< LEOVIGILDO: El REI de los HISPANOS > (2ª Estaya)
DELLOS APARTAOS COMPLEMENTARIOS AL RODIU'L REINU VISIGODU
 |
- ¡Hispania va ser una y equí pongo yo un Ducáu! - Val, gallu; pero tampoco fai falta ponese asina, ho. (Semeya a cuenta de la IA) |
EXORDIU
Enantes d’entamar cola dómina de Leovigildo, el rei de los visigodos, cuido conveniente facer una cativa reseña histórica de cómo llegamos equí.
Daqué día'l mio guah.e, cola sida d'algún cumple, tuvo l'aciertu de regalame un llibru al rodiu la historia d'Asturies: << PELAYO>> , de Don José Soto Chica. De mano taba cansándome un poco pola mor de tanta batalla pero fui entrando en fariña y terminó encantexándome. Darréu pasé a otra novela d'esti autor, <<Egilona. Reina de Hispania>> . Y ensiguida alcontréme con <<LEOVIGILDO: Rey de los hispanos>>. Entóncenes dime cuenta que sabía bien poco al rodiu los visigodos y tomé'l determín d'estudiar un pelín aquella dómina a partir de LEOVIGILDO. El resultáu dedícotelu a ti, collaciu, nesti post. ¿Damos un paséu per estos 300 años visigodos?...
<< - ¡Qué historia más allucinante!
- Nun ye otra que la nuesa, vamos p'allá! >>
La PRIMERA (1ª) ESTAYA yá la tenemos espublizada la selmana pasada, ¿vamos entós cola SEGUNDA (2ª) : <<Leovigildo. El Rei. DELLOS APARTAOS COMPLEMENTARIOS>>
ÍNDIZ COMPLETU de les DOS ESTAYES
LEOVIGILDO: El REI (1ª Estaya. Yá espublizada)
1. Entamu. Los reis godos enantes del «Rex hispanorum»
2. Leovigildo (568-586):
2.1. Biografía. Oríxenes. ¿La infancia gala? ¿Qué vio? ¿Ónde puedo tar?
2.2 La xubida al tronu. ¿Cómo taba’l Reinu godu nesi 568 ?
2.3. Actividá política: La idea cabezalera. Les campañes militares. Delles reformes.
2.4. El «Rex gothorum», Leovigildo, na historia.
3. El reinu godu tres « El Rex gothorum».
4. La invasión islámica (Un post aparte, merezlo):
4.1. Causes.
4.2. Desendolcu de los FECHOS.
4.3. Consecuencies.
 |
| <Batalla de Guadalete> (Salvador Cubells) |
"LEOVIGILDO: El REI . Apartaos complementarios" ( 2ª Estaya. Vamos con ella)
5. Dellos APARTAOS complementarios:
1. ENTAMU
2. FECHOS y feches CLAVE na Historia de los GODOS.
3. La LLEI de los godos. El “Fueru Xulgu” (n’asturianu).
4. Estructura Alministrativa del territoriu visigodu.
5. Los CONCEYOS o CONCILIOS visigodos .- TOLEDO.
6. Personaxes célebres na dómina leovixildiana: Xustinianu I. Masona. Miro.
7. Les muyeres del entornu Leovigildo: Gosvinta. Galsvinta. Brunequilda. Fredegunda. Ingunda. Baddo. Rigunta.
8. L’ARTE Visigodu: Arquiteutura. Escultura. Pintura.
9. ORFEBRERÍA: El TESORU de GUARRAZAR. La corona votiva de Recesvintu.
10. RECÓPOLIS. Un suañu d’eternidá (<< Qué poco te va durar>>).
11. Dellos Historiadores godos: Contemporáneos y Modernos
12. Toledo n’actualidá. Los Museos.
13 . BIBLIOGRAFÍA
14 . CUMPLIMIENTOS
****
1. ENTAMU
.webp) |
| < Alarico ama Roma> [2] |
Los godos foron un gran pueblu xermánicu del N-E d’Europa que terminó dixebrando en dos corrientes: ostrogodos (Oriente) y visigodos (Occidente) . Los primeros fueron asitiando al rodiu la península Itálica. Los visigodos, que son los nuestros, asitiaron nos Balcanes y darréu foron tirando dica Francia ya Hispania emburriaos por otros pueblos galos.
Los visigodos fueron de mano aliaos de los romanos aidándolos a controlar a otros pueblos bárbaros. Tou esto yera a cambiu de perres y tierres onde poder establecer dafechu sicasí los romanos nun cumplieren, bonos son estos. Tres la muerte del emperador romanu Teodosio I (395), el fiador de los godos, vieno Honorio, un emperador ensin pallabra.
Hasta qu'Alaricio I dixo <<¡Basta!!>>. Saquió Roma (410) y coló dica'l sur de la Península Itálica col envís de cruciar a África. Pero llamólu la Guaxa y el socesor, Ataúlfo, estableció per Aquitania y Narbonense (S-E de Francia) pasando más tarde los visigodos a la Península Ibérica. Hebo hasta 33 REIS seique'l gallu foi <<Leovigildo>>.
La historia de los 300 años de los visigodos n'Hispania queden cuntaos na primera Estaya d'esta entrada: <Leovigildo, el Rei> .
2. FECHOS y FECHES CLAVE na historia de los VISIGODOS
¿Y si facemos un repasu de los fechos y feches clave en la historia de los visigodos?
 |
| <Fíbules visigodes d'Alovera> [3] |
Esta historia podemos dicir qu’entama nel añu 376 cuando los godos crucien el Danubio fuxendo de los hunos y va ¿terminar? en 711 cuando los árabes omeyes ganen la Batalla del Guadalete . Otros puen pensar qu’esto entama con Alarico (410). A nun ser que pienses que la historia remanez con don Pelayo, d’esta miente somos fíos de los visigodos y ...
Los fechos más señalaos na historia de los VISIGODOS podemos resumilos n’estos puntos (Nunca naide va tar d’alcuerdu total sicasí...):
. Añu (376). Los godos crucien el ríu Danubio persiguíos polos hunos (orixe asiáticu) y entren en territoriu romanu.
- [Añu (409). Invasión del imperiu romanu por suevos, vándalos y alanos]
. Añu (410). Alarico, el lider visigodu, arrasa Roma y los visigodos asienten na Galia.
. En (416) Pautu con Roma. Los visigodos entren n’ Hispania como aliaos de Roma col envís d’esaniciar de la Península a otros pueblos “bárbaros”, talo vándalos y alanos.
. En (418) fúndase’l Reinu visigodu de Tolosa por mor d’un pautu (FOEDUS) con Roma ensin escaecer la escorribanda prometía a esos otros pueblos ¿bárbaros?.
- [Añu (434) . ¡Llega Atila! , «L’azote de Dios». Ente los años (434-453) amarga la vida a godos y romanos. En 451 crucia’l Rin y tien de ser frenáu, «Campos Cataláunicos*» , por una andecha de visigodos y romanos (Teodorico I-Aecio). Menos mal que’l Papa (León I) y les epidemies tiénenlu parao (552)].
. Añu (475). Eurico, aprovechando la debilidá romana ruempe’l pautu de “Foedus” (federaos) con Roma y declárase INDEPENDIENTE. «Odoacro, yá te pues dir al carayu». «Yá somos el Reinu independiente de Tolosa»
- [[Añu 476. L’imperiu romanu entra en colapsu cuando’l bárbaru Odoacro derrota al caberu emperador romanu d’Occidente, Rómulo Augusto. El GRAN IMPERIU va quedar reducíu a I.R. d’Oriente o Bizantín (Constantinopla) ]].
 |
| <Vouillé > [4] |
. Tres la perda la Batalla de Vouillé ( 507) los visigodos – con capital en Toulouse - tienen que colar pa Hispania y terminen poniendo la capital en Toledo. Seique dalgunos siguen asitiaos nel S-E de Francia (La Narbonense o Septimania).
. Con Leovigildo (585) Hispania queda cuasi toa unificada tres conquistar el Reinu Suevu; namás falta el S-E la península, nomáu Spania y baxo’l poder del emperador romanu-bizantín Justiniano I.
. En (589) con Recaredo los visigodos abandonen l’arrianismu y converten al catolicismu. Unificación relixosa.
. Sieglu VII: Recesvinto (654) asoleya’l Liber Iudiciorum (Fueru Xulgu) pa tou’l reinu. «Visigodos y romanos somos unos».
 |
| <D.Rodrigo en Guadalete>[5] |
***
Dende l’añu 410, tres el saquéu de Roma por Alarico, hasta 711 cola Batalla del Guadalete pasaren 300 años, son los de la verdadera historia visigoda. ¿Siguimos, quiciabes, con Don Pelayo y .....?
. 722: Don Pelayo. Cuadonga. Cangues d’Onís. Reinu d’Asturies.
. 725. Cai la Septimania y asina ¿acaba la historia de los visigodos?...
- << ¡Eh, que somos descendientes! Y tamos rescribiendo la Historia de los nuesos antepasaos. >>
* Na Batalla de los Campos Cataláunicos lluchen dos aliances: (A) Romanos (Aecio), visigodos (Teodorico I), alanos, francos y burgundios . (B) Hunos, ostrogodos, gépidos, hérulos y + .
**********************************
3. La LLEI nel Reinu de los VISIGODOS.
El pueblu visigodu, el qu’asitió n’España (Hispania) y nel S-E de Francia (Septimania o Narbonense), pasó de ser un pueblu bárbaru a ser un pueblu civilizáu que se rixó per aciu de LLEIS que se plasmaren en Códigos escritos roblaos en CONCEYOS (Concilios) que llevaben l’alcuerdu del Rei, nobles ya Obispos y delles celebridaes cabezaleres.
Los principales alcuerdos llexislativos polos que se gobernaben los visigodos (godos, hispanorromanos, xudíos ya otros pueblos autóctonos) ente’l reináu d’Alarico (395-410) y el de don Rodrigo (711) foron estos que nomamos d’arréu. Sicasí hai de tener en cuenta que nos diecinueve (19) Conceyos que celebraren taben llaraos de normes – cánones – de comportamientu empobinaes a toles clas sociales (Rei, nobles, obispos, cleru, pueblu y xudíos, por supuestu) :
. Códigu d’Eurico (476): La Primera Llei importante ya escrita nel sieglu (V) en Tolosa (Francia). Namás pa los visigodos.
. Breviariu d’Alarico (506): Empobináu a la población hispanorromana (Lex Romana Visigotorum).
