 |
| Les Torres de Prioriu, historia pasada y señoríu d'angüaño : Les Caldes (gayola presente) |
Ye verdá. Por aciu del Conde Cuaya y sobremanera del Arzobispu d'Uviéu, don Fernando Álvarez, arribamos a Les Caldes. A partir d'ende ficimos delles salíes pel entornu:
. 1. " Les Caldes - Puertu - Fusu La Reina - Campu de Golf - Les Caldes "
. 2. " Les Caldes - La Lluera - Prioriu - Priañes - Prioriu - Les Caldes"
. 3. " Queda pendiente visita, diurna ya nocturna, a la Cueva La Lluera (branu)". Lleva incluyida una visita completa a tol pueblu Les Caldes. Habrá que madrugar.
El conde y Potestas Gonzalo Peláiz llevónos a Picu Castiellu (Olloniegu) y per aciu d'esti algamamos a otru Gonzalo Peláez, Cuaya'l sangrín. "Coallla el sanguinario" ye un llibru de Fernando Romero con ilustraciones de J.A. Mariñas que encamentamos lleer si t'apetez facer estes rutes de "Quousque tandem, Conde Cuaya". Pa nós ye como.... ¿ el Liber Testamentorum pa los asturianos del XII ?
 |
| "La danza la muerte", interpretada por aquel Arzobispu d'Uviéu. << Soi'l que mio nome temen cuantos remembren mio nome dende les más baxes tierres fasta les más altes torres, dende'l llabriegu más mísere al imperator más noble >> |
que nel mundu sois de cualquier estáu,
el que nun quixere pagar al Obispu
a pechar s'avendrá col conde de Gráu.
Por muncho qu'Uviéu conceye o contrate,
por muncho que paute col Adelantáu,
por muncho que-y paguen a Suero del Dadu...
Soi l'amu d'Uviéu, l'andecha ye en baldre.
- Por muncho qu'ofrezas al conde cafiante,
por muncho qu'amueses "la danza la muerte" ,
por munches ilesies qu'al cielu-y llevantes
pagarás, ciudadanu, tenlo presente.
 |
| <<La danza la muerte>> |
* La danza la muerte ye una representación artística de la muerte personificada. Una alegoría en versu onde una cadarma va brindando a otres que s'amesten nuna macabra danza oficiada por un eclesiásticu . Tolos estamentos sociales son invitaos a participar: dende l'emperador más noble hasta'l campesín más feble, pasando por nobles, clérigos y caballeros. A la fin toos entramos nesa danza... Antoxana del barrocu.
Al ver el castiellu de Priorio nesa postura inverosímil, asemeyando un baille, féxonos remembar aquella representación teatral de los caberos años del medievu: el palaciu danzando y l'obispu oficiando per aciu del Conde Cuaya.
El malnomáu Conde Cuaya (nun consta mención denguna que lo fuere ) tenía siete castiellos o fortificaciones nes Asturies Centrales dende les cuales realizaba les sos fechoríes (violar, matar y robar al cuaslisquier caminante, vecín o mercante), a saber:
El palaciu Villanueva (onde dicen que ñaciere) al par del alfoz de Gráu; el turrión ( como dicen per ehí) de Cuaya, nun meandru'l Ríu Vares; la fortaleza Cabrera, na Figal, que xunto col castiellu de Baselgas xixilaba tol valle de Cuaya; el Picu Castiellu n'Olliegu, el final del conde; el castiellu d'Aguilar nel Padrún y el Castiellu de Prioriu, el que nos trai hasta equí.
 |
| "Les Caldes": Principal Avenie |
Pela antigua Carretera d'Uviéu (AS-II) cruciamos la capital del Principáu dexando a mandrecha la carreterina que nos lleva a los Monumentos del Naranco (fasta ceo) ya empobinándonos pela antigua carretera Gráu-La Espina hasta la desviación a Sograndio, que tomamos. A poco un lletreru: "Les Caldes", esti ye'l nuesu destín.
Tiramos p'abaxo y, dexando a manzorga'l Campu Golf, siguimos dica'l pueblu.
