<¡ Bon Camín![5] : La Puela - El Palu - A Mesa >
<¡Bon Camín! [5b] : El Palu - La Mesa >
Per tierres d'oru
 |
| Per tierres d'oru. |
1º: <La Puela - El Mazu -Peñaseita - Ponte Xestu Molín - A Reigada - El Palu>
2º: <El Palu - Montefurado - Texu de LLago - El Chao - Berducedo - Ll. Prima Madera - A Mesa>
 |
| <Entamó en Montefuráu esti Camín encantáu, si llegamos a La Mesa que venga Dios, y lo vea> |
Cuido que los dioses celtes nun teníen nada qu'envidiar a Xúpiter, Apolo o Minerva
(bueno, igual a esta nueva Atenea sí, no que cinca a lo del saber) pero nós siguimos encamentándonos a Lug, Belenos, Aramu, Segonu, Candamu y sobre too a la Deva, vecina nuesa, convertida p'algunos na Virxe la Peñafrancia, hermana partenogenética de la Santina.
Camiéntase que'l nome de Palu vien del llatín palus=charca, embalse, pantanu que fai referencia a los embalses qu'iguaben los romanos na parte alta los montes pa lluéu desfacelos per aciu del Ruina montium, calentando la roca con fogueres y enfriándolo col agua los embalses. Nel Palu queden les güelgues d'ello.
Camienta doña Isabel, fala Alana:
[[ De baxada esperábanos la entrada d'una mina d'oru, anunciada pol esqueletu d'una llomba cercana, reventada dende dientro cola xida d'arrinca-y el so valiosu frutu tapecíu nel so senu. Rara imaxen.
El llugar amosaba tanta gloria como espantu. Una visión terrible pa cualquiera que sintiere falar al rodiu'l rellatu que los cativos astures viérense obligaos a escarbar na tierra a la cata d'esa ayalga maldita.
Paez mentira qu'un paraxe tan candial puea caltener tan llerciosos secretros nel so vientre, eses grutes abiertes a vergayu y piqueta.]]
 |
| Montefurado: Capiella de Santiago, darréu l'Hospital de Pelegrinos. |
 |
| Entamando la ruta: Camín de Montefurado |
- Pos hai dellos tramos al principiu un poco abegosos, según me camentaren algunos pelegrinos. Hai peligru resbariar o restorcer un tobillu por mor de la piedra suelto.
- Entós vamos faer una cosa: Envede salir güei del Palu vamos faelo dende Montefurado; l'Apóstol sabrá perdonanos un saltucu d'un par de kilómetros escasos; entá nos queden otros trece hasta algamar a La Mesa y nun convién tentar al diablu. En cualquier casu yá tenemos prevista una salida cola Asociación ASTA esti veranu pa venir comprender cómo se desendolcaba'l trabayu nes mines d'oru romanes. Pa entós esperamos conocer la Cueva de Xuan Rata, la Fana la Freita y el Carcovón d'Orúa.
- OK, yá nos lo onterás nel to blog. Pel momentu dígovos onde entamar güei. Cuando lleguéis a Casa Miguelín, na Mesa, llamáime pol fixu si falla la cobertura del móvil, que ye bien posible. Son xente encantadoro.
Mientres baxábemos en coche d'El Palu a Montefurado venía faciendo alcordanza del caberu aquellarre de bruxes, documentáu, que tevo llugar n'Asturies y que foi precisamente nún d'estos pantanos, nos rimeros d'esti monte. Cuéntanoslo precisamente Isabel S.S. nel so llibru <Astur> y tamién fai referencia d'ello na <Peregrina>.
 |
| Capiella de Santiago (Montefurado) |
A les once menos cuartu (10:45) tábemos contemplando la Capiella de Santiago al tiempu qu'unos franceses.
- Bonjour, mesdames et messieurs. ¡Bon Camín!
- Bonjour et <¡Bon chemin!> .
Yeren cinco, tres homes y dos muyeres d'una edá asemeyada a la nuesa, vamos, unos xubilaos que facíen el Camín por estayes pero llevaben un toutarrén d'apoyu que diben conduciendo de forma alternativo, nun saben ná los gabachos. Hai milenta mil maneres pa llegar a Santiago, el casu ye echar cuayu y escaecer los pilancos.
 |
| Montefurado Pasando l'Hospital de Pelegrinos. |
Pasamos el pueblu pantasmal habitáu namái por un mastín que vive al abellugu de Xacobu, una talla percélebre del Apóstol que se caltién na capiella. Bien cerquina, ente les cases de piedra con teyaos escuros de pizarra, faise notar una casona pergrande que fuere HOSPITAL DE PELEGRINOS. Sí, equí hebo un hospital p'agospiar lo esmadexaos pelegrinos que veníen de xubir El Palu o h.acer la Ruta los Hospitales, precisamente. Esto, Montefurado, la casa Pepín, yera un oasis pa ellos.
