[1] Nel entornu de Cuaya: Bailache-Cuaya-Bailache
 |
| Cuaya: "L'árbol del aforcáu" |
Equí tamos de nuevo tres los pasos d'un conde, del Conde Gonzalo Peláez .
¿Pero cómo, nun lu sapozáremos n'Uviéu darréu matalu (a disgustos) en Portugal ?... ¿Resucitare?....
Cuásique. Porque, mira per ónde, vien d'apaecenos otru conde, homónimu del nuesu conocíu, pero que lleva de coletina:CUAYA. Gonzalo Peláez de CUAYA. ¡Qué casolidá!
El nuesu vecín, el Potestas, viviere a llombu los sieglos XI y XII. Pero esti nuevu ¿amigu? fadrálo ente'l XIII y el XIV; como doscientos años dempués. Tamién tienen de mancomún sublevase escontra'l Rei pero mientres el primeru yera un idealista esti ye un bandoleru. Mientres el nuesu mocín llucha pola llibertá esti que vamos conocer llucha por ... ¿Por qué llucha'l de Cuaya? ... ¿Por enllenar el calcetu?... ¿Por caltener los privilexos d'una nobleza a sucu baxeru?... ¿Por qué lluchó esti coín qu'entá arrecienden los odios d'aquella dómina pasaos ochocientos años? ... Mio güela, nacida nel alfoz de Grao, cuntábame de nenu - col envís de nun m' esaverar muncho de casa - que d'onde ella viniere había un conde muuuuiiii malu que mababa a tolos qu'alcontraba pelos caminos. Nun-y faltaba razón.
Equí entamó too...
 |
| Sí, equí entamó too. Equí nació'l malfechor. Palaciu de Villanueva, a tiru flecha de Grao: <<L'escuru oxetu del deséu>> del nuesu protagonisa. |
Nel últimu cuartu del sieglu XIII, nun se conoz data exauta, nun castiellu paecíu a esti - ta mui remocicáu - tien nacío un rapaz qu'algún día sedrá conde, como-y pretaba-y nomasen. Fidalgu ricu, noble baxu, so padre tenía facienda y castiellu nel puebín de Cuaya pero títulu.... Un día, siendo mozu entovía, heredarálo'l condesu. ¡Aciagu día foi esi!....
Pa conocer esta historia, que tamién discurre en Tudela, vamos facer unes rutes pelos dominios d'esti conde malditu: Grao, Prioriu, Uviéu, Picu Castiellu (¡otra casualidá!), Olloniegu...
 |
| Cartelu al entamu la Ruta Oficial PR AS-101: "Sienda'l Conde Cuaya" |
<<Sienda del Conde Cuaya>> .
Nós vamos percorrela entera pero franciéndola en delles estayes y buscando guapos apaños pa que nos queden circualares, a ser posible. D'esta miente conoceremos otros llugares de los dominios del Conde que nun caben n'esta ruta oficial, tanto per Grao como pel alfoz d'Uviéu. Los d'Olloniegu yá los conocemos por mor les entraes de "PrOTESTAS".
 |
| Cuatro rutes pela sienda d'aquel Conde de Cuaya, pa facelo nuna sola debería ser un aigla. Solo soi un caminante, voi andala estaya a estaya. ¿Petezte venir conmigo? Venga, vamos páxina a páxina. |
Ruta 1ª: << Bailache - Cuaya - Bailache >>
Track de la Ruta: Bailache - Alcubiella - Camín pela ribera'l Ríu Varas (Menendi) - Cuanxú - Cuaya - Villar - La Figal - Rañeces - Bailache.
. Percorríu: Ente 11 y 12 km .
. Tiempu: A min el tiempu dame la risa... ¿Dos hores y media?... Nós echamos cuasi cinco... (Yá verás por qué...)
. Dificultá: Primera mitá llana, llamargosa, señaldosa y mitolóxica. Darréu, una cuesta buena dende Cuaya a la Figal pasando per Villar. Plano hasta Rañeces y de porra l'afayadiza baxada dica Bailache. Resume: Una romería que dalgunos faen en bicicleta magar la llamarga del primer tramu. (¡Hai que tener güevos!... O ser de la triba'l Conde)
. Tipu: Como veis ye una ruta circular. Inventu nuesu, por aciu d'Amalia ( un ligue que nos echamos pel camín).
Y falando de caminos... Nun pensábemos alcontrar caminos como esti. Dir acostumándovos...
 |
| ¿Préstavos "Camín de Niria"? << Tres romeros van tan panchos pela sienda enllamuergada, prestáríame a min velos si apruciere'l de Cuaya. Si sigues Camín de Niria nada tremes, too ye calma >> |
Salimos de L'Aldea a eso de les nueve y, tres el repostax na Tahona Vega, tiramos pela autopista A-66 camín d'Uviéu a recoyer unos amigos. Retomamos l'autopista Lleón pero disviamos p'hacia Grao y La Espina ( A-63 ). Travesamos La Puebla (¿ónde escondisteis la Carta?) y, namás pasar el polideportivu, colámonos pela AS-131 camín de L'Alcubiella. Xusto pasar la ponte'l Ríu Vares -ya enfrente'l afamáu Restaurante El Bailache - aparcamos tranquilamente nel parkin del Bar Restaurante "El Tiro", onde tamién hai bonos menús a preciu irrisistible.
 |
| El famosu Restaurante "El Bailache" |
A la vera'l ríu vemos un cartelu informativu de la "PR AS-101: Ruta'l Conde Cuaya" que nós vamos a siguir nel so primer tramu (4,5 km), hasta Cuaya, que ye onde pensábemos dar la vuelta.Tamos, de momento, na ruta oficial.
 |
| Entamu la Ruta.:Al par d' El Bailache |
Una carreterina asfaltada siguiendo a escontra forga el cursu la corriente. ¿De qué ríu falamos? Al entamu vimos nun cartelu: "Ríu Las Vares"; pero en dellos mapes tenemos lleío: "Ríu Menéndez" . De la dulda saconos en Cuaya un señor (¡Dios, pensaba tar viendo al mesmu conde!) de lo más conciliador:
-"Mira, dende'l nacimientu hasta Cuaya nómamoslu "Ríu Les Vares " y d'equí p'abaxo apellídenlu "Ríu Menendi". Salomónica decisión adoptada en delles más ocasiones. En cualisquier casu esti tramín asfaltáu ye de lo más afayadizo...
