< De co casa a Cuadonga [y 10]: Cangues d'Onna - La Cuevona >

     <De co casa a Cuadonga [y 10]: Cangues d'Onna - La Cuevona >

                                      << Pequeñina y galana>>

                                << La Virxe de Cuadonga 

                                      ye pequeñina y galana

                                      y anque baxara del cielu

                                      nun hai pintor que la pintara, 

                                      ye la flor de les muyeres 

                                     y de les xanes la xana >. 

La Cruz de Priena na llomba.
Esto ye lo que ve la Santina dende so casa.
Dende que-y alzaren la Basílica vese muncho más contenta.

              < La Virxe de Cuadonga 

        nun quixo xubir a Priena,

        quedar quixo en Cuadonga

        que ye'l so tronu la Cueva.

            La Virxe de Cuadonga

        ye pequeñina y galana,

       lleva madreñes de Ponga

       ya escarpinos de Llaviana.>

          

¡A beber!

    
   <  La Virxe de Cuadonga

          tien la fonte cabo casa

          la neña que d'ella bebe

          enantes del añu casa. 

          Y si quedare soltera

          ye que casar nu-y petaba.

        que la Deva ye infalible

         pa los asuntos de maña.>

                                                                                                                                                                                                      *************

< Pa xubir a Cuadonga 
y algamar hasta la Cueva 
nun preciso yo que naide
 munchu o pocu me quiera,
col amor de la Santina
tengo a esgaya pa esta preba.
Pero si vien per de llau
daqué afalagu o xamueza
taría perencantada
velo xurdir pela Deva>

                                                    **********************

          ¡Por fin la estaya cabera!. 

        Sí, collacios; yá tamos al cabu'l Camín. Llevamos andaos más de 60 km (d'ida, otros tantos de vuelta) y namás nos queden 12 p'algamar a Cuadonga. La Santina ta esperándonos y nós tamos arranaos por poder charrar con ella y contemplar, una vez más, esi entornu maraviosu onde prendió aquel reinu, biltu de la España actual, porque tres el cataclismu godu hebo qu'entamar otra vuelta a llevantar un Estáu, pero notres circunstancies bien estremaes. Y ehí tábemos nós, los asturianos, símbololos de l'aunión. Por eso cuando siento algunos dicir que tán escontra la Llingua porque eso ye'l niciu del separatismu danme ganes de... Dilo tu. 

      Bueno, magar nos queden poco más de dos milles p'algamar al Santuariu  entá ficimos l'últimu tramu en dos veces, les xataes nun van pa con nós y les coses buenes hai que tastiales pasu ente pasu: 
                           Cangues-Sotu  y  Sotu-Cuevona.      
               
                                   <<  De Cangues a Sotu >>

   

- Ten curiao, Fafila,
y nu me faigas l'osu.

     En realidá nun salimos de Cangues p'algamar a Sotu sinon qu'aparcamos otra vuelta en Villanueva pa poder contemplar el BESU del Monesteriu; los capiteles románicos dexárennos clisaos.
 Asina que a eso de les once y cuartu (11:15) salimos del Parador Nacional y empobinamos pel caminín solombriegu que cuerre a la vera'l Seya al tiempu que xixilábemos dellos pescadores afanaos nel salmón, cuando non la trucha. 
    Media hora echamos n'andar 2 Km. per aquel camín de zahorra al abellugu d'humeros, carbayos, fresnos, ablanos, salgueros, pláganos, castaños .... Alcanzamos el Puentón per aciu una ponte mui chunga sobro la Playa'l Pelícanu, elli onde se mecen les corrientes d'agua más célebres de la nuesa historia: les bendites de la Deva per aciu del Güeña y les qu'encumen al Puentón romanu que xunce Llames con Parres, y nomamos del Seya.  ¿Veis, incrédulos?... El Puentón ye'l símbolu de l'Aunión ; l'aunión de Conceyos, l'aunión d'agües bendites dende l'albor de los tiempos... Y ehí, nes Cangues, ñació'l Reinu d' Asturies, el que confederó dafechu astures, celtes, hispano-romanos, godos y tou'l que quixere formar parte del nuevu Estáu embaxo l'amparu de la Santina. Por eso me convertí en pelegrín, namás que por dir a vete, pa date les gracies y pa pidite, otra vuelta, que nos eches un gabitu porque sopla un angustiante vientu del este.... 

Playa Pelícano, na meceura los
ríos Güeña y Seya. 

       A manzorga quedó'l Contranquil col so dolmen neolíticu al abellugu la Ilesia la Santa Cruz, la que Favila llevantó col enfotu d'encumar la Cruz de carbayu que so padre, Pelayo, narbolare en Cuadonga. 

     Lo normal yera tirar derechinos, pela vera'l ríu Güeña, p'algamar al Repelao lo primero posible, pos yeren 12 km los que teníemos pendientes y taba rayando'l meudía pero... ¿Qué prisa tenemos? ¡Y Cangues ye tan prestoso!... ¿Quién se resiste un domingu a pasar de llargu col ambiente festivu'l Mercáu de Cangues?... 

   Asina que cruciamos la ponte d'El Pelícano y per aciu'l parque Casa Riera (O.Turismu) algamamos al Puentón. Pela Cai San Pelayu llegamos al Mercáu, almiramos el Palaciu Cortés - ande agospiaren Xovellanos y Sabel II - y xubimos al Barriu d'Arriba pa güeyar la Ilesia-Muséu de la Reconquista y atestayar la capiella San Antón, patrón de la villa canguesa. 

- Guapu abellugu pa un dolmen.
 Esto ye respetar la tradición.
 (Ilesia la Santa Cruz)

   Baxamos del oteru a la esplanada'l Mercáu onde la moderna y alta ilesia parroquial abelluga, embaxo la mirada carlista de Vázquez de Mella - arrequexáu nel Palaciu Pintu - les estatues de Pelayo y la Muyerina, vivu retratu de mio Güela. 
Enfrente, formando parte de la fiesta, Casa Dado y yá camín de la ponte'l Contranquil, pela Avenida Cuadonga, pasamos per delantre l'Ayuntamientu, l'Hotel Los Llagos  y avistamos l'edificiu de Correos. 

Entramos na llosa lítica d'El Contranquil, embaxo l'abellugu'l Monte Llueves y l'atenta mirada la Villa María, onde los nuesos ancestros Azilienses yá moraren na Cueva los Azules y más tarde honraren a los suyos con un dolmen megalíticu que Favila supo caltener por esi mesmu apegu a los suyos guareciéndolu embaxo una ilesia cristiana. 

         - Esto ye pa caltener la tradición y amosar el respetu a les fazañes de mio padre y a los nuesos antepasaos neolíticos, Froiliuba.      
         - Esto ye pa dase'l pote, Favila. 

Señaldá: L'Emigrante.
< ¡Ai!, cuánto t'eché de menos, Pontona
 d'amores tienros;
siempres nos mios recuerdos 
del tiempu que pasé en Cuba 
a esficies de nueva vida >

     Dellos años más tarde otru Rei d'Asturies fexo dalgo asemeyao. Alfonso II, el Castu, llevantó la Ilesia de San Salvador onde yá tenía una homónima so padre Fruela que fuere desaniciada casi dafechu por aciu les  razzies los Mugait en 794 y 795. Honrar la tradición y los ancestros va ser una constante del reinu de los astures. Alfonso III, el Magnu, tamién escribió una crónica...

           - Nun te metas n'hestories y tira pa Cuadonga, anda - siento la voz terrenal de la conciencia....

  

Casa-Cuartel nel Lleráu

       Pel paséu fluvial, almirando Villa María, algamamos al Barriu la Pedrera y, como yera la hora'l vermú, entramos na cantina de la Estación d'Autobuses. Pali-pali, pela oriella del Güeña aportamos al Barriu d'El Lleráu onde destaca'l modernu edificiu del Cuartel de la Guardia Civil en cuarcita colorao típico del conceyu. Un poco más p'alantre ta la Gasolinera pero nós nun vamos pasar delantre d'ella, sinon que tomamos un senderu formigón, a manzorga la carretera xeneral, que t'indica <Camín de Cuadonga>, bona idea: ¡Adiós, tráficu! . ¡Adiós, Cangues!. 

Pela Viesca,  Camín de la Reina

     Vamos perencantaos pel Camín de Carao que nu  ye otru que'l Camín de la Reina qu'emprentamos en LLames de Parres. Pasamos la Ponte'l Cortixu y dellos cotos de Pesca talo: El Pozu los Llobos, Pozu Canzola o Pozu Parisina. Enantes d'entrar en Susierra paramos a tomar la parva, paezme qu'a esa zona llamen-y El Traperu, o La Viesca, nun sé... El chorizu y el xamón taben de viciu y la tortiella nun te digo ná... 

       

Melandru echando la siesta.

          Esti camín sele y solombriegu a la vera del Güeña, colos rayos de sol caltriando al traviés de la tarmuda follarasca son un relax pal espíritu. Pero como nun hai dicha perfeuta, poco antes de cruciar una ponte sobro'l Ríu, vemos el cadabre amosquiaú d'un animal... Nun ye un perru, nin un gatu... Ye peludu, finu, col focicu estiráu y d'un color pardu....
      - ¿ Sabes qué ye esto?
      - Cuido que ye un melandru. Un tejón, dicís per Castiella. 
      - Delles veces siéntote llamar melandru a dalguién...
      - Bueno... Cuando toi enfadáu con dalgún políticu... El melandru pue ser una persona con poco xacíu, desdexáu, xostrón...
      - Pero esti.... 

Melandru iguando
una melandrera.

        [ El melandru (meles meles) ye un mámiferu carnívoru, de la familia de los mustélidos, tirando a pequeñu, como vemos, pero fuertucu de complexón. Más llargu qu'altu, por mor les sos pates curties,tien el rabu pequeñu y romu y el pelo blanco y prieto bastante llargo. Na cabeza tien dos franxes blanques allargaes mui particulares.  Pero si dalgo destaca n'él ye'l focicu llargu y musculosu, paecíu al xabaril, col que foza na tierra buscando llombrices, gusanos o pequeños reptiles, lo que pilla, dao que ye omnívoru: que nun te pille un maizal o una pumar... A nada-y fai áscuares esti fartón que nagua pol miel, d'ehí -y vien el nome de meles meles.
Ye d'hábitos nocherniegos - los machos son más caleyeros - raru ye velu de día. Nun ve mui allá por eso de tar avezáu a la escuridá de la madriguera pero güel ya oye lo que quier. Son territoriales y defenden la melandrera como qué; nella viven un machu ya una fema dominantes y los descendientes subordinaos. Magar el machu copula con toles femes casi namás curien de los fíos de la xefa, los bastardos nun suelen llegar a mayores. Eses melandreres son heriedes y alcontróse alguna de cerca 900 metros, con más de 50 túneles ya unes 175 entraes ( o salides) pero lo meyor ye que tán compartimentaes dafechu con cámara principal, chimenees de ventilación, retrete y lliteres pa los alevines. ¡Toma melandru!]

¿Estos rapazos dirán pa Cuadonga
 o pa la Cueva'l Buxu?

      Tamos na zona de Cardes, indícalu un cartelu. Escondíu ente la vexetación acolumbramos un edificiu acolorazáu, mui vistosu, con un cartelu que diz:<Hotel Azebache>. Debe ser afayaizo pasar ehí unos díes de relax. Al poco, un grupu mozos, dambos sexos, pásennos a la velocidá del rayu....
    - ¡Bon camín!
    - Igualmente. 
     Ellos, embebecíos nos sos alderiques nun reparen que bien cerca d'equí hai una cueva perantigua... 

Esquema de la Cueva d'El Buxu (Cardes. Cangues d'Onís)
(Semeya Asturnatura)

       [ Nes calices cretáciques de la fastera Perancueva alcontró Cesáreo Cardín (trabayaba pal Conde La Vega'l Seya) en 1916  La Cueva del Buxu (¿Bruxu?) cuando en realidá buscaba la Cueva de les Inxanes.  Nun ye mui grande - dicen - pero les numberoses galeríes y sales que la conformen faen d'esti llaberintu una verdadera GALERÍA D'ARTE.  Pintures y grabaos con 17 representaciones d'arte parietal repartíes per unos 60 metros d'esplendor : caballos, ciervos, cabres, bisonte ya otres figures ideomorfiques. Aprovechando los relieves de la roca dan a les figures la perspeutiva qu'entá ¿nun conocíen?. Los estudios asitien esta ayalga del Paleolíticu Superior na domina del solutrense, al rodiu 18000 años e.X., cuando yá l'homo sapiens sapiens desplazare al neandertal (estos artistes yeren bien sapiens, dende lluéu). 
Esta cueva formóse per aciu la presión de la Riega d'Entrepeñes sobro'l tubu calcáreu hasta que l'agua s'esmució per un sifón. ]
    - ¡Qué suerte tuvísteis, pelegrinos!
     

