<< A teyavana en Baselgas >> [Quousque tandem (2) ]

           [Quousque tandem, Conde Cuaya ( 2) ]  :
                << CUAYA - BASELGAS >> 


 

<< Allá al fondu s'acolumbra l'aldeina de Baselgas
 nun foi fácil dar con ella, taba'l cielu na penumbra>>

         Hola, Collacios.
         Como veis siguimos na zona: Gráu. Esta granible y caldia tierra ( l'incendiu La Pobla de 1308 cambió-y el microclima de por vida) que ta asitiada nel centru de Les Asturies. Yá diximos na entrada d'El Bailache que nos resulta imposible percorrer tola Sienda del Conde d'un tirón; asina que por estayes. Como nos salimos de la ruta oficial en Cuaya, ellí entamaremos esta segunda caminada.
        Salimos de L'Aldea Esmeralda de Xixón darréu l'amanecerín. Ficimos la parada forniture  na Tahona de Vega pero yera miércoles, taba cerrao. Poco depués cargamos de gasolina na Cooperativa d'Agricultores (la gasolina más barato de Xixón). Tomamos la Carretera antigua d'Uviéu na zona d'Alcampo. Pasamos la capital pelos bastidores del Naranco pa empalmar cola  Carretera "Grao-La Espina (A-63)".  Atravesamos La Pobla  ya empobinamos pela AS- 311 dica'l Bailache - Subimos hasta Rañeces ( ferregüeyando'l Palaciu de Villanueva ) y baxamos pel Villar hasta Cuaya (¡qué pindio ta!).

Ruta nº 2: << Cuaya-Baselgas>>

            En Rañeces, parroquia mui visitada poles mesnaes del Conde, nun nos aguantamos y sacamos el nuesu armamentu, por si acasu... Una Canon bermeyón que nos dexó esta semeya:

<<La fachada de cebatu
  DOLOSÍA del pasáu>>

         Ya aportamos a Cuaya. Aparcamos tranquilamente nel campu la Ilesia y, envede tirar pela marxe izquierda del ríu Vares (d'equí p'abaxo van nomalu Menendi) camín del castañéu per aciu del molín, cruciamos la ponte ya empobinanos dica Pumarín escaciéndonos del ruxerux del agua. Bueno, lo d'escaecenos del agua...

La señaldá de" La Torre"

     Nun podemos resistir l'atracción de La Torre y echámos-y una güeyada. Güei nun vimos a Fran, el panaderu sabiu, nin la pola señora Amalia (tará semando los arbeyos). 
     Entamamos pela carreterina perfechamente asfaltada asitiada na marxe drecha del ríu. De momento veslo plano pero pali-pali va empinándose'l camín. En menos d'un kilómetro yá tamos faciendo eses por mor de la pindia carretera.

Flor de Pitayón (Helleborus foetidus)

 Aprovechamos pa esfrutar d'una antemanada primavera (¡qué tiempu ta viniendo esti iviernu!). Ente la fueya castaño xurden gozoses primaveres. Sicasí reparamos nuna planta que yá tenemos comentao na salida anterior: el Pitayón (Helleborus foetidus). Vese tan guapa porque, amás de ser perenne, florez n'iviernu o entamos de primavera, como ye'l casu. Los cinco sépalos, que paecen pétalos, dan-y a la flor forma de escudiella.  Pa gayola tuya méto-y el macro a la fin que pueas estremar nidio los estames de los pistilos. Pero curiao colo guapo.... Toa ella ye velenosa, por eso ta ehí. Naide nun s'atreve a xintala, nin tan siquier a tocala. Namás el Conde la usaba pa envelenar les fleches (¡cabrón!).