. Códigu de Leovigildo: Una reforma onde yá se mecíen les costumes godes y romanes.
. Liber Iudiciorum (Fueru Xulgu) : El definitivu, cónocíu como «Códigu de Recesvinto» (654) y conteníu en 12 llibros.
[Nel s. XIII l’obispu Rodrigo de Lleón mandó tornar el “Fuero Juzgo” al astur-lleonés a la fin que tol mundu lu entendiera. Bueno ...]
***
. 3.1. El Código d’Eurico (475) . El Codex Euricianus foi una recopilación de lleis visigodes basada en costumes godes y el derechu romanu que tresnare’l xurista romanu Lleón, conseyeru d’Eurico, que s’espublizó haza l’añu (476) cuando la capital entá s’alcontraba en Toulousse (Francia).
Seique Eurico ye consideráu’l primer llexislador hai estudios postreros que falen d’unes <Lleis Teodoricanes>, anteriores, nes que se basare Eurico. En cualquier casu les costumes godes, mecíes coles romanes, pasen al papel. Trataba sobre manera:
. Del repartu de tierres ente visigodos y romanos lo qu’implicaba les engarradielles fronterices.
. Abarcaba los asuntos de préstamos y compra y venta de propiedaes.
. Sobro’l matrimoniu y les socesiones.
. Establecía una clasificación social: señores, homes llibres y caballeros.
***
. 3.2. El Breviariu d’Alarico (487-507). La Lex Romana Visigothorum foi un códigu llexislativu romanu empobináu a los visigodos del Reinu de Tolosa. Foi promulgáu por Alarico II nel añu 506, poco enantes de morrer y cuando los visigodos se vieren obligaos a colar pa Hispania. Entá la capital andaba per Tolosa y pretendía enganchar a tolos galorromanos fuertemente separtaos por mor de les corrientes cristianes: arrianismu y catolicismu. Ye por embargu un códigu de calter priváu dao que’l Drechu Públicu andaba a sucu baxeru dende la cayida del Imperiu Romanu (476). Convién facer alcordanza que’l Códigu d’Eurico diba empobináu namás palos visigodos.
La idea principal yera bien bona: Paz ente los ciudadanos galos y romanos. Yera daqué prautico y obligaba a los xueces a ser claros y nun usar otres lleis que nun tuvieren rexistraes equí.
Tien dos grandes bloques:
. LLEIS: Sacaes del códigu de Teodosio y dalgunes de los socesores.
. DOCTRINA: Sacada d’escritos de xuristes romanos talo les Sentencies de Paulo, l’Epítome de Gayo y apartaos de códigos de Gregoriano y Hermoginiano.
Foi bien importante porque resolvía problemes d’asuntos civiles, contratos ya herencies. El Fueru Xulgu ta fechu a partir d’esti.
***
. 3.3. El Códigu de Leovigildo . El Codex Revisus foi un cuerpu llegal establecíu por Leovigildo nel añu 569 col envís d’ unificar el sistema xudicial en tol territoriu visigodu que por aquel entós taba peratomizáu na Península y parte de la Galia. «Esti paisanu tien una idea pernidia de lo que pretende establecer: Ensamblar tolos pueblos hispanos embaxo la mesma Llei, la mesma Relixón y el mesmu Rei. ¿Tu creyes que lo va poder algamar?».
 |
| <S. Braulio y S. Sidoro >*[8] |
Nun sabemos quién lu redactó – nin tan siquier nos queda una copia completa – sicasí sabemos que partió del antiguu Códigu d’Eurico y que foi la base pa redactar el posterior <Fueru Xulgu> (654) que siguió emplegándose na Edá Media.
Del conteníu del mesmu podemos destacar les lleis que s’empobinen a igualar tolos pueblos:
.« Quiero lleis clares y que valgan pa toa triba de pueblos peninsulares (y más tarde de la Septimania). Que tol mundiu puea tener confianza n’elles.
. ¿Qué ye eso que nun se puea casar una goda con un hispanorromanu?... Sé que lo veis mal pero <L’AMOR ye LLIBRE> y cadún pue casar cola muyer que quiera, ¿nidio? Ansí nun vamos a parte dala.»
Esti códigu tamién trató sobro los drechos hereditarios ameyorando la posición de la muyer « Bona yera Gosvinta». Y, por supuestu, trató de favorecer los intereses fiscales de la corona y la so autoridá frente a la nobleza.
NOTA: S. Braulio, obispu de Zaragoza, foi discípulu y amigu de San Sidoro de Sevilla al qu'agabitó coles Etimoloxíes". S. Braulio collaboró con Chindasvinto nel Liber Judiciorum asina como nos Conceyos de Toledo (IV-V-VI).
***
. 3.4. El Rei Recesvinto (653-672) espublizó’l Liber Iudiciorum nel añu (654) siendo completáu por Ervigio en (681). La so versión romance, tornada al castellán nel s. XIII, conocida como Fueru Xulgu, tevo en valir durante la E. Media. Hai una versión n’asturianu-lleonés que se guarda en Baviera «Ellí ta bien».
 |
| [9] |
El Liber Iudiciorum ye un h.itu na historia de la Xurisdicción Española. Ta compuestu por doce (12) llibros con (54) capítulos y (578) lleis que traten sobro normes civiles, penales ya eclesiástiques d’obligáu cumplimientu a toa la población del reinu ensin distingu del orixe o clas social a la que se perteneciere. Esti códigu foi un best seller de la dómina dende’l momentu la so espublización de manera tala que’l rei viose obligáu a torgar la reventa a precios desaxeraos «El que vienda una copia penriba de seis sueldos va recibir 100 llatigazos».
Los títulos d’estos 12 llibros podemos resumilos:
Llibru I: El llexislador y la llei.
Llibru II: L’alministración de la xusticia, escritures y testamentos.
Llibru III: Matrimonios y divorcios.
Liibru IV: Socesiones, herencies y amparos.
Llibru V: Donaciones, ventes ya otros contratos.
Llibru VI: Drechu penal: crímenes y tortures.
Llibru VII: Drechu penal: robu y fraude.
Llibru VIII: Drechu penal: actos de violencia y lesiones.
Llibru IX: L’ exércitu y el drechu d’asilu eclesiásticu.
Llibru X: El Drechu de propiedá y prescripción.
El Fueru Xulgu tuvo presente n’España hasta l’añu 1889 (Alfonso XII – Mª Cristina) cuando s’aprobó’l Códigu Civil Español magar que .... Entá sigui presente como derechu civil foral supletoriu en delles CCAA talo País Vascu, Navarra y Aragón.
*******************************
4. ESTRUCTURA ALMINISTRATIVA del Territoriu Visigodu
Siguiendo’l sistema romanu’l territoriu visigodu taba distribuyíu en PROVINCIES o DUCAOS que dirixía un DUX (duque) y al tiempu estos ducaos taben dividíos en CONDAOS gobernaos por un CONDE (Comes civitatis). A niveles más baxos – llocales – yeren los XUECES de los Conceyos los qu’alministraben la xusticia nes ciudaes (Civitates) siempres embaxo la supervisión de los condes. Nun hai qu’escaecer el poder tan grande que tenía la Ilesia per aciu los obispos y presbíteros aconceyaos en 5 grandes DIÓCESIS: Gallaecia (Braga). Lusitania (Mérida). Bética (Sevilla). Cartaxinense (Toledo). Tarraconense (Tarragona).
 |
| España visigoda: Provincies y Condaos [10] |
. LAS 6 PROVINCIES (Ducaos) en que taba dividíu’l REINU VISIGODU en tiempos de Recesvinto yeren: Tarraconense (Tarragona). Cartaxinense (Toledo, al tar Cartaxena en manes bizantines). Bética (Sevilla=Hispalis). Lusitania (Mérida). Gallaecia con Asturies (Braga=Brácara Augusta). Narbonense o Septimania (Narbona).
La capital principal – onde taba’l tesoru – yera Toledo (551- 567-711) seique a lo llargo de los tiempos tamién lo fueren: Toulouse =Tolosa (418-507). Narbona (507-531) y (712-720). Barcinona (511-517) y (531-549-567). Sevilla (s VI. De forma intermitente)
**************************************
5. Los CONCEYOS (Concilios) visigodos:
 |
| ¡¡Católicos!! (S: José Martí y Monsó - M. del Prado) [11] |
Los CONCEYOS de TOLEDO nun fueren otro que 18 asamblees político-relixoses que se celebraren ente los años (397 y 702) y que podíen durar dellos años. Nos últimos años del Reinu Visigodu dexaron de celebrase, cola falta que facíen.
¿Cómo se celebraben? El Rei reunía a nobles, obispos y funcionarios cabezaleros y proponía lleis tanto eclesiástiques como civiles pa tol estáu.
Los más importantes fueren:
El PRIMERU (I) . Refugaba’l Priscilianismu.
El TERCERU (III). Pasu oficial del arrianismu al catolicismu
EL CUARTU (IV) . Unificación Llitúrxica.
Pero vamos facer un cativu resume de caún, pos toos tienen el so aquel.
. I Conceyu ( 397-400): Nun foi convocáu por dengún rei visigodu. Celebróse na dómina imperial romana baxo los mandaos d’Arcadio y Honorio. Asistieron 19 obispos cola fin de refugar el PRISCILIANISMU* ya otres herexíes asina como dexar clares unes normes comunes no que cinca al comportamientu de los clérigos.
Refugóse l’arrianismu talo que Nicea «Xesucristu ye de la mesma naturaleza que’l Padre, dos persones distintes ya un solu dios verdaderu». Los arrianos pensaben que Xesús yera fíu de Dios, talo si fuere adotivu « Nun tien la mesma naturaleza, hebo un tiempu en que’l fíu nun existía» («Tanto escándalu pa esto. Yo pienso que’l Fíu ye’l que-y da tol valir al Padre»).
* Priscilianismu: Movimientu relixosu promovíu pol obispu d’Ávila Prisciliano que defendía l’ascetismu, una vida de probitú alloñada de los bienes materiales. «Ayunu y astinencia sexual» «Yá t’oyí, navaya». Dellos miembros cabezaleros de la Ilesia, naturalmente, nun taben d’alcuerdu y hasta-y dieron capirote, seique’l Papa agarró un berrinche pistonudu.
. II Conceyu (527) : Yá en Toledo durante’l reináu del rei visigodu Amalarico y baxo la presidencia del obispu Montano un 17 de mayu dellos obispos de la zona alcordaron cinco normes sobro’l comportamientu de los clérigos «Buena taría la cosa». « A ver con qué tipu de muyeres andáis ...» « ¿Pero nun yereis célibes?...».