VV. Guapa Vivienda Vacacional
en Celoriu.
(¿Camentando n'agospiar?)

             Per aquella granible vega de maizales vamos aportando a otru pueblu ricu y perguapu: Celoriu. Esti pueblín, de nueve viviendes ocupaes que pertenez a la parroqui d'Abamia, ye como un pasu atrás nel tiempu: grandes  cases típiques de corredor y galería que rematen en solláu-estudiu, horros, cuadres, güertos zarraos por pequeñes muries de piedra y flores; munches flores. Ye como si los escasos venti vecinos nun tuvieren llabor más importante que cultivar flores. 

Puente Celoriu

      P'algamar a Cuadonga nun ye preciso salir del Camín de Corao (la Reina) pero nós vamos facelo pa visitar el barriu La Venta (Sotu de Cangues); un amigu y el turruxón de Pelayo bien merecen una visita.

      Salimos del pueblu a la carretera xeneral As-144 ( Corao - Cabrales) per aciu del Puente Celoriu, incrustáu nuna chopera. 

<Torre del Herederu> o
<Torre de Cauvilla>

   Ensiguidina vemos daqué que destaca na redolada, un turruxón de piedra, con escases ventanes adintelaes que paecen impostaes. Damos unes vueltes alredor pa ver si alcontramos la puerte d'entrada pero la vexetación, los zarros ya un taller de coches tórguennos la visión afayaiza. ¡Qué vamos facer! En cualisquier casu tomamos unes semeyes que nos dan idea de los que fuere. 

     ¿Y qué fuere?. ¿ Qué pinta equí esta torre de mampostería con sillares nes esquines y a la que se ve-y falta un tramu d'altor?... 
     Echamos una güeyada al llibrín de Xurde Morán, a la nuesa guía <Xixón-Cuadonga> . Esti turruxón conocíu como la Torre de Cauvilla o La Torre del Herederu ye un vieyu caserón medieval al que la tradición asocia con Pelayo. Asitiada poliorcéticamente nun cuetu, ente los ríos Güeña y Reinazu, ta anguaño al par del camping, no que se conoz como'l Campu la Xura, y foi'l llugar onde los astur-godos elixeron Rei (o Princeps ) a Pelayo enantes de la batalla Cuadonga. 

¡La bici de Sidrín!
Sí, taba na Venta.
De xuru que l'aparcó
 pa  tomar daqué na Palmera.

     Ye probable qu'esto ocurriere en 718 mientres la Gran Batalla tuvo llugar en 722, según les últimes teoríes. Algo habrá de cierto cuando, hasta'l sieglu XIX, los alcaldes de Cangues xuraben equí'l cargu, Campu la Xura,  algo asemeyao a lo fizo Pelayo. Col tiempu, al perder el so valir defensivu, foi tresformáu en vivienda, d'ehí les sos ventales adintelaes. Lo que caltuvo ye la puerta de mediu puntu sobre impostes.Ye una pena ver esbarrumbase un finxu de la nuesa hestoria. ... ¡Una pena!
        A sacanos de la tristura vino esta chalga según caminábemos pa La Venta. 
    - ¡La bici de Sidrín!

¡Pal Zoo!

      Ganes nos dieron de coyer la bici de Sidrín p'algamar a la Venta. ¡Quién nos vería aparcar na Palmera! Enantes d'alcanzar el restaurante llamónos l'atención una moderna ponte, ¡otra!,  sobro'l Güeña, bien cerquina d'onde mez les agües col Reinazu, el que ñaz embaxo la Cuevona, benditu pola Deva, l'antigua Santina. Ye la pasarela que te lleva al Zoo de Sotu.
Nel Zoo de La Grandera hai una veriedá per grande d'especies animales onde'l 50 % son autóctones y la otra mitá alóctones. ¿Quies ver osos, llobos, ferres,  nutries, cigüeñes, canguros, garcies o un  gallu montés (Urogallu)?..... Pos ven a Cangues y por 9 E, 5 los ñeños, pues ver tou esto y cualisquier clase de coríu que te pueas maxinar. (En grupu más barato). Entra equí : info@zoolagrandera.es

     

Restaurante "La Palmera"
La Venta (Sotu de Cangues)

    Y agora a saludar un amigu a La Palmera. José Manuel ye un antiguu collaciu d'escuela. Bueno, él sentaba mirando pa l'encerao y yo pa la puerta, ye dicir, pa los escolinos. Tres les dures batalles cola numeración arábiga salíemos a xugar al fútbol al recréu, ehí siempre díbemos colos de Pelayo, claro, pero al final terminaba siempre nuna tremolina ente Madrid y Barça: Pirri y Zoco escontra Gallego, Fusté y Zaballa. ¡Yá llovió!.
     Nunca nun escaeceré cuando dellos años más tarde fuimos a xintar al so restaurante La Venta colos mios escolinos de Xixón por mor d'un intercambiu col colexu francés Jean Rostand (Thouars) . Tratónos a cuerpu de Rei. Los franceses quedaren forofos del Cánicas pa tola vida, y de Cuadonga, por supuesto. Lo que nun pudo ser foi la visita a los LLagos por mor de la ñeve reciente.

             Son cerca les cuatro la tarde. Yá nun ye plan de tirar camín de Cuadonga asina que tres evocar dellos recuerdos de va 50 años decidimos tornar andando hasta Cangues. Qué son cinco kilómetros pa unos andariegos... Tres facer otra visita en Cangues - los antiguos escolinos agora viven na capital - plantámonos nun vis-veo en Villanueva. Quedaba rematar la faena pa otru día...

                              ¡Sotu de Cangues - Cuadonga!

Sotu de Cangues, un marcu incomparable.

        Nun me petecía un res algamar solos a la Cuevona asina que falamos con unes amigues de Cangues que s'apuntaron encantaes a dir andando con nós a Cuadonga, namás yera preciso facer coindidir el día llibre del trabayu dambes. Dengún problema, en principiu, pero .... El día d'autos un percance familiar torgó-yos el viax asina que decimos tirar ¿solos?... Non, el fíu y la nuera fueren de la partida; vese que-yos prestó la caminada de Llames a Cangues pel Camín de la Reina. Siempre tuvi l'enfotu que remataren el camín con nós pos quería presenta-y el guaje a la Santina qu'esti ye más de la Deva y precisa una reconversión... Actualización, dicen per internet.

Ansí, con esta chispa,  emprentamos
la estaya cabera del
"Camín Xixón-Cuadonga"
- ¡Avante!

        Ye domingu d'Agostu y lluz un sol espectacular. Podemos pasar calor pero en cualisquier casu sedrá muncho más prestoso qu'andar solos, con capes y ensin esfrutar del paisax. Dexamos el coche nel aparcamientu La Palmera  y yá faláremos col dueñu pa que nos tuviere daqué preparao a la vuelta; menester sedrá rematar el viax Xixón - Cuadonga como se merez.

      Yá sabéis que nun somos de madrugar - ¡presta tanto lleer pela nueche! - ansí que cuando salimos de La Venta pasaben de les diez y media... Pela cera de manzorga y a la vera del Güeña vamos ascendiendo pali-pali hasta'l pueblu de Sotu. Ye preciso cruciar el ríu per aciu una ponte perguapa pa entrar nel cogollu l'aldea. Home, podíemos tener xubío pela marxe drecha del ríu, pel Camín de Cambre, como marca'l braeru Camín de Cuadonga pero foi más rápido y cenciello siguir la carretera xeneral AS-262, como nos recomendaren, magar te quede siempres un pocu de rocea...

Santa LLucía  (Sotu de Cangues )

     Una casona perguapa na vega'l ríu danos la bienvenida; ye un palaciu, ¿quiciabes el de los Caso ?: José Miguel Caso y la so fía Ángeles, perbona escritora y meyor persona, polo que tengo entendío. (Díes más tarde enteréme que nun yera esa la so casa familiar). Frente la ponte un hotel y a manzorga, metiéndode un poco al migollu la Ermita Santa Llucía, una capiella de piedra visto en mampostería con un adriu mui afayaizu, sofitáu en columnes toscanes, y onde los pelegrinos suelen parar a refrescar. Dientro, San Andrés nun fai otro qu'almirar a la Santa Patrona.

                             < Per Santa Llucía mengua la nueche y crez el día
                                tanto como una vieya salta p'arriba", dicía madre.

Palaciu de Sotu

    Cerca la capiella, frente la ponte que comunica la carretera xeneral col pueblu de Sotu, tenemos tamién otra casona pergrande y per guapa reconvertida nel Hotel La Trapa Palace del Grupu Pasera.
Sotu ye un pueblu ricu y con muncha tradición asturiana como podemos comprobar poles numberoses cases-galería, los horros y les pequeñes cerques de piedra qu'estremen los solares familiares blasonaos por escudos nobiliarios. Camiento yo que si Cangues foi la capital d'un Reinu los alredores bien podíen tar semaos de villaes  palaciegues. Lo cierto ye n'esi entornu podemos alcontrar numberoses casones-palaciu, talo:

Entrando en Sotu 

   . El Palaciu de los González-Cutre -como amuesal'escudu - ye un edificiu en tres cuerpos - de mano'l central fuere una torre - que perteneció a los Soto. Lo que se ve - mui remocicáo - ye del XVIII magar que lo primixenio data del XVI. Balcones, sollaos, galeríes y almenes a la vera'l ríu dan-y a esti palacín un aspeutu bien candial.
   . Más alantre, a la salida'l pueblu,  tenemos el Palaciu Cambre - que nun visitamos pola premura'l tiempu - del que queda poco de la construcción del XIV magar fuere llevantáu nel XIV. Lleva tamién anexa la Capiella San Andrés, si bien el Santu foi treslladáu a la capiella que vimos anantes de Santa Llucía.
    Otros palacios cercanos tenémoslos en:
   . El Palaciu de Sotu Cortés, en LLabra
   . El Palaciu de los Llabra-Sotu y Teleña en Coraín
   . La Casona de los Soto-Llabra en Corao-Castillo.

Tamos n'El Bosque

        Otra vuelta a la carretera xeneral pela cera averada xunto al Ríu Cuadonga (Deva ó Reinazu). Son les 11:07 cuando pasamos delantre una quin tana asturiana reconvertida nel  Restaurante El Bosque, con un comedor-galería de lo más afayaizo, un aparcamientu perampliu y cn una comida riquísimo.  Penriba hai unes peñes mui célebres que paecen escapar de la montaña. Cuenta la lleenda que ye'l fósil petrificáu de Don Oppas, l'Obispu felón que, pasáu al bandu sarracenu, quixo convencer a Pelayo delantre la Cuevona que más-y valiere pautar col enemigu, muncho más poderosu, y algamar un alcuerdu afayaizu enantes de quedar dafechu esclavu de los moros:
      - Pelayo, Pelayín, ¿ónde andes, fíu?
      - ¿Nun me ves, cara panoyu? Toi esperándovos na Cueva. Tengo sidra fresco, ¿nun voz petez un culín?
     - Nun sías fatu, rapaz; sois cuatro gatos, trenta asnos dicen estos...
    - ¿Cuatro gatos?... Un copín, que crecerá talo granu de mostaza.
                Y amás tengo la Santina,
                di a los caldeos
                que tornen pa Sevilla.
       Y tornándose p'Alkama
                                     va y espeta-y de bolina:
    - Nun sé, Alkama,
       tienen sidra y la Santina,
       igual ye más acertao
       dexalo pa otru día.

ARTESANIA, souvenirs, bar.

       Nosotros nun podemos dexalo pa otru día y vamos camín de La  Riera pero n'antes d'algamar al pueblu, nuna revuelta la carretera alcontramos un edificiu pimpanudu con aparcamientu enfrente; ye una tienda d'ARTESANÍA, con toa clase de souvenirs  y chigre incluyíu.

¡A manzorga!
 Entraremos na Riera al traviés 
d'un Arcu de Trunfu'l día que terminemos
el <Camín Xixón-Cuadonga>

 Nesto vienme n'alcordanza aquel canciu....


<Canteros de Cuadonga
  los que baxáis a La Riera
  si queréis beber bon vinu
  cortexái la tabernera >

Entramos na Riera pel
Camín del LLavaderu

    Y el guaje arrepóstiame: 

            < Canteros de Cuadonga
               nun baxéis más a La Riera 
              que vos la tienen xurada
             los mozos de la ribera > 

      Pa entrar na Riera en coche faise al traviés d'ún túnel escaváu na roca caliar pero'l Camín de Cuadonga empobínamos pel Camín del Llavaderu, que ye un tramín a asfalcáu a la vera'l ríu y de lo más prestoso: Fonte, LLavaderu, Bebederu y hasta bancos p'aselar un poco si fuere menester.

< Si quies entrar na Riera
has de cruciar esta ponte
sobro les agües la Deva >

       Pel Camín de la Prida algamamos a la vieya ponte La Riera, una ayalga pa la vista que te remonta a los tiempos de maricastaña. Un molín de piedra visto y cases antigües remocicaes completen la panorámica de colores. Enantes pasemos per delantre la Escuela Antigua con una placa dedicada a don Pedro Pidal, Marqués de Villaviciosa, qu'emburrió lo suyo pa que Cuadonga y el so entornu fuere declarao Parque Nacional.
Nel pueblu, per L'Avenida la Bolera, podemos dar cola ilesia parroquial embaxo l'advocación de los Santinos, Xusto y Pastor: Una nave con arcu de trunfu que remata n'abside cuadráu ya un cabildru qu'abeyuga una portada con arcu de mediu puntu.
 