 |
| El Santu Apóstol de Montefurado. (Semeya: Asturgeografic) |
Enantes de colar convién echar una plegaria al Santu Apóstol no que fuere la capiella l'Hospital, non sin antes despidir al mastín, que sigui curiando l'hospital y la capiella como cuando taba'l mesmu Pepe.
 |
| Hai que reblagar ... p'algamar a Sesto da Fonte. |
A poco vémonos obligaos a reblagar penriba una muria que crucia tresversal el camín; val más nun tocar la feble portiella.
Siguiendo una pequeña muria de piedra vamos xubiendo un senderu como rayáu nos cumales d'un olimpu, onde paeces flotar mecíu ente uces, toxos y piornos. Nes borices pastien mansiamente delles vaques ayenes al traxín de los romeros, a los que tán avezaes dende siempres. Tamién son ayenes a les regalles de los montes por mor del Ruina montium.Tamién elles se tienen llibrao de trebeyos inhumanos.
 |
| < Adiós, pelegrinos yo quédome equí que tengo a Xacobu al par del Camín . Adiós, pelegrinos, yo quédome equí, pidíi-y a Xacobu que mire por mi. Adiós, pelegrinos, yo quédome equí qu'en Montefurado ye oru'l Camín.> |
<Adiós, pelegrín,
yo quédome equí
que tengo a Xacobu
al par del Camín.
Si ves a Santiago
bien puedes pidi-y
polos alleranos,
y un poco por mí.
Ten munchu cuayu,
y llega hasta ellí,
sabrá'l gran Apóstol
mirar bien por ti.
Adiós pelegrín,
yo quédome equí,
qu'en Montefurado
ye oru'l Camín.>
 |
| Los colores de la tierra. Vexetación de montaña: uces ya escobes. Nestos paraxes tevo llugar el caberu aquelarre de bruxes -conocíu - d'Asturies en .... ¿A daquién-y pue estrañar viendo esti escobal? < Si ser yo fueru un Bruxu y precisare una escoba vendría a Montefuráu ensin dubia , ensin torga, que nun hai urcies nin bericios como talos d'esta llomba ; son de plata y son d'oru son del pelegrín la hestoria> |
¡Al carah.o los romanos!.
 |
| <Por munches torgues que pongan a Santiago llegaremos, dexamos Montefurado porque oru nun queremos; namás charrar con Xacobu de lo bien que lo pasemos. > |
 |
| ¿ La solombra de mio Padre? |
per un senderu marcáu;
a vegaes, con munches piedres
pero siempre bien floriáu.
Uces , gorbizos, bericies
dan al Camín tal encantu
que te petez agospiate
metanes el Monte-Furáu>
Cuenta Sabel SS. na so novela <La Peregrina>:
[[ Seique calzo buenes botes tresnaes con cuero fino y sueles gordes, la piedra suelto cáltriame nes plantes de los pies con acibre crueldá fasta convertise nun martiriu. Les rodielles amburen. Les piernes, molíes por mor de les xornaes precedentes, taben a puntu de dexar de sosteneme. Cuántu nun pasaríen los esclavos .... Nin maxinalo pueo. ]]
 |
| "Faciendo la goma" colos franceses. <¿Vendrán seique pol oru? ¿O vendrán pol Camín? El casu ye que vengan y pastien equí; la Tierrina presisa d'aire fresco, y revivir. .> |
Baxando a modo y colos franceses <faciendo la goma> colamos per una portiella abierta. Pasaes yá les once y media (11:35) empatamos cola carretera xeneral (AS-15) onde los gabachos teníen la furgoneta. Camentávamos qu'igual yera preciso pisar asfaltu, pero non, la ruta sigui sele, a manzorga, per un caminín de tierra, escaeciendo la vecina carretera. Otra ayalga pa la vista: la Bruxa taría encantada de llevar una escoba d'esta policromía ( Y yo tamién).
Esti tramu hasta llegar al pueblu de LLagu (Lago) bien pues calificalu como un <Camín encantáu>:
A manzorga una tarmuda arboleda onde pues alcontrar pinos, abedurios, fresnos, carbayos, salgueros, borrachinos (madroños) ...
A mandrecha predomina'l gorbizal pero vese una moderna plantación de pinos na fastera'l monte, nun ye plan quede'l territoriu ermu; otramiente convién frenar un poco la velocidá los vientos.