. III Conceyu ( 589) : Recaredo convocó a primero de mayu ún de los Conceyos más importante de la dómina visigoda. Duró pocos díes, porque’l Rei teníalo bien atao. Llegar y besar el santu. «Roblái equí, yo ya lo fici. A partir de güei Hispania abandona l’arrianismu y pasa ser oficialmente CATÓLICA. Acabaron les lluches relixoses, toos somos católicos, apostólicos y romanos» .
Con esti pasu Recaredo siguiendo (casi seguro) los conseyos de so padre Leovigildo (arrianu de tola vida), terminó d’aunir tolos pueblos d’Hispania embaxo la mesma fe. So padre tuviere fecho lo mesmo políticamente colos pueblos de la redolada: Sabaria, Oróspeda, Córduba, Asidonia, Aregia, Vasconia, Cantabria, Reinu Suevu... Spania (bizantina) tremaba ...
. IV Conceyu (633) . El rei Sisenando convocó esta asamblea de 69 obispos na Ilesia de Santa Leocadia. Tamién tuvieron “d’oyentes” los viris illustris.
 |
Códice vixilanu: IV Conceyu Toledo ¿L'orixe de la Carta Magna? [12] |
Presidíu por San Sidoro de Sevilla aprobó’l Ritu Mozárabe (Hispánicu) na lliturxa pa tola península. Como siempre impuso normes d’honestidá a los cures «Facéi alcordanza que nada d’enrollase con muyeres, que sois célibes». Los xudíos nun se vieren llibres de más normes restrictives.
La Ilesia y la Corona ficieren un pautu (Canon 75) * con normes d’bligáu cumplimientu: «El rei ye elixíu polos nobles ya obispos y ta obligáu aplicar y cumplir lleis xustes. Nada d’abusar de los probes» «Mui guapo magar que si daquién va escontra’l rei, que se prepare».
*Canon 75: Pue considerase como “La Primera constitución” escrita de la Península y tal paez que d’Europa. ¡Toma del frascu, Carrascu!.
. V Conceyu (636). Foi un Conceyu de calter políticu convocáu pol rei Chintila na ilesia de Santa Leocadia col envís d’asegurase nel tronu y abellugar a la so familia . Asistieron 22 obispos, sacante’l de la Narbonense, y un par de delegaos que buscaben calmar la inestable situación política tres la muerte del rei Sisenando asegurándose que los futuros reis salieren de la alta nobleza. «Ai d’aquel qu’intentase daqué escontra’l rei , la so familia o los sos fideles, porque serán escomulgaos». Poco duró la cosa porque a los pocos meses viose obligáu a convocar
. El VI Conceyu de Toledo (638). Esta vegada asistieron 53 obispos d’Hispania y de la Narbonense col mesmu envís de reforzar la estabilidá política y la disciplina de la Ilesia. Adiós a la simonía: «Acabó la compraventa de cargos eclesiásticos». Los xudíos, como siempres, vulven salir perxudicaos. «Equí nun queremos otra cosa que católicos fervientes, otra miente vais tenelo claro» «¿Pero a quién molestamos nosotros por cumplir los preceutos de la Torá* na sinagoga? ».
*Torá:Ye un conxuntu de lleis y enseñances so les cuales viven los xudíos y tán sacaes de los cinco primeros llibros de la Biblia hebrea (Pentateuco) :Xénesis, Éxodo, Levítico, Númberos y Deuterunomio.
. VII Conceyu de Toledo (646). Chindasvinto convocó esta asamblea político-eclesiástica a la qu’asitieron 41 obispaos. Cánones escontra los traidores al rei nos que la Ilesia tenía muncho que ver. «Ah, y los obispos dexái d’espremer les parroquies y si nun queréis pagar impuestos metéivos nun conventu».
. VIII Conceyu de Toledo (653). Recesvinto convocó na ilesia de los Santos Apóstoles a 52 obispos, 10 abás y, pola primera vegada, hasta 16 condes platinos con voz y votu, nada “d’oyentes”, asina que podíen participar na eleición del rei.
Amenorgaron les penes escontra los traidores al rei (CHindasvinto fuere mui duru pa con ellos). Volvió recalcase’l pecáu de la simonía (compra de cargos eclesiásticos) «Esti trapichéu tien qu’acabar d’una vez, anatema d’escomunión» («Dende equí nun se siente nin gota, Gavinio»).
Recesvinto, que nun tragaba los xudíos, presentó el tomus regius p’acabar con «esa peste» («Anda, que si llegues conocer a Netanyahu»).
. IX Conceyu de Toledo (655). Esta vegada Recesvinto convocó un sínodu de calter provincial (Cartaxinense) na Ilesia de Santa María de Toledo que nun pasaba de 16 obispos (« Abúltente pocos, nin?»), 6 abás, 4 condes y 2 dignatarios.
¿Temes?: Poner un poco de control social y, sobre manera, poner firmes a les clérigos «los fíos que tengáis d’estraperlu pasen a ser esclavos de la Ilesia». («Siempres el mesmu rollu, toi pensando en refundiar la Ilesia. Dellos obispos piensen que los bienes de la Ilesia son suyos»).
Los xudíos vense obligaos a celebrar les fiestes católiques. («Vega, ho; qu’esto nun ye un funeral»).
.X Conceyu de Toledo (656). El REI de los Concilios , Recesvinto (3º que facía), convocó esta xunta casera – nun vinieren de la Narbonense y Tarraconense - («arregla les caleyes, tío, que nun tamos pa tantu xaréu») presidida pol metropolitanu de Toledo Eugenio II. Tamién taben Fructuoso de braga y Fugitivo de Sevilla.
Lo de siempres: Castigos a los traidores al rei y lleis escontra la “trata d’esclavos cristianos” ente clérigos católicos y xudíos ricos. «Les perres nada nun saben de moral dala». A; l que fuere obispu de Braga, Potamio, mandáronlu al paru por “fornicador” («buena taría la cosa») . Y como “bonos cristianos” alcordaren anular el testamentu del Obispu de Dumio, Ricimiro, que llibertare a los esclavos y tuviere dexao n’heriedu los bienes de la so ilesia a los probes.
. XI Conceyu de Toledo (675). El célebre rei Wamba celebró esta xunta provincial pa la Cartaxinense na ilesia de Santa María. El metropolitanu Quirico cuntó con 17 obispos, 8 abás ya un arcedianu (finu tenía que ser). Tocó un de los temes más ingrientes pa los visigodos: <El misteriu de la Santísima Trinidá> . Nunca nun taba demás porque desapovisar l’arrianismu va costar un reñón. 68 cánones, la mayoría, pa poner enderezar el rumbu de los eclesiásticos. (<hasta los mesmísimos>).
. XII Conceyu de Toledo (681). Ervigio convocó esta xunta d’obispos na ilesia de los Santos Apóstoles; tamién asistieron 4 abás y 15 funcionarios palatinos. La mesma M de siempres: Reconocer al nuevu, rei so pena d’escomunión, tres desprestixar al célebre ya honestu rei Wamba(reformes drástique coles que buscaba’l bien común). El nuevu rei propondrá los obispos que’l metropolitanu de Toledo va consagrar talo si fuere un mandáu de Donal Trump. Los obispaos que creare Wamba «adiós que te vi, morena».
Dictaron bayura de Lleis escontra los xudíos sopelexando la llista d’aquellos que tuvieren refugao de la Torá. «A la fin quita-tos lo que teníen. Amén» .
Tocántenes a los nobles menos castigos y más<manga ancha> a aquellos que castigaben duro a los esclavos. «Con tal de ser Rei, Ervigio, robles la pena muerte de to madre».
. XIII Conceyu de Toledo (683). Foi’l propiu Ervigio quien convocó esta xunta na ilesi de los Santos Inocentes a la qu’asistieren 77 obispos, dellos abás y funcionarios palatinos cola fin de rebaxar penes polítiques y poner ciertu control al rei. «Los que vos opunxistis a Wamba (673) tais perdonaos. Y al endefechu vais recuperar aquello que se vos quitó; d’equí p’arriba nun va ser el rei solu’l que tome esti tipu de determín, seréis vos mesmos. Y yá non más tortures pa sacar información». ¡Qué baxada de pantalón!.
. XIV Conceyu de Toledo (684). Un sínodu en toa regla de la provincia Cartaxinense convocáu por Ervigio cola fin de responder una carta del Papa León II escontra’l monotelismu. (“En Cristu hai dos voluntaes o naturaleces, la divina y la humana y non una sola, como dicen los herexes”) . «¡Madre de Dios, en qué caxigalines pierden el tiempu!. Debía tar contentu’l Señor viendo los abusos de los eclesiásticos» . Y los moros pela costa ...
. XV Conceyu de Toledo (688). Reinaba Egica cuando San Xulián de Toledo fizo esta xunta d’obispos pa tener un alderique teolóxicu al rodiu les “puñefleres” voluntaes o naturaleces de Dios. «¡Yá vos vale, meyor aidáis a la xente necesitao, ociosos!.
El rei Égica aprovechó pa escaecer el xuramentu que ficiere al anterior, Ervigio, so suegru, a piques de morrer: < Curia de to suegra y los tos cuñaos> . Seique los nobles.. « Que non, home, que non; que nun fai falta dala que los dexes na miseria pero mira un poco por ellos». Eso sí; has devolver lo que Bamba nos quitare a dalgunos y que to suegru nun llegó a restituyir»
San Xulián palmó al poco de finar el Conceyu. Igual taba “hasta les ñaples”, talo que yo.
. XVI Conceyu de Toledo (693). Egica intenta ¿restablecer? l’orde políticu y relixosu tres les numberoses revueltes talo la de Suniefredo. Cánones aprobaos (11), por exemplu:
. Un presbíteru nun pue tener munches parroquies.
. Trató de controlar un poco les rentes de los obispos y hebo cierta condescendencia no que cinca al comerciu de los xudíos (conversos).
Tratóse tamién de la idolatría, la sodomía, el suicidiu, la proteición al rei, claro, y l’estierru del obispu Sisberto «Apostasti a caballu perdedor».
