Suaños de Merindades [1] . Misión: PATERNA

                  SUAÑOS de MERINDADES    

        

                                    Misión: PATERNA [1]

                                              (SEMEYA: Puentedey .  Merindá de Valdeporres)

TUNEL del  TIEMPU: < Ayeri tuvi un suañu de Merindaes >  
Si quies conocer esta historia ye preciso que lu travieses, ¿atréveste?

                    

            Hola, collacios, ¿cómo vais?. ¿Creyéis que vos tengo abandonaos por mor del COVID o dalgo ansí?... Pa nada, nun camiento n'otra cosa qu'en poder cuntavos dalgunos viaxes o esperiencies que tengo pasao  estos años atrás camín de Les Merindaes, esi terciu septentrional de Burgos onde xurde l' entamu de Castiella, biltu del <Castellán>. Ye verda que nos meses caberos tuvi de pasar pel taller del HUCA a tresnar unos tubos que, según los mecánicos, taben un poco tomaos; pero gracies a los Sanitarios, a la Santina, a Xacobu y dellos allegaos más podemos siguir dando guerra una temporada más; la pena ye qu'esta pandemia tiennos un tanto llimitaos por eso quiero cuntavos dellos suaños que tuvi arriendes deles visites que ficimos a les Merindaes estos años atrás (2016-17-18), cuando entá la nuesa madre taba énte nós.  Habéis de perdoname si alcontráis dalguna incongruencia  nos rellatos pero ye que <los suaños, suaños son> y a vegaes tán lloñe nel tiempu.... 

            Suañé que yera un <mozárabe> qu'arribó a les Asturies durante'l reináu del Rei Castu y .... ¿qué vos paez si vos voi cuntando la historia de la mio vida, pasu ente pasu, mentanto voi percorriendo Les Merindaes de Burgos nel quiqueniu  anterior a la pandemia? ...  Ye muncha tarea pa un aficionáu a la lliteratura pero cuido que si nun lo intento agora yá tendré qu'esperar  a <esotra vida> que naide nun conoz en verdá. ¿Podréis perdoname esti atrevimientu? ..... Entós vamos p'allá: < ¡Por Dios y por Alá!>.

                                  zzzZZZzzz   SUAÑU  PRIMERU (1º)  zzzZZZzzz

         - Traéime al mozárabe. Tengo un mandáu pa elli.
         - Nel intre, señor Gobernador. 
          Tamos en Llugo, nel palaciu de Ramiro, el Gobernador de Galicia encamentáu pol rei Castu, nuna casona pedresa na que destaca una torre que sambla ser un homenax. Per estes dómines nómenlos pazos. 
          Corría'l final del branu del añu 841 cuando la fueya de la viesca de ribera qu'orniaba'l Ríu Miño anunciaba la seronda. Los árabes llevaben más d'un sieglu aposentaos n'Hispania. Nunca nun llegaron a  pensar, daes les facilidaes qu'alcontraren de mano, qu'un garapiellu d'asturgodos diba pone-yos tantos pilancos pa facese cola península dafechu. 

EQUÍ ENTAMÓ TOO...
- ¿Que nun quieren baxar?... Esperái in poco, qu'estos asnos xabaces sácolos yo d'ehí.
- ¡Alqamaaaa!... ¿Ánde vas? ... ¡Torna equí qu'esos convénzolos yo!
- Pelayo, ¿tas ehí?
- ¿Nun me ves, obispu traidor?.
- Ríndite y nun sías fatu. Namás quedáis cuatro gatos llevantiscos en toa Hispania.
- Cola ayuda la Santina creceremos talo'l granu de mostaza. Y tu ponte no peor ...

         - Bueno, vamos colar; media ocena d'asnos xabaces nun van torgar que cantemos victoria - camentaren los sarracenos tres l'amarraza Cuadonga del añu 722, un deceniu llargu tres la INVASIÓN. 

          Pero los asinus africanus - ¡qué paradoxa! - nun ye qu'aguantaren tapacíos tres los Montes Cantábricos; seique aconceyaren, foron nomando  princeps (Pelayo, Alfonso I, Fruela, el Castu...) qu'enantaron aquel cativu reinu del norte peninsular y hasta s'atrevieren a llegar a Portugal naquella grandonada del noventa y ocho (798) cuando llantaron la bandera blanca cola cruz roxa nel turruxón del Delta del Tah.o, na mesmísima Llisboa.
    - Con esta cacida yá tengo pa llevantar San Salvador y hasta Santa María - comentó'l  rei de les Asturies Alfonso II, al que la xente-y dio por nomar: el Castu, por aquello que nun acontraba muyer pa casar  (depués d'una madre vasca y una tía Adosinda igual yera pa pensalo). 

Bien podía ser el PAZU O FARAMELLO  la  residencia en Galicia del Gobernador Ramiro.
Tuviérelo pensao pero a la fin decatose que'l so sitiu taba en LLugo, <Lucus Augusti>,
la capital romana por escelencia, por tradición; eso daba más barafuste a cualisquier rexidor.

        Podríemos nomalu'l xuiciosu, el xustu, el valerosu, l'estratega, l'estadista .... Too ésto y más yera Alfonso Froilaz, el primer REI de verdá - investíu con tol orde góticu toledanu -  que tenía'l Reinu d'Asturies. Pero esti rei tan mayor que llevaba GOBERNANDO  cincuenta años taba a piques de dar les boquiaes... Sabíalo, y por eso tenía nomao sucesor a Ramiro - al que llevaba preparando algún tiempu - masque daquién nun lo quixera entender ... Nin tan siquier el so pariente Nepociano - un poco mayor pa estos trotes, magar tampoco nun lo quixo entender - dao'l so parentescu pero El Castu vía mui llargo y sabía que'l Reinu precisaba d'un Cid, una guerreru q'uenfrentare los árabes y non que trapichare namás. Nepociano* yera finu pero pasárase-y l'arroz.

*(Nepociano, nun te cafies, la hestoria cuéntennosla los que ganen, y qué vamos facer si nun tenemos otra cosa .... Perdona, ho; yo téngote na llista talo un Rei más).

Plaza del Obradoiru (Santiago Compostela)
onde'l rei Ramiro pue que ficiese'l Máster
enantes de coronase como Rei de les Asturies.
Tenía nivel, los monumentos del Narancu (Uviéu)
nun son cualquier cosa.

        Ramiro barruntábalo, nun yera fatu, sabía que'l tronu d'Uviéu dependía d'esti máster na Universidá Santiago y poro taba tresnando un casoriu políticu, dao que quedare vilbu d'ha poco p'acá. Amás Uviéu naguaba por una reina (llevaben 50 años ensin ella, yá taba bien) y elli - Ramiro Bermúdez - precisaba tener el control de la ñaciente Castiella, la tierra los Bárdulos y de  dellos pueblos hispanos más, que venía repoblando a velocidá marcmárquez; la torga yeren los árabes que-y coyeren el gustu a veraniar nel Norte y nun había primavera - nin tan siquier esperaben el branu - que nun se nos presentaren en casa famientos y secañosos (del sangre, namás), coses qu'obligaba la  yihad.


         Ramiro, el que ganó l'apellíu d'El xusticieru, taba tramando planes pa cuando algamare al tronu:
     - Asina que tu yes El Mozárabe. 
     - Bueno, soi namás Selim ibn Said ben Mugait y delles coses más. 
     - Para, para; que yá te veo venir ....

      - Nun s'esmoleza, Señor; llámeme como cuasi tol mundu: Selim Marwán. 

      - Cuido que te sientes arguyosu del to pasáu árabe. 

    - Nun ye pa menos; siempre me trataron con tol procuru. Soi lo que soi gracies a ellos. 
     - ¿Y por qué nun quedasti en Córdoba pa siempre?
     - Un home precisa conocer los sos raigaños.Yo criéme na Córdoba del emigrante omeya Abderramán I, el Falcón d'Alandalus, pero fui educáu en total llibertá relixosa, por raro que vos paeza. Conozo perbién los dos credos y crecí nel respetu d'ambes cultures. Pa nada nun toi adoctrináu, como dicís per estes dómines; pero un día decidí que yá yera tiempu de conocer los mios oríxenes. 
     - ¿ Y agora que yá los conoces, lleves una década equí, nun crees que yá ye la hora d'escoyer?
     - Nun veo por qué . Dios namás qu'hai ún, nómese como se quiera: Alá o Yhavé, Zeus o Iovi , Lugh o Natura, Messi o Cristiano, Maradona ... Cadún ye un Dios a la manera de so. 
     - Bueno, bueno... Yá siguiremos falando d'esto n'otra ocasión. Mandéte llamar por otru asuntu...
     - Sedrá un gociu pergrande intercambiar paeceres con vós, señor gobernador. Los árabes - remaché con intención - pasamos muncho tiempu aldericando nes mezquites.  ¿Cuál ye esi asuntu tan secretu del que quier tratar conmigo?
     - ¿Por qué pienses que ye secretu?
     - Mandó salir a tol mundu...
     - Ye verdá. Yes bien cuciu, dignu fíu de to padre adotivu... 
     - ¿Llegó a conocelu?
     - Malpenes... Nuna ocasión coincidimos na corte d'Uviéu pero namás que lu vi de refilón cuando diba tratar con Alfonso. Pero sentí falar d'elli enforma. Tenía talante. Yera mui apreciáu ente los míos al tiempu de negociar; cuido que demasiao ....

     - Gracies polo que me toca. Elli tamién emponderaba enforma al vuesu rei'l Castu, el to valedor... 
     - Pos d'esto quería falate..... Necesito que me vaigas hasta la Bardulia, un llugar pergupu onde entamen abondar los castiellos, y qu'un día va conocese como Les Merindaes.  Pa que te faigas una idega voi enseñate un mapa, una ayalga que fexo un romanu va munchos años y que llegó a min de pura casualidá.  Ehí diz onde tán asitiaos los bárdulos y los pueblos de la redolada .... 

                     -  ¡¡¡¡¡¡¡CATAPLÁSSSSSSSsssss!!!!

Pueblos prerromanos norte Iberia
(Semeya Wikipedia)

    - ¿Qué pasa? ¿Ónde toi? ¿Qué ruíu ye esti?
    - Tas nel suelu, manín; acabes de cayer de la cama... Siéntolo abondo, queríu; al tropezar cola siella salióme volando la escudiella l'almuerzu y ... llevasti un sustu morrocotudu. 
    - Cagondiez, agora que taba a puntu de fer un viax nel tiempu... 
    - ¿Un viax? ¿Aú? Alpúntome. 
    - A la Bardulia.
    - ¿Ónde ta éso?
    - Anda pel norte de Burgos... Sé que ye la tierra de los bárdulos pero... Vamos miralo n'interné ...