-¡Carayu, unos "calzones de cuquiellu"!
Una aguileña azul, a la que nós llamamos "calzones de cuquiellu" , con candes flores péndules, ruempe la monotonía de mariellos, blancos y fusies del escobal máxicu. Lo que nos faltaba, y ye que yo muerro patiando estes llombes. ¿Queréis dicime que los romanos vinieren equí pol oru?... Por favor, mirái lo que vos arrodia, alzái la vista énte esta policromía de colores... Claro, vinieren pol oru, pero por qué nun colaren tres esquilmar los montes dafechu... Por qué quedaren pa siempres equí, nesta tierra de ... Y entamé da-y vueltes a la tiesta y entróme'l pruyimientu....
¿Charramos un poco con Estrabón?. Él cuenta y yo arrepostio:
. ."Montañeses austeros"
- Si tan apretaos andábemos, por que nun colasteis dafechu tres esquilmar estos güertos?
.. "Beben agua... Comen chivos..."
- Agua, mai de veneros
y sidre a esgarrapelleyu,
eso sí, con cabritinos
o daqué otru corderu
al sidre o a la estaca
tán de viciu, ¡tán de buenos!...
Eso nun te lo cuntaren
los soldainos aneyos
nun fuere que vos prestare
y ¡hala!, manda pelleyos.
.. "Conocen la birra y el vino y, raro, si lo pillen dan cuenta d'ello en menos que canta un grillu en fiestes colos parientes ... "Dos tercios del añu comen abellota molío..."
- Que non, jodío.
Boroña a diariu
y los domingos
escanda, con birra o daqué vino
pa escaecer los trebeyos
a que tamos sometíos.
¿Probasti, si acasu, la boroña de miyu;
los prunos con ablanes, tostaes,
los oricios?
Que nun te cuenten cuentos,
tamién comemos carne, de culona asturiana,
venaos, corcios, gochu celta, xabalinos....
Y sí, comemos xuntos,
¿tu sabes lo que presta tar de folixa,
d'espicha colos amigos?.
Que nun te cuenten cuentos otomanos
los romanos,
equí fame, la del <cuarenta y uno>
.. "Empleguen la mantega pol aceite "..
- ¿Y qué? ... ¿Tu probasti les tostaes cola mazada?.. Y con sebu, si fai falta. Yá sé que los güevos fritos con aceite tán perbonos pero cada acosa al so tiempu.
.. "Envede moneda faen trueque cola xente d'interior o corten una llascarina plata..."
- Venga, ho; será por perres... Pero desque llegásteis los romanos aumentaron los lladrones talo les setes, nun se pue andar con maneda na faltriquera. Amás, esto de les perres, les monedes, l'oru .... ¿Veis pa nos sirven?... Pa tar esclavizaos; ¡que vos dean!.
.. "Naveguen en barques de cueru"
- Pos sí, más llixeres y dondes de manexar. Amás, ¿qué facemos colos pelleyos del ganao?... Ye que sóbrenos, manín ... ¿Pero nun dices que namás comemos abellotes?... Pos esto ye pa vacilar. Pues escoyer barca de pelleyu de vaca, oveya, cabritu, corciu, venáu, xabaril y fasta de llobu; casi de cualisquier animal. Nin el "Corte Inglés" t'ofrez tantu... Y amás, nun mos prúi tarazar árboles según asina, pola de buenes; respetamos la naturaleza y vivimos en consonancia con ella. Ven por otra.
[ El casu ye, Estrabón, y esto cuéntolo "sotto voce", que nun toi enfocicáu contigo; yo compréndote, nunca nun tuvisti equí y cuntasti lo que te cuntaron, y claro, tol mundu arima l'áscuara a la so sardina .... D'otramiente, si queríes siguir trabayando, teníes que quedar bien col cabezaleru de turnu y , a fin de cuentes, tu yá sabes que nosotros sabemos lleer entre llinies... Delles vegaes, a los que nos presta cuntar, quédennos más coses nel tinteru que les que podemos sopelexar. Tas perdonáu. Cómo nun te voi perdonar si gracies a ti pudi conocer munches coses la vida los mios ancestros ... Eses mentiruques que poníes son fáciles de descubrir por mor de l'arqueoloxía (chisco güeyu), y tu yá lo sabíes...]
*************************************
 |
| <Calzones de cuquiellu> Aguileña, flor heráldica y afrodisíaca. Conozse tamién como la "flor de los celos" |
El nome vien-y de lo asemeyada que ye con un aigla (aquila=águila) coles ales estiraes. Pero yá ves, pa los asturianos sambla más a unos Calzones de cuquiellu*.