Andáu mediu kilómetru aportamos a un cruce de caminos. Pequeña dubia que resolvemos al ver a manzorga una equis blanco-mariella: "Per ehí non". Tiramos de frente dexando la ponte a manzorga.
 |
| -¡De frente! . Escaezte de la ponte. |
Adiós asfaltu. Toca caleya: Ancha, solombriega ya empedrada, magar que malpenes s'aprecie por mor de la follarasca serondiega que la cubre. Hasta Cuanxú vas paticar los folleros talamente los dexaron les güestes d'aquel Conde. Onde pisaba esta triba malpenes brotaba la yerba.
 |
| <<Pel camín encantexáu dexes el mieu de llau>> |
Vamos percorrer más de tres kilómetros somorguiaos nuna enllamuergada viesca de ribera (¡mamma mía, col tiempu que lleva ensin llover!). Llevái bon calzáu y, a poder ser, polaines. Si ta de llover... Nun vayas colos guah.es. Espera que seque y piérdete nel mercáu de la villa moscona:<<L'escuru oxetu del deséu>> del conde Cuaya. La Puebla que lu trexo a mal trayer y desendolcó'l so caráuter sangrín. ¡Qué prosperidá al algame de la mano!...
-<<¡Esto tien de ser de mio! Estos villanos ...
El carru nun ha pasar delantre les vaques!>>
 |
| Pitayón (Helleborus foetidus) |
Pero tornemos al camín. Unes cuantes semeyes van afitar les mios pallabres. Magar teamos nuna viesca de ribera onde lo más abondante sían los fresnos, salgueros, ablanos, castaños, humeros o bidulios al tar al cabu la seronda (masque oficialmente ye iviernu, ¡vaya añu!) llamáronnos más l'atención otres plantes de tarrén ricu y solombriegu: El Pitayón o Eléboro. Y ye que, amiguinos, esta planta tien muncha hestoria...
<<El Pitayón, esa planta perenne que ves na semeya, de fueya dividío y palmiao con sépalos en forma de pétalos, yera emplegada poles hordes del conde pa envelenar les fleches. Sábenlo bien los vecinos de la Puebla de Grao cuando na alborada del primeru de marzu del añu 1308 despertaron sobresaltaos por mor d'una lluvia de fleches cola punta entafarrada d'una pastia averdosada fecha de Pitayón machacáu. Una deferencia'l Conde pa colos sos porgüeyosos vecinos, a los que nun podía ver nin en pintura...>>
Al andar, y ensin danos malpenes cuenta, fuimos xubiendo pali-pali. Agora toca baxalo p'aportar de nuevo al ríu que debemos que cruciar per una ponte madera construyida polos alumnos de la Escuela Taller.
Tase bien n'esti requexu del ríu pero tenemos que siguir; esto nun fexo qu'entamar y quédanos sienda a esgaya.
De mano trespasar esta portiella:
 |
| - ¡Eh, aguardai... Bellezones! Siento'l galopiar del Conde pisándonos los talones. |
<<Pel camín enllamuergáu
vas topar delles portielles,
nun t'amedranes por elles
si precises dir pel práu;
eso sí, caminante,
déxales bien pesllaes.>>
 |
| " Un galante caballeru llibra dama d'un folleru" |
Separtámonos un poco del ríu caminando per un práu. Pero enantes que canta un gallu tamos enllordiaos nun barrizal, n'esto queda convertía la caleya. Ye'l peor tramu pero nada insuperable pa unos braeros caballeros:
<<D'una dama un caballeru
galante, salva'l pelleyu.
Si lo viere'l de Cuaya
plasmaría, ¡xenticaya!>>
Darréu llibrar el folleru y pasar otra portiella de fierro entramos n'otru práu. So la vega vemos una moderna plantación de mazanales. ¡Cómo presta! Equí sigue la vida, sobremanera cuando hai iniciatives. Nun nos pusimos tan contentos cuando vimos una arqueta de la traida d'agües a Grao fecha una triste llaceria. Pa conformamos aprució esta plantina tan guapa:
 |
| "Ruscus aculeatus", la belleza nun tien amu. |
La fueya ye engañoso. Les verdaderes fueyes son minúscules, inapreciables - unos 3/4 mm- que nacen nes axiles. Les que paecen verdaderes son estensiones coriácees de los tallos de forma ovolanceolada col ápiz acicular (¡Dios, pinchéme con una abuya!).
Les flores son averdosaes polo que resulten poco llamatives. Les femenines tienen 6 segmentos florales y les masculines 3 estames soldaos.
Dalgo guapo teníen que tener: Los frutos son unes llamatives bayes encarnaes (con dos semilles dientro), d'unos 10 a 12 mm de diámetru, engarciaes metanes les falses fueyes. La diseminación endozoocaraproduzse per aciu les deposiciones d'animales que s'alimenten d' elles.
Recoleición: El fruto ha recoyese na seronda, talo que los rizomes,cuando tean bien maduros. El tallu y la fueya páñase en primavera.
. Propiedaes: Tien propiedaes diurétiques, antiinflamatories y vasoconstrictores. Asina que pa eliminar toxines, pa la circulación o la gota nun hai otra.
¿Cuéntovos un secretu? Cuenten les males llingües que'l Conde, a lo cabero la vida, pasaba'l día mexando. Fartucu de comer carne probable tuviere gota y.... Una curandera Baselgas, que nun sabía del ácidu úricu pero sí cómo aliviar, tresnó-y esti potingue:
" Nuna pota de bronce echó como un litru d'agua y un plizcu de rizoma seco (unos 10 g). Darréu ferver dexólo reposar 5 minutos. Colólo nuna zapica y, en cuantes quedó tebio, dio-ylo a beber al Conde".