.XVII Conceyu de Toledo ( 694). Egica tomó-y gustu a los Conceyos y cónvoco unu na ilesia de Santa Leocadia col envís de meter mano a los xudíos: «Yá vos lo dixi, obispos; fuistis mui condescendientes colos xudíos y agora tán combalechando colos musulmanes . Esto ta que mete mieu:
.<Vamos quitá-yoslo too. Facelos esclavos . Y tocántenes a los fiyos van ser criaos por cristianos....>
. Lo de revisar normes pa los eclesiásticos ye una constante sempiterna. (<<¿Why?>>)
. Conceyu XVIII de Toledo ( 698-702). Foi’l caberu porque en 711 yá tien llugar la invasión islámica. Nun queda acta dala d’esti Conceyu sicasí tuvo que ser convocáu por Égica o Witiza. Basándose na Crónica Mozárabe (754)* pue que fuese nel 1º añu de Witiza y presidíu por Félix, el metropolitanu de Toledo. Tamién se cuenta que nel monesteriu de Celanova .... «Cuentos, nada de nada tenemos». Bastante tenemos cola que s’avecina .... Táriq ibn Ziyak ... Muza ... Árabes ... Bereberes ... MUNUZA ....
*NOTA: Cuido que nun tomamos esta Crónica ("Anónimu de Córdoba"), tan averada a los fechos, col enfotu que deberíemos.
***************************
6. PERSONAXES CÉLEBRES na dómina LEOVIXILDIANA
6.1 XUSTINIANU I , el GRANDE [482 (527-565)]
 |
<Justiniano I y Teodora> [13] (Mosaicu de Rávena) |
. Emperador romanu d’Oriente que quixo revivir l’imperiu romanu de los bonos tiempos reconquistando munchos de los territorios perdíos, ente ellos la Hispania visigoda que ye lo que nos afeuta. «El llatín torna ser la llingua oficial del imperiu».
A la fin d’algamar esti sueñu Justiniano realizó una serie de campañes militares:
- Guerres escontra l’Imperiu Sasánida [(527-532) (540-562)] qu’aseguraba les fronteres orientales. Non foi fácil, delles veces ganaba ya otres perdía hasta que firmó con Cosroes I una “Paz eterna” y más tarde otra VERDADERA.
- Campaña escontra’l Reinu Vándalu (533-534) .Per aciu del so oficial Belisarius conquistó’l Reinu de los vándalos n’África y darréu’l Reinu ostrogodu d’Italia (Dalmacia, Sicili y la península Itálica). Llegó hasta Hispania y tres aidar a Atanagildo quedó cola parte sur-este a la que nomó Spania. Hasta la dómina de Suintila (624) nun pudimos recuperala, magar los esfuercios de Leovigildo por unificar tola Península.
Al final del so reináu viose acorraláu por pueblos nómades. Los citrugos que saquiaren Tracia y Zabergán obligó al gran Belisarius a facer un paréntesis nel retiru porque yá taba a piques de tomar Constantinopla. «Justinianu quixisti comer el mundu y por poques de comen a ti».
¿Cuáles son les bases de la grandeza del imperiu de Justiniano?
Nun se pue construyir un gran imperiu ensin unos pegollos sólidos: La Llei. L’Exércitu. La Relixón. L’Alministración y el Fiscu.
. Lo primero establecer un Códigu únicu de xusticia.
- Triboniano, voi encamentate un trabayu un tanto abegosu pero fundamental pal lligame del Imperiu: Ellaborar un Códigu de xusticia, a partir del Derechu Romanu, que valga pa tol mundu. Pero yá sabes, axeitándolu cola fe cristiana, teniendo en cuenta que yo, l’emperador, soi’l representante de Dios na Tierra.
- Eso préstame a min. Vamos llama-y el Corpus Iuris Civilis. Toi seguru que la xente va llama-y «Códigu de Xustiniano».
ECONOMIA: . Organizó l’Alministración y les Finaces.
- «Xuan de Capadocia, vas encargate d’ello. Van facenos falta perres abondo, tanto pal exércitu como pa les grandes obres que tengo in mente. Ah, y esta falcatrúa de vender cargos públicos, acabóse.
- Xefe, yera bono poder controlar el comerciu de la seda d’Oriente.
- Pos a ello; quiero tenelo too controlao. Amás eso da perres.
. Un exércitu fuerte ya organizáu con grandes xenerales talo Belisarius y Narsés.
. La unidá relixosa yera imprescindible, nun quería dengún tipu de divisiones y menos no tocántenes a Dios. El catolicismu va ser la relixón oficial. Persiguió sobre manera a los arrianistes* y monofisistes**. El paganismu tampoco tien cabida nesti cesaropapismu*** asina que clausuró l’academia d’Atenas . «Nun te pases, Xustinianu. Tenemos drechu a pensar lo que mos dea la gana, solo faltaba».
Pa resaltar el poder del catolicismu mandó edificar templos y basíliques maxestuoses talo Santa Irene y Santa Sofía de Constantinopla. «menudes ayalgues, Señor». Claro, enantes entrenó llevantando la Ilesia de los Santos Sergio y Baco que más tarde quedó como la “Pequeña Santa Sofía”. Quería convencenos de toes, toes y pa ello llevantó una serie de construiciones impresionantes talo la Basílica de San Vital de Rávena, célebre polos sos mosaicos y la orixinal planta octogonal. Tamién llaró l’imperiu d’acueductos, muralles, cisternes ... Cerca d’onde naciere creó una ciudá nueva (535) ,“Justiniana Prima” (Caricin Grad).
* Arrianismu: Ye una doctrina cristiana que refuga’l misteriu de la Santísima Trinidá. Xesucristu nun ye eternu nin de la mesma naturaleza que so Padre, nun ye otro que la so primer creación, eso sí, la más grande.
** Monofisismu: Ye una doctrina relixosa que refuga les dos naturaleces de Xesucristu, la humana queda absorbida pola divina.
Catolicismu:En Xesucristu hai dos naturaleces, divina ya humana, pero dientro d’una mesma persona: el Fíu, de la mesma naturaleza que’l Padre. Tiense fecho home pero sigui siendo Dios.
«Vaya discusiones más fates, cuando lo importante ye sobrevivir»
Cesaropapismu: L’emperador ye l’amu de la Ilesia y del Estáu. «Los islamistes nada nun inventaron».
6.2. El Rei de los suevos: MIRO (570-583)
 |
| <Miro y Samartín de Braga*>[14] |
Nel noroeste d’Hispania, onde moraben los suevos, hebo un rei, Miro, que dio muncha guerra al hispanorum Leovigildo porque tamién pretendía asentar y hasta esparder el reinu suevu. Túvoles tieses con Leovigildo cuando invadió el territoriu de los rucones que tamién yera petite visigodu. Socedió a so padre Teodorico. Cola fin de poner n’apiertu al so rival nun tevo dulda dala n’agabitar a Hermenegildo (579) cuando-y declaró la guerra a so padre. «Yo échote una mano si prometes nun declarame la guerra d’espansión que lleva to padre».
Sicasí les fuercies de Leovixildo yeren mui superiores y tevo que dar marcha atrás. Tres so muerte en 583 el reinu suevu vieno a sucu baxeru y en 585 Leovigildo destituyó al usurpador Audeca quedando incorporáu dafechu a la nueva Hispania leovixildiana.
6.3. L’Obispu MASONA de Mérida
Masona foi un obispu de Mérida (573) de confesión arriana que se convirtió al catolicismu haza (579) pasando al bandu d’Hermenegildo que tamién se ficiere católicu.
Llamáu al orde de Toledo refugó tornar al arrianismu amás de negase entregar la túnica de Santa Olaya de Mérida.«Yá tas dando les fusties, infiel» . Nun pudo regresar del estierru hasta poco antes de morrer Leovixildo en (586).
Esti home tevo una relevancia pergrande na dómina de Recaredo presidiendo el <III Conceyu de Toledo», el de la conversión del rei – y del reinu – al catolicismu oficial (589). «Hispania ye católica», pero siempres queden rescaldos ...
La Ilesia upólu a los altares pola so bondá y la so capacidá alministrativa: fundó monesterios, una casa d’empeños («¡Ai...!») ya un xenodochium (albergue/hospital de pelegrinos) tanto pa cristianos como pa xudíos(«Home, estos tienen perres»). La ilesia emeritense nunca nun viere prosperidá tala.
*************************************
7. Les MUYERES del entornu de LEOVIGILDO
7.1. GOSVINTA
Gosvinta fuere una dama d’alta cuna perteneciente a una familia visigoda del sur d’Hispania que viviere nel sieglu VI d.X. Nació ente los años 520/530 y pasó a meyor vida en (589); nun foi a soportar lo que se-y venía enriba col «III CONCEYU de TOLEDO»: ¡Adiós al arrianismu!.
 |
| <¡Golswinta, vaya pote!> [15] |
Casó de primeres col rei visigodu Atanagildo (¿545-555?) y cuando quedó vilba volvió a casar col aspirante a Rex Gothorum, Leovigildo (569). Con esti nun llegó a tener fíos pero col primeru tuvo dos fíes: Brunequilda y Gasvinta que tuvieren envolubraes na xeopolítica de la dómina.
Yeren tiempos difíciles pa los visigodos qu’emburriaos polos francos diben abandonando la Galia p’asitiar n’Hispania seique nunca nun abandonaren la Septimania. El matrimoniu con Atanagildo fuere importante p’aunir fuercies escontra’l rei Agila I al qu’asesinaron (555) pa tomar el poder. Agora ella ye reina y elli tien un partíu que lu sofita. «¡Yá soi reina!». El problema «quedó resueltu» al pidir ayuda al rei bizantín (romanu d’Oriente) – Justiniano, menuda ayalga - que pidió a cambiu la Spania (S-E de la Península) de la que yá se venía apoderando pasu ente pasu. «¿Rei a cualquier preciu?».
- Mira, Atanagildo, tamos los dos contentos n'Hispania sicasí cuido axeitao casar a les nueses fíes con reis francos, hai que tar a bien colos vecinos, por si les mosques ... Pue que nos vengan bien pa dar caña a los bizantinos, esi Justinianu quier facese l’amu de tooo ... ¿Otru César imperator?. «La madre que lu abatanó»
- ¿Qué te paez colos fíos del merovinxu Clotario?.. Galsvinta pega bien con esi animal de Chilperico I de Neustria mentanto que Brunequilda igual pue con Sigeberto d’Austrasia, nun hai otra como ella p’adomar xatos.
- Qué quies que te diga, maríu; son dos xabaces qu’asemeyen a Nerón ya Herodes.
- Pero ye lo qu’hai, nun creas que los otros candidatos son meyores.