Apreciada l' AGULIÑA dende antiguo pola so grana afrodisíaco les cortesanes úsabenla como perfume pa cazar a los pazguatos pero les vestales malpenes podíen mirala porque-yos ponía'l rixu altu (yo metí un puñáu na mochila). Guapa ye p'alantre.
Ye una flor heráldica que milita nel escudu de la Casa de Guisa (Francia). Los contrabandistes navarros emplegábenla como cigua pa cruciar la frontera.
 |
| Cuquiella, Cuculus canorus, fema. |
* Cuquiellu: Cuculus canorus, cuco o cucu ye un paxarín insectívoru y migrador, mui pillu, que por nun trabayar pon los güevos - de colores estremaos - nos niales d'otros páxaros - onde meyor mimeticen - y ansina pue andar de ruta tul día, ye qu'Asturies ye tan llambiona...
- Coño, colo guapo que ye esto nun voi pasar tul día guariando... Mientres haya fatos pa eso...
Camuda'l plumax dos veces al añu, branu ya iviernu. ]]
**********************************
 |
| Per tarrén llento y solombriego. |
A meudía pasamos un depósitu d'agua nuna zona de champanes, cosa rara hasta'l momentu, y ensiguida tornamos a xubir. Son les doce y cuartu (12:15) cuando aportamos énte'l cementeriu. Por facer unes semeyes perdí'l bolígrafu d'anotaciones, xusto nel momentu qu'entrábemos nuna pista formigón; tamos llegando a un pueblu. Yá vemos una ilesia al par d'un texu perxigante qu'estremamos na tarmuda viesca por mor del so color más escuru:
- Mira, debe ser el célebre Texu de LLagu. Tien más de quinientos años.
- Ye la Ilesia de Santa María de Llagu (Lago).
- Hasta na TPA lo tengo visto.
 |
| Aportando a Llagu (Lago). La ilesia en primer términu col Texu a manzorga. |
 |
| Ilesia de Santa Mª de LLagu, al par del célebre texu. |
[[ El texu ye un árbol sagráu por mor de la cultura celta que trespasó'l so valir sagráu al cristianismu que s'apoderó del sentir de les xentes primitives. Son munches les capielles rurales que tán abellugaes polos raigaños del Taxus baccata.
El texu - árbore de porte maxestuosu - ye una conífera de la familia de les taxaceaes propiu de zones montañoses, llentes y caliares. La so groma piramidal pue algamar 20 metros d'altor. Tien el tueru gordu y la corteya de fines tires de color pardo-buxo. Lo normal ye que'l troncu nun tenga más de 1,5 m de diámetru, por eso, el de Llago ye perespecial, Monumentu Natural, al tener 2,5 m. La rama ye abondante y duro polo qu' antaño emplegábase pa facer arcos y toa triba de preseos.
La fueya ye perenne y aciculao pa torgar la perda d'agua y poder caltenese en condiciones d'escasa humedá pero prefier el tarrén llento y solombriego; especie higrófila ya umbrófila, dícen-y.
Ye un falsu frutu por ser ximnosperma que frutia en forma d'arín (arilu) o moquiellu (mocu, mexu, chupu, arandíu) carnosu y coloráu que lleva dientro la grana - una pebida - velenoso, al empar que'l restu del árbol. Los páxaros gusten del arín pero escaecen la grana. ¡Qué llistos!. Ye un árbol veceru - nun frutia tolos años - que madura na seronda y cada 6 ó 7 años tien producción perabundante de frutu. El fechu de que'l moquiellu nun sía velenosu facilita que les aves espardan la grana pela redolada.
La madera, de granu fino y trupo, ye perdura polo que ta bien visto parla ebanistería si nun fuere que'l árbol ta en peligru desaniciu y cortar ún ye pecáu. Anguaño ye una especie relíctica - escosa - por mor de la frada indiscriminada que se fizo d'elli va munchu tiempu (hebo un tiempu en que los chinos lo tomaren como "deporte nacional", imaxinái cuantos quedaren).
- <Val más matar un paisanu que cortar la caña un texu>,
dicíen per Bulnes nun va munchu tiempu. Ye de suponer qu'esto vien de la dómina los celtes, que los veneraben como sagraos.
¿Por qué los veneraben los celtes?
. ¿Pola so llonxevidá?... Puen durar hasta 5000 años.
. ¿Pol velenu?... Que lo mesmo mata al enemigu pola punta de la flecha o te sirve d'eutanasia cuando la enfermedá o la edá ... (¡Eh, quieto parao, nun sigas... Yá t'oyí navaya).