        [ Don José Miguel Caso González ye ún de los cangueses más célebres de los últimos tiempos. Ñació en Sotu allá pel 1928 y estudió en Xixón el Bachiller y depués na Escuela de Comerciu. Más tarde fizo Filosofía y Lletres n'Uviéu quedando como profesor de Lliterarura na Universidá y pasando más tarde a la de Madrid como profe d'Historia. En Lyon (Francia) esfruta como Llector d'Español y torna a España tres opositar a Medies exerciendo maestría en Ponferrada y Xixón. Yera tan tolerante y candial que naide nun piraba les sos clas, dicía un exalumnu. 

Santolaya d'Abamia, finxu de la nuesa

Doctor pola Universidá de Madrid gana cátedra de Llingua y Lliterarura na U. La Llaguna y pasa ceo a Uviéu onde sal elexíu Reutor pol claustru, el primeru. 

Dirixe la Cátedra Feijoo, funda'l Centru d'Estudios del Sieglu XVIII , reclámenlu n'universidaes de los Estaus Xuníos y termina dirixendo'l RIDEA (Institutu d'Estudios Asturianos). 

     Tien más de doscientes espublizaciones ente llibros y artículos al rodiu'l Romanceru y los clásicos españoles de tolos tiempos - lliterarios ya hestóricos - mientres bebe nos veneros de la LLingua Asturiana, con clásicos con Caveda y Nava o Acebal. Asturies y lo asturiano son el so rixu  y Xovellanos el so petite. Ta enterráu en Corao, como Pelayo. 

El profesor que salía ente aplausos de les clases -onde se-y colaben algunos que nun cursaben la so asignatura - tevo, tien, una fía:

Qué mayor homenax a un pá
qu'almirar la semeya de la fía.

L'artista, escritora, periodista, traductora, actriz, bailarina, presentadora, tertuliana y ecoloxista - y ye que como Ulises s'apunta a un bombardéu -  Doña Angeles Caso  ñació en Xixón y creció ente cantos de serenes  producíes por compases del trubiecu, Odisea's de so padre.

Dende "El mundo visto desde el cielo" por don José tará argulllosu de la obra la so Neña: Esperamos qu' El peso de las sombras nun vos prevoque "Un largo silencio" pos sabemos que - como Ulises te presta  " Xugar contra el viento" y qu'ellí "Donde se alzan los tronos" sigas siempre con "La alegría de vivir". 

Doña, Anxeles, déxame Usté trabayu abondo, qu'esti blog nun ye otro qu'una discupa pa siguir andando na llectura, esto ye lo bueno que se saca percorriendo les históriques caleyes d'Asturies. Gracies.

(Chisco un güeyu y a siguir, que m'espera la Santina) ].  

                                        **************************************

Restaurante Los Texos, chigre.
Una paradina pal vermú. 

   Salimos de La Riera  valle alantre y vemos el cartelu pa Llerices, endamiao na falda'l monte; darréu pasamos La Vega p'algamar a Muñigu, entá na parroquia La Riera.
Como tamos un poco sofocaos pol calor - ¡benditu sea! - paramos tomar el vemú nun chigre perguapu, a la solombra un texu; claro, ye'l Bar Los Texos, onde tamién pues comer, ente aperios fechos cola madera d'esti árbol míticu.
Nel alderique xurdió'l tema del Muséu de la cerámica y los relós de Basilio Sobrecueva. 

Reló "Güeyu de güe"

     - ¿Nun lu conocéis?...
     - Suéname algo d'un reloxeru de Corao...
     - Claro, Basilio aprendió l'oficiu en Madrid - más tarde perfecionó en Suiza -  con un reloxeru alemán que trabayaba pal Palaciu Real,  y en 1871 vino instalase a Corao - tres pasar per Uviéu y Xixón -  poniendo un negociu per tolo alto. Él mesmu inventaba pieces pa los sos relós de peses, famosos en toa España, contratando especilistes de la mesma Fábrica d'Armes de Trubia. Tamién los facía de bolsu siendo Alfonso XII el so mayor almirador que llegó a nomalu Caballeru de la Orde de Carlos III, casi ná col de Corao. Los sos reloxes artesanales yeren célebres nes estaciones del tren.
   - ¿Y la cerámica?
   - El qu'echó p'alantre'l Múséu foi Maximino Blanco del Dago que tamién tenía sales de cerámica. Una pena nun pudiere inauguralu, tevo que facelo dende'l cielu. Tien taller d'alfarería y presume d'amosar los meyores cacíos de barru d'España.

Pasarela de Muñigo

      Yá salimos de La Riera camín del Real Sitiu col enfotu de pasar pel Repelao, l'antoxana la Cuevona, onde taba la Estación del tranvía a Les Arriondes que llevaba'l carbón y mineral de Buferrera y onde los condes de Montpensier - Luisa Fernanda, hermana de Sabel II,  y Antonio, fíu del rei de Francia - llevantaren un monolitu n'honor de don Pelayo en 1857, un añu antes que viene so hermana, la Reina (¡Qué atrevimientu!).

     El Repelao ye una llanada a la vera'l Ríu Deva (Reinazu) onde dicen que los astur-godos nomaren Rei o Princeps a Pelayo. Ya tuviéremos ehí delles veces, ye una zona candial, pero'l casu ye qu'al dir andando damos un poco antes con una pasarela pergrande de madera que traviesa la carretera de parte a parte. ¿Cuálu ye'l motivu?... Pos qu'en cuenta d'algamar al Santuariu pela vera'l ríu faeslo p'enriba, pela fastera'l monte.

    - O güei o nunca, en coche nun se pue dir per ehí. 

    - Pos venga, namás ye kilómetru y mediu (1'5 km).

- Ven p'acá que te doi un masaxín...
- Un cayadazu te daba yo...

Asina qu'entramos per ella a ver qué pasaba....
La Sienda de Muñigo ye un camín asfalcáu, percuriáu y solombriegu namás qu'un poco cuestu. Pero bueno, pali-pali y sentándose de cuando en cuando nos bancos de madera asitiaos nos requexos abiertos del monte vamos llegar arriba tranquilamente. Una ventaxa sí que tien, envede aportar a la Cola de Caballu per debaxo, enfrente la Santina,  vamos facelo p'enriba, enfocando al Paséu de los Canónigos, al pie de lo fuere l'Hotel Favila ya onde ta'l Cuartel;  a nós espéranos:

Obelicu d'El Repelao (Duques de Montpensier)
Onde Pelayo foi encumáu a Rei
tres la Batalla de Cuadonga.

     Lo que nun pudimos ver esta vegada foi l'obeliscu que los duques de Montpensier llevantaron na esplanada del Repelao, onde'l pueblu - de motu propio - encumó a Pelayo tres ganar la batalla Cuadonga. Díes más tarde xuro'l cargu en Sotu Cangues, no que entá se llama El Campu la Xura y que ta onde la Torre del Herederu., al par del camping.
Los Duques de Montpensier , Don  Antonio de Orleans, fíu del Rei de Francia, y Doña Mª Luisa Fernanda de Borbón, hermana de la Reina Sabel II visitaron Cuadonga'l 14 de Xunu de 1857, un añu antes que la Reina, onde escucharon misa solemne y brindaron a la Santina con dellos regalos. Darréu baxaren al campu d'El Repelao a colocar l'obeliscu citáu. ¿Tenía esta visita dalgún mensaxe tapecíu?... Cuido que sí. El francu tenía aspiraciones al reinu d'España al traviés de la so muyer y había qu'amosase.
     - Que toi equí, ho. Toi dispuestu agabitar.
 Intrigó lo suyo pa qu'a Sabel-y fuere mal... Igual se podía quitar una reina incompetente (como terminó ocurriendo) y ponelu a él... Pero la coalición inglesa nun taba pol labor de da-y baza al francés.


                                                    ¡ L'APOTEOSIS ! 

¡ L' ARREBATU!
Ensí queden tolos pelegrinos al contemplar La Cuevona.
Nun son l'exércitu d'Alkama, non, son los romeros que vienen
 a dar les gracies a la Santina polos beneficios concedíos
y a pidi-y daqué más.... que nunca nun tamos conformes.

       Ye un domingua soleyeru como pocos, tamos en plenu veranu y hai xente a estrapayar; meyor, asina presta más. Estes coses celestiales ... meyor compartiles:
   - Hai más llocos que yo; o igual nun tamos tanto...

PLANU  de  CUADONGA
Lo que tenemos que visitar. 
(Semeya del llibru:"CUADONGA", d'Emiliano de la Huerta. F)

ITINERARIU que siguimos:
              1. Esplanada: H.Favila, Torre, Casa de Recuerdos, Casa Capitular (Muséu), Basílica, Estatua Pelayo, Campanona, Horru y Oficina Turismu.
               2. Camín del Santuariu: Xardinos, Hotel Pelayo, Casa d'Exercicios, Túnel de comunición, los sepulcros reales, Santuariu.
               3. Énte la Cueva: Escalera les Promeses, Cola de Caballu, el Pozón, Fonte los Deseyos, Colexata San Fernando y Panorámica la Cueva col Espeyu Máxicu.
               4. Ta lluéu: Xardín del Príncipe, Paneles informativos, El Mesón antiguu ,

L'Hotel Favila : Escolanía, Muséu y Casa del Abá.

       Lo que yera L'Hotel Favila - antiguu hotel de pelegrinos -  ta nel cabu opuestu la esplanada la Basílica, anguaño fai d' Escolanía dende qu'en 1970 tuvieren llugar delles igües qu'afeutaren a les cases multiformes onde s'agospiaben los canónigos. Agora tola manzana lleva un patrón siguiendo un poco lo que yera l'hotel. Harmonía, ye la pallabra que pue definir toles edificaciones de la esplanada: oficines de correos, teléfonos, viviendes de canónigos, patiu de pelegrinos, servicios, tiendes de recuerdos, Basílica, Muséu y hasta les cases del Abade y Capitular.

         El Muséu, dientro la Casa Capitular, nun ye otro qu'una esposición de les sucesives donaciones que se-y ficieren a la Santina al traviés de los tiempos, unes con ciertu valir artísticu ya otres sentimental, qu'equí cuenta muncho porque .... Cuadonga ye esaltación del espíritu dientro un marcu incomparable de sinfonía de colores y d'un ruxerrux polifónicu d'almes cantores escondíos la mar de les veces na poesía la ñublina. (Dalgo ansí tra-ylo'l llibru d'Emiliano de la Huerta)

¡Firrrrmessss!
< Énte Pelayo cuádrase tou Dios.
Hasta'l Rei ye un empleáu.
Yá diz muncho al so favor
que la Familia Real
tenga tenío esti honor.
Quedo fanáticu dafechu
de la Infanta Leonor >. 

      El Muséu consta de dos pisos, nel superior hai un departamentu pa los guardies y dos sales pa escudos, banderes y coses asemeyaes mientres que'l inferior caltién los tesoros de la Santina: les corones de la Virxe y el Neñu de F. Grande Buyllá llabraes  con oru y piedres precioses, la custodia en forma de Cruz de la Victoria, el pectoral con que l'obispu Guisasola coronó a la virxe en 1918 en presencia los reyes d'España, un crucifixu de marfil de tiempos de Felipe II, la vela ofrecía por Xuan XXIII, los mantos donaos por Sabel II y la so hermana Montpensier, imáxenes barroques y .....
      La entrada al Muséu Casa Capitular ta presidíu por un escudu escomanáu conformáu por dos estayes: una d'España ya otra de Cuadonga, cola cruz de Pelayo.

- Pelayoooo, Pelayínnnn, aguarda!
que voi echate un gabitu;
van enterase, mio h.iyu,
lo que val un mozu de Llaviana. 

                           
      Al salir del Muséu tiramos camín de la Basílica pero enentes d'entrar, a manzorga, d'espaldes al monte Priena pero mirando al Monte Orandi al traviés de la Catedral  vemos a Pelayo , mano tendida, n'actitú real narbolando la cruz que-y dio la victoria y reclamando'l protagonismu que se merez. Hai xente que queda mirándolu, clisada; otros cuádrense ente'l Rei ya otros, como yo, vamos corriendo por si precisa un gabitu:
   - Aguarda, Pelayo, aguarda, que quiero echate un gabitu. Van enterase esos moros lo que val un mineru Llaviana.