¡Pero qué ye esto! ... Camentamos tar enquivocaos al ver que la carretera pasa p'embaxo una galería-pasarela que, cruciando tola cai, xunce dos edificios estremaos. Pali-pali, como entrando a robar, vamos dexando a manzorga un palaciu y a mandrecha un hotel al que s'accede per una ponte que salva un regatu. ¡Agua!.
 |
| Aquaxana: hidroterapia nel Panteón d'Agripa |
El Balneariu Les Caldes abrió al públicu en 1776 al empar que los Estaos Xuníos se declaraba como una nación independiente. Les obres - con planos de Ventura Rodríguez - tuvieren dirixíes pol primer arquiteutu oficial d' Asturies: Don Manuel Reguera (¿suénavos?). Ye'l de la moderna ponte del Pontazgu, n'Olloniegu, que yá tenemos patiao por mor del otru conde Gonzalo Peláiz. Tamién iguó la ilesia- convento de Santo Domingo de Guzmán onde s'abellugaré "El pelegrín valiente" camín de San Salvador (vais tener que revisar la entrada "Ollonigu- Vegalencia".
La Casa Baños onde angúañu s'alcuentra'l Centru Termal "El Manancial" tien les primeres referencies nel sieglu XVII siendo nel XIX cuando esporpolla d'afechu: El Gran Hotel, el Salón de los Espeyos, la Pasarela fierro (¡qué pasada!) y el Casinu, son les obres más vultabes.
Algamó tan alta fama qu'hasta'l mismísimu presiende de Gobiernu de la dómina, el lliberal y masón Mateo Sagasta (1892), vieno a recuperar de los apulmonamientos de la política. Claro, que daquella yá tenía llegao a un apañu con Cánovas (Pautu del Pardo) pa sustituyise ca dos años nel gobiernu, mentanto Alfonso XIII algamaba la mayoría d'edá.
COTILLÉU: A min paezme que vieno a chisbar les nueves obres.... Yera inxenieru de Caminos... Deformación profesional.
 |
| ¿Petezte vivir nes Caldes? |
Al finar l'empedráu faemos una rotondina delantre una vetusta entrada y torcemos a mandrecha. A la vera un ríu - ¡agua!- aparcamos. Enfrente nós: ¡Aquaxana!, una moderna instalación de tratamienos termales. Vamos salir d'esti pueblu polos ya sanos como corales.
Pero enseguida sentimos daqué, como una atracción irresistible...
- ¡Mira que torres!
- Ye'l Palaciu de Prioriu. -Y ensin movenos del sitiu ya facemos la primera semeya. Sedrá la primera de munches. Nunca nuna salida sacamos tantes semeyes prestoses; nun sé cómo me voi arreglar p'amosávosles equí. A ver...
 |
| Chisbando |
Nun teníamos pensao denguna ruta en concreto; namás veníemos a chisbar peles Caldes, Prioriu, Piñera, Caces, La Lluera... Patiar los dominios de conde ya Obispu.. "Pour quoi pas?". Asina que, a lo tonto y a lo fato, dexámonos llevar pola mor de la corriente... Entramos, camín de Caces, per un senderu acutáu perfechamente arreglaú:
 |
| << Gayola nes Caldes : Azulones>> |
- Esto ye una sienda oficial, ta mui guapo ya enmanrcao.
- ¡Qué pasada!. - El ríu, el senderu, la tarmuda vexetación....
- ¡Mira, dos coríos!
- Azulones, son pareya. Casi siempre anden empareyaos.
- Estrémense bien el machu de la fema. El más llamativu ye'l machu, con esi collar blancu nel gargüelu verde y azul... La fema ya más parda, tirando a pedresa. Una discretra señora.
