SUAÑOS de MERINDADES .- MISIÓN:PATERNA [4] "Nos rimeros de les Bardulies"

                                      

             SUAÑOS  de  MERINDADES (4)

                                MISIÓN: PATERNA  

                                <Pelos rimeros de Les Bardulies cola futura Reina d'Asturies>

Averándonos al paradisu de  FRÍAS 

                        ZZZZZZzzzzz.... SUAÑU (Nu.6) .....zzzzzZZZZZ

            [ Soi, pa los cristianos, Selim Marwán, ¿alcordaisvos?. Voi camín de Les Bardulies,  encomendáu por Ramiro, Gobernador de Galicia a propuesta del rei Castu, col envís de cumplir un mandáu naquelles tierres al norte de Burgos y Álava a les que la xente empencipiaba nomar CASTIELLA pola bayura d'Al Qilá que se taben llevantando n'esta zona.

Castiellu de Frías 

         L'enfotu los cristianos del Norte yera poner un frenu al les razies árabes y al empar dir  afitando una repoblación que llevaba al rodiu d'un sieglu gotiando pero qu'adebecía dir asentando dafechu ensin tener qu'escondese nes montañes añu tres añu cada vez qu'un garapiellu moros venía d'escursión a les tentadores playes del Norte, a los idílicos valles de Llosa, Mena o Tobalina, a la llanura alavesa, a los campos de Villarcayo, a les güertes de Medina de Pomar.... Yá lo ficieren los romanos a los que nun hebo manera d'echar y anguaño instalaron los árabes que tornen, ganadores, otra vuelta a abusar .... Pero esta vegada los cristianos tán dimpuestos dafechu a reconquistar; repoblación ya espada a son les armes a emplegar. Yo toi ente dos mundos que nun quieren la paz; intento comprender a los bandos pero a Selim ben Said al Marwán, namás que-y queda rezar y pasar per esti mundu siendo una persona cabal. 

Castiellu primitivu, ¿un poco asemeyáu al 
de Don Diego ?

            Costó arribar al castiellu de Don Diego Rodríguez, nes Bardulies, asitiáu no alto de Medina de Pomar por mor de los dientes de dragón que'l conde fixere colocar col enfotu de torgar un posible - y casi seguru - ataque musulmán que nos obligó dir faciendo la sierpe hasta un fosu en "V" que salvamos per aciu d'una ponte llevadiza que trespasaba una rústica muralla de piedra mampostería engrandada con una empalizada o barganal. Los mios collacios, Argimiro y Sigeredo, y yo mesmu fuimos recibíos nel Patiu d'Armes pola muyer y la fía del comes que nun s'alcoltraba en casa seique aportó al atapecer acompañáu del so fíu Rodrigo; veníen de visitar les nueves obres d'ampliación del castiellu de Tedeja, nes llendes del so condáu, la naciente Castiella, mesmo al par d'un pueblín conocíu por Trespaderne. 

Castiellu Medieval ( Montsoriu). Por mor del so
afayaizu asentamientu enxamás foi conquistáu.

        Cuando sentimos los glayíos y l'estrueldu la caballería entrando n'antoxana de palaciu cortamos la entretenida y granible conversacíon con Paterna y so madre y salimos con elles a saludar al anfitrión. 

    - Dios vos salve, don Diego, el Señor sía con Vós. - Diximos empobinándonos al conde al tiempu qu'abangábemos la tiesta con munchu requiloriu en señal de reconocencia. 

    - Seyáis bienllegaos, amigos, que'l serviciu d'anubda yá nos punxo sobre avisu la vuesa visita ya unos criaos diéronnos los detalles de quién sois vós. Pa los emisarios de Ramiro esta ye la so casa; esperamos sía del vuesu enfotu. 

    - Munches gracies, Don Diego. El candial tratu recibíu pola vuesa muyer Mencía y la neña Paterna yá nos amuesa la clas de caballeru que sois Vos. El futuru rei Ramiro tendrá conocencia cierta de la vuesa gratitú ya enfotu pa con nós. 

    -  Mencía. ¡H.e, h.e!.. La mio muyer nómase en realidá Paterna Mencía pero prestá-y que se emplegue Paterna pa la so fía, qu'en realidá bautizó como Urraca Paterna, pero ella namás emplega'l segundu. Mencía la madre y Paterna la fía. Amén, digo yo. 

    - Asina sedrá, Don Diego; por Paterna conocíemos la neña y  Paterna sedrá, vive Dios.  Díxonos  doña Mencía qu'andabeis per Trespaderne col envís de visitar les meyores d'un castiellu asitiáu nun puntu mui estratéxicu que vos pue aportar una valiosa información por aciu les razies árabes.  

Monesteriu femenín Samiguel del Pedrosu
  Fruela I (759). Abadesa: Nonabella
¿Estudió Paterna n'él?

    - Asina ye, astures.  El castiellu de Tedeh.a tien una situación poliorcética envidiable (718 m/a); ye perdifícil d'asaltar y al empar abarca una panorámica impresionante contolando'l valle de La Horadada al sur, el valle del Nela al norte y mesmo'l de Tobalina, al este. Cualisquier invasión pue acolumbrase a munches milles de distancia colo que pue dir alvirtiendo al restu los castiellos de Les Bardulies. Yá sé que vos suena a chino pero si nos facéis l'honor d'agospiar unos cuantos díes na nuesa casa la mesma Paterna, qu'adebez cabalgar, pue amosavos el gran valir de les tierres de Castiella. Ramiro debe saber bien lo que significa controlar y establecese dafechu n'esta rexón, como lo intentaren el so predecesor Alfonso'l Castu y hasta so padre Fruela qu'en 759 llevantó'l Monesteriu Benitu femenín de Samiguel del Pedroso, na Bureba. Y nun falemos de Paterna qu'otra reina más afechisca nun l'alcuentra en dengún reinu cristianu. Nun m'empobina dicilo solo l'amor de padre pos si faláis con ella decatareisvos ceo de la so preparación; cuidela col tol procuru pero ella respondió meyor. Ye una muyer fecha pa ser Reina; los ecos que sintió Ramiro son del so valir el clamor. 

    - Aldovináis los nuesos pensamientos, don Diego. Nada nos prestaría más que conocer Castiella de la mano la so fía Paterna; naide meyor qu'ella pa poner al tantu a Ramiro de lo que Castiella significa pal Reinu d'Asturies y pa España. 

    - Sía, pues. Falái con ella, trazái un plan y disponéi lo necesario pal viax; magar yo nun puea acompañavos pienso agabitavos en tolo que preciséis. Por razones del cargu tengo que andar sollerte pa facer xusticia onde me llamen ya iguar les fronteres onde fuere menester. Sabéis que esto ye tierra seminuevo de repobladores y les presures, castiellos y cenobios dexixen muncha xusticia y llabor. Pocos díes paro en casa, Castiella tienme absorbíu'l tiempu y la razón. 

                                                .........................

Salimos de Medina de Pomar camín de Trespaderne y Frías.

        Paterna taba como lloca de contenta. Quería probar los caballos - asturcón y gallegu - que triximos y de pasu amosamos el grandor de les sos Merindades a llombu d'un caballu llosín - a min tocóme una yegua - qu'ella curiaba col mayor de los procuros. Esti viaxe diba permitinos conocer a la futura Reina d'Uviéu asina como la naciente Castiella, la llinde o marca coles tierres sarracenes.  La cosa pinta n'oros; namás pienso en Lluna - la mio muyer - que nun pudo acompañanos nesti viax al Edén: Les Merindades, la cuna de Castiella onde, en ciertu modo, ella mesma tien los sos raigaños. 

Paterna traza'l viax
de la primer visita. 

    - ¿ Cuál va ser el primer viax con que nos quies sorprender, Paterna? - entrugué-y yo.

    - Vamos siguir el camín que mio padre fizo últimamente dica'l sur, hasta Trespaderne, más o menos: Nofuentes, Trespaderne (Tedeh.a), Cillaperlta, Oña - quiciás - y el valle de Tobalina onde Frías ye ...Yá lo veréis, prefiero que me lo cuntéis vós. Si'l tiempu da igual llévovos a visitar los tabayones de Tobalina, un gociu pa los sentíos. 

    Componíemos la comitiva, amás de Paterana ya un servidor, los mios collacios  Argimiro y Sinderico, yá de soldaos-criaos, asina como dos criaes de Paterna - Gadea y Elvira - más otros  5 soldaos, refuerzu de seguridá del propiu Don Diego. ]]

                                 ........ FIN  del   SUAÑU (6º) .....

                                                 :::::::::::::::::::::::::::::::::::

LA  NUESA  REALIDÁ (1)

                 La realidá, naturalmente, ye que la Parienta y yo visitamos xuntos Les Merindades, como nun podía ser d'otra miente. Aquel añu punximos el cuartel xeneral en Trespaderne agospiando nel "Hostal-Restaurante José Luis" dende aprovechamos pa facer estes visites que Paterna acaba proponer: Tedeh.a, Frías, Cillaperlata ya Oña, onde tomamos la espuela recreádonos col "Cronicón D'Oña ", una obra de teatru representada polos vecinos del pueblu que nos tien de llevar a los tiempos de Sancho García de Castiella (995-1017) y d'Almanzor [939-1002], alredor del mileniu. Pero vamos pasu ente pasu que ye muncha la gayola que nos queda por cuntar ...