Ñublina*

      Claro que lo más bultable de la esplanada ye la Basílica. Cuadonga nun sedría Cuadonga ensin esa momumental catedral, d'estilu neorománicu, realizada  cola roxa caliza griot de la zona nel cotaraxu del Cuetu, qu'hebo qu'aplanar. Bueno, pa esto ofrecióse de mil amores el Rei Alfonso XII - que prendió la mecha (22-7-1877) - polo muncho que-y prestaba venir a cazar n'estos montes.
  La idea de llevantar esti monumentu venía d'antiguo pero los que de verdá - bueno, nun sedría xusto, hai muncha xente, inclusive anónimo - la llevaren a cabu fueren:
. Don Benito Sanz y Forés, que quedó aparráu'l primer día que visitó Cuadonga, agarró una de les piedres de la esplosíón y asitiándola con tol procuru (ya conocía los planos de Frasinelli) dixo:
     - Esta ye la primera; agora tu dios a trabayar, quiero vela terminá. 
         Al contemplar esta semeya vienenme n'alcordanza aquello que, más o menos, vengo de lleer en "La Peregrina" d'Isabel San Sebastián (perdón pol atrevimientu):
        *[ Nun momentu dáu la lluvia tornóse gruma zarrao alredor nueso. Borrina trupo talo que pieza de pañu que por abrigar calare. Podíemos tocalo, golelo, sentilo resbariar, destilao, pente la fueya l'arbolíu.  Envolubrávanos, amoroso, como vien faciendo dende antiguo por mor de les cumes que lo atrapen, enredándolo nos sos picos. Arrodiábanos talo les mas acuruxen los sos fíos ...] 

La esplanada la Basílica.

       Nun se-y arregló a don Benito magar lu ¿ascendieren?  a l'archidiócesis de Valladolid cuando malpenes tenía fecha la cripta.  Pa ún que vien con arremangu....
      Pero "nunca falta un rotu pa un descosíu", dicía madre, y vieno a terminala en 1901 ún de Llaviana - ¿quién sinon? - l'Obispu dominicu Ramón Martínez Vigil * yá con planos reformaos de Federico Aparici, magar el berrinche de Menéndez Pidal( yo creo que taba celosu por nun-ylo mandar a elli):
   - Si tenía cuatro torres ¿por qué me ponéis namás dos?.... Y pa disimular cargáismelo too de floritures, carayu. 
      Camienten qu'un cabezaleru eclesiásticu, tres visitar Cuadonga,  camentó-y a don Ramón:
     - Bueno, visto lo visto, cuido que'l Señor ha tenelo en cuenta pa compensar l'anoxu xeneráu pol estremáu ciñu apostólicu con que los dominicos tomaren la Inquisición. To tíu, de xuru que yá ta nel cielu; la basílica foi pa elli'l Purgatoriu. 

      * [Ramonín, como lu llamábemos en Llaviana, onde se criare (ñaciere en Tiñana), yera un guaje mui llistucu y mandámoslu estudiar pa cura, lo más que podíemos facer per aquelles dómines, a Ocaña. Yá cola tonsura en cogorote (1863) cola pa Manila onde se doctora en Teoloxía. Ellí conoz a otru ilustre llavianés, Flai Ceferino González y Díaz Tuñòn. Torna a España y en 1884 nómenlu Obispu d'Uviéu. Mui remangosu amás de la Basílica Cuadonga tamién echa andar el Seminariu d'Uviéu.

     Como de raza-y vien al galgu un sobrín suyu, Maximiliano Arboleya, ñacíu n'Aldea Perdida, tres estudiar nel Seminariu de la capital va de becariu a Roma y ellí faise socilista, bueno, católicu social, ¿nun ye lo mesmo?. Sindicalista "puru" nun ta mui d'alcuerdu col "paternalista" Marqués de Comilles y queda marcáu de roxo na llista: <Más peligrosu que Pablo Ilesies>. 
    - La Patronal ye la patronal y los obreros somos los obreros. Nun queremos caridá, a cadún lo suyo. Viva'l Sindicatu llibre y que Dios nos cueya confesaos.
       Tamién dirixe <El Carbayón> y algama a trending topic de la prensa astur hasta que lu cambien por otru más remanable.
     Yera Arboleya un incomprendíu. Católicu y Socialista quería un sindicatu llibre, ensin inerferencies de la Patronal como pretendía'l de Comilles pero tampoco revolucionariu estremu:
    - Nun defendo'l capitalismu nin tampoco la patronal quiero un sindicatu llibre de paternalimu y de violencia. 
      Nun lu entendía nin Dios. El día que los revolucionarios del 34 desaniciaren el Seminariu y la Cámara Santa, que trataren de defender,  foi pa elli'l <día de la marmota>: "Hai coses que nun se pueden cambiar".  Y lloró con amarguriu... 

                                         ***********

Cómo-y tuviere prestao a Don Máximo ver asina Cuadonga,
Cómo lo tará esfrutándolo dende'l cielu.

Si Cuadonga ye Cuadonga y la Basílica ta ehí ello débese a munca xente preparao, visionario y col rixu altu no que cinca a la Santina y tolo que l'arrodia. Don Benito y Don Ramón foron dos finxos perimportantes ensin los cuales esto nun sedría lo que ye pero hai más....
     Don Máximo de la Vega, el "Canónigu de Cuadonga" como-y prestaba lu llamaren (refugó l'obispáu de Mondoñedo por mor de la Santina) , yera uña y carne col obispu Vigil y cuando esti coló berrando pa Valladolid quedó sulu al frente del suañu; el nuevu obispu Espinosa los Monteros andaba más esmolecíu pola Virxe de la Encinilla que pola de Cillaperlata, que ye Santina. 
Pero'l cazador y constructor (por elli llevóse a cabu la carretera Nueva-Corao) terminó alcontrando nes montañes otru alma ximielga - ¡Frasinelli! - y xuntos maquinaben...
    - Facía falta iguar el Camarín de la Virxe...
    - Dende lluéu, pero una Basílica al altor d'esti paisax y d'esta Historia... ¿Nun te decates qu'esto ye la cuna d'España?
     - Los alemanes tamos ablucaos porque sois vosotros los que nun vos dais cuenta...
     - Tenemos qu'atropar perres, esto nun  pue quedar en cuayada...
     - Pámique van nomar obispu a ún de Llaviana...
     - Meca, esta ye la nuestra, ¡al tayu!
        Yera fácil ver a don Máximo remangáu faciendo argamasa. Tamién yera xefe de cuadrilla, arquiteutu o abá del monesteriu, que l'ancianu yá nun taba pa ello. Tantu puxu, tanto espatuxar buscando perres terminaren por pasa-y factura... Morrió d'una pulmonía (1897) enantes de ver les aguyes de la Basílica afitaes nel cielu asina que tevo qu'alcanzalu a pulsu pero... ¿qué yera eso pa él acostumáu como taba a esnalar sobro la Peña Santa?. ]

La Basilique, y .

        La Basílica Santa María la Real de Cuadonga - d'estilu neo-románicu - asitiada al borde d'un cantil, amuesa maxestuosa'l rosa mármore visible per tola redolada en contraste col verde permanente de la viesca que l'agospia.
 Téunicamente ye una construcción de planta basilical con tres naves - cubiertes por bòvedes d'arista - siendo la central bastante más grande que les de los lladrales, y qu'atravesaes pol transeptu rematen en tres ábsides escalonaos. La fachada principal engalanada por un adríu que s'adelanta na nave central, per aciu tres arcaes de mediu puntu, remata en dos torres coles aguyes clavaes nel cielu. Embaxo la planta alcontramos la cripta tradicional asturiana talo qu'en San Salvador Uviéu, Sta. Mª Narancu o la Sta. Cruz de Cangues...
Entamó facese en 1877, con planos de Frasinelli, siendo obispu D. Benito Sanz y Forés y acabóse en 1901 con planos definitivos d'Apparici siendo obispu el llavianés (perdón, Tiñana) D. Ramón Martínez Vigil. Pero si esta ayalga ta en pie ye gracies  a la velea de Máximo de la Vega.

                                          *************************

La Campanona
A los moros nun-y gustaben les campanes.
- ¡Tolón, tolón!

     Al salir de la Basílica tiramos pel Paséu los Canónigos al otru cabu de la plaza, per onde entramos. Cerca de La Torre del Homenaxe y la Casa del Guarda, asitiada na fastera del monte, medio atapecida pola viesca, buscamos la famosa Campanona.
    - Bonos díes, señor axente, ¿podría indicame ónde s'alcuentra la famosa Campanona?
    - Delantre mesmo les sos narices - dizme la señora sorriendo al tiempu que me señala col índiz un cuetu na fastera del monte. ¡Ehí la tien!. Si quier pue xubir hasta allá per esi senderu.
    - Munches gracies - contesté mientres sacaba la canon pa disparar.
        La campanona, tres metros d'altor y 4000 kilos de pesu , ye un iconu de la biltante industria metalúrxica asturiana con Duro Felguera a la cabeza. Algamó'l primer premiu y la medalla d'honor na Esposición Internacional de París de 1901 con motivu de la permanente inauguración de la Tour Eiffel.

- ¡Dai, guaje; van enterase en París
quien ye l'amu del fierro!
(Semeya de Don Alfonso: lne)

     La CAMPANONA foi construyida nes instalaciones que la Compañía Metalúxica  Asturiana (1894) - comandada pol  conde italianu Sizzo-Noris  y Wenceslao Fdez - tenía en Llangréu, magar bien ceo foi absorbida por Duro(1902).  El ricu conde viniere invertir nel ferrocarril asturianu, qu'echaba andar per aquelles dómines, tan  necesariu pa tresportar el carbón al estranxero.

      La Compañía llangreana quería amosar al mundu'l so puxu na que cinca a la metalurxa y pa ello preséntase en París col encargu fechu al célebre Xaverino Sortini que fai de la CAMPANONA un poema en fierro: Talo la Divina Comedia - yera italianu - separa los relieves en dos estayes, una pagana con motivos de la Eneida y cristianos como los misterios del rosariu, efixes de Papes o escenes de Les Cruzaes.

                                                               **************

Hotel Pelayo

                  A la campanona nun xubiemos pero quedamos nel parquín a refrescar un poco d'aquel sol espachurrante. A tiru piedra tenemos el famosu
                   Hotel Pelayo, eduficáu en 1907 talo que la galería soterraña escavada na roca que comunica l'entornu l´hotel col Santuariu consta de cuatro plantes y foi mui remocicáu en 2005.  Hotel de luxu (Q=calidade), inauguráu pola Chata - Sabel de Borbón, fía de Sabel II - cuenta con 52 habitaciones con bañera y minibar que miren a la Basílica y/o a les montañes del entornu. El restaurante ofrez dende los plátos típicos hasta los más modernos y ye mui apropiáu pa reuniones, banquetes, bodes.... Por supuesto tien parquing y rede wifi. D'esto nun pudo esfrutar el Rei Alfonso XIII cuando venía a Cuadonga, onde tuvo delles veces.

El Calvariu

   EL CALVARIU
< Enfrente del Picu Priena
tres cuces veo clavaes.
  Tres cruces veo clavaes
 embaxo del Monte Auseva
por una Patria perdida 
en traidoro combate. 
La Deva tuvo que ser
la qu'entamó col rescate
per aciu la nueva Virxe
qu'agabitó nel embate. 
Quiero ver a la Santina
a da-y por ello les gracies >

      Como nun vamos quedar güei nel hotel siguimos ruta. Lo siguiente va ser el Santuariu. Lo normal, ficímoslo munches veces, ye venir per abaxo y xubir la escalerona pero  esta vegada va ser al revés. Pa comunicar la esplanada la basílica cola Cuevona féxose un túnel na roca a primeros del siglu XX. Pa evitar la escuridá, magar la illuminación artificial d'estilu románicu concebía por Pidal, abrióse en 1944 un lluceru, un boquete perampliu,  mirando a la Basílica y al Monte Priena, nomáu El Calvariu por mor de les tres cruces que lu protexen;  algo val y la vista ye perguapa. Tamién comunica cola antigua Colexata, primer edificiu llevantáu en Cuadonga y habitáu por monxos beneditinos encargaos del cultu'l Santuariu.

Tumba de don Pelayo.

       Nel tunel, separáu en tramos por arcos de mediu puntu,  hai dellos adornos colo envís d'engalanalu un poco como tres escudos en madera policromáo: Asturies, Cangues y Cruz de la Victoria.
     Nesi mesmu túnel tamién s'alcuéntrense les tumbres de Don Pelayo y la so muyer Gaudiosa que foron treslladaes d'Abamia. Tamién ta enterrada la so hermana Ermesinda y el maríu d'esta, don Alfonso I el Católicu delque dicen construyó la primer ilesia na Cueva ya un monesteriu beneditín. .

Y yá cerca del Templu del Milagru - milagrosa Batalla y milagroso que'l primer templu de madera que s'endamió na Cueva nun cayere - tan los sepulcros de Pelayo y Gaudiosa y Alfonso I ya Ermesinda. Don Pelayo y la muyer vinieren de Satolaya d'Abamia, el so primer descansu.