"L' Anas Platyrynchos" ye un ánade migratoria pero que yá ta asentada práuticamente dafechu n'Asturies ( normal, ¿pa ónde va dir? . D'equí namás colen los universitarios. Sí, esos que costó un güevu preparar... Y si alcuentren, contentos).
 |
<< Qué meandros fai la la historia al percorrer los caminos de la vida. Enantes yeres la pompa de clero, nobles ya ricos de por vida. Ya güei venimos, gayola de plebeyos gradecíos a la vida. Tamién nós hemos historia. Munches vueltes, señor míu, da la vida. |
Damos vueltes alredor del castiellu faciéndo-y ún ya mil retratos. Dannos ganes de saltar el Ríu gafu (Gafo) y algamar pela yedra de les torres hasta les notables almenes. Pero'l castiellu tien amu.Y ta habitáu, lo que nos congratula abondo; tamos cansaos de castiellos espertéyicos.
Esti idílicu castiellu modernista ( una suerte nun se cumpliera la orde d'esaniciu roblada por Fernando IV en 1306) pertenez anguaño a la familia Quijano Secades que disfruta d'él, sobre tou, nel branu. Cuenten pel pueblu que l'afable Señora nun alcuentra día pa colar... ¿Quién va querer dir pa Madrid y dexar un edén d'agua y vexetación calizo? Cercáu polos ríos Gafo y Nalón esti palaciu neogóticu, reconstruyíu baxo la solombra d'aquel primitivu nel que s'abeyugare Alfonso II el Castu*, presenta n'actualidá dos romántiques torres flanqueando un cuerpu central. Le jardin potager que lu arrodia dicen que ye una pasada (diiez puntos, colega). Qué pena que'l so valedor - don Ángel Custodio Secades - nun pudo, por unos díes, pone-y el ramu.
*Alfonso II el Castu, perseguíu (795) pol cafiante Hixem I, al traviés de Ventana y Quirós, abeyugó camín d'Uviéu nes torres fortificaes de Prioriu. Nun hai data de construcción pero bien pudiere tenelu llevantao - o iguao - esti llaboriosu rei; pa sentise ellí seguru...
 |
| << Dos guardianes tien Uviéu na fastera Les Caldes; son les Torres de Prioriu, fermosura incalculable >> |
Pero midió mal l'Obispu. La burgusiona ovetense nun taba dispuesta a perder el momiu. De mano contraten al caballeru Suero del Dado pa protexer les sos inversiones mercantiles nel comerciu con Castiella:"Ente Mieres y Prioriu acabósete'l mogollu".
Cuando ven que ye poco organicen les milicies conceyiles y andechen col Señor de Noreña, el so primu Rodrigo, qu'ha venir con un exércitu pos tampoco taba dispuestu a dexase abasayar... (¡Bien fecho!).
Dellos años más tarde (1.381) sabemos que siendo alcaide de les torres don García Alvarez de Palomar rindío homenax al entós obispu d'Uviéu, el célebre Don Gutierre. (Los obispos d'Uviéu fueron davezu de cuidáu. Y ye que Vetusta ye'l trubiecu la Reconquista).
 |
| Desembocadura del Ríu Gafu nel Nalón (delantre'l castiellu) |
Siguimos el ríu de la historia. De sópitu decatámonos que'l pequeñu filu del Gafo esvanezse n'otra corriente d'agua enforma más enantada, el Nalón. La pequeña historia de Priorio , talo que la del Conde, desemboca n'otra de mayores dimensiones.
Tamos so la ponte del Nalón, na carretera que tira pa Caces. Camentando en qué facer, si tirar pela sienda acutada o buscar el camín de La Lluera se nos acerca un señor:
- Tenéis un paséu per guapu percorriendo esta sienda. Si siguis la corriente'l Nalón aportáis a Puerto. D'ehí pasáis a la estación del tren en Fusu La Reina y tornando a la sienda oficial, tres pasar un tunel pergrande, algsamaréis al Campu municipal de Golf de Les Caldes.
- ¿O sea, que ye una ruta circular alredor d'aquella llomba?
- Esautao, y nun vos lleva nin dos hores.
 |
| <<El "yelmu calizu" de Suero del Dado xixila sollerte la xente corriente cumpliendo'l mandáu >> |
Dicho y fecho. Vinimos a conocer. ¿Qué tenemos que perder? ... ¡Andando!