(((Si apruciera Doña Sancha llevaríavos pa casa)))

     Pel camín alcontramos unos amigos. Paramos pa saludar y sacamos-yos una semeya de recuerdu (cuando nós nun teamos daquién sabrá que fuimos amigos). Al mirala nel visor dámonos cuenta que'l cielu va anubriendo. Yá nun pinta'l día como va un cachu. Ta poniéndose nuble. Será cosa.... 
Dicen qu'hai que protexelos, que tan en peligru d'esaniciu... Nun se-yos alcuentra acomodu a los Equus africanus asinus (los primeros vinieron d'África); la maquinaria moderno tien acabao con ellos. Nun m'estraña, esti mundu ye pa los espabilaos... A ver si toos estos linces que tenemos na política terminen encerraos tres los alambres, talo que los nuesos amigos. Nun hai día que nun espertemos per aciu un casu nuevu de corruptela. ¡Vaya país! ¡Vaya morru!.
         Yes mui simpáticu burricus (caballu pequeñu) pero tovía me duel la espalda dende aquel día.... Sí, ho, nun t'alcuerdes .... Cuando perdisti la paciencia y me deshauciasti del to llombu d'aquella manera... Y too, por nun llevar llevar albarda... Pero home, si yo namás asonsañaba a Alan Ladd... Y nun yera la primera vez que tuviéremos un alacuentru poco afayadizu ... ¿Alcuérdeste, señor unguláu, cuando me dexesasti marcada nes posaderes la to pezuña central?... ¡Que les tienes p'andar, puñeteru!.. Bueno, perdónote; sé que fuisti mui castigáu, abusóse muncho de tí. Y a fin de cuentes yo namás quixi ser un poco más burru que tu...

Aportando a PUMARÍN. ¿Tamos en Xixón?.. Esti GPS...

 <<Esta fabulina,
 salga bien o mal,
acaba d'escurrime
 por casualidá.
Cerca d'unos pros 
que nun voi a nomar
pasaron dos burrinos 
falar y falar...
- ¿Per ónde ye'l camín?
-Pos voi a preguntar... 
. Izquierda, derecha,
p'arriba ya andar...
    Manzorga, mandrecha,
falar y falar...
- ¿Izquierda o derecha?
- ¿Y eso que más da?
Si tires p'arriba 
bien ceo has d'aportar.

<<Per esti folleru nun vas aportar>>

-¿Izquierda o derecha?  
¿Tu sabes pa ónde vas?
-Tiramos p'alantre 
y llegamos, verás.
-A ciegues, tas xugando
al corriverás..
     Perdímonos dambos 
por nun escuchar.
- Per esti folleru
nun vamos llegar...
    ¡Ai, Dios, qué burrinos!
falar y falar... 

                      ¡¡¡ESCLUSIVA!!!
          Too nun podía salir mal. Sí, ye verdá que tababos perdíos. El primer devíu a mandrecha nun yera l'afayaizu, había que salir del pueblu... Pero gracies a ello tuviemos la infinita suerte d'alcontrar el SURDIMIENTU. SÍ, sí; el surdimientu d'esti manancial que podéis esfrutar nel vidéu. Va xurdiendo de manera interrumpida, a gorgorotones... Como si tuviere q'enllarase una cisterna enantes de vaciar. ¿Mereció la pena perdese? 

¿Ves al Conde allalantrones?

 


Mira, ya amiramos,

¿Baselgas, ánde tas?
¿Sedrás aquel pueblín?
¿Tan lloñe?... ¡Non, qué va! 
Pos anda que nos queda...
¡Menuda eternidá!.
- A min esti camín  
nun me gusta ná. 

 - ¡Vamos, otru poco!
Un poco nada más.
- ¿ Sabes que te camiento?
 ¿Quo vadis, ónde vas?..
- ¿Nun ves aquel refuxu?
Pos vamos aselar.
Que ta cayendo a chuces,
nos vamos a moyar .
 - Me tienes hasta'l gorru
y yo nun vuelvo más.

<<O saltes la portiella o tornes too p'atrás>>

Pasáu aquel momentu
volvimos arrear.
 -¡ Acábase¡l camín!
¿Tenemos que saltar? 
- Paez que la h.odimos,
tenemos que tornar.
- Mui guapo, Marco Polo,
yá taba esprecetá. 
- ¿Y too lo que vivimos
nun t'importa ná? 