La Infanta Leonor faciendo los deberes.
Asina me gusta, Neña; que sías aplicada, ¡y llista!.
< Cuasi tolos reis que España tevo
tuvieren gran enfotu na Santina
por eso pido a Dios y t'encamiento
que vengas cada poco a la Tierrina,
serás una gran Reina, t' aseguro
que nun hai nada más grande n'esti mundu
que'l sofitu  y l'amor de la Santina.
Leonor,
 cuando'l pesu la Corona t'esmoleza
ven a dar una vuelta per Asturies
tu, llenarás la to alma de nobleza
y nós, brindaremos con unes botellines.
Que nun hai nada más grande, Princesina,
qu'una fía torne a casa daqué día.
Yá te veo en Cuandonga, mio Santina.>
(Semeya d'El Comerciu)

      Y tres xubir les escaleres del cielu aportamos al Santa Santorum, al Templu del Milagru, a la Cueva mítica de la Batalla, al nacimientu de la Deva, al entronizamientu de La Santina, a la << Maître-autel de l'Espagne >> , al << Altar Mayor >>, a Casa Mama. 
De pie, sobro un pedestal en piedra santificando l'ara, la Virxe, antes madre que reina, ofrez a los pelegrinos los sos dones: el so fíu - el nuesu hernanu - ya una rosa. Illuminando la escena dos lámpares d'estilu visigóticu, asemeyando la célebre corona de CHindasvinto. Esta imaxen de la Virxe nun ye la primixenia, aquella inmolóse en 1777 a la fin que'l mundu reparase nel Santuariu, seique tenía una ximielga qu'anguaño podemos comtemplar en Cillaperlata, cerca Trespaderne, nes Merindades de Burgos. L'imax actual foi donada a Cuadonga pol Cabildru catedraliciu d'Uviéu en 1778 ( a cambiu de La Cruz de la Victoria, que buenos son estos pa dar de papu).
      Ye una talla de madera col traxe talláu so la mesma de túnica azul con flores encarnaes y capa colorada pero, como Señora principal que ye, présta-y mudase de cuando en cuando y lluz davezu otres prendes donaes por dames d'alta cuna como los dos vistíos de seis capes de Sabel II; unu encarnáu con ramos d'oru ya otru de plata y oru que son los lleva nes grandes solemnidaes sustituyendo al tradicional del Cabildru fechu por un guarnicioneru d'Uviéu. En 1904 la Casa Real donó-y un mantón blancu que perteneciere a Mª de les Mercedes de Borbón, princesa d'Asturies. Munches coses se-y tienen donao a la Santa, pero munches coses se robaron... Y ye que hasta los más quinquis busquen l'abellugu la Santina.

L'Antependium, delantre, y  la Exedra, detrás,
abelluguen a la Santina.

      L'Ara lleva nel Antependium una representación n'oru y plata de la Batalla de Cuadonga presidía pola imax celestial de la Santina - col Neñu en cuello y los barazos abiertos a toos - abellugada por un coru d'Ánxeles. Pelayo, nel mediu, ponse moráu repartiendo mandobles.

      Guardando les espaldes la Santina, tres del tronu, la exedra, un frontón semicircular de madera qu'amuesa na parte baxa los reis de la monarquía asturiana y na superior una arcada peraltada con fustes sogueaos y capiteles decoraos que remata en simbólicos medallones de colores que me traen n'alcordanza a Santa María del Narancu. Bueno, nun tán tolos reis, falten los... ¿folgazanes?... ¿los poco comprometíos?... Aurelio, Silo, Mauregato y Bermudo nun salieron na foto y yo quiero condonalos, ¿por qué?...
     . Aurelio bastante tuvo con trepar colos siervos, nu  foi cosa dala traelos al riegu; cuando les Cróniques lo camienten ye que la cosa llegó a mayores. Amás ¿y si se llevaba bien con Vimarano?. Por si esto fuere poco tevo la ocurrencia de treslladar la corte a la mio tierra, ¿sentíase seguru nes Cuenques, habitaes por xente lleal ya afayaizo? ... Por esti detalle quedes perdonáu, Aurelio.

Per tierres del Rei Silo
San Esteban de Pravia

PER TIERRES DEL REI SILO

<Andaba Silo ablayáu
poles duldes d'Adosinda,
yera'l puntín que-y faltaba
pa colar na Monarquía.
    Un paséu pela playa
los Quebrantos y la Ría
y la novia queda en Pravia
namorada de por vida.
 Algamó Don Silo a Rei
ella, reina Asturies entovía>

     . Silo ta perdonáu dafechu. Casó con Adosinda pa qu'un día'l so sobrín fuere Rei, y consiguiólo (¡Y qué Rei, Alfonso'l Castu!). Silo nun yera guerreru, seique magnate, ¿y qué empresariu quier guerres? Namás los que faen perres coles armes, y nun yera'l casu. ¿Y si la má yera mora, como se camienta?... ¿Qué fiu-y declara la guerra a la madre? ... Pero hai una cosa pola que yo lu perdono sobremanera: El Diploma del Rei Silo, datáu en 775 - entá nun yera Rei - ye'l documentu más antiguu d'España y per aciu d'elli dona tierres a unos monxos pa llevantar un monesteriu en tarrén de la so propiedá, nes llendes d'Asturies con Llugo, ente los ríos Eo y Masma, ¿paezte que merez perdón? . Oi, pero hai más... Silo tevo que guerriar colos magnates gallegos que se-y xubieron a la chepa... Claro qu'en Montecupeiro púnxolos al oru, o al moru, como quieras. Vio como los vascos zurraben a los francos (Roncesvalles 778) y como Abderramán I s'engarriaba colos suyos... Y él a pasear a Adosinda per Pravia.
    - De momento a veles venir, Dosi; lluéu yá veremos.... 

Beatu de Llébana, el descubridor
del Apóstol Santiago como Patrón d'España.
(Semeya: Cantabria Total)

     . Mauregato, home maltratáu dafechu poles Cróniques "ocupó tiránicamente'l tronu d'Alfonso", "fíu de sierva mora", " que si pagaba'l tributu les 100 doncelles",... ¿Qué culpa tien él si so madre yera mora? Si'l rei Alfonso I la metió en casa - yá taba viudu - ye que sería bona, guapa y afayaiza, digo yo... Y el guaje igual tiró al padre que tamién algamó a rei per aciu d'un osu bien oportunu...
¿Pero tenía algo bueno'l Mauro?... El Beato, l'intelectual de la época, teníalu no más alto; dedicó-y un himnu, "O Dei verbum", que foi'l betseller de la dómina; nelli proclamaba a Santiago como < patrón d'España >, idea mui bien aprovechada, por cierto, más tarde pol Castu. Les Cróniques nun lu perdonaren, y a Beatu tampoco, pero yo sí; ye más, al de Llébana téngolu nun altar.

     . Bermudo, el fíu de Fruela Pérez, el cántabru, el presbíteru....
    - Pero carayu, lo mio ye la oración... ¿Qué faigo yo mazcaritáu  con estos trapos y con toa esta ferramienta enriba?...
    - Yá va siendo hora qu'espabiles, Mudo. Venga agarra la espada que los moros yá degolaron Salamanca...
      Y pasó lo que tenía que pasar... En 791 les tropes de Hixam I al mandu de Yusuf ibn Bujt metiéron-y escorribanda tala qu'esnaló pencima'l Burbia talo Mireia Belmonte en 400.
   - Buscáime al rapazacu esi, al fíu de Fruela; equí precísase ún gafientu... 
Queda perdonáu porque supo dimitir y poner al Rei afayaizu.

HISTORIA DE LA CUEVA

El grabáu más antiguu Cuadonga.
(Alcontréla nel Blog d'Acebedo)

        El Templu del Milagru, ta asitiáu na Cuevona. Nun tamos seguros si lu nomen asina pol milagru  de la Batalla o pol milagru que nun se viniere abaxo aquel endamiaxe madera qu'asemeyaba una ermita prerrománica asturiana escolingando na peña.
      Tres la Batalla Cuadonga Pelayo comprométese a llevantar una capiella na Cueva.  Fueron la so fía Ermesinda y el so xenru Alfonso I el Católicu los que edificaren la primer ilesia cristiana nel Santuariu y a ella lleveren la image de la Virxe que taba exiliada nel Monsacru. Doce obispos ya otros tantos abades ('madre!) presidieren l'actu (31-10-740).
    -  ¡La virxe nun pue tar sola! .- Y los reis llevanten un monesteriu al que donen tierres y varies ilesies del entornu embaxo'l control beneditín (7-11-741).
    - ¡ Suxetái al abade, que nos va tirar l'andamiaxe!.-  ¡Qué botes daba l'Arnulfo!
     -¡Rinnnnnnnggg! 
     - Aló, ¿qui est a l'apareille?...  ¡¡¡¡¿Qué ????... ¿Qué ye mentira???... ¿Qu'esos documentos son falsos ? ¿Que los de verdá nunca nun aprucieron?.... Mecagon la lleche.... Colo bien que me quedaba.... Pos el Padre Yepes diz que xunto la Cueva hebo un monesteriu benitu y qu'apaecieron sepulcros d'abades del XI?..
   - Yá....
   - ¿ Y Fernando III el santu (1232) y Alfonso X el sabiu (1308) nun confirmen privilexos de Cuadonga?
   - Eso sí, ho; eso ye historia. Tamién ta comprobao qu'en 1383, siendo Obispu Gutierre de Toledo, se ficieren cargu del cultu Cuadonga los agustinos, que vivíen na Riera. Nun paez qu'hubiere monesteriu na Peñona. 
    - ¿Quién te dixo eso?
   - Tirso d'Avilés. (¿1530?-1599). Cuenta qu'había un monesteriu na Riera  de lo más aprobetayo y que'l abá, el prior y los dos canónigos pasaben un fríu ... El casu ye que teníen xurisdición en tierres de la redolada y hasta en Llébana y Sahagún pero la mitá de lo que sacaben llevába-ylo'l Monesteriu de Villanueva de Cangues.
    - Normal...
    - Ambrosio de Morales visitó Cuadonga en 1572 por encargu de Felipe II  alcontrándolo amiseriao pero por más que xurgó nun alcontró documentos, que yera lo suyo, como bon historiador y periodista.  
    - ¿ Y con Felipe III?
    - L'abá tevo títulu de dignidá  pola ilesia d'Uviéu y con Felipe IV (1621-1640) fainse cargu del cultu canónigos secuales y ye cuando se constrúi'l Mesón p'agospiar los pelegrinos y los canónigos tornen otra vuelta vivir nunes casites que-ys ficieren en Cuadonga. 
   - O sía, que xente venía... La Santina taba nel coral d'España. 
   - Sí, Cuadonga siguía calteniendo la so importancia asina que l'obispu Caballero de Paredes (1642-1661) creó la plaza de Canónigu Penitenciariu y Fernando VI ( 1746-1759) la de Canónigu Penitencial. 
   - Nun te digo... Los sucesivos reis d'España teníen claro que-ylo debíen a la Santina. 
   - H.a, h.a, h.a... Contigo nun se pue, yes un acérrime.
    - Y el que nun lo vea un fatu. A ver, ¿qué me cuentes del XIX, qu'a min el reináu de Sabel II traime pela cai de la amarguria...
   - Yá sabes qu'esta muyer... 
   - ¡Xostrón!, ¿por qué nun dixisti reina?
   - Yá sabes qu'esta Reina ... tevo que llidiar cola Desamortización y daquella suprimieron delles colexates ....
   - Pero la de Cuadonga non, ¿ a que sí?
   -  Non, caltenía un abá, un maxistral, un doctoral, ocho canónigos, dos beneficiarios, un soxantre ...
   - ¿Un qué?
    - Un direutor de coru con ocho cantores; un organista, un maestru de ceremonies ya un capellán. 
   - ¡Ondia, vaya gastu!. en cualquier casu ... ¡ Viva la Reina!. 
   - Magar la to amiga l'abandonu Cuadonga yera un fechu hasta qu'en 1777... 
   - Sí, en 1777 la Santina inmólase por España, por tos nosotros... Íguase una foguera qu'acaba con too, hasta con ella mesma. La Cuna d'España nun podía siguir nesi desamparu. 
   - ¡Qué burru yes!. Hebo un incendiu porque yera too madera...
    - Sí, ho; ¿y tolo que se robó?. Col incendiu esapaecieren  coses de munchu valir como los cálices de Felipe II o'l veril de Felipe IV.  Foi arreimente.
    - Asina que quedamos ensin conocer la verdadera imax de la Santina...
    - Sí y non....
    - Acláriate.
    - Yera conocío qu'había una "copia" nes Merindades de Burgos, una semeya calcadina: la Virxe de Cillapertata; lluéu te lo cuento....
    - El casu ye qu'arriendes d'ello movilizó tol mundu: l'abá Campumanes, los cabildros  d'Uviéu y Cuadonga, la Xunta d'El Principáu, los ayuntamientos, la Real Congregación de Madrid y hasta'l mesmu Carlos III, que toma cartes nel asuntu per aciu d'un ministru asturianu, el conde de Campumanes.
    - ¿Nun lo prepararíen ente los dos Campumanes?.
    - H.a, h.a, h.a... De vivir tu daquella echábente la culpa a ti, de xuru. El Rei encargó a Ventura Rodríguez un proyeutu a lo grande...
    - ¿Ves?,¡ taba preparao!
    - Carlos III, el constructor, morrió cuando Ventura andaba colos cimientos, namás tenía fechu'l Pozón. 
     - Menos mal, porque creo qu'aquello yera un ecce homo...
     - Sí, bueno, yera una cosa barroca, grandiosa, pero que nun diba col entornu. L'ctual paez más acordies colos tiempos. 
    - ¿Ye verdá que Xovellanos tevo equí? 
   - ¿Ónde nun tuvu l'insigne?. Foi en 1795   y vino tamién pel Camín de la Reina seique daquella nun tenía entá esi nome.
    - Claro, y agospió nel Palaciu Cortés de Cangues; qué empaná traigo...