Tamién cuenten que, cuando aportaba glayando, amás del rizoma seco mecía-y el frutu y la fueya pero... ¡regábalo con vinu blanco! ( nun sabíen del coñac, lo qu' amestaba mio madre al café pa que rompiere sudar cuando pillaba una gripe. H.oder, bien pudi salir yo conde...). Pa cuando andaba de correríes - bona parte del tiempu - mandábalu mascar tallu tienru de ruscu (como si de regaliz se tratare).
A otros que se quexaben, por mor de les almorranes o les varices hinchaes, aplicába-yos ungüentos fechos de frutu, fueya y rizomes d'esta plantina>>.
Salimos per otra portiella y un desvíu llévanos a una antigua ponte recontruyida (hai quien diz que pertenez a la dómina los romanos). Ehí cerca caltiénse la caxa d'una antigua carretera que ficieren los republicanos cuando la guerra civil - <<la carretera los roh.os>>- pa comunicase con Tubia ya Uviéu magar qu'enxamás entrare en serviciu. Esta zona ye perguapa; voi dexávos daqué muestra.
¿Cuál der los dos furaquinos ta fechu a remente pol Picutorneru ?
Pero cuando meyor lo tábemos pasando, na aquella viesca encantexada, enllarada de collores : ¡zas!
De sópitu una visión pantasmagórica, una semeya d'otra dómina, un retorturiu na viesca, un clamíu ensin clamor. ¿ Un árbol?... ¿Una tresformación?... ¿ Un campesín disecáu?... Un desgraciáu. ¡Mirá-ylu!
 |
| <<Nun ye difícil de ver echándo-y un poco maxín. Cola cara de clangoriu y los brazos cruz llatín vi les momies de Teverga, y toi viendo una equí...>> |
 |
| - ¿Sabes que te digo, ne? Qu'allárriba n'aquel altu tenía'l Conde un mirador; ferregüeyaba tol pasu, nun se colaba nin Dios. - ¿Sabes que te digo, Rosa? ¿Sabes que te digo, oh? Que somos afortunaos, pos yá nun hai turruxón. - Pos venga, tira p'alantre, sigamos cola ilusión. -Sigamos "Camín de Niria" dica algamar a Xixón. |
<< Pela rasa de la llomba
tevo'l Conde un turruxón.
Bona vista, de lo alto,
a lo llargo del cañón;
tien de protexer Cuaya
d'una posible invasión.
La fortaleza Cabrera
tien de ser un gran bastión.
Esti malfechor de conde
nun ye fatu, el mui xostrón>>
 |
| Pela Ponte'l Ríu Vares pela Ponte Cuanxú pasiaba'l Conde Cuaya dando ¡hurres! d'ixuxú cuando de mil fechoríes tornaba col so botín. |
 |
| Ya aportamos a Cuaya, el templu d'aquel felón, que violentó los vecinos, que cono Rei s'enfrentó, que desoyó la conciencia, que nin a Dios escuchó. Pensó que yera l'Obispu d'Uviéu, el so Salvador. |
Y nós salimos salimos del camín encantexáu y tornamos a la carretera xeneral, que nun ha d'abondonanos hasta algamar a El Bailache. Pero nun creyáis qu'abandonamos l'ayalga; namás camudamos la color. La Hestoria caltiense viva, más llaspardera que nunca...
 |
| <<N'esti práu d'El Turrión teo'l Conde'l so palaciu y yo tengo la ilusión de remembrar el pasáu>> |
<<N'esti práu d'El Turrión
tevo'l Conde'l so palaciu
desque chuleó al Señor.
¡Qué atrevencia, don Gonzalo!
¿Va salvate don Fernando
esi Obispu tan lladrón?
Tu créis n'agüeros, Peláez...
Yá vien Rodrigo pa Uviéu
afianando'l batallón...>>
Cuando tábemos xurgando un requexu al par del ríu onde barruntábemos taría'l palaciu salió una señora de casa pa ponenos al corriente sobro'l tema:
- Bonos díes, ¿qué buscàis?
- Bonos díes, señora. Prestaríemos saber onde taba asitiada la fortleza'l Conde.
- Ehí mesmo lo tenéis. N'aquella revuelta del ríu, delantre la Ilesia San Pedru, taba'l palaciu del Conde; masque yá nada nun s'aprecia. Namás queden los cimiento enterraos.
Siguió la señora Amelia cola hestoria la familia, la de so y la de mio, colo bien qu'ella s'apaña pa caltener casa y güerta....
- Pos tengo yo unos arbeyos que daten d'Alfonso XII, o quiciabes de los tiempos onde otru conde malváu facía estragos per Tiraña, allá na Pola Llaviana... El más vieyu la parroquia pasó-ylos a mio güela que-y encamentó a mio padre nun s'esaniciara d'ellos; que cargaben tolos años abondo más que cualquier otros. D'esto encargó mi madre...
- Oi, ho. ¿Por qué nun me traes unos pocos la próxima vegada que pases per equí?
- Nun sedrá tardando muncho. A ver si la semana venidera...
N'esto siento unes voces:
- A ver, rapaz, qu'atapez. ¿ Qué faes tantu dar la parpayuela? Entá queda abondo andar.
- Carah.o, ¿nun veis que ta conmigo?
- Eso digo yo; pa una vez que toi ligando...
Amalia ye una vilva vecina Cuaya que tien 91 años. Nun aparenta nin ochenta. Cuida sola y atiende la güerta y les pites. Quién pudiere decir lo mesmo.... Mañana tengo de llevái los arbeyos. Yá vos lo cuento... Ta lluéu.
 | |
| << Cuasi del tiempu del conde ye esta señora, Amalia, otru finxu de la historia la vecina de Cuaya >> |
N'esto.... Yá ye mañana. Darréu siguir na sienda, tres los pasos del canalla, camín del altu Baselgas pasamos per casa Amalia pa facéi entrega los prometíos arbeyos. Quedó plamá, nun esperaba. Pa la primavera quedamos en tornar, más que nada pa facer cumplimientu de los agradecíos brindes. Tiempu habrá cuando estos dean frutu. Fasta ceo, doña Amalia.
 |
| <<Enseguida sedré paxe: caza, guerra y dir de viaxe>> |
Y tornemos al presente d'esta ruta.