. ¿Pola so madera duro, trupo y aneyo que s'emplegaba en bayura de preseos, como arcos?
. ¿Pola so salvia colorao, asemeyando'l sangre, que cuerre tueru abaxo cuando frades una caña?
. ¿Por too ello, que-y dan al texu un aire míticu, misteriosu u sagráu?
 |
| Arilu, moquiellu, chupu, mocu, frutu del texu |
La so duración fizo que los celtes lu veneraren como a un árbol sagráu tando presente nos sos llugares de cultu. El cristianismu siguió calteniendo esos mesmos llugares al par de los texos sagraos, qué espabilaos.
Acabo de lleer que nel claustru la Catedral d'Uviéu había un texu que los cures esaniciaren nel añu 1889 (claro, yá nun-yos facía falta p'atropar coolligans na <Civitas episcopal> ) . Y agora pregúntome yo...
¿Taría esti texu - centenarios son - ehí llantáu cuando Máximo y Fromistano entamaren col Monesteriu San Vicente? ( en tarrén del Rei Fruela, nun se t'escaeza). ¿Yera entá Uviéu, la nuesa capital, un antiguu centru de cultu relixosu celta de la tribu los llugones?... ¿Continuaren los fundadores d'Uviéu la tradición cristiana de siguir calteniendo los centros de poder políticu-relixiosu celta tresformándolos en centros de cultu relixiosu cristianu?... uido yo que lo de Fruela nunta tan mal tirao. Esta cabeza munches vueltes me da... ]]
Al par del texu alcuéntrase la Ilesia de Santa Mª de Llagu que tien una sóleda nave, la cabecera cuadrada ya una capiella nun lladral, seique lo más llamatible son l'adriu, la espadaña doble güeyu del XVIII, con una de les campanes del XVI, y el teyáu de pizarra prieto. Cuántes veces la Virxe se tien abellugao embaxo un texu.
*************************************
 |
| ¿ LLARES VIALES ? Una plegaria nunca ta demás. |
 |
| La cirigoña, en LLago. |
La cirigoña, como dicía madre, celidonia, ciledonia o cirigüeña ( Chelidonimum majos) ye un yerbatu, perenne, de la familia de les papueles, la única del xéneru Cheledonium. Presenta un rizoma carnosu del que salen dellos tallos d'hasta 80 cm.
La fueya, mui dividío - hasta 30 cm - ye alterno presentando de 3 a 5 lóbulos.
La flor, mariello, amúesase n'inflorescencies umbelíferes ente mayu ya ochobre.
El cáliz tien sépalos verdosos y caedizos.
La corola presenta 4 pétalos mariellos, como d'a cm, siendo los estames bayurosos.
El pistilu ye bicarpelar frutiando nuna caxina allargada que caltién unes semilles prietes, perpiquiñines, con arín ya eleosoma, una sustancia pernutritiva pola que nagüen les formigues; d'esta miente propaguen la planta.
Lo más llamatible d'esta planta seique ye'l xugu mariello-verdosu que emplegamos pa caltrizar les firíes, esternes ya internes. Doi fe d'ello. Madre curóme la úlcera duodenal con esti acibre "velenu". Machacaba tola planta - fueyes y tallu - nun morteru y darréu pasábalo pola máquina esprimidora de la carne. El llíquidu estrayíu pasaba a un frascu que se metía nuna bolsa plásticu pola mor del fedor. ¡Agora tómalo!. Una cucharina peles mañanes durante nueve díes; tres descansar otros nueve volvíes a repetir... Curó porque nun mató, pero lo que de verdá me dio la vida foi'l dadu d'azúcare que metía na boca darréu'l cafiante llíquidu. Gracies, madre. Gracies a eso, y a ti, pueo tastiar anguaño los choscos de Tinéu, les morcielles matachana, les miloxes del Fontán, los bartolos de Gersán y la fabada asturiana. ¡Puxa la cirigüeña! . ¡Vivan les madres!.
..................................................
 |
| Llago ye casi un pueblu pantasmal, magar d'ello La vida bilta entá. |
Tien una estensión de cerca 24 km2 onde nun viven más de cinco persones, unes 30 repartíes por tola parroquia qu'inclúi los llugares de: Armenande, Carcedo, Castanedo, Llago, Montefurado, San Pedro y los dos Villares (Justo y Castanedo). La impresión que te da Llago ye de tar mediu abandonáu. Ye conocío por mor d'un texu centenariu al par de la ileisa Santa María asina como por ser un finxu del Camín Primitivu, con bar en Casa Serafín. ]].
