per Peña Regá
 |
| Dende la Peña Regá ferregüeyamos el Picu Lluxoriu, o ... ¿sedrá un espeyismu? |
El llunes prometía sol, y cumplió. Paecía raro, yera una islla lluminosa nel mapa del tiempu onde nun s'apreciaba otro que gotines pingando de les nubes. Un día melguerru p'averase a Cenera, niciu'l <<Camín de Niria>>.
¡Ah! ¿Entá nun te lo dixi?
 |
| Oníricos caminantes siguiendo'l <Camín de Niria> |
Tamos tramando facer el "Camín ANICIÁTICU de Niria". Enteru. De cabu a rabu pero por estayes, magar que nun disponemos de tres o cuatro díes siguíos y completos. Asina que cada día avanzaremos unos 5 ó 6 km ( que deberemos desandar al puntu onde aparquemos el coche). El nuesu pruyimientu ye siguir tres los pasos de Niria de contino, talo fexo Melendo. Pero nin somos los Señores de Cenera nin podemos escaecenos de delles obligaciones ineludibles. Empero sedrá lo primero que faigamos en cuanto se dean les circunstancies afayaices.
El Camìn - al rodiu los 90 km - dan pa muncho y pa munches maneres de percorrelu. Si Clodo, Melendo ya Onirio echaron tres díes a caballu - tamién ye verdá qu'en tiempos d'Alfonso III, el Magnu, les caleyes taben un poco más enllamuergaes qu'anguaño -¿cuántos podemos emplegar nós, unos oníricos caminantes?
 |
| "Camín de Niria", peles Asturies Centrales |
Sí, una novela que lleí a la solombra d'unos abedurios, los que güei atopé perdayures camín de Peña Regá. Los mesmos, camiento, qu'abellugaren a Fulgencio Argüelles mentanto novelaba la so historia. Y los mesmos que nos van servir de finxos pa amosanos el camín que nos ha llevar tres Niria talo qu'al prócer Melendo, abenayá, na dómina del caberu rei de les Asturies, Alfonso III el Magnu.
<< N'esti mapa d'a manzorga, de les Asturies Centrales, ta asitiáu el "Camín de Niria". Sabéis qu'entama en Cenera, pero nun sabéis onde acaba masque podéis barruntalo... Diremos cuntándolo pasu ente pasu pa caltener la sospresa hasta'l final>>
 |
| <<Na campa Peña Regá ves les señales del cielu, sientes esi magnetismu l'ancestru>> |
¿ Petezte venir con nós?...
¿Prúite siguir el <camín del amor>? ....
Tendrás que llaniar enforma, xubir cuestes emprunes, baxar per arrimadiellos, cruciar pontes, salvar regatos nidios mientres t'embaeces cola alborá de los malvises... Delles vegaes veráste acompañáu pela civilización, d'otres escaecíu del mundu pero mayormente sentiráste abellugáu pola Natura y podrás siguir les enseñances del vagamundu principe Magilo << si observes les señales del cielu y de la tierra, si sientes les sos voces - deformaes delles veces ya afalagadores otres - y aprendes a estremar lo casual de lo necesario y sobre too a valorar la PAZ como'l principal manancial de sabiduría >>
Pa que t'entre'l petite y dir faciendo boca voi llevate güei hasta la Peña Regá, nes faldes de Picu Llusoriu, el país de los arrónides*. El track que vamos siguir - cuasi circular - ye esti:
. Track: Cuna - Inxertu - Los Mártires - Sobrobio - La Pandiella -El Rabatilu (Campa Rañaoriu) - La Peña Reigá - Mayáu de La Cueva los Pastores - (Ilusión del Llosoriu) - Torna a P. Regá - La Tazá - El Coxal - Viesca - Viade y Cuna.
*Arrónides: Son los habitantes d'un pueblu de lleenda novelada.
 |
| SIENDES pel entornu de CENERA Gúei toca Sienda 2 : CENERA - GALLEGOS (la colorá) |
Aportamos al Valle del Cuna per aciu La Minera, saliendo dende Xixón. En Mieres entramos n'autopista (A-66), camín de Lleón y salimos p'hacia Figaredo, darréu llibrar un par de rotondines. Ceo alcontramos una indicación que, tres cruciar la ponte sobro'l Caudal, pue llevanos a Uxu y Santuyano pela manzorga o a Cuna y Cenera si nos empobinamos a mandrecha, que ye lo que facemos. Paramos nuna revuelta enriba'l Pedrosu pa retratar una cartelu perchulu que trai una ruta pel entornu del Val de Cuna y Cenera, per onde queremos caleyar ensin tener claro del too lo que queremos facer.
 |
| Cartelu desplicativu del Val de Cuna y Cenera |
Tiramos pa Cenera col envís de retratar los palacios - el d'arriba y el d'abaxo - y xubir camín de Gallegos pero al entrar en Cuna vimos un aparcaeru tan afayadizu nuna plazoletina, al par de la Ilesia, que nun yera plan de perdelu. Asina qu'entamamos ruta dende Cuna:
- Yá visitaremos Cenera pela tarde....