    - Busca un mapa que diga: "Pueblos prerromanos del norte d'Iberia".     

    - Equí diz: <Bardulia quae nunc appellatur Castella>, según la Crónica Alfonsina. Agora entama conocese por Castiella, de xuru polos munchos castiellos que se tán llevantando. Nun hai añu que nun sufran una razia, polo menos. 

    - Per ehí van los tiros ... Agora busca'l Mapa ...

    - Debe ser esti .... Los Berrones ... los Pelendones, los caristios ...

    - Los Berones non, nun los tracamundies, los Berrones son del mio pueblu... (Tolivia- Pola Llaviana)
    - Oi, chachu; ¿cómo ye que has faer un viax a un sitiu que pa nada nun conoces y que p'a enriba son caristios ...?
    -  Son caristios, non caros. En cualquier casu ye un encargu de Ramiro.
    - ¿El de Carme? - ella sigui al endefechu la chancia.
    - Non, el futuru Rei de les Asturies. 
    - ¡Ah, los tos suaños!... Pos nada, si quies conocelos alpúntome; yo pa Castiella tiro siempres encantada.
    - Vamos ponenos a ello...
    - Mira esti mapa, el norte de Burgos ye conocío como Les Merindades.
    - ¡Ah, claro, Les Merindaes! Agora m'alcuerdo... Tienme falao Chema d'ello, por eso esti suañu... 
    - Mira que resume tengo equí... Pa entamar nun ta mal, date una idea.

   

Comarques de Burgos
  (Semeya Wikipedia)

          [ Les Merindaes son una contorna que vien a ocupar el cuartu norte la provincia de Burgos y poro pertenez la Comunidá de Castiella-Lleón. Llenda al norte con Vizcaya y Cantabria que tamién la zarra pol oeste, al este llinda cor Álava y al sur pola redolada de Los Páramos y La Bureba.
     Los 27 municipios que la conformen tienen una estensión de 2.821 k/m2. La so capital ye Villarcayo* que pertenez a la merindá de Castiella la Vieya (Nel "Reinu del Norte" la capital ye Cigüenza, pequeñu llugar al par de Villarcayo) y ta llancada nuna llanera pergrande atravesada pol Ríu Nela, que conflúi nel Ebro allá per Trespaderne.

*¿Villarcayo= Villa de Arcadio?. En 925 apaez nel Cartulariu de Cardeña como "Fonte Arcayo" por mor d'una donación al monesteriu de Cigüenza. Dalgo más tarde "Villa Archayo" figura como donación de Sancho García ya Urraca al monesteriu d'Oña.

     A llombu ente los Montes Cantábricos y los llanos de Castiella presenten Les Merindaes un abanicu de climes estremaos ente húmedos y secos con variedá de paisax. En xeneral podemos dicir que los iviernos son dalgo llargos y fríos mientres que los branos son suaves y curtios (de lo más afayaizo pa unes tranquiles vacaciones). El promediu de lluvies al añu ye de 1000 mm/3.  Amás de tar bañada polos entamos del Ríu Ebro onde conflúin bayura de ríos talo que Nela, Trema, Trueba, Xerea, Rusecu, Cerneh.a, Salón.... tien otros, como'l Cadagua ya Ordunte que desemboquen na vertiente cantábrica. 
        Una merindá yera un tarrén de realengu tuteláu por un noble que sopelexaba'l títulu de Merín y taba encargáu d'impartir xusticia . Enrique II donó-ylo a los Velasco pasando a ser señoríu hasta que Felipe II rescató'l títulu d'Alcalde y Xusticia Mayor.
 De mano Les Merindaes yeren siete (Acta Xunta Xeneral 5-1-1556): Castiya la Vieya, Cuesta Urria, Llosa, Montih.a, Sotoscueva, Valdeporres y Valdivielso pero foron enantándo con otres como Mena,Trespaderne, Los Monteros,Tobalina, Alfoz de Santa Gadea.... y dividiéndose en Partíos, Xuntes y Tercios. Llegaos a 1835 suprímese l'Ayuntamientu Xeneral de Les Merindaes pasando a ser el Municipiu la nueva autoridá alministrativa . Anguaño tiense recuperao esta calificación de Merindaes como unidá xeográfica, histórica y turística ( que buenes perres da, g.a D.).]]

                                ***********************************  

                                    ........zzz    ZZZ  zzz     SUAÑU  2u ... zzz  ZZZ  ZZZ ........... 

<Locus Sancti Iacobi> 
Anicios de Santiago Compostela.

   

  Yá debía faltar poco p'alborecer. Galdíu como taba de preparar el viax de Les Merindaes quedéme fritu. Volví a dormime. Volví a suañar que taba na corte Ramiro por mor d'una encomienda que quería faceme.  

    - Quería proponete, Selim, facer un viaxe , ¿alcuérdeste lo que tenemos falao la cabera vez?....
    - Ai, Señor; yá sabéis que toi equí unviáu pol rei Alfonso col envís de comprobar los avances fechos nel <Locus Sancti Iacobi> y  nel Camín Xacobéu, tanto na catedralina de Santiago como no que cinca a la seguridá los caminos y na naciente ciudá xacobea. Darréu del viax del Castu n' 834 son munchos los pelegrinos que s'averen a implorar el perdón énte'l sepulcru del Apóstol.  
    - Y tamién tas equí por dalgo más, so llaín, pero eso nun vas cuntámelo, ¿eh?...
    - Señor Gobernador, yo namás soi un mandàu. 
    - Entós aprovecho pa mandate yo algo y asina compruebes in situ como va'l Camín Primitivu. 
    - Si nun ye torga pa la encomienda real...
    - Nada imposible pa un cuciu como tu ... Verás, yá sabes que'l rei Alfonso favoreció la repoblación al sureste de les tierres de Cantabria, eso que se conoz como la Bardulia y que dalgunos entamen a nomar <Castiella>. 

Monesteriu femenín de Samiguel del Pedrosu.
Rei Fruela 759. Abadesa: Nonabella.
Primeros tiempos de la Repoblación.  

     - Toi bien al tantu de lo qu'ellí ta pasando. La xente ta repoblando les tierres de los bárdulos y d'otres tribes prerromániques qu'abenayá abellugaron tamién a caristios, vascones, autrigones, berones, pelendones... ye dicir: Burgos, Álava y La Rioh.a .  Yá sabemos que Fruela llevantó un monesteriu femenín en tierres de la Bureba, tierres que quedaren ermes pola política del otru Alfonso de caltener una estaya de <tierres de naide> a les que nun podía garantizar la so defensa.

    - ¿De naide San Miguel del Pedrosu ?... Poco-y duró, porque Fruela nun llevaba dos años cuando llevantó esti monestriu (759). Igual lo tenía entamanao'l mesmu Católicu (Alfonso I). 
    - Igual, pero estos conocimientos tuyos nun faen otro qu'afitar  que yes la persona afayadiza pa esta misión. <Misión: PATERNA>.

En Taranco (Valle de Mena) aprució por primera vez nesti
Monesteriu de San Vicente'l el nome de Castilla. 
¿La bárdula Paterna rinde cultu a Castiella?

    - ¿Pa busca-y una novia, señor Gobernador?
    - ¿Qué sabes tu d'éso, puñeteru?
    - Na corte sábese cuasi too, señor.
    - Y qué se sabe, al endefechu?
    - Que pensáis mui llargo, Froilaz... Y que nun taba mal enllaciar, pola de buenes, coles tierres del oriente del reinu... 
    - ¿Asina qu'esi ye'l comentariu trending topic  xeneralizáu na corte?
    - Bueno, algo se camienta.... ¿Ando atináu?... 
    - ¡Ah!, entós ye más bien cosa tuya, ¿eh, cabritu?... 
    - Nun se confíe, gobernador... Na corte d'Uviéu ta tresnándose'l el desembarcu... 

    - ¿El desembarcu? ...

    - El Rei ta cansu y mui mayor... hai qu'andar sollerte... El relevu ta al volver la esquina.
    - Dao que paeces sabelo too... ¿Conoces tamién el nome de la nuviella mentada?:........
    - Baráxense delles posibilidaes pero... 
    - Paterna, na Bardulia, lleva más papeletes que ninguna.  La tierra  los castiellos, el petite veraniegu de los mios parientes- afité camudando con goña'l tonu de voz. 
    - Pos yo voi quita-vos esi viciu - arrepostió nel mesmu tonu.  Pienso siguir cola repoblación y ameyorar la seguridá de la Bardulia; por eso quiero que vayas visitalo y de pasu... 
   - De pasu conocer a Paterna, a la familia y entamanar unes rellaciones prematrimoniales. 
   - Bueno, dalgo hai yá falao pero ando arranáu por saber lo que piensen na familia y si ella taría dimpuesta... Y como yes tan arteru, tres conocer dambes partes, sabrás ponderame la conveniencia del casu. 

Muralla Romana de LLugo <Lucus Augusti>
Semeya: Wikiland

    - Señor, nun me perestime. No que cinca al interés políticu yo namás podré apurrir una opinión, y bien humilde, por cierto; y tocántenes a lo personal...
    - Nun te faigas el fatu, tu sabes bien lo que s'espera d'una reina y lo qu'espero yo de ti.
    - ¡Ah!, si namás ye éso... ¿Cuándo teo que colar?
    - Vete preparando'l fatu, nun hai tiempu que perder. A partir d'agora lo más importante pa ti ye la     <MISIÓN:PATERNA>
    - ¿Dalguna recomendación, Señor Gobernador?
    - Lleves una carta pal condesu don Diego, el pá de Paterna, pa que te traten talo un Señor y nu ponga torgues a los tos desplazamientos pela Bardulia, d'onde tomarás bones notes p'ameyorar nun futuru próximu la seguridá de la zona. Conveníate llevar nes alforxes les <Cróniques d'Esparza> pa que conozas la zona un poco meyor.
    - Algo me quier sonar...
    - ¿Nun conoces estos códices? : <La gran aventura del reino de Asturias>, <El reino del norte >, 

<Los demonios del mar> y <El caballero del jabalí blanco>. De momento tienes bastante con eses. De lo que precises pal viaxe fala col mio fíu Ordoño, anda al tanto de too. 
         Al salir corriendo choco cola puerta y ....        

               ¡¡¡¡¡¡¡¡¡¡¡¡¡¡¡ CATAPLASSSSSssssss!!!!!!!!!!!!

         Cada vez qu'espierto d'un suañu apaez la costiella velando...

Les Merindaes de Burgos, d'España, d'Asturies.
(Porque los asturianos equí tenemos muncho que dicir,
y que ver....)