La madre sabía bien lo que dicía. Chilperico compincháu cola so amante, Fredegunda, vien de dar muerte a la neña Galsvinta (15 años). <<Probe, ella nun quería casar>>
- Mama, estos vienen a por nosotres- glaya Brunelquilda. Magar que nun saben con quien se tán metiendo. ¡Vamos a por ellos! .- (La historia de Brunequilda ye pa contar aparte. Aquella neña de porte anxelical terminó convirtiendo nel mesmísumu Llucifer, cosa de los tiempos) .
.La vida sigue ya un bon día Atanagildo va y diz << ¡adiós!>>
Muertu Atanagildo, ¡de forma natural (567)!, la reina vilba - Gosvinta - queda a los pies de los caballos, col monesteriu como solución, sicasí entá ye un carambelu bien goliosu .... El nuevu rei Liuva I tien un hermanu llibre de compromisu... Leovigildo.
- « Mira, hermanu; esti reinu ye pergrande pa mi solu. Yo voi quedar na Septimania y tu pues dir a gobernar Hispania como asociáu al tronu. Dao que vas tener pocos amigos sería bueno que-y echares el picáu a la reina vilba, Gosvinta. Ye de bona familia y tien munchos sofitos ente los nobles. Asina matamos dos páxaros d’un tiru: Rei con Tesoru y bonos aliaos».
. Gosvinta pasó la vida buscando-y les cosquilles al so maríu , Leovixildo, mentanto esti procuraba baxa-y los fumos pa que s’enterase quién mandaba en casa y, sobre too, n’Hispania. Una de les faenes que-y fizo la reina foi casar la so nieta Ingunda, fía de Brunequilda, col so fiastru Hermenexildo que yera católicu y taba naguando por xubir al tronu. A esta reina valía-y too. De nada-y valiere aliase con elli porque’l padre, Leovigildo, nun atolenó la sublevación na Bética y terminó por da-y capirote al Santu. Ingunda salvó porque s’esmució p’abellugase baxo les faldes del Papa; bueno, per Roma andaba. Como la ex nunca nun taba contenta entá conchabó - mertu Leovigildo - escontra’l so fiastru Recaredo, ferviente católicu (¡h.a!), dende’l < III CONCEYU de TOLEDO >. De nada-y valió’l gabitu del obispu arrianu Uldila. Arriana hasta’l megollu taba que la llevaben los demonios « Too me sal rana, malditos católicos».
- «Adiós, ehí vos quedáis. Yo voi conspirar con Dios»
Nun se sabe a ciencia cierta si morrió de vieya, del mal humor o ayudada pola guaxa Fredegunda que quería’l tronu de Neustria pal so fíu Clotario II. «Ente bruxes anda’l xuegu». Esta ayalga (Fredegunda) tamién ordenó l’asesinatu de Sigeberto, rei d’Austrasia. Y esti cativín de Clotario («fíu de cabra: cabra o cabritu») foi’l que mandó matar a Brunequilda. ¡Cómo tán les reines godes, mon die! .
7.2. GALSVINTA (540 – 568)
Galsvinta yera fía de los reis visigodos d’Hispania Atanagildo y Gosvinta y al empar hermana de Brunequilda, reina d’Austrasia pol so matrimoniu con Sigeberto.
 |
| <Fredegunda da cuenta de Galswinta>[16] |
Por estratexa xeopolítica viose obligada a casar col bederre de Chilperico I de Neustria, qu’enxamás la respetó, namás quería la dote y l’honor de tar emparentáu colos hispanos talo’l so hermanu Sigeberto que se casare cola otra hermana, Brunequilda. «Nin voi ser menos nin quiero poderes más fuertes que’l míu». Naide se fiaba de naide.
Galswinta quixo colar pa Toledo (567) pero la muerte de so padre torció-y los planes y vino a sucu baxeru siendo asesinada por Fredegunda, l’amante de Chilperico, qu’a los pocos díes casó con elli. Esti fechu traxo como consecuencies más de 40 años de guerres civiles .
El rebote de la hermana, Brunequilda, foi d’época y convenció al so maríu p’atacar Neustria. Victoriosu y a puntu de dar capirote a los asesinos Sigeberto recibió la visita d’unos sicarios de Fredegunda qu’acabaron con elli. Menos mal que Brunequida pudo refuxase na Borgoña del tercer hermanu, Goltrán I. Los trés yeren fíos del merovinxu Clotario I de Borgoña y nietos de Clodoveo I, l’amestador de los francos.
¡Qué mala suerte tuvo esta neña!
7.3. BRUNEQUILDA, la resilencia ta equí.
Yá sabemos qu’Atanagildo y Gosvinta tuvieren dos fíes: Golsvinta y Brunequilda. La primera casó col xostrón de Chilperico de Neustria y duró bien poco. Brunequilda, intelixente y de fuerte calter, tevo más suerte al casar con Sigeberto d’Austrasia (535-575) que yera otra persona. Al quedar vilba y col príncipe pequeñu tevo que pidir el gabitu del so cuñáu Goltrán I, rei de Borgoña, que los recibió de mil amores.
Brunequilda fuere polo tanto fiastra d’Leovigildo y yá taba casada cuando’l Rex Gothorum casó con so madre. Sicasí tevo una fía, Ingunda, que casó con Hermenegildo, el fíu que Leovixildo tuviere cola so primer muyer. «Too queda en casa». Ingunda arrenunció al arrianismu y cuasi alcuentra la muerte per aciu de so güela, Golsvinta <<Vaya cuelma que-y mtió>>. Por mor d’ello terminó sublevando col so maríu, Hermenegildo, escontra’l Rei. Salió-y caro porque terminó vilba.
7.4. FREDEGUNDA , la muyer ensin miramientos.
 |
| ¡Intenta matar la propia fía![17] |
Fredegunda foi una reina franca de Neustria, casada con Chilperico I, qu’intervino activamente na xeopolítica de la dómina de Leovixildo, xida asgaya pa trayela a esti post. P’algamar a ser la tercer muyer del rei tevo que desfacese de les dos primeres, Audovera y Galsvinta. La vida d’esta guapa ya humilde neña tevo siempres envolubrada na intriga y nel crime. ¡Qué pena!. Pa nada-y tembló’l pulsu pa vese implicada, polo menos, en diez (10) importantes asesinatos direutos, y vetu tu a saber los d’estraperlu ... La cantidá de muertes xeneralizaes de “bruxes” y cures que fizo desaniciar son imposibles d’atalantar. Nerón ya herodes yeren unos aprendices al par d’ella y tou porque naide nun yera capaz de dexala embaraza d'un neñu «¡Too pol poder!»
. De mocina entró a sirvir en palaciu como ayuda de cámara de la reina Audovera. Aprovechando los continuos embarazos de d’esta (6 guah.es, polo menos) pasó a ocupar el nial de la reina y yá nun hebo manera de sacala d’elli. Si a la primer muyer la metiere nun conventu a la segunda, Galsvinta, fía del rei d’Hispania y de Golsvinta, diéron-y muerte na propia cama ensin que tuviere tiempu la cativina reina d'abellugase n'Hispania.
- Yá te dixi Atanagildo qu’esos dos nun son más qu’unos asesinos.
- Son razones xeopolítiques, muyerina, yá sabes. La otra fía – Brunequilda - casámosla col hermanu, el rei d’Austrasia, y esti pollu nun quería ser menos. ¡Malditos francos! ¿Por qué tuvieren que dividir el reinu?
- La xida ye d’esa plebeya de Fredegunda. Yá me les pagará... ¿Ves en que quedó’l prestixu que díbemos algamar por xuninos a los merovinxos? ... Agora a la tema pa siempres.
.¿Y si facemos una llista d’esos personaxes importantes que desapovisó del mapa por algamar y/o caltenese nel tronu?:
. Audovera: La primer muyer del francu Chilperico I de Neustria a la que de mano zarró nun conventu y más tarde mandó asesinar – depués de da-y 4 fíos – pa casar con Galsvinta, fía de Atanagildo y Gosvinta. «Coses de la xeopolítica». Más tarde Fredegunda va quitala del mediu tamién.
. Galsvinta: La segunda muyer de Chilperico I, fía de los hispanorum Atanagildo y Gosvinta (más tarde casó con Leovigildo) a la que mandó estrangular na propia cama. «Equí duermo yo».
. Sigeberto I: Esti rei declaró la guerra al so hermanu Chilperico cuando-y reclamó compensaciones pola muerte de la so cuñada Galsvinta. Cuando lu tenía a güevu Brunequilda envió unos sicarios pa quita-y la vida al rei d’Austrasia per aciu de dos puñales envelenaos (575). «Asuntu arregláu». La “Bruxa” y el malváu tornen al tronu de Neustria.
-Agora vamos por Brunequilda. A esta sí que-y tengo ganes.
- Nun te pases, con metela nun conventu yá nós val.
- Espero que nun t’ arrepientas; nun me prui un res dexar les coses a medies.
Y razón tenía la plebeya. Brunequida escapó del cuartón pa casar con Meroveo, el so sobrín, fíu al endefechu del propiu Chilperico y Audovera. «Equí val too». Pos non, el Papa refugólo. Pero Brunequilda yera una rival a l’altura y consiguió facese perdonar polos nobles d’Austrasia que la nomaron rexente hasta que’l so fíu Teodoberto II fuere mayor d’edá.
- «Esta salióte rana, Frede». (De momentu).
El primeru que lo pagó foi Pretextao, l’obispu de Ruan que los casare (583). Darréu vinieren otros trés, los fíos d’Audovera que podíen reclamar el tronu: Meroveo, Clovis y Teodoberto <<Siempres col hachu afiláu>>.
« ¿Quedába-y daquién a esta harpía por cepillar? » Siempres queda alguién. Esta vegada tocó-y ¡al so maríu, Chilperico! (584). ¿Taba vieyu? ... Nun lo paez, tenía amantes a mamplén, como ella, pero a elli nun-y lo perdonó: Unes cuantes puñalaes y «¡equí comando io!. Yá tengo un fíu, yá nun me faes falta dala, Chilpe. Igual pienses que’l guah.e ye tuyu, so fatu».
- Agora voi por ti, Brunilda; o como te llames.
Esta vegada pagólo’l so fíu Childeberto II (575-596) d’Austrasia que nun foi a evitar el culete envelenáu.
Matar, matar y matar pa caltener un tronu, ¿pero cómo diba l'asuntu la so socesión? .... Tevo dellos fíos magar que toos-y morríen al poco de nacer ¡Disentería!. Mélicos, curanderos, rezos (llimosnes), bruxos, maxa negra, bruxes ... ¡Nada!. La impotencia llevóla a lo que meyor sabía facer ... ¡Asesinatos a magüeyu! ¡A la foguera! Foi cuando en plena fiebre asesina mató a Clodoveo y a so madre Audovera. Por fin, en 584, naz-y Clotario II . «Qué suerte tuvieron les bruxes, yá quedaben poques ...»