Castiellu de Les Cueves
Cebolleros

        El día que pensábemos agospiar en Trespaderne tomamos el camín de Villarcayo y pasamos per Medina de Pomar y siguiendo la N-629  pelos márxenes del Ríu Nela entramos na Merindá de Cuesta-Urria con capital en Nofuentes pero un pelín antes disviamos dica - Cebolleros pa visitar la célebre Torre neorrománica o Castiellu de Les Cueves llevantáu a finales del XX  por un paisanu casáu nel pueblu - Serafín Villarán - qu'emplegó unos 25 años en facelu con regodones del Ríu Nela (1978- 2003) trabayando namás los fines del selmana dao que'l so verdaderu oficiu yera soldador nel País Vascu.  D'esta miente lo que yeren unes cueves que quixeren ser bodegues - pero fueron el petite pal enriedu de los guah.es - terminaron por convertise nun verdaderu castiellu. Bueno, en realidá él nun llegó a velu termináu del too pos morrió un pelín antes, nel añu 1998. Nós tuvimos meyor suerte.        

Trespaderne dende Tedeh.a,
el caprichu de Don Diego, y de tantos ....

    

         Per Nofuentes pasamos como si tal cosa pos la idega yera instalase y xintar nel Hostal José Luis (Trespaderne) pa poder visitar el Castiellu de Tedeh.a pela tarde. Tomamos el menú del día y pueo dicir qu'enxamás comí una carne más rico, nada que me supiere tan bien. Tres una pequeña siesta reparadora - esi día veníemos de Xixón - tomamos el determín de xubir hasta'l castiellu al que Don Diego-y tenía apegu talu. Nós nun quedávemos atrás pos teníemoslu por un mitu dende que lleéremos la hestoria de "El caballero del jabalí blanco" y "El Reino del Norte", del escritor valencianu J. J. Esparza, un gran Maestru,  les cuales obres son talo unes CRÓNIQUES pa nós.  

            Dende l'hostal hasta la base del cuetu onde ta asitiáu'l castiellu hai dos kilómetros andando pela ciudá y l'estrarradiu. Como tábemos un poco cansaos y el castiellu taba la mar d'epicoretáu decidimos dir en coche hasta onde pudiéremos. En realidá yera tornar pela N- 629 - trespasando la ponte medieval y les víes del tren - hasta un puntu onde encontraremos una desviación col cartelu afayaizu: <Castillo de Tedeja>. Lo que fuere un camín avesíu anguaño ye una carretera formigón iguada de recién pero empinada de carayu.  Aparcamos nun ensanche fechu a remente y tiramos andando'l mediu kilómetru que nos quedare (igual yera más pero adebecíemos tantu llegar ...)

EL  CASTIELLU DE TEDEH.A (Tedeja)    

La mio PATERNA nel Castiellu de Tedeh.a 
- El que tenga valor que xuba, <Camín de Niria> ta a la espera.

     Ye una fortaleza asitiada al sur-oeste de la ciudá  nuna llomba caliar a 718 m/a. - onde se funden les agües del Ebru y Nela - sobro'l Beyu de La Horadada  y nos rimeros de la Sierra de la Tesla. Privilexu natural, comunica Les Merindades con Oña y La Bureba, al sur; al norte controla el valle del Nela y al este los de LLosa y Tobalina; un chollu poliorcéticu qu'enxamás pasó desapercibíu. 

Allugamientu del castiellu de Tedeh.a

        Tedeh.a vien del llatín = tetelis , ye dicir, tutela o vixía. Esto quier dicir que yá lu emplegaren los romanos (V) como lo amuesen tamién dalgunos restos alcontraos talo les bases cuadraes sobro les qu'asienten les torres semicirculares de la muralla.  Ye nidio qu'esti conxuntu tien un caráuter militar que fueron usando de cotino los diversos pueblos: romanos, godos, árabes y cristianos esceciendo'l so valor estratéxicu a partir de mediaos del XIV, asentada dafechu la Reconquista nestes tierres.

Escobiu de La Horadada, onde l'Ebru torbonia
la piedra con tol puxu de la mocedá. 

    Vamos ver como nos cuenta Zonio de Mena nel "El caballero del jabalí blanco" el primer conocimientu que tien elli d'esti castiellu ; cola venia de J.J. Esparza intentaremos tornalo al asturianu:

 [[  Dende Oña travesamos los beyos dica'l norte buscando'l Ríu Trueba (el que pasa per Espinosa los M. y Medina de Pomar). Entramos nel tarrecible Escobiu de La Horadada, onde l'Ebru torbonia la piedra con tol puxu de la mocedá.  Nun lladral de la foz, como colingando d'un monte, había un castiellu pervieyu. Aquel paraxe conocíase por Tedeh.a,  y a l'aldega más cercana como Trespaderne. Anguaño naide nun había ellí, sacante una xente estraño de pinta  pergafa que vivía en cueves naturales; debíen ser pastores mediunómades como los que Teudano y yo tuviéremos visto en Ventosa. El Castiellu de Tedeja nun yera otro qu'una pila ruines pero mañana pudiere algamar a ser un sofitu esceicional. Caltúvelu na memoria.]] 

         La mente hestórica de don Justo Pérez d'Urbel afita como fundador a Don Pedro (m.740), duque de Cantabria y consuegru de don Pelayo, seguramente poles güelgues visigótiques que queden pela redolada : Mijangos, Tartalés de Cilla, Tedeja, Cillaperlata, San Xuan de la Foz en Cillaperlata, Santa María de los Reis Godos (onde los espaterios del Rei treslladaríen el Panteón de los Reis Godos tres la toma de Toledo por Tarik )... Pero sí sabemos que nel 790 apruz una donación del abá de S. Xuan de la Foz (<< in locum qui dicitur Cellaprelata subtus Tetelia>>), en 934 apaez nunos Votos de Fernán González al monesteriu de Samillán de la Cogolla; en 1035 nómase l'alfoz de Zetelia, ente 1040 y 1049 "Teleguilla" ta gobernada por Fortún López, en 1054 gobierna l'alfoz de Tedeja el señor Galindo Bellacoz de Colindres y en 1366 Enrique II concede los drechos del citáu alfoz a Pedro Gómez de Porras. 

Estructura defensiva
(Semeya:El Condadodecastilla.es)

        Esta fortaleza  inespugnatible por aciu d'un fosu escaváu en "V" con casi 300 m de muralla y protexida por seis cubos semicirculares de piedra - tou ello con dos metros de grosor en mampostería -tien una estensión de 2 Ha, y si cuntamos los axacentes de Santa Mª los Reis Godos y Peña Cortada podemos suponer qu'abarcaba unes 10 Ha teniendo en cuenta que la muralla pue baxar hasta'l Ríu Ebro. Si al oeste tenía una atalaya que facía de barbacana defensiva al este alcontróse la puerta d'entrada protexida por una torre cuadrada de sillería con probable base romana.

        Cuendo baxamos yá yera tardiquino; el sol, d'un amariellu-naranxa que me tresportaba a los colores de la infancia, diba buscando l'horizonte seliquino, pa facenos esfrutar. Tábemos embebíos faciendo de vixíes agüeyando tola redolada dica los cuatro puntos cardinales: la villa Trespaderne que t'invita entrar pela ponte romana, l'esgobiu de La Horadada faciendo la sierpe pel fondu camín d'Oña, la llanera'l Ríu Nela que remata en Medina de Pomar o les montañes qu'abelluguen el val de Tobalina... Tando allarribones fici alcordanza del pasaxe del Nuevu Testamentu cuando'l Diablu tentó a Xexús :

        - Doite tou esto, si abangándote m'adores. - De tener ocurrío equí, Xexús tuviere pasáolo bien mal.

        Dimos una vuelta pel pueblu tres sacar unes semeyes a la ponte romana del Ebru, bien cerquina d'onde recibe les maxestuoses agües del Nela que naciendo en Valdeporres bendiz a Villarcayo y Medina de Pomar faciendo tan granibles les sos tierres como afiten les güelgues que dexaron los pueblos de l'antigüedá. 

        Tres la cena, nel Hostal, y el vueltu pela ciudá - la nueche siempres te sorprende con lluces y solombres que'l día nun pue amosar - lo que nunca nun falta ye'l carah.illu de coñá (años más tarde, nel Reinu de Tudmir, aprendimos que como un asiáticu nun hai ná) que convierte los suaños en realidá.  

                                                    .............................

Cuando pasamos camín de Frías los xirasoles tornaron
la so mirada dica nós; ¿o taríemos suañando?. 