    - Bueno parienta,vamos  preparar el viax. Tengo equí dellos mapes y esti llibru: <Las Merindades de Burgos>, de Mariano Cano Gordo. 
    - Voi meteme n'Internet a ver qu'alcuentro... ¡Guáu, tenemos la tira de blog's, pdf's,  páxines web, amás de la Wikipedia!:
     .  <elcondadodecastilla>, <7 Merindades>, <las merindades.com>, <minube.com>... y dirán saliendo más. Por información nun va quedar. 
         Tres lleer a esgaya tomamos el determín de marcar los finxos que nun podíemos escaecer, lluéu yá diríen apaeciendo otros sobre la marcha. Foron estos: Villarcayo, Medina del Pomar, Frías, Espinosa los Monteros, Valle de Mena, Valle de Llosa, Trespaderne, Cillaperlata y Oña. 
    Asina que preparamos les maletes, los llibros, l'ordenador y marcamos nel mapa'l primer puntu de llegada: Santa Gadea d'Alfoz, al entamu Les Merindaes, onde alcontraremos abellugu pa los dos primeros díes. 

                   Día primeru: < Xixón - Santa Gadea d'Alfoz

Los legionarios de la IVª de Macedonia
llegaron a Retortillo y nun hebo manera d'echalos:
- ¡Nosotros d'equí nun mos movemos!
De Reinosa pal cielu. 

     Salimos de Xixón a les siete la mañana. Furnimos de pan na <Tahona de Vega> porque nunca nun se sabe lo que pue asoceder... La ruta prometía (como siempres que marcha ún de viaxe, ¿o non?): Camín de la costa per A-8 hasta Reinosa pasando per: Villaviciosa, Colunga, LLanes, Unquera, San Vicente... Equí facemos alcordanza de les <Cróniques> al ver un cartelu que diz :"Potes". 
  -   [Per esti pueblu, tien pasao Zonio de Mena camín del monesteriu de Santu Toribiu de Llébana, onde'l Beatu escribiere los <Comentarios del Apocalipsis> que tantu polvu llevantaren. 

- Sí, yá sé qu'esti Beato traite pela Cai de l'Amargura; con eso yera migo de la reina Adosinda ....

- Ye un personax bien singular. Un probe monxu de Llébana tiense enfrentao al mesmísimu arzobispu de Toledo, escribió los célebres <Comentarios del Apocalipsis> y n'<O Dei verbum> - dedicada al Rei Mauregato - proclama a ¡Santiago como Patrón d'España!;  casi ná, menuda polvarea llevantó ... 

- Y bien que'l Rei Alfonso'l Castu lo aprovechó magar nun lu tragara por apartalu del tronu que-y dexare'l Rei Silo...

- Eso nun fai qu'amosar lo intelixente que yera: <Primero'l Reinu, darréu ún>.

- Bono, yá tendremos tiempu falar d'ello, agora esfruta con San Vicente la Barquera. 

 

San Vicente la Barquera (Cantabria)

     Pasamos l'espectacular pueblu de la Barquera (barc=agua), onde 80% ta nel Parque Natural d'Oyambre, pa dir camín de Cabezón  de la Sal y llegar a Torrelavega onde dexamos l'autopista 

A-8 pa entrar n' A-67 camín de Reinosa. Debíemos salir pola 1ª pero ensin saber por qué ficímoslo pola 2ª, la de Motamorosa, y tuvimos que preguntar:
    - Dais la vuelta y na rotonda tiráis camín de Xulióbriga, la ciudá romana, pasando por Bolmir (CA-732). Dende ehí a Santa Gadea d'Alfoz poco más de media hora. 
    
             Pa entamar..... ¡¡¡¡¡UNA   de   ROMANOS!!!!!!!!

Muséu: Una <domus> romana
- Voi pa casa tomar un cafetín, ta algo fresco. 

      Xulióbriga ye una de les nueve ciudaes que los romanos fundaren en Cantabria; seguramente la cabezalera. Ta asitiada na fastera d'una llomba, a unos 900 m/snm, nun llugar de lo más vistoso y soleyero sobro'l valle de Reinosa y dominando L'Embalse del Ebro. Tien tola pinta de ser l'asentamientu d'un castru apruciendo al endefechu restos de la Edá del Fierro.  Anguaño caltiénse un pueblín al que nomen Retortillo. Abenayá taba arrodiao por una viesca onde pastiaba ganao ovino y nos pandos cultivábase'l cereal que se guardaba nos horros de los queda constacia (Sí, ho; los horros tamién los inventaron o promocionaron los romanos).
     La Legio IV Macedonia fúndala 15 años e.X. - al acabar  les Guerres Cántabres -  n'honor de Cayo Xulio César, pá adoptivu d'Augusto, y ta nun puntu de pasu ente la meseta (Herrera de Pisuerga) y el puertu de Victoriae Iuliobrigensium (¿Santander?) pasando per Suances. Foi un llugar importante que dio xente cabezalero na Tarraconense. 
    La ciudá paez abandonase nel s. III pero foi recuperando a la llargo de la Edá Media onde s'instalaren un cementeriu y lluéu una ilesia románica - Santa Mª de Retortillo - enriba'l mesmu foru, d'onde partía una cai porticada. Les buelgues más notables alcontraes son: 

Planta del Foru (Wp)

    . El foru, pequeñu y asitiáu na parte más alta. 
    . La "Casa los Morillos", del 80 d.X.
    . La "Casa los Mosáicos", onde s'aprecien les güelgues d'unes termes con hypocaustum (sistema de calefaición que producía vapor caliente soterraño quemando madera). El xefe taba bien calecíu pos cuando sopla l'airón nel Retortillo... 

Ilesia enriba'l FORU

    . La Tabernae, que nun yera'l chigre como pensaba de mano ( yá llevábemos dos hores llargues dende que saliéremos de casa y echábase de menos un cafetín... ¿Cómo s'apañaríen los romanos?). Pos les tabernaes yeren unos edificios tipu insula  (de pisos) que taben nun tarrén aterrazáu (¡qué espabilaos!) qu'emplegaben nesti casu como almacenes y comercios. Vamos, les "tabernes" vienen ser tamién como los baxos comerciales d'anguaño, que dellos significaos tien esta pallabra. Con dicir que nós pasamos a nomales chigres...  
    . Queden restos d'un alfar, onde fabricar teyes y recipientes cerámicos pa caltener el granu, llíquidos o cacía.  

DOMUS romana (Wikip)

    . Zócalos de la planta de varies cases rectangulares, non mui grandes. Si entres nel Muséu puen desplicate les partes d'una casa:l'ostium (puerta entrada),  l'adrium (patiu central), el vestibulum (entrada o estragal) el triclinium (comedor), la culina (cocina), el cubiculum (cuartos pa dormir),

 laraium (ara o altar a los dioses), el tablinum (oficina), la tabernae... Tuvimos mala suerte porque entá nun taba abierto.
    

    Xulióbriga ta en Retortillo, como queda dicho. Agora tiramos camín del Alfoz. Ye una mañana calentina . Baxamos sele, como tastiando'l vinu la zona; nun apetecía dexar aquella atalaya: ¡qué vistes de Reinosa! . Vamos bordiando l'Embalse del Ebro pola CA-730. L'agua ye la nota dominante.

-¡Meca, ye l'aniversariu José!
- Vamos echar una oración naquella capiella.
por un collaciu que nos dexó l'añu pasáu.

     Vemos una capiella y paramos echar una plegaria pos veníemos camentando sobro'l nuesu collaciu José que, xusto facía un añu, venía d'abandonamos y andábemos un poco murnios. 
Pasamos per Horna, Arroyo, Les Roces, Llano, Bimón y Arija. Equí paramos nun cruce pa preguntar, por si acasu. Si los romanos nun inventaren el GPS sedrá por que nun ye de fiar del too... 
    -De frente. Pilláis la BU-V-6423 y llegáis al "Rincón de Santa Gadea" nun santiamén.
        Y asina foi. Santa Gadea ye un pueblín del alfoz qu'exerce de capital del municipiu perteneciente al partíu xudicial de Villarcayo. 

                 

                                             ***** CAMÌN  del  AGOSPIU ******

"El Rincón de Gadea", agospiu.

         La casa rural onde agospiamos - antigua casona reformada con sabor a antiguo - ye perconocida, tanto polos vecinos como por los turistes que busquen tranquilidá: preciu llevaderu y bona comida casero. Nin que dicir tien qu'equí, pel branu, nun se t'apeguen les sábanes pola calor; duérmese talo los ánxeles. 
    Trátase d'una antigua casona reformada, con dos pisos y balcones tipu montañes, onde se sienten les pisaes del tiempu sobro'l pisu de madera. Tol mundu echa un gabitu nesti negociu familiar onde Rosa, la ma,  ye'l catalizador.

     - Mientres llega la hora de la xinta ¿ por qué nun dais una vuelta pel pueblu?
     - Bona idea, ansí estiramos les pates un poco, que tan encambriaes. ¿Qué podemos ver nesti alfoz?
     - Guapa pallabra, ¿eh?. Tien raigaños árabes. Venía ser una contorna na que dellos pueblos vivíen embaxo la xurisdición d'un merín o noble que moraba davezu nun castiellu onde s'abellugaba la vecindá por mor de les razies mores. Equí al llau tenemos tamién l'alfoz de Bricia. 
    - ¿Nun hai otru Santa Gadea en Burgos?
    - Sí, Santa Gadea del Cid; pero eso ta más al sur, nos rimeros de la célebre Sierra de Pancorbo. ¿Conocéis Miranda del Ebro?
    - Pasu ente pasu... Conoceremos Burgos de norte a Sur. Agora vamos conocer Gadea. 
     - Bueno, pos alcontraréis algo de tipu montañes, la ilesia, l'ayuntamientu, un palaciu...
     - Vamos echar una güeyada y si éso depués preguntámoste...Ta lluéu. 

 Gadea, capital de Santa Gadea d'Alfoz : Un pueblu castellanu

         Asina que vamos dar un paséu pela capital del alfoz - qu'abarca tamién Higón y Quintanilla - y en so tiempu tevo embaxo'l señoríu de la Merindá de los marqueses d'Aguilar a los que'l pueblu llegó a pagar : alcabales, hermandaes y martiniegues. Enantes foron realengu del infante don Pedro, fíu de Sancho IV, y más tarde de don Tello, fíu d'estranxis d'Alfonso XI. Tamién perteneció al Bastón de Laredo, una de les cuatro villes de la Hermandá de la Costa (con Santander, San Vicente y Castro-Urdiales) a les qu'Alfonso VIII concedió'l Privilexu Vieyu en 1200.  

