<<MINIMA URBIUM, MAXIMA SEDIUM >>
Un día embredé'l Camín
de Xixón a Cuadonga
porque l'orixe ta ellí,
onde entamó tola hestoria.
Güei toi en Cangues d'Onís,
al pie mesmo'l Ríu Onna,
yá queda poco a la fin
p'algamar a la Cuevona
y poder saber de ti
so la célebre Victoria;
porque tu tuvisti ellí
aquel día de la Gloria.
[L'Escudu de Cangues d'Onís más aceutáu no cabero presenta en forma elipsoidal un campu sinople cola Cruz de Pelayo en xefe sobro la media lluna abatida, en plata, y el Puentón, n'honor y plata, sobro les foles en punta del Seya, n'azur y plata. Una bordura n'oru cola lleenda, en gules, <MINIMA URBIUM, MAXIMA SEDIUM>.
En timbre la corona real: Un cercu d'oru engastáu en pedrería de color y realzáu por ocho florones - 5 visibles - de fueya d'acantu xuncíos nes puntes por ocho diademes de perles en plata que converxen nun orbe azur que porta una cruz llana d'oru sobro l'ecuador, nesi metal. Pa da-y más puxu l'interior de la corona va forráu en gules]
Santina,
Munchos quieren embrivir
la Batalla Cuadonga:
¿Cuatro gatos?, ¿un copín?
cuido que foi la rehostia.
De mano ...... un puñadín,
darréu vien la Mareona:
Fruela, Ramiro, Fonsín
y tola triba La Pola.
El casu ye, chavalín,
que too entamó en Cuadonga;
esto ye otru rispir
desque el REI crució'l Piloña.
Que queréis cobrar equí
y fer d'Asturies l'alcoba...
A fierro tenéis que venir
nun hai pautu nin bicoca;
Asturies nun ye'l cortín
de tola morisma mora.
 |
| Cuadonga < - Entrégate, Belaí, nun tienes escapatoria. - ¿Por qué nun xubes por mi, y tomes esta Cuevona? - Porque Alá xuxurrióme a min qu'equí mudará la hestoria.> |
ve y cúnta-yos per Córdoba
que los suaños d'un país
nun van en carru la compra.
- Cola, Munuza, monín,
que yá te voltió la novia,
qu'Asturies nun ye'l patín
pa que toméis toa Europa.
El casu ye, mio chatín,
que too entamó en Cuadonga.
¿Qué te paez esto a ti,
foi quiciabes na milonga?
¿ O sedría, de postín,
una bultable Victoria?
Yo que tu sigo'l < Camín
de Niria> pel Riu Onna.
Yá tamos nel Contranquil
¿reconstruyimos la historia?.
**********************************
Enantes de dar un vueltu pela ciudá de Cangues vamos asitiala nel mapa d'Asturies y del propiu Conceyu. Asina que vamos siguir un pequeñu esquema trazáu d'antemano, lluéu... perderémonos, como siempres.
. Entamos pol Blasón, símbolu de la ciudá, del conceyu.
. Xeografía Física: Asitiamientu, Llendes, Accidentes xeográficos: Ríos , Montes y Llagos .
. MAPES: Del Conceyu, con finxos destacaos.
Planu de Cangues, capital.
. MONUMENTOS a visitar per aciu una ruta circular: Puentón, Barríu Altu, Plaza Mercáu, Avenida Cuadonga y El Contranquil. Asina visitaremos El Puentón ya otres pontes , la Casa Riera (Oficina Turismu), El Palaciu Cortes, El Palciu Pintu, El Dago, la Casa indiana (Chalet Villa María), el Paséu Fluvial o les ilesies de San Antón, Santa María del Mercáu (antigua y moderna) y sopbre manera la Santa Cruz, un muséu de símbolos.
. Pequeña Reseña Hestórica: Dende'l Paleolíticu a l'actualidá pasando pola Corte de don Pelayo, Favila, Alfonso I y Fruela.
**********************************
. Sí, collaci@s, los del <Camín de Niria> yá tamos nel Contranquil, n'antoxana Cangues d'Onís. Tenemos énte nós la cucia ciudá capital d'un gran imperiu (pa qué vamos andar enredando, ho), la < MINIMA URBIUM seique la MAXIMA SEDIUM>.
- Sí, ho, sí; d'un IMPERIU grandón, non pola so estensión pero sí pola so trescendencia. Gracies al aneciu d'unos cuantos asturianos (porque vivíen equí) encabezaos por Pelayo Asturies tomó'l relevu qu'esbarrumbare ¿dafechu? el rei Rodrigo y, con cuayu y algo suerte, entamaren la RECONQUISTA del reinu anubríu embaxo de la Media LLuna. El biltu xurdió nuna Cueva en Cuadonga, a los pies del Monte Auseva y espoxigó dende Cangues onde s'asitió'l primer finxu alministrativu de lo que terminaría siendo'l Reinu d'ASTURIES.
 |
| Cangues d'Onís, la Villa del Seya. (Semeya: Oficina Turismu) |
Cangues ye una VILLA (dio-y el títulu Alfonso XIII en 1907) llevantada poliorcéticamente na mecedura de dos importantes ríos: El Seya (Salia pa los de casa) y el so afluyente, el Güeña ( ¿seguro que ye ansina?) y nos rimeros de la montaña... Lo más moderno yá ta na llanera, más averada a los ríos; y lo más antiguo nos barrios de Cangues d'Arriba, El Pedrosu y el de San Antonio (patrón de Cangues), onde s'alcuentren la capiella del mesmu nome y l'antigua Ilesia parroquial (Sta. María), anguaño <Aula del Reinu d'Asturies>.
Esta ciudá foi la capital del Reinu d'Asturies que fundara Pelayo nel primer cuartu del sieglu VIII (718-722) hasta qu'en 774 el rei Aurelio la treslladare a Samartín R.A, allá pa Llangréu (¿Tenía miéu a los qu'atentaren escontra Fruela?).
Anguaño pue paecenos raro que Cangues fuere la gran capital por tar escondida ya un poco alloñada de lo que güei ye'l centru - xeográficu, alministrativu ya económicu - d'Asturies pero convién recordar que la <Mínima urbium> formaba parte d'un vía romana que xuncía Lucus Asturum - Llugones, el centru de poder romanu n'Asturies - con Portus Victoriae Iuliobrigensium (Santander); el Puente Romanu yera ún de los pilancos qu'había que salvar.