Un pelín más alantre, xusto onde la carretera tuerce pa cola ilesia, acercámonos al restu'l grupu.
Sentáu na escalera que da accesu al primer pisu d'una desmeyorada casa solariega creyo ver al conde mozu. ¿Sedrá posible? ¿Sedrá'l maxín? ... ¿Qué tará maquinando esi chavalete de unos 13 años? ...
<<Criara con so madre hasta los siete años pasando darréu a ser paxe d'un amigu de so padre. Yá taba acabando esta estaya y desiguida diba entrar como escuderu d'un cabezaleru del alfoz de Grao. ¡Por fin!... Agora podría dir daprendiendo al averase a los toneos, al ver la guerra de cerca y , sobre tou, ¡dir a cazar!. Esto yá lo facía a escondíes
daqué vez que podía; cualquier cosa menos dir a la escuela, ¿pa qué si diba tener un criáu escribiente?. Y mira que so padre lu reñía porque-y via cualidaes...Paecía listucu, inxeniosu, atrevíu - descaráu - y hasta temerariu enforma... A los venti, o antes, sedría nomáu caballeru...>>
 |
| "La Torre":¿Casa o turruxón defensivu? |
Tuviere echando un a güeyada a la casa. Amalia dixéreme que n'ella vivieren los moros... Los moros nun creyo pero esta construcción cuasi cuadrada, con escasos güecos de luz: delles aspilleres, una puerta al este elevada del suelu, que precisa d'escalera esterior, y otra perguapa al oeste - ¿o ye un ventanal?- d'arcu apuntáu de principios del góticu ( lá dómina del nuesu protagonista) tien tola pinta de ser n'orixe un turruxón defensivu. ¿Podría ser una de les torres del palaciu primixeniu?..Ta tan apegada al práu en cuestión... Enterámonos por Fernando Romero ("Coalla el sanguinario") qu'esta Torre foi Casa Consistorial del ayuntamientu constitucional de Cuaya (1821), cárcel y Sala de Xusticia na dómina de los Valdecarzana.
Les collacies de ruta tan falando con un llugareñu. Al averame quedo ablucáu:
- ¡Si tan falando col mismísimu Conde!
 |
| - Nun soi conde de Cuaya, pero por poco, vivo al par de so casa. |
Tamién nos cuntó que yera amigu'l Profesor y Arqueólogu Manzanares, cuasi ná. ¡Ah! Y tuviere nel "Tabularium" que, daquella, nun lu conocía entá'l Rei (Xuan Carlos I ).
 |
| << N'otra vida fui conde, dicen que fui mui malu, reencarneme n'otru home como nun hai otru talu; si preguntes per Cuaya sentirás que soi un santu. ¿Nun lo crees? Pos ve tu a comprobalo >> |
 |
| <<A San Pedru s'encamienten los vecinos de Cuaya a la fin d'escaecer los pecaos d'aquel canalla>> |
 |
| El Villar |
Dexamos el campu la Ilesia y tornamos a mandrecha. Pali-pali cuestarriba más pindio a cada pasín hasta algamar a la casería del Villar. Nel últimu nomenclator tenía 11 habitantes, pero mui facendosos.
Guapo, soleyero y mui curiao. Nesta semeya queda muestra de cómo los villarinos mimen el pueblín y les sos tradiciones. Ye la tónica xeneral.
 |
| La Figal |
El tebiu sol de meudía contribúi a la gayola. Los diez vecinos del pueblu entá nun s'atrevieren a sair asoleyase. Pena. Nun tuvimos con quier falar. Un poco más allá, más o menos a mesma altura y no que tamién se dio en llamar Picu Castiellu, tevo El Conde un turruxón defensivu y sobre too de control de pasu hacia'l castiellu Coalla, onde pasaba más tiempu.
 |
| Control del Val de Cuaya dende La Figal |
Nun yera plan averase hasta esi picu onde peer otra parte nun queda a la vista vestixiu algún pero pa danos una idea de la visión que tenía sacamos esta semeya dende un horru d'esta aldea. ¿Préstavos? Ye del valle de Cuaya. El pueblín que se ve al fondu, endamiáu nuna llomba, ye Pumarín. Per ehí vamos pasar otru día (yá pasemos) camín de Baselgas, onde el conde tenía otru turrión defensivu.
Aportamos a la carretera xeneral que nos lleva camín de Rañeces. Pueblu abiertu no alto d'un llomba, ente los ríos Cubia y Les Vares, ye un de los más sacudíos pol Conde. Nun ye d'estrañar: Soleyeru y de tierra feraz yá yera daquella bayurosu abondo. Bona despensa pal rapiegu.
 |
| Rañeces, al fondu Escuela ya Ilesia. |
Yá llegamos a la picalina la ruta. Agora toca dir baxando, bien contentos, pasu ente pasu. Entá nos dalgunes sorpreses...
Comentáremos Fran, el nuesu conde Cuaya, que díbemos ver el Palaciu de Villanueva, el de la alta torre cuadrada.
 |
| El Caliente, onde Dios paró un instante pa recrease na obra. |
- Namás-y falta a esta ayalga un regatu que la bañe.- Y dibuxó'l Ríu Cubia.
Y pa más gayola nuesa relantizare'l tiempu conformándo-y un meandru. Gracies, Natura.