Ilesia parroquial de San Andrés

     Como en casi tolos pueblinos castellanos lo más bultable arquiteutónicamente ye la ilesia parroquial - nel Barriu d'Arriba - embaxo l'advocación del apóstol San Andrés y non a Santa Águeda, como se pudiera maxinar, masque ésta tenga dedicada una ermitina. Esta ilesiona tien pasao munches llaceries a lo llargo la so esistencia. Delante la ilesia hai una Estela Medieval en forma de disco - conocida por La Palma que caltién ¿una cruz?.
La Patrona de Gadea ye Santa Gadea (Águeda), una santa italiana que foi martirizada en Catania por orde del procónsul Quintilinus al refugar los sos pettites carnales (¡gochu!). Ye la patrona de Sicilia dende que - per aciu la so intervención - detúvose l'avance del volcán Etna. 

     L'edificiu consistorial, en piedra de sillería, data de 1707 y ta ornáu por un reló enriba'l balcón. Cuenta una lleenda que nesi solar hebo abenayá un monesteriu de monxes beneditines. Igual un día Santa Àgueda nos afita la información...

La Casona los Bustamante.

     Esti alfoz, célebre poles sos agües sulfuroses y con tierres de segunda calidá, foi ricu por embargo - tamos mirando'l Madoz - na producción de patates, centenu, trigu y llegumes. Tenía ganáu vacunu, caballar y llanar asina como caza abondante, por mor del Monte Hih.edo, en: llebres, perdices, palombes, xabalinos ya osos.     
     Restolando pel pueblu entá nos quedaba por descubrir una casona palaciu nel Barriu d'Abaxo: La torre o Casona los Bustamente. Destaca sobre la sillería una vieira de pelegrín, un ventanal custodiáu por columnes ya unos turruxones cilíndricos. 
     

  Y falando de blasones namás queda rematar esta entrada col  Blasón de Santa Gadea.
Al primer vistazu yá podemos apreciar los símbolos distintivos del Alfoz: La Santa, un castiellu y los medios d'esistencia.

         [ L'escudu de Santa Gadea ta partíu ( d'arriba a baxo) y mediu cortáu (diestra-siniestra)pos, anque paez lo contrario, namás ta cortáu'l mediu la diestra; el de siniestra ye enterizu masque paezca cortáu al terciu. 
Nel primer cuartel, sobro campu azur, el bustu de Santa Gadea con cercu d'oru y la palma'l martiriu. 
Nel segundu cuartel, sobro campu de gules, castiellu (Castiella) n'oru:  donxonáu  (la torre central más alta que les otres), aclaráu n'azur (puerta y ventanos),mazonáu de sable (amosando les llinies de sillería) y sobromontáu por tres estrelles d'oru d'ocho puntes. 
Nel tercer cuartel,nun campu d'oru, tarmudu carbayu en sinople afrutáu d'abellotes d'oru,col troncu de sable y vaca pasante; too ello sobro terraza sinople. 
Al timbre corona real zarrada].

                    *****************************************

AGASAYOS:
1. A dellos Blog's: <Crónicas de las Merindades > . <Las 7 Merindades>. <bibliotecagonzalodeberrceo.com>. <elcondadodecastilla>, <las merindades.com>, <minube.com> y dalgún otru del que nun soi facer alcordanza. 

2. La <Wikipedia>  una compañera permanente a la que ye imposible agradece-y tanto. 

                 < A la cata de "beak heads" n'Asturies: Les "cabeces rostraes" > 

                        < CABECES DE PICU : BEAK HEADS >

Cabeces de Picu  o  Beak Heads, abrazanzo l'arquivolta .
Sanestébanu d'Aramil (Siero)

             El día que Camín de Niria , percorriendo'l  <Camín de Cuadonga> , algamó a la "Capiya Sistina" del románicu asturianu, San Xuan d'Amandi (Villaviciosa), llevó una sospresa... bueno ... quedó ablucáu énte aquella maraviella: la portada, l'adriu, la nave, l'arcu de trunfu, ¡el presbiteriu!....  Pero tres pasar un bon ratu plasmaos faciendo semeyes reparamos nuna de les arquivoltes de la portada principal  que nos llamó poderoso l'atención magar yá sintiéremos falar d'ello: la que lleva unes "cabeces de picu" abrazando'l bocel (moldura) de la segunda arquivolta. 

"Cabeces de Picu " o  
Beak Heads ( Sanestébanu d'Aramil) 

       Les <Cabeces de picu> o <Beak heads> , tamién comocíes como <Cabeces rostraes*>, son unes escultures mui orixinales, endémiques del Arte Románicu Atlánticu Européu, que suelen alcontrase nes arquivoltes de les portaes y amuesen una cabeza – d’ave, davezu - col picu mui allargáu qu’enferrona'l bocel de l’arquivolta; seique tamién puen rebilicoquiar - decorar - cualisquier tipu de moldures o arcos, bien de trunfu o d’otra triba como pa estremar les naves; y hasta les pues alcontrar en ventanes, ménsules o capiteles. Nós vimos toles ilesies (cuasi) asturianes afeutaes, mesmamente la de S. Vicente la Barquera, y siempres taben orniando les arquivoltes.    Dalgunos autores piensen qu’esti apartáu debía venceyar tamién les cabeces que presenten cares d’otros animales, inclusive antropomorfes, que col focicu allargáu, asemeyando un páxaru, arrodíen les arquivoltes; ye dicir les "cabeces rostraes". 

*Rostum-i: Del llatín “picu d’ave”. Rostrado/a: En castellán quier dicir que remata en punta asemeyando’l picu d'un ave o l' espolón d’una nave (¿vikinga, por exemplu?; esto ye bien interesante)

        Estes tardíes (XIII) cabeces decoratives romániques – Escuela de Villlaviciosa - podemos alcontrales n’Asturies o en Cantabria y son les que vos queremos amosar 

                    pos les otres tán mui lloñe 

                    pa dos vieyos visitar. 

                    Hai que conformar .....

. San Xuan d’Amandi (Villaviciosa). Onde se tien creao l’aniciadora “Escuela de Maliayo”.

. Santa María de Llugás (Villaviciosa).

. Sanestébanu d’Aramil (Siero).

. Sanestébanu de Ciaño (Llangréu).

. San Xuan Bautista de Mieres (anguño asitiada en finca privada de Porceyo-Xixón), pos les otres tán mui lloñe

. Santa María d’Arbás (Payares).

. Colexata Sta. M.ª de los Ánxeles (S. Vicente la Barquera - Cantabria).

        Ya una novedá que decubrimos va poco, por casualidá. Nel Muséu del Monesteriu de Corias hai una “cabeza de picu”, suelta, pero que formaba parte de daqué, esperando que daquién nos puea esplicar qué pudo haber ellí. (¡Falta muncho por picar!) . 

        

Capitel coles "Cabeces de picu"
Valliniello (Asturgeografic)

        Acabamos d'enteranos, per aciu d'Asturgeografic, que na ilesia de San Pedro, en Valliniello (Avilés), tamién hai un capitel qu'amuesa dos cabeces de picu mordiendo'l ráu a dos felinos. Ye bien poco lo qu'esta ilesia caltién del románicu por mor de la reforma sufría tres la Guerra Civil del 36. 

        Tamién les hai n’ Oporto (Portugal) y si siguimos la costa pel Cantábricu dica’l norte podemos topales – siempres averaes a la costa - en :

Mapa de coincidencies:
Les "Beak heads" coles escursiones normandes.
(Dª Etelvina Fernández: "Las cabezas rostradas")

. Francia : Normandía : Bayeux – Guéron – Luc – Mouen – Rexón de Calvados

                Pérignac-Saintogne (Charante-Maritime), Auvillars (Caen).

                Bretaña: Caltriaron bien poco y tán escaecies, pero habeles, húboles.

. Gran Bretaña: Munches y de formes estremaes.

        Condaos de York ya Oxford (S. Michel de Barford - Sta. Ebbe) o en

        Surrey, Kent y Essex, Iffley.

. Irlanda: Suelen ser una imitación de la Cruz de Cong* (cabeza con picu):

        - Ilesies de Clonmacnoise, Inchagoill, Inis Cealtra, Lismone, Clonfert

          Cashel, Monesteriu de Dysert o D’ea o la catedral de Limerik o en Trikencote.

. Portugal: Ilesia de Travança (Oporto).

            Les “cabeces rostraes” guañaron tamién nel Mediterráneu mercé a que nel sieglu XI asitió en Sicilia una colonia normanda que controlaba’l pasu de les mercancies ente l’oriente ya occidente d’esti <Mare Nostrum>:

Cuz de Cong (Wp)

   - Catedrales de Monópoli y Comesano (Bari) , catedral d’Anglona (Lucrania) , Santa M.ª di Perno o Aceranza (Basilicata) .

        Hasta’l Peloponeso llegaron les “cabeces rostraes : Patras (Acaya).

* Cruz de Cong:Una cruz de primeros del XII qu’encargó’l Rei d’Irlanda (Connacht) pa la catedral de Tuam, Condáu de Galway, que más tarde pasó a l’Abadia de Cong (Condáu de Mayo). Lleva nel centru un relicariu onde s’amosaba un trocín de la Vera Cruz y ún de los brazos lluz una “cabeza de picu” invertía.

- ¿Cómo podemos desplicar esta situación, esti afayu tan nidiamente asitiáu?

        Porque conocemos por dellos autores qu’a finales del Medievu hebo un intercambiu pergrande ente los paises del Atlánticu Norte: Costa de Portugal, norte d’España (Asturies y Cantabria), Normandía, Irlanda y Gran Bretaña. Esti intercambiu nun foi solo comercial seique tamién cultural mercé a los pelegrinos xacobeos, d’ehí que tamién se tresmitieren les téuniques ya ornamientos del arte románicu, ente ellos les “cabeces de picu”, los zig-zas, etc.

Abadía de Reading XII (Wp)
(Enrique I d'Inglaterra)

            . L’orixe d’estos “picos d’ave” pue alcontrase n’Abadía de Reading (Norwich) y el so misteriosu significáu pue tar rellacionáu coles almes de los difuntos qu’en numberoses cultures busquen el “más p’allá” tresportaes por páxaros. El primeru qu’emplegó esti términu “beak heads” foi sir Alam Clapham, eruditu autodidacta medieval, miembru de la Brithis Academy.

            . Hai quien camienta que l’orixe hai que buscaslu n’Oriente, nel mundu celta, nel Arte vikingu y nes cultures prerromániques del norte d’Europa, como los mitos y lleendes irlandedes y daneses o tamién el vezu de la caza de cabeces delles veces sapozaes. Estes costumes caltuviéronse ente los pueblos celtes hasta’l Medievu. Pa Robert Ruprich les “cabeces rostraes” son el frutu de la influyencia vikinga que dende’l sieglu VIII baltó les costes d’Irlanda, Inglaterra, Francia y España . Como formes plástiques nun hai qu’escaecer los mascarones de proa de les naves vikingues. Si comparamos dos mapes : el de les “cabeces rostraes” y el de les <campañes escandinaves> alcontraremos una semeyanza bien bultable.