La maldá de Fredegunda algamó inclusive a la so propia fía, Rigonda, que l’acusaba d’atuñada. La madre agarró la fía, amosó-y un arca pergrande llarada de xoyes y cuando la rapaza taba valorando l’ayalga baxó la tapa y a poques más l’afuega. Menos mal que los glayíos alertaron a los sirvientes emballando la ocasión. La verdá ye que la rapaza yera más bien llixera y so madre nun la soportaba. ¿Pero qué esperabes cola enseñanza que tuvo? ...«Fíu de cabra, cabra o cabritu», dicía mio madre.
.Otru que tuvo na miriella de Fredegunga foi’l rei merovingiu de Borgoña y París Goltrán I. Yá sabemos que Clodoveo I dividió’l reinu francu en cuatro (4) partes, una pa cadún de los sos fíos: Chilperico en Neustria, Sigeberto n’Austrasia, Clodomiro n’Aquitania y Goltrán I en Borgoña. ¿Qué fizo esti santu, y nunca meyor dicho? ... El buenu de Goltrán exerció como árbritu de la zona francesa. Asoció al tronu d’Austrasia al fíu de Brunequilda, Clotario II. D’esta miente torgaba que Fredegunda se ficiere l’ama de los francos. ¡Lo que-y faltaba! Aidando a la so eterna enemiga...
- «Vas comulgar les hosties que te voi dar yo, pazguatu» . Intentólo la bruxona pero cuido que les «hosties» taben ensin consagrar. – Goltrán morrió na cama dexando’l reinu de Borgoña a CHildeberto, el fíu de Brunequilda.
- « Agora tien el doble que nosotros, ¡buag!»- glaya Fredegunda.
. Childeberto nun foi evitar que lu envelenaren en 586. Fredegunda y el so llugarteniente, Landry, atacaron Borgoña y quedaron con París. «Quién viere a la BRUXA esnalar sobro los campos bañaos pol Sena».
En 596 la foria consiguió lo que nin homes, nin muyeres y nin tan siquiera Dios fueren a llogar: «Que dexare d’intrigar pa siempres». Pero’l so fíu Clotario II algamó a Rei de los francos. ¡Vaya por Dios! ¡Qué inxusta ye la vida! ¿Pasará lo mesmo con Donal Trump?.... Que Dios nos cueya confesaos.
****************
****************************
8. L’ARTE VISIGODU: Arquiteutura
Nun ye que nos queden muestres a estrapayar del Arte Visigodu sicasí remanecen más que suficientes pa poner en valir la so capacidá creativa. ¿Xurgamos un poco per ehí? ...
Una pincelada xeneral va llevanos a unes ilesies non mui grandes, de gruesos muros de piedra onde rellumen perguapos arcos de ferradura*. Sicasí lo que más nos llama l’atención puen ser les estremaes pieces d’orfebrería d’influyencía bizantina.
.jfif) |
| S. Pedro de la Nave (Zamora) [18] |
. Planta basilical llatina, con tres naves ya un ábside cuadráu – a vegaes en ferradura – onde remanez l’únicu altar.
. Grueses columnes desimíes (exentes) y pilastres cencielles pa dividir les naves.
. Capiteles corintios o asemeyaos con escultures de pocu relieve.
. Los arcos son de ferradura o de mediu puntu y peraltaos.
. La cubrición ye de madera nes naves y de bóveda de cañón o cuartu d’esfera nos ábsides.
. Gruesos muros de piedra d’apareyu irregular - que nunca nun se mez col lladriyu – y nun precisen de contrafuertes.
. Los muros pueden tar decoraos con pintures o tar revestíos de mármore. Asino como’l pavimentu pue presentar mosaicos «Qué pena que nun quede preba dala».
. Les ventanes, cuasi siempres bífores (xeminaes), van orniaes con dolosíes de piedra calao.
. La ornamentación de tipu bizantín: Cruces (alfa ya omega), estrelles, florones y motivos xeométricos...
* Arcu de ferradura: Esti arcu tan guapu tien los sos oríxenes na Persia sasánida onde fue copiáu polos bizantinos. Los visigodos quedaren prendaos y tomáronlu como suyu. Los artistas islámicos copiáronlu de nosotros seique yá teníen constancia d'elli tres la conquista Persa polos califes Rashidún (Abu Bark y Omar) nel s. VII.
¿Qué obres nos queden pal recuerdu?:
8.1. San Xuan de Baños (Palencia).
 |
| [19] |
. Orixinal planta trapezoidal (21x14) que de mano presentaba forma de tridente por mor de trés ábsides discontinuos (?) seique’l central yera’l cabezaleru; dende llueu anguaño ye l’únicu orixinal.
El pórticu de la entrada ye un reclamu al traviés d’un arcu perfeutu de ferradura con una llamatible cruz patada na clave La espadaña ye cosa más serondiega.
 |
| San Xuan de Baños [20] |
L’interior – monumental, magar la escosa lluz - presenta trés naves estremaes por 4 pares de columnes que sofiten vistosos arcos de ferradura. Los fustes, reaprovechaos, son romanos y los capiteles o bien romanos o visigodos d’époques estremaes. Les impostes presenten una decoración xeométrica y vexetal bien naif qu’asemeya la corona votiva de Recesvinto.
L’arcu trunfal entá caltién la placa fundacional «Esto fízolo Recesvintu en 661» . ¿Conocía esto’l rei Silo cuando dexó grabao en San Xuan Apóstol de Pravia aquello que diz «Esto fízolo Silo»? ...
De les pintures nun queda reseña dala nos sillares o mármoles romanos reutilizaos*.
* NOTA: Los fustes y capiteles reutilizaos en S. X. Baños proceden d’un templu romanu dedicáu a Esculapio – dios de la melecina - y d’un complexu termal qu’había al rodiu’l manancial actual (onde s’alcuentra la célebre “Fonte de Recesvinto”).
**
.8.2. San Pedro de la Nave (Zamora). .
.png) |
| S. Perdro de la Nave (21) |
Esta ilesina foi construyida nos caberos tiempos del reinu visigodu, ente 680 y 711. Pasó per dos etapes constructives, polo menos, y dellos maestros escultores. En principiu tevo llevantada a orielles del Esla (Astura) pero por mor de la construición del embalse de Ricobayo hebo de treslladase al cercanu pueblu d’El Campiello (Zamora).
A simple vista la ilesia de S. Pedro de la Nave ye un rectángulu de (16,80 x 11,20) m. magar que tien una planta complexa, una mecedura de cruz griega y basilical de trés naves. Tien forma de cruz griega al oriente (E) y basilical al occidente (W).
.webp) |
| San Pedro la Nave[22] |
Entamó en forma de cruz griega con dos capielles nos lladrales del presbiteriu pero al occidente foron apurriéndo-y trés naves más – pa los fieles - estremaes por columnes y arcos de ferradura colos fustes de mármole. Al cruzase orixina un transeptu que s’enanta con dos pórticos N. y S.
Quiciabes lo más esceicional d’esti templu visigodu sían los capiteles bíblicos tallaos a bisel: “Daniel nel fosu de los lleones” o “El sacrificiu d’Isaac” figuren nel parnasu de la escultura.
¡Gracies, Manuel Gómez Moreno!
**
8.3. Santa Comba de Bande (Orense)
 |
| Santa Comba [23] |
Ye posible qu’esta ilesina, asemeyada a S.X. de Baños, fuese llevantada n’época sueva y tuviere reformada na dómina de Recesvintu pero nun hai seguranza magar el cartulariu de Celanova que fala ¿d’ella? ...
Amuesa una planta en cruz griega (brazos iguales) inscrita dientro un rectángulu (18x12) por mor de delles dependencies llaterales. Al oeste presenta’l pòrticu d’entrada frente la cabecera (este) d’ábside cuadráu.
A los llaos del pórticu dos cámares comuniquen col transeptu completando’l rectángulu. Nel centru del cruceru sobresal el cimboriu coronáu por una bóveda d’arista. Brazos y nave principal cúbrense con bóveda de cañón seique hai dalgunes estancies con cubierta de madera.
Ye una ilesia del VII de calter intimista que formó parte d’un monesteriu y anque caltién la estructura bastante pura sabemos que tevo una reforma (872) en tiempos d’ Alfonso XIII. Guarda’l sepulcro de San Torcuato asina como unes pintures del XVI.
Santa Comba foi una mártir gala considerada en Galicia como la patrona de les meigues.
**
. 8.4. Santa Llucía de Trampal (Cáceres).
 |
| [24] |
. Trés naves basilicales estreches, allargaes tan misterioses como un llaberintu porticáu llaráu de requexos, columnes, arcos de ferradura y contralluces .... «¡Qué mieu!» .
.Cabecera de tridente. Trés capielles absidiales independientes qu’abren per aciu d’arcos de ferradura haza’l transeptu.
. Cruceru (transeptu): En 7 tramos que comuniquen naves y altar.
. Dellos compartimientos anexos añadíos a posteriori lo que xenera numberosos requexos que torguen una visión única del templu y dan-y al templu una amplitú que nun tien.
**
8.5. Santa María de Melque (Toledo)
.jpg) |
| [25] |
El noxu central ye la ilesia de Santa María de Melque (VII-VIII) que perteneciere al monesteriu y que funcionó durante la invasión islámica con una liturxa mozárabe. Amás de la ilesia y toles dependencies del monesteriu (celdes, viviendes de monxos, almacenes ya otres zones de trabayu) tenemos el recintu amuralláu qu’arrodiaba’l monesteriu asina como una infraestructura hidráulica compuesta por 5 preses construyíes nos dos ARROYOS regueros qu’arredolen tol complexu monacal. Tamién hai un Aula d’Interpretación de tola arrodiada.
 |
| [26] |
Durante la Edá Media convirtióse nun núcléu defensivu llevantando los templarios de la Encomienda de Montalbán un turruxón sobro’l cimboriu del cruceru de la ilesia (entá se pue apreciar). Cola Desamortización esti conxuntu quedó pa prau.
¿Cómo ye la célebre Ilesia?
Tien forma de cruz griega pero colos brazos desiguales. Ta construyida con enormes sillares ensin emplegar argamasa dala, tipu tardorromanu. Presenta arcos de ferradura per auquier: puertes, ventanes y bóvedes. L’interior ye sobriu, ensin escultura dala magar que de mano les parés taben cubiertes d’estucos y pintures.