     Tres el desayunu nel Hostal embredamos camín de FRÍAS pela carretera BU-530 que pasa al llau de Cillaperlata, pero qu'esperamos otru día pa visitar. Son 15 minutos, o dalgún más, pa percorrer los 15 km que nos separen. Antes de llegar a Frías hai una llanura inmensa y ye que tamos nel Valle de Tobalina.  Vimos al final, nel finxu'l cielu, una especie farallón que destacaba na planicie magar la pequeña sierra que tenía detrás. Al dir acercádonos un pocu yá nos decatamos qu'aquel farallón yera daqué más grande, yera un pandu onde sobresalíen dos finxos asitiaos nos lladrales .... Yera un pueblu entamilgáu nuna rasa rocosa onde la Ilesia y el Castiellu paecíen abellugar aquel benditu llugar.... Frías yera  un pueblu eleváu, nacíu de la roca, que quería dicíi a tou'l valle de Tobalina qu'ellí taba'l Rei, qu'ensin elli, aquella maravía de valle yera vilba, que los fíos nun yeren del sangre real.  Llegó un momentu en que les tierres cercanes llararon los campos xirasoles y al venos pasar torcieron la vista hacia nós y entós nun tuvimos más remediu qu'aparar. Aparcamos a la oriella la carretera y entamamos a xugar a semeyeros, cuando de pie, cuando echaos, cuando retorniándonos en postures imposibles ....  Nun sé'l tiempu que perdimos, ¿perdimos?, naquel benditu llugar; d'ellí nun había manera de colar.... 

Ponte Medieval de Frías sobro'l Ebru.
Pasu casi obligáu ente la Meseta y el Norte. 

            Fuimos averándonos al pueblu perdíos ente un mar de xirasoles que nos dexaron a la vera del Ríu Ebru que debíemos cruciar pero... A manzorga había una bellissima Ponte Medieval (XII, góticu) -allombada nel centru - colos raigaños na dómina romana y que sufrió delles tresformaciones a lo llargo de los sieglos.  Agüano nun ye preciso pasala col coche pero antiguo yera'l pasu natural, tres pagar el portazgu, como ye de talantar, pa entrar na villa. Volvimos a parar. Semeyes y más semeyes naquella ponte que nos podía aupar al paradisu de Frías al traviés d'un mundu pasáu qu'adebeces remembrar, magar que nun lu conocieres sacante en suaños, Suaños de Merindaes. 

Dende la Ponte de Frías 

        La Ponte fortificada con un turruxón de tres altures - por mor de los impuestos - sobro 9 güeyos mide 143 m de llargor por 3,5 d'anchura. Yera'l pasu obligáu pola calzada romana que comunicaba la Meseta y La Rioh.a col norte  cantábricu: Bilbao (por Orduña), Cantabria y Asturies. 

        Y yá, por fin, arribamos a Frías col coral nun puñu, con una pergrande ilusión. Sabíemos qu'aquel pueblu nun mos podía defraudar; nada nun teníemos lleío al rodiu la so hestoria, tábemos vírxenes de tolo que se refier al rodiu Les Merindades y Frías ye una hestoria más que debemos descubrir, ¿quies acompañanos a caleyar peles sos cais? . 

... Tres enredar pela Ponte faciendo semeyes a mamplén terminamos agarrando'l coche p'averon al pueblu dao que después pensábemos siguir la carretera camín de la Toba, un máxicu llaráu de tabayones que s'esparden pela infinita piedra toba qu'abonda nesi llugar. 

FRÍAS, mapa colos finxos principales de la villa
(Semeya: Folletu de "turismoburgos")

            Había indicaciones de los parkings asina que dexamos el coche nel primeru qu'atopamos, el que ta xusto embaxo del Castiellu que tantu nos llamare l'atención; vamos, nel Paséu de Ronda ¡Yera impresionante! Les güelgues de la torre del homenax - desimía del restu les edificaciones interiores - taben xusto enriba nós, ¡como p'asaltar aquel castiellu!, magar les sos almenes y los turruxones arredondiaos que la conformen. Dientro, nel Patiu d'Armes, una cisterna pergrande ya un pozu van dar pasu a los edificios residenciales - como la del Alcayde - qu'amuesen unos ventanales xeminaos ya hestoriaos de lo más prestoso. Al norte, bodegues, caballerices, almacenes,..).

Aparcando en Frías, al pie del castiellu;
que sía'l Duque'l que-y dea de comer a los caballos.

        Pa entrar nel castiellu ¿había que pedir permisu al Papa?: salvar un fosu, una ponte llevadiza, una antepuerta-torre con buhedera , un alamud (barra de fierro) ya un rastrillu; amás taba protexida con saeteres, troneres, cañoneres ... Meyor llamar a Serguéi Bubka, el saltador de pértiga rusu (6,15 m) que forzar la puerta. Claro que tamién había una puertuca disimulada, por si acasu había que colar escopetáu...   

        EL CASTIELLU de los DUQUES de FRÍAS o de los VELASCO ta como sabemos asitiáu nun lladral del roqueru de toba conocíu como La  Muela; nel lladral opuestu otru finxu corona l'entramáu urbanu de la villa, la Ilesia San Vicente. Dende la so privilexiada talaya contrala'l Valle de Tobalina y el pasu del Ríu Ebro, ye dicir, el comerciu de la Meseta col norte peninsular. Ta bastante bien conserváu pos tevo munches igües a lo llargo de los sieglos; anguño emplégase con fines turísticos y deportivos.

        La primer mención a esti Padremoñu Hestóricu arréyase al añu 867, tiempos d'Ordoño I, que como so padre andaba enfotáu na Repoblación de la naciente Castiella y precisaba de finxos estratéxicos col envís de frenar el poderíu árabe. 

El Fueru de Frías
 (Alfonso VIII 1202)

    

        En 1201 dótase d'una muralla en condiciones y pasa de los Armengol a la Corona dándo-y Alfonso VIII de Castiella - el de les Naves de Tolosa - un gran valir poliorcéticu ameyorando entá les sos defenses y repoblándola con xente trayío del castiellu de Petralata (Navarra), tres la batalla que-yos ganó (1199). Foi la época de mayor puxu mercé tamién al Fueru de Frías, copiáu del bien célebre de Logroño que desimía del pagu de portazgos reduciendo los pechos del Rei a la mitá y teniendo amás en cuenta les ganancies de cada cual. D'otra miente ellos mesmos elexíen el so Merín ente la xente del pueblu. Celebraben mercáu tolos díes (azog) amás d'un más grande los sábados. Tamién taben desimíos los sos habitantes de dir a la guerra pos ya fecíen sacrificiu a esgaya con vivir y defender el pasu de la Muela. Fernando III, el Santu, confirmó esti fueru y entá lu ameyoró.  

¡FRÍAS!
 Les cases colingantes y la Torre l'Homenax 

    La prosperidá de Frías atraxo xente enforma y los xudíos ensiguida s'enteraren llegando a formar piñu nel Barríu la Xudería, estramuros la muralla la ciudá (XIII), que tenía tres puertes: La Cadena, la Medina y la del Postigu. Formando parte d'esta muralla, colingando de la paré rocosa, había (hai) unes cases como colgaes de una escarpia - cases colgantes - con entramaos de madera que son un arquetipu del equilibriu arquiteutócicu de la ciudá de La Muela; si te presten les emociones fuertes nun les pues dexar de visitar; en tres díes nun te podrás nin peinar. 

 En 1446 pasa a manes de los Velasco que-y faen una bona restauración pero la xente'l pueblu taba que trinaba pos vieron amenorgar los sos drechos de behetría - ¡que tamos nes Merindades, Reina Isabel! -y hasta llegaron a les manes, digamos armes. En 1492 en pagu los favores los Velasco a los Reis Católicos, na conquista de Granada, concediéron-yos el Ducáu de Frías (¡lo que-vos falta, fredenses!). Tres la Guerra la Independencia quedó valera la so función militar pasando en 1920 a manes municipales, hasta güei. 

¿Qué, un vermutín a la solombra
la Torre l'Homenax?

   

       Angüaño Frías ye un pequeñu municipiu independiente (30 km2) formáu por tres llocalidaes: Frías, Quintanaseca y Tobera. N'iviernu queda poca xente en pueblu pero durante'l branu hai un ambiente escomanáu como podemos ver pola semeya. Les cais empiedraes, les cases balconaes de poca altura y con collores térrosos, la bona predisposición de la xente, la hestoria , la cultura ,y l'arquiteutura d'edificios como'l castiellu, les ilesies, los conventos, la xudería, les cases colingantes o l'ambiente les terraces de los chigres son un atractivu irresistible pa cualisquier visitante de Les Merindaes. 

        Cerca les "cases colgantes", faciendo frente al castiellu, nel estremu opuestu de la Muela, una ilesia fai de contrapesu a l'arrecha torre del Homenax: 

        La Ilesia fortificada de San Vicente ye d'estilu románicu tardíu (XIII), talo que'l castiellu, pos forma parte del conxuntu defensivu de la ciudá merce a la torre- campanariu, cuasi piramidal, que l'abellugaba nel otro estremu de la villa. Taba provista de troneres y almenes talo d'ún castiellu se tratare. 