- ¡Hola, Caesar, los que vamos pasar te saluden !. Y con muncho gustu.
 |
| Semeya: Web del Ayuntamientu. |
EL CONCEYU
. Cangues d'Onís ye ún de los 78 conceyos d'Asturies asina como de los 18 Partidos Xudiciales. Ta dividíu en 11 parroquies, per cinco d'elles pasa'l Camín Xixón Cuadonga: Villanueva, Cangues, Sotu, La Riera y Cuadonga.
Tien una estensión de 212,75 km2 y va dende los Picos d'Europa, al sur, hasta cerca la desembocadura del Seya, al norte, asina que pasa de los 10 m/snm hasta los 2478 de la Peña Santa d'Enol, y de la dulzura climática del llanu, próximu al mar, al estremáu de la montaña.
Pero de lo que naide nun se llibra ye de la humedá, tan sele, tan espectacular y tan fondera que caltria nos güesos y nel alma d'Asturies dexándonos estos paisax tan candiales, tan melgueros ... Mesmamente Cuadonga ya dalgo ansí como un Paradisu Terrenal, un llugar máxicu onde se mecen el cielu y la tierra, onde la Deva se tresformó na Santina. Si yes foriatu y nun lo crees, ven a velo; si nun quedes contentu devolvémoste les perres.
El conceyu de Cangues cuenta con unos 6.500 habitantes onde les tres cuartes partes moren na capital; qué bien se vive nes ciudaes ensin tener qu'arrincalo de la güerta.... Agora en Cangues son casi toos señoritos, la mayoría vive del Sector Terciariu, al rodiu'l Turismu; y que siga, esto nun se pue desaprovechar. Antiguo'l sector primariu yera l'únicu, lluéu xurdieron les mines de Buferrera* y esto creó munchos puestos de trabayu; pero un día pesllaren y hebo que buscase la vida. Y si tenemos estos ríos, estos árboles, estos montes, estos paisaxes... ¿ por qué nun vamos vivir d'ello?. (Oi, yá toi h.ablando como si fuere cangués).
* [[ Les Mines de Buferrera tán nos rimeros del llagu Enol y fueren creaes en 1879 col envís d'obtener manganeso, mercurio y fierro. D'aquella'l trabayu yera manual y sacábase'l carbón en cestos que baxaba en burros hasta la Estación del tren, en Cuadonga. Más tarde modernizaren y yá se baxaba por cable. D'ehí en tren hasta'l puertu de Ribesella que lo llevaba en barcos pa Francia ya Inglaterra. Llegaron a trabayar más de 500 persones en condiciones perruneres polo que les güelgues yeren frecuentes.
En 1918 quedaren dientro'l Parque Nacional de la Montaña Cuadonga creáu per aciu d'Alfonso XIII y en 1979 pesallaron dafechu poles puyes d'ICONA al tar dientro'l Parque. Anguaño tán reconstruyíes y son visitables talo un muséu. ]]
LLENDES:
. El conceyu Cangues llenda al norte con Parres y Ribesella, al este con Onís y LLanes, al oeste con Amieva y la mesma Parres y al sur con Lleón. Son munchos los ríos que percorren les sos tierres siendo'l Seya'l más importante asina como los sos afluentes: Dobra, Güeña y Zardón que conformen cuatro valles o cuenques hidrográfiques bien estremaes. Lluéu tenemos el Riu Reinazu, qu'emboca nel Güeña per Sotu de Cangues y ye perimportante pol so simbolismu históricu dao que ñaz na Cuevona y tien les agües bendites pola Deva (La Santina, en moderno) .
 |
| Conceyu Cangues d'Onís, Mapa xeográficu. |
. La principal corriente d'agua que traviesa'l conceyu ye'l Ríu Seya que va de sur a norte pel lladral oeste. Ñaz en Sayambre (Llión) y aboca en Ribeseya teniendo como los principales afluyentes: El Ponga y El Piloña, pela esquierda, y el Güeña y Dobra pela drecha.
Como a mitá del percorríu recibe les agües del Ríu Güeña que vien del este. Más abaxo, del sur, recibe'l Ríu Dobra, que ñaciendo en Valdeón (Llión) aboca nel Seya a l'altura Tornín, yá cerca de Cangues, tres bañar les faldes la Sierra Cuadonga y el valle d'Angón, embalsar antes les agües na H.ocica y h.acer de llende col Conceyu d'Amieva.
Allárribones, pal este'l conceyu, cuerre'l Ríu Zardón, que vien del conceyu Llanes recoyendo les agües que baxen de la Peña Ixena y va derechín al norte hasta abocar nel Seya, cerca Les Peruyes.
. Los principales accidentes montañosos son tan numberosos (Picos d'Europa, El Cornión, Sierres de Cuadonga, Ordiales, La Trapa, La Escapa...) que prefiero dexátelos nun mapín adxuntu y daqué caseru, a ver...
**********************
. Cangues d'Onís ye un conceyu con una HESTORIA perimportante como yá sabemos. Cabezaleru la Reconquista tiense conocencia d'elli dende... la Prehistoria.
 |
| Enterramientu de "Los Azules", del Aziliense. (Semeya de Wp) |
Del magdaleniense ta la Cueva la Güelga (Narciandi), un abellugu kársticu formáu por Ríu La Brava onde los cazaores de ciervos de va 14.ooo años nos dexaron restos como: puntes de llanza, colgantes con dientes ya otros güesos d'animales, una tibia grabada y....una ¡flauta!, yeren músicos. ¿Fadríen conciertos como los de les cueves del Drach en Mallorca? .
De la dómina l'aziliense ye la Cueva Los Azules onde aprució una cadarma humana con dellos aperios que llevaba al sapozala (pues vela nel M. Arqueolóxicu). Trátase d'un paisanu d'unos 30 años, algo mayor pa la dómina, que foi allugáu con tol ciñu y parafernalia: útiles de caza y pesca, conches de moluscos marinos...
-¡Nun pases fame, papa!.
 |
| "Güeyos de Curuxa" |
De los romanos quédennos en Cánicas restos n'El Puentón y na LLingua, porque l'asturianu vien del llatín sobre manera. Hai bultables llábanes funeraries que demuestren la romanización de los vadinienses tres la batalla del Monte Vindius, nos Picos d'Europa, y con probable capital en Riaño.
 |
| Estela commemora Batalla Cuadonga |
- ¡Dísteis en güesu, sarracenos! Los astures nun tamos dimpuestos a pasar poles "forques claudines". Nin entrega de muyeres nin impuestos abusivos.
 |
| ¡Pelayo Rei! ¡Pelayo Rei! ("Crónica de Leodegundo", de Gaspar Meana) |
- ¡Equí vos quería yo, capuletos!. Pa la próxima miráis el google maps, ansí sabéis ande vos metéis.