Salimos de Llago hacia la una menos cuartu (12:45) siguiendo les indicaciones del informante:
- Al llegar al final de la recta, pasando aquel coche, metéisvos a mandrecha per un camín escaeciendo la carretera . Tenéis un moyón indicativu. En menos de 4 km tais en Berducedo.
- Chupao. Llegamos pa la hora de xintar.
 |
| Travesando'l pinal camín de Berducedo. A mandrecha arandaneres naturales. <Caminante, les tos güelgues son el camín y namás; Caminante, nun hai camín, faise'l camín al andar . Al andar faise'l camín, y al tornar la vista atrás vese la sienda que nunca pienses volver a pisar> |
Nes entenes del pinal vemos delles arandaneres naturales; bien se podría aprovechar pa plantales, dau l'abandonu la nuesa tierra. Fai falta crear puestos de trabayu esplotando con xacíu'l tarrén.
Al cabu damos otra vuelta cola carretera que debemos cruciar pa entrar polos paraxes del Chao y la Llanera, nunca meyor dicho. La verdá que s'agradez esti tarrén planu y solombriegu de pisu tierra. D'esto, lo que queráis.
- ¡Bon Camín! - sentimos al conductor d'una furgoneta que va pola carretera camín de Berducedo.
 |
| < ¿L'arandanera d'Alana? > |
Al columbrar les arandaneres del pinal fici alcordanza d'un comentariu d'Alana tres perder la intendencia culinaria camín d'El Palu:
[[ Nun había otro que prunos pa echa-y el diente; nin tan siquier abellotes de carbayu. La mayor parte'l camín trescurrió pente pastos ralos, viesques de felechu, uz inútil, seique divina na so policromía de colores, y daqué arboláu de pinos...]]
 |
| Entrando en Berducedo La Escuela: Albergue. |
A ringlón siguío tenemos el parque con árboles, columpios, toboganes y demás aperios lúdicos pa la infancia. Son les dos de la tarde (14:00), la hora la xinta:
- ¿Qué facemos, siguimos camín alantre, damos una vuelta pel pueblu o xintamos nun chigre?
- ¿Qué tal si damos un vueltu y mentanto que lo pensamos?...
- Acuéi.
A les dos y picu la tarde, y tres d'una bona caminada, hai pocu que pensar; enantes d'un cuartu d'hora tábemos sentaos delantre'l platu y yá vermú tomáu: Paella, pa la Señora, y carne guisao pa él. De segundu patates frites, con algo, qu'en casa engorden. Vino, casera y de postre xubir la cuesta Buspol.
 |
| Per Berducedo |
Per Berducedo (900 m/a) pasa la carretera AS-14 que va d'Allande a Salime y la AS-34 que sal de Berducedo camín de Villapedre percorriendo'l Valle del ríu d'Oru. Tou ye oru, nestes tierres. Pero si dalgo presume anguaño Berducedo ye por ser un finxu percélebre del Camín Primitivu. Nun ye cosa dala. Tien dellos albergues, públicu y privaos, que van n'aumentu, asina como bares-restaurantes que son lo más productivo del PIB llocal. La ganadería tradicional, oficiu cabezaleru antaño, paez que nun espoxiga muncho. Cuenta con Dispensariu mélicu y Farmacia y tien delles tiendes, dalguna en plan boutique. Si nun te pones guapa ye porque nun quies.
P'agospiate tienes, amás del Albergue municipal (Escuela) : Casa'l Marqués, Hostal Camino Primitivo y l'Albergue Rural Camín Antiguu.
 |
| Santa María de Berducedo (XIV) |
Esti hospital-albergue foi fundáu nel sieglu XIII pol señoríu de Neira de Xusá y refechu en 1875 por Josef Álbarez Lozano, como reza una inscripción que se caltién nel dispensariu mélicu.
Santa María de Berducedo ye una ilesia del sieglu XIV, seique'l cabildru, la espadaña barroca y el teyáu de llousa prieto, sobro bóveda de cañón, son más tardíos. Nun hai quien trabaye la piedra como los galegos (esta xente que d'El Palu pa occidente yá empleguen la fala) y hasta'l cabildru ta sofitáu con ello, ye una pasada. Destaca nel interior, de nave única con bóveda de cañón un arcu góticu que nos sos entamos góticos tuviere pintáu; les reformes de 1910 nun les tuvieren como algo principal y pasaren a la reserva. Bye, bye. N'Asturies teníen que salir los guajes pola chimenea, porque pa h.oder somos los amos. (Y espera que lleguemos al Chao de Samartín).