**
8.6. Santa Mª de Quintanilla de las Viñas (Burgos) [VII-VIII]
 |
Sta. Mª Quintanilla[27] |
Nos dominios de Lara que fueren señoríu del primer conde de Castiella, Fernán González, hai una capiella visigoda conocida como Santa Mª de Quintanilla de las Viñas (Burgos). Si entá se caltién anguaño ye pola mor de les igües que realizó esta familia del alfoz de Lara, en concreto una tía del Buen Conde nomada Fámula que quedó inscrita ad eternum nel arcu toral, una amuesa en ferradura visigótica . Seguramente esta Señora yera devota de la virxe de Sta. Mª de las Viñas, culto mui estendíu per toa la reolada. «Gracies, neña». Como tamién conocemos les obres realizaes nel primer terciu del XX.
Yá sabemos que los visigodos reutilizaben los materiales romanos procedentes de restos obsoletos, como ye’l casu d’esta ilesia qu’aprovechó los sillares esteriores de la ermita que lleven unos dibuxos grabaos bien guapos de motivos florales, xeométricos y naturalistes.
Con eso y too anguaño námas conservamos d’aquel templu basilical en cruz llatina, con trés naves, una parte del cruceru y l’ábside cuadráu onde s’afayaba la capiella mayor. «Dalgo ye algo».
Por ciertu, escondida ente la maleza foi rescatada pol párrocu en 1921 y yá pa 1929 ye declarada M.N.
****************************
9. Orfebrería:El TESORU de GUARRAZAR
 |
| [28] |
Si en daqué salieron finos los visigodos cuido que la orfebrería yera’l puntu cume. El coloríu, esi lluxu bien pomposu con una téunica bien precisa, mecedura ente la tradición xermánica y la influyencia bizantina. Buscaben la policromía a partir de perlles, piedres precioses, vidríos y pasta de colores estremaos. Gustába-yos el oru en llámines mui fines sobro otres más barates «hai qu’aforrar». Seique aquello que rellumaba más que’l sol yera la téunica del croisonné, un rellenu d’alvioles de metal con vidriu fundío o piedres precioses que van formando unos dibuxos xeométricos perguapos de vexetales o animales estilizaos. Corones o cruces votives y fíbules son los obxetos que más abonden.
Un día daquién alcontró un tesoru nun pueblín de Toledo; Guadamur ye l’afortunáu. Na güertina de Guarrazar abriéronse les tierres p’amosanos una ayalga ensin igual: ¡El tesoru visigodu, por tantu tiempu olvidáu!.
***
Ello yera agostu de 1858. Isabel II reinaba n’España y el xeneral O’Donnel taba al frente del executivu.
Llovía a calderaos. El matrimoniu de María y Paco taba enforma preocupáu. Na güerta de Guarrazar asitiada nel pueblín de Guadamur, bien cerquina de Toledo, hebo un movimientu de tierres bien poco habitual. La esmolición dio pasu al ablucamientu cuando de les entreteles de la tierra surdió un brillu escomanáu. Averáronse y llevantaron la llosa de lo que fuere un antiguu cementeriu.
 |
| < Guarrazar> [29] |
- ¡María, somos ricos, equí hai oru pa pandiar!
- Vamos a tapalo y venimos pela nueche, cuando naide nun nos vea. Neña, tu nun abras el focicu hasta que nun sepamos de qué se trata.
Y asina lo ficieron pero siempres hai daquién que ferregüeya ... Asina qu’al día siguiente’l vecín foi a escarbar pela redolada y alcontró otra llosa qu’afayaba una gran cacida de corones y cruces espectaculares.
Callaron como afogaos y vendieron a tratantes aquel tesoru ensin saber lo que teníen entre manes. Los plateros de Toledo tampoco yeren conscientes de l’ayalga qu’acaben de mercar; sicasí yá barruntaben qu’aquello yera daqué d’un grandísimu valir. Una parte del tesoru terminó nel Muséu du Moyen Âge de París (dalgo tornó p’acá en 1941), otra parte nel Muséu Arqueolóxicu Nacional (Madrid) y el ¿restu? nel Palaciu Real de Madrid.
¿Cuálos son los oxetos principales d’esti tesoru?
.jfif) |
| [30] |
. La corona votiva de Recesvinto (MAN). Calidá téunica hispa-romana.
. La corona de Suintila (En busca y captura).
. Más de 23 coronas d’otros reis. [Seguramente de Chindasvinto y más]
. Delles cruces (exvotos): cruz procesional ya otros brazos d’oru.
. Cadenes d’oru pa colgar cruces y corones (a la xermánica).
. Colgantes y llámines d’oru decoraes a estilu cloisonné (a la bizantina).
Nota: El tesoru caltién munchos elementos llitúrxicos; les mesmes corones reales taben colingando del techu nes ilesies sobro la cabeza del oficiante, nun yeren pa llucir na tiesta. Esto indica la conexón de la Ilesia y l’Estáu quedando patente nos Conceyos de Toledo (Concilios), sobre manera.
Una parte pergrande d’esti tesoru entá s’alcuentra desapaecida.
La corona votiva de Suintila (621-631)
«SVINTHILANVS REX OFFERET» ye la inscripción que figuraba nuna corona votiva qu’ofreciere’l rei Suintila a la Ilesia toledana nel sieglu VII. Foi una de les pieces que remanecieron nel tesoru de Guarrazar (Guadamur). Tres dellos avantares foi ¿regalada? a la reina Sabel II d’España (ella pagó lo suyo). El (4-4-1921) l’Armería del palaciu Real de Madrid sufrió’l robu de delles pieces del Tesoru de Guarrazar, la más importante la citada corona de Suintila. Nunca más se supo. La perda nun tien igua dala.
. La CORONA VOTIVA de RECESVINTO ye una ayalga de la orfebrería visigoda del sieglu VII. Ta fecha n’oru, piedres precioses y perlles. Fuere brindada pol esti rei a la Ilesia talo un regalu llitúrxicu.
Orixe ya historia
La corona foi llevada a cabu pol rei visigodu Recesvinto (649-672) na segunda metá del sieglu VII, faciendo parte de les donaciones reales a la Ilesia pala honra de Dios (y pa tenela a favor). Ta incluyida nel Tesoru de Guarrazar, siendo descubierta en 1858 en Guadamur, cerca de Toledo, xunto con otres corones y cruces votives. Anguaño asoleyase nel Muséu Arqueolóxicu Nacional d’ España, seique dalgunes pieces del mesmu AFAYU tienes que dir veles al Muséu Cluny de París .
Carauterístiques y materiales La corona ta confeicionada con chapa doble d’oru, la interior llisa y la esterior llabrada, amosando motivos vexetales y fueyes que de mano calteníen granates, magar que munchos dellos terminaron por ¿perdese?. La diadema ta cubierta por una rede de zafiros y perlles en forma convexa, y cuelga per aciu de cadenes con esllabones en forma de fueya de peral que s’axunten n’una doble azucena coronada por un capitelín de cristal de roca.
Corona de Recesvinto [32]
Del borde inferior de la corona cuelguen 23 pequeñes cadenines, caduna con lletres d’oru que forman una dedicatoria en llatín: «RECCESVINTHVS REX OFFERET», que vien dicir “Cosa del rei Recesvinto”. Les lletres tán orniaes con perlles, zafiros y esmeraldes, tipo cloisonné*, qu’amuesen una nidia influyencia bizantina.
*Cloisonné: Pequeños departamentos rellenos d’esmaltes de colores.
Función y simbolismu Trátase d’una corona votiva (una promesa), ye dicir, una ufrienda permanente a la Ilesia que podía colgase sobro l’altar durante la lliturxa. Esti tipu de corones reflexaba la bona rellación ente’l Rei y la Ilesia, que llexitimaba la monarquía. La cruz central, colgante, y la riqueza de materiales preciosos recalcaben el so calter sagráu y ceremoniosu.
Descubrimientu y conservación El tesoru afayóse tres una tormenta que dexó al descubiertu delles tumbes ya un sepulcru na Güerta de Guarrazar. Parte de les corones vendiéronse a xoyeros y coleicionistes, mentanto qu’otres fueren recuperaes pol gobiernu español y depositaes en museos. L’estudiu xemolóxicu indica que los materiales, talo oru, zafiros y cristal, teníen procedencia bizantina, reflexando la política de Recesvinto y la influyencia artística de la dómina. La corona votiva de Recesvinto ye, a bon seguru, una de les xoyes más importantes del arte visigodu, tanto pola so téunica, como valía de los materiales ya importancia histórica y relixosa de la mesma.
*********************
10. RECÓPOLIS (578). Un suañu d'eternidá
Na contorna de L’Alcarria (Guadalajara), na llomba de La Oliva, a la vera d’un pueblín nomáu Zorita de los Canes, queden les buelgues d’una ciudá antigua n’otros tiempos conocida como RECÓPOLIS , ¿la ciudá de Recaredo?. Lo propio sedría “Rexopolis”, la ciudá del rei. A fin de cuentes Recaredo yera’l segundo de los fíos y Hermenegildo, el primixeniu, entá nun se sublevare escontra so padre¿celos?... Nun paez sida bastante. En cualquier casu ye la primer ciudá de l’Alta Edá Media llevantada por orde real.
.webp) |
| <Recópolis, la ciudá visigoda de Leovigildo> [33} |
Ello yera 578. Leovigildo fai una pausa nes campañes militares. Col envís de sacar pechu frente a merovinxos y bizantinos acuña moneda y manda llevantar una ciudá col so palaciu, plaza pública, ilesia palatina, cais bien planificaes acorrompinaes de cases y tiendes, muralla defensiva con tramos ente torres cuadraes qu’arrodiaben les 33 Ha del allugamientu ya una Puerta d’Entrada monumental, dependencies comerciales, acueductu ... «Quiero una semeya de Constantinopla».
. Esta ciudá palatina nun tuvo munchu percorríu por mor de la cris del reinu visigodu y la invasión islámica (711) que treslladaron la ciudá a un llugar cercanu seique más poliorcéticu, Zorita de los Canes (Madinat Surita); la mayoría de los materiales primixenios sirvieron pa llevantar el nuevu allugamientu (IX); entá nos queden los restos del castiellu-alcazaba y tamién hai un Centru d’Interpretación en Recópolis.