Nota:(Díes más tarde, al visitar El Caliente, un señor díxonos que lo de caliente yera una broma, que facía un fríu que pelaba, sobre tou pela mañana hasta que-y daba'l sol... Y damos fe d'ello, pero cuando aporta Febo El Caliente xustifica'l so nome )
 |
| Palaciu d'Agüera |
Delantre'l palaciu, a la vera del ríu, hai instalada una piscifactoría. Bien polos negocios y polos emprendedores. ¿Quies saber daqué más del Palaciu?
 |
| Blasón de los Agüera |
El PALACIU D'AGÜERA , del XVII, tamién nomáu Palaciu de los Valdecarzana, ye una antigua casona solariega de los Cañedo-Vélez, condes d'Agüera, convertía nun llugar d'alcuentros familiares y d'empresa: una boda, un bautizu, una comida d'empresa... Foi ampliamente reformáu polos Miranda y nel so escudu puen vese tamién les armes de los Bernaldo de Quirós (¿habrá algún sitiu onde estos señores nun ten metíos?), Sierra y Argüelles.
Nun saliéremos del plasmu y yá acolumbramos la torre de Villanueva.
 |
| Acolumbramos un palaciu... |
Ye probable que n'esti castiellu del Coto de Villanueva, a media llegua de la esporpollante Puebla, naciere'l Conde Cuaya nel últimu terciu del sieglu XIII. Daquella paecíase más bien a una fortaleza defensiva con dos torres cuadraes nos estremos y un llargor d'unos 30 m. La torre qu'entá se caltién -reformada - alcanza unos 20 metros y ta dividida en tre pisos. Un idílicu llugar p'andar de caza y de pesca, que ye no que pasaba'l condesu la mayor parte del tiempu. Dicen que malpenes firmaba con una cruz... Pa qué, yá roblaba colo espada.
 |
| Palaciu de Villanueva |
Al baxar un poco más pudimos aprecialu en tou so esllendor... Ye enforma más grande de lo que camentaba. Equí foi creciendo'l fuerte rapaz, de güeyos y pelo claro. Ente abusos a criaos y ente'l sangre de la caza foi desendolcando un caráuter fríu, duru y sangrín. <La llei ye'l so caprichu y la única razón la fuercia>. Yera la norma naquellos tiempos medievales onde los condes y nobles actuaben talo que reis ensin conciencia.
<< Asturies,naquella dómina baxo medieval de los sieglos XII al XIV, alcontrábase perallonada de la corte de Castiella, con un rei siempre n'ausencia. Cuando nun yera un infante andaba en guerra colos suyos pa caltenese nel tronu. Por si fuere poco andaba a la tema col rei d'Aragón ya escontra los benimerines pa caltener les fronteres ... Escaecía de Dios y del Rei, Asturias, quedaba en manes de una nobleza cada vez menos poderosa ante la pudiente burguesía de les ciudades que los reis mimaben con procuru - Hermandaes y Cartes Puebla -col envís de baxayos los fumos a los nobles llevantiscos ya abusivos... Pero estos nun se resinaben, ¡de xuru que non!.
El final de la Edá Media coincide con un tiempu de males colleches, pestes, guerres y cismes na Ilesia. La nobleza, que basa la so ecomía nos impuestos que cobren a los habitantes de los sos señoríos, ve como amenorga la recaudación al empar que va esporpollando'l de la burguesía les ciudaes:
-¡Esto nun pue ser¡ ¡Van saber quien somos nós!
Cola fín de caltener el so poder adquisitivu deciden emplegar la violencia. Tienen armes, caballeros (?) y castiellos: Saquear y guarecese. A ver quién ye'l guapu que s'enfrenta...
Munchos, munchísimos nobles conviéntense en bandoleros-patricios. El Señor de Cuaya (¿lo de Conde ye lleenda?) foi ún más, pero enforma más dañín. Por eso, col tiempu, sedrá contratáu pol capo los bandoleros d'Asturies: ¡L'Obispu d'Uviéu!>>.
Pero esto ye fariña d'otru costal...
- Tenémoste echáu'l güeyu, don Fernando... Attends un peu...
 |
| Territoriu comanche: Ven si t'atreves, primu Álvarez... |
 |
| "Si trespases esta puerta podrás conocer daqué historia d'aquel conde de Cuaya" |
El Val de Pramaro ye una fértil ya enantada vega bendecida pol ríu Cubia asaina como por otros numberosos ríos menores, talo: El ríu Moutas, El regueru San Martín, R. Gaspar, el R.Ferrrera, el Sama ... Por si fuere poco llimita más norte col ríu Nalón, onde desemboca'l Cubia (Bustiello), que riega la Veiga d'Anzu na paroquia La Peñaflor. Nesta tierra feraz naz una villa que, baxo l'amparu del rei (realengu), algama'l títulu de Puebla -enantes de 1256- por consesión d'Alfonso X, el Sabiu, La Puebla de Gráu: una ciudá llibre,con tolos drechos sobre'l so alfoz y con votu en Cortes. Pero agora va conformar polos tres alfoces próximos:Val de Pramaro (La Mata), Salcéu (El Caliente) y Gráu (El Bayu) amás de les tierres del norte (actual conceyu de Candamo). ¡Casi ná! ¿Hai quien dea más?
 |
| Turruxón na villa. ¿Por si torna'l Conde? |
Bien cerca, apegao, a esti alfoz alcuéntrase'l Coto de Villanueva, onde ñaciere'l condesu fidalgu entá - Gonzalo Peláez. Esti novalín diba decatando, día a día, cómo los aballosos habitantes de la villa ya alfoz de Gráu prosperaben como la espluma per acíu de la so Güerta, de los sos gremios y del so floreciente comerciu favorecíu por una situación estratéxica privilexiada:
Equí ñaz el Camín de La Mesa que la comunica con Castiella al traviés de Teverga, Belmonte y Somiéu. Recibe los pelegrinos que vienen de visitar El Salvador d'Uviéu (provinientes del norte España y Francia, amás de Castiella) y van camín de Compostela. Pravia al norte col puertu d'Avilés bien cerca. Vaya negociu teniendo en cuenta que se cobraba impuestu por drechu de pasu...