Alkama picó como un pinín y Pelayo dió-yos un repasu d'época. Los que quedaron vivos tiraren camín de Llébana ande los estaba esperando'l Duque de Cantabria. Por si fuere poco una bona xarazada terminó por desprender un roqueru y acabó con ellos dafechu. Munuza que s'entera pon pies en polvorosa pero los confederaos astures - mui manudos ellos- dan-y n'Olalíes un billete pa conocer el Paraisu.
- Depués cuéntesnos cualo te gusta más, si'l Paraisu o esti Paradisu.
- Cagon diez, yo namás quería casar con una asturiana...
- Sí, fíu, pero a la media lluna; non pola Santina. ¡Andando!
Pelayo gobernó 19 años; en 737 entró na lleenda y pidió que lu enterraren xunto al dolmen, al abellugu'l texu d'Abamia, cola so muyer Gaudiosa y los sos ancestros neolíticos. La tradición máxica continúa. Depués vien el so fíu Favila que namás dura dos años pero dexónos la ilesia la Santa Cruz del Contranquil. ¿Preparó-y una engatada'l so cuñáu Alfonso I, el católicu (759)?... Dios quiera que non, porque el cántabu foi un gran Rei que reconquistó el norte peninsular estableciendo una franxa de "tierra quemao" entre cristianos y moros.
- ¡Del Duero p'arriba nun quiero ver un turbante!
 |
| A Fruela váse-y la mano col so hermanu Vimarano |
- Amiguinos, yá nun somos a pasar ensin percebes y amás , pel branu fai un calor insoportable n'Al-andalus. ¡Viva Galiza mora!
Pero'l nietu Pelayo nun taba por ello y , en Pontuviu, cortó-yos el mexu.
- A comer mexones al Mediterráneu, mazcayos, que Galicia ye un cotu astur.
Fruela repobló Galicia, punxo firmes a los vascones revolvinos (hasta casó con una d'ellos, prima de so), metió en breda a los cures qu'hasta-yos prohibió casase (pero home, esto nun se fai que los iviernos...) , fundó conventos como Samiguel del Pedrosu (Burgos) o San Vicente d'Uviéu, onde ye probable que quixere afincar.
- Munia, voi poner Uviéu a los pies. Mira, nesti cuetu quiero llevantar una ilesia a San Salvador y ehí cerca un palaciu dignu d'una reina vascona. Cangues quédate mui pequeño.
- Yo toi a gustu en Cangues, Favi; por min nun te mudes.
 |
| El Diploma del Rei Silo. El documentu más antiguu de la Monarquía asturiana (775) |
- <El qu'a fierro mata a fierro muerre>.
El so primu Aurelio (768) treslladó la capital a Samartín del Rei Aurelio, en Llangréu.
- Ta más negra esta corte que'l carbón del Sotón. Adéu.
Más tarde Silo (774) pon-y palaciu a Adosinda - la hermana Fruela - en Pravia.
- Tu mereces el mar, Dosi, y amás nel centru ta mui frío n'iviernu.
Marchó la corte, marchó'l glamour. Cangues malpenes cuenta na hestoria y escaezse nel olvidu. Les coses importantes, bueno, los xareos, tán n'otra parte.
. Home, tiense sentío nomar al territoriu Cangues nel inventariu del episcopáu d'Uviéu (Gutierre de Toledo) alluendi'l XIV y tamién na mesma dómina nel testamentu d'Enrique II de Castiella - el primer Trastámara - en favor del so bastardu Alfonso Enríquez *(¿por so culpa ardió Xixón?) . Enrique II tamién yera bastardu d'Alfonso XI y foi'l qu'arrampló col tronu del llexítimu Pedro'l Cruel; bueno, tampoco ye que'esti fuere mui manudu.... ¿ Tenéis alcordanza d'aquella pelea mano a mano ente los dos hermanos y Bertrand Du Guesclin (contratáu pol Trastámara) voltió l'amarraza poniendo al bastardu enriba?:
 |
| Bertrand Du Guesclin echa un gabitu a Enrique II, el pá d'Alfonso Enriquez, señor de Cangues. |
- <Nin quito nin pongo rei pero ayudo al mio señor>
- Poques gracies, bastardos; ansí se roba'l tronu Castiella.
*Alfonso Enríquez ñació en Xixón en 1355 pero nun-y gustaba la sidra. Yera fíu natural del rei Enrique II Trastámara y anque incordió lo suyo p'algamar a ser como so padre tevo que conformar con poco menos; casi toa Asturies yera d'elli, ente ello Les Cangues d'Onís, asina como les Babies en Lleón. Por encrespar esconcontra so pá esti terminó ¿prendiendo la ciudá de Xixón? mientres el Conde andaba buscando ayuda per Francia, onde a la fin terminó fugáu dafechu .
La lleenda cuenta qu'Enrique III, rei de Castiella-Lleón, al asediar Xixón - ande taba atecháu Alfonso E. - prevocó un incendiu pergrande na ciudá...
Lleenda, namás que lleenda; les escavaciones más recientes nun amosaron güelga alguna d'incendiu na ciudá pero sí los proyeutiles de piedra llanzaos con catapultes. Más seguro que la so muyer, acosada y sola, entregó la ciudá al Rei y coló col maríu (afiáu del so vecín Rodrigo Álvarez de les Asturies) pa Francia. ¡Qué guerra dio esti rapaz más aficionáu al poder qu'a la sidra (otramiente nun sedría tan fatu). Paez mentira que ñaciere en Cenero.
. Nel sieglu XVI Cangues forma parte como conceyu de la Xunta Xeneral del Pricipáu y d'esta miente asiste a una reunión nel conventu de San Francisco d'Uviéu (1504).
Felipe II mandó al cronista Ambrosio de Morales a Cangues y dio-y cuenta del estáu de la Cuevona.
 |
| < Hasta equí vino Alkama pa entrar na hestoria como cada asturianu busca la Gloria > |
Felipe III mandó faer dellos arreglos na capiella y apurió-y dalgún regalu, talo que Felipe IV.
Como vemos si nun ye pola Santina nin se nos noma pero a esta santa entá-y queda por facer el mayor sacrifiu que se-y pue pidir a daquién: <Inmolase por Asturies y por España>. Nun ye hasta qu'en 1777 prende'l retablu la Santina (demasiao madera) y entós entama falase otra vuelta de nosotros; sí, esto fexo la reencarnación de la Deva por nosotros: tornar a ponemos nel mapa ( y de pasu modernizar la imaxe y el vestuariu).