Semeyes al rodiu la placina: l'antigua escuela, la Ilesia de Santa María, fermoses cases de galería... Y crucimos la carreterina pela cucia ponte sobro'l ríu Cuna que nos ha llevar a Inxertu. Hai que xubir......
 |
| Cuna: L'entamu la ruta < Peña Regá>. ¡Entra nel embudu del tiempu! |
Pero ye prestoso. El día púnxosenos a güevu: un caldiu solín de primavera qu'invitaba ascender a les montañes xusto pa contemplar el Valle ... (los homes somos asina de contradictorios).
Enseguidina alcontamos un palaciu. A mandrecha, colingando sobro la carreterina y acomodáu al tarrén, metanes la proteición d'un pinu, menacia'l palaciu de El Valletu. Tenemos que llevantar la vista enforma pa poder aprecialu; paez que nos pue venir enriba... Tranqui, lleva ehí dende'l sieglu XVIII. Nun va da-y por cayer güei...
 |
| La Casona de los Vázquez Prada: Palaciu del Valletu |
L'edificu palaciegu - el primixeniu del XVIII - tien planta cuasi rectangular en dos pisos. La fachada principal ábrese por tres arcos carpanel sobro solemnes pilares que sostienen los cinco ventanales abalconaos del pisu superior. L'aleru central, en forma de frontón, remata col escudu d'armes familiar nun áticu achaflanáu.
 |
| Entrada principal de Palaciu. (asturnatura) |
La fachada norte tien un adriu de madera de lo más afayaizo y la sur cola trasera (E) engalánense con una galería acristalada, llamativa por demás, que caldia
 |
| Tamién el Palaciu'l Valletu ta inxertáu na viesca |
Xubiendo, pali-pali, vamos aportando a Inxertu, l'aldea más antigua del valle.
<< Cuenta la lleenda que nesa llomba del valle había un texu xigante que fundiendo los raigaños nes entrañes de la tierra paecía inxertar el cielu cola tierra.
Nueve gües tuvieren pastiando durante nueve díes pela redolada'l texu. Sacrificóse'l más fuerte y, col so sangre, trazóse un círculu primero y darréu llevantóse una muralla que foi l'orixe del pueblu.
 |
| Fonte y Llavaderu d'Inxertu. ¿Sedrá l'orixe de la lleenda? |
<<L'agua ye l'orixe de la vida y l'amor
la fonte que la caltién>>
Precisamente al par de la fonte falamos con unos nativos sobro les posibilidaes que teníemos d'aportar al Picu Llosoriu teniendo en cuenta'l día lluminosu que taba quedando.
-Ta lloñe, dixeren. Podéis escoyer: O dir pela manzorga hasta Gallegos y esguilar hasta'l Picu o tirar a mandrecha hasta alcanzar Sobrobio; d'ellí a Pandiella, xubir a Peña Reigá y depués al Llosoriu.... Si vos queden ganes...
Prestó la respuesta y tiramos pa Sobrobiu. Pero enantes nun pudimos reistir la cabera mirada a aquel finxu del valle, aquel pueblín llevantáu nuna llombra sobro'l valle... ¡Una pasada esti Inxertu!
 |
| Insiertu, un pueblu inxertáu nuna llomba del Val de Cuna. |
Y ensin salir de la gayola enseguidina aportamos, talo que devotos romeros, al santuariu Los Mártires: San Cosme y San Damián. Estos dos hermanos ximielgos nacíos nel s.III d.X. na provincia romana d'Arabia Pétrea foron unos afamaos mélicos - de los que son patronos - que sanaben gratis a los probes que teníen a bien escuchar la pallabra de Dios, per aciu de Xesucristu. Esto, a la fin, costó-yos el martiriu. El gobernador de Cilias mandó tiralos al mar, pero una fola xigante aportólos a la oriella sanos y salvos. Darréu ordenó quemalos vivos pero los que morrieren amburaos foron los verdugos. A la postre cortó-yos la cabeza pero... El sangre espardió pel imperiu la pallabra de Xesús de Nazaret.
 |
| Santuariu de Los Mártires: San Cosme y San Damián << Y les campanes de los mártires sentiránse en toles aldees, dende'l Picu Llosoriu hasta'l ríu d'inmensu Caudal>> |
Xubir, andar y ferregüeyar...