Esti fríu fidalgu, intelixente, avariciosu y ensin escrúpulos qu'aspiraba a entrar na jet astur - Gonzalo Peláez de Cuaya - precisaba aumentar los sos moderaos ingresos si quería algamar al Olimpu. La envidia escómelu hasta'l ciernu.
- Tengo que me facer col alfoz de Gráu. El Val de Pramaro tien de ser míu, y tolo que lu arrodia tamién. !Equí nun hai más amu que yo!.
<<L'escudu d'armes del Conde Cuaya: Flotando nun oleax azur y blancu vemos un turrión almenáu sobro un campu carmín colos dos pinos del blasón de Graú escoltándolu >>
Nun yera fatu'l xostrón. Magar tuviere dispuestu a too entamó pela de buenes... Decidíu, presentó escritu ante'l Rei suplicándo-y la concesión de la Pobla. ¿Qué motivos alegó? Nun se sabe a ciencia cierta pero achisbando na historia d'aquella dómina ye fácil de suponer qu'esplayare ante'l Rei los buenos servicios que la familia Cuaya-y prestare na so llucha colos Infantes de la Cerda p'algamar al tronu. Bona carta presentación.
Los argüyosos vecinos de Gráu, enteraos de tal asuntu, pos yá andaben bien sollertes, preséntense tamién énte'l Rei - la Xunta de Rexentes ya funcionarios reales - sopelexando la so Carta Puebla.
 |
| Gráu: Escudu d'armes |
<<L'escudu d'armes de La Pobla Graú:
..............
Los conselleros del Rei tiénenlo claro ya aconseyen en firme:
- "La Carta Puebla ha prevalecer pencima cualisquier otru privileyu".
Pudo tener claudicao - a vegaes ocurría- pero andaba mui necesitáu de perres; los enemigos yeren munchos...
El conceyu gana, el de Cuaya pierde... De momento...
Pero va costayos caro a los vecinos de Gráu. Trama un plan pa tomala pola fuercia. Los ataques al alfoz, y a toa la redolada, aumenten de día en día... Nun hai camín seguru nin comerciante tranquilu... Les colleches arruinaes, les muyeres forciaes... Los pueblos vecinos a Graú, que son los más perxudicaos, van despoblándose: La Mata, Gurullés, Bayu, Rañeces... Al empar que la va aisllando y aumentando'l númberu de miembros de les sos mesnaes va fortificando'l so terrritoriu. Amás de Villanueva llevanta castiellu en Cuaya protexíu por otros dos : Cabrera al norte y Baselgas al sur. Gráu reiste atrincheada tres les muralles de la villa. La situación tórnase insoportable... Esto nun pue siguir asina...
- ¿Qué facemos?
 |
| Fernando IV, L'Emplazáu |
Acudir a los alfoces vecinos que teníen el mesmu problema. En 1301 llogren trespasar el cercu y empobínense a Uviéu a tratar col Conceyu. Otros van dica Castiella pa solicitar l'amparu del Rei, al que pagaben impuestos. Diéron-yos ¡cola puerta nes narices!
El Rei taba en guerra permanente, civil ya esterior:
- ¡Agora nun pueo!.
El Conceyu d'Uviéu tampoco podía. Andaba a la tema col peor de los señores: L'insaciable Obispu don Fernando Álvarez. A esti tamién hai qu'echa-y de comer a parte. Y echarémos-ylo...
En 1307 vuelven los de Gráu a pedir andecha a Uviéu escontra'l carniceru....
¡Nada!.
El guardián de la Gloria tien la ciudad abrasada con mesnaes de bandoleros que s'abelluguen nos castiellos del señor de la mitra: Priorio y Picu Castiellu (Tudela).
¡Solos!.El pueblu de Gráu queda solu.
El llobu sábelo. Yá ta fecha la faena; agora bien ¡LA ESTOCADA!.
Llevaba un ciertu tiempu ensin malpenes faese notar. Na mañana del primeru de Marzu del añu 1308 los habitantes de la villa despiértense con una alborada ingrienta.
 |
| L'asaltu |
Asina lo vimos nós:
<< Los cohotes son saetes envelenaes de dolor.
Los sones, el repicar de morteros de catapultes honor.
Les muralles vense ornaes por escales de terror.
La ciudá ambura en llames ... ¿Ye n'honor de Faetón?
La puerta del Campu abierta pola mor d'algún traidor
y esotra l' Ayuntamientu
dolosía del ariete d'aquel conde malfechor...
Les mesnaes danse al saquéu, a la muerte y violación.
De bien poco sirvió'l fosu... ¿Qué te ficimos, Señor?>>
 |
| Los afanosos vecinos de Graú nun s'afandaron un res y pocu tiempu dempués teníen la MURALLA en pie. Foi tan feraz la lleenda qu'entá la caltien arrecha. |
El carniceru Cuaya acaba d'aprobar les oposiciones. El tribunal inquisitorial del obispáu concedió-y la másima nota: ¡Sobresaliente Cum Laude!. Y a trabayar pal Señor. Pal señor obispu d'Uviéu que naguaba por controlar les Asturies, polo menos les Centrales. Yá tien el Tijelino que buscaba. Y los cívitas d'Uviéu'l Nerón qu'atoxigaba.
"Axuntose con topose".
 |
| El Conde pauta col Obispu |
Nel sieglu XIV, al final de la Edá Media, Uviéu ye una ciudá semiescaecía por Dios pero'l so obispu ye'l señor más poderosu d'Asturies. El señor del Señoríu de San Salvador señorea en numberosos conceyos del centro d'Asturies: Llangreo, Llanera, La Ribera, Riosa, Morcín, Proaza, Teverga y Les Regueres. Tien cotos n'algunos conceyos de realengu y tamién tien parte del Señoríu de San Vicente. Hasta 24 obispalíes d'Asturies taben embaxo'l xugu civil y penal de la Ilesia ("Cola ilesia topemos, Sancho"). Por si fuere pocu la tercera parte del señoriu xurisdicional (realengu) de la ciudá d'Uviéu ye d'elli...