Carlos III toma cartes nel asuntu y quexo reconstruyir la Cuevona dafechu. L'arquiteutu Ventura nun andaba mui avisáu y los abaes torgáron-y llevantar aquel ecce homo (bueno, iguó'l calce'l ríu pa siempres). Pero la obra siguía pendiente hasta qu'un sieglu depués Alfonso XII pon el primer petardu na llomba onde se va edificar la Basílica actual (1877-1901) y el so fíu Alfonso XIII abre la puerta pola primera vegada. Tamién se igua'l Camarín con bocetos de Frasinelli. Cangues y Cuadonga tán nel mapa dafechu. La Santina algamó a la fin el so pruyimientu, y los asturianos, fíos de so, tamién.
- ¡Qué son doce sieglos de nada!
Tamién tenemos noticies de Cangues por mor de la Guerra la Independencia onde ún de los gobiernos militares y de cuando les Guerres Carlistes con Vázquez de Mella como cabezaleru.
Cola Guerra Civil sufrió la capital dellos bombardeos y la posguerra foi pa olvidar, como en tolos sitios.
Tienen que venir reis y nobles a visitar Cuadonga p'amosase otra vuelta nel mapa: En 1857 los duques de Montpensier, en 1858 la Reina Sabel II, lluéu Alfonso XII, Alfonso XIII, el cardenal Roncalli (Xuan XXIII), Xuan Pablo II ... Tamién Xovellanos fexo'l tránsitu de Xixón a Cuadonga y bien que se quexó del camín.... Claro, nun taba iguáu'l Camín de Reina...
 |
| D.Alfredo García Álvarez, l'Alcalde de Cangues con más mandatos. (Semeya d'Internet) |
Como fechos bultables na hestoria de la Villa podemos citar.
La concesión del títulu de Ciudá en 1907 por Alfonso XIII.
La creación del Parque Nacional de Cuadonga en 1918 col mesmu rei coincidiendo col 1200 (XII s.) cumpleaños de la Batalla Cuadonga. Anguaño camiéntase que l'añu más probable la batalla fuere 722, siendo en 718 cuando lu elixeren como princeps o cabezaleru del pronunciamientu astur.
En 1978 Cangues d'Onís foi otra vuelta la capital del Principáu d'Asturies por mor de la ellaboración del Estatutu d'Autonomía. D'entós p'acá hebo 6 Alcaldes en Cangues siendo'l socialista Alfredo García Álvarez el que más veces repitió, tres estayes diferentes. Con ellí la villa dio un espurrión no que cinca a la so tresformación urbanística: carretera circunvalación, estación autobuses, o renovación del so patrimoniu históricu. Los alcaldes foron estos:
. Luis Miguel Ortíz Cortés (UCD) . Juan Antonio Vega Díaz (AP)
. Mª del Pilar Díaz Junco (AP) . Alfredo García Älvarez (PSOE)
. Miguel Ángel Villoria Noriega (PP) y José M. González Castro (PP), l'actual.
¿Y qué dicir de tola triba asturianos cavez qu'entamamos daqué importante vamos visitar la Santina? ¿Nun seremos tamién parte de la historia?.
*******************************
¿Y SI DAMOS UN VUELTU PER CANGUES?
Mapa planu de Cangues
 |
| Cangues d'Onís, planu de la Villa. (Semeya de la pax. Web del Ayuntamientu) |
¿Per ónde entramos?... Si vienes faciendo'l Camín Xixón-Cuadonga lo más normal y afayaizo ye entrar en pueblu pel barriu d'El Contranquil viniendo de Villanueva pela marxe drecha del Seya pero tamién pues tirar pela xeneral dende Vega los Caseros hasta Cangues, ensin entrar siquier a Villanueva, pa visitar les cases d'indianos del Prestín. Nós vamos siguir la ruta pelegrina asina que visitamos el conventu beneditín - yá vos los cuntamos nel post anterior [De co casa a Cuadonga (9):Llames-C. d'Onís] - anguaño parador nacional, asina como la ilesia románica del Besu.
Guapu paséu a la vera los cotos trucheros del Seya hasta qu'algamamos a la mecedura con otru ríu, el Güeña, que separa'l barriu Contranquil del núcleu la villa. Bueno, separa.... Son varies les pontes que xuncen la vega onde s'asitia'l Dolmen y la ciudá d'El Puentón. Asina que na mecedura les agües, la que llamen la Playa del Pelícano, travesamos una ponte mui moderna que nos dexa nun parque delantre Casa Riera, onde s'alcuentra la Oficina de Turismu.
El parque, un tapiz sinople, ta engalanáu con un horru, una estatua dedicada a los emigrantes y conxuntu de paneles desplicativos sobre la flora y fauna del conceyu.
 |
| El Ríu Seya, el Monte LLueves y el Puentón (onde tamos) tán enmarcando la Casa Riera (Oficina de Turismu), de colorao. |
Esta ayalga ñaz nos entamos del XX per aciu la famila Garro, d'orixe cangués, emigrantes en México. D'esta familia yera doña Elena Garro, la muyer d'Octavio Paz, que pasare un iviernu en Cangues col enfotu d'escribir la so novela "La casa junto al río".
La casa de xunto al ríu pasó más tarde a la familia Prieto y ye conocida como "La Casa Riera" porque nella tien vivío'l doctor Aurelio Riera. ]
 |
| Los mesmos romanos siempre tomaben la parva n'El Puente enantes de continuar ruta. ¿Veislos? |
- Preciamos información, a ver qué nos apurren nesta casa tan guapa.
Salimos de la Oficina T. percontentos con una farta mapes de los más prestoso y sobre manera con un llibrín guía de la villa y del conceyu. GRACIES.
- Mira, el palaciu Cortés ta equí, al llau de la Plaza, marcómelu bien la rapaza.
- Perdona, pero yo voi visitar primero El Puentón, quiero entrar na villa como Dios manda.
- Ties razón, romana; vamos p'allá.
- ¿Y qué plan tienes trazáu pa depués?
- Vamos mirar el mapa y siguir les indicaciones que nos dieren en Turismu:
- Mira, ehí enfrente, a la otra oriella, hai unes cases d'indianos.
- ¿Les del Prestín?... Yá les vimos al venir, si mos da tiempu vamos depués pa veles de cerca.