Ceo apòrtamos a Sobrobiu d'Abaxu. Entrugamos a un señor:
-Bueno, El Llosoriu ta lloñe enforma... Tenéis más cerca la Pandiella, depués vais viendo..
 |
| Sobrobiu |
- Si nun andáis apuraos... El día ta pa ello y el camín, anchu y afayadizu, ta secu. Amás les vistes... (Tol mundu ye consciente de lo que tien)... Taremos apartaos pero la gayola les vistes.... A Pandiella aportáis enseguida.
- Munches gracies, señora. Y sí, ye verdá que merez la pena xubir hasta equí namás que pola panorámica.
- Mirái, ellí arriba ta Pandiella. D'ehí hasta la Peña Reigá entá vos queda un cachu. Bueno, a dar la vuelta siempre tais a tiempu... Claro, que coles vistes que tenéis ellí...
- ¡H.a, h.a, h.a!.... - Rimos toos a discreción.
Asina que p'arriba..... Pel camín de La Pandiella, a la solombra de castaños y bidules, alcontramos un tocón.... Llámonos l'atención ... Tenemos alcoldanza de daqué... Y prendióse la bombilla:
- ¡El Yelmu de Piniolo!.
- ¿Qué tas diciendo?
- Que la estirpe de Piniolo precisa d'un escudu d'armes. Yá lu tengo mediu pensao y, amás de la lluna, l' abeduriu y la palma de los Mártires tien de llevar un yelmu coronándolo too. Ya esti tucu acaba d'amosame qué forma ha tener ¡el Yelmu de Piniolo!. Bono, esto ye lo que camiento yo....
- Tu vas terminar como'l Piniolo, aquel de los siete fíos...
 |
| ¿Tendrá sacao d'equí Piniolo el Yelmu la so estirpe ? |
"Efeutivo. El yelmu qu'ha sopolexar l'escudu d'armes de los Señores de Cenera va tener una forma mui asemeyada a esti tucu: Arredondiáu pela sobrecalva cimera y con una especie de trompa delantera o barberón más dos colmillos alaos pa protexer el pescuezu. Namás-y falta la güeyera porque visera nun precisaba aquel monolíticu cabezal.
¿Inventu del primer Señor de Cenera darréu les guerres de Portugal?. El pá de Piniolo, el güelu de Melendo, algamó a capitán por aciu los méritos adquiríos nel asediu de Llisboa siendo soldáu d'Alfonso II, el Castu. Bueno, esto ye lo que cuenta la lleenda... Y pa min ye pallabra de Llei>>
* (Nota: El yelmu de Piniolo ta iguándo en ca'l ferreru mentanto l'escudu familiar quedó em manes d'un menetral de Llaviana que pidiere modo en palaciu )
Discutiendo camín arriba cómo aquel Piniolo y los siete fíos finaren los sos díes cola tiesta colingando nun carbayón a la entrada W. de la muralla d'Uviéu en tiempos del Rei Ramiro,
"La vara de la xusticia", aportamos a la Pandiella.
Tamos de suerte. Un perru sal a saludanos. L'amu, que lu siente, sal a la nuesa escontra por si acasu'l tratu colos caminantes nun ye tolo afayadidu que debiere.
 |
| ¿Qué sedría de Pandiella de nun ser por Xuan y la so Costiella? |
Xuan Pandiella (¡como non!), el maríu de Concha, el campesín qu'espardió'l sudu en Nicolasa durante trenta años, tevo esplicándonos per onde algamar a Peña Regá ( que yera yá'l nuesu destín definituivu, porque la cuesta qu'había que baxar taba faciendo esmornia).
- A la vuelta, si queréis dir a Gallegos podéis garrar ehí mesmo una caleya que vos lleva direutos.
Tres una despidía afalagosa - que paecía más un "fasta ceo" - empobinamos cuesta arriba hasta aportar a una campa:
- Per un camín ente dos praos. Nun tenéis perda. Daivos cuenta que'l Llosoriu ye aquel picu que veis elli, dixo apuntando pal noroeste.
Dicho y fecho. Dexamos la Pandiella, una planicie n'altura, y pasando pel Rebatilu (si te digo la verdá nun sé cuando, porque cartelos nun había, pero como lo dixo Xuan...) empatamos con una llanera que brindaba unes vistes impresionantes ( Mieres primero, la carretera'l Padrún darréu y más tarde'l valle d'Olloniegu, La Manzaneda ya Uviéu).
 |
| "L'allabancia del horizonte" Allá, nel finxu del cielu , si sigues "Camín de Niria", tas na capital del Reinu. |
- ¡Mira, el Camìn de Niria! . Per to eso tenemos que pasar bien ceo, cuando faigamos el Camín Aniciáticu
- Piénsalo bien, mochileru. Alcuérdate que yá nun t'alcuerdes cuando te xubilasti...