Drakkar vikingu
(quevuelenaltolosdatos.com)

            Pos gracies a los vikingos nós tamos faciendo unes rutes de lo más afayaizo buscando per Asturies les “beaks heads”. Yá barruntaba qu’estos normandos nun podíen ser tan malos pos tenía yo un tíu fuerte talo un vikingu, orixinariu de Llanes, col pelo roxo, los güeyos azules y la cara colorá que yera la persona más buena que te pueas maxinar; cuido que nun conocía la maldá,  pero yera vikingu.

                                         ************************************

        Y  agora vamos facer un pequeñu repasu de les "cabeces de picu" que visitamos n'Asturies y del entornu nel que s'alcuentren:

. [ 1] San Xuan d'Amandi:

       Esto foi un día "Camín de Cuadonga" . Yá sabéis que nós vamos percorriendo los caminos d'Asturies pasu ente pasu, por estayes curties, porque el coral nun ta pa munchos trotes . Entós nun sabíemos que nos diben rectificar el motor con trés by pass nun tardando muncho, y eso porque la Santina agabitó lo suyo, otramiente igual nun tábemos equí; pero ella bien sabe lo qu'entá nos queda potr cuntavos. 

                                    < San Xuan d'Amandi> 

Abducíos pola "Puerta'l Cielu"
 nun mos queda otra qu'entrar nesta nave espacial.
¿Vienes con nós?

     La ilesia de San Xuan d'Amandi, embaxo l'advocación de San Xuan Bautista, ye un santuariu católicu, faltaría, asitiáu nel caseríu d'Algara, na parroquia maliaya d'Amandi (Villaviciosa). Esta ilesina rural ye un finxu del románicu asturianu, la nuesa capiella sistina, camienten fontes bien informaes... 
          San Xuan ye un templu románicu tardíu (primer cuartu del XIII) con delles incrustaciones gótiques. Claro que.... Hai nicios que yá pudiere esistir a finales del X (990) por una inscripción grabada nuna llábana funeraria. Y por si fuere poco'l Padre Carbayu (XVII) tien rexistráu a San Xuan de Maliyo como conventu benitu (beneditín) en tiempos d'Ordoño II (850-865). Ye fácile pensar que, tres la invasión árabe (711), munchos cristianos abellugaren n'Asturies y bien pudieron repoblar la Villa y el so entornu onde fabricaren el conventu; dende lluéu'l cuetu nun pue ser más afayaizu: eleváu, soleyeru y con terrenos bien granibles al rodiu la Ría; pa quedar. ¿Y si'l solanu procedía d'un cultu más antiguu?.... En Moriyón había un castru.... Bueno, en 1270 yá esistía dafechu esta ilesia al ser nomada na Carta Puebla de Maliayo. Nós xubimos un día pero taba sapozada ¡Madiós!.

<La Puerta'l Cielu>

        Dizse d'él que ye un templu mui completu porque caltién cuasi que toles carauterístiques del arte románicu. 
       La sóleda planta < ye una nave paralelograma de 51 pies de llargor por  25 1/2 de llalitú y 35 p. d'altor hasta la bóveda > (14,178 m x 6.95 m x 9,63 m)  que remata nun ábside semicircular cubiertu con bóveda de fornu.
       La rica cabecera y la cenciella nave comuniquen per aciu d'un arcu toral de triple arquivolta de mediu puntu que sofita sobro columnes dobles de fuste llargu y capiteles decoraos. La cenciella nave contrasta cola artística arquería de la cabecera, sofitada sobre dos fileres de columnes coronaes por capiteles historiaos, lo más  in del románicu astur. 

      La entrada principal, que da al oeste, ye una portada abocinada con cuatro arquivoltes oxivales (goticismu) y  concéntriques, tres d'elles sofitaes en columnes redondes y la cuarta, decorada en ziszás xeométricos, sobro dambes xambes. Entrar per ella ye como entrar pela Puerta del cielu.  La portada sur, con arquivoltes de mediu puntu, ye más cenciella. 
     Sí, desque acolumbres la ilesia de la carretera xeneral hasta que llegues al ábside tou te va dir invitando a la cata'l puntu de fuga de la perspeutiva: l'ara. L'amplia avenida empiedrada va aocinando  hasta algamar n'arredondiada escalinata del adríu que tamién s'aboquiella. Entós ye cuando quedes delantre la portada que t'abduz, abocinada y misteriosa, al traviés de los sos arcos y columnes al interior del templu. 

Los anxelinos analayando pela 
<La cabecera del cielu>.
Una estampa celestial embaxo l'arcu toral.
¡Una entrada trunfal!

        Dende'l fondu la nave, embaxol coru, acolumbres l'altar allá nel fondu talo si fuere la esfera del mundu (bóveda de fornu=1/4 d'esfera), ¿o sedrá asina'l cielu?.   

             Percorremos a troches moches la nave dexando nos lladrales santos, vírxenes bancos y confesionarios  hasta quedar baxo'l paliu del arcu toral. ¡Qué maravía pedresa!. ¡Qué decoración!. Agora entendemos lo de la "puerta'l cielu", y lo de "capiella sistina".

     [Amás güei tamos de suerte. Al entrar un garapiellu rapacinos tán tomando la Primera Comunión. Nun ficieren qu'aselar les lletaníes del cérigu cuando una procesión d'anxelinos apruz pela cabecera'l cielu al tiempu que'l coru y los parroquianos entamen un melgueru cantar. Una algarabía celestial percorre'l presbiteriu y la nave mientres les campanes tañen con fuercia l'aleluya. Al aportar la comitiva al adriu la multitú ruempe l'encantu con un aplausu estreldosu. Esto sí que ye una entrada trunfal]

<Cabeces de picu>
na segunda arquivolta.

     Cubriendo l'interior del eleváu ábside semicircular una doble columnata adosada que remata nel pisu superior por arcos de mediu puntu sorprendidos por unos llamativos espacios cóncavos que cubren la parte ciega; en realidá l'ábside ye ¡un garapiellu d'absidiolos!. La decoración historiada de los numberosos capiteles, talo que na portada, va esplicanos onde tamos; na escuela del cielu pa los humildes maliayos: Dios coles Tables de la LLei, el martiriu de Sanestébanu, la Presentación nel templu, Daniel nel fuexu los lliones, el Sacrificiu d'Isaac o Adán y Eva nel paradisu, nidio. 

<Capiteles historiaos>
Escuela del Pueblu.
(Semeya: Arteguías)

     El zócalu corríu de la columnata superior remata con un arcu semicircular, paralelu al trunfal y faciendo ziszás, que como'l restu la bóveda dan-y al conxuntu la sensación de buiciu permanente; ¿barruntaría'l cuciu arquiteutu medieval que  l'universu ta en perpetuu movimientu?. 
    Y como del cielu se trata podemos atalantalu  per unes estrenches saeteres -como non, abocinaes - qu'illuminen esti requexu del firmamentu. 
       Seique la carauterística más bultable d'esti edificiu ye la so decoración pedresa: nes portaes, nos  capiteles, nos canecinos o nel arcu de trunfu con representaciones sagraes o profanes, bien vexetales o en zizás, antropomorfes o zoomorfes. D'estes últimes destaquen unes "cabeces de picu" -paxarones perraros de picu llargu que paecen morder les arquivoltes de la portada - que namás se dan nel románicu inglés, na Normandía bretona y n'Asturies. Asemeyen enforma a los mascarones de proba de les naves wikingues; igual lo copiamos d'ellos darréu se tresformaren en candes mercaderes. Sía como fuere la decoración de San Xuan d'Amandi ye una fiesta: mozos puxando al "baltu", guerreros peleando a caballu, escenes de caza, moces tocando'l panderu ya otros instrumentos musicales... Namás-yos falta vender papeletes pa la xata. 

La Rectoral frente al Adriu.

       Esta ilesia tien una sacristía nel sur ya un adríu semicircular y porticáu, con techume de madera sofitada en columnes toscanes, ocupando les cares norte, sur y oeste. Ye una pasada, esti adríu; paez un platillu volante. L'adriu foi amestáu tiempu depués; la parte que cubre la entrada principal nel oeste ye del XVII y la del sur del XVIII. 
    Nun podía faltar el típicu reló de sol mirando al sur. El tiempu ye daqué importante, inclusive n'otres dómines. Frente l'imafronte la ilesia una casina corredor bien cucia sembla ser la Casa rectoral; tán bien curiaos los cancerberos del cielu. 
        Magar que San Xuan d'Amandi tuviere un poco clisada pol cercanu Conventín los maliayos fueron siempres mui conscientes de lo que teníen: una ayalga única del románicu. Poro nel s. XVIII cuando se decataren que la cabecera, "la puerta del cielu", taba en peligru d'esbarrumbe punxéronse manes a la obra y, tres desmontala dafechu, tornaron a reconstruyila "piedra a pìedra". Cuando la Guerra Civil tamién fue dañada enforma (prendiéron-y fueu), menos mal qu'andaba per ellí l'Arquiteutu del cielu na tierra: l'incombustible Menéndez Pidal.
      Si depués de too nun tas convencíu camienta na posibilidá de facer el Camín de Cuadonga.... Namás la Santina podría iguar lo tuyo. 

                                                ************************

[2] Santa María de LLugás (Villaviciosa)

            ... La segunda ilesia a visitada que caltién na portada les "cabeces de picu" (beak heads) va ser Santa María de LLugás asitiada a poco más de 3 kilómetros de San Xuan d'Amandi. Como tamién se trata d'andoliar vamos dexar el coche aparcáu cerca de la Ponte d'Amandi, de base romana pero de igua medieval. Pasen per él : El <Camín de Cuadonga> y el <Camín Xacobéu>. 

- ¡Yo flipo! Agora mátate a andar...
- El Camìn pue facese de munches maneres.
- Claro, estos yá vienen de vuelta ....
(Tamos na entrada Valbucar)

          Vamos salir caminando paralelos a la carretera nacional As-255, la que va pa L' Infiestu. A mandrecha pasamos la quintana La Ferrería y a manzorga dexamos el Restaurante Amandi y el Llagar de Cortina, un emporiu comercial mui prósperu. Pasáu'l restaurante "La Canaliega" vemos a mandrecha la vega del Ríu Viacabá . Por fin acabamos esti tramu bien cafiante a falta d'una cera afayaiza. Tamos n'antoxana  d'una quintana faneguera, un portón pergrande que remeda un castiellu almenáu, pero ye namás una ilusión.
         - ¡Curiao, nun te tracamundies!.
     Tienes qu'abandonar la carretera xeneral y metete, a mamanzorga, per una caleya zahorra que va bordiando la muria la quintana. Sembla tar n'otra dómina y lo más seguro ye siguir les garrapielles del Camín de Cuadonga tou'l tiempu. La Casa la Vega si nun ye un castiellu, ye daqué bultable, pos nun ye pequeña la finca.    
      Pel camín solombriegu, nos rimeros de la viesca, date la impresión d'andar perdíu; de nun ser poles garrapielles y fleches que vas alcontrando cuando nun árbol, cuando nuna piedra, terminabes por dar la vuelta.