- Pos el plan va ser esti:
< Puentón, palacios Avenida Castiella, Cai San Pelayo, Centros de Cultura y Salú (Cárcel), Mercáu (Ilesia Parroquial, Palaciu Pintu, ), San Antonio, Aula Reinu d'Asturies (antigua ilesia parroquial), Barriu la Conceición (Palaciu Cortés), Plaza'l Mercáu, Casa Dago (C. I. Picos Europa), Ayuntamientu y yá pasamos al Barriu d'El Contranquil >
Contemplampos la Ponte Romana dende'l puente modernu que t'introduz na villa. Darréu les semeyes inacabables vamos a patiar la ponte que cruciaren romanos, astures, godos, medievos, cangueses y tola triba vecinos y pelegrinos, como ye'l casu nuestru. El Puentón impón, nun m'estraña que seya l'iconu de Cangues.
 |
| <P'algamar a Cuadonga hai que pasar el Puentón, otramiente has quedate pasear con San Antón> |
El Puentón xunce los conceyos de Parrres y Cangues siendo la mitá de cadún, ¿sabíeslo?.. Pos yo non; como siempre dicimos "el puente de Cangues"...
La ponte que vemos de tres arcos - de mano tenía 7 - , oxival y peraltáu'l del medio y de mediu puntu los llaterales - desiguales dambos - ye de la dómina d'Alfonso XI de Castiella seique tien un orixe romanu. Foi utilizada como vía cabecera hasta'l sieglu XIX, pero nun pudo col tráficu modernu y quedó obsoletu teniendo que facer l'actual, per onde rodamos anguaño. El Puente tuvo a lo llargo del tiempu delles igües siendo quiciabes la de 1876 la más sonada. Tamién lu remocicaren en 1940 y 1943. Dende 1931 pasó a ser reconocíu como Monumentu Históricu Artísticu.
Cuando la Santina tornó del exiliu parisín en 1939, pa que yá se sintiere "como en casa" colocóse - amás del slogan <Minima urbium, maxima sedium> - una Cruz de la Victoria colingando del arcu central. Y la Santina clamió:
- ¡Cómo m'alcuerdo d'aquel día! ... ¡Los confederaos tuvimos sembraos!]
 |
| La buiciega Cai San Pelayo |
- Vaya suerte que tienen, puen pescar dende'l balcón.
Villa Monasterio : Ye un palacín de dos plantes d'arquitectura indiana y estilu autóctonu. Na primera ta la vivienda mientres que'l baxu ta destináu a tienda. Tien cuatro vanos en ca planta repartíos simétricamante siendo'l cuerpu central abuardilláu l'exe.
y Villa Sarmiento: Ye una construcción tipu indianu formada por dellos volúmenes d'altures estremaes con ventanes mui decoraes, balcón nel pisu principal y un aleru de madera con metopes decoraes. Nun falta la típica palmera indiana y una verxa de fierro que da pasu a una escalerona de falsa piedra. Foi construyida en 1916 como reza nuna placa la fachada d'azulexu. Ye de planta cuadrada, con dos niveles ya una cúpula gallonada cubierta de cerámica policromao de calter modernista.
 |
| Aula del Reinu d'Asturies, antigua Ilesia parroquial de Sta Mª. |
Ehí cerquina, a mandrecha taba l'antigua cárcel, güei dos edificios en ún que son El Centru de Cultura y El Centru de Salú.
Como queremos algamar al barriu San Antonio tornamos a mandrecha p'agarrar la cai Evaristo Sánchez. Toca xubir, pos esti antigüu barriu ta nuna llomba, onde s'asitiaba la Cangues primixenia. Yá vamos viendo al fondu una ilesiona bastante grande; ye l'antigua Ilesia de Santa María del Mercáu güei convertida en Aula del Reinu d'Asturies. Yá tuviéremos dientro va tiempu, cuando echó a andar, allá pol 2003. Anguaño pertenez al Ayuntamientu y emplégala pa facer eventos institucionales amás d' amosar en paneles y audiovisuales la importancia la dómina de la Monarquía Asturiana.
 |
| Aportando a la Capiella San Antón. < Tengo dir de romería a la ilesia San Antón el día 13 de Xunu cuando más calienta'l sol. Enantes, una foguera y darréu la procesión > |
Trátase d'un edificiu neoclásicu, del sieglu XVIII, de pórticu toscanu ya una nave cubierta con bóveda de cañón. El cruceru ye importante y la cabecera cuadrada ta cubierta con bóveda d'arista. Tien una espadaña de vanu doble que-y da munchu realce.
La fiesta, al entamu del branu, ye percélebre. Yá na viéspora s'igua una foguera onde se quema'l rozu. El día d'autos la xente aporta vestida col traxe típicu y asina, en procesión, lleven el Santu hasta la Ilesia Santa María pa celebrar la misa solemne. Darréu tornen a San Antonio al so requexu, que ye onde s'afaya, qu'a la xente mayor nun mos gusta muncho'l trevolgu; esto d'andar de casa en casa... La romería nel robedal ye, seguramente, lo más prestoso y San Antón ta percontentu col hermanamientu de la vecindá. ¿Hai dalgo más guapo que los vecinos se lleven bien?.
- Bueno, güei nun ye plan de siguir xubiendo pa conocer tou Cangues d'Arriba, el Güertu'l Cura tendrá qu'esperar.
- ¿Baxamos per onde xubimos?
- Non, mira'l planu, p'aportar a la plaza'l mercáu vamos baxar per esta caleyina que da al Barriu La Conceición.
 |
| <El balón Cortés> ¿Un balón? ... Hai neños, hai vida, hai esperanza... |
- ¡Meca, esto tien que ser el Palaciu!.
Teníemos muncho enfotu por alcontralu y tres siguir bordiando la cerca damos con un portón (mediu puntu sofitáu sobro pilastres) abiertu dende onde podemos contemplalu. Lo que nos prestó nun fuere'l tantu edificiu, ¡vaya!, magar les ganes que teníemos de dar con elli por mor de ser la estancia de la Reina Isabel II cuando vieno a visitar Cuadonga en 1858. (Yá sabéis qu'en Llames entramos nel <Camín de la Reina> y yá nun pensamos soltalu hasta Cuadonga). Pos non, eso foi la farda pa buscalu pero'l fechu d'alcontrar un balón - pincháu, estos guajes del Cánicas- delantre la puerta dionos como un pálpitu de gayola:
< ¡Hai vida nel palaciu!>.
Son tantos los qu'alcontramos n'estáu d'abandonu ... Estos símbolos del pasáu puen y debieren caltener nel presente esi aldu d'historia, de tradición, de cultura que tantu nos presta remembrar. Allegrámonos abondo que siga con vida y nel bon estáu nel que s'alcuentra, o meyor.
 |
| Mercáu ¿decimonónicu ? delantre 'l Palaciu Cortés. |
De planta rectangular y sobria fachada presenta una torre-capiella nel lladral d'a manzorga quedando descentráu'l portalón d'entrada (hai que ser orixinales, coño), con arcu de tipu carpanel que da pasu a un estragal del que sal una escalera de dos tramos. El pasu de palaciu a la torre faise al traviés d'un entramáu de madera.