-Pero aguarda un poco, manín, ¡que tu vas pagar impuestos como cualisquier vecín!.
¡Menos mal!...
Menos mal que'l Conceyu la ciudá nun ta dispuestu a dexate pasar una... Y tamién vais a pagar portazgu pola Puerta La Noceda, la más averada a los edificios relixiosos... Y andaben a la tema... Y porque l'obispu quería meter el focicu na eleición de los alcaldes - tres - de la ciudá masque yá Alfonso X sentenciare: "El conceyu elixe dos y l'obispu ún".
Pero nun se resinaba... ¿Cómo se diba resinar?
Antiguo, allá pel sieglu XI, la ilesia d'Uviéu yera'l centru de too y l'obispu l'umbeligru del mundu. Agora, nos entamos del XIV, la burguesiona - magar el sentimientu relixiosu lo encubriere too - taba un pelín penriba, de mou talu que'l recaudu baxáre-yos casi a la tercera parte.
 |
| (La catedral d'Uviéu) "Quería L'Obispu d'Uviéu ganar la puerta del cielu per aciu la puerta la Seo " |
- ¿Pero qué va ser ésto? ¿Habráse visto qué descaru? ¿Dende cunando les perres faen más provechu a los homes qu'a Dios?... ¡Si tengo que remocicar la Catedral! Quiero entrar nel cielu pela Puerta Rutilante.
- ¡Preciso fichar un galácticu!.... A ver como ta'l mercáu...Yá lu tengo.... ¡¡¡Cuaaayaaaa!!!!
Nun había otru meyor pa francir les defenses de la ciudá, pa roba-yos la cartera... Y los ricos comerciantes carbayones - y otros - víense atacaos per tolos hastiales; y el tráficu baxaba y el calcetu encoyía... Pero'l del cura engordaba, que nun había vecín, nin pelegrín que nun recibiere visita de la malfetría güeste.Y glayaben per Uviéu:
-Esto nun pue siguir asina... Hai que busacar soluciones ....
¿Y qué determín tomaren?
Escontra violencia, xusticia. Y si esta nun encartia....
"Un clavu saca otru clavu".
 |
| "Un clavu saca otru clavu" |
<< Contrataron los d'Uviéu
Suer de Dado, l'alleranu
que de Mieres a Prioriu
tien a gonzalo amargáu;
nun ye casu que'l comerciu
tea dafechu afogáu.
Mas de poco sirvió'l parche,
foi'l Conde está más malu
Asina que, amás de fortificar les ciudaes y formar un especie de policía llocal, contrataron asimesmo otru caballeru ociosu pa faer frente al benditu malfechechor (1308). L'alleranu Suer del Dado, espertu espadachín, poseyía un pequeñu exércitu col que se dedicaba, más o menos, a los mesmos llabores que'l Conde. Agora firma contratu y ta abellugáu pola Llei. Mui guapo. Misión: Protexer el comerciu d'Uviéu dende Mieres a Priorio. (¡Curiao, que ye una cueva bandidos!)
 |
| << Dende El Castiellu Prioriu el de Cuaya anda al oru >> |
Yá nun dormíen tan tranquilos los amparaos pola Ilesia ...L'Obispu vese un poco sosprendíu y firma un conveniu col Conceyu pa....¿Pa nun se mancar ente ellos? ... En realidá pa ganar tiempu porque los desmanes diben de pire en pire... Magar les bones intenciones los alleranos fueren poco más qu'una mosca coh.onera...
- Esto nun pue siguir asina. Hai qu'hermanase y trabayar en comuña.
Y mandaren emisarios a Gráu. El 21 d'ochobre del añu 1309 - y sabiendo que'l rei nun podía agabitalos- que bastante tenía colo de so- roblen una Carta d'Hermandá los conceyos d'Uviéu, Gráu y otros alfoces vecinos ( hai quien diz que'l Rei metió'l focicu pa catalizar esti alcuerdu darréu l'incendiu de Gráu, qu'hasta la Corte llegó'l fumu). Asina surdieron les Cartes d'Hermandá, como alcuerdos intermunicipales pa defendese de la malfetría nobiliaria, pero tamién de los que nun lo yeren que jetas hailos en tolos llaos, hasta na corte real...
Estes "milicies municipales" - mandaes por alcaides, ún per cada municipiu - tírense a la cai pa defender los caminos. Taben bien organizaes: Fuerza militar (caballeros, arqueros y piones), intendencia y zapadores. Pero...a más milicies, más cuayones... ¡Y yo más!
¡Asturies ye un campu de batalla!
Una guerra civil onde los del sangre azul (cuayones) lleven les de ganar; que pa eso tienen castiellos abondo onde abellugase darréu de cada asaltu.
- ¡Precisamos d'un galácticu mayor!
 | ||
| Sarcófagu de don Rodrigo Álvarez de les Asturies (Muséu Arqueolóxicu d'Uviéu) |
- ¿Ónde alcontrar daquién que tea interesaú? ¿Hailu?
- Hai un señor asturianu, mui importante na corte castellana y con posesiones abondo na nuesa tierra, que tien el mesmu problema que nós: Rodrigo Álvarez de les Asturies.
- ¡El so primu!
- Carnal. Y "nun hai peor cuña que la de la mesma madera".
-¿ Nun ye conseyeru del Rei y ayu del principe ?
- ¿Y por qué ha venir aidanos? Nun va tanto vieno...
- Intereses comerciales; talo que nós.Tien bayura de tierres n'Asturies y tan viéndose asolaes poles hordes del so primu. Naide nun tien tantu interés n' acabar col rapiegu. Y ta preparando un exércitu, por si acasu...
- Eso cuesta munches perres. Nun ha de venir pa nada el Mayordomu Real...
- Dende llueu. El Señor de Noreña ... Y de Xixón y Ribesella; y d'Allande y de Llanes ye'l Comenderu d'Uviéu, ye dicir, el so proteutor militar....