- Caxigalines a mín... Si Niria y Rigio travesaren con un carrucu toos esos montes ¿por qué nun vamos poder nós col GPS y colos caminos más acordies colos tiempos? . ¡Cuayu, rapaza!
- Yá veremos como te les apañes cola pata arrastru...
 |
| << Na Campa Peña Regá ves les señales del cielu, sientes - magnetismu ancestru - los clamores de la tierra la PAZ , el fin caberu>> |
-¡Peña Reigá!.- Salióme'l nome ancestru.
Una menada caballos salió a saludanos. Los prietos paecíen asturcones - ¡qué menos! - . Yá fechos al turismu. asitiarón de manera tala que pudimos retratalos con un fondu prehistóricu:
- Venga, agora. A ver como te queda la semeya cola peña Reigá detrás y el Llosoriu al fondu - camentó pa sigo l'equinu. Pero yo entendí la so mirada.
 |
| La menada posa: - Venga, chaval, aprovecha; tienesme a güevu. Peña Regá bien cerca y l'imponente Llosoriu al fondu. |
- Gracies, equinos, nun esperaba menos de vós. Tais bien civilizaos. Ta lluéu.
Y tiramos camín d'aquella peña que sobresalía na campera como si d'un imán se tratare.
¡Qué paisax!.... Mientres caminábemos díbemos nortiando pa tolos costazos... Mieres, el Padrún y los montes que te lleven a Uviéu a mandrecha; un rebañu de caballos pastiando a manzorga y el solemne Llosoriu al norte.
Hebo qu'apartase de la pista, enllamuergada per un momentu, p'averase a aquella mole cuarcita que remembraba la esfinge de Ghizé.
Talo que la exipcia, maxestuosa ya axorizante, paez curiar los túmulos que los sos ancestros teníen semao perdayuri. La verdá ye qu'impón... ¿Qué te paez?
 |
| <<La Esfinxe de Peña Regá ta curiando la campera, los túmulos del Llosoriu ya tou'l qu'equí s'avera>>. |
- ¿Qué, paramos a xintar equí, al par d'esta bidul, o averámonos un pelín más al Llosoriu?
- Nun sé qué dicite... Esti llugar dizme muncho y si pa enriba tamos a la solombra d'unos abedurios...
Pero ye un poco temprano...
- ¿Y si nos allegamos al Mayáu Pastor? Tol mundu nos faló d'elli...
- Pos venga, en marcha; hasta la Capiella los Pastores.
Llaniar per una campa cola yerbina bien curtio, un solín afalagador y vistes a les cuatreo esquines nun s'algama tolos díes.
 |
| "Nun sabes cómo me llamo...Nun sabes cómo me llamo..." |
Cerca d'una cabana, nun práu ensin pastiar un páxaru medianeru col plumax pardo ya acanalao fainos señes pa que lu retratemos:
- A ver, ho, una semeya... Que güei ta'l día pa ello.
- ¡Qué picu tan llargu tienes! ¡Y fuerte! Pa xintar cascoxos debe venite per bien... Cómo t'apelliden, ho?
- ¡Ai, guapín; eso has d'averigualo tu! .Ya entamó asonsañame canturriando: "Nun sabes cómo me llamo, nun sabes cómo me llamo..."
- Nun t'esmolezas, chuleta, yá verás cómo doi contigo... ¿Tienes ganes d'enredar, eh?
- Delles vegaes abúrrome un poco... Antiguo taba más ambientao ésto... Mio güelu tienme cuntáo unes histrories.....
- ¿Histories? .... Eso ye lo que presta a mín... ¡Cunta, cunta!
- Pos siéntate un poco a la solombra d'aquella bidul qu'acompaña a La Esfinxe la Regá.
- ¿Por qué xubisteis equí?
- Por mor del << Camín de Niria >>.
- ¿Qué camín ye esi?. Nun tengo conocencia d'elli.
- Normal. Ye dalgo nuevo. Tan nuevo que ta en plena... fabricación.
- Vamos, ¿qu'entá hai coses por aclariar ?
- Exauto. Queda alguna cosina por precisar, pero poca cosa; yá lu tenemos dio descubriendo pasu ente pasu, por pequeñes estayes. Agora namás que ye ponese a ello dafechu, en cuantes dispongamos d'unos pocos díes.
- ¿Ya ónde escomencipia'l Camín ?
- Tien d'entamar en Cenera, al par de los palacios: el d'Arriba y el d'Abaxo.
 |
| CENERA: Equí entamó too.... El niciu'l <Camín de Niria> |
- Guapu comienzu. ¿Y pasa per equí esi Camín?