Vamos perdiendo la mirada al compás de les agües del Nalón. D'esmenu decatámonos que, dende la ortra oriella del ampliu calce daquién nos está xixilando tres d'un yelmu calizu... Una blanca roca calcárea amuesa menazante los sos güeyos cavernosos... ¿La pantasma de .Suer del Dado?
- Tenéi curiao, caminantes y respetái l'entornu, que nós tamos xixilantes pa que nun causéis destrozos.
 | |
| Camentando na lleenda de <<Pablín y la Princesa>>. |
 |
| Raitán (Erithacus Rubecula) |
Cuenten que na llonxana Edá Media moraba n'esti castiellu un señor nomáu don Rodrigo. Tenía una fía perguapa que s'enamoró de Pablo, un paxe del caballeru. Enteráu so pá trató de matalu, pero esti defendió y acabó cola vida del proxenitor de la so amada. Irene maldíxolu ya refugólu. Esti, anoxáu y esprecetáu dafechu, tiróse al ríu matándose escontra una roca. Entá puen apreciase les güelgues del sangre que salpicaron l'entornu>>.
Un paxarín que pasaba per ellí ablucare mirando la escena colos güeyos remellaos, quedándo-y asina pa siempre. Tamién s'entafarró del sangre polo que pasaron a llama-y "Rubécula" (Erithacus Rubecula), polo coloradín que se vía.
 | |||||
| La Pantasma de Pablín imprentada nel Llique Parmelia |
Atrás dexamos, a manzorga, un moxón que nos marca'l "Km 2" y a mandrecha la pola vexetacíon de ribera que bordia'l Nalón (humeros, bedules, ablanos, salgueros, fresnos) enmarañada con lianes de bilortos y yedra. Davezu sientes como na xungla.
Un llique clarín llámanos l'atención:
La "Parmelia saxatilis" dase nos árboles y nes roques, si tan protexíes meyor. El so talu ablancáu aguanta bien la contaminación seique n'esta fastera nun ye'l casu.
¿Sabes que na Edá Media emplegaben esti llique pa tintar la ropa de colorao? Sedría per aciu del sangre de Pablín?....
 |
| "Garza Real" (Ardea Cinerea) mimetizada na viesca ribera |
Vemos un xubiláu disparar a tutiplén ( d'estos pue esperase cualquier cosa) sobre daqué que nun acolumbramos. De sutaque un ave da un esnalíu. Ye enforma grande, cuasi blanca... buxa... Pósase maxestuosa nuna rama:
- ¡Una garcia real!
- Sí, hai varies. Vengo casi tolos díes dende Uviéu a retratales. Esti paséu ye un relax total.
Nós facemos lo mesmo (que somos de la mesma mena). ¡ A disparar!.
La Garcia Real ( Ardea Cinerea) ye un ave de gran porte (90 x 170 cm) de la familia de los pelícanos. Provién de centru Europa ya Asia y onde meyor s'asaya ye nes zones templaes del globu. N'Asturies tan asitiaes y pues veles pescar - col pescuezu estiráu y el picu en forma cuyar - nos nuesos ríos, como ye'l casu'l Nalón. ¿Alcordáivos cuando Pere se tien perdío por mor de la pelegrina francesa que quería visitar El Salvador*?
* (Mira la entrada: <<PrOTESTAS: Olloniegu-Vegalencia>>)
Y siguimos pel silenciu la corriente hasta algamar a una ponte colingante. Una pasarela peatonal de 96 m. de llargor na sienda : "Fusu de la Reina- Tuñón" . Un cartelu encamienta nun parase so la mesma, pero quién se resiste... Una semeyuca namás,ho...
Al otru lláu de la pasarela una piscifactoría va introducinos nel pueblu. De nun querer visitalu tiráremos de frente pero quié s'arresiste... Petecíanos dar un vueltu por si nos alcontrábemos con xente de la Hermándá ( un pautu ente conceyos pa lluchar escontra'l malfechor Cuaya). Sí, igual andaba per ellí l'alma de García Rodríguez de Banduxu, que viviere en Puerto. O los fíos de Suero Menéndez de Valdés, que tamién brindaren la so ayuda a la ciudá. Taben toos hasta los.... Masque matar, robar y violar nun facíen les güestes d'aquel conde sangrín.
 |
| Pasando a Puerto pela ponte-pasarela |
Puertu, ye un pueblín soleyeru asitiáu na falda una llomba. Foi ún de los pueblos más castigaos pol conde Cuaya. Nun ye d'estrañar. ¡Vaya vega faneguera!. Debía tener abrasaos los numberosos vecinos. En 2008 yeren 218 los habitantes, pero en 1968 albergaba a 630 persones.