Ilesia San Vicente, de raigaños románicos.

        Cuando en 1906 s'esbarrumbare la torre y con ella parte de la ilesia camentóse en reformala coles perres de la venta de la Portada Románica al Muséu de Claustros de New York. Don J. Calleja, l'arquiteutu burgalés encargáu de la obra, fexo un conglomeráu eclécticu - con predominiu barrocu - que nun gustó a muncha xente porque ruempe l'idega medieval de la ciudá, magar que la ilesia nun quedare nada mal. De mano tenía una nave pero na Edá Moderna añediéronse-y dos capielles, la del Santu Cristu y la visitación. Tien dellos retablos pero'l principal lleva a San Vicente abellugáu por San Xosé y Sanestébanu, el subtenente la ciudá. Esta ilesia abelluga tamién una bona coleición de retablos, pintures, sepulcros ya imaxinería relixoso. 

    ... Estramuros la ciudá  alcontramos delles cose interesantes como'l barriu la Xudería, la Ilesia de San Vítores, El Conventu San Francisco, el Llavaderu y el conventu del Vadillo. Madre de Dios, la vida na Edá Media taba dominada dafechu pola nobleza y la  Ilesia, ¡qué aburrimientu!.  

Trabayu nel campu,
el Conde alleiciona al Mayordomu. 
(S: El castillo de Montsonís, Maribel Pendás)

        Nun principiu la Economía de Frías podía considerase de subsistencia y afitábase n'agricultura de los cereales (trigu, centenu, cebada, avena y maíz, más tarde. El llinu yera otru cultivu tradicional pa texer ropa - en un tiempu llegó haber un centenar de telares - asina como la llana les oveyes. Otru negociu sonáu foi'l vinu de chacolí qu'esanició cuando la filoxera acabó coles viñes en 1900, pasando entós les tierres a cultivar cereales, más seguros. Los flaires del conventu de Vadillo yeren unos artistes cultivando esti vinu, asina como nos llagares de Tobalina (normal, taben en llendes d'agua, como veremos más tarde). Tamién tuvieren importancia grande los productos de güertes, como les fabes ya una rica variedá de frutales estremaos. Tamién na Edá Media abondaron cantidá de gremios como los: alfareros, canteros, carpinteros, cereros, cerraxeros, ferraores, ferreros, llibreros, xastres, sombrereros o zapateros, pademás tuvieren mélicu, ciruxanu, vetrinariu y boticariu. 

        Los tabayones o cascaes del Ríu Molinar, en Tobera, son una ayalga difícil d'olvidar.

                                                .........................................       

         A pocos kilómetros de Frías, a la salida del beyu per onde cuerre'l Ríu Molinar alcontramos una aldega maraviosa, llarada de tabayones, que ye imposible dexar de visitar: TOBERA, que nun tiempu llegó a ser considerada como un barriu la ciudá de Frías. Paez imposible que n'un kilómetru de ríu puea haber tal bayura d'agua llibre que s'axeita nunes impresionantes cascaes. Tal merez la pena velo que los romanos fixeron pasar la calzada que xunía la Meseta col Norte peles llendes d'estos tabayones. ¿Vamos dexar mal a los romanos?... Pos vamos a veles. 

-¿Oiga, son los romanos?...
Que llevo dos hores esperando
y per esta calzada nun pasa nin el tato.
¿Pinchó la xarré?.. Voi llegar tarde a Orduña 
y a mio suegra nun l'aguanta nin la Virxe de la Foz.

            Parte del agua que ñaz nos Montes Obarenes discurre per una roca específico, volcánico, poco pesao - la toba -  que forma un esgobiu ente Tobera y Frías y da llugar a dellos tabayones - hasta cuatro pues ver - de lo más guapo que te pueas maxinar. 

¿Paterna percorriendo la Ruta el Ríu Molinar?

        

        El paséu pues entamalu nel mesmu pueblu de Tobera y dir ascendiendo a la vera'l ríu - hai escaleres- cola gayola les cascaes hasta algamar a un finxu máxicu , la Foz de Tobera,  onde una ponte romana d'un güeyu - per onde pasaba la calzada romana - , un amilladaderu (a Cristo), una ilesia-ermita al abellugu la montaña (Nuestra Señora de la Foz) ya una cascada o tabayón que completa aquel llugar sacru, de natura ensin igual. Tamién pues facelo al revés, aparcar cerca la ponte, baxar col ruxerrux de ríu y tornar a xubir. Más p'abaxo del pueblu aprovechábase pa llevantar molinos pos yera muncho'l granu que daba'l Valle de Tobalina. Años más tarde batanes, ferreríes, pisones ya otros artiluxos hidráulicos pa facer papel - célebres yeren les imprentes de Burgos - llaraben aquel cachu de ríu hasta los mesmos pies de Frías. En feches más recientes tamién se llevantaron pequeñes centrales p'abastecese de lluz y corriente llétrico. La redolada d'esti crespu ríu facilita unos frutales y güertes de regadíu como nun se vio otru tal. 

        Pasamos una tarde inolvidable percorriendo la Ruta'l Ríu Molinar ente'l ruxerrux del agua, la piedra toba, el mufu y les cascaes;  les pontes, les capielles, los güertos, la xente'l pueblu de TOBERA y turistes a pandiar. Namás faltaron los romanos que fixeren la calzada que xunía La Bureba con Orduña, la meseta burgalesa colos montes del País Vascu, y pasaba pel esgobiu y la  Ponte de Tobera. Pero nun se pue tener too. Tornamos al "Hostal-Restaurante José Luis" como tresportaos nuna nube, yera como si tuviéremos pasao pel Güeyu de Dios (Pontedei) y entráremos nel "Tunel del tiempu". Una cena reparadora ya un bon descansu ye lo que precisábemos pa continuar a la mañana siguiente, Cillaperlata ya Oña son los siguientes puntos a visitar. Cayimos redondos na cama y ... volvimos a suañar...

                                                :::::::::::::::::::::::::::::::::::::

                .................... zzzzZZZZ .........SUAÑU (7u) ........ ZZZZzzzzzz.............

        ... [[ Bien tempranino yá taba la comitiva preparada por Paterna pa salir camín de Trespaderne col envís de visitar el Castiellu de Tedeh.a, Frías, Tobera, Cillaperlata y quiciabes Oña si'l cuerpu quedaba pa ello.. Yéremos once en total: Paterna y dos criaes, cinco soldaos de Don Diego, yo mesmu, Selim Marwán y los dos soldaos que m'acompañaben siempres: Argimiro y Sinderico. 

Per estos campos de Castiella díbemos caleyar
con Paterna, la futura Reina d'Asturies. 

        Tábemos nel Patiu d'Armes iguando los últimos preparativos del viax. Yo montaba un caballu llosín por deséu espreso de Paterna y ella la yegua gallega, regalu de Ramiro. El caballu y la yegua asturcones veníen cuasi de refrescu, con delles provisiones, col enfotu de montalos más palantre, quiciabes pa xubir al castiellu de Tedeh.a fueren lo más apropiao.  Padre, madre y  criaos de Paterna asina como los soldaos que quedaben salieron a despidinos asina como la mayoría de los habitantes del castiellu. Tres pasar la ponte llevadiza sobro'l fosu, dellos vecinos que vivíen estramuros, tamién s'aunieron a la despidida. Toos tábemos percontentos, sobremanera Paterna que se sintía talo la heroina d'un cuentu; aquella espedición comandábala ella, la futura Reina d'diba ser parte bien importante la naciente Castiella. 

Pumarada
(S: pintirest)

    .... Na falda del castiellu cruciamos el Ríu Trueba per una guapa ponte madera y fuimos caminando dica'l sur siguiendo l'ampliu camín que va bordiando'l Ríu Trueba, primero, y el Nela dempués. Díbemos dexando atrás les célebres güertes de Villacomparada y los campos de cereal: mih.u, trigu, centenu, cebá.... Llamaben l'atención los pumaraes, con variedaes  estremaes de mazana que se daba especialmente bien. En Bustillo vimos trabayar los alfareros, herederos de los musulmanes que diba cuatro díes qu'emburriáremos dica'l sur; daba gustu velos torniar pieces cerámiques de barru de lo más emplegao: cántaros, cacíes, ... Pasamos Moneo, un pueblu un tantu especial porque tando nes Merindaes caltién los Fueros vizcainos igual que dellos pueblos de Llosa. Cerquina, en Samartín de Mancobo  entá puen apreciase les güelgues d'una villa agrícola romana como figura nel Bercerru de Les Behetríes.