Nun falta'l texu totémicu al par de la ilesia onde se celebraben les reuniones del Conceyu . Bueno, si llovía, embaxo'l cabildru, digo yo, y camiento.... ¿Nun habría dalgo más aneyo ehí cuando llevantaron la ilesia gótica?... El texu llévame a les costumes celtes, ¿o non?. ¡ A picar!.
Berducedo tamién celebra a Santa Sabel a primeros de Xunetu. Agora.
**********************************
 |
| Berducedo, un oasis ente sierres d'oru. Xubiendo la cuesta de Buspol. |
 |
| Llábana a llábana |
- Quedamos solos, Santa.
- Reza pa que lleguemos, sobremanera tu ....
- (Val más tomar distancia....)
Llegar al cruce cola cola carretera foi un aliviu pergrande; enfrente víase una pista de zahorra que conducía a un biescu de Pinus sylvestris na llomba de Prima Madera. ¡LLano!. Andando en llano per una sienda de pinos ya abedurios hasta que calamos a la carretera xeneral (AS-14) que nos tien de llevar a La Mesa. Aquel baxar sele pela carretera foi como dir pa una romería (camiento nos cuadros de Piñole), una gayola pal cuerpu y pal alma sacando semeyes a un pueblín que columbráremos en llontanza:
 |
| A Mesa Santa María Madalena y l'Albergue Miguelín tán esperándonos. |
- Nun sé, abúltame que ta mui lloñe. A Mesa tien de tar más cerca, a manzorga.
- (Más tarde, nel Albergue, enteramos qu'aquel pueblín tan granible y soleyeru metanes un mantu pergrande de praderíes yera A Figueirina).
 |
| Entrando n'A Mesa. |
- Cuido qu'aquello sí debe de ser La Mesa.
Tres cruciar la Riega los Cabríos , pasaes les cuatro y media (16:35), arribamos A Mesa.
 |
| Arribando A Mesa Los finxos: La Ilesia, la Escuela y Casa Miguelín. A mandrecha la Rectoral. |
- Mira, aquella casa colorada bebe ser la Rectoral.
A Mesa ye un pueblín de montaña ya una parroquia (12,73 km2) del conceyu de Grandas de Salime asitiada nos rimeros del monte a 860 m/a , no que se conoz como'l valle de Carbayín. Seguramente de nun tar averáu al Camín Primitivu pasaría bien desapercibíu, pero tien esa suerte. Nun llega la parroquia a los 30 habitantes ( unos 20 n'A Mesa) repartíos nunes once viviendes en cases techaes de pizarra y separaes por muries baxes de piedra arrecho - chantas - que te lleven al occidente d'Asturies. Pueblos pequeños, guapos pueblos con identidá propia que caltienen la so fisonomía magar algunes modernes construcciones que ponen tol procuru n'averase al patrón.
La ilesia del pueblu cabezaleru (A Mesa), onde tamos, ta entamilgada nuna cotariella - ¿sobro un dolmen? - metanes l'aldea, y formando parte del Campu la Ilesia. Ye ún de los finxos más representativos pero tol pueblu caltién esa unidá, esi arume occidental. Tal paez la modernización d'un castru, la evolución de San Chuís o del Chao Samartín. Asina lo ve'l mio alma celta.
 |
| Sta. María Madalena, XVIII. (A Mesa) |
La nave rectangular, nel mediu, con teyáu de llousa prieto, a dos agües, y colla espadaña de doble güeyu enriba de la entrada. Si pases al interior y te sientes nun bancón de madera mirando'l techu creyes tar embaxo un horru, coles vigues de madera y les ripies casi a teyavana. Tranqui, ta bien armao y nun te va cayer enriba
(en cualquier casu'l cielu tiéneslu a tiru piedra nestos llares). Remata esta nave nel presbiteriu o cabecera cuadrada , a cuatro agües, grandona, más alta que la nave y que lleva al tiempu una ampliación al norte, d'un agua, que paez en relidá otru cuerpu; cuido sía la ¿sacristía?.
 |
| Presbiteriu Sta. Mª Madalena (Semeya:Atracu a Xurde Morán) |
Y lluéu, nun lladral de l'antoxana la entrada, otra pequeña construcción (¿un trasteru?) , más moderna, con carga esterior pintada de claro pero col zócalu de piedra. Nada desentona; la cuidada mampostería y la techume de llousa prieto determinen la unidá del conxuntu.