Antroxando pel Profundu.
Tiempos d'esperanza.

     Al terminar d' arrodiar la muria de cierre baxamos hasta'l Ríu Profundu. Caleyamos  un bon tramu per un camín de llábana sopelexada poles crecíes del ríu; tamos faciendo'l percorríu de la famosa Ruta los Molinos del Profundu (Villaviciosa). Nun ye la única per esta zona, tamién t'alcuentres cola "Ruta de Peña Cabrera",  la "Ruta de Buslaz ", la xubida a LLugás.... Nós yá tenemos fecho, va unos años, esta mesma ruta del Profundu con unos amigos. Vamos dexavos el recuerdu con una semeya.

< Romeros que vais xubiendo
a la Virxe de Llugás
rayinos de Cuadonga
sobro so frente verás >
(La Virxe de Llugás queda bien cerca d'equí;
ye otra collacia de la Santina.
<Bona falta nos fadrá un gabitu 
per esti camín avesíu> )

  

      - Oi, nin; ¿nun hai otra manera de xubir a Santa Mª de LLugás que nun sía esquiando per esta maldita llábana nidioso?.

    - Sí, pela carretera xeneral AS-255 que va pa L'Infiestu . Poco depués de pasar el cruce onde entramos nesta ruta hai un desvíu a manzorga. 

    - ¿Cuántos kilómetros son dende Amandi?

    - Cuido qu'unos trés y mediu (3,5) ...

    - ¡Madiós! ...¿Y pudiendo facer esi paseín méteste per esti llabanal nidiu a fartar?

    - Tamién ye mala suerte que lloviera y tea tan resbarioso ....  (Nun sabe lo que-y espera xubiendo pela mata que xube a LLugás...)

    - ¡Nun tienes perdón de Dios!

    - Bueno, si me perdona la Virxe de LLugás, que nun ye otro qu'una semeya  La Santina ....

        

<Pelegrinando a LLugás,
un resbarión y ...¡zas!
Menos mal que la Santina
pal renegrón ye xenial ;
dos kms andando
y la ñalga... anxelical.>

        Díbemos como podíemos sortiando les llábanes y pisando na tierra que tampocu yera de fiar cuando de sópitu:

       - ¡Zas!. Un resbarión en toa regla y la parienta de culu nun champán ... Menos mal que nun yera mui grande y ....

        - ¡Madre!...  ¿Mancástite?... ¡Vaya moyadura! Si quies tornamos y volvemos otru día . 

        - Neso taba camentando yo, en volver otru día ... Espero qu'eses "cabeces de picu" merezan la pena, otra miente van ruxite los oyíos una temporá ....

        - Yá verás que sí. Tengo equí un poco información, pa dir faciendo boca:

     - [Los primeros documentos que falen de Santa María de Llugás remonten a los tiempos de la Monarquía Asturiana. Nel añu 745 el Pontífice Zacaríes fai donación d'esta ilesia al Rei Alfonso I, el Católicu (739-757). Cuando'l monesteriu esanicia la ilesia vien a depender de S.S. de Fuentes).
         Tevo munches igües. Anguaño lo más antiguo que tien ye del XII/XIII destacando les célebres cabeces de picu que vimos en San Xuan d'Amandi y que namás se dan nel Arcu Atlánticu.
    Cerca d'equí, no que yera un castru celta de la tribu los llugones (d'ehí vien el nome de LLugás), ta la "Pica Castiellu", territoriu que perteneció a los condes medievales  Berenguela y  Piniolo.]

       Por fin vemos la lluz. Acabóse la piedrona y entramos nel asfaltu al dar una curva. Si tires a manzorga, llegues a la ilesia de Fuentes pero lo nueso ye de frente, más pegaos al ríu.
     La ilesia ta dedicada a San Salvador, y tamién a la Virxe María, por alcontrase nel Camín Xacobéu. Nel inventariu del obispu d'Uviéu Gutierre de Toledo (1385-86) apaez nomada como badía.
                                                    ....................................

A mandrecha pa LLugás.

                Nun momentu del camín vemos unos cartelos al par del Ríu: <Busllaz>, <Peña Cabrera> y <LLugás. Ponte Villaverde> . Empobinamos a mandrecha tres cruciar el rìu pela ponte de madera siguiendo'l cartelu afayadizu. Tamos a la vera del ríu, no más profundo y LLugás queda nuna llomba, na fastera del monte, asina que toca xubir per una viesca onde abonda'l castañal. Al cabu d'un ratu perdimos el camín; si lu había  perdímoslu por intentar atayar, el casu ye que envede andar ficimos escalada agarrándonos a los berizos, cotoyes, felechos, yerbes o nos caxigales de los tueros d'árboles talaos. 

        - ¡Lo que me faltaba!. - Intentaba da-y la mano a la parienta que xubía pasu ente pasu ensin gorgutar, pero notaba que'l aire podía cortase col filispiu d'una pallabra ... 

Tardamos un bon ratu n'arribar al pueblu de LLugás qu'en teoría ta a 300 m. Ye mui guapu y ta bien curiáu, con cases guapes y hasta un parque pa los guajes cerca d'una casona d'aldea. Tien bona carretera y nun ta lloñe de la Villa (6 km) lo que permite desplazase en pocu tiempu a bayura llugares de trabayu. 

Asina ve la Santina'l prestosu pueblu de LLugás.  

        La Ilesia de Santa María de LLugás ta asitiada nuna<llomba abierta y gayolera> - como diz P. Madoz -  un poco apartada del pueblu, asina que tenemos que xubir unos 300 m. Como'l día ta nuble nun podemos esfrutar de les vistes de la Ría nin del mar pero'l santuariu merez la pena. Na esplanada  hai dellos edificios amás de la ilesia: la Casa les Novenes (anguaño Rectoral), el <polvorín> , l'Altarín, la biblioteca, les antigües Escueles, el Cementeriu y <la Obra>, onde se sirven comides a romeros y pelegrinos cuando hai romería, una de les más importantes d'Asturies. Esti llugar ta escoyíu po deséu de la propia Virxe pos entamóse notru sitiu y de nueche los materiales camudaben de llugar misteriosamente. La talla qu'honramos de la mesma aprució nuna llosa cuando los propietarios taben arando pa semar. 

< El Santuariu de LLugás. 
Tres Cuadonga, el nun va más >

            L'orixe d'esti Santuariu vien de la dómina d'Alfonso I per aciu d'una donación que-y fexo'l Papa Zacaríes nel añu 745 seique nun queda documentu que lo afite. Sí lu hai de 1385 nel LLibru Becerru de la Catedral d'Uviéu que noma a LLugás como parroquia. A finales del XVI llevantóse la <Casa de les Novenes> col envís d'acoyer a les persones qu'acudíen a la novena de la Virxe y supongo qu'a los pelegrinos del Camín Xaciobéu y a los romeros de Cuadonga polo que tevo delles reformes nos sieglos venideros.

Ábside poligonal,
lo nunca visto 
nel románicu rexonal.

    Nel sieglu XVII llevárense acabu importantes obres: El retablu mayor, el de S. Tororibio, la imaxe del santísimu Cristu, l'ampliación de la ilesia, la nueva sacristía y les capielles los lladrales asina como la bóveda de crucería cuatripartita (1690). 

    El XVIII foi un sieglu de munches igües no que yá taba fecho: retablos, imáxenes, altares, peanes, púlpitos, portalones y tamién se fundare la <Cofradía de Nuuestra Señora del Rosariu>. 

PORTADA   SUR . Dos arquivoltes:
"Beak heads" y "Rollos zamoranos"

  

  Nel XIX reformóse la espadaña del XVIII y púnxose una vidriera. 

        De la ilesia primixenia nada nun se caltién; lo primero que tenemos ye del románicu del XIII. L'orixinal constaba d'una nave en cruz llatina con un ábside cuasi circular que foi ampliada nel XVII por un cruceru con arcu de trunfu y la sacristía al N.  Queden del románicu dos ayalgues: les portaes. Una , ye la entrada principal por W. , con tres arquivoltes semicirculares y decoración xeométrica. Otra pol sur  - dos arquivoltes - que ye la que nos trai equí por mor de les "beak heads" (cabeces de picu) qu'engalanen la primer arquivolta de rollos zamoranos. Asemeya enforma a la Portada Sur de Sanestébanu d'Aramil, yá lo verás.

        Pola estructura la ilesia y la perfeición de los sillares ye fácil suponer qu'esta ilesia ya otres, con "cabeces de picu" la mayoría, seyan de la mesma fábrica de Villaviciosa : San Xuan d'Amandi, Sanestébanu d'Aramil, Sanestébanu de Ciañu, Santa Mª de Narzana (non c.p.) y Santolaya d'Uxu ( non c.p.) . 

  [3 ] SANESTÉBANU de CIAÑU  

Ilesia neorománico-historicista de Ciañu 
(Semeya: Jmir)

        A la parroquia Ciañu (conceyu de LLangréu) - allugada a unos 40 km de casa- fuimos a tiru fixu ensin camentar notra cosa que nu fuere visitar les "cabeces de picu" na ilesia románica de Ciañu. Vamos, que nun fiximos ruta complementaria talo  n'otres ocasiones. En Mareo (Xixón) pillamos la Minera y tres torcer dica LLangréu salimos en Sama - podíemos facelo xusto na salida de Ciañu - pa remembrar tiempos mozos, yá bien pasaos. Aparcamos más bien cerca  la capiella y dimos una vueltuca pel pueblu enantes d'averanos a l'ayalga adebecida. Llamónos l'atención l'escasu trasiegu de la villa, de xuru facíemos alcordanza inconsciente de la dómina'l carbón; y pensar que nel sieglu XVI yera'l núcleu más granible de tola comarca Llangréu....

      

Portada principal coles 
"Cabeces de picu"
(Semeya:asturnatura)

     

   Sanestébanu de Ciañu ye una ilesia de fábrica románica - finales del XII  ó primeros del XIII - magar que d'aquella dómina namás caltién les dos portaes: oeste, o principal, y sur. Tevo delles tresformaciones a la llargo de los sieglos y nos entamos del  XX algamó unes igües neorrománico-historicistes pa trayer n'alcordanza lo que fuere n'orixe. 