Castiellu Les Cueves
(Cebolleros)

        Entramos nes tierres conocíes como Cuesta Urria . En Pradolamata, xunto al Ríu Nela, llamen l'atención les güertes , llaraes sobre manera de lechugues. Dalgo asina pasa en Cebolleros, onde la xente nos brindó con unes cebolles rellenes de truches - pescaes nel Nela -  y regaes col vinu la tierra, dao que yera rica en viñeos; tamién teníen semao bayura de cereal. El comentariu la cena foi sobro un vecín del pueblu que s'empeñare en llevantar él sulu un castiellu con regodones del ríu; deseyámos-y suerte y esperamos, qu'al cuntar esto, yá lu tenga termináu. Cuayu hai que tener. [ Entrando nel Tunel del Tiempu, en Pontedei, tiénennos dicho qu'años más tarde la Reina Sabel la Católica agospió nesti mesmu pueblu cuando visitaba Les Merindades. ¿Dormiría nel Castiellu de regodones? ]. 

            Poco depués pasamos pela capital d'esta Merindá que nomen Cuesta Urria, Nofuentes, célebre por una talla de la Virxe qu'alcontró una rapaza vecina y qu'ella mesma custodiaba nuna  capiellina cercana. Yera detardiquina y facía munchu calor cuando arribamos a la ponte romana que cruciaba'l Nela empobinándose hasta'l celebérrimu pueblu de Mih.angos. Nun mos pudimos aguantar y pocu depués de pasar la ponte había una olla que nos taba pidiendo a gritos:

        - Veníi, dáivos un chapuzón. 

Ponte romana sobro'l Nela (Mih.angos)
Nin Paterna pudo resistir el chapuzón. 

        Nin Paterna pudo resistise y hasta la futura Reina, aprovechando la tapadera d'un xerrón, tuvo refrescando un bon ratu nes poles agües cristalines d'aquel ríu que nos acompañò tul día na escursión. Esto nun fizo qu'aumentar la fame pero había que llegar a Trespaderne (10 milles en total) pasando antes por Mih.angos, onde so padre tenía un turruxón, ún de tantos de los qu'había previsto pa formar una barrera defensiva escontra l' invasor. 

Yera un pueblu preciosu coles cases de barru y madera y solana nel pisu superior. Nesti pueblu tiénense alcontrao güelgues d'un templu de la dómina visigoda - siglu VI , Recaredo (586-601) . Tamién nos atraxo la curiosidá la bayura de viñeos, variedá Chacolí, qu'había na redolada, talo que los monxos de Vadillo, nes faldes de La Muela de Frías; a fin de cuentes siguimos tando nos rimeros de la Sierra de La Tesla. Unes monxes sabichegues que nos vieron, quixeron enterar quién yéremos nós. Cuando averiguaron que Paterna yera la fía'l Conde, nun tuvieron tiempu p'agasayanos con unos pinchos de morciella de Burgos ya dellos pastelinos fechos por elles mesmes; xusto lo que precisábemos p'algamar con gracia a Trespaderne, como asina asocedió. 

        Los escatafinos visigodos en toa esta zona son perabondantes: Tedeh.a, Tartalés de Cilla, Cillaperlata o  Mih.angos son exemplos nidios que dende'l sieglu VI asentaron per equí.  

    - ¿Ónde agospiamos, Paterna?

    - Pasada la ponte sobro'l Nela vamos xubir hasta'l Castiellu de Tedeh.a, ye poco más d'una milla. Mio padre tien iguaes unes cabañes mui afayaices tantu pa los que tán de cotino como pa los que podemos venir de cuando en vez. Pasaremos ellí la nueche y mañana l'alba saldremos dica Cillaperlata y Frías. Yo cuido qu'Oña tien de quedar pa otra vuelta, a fin de cuentes yá queda fuera les llendes la nuesa xurisdición. Pa xubir la cuesta cambiamos polos caballos que tán más frescos.... 

            El  SUAÑU (7u) continúa, entá nun s'acabó; pero yo toi cansu d'escribir y buscar información, asina que te dexo pa que duermas y, de pasu, descanso un poco yo, que mañana ye otru día y de xuru continúa la emoción. 

                                                    .......................................

      ESTIMANCES:

La porosidá de la toba permite que s'asienten
bayura de plantes colingando les sos muries.

. A Mariano Cano Gordo, autor de "Las Merindades de Burgos", el mio llibru guía pa estos spots; ¿qué fadría yo ensin vós?

. A la "Asociacion Cultural Amigos de Tedeja" col so presidente Roberto Fernández, pol ponderatible trabayu que llevaren a cabu nel castiellu de Tedeja, el primero del que se tien noticia nidia en Castiella.

. A los blogs: "elcondadodecastilla.es", "burgossinirmaslejos.com", "ciudaddefrias.es", "castillos del olvido.com", "raices de castilla.com", "fotonazos.es" y dalgunos más que, por descuidu, nun m'alcordé d'alpuntar. 

. A les páxines web de Frías, Trespaderne ya Oña. 

. Al "Cronicón de Oña" del qu'entá caltengo la emoción. Espero  nunca nun se rindan los onienses. 

. A Maribel Pendás, Ll. Pedemonte y C. Rivas polo so llibru :"El castillo de Montsonís". 

. A la wikipedia, como siempres, pola bayurosa información que m'apurre. 

Suaños de Merindades [3] .- "Bardulia, que nunc apellatur Castella".

     SUAÑOS de MERINDADES [3]

                                  Misión: PATERNA (3)  

                                            <Dende la capital: Villarcayo>

Torres de Medina (XIV)   o   Alcázar de los Velasco  (Medina de Pomar)

                   ZZZZzzzzzz ... SUAÑU Nu. (4) ... zzzzzzZZZZZ
     

        .... Pa los cristianos soi Selim Marwán, conocíu como'l Mozábe, que trabaya na corte d'Uviéu al serviciu d'Alfonso (El Castu). La cabera misión que m'encamentare'l Rei foi dir a LLugo (Lucus Augusti) a comprobar cómo se remanaba  Ramiro na gobernanza de Galicia y tamién la marcha del Camín Xacobéu (Primitivu) nel que tenía puestu un gran enfotu. Dao que llegare la hora tornar a la capital del Reinu'l mesmu Ramiro aprovechó pa encamentame otra misión: La Misión PATERNA.  Quería que m'averare a la naciente Castiella (Les Bardulies) pa que-y tresmitiere la impresión al rodiu la fía del Conde Diego Rodríguez, el cabezaleru de la zona, cola que pensaba casar. Yera un matrimoniu de conveniencies; al Rei convenía-y esa alianza pa taponar les correríes añales de los árabes a la zona de les Merindades (Castiella) y a los castellanos nun-yos sobraba'l gabitu real p'ameyorar les crecientes repoblaciones con xente venío del norte o mozárabes del sur. 

Puerta de San Pedro (wikiloc)
Muralla de Lucus Asturum

    La comitiva hacia Uviéu iguábemosla tres, dos soldaos mazcaritaos de monxos y yo mesmu con idénticu disfraz, que facía de prior. Montábemos caballos de Pura Raza Galega - Ecuus Caballus - y portábemos amás una mula col condumiu pal viax (pan d'escanda, cecina, chorizu, xamón, pescao en salazón, ya oruxu gallego pa dexar el cuerpu talo un reló cuando'l tarrén empinaba), ya otru caballu gallegu con regalos y preseos de llucha por si fuere menester.  Travesamos la muralla de LLugo pela Puerta de San Pedro - la mesma pela qu'entrare'l Rei Alfonso faciendo el Primitivu- camín de Fonsagrada, onde pensábemos agospiar,  y tres dexar atrás O Cádavo Baleira. 

    El viax de Llugo hasta Uviéu pel Camín Primitivu tien unes 140 milles y cuntábemos percorrer unes 20 milles al día. De nun haber novedá en díez díes podíemos tar n'Uviéu teniendo previsto facer tres díes de reposu total pa los caballo y pa nós, que los caminos entá tienen muncho qu'ameyorar. 

    Tardamos un pelín más pos la xubida de Grandas a La Mesa foi perabegosa por mor del xial y la trepa hasta El Palu nun te digo ná. Menos mal que'l tratu nes posaes foi de lo más candial. Sedrá difícil d'olvidar el pulpu de Fonsagrada y Grandas, Casa Miguelín, la xinta en Berducedo, la yacuada na Puela, el choscu de Tinéu, el menú de La Espina, la fartura na sorprendente Salas medieval (Casa Pachón), los pinchos de Grao, o'l vermú de L'Escampleru y d'otros manxares que nun soi a remembrar .... 

Monesteriu S. Vicente 
Muséu Arqueolóxicu
(Semeya: rutaclariniana.es)

        Lo que pasare n'Uviéu yá vos lo tengo cuntao. Tres ser recibiú pol Rei Alfonso yo quedé en casa, nel barriu La Foncalada, mientres los dos collacios agospiaben nel Monesteriu San Vicente. Tres díes tardamos en salir camín de Les Bardulies.  Cambiamos dos caballos, la mio yegua gallega por una fema asturcona y y el Ecuus caballus que cargaba colos regalos y preseos de llucha por un machu asturcón . Pensábemos llevar la mio muyer pero la probe nun s'atrevió; a última hora Davoecia - la nuesa neña -amalicó y el mélicu aconseyó-y  quedar unos díes en cama por mor de les fiebres.  El guah.e, Abdel, diría internu a San Vicente mientres la neña alicaba; cuando esta tuviere bien dambos quedaríen seminternos, elli en San Vicente y ella nes Pelayes (de mano San Xuan Bautista). 