<< Pel caminín braeru escaecióse'l folleru >>

      Sí, foi verdá, perdímonos. Al salir de Pumarín teníemos que tirar a manzorga ya mandrecha pero yera al salir del pueblu, nos metanes el mesmu. Asina qu'al llegar al pueblu entrónos la dubia si siguir camín de Baselgas o dar la vuelta y dir xintar al Bailache. 
- Dexo na to mano
siguir o retornar.
- Yo equí nun vuelvo,
venga, a caleyar.
 - Gracies, bella dama,
nun esperaba más.

<< Bermeya ye la flecha gayola ensin igual >>

Al cabu d'un momentu
yá vimos la señal.
- La flecha que tas viendo
dexóla'l Conde, igual
nun quier que tu te pierdas
y vengas dalgo más.
 Al fin yá ta contenta:
-¡Vas bien, chaval!.
- ¡Qué aliviu, señor míu!
Por fín vamos en paz.

 

                  Al poco ve la cristiana andar a la gueta: ¡Ta pañando castañes!. Volvemos a la normalidá.  En menos de media hora calamos a la carretera xeneral :¡Asfaltu! . Coño, tamos contentos; per equí damos a la civilización. Nun sabes cómo s'agradez la güelga humana cuando andes mediu perdíu... Xubimos un ratu y al calar a la cume ... ¡ Un cartelu!:
<<La Condesa y Santuadrianu>>, apuntando hacia manzorga per una carreteruca formigón.

La Llamera: O xubes pa La Condesa
o baxes dica Basegas
(yá xubirás tolo que baxasti)

    A mandrecha otru cartelu: <<Baselgas>>.¡Por fin!. 
Por fin nos decatamos que tamos nel bon camín . Esti ye'l carrefour que pescanciamos nel mapa la ruta; debemos tar na LLamera. Per esta carretra asfaltada vase a Bayo y Vallongo tirando hacia manzorga.
Otra dubia:¿Damos la vuelta o siguimos pa Baselgas?

Ponte nel Ríu Vares, agora'l Tourmalet.

 - Como yá tamos equí
nun ye plan de dar la vuelta  
o volver a Pumarín
o dir camín de Baselgas.  
- ¿ A Baselgas otra vuelta?
  Pos sedrá'l gupu to padre
el qu'a vós vos acompase, 
porque yo yá "toi de vuelta". 

     Pa salir de dubies tiramos de móvil, tamos mui modernizaos. Abrimos el gooble maps y... Bueno, quedaben 3,2 km hasta Baselgas asina que decidimos continuar.  De momento toca baxar. Lo malo sedrá pa la vuelta porque ye pindio a esgaya.
Como kilómetro y mediu dempués aportamos al ríu. Una ponte llamativa y a emprunar otra vuelta. ¡Y vaya cuesta!... Pa encima zurdiendo con tola gracia. 

<< Quicias les güestes del onde
 aselaren nesta casa: 
pesca cerca y caza a esgaya. 
Controlaben dende arriba 
si daquién se-ys averaba >>

         Cuesta arriba se nos fai y malpenes cambiamos pallabra. Namás pensamos en llegar... ¡Baselgas!. Si Gráu ye << l'escuru oxetu del deséu >> del Conde el nuesu ye :¡Baselgas! 

Cuando'l Conde asoló Grao dicen que s'abeyugó en Baselgas. Nun m'estraña. A ver quien s'arima equí pa prindar al malfechor. Ta bien pensao: El pueblu ta entamilgáu nun pandu de lo más afayadizo ya una altura increyible (430 m ). Pero pa llegar a él han faelo dende abaxo, xubiendo del ríu. ¡Pas posible!. Ferregüéyenlos muncho enantes d'aportar y puen atacar o esmucise pelos cumales vecinos. ¡Que te zurdan, señor Conde!

