

       - Da gustu venir a Ocela coles cais empiedraes y el so bon arrecendor por mor del alcantarillao... 

       - Y nun te digo ná dientro les cases coles paredes cargaes y pintaes de colorinos... 

      - Y sobre tou n'iviernu colos cuartos encaldiaos... Y alacenes pala cacía... 

      - Son ricos los nuesos vecinos por mor de les granibles tierres que l'arrodien...

      - Y los rebaños d'oveyes y telares.... 

      - Hasta tienen moneda foriato, de la ceca'l Valle'l Ebro.

      - Mira, yo tengo una moneda de <Cayo y Lucio>, los ñetos d'Augusto.

      - Cámbiotela por esi vasín del lleón que vieno del Melgar de Tera (Zamora). 

      - ¡Acuéi!. 

       Na civitas Ocela, el centru alministrativu de la zona, los roimanos llevantaron una domus bien lluxosa que va sirvir como residencia de los grupos aristocráticos llocales. Too terminó nel siglu II d.X por mor d'un tarrecible movimientu sísmicu. Debió de ser mui gorda porque hasta Xúpiter (Xove) s'encueye énte'l cataclismu, nun hai más que ver cómo quedaren les muries de La Plaza:

     - Colemos darréu, Xove vien d'abandonanos. 

       Hai zones del castru, como C-2, d'un vacíu impresionante; ¿nun había cabanos?.... Sí, ho; pero na Alta Edá Media, na dómina la Monarquía Asturiana (VIII - IX d.X), foron espoliaos pa remplegar la piedra n'otres construiciones estramuros del castru. Dexáronles talo trincheres pa la guerra, pero quedaren les güelgues, menos mal.

    - ¡Qué vienen los moros, a la trinchera!

    - Que nun ye pa tanto, carayu; amás, tamos fuera ruta, ho ...
    - Non tanto, manín; el Camín de la Mesa ta bien cerca.

       Les ruines del pobláu romanu sirvieron como necrópolis hasta finales de la Edá Media. Un sitiu d'altor pa enterrar a los seres queríos.

                                 

                              **********************************

Discu Metálicu 
alcontráu n'Acrópolis celta.

        Collacios, tengo qu'escaeceme del Chao porque voi camín de Santiago y a esti pasu nun llego nin pa Navidá. Güei voi dexavos equí, nel Chao Samartín, pero prometo venir a rescatavos el día - cercanu - que torne a sacar semeyes propies, estes qu'amueso son propiedá d'Ánxel Villa. Regalóme  un llibru (dos) del CHao y prometíme qu'un día diría a visitalu; neses toi, en cuantes me lo permitan les circunstancies familiares. Un abrazu y fasta ceo.

       Bueno, mientres vuelvo a ver si m'iguáis esti discu metalicu que s'alcontró n'Acrópolis. Déxovos unos datos de cuando taba nuevu:

        Ente los elementos alcontraos pertenecientes a la dómina del Bronce tenemos el gran discu metálicu (VIII-VII  e.X) construyíu sobro una base madera  guarnida por planches y tires circulares de bronce suxetes con remaches y clavos de seición poligonal. La distribución compositiva ta fecha a partir de cinco círculos concéntricos que lleven nel centru una plaquina circular oriellada por un aniellu de clavinos piramidales; una pasada, vamos.

     Acordies colos cachos alcontraos el discu pudiere tener un diámetru que nun baxa de ¡1,15 metros! y daría un pesu aproximáu a los 15 kg. La téunica yera asemeyada a la d'un calderu - del que s'alcontraren dellos llixos -  con asa de sítula que s'emplegaba pal consume ritual y comunitariu de carne.

     Yá toi viendo'l ritual nes fiestes del Samaín (1-11), la Lughnasad (6-8),  l'Imbolc (1-2), los solsticios d'iviernu cola Yule (21-12), de branu cola Litha (21-6), los equinoccios de primavera en la Ostara (21-3) y na seronda col Mabon (21-9).

    Sicasí, nesti castru del Chao, yá toi viendo cada 1º de Mayu, no alto de l'Acrópolis,  a los castreños  sopelexando alredor de la foguera l'hachu de talón y argolles, celebrando La Beltane (1º de Payares nel H. Sur),  n'honor de la diosa Navia,  cuando tien llugar la suelta del ganáu a  pastiar llibre pelos montes; ¡llegó'l branu!.

Cabaña cilúrniga de La Campa Torres
iguada polos escolinos del Colexu Públicu de Xove. 

 AGASAYOS:

. A Isabel SS. por <La Peregrina>, veneru d'esti Camín.

. A Xurde Morán pol so <Camín Primitivu> y tantos caminos.

. A Ánxel Villa, que me regaló los llibros del Chao de Samartín, ensin ellos piérdome pel castru.

. A Alfonso Fanjul Peraza, pol so llibru "Los Astures" y les esplicaciones del castru de San Chuís.

.  A la páxina Web del Muséu de Grandas per aciu <Britonia.Revista d'estudios da terra Eo-Navia> .

. A <embalsedesalimepueblosyaldeasbajoelag.blogspot.com>, polos sos comentarios al rodiu'l pantanu de Salime.

. Al blog <cosasdemeiga>, pola semeya y comentarios de la diosa Navia.
. A la wikipedia, como siempres asina como Asturnatura.
. A <recreaciónhistoria.com> al rodiu la hestoria de Vegadeo y la so contorna.
. A Bertu Ordiales y G.C. Ruíz por <Guía de los árboles d'Asturies> y <21 Rutes de Senderismu>.