- Non, pero dende equí podemos ferregüeyar bona parte délli. Mira, pasa per Ablaña, pel Padrún, per Picullanza, per Uviéu....
- ¡Coño, qué guapo! Danme ganes dir contigo...
- Podemos tar en contautu, si te metes nel mio blog... Alcuérdate, <<Camín de Niria>>
- Por cierto, ¿quién ye Niria?
- Una mocina perguapa que mora en palaciu.
- Y que tien un amorucu, ¿eh?... - dizme asonsañando.
- Nidio. El Camín ye una historia d'amor.
- ¿Y que termina.....?
- ¡Ah!. Eso tendrás de dir descubriéndolo tu pasu ente pasu... ¿Qué te paez?
- Paezme perbién, "Camín de Niria". Pienso siguir los to azares. ¡Ta lluéu! ¡Y que tengáis bon día!
Claro que lu tuviemos. Conocelu a elli y les so histories foi motivu suficiente.
 |
| Hasta'l Val de Nicolasa llega la perllonga solombra de los abedurios. |
<< Mirái, estes histories tan feches a la solombra de les bidules que, como veis, ye un árbol perabondante n'esti cortinal. Cuando deis cuatro pasinos vais acolumbrar nel fondu valle, a mandrecha, una mancha azulada. Ye'l Pozu Nicolasa, que ta nel val del mesmu nome.
- Precisamente nòs algamamos equí siguiendo la solombra de los abedurios >>...
. L'árbol de la sabiduría:
. L'abeduriu o la bidul ( Betula Celtiberica*), ye un àrbol plani-caduci-foliu d'ente 15 y 25 m. d'altor, cola groma cónico-piramidal y de cañes flexibles colingando sobro los caminantes que quieran tomar la parva embaxo la so solombra. Ye perfácil conocelu pola so corteya blanco rellumente qu'esfogaya fácil, talo fueyes de papel. Los celtes nomábenlu betu y l'apellidu cetibérica vien-y por ser - esta especie - endémica de la Península Ibérica (mitá norte). Sepas que pues alcontrate tamién con bidules lloroses del too (B. péndula Roth) y hasta prietes (B. nigra).
La fueya ye simple, alterno y peciolao col llimbu romboidal y aserrao. Si-yos toques los guaños puen quedate los deos tomentosos (¡ai, Dios!, pegañosos).
 |
| Tueru esfoyáu del abeduriu. |
Tien les flores masculines y femenines nel mesmu pie (monóicu) presentando les primeres llargos amentos colingantes y les femes n'ovoide cilíndricu. Florez na primavera y poliniza col aire (anemògama). El frutu nun ye otro qu'un biltu piquiñín, con alines chaparretes, que' esparde l' aire al acabar la seronda, que ye cuando más guapu s'amuesa l´árbol cola fueya mariello cámel.
Dicen que la bidul ye una planta invasora - a min préstame más colinizadora o pionera - que protexe los suelos ermos anque esporpolla mui rápido nes fasteres llentes y fresques del monte supratempláu (700/1800 m) onde se fai dominante. Claro que pue amiyar más p'abaxo y ya fácil alcontrala hasta tomando'l solín a la vera'l Ríu Cuna... (¡toma, ye helihófila, como yo!).
 |
| Ehí lu tenéis. Mazcaritáu de llobín (amigu de Fernán Morán) . ¿Veislu? Dispuestu a xintar fueya y amentos. Ye un inxanu, proteutor de la viesca. |
Mira, si'l terrenu queda ermu - que lu talen o lu quemen - va corriendo llantase la primera mentantu se forma una previesca pero... en cuantes la viesca asitia - gracies, en parte, a les auxines* que l'abeduriu escreta - va amusgando pali-pali a cotes más altes dexando pasu a les chules de la parroquia, como los quercus, presumíos ellos...
*(Les auxines son fitohormones - como la "xiberelina" o'l "floríxenu" - que regulen el crecimientu vexetal. Sinteticen nel ápiz de los tallos y desplácense al restu los texíos per aciu del parénquima qu'arrodia los fexes vasculares. Tamién afala'l floriamientu y el cuaye de los frutos).
- L'árbole de la sabiduría , na cultura celta, ye una especie de vida curtia por mor d'abondos fungos que se llanten nes son mancaures per aciu d'animales ¿xabaces?: Corcios, robezos y xabalinos pásendo de viciu rascando'l llombu escontra les esfollaciones de la so corteza nidio. Por contra tamién fai bones migues con fungos simbióticos colos que micorriza: Boletus edulis, Lactarius pubescens, Amanita muscaria (la que Capiellín Colloráu prindaba p'afatar la casa so güela)...