****************************
11. Dellos HISTORIADORES al rodiu los godos.
San Sidoro de Sevilla (602-626).
 |
| <San Sidoro coles Etimoloxíes> |
Foi obispu de Sevilla ya escribió la <Historia de los godos> hasta’l reináu de Suintila (621-631) que foi’l rei que consiguió la rindición de los vascones (¿rindieron dalguna vez?) y espulsó dafechu a los bizantinos del sur peninsular. ¡HISPANIA yá ye una!.. «¡Qué poco mos duró!» . La historia de San Sidoro va dende l’añu 265 a 624 y cuenta la historia de godos, suevos y vándalos.
Inspiró en Hidacio y Xuan de Bíclaro. Y yera hermanu de San Leandro (534-600) - que foi’l so tutor y tamién obispu de Sevilla – amás de San Fulxencio y Santa Florentina. Los 4 santos cartaxeneros. («¡Vaya cortixu, Sevilla!»).
. San Leandro de Sevilla (534-600).
.webp) |
| < Landri> |
Obispu. Monxu. Escritor. Algamó la conversión de los
visigodos d’arrianos a católicos: Hermenexildo y Recaredo. Foi’l
conductor del <III
Conciliu de
Toledo> onde se produxo la fusión. Yera fíu de
Severiano, un cabezaleru hispanorromanu de la Cartaxinense que viose
obligáu a colar de Cartaxena cuando Atanaxildo entregó la Bética
(Spania) a los bizantinos por mor de la refriega que caltenía con
Agila I. So madre yera la hispanorromana Teodora (Teodorica).
Pa los monxos dexó escrito “La regla de San Leandro”. Landri, ye ún de los cuatro santos cartaxeneros.
. Xuan de Bíclaro (540-621).
Foi un clérigu católicu de la Hispania visigoda que naciere hacia 540 en Santarem (anguaño Portugal). Eruditu y mui viaxáu aprendió espresase en Llatín y Griegu cuando, de chaval, tevo estudiando en Constantinopla por más de 10 años.
De vuelta la capital del imperiu bizantín asitió na Tarraconense onde fundó un cenobiu (586) – Monesteriu de Bíclarum - que rixó pola so propia regla (Nun mos queda constancia escrita). Nun ta claro onde taba asitiáu pero lo más probable ye que fuere en Vallclara (Tarragona).
 |
<Constantinopla. ¡Qué cosa más guapa! Equí estudió Xuanín. |
Leovixildo, que yera arrianu, exiliólu en (576) a Barcelona (¡vaya castigu!) onde tuvo qu’aguantar lo suyo de los bederres arrianos. Firmó les actes del Sínodu Provincial de Zaragoza (592) ; asistió al <III Conceyu de Toledo (597)> y al <II de Barcelona (599)>.
Tamién sabemos qu’ocupó’l cargu d’obispu de Girona ente 591 y 621, añu en que pasó del paraísu girondín al celestial.
Fízose célebre, sobre manera, per aciu del so Chronicón (589) que comprende dende (567-590)* y que mos dexó pa gociu los amantes de la historia.
Participó en dellos CONCEYOS (Concilios) talo’l de « III Conceyu de Toledo» del que foi cronista – amás d’Obispu - dexándonos nel so Chronicón una versión única de los fechos: la conversión de Recaredo y el fin oficial del arrianismu, dalgo trescendental pos significaba l’aunión eclesiástica de los visigodos tres l’ensame políticu qu’algamare Leovixildo.
¿Quién gobernó n’Hispania ente (567 -590), dómina de Leovigildo) ?
Hebo trés reis: Liuva I, Leovixildo, (Hermenexildo) y Recaredo. Como vemos de lo más granao del reinu visigodu.
Xuan de Biclaro, católicu talo Hermenexildo, llevóse con elli «a partir un reñón». Nun taba d’alcuerdu na tiranía (sublevación) del fíu escontra so padre seique yera partidariu de l’aunión de tolos pueblos d’Hispania embaxo’l control visigodu. « ¿Y pa qué trabayó to padre a rabu restalláu, so mazcayu?» Esti baturiciu creó munchos problemes ente godos ya hispanorromanos. «Hispania nun paga traidores y a ti de Santu tocóte bien poco, babayu». (Y eso ye lo que tamién pienso yo ¡Puxa Xuan, tiéneslo Bien-claro!
Xuan de Bíclaro respiró cuando Recaredo xubió al tronu. «Ricar, tiénesme equí pa lo que faiga falta». Y con elli tuvo agabitando nel <III Conceyu de Toledo>.
Tamién hai que poner en sabencies que nel sur-este d’Hispania había una faza (Spania) baxo’l control bizantín de Constantinopla, que yera católica.
D’esta miente podemos dicir que Xuan de B. pasó de padecer l’arrianismu a la oficialidá del catolicismu. «Nun pues quexate, Xuanín».
. Gregorio de Tours (538-594).
 |
Gregorio de Tours poniendo al orde al Rei. * < Vamos ver, Chilpedrico, ¿a ti quién te manda metete nestos cancios? . Dexa en paz la Santísima Trinidá, esto nun ye cosa tuya> |
.Esti obispu católicu – ya escritor - galorromanu nació en Tours (Francia merovinxia d’Austrasia) y vivió na segunda metá del sieglu VI siendo contemporaneu de la flor y nata d’esta dómina: Leovixildo, Recaredo, Sigibertu I d’Austrasia y Brunilda, Chilperico I de Neustria, Xustinianu I el Grande, Xuan d’Éfeso, Mauricio l’emperador bizantín, el persa Cosroes I Anushirvan, San Leandro y San Sidoro de Sevilla, ¿San Hermenexildo? o’l Papa Gregorio I el Magnu. <<Qué choyu pa un escritor>>
.Como vemos una vida d’enguedeyes franco-merovinxies que plasmó na “ Historia de los francos en 10 llibros”
*************************
. BIBLIOGRAFÍA
P’atopar información al rodiu d’esti post “Leovigildo, rei de los visigodos” pues rebuscar per equí ....
. “Anexo Reyes Godos”.
. “Leovigildo, rey de los hispanos” (José Soto Chica).
. Wikipedia.
. “Historia de los godos” San ISidoro de Sevilla.
. San Leandro de Sevilla.
. Gregorio de Tours
. La persecución a los judíos en la España visigoda
. El Código de Recesvinto.
. Ducáu d’ Asturias. (Ducado de Asturias)
. XIII CONCILIU VISIGODU (¿6+2 ducaos) Chindasvinto y Recesvinto.
. “La vida y muerte del rey Bamba” de Lope de vega.
. “Reis visigodos: Ärbol xenealógico”. Llinaxes.
Recursos pa consultar l’árbol xenealóxicu
Wikipedia ofrez un llistáu completu de los reis visigodos y les sos rellaciones familiares.
Rede Historia proporciona la llista de reis dende Alarico I hasta Rodrigo, con feches y datos clave.
Geneanet permite esplorar l’ árbol xenealóxicu de monarques talo Ervigio, amosando bisnietos y tataranietos, ansí como conexones cola nobleza europea.
Esti árbol xenealóxicu reflexa tanto la herencia familiar como la influyencia de la nobleza na eleición de los reis, sopelexando la evolución del poder visigodu dende los sos oríxenes hasta la cayía del reinu.
CUMPLIMIENTOS
 |
| ¡Qu'esfrutes! [35] |
Seique debe quedar claro a lo llargo del post a quién-y debo la mio gratitú por aidame a comprender un poco la historia de los VISIGODOS paezme de recibu remarcalos esplicitamente. Magar que dalgún pue quedame nel tinteru atrévome con esti llistáu:
. Don José Soto Chica per aciu del so llibru: "Leovigildo. El Rey de los hispanos" . Al endefechu tamién tengo escuchao dellos post coles entrevistes que-y tienen fecho. [Sigo lleendo con prestu, profesor, les sos histories. ¡Que'l ritmu nun pare, don Xosé! ¡Qu'enantes muerra'l que xibla!].
. A la Wikipedia onde consulto de contino y alcuentro bayura de semeyes.
. A la IA, esta nueva poderosa arma enciclopédica que vien a revolucionalo too; de fechu a min tienme sacao de más d'ún enguedeyu. Sicasí lo que más me prest ye esa rellación de fuducia que caltengo con ella; yo pregunto-y les mio duldes y ella apúrreme una rempuesta en menos que canta un gallu.
. A <www.despertaferroediciones> , por TANTO, por TOO y nesta ocasión polo que nos apurre no que cinca a los visigodos per aciu de José Soto Chica.
. A dellos blogs y páxines web poles sos histories y SEMEYES, talo: < Pintirest.com>. <blogspot.com>. <pining.com>. <www.alamy.com>. <mundoprimaria.com>. <rtve.es>. <ciudaddelastresculturas.com>. <gettyimages.com>. <um.es>. <hotelconquistadetoledo.com>. <acchistoriablogspot.com>. >Pedazosde historia(Alberto Garín)>. <blogspo.tripavisor.es>. <www.amazon.es>. <lahistoriadeluniverso.blogspot.com>. <nietos_1 leamoslabiblia.com>. <kokita-eri-historiadelarte.blogspot.com>. <guerrasconhistoria.wordpress.com>. <RTVE>. <es.slideshare.net>. <guarraza.com>. <hoteles.net>. <castillalamancha.com>. <@historias beliticas (Sergio)> .<nationalgeographic. com>. elmundo.es>. <@BELLUMARTISHISTORIAMILITAR .blgspot.com (Francisco García Campa o David Nievas o Josep Suñé o Yeyo Balbás)>. A la Asociacióncultural "HéroesdeCavites".
A los pintores: <Salvador Cubella>. <Allan Stewart>. <Bartolomé E. Murillo>
Tengo escuchao dellos postcard per equí: <@Historia ex Hispania>. <@PostalesdelPasado>. <Pedazos de Historia> ¡Qué entrevista, Alberto Garín!. <@BELLUMARTISHISTORIAR>. < @h<istoriasbelicas (Sergio)>. <@CrónicasdelaHistoria>. ..... ¡Y más ! ¡Y más! ...
¡Qué gustu me da dir escuchando estos post mientres cuerro na estática o doi un paséu per Roces! . ¡¡¡VIVA LA REVOLUCIÓN!!!. ¡¡¡VIVA LEOVIXILDO'L XEFE DE L'AUNIÓN!!! ¡¡¡ Y VIVA CEUTA QUE YE PARTE IMPORTANTE DE LA MIO NACIÓN!!!
::::::::::::::::::: FIN ::::::::::::::::
No hay comentarios:
Publicar un comentario