Nesta parroquia, amás de La Madalena celébrase tamién San Pedro, el 29 de Xunu, con una romería nel campu la Ilesia onde s'instala una carpa pa la xinta comunitaria y d'otres actividaes. Vien xente abondo amás de los pelegrinos agospiaos nel Albergue Miguelín o nel públicu, que ta Escuela antigua (non tan antigua).
La Mesa, a 24 km por carretera - hai un atayu - de la capital, Grandas de Salime, tien cuatro aldees que complementen la parroquia: Buspol, Toucedo, Viliamayor y Villar de Buspol. Pel Camín Xacobéu son 16 km la distancia con Grandas, pero finos. Esto pa otru día, que güei toi fechu polvo.
 |
| A Mesa |
La Mesa ye una parroquia del conceyu de Grandas de Salime, pero non siempres foi asina. Na Edá Media toa esta comarca del altu Navia pertenecía la ilesia d'Uviéu pero entrada la E. Moderna y reinando Felipe II hebo una Desamortización eclesiástica y tres la Bula de Gregorio XIII (1574) munchos territorios eclesiásticos pasaren embaxo la xurisdición real (había que pagar los favores de la Batalla de Lepanto). D'esta miente'l Rei, mui necesitáu de perres pa soportar les continues guerres nes que taba metíu, vendía les tierres a los conceyos (1584) de los pueblos que se llibraben de la gula eclesiástica (nunca nun teníen bastante). Ún d'estos conceyos foi'l de Salime integraú por Salime, Vilarpedre y A Mesa. Otru yera'l de Grandas, que tenía pa consigo a Trabada. En 1836 estos dos conceyos, sangre del sangre y pastu de la mesma tierra, tomen el determín d'axuntase n'ún: Grandas de Salime, bien fecho.
¿Pero por qué suena tanto La Mesa? ....
 |
| Nel Albergue Miguelín |
*************************************
Esti nun ye l'asuntu pero por si vien a cuentu...... ¿Préstente los cuentos?
 |
| <Camín R. de La Mesa> |
Pasaba per Torrebarrio, P. Ventana, La Mesa, Braña de Saliencia, Pu. San Llorienzu, La Bobia, L'Acebu, La Corredoria, La Dolia, Les Cruces y Grao. El tramu de Torrebarrio (San Emiliano) a La Dolia son unos 45 Km; a partir d'equí, anguaño, yá ta asfalcao. ¡Llástima! Y ye que nos cargamos la calzada romana y el Castru del Chao Samartín, si fai falta. Será por güevos...
Yera La Mesa una vía de montaña pos los romanos procuraben evitar les zones baxes onde s'amosaben más vulnerables al enemigu. Camiéntase que foi trazada siguiendo un camín celta de los antiguos astures.
Nesta calzada, a l'altura de Llutos (Lodos), Alfonso II preparó-y una engatada al moru Abd al Malik (794) cuando tornaba pa Córdoba tres desguazar Uviéu, y lo otro. Claro qu'al añu siguiente vino'l so hermanu Abd al Karim y diónos como "panzorru" . Alfonso llibró de milagru tapecíu pelos montes del Aramu.
Yera tan prestosa esta vía de la Mesa que los árabes tomaren el determín de venir de saifa - a braniar - tolos años al norte siguiendo la Vía la Plata, de la qu'esti trozu de La Mesa formaba parte. Sicasí, la del 795 foi la cabera vez que los árabes la tomaren con Uviéu; el cielu apiadóse de la <Civitas espiscopal>, pena.
- Acabóse lo de tomar carbayones de papu nel Rialto.
- ( Sicasí anguaño puen mercalos, si vienen de bona Fé)
****************************
ESTIMANCES:
 |
| La cirigüeña, salvadora de pelegrinos firíos (y fíos atorrantes). |
. A Xurde Morán y el so <Camín Primitivu>, onde abebentamos a diariu.
< Maestru,
nun hai día nun me dexes
un balagar de deberes;
que nun falten,
perdería los deleres >
. A <Wikipedia>, como siempres, y <Asturnatura>, veneros del nuesu Camín.
. <historiadeasturias.com/los-astures/>.
.<Senditur.com>.
. A Celso Peyroux, por < La Calzada Romana de la Mesa>.
. Al blog <Asturgeografic>, al que sigo, copio y robo, dalguna semeya, talo esta vegada.
. A Bertu Ordiales y Guillermu C. Ruíz pol so "vademécum": <Guía de los árboles d'Asturies" onde catamos dafechu.
. A Madre y a la cirigoña, ente les dos algamaron facer de mi esta ayalga ... Y tu pues entretenete con estes xácares. ¿Acuéi?.
No hay comentarios:
Publicar un comentario