Cuadonga ¿de Frasinelli?
(Semeya: Bartolomé Maura Montaner)

    - Enantes de la visita Real, en 1820, fízose otru voladizu de madera y cambióse la imax de la Virxe. En 1884,recién entamada la "Década Moderada (1844-1854) de la nuesa Reina dióse-y una distinción canónica a Cuadonga, otra de Pío IX en 1849 y la confirmación como colexata en 1951, cuando Narváez yera'l manda más. 
    - Tamos acercándonos a mediaos del XIX.... 
    - En 1857 visiten el Santuariu los duques de Montpensier, el fíu del rei de Francia y Luisa Fernanda, la hermana de Sabel II. Foi un impautu brutal porque esi duque revolvín tenía ganes de facese col tronu d'España. 
    - Foron los que-y regalaren ...
   - Delles coses ente les que destacaba un veril. Lluéu en Repelao llevantaron un obeliscu a Pelayo, qu'entá  se pue ver. 
    - Pero lo gordo vino al añu siguiente. Nel branu del 58 tuvieren en Cuadonga la Reina, el rei y los infantes con tola corte celestial pa encumar al Principe d'Asturies, el futuru Alfonso XII y de pasu anubrir la visita de la hermana. ("¡Quién pensará esa fata que ye!"). 
    - Pero la cosa cambió poco...

Don Benito Sanz y Forés
¡Que t'afayes, gallu!

    - Nada, tuvo que venir un obispu foriatu pa Uviéu, el valencianu Don Benito Sanz y Forés (1868-1881) pa qu'esto tomare otru carís. Esti santu emprendedor cuando llegó a Cuadonga, a caballu,  quedó ablucáu:
   - Y ésto ye Cuadonga... - Nun lo pensó dos veces y púnxose manes a la obra. Pidió perres a Marisantísima:Obispáu, gobiernu, Cabildu y hasta'l patrimoniu familiar amás de les llimosnes del cepu; too yera poco pero echó aquello a andar. Fizo una capiella de campu pa ceñebrar el día la Santina, ameyoró'l Santuariu, renovó la Escalera de les Promeses ya iguó'l teyau de la  Ilesia la Colexata, fizo cases pa los canónigos ya una hospedería y... planificó la Basílica nel Cuetu: ¡Un plan integral!
    - ¿Y les perres, manín?
    - "Dios proveerá", dicía siempre. Y terminó acudiendo a la xente de fe.
          Enantes faló con Frasinelli (alemán) pa que-y ficiere un proyeutu ya un arquiteutu pa que-y ficiere los planos: Lucas Palacio. Pero tres prender la mecha'l propio rei Alfonso  XII en 1877 y él mesmu colocar la primer piedra, dos meses depués treslládenlu a Valladolid.
    - ¡H.oite, manín!, agora qu'atopamos lo llevábemos sieglos buscando .... 
    - El siguiente obispu nun sabía trabayar sin perres y tevo que llegar ún obispu de Llaviana pa echalo alantre: Flai Ramón Martínez Vigil, ñacíu en Tiñana pero ceo foi vivir a Llaviana hasta que coló pal seminariu d'Uviéu.

Don Ramón Martínez Vigil,
criáu en Llaviana, terminó
la Basílica Cuadonga.

    - ¿Y qué sofitos tuvo?
    - El del canónigu de cuadonga don Maximino de la Vega, otru apasionáu como ellos. 
    - ¿Cuando s'acabó?
   - Consagróse'l 7 de Setiembre de 1901 - 24 años depués - yá con planos d'Aparici (italianu) y como dixo Alfonso XIII: <Vamos facer daqué único nel mundu, amestar l' Arte y la Naturaleza a la Relixón y la Hestoria>. 
   - ¿Y qué paso cuando la Guerra'l 36?
   - Foi habilitao como hospital de campaña - hoteles Pelayo y Favila - durante un añu. Pero la Virxe nun foi capaz aguantar una pelea ente hermanos, y esmucióse. Bueno, al acabar la guerra tornó del exiliu francés, tevo agospiada na embaxada.
    - Oi, ¿y Menéndez Pidal nun metió'l cazu per equí?
    - Faltaría, ho;si nun lu dexen facer nada muerre de la pena. Camudó la capiella d'escayola y madera del Santuariu por otra de piedra d'estilu románicu. Pero atiendi, Pidal tamién iguó la Colexata.
    - Agora yá quedo tranquilu, tando isti paisanu pel mediu..... Ta lluéu, gallu. ¡Ah!, ¿ónde ta la semeya de don Ramón?. Teo pidí-y un favor: 
    Don Ramón, agora que nun mos siente naide: Lléame Vd. a Clarín con munchu procuru; por mui cultu, intelixente y trabayador que sía nunca nun ta demás conocer lo que piensen los demás, dalgo aprenderá, y sobre tou d'un escritor tan críticu como'l creador de Vetusta. Ye la pata que-y falta a la so tayuela. Díz-ylo de bon aquel, un vecín. (Chísco-y un güeyu). 
               
                                    **************************

El Pozón, La Cola de Caballu, la Escalera les Promeses,
La Fonte los Deseyos, el Templu del Milagru, La Santina:
CU.A.DON.GA

         Echamos una güeyada al entornu al traviés de la boca de la Cueva pa ver lo que ve la Santina y salimos del Templu del Milagru per aciu d'una escalerina que nos va embocar n'otra mui famosa:
      La Escalera les Promeses, que yá mandare facer Carlos III (¡qué tio!) tres l' incendiu de 1777. Son 107 peldaños bien pindios que nun sé si prefiero xubilos o baxalos, en cualisquier casu voi agarrándome a la barandilla fierro sacante cuando m'aparo a facer semeyes. En cualquier casu hai xente que les xube de rodiyes, por alguna promesa (gorda tien que ser) por eso se la conoz con esi nome.
          En tiempos de Pelayo nun esistía nada parecido, nin tampoco taba'l Pozón fechu por Ventura Rguez por encargu de Carlos III.  P'algamar a la Cueva había que facelo per un senderu a mandrecha continuación de lo qu'anguaño llamamos Camín del Principe y pasaría per onde La Colexata, que tampoco taba daquella, nidio.

- Quieta, nun te muevas, COLEXATA,
que si vien el Rei Alfonso
cuido qu'igual nos mata. 

        La Colexata de San Fernando ye'l primer edificiu del entornu del que tenemos conocencia. Tien planta rectangular distribuyía alredor d'un patiu ya una torre cuadrada nuna esquina, siendo la bóveda de crucería.
 ¿Foi'l cenobiu  beneditín que llevantó Alfonso I el Católicu'l precursor de la Colexata?... Ye lo que camienta'l Padre Yepes per aciu la Crónica de San Benito pero nun queda constancia documental d'ello, seique nunca esistió. Nel XIV esos flaires yá son agustinos pero debíen vivir na Riera, como camienta Tirso d'Avilés.
El casu ye que los sepulcros de los abaes del XI, la torre cúbica, el coru y dellos detallucos arquiteutónicos dan a entender que'l edificiu que se construyó nel XVI, siendo obispu d'Uviéu don Diego Aponte de Quiñones (1585-1599), foi llevantáu sobro otru ya esistente.
Pero Cuadonga ye un sitiu pa sustos y en 1868 (añu aciagu pa la Reina Sabel)* despréndese un peñón del Monte Orandi y nun tien onde cayer más qu'enriba la Colexata:
    - ¡Adiós capiella San Fernando!
Menos mal que'l Obispu yera daquella l'emprededor Sanz y Forés y ensiguida iguó'l techu pa que la cosa nun fuere a más. Mala suerte tien Don Benito metíu hasta les tranques col plan integral de Cuadonga.
    - ¿Y agorá qué, Don Benito, d'ónde sacamos les perres?
    - "Dios aprovirá, ho, Dios aprovirá".- repostiaba siempre'l valencianu. Sí, aproveció-yos enforma a los amantes de Cuadonga, un cuartu de sieglu (1877-1901) y lo que te rondaré, morena... Pero terminó apurriéndo-yos una Basílica monumental ya un nuevuTemplu del Milagru bien consistente.
      El que la remocicó dafechu foi... el de siempres... Don Ramón. Menéndez Pidal dexa la Ilesia y el restu la Colexata como un pincel y amás adosa-y otru edificiu conocíu como La Casa de Exercicios Espirituales xunciédodolos per aciu d'una antoxana. D'esta época ye tamién la Hospedería que ta enfrente d'elles. Ye bien bultable'l célebre Claustru la Colexata.

Caminando en santa inocencia pel Camín del Príncipe.

        Tornamos de la Colexata y almiramos otra vuelta la Cuevona engalanada pola cola caballu y orniada nos lladrales pola Escalera les Promeses ( o Escalera del Perdón) y la Fonte los Deseyos (Fonte del Matrimoniu), dambes trasegaes por multitú de fervientes pelegrinos. Baxamos pela carretera y pasamos per delantre la Sidrería Restaurante Cuadonga, cerca La Panera del Molín, onde tomamos el vermú. Un poco más abaxo tán el restaurante Hospedería el Pelegrín y el Rincón de don Pelayo, onde tenemos tomao daqué alguna qu'otra vez.
     Enantes d'agarrar l'autobús pa dir celebralo a La Palmera entramos per un caminín perprestosu na viesca qu'arrodia l'entornu, lo que se conoz como'l Xardín del Príncipe: arbolíu, agua, pequeñes pontes ... Sinfonía de colores, orquesta polifónica de páxaros cantores, ruxerrux d'agües bendites: harmonía, dicía padre momentos antes de dexanos; armonía na familia, armonía na vida, harmonía ye lo que se respira en Cuadonga.

Casa Priena, l'antoxana la Cuevona,
onde Pelayo tramaba
La Batalla cuadonga.

      Entramos nel Parque'l Principe per aciu una escalerina que t'emboca nun puentín de madera. A mandrecha quèdanos la casa S. Pedro Poveda, institución de les Teresianes. Tamos embobaos...
     - Mira, l'Antiguu Mesón; lo que foi la Casa Pelegrinos y tamién Escolanía.
    - Ye del tiempu Felipe IV (1621 - 1640), asina como unes cases pa canónigos, que dexen les cases de La Riera pa tornar equí. (Firmaría un día que taba contentu nel teatru la Calderona).
Y siguimos caleyando per aquel caminín de fueya y pontes de madera qu'engalanen el ríu Reinazu hasta qu'empatamos cola carretera xeneral onde nos reciben un par de cases precioses dedicaes al turismu rural: Casa Priena y Casa Asprón asitiaes mesmamente enfrente'l Parking de valdre.
Si sigues pel camín, al par de la carretera llegues al Repelao, onde dicen que los asture elixeron rei a Pelayo yaonde los Duques de Montpensier asitiaron un obeliscu.  Tamos nuna llana onde antaño taba asitiada la Estación del tren que llegaba hasta Les Arriondes.

La Estación del Repelao
 Cuadonga- Les Arriondes
(Semeya: Wikipedia)

      [ El tranvía de <Cuadonga - Les Arrionedes>, tuvo 25 años de vida (1903-1928) y sirvió, amás de tresportar pasaxeros, pa llevar el mineral de manganeso y fierro de Buferrera (Los LLagos)  hasta Les Arriondes, onde empalmaba hasta Ribesella y d'ehí en barcu a Inglaterra. En 1908 llegó a tresportar 101.107 pasaxeros y en en 1910 hasta 60.000  tm. de mineral.
Percorría 17 km y tenía estaciones na Riera, Sotu Cangues y Cangues. 
 El coste total de la obra xubió a 968.000 pesetes (barato porque diba pela carreretra pública) aportanto Económicos 600.000 ptes y 300.000 fueren emitíes n'obligaciones públiques.
Curiosidaes:
     El billete nunca nun xubió de preciu nos 25 años que furruló, pero yera caru: 2,35 ricos (23 €) y 1,23 (12 €) probes. en comparanza.
     Utilizó tres máquines de vapor tipu Borsig, 4 vagons de 1ª y 6 de 2ª, de colores estremaos: roxu y verde pa que los payos nun nos equivocáremos.
     Magar la locomotora podía alcanzar los 40 km/h nunca nun pasó de los 20 km/h ( la escorripanda d'Alkama diba más aprisa. La Campurra del mio pueblu nun pasaba de 8 km/h pero'l Mc Laren d'Alonso tampoco nos alcanza).
    Cuendo'l carbón escosó hebo que pesllar porque'l tresporte material ye lo que daba perres (140.000 ptes en 1905, más del doble que los viaxeros).
    Los piragüistes del Seya coincidíen cola locomotora siendo el Descensu del 6 d'Agostu de 1932 la cabera vez que se saludaren. Agora lleva los políticos que nun quieren manchar la corbata y algún  qu'otru manguán.]


ANEXU: La Santina de Cillaperlata.