Caleyamos per él hasta ascender a la ilesia de San Pelayo.
Camentamos daqué con unos amables vecinos y empobinámonos dica'l Fusu la Reina tres arrodiar una llamativa montaña caliza que ruempe'l planu de la vega. Conocemos la estación. Yá tenemos fecho la sienda: " Oviedo-Fusu La Reina" . Agora trátase de siguir per ésta camín d'Uviéu pero quedando nes Caldes per aciu del Campu Golf.
 |
| Bancu pa xubilaos, ya otres menes |
A poco de salir de Fusu damos con una pequeña Área Recreativa y sentamos a almorzar nuna mesa de madera, como unos señores. Dacuando pasa un ciclista, un mediufondista o un garapiellu muyereres esplayándose gayoleres. Nunca nun tas solu.
El chorizu La Pontona y el cuartillu de vinu pónennos como unes castañules, como si nos fixere falta... Namás falta que pasare'l tren...
 |
| Tunel de Premaña. ¿Y si apruz el tren?... |
Y llegamos al famosu tunel que nos tienen camentao: El tunel de Premaña. Otru día hemos volver a percorrer el cantu per la cumbrera del túnel. Dende lo alto La Lluera da gustu ver, sobro'l val de Les Caldes, una enantada llomba qu'alberga lo antiguo'l pueblu. Otra disculpa pa volver...
 |
| Campu Municipal de Golf "Les Caldes" |
Al salir de la sienda asfaltada - antigua vía de tren - que nos llevaría hasta Uviéu (7 km) en menos de dos hores alcontramos col Campu de Golf de Les Caldes.
¡Qué pasada!.Talo que tolos campos de golf.
Esti campu - de 18 fuexos ya un par de 71 güelpes - inauguró nel añu 2000 siendo alcalde d'Uviéu don Gabino de Lorenzo y Presidente del Principáu don Vicente Álvarez Areces.
 |
| El Molín |
El campu de golf ye una maravilla, pero hai que siguir. Colamos per aciu d'una antigua ponte construyida por Urbano González en 1934, l'añu la revolución d'Asturies. El pueblu, agradecíu, dedicó-y esta placa. Tiramos pela agradable sienda asfaltada a la vera del ríu Gafu. A mandrecha, al pie d'una casona, un célebre y antiguu molín a dos agües.
Tas tan agusto que nun te petez llegar al aparcamientu:
<<Verde, molín, agua, ponte.
Cueva, gatín, agua, fonte>>.
 |
| Poques coses aselaben los ardores espirituales de la Rexenta. Los baños termales yeren ún d'ellos. |
Tamién pues alcontrar nes Caldes un centru termal: Aquaxana, ya un Balneariu Real. Depués d'una bona caminata ya una cena nel restaurante Viator bien mereces un reposu decimonónicu nuna habitació d'época. Claro, que llevantase a la mañana y tomar el desayunu nel Salón de los Espeyos pue ser entá más ablucante... Pensarás que tas antroxando.
Santurio, 10 de Febreru de 2016. Miércoles de Ceniza.
<< Son les Caldes un edén
del que nun yes a colar.
Solo puedes escapar
si te prometes volver >>
 |
| Zarramos, señores, n'iviernu . Tornamos, Señora, pel branu. |
agasayos:
 |
| Traenme suerte los micinos, faen prestosa compañía, sabes que tan contigo arriendes propia llocura. |
. A Fernando Romero y J.A. Mariñas: "Coalla el sanguinario".
. Blogueros y páxines web:
. Wikipedia. Asturnatura. Páxina Web del Balneariu Les Caldes. Mirabilia Ovetensia.
No hay comentarios:
Publicar un comentario