Les Pelayes

        Lluna - la mio muyer - tenía'l gabitu de dos criaos, un matrimoniu que llevaba con nós dellos años y yeren talo unos familiares más, pero notábase-y nel caretu la esmolición del alma por nun poder acompañanos. ¡vaya pucheru, manín!... Yo tamién lo sentí enforma pola compaña que me fai y porque llevábemos cerca dos meses separaos por mor del viax a Lucus Augusti. Malpenes me diere tiempu a cunta-y les aventures de Galicia y yá tenía que colar otra vez. Esto ye lo que tien ser un "criáu" del Rei. 

Asturcón con cría pelos Montes Cantábricos
(Semeya: blog.teranea.es)

.... El caballu asturcón o Poni asturianu ye un caballín negru, cola grupa empruna ya una melota considerable. Ye de poca alzada (1,25 de media) y de traza un tanto rústica pero mui forníu magar descanse nunes pates fines de cascos pequeños y arredondiaos qu'aguanten la de coyer. Nerón apreciábalu enforma según Estrabón (Bueno, nun sé si foi cosa de Plinio), claro que p'aguantar aquella mole ... Vive na Cordillera cantábrica dende l'antigüedá talo otres races bien conocíes: el "garranu" portugués, el "pura raza galega", el "monchín" cántabru o la "potokka" vasca. El caballu asturcón foi perapreciáu  tanto pa la monta como pal tresporte o les xeres agrícoles. 

        . Tomamos el camín del norte, como sabéis: Uviéu, Villaviciosa, Colunga, LLanes, San Vicente la Barquera - equí disviamos dica sur -, Reinosa, Soncillo, Pontedey, Villarcayo y Medina de Pomar. 

Cuando pasamos per Pontedey vimos la mano de Dios.

     . El viaxe a Medina de Pomar foi perprestosu seique un poco cansáu, como ye de suponer. Nun tuvimos munchos percances sacante qu'en Reinosa aprovechamos pa facer una revisión a les ferraures de los caballos pos había un par d'ellos que diben coxicando y nun yera plan tenelos dando caiconaes. Polo que cinca al paisax ye daqué maravioso, a vegaes nun sabe ún con cualau quedar: La Ría Villaviciosa, les playes de Colunga y LLanes, l'asentamientu y redolada de San Vicente, el Valle de Reinosa y ... La ponte de Dios, ¡Pontedey!. Siguiendo'l cursu del Nela hai un llugar onde'l ríu fizo un milagru afuracando la roca caliar pela parte baxo dexando cuasi tola aldega enriba del güeyu que se tien formao al correr de los sieglos. Ye un llugar máxicu, una especie de tunel del tiempu onde tres pasar el sustu d'aquel inestable equilibriu xeolóxicu nun sientes otro que ganes de perdete per él. ¿Aú me pue llevar? ....

Ponte sobro l'Ebru. (Cerquina de Riosecu)
Yá nos tuviere prestao a nós tener una ponte como
esta pa cruciar el Ríu Ebro. 

       Pocu depués pasamos per Cigüenza y la llanura de Villarcayo, semada per uquier, onde numberosos arrieros carriaben el mies en toles direiciones; tien traza de ser el graneru d'aquella naciente Castiella. Yá queda poco pa conocer a Paterna. ¡Qué arranáu toi!.

     Otra vuelta volvemos a cruciar el Ríu Nela per una ponte madera aprovechando una estrechura del mesmu y ceo acolumbramos la cotariella onde s'asitia'l castiellu condal. Magar les ganes que teníamos de conocer a Paterna y dao'l cansanciu que trayíemos nun pudimos evitar danos un chapuzón nel Nela aprovechando una olla que se formaba nun meandru allonáu del buiciu l'aldea y un tanto escondíu por mor d'un sotu de chopos y alcacies. ¡Quién vería tres flaires en calzones dando glayíos nel agua!

                   ..............¡¡¡ CATAPLÁS !!!! ..........  Fin  del  SUAÑU (4u) ......

VILLARCAYO

Hotel Doña Ximena (Villarcayo)

.... Cuando la Parienta y yo fuimos a les Merindades el primer añu (4 branos, talo los árabes) agospiamos dos díes en Santa Gadea d'Alfoz ya otros dos nes afueres de Villarcayo, nel Hotel Doña Jimena, onde nos trataron perbién : Un desayunu de campeonato que facía de xinta ya una piscina con yakusi pa reparar les fuercies a la tarde enantes de dir cenar al restaurante d'al llau: Restaurante El Cid. Equí convién pidir los platos d'ún en ún porque son perabondantes y cuerres el peligru de tirar les perres. Otra cosa perbona d'esti hotel foi la bayurosa información que nos apurrieron, colos mapes afayaizos, qu'entovía guardamos como oru en pañu. 

        Anguaño Villarcayo ye la capital oficial de Les Merindades dende que Felipe II [1527 (1556-1598)] en 1560 aconseyó treslladala dende Medina de Pomar. D' aquella p'acá entamó a espoxigar mercé al mercáu de los llunes y a les numberoses asociaciones gremiales que per ellí establecieron siendo mui célebre esa de los "arrieros", que tresportaben el trigu castellano a tol norte peninsular. Creóse en 1974 pola fusión de los municipios de Villarcayo y la Merindá de Castilla la Vieya seique pocu depués dos pequeños pueblos pasaren a Medina de Pomar. Llinda al norte colos rimeros de la Cordillara Cantábrica, al sur por ríu Ebro que recibe les agües del Nela y del Trema, el valle de Manzaneda y la Sierra del Tesla y  al este por Medina de Pomar.  Anguaño roza los 5000 habitantes repartíos en trenta núcleos de población. 

       

 ....Munches veces falamos del Riu Ebro al tratar de Les Merindades; ¿prestaríavos saber como suenes les sos agües?...  Equí les tenéis a so pasu per una tarmuda sienda bien cerquina del Monesteriu de Rioseco, que fuere col d'Oña cabezaleru nel sieglu XIV. 

        La pallabra Villarcayo tien un orixe un tantu inciertu: pue venir del romanu Villa de Arcadio o pola célebre Fontem Arcayum onde s'estableciere l'antigua población, según una escritura de donación del añu 959 nel Cartulariu de Cardeña pola parte de Dª Fronilde, nuera de Fernán González. Esti datu tamién lu afita la escritura fundacional del Monesteriu d'Oña por Sancho García nel añu 1011. Dicha fonte, dayuri del Ríu Nela, debió tener ganchu talu que nel sieglu XIV tanto la fonte como les tierres de la redolada yeren señoríos de los Monesterios d'Oña y Santa Mª de Rioseco - los de más puxu de les Merindaes - como reza nel "Becerru de les Behetríes". 

Les Bardulies
(S: El Condado de Castilla)

 

        Los entamos de Villarcayo, como la mayor parte de Les Merindades, debieron tener el so orixe a mediaos del IX cuando les tribus de Cántabros, Autrigones y Bárdulos foron asitiando nestes tierres a midida que la invasión árabe lo diba permitiendo mercé a les lluches intestines qu'había entre ellos: árabes, bereberes, yemeníes ... Cola fin de defendese los repobladores foron llevantando castiellos a lo llargo y ancho de Les Merindades comandaos por merínos que col tiempu foron tomando'l nome y oficiu de comte. El pá de Paterna debía sería ún de cabezaleros, otramiente nun cuadra que'l Rei decidiere casar ehí. Foi Ordoño I, el fíu de Ramiro, el que nomó oficialmente como primer conde de Castiella a Rodrigo, posible hermanu o cuñáu suyu. 

        Villarcayo foi depredada cuando  les Guerres Carlistes esaniciándose una parte perimportante del mancomún cultural y arquiteutónicu de la villa. Menos mal que salvaron dalgunes construiciones importantes de los Salazar, Uriarte, Sarabias,Varona, Danvila o Díez-Isla de la villa asitiaes estes últimes na Cai de Santamarina. A la salida de la villa alcontramos un muséu no que fuere un monesteriu fundáu por Dª Urraca onde podemos apreciar el so sepulcru góticu y dellos más. 

Plaza de Villarcayo

        Monumentos importantes de Villarcayo son La Torre del Reló (XVI) qu'angüaño fai de Xulgáu o La Torre del Correximientu - asitiada tres l'Ayuntamientu - onde s'alcuentra l'Archivu de les Merindades. L'Ayuntamientu (1891), porticáu, ye neoclásicu (1891), preside la Plaza Mayor de la Villa xunto col antiguu Quioscu de la Música. Bien cerquina llevantóse en 1968 una Ilesia modernista engalanada con vistoses vidrieres. El Parque'l Sutu (Parque del Soto) - onde antaño había pastos comunales - ye anguaño'l barquín (pulmón) de la villa ya un llugar d'alcuentru pa vecinos y convecinos del municipiu qu'esfruten como verderones nes piscines seminaturales del Nela a la solombra de chopos y alcacies onde los guajes alcuentren bayura maneres de pasar el tiempu. 