"La Vallonga", casona d'aldea.

   Que Baselgas foi un llugar fanegueru decátase ún namás entrar nel pueblu. Guapes cases - varies en reconstrucción - y abondos horros dícennos qu'equí xorreció'l maíz y, de tiempos más antiguos (el pueblu t'asitiáu sobro un castru celta qu'aprovecharon los romanos), la escanda y l'ablana. Tampoco yeren mancos n'otres hotolices: fabes, pataques, arbeyos ya verdures varies. Na fabicación de cestos yeren consumaos artistes.
  Pero si dalgo puen presumir los baselguinos ye de los horros. ¡Madre, cuántos hai!. Enseguida te decates. Corredores, talles y hasta pintures alcuentres nellos. Y, claro, ¿ónde díbemos aselar?

<<Embaxo l'horru aselamos 
embaxo l'horru comimos,
 embaxo l'horru proclamo
                   que nun vuelvo más contigo>>           

            La moyaura yera pistonuda, pero la fame tamién. ¡ Y nun traíemos pan! Nel pueblu de la escanda, n'aldea del maíz ¿ por qué díbemos traer pan?. Yo tenía la esperanza que na casona d'aldea La Vallonga pudiéremos xintar pero con aquel tiempu infernal nin nos atrevimos a picar a la puerta. Asina que, darréu camudar de camisa y camiseta embaxo un horru, dimos cuenta de les poques provisiones de que disponíemos: Un chorizu (de Llaviana, eso sí), un yogurt ya un par de casadilles (depués vos cuento cómo les tresnamos). ¡Ah!, y l'habitual  cuartillu de vinu, que nos (me) sentó de p. m.

<< El refuxu del Conde>> Semeya de Top Rural

     
Otra cosa tendría sío d'alcontrar esti chozu... Nómase "Refugio del Conde" y tien tola pinta que dellos elementos sían daquella dómina. Si te petez venir "a tiru fih.u" llama enantes por teléfonu (interné). Los precios son de risa. Nós nun dimos con ella. Intentamos dar un vueltu pel pueblu pero torgáronnoslo unos perros. Normal... ¡Con aquel día de perros!. Magar lo tarde la hora decidimos dar la vuelta y dexar la visita al desaniciáu "castiellu" pa otru día más afechiscu.

<< Nun ye un adiós, ye hasta pronto
 que yo a Bsaselgas retorno >>

<< Costó llegar hasta equí
     mas camento retornar,
     quedéme a mediu camín
     no que cinca a caciplar.
      Faltóme ilesia y castiellu
      faltó casona del pueblu, 
     pa dicite la vedá:
     faltó'l tiempu>>
     

         Cómo cuesta rematar una salida. Quédente tantes coses en tinteru... Tantes semeyes qu'amosar, tantes sensaciones qu'esplicar... Pero pa nun dexate un sabor agrín voi despidime asoleyándovos - por dicir algo - dende Pumarín (¿ qué día de trasgos, eh?) la:




                <<RECETA LES CASADIELLES>>

Cascando

          Baselgas tien un entornu bien fanegueru pa les ablanes, ye bien afamáu por ello. A nós salváronnos les ablanes, tresformaes en casadielles, d'un famión seguru. Chorizu y casadielles foi'l menú d'esti día. Qué menos que facéi esti honor al pueblu de Baselgues. Va por vosotros, baselguinos:
 - Bueno, dexémonos de de cascar  y vamos a cascar ñueces, y sobre tou les ablañes.      


    Pa facer les casadielles lo primero ye aportar los ingredientesl : Ablanes, ñueces ya anís como material primario pal engrudu (como 3/4 kg, si sobra daqué cómolo a cucharaes). D'otra parte precisamos pal envoltoriu fariña de trigu (1/2 kg.) o masa d'hoxaldre, que yá pues mercar tresnao, ya un cuantu d'aceite en casu que les vayas a freir (les d'hoxaldre van al fornu, pero estes pa otru día qu'a "Camín de Niria" quéda-y abondo qu'andar). Apurrimos "La sal y el formientu" (un llibrín perguapu de teatru de Montse Garnacho ), pero poco, nun convién "pasase de lleldu . Falta la sal , pa la masa... Y l'agua p'amasar. ¡Ah!, y un pocillu d'aceite pa mecer cola masa.