Tien planta y pisu - con balcones voladizos ente los que destaca l'escudu familiar - abellugáu por un aleru de madera mui llamatible rematando nuna guardilla mui petecible pa caltener un estudiu. Escribir dende un requexu que sobrevuela los teyaos del pueblu debe ser una gozada; tiéneslo too controlao, como De Pas a Vetusta].
 |
| Mercando |
 |
| Don Pelayo abellugando a Santa María. |
[[ La Ilesia de Santa María del Mercáu ta asitiada nun estremu d'una plazoleta peramplia que llenda cola trasegada Avenida Cuadonga. Ye un edificiu peraltu, de traza clasicista, asina que ta comtemplalu bien allugamonos al otru estremu, delantre la estuta Pelayo que preside la plaza'l xardín triangular.
Foi llevantada nel añu 1963 nel centru neurálxicu de la nueva villa pa sustituir la alloñada ilesia de la Asunción, del barriu altu.
Esti edificiu neoclasicista foi llevantáu pol arquiteutu Rodríguez Bustelo gracies a les xeneroses aportaciones del indianu José González Soto. En cualisquier casu antiguo había otru medieval nel mesmu llugar que fuere iguáu delles veces col pasau del tiempu.
Tien planta de cruz llatina y tres naves separtaes por pilares d'arcos carpaneles.
El cruceru remata nuna cúpula decorá colos evanxelistes, obra del escultor asturianu Casimiro Baragaña. Nos brazos de les cruces llucen unes imponentes vidrieres d'artistes franceses afincaos en Madrid.
Quiciabes lo más llamatible sía la so torre-campanariu de tres pisos en pirámide (33 m.) remedando les espadañes barroques de la zona, qu'abelluguen 9 campanes. Sobro l'arcu d'entrada l'escudu de la ciudá de Gerardo Zaragoza]].
 |
| Palaciu Pintu (Cuando vi la muyerina pensé que yera mio güela) |
Na mesma plaza, a la espalda'l mercáu, tamién degustamos d'otru edificiu perinteresante, El Palaciu Pintu. La Casa la Capitana, como yera conocía, pertenecía a la familia Ceñal, talo que tola redolada.
D'estilu barrocu foi reconstruyíu tres el bativoléu de la Guerra Civil n'ochobre del 37 llevantándose esa llamatible torre barroca, d'aleru perampliu, balcón voladizu y decoración pictórica que lleva na fachada la lleenda familiar:
< ... los Barelas y Bermúdez, Ulloas y Villalobos,
tan antiguos en Galicia como en Castilla los Godos.
Por mi ley y por mi Rey moriré >
- Ahí, gallu, que yá se nota que yes asturianu.
Embaxo de la lleenda podemos apreciar la efixe (Gerardo Zaragoza) d'un cangués ilustre, l'intelectual :
 |
| D.Xuan Vázquez de Mella, carlista dafechu. "El Gedeón" 1897 (Semeya: Wp) |
Xuanín pasó la infancia na Villa de Pelayo quedando güérfanu bien ceo porque so padre, militar gallegu casáu en Cangues, morió cuando tenía seis años. Estudió nel Seminariu de Valdediós el bachilleratu pasando darréu a vivir en Galicia cola familia paterna. D'esta miente continuó estudios de Drechu na facultá de Santiago onde dicen que "piraba" muncho les clas, pero non pa dir a percebes seique pasaba les hores lleendo na biblioteca y díbase-y el xacobu al cielu. Apuntóse a les files carlistes - onde algamó a cabezaleru intelectual - y como tal exerció de periodista y depués como diputáu a cortes per Navarra. Más tarde, el <picu d'oru>, como yera conocíu, tamién lo foi per Uviéu. Los sos mítines teníen más audiencia qu'un Sporting-Uviéu.
El so lema yera:
<Tradición, Catolicismu, Patria y Monarquía>, a tremar...
Vázquez de Mella foi académicu de la Real Academia de Ciencies Morales y Polítiques y tamién algamó a Académicu de la LLingua Española magar que nunca nun llegó a tomar posesión. Tamién refugó ser ministru por dos veces, con Cánovas y con Maura.
- ¿Pero tu qué quies?... A que te zarro la Biblioteca... ]]
 |
| Casa Dago, anguaño Centru informacaión del Parque Natural de Cuadonga. (Semeya de Palmi) |
Presenta balcones volaos, un portalón d'arqueríes, una galería abierta ya un aleru sobro ménsules tallaes.
Na so fachada lluz un escudu coles armes de los Cortés, famila de la muyer, col lema:
< Tan fuerte como valiente y leal es Cortés >
Anguaño esti edificiu caltién les oficines del <Parque Nacional de los Picos d'Europa> tres ser mercáu por ICONA.
 |
| AYUNTAMIENTU de Cangues, abenayá Audiencia Territorial. |
[ Javier Aguirre yera un arquiteutu donostiarra mui célebre que participare n'edificios como los mercaos del Fontán, les Aceñes d'Avilés o Santa Clara n'Uviéu. Tamién collaboró nel Hospital de Llamaquique, nos monumentos del Narancu, la sede la Banca Masavéu o la Escuela Normal de la capital (gracies, ho) ya otres escueles.]
Pasu ente pasu pela Avenida Cuadonga dexamos atrás l'edificiu Correos, l'hotel Seya, y vamos empobinamos camín d'El Contranquil per aciu una ponte sobro'l Güeña. L'Avenida Cuadonga ye'l corazón de la villa; ehí ta la vida social, alministrativa ya económica del pueblu y hasta del conceyu, diría yo. Yá se trazare nel XIX tres llevantar la ponte moderna p'alliviar el tráficu rodáu , o bien camìn de Cuadonga, Corao ya Benia , o bien pa Les Arriondes, Ribesella .......
 |
| Moderna ponte sobro'l Ríu Güeña, hai delles pal Contranquil. |
Como yá nos prúi visitar la ilesina la Santa Cruz pol simbolismu que caltién pasamos la ponte sobro'l Güeña pa entral n'Avenida d'El Contranquil. Enantes, a manzorga, pasamos l'edificiu de Correos, qu'alluga'l fondu antiguu del Arquivu Municipal.
Namás cruciar la ponte sobro'l Güeña, na redolada la capiella, tenemos la Piscina Municipal , un Aparcamientu y un Parque infantil , con vistes perguapes del cuetu dolménicu. Apegando, como quien diz, ta Institutu de Secundaria "IES Rei Pelayu"., que da pasu a una amplia Zona Deportiva. Equí cerca tamién s'alcuentra'l restaurante Casa Fermín, antaño bar y alberguería de tolos pelgrinos a Cuadonga.