La  SANTINA 
<La Virxe de Cuadonga>, en Cillaperlata .
 Trespaderne - Merindá de Cuesta-Urria - Burgos

       Cuando en 1777 se produz l'incendiu del Templu del Milagru quedáremos ensin imax hasta que'l Cabildru d'Uviéu aportó otra a cambiu de la Cruz de Pelayo. Pero.... La virxe sabía lo que facía, tenía una semeya que fuere llevada a Les Merindaes, en concreto a Cillaperlata, cerca de Trespaderne.
       Al enteranos d'esto salimos disparaos - bueno, esperamos les vacaciones - pa Burgos. Tolos años vamos a pasar unos díes nes Merindaes: Villarcayo, Medina de Pomar, Espinosa los Monteros, Frías, Oña... (estes histories yá vos cuntaré otru día) pero esti veranu fuimos a Cillaperlata.

Cillaperlata. Tuvi a puntu de coyer esti pueblín y
trayelu p'Asturies. Nun me dexó la parienta:
- Si lu llevamos quedamos ensin farda 
pa venir a Les Merindaes. Baxa la grúa.

Salimos de palaciu - tábemos agospiaos nel Hotel Torre-Palaciu los Alvarado, a once km d'Espinosa de los Monteros -  camín de Trespaderne pa lluéu buscar Cillaperlata enantes de llegar a Oña. Paramos en Medina de Pomar pa visitar el Castiellu y facer dalgunes compres dao que namás hai 31 km dende "casa" (dormíamos na suit del conde, menudo polvo). De Trespaderne a Cillaperlata hai 4 km escasos por BU-530. Entramos nel pueblu per aciu una ponte perantigua sobro'l Ríu Ebro qu'en realidá ye la presa d'un central llétrica.

La nuestra Señora de Cuadonga
ta abellugada en Cillaperlata.
Señores, mientres Claudio cuire d'Ella
cuido ye la más segura d'España.

    - Pasái tranquilos, mozos; toos lo facemos; otramiente hai que dar muncha vuelta...
Cillaperlata ta asitiada nun cuetu, tien les cais estreches y les cases tán apegaes unes ya individuales otres, pero siempre cerca.
    - ¿La ilesia del Pueblu tará abierta?
    - Tenéisla ellí, al fondu. Na ventana ta'l teléfonu de Claudio, él acude siempre gustosu.
       Claudio aportó nunos minutos, ye como si tuviere esperando. Siempre ta esperando cuntar la historia de la ilesia y de la Santina. Mientres llegaba fisgamos pelos cristales y vimos una virxe col neñu na antoxana la capiella:
            - Mira, la Santina. Tiénenla a la vista de tol mundu.

Cillaperlata: Ilesia Santa María (agospia la Santina)
y Fonte de Cuadonga, inmigrante (¿Cabeces de Picu?)

          Claudio ye un paisanu d'unos setenta, afable y servicial. Nun tardó cinco miunutos en aportar con una sorrisa d'oreya a oreya; taba feliz de la vida porque diba face-y un serviciu a la Virxe, a la so Virxe, a la Santina y de pasu a la comunidá pos ye una forma de tener a Cillaperlata nel mapa. Claro qu'entá tienen más... Yá veremos.
    - La verdadera Virxe de Cuadonga ye esta que ta nel altar, la de fuera ye una semeya. ¿Cómo díbemos tenela nel estragal, ho, sola y pasando fríu. ¡De manera alguna!.
    - Aseméyense pero al empar son bien diferentes.
    -  Esta Virxe estrémase bien de la que tenéis en Cuadonga. Dambes lleven corona, seique diferentes, y dambes tán con el Neñu pero esta tien una cara más amplia y escamplada, talo que Chusín; la vuestra tien la cara más ovalada. La rosa na mano diestra tamién ye común. Y si vos decatáis la vuestra ta de pie mientres la nuesa remanez sentada.
     - Claro, ye más vieya y cansa más.
     - ¡H.a, h.a, h.a! . Bueno, nosotros tamién tenemos dalgunes reliquies como una espina de la cruz de Cristu o un güesu del barazu d'un santu.

Eremitoriu en Cillaperlata,
sobro les agües d'El Ebro.
Tamién s'emplegó como Sala de Conceyos y cuadra.

     - Claudio,  ruxe per círculos burgaleses que la Batalla Cuadonga igual tevo llugar n'esta zona...
     - Ye qu'hai delles coincidencies: La batalla ocurrió cerca d'un cueva que cai sobro un ríu, ¿non?. Pos ehí mesmo detrás tenéis una cuevona, un ermitoriu que cai sobro'l Ríu Ebru, depués vais a vela. Y la Virxe de Cuadonga qu'agabitó na batalla veisla delantre vuestro. Tenéi en cuenta qu'Alfonso yera fíu de Pedro, Duque de Cantabria, y la Bardulia pertenecía al ducáu.
    - Vamos, qu'Alfonso conocía esto como la palma la mano...
     - Yá toi arranáu por vela. Y esto que-y digo, ¿ a qué pue debese la coincidencia de los nomes de la Virxe?
     - Yá sabéis, ye lo que cuenten les lleendes, que'l Rei Alfonso I, el xenru Pelayo casáu con Ermesinda, llevantó un monesteriu mistu (pero ensin ayuntamientos, ¿eh?) en Cuadonga y resulta qu'equí mesmo, nes afueres de Cillaperlata, tamién había - queden los restos - otru monesteriu beneditín onde cuiden que la propia Ermesinda tevo profesando...
    - ¡Esto ye mui gordo! ¿Podemos ver los restos?

Ruines del Monestriu de San Xuan de la Foz.
Cillaperlata d'Arriba. 

    - Claro, llévovos yo depués de venir del mélicu. Andamos los del pueblu faciendo llimpieza pa que nun se desanicie del too. El Monesteriu de San Xuan de la Foz - San Juan de la Hoz, dicen ellos -  tien oríxenes prerrománicos, visigóticos dicen algunos espertos, del VII. Ta adosaú a un roqueru no que fue'l Barriu d'Arriba del pueblu, anguaño esaniciáu.
    - Asina que del VII...¿ Y qué pasó con él?
    - Bueno, la mayor parte ye románico algamando'l so rellumu nel XII. Más tarde les monxes pasaron a vivir nel Monesteriu d'Oña, que foi llevantáu por Sancho García, conde de Castiella.
     - ¿Nun sería'l el pá de Tigridia?
     - La mesma, la guaja quería ser monxa y refugó'l matrimoniu....
     - Que ye la representación que fain n'Oña tolos años los propios vecinos...
     - ¿Conocéislo?
     - L'añu pasáu fuimos velo, ¡es-pec-ta-cu-lar!. Bueno, nun mos enrollemos, tábemos cola Santina...
¿Asina que Cillaperlata y Cuadonga teníen un intercambiu cultural?
    - Si quies llamalo ansí... Lo que ta claro ye que cuando se talló esta virxe féxose otra igual pa Cuadonga, o al revés, el casu ye qu'había dos ximielgues.
    - Y tres del incendiu de 1777 cómo nun se sacaría otra igual por esta...
    - Covadonga pidióla pero nun-y la dieren, ¡ye nuesa!. Sí que vos la dexamos va poco pa una esposición; eso sí, tuvisteis que paganos la restauración.

La Virxe Prieta d'Encinillas
(Vecina de la Santina en Cillaperlata)

    - Bien fecho, cazurrinos. Oi, Claudio, ¿yá esta otra virxe que tenéis equí?. Nun paez la Santina...
    - Non, ho; esta ya la Virxe de la Encinilla. ¿Qué ye, nunca nun sentísteis falar d'ella?
    - Quier soname, ¿tien algo que ver con una  batalla nun día mui prietu? ...
    - ¡H.a,h.a,h.a!.  Un día prietu... ¡H.a,h.a!.. La Batalla del Negro día, sí.
    - Qué interesante... Cunta, cunta...

    - Ello yera la dómina de don Pelayo cuando en Damasco mandaba Hixam y n'Alandalus gobernaba.... Bueno, en 726 nun se sabe mui  bien quien yera'l cabezaleru porque hasta tres walís hebo esi mesmu añu (Anbasa b.S. Al Kalbi, Udrha Al Fhiri, Yayha ben Salama A. Kalbi). Y entamamos a falar de lo que pudo asoceder... Son munches les histories que se cuenten, en Cillaperlata tienen la suya.... o les suyes, porque son delles les versiones qu'alcontramos al rodíu

                                             Entamu d' El CRONICÓN  d'Oña.

   < La Batalla del Prietu Día > pero en xeneral toes coinciden:
  1. La batalla ocurrió en tiempos de don Pelayo que tevo agabitáu por Pedro, duque de Cantabria (el pá d'Alfonso I, darréu xenru de Pelayo).
    2. La refriega tevo llugar xunto a la viesca d'Encinilles, onde se llevantó más tarde una ermita, que podemos contemplar anguaño sicasí nos prestaría la remocicasen ensiguida. La lleeenda cuenta qu' l propiu duque Pedro ta equí sapozáu.
     3. Sapozaos equí hai munchos pos aprucieron más de quinientes tumbes pela rodiada. Diz el beneditín G. d'Argáiz nel XVII que más de 8000 moros quedaren embaxo la solombra les alcines... Yá se sabe que cuando falamos de moros too se desaxera un pelín...
     4. A tiru flecha, en Cillaperlata, alcontramos la imax de la Virxe de Cuadonga anguaño abellugada na Ilesia Nuestra Señora y quién sabe si antaño na Cueva-Eremitoriu qu'hai xusto tres d'esa mesma ilesia. Por cierto, la cueva ta bañada, protexida más bien, pol caudalosu ríu Ebru, bien cerca onde emboquen los ríos Nela, Oca y Jerea.  La Cuevona asturiana ta protexida por tres riegues: La Deva (Onna), el Reinazu y la Guxana que conflúin toos a los pies de la Basílica formando'l ¿Ríu Cuadonga?.

La lleenda...

Ermita na viesca d'Encinillas
Onde se llibró la Batalla del Negru Día.
(Semeya: Burgospedia)

    Cuenta'l fantásticu padre Argáiz que nel añu 726 ( d'esto nun ta mui seguru; vamos, que si arima un poco más péga-y al 722, el mui h.odíu) Pelayo quitáre-yos Lleón a los caldeos, mandaos por un tal Mohamed dexando de tenente nel puestu a un tal Fermosillo. Crecíu Pelayo tiró hacia Llébana a la cata de moros pero al nun alcontrar dalqún tornó dica Les Merindaes y nun campu al lláu de Trespaderne, onde se mecen les agües del Ebro y del Nela, alcontró los que buscaba, ¡moros! abellugaos embaxo les montañes de Tedeja*, no que da al Valle de Tobalina que llenda colos Montes Obarenes. Pero Pelayo taba allegáu a dios, o meyor, a la Virxe, y anque de mano quedare sosprendíu terminó por imponese; claro que pa ello.... Tevo que rogar a la Virxe - ¿la de Cuadonga, la d'Encinilles o ...sedrá la mesma? que-y estirare'l día un poco más seique atapecía y quería rematar lo que taba ganando. Si dalguién nesti mundu tien empatía cola Virxe esi ye Pelayo. Más d'ocho mil (¡puf!) colaren Ebru abaxo; los cristianos quedaren enterraos, cristianamente, nel campu de batalla onde se llevantó una Ermita.

Trespaderne dende'l Castiellu de Tedeja.

        Pa más enchipe de los cillaperlatos bien cerca d'equí, al entamu'l Valle l'Horadada hai otra ilesia nomada Nuestra Señora de Regodos (reis godos) onde dicen tar enterraos dalgunos reis godos (como en Cuadonga) o cuando menos notables... El casu ye que la bóveda la capiella ta fecha con piedra de toba (Tobalina ta cerca), talo que Santa María del Naranco, ¿copió Ramiro I, el Vara de la Xusticia?.
     Sía como fuere Cillaperlata y Cuadonga tienen munches coses en común  ¿nun deberíemos tar harmanaos?

*[Dicen que'l de Tedeja foi'l primer castiellu que se llevantó per aciu la Repoblación entamada polos reis del Reinu d'Asturies. Nós xubimos al castiellu - Pelayo nun lu tenía entá - asitiáu estratéxicamente pa controlar el pasu a la meseta burgalesa. Control y vistes espectaculares. Si enantes de xubir lleéis el llibru: "El caballero del jabalí blanco", de J.J. Esparza, va prestavos más. Y siguirèis con otros llibros del citáu autor...]. 

                                             ********************
       Y nós tenemos la nuesa versión.....

Don Pelayo
  proclamaú rei en 718
nel campu del Repelao.
(F. Madrazo)

       El casu ye que'l walí cordobés, Anbasa, taba hasta les ñaples de los rebecos del Norte que'arriendes de refugar el  pagu los impuestos tienen l'atrevencia d'atacar de cotino los destacamentos y puestos de control árabes, bereberes, más bien:
   - Alkama, vas dime hasta'l norte y dar una somanta buena a esos asnos astures, nun aguanto más les quexes de Munuza... Que  nun pue pa con ellos, que nun pue pa con ellos... Qu'esi Belaí - Pelayo pa  ellos - conoz perbién el tarrén y nun son a prindalu. Vas echa-y un gabitu.
    - ¿Pero esi Pelayu nun ye'l chuleta aquel que tevo de rehén equí va unos años?
    - Pos sí, el mesmu, pero coló y magar tuvimos a puntu de prindalu en Brece  esmuciósenos pel Piloña. Darréu armó un pequeñu exércitu con nativos, rumís y dellos godos fugaos que tán desarmando la bolera qu'emprentamos. Munuza anda esmolecíu porque tien miéu que la cosa vaya más. ¡Ah!, al pasar per Toledo díces-y al Gobernador que te preste al Obispu Oppas, entá caltién muncha mano ente los cristianos y pue venite bien pa tratar col rebecu esi.