        A nosotros lo que más nos prestó foi pasiar ente los tenderetes de la ciudá nun día de mercáu onde, por cierto, aproveché pa mercar un llibru d'Heráldica que me vino peripintáu. Cómo cambiamos col pasu del tiempu... Va poco nós dedróemos unos de los que nun saldríemos del agua; la vieyera ...

        A les afueres de la villa tien Villarcayo un modernu Polígonu Industrial de gran valir qu'aprovecha pa tresformar  los productos del Sector Primariu de la zona. Tamién el Turismo ye daqué importarte tanto pola so rica hestoria como pola sorprendente xeografía; tou esto lo que nos diz ye que Villarcayo tien una economía mui diversificada lo que vien perbién p'aguantar la cris actual. Nós mesmo triximos un xamón y dellos embutíos de la zona asina como'l miel que nunca nun falla nes nueses salides. 

                                                     **************                                   

        L' Escudu de Villarcayo: El típicu escudu español de forma rectangular cola punta arredondiada. 

    En campu de gules castiellu d'oru, donxonáu de tres donxones col central n'homenax (más altu) y mazonáu (sillería) de sable. El castiellu amuésase en dos cuerpos separtaos por un adarve almenáu. 

    Nel cuerpu inferior, por puerta, tien dos nichos embaxo arcos de mediu puntu, aximezaos, sosteníos por tres columnes clásiques con basa, fuste, capitel y cimaciu; embaxo los arcos dos homes n'azur y plata, barbaos y coronaos con sendos llibros nes sos manes siniestres y plumes d'ave nes diestres n'honor de los primeros xueces de Castiella: Laín Calvo y Nuño Rasura.  

    La bordura en plata lleva la lleenda de la escelente villa: La mui noble y mui lleal, heróica y fidelísima. 

    Al timbre la corona real abierta. 

                 

                       zzzzzzzzzZZZ............ SUAÑU Nu (5) ................... ZZZzzzzzzz

      

Monesteriu de Santa Clara, a la entra sur de Medina
Cuando Selim pasó per equí entá nun taba edificáu.

          .... Medina del Pomar, la capital oficiosa d'aquella naciente  Castiella ta perbién asitiada pa controlar tola zona de les Merindades y pa facer fuercia en casu d'invasión. Al empar tamién tien, por si fuere menester, una escapatoria rápida y bastante segura dica les montañes qu'arrodien el Valle de LLosa o mesmamente a La Riba (641m/a), non mui lloñe del nacimientu del Ríu Salón. 

        El cabezaleru, Diego Rodríguez, tenía asitiáu un pequeñu castiellu nuna cotarilla defendíu por una curtia tropa de soldaos profesionales. Al rodiu d'elli asentaba aquella parte de la población que se dedicaba al comerciu o a talleres estremaos talo los ferreros, carpinteros, albañiles, picapedreros, guarnicioneros, pelleyeros, alfareros,..... Nun yera fácil algamar hasta aquel castiellu onde antaño hubiere un castru celta, más tarde un campamentu romanu y depués un Al Qila árabe; enantes debíes de cruciar  dellos ríos - Nela, Trueba o Salón - amás de bayura de riegues según pero onde fueres seique la xubida afayaiza yera pel camín del sur que foi pel qu'emprimamos.

        ... Enantes d'emprentar la xubida al cuetu onde ta asitiáu'l castiellu yá nos salieró al pasu un destacamentu de soldaos que nos llevaben controlando dalgún tiempu; tres flaires con cinco caballos nun ye un grupu que puea pasar inalvertíu munchu tiempu sobre manera naquella llanera de Villarcayo. 

        - ¡Alto, en nome del conde y de Dios!. ¿Pue sabese quién sois ya ónde vais?.

        - Venimos del norte. Somos representantes del Gobernador de Galicia, el gran Ramiro, y venimos a parllamentar col conde de Castiella, Don Diego Rodríguez. 

        - ¿Trayéis carta de presentación?

        - Ehí van les nueses credenciales. El restu la documentación namás-yla podemos entregar al conde personalmente. 

        - Acompañáimos . El conde nun ta, pero seréis agasayos como cuerrespuende a caballeros de tantu altor pola so muyer y la fía, Paterna. 

        Al llegar a la esplanada onde ta asitiáu'l castiellu abrióse una puerta a una señal del comandante del  destacamentu. Apeamos de los caballos qu'enseguidina foron llevaos a abentar por unos criaos que los conduxeron darréu a les caballerices, unos tendeyones a teyavana asitiaos bien lloñe de lo que yera'l rústicu edificíu residencial. Un garapiellu persones formaba práuticamente un círculu alredor de nós. Dos señores destacaben del restu por mor de la so prestancia na vestimienta, el porte y el tocáu. Yera nidio, tratábase de la muyer y la fía del conde. Empobinamos los nuesos pasos dica elles abangando'l cuerpu al teneles enfrente seique Paterna - una moza más bien alta, roxa y col talle d'una baillarina - nun quitaba güeyu a los caballos: 

        - Bones tardes, señoras. Soi Selim Marwán, unviáu pol futuru Rei Ramiro, gobernador de Galicia,  pa falar con Don Diego y con vós. 

        - Seyáis bienllegaos, caballeros. Ye un honor, Selim Marwán, recibir na nuesa humilde casa a tan altu embaxador. Yo soi Mencía, la muyer del señor, y esta mocina ye Paterna, la nuesa fía. Mentantu aporta Don Diego ¿por qué nun descansáis un poco y tomáis daqué?. 

        - Gracíes, Señora; vese que lleéis los nuesos pensamientos. Una garuya nun mos vendrá mal, son munchos díes de camín, vixilia y soledá. Veo que les noticies que llegaron a Galicia al rodiu la vuesa fía non foron del tou acertes, ye muncho más guapa de lo que tenemos sentío; claro que viendo la madre ye de comprender ... 

        - Gracies, caballeros - arrepostiaron les dos. La nuesa neña ye una muyer mui preparada- siguió so madre - estudió en Samiguel del Pedrosu; amás de dominar les llabores propies d'una muyer como filar y coser, tamién sabe  d'arte, música y danza. Tien munches nociones de Cálculu, de fechu ye ella la que lleva les cuentes del condáu; so padre tien tol enfotu puestu n'ella.  D'otramiente présta-y muncho lleer, la vida de los santos y cualisquier hestoria antigua o actual que caiga nes sos manes. Aldericar de política ye pa ella una pasión. Sabe montar como un paisanu ya entiende de caballos talo'l xinete más avezáu.  

        - D'alguna cosa tábemos enteraos, de fechu esa pareya de caballos "Pura raza galega" queríemos ofrecé-yla como regalu de Ramiro, ansí como dalguna cosina más que de xuru serán del so petite. 

        - Munches gracies, caballeros. Mientres tomamos daqué fadré que descansen y-yos llimpien los cabalos; nun veo la hora de galopiar un ratín nun d'ellos- arrepostió Paterna. ¿Por qué nun mos cuenten, mentanto, los avantares del viax? ... Tuvo de ser pa pirriase. 

        - Si m'aporta un pergamín cualquiera pueo face-y un mapa del percorríu, cuido qu'a so mercé puea resulta-y mui interesante ....- Dexélo cayer con segundes dao la xida del mio viax y Paterna llanzóme de revisgu  una sorrisuca maliciosa al tiempu que colocaba na regalla l'entamu la so descuidada coleta roxa y rogaba a un criáu que-y trixera los preseos pa dibuxar un mapa.  

        L'acoyida foi de lo más candial. Yo dibuxé-y el mapa del viax mientres pinchábamos un bocáu a base de quesu, cecina, xamón, morciella de Burgos (l'arroz nun lo vi) y un pocu d'empanada, tou ello regao con vino de la zona y zusmiu de mazana, perabondante na zona. Al empar pudimos apreciar la xentilexa de Paterna asina como los sos conocimientos en cualisquier materia. Lo mesmo fala d'arte, de política que de curar un caballu; tien interés por too. Los caballos nun los montó por nun los castigar:

     - Tiempu habrá nos díes vinientes- acutió.  Cuando más entreteníos tábemos sentimos grandes gallaríos y comprendimos que llegaba Don Diego, que yá taba alvertíu de la nuesa visita. 

        Tengo de reconocer que la Neña cayóme perbién, en relidá yá podía tornar a Galicia pero conocer bien Les Bardulies tamién yera importante pa Ramiro ( y pa min) por mor de la defensa les fronteres del reinu; asina qu'a siguir esfrutando daquelles Merindades con que Dios nos regaló.