Xusto enfrente la capiella un xalé antiguu, mui guapu, engalana l'avenida; trátase de la perconocida Villa María.
 |
| Villa María xunce'l Ríu Güeña col Monte Llueves nel barriu de Contranquil. |
Por si fuere pocu la casona ta nuna finca agropecuaria con dellos edificios emplegaos na esplotación agrícola y ganadera asina como un horru sofitáu por 15 pegollos de piedra repartíos en tres fileres, ¿visti cosa igual?. ¿Quies velo?... Pos ye mui fácil, anguaño esta villa tien toles dependencies esternes dedicaes a Restaurante. Sitiu más afayaizu nun lu vas alcontrar si quies celebrar una boda, un bautizu o cualisquier eventu social que termine en gastronómicu.
 |
| Per tierres de Don Constante. Parque nel Contraquil, al fondu la Sta. Cruz. |
*************************************
La ilesia de la Santa Cruz
Nel barriu d'El Contranquil, na llana asitiada a mandrecha'l Riu Güeña y nes faldes del Monte Llueves - onde Favila tevo l'alcuentru col asu ya onde ta la Cueva de los Azules - , aprovechando un cotaraxu qu'abelluga un dolmen neolíticu con más de 3000 años d'antigüedá tenemos una ilesia pequeñina, pero sólida, conocida como
 |
| Ilesia la Santa Cruz, la primixenia. Del Semanario Pinto |
 |
| Llábana fundacional de la Ilesia la Santa Cruz El 27 d'Ochobre del 737 (775-38). (Ye una copia d'otra copia alemana) |
[ La llábana fundacional vien a dicir algo ansí como:
<Torna a llevantase por preceptos divinos esti edificiu sagráu ornáu de manera mui probe. Que resplanda esti templu ente les miraes sagraes amosando'l signu de la cruz*. Sía agradable a Dios esta casa consagrada n'alcordanza de la Santa Cruz ya edificada pol rei <famulus> Favila , la so muyer Froiliuba y los so fiyos a los que Dios bendiga y-yos dea a toos gracia y misericordia cuando dexen esti mundu. Consagra estos altares l'obispu Asterio nel añu 775 (775-38=737)>.]
*Amosando'l signu de la Cruz: Siempre s'entendió que nesa ilesina taba la cruz que Pelayo narboló na Batalla Cuadonga pero dalgunos, como De Castro camienten que la planta la ilesia podía tener esta forma +. Podríen ser les dos coses, el troféu por ganar al enemigu y al pecáu y la planta.
 |
| La CRUZ de la VICTORIA nel Puentón de Cangues. El símbolu cabezaleru d'Asturies. |
Otru simbolismu pue ser la comparanza con rei David que nun pudo acabar el templu que terminaría'l so fíu Salomón. Pelayo morrió en 737, el mesmu d'inauguración de la ilesia de Cangues. ¿Taba yá nello?... Ye mui probable.
Nesta placa tamién apaez el nome de Froiliuba, la muyer, que simboliza'l continuismu del llinax -amás mete los fiyos, ensin nomalos - faciendo alcordanza d'Helena, la ma de Constatino'l Grande, l'emperador romanu verdaderu "creador" del cristianismu al reconocelu como la relixón del estáu.
Y digo yo... Igual Favila nun yera tan poca cosa... Les cróniques namás dicen d'elli que yera fíu de Pelayo, que gobernó dos años, que lu mató un osu y que mandó llevantar la basílica de la Santa Cruz ... Bueno, ser fíu de Pelayo nun yera poca cosa, la ilesina yera daqué importante pol simbolismu qu'encierra y polo que significaba de continuidá... El rapaz tenía planes... ¿Nun-y preparíen una engatada los de la rama cántabra?. Paez nidio qu'Alfonso Froilaz casó la fía Pelayo pa xuncir cántabros ya astures y formar un Reinu del Norte tres el esbarrumbe del Condáu de Cantabria polos árabes. Había qu'esaniciar el pilancu de Favila ensin llevantar sospeches... ¿Un osu en Llueves, a la puerta casa?...
 |
| Ansina ve <juanolallarodrigo> La Ilesia la Santa Cruz. |
<Torna a llevantase>, diz la llápida fundacional.
Favila siguió la tradicción: veneró al so ancestru nun llugar sagráu pa los astures ya onde él mesmu pidió ser sapozáu cola so muyer, Froiliuba, cuando morrieren.
- ¡Pero non tan temprano, h.oder! (Dos años reinó Favila, y la rama cántabra algamó'l poder)
Como daquella nun se podía enterrar la xente nes ilesies ficiérenlo fuera pero col tiempu enantóse la capiella quedando asina dientro.
 |
| Flor exapétala. ¿Cuantes vegaes la tenemos visto? |
* A la flor de seis pétalos tamién se conoz como: rosácea, roseta exafolia, ruedina celta o flor galana. Ye un motivu recurrente nos grabaos asturianos; yo vengo de vela güei mesmo nun horru.
 |
| Capiya La Santa Cruz, la primer ilesia cristiana de la Reconquista . Favila 737. |
¿Que la reconstruya Mirabilia Ovetensia?
La Fibrolita: Ye una variedá de la "sillimanita" (SiO5Al2) un mineral compuestu de silicatu d'aluminiu. Bastante más duro (7 Mosh) que'l fierro (4) pue presentase incoloro o con delles tonalidaes: verde, azur, roxo, gris o con visos marrones.
N'Asturies emplegóse siempre como una cigua escontra les tormentes, ¿copiamos de los nuesos ancestros?. El cangués sapozáu nel dolmen diba bien protexíu al otru mundu, lo qu'aquella bona xente del neolíticu nunca nun imaxinó ye qu'algún tiempu más tarde apruciríen otra xeneración de ¡vándalos!.
************
El DOLMEN de la SANTA CRUZ
Yo voi referime agora a los estudios fechos pol estudiosu del Prerrománicu Fco. J. Borge Cordovilla que podemos lleer nel so prestosu blog: <mirabiliaovetensia>. Vamos ver qué atalanta esti autor tan célebre sobre la famosa capiella.
 |
| La Santa Cruz vista por <Mirabilia ovetensia> |
. La Crónica Rotense, del tiempu d'Alfonso III (finales VIII) diz que ye < basílica d'obra maraviosa> *, gustó-y al paisanu.
. Lucas de Tuy (primeros XIII), na Edá Madia, <Na hera de siete años y trenta y cuatro, Favila, fíu del rei Pelayo, edificó una ilesia de obra maraviosa n'honor de la Santa Cruz>.