La Batalla'l Guadalete (711)
(Semella: Arre caballo!)

          Si facemos casu a les cróniques Pelayo yera un noble godu  que fuxó del sur tres la Batalla Guadalete (711) y terminó agospiando n'Asturies, onde pue que ñaciere. Convién facer alcordanza que so padre, Favila, yera dux de la Gallecia ( y Asturies) en tiempos de Witiza col que tevo un altercáu por mor d'una muyer y terminó perdiendo la vida. Pelayo, espatariu del rei godu xuró-yla de por vida y tres colar de la capital, Toledo, arimó al bandu de Rodrigo. Cuando esti algamó a rei (tres la muerte, natural, de Witiza) Pelayo quedó como espatariu (fidelis) de so.
     ¿Qué fizo Pelayo tres la batalla?. ¿Llevó al rei firíu hasta Viceo, onde lu enterró, y siguió darréu camín del norte al dir viendo lo que pasaba? ¿O tiró dafechu pal norte onde tenía familia y facienda?.
    Tariq siguió a lo suyo. Al ver lo poco que-y costaba dir conquistando tarrén: Medina Sidónia, Carmona, Sevilla, Ëcija... Va dexando comandos al frente de les ciudades dirixíes por xudíos que vieron el cielu abiertu pa llibrar del xugu godu. En cualquier casu  nun pue colar pa Toledo (¡la capital del tesoru!) dexando les espaldes abiertes. Entós toma un determín y divide l'exércitu: Mugait al Rumí pa Córdoba que cae en 712, otru pa Sevilla, pa Elvira (Granada) ya otru pa Rayya (Málaga). Tariq encamina pa Toledo onde entra de vacaciones el 11-11-711, Samartín.

Les campañes árabes na Península Ibérica (711 - 732)
(Semeya: Arre caballo!)

    - ¡Esto ye Holywood! .
      Y desoyendo les instrucciones de Muza sigui norte arriba (712): Tiermes, Osma, Clunia, Sasamón, Amaya *, y pola Vía Aquitana traviesa los Campos Góticos (Carrión C.), Sahagún, Lancia, Lleón y ¡Astorga!. Ye de suponer que dexa un bon destacamentu al mandu de Munuza pa que controle'l ducáu de Cantabria y ¡Asturies!.

* [Amaya ye la capital del ducáu de Cantabria, onde manda don Pedro colos sos fíos Alfonso y Fruela Pérez.]

      Muza, mentanto, ta que trina; ye'l xefe y va quedar ensin gloria y ¡ensin tesoru!. En 712 desembarca con un exércitu pistonudu n'Alcalá del Ríu (Cádiz) y va camín de Huelva afianzando'l tarrén pel que pasa. Darréu tira pa la capital de la Emeritense y tres d'un añu llargu d'asediu entra en Mérida al entamu la seronda del 713.

Muza ta que trina,
y pon a Tariq al cayer d'un burru 
(Semeya: Arre caballo!).

    - Yá ye hora de poner a pan pidir al nefandu Tariq, esi llibertu desagradecíu.
    Tienen un alcuentru en Tolosa,  cerca la capital - Toledo - onde Muza lu pon verde pero... sabe que ye un bon xeneral y fai de tripes corazón. Xuntos van per la Complutum (Alcalá d'Henares), tomen Guadalaxara y lleguen a Zaragoza.
    - Vamos separanos, Tariq: Tu tires pa Tarragona  y yo voi camín de Gallecia.
        Tariq toma Huesca, Barbastro y Lleida enantes d'arribar a Tarraco. Mentanto Muza pauta colos Banu Casí nel Ebru y pela Vía Aquitana llega hasta Lleón tres dar una barrida per Amaya (¡otra!) y darréu tirar hasta Xixón, pasando per Lucus Asturum (Llanera), onde s'establez Munuza. Torna otra vuelta y va hasta Astorga y d'ehí a Llugo (Lucus Augustum).
 Tamos yá en 714 y el xenru de Muawiya tien que rindir cuentes en Damasco, talo que Tariq. N'Hispania queda de caporal Abd al-Aziz, fíu de Muza. Más-y valía nun lu dexar solu; al casar el rapaz con Egilona, la vilba de Rodrigo, Muza acaba perdiendo énte'l califa Suleymán el pocu créitu que-y quedaba y terminó de mala manera: 
     - ¡Ai, Alá, colo que yo fici pol Islam!

Llugar de la Batalla Cuadonga.
(Semeya: elrincóndelahistoria)

      Munuza llogra un alcuerdu colos astures pa pagar unos tributos, ye bastante, esto ye un tarrén perdifícil, mientres paguen... ¿Cómo sabemos que hai pautu?... Porque Pelayo y otros cabezaleros van como garantes a Córdoba (los omeyes queríen combayar con ellos pa que s'avinieren pola de buenes) y amás porque na Crónica Rotense l'obispu Oppas fai alcordanza d'ello delantre la Cuevona:
    - Pelayo, escucha'l mio conseyu y torna al alcuerdu*, ganarás muncho con ello. - Pero Pelayo da-y un corte de manga y refuga la sumisión. Batalla y a reza-y a la Santina.

*Munuza y Pelayo (o los pueblos d'Asturies) teníen un  apañu:
    - Pagáis unos tributos y siguís colo vuestro, ¿val?. Voi mandar unos cuantos de vosotros de vacaciones a Sevilla, como garantía l'álcuerdu, ho. Yá veréis cómo vivimos los árabes.
    - (Vamos p'allá, collacios, pa derrotar a enemigu hai que conocelu). - Esto'l moru nun l'oyó.

       Pelayo debió tar poco tiempu na capital omeya ¿717?...  Cuando vio'l baturiciu qu´había ellí coló p'Asturies y entamó cola revuelta. En 718 yá yera'l cabezaleru la Resistencia y foi elexíu princeps en conceyu astur y seguramente polos godos tamién, pero ye nidio que foi aceutáu por tol mundu, hasta polos árabes, como se ve poles sos cróniques, y por eso Munuza quería casar cola hermana.  De 718 a 722 tuvo enantando les sos güestes y  aperrillando enriba los moros hasta qu'a  Munuza se-y llenó'l calderu y pidió ayuda a Córdoba. El visir Anbasa unvió un exércitu al mandu d'Alkama p'agabitar al gobernador (valí) del norte, Munuza.  El desenllaz foi Cuadonga y l'epílogu n'Olalíes: los sarracenos praúticamente esaniciaron del mapa del Reinu d'Asturies.

                                            ***********
     Pasamos la mañana en Cillaperlata al abellugu la verdadera Virxe de Cuadonga. Vimos l'eremitoriu, el cementeriu rupestre y los restos del Monesteriu.... Rematamos nel Restaurante José Luis, como nun podía ser d'otra manera. Nunca nun comí carne churruscao como aquello... Y too por mor de la Santina.

    [La primer noticia escrita sobro'l  Monasteriu de San Juan de la Hoz data del añu 790 por mor d'una donación; reinaba n'Asturies - Bardulia tamién - Bermudo I, sobrín d'Alfonso I. 
     En 967 profesa la noble  Eldoara apurriendo al conventu bienes bayurosos. Nel XI ye cuando les monxes pasen a Oña siendo'l XII el de mayor puxu al ampliar el primitivu col románicu. Ente les guerres napoleóniques y la Primera G. Carlista (1835) acaben con él y por mor de la Desamortización pasa a manes d'un ricu y noble vecín. Al despoblase nel XX el Barriu d'Arriba desmantélase'l monesteriu dafechu siendo aprovechaes les piedres de valir pa otres construcciones, como la casa Reutoral del pueblu.]

       << Arribar a Cuadonga
 foi una xesta perguapa,
adulces y ensin matase
y saliendo de co casa
llegamos a la Cuevona
pa festeyar la fazaña
de los astures y godos
 sobro l'emir Ben Anbasa.
Un exércitu unvió
al mandu d'un tal Alkama,
de nun mediar la Santina 
queda mora toa España.
¿Paga la pena venir
a visitar esta ayalga?
Preguntélo na Palmera
 onde fici una yacuada;
merecida la tuvimos
tres tan grande caminada.
La Escolanía cantó:
¡Puxa Asturies!¡Viva España! >>

                                       CUMPLÍOS:

La Pantasma l'Eremitoriu: Gracies.

. A la Pantasma l'Eremitoriu, que m'acompañó en tou momentu. Al fíu y la nuera que nos emburriaron nos últimos suspiros.
. A Xurde Morán que nos llevó <De co casa a Cuadonga> per aciu del so llibru:<El Camín Xixón-Cuadonga> asina como a la "Asociación Cultural El Garrapiellu" que nos balizó la ruta; ensin ellos sedría imposible fer esta caminada. Gracies, gracies.
. A la Biblioteca la Camocha, que nos prestó los llibros afayaizos a lo llargo del treyeutu.
. A los Diccionarios de LLingua Asturiana: ALLA, DGLA, RAE, D. Temáticu de Ramón d'Andrés, Diccionarios de Sinónimos de X.X.Sánchez Vicente y Lluis A. Prieto. Y al MADOZ d'Asturies (1845-1850).
. A los collacios que fiximos pel camín: Sidrín, Sidrón, Duende y Mirín. Asina como la bayura de persones que nos diben informando pel camín. ¿ Y qué dicir de los incontables personaxes históricos que conocimos a lo llargo del trayeutu?. Sabel II, por exemplu, dexónos deberes por facer, y don Pelayo, y la familia Xovellanos, y los reis d'Asturies...
. A Asturnatura pol so gabitu en temes d'Arqueoloxía, Hestoria y Naturaleza, asina como a Bertu Ordiales y G.César Ruiz pol so llibru "Guía de los árboles d'Asturies"(¡qué bueno, tíos!).
. A la wikipedia, qué fadríemos ensin ti, ¡guapa!. asina como a multitú de blogs imposibles d'enumerar.
. A Fulgencio Argüelles, que per aciu la so novela "A la sombra de los abedules" dio nome y figura a esti vuesu blog <Camìn de Niria>, al que tanto-y debemos. Gracies.
.  <<www.soto.biz >> CASAS SOLARIEGAS DE SOTO DE CANGAS que nos agabitó n'esti post, como "Arre Caballo!" o "El Condado de Castilla". Tamién el blog "Cantabria total".
      Gracies a vosotros, los llectores d'esti blog, que m'aportáis el cuayu que preciso pa siguir nel Camín. 
. Gracies a la SANTINA que vien de facer l'últimu milagru, acaba de llamame'l guaje :
    - Papá, ¿vamos dar un PASÉU?

¡Fasta  ceo ! Yá tamos encetaos nel <Camín Primitivu>

<< CAMINÍN de CUAGONGA >>

Pasó una cosa n’Asturies,

cuido que va trece sieglos,

seique los moros tomaren

Hispania a pitu serenu.

Cuando llegaron a Asturies

Pelayo echó-yos el frenu:

- ¿Ánde vais, bereberinos,

creyéis que tol mundu ye oréganu?.

D’aquel día en Cuadonga

hasta’l día en que te cuento

- cuando Pelayo escorrió

la de Dios de cordobeyos -

los romeros asturianos

a la Deva encamentamos

los problemes del momentu.

Si la Santina baltó

milenta mil sarracenos

¿nun va poder, la mui cucia,

con problemuques de neños?:

Una vaca que nun pare,

un guaje que busca un puestu,

la muyer quier ser alcalde

o mercasti coche nuevu...

Tolo igua la Santina

si te fais d’ella romeru.

Por eso embredé’l camín

de Cuadonga, mio neñu

quiero sacate del paru

y algames trabayu aneyu.

Si la Santina baltó

milenta mil agarenos

¿nun va poder, la mui cucia,

busca-y acomodu al neñu?.

Y pola parte de mio

cumpliré con tol procesu:

xubiré la escalerona,

rezaré un rosariu plenu

y besaré a la Santina

mientres-y pido conseyu.

Llibaré como un cosacu

del cañu de los deseyos,

y si la cosa se tercia

bebo hasta’l Pozón enteru.

Cuadraréme énte Pelayu,

mercaré daqué recuerdu;

tocaré la Campanona

si’l bon fin llegare a puertu.

Y si la Santa nun pue

arreglame esti enguedellu

fadré como aquel vecín

qu’arremetió escontra’l neñu

y espetó-y en plan de chunga

- eso sí, con tol respetu - :

< Oi, fíu,

o fais modo trabayar

o te meto nun conventu>.

La Campanona tocó

a les cuatro, pero a incendiu.