    Presenta planta de cruz llatina con capielles panteón adosaes a les muries de la nave y al deambulatoriu. Nel imafronte amuesa un adriu zarráu sacante pol pórticu de la entrada principal (oeste) que sofita una torre campanariu mui vistosa rematada con una escultura del Sagráu Corazón. 

     

Cabeces de picu o Beak heads (Ciañu)

   

            La portada principal ye lo más prestoso siendo la xida la nuesa visita. Un arcu de mediu puntu con tres arquivoltes decoraes: una en zis-zás, otra con boceles de boles y la mediana con "beak heads" o cabeces de picu mordiendo'l boquetón y sofitaes por seis columnes de fuste llisu y capiteles decoraos. Ún d'ellos, como nun podía ser d'otra miente, representa'l martiriu del santu patrón: Sanestébanu, llapidáu polos xudíos*.  A ver esto vinimos nós equí.    Esta ayalga ta abellugada por un telladín (texaroz) o guardapolvu , qu'entá la fai más guapa,  mercé a los sos decoraos zoo-antropomórficos.  

La llapidación del mártir
(Semeya: fotoviaje.com)

        * El protomártir Sanestébanu yera un diáconu de la primixenia Ilesia de Xerusalén , encargáu polos Apóstoles pa repartir comida ente los probes.Terminó llapidáu ( a morrillazos) polos xudíos - depués quéxense - venida del Señor, fechu Dios, y a los qu'Estébanu aplanaba con argumentos que'l Sanedrín nun yera a retrucar. La casualidá quexo qu'esti fechu convirtiera al soldáu romanu Tarso en San Pablo, colo qu'esto vieno a sinificar para Ilesia Católica. Ensin Pablo de Tarso'l mensax de Xesús tuviere sío otra cosa.

            La portada sur presenta un arcu selemente apuntáu con dos arquivoltes - una d'ella polillobulada -  sofitaes en dos columnines de capiteles decoraos con páxaros y serenes tando'l guardapolvu y la imposta tamién axedreazos.  Dambes portaes tan bien trabayaes asemeyen enforma a la Escuela Maliayesa. 

        L'interior tien una bóveda de fornu decorada y dellos retablos que faen alcordanza a Santa Bárbara (Patrona los mineros), o a Cristu crucificáu.

        Cuando terminamos de fer les semeyes fuimos tomar el vermú a un bar asitiáu cerca la ilesia. Charrando con sóledu dueñu quexaba amargo pola poco clientela que-y quedare darréu l'exodu a Uviéu y sobremanera  a Xixón:

  - ¿Nun podíen gastar los xubilaos la paga en pueblu? .... ¿Por qué tienen toos que colar si la playa queda a tiru piedra pela Minera? ... 

        Ye la murnia realidá, les Cuenques tán quedando valeres porque nun hai trabayu de ná. 

Torre de Quintana (Ciañu Santana)
(Semeya: Castillos del Olvido)

        Como  nun yera plan colar de Ciañu daquella manera averámonos a ver un turruxón circular en mampostería que vimos na contorna. Vese bien iguáu y anguaño ta dedicaú a Sede de l'Asociación de LLangreanos pel mundu.       

      El turruxón foi una torre defensiva circular (9x12,75) de tres pisos con 4 saeteres y desván. Tanto esti como la cubierta foron añedíos en 1540 por encomienda de Prior Solís que tamién fexo construyir el pasadizu que comunica'l primer pisu del turruxón cola casona-palaciu adxunta asina como los aximeces. La so primixenia construición data del sieglu XIV darréu la Carta Puebla de LLangréu de 1338 qu'esti conceyu arrebató al señoríu de la Mitra Ovetense (antigua concesión d'Alfonso VI na so visita de 1075), seique estos nun diben mal pagaos pos cobraben al municipiu 6000 maravedinos al añu, en dos veces, eso sí (pa que Dios los perdonase, supongo).   Tanto la casa como'l turruxón - quiciabes dalgo más - debíen tar dientro d'una muralla porque hasta mediaos del XX entá s'amosaben dellos restos onde la guajería lo pasaba como Dios. 

         El turruxón taba abiertu y aprovechamos pa entrugar por coses dignes de visitar en Ciañu; dixéronos dalgunes delles, talo: 

Casa de los Alberti:
Oficina Llingua Asturiana y F. Nuberu

    . La ilesia de la Virxe del Carbayu, patrona de la parroquia (3 km de la Torre por LA-6 y el Campón)

    . La casa de la Buelga (A 3' de la Torre. Nel Campón)

    . Casa de los Alberti o Centru de LLingua Asturiana ya Esposición F. Nuberu (Cerca de La Buelna).

    . Ecomuséu Mineru del Valle de Samuño: Tren Mineru y Pozu San LLuis.  (1,6 km de la Torre).

    . MUMI: Muséu Minería ya Industria (A medies ente Ciañu y L'Entregu).

    . Palaciu San Féliz: Asilu-LLar (Cerca Centru LLingua Asturiana. Cai Nozaleda). 

     . El Pozu Maria Luisa tamién queda per equí.... 

            Como veis tenemos munchos deberes por facer, pero esto va ser en cuantes acabe esta maldita pandemia. Les semeyes qu'apòrtamos de Ciañu nun son orixinales, teníemosles feches de la ilesia y turruxón pero'l llápiz  estrozó ¡!. Repetiremos. 

                                                   .....................................

[ 4] SANESTÉBANU  D'ARAMIL (Siero)

Palaciu d'Aramil  (Siero), una ayalga a puntu d'esbarrumbar. 

        La Ilesia de Sanestébanu d'Aramil ta asitiada nel conceyu Siero, a unos 5 km de la la capital. P'algamar dende Santurio (Xixón) teníemos delles opciones pero tomamos la de la tranquilidá, la carretera vieya de Xixón-Pola Siero (As-248) llarada de curves y con un pisu regular ( quiero dicir irregular) pos presenta dellos socavones, fundimientos parciales, que cualquier día terminen mal. Pasamos La Collada, Muncó y el Llugarín y al arribar a la ciudá disviamos camín d' El Remediu-Nava pela N-634 tres dexar atrás l'Ayuntamientu, el Corte Inglés, El Patronatu Deportivu, el Mercáu del ganáu, el Karting,  la Piscina Municipal y la Escuela d'Aramil (CRA de Viella).  

        . Aramil ye una parroquia de Sieru formada por ocho pequeñes llocalidaes repartíes nos 1,83 km2 y qu'entre toes nun lleguen a los 350 habitantes. (Hai qu'enseñar más la pata, poles@s). 

    Aparcamos cerca del Bar y yá tiramos andando a mandrecha - tres escaecer la xeneral -  per una carreterina bien asfalcada hasta la célebre Ilesia románica. Hai que travesar el pueblu que ye daqué candial y bucólico por mor de l'arbolea, el solín  de la tarde y el ganao pastiando na redolada del Palaciu d'Aramil, que ta viniéndose abaxo pasu ente pasu. ¡Qué pena!. 

Palaciu d'Aramil o Vixil de Quiñones.

        El Palaciu d'Aramil  o de los Vixil de Quiñones data de finales del XVII . De mano, lo que más te llamama l'atención ye'l turruxón del noroeste - símbolu del poder familiar - qu'amuesa les armes de la familia más poderosa de Siero  tiempu abondo. Por desgracia ta esbarrumbando , al aviesu que'l so tocayu: "Torre de Vixil, na Secada" .  Camiéntase qu'esti edificiu de forma rectangular y dos pisos partió d'una antigua capiella, d'ehí tien de venir la so cabecera absidal. La cara sur ye la más guapa con dos portalones - ¿un portalón xemináu? - ornaos con arcos de mediu puntu pelos que s'accede al patiu interior arrodiáu por un corredor de madera o brandal que va sofitáu sobro ocho columnes. El palaciu ya una bona antoxana tán abellugaos por una muralla de mampostería, sacante nes esquines que lleva sillarexu. 

        El nome de Vixil pue venir de "vixilar" dao qu'hebo un tiempu en qu'un ancestru d'esta familia tenía la misión de vixilar, curiar, abellugar o ptrotexer la Rei que como recompensa dio-y el castiellu como arma pal escudu. 

Les armes de los Vixil de Quiñones

  

            Les armes de los Vigil de Quiñones son un escudu cuarteáu: 

En gules el primer y cuartu cuadrantes con un castiellu de piedra n'oru procedente de los Vixil. 

Quince veros el segundu y el terceru - mitá sinople ya otra mitá n'oru - repartíos en tres órdenes que cuerrespuende a los Quiñones. 

El castiellu ye un símbolu d'autoridá feudal, de gobiernu y proteición. L'esmalte de gules ye la fuerza y el coraxe asina como l'amor a Dios. 

Los Vixil y los Quiñones son dos cases que xuncieron pol amor y dieron xente de muncho valir como don Diego Fdez. Vixil  casáu con Leonor Xuárez de Quiñones, padres del primer conde de Lluna.

            < Vi dos castiellos pintaos

                                                            sobro sangre varonil,

                                                            colos veros cuarteaos,

                                                            que son verde y coloraos,

                                                            del gran validor Vixil >

  

                                                        ............................................                            

Averándonos a l'ayalga d'Aramil

        Amirando de xemes en cuandu al palaciu - ¡munches semeyes-y ficimos!- fuimos averándonos a la ilesia románica de Sanestébanu.  Nun tábemos solos, había otra pareya faciendo lo mesmo magar que'estos nun buscaben  arrémente les "cabeces de picu", pámique-yos llamaben más l'atención los canecinos del ábside, que son bien variaos y amás una pasada. 

        

        Nada  nun sabemos no que cinca a fecha de la so construición pero les tardíes "cabeces de picu" tiren más bien dica'l XIII. El primer documentu que la noma data de 1204 como donación de Don Álvar Díaz y muyer al Monestriu de Valdediós. Asina que pudo ser llevantada pocos años enantes, ente 1278 y 1204 (XII-XIII).Tamién apaez rexistrada nel Llibru Becerru del obispu d'Uviéu Don Gutierre de Toledo (1385) .  Tampoco sabemos si se trataba d'una capiya desimía - esenta - o bien formaba parte d'un complexu monásticu o perteneciere a un noble palaciegu que permitiera al pueblu asistir al cultu. 

        - ¿Nun tenéis perres pa picar y averigualo, ¿eh?. - Colo qu'apurrió l'indianu Don José Martínez Canteli en 1985 iguóse la capiella y el cementeriu pero yá nun dio pa más. Gracies, Don José; si hubiere munchos como usté ....    