. Alfonso X, el Sabiu (mediaos XIII), na "Crónica General d'España", camienta que < Fafila nun fexo otro que llevantar, nel primeru de los dos años del so reináu, una ilesia de perbona obra n'honra de la Santa Cruz>.
*<Obra maraviosa> pue referise al fechu de tar asitiada enriba'l dolmen xustamente. Ye'l primer casu; n'Abamia, por exemplu, ilesia y los dólmenes tán separaos. Sedría como la cripta del templu; ¿copiaríen los constructores de la Cámara Santa de la Catedral d'Uviéu o Ramiro I en Santa María del Narancu?. Los símbolos perpetúense...
 |
| Dolmen de La Santa Cruz ´ ¿la cripta del templu? (Blog de Montejuan) |
. Ambrosio de Morales (XVI : 1572) viola y vien a dicir < nun ye mui pequeña esta ilesia construyida en sillería* na llanera del valle, cerca'l Mercáu de Cangues, ellí onde Pelayo ganó la batalla a los moros.
De Fábrica perantigua agora ta encalada per fuera y blanqueada per dientro y foi llevantada por Fafila - non por Pelayo - como diz una llábana asitiada sobro l'arcu la capiella.
Dientro la ilesia hai una cueva** - dos estructures superpuestes -, a la que s'entra como por un pozu, onde hai una capiella con altar. Camienta, por boca l'obispu Pelayo, qu'ehí debe tar sapozáu Fafila pos fuera nun se ven nicios d'enterramientu (¿Tracamundia'l dolme col enterramientu de Fafila?.. De xuru.) >.
*Sillería: El fechu que tuviere en sillería, nuevo n'Asturies, fainos camentar en canteros del sur, emigrantes godos que construyíen d'esta miente (G.G. de Castro).
** Cueva: La cámara del dolmen tien 2'4 x 1'28 m. ¿Namás tenía la capiya 2,5 x 2,5 m.= 8x8 pasos?
 |
| Capiya de La Santa Cruz, irreconocible, eh. |
Favila punxo como troféu la cruz de carbayu que Pelayo narbolare na Batalla y qu'anguaño ta la Cámara Santa. Favila y la so muyer foron sapozaos delantre la ilesia seique dientro nun se podía naquellos tiempos magar quedaren nel interior al enantase la ilesia. <Y yera como una cueva onde los llugareños sacaben tierra santo...>. ¿Dos ilesies, dos partes, dos santuarios?....
. En 1632 hebo una reforma perimportante, ¿en qué consistió?....
 |
| Batalla del Puente Milvio: Constantino suaña que la Cruz va da-y la victoria. La Cruz Pelayo salvará otra vuelta a los cristianos: SÍMBOLOS. |
* Cruz nel cielu: Al emperador Constantino tamién-y tien pasao algo paecío enantes de decisiva batalla del Puente Milvio, cola que dio puxu a la cristiandá. Hasta nel día y nel mes les quieren facer coincidir. Otru paralelismu simbolismu.
. Don José Caveda y Nava, nel XIX, tamién fala de dos ilesies superpuestes, según los antiguos, y camienta la tesis del P. Carballo, primer cronista asturianu, y da la so teoría:
< La ilesia la Santa Cruz fundada por Favila en 737, mui remocicada anguaño, y de la que falen Morales, Carballo y Risco, namás conserva (¿vístila?) de la fábrica primitiva la inscripción fundacional, mui afayadiza pa los llingüistes asturianos. Paez ser que la primixenia, d'una nave cuadrillonga de (8x8 pasos) taba fabricada sobre otra que sirvía de cripta, a imaxe Santa Mª Naranco y a la que se-y añedió la capiella mayor nun lladral. Según Caveda la primitiva tenía tres naves (acordies colo de "basílica") ya una cripta. La capiella real ye patronatu los Condes de la Vega'l Seya>.
 |
| Hipótesis de reconstrucción:< Mirabilia ovetensia> |
*Montículu: Polo menos de (18x37) metros cuando Vega del Seya; abenayá de xuru que más; diríen comiendo tarrén a la lloma pa l'agricultura.
Esti santuariu foi anováu dafechu en 1632 , según se pue lleer nos lletreros grabaos nes pilastres y capiteles del arcu central. La basílica mide 15x5 metros, la sacristía - de bóveda cañón - ta al llau de la epístola talo que la espadaña; el suelu ta empiedráu lo que torga la visión de la cripta y el dolme. El que sí lu vio foi don Antonio Cortés en 1870, faltaría más.
 |
| Grabaos en ziszás, Ilesia La Santa Cruz de Cangues |
Hai otros - munchos - illustres estudiosos de la ilesia talo M. Asas (1857), Juan de Dios de la Rada (1871) qu'iguó un planu de la ilesia y dolmen y alcuentra utensilios, Juan Cabré (que descubrió los grabaos), Jordá Cerdá ( más piedres pintaes) o'l sempiternu Blas Cortina o'l espertu ya orixinal G.García de Castro que'l nuesu reedificador <Mirabilia ovetensia> conoz perbién y de xuru que tevo en cuenta pa fer la so reconstrucción dolménica, que podéis apreciar nes semeyes.
 |
| Drama nel Puentón: La Hestoria de Cangues -d'Asturies - representada en vivo embaxo'l Puente Romanu. (Semeya LNE) |
. A Xurde Morán pol so llibru guía <Camín Xixón - Cuadonga>.
. A Francisco J. Borge Cordovilla, autor de <Miriabilia ovetensia >; n'esti post restolamos en "La Iglesia de la Santa Cruz> en Cangues d'Onís.
. A Amancio Isla pol so prestosísimu artículu : <El Rey Favila, la Reina Froiliuba y la fundación de la iglesia de Santa Cruz de Cangues (737)>.
. A La Oficina de Turismu de Cangues pola información que nos apurrió asina como al propiu Ayuntamientu pola so páxina Web, tan bien documentada.
. A la Wikipedia, ventana del saber y la información. Paso media vida n'ella.
. A los arqueólogos, qu'echáis la vida tres les güelgues del pasáu pa que yo puea esfrutar de la mía.
. Al blog <casonasdeindianos> pola información de Villa María y al de <juanolallarodrigo> pol debuxu la Santa Cruz. .
A LNE pol so artículu y semeya la representación hestòrica del Puentón. Un aplausu al Ayuntamientu, siguen faciendo les coses perbién.
. A Gaspar Meana pola so "Crónica de Leodegundo", una hestoria d'Asturies en comic onde apurre teoríes bien orixinales. Yo búscola de cuando en cuando porque me presta a esgaya.
. A Palmi, que nos dio ánimos pa h.acer el Camín y amás aportónos les semeyes de la Casa Dago,
No hay comentarios:
Publicar un comentario