                                zzzzzzzZZZ ..... FIN   del   SUAÑU (5u) .........ZZZzzzzzz

                                **************************************

MEDINA de  POMAR

        . Medina ta tan bien asitiada que ye fácil pasar per ella pa dir a munchos llugares de Les Merindades. Ye'l municipiu de mayor estensión (205,8 km2) y el más pobláu llegando casi a los 6000 habitantes. Ta bañáu polos ríos Nela, Trueba y Salón y comprendíu ente los rimeros de la Sierra de La Tesla, los pinares de LLosa (N) y los pandos de cultivu de cereal, patata y lechuga. El nome de Medina  fai referencia a un barríu antiguu d'una ciudá árabe (o mozárabe) o xudía y Pomar a la bayura de mazanes que se dan dende abenayá nesta zona. 

Sepulcru de Pedro Fdez de Velasco y muyer.
Catedral de Burgos (Wikipedia)

          Medina de Pomar tevo habitada d'antiguo polos cántabros y yá en tiempu los romanos pertenecía al Conventu Xurídicu de Clunia. Son munches les güelgues d'asentamientos prerromanos y romanos que nos quedaren nesta zona: Medina, Pérex, Momediano, Salines del Rosariu... Foi llugar de Reis, ciudá de realengu, hasta que Enrique II Trastámara dió-yla como Señoríu al so Camareru Mayor Pedro Fernández de Velasco (1369). Alfonso VIII (XII) convirtióla en villa al concede-y un fueru especial asemeyáu al de Logroño seique yá tuviere otros d'Alfonso VII y Sancho II ; esto atraxo a munchos artesanos y mercaderes sobremanera xudíos y francos que dieron gran puxu a la ciudá. Medina algamò a tener una aduana pal tráficu de llana que salía dica'l restu d'Europa. La reina María Cristina d'Hasburgo-Lorena (1894) dio-y el títulu de ciudá por so gabitu a la causa lliberal. Medina fuera la capital de Les Merindades hasta qu'en en 1562 Felipe II  mándó treslladar l'Audiencia y l'Ayuntamientu a Villarcayo.  Esto venía d'atrás, cuando la revuelta los Comuneros los medinenses agabitaron a estos escontra de los Velasco y del Rei. ¿Los grandes nunca nun perdonen!

La Batalla de Villatomil

Alcázar de los Velasco (Medina de Pomar)

      Otra de les families cabezaleres de Les Merindaes foi la familia Salazar, siempres en guerra colos puxantes Velasco. En 1329 les pequeñes rocees algamaron tal rancor que llegaron a les armes de la forma más bestial (más de 8000 infantes y 700 d'a caballu, casi tou llosín). Na redolada de La Cerca, en Villatomil, foi tala la matanza que les agües cristalines del Salón baxaben encarnaes del sangre de Les Merindaes. Esta vegada ganaron los Salazar pero los Velasco aguardaron el tiempu la venganza y cuando pocu depués españó la guerra civil en Castiella ente'l rei  Pedro'l Cruel y l'aspirante Enrique Trastámara cada familia escoyó un bandu y esta vegada Salazar, qu'agabitó a Pedro como toles Merindades, salió perdedor cuando Enrique díere-y muerte en Montiel (1369). Dicen - igual un pelín desaxerao - que los Velasco nun dexaren piedra sobro pìedra de los castiellos Salazar. Cuenten que'l palaciu fortaleza de los Velasco, en Medina de Pomar,  ta llevantáu colos sillares de los Salazar. Guapu homenax; sí, señor.

                                                *****

Arcu de la Cadena,
pasu al barriu Cristianu. A esta probe
mora nun la dexen entrar. (¡Fatos¡)

       . El Padremoñu Cultural de la Medina medieval ye pergrande pos sobro una base de cais empiedraes aprucen per uquier casones, blasones, ilesies, conventos, castiellos,  muralles, Puertes ... Esto fai que tanto'l día como la nueche de la ciudá venga convertise un buiciu braniegu de primer orde, hai quien l'apellida Medinabella. 

        El Cascu Hestóricu taba arrodiáu d'una muralla del XV que tenía 5 puertes de les que queden tres: Puerta d'Oriente y Puerta del Arcu de la Cadena, que la llamaben asina porque de nueche quedaba pesllada con cadenes pa torgar el pasu al Barriu Cristianu. Precisamente p'aisllar el barriu cristianu llevantóse otra muralla interior, ye dicir, una ciudadela. (Seique había trampa porque el pasadizu de Santa Cruz comunicaba estramuros el barriu cristianu colos moros y xudíos. (¡El negociu, ye'l negociu). La tercera ye la Puerta de Ronda o del Perdón.  N'antigua alh.ama (sinagoga) tamién ta abierta la puerta o Arcu de la Xudería. Cuando esta zarraba los cristianos y xudíos facíen trampa comerciando ente les cais Laín Calvo (más alta) y Nuño Rasura que taben asitiaes a distinta altura. 

       . L'edificiu más llamatible de la ciudá son Les Torres de Medina o Alcázar de los Velasco (XIV) - dos torres llaterales ya un cuerpu más baxu d'aunión - que se llevantó na parte alta onde yá hubiere un castru y más tarde asitiaren un castiellu árabe. 

Xubiendo: Ilesia de la Sta. Cruz 

        . La céntrica Plaza Mayor - onde ta l'Ayuntamientu -  ye talo un balcón sobro la granible vega del Ríu Trueba y ta engalanada con unos soportales perguapos de los sieglos XVIII y XIX.  

        . Nes afueres de la ciudá alcontramos el Monesteriu de Santa Clara, ún de los cabezaleros de la dómina. Nun lladral del patiu llevantóse la ermita románica de Santa LLucía o San Millán (XII) mui patiada polos pelegrinos de toles dómines. 

        . Nel Parque del Salcinar (XII) ta la  Ilesia del Rosariu, Patrona de Medina de Pomar. Nes güertes de lo que fuere'l Monesteriu de San Pedro tenemos angüaño la Plaza Porticada de Somovilla, n'antigua alh.ama .

        . Al sur de la ciudá ta la so granible güerta que na Edá Media remataba cola célebre alfarería musulmana de Bustillo. 

.L' Escudu de Medina de Pomar:

        .L' Escudu de Medina de Pomar tien la forma del típicu escudu español: Rectangular cola punta arredondiada. Ye un escudu partíu en dos cuadrantes. 

        El cuartel de mandrecha presenta en gules un castiellu n'oru, almenáu y mazonáu de sable con tres donxones tando'l del mediu n'homenax (más altu) y aclariáu n'ázur (el güeyu les ventanes). El castiellu ye'l símbolu de la naciente Castiella ya una de les 7 Merindaes primitives. Si hai dalgún escudu que mereza llevar con más honor el castiellu nel so escudu esi ye'l de ciudá de Medina de Pomar, la primera capital de Les Merindades de Burgos.

        El cuartel de siniestra, en plata, presenta un mazanu, arrancáu, nel so color (sinople y pardu) y afrutáu de gules. Esto ye debío a la bayura de variedaes de pomares qu'hai nesta zona.

        En timbre lleva la Corona Real zarrada. 

                            ********************************

ESTIMANCES: 

Bigninia grandiflora o Trompeta china
ye perabondante na ribera del Ebro.

. A la páxina web del Ayuntamientu de Villarcayo asina como la de Medina de Pomar. 

. A  D. Lluis Messía de la Cerda y Pita, autor del llibru d'heráldica : "Heráldica española"

. A D. Mariano Cano Gordo, autor de "Las Merindades de Burgos" que llevo de cotino al llombu. 

. Al Maestru  D. José Javier Esparza por too, poles cróniques al rodiu d'Asturies talo "La gran  aventura del Reino d'Asturias", por exemplu; o "El Reinu del Norte" ....

. A los blogs y pax. Web: "Villarcayo.net", "wikiburgos.es", "caballolosino.com", "www.el correo.com"   

  [ La Bignonia grandiflora = Campsis grandiflora conocía por Trompeta china o Bignonia ye una planta trepadora de la familia de les Bignoniacees (unes 500 especies), oriunda de China.  
      Tien el tallu lleñosu con poques raizuques; seique algama trepar por mor de la firmeza los sos tallos.
      De fueya compuesto (pinnao) por 7/9 foliolos, ovalaos col marxe en forma serruchu.
      Les flores (inflorescencies en panícula) tienen el cáliz acampanáu y la corola infundibuliforme (forma d'embudu) de color roxo-anaranxao per fuera y mariello per dientro. El frutu ye una cápsula col ápiz obtusu. 
      Mui desixente ella, quier el suelu rico, fresco y bien drenao: que nun-y falte'l riegu pero ensin encharcar, eh. Lo que nun-y fai puñetera gracia ye'l fríu.. 
      Pódense los tallos que yá dieren flor al final del iviernu pero... Curiáu col lates que rezuma, ye tóxico pa la piel.  Pue multiplicase per aciu d'un morgón (acoldu)  o d'una pundera (frada o espetu)].