Sanestébanu de los Caballeros o Tabladiello
Imafronte y fachada sur (Cabeces de Picu)

        Namás echa-y una güeyada a la capiella románica d'Aramil yá te decates de la so planta rectangular d'una nave que remata nun ábside semicircular precedíu d'un tramín reutu - de fechu ye lo primero que vemos - de lo más prestoso con un texaroz - cornisa - acorropináu de canecinos de formes estremaes ya una ventana abocinada que corta y aguapia la imposta-guardapolvu que traviesa l'ábside, ¡qué orixinal!.   

      Ta asitiada l'ayalga nuna mínima llomba de la llana del ampliu valle ya orientada de según los cánones de la más pura ortodosia eclesial: el presbiteriu absidial al este, enfrente la portada principal (W), la sobriedá al norte por mor de los vientos  y al sur, al solín, la portada que nos trai equí: la que caltién les Cabeces de picu n'arquivolta central. Bien fecho; sí, señor. 

Portada Principal (W)

     

   . La Portada principal ta asitiada al oeste y nel sieglu XIX taba abellugada por un adriu zarráu que remataba - talo agora - por una espadaña de dos güeyos. 

Presenta esti "pórticu de la gloria" una traza románica con arcu de mediu puntu conformáu por dos arquivoltes sofitaes en dos pares de columnes con basa floral, fuste llisu y capiteles decoraos: la primer arquivolta con doveles y la segunda con dientes de sierra, dambes abellugaes por un guardapolvu de mediu puntu axedrezáu. 

Portada Sur: "Beak heads"

           La Puerta de la Fachada Sur ye más pequeña que la principal y, dicen, que menos llamatible pos namás presenta dos arquivoltes con guardapolvu pero ensin columnes nin capiteles pa sofitar. Ye verdá, namás unes columnes de sillar pero ... ¿qué tienen qu'envidiar les dos orixinalísimes arquivoles, una con rollos zamoranos d'orixen árabe y la otra coles célebres cabeces de picu d'influyencia normanda?.... ¿Nun demuestra esto que somos internaciones?.... Les "beaks heads" namás se dan nel Arcu Atlánticu y los zarraos "rollos zamoranos" (emplegaos polos cristianos zamoranos por primer vez n'España) tienen semeya na Mezquita de Córdoba y .... yá veníen d'Oriente, talo los Reis Magos. 

Ventana del ábside
Canecinos del texaroz

         L'ábside semicircular ye quiciabes lo más llamatible pal públicu en xeneral por mor de la so artística ventana abocinada, la orniada imposta que la crucia y polos canecinos qu'engalanen el texaroz... Ye verdá qu'asemeya a otros como Narzana, Villamayor, Villanueva, Valdebárcena o Sograndio pero la ventana central d'Aramil con dos columnes nos lladrales, rematada en mediu puntu y abellugada por una arquivolta-guardapovu qu'enferrona  la mitá d'un dodecágonu  estrelláu nun tien comparanza con nada. 

        Por si fuere pocu la cubierta cónica presenta un texaroz con bayura de canecinos esculpíos: un monxu lleendo, una figura de muyer, una pareya (¿Adán y Eva?),  una baillarina, un paisanu con una pipa, un gatu, dos sierpes enrollaes, un osu, dos cuélebres, dientes de sierra, boles, rollos, zig-zás .... ¿Vaya coleición! ¿Hai quien dea más? .... Tres la Guerra Civil Magín Berenguer fexo una bona obra de restauración nesta ilesia románica, argullu de Siero. 

                                                    ......................................

[5] COLEXATA  Sta. MARÍA de los ÁNXELES (San Vicente la Barquera)

San Vicente de la barquera

        Yá andábemos a la cata de "Beah heads" (Cabeces de picu) cuando nel branu del 18 (2018) fuimos a visitar el Clavih.o, cuna del nacimientu del mitu de Santiago como Patrón d'España. A la vuelta decidimos parar en San Vicente  la Barquera y xubir hasta la Colexata, asitiada nel Cascu Vieyu la ciudá pa tomar unes semeyes de les célebres "Cabeces de Picu" qu'alcontramos con más facilidá na nuesa rexón, casi siempres averaes a la costa maliaya: Amandi, Llugás, .... Otres, un pelín al interior: Siero, Ciaño, Arbas,... pero toes rellacionaes al paecer cola Escuela Maliaya  de Villaviciosa.  San Viecente tamién ta na costa y bien rellacionada col reinu astur. 

"Güeyu Guareña",
na Merindá de Sotoscueva (Burgos).

        Llegamos pela tarde y yá tuviéremos comío nes Merindades, tres visitar el Conxuntu Kársticu de  Güeyu de Guareña. Tiramos dica'l cruce de Soncillo y llueu pela N-623 hasta Torrelavega. Equí yá garramos la autovía A-8 hasta la redolada de San Vicente. Aparcamos al llau del Puertu tres cruciar el Brazu Mayor de la Ría pela ponte la Barquera y yá andando fuimos ascendiendo camín de Ilesia de Nuestra Señora onde s'alcuentren les "cabeces de picu".

             El paséu pedresu peles cais empinaes del cascu vieyu ye prestosu a fartar, y hai momentos que sembles tar notra dómina y a min tráeme un poco n'alcordanza'l pueblín de Salas (Asturies) al rodiu la Colexata y el palaciu del Inquisidor Valdés. Equí tenemos La Muralla y la Torre del Preboste xunto a la Puerta mesmo del Conxuntu Medieval.  

     

   

            Pasu ente pasu vamos caminando embaecíos dexando atrás El Palaciu de los Corro, actual Ayuntamientu (XVI), y el Castiellu del Rei (XIII-XV) mientres contemplamos la Ría, el filu acuáticu que foi, ye y sedrá la vida eterna de San Vicente.  

Pero como que nun quier la cosa algamamos a la Cai Alta, onde s'asitia la Ilesia de Nuestra Señora de los Ánxeles, que ye la sida que nos trexo equí por mor de les "beak heads". 

 

- Eh, quieto parao;
dir sacando la cartera 
pa pasar  S. V. la Barquera

        Pero enantes d'algamar a la cume alcontramos dellos edificios dignos de resaltar como 'l Castiellu del Rei, L'Ayuntamientu y la Torre del Preboste:

    . El Castiellu zarra la Muralla de la villa Medieval seguramente entamada pol Rei Alfonso I d'Asturies por mor de la repoblación. Tuvo varies igües nos sieglos venideros sobre manera nel XIII, la traza actual. Tien una planta d'unos (50x20) y adáutase a les falles del tarrén siendo construyíu en mampostería con sillares nos vanos ya esquines. Tien dos torres: una cuadrangular ya  otra pentagonal xuncíes por un cuerpu central.

Vamos llegando. 
L'Ayuntamientu y la Ilesia. 

 .

     

      . El Palaciu de los Corro, anguaño Casa Consistorial, ye un palaciu renacentista del XVI de disposición horizontal con una puerta abellugada por dos balcones, pilastres dóriques y columnes h.óniques. El dueñu, l'Inquisidor Antonio del Corro, tien na Ilesia una interesante tumba de mármole y alabastru. 

- Voi tartar col Preboste
a ver si me lo pon arreglao. 

        . La Torre del preboste acoplada a l'antigua muralla yera la casa del preboste, l'encargáu de cobrar los impuestos  de los qu'entraben y salíen de la ciudá. Al empar yera una torre defensiva que controlaba la Puerta la Barquera (Santander). Col tiempu foi usada de cuartón (cárcel) y anguaño ta destinada a esposiciones ya actividaes culturales. 

        Tamién arriba queden los restos del Hospital de la Conceición onde se sanaba a los pelegrinos del Camín del Norte y los que veníen del Camín Llebaniegu.

                                                                ...............................

        Y yá, por fin, damos cola ilesia onde vamos retratar les "cabeces de picu". 

Ilesia de Nuestra Señora de los Ánxeles 

             Arriba del too, na parte más vistosa del Cascu Vieyu, xunto al castiellu, damos cola Ilesía de Nuesa Señora de los Ánxeles, la que caltién les "cabeces de picu". Ye un edificiu góticu  llevantáu  a lo llargo de varios sieglos (XIII - XIV - XV y hasta'l XIX) per aciu l'empeñu de los "homes del mar"; tamién ye conocida como "la Ilesia del fueru" . Nel añu 1210 el gran Rei Alfonso VIII - el trunfador nes Naves de Tolosa (1212) - concedió-y un fueru a esta villa marinera y pa con ello entamó cola contruición d'una imponente ilesia - cual torre del homenaxe - , probable sobro les güelgues d'otra anterior, seguramente de la dómina del Rei asturianu Alfonso I, esmolecíu como andaba pola repoblación.  Arrodiada por una muralla caltriamos nella per aciu la "Puerta los Pelegrinos" o d'Asturies, nel Camín Xacobéu del Norte. Per San Vicente tamién pasa la "Ruta Lebaniega" que vien del Monesteriu de Santu Toribiu de LLébana. 

PUERTA PRINCIPAL de Sª Mª de los Ánxeles (S)

            Esta ilesia gótica - que foi cabeza del corrreximientu  de les 4 villes del Mar - de planta rectngular, consta de tres naves siendo la central un pelín mayor, y que remata con tres ábsides rectangulares. Accemos al interior per aciu de tres puertes estremaes: la meridional (sur) o principal - 6 arquivoltes abocinaes - y  la occidental (W) samblen ser romániques pero tán trabayaes con temes góticos y a vegaes un anto erótiques. Nel tímpanu lleva los escudos de la villa y del Rei. La occidental - mediu puntu - lleva l'escudu de Castiella. La tercer puerta da al norte y ye bastante simple. 

PUERTA OCCIDENTAL: 
"Beak heads" y capiteles. 

        Nel interior destaca la capiella funeraria de los Corro con una escultura en mármole del Inquisidor (1556). Una talla de Cristu, un retablu barrocu y el Retablu Mayor onde alcontramos la imaxen de la Virxe de los Ánxeles (XV). 

    ¿Ónde tán les "cabeces de picu?... La Puerta occidental (w) tien 4 arquivoltes de mediu puntu con guardapolvu. Los "beak heads" tán abrazando'l  bocel de la tercer arquivolta.

ESTIMANCES:

 PUERTA OCCIDENTAL 
Les "cabeces de picu" abrazando'l bocel de la tercer arquivolta. 

. A Doña Etelvina Fernández pol so escritu - el meyor qu'alcontré al rodiu'l tema : "Las cabezas rostradas. Un tema ornamental en el románico de Villaviciosa". Gracies, Señora. 

. A la Wikipedia, <Asturnatura> ,  < Arteguías.com>, <Asturgeografic> y  <La Xacopedia> eternos colllacios de viaxe. ¿Qué diba ser de min  ensin vós? 

. Al "Blog d'Acebedo" y a Josefina Velasco, archivera-bibliotecaria de la Xunta Xeneral.