Ingredientes ya preseos

    - Alcuérdate que la sal dilíse nel agua. ¿Yá ta too?... 
    - Pa min.... Van quedate un poco esoboríes, les casadielles...
    - ¡Meca, el Saccharum officinale! .
     - Yá te digo, si nun-y eches zucre al mondongu... Pero nun convién pasase, hai que curiar la glucosa que la diabetes ta siempre amenazando...
      Precisamos dellos preseos:
      Cazu ( pa freir), rodillu (p'amasar), ruedina o cuchiellu ( pa cortar dando forma a la casadilla) ya un molinillu o thermomix (pa moler los frutos secos). Por supuesto tabla y martiellu pa machacar les ablanes.
     - ¡Eh! ¿Nun te falta ná? ... ¿Con qué pienses engrasar?
     - ¿Engrasar el qué?
     - El gargüelu. Esto hai que facelo cantando y engrasando...
     - ¡Ah!. Sí, ho... Bueno, voi buscar la botellina...

Moliendo

     Mentanto s'escancia un culete vamos moliendo les ablenes. Güei tamos modernizaos y facémoslo con una maquinaria permoderna. Aforrres munchu tiempu. Angüaño (va bien poco) tiraba de rabil que daba gustu. Yera prestoso. 
Solíen facese per Navidá. Daquella l'iviernu yera iviernu de verdá. Nevaba tolos años y magar abocanaba quedaben los carámpanos colgando los canalones pa entrar en calor ya afinar la puntería. Póngome señaldosu y viénenme n'alcodanza la pila collacios que ya nun puen camentar estes momentos. Al dar cuenta les casadielles tendré un recuerdu pa vosotros. Fasta ceo, collacios. (¡Ah! Y nun vos esmolecer, yá veré la manera de llevavos unes poques).

Yá pues rellenar

         Darréu la molienda toca tresnar l'engrudu. A la meceura d'ablanes y ñueces echámos-y una copina d'anís, o algo menos según como te presten, ¡borrachín!. Revolvémoslo bien y dexámoslo reposar mientres preparamos la masa.


 

     Pa iguar la masa envoltoria del mondongu viértese la fariña so la mesa. Facemos un güequín nel centru, onde echamos el formientu (llevadura), l'agua salao ya un pocillu d'aceite. Y ensin más entamamos a revolver ya amasar. De xemes en cuando espolvoriamos un poco fariña enriba la mesa amasadora.




Estendemos la masa col rodillu y vamos faciendo montoninos separaos so la mesma. Cortamos la masa al rodiu l'engrudu de manera tala que se puea pesllar bien el conteníu y nun s'abra'l zarru al freir (en cualisquier casu les abiertes saben entá meyor).
Col aceite calentino vas echándoles a freir dándo-yos la vueta de xemes en cuando. 
Hai quien les pinta con almibar. Tan más presentables, más modernes, y si yes mui llambión... A "pelu gochu" y de dos bocaos son les que más me presten, ¿Y a ti?. 
Como nun quiero facete sufrir demasiao nun t'apurro la bandexa col productu rematáu pero...
Yo voi comeles en Baselgas, a teyavana. Si vienes hasta equí... Igual te "vien la fueya al muriáu"...

          Tengo que colar. Van enfriame les casadielles. Tampoco ye que m'importe, pero güei ta un día desapacible y hasta naguamos por recuerdos caldios...

 

<< A teyavana >>   
"A teyavana vivimos,
 a teyavana suañamos,
 a teyavana vos dexo
 seique sois los putos amos.
¡Ta lluéu, collacios!"