La so madera - abondo impermeable - tien bayura d'usos: preseos pa la casa ( escudielles, xarros, zapiques, arnos pal quesu,...) , preseos pal trabayu ( mangos, madreñes, araos,...) y sobre manera, aplicaciones melicinales.
¿Quies saber por qué los celtes lu nomaben sabiu?:
. Al ser ricos en taninos, como la betulina, empléguense como antitumorales. ¿Cuándo oyistu tu qu'un celta morriere de cáncer?.
. De la so salvia faise llicor y vinu. <<Vinu d'abeduriu>> ye lo que tomaben Obélix y cia. p'acompañar al xabaril. Y los arrónides de Picu Llosoriu ¿qué creyéis que tomaben col robezu y el venáu?:
- <<Vinu d'abeduriu>>.
Cuando teníen folixa hasta les tantes el primeru que tumbaba tenía que barrer la campa Viscarrionda al otru día col baléu, un escobón fechu coles cañes la bidul. Como entamaben tarde , si se-yos facía sero, allumaben cola yérbola, una antorcha iguada con corteya de bidul.
Delles vegaes los fubolistes nun son a pasar el control antidoping por falta "chorru". Si falaren con Panoramix, l'amigu d'Asterix, recetáre-yos una bébora compuesta coles fueyes la bidul y...¡ Y si non que tomen sidra, coño!, que ye menos incruento.
<< Un óscar pol abeduriu >>
Antiguo, esta fastera, amás de bidules taba acorropinada de monumentos megalíticos que los tos , bueno, los nuesos, ancestros del Neolíticu llevantaren n'honor del dios LUG (d'ehí Luxoriu > Llosoriu ).
 |
| Recreación fecha a partir de les histories de César Rubín per aciu'l <Blog de Acebedo> |
Los humanos nun entendéis del too la escritura de los páxaros poro César Rubín, per aciu del blog d'Acebedo, dexóvoslo por escrito. L'escritor de la mina cuenta que-y tienen cuntao de nenu que nuna pandiella, p'enriba de la Fayosa al N-W del Picu Roiles y bien cerca la necencia'l regatu de La Llama, había un dolmen, un túmulu ya un ¡crómlech!. El dolmen yera de tamañu talu que, Celestón el Porretu - l'Obelix de Nicolasa - pasaba embaxo d'elli con dos vaques xuncíes al carru (¡qué gociada!).
Pero nun taba sola <<la Mesona>> - como yera conocía. Al par d'ella había otrú túmulu entá cubiertu de tierra y, bien cera, una estela rectangular de 1,20 x 0,50 m. que la vecindá nomaba <<El Fitu>>.
¡Cómo los tendrìen paso equí los profesores Blas Cortina y Ánxel Villa! Pero salió-yos torda... O meyor, nun llegaren a dar con estes ayalgues porque foron desaniciaes pola inorancia enantes qu'ellos tuvieren oportunidá de conocelos:
. El túmulu foi saqueáu por un "ayalgueru" buscando los tesoros de los "moros".
. El dolmen - ¡ai, Luxín! - foi voláu con dinamita (1905)... Les piedres tán faciendo terraza nunes cases de la Peña'l Cuervu y sabe Dios en cuentes más. Asina que cuando xubas a estos montes nun deas pataes a les piedres ya mira toles construcciones col mayor de los respetos y ...¡Que Lug s'apiade de nós!
 |
| Crómlech de Stonehenge: Necrópolis finales neolíticu |
Tábemos ablucaos escuchando al paxarín. Foi elli'l que tevo que sacamos del plasmu.
-¡Ehhhh!... ¿Nun tenéis na qu'entrugar? ....
- ¡Ah!.. Sí, sí.... ¿Qué hai del cromlech?.... Esa mítica construcción , esa necrópolis singular...
- Pos qu'esi círculu máxicu comparatible a la corona piedra de Stonehenge taba asitiáu na base del Picu Llosoriu, na campa de Viscarrionda (Camparrionda).
- ¡Coimes, que precisión!
- CésaR tien alcordances de nenu - hacia 1926 - d'esi templu del poder. El crómlech, d'unos 60 m. de diámetru arrodíáu por un fosu, taba remarcáu por 18 menhires formando los dos "finxos" más al norte una puerta ¿dintelada? (¡toma castaña!) . ¿Máxináis que güei día tuviéremos tou esti Olimpu restauráu?... Tendríemos más visites que los británicos..... Más que la "Quinta Avenida" ... Y hasta que la Kardashian...