-¿Qué?... ¿ Proteutor militar del Conceyu d'Uviéu ?.. ¡Pero si tevo asediándonos va poco!... Por mor de la guerra sucesión al tronu allinióse nel bandu enquivocáu. Tevo de la parte del infante Xuan y escontra del cativu Rei Fernando IV y de so madre María de Molina, colos que nós tábemos a piñón...
- Pero esti finu navegante en tierra supo camudar de bandu a tiempu (per aciu les habilidaes de la mio almirada señora). Agora ye'l brazu derechu d'Alfonso XI, qu'hasta lu punxo al cuidáu del so fíu bastardu. ( Y debió facelo con procuru porque algamará a ser rei: Enrique II, primer Trastámara).
Y equí los tenemos frente a frente; los dos pesos pesaos d'Asturies:
Rodrigo Álvarez >< Fernando Álvarez
( la Corte >< la Ilesia )
Por dalgo yeren parientes; los dos queríen lo mesmo: Perres y poder. Pero'l señor Condal diba algo adelantáu (yera Adelantáu d'Asturies y Lleón; y más tarde foilo de Galicia). Tenía al rei, y la llei, de la so parte. Asina qu'echó-y la llei enriba al arteru Obispu d'Uviéu al acusalu de xantaxista y trafulleru por mor de los abusos y males artes emplegaes pa saca-y impuestos al Conceyu.
- ¡Eh,cuidadín, camaleón!... Que tas metiéndote nes faldes de la Ilesia...
Y tanto, porque ye comedenderu San Vicente. Y tamién de Llanera y Les Regueres (más tarde foilo de Sobrescobiu y Gauzón). Demasiao cerca, demasiaos roces entre primos.
Pero Rodrigo vien a por toes y yá alcontró la xida que precisaba pa echa-y l'exércitu enriba... De poco sirviere la carta del Rei al Obispu encamentándo-y mui serio que dexare d'alendar al conde-bandoleru y s'esaverare dellli.
<< ALEA IACTA EST >>
Cuando en 1316 "l'exércitu de salvación" entró n'Asturies diben amestándose-y los conceyos vecinos, les hermandaes y tou'l qu'arranaba por acabar col carniceru. Yeren munchos. Nun podía desperdiciase ocasión tala...
 |
| <<Mira y mira don Rodrigo cómo atacar el castiellu ; el de Cuaya, seguru, espera daqué d' Uviéu ... - Si tien l'Obispu les armes yo pueo ganar un tiempu ... Cuesta muncho caltener tanta mesnada, ¡qué exercitu! ¡Qué bien me venía un apañu pa un futuru tan inciertu! ¡Tas guapu , Conde Cuaya!, Ye muncho la que se xuega nesta partida entamada : o pal Señor de Noreña o pa la Mitra encarnada>> |
El de Cuaya atrincheró nel castiellu de Tudela. Picu Castiellu yera'l sitiu más seguru. Yá ocurriere doscientoa años antes col otru tocayu suyu. ¿Nun s'alcordaba que'l Potestas claudicare a la fin?
Los d'Uviéu pel norete, los llangreanos pel este y les tropes de Rodigo pel sur ya oeste torguen la posible fuxida a los del castiellu. Per esti aguanta, quier ganar tiempu... Sabe que-yos falta maquinaria pal asaltu definitivu y que l'Obispu nun-y lo ha de prestar...Sabe que caltener un exércitu cuesta mun ches perres. Igual pide un pautu...
Los vecinos de la redolada (La Fócara, La Motera...) asina como los ancestros grabaos nel Picu Berrubia clamien plasmaos énte despliegue talu...
 |
| <<Los ancestros de Berrubia nun conciben tal batalla ¿Cómo podrá el de Cuaya aguantar esta embestía?>> |
¿Ún vivu?... ¿ Y el Carniceru Cuaya?... Foi inútil buscalu ente los muertos.... ¡Fuxó!... Naide nun lu viere... Dicen que yá colare díes antes camín de Navarra....
El conde esapaeció pero la lleenda sigue... Y sigue viva entá... Entá me la contó mio güela. Entá'l Conde m'amedranó. ¡Güelaaaaa!
Tamién siguió la lleenda del castiellu. Quedó en pie pa que s'abellugare otru conde rebelde: Alfonso Enríquez, hermanu de Xuan I Trastámara. Pero esti rei taba h.artu y mandó esanicialu dafechu. Corría l'añu 1383. Menos mal que me dexaron cuatro piedres pa poder contalo yo. Cortesía de Don Xuan. Gracies, maxestá.
Ansí que la lleenda sigue. Güei día somos munchos los que nos averamos a Picu Castiellu a remembrar la historia. Queremos formar parte de la lleenda...
Yá güei zarramos la puerta. Si queréis abrila vós...
 |
| Voi echar la tarabica a esta ruta de Cuaya Pasélo de maraviya ya nun tiro la toballa. Aneciaré so la vida d'aquel conde tan canalla. |
AGASAYOS :
Magar que todo entamare por mor del conde y PrOTESTAS Gonzalo Peláez nos tiempos de Doña Urraca y del so fíu Alfonso VII de nun ser por Fernando Romero que escribió el llibru: "Coalla el sanguinario. ( "Vida de Gonzalo Peáez, conde y bandido") con illustraciones de J.A. Marinas, estes salides de "Quousque tandem, Conde Cuaya" nun tendrío visto la lluz o, polo menos, nun tendrién la mesma forma nin fondu.
Tuvimos que dir mercalu a Uviéu, a la llibrería Ojanguren ( nun lu hai n'otru sitiu), pero mereció la pena; foi, ye'l nuesu llibru de cabecera. Una enciclopedia pa nós que nos llevó a facer un máster aceleráu; solo somos caminantes ensin otres pretensiones que nun dir pal otru mundu "in albis"..Igual ellí nun son tan benevolentes como esperamos la seyáis vos.
Gracies caldies a dambos. Y espero, qu'enantes de rindir cuentes allá onde debiere - espero que Conde ya Obispu nun tean mazcaritaos na puerte - podáis roblame esti llibru.
No hay comentarios:
Publicar un comentario