Anguaño esa fermosa pradería - darréu sacar el carbón a cielu abiertu - ta sapozada por estériles de les mines... ¡Qué horror! . Pero siquier les piedres que-y daben vida a aquel cachín de cielu foron llibraes polos vecinos... Cuando pases pela zona pon tol procuru na mirada; quiciabes teas contemplando - nuna casa, nuna muria, nuna cabana... - ún d'aquellos finxos qu'adoraren los nuesos ancestros del Neolítico y tamién del Bronce >>.
 |
| << Dende la peña Regá, acolumbramos esta libélula nel fondu del valle, buscando les agües del ríu: El moyaculos azul cielu ye'l El castillete la Mina Niocolasa >> |
Camín del Mayáu Pastor, camentando nes histories d'aquel paxarín, miramos a mandrecha y, allá nel fondu, apreciamos una manchina azul... Ye'l val de Nicolasa, onde sálcuentra la mina Nicolasa. ¡Cuánta historia!. Yá nos lo camentare Xuan Pandiella que trabayó equí tola vida.
<< La mina Nicolasa ta n'Ablaña. Puntu. Ye ún de los dos pozos del valle. ENTÁ ( y danme ganes de llorar, porque nun sé lo que durará) permanez abiertu, mentanto que'l pozu Llames - qu'algamó a tener seis plantes - tien pesllao va unos años, nel 1977 cuando yá taba integráu n'HUNOSA.
El Pozu Nicolasa ta n'activo dende l'añu 1859 magar tuviere cerráu durante doce años (1995 -2007) darréu la terrible esplosión de grisú que costó la vida a catorce mineros << los 14 d'Ablaña >> , los "catorce de Nicolasa".
Si'l pozu Llames foi pioneru por ser elprimer pozu vertical del valle'l Pozu Nicolasa foi pioneru nes reivindicaciones sindicales. Son sonaes les lluches d'esti pozu. En 1982 tres mineros retienen amablemente a cuatro inxenieros nes oficines del pozu al non ser recocíes pola empresa DENGUNA de les sos propuestes de meyora. Eso sí, la empresa declara'l <<cierre patronal>> como rempuesta a la güelga entamada. Terminaron abriendo pero colos "tres de Nicolasa" na cai. Foron readmitíos nel 83 per aciu Felipe González, darréu ganar les eleiciones xenerales >>.
 |
| Aportando al Mayáu de los Pastores, al abellugu del Llosoriu |
Venga, señaldá aparte. Los que nacimos na Cuenca, xugamos ente la cisca y respiramos el polvu del carbón recién sacao (magar nun nos tocare arrancalo, d'eso yá s'encargare mio padre) en cuantes que vemos una carrucha, un castillete o una casa obreros dannos respingos, ponémosmos aliellos.
Pero güei nun ye de día de Campurra, vamos a pata camín del Mayáu Pastor embaecíos nes hitories d'antaño: unes cuntaes, otres pasaes pero toes vivíes.
Pasu ente pasu vamos averándonos a un mayáu bien grande. Hai vaques esgamotando perdayuri; otres, yá fechu'l primer trabayu, tan rumiando lo comío. Amiren pa nós mansamente.
 |
| La Cueva de los Pastores: capiella. |
 |
| A Javi y por Javi. |
Dientro la cueva imáxenes de cultu a la virxe y delles plaques conmemorratives. Una sobre manera llámanos l'atención: <<Javi: siempre tarás con nós>> . Conocimos un neñu, un chavalín qu'estudiare nel Colexu Asturies, que va unos años dexó d'acompañanos pelos senderos d'Asturies.
Dios, que tien necesidá de tar acompasáu de bones persones, delles vegaes llámanos enantes de tiempu, o eso nos paez a nós. Has saber, Javi, que siempre que como freses alcuérdome de ti. Y tamos en tiempu d'elles...
 |
| <<Mesa y mantel, la estampa bien lo merez>> |
Si ye meudía, tas nun mayáu santificáu, tas muertu fame y traes na mochila unos bocadillos chorizu, xamòn, quesu... y un cuartillu de vinu ¿qué pues faer?... Pos xintar nún de los llugares más bucólicos, emblemáticos ya idílicos qu'imaxinar pueas. A eso xubimos hasta les faldes del Llosoriu, a embaecenos de pasáu, a purificanos enantes d'entamar col <<Camín aniciáticu de Niria>>
Amiramos pal Picu pero yá nun ye día pa xubir ellí. Eso hai faelo con tiempu. Llegar ceo y rebuscar dellos puntos míticos. implorar a Lug pa que'l camín que queremos percorrer nos resulte afayadizu. Asina qu'a desandar lo andao que tan esperando en Xixón.
Tan embelesaos tábemos contemplando el paisax qu'envede garrar el camín de Pandiella siguimos embobaos ensin saber onde tábemos...
 |
| Soi un trasgu: Cuido de ti. |
Dimos la vuelta y prindamos un camín anchu y arregláu que nun tenía perda... Sacante nós. Nós somos capaces de perdenos a pesar del mapa topográficu, interné, google maps y lo que pinte. Asina que cuesta abaxo aportamos a la Tazá. Pero tamién nos metimos pel camín enquivocáu magar de preguntar a una familia d'arxentinos asitiaos y felices naquella fastera del monte arrodiaos de cabres, pites, oques ya unos cuantos perros.
 |
| <<El carrascu del Coxal da-y a Mieres llibertá>> |
A los que nos falta un tazá ye a nós, que nun hai manera de tomar el camín braeru. P'atrás y pa'lantre aportamos al Coxal.
- Mui mal nun vamos, ne. Mira onde ta Mieres.
- Sí, pero nós vamos pa Cuna, ¿alcuérdeste?. Y ta faciéndosenos tarde.
- Mira, vese ellí la carretera xeneral, la que nun paren falar d'ella.
- ¡Por fin!
 |
| Una "casina" en Viesca. |
Un bon trechu carretera con dalgunes vistes guapes, como esta casona de Viesca.
Empero esta nun ye otro que l'aperitivu de la que vamos alcontrar un poco más abaxo, a manzorga la carretera, cuando aportamos a Viade.
Una muria de piedra bien alta ya una entrada monumental, con un portón encarnáu - debe ser el símbolu de la familia - dícennos que tamos a la vera dalgo grande.
Dende esta carreta que baxa a Cuna nun tien mui bona vita el palaciu de los García Tuñón. Pa tomar bones semeyes hai que ferregüeyalu dende la carretera xeneral de Cuna al Pedrosu (Mieres). Como yá les teníemos feches son les que vos vamos amosar.
El palaciu ye orixinariu del sieglu XVII y d'entós p'acá tevo delles igües que lu ameyoraron abondo.
 |
| El Palaciu de Viade, de la familia García Tuñón. |
¿Prestóvos la caminata? Pos siguíi "Camín de Niria" y daréis con esta ayalga....
 |
| << Námas falta pa pesllar echar al campu la tranca, ¿Tu creyes sedrá posible? Pos tira p'alantre, ¡anda! Que tou'l Camín de Niria ye una bendita ayalga>> |
. El primer pensamientu tien de dir dica l'escritor y la so novela:
Con elli, y per aciu d'ella, camentamos iguar el <<Camín de Niria>>, un blog de senderisu que tien como niciu - seique nun seya la primer salida fecha - la novela de Fulgencio Argüelles:
" A la sombra de los abedules" ("A la solombra de los abedurios"). Prestó tanto la historia, ya
envolubrámonos de manera tala, que terminamos convertíos nel sosias de Melendo - el mocín de la historia - y decidímos siguir tres los pasos la mocina: Niria, farda d'esti blog.
. <<El blog de Acebedo>> foi, ye, un llugar de visita permanente. Les histories de R. Cortina Mieres, nesti casu "El dólmen de César Rubín", foron un socalliñu para xubir les emprunes cuestes del Llosoriu (seique nos falte'l remate). Gracies, Roberto. Siempre qu'escibo una hestoria termino recurriendo a ti:
- A ver si Roberto Cortina Mieres tien daqué escrito sobre... ¿Al rodiu los 14 d'Ablaña?, por exemplu.
. Tamién escarabiqué pel <<Blog del mierense: Plauto y cia.>> . Pero cuando andes per Mieres siempre tienes flotando nel ambiente a Ernesto Burgos, la historia viva esta Cuenca; meyor, les Cuenques.
. Los mios llibros de plantines: << Guía de los árboles d'Asturies >> y << 25 Rutes de senderismu per Asturies>> de Guillermo C. Ruíz y Bertu Ordiales, al que tengo como amigu en face-book y sigo per aciu de "La mio pallabra", tán siempre enriba la mesa o na mochila.
. <<Asturnatura>> ye otru finxu del mio blog: plantes, monumentos, histories,.... ¡ qué nivel!
. Nesta ocasión nun tiré de <<Mi Geoblog: geología y algo más>> pero pienso facelo porque me queda al pendiente facer un pequeñu estudiu xeolóxicu de la zona, d'otramiente esta salida queda coxa. ¿De qué ta constituyida la Peña Regá? ¿Cuarcita?... ¿Qué clas de roca ye ? ... ¿A qué formación pertenez?...
. Wikipedia. ¿Qué fadríemos ensin ella? ... Nun soi a concebir la vida ensin esta enciclopedia y ensin Google.
QUEDA ALGUNA COSINA.... Mañana reviso, pero voi colgar la salida pa que pueas distrayete un pelín, que ye sábadu.....
¡¡¡¡¡¡¡¡¡¡Ta mañana!!!!!!!!!!!!!!!!!!!!!!!!!!
No hay comentarios:
Publicar un comentario